Һʹәзиран

Йаһоԝа мә рʹаст дькә, һин дькә у ширәт дькә, чьмки әԝ мә һʹьз дькә у дьхԝазә әм һʹьзкьрьна ԝида у сәр рʹийа жийине бьминьн. Щара ширәткьрьнеда тʹәне ширәт у рʹасткьрьн нинә. Һәрге кәсәк гӧне гьран кьрийә, әԝ ԝе щьватеда щабдарийа ӧнда кә. Ле ве йәкеда жи һʹьзкьрьна Йаһоԝа те кʹьфше. Бәʹса хәбәре, чахе кәсәк щабдарийед хԝә ӧнда дькә, әԝ йәк дькарә али ԝи бькә кӧ бьфькьрә чьԛас фәрз ә тʹьме һинбуна шәхси дәрбаз кә, сәр бьфькьрә, у дӧа бькә. Ԝи щурʹәйи әԝ дькарә рʹӧһʹанида пешда һәрә у ԛәԝи бә (Зәб. 19:7). Ԝәʹдә дәрбаз дьбә, у әԝ мәрьв дькарә пашда щабдарийа бьстинә. Ле һәрге жи мәрьв жь щьвате те дәрхьстьне, әв йәк жи һʹьзкьрьна Йаһоԝа әʹйан дькә, чьмки ӧса щьват жь һʹӧкӧме хьраб тʹәмьз дьминә (1 Корн. 5:6, 7, 11). Хԝәде тʹьме бь һәԛийе ширәт дькә у щәза дькә, ләма жи мәрьве кӧ жь щьвате һатийә дәрхьстьне, фәʹм дькә кӧ гӧне гьран кьрийә. Әԝ йәк дькарә ԝи һелан кә, кӧ гӧне хԝә бинә рʹуйе хԝә (Кʹар. Шанд. 3:19). w18.03 24 ¶5-6

Әԝ сәрԝере кәле Хәбәра Хԝәде ньзаньбу. Ләма жи сәва кӧ әԝ бьбуйа Мәсиһи, әԝи гәрәке рʹастийед сәрәкә бьзаньбуйа, фәʹм кьра кӧ чь те һʹәсабе бьбә хьзмәткʹаре Хԝәде у бьхԝаста һинкьрьнед Иса пек бинә. Ԝәʹдәки кьнда, әԝ рʹастийед сәрәкә пеһʹәсийа у һʹьз кьр, ләма жи әԝи хԝәст бе ньхӧмандьне (Кʹар. Шанд. 16:25-33). Бешьк дькарьн бежьн, ԝәки паши ньхӧмандьне жи әԝи бәрдәԝам кьр занәбуна хԝә зедә кә. Де-бавно, ле һун чь гәрәке бькьн чахе зарʹа ԝә дьбежә кӧ әԝ дьхԝазә бе ньхӧмандьне, чьмки Йаһоԝа һʹьз дькә у дьхԝазә гӧрʹа ԝи бькә? Һун дькарьн жерʹа бежьн, ԝәки незики рʹуспийед щьвате бә, сәва әԝана бьньһерʹьн һәла әԝ һазьр ә бе ньхӧмандьне йан на. Чаԝа һʹәму Мәсиһийед ньхӧманди, әԝ жи ԝе бәрдәԝам кә тʹәмамийа әʹмьре хԝәда, дьԛәԝьмә һʹәта-һʹәтайе жи, дәрһәԛа Йаһоԝа һе зедә пебьһʹәсә (Рʹом. 11:33, 34). w18.03 10 ¶8-9

Һәрге әм рʹӧһʹанийа хԝә ԛәԝи кьн, рʹӧһʹе пироз ԝе ԛәԝате бьдә мә сәва әм фькьред хԝә бьгӧһезьн. У бь сайа рʹӧһʹе пироз әме бькарьбьн сәр нет-фькьред Мәсиһ бьн. Хенщи ве йәке, әԝ йәк ԝе али мә бькә хԝәстьнед бәдәни кʹокева нав хԝә дәрхьн у хәйсәт-һʹӧнӧред ӧса нав хԝәда пешда биньн кӧ Хԝәде хԝәш тен. Һәрге әм мина Мәсиһ бьфькьрьн, әԝ йәк ԝе һʹӧкӧм бә сәр хәбәрдан, рʹабун-рʹуньштьна мә хәбатеда йан жи мәкʹтәбеда, ӧса жи сәр сафикьрьнед мәйә һәррʹожи. Әԝ сафикьрьнед мә ԝе әʹйан кьн, ԝәки әм дьхԝазьн чʹәʹв бьдьнә Иса. Чаԝа мәрьвнә рʹӧһʹани, әм нахԝазьн тьштәк һәләԛәтийа мә тʹәви Баве мәйи әʹзмана хьраб кә. Чахе әм рʹасти щерʹьбандьна бен, ньһерʹандьна мина йа Мәсиһ ԝе али мә бькә кӧ амьн бьминьн Хԝәдерʹа. У ӧса жи чахе әм сафикьрьна бькьн, әме ләз нәкʹәвьн у бьфькьрьн сәр ван пьрса: «Кʹижан принсипед Кʹьтеба Пироз ве сафикьрьнеда ԝе али мьн бькьн? Гәло Мәсиһ ве дәрәщеда ԝе чь бькьра? Кʹижан сафикьрьн ԝе Йаһоԝа хԝәш бе?». w18.02 25 ¶12; 26 ¶14

Ԝәʹде Һәнохда, демәк баве кальке Нӧһ, мәрьв гәләк зӧлм бун. Әԝана «һʹәму готьнед хьраб» һьндава Йаһоԝа хәбәр дьдан (Щьһуд. 14, 15). Зорбәти жи гәләк бәла бьбу. Рʹожед Нӧһда, «хьрабийава әʹрд тʹьжи бьбу». Мьлйакʹәтед хьраб һатьбун сәр әʹрде, хԝә кьрьбун мәрьв у хԝәрʹа жьн дьстандьн. Һьн жи зарʹ кӧ ԝанрʹа дьбун гәләк берʹәʹм у зӧлм бун (Дәстп. 6:2-4, 11, 12). Ле Нӧһ жь ԝан һʹәмуйа гәләк щӧдә дьбу. [Әԝ] нава мәрьвед ԝи зәманида мәрьвәки рʹаст у кʹамьл бу. Нӧһ рʹийа Хԝәдеда дьчу» (Дәстп. 6:9). Дина хԝә бьдьне кӧ әԝ гьли дәрһәԛа Нӧһ чь дьдьнә кʹьфше. Йа пешьн, бьфькьрьн әԝ пешийа Селаве зәманед хьрабда чьԛас ԝәхт рʹийа Хԝәдеда дьчу. Әԝ нә кӧ 70 йан жи 80 сала ԝе дьнйа хьрабда дьжит, ле ԝәкә 600 сала! (Дәстп. 7:11). Йа дӧда, ԝәʹде Нӧһда щьват тʹӧнә бу, кӧ али ԝи бькьра у әԝ бьшьданда. Ча те кʹьфше, һәла һе хушк-бьред ԝийи һʹәлал жи алийе рʹӧһʹанида пьштгьрийа ԝи нәдькьрьн. w18.02 4 ¶4-5

Мәрьвед пʹәрәһʹьз пе пʹәра ԝе тʹер нәбьн, чьмки һе зедә у зедә дьхԝазьн, у ԝәʹде хԝә хәрщ дькьн сәва һе зедә тʹоп кьн. Ле ахьрийеда әԝана дьбьнә хԝәйе «кӧл-дәрда» (1 Тимтʹ. 6:9, 10; Ԝаиз 5:10). Мә һәр кʹәсирʹа пʹәрә лазьм ә. Пʹәрә һьнә тьштада мә хԝәй дькьн (Ԝаиз 7:12). Ле гәло мәрьв дькарә бь рʹасти бәхтәԝар бә, һәрге пʹәре ԝи тʹәне тʹера һʹәԝще ԝи дькә? Бәле дькарә! (Ԝаиз 5:12). Зәбурбеж бь наве Агур, кӧрʹе Йаԛәһе, дӧа кьр: «Нә мьн бәләнгаз кә, нә жи дәԝләти кә, пе нане рʹоже Тӧ мьн тʹер кә». Әм дькарьн фәʹм кьн чьрʹа әԝи гот кӧ нахԝазә гәләк кʹәсиб бә. Паши ԝан гьлийа әԝи шьровәкьр кӧ әԝ нәдьхԝәст дьзийе бькә у бь ве йәке наве Хԝәде беһӧрмәт кә. Ле чьрʹа әԝи дӧа кьр ԝәки нахԝазә дәԝләти бә? Әԝи ньвиси: «Нәбә кӧ әз тʹер бьм, Тә инкʹар кьм у бежьм: ‹Хӧдан ки йә?›» (Мәтʹлк. 30:8, 9). Иса гот: «Тʹӧ кәс нькарә дӧ ахарʹа хӧламтийе бькә, чьмки йан ԝе һʹиле ԝи жь йәки һәрә у йе дьне һʹьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʹа, һьн жи һәбукерʹа хӧламтийе бькьн» (Мәт. 6:24). w18.01 24 ¶9-11

Әм дькарьн йәктийе хԝәй кьн, чахе бь дьл дьбахшиньн мәрьва. Чахе әм дьбахшиньнә ԝан, йед кӧ мә данә хәйидандьне, әм нишан дькьн ԝәки ԛимәт дькьн бахшандьна гӧнед мә, кӧ бь сайа ԛӧрбана Мәсиһ мә стандийә. Дина хԝә бьдьнә мәсәла Иса кӧ Мәтта 18:23-34-да ньвисийә. Пьрсед ӧса бьдьнә хԝә: «Гәло әз дьхԝазьм әԝ ширәта Иса биньм сери? Әз бь сәбьр ьм у бь фәʹмдарийе мә тʹәви хушк-бьред хԝә? Әз һазьр ьм бьбахшиньмә ԝан, йед кӧ һьндава мьнда гӧнә кьрьнә?». Щара мәрʹа ча мәрьвед гӧнәкаррʹа гәләк чәтьн ә бьбахшиньн. Ле йәкә әԝ мәсәла Иса рʹьнд нишан дькә, ԝәки Йаһоԝа дьхԝазә әм ве йәке бькьн. Иса әшкәрә дьдә кʹьфше кӧ Йаһоԝа ԝе нәбахшинә мә, һәрге әм нәбахшиньнә хушк-бьред хԝә чахе әԝана гӧне хԝә тиньн рʹуйе хԝә. Әԝе йәке әм гәрәке бир нәкьн. Чахе әм дьбахшиньнә мәрьва чаԝа Иса мә һин кьр, әм йәктийа хԝәйә ԛимәт хԝәй дькьн. w18.01 15 ¶12

Данийел әʹмьре хԝә кьрә бьн ԛәзийе, ле әԝ хԝәрʹа сафи кьрьбу, ԝәки бәрдәԝам кә бәр йед дьн дӧа бькә, сәва әԝана нәфькьрьн кӧ һʹәбандьна ԝи фәрз нинә. Йаһоԝа бь кʹәрәмәт Данийел жь мьрьне хьлаз кьр, чьмки әԝи бь мерхаси әԝ сафикьрьн кьр у Хԝәдерʹа амьн ма. Әве ԛәԝьмандьне алики дьнва жи гәләк кʹар ани. Нав тʹәмамийа Империйа Мәда-Фарьседа гьшк дәрһәԛа Йа-һоԝа пеһʹәсийан (Дан. 6:25-27). Әм чаԝа дькарьн баԝәрийа мина йа Данийел ԛазанщ кьн? Сәва баԝәрийа мә ԛәԝи бә, лазьм ә әм Хәбәра Хԝәде нә кӧ сәра-бәра бьхуньн, ле ӧса бьхуньн ԝәки «фәʹм» кьн (Мәт. 13:23). Әм дьхԝазьн ньһерʹандьна Йаһоԝа пебьһʹәсьн, у кʹур фәʹм кьн принсипед ԝи. Хенщи ве йәке, әм чь жи дьхуньн гәрәке сәр бьфькьрьн. Дӧа жи гәләк фәрз ә, илаһи чахе әм рʹасти щерʹьбандьна у тәнгасийа тен. Чахе әм бь баԝәрийе Йаһоԝарʹа дӧа дькьн сәва билани у ԛәԝате бьдә мә, әԝ ԝе әʹсә бь мәрʹдани мәрʹа бьдә (Аԛуб 1:5). w18.02 10-11 ¶13-15

Һәла һе чаԝа хьзмәткʹаре Йаһоԝайи щаһьл жи, тӧ дькари ԛәнщийа ԝи сәр хԝә тʹәхмин ки, чахе дәрһәԛа баԝәрийа хԝә мәрьвед дьнрʹа гьли ки у аликʹарийа ԝи бьвини. Мәсәлә, чахе тӧ хьзмәт дьки йан жи мәкʹтәбеда шәʹдәтийе дьди, әԝ дькарә мерхасийе бьдә тә. Дьбәкә тәрʹа чәтьн ә һәвалед дәрсхана хԝәрʹа шәʹдәтийе бьди, чьмки ньзани әԝана ԝе чь бежьн у хԝә ча бьдьнә кʹьфше. Ле һе чәтьн ә дәрһәԛа баԝәрийа хԝә гьли ки бәр гәләк мәрьва, нә кӧ бәр йәке. Ле чь дькарә али тә бькә? Пешийе бьфькьрә кӧ тӧ чьрʹа баԝәрийа хԝәда дӧдьли нини. Һәрге jԝ.org-да сәр зьмане тә һәйә рʹебәрийед бона һинбуне кӧ бона щаһьла йә, әԝан рʹебәрийа бьдә хәбате. Әԝ рʹебәри ԝе али тә бькьн, ԝәки бьфькьри кӧ чьрʹа тӧ баԝәрийа хԝәда дӧдьли нини у ча йед дьнрʹа баԝәрийа хԝә шьровәки. Чахе тӧ баԝәрийеда ԛәԝи би у рʹьнд һазьр би, тӧйе хԝәха бьхԝази бь мерхаси дәрһәԛа Йаһоԝа шәʹдәтийе бьди (Йерәм. 20:8, 9). w17.12 26 ¶12, 14-15

Бәс нинә тʹәне сәрһати у ԛәԝьмандьнед Кʹьтеба Пироз зарʹа һин кьн. Биньн бира хԝә кӧ Тимотʹейо ӧса жи «избат» бу, демәк баԝәрийа хԝә ԝан тьшта ани чь кӧ һин бу. Зьмане орижиналеда хәбәра «избат», те һʹәсабе «нәдӧдьли», йан жи баԝәрбун кӧ фьлан тьшт рʹаст ә. Тимотʹейо жь бьчʹуктайе Ньвисаред Ибрани заньбу. Ле паше әԝи сәр һʹиме избаткьрьна, баԝәр кьр, ԝәки Иса Мәсиһ бу. Де-бавно, һун чаԝа дькарьн али зарʹед хԝә бькьн, ԝәки мина Тимотʹейо «избат» бьн ԝан тьштада чь кӧ һин дьбьн? Йа пешьн бь сәбьр бьн, чьмки баԝәри рʹожәкеда найе. Ӧса жи һәрге баԝәрийа ԝә ԛәԝи йә, әв найе һʹәсабе кӧ баԝәрийа ԝә ԝе дәрбази зарʹед ԝә бә. Һәр зарʹ гәрәке хԝәха һʹьш-аԛьле хԝә бьдә хәбате, сәва баԝәрийа хԝә рʹастийа Кʹьтеба Пироз бинә (Рʹом. 12:1). Ве йәкеда һун чаԝа де-бав роләкә фәрз дьлизьн, илаһи чахе зарʹ пьрса дьдә ԝә. w17.12 19 ¶3, 5-6

Мәртʹа, кӧ шагьрт у һәвала Исайә незик бу, шин дькьр чьмки бьре ԝе Лазар мьрьбу. Гәло тьштәки ӧса һәбу кӧ еша дьле ԝе сьвьк кьра? Бәле! Иса соз да ԝе: «Бьре тәйе жь мьрьне рʹабә» (Йуһʹн. 11:20-23). Мәртʹа сәд сәләфи баԝәр бу кӧ ахьрийеда рʹабуна мьрийа ԝе һәбә. Ле паше Иса кʹәрәмәт кьр у һәма ԝе рʹоже Лазар жь мьрьне рʹакьр. Иро әм һивийе ниньн ԝәки Иса йан жи Йаһоԝа ԝе бь кʹәрәмәт мьрийед мә сах кьн. Ле гәло һун мина Мәртʹа сәд сәләфи баԝәр ьн кӧ ахьрийеда мәрьвед ԝәйи дәлал ԝе жь мьрьне рʹабьн? Дьбәкә ԝә малхе хԝә, йан жьна хԝә, йан жи де-бав, йан кальк-пирька хԝә ӧнда кьрийә. Йан жи дьбәкә зарʹа ԝәйә дәлал мьрийә, у һун гәләк дьхԝазьн ԝи бьдьнә бәр дьле хԝә, ԝирʹа хәбәр дьн у ша бьн. Чьԛас баш ә кӧ мина Мәртʹайе мәʹнийа ԝә жи һәйә бежьн: «Әз заньм кӧ мәрьве мьни дәлал ԝе жь мьрьне рʹабә». Ле ԝе баш бә ԝәки һәр Мәсиһи бьфькьрә дәрһәԛа ԝан мәʹнийа, кӧ чьрʹа әм баԝәр ьн ԝәки мьри ԝе рʹабьн. w17.12 3 ¶1-2

Иса Ԛануна Муса һʹьз дькьр. Әԝ йәк әʹщебмайи нинә, чьмки әв Ԛанун жь Кәсе һәри бьльнд бу, жь Баве ԝи Йаһоԝа бу. Һʹьзкьрьна Иса һьндава ԛануна Хԝәде һатийә пʹехәмбәртикьрьне рʹеза ве рʹожеда. Иса пе хәбәрдана хԝә у кьред хԝә избат кьр кӧ Ԛануна Хԝәде тʹам ә, керһати йә, у һәр тьшт чь жи теда ньвисар ә әʹсә ԝе бе сери (Мәт. 5:17-19). Бьдьнә бәр чʹәʹве хԝә, кӧ Иса ча бәрхԝә дькʹәт гава дьдит, ԝәки ԛанунзан у Ферьси Ԛануна Баве ԝи нәрʹаст шьровәдькьн у чаԝа лазьм ә найньн сери. Ԝана Ԛанунеда дина хԝә дьданә тʹәне сәр тьштед һур, ләма Иса ԝанрʹа гот: «Һун дәһәке пʹунге, анисойе у кемуне дьдьн». Демәк чьда ԝана шаши бәрʹда? Иса шьровәкьр: «Ле тьштед Ԛанунейә пеш, аԝа готи һәԛийе, рʹәʹме у баԝәрийе давежьнә пьшт гӧһе хԝә» (Мәт. 23:23). Әԝан Ферьсийа хԝә рʹаст һʹәсаб дькьрьн у мәʹнийа Ԛануне фәʹм нәдькьрьн. Ле Иса нета Ԛануне фәʹм дькьр у заньбу кӧ пьшт һәр тʹәми у ԛанунеда, һʹӧнӧред Хԝәде тенә кʹьфше. w17.11 13 ¶1-2

Дьбәкә мәрʹа дьбежьн: «Чь хьраб ә ве йәкеда кӧ жь зәԝаще дәр тʹәви кәсәки дьн бькʹәви һәләԛәтийа сексуал? Әʹмьре хԝәрʹа ша бә у бьжи ча дьле тә дьхԝазә!» Ле Мәсиһи тʹӧ щар ӧса нафькьрьн кӧ бенамусийеда тьштәки хьраб тʹӧнә. Чьрʹа? Чьмки Хәбәра Хԝәде бенамуси у ԛавийе ԛәдәхә дькә (1 Тʹеслн. 4:4-8). Йаһоԝа әм әʹфьрандьнә у ләма изьна ԝи һәйә кӧ мәрʹа ԛануна дайнә. Ԛануна Хԝәде тʹәне жьн-меррʹа изьне дьдә кӧ бькʹәвьнә һәләԛәтийа сексуал. Хԝәде мә һʹьз дькә ләма ԛануна датинә. Һʹәму ԛанунед ԝи кери мә тен. Малбәтед кӧ гӧрʹа ԝи дькьн, мала хԝәда ԝе һʹьзкьрьне, ԛәдьр бьстиньн у хԝә хԝәйкьри тʹәхмин кьн. Ле әԝед кӧ ԛануна Хԝәде пьшт гӧһе хԝәва давежьн, әԝ ԝе диԝана ԝан бькә (Ибрн. 13:4). Хәбәра Хԝәде мә һин дькә кӧ чаԝа хԝә жь бенамусийе хԝәй кьн. Гәләк фәрз ә фәсал бьн кӧ әм чь дьньһерʹьн (Мәт. 5:28, 29). Ләма жи Мәсиһи ԝе хԝә жь порнографйайе дур бьгьрә у кʹьламед бь гьлийед бенамуси ԝе нәбьһе (Әфәс. 5:3-5). w17.11 22 ¶9-10

Бәреда хьзмәткʹаред Йаһоԝа пе кʹьлама пәсьн у шькьри дьданә Йаһоԝа. Дина хԝә бьдьне, кӧ чахе Исраели бь амьни Йаһоԝарʹа хьзмәт дькьрьн, стьрандьн һʹәбандьна ԝанда щийе фәрз дьгьрт. Бәʹса хәбәре, чахе Даԝьд Пʹадша бона хьзмәтийа пʹарьстгәһеда кʹар дькьр, әԝи 4 000 Леԝи бьжарт сәва бь кʹьлама пәсьн у шькьрийе бьдьнә Йаһоԝа. Нава ԝанда 288 мәрьв һинкьри бун, ԝәки бона Йаһоԝа бьстьрен, у әԝ һʹәмушк жи ԝе йәкеда һостә бун (1 Дир. 23:5; 25:7). Чахе пʹарьстгәһ тʹәсмили Йаһоԝа дькьрьн, һьнге жи мьԛам у кʹьлама щийе фәрз дьгьртьн. Кʹьтеба Пирозда те готьне: «Гава кӧ боривана у дәнгбежа бь һәврʹа пәсьн у шькьри дьданә Йаһоԝа, у гава кӧ дәнге борийе у шьнгинийа болма у саза шькьри дьданә Йаһоԝа . . . Рʹумәта Йаһоԝа, мала Хԝәдейе рʹаст тʹьжә кьрьбу». Бьдьнә бәр чʹәʹве хԝә, ԝәки әԝе ԛәԝьмандьне чьԛас баԝәрийа Исраелийа ԛәԝи кьр (2 Дир. 5:13, 14, ДТʹ; 7:6). w17.11 4 ¶4-5

Иса фәʹм дькьр кӧ ԝе нә һʹәму мәрьв һинкьрьнед ԝи ԛәбул кьн. Әԝи ӧса жи заньбу ԝәки ԝанрʹа мерхаси лазьм ә, чьмки ԝе һәбьн мәрьв кӧ пәй ԝан кʹәвьн. Нета Иса әԝ нибу кӧ нәфәра жь һәв бьԛәтинә, әԝи дьхԝәст кӧ рʹастийа Хԝәде бьгьһижә мәрьва (Йуһʹн. 18:37). Ләма шагьртед ԝи рʹьнд фәʹм дькьрьн кӧ ԝе һеса нибә хԝә ль һинкьрьнед ԝи бьгьрьн. Сәва кӧ һежа бьн бьбьнә шагьртед Иса, ԝана сәбьр дькьр гава нәфәред ԝан сәр ԝан дькʹәнийан йан һәла һе жи ԝана ԛәбул нәдькьрьн. Ле ԝана чь жи ӧнда кьр, һе зедә ԛазанщ кьрьн (Марԛ. 10:29, 30). Чахе мәрьвед мәйи незик мьԛабьли ве йәке нә кӧ әм Йаһоԝарʹа хьзмәт дькьн, әм диса жи ԝана һʹьз дькьн. Ле әм гәрәке бир нәкьн, ԝәки һʹьзкьрьна мә һьндава Хԝәде у Мәсиһ гәрәке щийе пешьн бьгьрә (Мәт. 10:37). Әм ӧса жи гәрәке бира хԝәда хԝәй кьн, кӧ Шәйтʹан дькарә һʹьзкьрьна мә һьндава нәфәред мә бьдә хәбате, сәва кӧ әм Йаһоԝарʹа амьн нәминьн. w17.10 13 ¶3-6

Әв хәԝн-хәйал мәрʹа әшкәрә нишан дькә, кӧ Йаһоԝа ԝе нава щьмәʹта хԝәда тʹӧ хьрабийе наһелә. Гава кӧ Йаһоԝа хьрабийе бьвинә, ԝе дәрберʹа бьдә һьлдане (1 Корн. 5:13). Мьлйакʹәт әв йәк рʹьнд нишан кьр, чахе дәрберʹа пе дәвлике гӧлә сәлә дада. Әв хәԝн-хәйал дьле ԝан Исраелийа кӧ ԝәʹде Зәкәрийада дьжитьн, рʹьһʹәт кьр кӧ Йаһоԝа ԝе нава щьмәʹта хԝәда хьрабийе нәһелә у һʹәбандьна рʹаст ԝе бе хԝәйкьрьне. Әв хәԝн-хәйал ӧса жи ани бира Исраелийа кӧ әԝана жи щабдар ьн, ԝәки һʹәбандьнеда тʹәмьзайе хԝәй кьн. Нава щьмәʹта Йаһоԝада щийе хьрабийе тʹӧнә у ԝе нә жи һәбә. Иро Йаһоԝа мә кьрийә нава тʹәшкиләта хԝәйә тʹәмьз, кʹидәре кӧ әм һʹьзкьрьн у хԝәйкьрьна ԝи дьвиньн. Ле әм щабдар ьн кӧ «мала» хԝә, демәк тʹәшкиләта Йаһоԝа, һʹәму алийава тʹәмьз хԝәй кьн. Бәле, тʹӧ хьраби нава щьнәта мәйә рʹӧһʹанида гәрәке тʹӧнә бә. w17.10 24 ¶14-15; 25 ¶17-18

Сив нәһә кʹьтебед пешьн йа Кʹьтеба Пироз Исраелийа ньвисинә, демәк Щьһуйа. Әԝана йед пешийе бун, кʹижанарʹа «готьнед Хԝәде . . . һатьнә спартьне» (Рʹом. 3:1, 2). Ле ԛьрʹна сьсийада Б.Д.М., гәләк Щьһуйа ида зьмане Ибрани фәʹм нәдькьрьн. Гәло чьрʹа? Чьмки Искәндәре Мәзьн нав ԝәлатед кӧ әԝи зәфт кьрьбу Имперйа Йунаньстане фьрә кьр (Дан. 8:5-7, 20, 21). Ләма жи, ԝәлатед кӧ бьн дәсте Йунаньстанеда бун, зьмане бьнәлийед ԝан, бу зьмане Йунани. Демәк гәләк Щьһу жи кӧ ԝан ԝәлатада дьжитьн, ида сәр зьмане Йунани хәбәр дьдан. Әԝ бу мәʹни кӧ ԝана ида чәтьн фәʹм дькьр Ньвисаред Ибрани. Ле гәло әв чәтьнайи ча сафи бу? Ԝәлгәрʹандьна Кʹьтеба Пироз жь зьмане Ибрани һатә ԝәлгәрʹандьне сәр зьмане Йунани ԛьрʹна дӧдада Б.Д.М.. Әв ԝәлгәрʹандьн һатә навкьрьне «Септуагинта» Йунани. «Септуагинта» әв һәйә ԝәлгәрʹандьна пешийе йа тʹәмамийа Ньвисаред Ибрани, кʹижан кӧ бь дәста һатийә ньвисаре. w17.09 20 ¶7-9

Мәзьне хәбата ԝә дькарә тʹьме ԝәрʹа бежә, ԝәки һе зедә бьхәбьтьн еваре у шәми ләʹда жи, ле ԝә әв ԝәʹдә хԝәрʹа кʹьфш кьрийә сәва ԛӧльхкьрьна тʹәви малбәте, хьзмәтийе, у щьвате. Һьнге ԝәрʹа мерхаси лазьм ә сәва нәкʹәвьн бәр байе ԝи у мәсәла баш бьһельн зарʹед хԝәрʹа. Ӧса жи мерхаси лазьм ә сәва али зарʹед хԝә бькьн, кӧ хьзмәтийеда нета дайньн пешийа хԝә у бьгьһижьнә ԝан нета. Бәʹса хәбәре, һьнә де-бав дьбәкә дьтьрсьн зарʹед хԝә һелан кьн кӧ бьбьнә пешәнг, йан хьзмәт кьн ԝан щийада кʹидәре һʹәԝщәти һәйә, йан Бәйтʹәледа, йан жи шьхӧле авакьрьнеда кʹар бькьн. Дьбәкә әԝана дьтьрсьн кӧ чахе әԝана кал-пир бьн, зарʹед ԝан ԝе нькарьбьн мьԛати ԝан бьн. Ле де-бавед билан мерхас ьн у натьрсьн, чьмки дӧдьли ниньн кӧ Йаһоԝа хԝайе созед хԝә йә (Зәб. 37:25). Әԝ де-бавед мерхас, йед кӧ итʹбарийа хԝә Йаһоԝа тиньн, али зарʹед хԝә дькьн кӧ әԝана жи ӧса бькьн (1 Сам. 1:27, 28; 2 Тимтʹ. 3:14, 15). w17.09 30 ¶14-15

Гәло де-бав ча дькарьн али зарʹед хԝә бькьн сәва әԝана хԝәгьрти бьн? Һун заньн кӧ лазьм ә зарʹа һин кьн хԝәгьрти бьн, чьмки зарʹ найенә буйине пе ви һʹӧнӧри. Ләма жи фәрз ә де-бав ве йәкеда мәсәла баш бьн (Әфәс. 6:4). Де-бавно чахе һун дьвиньн кӧ зарʹед ԝәрʹа чәтьн ә хԝә бьгьрьн, жь хԝә бьпьрсьн һәла һун ве йәкеда бона ԝан мәсәла баш ьн йан на. Һәрге һун хьзмәтийеда хирәт ьн, тʹьме тенә щьвата у ԛӧльхкьрьна тʹәви малбәте дәрбаз дькьн, ве йәкеда жи һун мәсәла баш дьһельн ԝанрʹа. Щара лазьм ә хԝәстьнед зарʹа нәйньн сери. Биньн бира хԝә кӧ Йаһоԝа бона Адәм у Һеԝайе синор дани. Әв синор ԝанрʹа мәщал дьда сәва ԛәдьр-һӧрмәт нишан кьн һьндава сәрԝертийа Йаһоԝа. Де-бав жи чахе зарʹед хԝә ширәт дькьн у мәсәла баш ьн бона ԝан, ӧса әԝана зарʹед хԝә һин дькьн хԝәгьрти бьн. Тьште гәләк ԛимәт кӧ де-бав дькарьн зарʹед хԝә һин кьн, әԝ һәйә һʹьз бькьн сәрԝертийа Хԝәде у тʹәмийед ԝи биньн сери (Мәтʹлк. 1:5, 7, 8). w17.09 7 ¶17

Һʹәта кӧ дьнйа Шәйтʹан нәйе кʹӧтакьрьне, әме рʹасти чәтьнайа бен, мәсәлә, бехәбати, нәхԝәшийед гьран, пәйкʹәтьн, хәзәб, ӧндакьрьна һәбуке у тьштед дьн. Әм гәрәке дьлшәԝат бьн һьндава һәвда, ԝәки ԝәʹде чәтьнайа али һәв бькьн. Чьмки дьлшәԝати ԝе мә һелан кә кӧ мәрьварʹа ԛәнщийе бькьн (Әфәс. 4:32). Әԝ хәйсәт-һʹӧнӧр кӧ пʹара мәрьве ну нә, ԝе али мә бькьн, ԝәки чʹәʹв бьдьнә Хԝәде у бәр дьле мәрьвада бен (2 Корн. 1:3, 4). Әм ча дькарьн һе зедә ԛәнщийе бьдьнә кʹьфше һьндава мәрьвед хәриб у йед кʹәсиб? Әм гәрәке ԝанрʹа бьбьнә һәвал у ӧса бькьн ԝәки әԝана бьвиньн кӧ щьватеда ԝана ԛимәт дькьн (1 Корн. 12:22). Гәләк Шәʹдед Йаһоԝа дьлшәԝат ьн һьндава мәрьвед хәриб, у ләма ԛәԝате дьдьнә хәбате, ԝәки зьмане ԝан һин бьн (1 Корн. 9:23). У әԝ йәк кʹәрәмед мәзьн тинә. w17.08 23-24 ¶7-9

Бешьк, әм жи гәрәке сәбьр кьн у бь дьл у щан һивийе бьн. Ле ве йәкеда ԝе чь али мә бькә? Хԝәдерʹа дӧа бькьн, ԝәки рʹӧһʹе хԝәйи пироз бьдә ԝә, чьмки сәбьр жи бәре рʹӧһʹе пироз ә (Әфәс. 3:16; 6:18; 1 Тʹеслн. 5:17-19). Жь Йаһоԝа һиви кьн сәва али ԝә бькә кӧ һун сәбьр кьн у ԛәԝи бьминьн. Биньн бира хԝә кӧ чь али Бьраһим, Усьв, у Даԝьд кьр, кӧ әԝана бь сәбьр һивийа созед Йаһоԝа бун. Баԝәри у итʹбарийа һьндава Йаһоԝа али ԝан кьр. Әԝана нәдькʹәтьнә һʹәйра хԝә у хԝәстьнед хԝә. Һәрге әм бьфькьрьн кӧ сәбьра ԝан ча һатә кʹәрәмкьрьне, әме һелан бьн кӧ мина ԝан бь сәбьр һивийе бьн. Һәрге жи әм ньһа рʹасти тәнгасийа у щерʹьбандьна тен, йәкә әм бь дьл у щан һивийа Хԝәде нә. Дьбәкә щара әм жи жь кʹәсәра дьле хԝә дьбежьн: «Һʹәта кʹәнге йа Йаһоԝа?» (Иша. 6:11) Ле пе ԛәԝата рʹӧһʹе Хԝәдейи пироз, әм дькарьн гьлийед Йерәмйа кӧ ве рʹеза рʹожеда ньвисар ә, сәр хԝә тʹәхмин кьн. w17.08 7 ¶18-20

Чахе Иса бьчʹук бу, тʹәбийәти йә кӧ әԝи тʹәви зарʹа дьлист у хԝәрʹа тьштәкива мьжул дьбу. Ча Хәбәра Хԝәде дьбежә, «ԝәхта кʹәнине һәйә . . . у ԝәхта листьне һәйә» (Ԝаиз 3:4). Ле хенщи ԝан тьшта, Иса Ньвисар леколин дькьрьн у ӧса незики Йаһоԝа дьбу. Чахе әԝ 12 сали бу, дәрсдаред пʹарьстгәһеда «сәр занәбун у щабед ԝи» зәндәгьрти дьман (Луԛа 2:42, 46, 47). Иса бәхтәԝар бу. Ле чь ԝи бәхтәԝар дькьр? Әԝи ԛьрара Хԝәде дьани сери кӧ фәԛирарʹа у «корарʹа бой дитьне» мьзгини бәла дькьр (Луԛа 4:18). Бәле, Иса бәхтәԝар бу, чьмки әԝи әв дькьр чь кӧ Хԝәде жь ԝи дьхԝәст. Иса гәләк һʹьз дькьр дәрһәԛа Баве хԝәйи әʹзмана мәрьва һин кә (Луԛа 10:21). Щарәке, чахе Иса дәрһәԛа һʹәбандьна рʹаст тʹәви жьнькәке хәбәр да, паше әԝи шагьртед хԝәрʹа гьлийед ӧса гот: «Хԝарьна мьн әԝ ә, кӧ әз хԝәстьна йе кӧ әз шандьмә бькьм у шьхӧлед ԝи биньмә сери» (Йуһʹн. 4:31-34). Иса Хԝәде у мәрьв һʹьз дькьрьн, у пе кьред хԝә әв йәк нишан дькьр. Щаһьлно, һәрге һун жи ӧса бькьн, һуне жи бәхтәԝар бьн. w17.07 23 ¶4-5

Гава Иса сәр әʹрде бу, әԝи дьлшәԝатийеда бь тʹәмами чʹәʹв дьда Баве хԝә Йаһоԝа. Иса һьн бь гьлийед хԝә, һьн жи бь кьред хԝә чʹәʹв дьда ви һʹӧнӧре Баве хԝә (Йуһʹн. 5:19). Йаһоԝа хԝәха Иса шандә сәр әʹрде, сәва бәрдьлийе бьдә йед «дьлшькәсти» у «һʹәму кәсед бь шин» (Иша. 61:1, 2; Луԛа 4:17-21). Мәрьва, Иса ча кәсе дьлшәԝат нас дькьрьн, чьмки әԝи дәрде ԝан фәʹм дькьр у бь дьл у щан дьхԝәст али ԝан бькә (Ибрн. 2:17). Кʹьтеба Пироз зәлал дьбежә, кӧ «Иса Мәсиһ дӧһӧ, иро у һʹәта-һʹәтайе йәк ә» (Ибрн. 13:8). Ӧса жи Кʹьтеба Пироз дьбежә кӧ әԝ «Чʹәʹвканийе жийине» йә, демәк дькарә рʹе вәкә сәва әм һʹәта-һʹәтайе бьжин. Иса занә дәрд чь йә у ләма «дькарә аликʹарийа ԝан бькә, йед кӧ дькʹәвьнә нава щерʹьбандьне» (Кʹар. Шанд. 3:15; Ибрн. 2:10, 18). Мәсиһ дькʹәвә һʹале мәрьва, дәрде ԝан фәʹм дькә у ԝәʹде лазьмда ԝе бәрдьлийе бьдә ԝан (Ибрн. 4:15, 16). w17.07 13 ¶6-7; 14 ¶10

Шәйтʹан у дьнйа ԝи дьхԝазьн ԝәки әм хьзнед рʹӧһʹани ԛимәт нәкьн, кʹижан кӧ Йаһоԝа дайә мә. Ләма әм гәрәке һаш жь хԝә һәбьн сәва һʹьзкьрьна хԝә ӧнда нәкьн. Һәрге әм фәсал нибьн, һʹьш-аԛьле мә дькарә һәрә алийе нәрʹаст. Мәсәлә, әм дькарьн пәй пʹәра кәвьн. Бәʹса хәбәре, кәсәк хәбатәкә баш соз бьдә мә у әм һʹьш-аԛьле хԝә бьдьнә сәр ве йәке кӧ пʹәре ԛальм чекьн. Йан жи дьбәкә әме тʹәне сәр ве йәке бьфькьрьн, кӧ чаԝа дәԝләмәнд бьн у рʹьһʹәт бьжин, йан жи пе һәбука хԝә ԛӧрʹә бьн. Йуһʹәннайе шанди тинә бира мә ԝәки әԝ дьнйа у чь кӧ теда һәйә ԝе дәрбаз бьн (1 Йуһʹн. 2:15-17). Ләма жи, әм гәрәке мьԛати хԝә бьн сәва хьзна хԝәйә рʹӧһʹани ӧнда нәкьн. Нәһельн ԝәки тьштәки һʹьзкьрьна ԝә һьндава Пʹадшатийа Хԝәде сьст кә. Бь хирәт мьзгинийе бәла кьн у хьзмәтийе һʹьз бькьн. Бь дьл у щан бьгәрʹьн рʹастийед жь Кʹьтеба Пироз. Гава һун ӧса бькьн, һуне «хьзна» ль әʹзмана тʹоп кьн. «Ль ԝе дәре нә дьзе незик бе у нә жи ԝе бьзузе бьхԝә» (Луԛа 12:33). w17.06 13 ¶19-20

Йаһоԝа сәрԝере сәрт нинә у әԝ нә жи зоре кәсәки дькә кӧ гӧрʹа ԝида бә. Сәрԝертийа ԝи азайе тинә у мәрьва бәхтәԝар дькә (2 Корн. 3:17). Даԝьд дәрһәԛа Йаһоԝа ӧса гот: «Бьльндайи у мәзьнайи ль бәр ԝи нә; ԛӧдрәт у кʹефхԝәши ль щиһе кӧ әԝ ле рʹудьне нә» (1 Дир. 16:7, 27). Зәбурбеж Әйтан жи гот: «Хԝәзи ль ԝе щьмәʹте, кӧ занә дәнг һьлдә щәжьнерʹа. Хӧдано, әԝ бь рʹонайа рʹуйе Тә дьмәшьн. Тʹәмамийа рʹоже бь наве Тә ша дьбьн у бь азадийа Тә бьльнд дьбьн» (Зәб. 89:15, 16). Һәрге әм кʹур бьфькьрьн кӧ Йаһоԝа чьԛас ԛәнщ ә, әме дӧдьли нәбьн кӧ сәрԝертийа ԝи һәри баш ә. Йаһоԝа мә әʹфьранд у ләма әԝ занә чь бь рʹастийе мә бәхтәԝар у ша дькә. У әԝ һе зәʹф тьшта дьдә мә, нә кӧ чьԛас мәрʹа лазьм ә. Чь кӧ Йаһоԝа жь мә дәʹԝа дькә, тʹьме бона кʹара мә йә у шабуне мәрʹа тинә. Һәрге жи әм жь хԝә тьштәки кем дькьн сәва кӧ гӧрʹа ԝи бькьн, һьнге жи әм шабуне дьстиньн (Иша. 48:17). w17.06 29 ¶10-11

Хушкәкә мәйә жь Инглистане гәләк дьхԝәст зарʹ жерʹа бьбә, ле хԝәстьна ԝе нәһатә сери. Әԝе гьли кьр ԝәки әԝ чьԛас дьлшкәсти бу, чьмки фәʹм кьр кӧ ве дьнйайеда ида зарʹ ԝе жерʹа нәбьн. Ләма әԝе тʹәви мере хԝә сафи кьр кӧ зарʹәке хԝәрʹа һьлдьн у хԝәй кьн. Ле әԝе хушке гот: «Әԝе йәке бь тʹәмами дәрд-кӧле мьн кʹӧта нәкьр. Мьн заньбу ԝәки зарʹа һʹәлал әԝ тьштәки дьн ә». Кʹьтеба Пироз дьбежә кӧ жьн «зарʹанинеда . . . ԝе хьлаз бә» (1 Тимтʹ. 2:15). Ле әԝ гьли найе һʹәсабе, ԝәки жьн тʹәне жь бо зарʹанине ԝе жийина һʹәта-һʹәтайе бьстинә. Ԝәки ӧса нә, әԝ гьли чь те һʹәсабе? Чахе зарʹед жьне һәнә, әԝ ԝәʹде хԝә сәр зарʹа у ӧса жи сәр шьхӧлед мале хәрщ дькә. У әԝ йәк дькарә ле хԝәй кә жь гәвәстийе у ԝәки нәкʹәвә нав шьхӧлед мәрьвед дьн (1 Тимтʹ. 5:13). w17.06 5-6 ¶6-8

Гәло бь ԝан гьлийа Әлиһу дьхԝәст бьгота ԝәки щәфе мә кӧ әм бона шьхӧле Хԝәде дькьн бадиһәԝа йә? На. Ләма жи бона ԝан гьлийа Йаһоԝа сәр ԝи һерс нәкʹәт, ча сәр Әлифаз у Билдад, чьмки Әлиһу бь ԝан гьлийа да кʹьфше кӧ Хԝәде һʹәԝще хьзмәтийа мә нинә. Әԝ тʹам ә у һʹәԝще тʹӧ тьшти нинә. Әм нькарьн ԝи һе дәԝләти кьн йан жи һе ԛәԝат кьн. Ле дәԝсе һәр һʹӧнӧр, фәрәсәт у ԛәԝат әм жь Хԝәде дьстиньн, у әԝ дина хԝә дьдә кӧ әм ча ԝан пʹешкʹеша дьдьнә хәбате. Чахе әм хушк-бьрарʹа ԛәнщийе дькьн, Йаһоԝа һʹәсаб дькә кӧ әм ԝирʹа ԛәнщийе дькьн. Мәтʹәлок 19:17-да әм дьхуньн: «Йе кӧ аликʹарийа кʹәсиб дькә, дәйн дьдә Хӧдан у Хӧдане жь бәр дайина ԝива, ԝи хәлат кә». Бәле, Йаһоԝа һәр ԛәнщикә кӧ әм мәрьвед бәләнгазрʹа дькьн, дьвинә. У рʹаст ә әԝ Әʹфрандаре гәрдуне йә, ле бьдьнә һʹәсабе хԝә кӧ чахе әм кәсәкирʹа ԛәнщийе дькьн, әԝ хԝә ча дәйндаре мә һʹәсаб дькә. У әԝ ԝи дәйне мә бь ве йәке дьдә, кӧ мә ԛәбул дькә у кʹәрәма хԝә дьдә. Кӧрʹе Хԝәде хԝәха әԝ йәк избат кьр (Луԛа 14:13, 14). w17.04 29 ¶3-4

Хенщи хԝәндьна Кʹьтеба Пироз у әʹдәбйәтед мә, диса һәнә тьшт кӧ дькарьн али мә бькьн ԝәки рʹастийе һʹьз бькьн. Мәсәлә, чахе әм тʹьме тенә сәр щьвате, һʹьзкьрьна мә һьндава Кʹьтеба Пироз һе зедә дьбә, чьмки ԝедәре Йаһоԝа мә һин дькә. Һәр һʹәфти бь сайа журнала «Бьрща Ԛәрәԝьлийе» әм Кʹьтеба Пироз леколин дькьн у әԝ һәйә йәк жь методед сәрәкә бь кʹижани әм тенә һинкьрьне. Сәва кӧ әм жь ԝан готара бь тʹәмами кʹаре бьстиньн, әм гәрәке бона һинбуна «Бьрща Ԛәрәԝьлийе» хԝә пешда һазьр кьн. Мәсәлә, әм дькарьн һʹәму рʹезед кӧ «Бьрща Ԛәрәԝьлийеда» тенә дайине, бьхуньн. Әм дькарьн «Бьрща Ԛәрәԝьлийе» жь малпәра jԝ.org йан жи жь кʹьтебхана мә «JԜ Library app» бькʹьшиньн, кʹижан кӧ сәр гәләк зьмана һәйә. Бь һьнә форматед әләктроник дьһа һеса йә һәр готарәкеда рʹеза вәкьн. Фьрԛи тʹӧнә әм кʹижан методе жи бьдьнә хәбате, һʹьзкьрьна мә һьндава рʹастийа Кʹьтеба Пироз ԝе ԛәԝи бә, һәрге әм ԝан рʹеза бьхуньн у кʹур сәр бьфькьрьн. w17.05 20 ¶14

Паши ньхӧмандьне, әм гәрәке диса жи бәрдәԝам кьн ль гора тʹәсмилбуйина хԝә Хԝәдерʹа бьжин. Әм нькарьн сонда хԝәйә тʹәсмилбуйине, демәк созе хԝә кӧ мә дабу Хԝәде, пашда һьлдьн. Һәрге кәсәк ида нахԝазә Йаһоԝарʹа хьзмәт кә у пе ԛанунед ԝи бьжи, әԝ нькарә бежә кӧ әԝи тʹӧ щар бь рʹастийе хԝә тʹәсмили Хԝәде нәкьрийә, йан жи ԝәки ньхӧмандьна ԝи нәһатийә һʹәсабе, демәк бәтал бу. Чьмки әԝи мәрьви һʹәмде хԝә у хԝәстьна хԝә, бәр шәʹда әʹйан кьр, кӧ әԝи бь тʹәмами хԝә тʹәсмили Хԝәде кьрийә. У һәрге әԝ мәрьв гӧнед мәзьн бькә, әԝ бәр Йаһоԝа у бәр щьвате ԝе щаба хԝә бьдә. Ԝәрә алийе хԝәда һʹәму тьшти бькьн, сәва Иса мәрʹа нәбежә кӧ мә һʹьзкьрьна хԝәйә пешийе ӧнда кьрийә. Бәле әм дьхԝазьн ԝәки Иса әван гьлийа мәрʹа бежә: «Әз һаш жь кьред тә, һʹьзкьрьна тә, баԝәрийа тә, хьзмәткʹари у сәбьра тә һәмә. Әз заньм кӧ кьред тәйә пашԝәхтийе жь йед пешийе зедәтьр ьн» (Әʹйан. 2:4, 19). Ԝәрә әм һәртʹьм бь хирәт ль гора тʹәсмилбуйина хԝә бьжин у дьле Йаһоԝа ша кьн. w17.04 6-7 ¶12-13

«Әв йәк набә кӧ һʹакьме тʹәмамийа дьнйайе диԝана рʹаст нәкә» (Дәстп. 18:25). Бь ԝан гьлийа Бьраһим да кʹьфше кӧ әԝ дӧдьли нәдьбу, ԝәки Йаһоԝа ԝе бь һәԛи диԝана Содом у Гоморайе бькә. Бьраһим сәд сәләфи заньбу, ԝәки Йаһоԝа ԝе тʹӧ щар нәһәԛийе нәкә у «рʹаста тʹәви нәԛәнща» ӧнда нәкә. Һʹьше Бьраһимрʹа жи дәрбаз нәдьбу кӧ Хԝәде дькарә тьштед ӧса бькә. Бьраһим сәд сәләфи баԝәр бу, кӧ Йаһоԝа тʹьме диԝана рʹаст дькә, чьмки Йаһоԝа хԝәха һәԛийе у рʹастийеда мәсәләкә лапи мәзьн ә. Хәбәред Ибрани кӧ һатьнә ԝәлгәрʹандьне ча «һәԛи» у «рʹасти», Кʹьтеба Пирозда гәләк щар кʹеләка һәв тенә ньвисаре. Дькарьн бежьн кӧ ортʹа ԝан дӧ хәбәрада фьрԛи тʹӧнә. Бәле, Йаһоԝа рʹаст ә, демәк әԝ тʹьме бь һәԛийе тьшта сафи дькә. Чаԝа кӧ Хәбәра ԝи дьбежә, «әԝ рʹастийе у һәԛийе һʹьз дькә» (Зәб. 33:5). w17.04 18 ¶1-2

Де-бавно, сәва кӧ зарʹед ԝә бьбьнә достед Йаһоԝа у жийина һʹәта-һʹәтайе бьстиньн, мәсәла ԝә гәләк фәрз ә. Чахе зарʹед ԝә дьвиньн кӧ һун «бәре пешьн ль Пʹадшатийа Хԝәде» дьгәрʹьн, әԝана һин дьбьн итʹбарийа хԝә Йаһоԝа биньн бона һʹәԝщед хԝәйи һәррʹожи (Мәт. 6:33, 34). Де-бавно, нәкʹәвьнә пәй һәбуке. Тьштед материали бьра бона ԝә щийе пешьн нәгьрьн. Нәкʹәвьнә бьн дәйна. «Хьзна . . . ль әʹзмен» бьгәрʹьн, демәк ԛәбулкьрьна Йаһоԝа, нә кӧ һәбуке йан жи «пәсьна» алийе мәрьвада (Марԛ. 10:21, 22; Йуһʹн. 12:43). Бьра ӧса нибә кӧ жь бо гәләк шьхӧла, ԝәʹде ԝә нәминә бона зарʹед ԝә. Зарʹед хԝәрʹа бежьн, ԝәки һун ԝанрʹа фьрнаԛ дьбьн гава әԝана Йаһоԝа датиньн щийе пешьн, у пәй һәбуке у нав-дәнге хԝә накʹәвьн. Ве дьнйайеда гәләк дьфькьрьн кӧ зарʹ гәрәке һәр тьшти бькә, ԝәки де-бав рʹьһʹәт у бехәм бьжин, ле әԝ ньһерʹандьн нә ль гора Кʹьтеба Пироз ә. Бир нәкьн, «нә кӧ гәрәке зарʹ бона де-бава бькьн, ле де-бав бона зарʹа» (2 Корн. 12:14). w17.05 8-9 ¶3-4