Тирмәһ

Шәбна щийе бьльнд дьгьрт чьмки «ль сәр мала ԛьрал бу», дьԛәԝьмә сәр мала Һьзԛийа (Иша. 22:15). Ле йазьх әԝ бу йәки бабах у ԛӧрʹә у дьхԝәст гьшк ԝи һӧрмәт кьн (Иша. 22:16-18). Бәле, Шәбна рʹумәта хԝә дьгәрʹийа, ләма Хԝәде әԝ жь щийе ԝи авит у Елйаким да дәԝса ԝи (Иша. 22:19-21). Әԝ йәк ԛәԝьми чахе Пʹадше Асуре Санһәриб мьԛабьли Оршәлиме дәркʹәт. Һьнәк ԝәʹдә шунда, әԝи пʹадшайи мәрьвед хԝә тʹәви ордийа мәзьн шанд, сәва кӧ Щьһуйа бьтьрсинә у Һьзԛийа бьхальфинә (2 Пʹадш. 18:17-25). Елйаким һатә шандьне ԝәки тʹәви мәрьва хәбәр дә. Әԝ тʹәви дӧ мәрьва чу, у йәк жь ԝан Шәбна бу, кӧ ида ча аликʹарчи хьзмәт дькьр. Жь ве йәке те кʹьфше, ԝәки Шәбна чахе щийе хԝәйи бьльнд ӧнда кьр, һерс нәкʹәт у нәбу йәки зӧлм. Әʹйан ә кӧ әԝи бь мьлукти щабдарийа нәбьльнд ԛәбул кьр. w18.03 25 ¶7-8, 10

Һәрге ԝә тедәрхьстийә кӧ һʹьш-аԛьле ԝә дьчә сәр һәбуке йан жи хԝәстьнед бәдәни, хԝә әглә нәкьн, сәр хԝә бьхәбьтьн. Тʹьме жь Йаһоԝа рʹӧһʹе пироз бьхԝазьн, у әԝ ԝе али ԝә бькә, ԝәки һун ньһерʹандьна хԝә бьгӧһезьн у һʹьш-аԛьле хԝә дайньн сәр тьштед фәрз (Луԛа 11:13). Биньн бира хԝә Пәтрусе шанди. Чәнд щара әԝи тьштед ӧса кьр ча мәрьвәки нәрʹӧһʹани (Мәт. 16:22, 23; Луԛа 22:34, 54-62; Галт. 2:11-14). Ле әԝ дьлтәнг нәбу, у Йаһоԝа али ԝи кьр. Һеди-һеди Пәтрус һин бу мина Иса бьфькьрә у әԝи ньһерʹандьна хԝә гӧһаст. Әм жи гәрәке ӧса бькьн. Пәтрус паше дәрһәԛа чәнд һʹӧнӧра гот, кʹижан кӧ дькарьн али мә бькьн (2 Пәт. 1:5-8). Һәрге әм «һәр алийава хирәт кьн» сәва һʹӧнӧред ӧса нав хԝәда пешда биньн ча хԝәгьртьн, сәбьр, у һʹьзкьрьн һьндава хушк-бьра, әме рʹӧһʹанида һе пешда һәрʹьн. Ԝе баш бә әм һәр рʹож пьрсәкә ӧса бьдьнә хԝә: «Иро әз сәр кʹижан һʹӧнӧри дькарьм бьхәбьтьм сәва рʹӧһʹанида пешда һәрʹьм?» w18.02 25-26 ¶12-13

Ибо принсипед Хԝәде рʹьнд фәʹм дькьр. Әԝи бь рʹастийе Йаһоԝа нас дькьр, у ләма тьштед рʹаст дькьр. Бәʹса хәбәре, дина хԝә бьдьн кӧ Ибо заньбу, ԝәки әԝ ԝе нькарьбә бежә кӧ Хԝәде һʹьз дькә, һәрге һьндава мәрьва хьраб бә (Иб. 6:14). Әԝи тӧ щар хԝә сәр мәрьварʹа нәдьгьрт, у нәдьфькьри ԝәки әԝ жь йед майин баштьр ә. Ле әԝ бь дьл у әшԛ бу тʹәви һʹәмушка, ча тʹәв йе дәԝләти ӧса жи тʹәви кʹәсиба. Әԝи гот: «Ма йе мьн дь зьке дайикеда афьрандийә, ԝи жи нә хӧлӧԛандийә?» (Иб. 31:13-22). Бәле, жь ве йәке әм дьвиньн кӧ чахе Ибо гәләк дәԝләти у навдар бу, әԝ нәбу йәки ԛӧрʹә, у тӧ щар йед дьн ньмьз нәдькьр. Рʹасти әԝ чьԛас щӧдә дьбә жь ԝан мәрьва, йед кӧ иро дәԝләти нә у һʹӧкӧме ԝан һәйә! Ибо һәла һе дьле хԝәда жи һәр щурʹе пʹутпарьстийе инкʹар дькьр. Әԝи ӧса жи заньбу кӧ һәрге пәй һәбуке кʹәвә, ԝе «Хԝәдайе ль жоре» инкʹар кә (Иб. 31:24-28). Ибо зәԝащ ча созәки пироз һʹәсаб дькьр. Әԝи һәла һе жи тʹәви чʹәʹве хԝә пәйман гьредабу кӧ пе чʹәʹве хьраб сәр ԛиза нәньһерʹә (Иб. 31:1). w18.02 11 ¶16; 12 ¶18-19

Нӧһ нәдьфькьри ԝәки бәс ә тʹәне мәрьвәки баш бә. Әԝи ӧса жи «рʹасти даннасин дькьр», у әʹйан гьшкарʹа дьгот дәрһәԛа баԝәрийа хԝә һьндава Йаһоԝа (2 Пәт. 2:5). Паԝлосе шанди гот кӧ Нӧһ «бь ԝе баԝәрийе диԝана дьне кьр» (Ибрн. 11:7). Бешьк дькарьн бежьн кӧ һьнге мәрьва ԛәрфе хԝә Нӧһ дькьрьн у пәй дькʹәтьн. Дьбәкә һәла һе жи ԝи дьданә тьрсандьне кӧ ԝе хьрабийе жерʹа бькьн. Ле Нӧһ жь мәрьва нәдьтьрсийа (Мәтʹлк. 29:25). Нӧһ мерхас бу, чьмки Йаһоԝа мерхаси дабу ԝи, чаԝа хьзмәткʹаред хԝәйи амьнрʹа дьдә. Нӧһ паши пенщ ԛьрʹна зедәтьр рʹийа Хԝәдеда дьчу, у паше Йаһоԝа жерʹа гот кӧ гәмийа мәзьн ава кә, сәва мәрьв у һʹәйԝан ԝәʹде Селаве хьлаз бьн (Дәстп. 5:32; 6:14). Бона Нӧһ рʹасти жи нәһеса бу гәмийа мәзьн ава кә. Ле әԝи заньбу кӧ чәтьнайи ԝе нә кӧ тʹәне авакьрьна гәмийеда бә, ле мәрьв жи ԝе дьһа зедә ԝи бькʹәньн у мьԛабьли ԝи дәркʹәвьн. Йәкә әԝан тьшта рʹе ԝи нәдьгьртьн, у әԝи баԝәрийа хԝә Хԝәде дьани у гӧрʹа ԝида бу. Нӧһ һәма «ӧса жи кьр» ча Хԝәде жерʹа гот (Дәстп. 6:22). w18.02 4 ¶4, 6-7

Әм дькарьн йәктийе хԝәй кьн, һәрге һʹьзкьрьнеда чʹәʹв бьдьнә Йаһоԝа, йе кӧ Хԝәдейе һʹьзкьрьне йә (1 Йуһʹн. 4:8). Әм тӧ щар нахԝазьн бежьн сәр хушк-бьра гьлийед ӧса: «Әз гәрә ԝана сәбьр кьм, чьмки хушк-бьред мьн ьн, ле әʹсә нинә әз ԝана һʹьз бькьм!». Бьфькьрьн сәр ширәта Паԝлос, йе кӧ гот «һʹьзкьрьнеда ль бәр һәв дахьн» (Әфәс. 4:2). Дина хԝә бьдьн, әԝи нә гот тʹәне «ль бәр һәв дахьн», демәк һәв сәбьр кьн, ле әԝи гот кӧ «һʹьзкьрьнеда» ве йәке бькьн. Демәк фьрԛи һәйә. Щьвата мәда һʹәму щурʹә мәрьв һәнә кʹижана Йаһоԝа незики хԝә кьрийә (Йуһʹн. 6:44). Әԝана дьле ԝи һатьн, ләма әԝи ԝана незики хԝә кьр. Ԝәки ӧса нә, чь изьна мә һәйә кӧ лома хушк-бьред хԝә бькьн, у бежьн кӧ әԝана һежайи һʹьзкьрьна мә ниньн? Дәԝсе, әм гәрәке тʹӧ щар хԝә паш нәхьн һʹьзкьрьне бьдьнә кʹьфше, чьмки Йаһоԝа ве йәке жь мә дәʹԝа дькә (1 Йуһʹн. 4:20, 21). w18.01 16 ¶14

Һьнә де-бав дьфькьрьн ԝәки һе баш ә зарʹа ԝан пешийе хԝәндьна бьльнд бьстинә у хәбатәкә баш хԝәрʹа бьвинә, паше бе ньхӧмандьне. Рʹаст ә бь ве йәке де-бав зарʹа хԝәрʹа хьрабийе нахԝазьн, ле һәрге зарʹ пешийе әԝан нета дайнә пешийа хԝә, гәло бь рʹастийе ԝе пешдачуйи у бәхтәԝар бә? Ԝе баш бә де-бав пьрсед ӧса бьдьнә хԝә: Гәло әԝ йәк ль гора Хәбәра Хԝәде йә? Гәләк фәрз ә бир нәкьн ԝәки әв дьнйа у тьштед ве дьнйайе, мьԛабьли ԛьрар у ньһерʹандьна Йаһоԝа нә (Аԛуб 4:7, 8; 1 Йуһʹн. 2:15-17; 5:19). Чахе һәләԛәтийа зарʹе тʹәви Йаһоԝа незик ә, әԝ йәк дькарә ԝи жь Шәйтʹан у дьнйа ԝи, у ӧса жи жь ньһерʹандьна ве дьнйа хьраб хԝәй кә. Һәрге де-бав хԝәндьна бьльнд у хәбате датиньн сәр щийе пешьн, зарʹ дькарә бьфькьрә ԝәки әԝ тьшт жь һәләԛәтийа тʹәви Йаһоԝа фәрзтьр ьн. Әԝ йәк гәләк хоф ә. Де-бавед кӧ зарʹед хԝә һʹьз дькьн, ԝе тʹӧ щар нәхԝазьн ԝәки зарʹед ԝан ве дьнйайеда пешдачуйи бьн. Бь рʹастийе бәхтәԝари у пешдачуйина рʹаст тʹәне һьнге йә, чахе Йаһоԝа йә сәр щийе пешьн әʹмьре мәда (Зәб. 1:2, 3). w18.03 10-11 ¶10-11

Гәләк хьзмәткʹаред Хԝәде бь әʹмьрәки һеса дьжин. Ԝана фәʹм кьр кӧ әԝ йәк ԝана нә кӧ тʹәне бәхтәԝар дькә, ле һьн жи һе зедә ԝәʹде ԝан дьминә бона хьзмәткьрьна Йаһоԝарʹа. Бьраки мә бь наве Жак ханийа хԝәйә мәзьн у бизнеса хԝә фьрот, чьмки заньбу ԝәки ӧса әԝе бькарьбә мина жьна хԝә ча пешәнг хьзмәт кә. Әԝ гьли дькә: «Бь сала әз сәва проблемед хәбатеда, дьлтәнг дьһатьмә мал. Ле жьна мьн кӧ пешәнг ә, тʹьме йәкә ша бу. Әԝе мьнрʹа дьгот: ‹Мәзьне хәбата мьн, кәсе һәри бьльнд ә!› Ньһа әз у жьна мьн ча пешәнг хьзмәт дькьн, у әм һәрдӧ жи бона Йаһоԝа дьхәбьтьн». Сәва әм хԝә бьщерʹьбиньн кӧ һьндава пʹәрада әм чаԝа ньн, әм гәрәке һʹәлал хԝә бьщерʹьбиньн у пьрсед ӧса бьдьнә хԝә: «Гәло пе әʹмьре мьн те кʹьфше ԝәки әз тиньм сери гьлийед Кʹьтеба пироз дәрһәԛа пʹәра? Гәло әʹмьре мьнда пʹәрә щийе пешьн дьгьрә? Гәло бона мьн тьштед материали дьһа ԛимәт ьн, йан һәләԛәтийа мьн тʹәви Йаһоԝа у мәрьва? Гәло әз бь рʹастийе итʹбарийа хԝә Йаһоԝа тиньм, ԝәки әԝ бона һʹәԝщед мьн ԝе хәм бькә?» Әм дькарьн дӧдьли нәбьн ԝәки Йаһоԝа ԝе тӧ щар ԝана наһелә, йед кӧ баԝәрийа хԝә ԝи тиньн. w18.01 25 ¶12-13

Бона хьлазбуна хԝә бьхәбьтьн, әԝ щабдарийа мәзьн ә. Сәва ве йәке әм гәрәке Хәбәра Хԝәде бьхуньн у сәр бьфькьрьн, дӧа бькьн Йаһоԝарʹа, у бьфькьрьн дәрһәԛа кʹәрәмед кӧ Йаһоԝа хут дьдә мә. Һәрге тӧ ԝан тьштада пешда һәри, тӧйе дьһа баԝәр би, ԝәки Йаһоԝа досте тә йә. Әԝ йәк ԝе тә һелан кә кӧ бь мерхаси хәбәр ди дәрһәԛа баԝәрийа хԝә (Зәб. 73:28). Иса гот: «Һәгәр йәк дьхԝазә ль пәй мьн бе, бьра хԝә инкʹар кә, стуна щәфайе хԝә һьлдә у ль пәй мьн бе» (Мәт. 16:24, ДТʹ). Әʹйан ә кӧ тʹәсмилбуйин у ньхӧмандьн, әв борщдарийа тә йә, чьмки тӧ Мәсиһи йи. Бь сайа ве йәке тӧ дькари беһʹәсаб кʹәрәма бьстини ньһа, у дьнйа тʹәзәда жийина һʹәта-һʹәтайе. Бәле, мәʹнийед тә һәнә ԝәки бона хьлазбуна хԝә бьхәбьти! w17.12 27 ¶18-19

Һәрге де-бав бь сәбьр зарʹед хԝә һин кьн, ԝәʹдә дәрбаз бә зарʹ ԝе бькарьбьн фәʹм бькьн «бәрайи, дьрежайи, бьльндайи у кʹурайийа» баԝәрийе (Әфәс. 3:18). Әм гәрәке һьлдьнә һʹәсаб кӧ әԝана чәнд сали нә у чьԛас фәʹм дькьн. Һәрге баԝәрийа зарʹа ԛәԝи бә ԝан тьштада чь кӧ әԝана һин дьбьн, ԝанрʹа ԝе һеса бә мәрьвед дьнрʹа, мәсәлә һәвалдәрсханед хԝәрʹа, баԝәрийа хԝә шьровәкьн (1 Пәт. 3:15). Бәʹса хәбәре, бьфькьрьн, гәло зарʹед ԝә дькарьн бь сайа Кʹьтеба Пироз шьровәкьн кӧ чь дьԛәԝьмә паши мьрьне? Гәло шьровәкьрьна Кʹьтеба Пироз дәрһәԛа ве пьрсе бона ԝан логики у фәʹмдари йә? Бәле, сәва кӧ зарʹа ԝә баԝәрийа хԝә Хәбәра Хԝәде бинә, лазьм ә һун сәбьр кьн. Бь рʹастийе һежа йә кӧ һун сәбьр кьн, чьмки ӧса һун дькарьн бәред баш бьстиньн (Ԛан. Дщр. 6:6, 7). Сәва баԝәрийа зарʹед ԝә ԛәԝи бә, ӧса жи гәләк фәрз ә кӧ һун ԝанрʹа бьбьнә мәсәла баш. Хушкәкә мә бь наве Стефани кӧ се ԛизед ԝе һәнә, гьли дькә: «Әз пьрсед ӧса дьдьмә хԝә: ‹Әз зарʹед хԝәрʹа шьровәдькьм кӧ чьрʹа әз дӧдьли ниньм ԝәки Йаһоԝа һәйә, әԝ мә һʹьз дькә у рʹийед ԝи рʹаст ьн?› Әз нькарьм һивийе бьм кӧ зарʹед мьн баԝәрийеда ԛәԝи бьн, һʹәта кӧ әз хԝәха ԛәԝи нибьм». w17.12 20 ¶8-10

Чьрʹа Мәртʹа дӧдьли нибу кӧ бьре ԝе жь мьрьне ԝе рʹабуйа? Чьмки әԝе пеһʹәсийабу дәрһәԛа рʹабуна мьрийа кӧ бәре ԛәԝьмибун. Дәрһәԛа ԝан ԛәԝьмандьна әԝ дьбәкә бьчʹуктайеда малда йан жи кʹьништеда пеһʹәсийабу. Ԝәрә әм се сәрһатийа шеԝьр кьн кӧ Кʹьтеба Пирозда тенә гьликьрьне, кʹижан кӧ дьбәкә бира Мәртʹайеда бун. Дина хԝә бьдьн сәрһатийа пешьн дәрһәԛа сахкьрьне. Әԝ ԛәԝьми чахе Хԝәде ԛәԝат да Елйас кӧ кʹәрәмәта бькә. Финикйайеда шәһәре Сәрәптада, жьнәбикә кʹәсиб дьжит, йа кӧ Елйасрʹа меванһʹьзи да кʹьфше. Хԝәде бь кʹәрәмәт ӧса кьр, кӧ ар у рʹун мала ԝеда хьлаз нәдьбу сәва кӧ әԝ кӧрʹе хԝәва сах бьминьн (1 Пʹадш. 17:8-16). Ԝәʹдә шунда кӧрʹе ԝе гьран нәхԝәш кʹәт у мьр. Ве дәме Елйас али ԝе кьр. Әԝи дәсте хԝә да гәде мьри, Йаһоԝарʹа дӧа кьр у гот: «Йа Хӧдан, . . . әз лава жь тәрʹа дькьм, бьра щане ви лаԝьки вәгәрʹә һӧндьрʹе ԝи». У бь рʹасти әԝ йәк ԛәԝьми. Хԝәде дӧайе Елйас бьһист у гәдә сах бу. Әԝ сәрһатийа пешийе йә дәрһәԛа сахкьрьне, кӧ Кʹьтеба Пирозда ньвисар ә (1 Пʹадш. 17:17-24). Бешьк, Мәртʹайе дәрһәԛа ве ԛәԝьмандьне заньбу. w17.12 3 ¶1; 4 ¶3, 5-6

Гәләк мәрьв тʹәви мә дькʹәвьнә дәʹԝе, дьбежьн кӧ әм ԝәʹдә у ԛәԝата хԝә гәрәке хәрщ кьн сәр хәбата баш. Хәбат дькарә мәрьва бькә навдар, хԝәйиԛәдьр у дәԝләти. Ве дьнйайеда гәләк дьфькьрьн кӧ мәрьв һьнге бәхтәԝар ә, чахе хәбата ԝийә баш һәйә. Әм гәрәке һаш жь хԝә һәбьн ԝәки нәкʹәвьнә бәр байе ньһерʹандьна ԝан. Гәло бь рʹастийе хәбата баш кӧ мәрьва дькә навдар у дәԝләти, бәхтәԝарийе тинә? На. Бьфькьрьн сәр ве йәке: Шәйтʹан гәләк дьхԝәст бьбә хԝәйиһʹӧкӧм у навдар, у дькарьн бежьн әԝи чь дьхԝәст әԝ жи станд. Ле йәкә әԝ диса жи бәхтәԝар нинә, һерс у зӧлм ә (Мәт. 4:8, 9; Әʹйан. 12:12). Хәбата баш у пешдачуйин дькарә сәр ԝәʹдәки кьн бәхтәԝарийе бинә. Ле чахе әм али мәрьва дькьн кӧ дәрһәԛа Хԝәде у созед ԝи бона жийина һʹәта-һʹәтайе пебьһʹәсьн, әв шабунәкә ӧса тинә кӧ кʹӧта набә. Әва дьнйа мәрьва һелан дькә кӧ хԝә сәр йед дьнрʹа бьгьрьн сәва пешда һәрʹьн. Бона ве йәке мәрьв һʹәвсудийе һәв дькьн у дьбьнә һерс. Әԝ һәр тьшт ахьрийеда дьбә «гьртьна байе» (Ԝаиз 4:4). w17.11 23 ¶11-13

Ԝәʹде Исада жи һʹәбандьна рʹастда кʹьлама щийе фәрз дьгьртьн. Биньн бира хԝә еварәкә мәхсус нав тʹәмамийа тʹәрихийа инсанәтеда. Гава Иса Шива Хӧдан дәрбаз кьр, әԝи шагьртед хԝәва бь кʹьлама пәсьн данә Йаһоԝа. Мәсиһийед ԛьрʹна йәке тʹәвайи бь кʹьлама пәсьне Хԝәде дьдан. Әԝ бона мә мәсәлә йә. Гәләк щар әԝана дьзикава малада тʹоп дьбун, ле әԝе йәке рʹе ԝан нәдьгьрт, ԝәки пәсьне Йаһоԝа бьдьн. Паԝлос пе рʹебәрийа Хԝәде бьред Мәсиһирʹа гот: «Бь һʹәму сәрԝахтийе ль һәв һин кьн у ширәт кьн, зәбура у һәр щурʹә стьранед рʹӧһʹани бь шькьрдари дьле хԝәда бона Хԝәде бьстьрен» (Колс. 3:16). Кʹьламед кӧ кʹьтеба мәйә кʹьламада һәнә, рʹасти жи «стьранед рʹӧһʹани» нә, кʹижан кӧ гәрәке «бь шькьрдари» бенә стьране. Әв һәйә пʹарәкә хԝарьна рʹӧһʹани кӧ «хӧламе амьн у сәрԝахт» дьдә мә (Мәт. 24:45). w17.11 4 ¶7-8

Йаһоԝа ӧса кьр, ԝәки һеса бә бьгьһижьнә әԝан шәш шәһәред сьтʹарбуне. Әԝи тʹәми да Исраелийа, ԝәки ԝан шәһәра һәрдӧ алийед чʹәме Урдӧнева бьжберьн. Ӧса йе рʹәвира ԝе һеса буйа зу бьгьһижә йәк жь ван шәһәра (Жьмар 35:12-14). Һьн жи рʹийа ԝан шәһәра чекьри бун (Ԛан. Дщр. 19:3). Ль гора әʹдәте Щьһуйа, ԝедәре ль сәр рʹе нишан һәбун, сәва рʹәви һеса бьвинә ԝан шәһәра. Ләма жи әԝе кӧ бей һʹәмде хԝә кәсәк бькӧшта, нәлазьм бу бьрʹәвийа ԝәлате хәриб, сәва хԝә хьлаз кә. Ԝәлате хәрибда әԝ дькарьбу бькʹәта тʹәльке у хӧданед ԛәлп бьһʹәбанда. Бьфькьрьн дәрһәԛа ԝе йәке: Йаһоԝа тʹәми дабу ԝәки меркӧж бьһата кӧштьне. Ле әԝи ӧса жи тʹәми дабу, ԝәки мәрьве кӧ бе һʹәмде хԝә кәсәк бькӧшта, дькарьбу рʹәʹма Хԝәде бьстанда у хьлаз буйа! Зандарәки Кʹьтеба Пироз гот: «Һәр тьшт пе нете бу у гәләк һеса». Йаһоԝа һʹакьме дьлсар нинә, кʹижан кӧ мәʹни дьгәрʹә сәва хьзмәткʹаред хԝә щәза кә. Ле әԝ «хԝәйе рʹәʹма дәԝләмәнд ә» (Әфәс. 2:4). w17.11 14 ¶4-5

Кʹьтеба гӧломәтк кӧ дьфьрʹә, жьн һӧндӧрʹе сәләйа дадайида, у дӧ жьн бь баскед мина йед ләгләге дьфьрʹьн. Әԝ йәк Зәкәрйа пʹехәмбәр хәԝн-хәйалада дит (Зәкәр. 5:1, 7-9). Ле гәло чьрʹа Йаһоԝа әԝ хәԝн-хәйал нишани пʹехәмбәре хԝә кьр? Хәԝн-хәйалед шәша у һʹәфта кӧ Зәкәрйа дит, ширәтәкә фәрз дьдьнә ԝан, йед кӧ ԛәлпи у хьрабийе дькьн. Йаһоԝа ԝе нәһелә ԝәки хьраби бьминә. Хьраби гәрәке бәр чʹәʹвед хьзмәткʹаред ԝи жи рʹәш бә. Әв хәԝн-хәйал жь Баве мәйи әʹзмана бона мә ширәт у дәрс ьн. Һәрге әм бь дьл у щан һәр тьшти дькьн сәва Хԝәде хԝәш бен, һьн жи ԛәбулкьрьн у хԝәйкьрьна ԝи бьстиньн, ньфьрʹ ԝе нәйе сәр мә, ле әме кʹәрәмед Хԝәде бьстиньн. Бона мә нәһеса йә кӧ ве дьнйайеда кʹижан кӧ хьрабийеда дьхәньԛә, хԝә тʹәмьз хԝәй кьн. Ле пе аликʹарийа Йаһоԝа әм дькарьн хԝә хԝәй кьн. w17.10 21 ¶1; 25 ¶19

Гәләк мәщалед хушкед азәп һәнә хьзмәтийеда, мәсәлә бьбьнә пешәнг, дәрбази ԝи щийи бьн кʹидәре һʹәԝщәти һәйә, мьһала хԝәда шьхӧле авакьрьнеда аликʹарийе бьдьн, йан жи Мәкʹтәба Мьзгинванед Пʹадшатийе дәрбаз бьн. Һьнәк һәла һе дькарьн Мәкʹтәба Гиләд жи дәрбаз бьн. Рʹаст ә хушкед әʹмьрда мәзьн хьзмәтийеда гәләк нькарьн бькьн, йәкә әԝана щьватеда гәләк ԛимәт ьн. Әм ԝан хушкед дәлал гәләк һʹьз дькьн! Һьнәк дьбәкә ида нькарьн һаԛас хьзмәт кьн чьԛас ԝана бәре дькьр, ле йәкә әԝана жи дькарьн мерхасийе бьдьнә кʹьфше у шьхӧл пешда бьвьн. Мәсәлә, һәрге рʹуспи хушкәкә әʹмьрда мәзьнрʹа бежьн, кӧ хушкәкә щаһьл ширәт кә дәрһәԛа кʹьнщхԝәкьрьна ԝе, ԝе хушкерʹа мерхаси лазьм ә. Ле әԝ ԝе тʹӧ щар хушка щаһьл беһӧрмәт нәкә кӧ әԝ кʹьнщед ча хԝә дькә. Дәԝсе әԝе бь нәрми хушка щаһьл һелан кә, ԝәки әԝ бьфькьрә ча кʹьнщхԝәкьрьна ԝе сәр йед дьн дькарә һʹӧкӧм бә (1 Тимтʹ. 2:9, 10). Чахе хушка әʹмьрда мәзьн бь һʹьзкьрьне ширәте дьдә, әԝ йәк дькарә бәре баш бинә. w17.09 31-32 ¶17-18

Ԝәʹдә дьчу, у гәләк мәрьвед хԝәйиһʹӧкӧм дьхԝәстьн ӧса бькьн, ԝәки мәрьв нькарьбьн сәр зьмане хԝә Кʹьтеба Пироз бьхуньн. Ле йәкә мәрьвед дьлсах нәһиштьн кӧ әв йәк рʹе ԝана бьгьрә, у Кʹьтеба Пироз ԝәлдьгәрʹандьн сәва бал гьшка жи һәбә. Мәсәлә, мәрьве хԝәдехоф наве кʹижани Щон Ԝиклиф бу у ԛьрʹна 14-да Инглистанеда дьжит, әԝи фәʹм дькьр, ԝәки лазьм ә бал һәр кәси Кʹьтеба Пироз һәбә. Ле һьнге, Инглистанеда щьмәʹте ԛә нькарьбу Кʹьтеба Пироз бьхԝәнда. Сала 1382-да Щон Ԝиклиф Кʹьтеба Пироз ԝәлгәрʹанд. Пәйчуйед ԝи кʹижанарʹа дьготьн Лолард, гәләк дьхԝәстьн кӧ Хәбәра Хԝәде бьгьһижә һʹьш у дьле щьмәʹте, у ләма әԝана нав тʹәмамийа Инглистанеда ньга гӧнд бь гӧнд дьгәрʹийан. Ԝана мәрьварʹа Кʹьтеба Пироз йа ԝәлгәрʹандьна Ԝиклиф дьхԝәндьн у копийед ве кӧ бь дәста ньвисар бун ԝанрʹа дьһиштьн. Паши чәнд ԛьрʹна, Әԝропайеда у щийед дьнда, гәләк мәрьва дәстпекьрьн Кʹьтеба Пироз сәр гәләк зьмана ԝәлгәрʹиньн у бәла кьн, сәва мәрьв бькарьбьн бьхуньн. w17.09 20-21 ¶10-12

Чахе жьн-мер дьхԝазьн зарʹа биньн, ле нькарьн, әԝ дьбә «охьрме гьран» (Мәтʹлк. 13:12). Ԝәʹде бәре, чахе жьн безӧрʹәт бу, әԝ гәләк шәрм бу. Раһеле жьна Аԛуб, дәрдәки гьран дькʹьшанд, чьмки хушка ԝе зарʹ дьани, ле әԝе нькарьбу (Дәстп. 30:1, 2). Зәԝащеда дькарә дәрд-кӧләкә ӧса жи һәбә, кӧ жьн у мер нә жи дьфькьрин ԝәки тьштәки ӧса ԝе бьԛәԝьмә. Әԝ дәрд әԝ ә, чахе жьн йан мер дьмьрә. Әԝ ешәкә гәләк гьран ә у нәһеса йә бәр тәйах кьн. Ле Мәсиһи ԛайим баԝәр дькьн кӧ мьри ԝе рʹабьн, у әԝ йәк бәрдьлийа мәзьн дьдә ԝан (Йуһʹн. 5:28, 29). Тәнгасийа ӧсада, Баве мәйи һʹьзкьри бь сайа Хәбәра хԝә дьл дьдә мә у дьле мә һеса дькә. w17.06 4 ¶1; 5 ¶6; 6 ¶9

Щарәке Хԝәде Мусарʹа наве Хԝәйи шәхси у һʹӧнӧред хԝә әʹйан кьр. Йаһоԝа дькарьбу пешийе бьгота кӧ әԝ чьԛас ԛәԝат ә йан жи ча билан ә, ле әԝи пешийе дәрһәԛа рʹәʹмти у дьлшәԝатийа хԝә гот (Дәркʹ. 34:5-7). Һьнге Муса дьхԝәст баԝәр буйа кӧ Хԝәде ԝе али ԝи бькә. Ләма Йаһоԝа пешийе бәʹса ԝан һʹӧнӧра кьр, у бь ве йәке да кʹьфше кӧ дьхԝазә али хьзмәткʹаред хԝә бькә (Дәркʹ. 33:13). Әм ӧса һатьнә чекьрьне кӧ әв һʹӧнӧр, демәк дьлшәԝати, нав мәда һәйә, ле щара әм хԝәһʹьзийе дьдьнә кʹьфше, чьмки әм гӧнәкʹар ьн. Ләма жи мәрʹа щара нәһеса йә сафи кьн аликʹарийе бьдьнә мәрьва, йан бькʹәвьнә һʹәйра хԝә. Ле чь дькарә али ԝә бькә кӧ һе зедә бона мәрьва хәм бькьн? Йа пешьн, ԝәʹдә хԝәрʹа бьвиньн леколин бькьн кӧ Йаһоԝа ча дьлшәԝати нишан кьр у ӧса жи чаԝа мәрьвед дьн нишан кьрьн. Йа дӧда, бьфькьрьн кӧ һун ча дькарьн ве йәкеда чʹәʹв бьдьнә Хԝәде у әԝ йәк ԝе чь кʹаре ԝәрʹа бинә. w17.09 8 ¶1; 9 ¶3

Хԝәстьна мә кӧ мәрьве ну ль хԝә кьн, гәрәке нә сәва ԝе йәке бә кӧ мәрьв пʹайа бьдьнә мә, ле гәрәке наве Йаһоԝа һӧрмәт-рʹумәт кьн. Бир нәкьн, кӧ һәла һе һорийе беԛьсур жи гӧнә кьр, чьмки бу йәки ԛӧрʹә (Бәрамбәр кьн Һәзәԛел 28:17). Әм мәрьвед гӧнәкʹар ьн, ләма жи мәрʹа дьһа чәтьн ә ԝәки хԝә жь ԛӧрʹәбуне дур бьгьрьн. Ле йәкә әм диса жи дькарьн мьлуктийе ль хԝә кьн. Чь дькарә али мә бькә ве йәкеда? Сәва кӧ мьлук бьминьн, әм гәрәке һәр рʹож ԝәʹдә хԝәрʹа бьвиньн, ԝәки Кʹьтеба Пироз бьхуньн у сәр бьфькьрьн (Ԛан. Дщр. 17:18-20). Илаһи гәрәке бьфькьрьн сәр һинкьрьнед Иса у мәсәла мьлуктийа ԝи (Мәт. 20:28). Иса ӧса мьлук у шкәсти бу, кӧ һәла һе ньгед шагьртед хԝә жи шушт (Йуһʹн. 13:12-17). Әм жи гәрәке Хԝәдерʹа дӧа бькьн, ԝәки рʹӧһʹе хԝәйи пироз бьдә мә, чьмки рʹӧһʹе ԝийи пироз дькарә али мә бькә, ԝәки әм хԝә сәр мәрьвед дьнрʹа нәгьрьн (Галт. 6:3, 4). w17.08 25 ¶11-12

Дьбәкә тʹәви мә жи ӧса ԛәԝьмийә, чаԝа тʹәви Паԝлос. Бәʹса хәбәре, мә жь Хԝәде рʹебәри хԝәстийә сәва сафикьрьнәке бькьн, у мә дитийә кӧ рʹӧһʹе пироз рʹебәрийе мә дькә кӧ чь сафикьрьне бькьн. Ле паше ньшкева тьштәки ӧса ԛәԝьми, кӧ әм нә жи һивийе бун, йан жи һʹал у дәрәща мә һатә гӧһастьне (Ԝаиз 9:11). Ле чь дькарә али мә бькә, ԝәки бона тӧ тьшти хәма нәкьн у «әʹдьлайа Хԝәде» бьстиньн? Гьлийед Паԝлос Филипйарʹа нишан дькьн, кӧ сәва ԝәʹде тәнгасийа бина хԝә тәнг нәкьн, әм гәрәке дӧа бькьн чьмки дӧа мина дәрман ә. Демәк, чахе әм бона тьштәки бәрхԝә дькʹәвьн, әм гәрәке дӧада дьле хԝә Хԝәдерʹа вәкьн (1 Пәт. 5:6, 7). Бь баԝәрийе Йаһоԝарʹа дӧа бькьн у дӧдьли нәбьн ԝәки әԝ ԝә һʹьз дькә у мьԛати ԝә дьбә. Бь рʹазибуне дӧа бькьн бона ԝан кʹәрәма кӧ әԝ дьдә ԝә. Әме һе зедә итʹбарийа хԝә ԝи биньн һәрге бир нәкьн кӧ Йаһоԝа «дькарә һәр тьшти һе зедә кә, нә чаԝа әм дьхԝазьн йан дьфькьрьн» (Әфәс. 3:20). w17.08 9 ¶4, 6; 10 ¶10

Гәләк хушк-бьред мә шабунәкә мәзьн дитьнә чахе щаһьлтийеда ча пешәнг хьзмәт кьрьнә. Щаһьлно, ԝе баш бә һәрге һун дәрһәԛа нетед хԝә тʹәви ԝан хушк-бьра хәбәр дьн. Әв хушк-бьред щерʹьбанди дькарьн ԝәрʹа гьли кьн, ԝәки хьзмәткьрьна һәртʹьмда һуне һинкьрьнед ӧса бьстиньн кӧ тʹәмамийа әʹмьре ԝәда кери ԝә бен. Иса сәр әʹзмана гәләк тьшт жь Баве хԝә һин бу. У ԝәʹде хьзмәтийе сәр әʹрде жи әԝ гәләк тьшт һин дьбу. Әԝи дит кӧ шабунәкә чьԛас мәзьн ә чахе мәрьварʹа мьзгинийе гьли дькә у ӧса жи ԝәʹде щерʹьбандьнада амьнийе хԝәй дькә (Иша. 50:4; Ибрн. 5:8; 12:2). Иса шагьртед хԝәрʹа гот: «Һәрʹьн . . . мьләта бькьн шагьртед мьн» (Мәт. 28:19, 20, ИМ). Щаһьлно, һәрге һун хԝәрʹа нете дайньн кӧ ԝи шьхӧли бькьн, һуне бәхтәԝар бьн, чьмки бь ԝи шьхӧли һуне рʹумәте бьдьнә Хԝәде. Ле сәва ԝи шьхӧлида щерʹьбанди бьн, лазьм ә ԝәʹдә. w17.07 23 ¶6-7

Бешьк, канийа бәрдьлийе Баве мәйи дьлшәԝат, Йаһоԝа йә (2 Корн. 1:3, 4). Щьват ӧса жи дькарә бәрдьлийа мәзьн бьдә ԝан, йед кӧ мәрьвед хԝәйи незик ӧнда кьрьнә (1 Тʹеслн. 5:11). Ле һун ча дькарьн йед бь «дьле хәм» дьлгәрм кьн у ԛәԝи кьн? (Мәтʹлк. 17:22) Фәрз ә әм бир нәкьн кӧ «ԝәхта һʹьшбуне һәйә у ԝәхта готьне һәйә» (Ԝаиз 3:7). Жьнәбикә бь наве Дален дьбежә: «Әԝе кӧ мәрьве хԝә ӧнда кьрийә, гәрәке кʹәла дьле хԝә бьрʹежә. Ләма жи йа лапә фәрз әԝ ә, кӧ гӧһ бьдьнә ԝи мәрьви у хәбәрдана ԝи нәбьрʹьн». Щунйа, бьре кʹижани хԝә кӧшт, зедә дькә: «Һәрге жи һун бь тʹәмами нькарьн дәрде ԝи кәси фәʹм бькьн, ле сәри әԝ ә кӧ һун дьхԝазьн һʹале ԝи фәʹм кьн». Әм гәрәке ӧса жи бир нәкьн, кӧ нә һʹәму мәрьв мина һәв бәр дәрде хԝә тәйах дькьн у дәрде хԝә әʹйан дькьн. w17.07 13 ¶3; 14 ¶11-13

Иро сәва гәләк мәрьва пʹәрә тьштәки лапи фәрз ә. Әԝана дьфькьрьн чаԝа дәԝләти бьн, һьнәк жи һәбука хԝәрʹа дьләрьзьн. Һәнә мәрьвед ӧса кӧ бона ԝан лапә фәрз ә малбәта ԝан, сьһʹәт-ԛәԝата ԝан, йан жи нет-мәрәмед ԝан. Ле һәйә пьрсәкә лапә фәрз кӧ сәр һәр тьштирʹа йә, әԝ һәйә пьрса пьштгьрийа сәрԝертийа Йаһоԝа. Һʹьш-аԛьле мә гәрәке тʹьме сәр ве йәке бә, кӧ чаԝа пьштгьрийа һʹӧкӧмәтийа Хԝәде бькьн. Ле һәнә тьшт кʹижан кӧ дькарьн һʹьш-аԛьле мә бьрʹәвиньн у әм бир кьн дәрһәԛа ве пьрсе. Бәʹса хәбәре, әм дькарьн бькʹәвьнә һʹәйра шьхӧлед һәррʹожи. Йан жи чахе әм кӧл-дәрда дькʹьшиньн әв пьрса фәрз дькарә жь һʹьше мә дәре. Ле һәрге бона мә дьһа фәрз ә пьштгьрийа Йаһоԝа бькьн, әме чәтьнайада сәбьр кьн у һе незики Йаһоԝа бьн. w17.06 22 ¶1-2

Йаһоԝа бь һʹьзкьрьн сәрԝертийе дькә. Рʹуспи у малхед мале, йед кӧ сәрԝертийа Йаһоԝа һʹьз дькьн, ве йәкеда ԝе чʹәʹв бьдьнә Йаһоԝа. Әԝана ԝе тʹӧ щар сәрт нибьн у йед майин контрол нәкьн. Паԝлосе шанди тʹьме чʹәʹв дьда Хԝәде у Кӧрʹе ԝи. Әԝи тʹӧ кәс беһӧрмәт нәдькьр у нә жи зоре ԝан дькьр ԝәки тьштед рʹаст бькьн. Дәԝсе, әԝи ԝана һелан дькьр у жь ԝан һиви дькьр (Рʹом. 12:1; Әфәс. 4:1; Фьльмн. 8-10). Ӧса әԝи чʹәʹв дьда Йаһоԝа. Бәле, һәр кәс жь мә йе кӧ сәрԝертийа Йаһоԝа һʹьз дькә, гәрәке һьндава мәрьвада ӧса бә. Әм гәрәке һәвкʹарийе бькьн тʹәви ԝан, кʹера Йаһоԝа һʹӧкӧм дайә. Ԝи щурʹәйи әме нишан кьн кӧ пьштгьрийа сәрԝертийа Йаһоԝа дькьн. Һәрге жи әм бь тʹәмами фәʹм накьн йан жи ԛайил ниньн тʹәви сафикьрьнәкә ԝан, әме диса жи пьштгьрийа ԝан бькьн. Ве дьнйайеда ӧса нинә, ле һәрге әм дьхԝазьн бьн сәрԝертийа Йаһоԝада бьжин, әм гәрәке ӧса бькьн (Әфәс. 5:22, 23; 6:1-3; Ибрн. 13:17). w17.06 30 ¶14-15

Щаһьл у йед әʹмьрда мәзьн дькарьн аликʹарийе бьдьнә ԝан хушк-бьра, йед кӧ тәнгасийеда ньн, йан кʹәтьнә депресийе. Әм гәрәке кʹеләка ԝан хушк-бьра бьн, ԝана ԛәԝи кьн у бәр дьле ԝанда бен (Мәтʹлк. 12:25; Колс. 4:11). Бәле, гава әм бь гьлийа у бь кьред хԝә хушк-бьрарʹа һʹьзкьрьне нишан дькьн, әм избат дькьн ԝәки әм хәм дькьн бона «нәфәред мала Хԝәде» (Галт. 6:10). Кʹьтеба Пирозда те готьне кӧ «рʹожед ахьрийеда» мәрьв ԝе бьбьнә хԝәһʹьз у тьма (2 Тимтʹ. 3:1, 2). Ләма жи әм гәрәке мьԛати хԝә бьн, сәва һʹьзкьрьна хԝә һьндава Хԝәде, рʹастийа Кʹьтеба Пироз у һьндава һәвдӧ ӧнда нәкьн. Щара дьбәкә әм у хушк-бьра һәв фәʹм нәкьн. Ле чьмки әм ԝана һʹьз дькьн, әм тʹәви ԝан ль һәв тен у әԝ йәк щьватерʹа кʹәрәма тинә (Әфәс. 4:32; Колс. 3:14). Ләма жи әм гәрәке бәрдәԝам кьн һәр тьшти бькьн, сәва һʹьзкьрьна мә һьндава Йаһоԝа, Хәбәра ԝи, у хушк-бьрада тʹӧ щар кʹӧта нәбә. w17.05 21 ¶17-18

Бь рʹастийе әм әʹщебмайи наминьн чахе ве дьнйайеда рʹасти нәһәԛийе тен. Ле баԝәрийа мә дькарә бе щерʹьбандьне, чахе мәва те кʹьфше кӧ щьватеда нәһәԛи те кьрьне. Һуне ча хԝә бьдьнә кʹьфше, һәрге щьватеда һун нәрʹастийе бьвиньн, йан жи һәрге хушкәк йан бьрак һьндава ԝә нәһәԛийе бькә? Һуне бьлькӧмьн? Әм гьшк гӧнәкʹар ьн у бьн һʹӧкӧме гӧнәда ньн, ләма жи әм фәʹм дькьн кӧ щара щьватеда жи әм дькарьн һьндава хԝә йан һьндава кәсәки дьн нәһәԛийе бьвиньн. Рʹаст ә әԝ йәк һʹәзара щарәке дьԛәԝьмә, ле Мәсиһийед амьн әʹщебмайи наминьн у нә жи дьлькʹӧмьн һәрге нәһәԛийе дьвиньн. Чахе әм алийе хушк-бьрада нәрʹастийе дьвиньн, әԝ йәк һеса нинә. Сәва кӧ ԝе дәрәщеда амьнийа хԝә хԝәй кьн, Йаһоԝа Хәбәра хԝәда мәрʹа ширәтед баш дайә (Зәб. 55:12-14). w17.04 19 ¶4-5

Һәрге кʹӧлфәт йан малхе тә нәбаԝәр ә, әԝ йәк зәԝаща тәда дькарә стрес у чәтьнайа зедә кә. Ле әв йәк кӧ кʹӧлфәт йан жи малхе тә рʹастийе ԛәбул накә, гәрәке нәбә мәʹни кӧ һун башԛә бьжин йан жи жь һәв бьԛәтьн (1 Корн. 7:12-16). Һәрге малхе мале нәбаԝәр ә у алийе рʹӧһʹанида мьԛати малбәте набә, йәкә жьн гәрәке ԛәдьре ԝи бьгьрә, чьмки әԝ сәре малбәте йә. Ӧса жи һәрге жьн нәбаԝәр ә, мер гәрәке һьндава ԝе бь һʹьзкьрьн бә у ле хԝәй кә (Әфәс. 5:22, 23, 28, 29). Һәрге жьн йан мере тә дьхԝазә кӧ тӧ һе кем Хԝәдерʹа хьзмәт ки, чь гәрәке бьки? Бәʹса хәбәре, мере хушкәке жерʹа готийә, ԝәки әԝ һʹәфтийе тʹәне чәнд рʹожа һәрә хьзмәтийе. Һәрге тӧ жи дәрәща ӧсада ни, пьрсәкә ӧса бьдә хԝә: «Гәло әԝ дьхԝазә кӧ әз ԛә Хԝәдерʹа хьзмәт нәкьм? Һәрге на, гәло әз дькарьм ве йәке бькьм чь әԝ дьхԝазә?» Һәрге тӧ бәрбьһер у сәрԝахт и, тӧйе ӧса бьки кӧ ортʹа ԝәда кем чәтьнайи һәбьн (Фили. 4:5). w17.10 13 ¶7-8

Чаԝа һатьбу пʹехәмбәртикьрьне, мәрьв жь һʹәму мьләта йед кӧ бь щурʹә-щурʹә зьмана хәбәр дьдьн, тенә тʹәшкиләта Йаһоԝа (Зәкәр. 8:23). Ле фьрԛийа ортʹа зьмане де-бава у зарʹед ԝан, дькарә чәтьнайе пешда бинә. Де-бавно ԝәрʹа дьбәкә чәтьн бә рʹастийе зарʹед хԝә һин кьн. Ле зарʹед ԝә шагьртед ԝәйи лапи фәрз ьн. Һун гәрәке ԝана Кʹьтеба Пироз һин кьн, чьмки ӧса әԝана ԝе Йаһоԝа «нас» бькьн у бькарьбьн жийина һʹәта-һʹәтайе бьстиньн (Йуһʹн. 17:3). Сәва кӧ зарʹед ԝә тʹәмийед Йаһоԝа пебьһʹәсьн, һун гәрәке тʹьме тʹәви ԝан дәрһәԛа Хԝәде хәбәр дьн (Ԛан. Дщр. 6:6, 7). Зарʹед ԝә ԝе зьмане хәриб һин бьн жь мәкʹтәбе у жь мәрьвед дор бәре хԝә. Ле зьмане ԝә әԝана ԝе һин бьн, һәрге тʹьме тʹәви ԝә сәр зьмане ԝә хәбәр дьн. Чахе зарʹ зьмане ԝә бьзаньбьн, ԝе ԝанрʹа һеса бә дьле хԝә ԝәрʹа вәкьн. Диса кʹарәк һәйә чахе зарʹ сәр чәнд зьмана хәбәр дьдьн. Һʹьше ԝан рʹьнд дьхәбьтә у әԝана һе рʹьнд мәрьва фәʹм дькьн. w17.05 9 ¶5-6

Чʹәкед Исраелийа нә бона шәрʹкьрьне һәбун, нә жи тьштед сәва хԝә хԝәй кьрана. Ле щәм дьжмьна 900 әʹрәбед бь кʹеләндийед һʹәсьн һәбун (Һʹакьм. 4:1-3, 13; 5:6-8). Ле йәкә Йаһоԝа тʹәми да Барак кӧ рʹеза рʹожеда те готьне. У чаԝа Йаһоԝа рʹебәри да, Барак чу шәрʹ пешийа дьжмьна (Һʹакьм. 4:14-16). Таанакеда, щийе кӧ ԝана шәрʹ дькьр, ньшкева барана ԛайим бари у әʹрд бу һʹәрʹи-чамур. Барак пәй ордийа Сисәра кʹәт у ԝәкә 24 километра пәй ԝан чу, һʹәта Һарошәте. Рʹева әʹрәба Сисәра кʹәтә һʹәрʹийе, у әԝ мәщбур бу әʹрәба хԝәйә бекер щида бьһелә у бьрʹәвә. Жь тьрсе әԝ рәʹви у чу алийе Тсаананниме. Сәва кӧ хԝә вәшерә, ль ԝе дәре әԝ кʹәтә мала жьнькәкә бь наве Йаел. Сисәра ԛайим ԝәстийайи бу, у чу рʹаза. Чахе әԝ кʹур рʹазайи бу, һьнге Йаеле ԝи кӧшт (Һʹакьм. 4:17-21). Бәле, бь аликʹарийа Йаһоԝа Исраелийа дьжмьнед хԝә алт кьрьн. w17.04 29-30 ¶6-8

Паши Һармәгәдоне, гәло сәр әʹрде ԛә ԝе диса тʹәшкиләт һәбьн? Кʹьтеба Пироз дьбежә: «Әм һивийа әʹрдәки ну у әʹзманед ну нә, ль гора созе ԝи, кʹижанада рʹастийе бьминә» (2 Пәт. 3:13). Әʹзман у әʹрде бәре, әԝ һәнә сәрԝертийед хьраб у мәрьвед бьн һʹӧкӧме ԝанда, кʹижан кӧ ԝе бенә кʹӧтакьрьне. Ле гәло чь ԝе дәԝса ԝан бьгьрә? «Әʹрдәки ну у әʹзманед ну». Әʹзманед ну әԝ сәрԝертийа тʹәзә йә, демәк Пʹадшатийа Хԝәде, ле әʹрдәки ну әԝ һәйә бьнәлийед тʹәзә сәр әʹрде, йед кӧ бьн ве сәрԝертийеда бьжин. Әԝ Пʹадшатийа бьн сәрԝертийа Иса Мәсиһ, ԝе бь тʹәмами әʹйан кә ԝәки Йаһоԝа Хԝәде йәки ча нә. Бәле, Йаһоԝа Хԝәде бепʹәргал нинә (1 Корн. 14:33). Ләма жи әԝ ԝе «әʹрдәки ну» саз кә, кʹидәре кӧ меред ԛәнщ ԝе рʹебәрийе бькьн (Зәб. 45:16). Иса у ӧса жи 144 000 ԝе рʹебәрийа ԝан бькьн. Бьдьнә бәр чʹәʹве хԝә, кӧ ԝе ԝәʹдәки чьԛас хԝәш бә чахе һʹәму тʹәшкиләтед хьраб кʹӧта бьн у дәԝсе сәрԝертийа тʹәк һәбә. Бьн ԝе сәрԝертийеда ԝе тʹьме йәкти һәбә у әԝ ԝе тӧ щар нәйе хьрабкьрьне. w17.04 11 ¶8-9

Зәԝащ пироз ә. Бук у зәʹԝа һьн бәр Хԝәде у һьн бәр шәʹда сонда зәԝаще дьхԝьн. Әԝана соз дьдьнә һәв ԝәки һәвдӧ һʹьз бькьн, хәм бькьн у ԛәдьре һәв бьгьрьн. Әԝана сонд дьхԝьн кӧ әԝе йәке бькьн «һʹәта кӧ бьжин сәр әʹрде, ль гора ԛануна Хԝәде кӧ әԝи бона зәԝаще дани». Мәрьвед дьн йед кӧ зәԝьщи нә, дьбәкә һәма әв гьли нәготьнә, ле йәкә ԝана жи бәр Хԝәде сонд хԝарьнә. Паши ве сонде, әԝана бунә мер у жьне һәв у зәԝаща ԝан һʹәта-һʹәтайе ԝана һәвва гьредьдә (1 Корн. 7:39). Чаԝа Иса гот, «әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә», нә мер, нә жьн, нә жи кәсәки дьн. Бона ве йәке, әԝед кӧ дьзәԝьщьн гәрәке ԛә нә жи бьфькьрьн ԝәки һәвԛәтандьн чʹарәке дькә (Марԛ. 10:9). Зәԝаща бекемаси тʹӧнә йә, чьмки әԝ жь һәрдӧ мәрьвед гӧнәкʹар саз дьбә. Ләма Кʹьтеба Пирозда те готьне ԝәки мер у жьн зәԝащеда ԝе «рʹасти охьрмед гьран бен» (1 Корн. 7:28). w17.04 7 ¶14-15