Гӧлан

Рʹаст ә чахе мә ширәт йан жи щәза дькьн, дьле мә дешә, ле жь ве еше хьрабтьр әԝ ә чахе әм ширәта ԛәбул накьн у зийане дьстиньн (Ибрн. 12:11). Дина хԝә бьдьнә мәсәла Ԛайин. Чахе Ԛайин дәстпекьр бьре хԝә Һабил нәфрʹәт кә, Хԝәде Ԛайин ширәт кьр у готе: «Тӧ чьма һерс кʹәтийи? У тә чьма сәре хԝә бәржер кьрийә? Һәгәр тӧ рʹастийе бьки, гәло те сәре хԝә бьльнд нәки? Ле ԝәки тӧ рʹастийе нәки ва йә гӧнә ль бәр дери кʹәтийә у хԝәха жи һʹәйра тәда йә, ле бькә кӧ тӧ һʹӧкӧми ль сәр бьки» (Дәстп. 4:6, 7). Ле Ԛайин гьлийед Хԝәде пьшт гӧһе хԝәва авит, у кʹәтә бьн һʹӧкӧме гӧнә. Ԛайин хԝәха ешәкә мәзьн у кӧл-дәрд хԝәрʹа ани (Дәстп. 4:11, 12). Һәрге әԝи гӧһ бьда ширәта Йаһоԝа, ԝе әԝ еш нәдита чь кӧ һе чәтьн бу, нә кӧ еша ширәткьрьне. Йаһоԝа тʹӧ щар нахԝазә әм кӧл-дәрда бькʹьшиньн (Иша. 48:17, 18). Ләма жи ԝәрә әм «гӧһ бьдьнә ширәта» у «сәрԝахт бьн» (Мәтʹлк. 8:33). w18.03 32 ¶18-20

Данийел жь кʹӧ дәрһәԛа Йаһоԝа пеһʹәсийа? Ча те кʹьфше де-баве ԝи жерʹа гьли дькьрьн дәрһәԛа Йаһоԝа, у һин дькьрьн, ԝәки Хԝәде у Хәбәра ԝи һʹьз бькә. Әв һʹьзкьрьн тʹәмамийа әʹмьре ԝи дьле ԝида бу. Әԝи һәла һе әʹмьре хԝәйи мәзьнда жи, Ньвисар кʹур леколин дькьр. Данийел Йаһоԝа рʹьнд нас дькьр. Әԝи заньбу кӧ Йаһоԝа чаԝа бу һьндава щьмәʹта Исраел. Әԝе йәке әм дьвиньн жь дӧайе ԝийи бь дьл, кʹижан кӧ әм Данийел 9:3-19-да дьхуньн. Ԝе керһати бә кӧ әм бьхуньн дәрһәԛа дӧайе ԝи у сәр бьфькьрьн. Бона Щьһуйед амьн, жийина Бабилона пʹутпʹарьстда чәтьн бу. Дина хԝә бьдьн Йаһоԝа чь готә ԝан Щьһуйа: «Әʹдьлайе бьгәрʹьн бона ԝи шәһәри, кʹидәре мьн һун дилти шандьн» (Йерәм. 29:7, ДТʹ). Йәкә әԝи ӧса жи жь ԝана дәԝа дькьр кӧ бь тʹәмамийа дьле хԝә тʹәне ԝи бьһʹәбиньн (Дәркʹ. 34:14). Гәло чь али Данийел кьр кӧ әԝи һәрдӧ дәʹԝакьрьн рʹаст фәʹм кьр у ани сери? Биланийа жь Хԝәде али ԝи кьр кӧ фәʹм кә, ԝәки йа пешьн әԝ гәрәке гӧрʹа Хԝәдеда бә, нә кӧ сәрԝера. Гәләк ԛьрʹнә шунда, Иса жи әв принсип һин кьр (Луԛа 20:25). w18.02 10 ¶11-12

Дьԛәԝьмә һун рʹасти чәтьнайа тен, мәсәлә алийе сьһʹәт-ԛәԝатеда, алийе пʹәрада, йан жи дьбәкә рʹасти пәйкʹәтьна тен. Щара жи дьбәкә хьзмәтийа Йаһоԝада ԝәрʹа чәтьн ә шабуна хԝә хԝәй кьн. Һәрге дәрәща ԝә ӧса нә, мәсәла Нӧһ, Данийел у Ибо дькарә ԝә бьшьдинә. Әԝана һәрсек жи гӧнәкʹар бун у мина мә рʹасти тәнгасийа дьһатьн. Щара һәла һе әʹмьре ԝан жи дькʹәтә бьн ԛәзийе. Ле йәкә ԝана амьнийа хԝә хԝәй кьр, у Хԝәде ԝана һʹәсаб кьр кӧ әԝана баԝәри у гӧһдарийеда мәсәлә нә (Һәзԛл. 14:12-14). Һәзәԛел гьлийед жь рʹеза ве рʹоже сала 612 Б.Д.М. Бабилонйайеда ньвиси (Һәзԛл. 1:1; 8:1). Һьнге, чаԝа һатьбу пʹехәмбәртикьрьне Оршәлим ида незики ԝеранкьрьне бу, у сала 607 Б.Д.М. әԝ пʹехәмбәрти һатә сери. Ԝи ԝәʹдәйи тʹәне һьнә мәрьв хьлаз бун, йед кӧ мина Нӧһ, Данийел у Ибо амьн бун у гӧрʹа Хԝәде дькьрьн (Һәзԛл. 9:1-5). Иро жи ӧса нә, тʹәне әԝ мәрьв йед кӧ Йаһоԝа һʹәсаб дькә ча йед рʹаст у беләкʹә, бенә кʹьфшкьрьне бона хьлазбуне ԝәʹде кʹӧтакьрьна ве дьнйайе (Әʹйан. 7:9, 14). w18.02 3-4 ¶1-3

Һәрге тӧ щаһьл и, пьрсед ӧса бьдә хԝә: «Гәло әз сәва хатре де-баве хԝә хьзмәт дькьм у темә щьвате? Гәло әз һе незики Хԝәде дьбьм у һәләԛәтийа хԝәйә шәхси тʹәви Йаһоԝа ԛәԝи дькьм?» Фәʹмдари йә кӧ нетед рʹӧһʹани бал мә һәр кәси гәрәке һәбьн, нә кӧ тʹәне бал щаһьла. Әв нет ԝе али мә бькьн кӧ рʹӧһʹанийа хԝә ԛәԝи кьн (Ԝаиз 12:13). Чахе әм кемасийа нав хԝәда дьвиньн, әм гәрәке дәрберʹа сәр хԝә бьхәбьтьн у гӧһастьна бькьн. Гәләк фәрз ә ԝәки әм мәрьвнә рʹӧһʹани бьн, чьмки әԝ әʹмьре мәва гьредайи йә (Рʹом. 8:6-8). Ле бьбьнә мәрьвнә рʹӧһʹанида гьһишти, найе һʹәсабе кӧ бекемаси бьн. Фәрз ә әм алийе хԝәда һәр тьшти бькьн сәва рʹӧһʹанида пешда һәрʹьн. Ве йәкеда рʹӧһʹе Йаһоԝайи пироз дькарә али мә бькә. Хԝәндьна Кʹьтеба Пироз һʹәԝас ә, ле бона мә әԝ гәрәке ча мьжулбун нибә. Әм гәрәке кʹур леколин бькьн сәва кӧ хьзнед рʹӧһʹани бьвиньн кʹижан кӧ ԝе кери мә бен. w18.02 25 ¶10-11

Сәва кӧ мәрьв хԝә тʹәсмили Хԝәде кә у бе ньхӧмандьне, әʹсәйи нинә әԝ һәр тьшти һур бь һур бьзаньбә. Йәкә паши ньхӧмандьне жи һʹәму шагьрт гәрәке занәбуна хԝә зедә кьн (Колс. 1:9, 10). Ле гәло чьԛас занәбуна мәрьв гәрәке һәбә сәва бе ньхӧмандьне? Сәрһатийа малбәтәкә ԛьрʹна йәке, дькарә иро али мә бькә (Кʹар. Шанд. 16:25-33). Паԝлос ԝәʹде рʹеԝитийа хԝәйә дӧда, незики сала 50 Д.М., тʹәсәлийа Филипйайе кьр. Чахе әԝ ԝедәре бу, тʹәви Силас һатә гьртьне у кʹәтә кәле. Шәв, ньшкева әʹрд ԛайим һʹәжийа у һʹәму дәред кәле вәбун. Сәрԝере кәле тьрсийа кӧ гьрти ԝе бьрʹәвьн у дьхԝәст хԝә бькӧшта, ле Паԝлос ԝи да сәкьнандьне. Паше Паԝлос тʹәви Силас дәрһәԛа Иса шәʹдәти да ԝи у малбәта ԝи. Әԝе малбәте рʹастийа кӧ пеһʹәсийан ԛәбул кьрьн у ԛимәт кьрьн. Бь ԝе йәке әԝана һелан бун у перʹа-перʹа һатьнә ньхӧмандьне. w18.03 10 ¶7-8

Йаһоԝа Хԝәдейе бәхтәԝар ә, у щьмәʹта ԝи жи бәхтәԝар ә. Хьзмәткʹаред Йаһоԝа мина мәрьвед хԝәһʹьз ниньн, йед кӧ тʹәне кʹара хԝә дьгәрʹьн, ле әԝана шабуне дьстиньн чьмки бона мәрьвед дьн хәм дькьн (Кʹар. Шанд. 20:35; 2 Тимтʹ. 3:2). Ле ча әм дькарьн тедәрхьн кӧ әм гәләк хԝәһʹьз дьбьн у һʹьзкьрьна мә һьндава Хԝәде сьст дьбә? Дина хԝә бьдьн кӧ чь те готьне Филипи 2:3, 4-да: «Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә. Тʹәне ль кʹара хԝә нәгәрьн, ле бьра һәр кәс ль кʹара һәвале хԝә жи бьгәрʹә». Ԝе керһати бә әм пьрсед ӧса бьдьнә хԝә: «Гәло әз әве ширәте әʹмьре хԝәда дьдьмә хәбате? Гәло әз мәщала дьгәрʹьм сәва али мәрьва бькьм, чаԝа щьватеда ӧса жи хьзмәтийеда?» Һеса нинә тʹьме ԝәʹдә у ԛәԝата хԝә сәр мәрьвед дьн хәрщ кьн, ләма жи лазьм ә әм хԝә һьнәки бьдьнә щәфе у тьштәки жь хԝә кем кьн. Тʹӧ тьшт ӧса мә бәхтәԝар накә, чаԝа занәбуна ве йәке кӧ Хԝәдейе Һәри Жорьн мә ԛәбул дькә. w18.01 23 ¶6-7

Чаԝа ве йәке бькьн? Баԝәрийа хԝә бьщерʹьбиньн. Ԝе баш бә пьрсед ӧса бьдьнә хԝә: «Гәло әз бь рʹастийе баԝәр дькьм кӧ әз нава ве тʹәшкиләтеда мә, бь сайа кʹижани Йаһоԝа ԛьрара хԝә тинә сери? Гәло әз һәр тьшти дькьм сәва мьзгинийе бәла кьм у мәрьва һин кьм? Гәло пе кьред мьн те кʹьфше ԝәки әз баԝәр дькьм кӧ рʹожед ахьрийеда дьжим, у кӧ хьлазийа һʹӧкӧме Шәйтʹан незик ә? Гәло әз иро жи ԛайим итʹбарийа хԝә Йаһоԝа у Иса тиньм, чаԝа дәстпека хьзмәтийа хԝә Хԝәдерʹа?» (Мәт. 24:14; 2 Тимтʹ. 3:1; Ибрн. 3:14). Һәрге әм сәр пьрсед ԝи щурʹәйи бьфькьрьн, әԝ йәк ԝе али мә бькә кӧ дьле хԝә бьщерʹьбиньн. Диса ча һун дькарьн хԝә һазьр кьн бона рʹожа Биранине? Бьхуньн готаред дәрһәԛа Евара Биранине, у бьфькьрьн сәр (Йуһʹн. 3:16; 17:3). Жийина һʹәта-һʹәтайе әм дькарьн тʹәне һьнге бьстиньн, һәрге Йаһоԝа «нас кьн», у баԝәрийа хԝә Иса биньн, демәк Кӧрʹе Ԝийи тайе тʹәне. Сәва хԝә бона Биранине һазьр кьн, һун дькарьн хԝәрʹа готара бьжберьн сәва леколинкьрьне, кʹижан кӧ али ԝә бькьн һе незики Йаһоԝа у Иса бьн. w18.01 13 ¶5-6

Чахе әм Кʹьтеба Пироз у әʹдәбйәтед мә дьхуньн, у ӧса жи тенә щьвата, әм педьһʹәсьн дәрһәԛа гәләк сәрһатийа кӧ чаԝа Хԝәде али хьзмәткʹаред хԝә кьрийә, ԝәки жерʹа амьн бьминьн. Чахе тӧ рʹӧһʹанида мәзьн би, тӧ ида хԝәха гәрәке бьвини, кӧ Йаһоԝа ча хут али тә дькә. Ле тә әʹмьре хԝәда сәр хԝә тʹәхмин кьрийә ԛәнщийа Йаһоԝа? Һәр Мәсиһи ԛәнщийа Йаһоԝа һьндава хԝә дитийә. Хԝәде мә һәр кәс незики хԝә у Кӧрʹе хԝә кьрийә. Дьбәкә тӧ ӧса дьфькьри: «Йаһоԝа де-баве мьн незики хԝә кьрийә, у әз жи пәй ԝан дьчьм». Ле бир нәкә, кӧ чахе тә хԝә тʹәсмили Йаһоԝа кьр у һати ньхӧмандьне, һьнгева һәләԛәтийа тә тʹәви Йаһоԝа дәстпебу, чь кӧ ԛәдьрәки гәләк мәзьн ә. Кʹьтеба Пироз мәрʹа дьбежә: «Һәгәр йәк Хԝәде һʹьз дькә, әԝ жь алийе ԝива наскьри йә» (1 Корн. 8:3). Тʹьме ԛимәт кә у бьшекьринә щийе хԝә тʹәшкиләта Йаһоԝада. w17.12 26 ¶12-13

Хәбәра «ширәткьрьн» дьбәкә бона ԝә тʹәне щәзакьрьн те һʹәсабе, ле әԝ һе зедә йә. Кʹьтеба Пироз дьбежә, ԝәки ширәткьрьн тʹьме бона кʹара мә йә, у гәләк щар Кʹьтеба Пирозда тʹәви хәбәра ширәткьрьн ньвисар ә хәбәред занәбун, билани, һʹьзкьрьн у әʹмьр (Мәтʹлк. 1:2-7; 4:11-13). Гәло чьрʹа? Чьмки ширәткьрьна Хԝәде әʹйан дькә һʹьзкьрьна ԝи һьндава мә у хԝәстьна ԝи, кӧ әм һʹәта-һʹәтайе бьжин (Ибрн. 12:6). Рʹаст ә щара щәза жи дькʹәвә нава ширәткьрьна ԝи, ле йәкә әԝ тʹӧ щар сәрт у берʹәʹм щәза накә. Бь рʹасти хәбәра ширәткьрьн һʹәчʹи зәʹф те һʹәсабе һинкьрьн, мәсәлә чахе де йан бав зарʹа хԝәйә һʹьзкьри мәзьн дькә у һин дькә. Әм Мәсиһи, нәфәред «мала Хԝәде» нә (1 Тимтʹ. 3:15). Әм заньн кӧ изьна Йаһоԝа һәйә принсипа дайнә. Ле чахе әм принсипед ԝи найньн сери, әԝ мә бь һʹьзкьрьн ширәт дькә у рʹаст дькә. Ӧса жи, чахе әм жь кьред хԝә ахьрийа хьраб дьстиньн, ширәткьрьна Йаһоԝа дькарә бинә бира мә, ԝәки чьԛас фәрз ә гӧрʹа Баве хԝәйи әʹзманада бьн (Галт. 6:7). w18.03 23 ¶1; 24 ¶3

Һәрге тӧ щаһьл и, дьбәкә дьфькьри кӧ де-баве тә, тә фәʹм накьн йан жи тʹәви тә гәләк сәрт ьн. Әв йәк дькарә тә ӧса дьлтәнг кә, ԝәки һәла һе жи дӧдьли би кӧ хьзмәти Йаһоԝарʹа рʹийа лапә баш ә. Ле һәрге тӧ Йаһоԝа бьһели, ахьрийеда тӧйе пʹошман би, чьмки тӧйе фәʹм ки кӧ тʹӧ кәс ӧса ԛайим тә һʹьз накә у бона тә хәм накә, чаԝа де-баве тә у щьвата тә. Һәрге де-баве тә ԛә тә ширәт нәкьн, тӧйе бьфькьри кӧ әԝана тә һʹьз дькьн у хәм дькьн бона тә? (Ибрн. 12:8). Дьԛәԝьмә тә хԝәш найе кӧ әԝана ча тә ширәт дькьн, у ләма тӧ бина хԝә тәнг дьки. Ле ԝе баш бә һәрге тӧ дина хԝә бьди сәр мәʹнийа ширәткьрьна ԝан, нә кӧ сәр щурʹе ширәткьрьне. Дьле хԝә фьрә кә у чьԛас дькари һерс нәкʹәвә гава әԝана тә ширәт дькьн. Нете дайнә пешийа хԝә кӧ гьһишти би сәва ширәта һеса ԛәбул ки, кʹаре жь ԝан бьстини у бәрхԝә нәкʹәви кӧ чаԝа ширәт тенә дайине (Мәтʹлк. 1:8). w17.11 29 ¶16-17

Дьбәкә һун бәрхԝә дькʹәвьн, чьмки дьԛәԝьмә һун һьнә щаһьла дьвиньн, йед кӧ һатьнә ньхӧмандьне, ле паше дӧдьли дьбьн кӧ принсипед Хԝәде бона кʹара ԝан ьн. Гәләк жь ԝан щаһьла һәла һе жи жь рʹийа рʹаст дәрдькʹәвьн. Ләма жи дьбәкә һун бәрхԝә дькʹәвьн кӧ чахе зарʹа ԝә дәстпекә Йаһоԝарʹа хьзмәт кә, паше бе гӧһастьне у һʹьзкьрьна хԝәйә пешийе ӧнда кә. Де-бавно ча һун дькарьн али зарʹед хԝә бькьн, ԝәки һʹьзкьрьна хԝә ӧнда нәкьн у «хьлазбунерʹа мәзьн бьн»? (1 Пәт. 2:2). Щаб әм дьвиньн гьлийед Паԝлосда кӧ әԝи Тимотʹейорʹа ньвиси: «Нава ԝан тьштада бьминә, чь кӧ һин буйи у чьда избат буйи. Тӧ зани жь кʹижана һин буйи, ӧса жи тӧ жь зарʹотийа хԝәда ньвисаред пироз [Ньвисаред Ибрани] зани, йед кӧ дькарьн тә сәрԝахт кьн, ԝәки бь баԝәрийа сәр Мәсиһ Иса хьлаз би» (2 Тимтʹ. 3:14, 15, ДТʹ). Дина хԝә бьдьне, Паԝлос гот ԝәки Тимотʹейо 1) ньвисаред пироз заньбу, 2) чь кӧ һин буйә, ԝан тьштада избат буйә, у 3) дькарә сәрԝахт бә ԝәки бь баԝәрийа сәр Мәсиһ Иса хьлаз бә. w17.12 18-19 ¶2-3

Гәләк религийа дәрһәԛа щәʹньме һин дькьн, пьштгьрийа политике дькьн йан жи жь мәрьва пʹәра тʹоп дькьн, у бь ԝе йәке мәрьва жь Хԝәде дур дьхьн. Ләма жи ида һе зедә мәрьв дьфькьрьн кӧ бей религийа әԝана һе бәхтәԝар ьн. Бей дине ԛәлп мәрьв дькарә бәхтәԝар бьжи, ле мәрьв бь тʹәмами нькарә бәхтәԝар бә, һʹәта нәбә досте Йаһоԝа, йе кӧ «Хԝәдейе хԝәзьли» йә (1 Тимтʹ. 1:11). Һәр тьшт чь жи Хԝәде дькә бона кʹара мәрьва йә, у хьзмәткʹаред ԝи жи гәләк бәхтәԝар ьн чахе чʹәʹв дьдьнә ԝи у аликʹарийе дьдьнә мәрьва (Кʹар. Шанд. 20:35). Бәʹса хәбәре, дина хԝә бьдьн кӧ һʹәбандьна рʹаст чаԝа дькарә али малбәте бькә кӧ бәхтәԝар бә. Һʹәбандьна рʹаст мә һин дькә кӧ ԛәдьре кʹӧлфәт у малхе хԝә бьгьрьн, сонда зәԝаще пироз һʹәсаб кьн, бенамусийе нәкьн, зарʹа мәзьн кьн кӧ мәʹрифәт бьн, у һʹьзкьрьна һʹәлал малбәтеда бьдьнә кʹьфше. Рʹасти жи бь сайа һʹәбандьна рʹаст мәрьв щьватада у бьратийа һʹәмдьнйайеда бәхтәԝар ьн у йәктийеда ньн. w17.11 21 ¶6-7

Гәләк хьзмәткʹаред Хԝәде ӧса хԝә тʹәхмин дькьн чаԝа Паԝлос гот. Гәло чьрʹа? Чьмки әм гьшк гӧнәкʹар ьн у шашийа дькьн. У чахе әм щара пе кьред хԝә дьле Йаһоԝа дешиньн, әм дьлтәнг дьбьн. Һьнә Мәсиһи йед кӧ гӧне гьран кьрьнә, һәла һе жи дьфькьрьн кӧ Йаһоԝа ԝе тʹӧ щар ԝана нәбахшинә. Кʹьтеба Пироз мәрʹа дьбежә ԝәки әԝед кӧ бал Йаһоԝа сьтʹаре дьгәрʹьн, гәрәке сәва гӧнед хԝә һәр гав хԝә нәһәԛ нәкьн у нәчәрчьриньн (Зәб. 34:22). Чахе Паԝлос гот кӧ әԝ хԝә чьԛас һесир-бәләнгаз тʹәхмин дькә, паше гот: «Шькьр жь Хԝәдерʹа, бь сайа Хӧдане мә Иса Мәсиһ!» (Рʹом. 7:25). Рʹаст ә әԝи шәрʹ дькьр мьԛабьли гӧнә у пʹошман дьбу бона кьред хԝәйи бәре, ле йәкә әԝ баԝәр бу кӧ Хԝәде бь сайа Иса ԝи бахшандийә. Иса бона мә әʹмьре хԝә да ча кʹьрʹин, у әԝ исафа тʹәмьз у дьлрʹьһʹәтийе дьдә мә (Ибрн. 9:13, 14). Чаԝа Сәрәккʹаһин, «әԝ һәр гав дькарә ԝан хьлаз кә, йед кӧ бь дәсте ԝи незики Хԝәде дьбьн, чьмки әԝ тʹьме сах ә, кӧ бона ԝан лава-навчетийе бькә» (Ибрн. 7:24, 25). w17.11 8 ¶1-2; 12 ¶15

Ча әм дькарьн ль гора сонда хԝәйә тʹәсмилбуйине бьжин? Әм гәрәке ԝәʹде щерʹьбандьнед мәзьн у бьчʹук жи бьдьнә кʹьфше, кӧ әм хԝәйе сонда хԝә нә, у «һәр рʹож» ве йәке избат кьн (Зәб. 61:8). Бәʹса хәбәре, һәрге хәбатеда йан жи мәкʹтәбеда тʹәви мә флирте дькьн, әм ча хԝә дьдьнә кʹьфше? Гәло һьнге «чʹәʹве мә сәр рʹийа» Йаһоԝа йә? Гәло әм дьрʹәвьн жь тʹәлькед ԝи щурʹәйи? (Мәтʹлк. 23:26). Йан жи һәрге малда тʹәне әм Шәʹде Йаһоԝа нә, гәло әм жь Йаһоԝа аликʹарийе дьхԝазьн сәва рʹаст хԝә бьдьнә кʹьфше? Гәло әм һәр рʹож Баве хԝәйи әзманарʹа дӧа дькьн, у рʹази нә кӧ әԝ мә һʹьз дькә у әм кьрьнә бьн пʹәрʹе хԝә? Гәло әм ԝәʹдә хԝәрʹа дьвиньн сәва Кʹьтеба Пироз һәр рʹож бьхуньн? Чахе мә хԝә тʹәсмили ԝи кьр, дькарьн бежьн кӧ мә жерʹа соз да ԝәки әме ван тьшта жи бькьн, ӧса нинә? Чахе әм гӧрʹа ԝи дькьн, әм дьдьнә кʹьфше кӧ ԝи һʹьз дькьн у кӧ мә бь рʹастийе хԝә тʹәсмили ԝи кьрийә. Әм бе һʹәмде хԝә Хԝәдерʹа хьзмәт накьн, ле әԝ щурʹе жийина мә йә. w17.10 23 ¶11-12

Мәрьвәки навдар кӧ кʹьлама дьньвисә, гот: «Бь сайа хәбәра, һʹьше мәда фькьр пешда тен. Бь сайа мьԛаме, дьле мәда һәст пешда тен. Ле бь сайа кʹьламе, һәрдӧ тʹәвайи пешда тен у хәбәр дьгьһижьнә дьла». Пе кʹьлама әм пәсьна дьдьнә Йаһоԝа у һʹьзкьрьна хԝә жерʹа әʹйан дькьн. Рʹасти жи чьԛас хԝәш ә гава әм бона ԝи дьстьрен у һе незики ԝи дьбьн! Фьрԛи тʹӧнә әм тʹәне дьстьрен йан тʹәви хушк-бьред хԝә, йәкә тʹьме кʹьлам хьзмәткьрьна Хԝәдеда щийе фәрз дьгьрә. Ле һун щьватеда бь дәнге бьльнд дьстьрен, йан шәрм дькьн? Нав һьнә мьләтада мер шәрм дькьн бәр мәрьвед дьн бьстьрен. Әԝ йәк дькарә сәр тʹәмамийа щьвате жи һʹӧкӧм кә, илаһи һәрге рʹуспи шәрм дькьн бьстьрен, йан жи чахе щьват кʹьлама дьстьре, ле әԝана шьхӧлед дьн дькьн (Зәб. 30:12). Һәрге әм бь рʹастийе стьрандьна кʹьлама һʹәсаб дькьн ча пʹара хьзмәтийа хԝә, щьватеда ԝәʹде кʹьлама әме нәчьн-нәйен. w17.11 3 ¶1-3

Әм гьшк жи дьхԝазьн бей чәтьнайа у хәма әʹдьлайеда бьжин. Әм гәләк рʹази нә жь Йаһоԝа, кӧ әԝ «әʹдьлайийа Хԝәде» дьдә мә. Әв әʹдьлайи али мә дькә, ԝәки әм гәләк хәмгин нәбьн у дьлрʹьһʹәт бьн (Фили. 4:6, 7). Хенщи ве йәке, «әʹдьлайийа мә тʹәви Хԝәде» һәйә, демәк һәләԛәтийа баш тʹәви ԝи, чьмки мә хԝә тʹәсмили ԝи кьрийә (Рʹом. 5:1). Ле ньһа һе әԝ ԝәʹдә нәһатийә кӧ Хԝәде бь тʹәмами әʹдьлайе бинә сәр әʹрде. Әм дьжин рʹожед ахьрийеда, демәк ԝи ԝәʹдәйи чахе гәләк шәрʹ-дәʹԝ һәнә у чьԛас дьчә мәрьв хьраб дьбьн (2 Тимтʹ. 3:1-4). Һьн жи әм Мәсиһи мьԛабьли Шәйтʹан у һинкьрьнед ԝийә ԛәлп шәрʹ дькьн (2 Корн. 10:4, 5). Ле йа лапә хьраб әԝ ә, кӧ щара әʹдьлайа мә хьраб дьбә тʹәви нәфәред мә у мәрьвед мәйи незик, чьмки әм Шәʹдед Йаһоԝа нә. Дьбәкә һьнәк жь ԝан мә дькʹәньн сәва баԝәрийа мә, йан жи мә нәһәԛ дькьн кӧ әм малбәте һәв дьԛәтиньн, йан жи мә дьтьрсиньн кӧ һәрге әм баԝәрийа хԝә нәһельн, әԝана ԝе мә ида ԛәбул нәкьн. w17.10 12 ¶1-2

Гӧһастьнед зьманада ӧса жи һʹӧкӧм бун сәр зьманед кӧ Кʹьтеба Пироз һатә ԝәлгәрʹандьне. Ԝәлгәрʹандьна Кʹьтеба Пироз кӧ бәре фәʹмдари бу, ԝәʹдә дәрбаз дьбу ида чәтьн дьһатә фәʹмкьрьне. Дина хԝә бьдьнә сәр ԝәлгәрʹандьнәкә Кʹьтеба Пироз сәр зьмане Инглизи. Ԝәлгәрʹандьна «Версиа Аԛубе Пʹадша» йа пешийе бу кӧ сала 1611-да һатә дәрхьстьне («King Jamеs Vеrsion»). Нава ԝәлгәрʹандьнед Кʹьтеба Пироз сәр зьмане Инглизи, әԝ йа лапә бәлабуйи бу. Рʹаст ә һьнге «Версиа Аԛубе Пʹадша» ԝәлгәрʹандьнәкә баш бу, ле ԛьрʹнә дәрбаз бун у әв ида чәтьн дьһатә фәʹмкьрьне, чьмки хәбәр у гьлийед ве ԝәлгәрʹандьнеда, щьмәʹте ида нәдьда хәбате. Ԝәлгәрʹандьнед Кʹьтеба Пироз йед бәре, сәр зьманед дьн жи чәтьн тенә фәʹмкьрьне. Ле әм гәләк рʹази нә ԝәки «Ԝәлгәрʹандьна Дьнйа Тʹәзә йа Ньвисаред Пироз» бал мә һәйә, кʹижан кӧ бь зьмане иройин һатийә ԝәлгәрʹандьне. Әв ԝәлгәрʹандьн бь тʹәмами йан жи бь пʹар сәр 150 зьмана зедәтьр һәйә, демәк нав тʹәмамийа дьнйайе һʹәчʹи зәʹф мәрьв дькарьн әве ԝәлгәрʹандьне бьхуньн. Әв ԝәлгәрʹандьна һеса аликʹарийе дьдә ԝәки әʹламәтийа жь Хәбәра Хԝәде бьгьһижә дьле мә. w17.09 19 ¶5-6

Щаһьлед Мәсиһи сафикьрьнед фәрз гәрәке бькьн. Ԝанрʹа мерхаси лазьм ә сәва сафи кьн тʹәви кʹе һәвалтийе бькьн, чаԝа намусийеда хԝә хԝәй кьн, ча ԝәʹде хԝә рʹаст дәрбаз кьн, у бенә ньхӧмандьне. Бәле, мерхаси ԝанрʹа әʹсә лазьм ә сәва кӧ дьле Шәйтʹан ша нәкьн, кʹижан кӧ ԛәрфа Хԝәде дькә. Сафикьрьна фәрз кӧ щаһьл гәрәке бькьн, әԝ ә кӧ кʹижан нета дайньн пешийа хԝә. Һьнә ԝәлатада йед щаһьл тенә һеланкьрьне кӧ нетед ӧса дайньн пешийа хԝә ԝәки хԝәндьна бьльнд бьстиньн у щийе башда бьхәбьтьн сәва пʹәре мәзьн бьстиньн. Һьнә ԝәлатада жи жь бо економика нәбаш, щаһьл дьфькьрьн кӧ йа лапә фәрз әԝ ә ԝәки бьхәбьтьн сәва әʹбура малбәта хԝә бькьн. Йаһоԝа ԝе ԝан щаһьла кʹәрәм кә, йед кӧ бь мерхаси нетед рʹӧһʹани датиньн пешийа хԝә у шьхӧле Пʹадшатийе әʹмьре хԝәда датиньн щийе пешьн. Йаһоԝа ԝе әʹсә али ԝан бькә сәва әԝана мьԛати малбәтед хԝә бьн. Ԛьрʹна йәкеда, Тимотʹейойе щаһьл нетед рʹӧһʹани дьда пешийа хԝә, у һун жи дькарьн ӧса бькьн (Фили. 2:19-22). w17.09 29-30 ¶10-12

Хԝәндьна Кʹьтеба Пироз у фькьрандьна сәр дькарә али мә бькә ԝәки хԝәгьрти бьн. Ле чь щурʹәйи? Жь сәрһатийед Кʹьтеба Пироз әшкәрә те кʹьфше кӧ чьԛас кʹар ә чахе хԝәгьртьна мә һәйә, ле чахе тʹӧнә йә чьԛас зийане тинә. Йаһоԝа әԝ сәрһати бадиһәԝа нәдайә ньвисаре, ле нета ԝи һәбу (Рʹом. 15:4). Ләма жи ԝе аԛьлайи бә һәрге әм бьхуньн әԝан сәрһатийа, сәр бьфькьрьн у леколин бькьн! Кʹур бьфькьрьн кӧ чь дәрсе һун дькарьн бона хԝә у малбәта хԝә һин бьн. Жь Йаһоԝа аликʹарийе бьхԝазьн сәва кӧ һун ширәтед жь Хәбәра ԝи биньн сери. Һәрге һун тʹәхмин дькьн кӧ тьштәкида хԝәгьртьна ԝә кем ә, һʹәлал биньн сәр хԝә. Паше дӧа бькьн бона ве йәке, у бьфькьрьн кӧ һун ча дькарьн һе зедә хԝәгьрти бьн (Аԛуб 1:5). Әʹдәбйәтед мә леколин бькьн, ԝәки ширәта бьвиньн йед кӧ дькарьн али ԝә бькьн. w17.09 6 ¶15-16

«Мәрьве ну» ль гора ԛьрара Хԝәде хӧльԛанди йә. Ле гәло әм дькарьн бьбьнә мәрьвед ӧса? Бәле, чьмки Йаһоԝа мәрьв дьлԛе хԝәда әʹфьранд у ләма жи әм дькарьн чʹәʹв бьдьнә һʹӧнӧред ԝи (Дәстп. 1:26, 27; Әфәс. 5:1). Паԝлос дәрһәԛа хәйсәтәки мәрьве ну гот, кʹижан кӧ гәләк фәрз ә. Мәрьве ну фьрԛийе накә ортʹа мәрьва. Паԝлос гот: «Иди Йунани у Щьһу, сьнәткьри у сьнәтнәкьри, Искит у һовед дьн, хӧлам у азад тʹӧнә». Щьватеда тʹӧ щар гәрәке фьрԛи тʹӧнә бә ортʹа раса, мьләта йан жи кʹәсиба у дәԝләтийа. Гәло чьрʹа? Чьмки әм ча шагьртед Мәсиһ «һʹәму жи йәк ьн» (Колс. 3:11, ИМ; Галт. 3:28). Әԝед кӧ мәрьве ну ль сәр хԝә кьрьнә, тʹәви һʹәмуйа демәк тʹәви хушк-бьра у нәбаԝәра бь ԛәдьр ьн, у тӧ щар фьрԛийе накьнә ортʹа мьләта у раса, ӧса жи кʹәсиба у дәԝләтийа (Рʹом. 2:11). w17.08 22 ¶1; 23 ¶3-4

Йаһоԝа жь мә нахԝазә тьштәки ӧса, чь кӧ әԝ хԝәха накә. Әԝ хԝәха гәләк сәбьр дькә, у ве йәкеда әԝи мәрʹа мәсәла мәзьн һиштийә (2 Пәт. 3:9). Йаһоԝа ида бь һʹәзара сала һивийе йә, һʹәта сафи бә әԝ шәрʹе кӧ Әдәнеда авитьнә ԝи. Әԝ бь сәбьр һивийа ԝи ԝәʹдәйи йә чахе наве ԝи бь тʹәмами бе пирозкьрьне. Гава әв ԝәʹдә бе, мәрьвед кӧ бь дьл һивийа ԝи нә, ԝе кʹәрәмед мәзьн бьстиньн (Иша. 30:18). Иса жи сәбьр дькә у һивийе йә. Чахе әԝ сәр әʹрде бу, әԝ һʹәта мьрьне Йаһоԝарʹа амьн ма, у сала 33 Д.М.-да әʹмьре хԝә да ԛӧрбан у чу ль әʹзмана. У паше әԝ һʹәта сала 1914 һивийе бу сәва пʹадшатийа хԝә дәстпекә (Кʹар. Шанд. 2:33-35; Ибрн. 10:12, 13). Иса ньһа жи һивийе йә һʹәта кӧ һʹәму дьжмьнед ԝи ԛьрʹ бьн паши хьлазийа Һʹәзарсалийа Пʹадшатийа ԝи (1 Корн. 15:25). Ле әԝ йәк ԝе кʹәрәмед мәзьн бинә. w17.08 7 ¶16-17

Хушкәкә мә бь наве Сузи гот: «Паши мьрьна кӧрʹе мә, ԝәкә саләке мә ешәкә гәләк гьран дькʹьшанд». Бьраки мә жи гьли кьр, кӧ чахе жьна ԝи ньшкева мьр, әԝи «еша физикийә әʹщеб гьран дькʹьшанд». Сәд һʹәйф, иро гәләк мәрьв рʹасти дәрде ӧса гьран тен. У иро гәләк Мәсиһи жи һивийе нибун кӧ мәрьве ԝани незик ԝе бьмьрә. Дьԛәԝьмә мәрьве ԝәйи незик мьрийә, йан жи мәрьве ԝи кʹе һун нас дькьн. Дьбәкә һун хԝәрʹа дьфькьрьн: «Кәсе кӧ мәрьве хԝә ӧнда кьрийә, ча дькарә бәр дәрдәки ӧса гьран тәйах кә у бәрдьлийе бьстинә?» Дьԛәԝьмә ԝә бьһистийә кӧ ԝәʹдә бьрина дьл ԛәнщ дькә. Ле гәло рʹасти ӧса нә, кӧ ԝәʹдә дәрбаз бә у еша дьл ԝе хԝәха ԛәнщ бә? Жьнәбике гот: «Һе рʹаст ә бежьн ԝәки чахе кәсәк ԝәʹде хԝә хәрщ дькә сәва али йед дьн бькә, әԝ ԝәʹдә бьрине дьл ԛәнщ дькә». Бәле, чаԝа бьринәкә бәдәнерʹа ԝәʹдә у дәрманкьрьн лазьм ә сәва ԛәнщ бә, ӧса жи бьринед дьлрʹа ԝәʹдә у бәрдьли лазьм ә. w17.07 12-13 ¶1-3

Гәло Йаһоԝа чь ширәте дьдә ԝә, демәк һун дькарьн кʹижан нета дайньн пешийа хԝә? Сәва кӧ һун бәхтәԝар бьн, лазьм ә һун Йаһоԝа нас кьн у жерʹа хьзмәт кьн, чьмки әԝи әм ӧса чекьрьнә (Зәб. 128:1; Мәт. 5:3). Һʹәйԝан тʹәне дьхԝьн, вәдьхԝьн, дьтәрькьн у дьзен, ле нет-мәрәмед ԝан тʹӧнә. Ле мәрьв ӧса нәһатьнә чекьрьне. У Хԝәде дьхԝазә ԝәки һун, щаһьлно, әʹмьрда нета дайньн пешийа хԝә у бәхтәԝар бьжин. Әʹфьрандаре ԝә «Хԝәдейе һʹьзкьрьне», «Хԝәдейе хԝәзьли» йә, йе кӧ мәрьв «дьлԛе хԝәда хӧльԛанд» (2 Корн. 13:11; 1 Тимтʹ. 1:11; Дәстп. 1:27). У чахе һун чʹәʹв бьдьнә Хԝәдейе мәйи һʹьзкьрьне, һуне бәхтәԝар бьн. Дьԛәԝьмә ԝә хԝәха дитийә кӧ чьԛас шабуне тинә әв йәк чь кӧ Кʹьтеба Пироз дьбежә: «Хԝәзи ль дайийа, нә кӧ ль стандийа» (Кʹар. Шанд. 20:35). Әԝ гьли рʹаст ьн. Ләма жи Йаһоԝа дьхԝазә һун әʹмьре хԝәда нетед ӧса дайньн пешийа хԝә, кʹижан кӧ ԝе һʹьзкьрьне бьдьнә кʹьфше һьндава мәрьва у һьндава Хԝәде (Мәт. 22:36-39). w17.07 23 ¶3

Хԝәде һьндава хьзмәткʹаред хԝә бь ԛәдьр ә. Әԝ занә мәрʹа чь лазьм ә у һе баш мә хԝәй дькә, нә кӧ әм хԝәха. Рʹаст ә Йаһоԝа тʹәмамийа щьмәʹта хԝә һʹьз дькә, ле әԝ ӧса жи бона һәр мәрьвәки башԛә-башԛә хәм дькә. Биньн бира хԝә сәрһатике кӧ бәре ԛәԝьми. Нава се ԛьрʹнада, Йаһоԝа бь сайа һʹакьма рʹебәри щьмәʹта хԝә дькьр, у али ԝан дькьр ԝәки шәрʹада дьжмьнед хԝә алт кьн. Ԝи ԝәʹде һәвкʹәтида, Йаһоԝа дина хԝә дьда сәр һәр мәрьвәки. Йәк жь ԝан Рʹутʹ бу, йа кӧ Исраели нибу, ле гәләк тьшт ԛӧрбан кьр ԝәки бьбә хьзмәткʹаре Йаһоԝа. Йаһоԝа сәва ве йәке ле кʹәрәм кьр, у әԝе мерәки баш станд у кӧрʹ жерʹа бу. Һьн жи кӧрʹе ԝе бу пʹара ве рʹькʹьнйате, жь кʹижани гәрәке Мәсиһ бьһата. Хенщи ве йәке, сәрһатийа ԝе Кʹьтеба Пирозда һатә ньвисаре. Бьдьнә бәр чʹәʹве хԝә, кӧ чахе әԝ жь мьрьне рʹабә у әԝан тьшта пебьһʹәсә, ԝе чьԛас ша бә кӧ Йаһоԝа ча ле кʹәрәм кьрийә! (Рʹутʹ 4:13; Мәт. 1:5, 16). w17.06 28-29 ¶8-9

Сала 1970 бьраки мә, бь наве Питер, кӧ 19 сали бу, тʹәзә дәстпекьр Бәйтʹәла Британйайеда хьзмәт кә. Щарәке әԝи мал бь мал хьзмәт дькьр у рʹасти мерәки ԝәкә 50 сали һат, рʹуйе кʹижани бәрдайи бу. Питер жь ԝи мерьки пьрси кӧ гәло әԝ нахԝазә Кʹьтеба Пироз фәʹм бькә. Питер әʹщебмайи ма чахе әԝи мерьки жерʹа гот ԝәки әԝ мамостайе Щьһу йә. Әԝи мерьки дьхԝәст Питер бьщерʹьбинә, у пьрсәкә ӧса да ԝи: «Ижа кӧрʹе мьн, һәла бежә кʹьтеба Данийел сәр кʹижан зьмани һатә ньвисаре?» Питер щаба хԝә да: «Пʹарәкә ве кʹьтебе сәр зьмане Арамайи һатә ньвисаре» (Дан. 2:4). Питер тинә бира хԝә: «Әԝ мамоста әʹщебмайи ма кӧ мьн щаба ве пьрсе заньбу, ле әз хԝәха жь ԝи зедәтьр әʹщебмайи мам! Ле мьн жь кӧ заньбу щаба ԝе пьрсе? Чахе әз һатьм мале мьн журналед «Бьрща Ԛәрәԝьлийе» у «Һʹьшйар бьн!», йед ԝан пашԝәхтийа гәрийа у мьн готарәк дит кʹидәре кӧ дьһатә шьровәкьрьне ԝәки кʹьтеба Данийел сәр зьмане Арамайи һатийә ньвисаре». Бәле, рʹӧһʹе пироз дькарә бинә бира мә ԝан тьшта, чь кӧ мә бәре хԝәндийә (Луԛа 12:11, 12; 21:13-15). w17.06 13 ¶17

Жьн-мер рʹасти щурʹә-щурʹә чәтьнайа тен. Мәсәлә, чахе жьн гьран дәрте, рʹаст ә әԝана һәрдӧ жи ша дьбьн, ле ӧса жи мәʹни һәнә кӧ әԝана бәрхԝә дькʹәвьн. Бәса хәбәре, әԝана хәм дькьн кӧ гьрани ԝе ча дәрбаз бә, ԝәки зарʹ сах-сьламәт бе буйине. Хенщи ве йәке, әԝана заньн ԝәки хәрще ԝан ԝе зедә бә. Ле чахе зарʹ те буйине, диса хәм зедә дьбьн. Де ида тʹәмамийа ԝәʹде хԝә сәр зарʹе хәрщ дькә у мьԛати ԝи дьбә. Ләма жи дьбәкә ԝәʹде ԝе бона мере ԝе һьндьк дьминә, у жь бо ве йәке мер хԝә тʹәне тʹәхмин дькә. Һьн жи һе зедә шьхӧл дькʹәвә стуйе мер кӧ тʹәзә буйә бав. Әԝ ида гәрәке мьԛати жьн-зарʹа хԝә бә, у һʹәԝщед ԝан рʹази кә. Жьн-мер диса рʹасти һьнә чәтьнайед дьн тен. Мәсәлә, һәрге әԝана бь дьл у щан дьхԝазьн зарʹа биньн, ле безарʹ дьминьн, әԝ жи охьрме гьран ә. Илаһи сәва жьн әԝ дәрдәки гьран ә чахе әԝ нькарә зарʹа бинә. w17.06 4 ¶1; 5 ¶5-6

Әм чаԝа Мәсиһи рʹастийе ԛимәт дькьн у һʹьз дькьн. Хәбәра Хԝәде әԝ һәйә канийа рʹастийе. Дӧада Иса баве хԝәрʹа гьлийед ӧса гот: «Хәбәра тә рʹасти йә» (Йуһʹн. 17:17). Сәва кӧ рʹастийе һʹьз бькьн, әм гәрәке Хәбәра Хԝәде рʹьнд бьзаньбьн (Колс. 1:10). Ле тʹәне занәбун бәс нинә. Зәбура 119 али мә дькә фәʹм бькьн, кӧ чь те һʹәсабе рʹастийе һʹьз бькьн (Зәб. 119:97-100). Әме кʹаре бьстиньн һәрге чь кӧ әм Кʹьтеба Пирозда дьхуньн, тʹәмамийа рʹоже кʹур сәр бьфькьрьн. У гава әм бьвиньн кӧ әм кʹарәкә чьԛас мәзьн дьстиньн чахе принсипед ве дьдьнә хәбате, әме Кʹьтеба Пироз дьһа һʹьз бькьн. Әм ӧса жи дькарьн тәʹм кьн хԝарьна рʹӧһʹани кӧ әм жь тʹәшкиләта Хԝәде дьстиньн. Гава әм хԝарьна рʹӧһʹани леколин дькьн, әԝ «готьнед хԝәш» жь Кʹьтеба Пироз бира мәда дьминьн. Паше әм әԝан готьна дькарьн бьдьнә хәбате ԝәки али мәрьва бькьн (Ԝаиз 12:10). w17.05 19-20 ¶11-12

Әм дьхԝазьн аликʹарийе бьдьнә ԝан, йед кӧ кӧл-дәрда дькʹьшиньн, фьрԛи тʹӧнә Шәʹдед Йаһоԝа нә йан на (Луԛа 10:33-37). Чахе әм ԝанрʹа мьзгинийе гьли дькьн, әԝ аликʹарийа лапә мәзьн ә. Рʹуспик кӧ али гәләк рʹәвийа кьрийә, дьбежә: «Гәләк фәрз ә дәрберʹа ԝанрʹа бежьн кӧ әм Шәʹдед Йаһоԝа нә у кӧ нета мәйә сәрәкә әԝ ә кӧ рʹӧһʹанида али ԝан бькьн, нә бь пʹәра. Һәрге әм әԝе йәке ԝана нәдьнә фәʹмкьрьне, һьнәк жь ԝан ԝе тʹәне бона кʹара хԝә гӧһ бьдьнә мә». Чахе әм рʹәвийарʹа һʹьзкьрьне дьдьнә кʹьфше, әԝ йәк кʹаре тинә (Зәб. 146:9). Хушкәкә мә гьли кьр, кӧ нәфәред ԝе ча жь бо пәйкʹәтьна, жь Әритрейайе рʹәвин. Чар зарʹед ԝе һʹәйшт рʹожа бәрийерʹа чун у гьһиштьнә ԝәлате Судан. Әԝе гьли кьр: «Хушк-бьред ԝедәре тʹәви ԝан ӧса бун ча тʹәви нәфәред хԝә. Ԝана хԝарьн, кʹьнщ, щи-сьтʹар у пʹәре рʹе дьданә ԝан. Ԛә ве дьнйайеда кәсәк йе хәриб ԝе бинә мала хԝә сәва ве йәке, кӧ әԝана Хԝәдеки дьһʹәбиньн? На, тʹәне Шәʹдед Йаһоԝа» (Йуһʹн. 13:35). w17.05 7 ¶17, 19-20

«Гәло мәрьв дькарә кери Хԝәде бе? Йан жи йәки фәʹмкар дькарә кʹаре бьдә ԝи? Гәло йе Һьмзор жь тә рʹази йә бона һәԛийа тә, йан жи кʹара ԝи чь йә кӧ тӧ хԝә рʹийа беԛьсур дьгьри?» (Иб. 22:1-3, ДТʹ). Тӧ ԛә фькьрийи сәр щаба ԝан пьрса? Һәвале Ибо Әлифаз әԝ пьрс данә Ибо. Әлифаз баԝәр дькьр кӧ мәрьв кери Хԝәде найен! Һәвале ԝи Билдад, һәла һе кʹәтә дәʹԝе жи у гот кӧ мәрьв нькарә бәр чʹәʹве Хԝәде һәԛ бә (Иб. 25:4). Әлифаз у Билдад йанчь бәр дьле Ибода дьһатьн. Ԝана дьготьн кӧ йанчь щәфе мә кʹижан кӧ әм бона шьхӧле Хԝәде дькьн, бадиһәԝа йә у кӧ ԛимәте мә бәр чʹәʹве Хԝәде ԝәкә ԛимәте кʹезьк у кӧрма йә (Иб. 4:19; 25:6). Йаһоԝа сәр Әлифаз, Билдад у Зофар һерс кʹәт, чьмки ԝана дәрһәԛа ԝи дәрәԝ кьрьн. Йаһоԝа ԝанрʹа гот, кӧ әԝ Ибо ԛәбул дькә у ԝи һʹәсаб дькә хьзмәткʹаре хԝә (Иб. 42:7). Демәк, әм гәрәке ԛә дӧдьли нәбьн кӧ әм мәрьвед гӧнәкʹар дькарьн «кери Хԝәде» бен. w17.04 28 ¶1-2

Әм ида ви һʹале хьрабда һаԛас ԝәхт дьжин, ԝәки ида һини стресе бунә. Әԝ мина ве йәке йә, чахе мәрьвед кӧ незики щийе сәкьнандьна трене дьжин, ида һини дәнге ԝе бунә, йан жи мәрьвед кӧ незики щийе гәмаре дьжин, ида бина ԝе нә жи тʹәхмин дькьн. Ле ԝәрә дәрһәԛа ве йәке нәфькьрьн, у бьдьнә бәр чʹәʹве хԝә ԝәʹдәки чьԛас хԝәш һивийа мә йә. Бәле, әме ида тʹӧ щар нәкʹәвьнә стресе. Дина хԝә бьдьнә созе кӧ ве рʹеза рʹожеда ньвисар  ә. Бешьк, әв гьли дьле мә дьгьрьн, чьмки әԝ йәк Йаһоԝа бона мә дьхԝазә. Ләма жи ԝәрә ԝан рʹожед чәтьнда чь дәсте мә те бькьн, сәва незики Йаһоԝа Хԝәде бьн у тʹәви тʹәшкиләта ԝи бьминьн. Баԝәрийа хԝә ԛәԝи хԝәй кьн, бьфькьрьн сәр ԝан тьшта кʹижан кӧ һивийа мә нә, әԝан кʹәрәмәта бьдьнә бәр чʹәʹве хԝә, у мәрьвед дьнрʹа жи гьли кьн дәрһәԛа баԝәрийа хԝә (1 Тимтʹ. 4:15, 16; 1 Пәт. 3:15). Дӧдьли нәбьн ԝәки ԝәʹде ԛьрʹа ве дьнйайе, һуне әʹсә хьлаз бьн у бәхтәԝарийеда һʹәта-һʹәтайе бьжин! w17.04 13 ¶16-17

Әм әве йәке рʹьнд заньн, ле чахе һьндава мәда шаши те кьрьне, әԝ ида нәһеса йә. Ләма жи пьрс пешда те, ԝан дәрәщада әме чʹәʹв бьдьнә һәԛийа Йаһоԝа? Бәса хәбәре, һуне ча хԝә бьдьнә кʹьфше, һәрге рʹуспик тьштәки ӧса дьбежә кӧ те кʹьфше ԝәки әԝ фьрԛийе дькә ортʹа хушк-бьра? Йан жи, һуне бьлькʹӧмьн һәрге рʹуспик беһʹәмде хԝә пе гьлики ԝә бьхәйидинә у дьле ԝә бешинә? Дәԝса кӧ дәрберʹа бьфькьрьн ԝәки әԝ нәһежа йә рʹуспи бә, бь сәбьр һивийа Иса бьн, кӧ әԝ ԝе дәрәща рʹаст кә. Һе баш ә бьфькьрьн кӧ әԝ бьра ча нава салада бь амьни Хԝәдерʹа хьзмәт дькә, нә кӧ һʹьш-аԛьле хԝә бьдьнә сәр шашийа ԝи. Ле гәло һуне ша бьн һәрге әԝ рʹуспийе кӧ нәһәԛи һьндава ԝә кьрийә, диса рʹуспи дьминә у һәла һе сәрда жи щабдарийе зедә дьдьнә ԝи? Һәрге һун бь дьл у щан бьбахшиньнә ԝи бьрайи, бь ве йәке һуне нишан кьн кӧ чʹәʹв дьдьнә һәԛийа Йаһоԝа (Мәт. 6:14, 15). w17.04 27 ¶18