Тʹәбах

Сәва бьбьнә дәрсдаред баш, пешийе әм гәрәке бьбьнә шагьртед баш (1 Тимтʹ. 4:15, 16). Бь ԝи щурʹәйи, һәрге щабдарийа ԝә һәйә кӧ кәсәки ширәт у рʹаст кьн, һун гәрәке мьлук бьн у рʹебәрийа Йаһоԝа ԛәбул кьн. Чахе мәрьв бьвиньн кӧ һун ӧса дькьн, әԝана ԝе ԛәдьре ԝә бьгьрьн у һе бь дьл ширәтед ԝә ԛәбул кьн. Жь мәсәла Иса әм дькарьн гәләк тьшт һин бьн, ԝәрә әм дәрһәԛа ве йәке шеԝьр кьн. Иса тʹьме гӧрʹа Баве хԝә дькьр, һьнге жи гава жерʹа чәтьн бу. Әԝи бона һинкьрьн у биланийе, шькьри дьда Баве хԝә (Йуһʹн. 5:19, 30). Иса мьлук у гӧрʹа Хԝәдеда бу, ләма мәрьвед дьлсах бәрбь ԝи дьһатьн. Әԝ дәрсдарәки дьлшәԝат бу у мәрьва хԝәш дьһат бал ԝи һин бьн (Мәт. 11:29). Гьлийед ԝийи һʹәйф дьле ԝан мәрьва рʹьһәт дькьрьн, йед кӧ мина ԛамише пәрчʹьԛи у пʹьлта кӧ ведьсийа бун (Мәт. 12:20). Һәла һе жи чахе сәбьра Иса дьһатә щерʹьбандьне, әԝ бь һʹьзкьрьн у нәрм бу. Әԝ йәк әшкәрә те кʹьфше чахе шандийед ԝи ԛӧрʹәбун у хԝәһʹьзи данә кʹьфше (Марԛ. 9:33-37; Луԛа 22:24-27). w18.03 26 ¶15-16

Пәтрус ньхӧмандьн бәрамбәри авакьрьна гәмийа Нӧһ кьр. Әве гәмийе әшкәрә избат дькьр кӧ Нӧһ хԝә тʹәсмили Хԝәде кьрьбу, ԝәки ԛьрара ԝи бинә сери. Нӧһ бь амьни әԝ шьхӧл ани сери, кʹижан кӧ Йаһоԝа дабу ԝи. Бәле, Нӧһ бь кьред хԝә у баԝәрийа хԝә, һьн хԝә һьн жи нәфәред хԝә хьлаз кьр. Гәмийе избат дькьр баԝәрийа Нӧһ һьндава Хԝәде. Ле ньхӧмандьн чь избат дькә? Чахе мәрьв те ньхӧмандьне, әԝ бь ве йәке избат дькә ԝәки хԝә тʹәсмили Йаһоԝа кьрийә сәр һʹиме баԝәрийа һьндава Мәсиһ. Йед ньхӧманди жи мина Нӧһ гӧрʹа Хԝәде дькьн у шьхӧле ԝи тиньн сери. Йаһоԝа Нӧһ жь Селаве хьлаз кьр, у әԝ ԝе мәрьвед амьн жи йед кӧ ньхӧманди нә, хьлаз кә чахе ԛьрʹа ве дьнйа зӧлм бинә (Марԛ. 13:10; Әʹйан. 7:9, 10). Демәк, әʹйан ә кӧ тʹәсмилбуйин у ньхӧмандьн гәләк фәрз ьн. Кәсе кӧ бе мәʹни ньхӧмандьне дәрәнги дьхә, мәщала ԝийә кӧ әʹмьре һʹәта-һʹәтайе бьстинә дькʹәвә бьн хофе. w18.03 4 ¶3-4

Һьнә де-бав дькарьн бьфькьрьн: «Һʹәта кӧ зарʹа мьн нәньхӧманди йә, әԝ ԝе жь щьвате нәйе дәрхьстне». Ле гәло чьрʹа ньһерʹандьна ӧса нәрʹаст ә? (Аԛуб 1:22). Фәʹмдари йә ԝәки де-бавед кӧ Мәсиһи нә, нахԝазьн зарʹа ԝан бе ньхӧмандьне һʹәта әԝ епʹещә гьһишти нибә сәва хԝә тʹәсмили Хԝәде кә. Ле нә рʹаст ә бьфькьрьн кӧ зарʹа нәньхӧманди бона кьред хԝә бәр Йаһоԝа щабдар нинә. Чьрʹа? Чьмки әԝ йәк ньхӧмандьнева гьредайи нинә. Чахе зарʹ занә кӧ бәр чʹәʹве Йаһоԝа чь рʹаст ә у чь хьраб ә, әԝ ида бәр Хԝәде щабдар ә (Аԛуб 4:17). Ләма жи дәԝса рʹе зарʹа бьгьрьн кӧ бенә ньхӧмандьне, де-бавед сәрԝахт ԝе һәр тьшти бькьн сәва мәсәла баш бьн бона зарʹед хԝә. Әԝана зарʹа хԝә һе жь заротийеда һин дькьн кӧ Йаһоԝа һʹьз бькьн у принсипед ԝи биньн сери (Луԛа 6:40). Һʹьзкьрьна зарʹа һьндава Йаһоԝа ԝе ԝана хԝәй кә, ԝәки гӧнә нәкьн у хԝә ль рʹийа Йаһоԝа бьгьрьн (Иша. 35:8). w18.03 11 ¶12-13

Нӧһ бәрдәԝам дькьр ӧса бьжи 350 сала паше Селаве жи (Дәстп. 9:28). Рʹасти жи әԝи баԝәри у гӧһдарийеда мәсәла мәзьн мәрʹа һишт. Әм дькарьн чʹәʹв бьдьнә баԝәри у гӧһдарийа Нӧһ бь ве йәке кӧ пьштгьрийа рʹастийа Хԝәде бькьн, нә пʹара ве дьнйа Шәйтʹан бьн, у әʹмьре хԝәда Пʹадшатийа Йаһоԝа щийе пешьн бьгьрьн (Мәт. 6:33; Йуһʹн. 15:19). Бона ве йәке дьне мә һʹьз накә. Мәсәлә, әм хԝә ль ԛанунед Хԝәде дьгьрьн дәрһәԛа зәԝаще у һәләԛәтийа сексуали, ле әԝ йәк гәләка хԝәш найе у ләма әԝана щара медйайеда сәр мә хәбәр дьдьн (Малх. 3:17, 18). Ле әм мина Нӧһ, Хԝәде дьтьрсьн, нә кӧ мәрьва. Әм заньн кӧ тʹәне әԝ дькарә әʹмьре һʹәта-һʹәтайе бьдә мә (Луԛа 12:4, 5). Ԝе керһати бә һун пьрсед ӧса бьдьнә хԝә: «Гәло әзе һьнге жи рʹийа Хԝәдеда һәрʹьм, һәрге мәрьв ԛәрфе хԝә мьн бькьн йан жи сәр мьн нәбаш хәбәр дьн? Һәрге алийе пʹәрада чәтьнайед мьн һәбьн, гәло әзе итʹбарийа хԝә Йаһоԝа биньм кӧ әԝ ԝе мьн бьбә хԝәйи?». Һәрге һун чʹәʹв бьдьнә баԝәри у гӧһдарийа Нӧһ, һуне дӧдьли нәбьн кӧ Йаһоԝа ԝе бона ԝә хәм кә у али ԝә бькә (Фили. 4:6, 7). w18.02 4 ¶4, 8; 5 ¶9-10

Иро дьнйайеда фькьр у ньһерʹандьна гәләка тʹәне сәр тьштед бәдәни йә. Паԝлос дәрһәԛа ве йәке гот кӧ «рʹӧһʹе кӧ ньһа . . . нава ԝан мәрьвада йа хԝә дькә, йед кӧ нә гӧрʹа Хԝәдеда нә» (Әфәс. 2:2). Әв рʹӧһʹ һʹәчʹи зәʹф мәрьва һелан дькә кӧ пәй гәләка һәрʹьн, демәк чʹәʹв бьдьнә ԝан. Ләма жи әԝана ԝан тьшта дькьн кʹижан кӧ әԝана һʹәсаб дькьн рʹаст ә, у принсипед Хԝәде пьшт гӧһе хԝәва давежьн. Әԝе нәхԝәйи рʹӧһʹ, гәләк дькʹәвә һʹәйра наве хԝә, һәбуке, йан жи бона ԝи изьна ԝийә шәхси йа лапә фәрз ә. Мәрьвед кӧ дькʹәвьнә бәр байе «кьред бьнйатʹа инсен», нәрʹӧһани нә (Галт. 5:19-21). Мәрьвед ԝи щурʹәйи ортʹа мәрьва хьраб дькьн, дәʹԝ-доза пешда тиньн, һәврькʹийе дькьн, һәвдӧ дьдьнә диԝане, бешекьр ьн һьндава ԝан йед кӧ рʹебәрийе дьдьнә ԝан, у пәй хԝарьн-вәхԝарьне дькʹәвьн. Чахе мәрьве бәдәни дькʹәвә щерʹьбандьне, әԝ нькарә хԝә рʹаст бьдә кʹьфше, сьст дьбә у дькʹәвә тʹәльке (Мәтʹлк. 7:21, 22). w18.02 19 ¶3-5

Бь рʹастийе тьштәки хьраб ԝе йәкеда тʹӧнә, ԝәки әʹмьре хԝәрʹа ша бьн у рʹьһәт бьн. Ле фәрз ә рʹаст сәр ԝе йәке бьньһерʹьн. Йаһоԝа нахԝазә ԝәки әм һәр тьшти жь хԝә кем кьн, һеса нәбьн, у хԝәрʹа ԝәʹдә дәрбаз нәкьн. Кʹьтеба Пироз хьзмәткʹаред амьнрʹа дьбежә: «Һәрә бь кʹефхԝәшийе нане хԝә бьхԝә у бь дьле ԛәнщ хәмра хԝә вәхԝә» (Ԝаиз 9:7). Тимотʹейо дӧда 3:4-да, те готьне дәрһәԛа мәрьвед рьһʹәтиһʹьз, әʹмьре кʹижанада бона Хԝәде щи тʹӧнә. Дина хԝә бьдьн кӧ ве рʹезеда найе готьне, ԝәки әԝ мәрьв, жь Хԝәде зедәтьр ԝе рʹьһʹәтийе һʹьз бькьн. Ле рʹезеда те готьне кӧ мәрьв ԝе рʹьһʹәтиһʹьз бьн, «нә кӧ Хԝәдеһʹьз». Зандарәки ньвиси: «Әв [рʹез] найе һʹәсабе ԝәки һʹьзкьрьна ԝан һьндава Хԝәде һьнәки һәйә. Әԝ те һʹәсабе ԝәки әԝана ԛә Хԝәде һʹьз накьн». Рʹасти жи әԝ йәк бона мәрьвед рʹьһʹәтиһʹьз ширәтәкә фәрз ә сәва һаш жь хԝә һәбьн. Кʹьтеба Пироз дьбежә кӧ мәрьвед рʹьһʹәтиһʹьз, «шабуна ви әʹмьрива мьжул дьбьн» (Луԛа 8:14). w18.01 25 ¶14-15

Йаһоԝа Хԝәдайе мәрʹд ә. Һәр тьшт чь кӧ бал мә һәйә, жь ԝи йә. Һʹәму зерʹ, зив у һʹәму тьштед ԛимәт чь кӧ әʹрд дьдә, йед ԝи нә, у әԝ ԝан тьшта дьдә хәбате сәва әʹмьр һәбә (Зәб. 104:13-15; Һаг. 2:8). Мәсәлә, 40 сала Йаһоԝа манна у ав дьда щьмәʹта Исраел, чахе әԝана бәрʹийеда бун (Дәркʹ. 16:35; Нәһәм. 9:20, 21). Йаһоԝа ӧса жи бь Елиша пʹехәмбәр, бь кʹәрәмәт ӧса кьр кӧ бьзьр мала жьнәбикә амьнда зедә бу. Хԝәде бь сайа ве йәке али ԝе кьр, ԝәки әԝ дәйне хԝә бьдә у сәва епʹещә пʹәре ԝе һәбә ԝәки хԝә у кӧрʹед хԝә хԝәй кә (2 Пʹадш. 4:1-7). Бь аликʹарийа Йаһоԝа, Иса али мәрьва дькьр бь хԝарьне у һәла һе жи бь пʹәра чахе әԝ йәк лазьм бу (Мәт. 15:35-38; 17:27). Йаһоԝа дькарә һәр тьшт бьдә хәбате сәва әʹфьрине хԝәйә сәр әʹрде хԝәй кә. Ле Йаһоԝа ӧса жи хьзмәткʹаред хԝә һелан дькә, ԝәки әԝана һәбука хԝә бьдьнә хәбате сәва пьштгьрийа тʹәшкиләта ԝи бькьн (Дәркʹ. 36:3-7). w18.01 17 ¶1-3

Кʹьтеба Пироз дьдә кʹьфше кӧ хьзмәткʹаред бәре жи щара ӧса хԝә тʹәхмин дькьрьн, кӧ ԛәԝата ԝан тʹӧнә чәтьнайа сәбьр кьн (Иб. 7:7). Ле ԝана тӧ щар бина хԝә тәнг нәдькьр, чьмки ԝана итʹбарийа хԝә ԛәԝата Йаһоԝа дьани. Әԝана дьлтәнг нәбун, чьмки Хԝәде «йе ԝәстийайирʹа ԛәԝате дьдә» (Иша. 40:29, ДТʹ). Ле йазьх, иро һьнә хьзмәткʹаред Хԝәде фькьринә кӧ дьһа баш ә хьзмәтийа хԝә бьдьнә сәкьнандьне, сәва чәтьнайед хԝә сафи кьн. Ԝана тʹьре кӧ хьзмәти Йаһоԝарʹа баргьрани йә, нә кӧ кʹәрәм ә. Ләма жи әԝана ида Хәбәра Хԝәде нәдьхԝәндьн, нәдьчунә щьвате, у хьзмәт нәдькьрьн. Шәйтʹан һәма ве йәке жи дьхԝәст бона ԝан. Шәйтʹан рʹьнд занә кӧ чахе әм хьзмәтийа Йаһоԝада хирәт ьн, әм ԛәԝате дьстиньн. Ле әԝ тӧ щар нахԝазә әм ԛәԝи бьн. Ләма жи чахе һун сьһʹәт-ԛәԝатеда йан жи емосийалида һʹал дькʹәвьн, тʹӧ щар хԝә жь Йаһоԝа дур нәхьн. Дәԝсе, һе незики ԝи бьн, у Хԝәде ԝе ԝә «бьшьдинә, ԛәԝат кә» (1 Пәт. 5:10; Аԛуб 4:8). w18.01 7-8 ¶2-3

Сәрһатийа дӧда дәрһәԛа сахкьрьне кӧ Кʹьтеба Пирозда ньвисар ә, дәрһәԛа Елиша пʹехәмбәр ә. Шунәмеда жьнәк дьжит, йа кӧ безӧрʹәт бу у мере ԝе ида әʹмьрда мәзьн бу. Әԝе меванһʹьзийа мәзьн Елишара да кʹьфше, у бона ве йәке Йаһоԝа ле кʹәрәм кьр у кӧрʹ жерʹа бу. Чәнд сал дәрбаз бу, әԝ кӧрʹе ԝе мьр. Бьдьнә бәр чʹәʹве хԝә кӧ бона ве жьньке әԝ йәк дәрдәки чьԛас гьран бу. Дьле ԝе ӧса дешийа кӧ кʹәрба әԝ 30 км. рʹе чу, сәва кӧ сәр чʹийайе Кармәл Елиша бьвинә. Елиша пʹехәмбәр бәрдәстийе хԝә Гәһази пешийа хԝә у ве жьньке, шандә Шунәме. Гәһази нькарьбу әԝ гәдә жь мьрьне рʹакьра. Паше дийа гәдә кӧ дьлшькәсти бу, тʹәви Елиша һатә мал (2 Пʹадш. 4:8-31). Малда кʹидәре кӧ щьнйазе ԝи гәдәйи бу, Елиша дӧа кьр. Йаһоԝа дӧайе ԝи бьһист, у гәдә сах бу. Жь шабуне ньге де әʹрд нәдьгьрт кӧ кӧрʹе ԝе диса тʹәви ԝе бу! (2 Пʹадш. 4:32-37). Хԝәде әԝ гәде Шунәме һьлкʹьшанд, у избат кьр кӧ ԛәԝата ԝи һәйә мьрийа жь мьрьне рʹакә. w17.12 4 ¶7-8

Чахе мәрьв сәрԝахт ә, әԝ йәк дьдә кʹьфше кӧ әԝ гьһишти йә. Рʹӧһʹанида гьһиштибун салед әʹмьрва гьредайи нинә. Мәрьве гьһишти әԝ ә, дьле кʹеда хофа Хԝәде һәйә, у дьхԝазә бь дьл у щан гӧрʹа тʹәмийед ԝи бькә (Зәб. 111:10). Щаһьлед кӧ рʹӧһʹанида гьһишти нә, пе хԝәстьнед хԝә йан жи пе фькьред щаһьлед дьн «жь пʹела вьрда-ԝеда» накʹәвьн (Әфәс. 4:14). Дәԝсе әԝана пешда дьчьн у һʹьш-аԛьле хԝә һин дькьн, ԝәки «ԛәнщи у хьрабийе» жь һәв дәрхьн (Ибрн. 5:14). Чахе әԝана сафикьрьнед аԛьлайи дькьн, әԝ дьдә кʹьфше кӧ әԝана гьһишти дьбьн. Әԝ щурʹе сәрԝахтийе бона хьлазбуне гәләк фәрз ә (Мәтʹлк. 24:14). Ләма жи зарʹед хԝәрʹа нишан кьн кӧ һун чьрʹа Кʹьтеба Пироз ԛимәт дькьн. Пе гьли у кьред хԝә нишан кьн, ԝәки һун ль гора принсипед Хәбәра Хԝәде дьжин (Рʹом. 2:21-23). w17.12 20-21 ¶12-13

Гәләк мәрьв дьфькьрьн кӧ мәрьв дькарьн хԝәха чәтьнайед хԝә сафи кьн у һәнә йед ӧса кӧ ԛайил ьн ве йәкерʹа. Ле чьрʹа? Чьмки ԝанарʹа дәст дьдә кӧ бей рʹебәрийа Хԝәде бьжин, у ча бьхԝазьн ӧса жи бькьн. Ӧса жи гәләк баԝәр дькьн кӧ бь рʹастийе мәрьв хԝәха дькарьн һʹале инсанәте баш кьн, чьмки ль гора һьнә леколинкьрьна, шәрʹ, ԛачахти, нәхԝәши у кʹәсиббун дьнйайеда кем дьбьн. Әʹламәтикеда һатийә готьне: «Мәʹнийа ве йәке кӧ чьрʹа һʹале инсанәте алийе башда дьчә, әԝ ә кӧ мәрьв хԝәха сафи дькьн ԝәки һʹале дьнйайе баш кьн». Һәрге һун тедәрдьхьн кӧ нет-фькьрәки ве дьнйайе баԝәрийа ԝә сьст дькә, Хәбәра Хԝәде леколин бькьн кӧ әԝ чь дьбежә дәрһәԛа ве йәке. Ӧса жи ԝе керһати бә хәбәр дьн тʹәви хушк-бьред рʹӧһʹанида ԛәԝи. Бьфькьрьн кӧ чьрʹа әв ньһерʹандьн мәрьва хԝәш те, чьрʹа әв нәрʹаст ә у ча һун дькарьн хԝә хԝәй кьн жь ве йәке. Һәр кәс жь мә дькарә хԝә хԝәй кә жь фькьред ве дьнйайе, һәрге гӧһ бьдә ве ширәта Паԝлос кӧ рʹеза рʹожеда әм дьхуньн. w17.11 24 ¶14, 17

Чьрʹа Ферьси һьндава мәрьва берʹәʹм бун? Кʹьтеба Пироз дьбежә кӧ әԝана «һʹәмуйед майин бәр тьштәки һʹәсаб нәдькьрьн» (Луԛа 18:9-14). Чʹәʹв бьдьнә Йаһоԝа нә кӧ Ферьсийа. Дьлшәԝат у рʹәʹм бьн (Колс. 3:13). Ӧса бькьн ԝәки мәрьварʹа һеса бә жь ԝә бахшандьне бьхԝазьн (Луԛа 17:3, 4). Жь хԝә бьпьрсьн: «Гәло әз зу дьбахшинмә мәрьва һьнге жи, һәрге ԝана гәләк щар мьн данә хәйдандьне? Гәло әз дьхԝазьм кӧ тʹәви ԝи ль һәв бем, йе кӧ мьн дайә хәйдандьне у дьле мьн ешандийә?» Сәва кӧ бьбахшиньнә мәрьва, әм гәрәке мьлук бьн. Ферьсийа нәдьхԝәстьн бьбахшиньн мәрьва, чьмки ԝана хԝә сәр ԝанрʹа дьгьрт. Ле әм Мәсиһи гәрәке бь мьлуктийе «һәвале хԝә сәр хԝәрʹа» бьгьрьн у бь дьл у щан бьбахшиньнә мәрьва (Фили. 2:3). Гәло һуне мьлуктийеда чʹәʹв бьдьнә Йаһоԝа? Һәрге һун мьлук бьн, мәрьварʹа ԝе һеса бә незики ԝә бьн у бахшандьне жь ԝә бьхԝазьн. Зу нәхәйидьн, дьлрʹәʹм бьн у зу бьбахшиньнә мәрьвед дьн (Ԝаиз 7:8, 9). w17.11 14-15 ¶6-8

Һәрге һун дәнге хԝә бәрамбәри дәнге мәрьвед дьн дькьн, дьбәкә бәрхԝә кʹәвьн кӧ мина ԝан нькарьн бьстьрен. Ле йәкә әв тьшт гәрәке нәбьнә мәʹни кӧ щабдарийа хԝә нәйньн сери, демәк бь кʹьлама пәсьна нәдьн Йаһоԝа. Дәԝсе, кʹьтеба хԝәйә кʹьлама бьльнд бьгьрьн, сәре хԝә бьльнд кьн, у бь дьл у щан бьстьрен! (Әзр. 3:11). Иро гәләк Одед Щьватада, хәбәред кʹьлама сәр мониторе тенә нишанкьрьне, у әԝ йәк али мә дькә бь дәнге бьльнд бьстьрен. Ӧса жи ԝәʹде Мәкʹтәба Хьзмәтийе кӧ рʹуспи дәрбаз дьбьн, кʹьлам жи кʹәтьнә нава бәрнама ве мәкʹтәбе. Әв йәк дьдә кʹьфше кӧ чьԛас фәрз ә рʹуспи щьватеда бьстьрен у ве йәкеда бьбьнә мәсәлә. Мәʹник кӧ чьрʹа гәләк хԝә дьгьрьн у бь дәнге бьльнд настьрен, әв һәйә тьрс. Бәʹса хәбәре, һьнәк дьтьрсьн кӧ йед дьн әʹщьз бьн һәрге бь дәнге бьльнд бьстьрен. Һьнәк жи дьфькьрьн кӧ дәнге ԝан нә хԝәш ә, у шәрм дькьн бьстьрен. Ле дина хԝә бьдьн сәр ве йәке, кӧ хәбәрданеда «әм һʹәму жи гәләки шашийа дькьн» (Аԛуб 3:2). Ле әв йәк рʹе мә нагьрә кӧ әм ида хәбәр нәдьн. Ләма жи чьрʹа әм гәрәке сәва дәнге хԝәйи бь ԛьсур, хԝә бьгьрьн у пе кʹьлама пәсьна нәдьнә Йаһоԝа? w17.11 4-5 ¶9-10

Чахе хәԝн-хәйала Зәкәрйа йа һʹәфта хьлаз бу, әԝ дьбәкә гәләк кʹур дьфькьри дәрһәԛа ве йәке. Йаһоԝа бь ве хәԝн-хәйале соз да, кӧ ԝе мәрьвед ԛәлп у хьраб бона кьред ԝан щәза бькә. Әԝи сози Зәкәрйа гәләк шьданд. Ле һәла һе тьштәк нәһатьбу гӧһастьне. Гәләк мәрьва диса жи ԛәлпи у хьраби дькьрьн, у пʹарьстгәһа Оршәлиме һе нәһатьбу авакьрьне. Ле чьрʹа Щьһу әԝ шьхӧл кӧ Йаһоԝа да ԝан, ӧса зу һиштьн? Гәло әԝана вәгәрʹийанә ԝәлате хԝә тʹәне сәва бькʹәвьнә һʹәйра хԝә, ԝәки әʹмьре хԝә баш кьн? Йаһоԝа заньбу кӧ щьмәʹта ԝирʹа чь лазьм ә. Ләма әԝи хәԝн-хәйала пашьн нишани Зәкәрйа кьр. Ве хәԝн-хәйаледа, Йаһоԝа Щьһуйарʹа да кʹьфше кӧ ԝана һʹьз дькә, у ԛимәт дькә һәр тьштед кӧ ԝана бона ԝи кьр. Һьн жи әԝи соз да ԝан кӧ ԝе ԝана хԝәй кә, һәрге әԝана вәгәрʹьнә шьхӧле Ԝи. Рʹеза ве рʹожеда ньвисар ә созе Йаһоԝа, ԝәки пʹарьстгәһ тʹәзәда гәрәке бьһата авакьрьне. w17.10 26 ¶1; 27 ¶5

Бьред мерхас кʹижан кӧ һазьр ьн һе зедә щабдарийа һьлдьнә сәр хԝә, кʹәрәм ьн бона щьвате (1 Тимтʹ. 3:1). Ле һьнәк дьбәкә хԝә дьгьрьн у шьхӧл һьлнадьн дәсте хԝә. Дьбәкә бәре бьраки шаши дькьр у ньһа дьфькьрә кӧ һежа нинә сәва бьбә бәрдәстийе щьвате йан жи рʹуспи. Ле бьраки дьн дьбәкә дьтьрсә кӧ ԝе нькарьбә щабдарийа хԝә бинә сери. Һәрге тӧ ӧса дьфькьри, Йаһоԝа ԝе али тә бькә кӧ мерхас би (Фили. 4:13). Бинә бира хԝә кӧ Муса жи дьфькьри ԝәки ԝе нькарьбә щабдарийа хԝә бинә сери (Дәркʹ. 3:11). Ле Йаһоԝа али ԝи кьр, у ԝәʹдә дәрбаз бу Муса бь мерхаси щабдарийа хԝә һʹәта хьлазийе ани сери. Ԝи щурʹәйи бьра жи дькарә мерхасийе бьстинә, һәрге бона аликʹарийе бь дьл у щан Хԝәдерʹа дӧа бькә у һәр рʹож Кʹьтеба Пироз бьхунә. Ӧса жи ԝе керһати бә һәрге әԝ бьфькьрә сәр сәрһатийед мәрьвед мерхас кӧ Кʹьтеба Пирозда тенә гьликьрьне. Һьн жи әԝ дькарә рʹуспийарʹа бежә кӧ ԝи һин кьн, у чахе щьватеда аликʹари лазьм ә кʹомәке бьдә. w17.09 32 ¶19

Кʹьтеба Пироз жь бина бәр Хԝәде йә. Ле Мәсиһи гәрәке нәфькьрьн ԝәки ԝәлгәрʹандьна «Септуагинта», «Версиа Аԛубе Пʹадша», йан жи ԝәлгәрʹандьнәкә дьн, рʹастә-рʹаст жь бина бәр Хԝәде һатьнә кьрьне. Ле йәкә чахе әм кʹур дьфькьрьн кӧ нава тʹәрихийеда чаԝа ԝәлгәрʹандьнед Кʹьтеба Пироз һатьнә дәрхьстьне, әшкәрә йә кӧ әв избаткьрьн ә ԝәки Хәбәра Йаһоԝа һатә хԝәйкьрьне чаԝа әԝи соз дабу. Әв йәк баԝәрийа мә һе ԛәԝи дькә, кӧ Йаһоԝа ԝе әʹсә созед хԝәйә дьн жи бинә сери! (Йешу 23:14). Гава әм дьфькьрьн кӧ Йаһоԝа чь щурʹәйи Хәбәра хԝә хԝәй кьрийә, ча баԝәри ӧса жи һʹьзкьрьна мә һьндава ԝи ԛәԝи дьбә. Ле сәва чь Йаһоԝа Хәбәра хԝә дайә мә у соз да кӧ әв бе хԝәйкьрьне? Чьмки әԝ мә һʹьз дькә, ԛәнщийа мә дьхԝазә у дьхԝазә мә һин кә, сәва әм бәхтәԝар бьн (Иша. 48:17, 18). Әм жи дьхԝазьн жерʹа һʹьзкьрьна хԝә нишан кьн у гӧрʹа ԝи бькьн (1 Йуһʹн. 4:19; 5:3). w17.09 21-22 ¶13-14

Һәрге жьн йан мер нәбаԝәр ә, һьнге дькарә чәтьн бә зарʹа рʹаст ширәт кьн у һин кьн кӧ әве тʹәмийе биньн сери. Ле һун гәрәке ԛәдьре ԝи (ԝе) бьгьрьн у ӧса һуне зарʹед хԝәрʹа мәсәла баш бьһельн. Бьфькьрьн кӧ кʹижан хәйсәт-һʹӧнӧред ԝийи (ԝейә) баш һәнә, у жерʹа бежьн кӧ һун ԝи (ԝе) ԛимәт дькьн у дьшекьриньн чь жи әԝ дькә. Сәр жьн йан мере хԝә бәр зарʹа тӧ щар нәкьнә котә-кот. Ле дәԝсе зарʹед хԝәрʹа шьровәкьн, кӧ һәр кәс гәрәке хԝәха бьжберә Йаһоԝарʹа хьзмәт кә йан на. Һәрге рʹабун-рʹуньштьна зарʹа баш ә, әԝ йәк дькарә де йан баве нәбаԝәр бинә сәр рʹийа Хԝәде. Һьнә мер кӧ нәбаԝәр ьн, һәла һе жи изьне надьнә жьнед хԝә, ԝәки зарʹа Кʹьтеба Пироз һин кьн, йан жи тʹәви хԝә бьвьнә щьвате. Ле һьнге жи чь дәсте жьне те гәрәке бькә, сәва зарʹед хԝә рʹастийе һин кә (Кʹар. Шанд. 16:1; 2 Тимтʹ. 3:14, 15). Рʹаст ә жьн ԛәдьре сафикьрьна мере хԝә дьгьрә, ле йәкә әԝ дькарә тʹәви зарʹед хԝә хәбәр дә дәрһәԛа баԝәрийа хԝә чахе мәщалә һәйә. Ӧса әԝ зарʹ дькарьн дәрһәԛа Йаһоԝа у ԛанун принсипед ԝи пебьһʹәсьн (Кʹар. Шанд. 4:19, 20). w17.10 14 ¶9-10

Йаһоԝа дьлшәԝат ә, ләма әԝ һʹӧнӧр бал мәрьва жи һәйә, чьмки бь сурәта ԝи һатьнә чекьрьне. Һәла һе мәрьвед кӧ Йаһоԝа нас накьн, гәләк щара әԝана жи дьлшәԝатийе дьдьнә кʹьфше у бона йед дьн хәм дькьн (Дәстп. 1:27). Кʹьтеба Пирозда гәләк сәрһатийед мәрьвед дьлшәԝат һәнә. Мәсәлә, биньн бира хԝә дӧ жьнед ԛав кӧ бәр Сьлеман сәкьнибун у сәва зарʹе һәврʹа кәтьбунә дәʹԝе. Жь ԝана йәк дийа зарʹе бу. Сьлеман фәрман да, ԝәки зарʹе бькьнә дӧ кәра, сәва кӧ тедәрхә һәла кʹижан ә дийа зарʹе. Дьле ве жьньке шәԝьти, кʹижан кӧ рʹасти дийа зарʹе бу. Ләма әԝ ԛайил бу кӧ зарʹа ԝе бьдьнә жьнька дьн, тʹәне зарʹе нәкӧжьн (1 Пʹадш. 3:23-27). Йан жи биньн бира хԝә ԛиза Фьрәԝьн, йа кӧ Муса хьлаз кьр чахе әԝ зарʹа вьрʹни бу. Рʹаст ә әԝе фәʹм дькьр кӧ әԝ зарʹа Ибранийа бу у гәрәке ԝи сах нәһельн, ле «дьле ԝе сәр шәԝьти» у әԝе сафи кьр кӧ ԝи бькә зарʹа хԝә (Дәркʹ. 2:5, 6). w17.09 8-9 ¶2-3

Йаһоԝа дьхԝазә ԝәки һʹәму хьзмәткʹаред ԝи мьлук бьн (Мәтʹлк. 22:4). Бь рʹастийе мьлукти кʹәрәмед мәзьн тинә у ӧса жи әʹдьлайе у йәктийе дькә щьвате. Һәрге әм әԝи һʹӧнӧри бал хԝә пешда биньн, Хԝәде ԝе ԛәнщийа хԝәйә нәһежа бьдә мә. Пәтрусе шанди гот: «Һун һʹәму жи, ль бәр һәв шкәсти бьн, хӧламтийе һәвдӧрʹа бькьн, чьмки ньвисар ә: ‹Хԝәде мьԛабьли кʹӧбар-бабаха йә, ле кʹәрәме дьдә шкәстийа›» (1 Пәт. 5:5). Ԝе дьнеда мәрьвед бәрбьһер у бь сәбьр, сьст һʹәсаб дькьн. Ле әԝ йәк рʹаст нинә. Әԝ һӧʹнӧред гәләк баш, жь Йаһоԝа нә, демәк жь Кәсе лапи ԛәԝат сәр тʹәмамийа дьнйайе. Йаһоԝа мәсәләкә лапә баш ә кӧ ча бәрбьһерийе у сәбьре бьдьнә кʹьфше. Бьфькьрьн сәр ԝе йәке, кӧ Йаһоԝа ча бь сайа мьлйакʹәтед хԝә бь сәбьр щаба Бьраһим у Лут да чахе ԝана пьрс дьданә ԝи (Дәстп. 18:22-33; 19:18-21). Ӧса жи бьфькьрьн дәрһәԛа сәбьра Йаһоԝа һьндава щьмәʹта Исраел, кӧ 1 500 сал зедәтьр нәгӧһдар бун (Һәзԛл. 33:11). w17.08 25 ¶13-14

Дӧа бькьн у Хԝәде ԝе әʹдьлайа хԝә бьдә ԝан. Ле дина хԝә бьдьне, ԝәки «әʹдьлайийа Хԝәде . . . жь һәр һʹьш-аԛьли дәрбазтьр ә». Әв чь те һʹәсабе? Һьнә ԝәлгәрʹед Кʹьтеба Пироз дьбежьн кӧ әв жь «һәр нет-мәрәм» у хԝәстьна мәрьва мәзьнтьр ә. Бь гьлийед майин бежьн, Паԝлос дьгот кӧ «әʹдьлайийа Хԝәде» ӧса ԛәԝат у баш ә, кӧ әм нә жи дькарьн бьдьнә бәр чʹәʹве хԝә. Щара әм ньзаньн жь тәнгасийе ча дәрен, ле Йаһоԝа занә у әԝ дькарә мә жь тәнгасийе ӧса хьлаз кә, кӧ әм нә жи һивийе нә (2 Пәт. 2:9). Ча әм дькарьн «әʹдьлайийа Хԝәде» хԝәй кьн, һәла һе ԝи чахи жи, гава чәтьнайед мә һәнә? Әм гәрәке һәләԛәтийа хԝә тʹәви Йаһоԝа ԛәԝи хԝәй кьн. Әԝ йәк тʹәне бь сайа ԛӧрбанбуна Иса Мәсиһ дькарә бьбә, йе кӧ әʹмьре хԝә да ча кʹьрин. Хԝәде әве ԛӧрбане дьдә хәбате бь щурʹәки дьн жи бона кʹара мә. Мәсәлә, әԝ гӧне мә дьбахшинә, мәщале дьдә мә сәва исафа мә тʹәмьз бә у ӧса әм һе незики ԝи дьбьн (Йуһʹн. 14:6; Аԛуб 4:8; 1 Пәт. 3:21). w17.08 10 ¶7; 12 ¶15

Щарна мәрьврʹа кʹижан мәрьве хԝәйи незик ӧнда кьрийә, чәтьн ә дьле хԝә бьрежә у тʹәне әԝ хԝәха кӧла дьле хԝә занә. Ле һәрге жи кәсәк кʹәла дьле хԝә дьрежә, йәкә йед дьн һәр гав нькарьн бь тʹәмами фәʹм кьн әԝ чь сәр хԝә тʹәхмин дькә. Щара ньзани чь бежи ԝан йед кӧ шине дькьн. Гәләк щар әм дькарьн бәрдьлийа мәзьн бьдьнә ԝан, һәрге «тʹәви йед дьгьрин бьгьрин» (Рʹом. 12:15). Һәрге ԝәрʹа чәтьн ә бь хәбәрдан бәр дьле ԝанда бен, ԝе баш бә кӧ бь нәʹмәке, йан емаиле, йан жи пе тʹеле ԝанрʹа бьньвисьн. Бәʹса хәбәре, нәʹмәкеда дькарьн ԝан рʹезед жь Кʹьтеба Пироз бьньвисьн, йед кӧ бәрдьлийе дьдьн, йан жи бьньвисьн дәрһәԛа хәйсәт-һʹӧнӧред баш йед мьри, йан жи дәрһәԛа ԝи ԛәԝьмандьнәкә һʹәԝас гьли кьн кʹижан кӧ бира ԝәда майә. У нәфькьрьн кӧ чахе һун бона ԝан дӧа дькьн у ӧса жи тʹәви ԝан, әԝ ԛәԝатәкә гәләк мәзьн ә. w17.07 14-16 ¶13-16

Дьбә ӧса кӧ чахе жьн у мер зәԝащеда гәләк чәтьнайа дьвиньн, һивийа ве йәке нибун. Йан жи әԝана гәләк дьлтәнг дьбьн кӧ зәԝаща ԝан ӧса нинә чаԝа ԝана дьхԝәст. Һьнге ԝе гәләк керһати бә һәрге жьн у мер бьфькьрьн кӧ Йаһоԝа ча бу һьндава Исраеле. Йаһоԝа хԝә нав кьр ча мере ви мьләти (Иша. 54:5; 62:4). Һәләԛәтийа Йаһоԝа тʹәви ви мьләти мина «зәԝащәке» чәтьн бу, чьмки ԝана гәләк щар дьле ԝи дешандьн! Ле йәкә Йаһоԝа ләз нәкʹәт тʹәрка ԝан бьдә. Әԝи диса у диса рʹәʹма хԝә дьда кʹьфше һьндава ԝан у пәймана хԝә тʹәви ԝан хԝәй дькьр (Зәб. 106:43-45). Әԝ һʹьзкьрьна Йаһоԝайә ӧса мәзьн, рʹасти жи дьле мә дьгьрә! Һәрге жьн у мер Йаһоԝа һʹьз дькьн, әԝана ԝе чʹәʹв бьдьнә ԝи. Һәрге зәԝащеда чәтьнайед ԝан һәнә, әԝана ԝе мәʹнийа нәгәрьн сәва кӧ жь һәв бьԛәтьн. Әԝана рʹьнд фәʹм дькьн кӧ Йаһоԝа ԝана кьрийә йәк у әԝ дьхԝазә ԝәки әԝана хԝә ль һәвдӧ бьгьрьн. Кʹьтеба Пироз дьбежә кӧ тʹәне мәʹник һәйә, жь бо чь жи жьн-мер дькарьн жь һәв бьԛәтьн, әԝ һәйә ԛави (Мәт. 19:5, 9). Гава мер у жьн алийе хԝәда һәр тьшти дькьн сәва зәԝаща хԝә хԝәй кьн, бь ве йәке әԝана избат дькьн кӧ пьштгьрийа сәрԝертийа Йаһоԝа дькьн. w17.06 31 ¶17-18

Шәйтʹан дәрһәԛа изьна сәрԝертийа Йаһоԝа бӧхдан гьли кьр. Әԝи гот ԝәки йанчь Йаһоԝа сәрԝере хьраб ә у әԝ тьштед баш жь мә вәдьшерә. Шәйтʹан ӧса жи гот ԝәки йанчь һәрге мәрьва хԝәха сәр хԝә сәрԝерти бькьрана, әԝана ԝе һе бәхтәԝар буна (Дәстп. 3:1-4). Әԝи ӧса жи гот, кӧ йанчь мәрьв гава бькʹәвьнә тәнгасийа, ԝе Хԝәде чаԝа сәрԝере хԝә ԛәбул нәкьн (Иб. 2:4, 5). Ләма жи Йаһоԝа ԝәʹдә да, ԝәки гьшк пе чʹәʹве хԝә бьвиньн кӧ бей сәрԝертийа Хԝәде жийин гәләк чәтьн ә. Йаһоԝа занә, ԝәки чь кӧ Шәйтʹан гот һʹәму тьшт дәрәԝ ә. Ԝәки ӧса нә, чьрʹа Хԝәде ԝәʹдә да Шәйтʹан кӧ гьлийед хԝә избат кә? Чьмки щаба ве пьрсе һәр кәси дькʹәвә, ча мәрьва ӧса жи мьлйакʹәта (Зәб. 83:18). Адәм у Һеԝайе һʹӧкӧмәтийа Йаһоԝа бәр тьштәки һʹәсаб нәкьрьн, у паши ԝан жи һәбун кәсед ӧса кӧ мьԛабьли сәрԝертийа Хԝәде дәркʹәтьн. Ләма жи һьнәк дькарьн бькʹәвьнә шьке у баԝәр кьн кӧ Мире-щьна рʹаст ә. w17.06 22-23 ¶3-4

Хьзмәтийеда һун тьштед баш һин дьбьн. Мәсәлә, һун хәйсәт-һʹӧнӧред баш пешда тиньн, фәрәсәтед ԝә зедә дьбьн, хәбәрдана ԝә тʹәви мәрьва һе рʹьнд у һеса дьбә, һун хԝәда һе баԝәр дьбьн у һин дьбьн мәрифәт бьн (Мәтʹлк. 21:5; 2 Тимтʹ. 2:24). Ԝи шьхӧлида ӧса жи шабунәкә мәзьн һәйә, һун дьбьнә щерʹьбанди сәва мәрьварʹа пе Кʹьтеба Пироз баԝәрийа хԝә избат кьн. Ӧса жи һун һин дьбьн кӧ чаԝа тʹәви Йаһоԝа һе незик һәвкʹарийе бькьн (1 Корн. 3:9). Һәрге жи мьһала ԝәда һьндьк мәрьв гӧһ дьдьнә ԝә, йәкә һун дькарьн шабуне бьвиньн. Тʹәмамийа щьвате ча кʹом дьхәбьтә ԝәки мәрьвед дьлсах бьвиньн у бькьн шагьрт. Чахе хушк йан бьрак кәсәки дьвиньн у әԝ дьбә шагьрт, һʹәмушк жи ша дьбьн чьмки ԝана жи гәрийанә. Мәсәлә, бьрак бь наве Брендон, нәһә сала пешәнг бу ве мьһаледа, кʹидәре кӧ һьндьк мәрьв Кʹьтеба Пироз һин дьбьн. Әԝ дьбежә: «Рʹаст ә мьн ԛә мәрьвәк жи нәгиһандә ньхӧмандьне, ле хушк-бьред дьн әԝ йәк кьрьн. Әз гәләк ша мә кӧ мьн нет хԝәрʹа данийә, ԝәки бь тʹәмами хԝә шьхӧле һазьркьрьна шагьрта бьгьрьм» (Ԝаиз 11:6). w17.07 23 ¶7; 24 ¶9-10

Һанна безӧрʹәт бу, ле жьна Әлкана йа дӧда Пенина, зарʹ дьанин (1 Сам. 1:4-7). Бь сала Пенина сәва ве йәке Һаннайе дькʹәнийа. Бьдьнә һʹәсабе хԝә Һанна чьԛас дьнәʹлийа. Ле әԝе Йаһоԝарʹа дӧа кьр у әԝ дәрд-кӧл да дәсте ԝи (1 Сам. 1:12). Әԝе заньбу кӧ Йаһоԝа ԝе йан кӧрʹ бьде, йан жи бь щурʹәки майин дәрде ԝе дәрман кә. Һʹәта әм гӧнәкʹар ьн у ве дьнйа Шәйтʹанда дьжин, әме рʹасти тәнгасийа у чәтьнайа бен (1 Йуһʹн. 5:19). Ле әм бона ве йәке гәләк бәрхԝә накʹәвьн, чьмки әм заньн ԝәки Йаһоԝа «Хԝәдейе һʹәму бәрдьлийе» йә! (2 Корн. 1:3). Чахе әм дькʹәвьнә тәнгасийе, әм дькарьн Хԝәдерʹа дӧа кьн у аликʹарийе бьхԝазьн. Әм жи мина Һаннайе гәрәке дьле хԝә Йаһоԝарʹа вәкьн. Ле ԝәʹде тәнгасийа, бәс нинә тʹәне Йаһоԝарʹа гьли кьн кӧ әм чь тʹәхмин дькьн, лазьм ә дьле хԝә жерʹа вәкьн у бь дӧа-дьрозга жь ԝи һиви кьн (Фили. 4:6, 7). w17.06 6 ¶10-11

Исайе сахкьри заньбу ԝәки шагьртед ԝи тьштәк нәгьртьн, ләма готә ԝан: «‹Тʹоре бавежьнә алийе ԛәйькейи рʹасте һуне бьгьрьн›. Ԝана жи тʹор авите у жь дәст гәләкбуна мәʹсийа нькарьбун кӧ тʹор бькʹьшандана» (Йуһʹн. 21:1-6). Паши тәʹште кӧ Иса ԝанрʹа һазьр кьр, әԝи Пәтрус ньһерʹи у готе гьлийед рʹеза ве рʹоже. Ле гәло чьрʹа Иса әԝ пьрс да ԝи? Те кʹьфше Иса дьхԝәст жь Пәтрус бьпьрсийа, һәла әԝ Иса у һинкьрьнед ԝи дьһа һʹьз дькә, йан хәбата хԝә ча нечʹирван. Ле Пәтрус щаба ԝи да: «Бәле Хӧдан, тӧ зани кӧ әз тә һʹьз дькьм» (Йуһʹн. 21:15). Жь ԝи ԝәʹдәйи Пәтрус бь жийина хԝә избат кьр, кӧ әԝ Иса Мәсиһ һʹьз дькә. Әԝи шьхӧле бәлакьрьна мьзгинийеда гәләк тьшт дькьр, у паше бу стуна щьвата Мәсиһти ԛьрʹна йәкеда. w17.05 22 ¶1-2

Паԝлос тӧ щар дӧдьли нәдьбу ԝәки Йаһоԝа ԝи һʹьз дькә у бона ԝи хәм дькә, ләма жи гава әԝ рʹасти тәнгасийа дьһат, баԝәрийа хԝә һьндава Хԝәде ӧнда нәдькьр. Әԝи нәдьһишт ԝәки әԝ чәтьнайи ԝи бьшкеньн. Ле гәло әԝи әԝ ԛәԝат жь кӧ дьстанд? Әԝи хԝә дьспартә «Хԝәдейе һʹәму бәрдьлийе», йе кӧ «нава һʹәму тәли-тәнгийада дьл дьдә бәр мә» (2 Корн. 1:3, 4). Чахе әм дӧада тʹәви Йаһоԝа хәбәр дьдьн, достийа мә тʹәви ԝи ԛәԝи дьбә (Зәб. 86:3; 1 Тʹеслн. 5:17; Рʹом. 12:12). Йаһоԝа «дӧа дьбьһе». У гава әм Баве хԝәйи әʹзманарʹа дьле хԝә вәдькьн, әм һе незики ԝи дьбьн (Зәб. 65:2). Хенщи ве йәке, чахе әм дьвиньн кӧ Йаһоԝа ча щаба дӧайед мә дьдә, әм һе ԛайим ԝи һʹьз дькьн. У әм баԝәр дькьн ԝәки Йаһоԝа «незики ԝан һʹәмуйа йә кʹижан гази ԝи дькьн» (Зәб. 145:18). Һәрге әм дӧдьли нибьн кӧ Йаһоԝа мә һʹьз дькә у али мә дькә, әме бькарьбьн бәр тәнгасийед гьран жи тәйах кьн. w17.05 19 ¶9-10

Һәрге щьватеда рʹуспийа тьштәк сафи кьрьнә, ле тӧ ԛайил нини тʹәви ве сафикьрьне, тӧйе чь бьки? Әԝ дәрәщә дькарьн баԝәрийа мә һьндава Йаһоԝа у тʹәшкиләта ԝи, бьщерʹьбиньн. Ԝан дәрәщада мьлукти ԝе али мә бькә. Гәло чаԝа? Ԝәрә дӧ тьшта шеԝьр кьн. Йа пешьн, һәрге әм мьлук ьн, әме рʹази бьн кӧ әм һәр тьшти ньзаньн. Һәрге жи әм дьфькьрьн кӧ дәрһәԛа ве дәрәще һәр тьшти заньн, йәкә тʹәне Йаһоԝа дькарә дьле ԝи мәрьви бьхунә. Һәрге әм әве йәке бир нәкьн, әме бь мьлукти биньн сәр хԝә кӧ синоред мә һәнә у чахе лазьм бә әме фькьред хԝә бьгӧһезьн. Йа дӧда, һәрге әм мьлук бьн, әме гӧрʹа Йаһоԝада бьн у бь сәбьр һивийе бьн кӧ Йаһоԝа ԝе һʹәму нәһәԛийа рʹаст кә. Кʹьтеба Пироз дьбежә: «Жь йе хьрабрʹа нәбә ԛәнщи у ԝе рʹожед ԝан . . . дьреж нәкә» (Ԝаиз 8:12, 13). Бәле, һәрге әм мьлук бьминьн, әм у йед дьн ԝе кʹаре бьстиньн (1 Пәт. 5:5). w17.04 25-26 ¶10-11

Әшкәрә йә, ԝәки һьндава Усьв нәһәԛи һатә кьрьне. Әԝи ӧса жи рʹастә-рʹаст гот ԝәки гӧне ԝи нибу кӧ әԝ кʹәтә кәле. Ләма жи, Усьв һиви шәравдар кьр ԝәки бәр Фьрәԝьн ԝи бинә бира хԝә. Гәло чьрʹа? Әԝи жерʹа нета хԝә вәкьр у готе: «Мьн жь ве мале дәрхи» (Дәстп. 40:14). Жь гьлийед Усьв әм нькарьн бежьн ԝәки ԛә тʹалаша ԝи нибу чь сәре ԝи ԛәԝьми. Усьв фәʹм дькьр ԝәки һьмбәри ԝи гәләк нәһәԛи һатийә кьрьне. Ләма әԝи һʹале хԝә шәравдаррʹа гьли кьр, йе кӧ дькарьбу али ԝи бькьра. Ле дина хԝә бьдьн кӧ Кʹьтеба Пирозда тʹӧ щикида найе готьне ԝәки Усьв кʹәсәкирʹа, йан жи Фьрәԝьнрʹа шькйате бьред хԝә кьр у гот ԝәки ԝана ԝи дьзива фротьн. Чахе бьред Усьв һатьн Мьсьре у тʹәви ԝи һәв һатьн, Фьрәԝьн меванһʹьзи бьред ԝирʹа да кʹьфше. Әԝи ԝана тʹәглифи Мьсьре кьр сәва ԝедәре бьжин у «хер-хьзна ԝәлате» Мьсьре бьстиньн. Жь ве йәке жи те кʹьфше ԝәки Усьв дәрһәԛа бьред хԝә гьли нәкьрийә (Дәстп. 45:16-20). w17.04 20-21 ¶12-13

Мәʹникәк кӧ чьрʹа тʹәне изьна Йаһоԝа һәйә сәрԝертийе бькә әԝ ә, кӧ занәбун у биланийа ԝи һәйә, кӧ чаԝа сәрԝертийе гәрдуне бькә. Дина хԝә бьдьн, кӧ Хԝәде ԛәԝат да Кӧрʹе хԝә, ԝәки нәхԝәшийед ӧса ԛәнщ кә, кʹижан кӧ һʹәким нькарьн ԛәнщ кьн (Мәт. 4:23, 24; Марԛ. 5:25-29). Бона мә әԝ кʹәрәм ә, ле бона Йаһоԝа әԝ тьштәк нинә. Әԝ занә кӧ бәдәна мә ча чекьри йә у ча дьхәбьтә, у дькарә һәр нәхԝәши у зийане ԛәнщ кә. Әԝ ӧса жи дькарә мьрийа рʹакә у тʹәшԛәлед тʹәбийәте жи бьдә һьлдане. Дьнйа бьн һʹӧкӧме Шәйтʹанда тʹӧ щар нькарә әʹдьлайе бинә нава мьләта, нә жи нава ԝәлата. Тʹәне Йаһоԝа дькарә әʹдьлайе бинә сәр дьнйайе, чьмки билани у сәрԝахтийа ԝи һәйә (Иша. 2:3, 4; 54:13). Гава әм кʹур бьфькьрьн сәр занәбун у биланийа Йаһоԝа, әме жи мина Паԝлос бьхԝазьн бежьн гьлийед жь рʹеза ве рʹоже. w17.06 28 ¶6-7

Ве дьнйайеда сәр зәԝаще гәләк сьвьк дьньһерʹьн. Чахе һәләԛәти ортʹа мер у жьнда сар дьбә, әԝана тьштәки накьн сәва зәԝаще хԝәй кьн, у ләма жь һәв дьԛәтьн. Ле Мәсиһи гәрәке сәр зәԝаще ӧса нәньһерʹьн (1 Корн. 7:27). Әԝана фәʹм дькьн кӧ һәрге әԝана сонда зәԝаще нәйньн сери, әԝ бәр чʹәʹве Хԝәде ԝәкә дәрәԝийе йә, ле Хԝәде мәрьвед дәрәԝ нәфрʹәт дькә! (Ԛан. Кʹаһ. 19:12; Мәтʹлк. 6:16-19) Йаһоԝа ӧса жи нәфрʹәт дькә чахе мәрьв һʹәмде хԝә ԛәлпийе дькә, сәва жьн йан мере хԝә бьԛәтә (Малх. 2:13-16). Иса гот ԝәки сәр һʹиме Ньвисара тʹәне мәʹник һәйә, кʹижан кӧ изьне дьдә мәрьв сонда зәԝаще бьтʹәрьбинә. Мәʹни әԝ ә, чахе мәрьв ԛавийа жьн йан мере хԝә набахшинә (Мәт. 19:9; Ибрн. 13:4). Ле дәрһәԛа башԛәжитьне жи Кʹьтеба Пироз зәлал әʹйан дькә (1 Корн. 7:10, 11). Бь рʹастийе Кʹьтеба Пирозда найе готьне чь мәʹни һәнә ԝәки мер у жьн башԛә бьжин. Йәкә, һьнә Мәсиһи чәнд дәрәща һʹәсаб дькьн ча мәʹни бона башԛәжитьне. Мәсәлә, һәрге йәк алийе физикида ԛайим зийане дьдә жьн йан мере хԝә, йан жи наһелә ԝәки әԝ Хԝәдерʹа хьзмәт кә. w17.04 7 ¶14-16