Илон

Зарʹед хԝә «бь ширәт у һинкьрьна Хӧдан» мәзьн кьн, әԝ ԛәдьрәки мәзьн ә бона де-бава (Зәб. 127:3). Исраела бәреда, чахе зарʹ дьһатьнә буйине, әԝана ида тʹәсмилкьрийе Йаһоԝа бун. Ле иро ӧса нинә. Хенщи ве йәке, һʹьзкьрьна де-бава һьндава Хԝәде у рʹастийе, дәрбази зарʹа набә. Жь рʹожа буйина зарʹе, нета де-бава гәрәке әԝ бә, кӧ зарʹед ԝан ахьрийеда бьбьнә шагьрт, демәк, хԝә тʹәсмили Йаһоԝа кьн у бенә ньхӧмандьне. Ле чь дькарә жь ве йәке фәрзтьр бә? Тʹәсмилбуйин, ньхӧмандьн, у хьзмәткьрьн Хԝәдерʹа, мәщала дьдә зарʹе, ԝәки ԝәʹде тәнгасийа мәзьн хьлаз бә (Мәт. 24:13). Де-бавно, бьра зарʹед ԝә жи хԝә тʹәсмили Йаһоԝа кьн у бенә ньхӧмандьне, у һун жи ԝанрʹа ша бьн. w18.03 12 ¶16-17

Чахе бьред щабдар йан жи кәсәки дьн, сәр һʹиме Кʹьтеба Пироз малбәтеда йан жи щьватеда кәсәки ширәт дькьн, әԝана гәрәке чʹәʹв бьдьнә Мәсиһ. Ԝи щурʹәйи әԝана ԝе нишан кьн кӧ дьхԝазьн Хԝәде у Кӧрʹе ԝи рʹебәрийе ԝан бькьн. Чахе әм ширәткьрьна Йаһоԝа ԛәбул дькьн, у ӧса жи чʹәʹв дьдьнә ԝи у Иса, гава йед дьн ширәт дькьн, әм беһʹәсаб кʹәрәма дьстиньн. Мәсәлә, кʹәрәмәк әԝ ә кӧ малбәта мәда у щьватеда ԝе әʹдьлайи һәбә. Һәр кәс ԝе тʹәхмин кә кӧ ԝи һʹьз дькьн, ԛимәт дькьн у кӧ әԝ хԝәйкьри йә (Зәб. 72:7). Ширәткьрьна Йаһоԝа мә һин дькә у һазьр дькә бона жийина һʹәта-һʹәтайе әʹдьлайеда, йәктийеда, у бьн пʹәре Хԝәдеда (Иша. 11:9). Һәрге әм сәр ширәткьрьна Йаһоԝа ӧса бьньһерʹьн, әме фәʹм кьн ԝәки ширәткьрьна ԝи, һʹьзкьрьна ԝи һьндава мә избат дькә. w18.03 26 ¶15; 27 ¶17, 19

Мәрьв дьһатьнә бал Йуһʹәнна хԝә дьньхӧмандьн сәва әʹйан кьн, ԝәки тʹобә дькьн гӧнед хԝә, чьмки Ԛануна Муса нәдьанин сери (Мәт. 3:1-6). Ле ньхӧмандьнәкә лапә фәрз у мәхсус кʹижан кӧ Йуһʹәнна кьр, бона тʹобәкьрьне нибу. Бона Йуһʹәнна ԛәдьрәки гәләк мәзьн бу кӧ әԝи Кӧрʹе Хԝәдейи беԛьсур ньхӧманд (Мәт. 3:13-17). Иса бегӧнә бу, ләма жерʹа тʹобәкьрьн нәлазьм бу (1 Пәт. 2:22). Иса бь ньхӧмандьне нишан кьр, ԝәки хԝә тʹәсмили ве йәке дькә кӧ ԛьрара Хԝәде бинә сери (Ибрн. 10:7). Жь дәстпека хьзмәтийа Исада, шагьртед ԝи жи мәрьв дьньхӧмандьн (Йуһʹн. 3:22; 4:1, 2). Әԝ мәрьв жи дьһатьнә ньхӧмандьне бона тʹобәкьрьне, чьмки Ԛануна Муса нәдьанинә сери. Ле паши мьрьн у рʹабуна Иса, ньхӧмандьн ида сәва нетәкә дьн бу бона шагьртед Иса. w18.03 5 ¶6-7

Мәрьве рʹӧһʹани кʹе йә? Мәрьве рʹӧһʹани һәр гав дәрһәԛа һәләԛәтийа хԝә тʹәви Хԝәде дьфькьрә. Мәрьвед ӧса дьхԝазьн «чʹәʹв бьдьнә Хԝәде» (Әфәс. 5:1). Әв те һʹәсабе кӧ әԝана дьхԝазьн мина Йаһоԝа бьфькьрьн у сәр тьшта пе чʹәʹве ԝи бьньһерʹьн. Хԝәде бона ԝан реали йә. Әԝана һʹәму тьштада принсипед Йаһоԝа һьлдьдьн һʹәсаб (Зәб. 119:33; 143:10). Мәрьвед бь һʹьш-аԛьле рʹӧһʹани сәр хԝә дьхәбьтьн, ԝәки бәре рʹӧһʹе пироз бьдьнә кʹьфше, нә кӧ бькʹәвьнә пәй хԝәстьнед бәдәне (Галт. 5:22, 23). Сәва фәʹм кьн кӧ чь те һʹәсабе мәрьве рʹӧһʹани, ԝәрә мәсәләкә ӧса биньн: Мәрьве кӧ бь һʹьш-аԛьле хԝә педа дькʹәвә бизнесе у ве йәкеда пешда дьчә, ԝи нав дькьн ча бизнесмен. Ле әԝе кӧ һʹьш-аԛьле ԝан сәр тьштед рʹӧһʹани йә, дькарьн ԝи нав кьн ча мәрьве рʹӧһʹани. Бәле, мәрьве кӧ гәләк ԛимәт дькә тьштед рʹӧһʹани, әԝ мәрьве рʹӧһʹани йә. w18.02 19 ¶3, 6

Данийел чаԝа дил дьжит Бабилонеда, шәһәре кӧ бь пʹутпʹарьсти у сербазийева тʹьжә бу. Хенщи ве йәке, мәрьвед Бабилоне Щьһу ньмьз дькьрьн, у ԛәрфе хԝә ԝан у Хԝәдейе ԝан Йаһоԝа дькьрьн (Зәб. 137:1, 3). Бьдьнә бәр чʹәʹве хԝә, кӧ әԝ йәк чаԝа дьле Данийел у Щьһуйед амьн дьешанд! Данийел ӧса жи дьле хԝәда сафи кьр, ԝәки әԝ хԝарьна пʹадша нәхԝә, кʹижан кӧ ԝи бәр чʹәʹве Хԝәде һʹәрам кьра (Дан. 1:5-8, 14-17). Диса чәтьнайикә Данийел һәбу, кӧ аликива дьһатә кʹьфше те бежи әԝ йәк чәтьнайи нибу. Пʹадша щабдарийед мәхсус дабу Данийел, чьмки әԝ мәрьвәки сәрԝахт у билан бу (Дан. 1:19, 20). Ле Данийел тʹӧ щар ԛӧрʹә у хԝәрʹази нәдьбу. Әԝ мьлук у шкәсти ма, у тʹьме шькьри дьда Йаһоԝа (Дан. 2:30). Дина хԝә бьдьне, чахе Йаһоԝа гот кӧ Данийел, Нӧһ у Ибо мәрьвед рʹаст ьн, һьнге Данийел һе щаһьл бу (Һәзԛл. 14:14). Бәле, Йаһоԝа бадиһәԝа ԝида баԝәр нибу. Данийел һʹәта мьрьне амьн ма у гӧрʹа Хԝәдеда бу. w18.02 5 ¶11-12

Иса ньһерʹандьна рʹаст нишан кьр һьндава рʹьһәтийе. Әԝ чу «дәʹԝате» у ӧса жи ча меван дьчу сәр нанхԝарьне (Йуһʹн. 2:1-10). Дәʹԝатеда әԝи бь кʹәрәмәт ав кьрә шәрав. Ле әʹмьре Исада рʹьһәти тӧ щар щийе пешьн нәдьгьрт. Бона ԝи Йаһоԝа сәр щийе пешьн бу, у әԝи бона мәрьва һʹәйфа хԝә ԝәʹдә у ԛәԝата хԝә нәдьани. Сәва инсанәте хьлаз кә, әԝ бь рʹәзәдьли чәрчьри у сәр стуна щәфайе мьр. Әԝед кӧ дьхԝәстьн пәй Иса һәрʹьн, Иса ԝанрʹа гот: «Хԝәзи ль ԝә, гава бона наве мьн ԝә беһӧрмәт кьн, бьзерʹиньн у һәр щурʹә бӧхдан ль ԝә бькьн. Әшԛ у ша бьн, чьмки һәԛе ԝә ль әʹзмана гәләк ә» (Мәт. 5:11, 12). Һәрге әм бь рʹастийе Хԝәде һʹьз дькьн, әме фәсал бьн у хԝә нә кӧ тʹәне жь ԝан тьшта дур бьгьрьн кʹижан кӧ ԝи хԝәш найен, ле ӧса жи жь ԝан тьшта кӧ әм дьфькьрьн ԝәки дькарьн ԝи хԝәш нәйен (Мәт. 22:37, 38). w18.01 26 ¶16-18

Әм тьштед хԝәйә ԛимәт дьдьнә Йаһоԝа, чьмки ԝи һʹьз дькьн у ԛимәт дькьн. Чахе әм дьфькьрьн сәр ве йәке кӧ Йаһоԝа чь бона мә дькә, дьле мә бь рʹазибуне тʹьжә дьбә. Даԝьд Пʹадша шьровәкьр кӧ һәр тьшт әм жь Йаһоԝа дьстиньн, у чь жи әм дьдьнә ԝи, әԝ тьшт диса жи жь ԝи нә (1 Дир. 29:11-14). Чахе әм бь мәрʹданийе дьдьн, нә кӧ тʹәне дьстиньн, әԝ мәрʹа жи кʹаре тинә. Бьдьнә бәр чʹәʹве хԝә зарʹа кӧ де-баве хԝәрʹа пʹешкешәки дьдә, кʹижан кӧ әԝи пе пʹәре ԝан кьрийә. Бона де-бав әв пʹешкʹеш гәләк ԛимәт ә! Ӧса жи бьдьнә бәр чʹәʹве хԝә ԛиз йан кӧрʹ кʹижан кӧ пешәнг ә, мала де-баве хԝәда дьжи у пʹәрә дьдә де-баве хԝә сәва хәрще мале дадьн йан жи хԝарьне бькьрьн. Рʹаст ә де-бав жь зарʹе дәʹԝа накьн ве йәке, ле әԝана ԛәбул дькьн пʹешкʹеша ԝи. Чьрʹа? Чьмки де-бав заньн кӧ ӧса зарʹ дьдә кʹьфше кӧ әмәке ԝан дьшекьринә. Мина ве йәке, Йаһоԝа жи занә кӧ чахе әм тьштед хԝәйә ԛимәт дьдьн, әԝ бона мә кʹар ә. w18.01 18 ¶4, 6

Бәс нинә һун зарʹед хԝәрʹа тʹәне бежьн чь рʹаст ә у чь хьраб ә. Һун ӧса жи гәрәке али ԝан бькьн, ԝәки әԝана сәр пьрсед ԝи щурʹәйи бьфькьрьн: «Гәло чьрʹа Кʹьтеба Пироз ԛәдәхә дькә ԝан тьшта, чь кӧ мәрьва хԝәш те? Чь мьн дьдә баԝәркьрьне кӧ принсипед Кʹьтеба Пироз бона мьн тʹьме керһати нә?» (Иша. 48:17, 18). Һәрге зарʹа ԝә дьхԝазә бе ньхӧмандьне, һун гәрәке али ԝи бькьн, ԝәки әԝ фәʹм кә кӧ әв гавәкә гәләк фәрз ә. Жерʹа шьровәкьн кӧ паши ньхӧмандьне ԝе чь борщдарийед ԝи һәбьн. Әԝ ԝе чь кʹаре бьстинә һәрге бе ньхӧмандьне? Әԝ дькарә рʹасти чь чәтьнайа бе? Чьрʹа әԝ кʹар жь чәтьнайа зедәтьр ьн? (Марԛ. 10:29, 30). Гәләк фәрз ә кӧ пешийа ньхӧмандьне әԝ сәр ԝан пьрса бьфькьрә. Чахе де-бав али зарʹа дькьн бьфькьрьн сәр ԝан пьрса, әԝана ԝе ԛәԝи баԝәр кьн, кӧ принсипед Кʹьтеба Пироз тʹьме бона кʹара ԝан ьн. w17.12 21 ¶14-15

Гәләк жь ԝә хушк-бьред дәлално, рʹасти нәхԝәшийед гьран тен. Һьнәк жи рʹаст ә салийед хԝәда мәзьн ьн, ле йәкә мьԛати мәрьвед хԝәйи незик дьбьн кӧ кал-пир ьн. Йед дьн жи хәм дькьн кӧ чаԝа нәфәред хԝә хԝәй кьн. У әм заньн кӧ гәләк жь мә нә кӧ тʹәне рʹасти чәтьнайики тен, ле щарәкива рʹасти чәнд чәтьнайа тен. Һәрге Йаһоԝа бона ԝан әʹфьрина хәм дькә, илаһи әԝ чьԛас бона тә хәм дькә у дьфькьрә. Әԝ занә ԝәки тӧ жерʹа хьзмәт дьки нә кӧ беһʹәмде хԝә, ле чьмки тӧ ԝи һʹьз дьки! (Зәб. 19:1, 3, 14). Баве мәйи дәлал дәрһәԛа тә һәр тьшти занә. Кʹьтеба Пироз дьбежә: «Һәр тʹеләки пʹоред сәре ԝә жьмарти нә» (Мәт. 10:30). Ӧса жи Кʹьтеба Пирозда те готьне: «Хӧдан хәме һʹале беләка дькʹьшинә» (Зәб. 37:18). Бәле, Йаһоԝа һәр чәтьнайед тә дьвинә, у әԝ дькарә ԛәԝатәкә ӧса бьдә тә, ԝәки һʹәму чәтьнайа тәйах ки. w18.01 7 ¶1; 8 ¶4

Әԝ ԛәԝьмандьн кӧ Пәтрус Тʹабита жь мьрьне рʹакьр ӧса сәр мәрьва һʹӧкӧм бу, кӧ «гәләка Хӧдан баԝәр кьрьн». Әԝан шагьртед тʹәзә һьлбәт ԝе мәрьварʹа гьли кьрана мьзгинийа дәрһәԛа Иса у илаһи дәрһәԛа ԛәԝата Йаһоԝа кӧ әԝ дькарә мьрийа рʹакә (Кʹар. Шанд. 9:36-42). Ԛәԝьмандьнәк жи һәбу, кӧ бәр гәләк шәʹда, мьри жь мьрьне рʹабу. Щарәке чахе Паԝлосе шанди сәр щьвинәке Тройайеда бу, әԝ һәйә Тʹьркйа бакʹур-рʹоавайа иройин, әԝи һʹәта ниве шәве хәбәр дьда. Гәдәки щаһьл бь наве Әйтухо сәр пʹәнщәре рʹуньштьбу у гӧһ дьда Паԝлос. Ле әԝ һеньжи, паше кʹәтә хәԝа кʹур у жь ԛате сьсийа жорда кʹәт. Дьԛәԝьмә пешийе Луԛайе һʹәким гьһиштә Әйтухо у әԝи гот, ԝәки Әйтухо нә кӧ хәрьԛи йә йан жи зийан сьтандийә, ле әԝ мьрийә. Паԝлос жи пәйайи жере бу, щьнйаз да һʹәмеза хԝә у әʹлам кьр кӧ әԝ сах ә. Бьдьнә бәр чʹәʹве хԝә кӧ әԝ йәк ча һʹӧкӧм бу сәр ԝан, йед кӧ ԝедәре бун. Ԝана заньбу ԝәки әԝ мьри бу у жь мьрьне рʹабу у һьнге «беһʹәсаб дьл һатә бәр ԝан» (Кʹар. Шанд. 20:7-12). w17.12 5 ¶10-11

Гәло проблемед инсанәте чь дьдьнә кьфше? Әԝана гәрәке һин бьн кӧ жь шәрʹа дур бьн. Щурʹед ԛачахтийейә тʹәзә пешда тен, мәсәлә, кибер ԛачахти (ԛачахтийа пе интернете), зорбәти малбәтеда, у тероризм гәләк бәлабуйи нә. Ӧса жи нәхԝәшийед кӧ найенә ԛәнщкьрьне жи һе зедә бәла дьбьн. Иро система економики у политики бьн дәсте мәрьвед хԝәһʹьзда ньн. Әшкәрә йә кӧ әԝана нькарьн нә шәрʹ, нә зорбәти, нә ԛачахти нә жи кʹәсиббуне бьдьнә һьлдане. Тʹәне Пʹадшатийа Хԝәде дькарә кʹока ван тьшта бинә. Дина хԝә бьдьне, Йаһоԝа ԝе чь бькә бона инсанәте. Шәрʹ: Пʹадшатийа Хԝәде ԝе һʹәму мәʹнийед шәрʹа бьдә һьлдане, әԝ һәнә хԝәһʹьзи, корупсйа, патриотизм, динед ԛәлп, у Мире-щьна (Зәб. 46:9). Ԛачахти у Зорбәти: Пʹадшатийа Хԝәде ԝе ԛачахти у зорбәтийе бь тʹәмами кʹӧта кә, у әԝ ида ирода бь милйона мәрьва һин дькә кӧ һәвдӧ һʹьз бькьн у итʹбарийа хԝә һәвдӧ биньн. Тʹӧ сәрԝерти тьштед ӧса нькарә бькә (Иша. 11:9). Нәхԝәши: Йаһоԝа ԝе һʹәму нәхԝәшийа бьдә һьлдане у щьмәʹта хԝәрʹа сьһʹәт-ԛәԝата бекемаси бинә (Иша. 35:5, 6). Кʹәсиббун: Йаһоԝа ԝе кʹокева кʹәсиббуне бьдә һьлдане у щьмәʹта ԝи ԝе бәхтәԝарийеда бьжи у тьштәки ԝан кем нибә. (Зәб. 72:12, 13). w17.11 24 ¶14-16

Мәʹнийа сәрәкә кӧ чьрʹа шәһәред сьтʹарбуне һәбун, әԝ бу кӧ щьмәʹта Исраел нәһәԛ нибә бона хунрʹетьне. Йаһоԝа жийине ԛимәт дькә у дәстед меркӧжа кӧ «хуна бесущ дьрʹежьн», бәр чʹәʹве ԝи рʹәш ьн (Мәтʹлк. 6:16, 17). Хԝәдейе һәԛ у пироз чʹәʹве хԝә данәдьда сәр ԝе йәке жи, чахе кәсәк бей хԝәстьна хԝә, демәк ньшкева хуна кәсәки бьрʹета. Ле ԛанунзан у Ферьси мина Йаһоԝа нибун, ԝана хәм нәдькьр бона әʹмьре мәрьва. Чьрʹа? Иса готә ԝан: «Ԝә кʹьлита занәбуне һьлдайә. Нә һун кʹәтьне у нә жи ԝә һьштийә йед кӧ дьхԝазьн бькʹәвьне» (Луԛа 11:52). Ԝана гәрәке нета Хәбәра Хԝәде мәрьварʹа шьровәкьрана у али ԝан бькьрана кӧ жийина һʹәта-һʹәтайе бьстиньн. Дәԝсе, ԝана мәрьв жь «Сәроке Жийине» демәк Иса, дур дьхьстьн. Бона ԝе йәке әԝан мәрьва дькарьбун әʹмьре һʹәта-һʹәтайе ӧнда кьрана (Кʹар. Шанд. 3:15, ИМ). Ԛанунзан у Ферьси ԛӧрʹә у хԝәһʹьз бун, ләма бәрхԝә нәдькʹәтьн бона әʹмьр у һʹалхԝәшийа мәрьва. Рʹасти жи әԝ йәк чьԛас бехԝәдети у берʹәмти йә! w17.11 15 ¶9-10

Чахе мә дәстпекьр тʹәви Шәʹдед Йаһоԝа Кʹьтеба Пироз һин бьн, дьбәкә мә пешийе нәфәред хԝәрʹа дәрһәԛа ве йәке нәгот. Ле чахе баԝәрийа мә һе мәзьн бу, мә ида дәстпекьр дәрһәԛа баԝәрийа хԝә гьшкарʹа гьли кьн. Һәрге бона рʹастийе ортʹа ԝә у мәрьвед ԝәйи незикда чәтьнайи пешда тен, фәʹм кьн ԝана у нәрм бьн һьндава ԝан. Әм бәхтәԝар ьн кӧ рʹастийе заньн. Ле мәрьвед мәйи незик дьбәкә дьфькьрьн, кӧ әм һатьнә хапандьне йан жи кʹәтьнә сектәке әʹщеб. У чьмки әм тʹәви ԝана щәжьна у әʹйд-ԛәйда дәрбаз накьн, дьбәкә әԝана дьфькьрьн кӧ әм ԝана ида һʹьз накьн. Һәла һе дьбәкә дьтьрсьн жи кӧ әме ахьрийеда гәләк пʹошман бьн у ахьрийа хьраб бьстиньн. Әм гәрәке ԝана фәʹм кьн у хԝә дайньн дәԝса ԝан. Ӧса жи чахе әԝана мәрʹа дьбежьн кӧ бона мә бәрхԝә дькʹәвьн, әм гәрәке гӧһ бьдьнә ԝан (Мәтʹлк. 20:5). Паԝлосе шанди дьхԝәст һʹәму щурʹә мәрьва фәʹм кә, сәва кӧ ԝанрʹа дәрһәԛа мьзгинийе гьли кә. Ве йәкеда әм жи гәрәке чʹәʹв бьдьнә ԝи (1 Корн. 9:19-23). w17.10 15 ¶11-12

Дьбәкә әм шәрм дькьн бьстьрен чьмки ньзаньн ча бьстьрен. Ле ԝәрә әм чәнд ширәта шеԝьр кьн, кʹижан кӧ ԝе али мә бькьн әм һе рʹьнд бьстьрен. Һәрге һун һин бьн кӧ ча рʹаст бина хԝә бькʹьшиньн, ԝе дәнге ԝә һе бьльнд бә у ԛайим бә. Ча ток кӧ ԛәԝате дьдә сәва лус бьшьхӧлә, бинкʹьшандьн жи ԛәԝате дьдә дәнге мә ԝәʹде хәбәрдане у стьране. Һун гәрәке бь дәнге ӧса бьстьрен, чаԝа һун хәбәр дьдьн, йан һәла һе бь дәнге дьһа бьльнд жи. Кʹьтеба Пирозда жи чәнд щийада хьзмәткʹаред Йаһоԝарʹа те готьне кӧ «әшԛ» бьстьрен (Зәб. 33:1-3). Әван ширәта бьдьнә хәбате: Кʹьтеба кʹьламада бьжберьн кʹьламәке кʹижане һун һʹьз дькьн. Пешийе педа кʹьламе бь дәнге бьльнд бьхуньн. Паше, һәма бь ви дәнге бьльнд һәр щьмләке бинәкера бьхуньн. Паше диса жи бь ԝи дәнги әве щьмле бьстьрен (Иша. 24:14). Ӧса ԝе дәнге ԝә һе ԛәԝи бә у баш бә. Дәнге хԝә нәгьрьн у тʹӧ щар шәрм нәкьн бьстьрен! w17.11 5-6 ¶11-13

Дьбәкә рʹева Щьһу гәләк дьфькьрин кӧ ԝе ча бә һʹале ԝан мала ԝанә тʹәзәда. Әԝана жь мәрьвед әʹмьрда мәзьн пеһʹәсийабун кӧ бәре Оршәлим у пʹарьстгәһ чьԛас бәдәԝ бун (Әзр. 3:12). Һәрге һун нава ԝан Щьһуйада буна, ԝәйе чь тʹәхмин кьра чахе щара пешьн Оршәлим бьдита? Дьбәкә ԝәйе бәрхԝә кʹәта, гава ԝә бьдита кӧ зиԝан авайива у диԝаред һьлшийайива шин буйә. Дьбәкә ԝәйе дьле хԝәда әԝ диԝар у бьрщед ԛәрәԝьлийе йед һьлшийайи бәрамбәри йед Бабилоне кьра, кʹижан кӧ гәләк ԛәԝи у мәзьн бун. Ле щьмәʹта Щьһу дьлтәнг нәдьбу, чьмки ԝана ида дәсте Йаһоԝа дитьн, чахе әԝи ве рʹийа дьрежда әԝана хԝәй дькьрьн у али ԝан дькьр. Зутьрәке, гава әԝана һатьнә Оршәлиме, ԝана сәр щийе кӧ бәре пʹарьстгәһ бу, горигәһ чекьрьн у паше һәр рʹож Йаһоԝарʹа ԛӧрбан дьанин (Әзр. 3:1, 2). w17.10 26-27 ¶2-3

Сьлеман дьбәкә жь Даԝьде баве хԝә мерхасийе һин бу. Щаһьлтийеда Даԝьд тʹәви тәрәԝьла шәрʹ дькьр, сәва кӧ пәзед баве хԝә хԝәй кә. Хенщи ве йәке, әԝи мерхасийа мәзьн да кʹьфше гава мьԛабьли Голйат дәркʹәт. Бәле, пе аликʹарийа Хԝәде Даԝьд пе кәвьрәки  әв мәрьве тәʹрьки кӧшт (1 Сам. 17:45, 49, 50). Рʹасти жи Даԝьд мәрьвәки ӧса бу кӧ дькарьбу Сьлеман ширәт у ԛәԝи кьра, сәва әԝ пʹарьстгәһе ава кә! Йаһоԝа ԝе тʹәви ԝи буйа, һʹәта кӧ авакьрьна пʹарьстгәһе хьлаз буйа. Әв гьлийед баве ԝи һʹьш у дьле ԝида ман, у рʹаст ә әԝ щаһьл у нәщерʹьбанди бу, йәкә тʹӧ тьшти рʹе ԝи нәгьрт. Әԝи бь мерхасийа мәзьн әԝ шьхӧл дәстпекьр у пе аликʹарийа Йаһоԝа әв пʹарьстгәһа мәзьн у бәдәԝ хьлаз кьр нава 7 у нив салада. Бәле, чаԝа Йаһоԝа али Сьлеман кьр, әԝ ԝе али мә жи бькә сәва әм мерхас бьн у шьхӧле хԝә биньн сери, һьн малбәтеда һьн жи щьватеда (Иша. 41:10, 13). Чахе әм бь мерхаси Йаһоԝарʹа хьзмәт дькьн, әм дькарьн дӧдьли нәбьн кӧ әԝ ԝе мә һьн ньһа, һьн жи ахьрийеда кʹәрәм кә. w17.09 28 ¶3; 29 ¶4; 32 ¶20-21

Әм хьзмәткʹаред Йаһоԝа ԛә дӧдьли набьн кӧ «Хәбәра Хԝәде сах у зор ә». Әм хԝәха дьвиньн кӧ ԛәԝата Хәбәра Хԝәде ча сәр әʹмьре мә у ӧса жи сәр әʹмьре мәрьвед дьн һʹӧкӧм дькә. Мәсәлә, һьнәк хушк-бьред мә бәре дьз у наркоман бун, йан жи бенамуси дькьрьн. Һьнәк жи ве дьнйайеда пешдачуйи у дәԝләти бун, ле әԝ йәк ԝана бәхтәԝар нәдькьр (Ԝаиз 2:3-11). Бәле, гәләк мәрьвед кӧ нәрʹаст дьжитьн у нета әʹмьре ԝан тʹӧнә бу, бь аликʹарийа ԛәԝата Хәбәра Хԝәде һатьнә сәр рʹийа рʹаст у бәхтәԝар бунә. Дьбәкә ԝә гәләк сәрһатийед ԝи щурʹәйи хԝәндийә «Бьрща Ԛәрәԝьлийеда» рʹеза готарада йа бь наве «Кʹьтеба Пироз Жийина Мәрьва Дьгӧһезә». У әм дьвиньн кӧ һәла һе паши ньхӧмандьне жи Мәсиһи бь аликʹарийа Кʹьтеба Пироз бәрдәԝам дькьн рʹӧһʹанида пешда дьчьн. w17.09 23 ¶1

Әв сәрһатийа Лут әшкәрә дькә, кӧ Йаһоԝа һаш жь чәтьнайед хьзмәткʹаред хԝә һәйә у али ԝан дькә (Иша. 63:7-9; Аԛуб 5:11; 2 Пәт. 2:9). Әԝ ӧса жи щьмәʹта хԝә һин дькә кӧ әԝана дьлшәԝат бьн. Ԝәрә дәрһәԛа ԛанунәке шеԝьр кьн кӧ Хԝәде дабу Исраелийа. Ве ԛанунеда дьһатә готьне кӧ һәрге мәрьв тьштәки дәйни бьдә кәсәки, әԝ дькарә кʹьнща дәйндаре хԝә һьлдә чаԝа бьһе, демәк ча избаткьрьн, кӧ дәйне хԝә пашда бьстинә (Дәркʹ. 22:26, 27). Мәрьве берʹәʹм дьбәкә нә жи бьхԝәста кʹьнща ԝи кәси пашда вәгәрʹинә у дәйндар ԝе бе кʹьнщ у бе сьтʹар рʹаза. Ле Йаһоԝа щьмәʹта хԝә һин кьр кӧ дьлсар нибьн. Йаһоԝа дьхԝәст щьмәʹта ԝи дьлшәԝат бә. Ле гәло принсипа ве ԛануне мә чь һин дькә? Әм гәрәке тʹӧ щар пьшт гӧһе хԝәва нәвежьн чахе дьвиньн хушк-йан бьрак чәтьнайеда нә. У һәрге әм дькарьн али ԝи бькьн, әм гәрәке дәсте хԝә дьрежи ԝи кьн у дәрде ԝи сьвьк кьн (Колс. 3:12; Аԛуб 2:15, 16; 1 Йуһʹн. 3:17). w17.09 9 ¶4-5

Иса Баве хԝәрʹа дӧа кьр ԝәки әԝ бьбахшинә ԝан, йед кӧ гәрәке ԝи бькӧштана. Бь рʹасти жи Иса мәсәләкә гәләк баш һишт, кӧ ча мьлукти у сәбьре хԝәй кьн ԝәʹде чәтьнайед гьран! (1 Пәт. 2:21-23). Ле әм чаԝа дькарьн мьлуктийе у сәбьре бьдьнә кʹьфше? Паԝлос ньвиси: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв» (Колс. 3:13). Бь рʹасти жи, сәва кӧ әве тʹәмийе биньн сери, әм гәрәке мьлук у бь сәбьр бьн. У һәрге әм һазьр бьн мәрьва бьбахшиньн, әʹдьлайа щьвате ԝе бе хԝәйкьрьне. Әԝ йәк нә кӧ сәр хԝәстьна мәйә кӧ мьлук у бь сәбьр бьн, ле Йаһоԝа жь мә дәʹԝа дькә. Һәрге әм дьхԝазьн бенә хьлазкьрьне, әԝ һʹӧнӧр әʹсә лазьм ьн (Мәт. 5:5; Аԛуб 1:21). Ле йа лапә фәрз әԝ ә, кӧ бь ԝан һʹӧнӧра әм Йаһоԝа һӧрмәт дькьн у мәрьва жи һелан дькьн ԝәки әԝана жи ӧса бькьн (Галт. 6:1; 2 Тимтʹ. 2:24, 25). w17.08 25-26 ¶15-17

Кʹьтеба Пирозда гәләк сәрһати һәнә кӧ нишан дькьн ча Йаһоԝа ньшкева дәрәщә гӧһастьнә. Мәсәлә, Һьзԛийа пʹадшати дькьр чахе Санһәриб Пʹадшайе Асуре дора Щьһудайе гьрт у һʹәму шәһәред ԝи зәфт кьр, хенщи Оршәлиме (2 Пʹадш. 18:1-3, 13). Ле Санһәриб Һьзԛийа да тьрсандьне кӧ ԝе Оршәлиме жи һьлдә дәсте хԝә. Ԝи һʹалида гәло Һьзԛийа чь кьр? Әԝи Йаһоԝарʹа дӧа кьр у жь Ишайа пʹехәмбәр ширәт хԝәст (2 Пʹадш. 19:5, 15-20). Һьзԛийа ӧса жи алийе хԝәда хԝәст аԛьлайи бькә у ләма хәрщ да Санһәриб чьԛас кӧ әԝи жь ԝи дәԝа кьр (2 Пʹадш. 18:14, 15). Ԝәʹдә шунда, Һьзԛийа Оршәлим һазьр кьр сәва шәрʹе тʹәви Санһәриб (2 Дир. 32:2-4). Ле гәло әԝ чәтьнайи ча сафи бу? Йаһоԝа мьлйакʹәте хԝә шанд у шәвәкеда 185 000 әскәред Санһәриб кӧшт. Бәле, Һьзԛийа нә жи һивийе бу кӧ тьштед ӧса ԝе бьԛәԝьмийа (2 Пʹадш. 19:35). w17.08 10 ¶7; 11 ¶12

Щаһьлно, һун ча дькарьн хԝә һазьр кьн бона хьзмәткьрьна һәртʹьм? Сәва кӧ ахьрийеда пешдачуйи бьн ве хьзмәтийеда, гәләк фәрз ә хәйсәт-һʹӧнӧред Мәсиһити нав хԝәда пешда биньн. Ләма жи бь дьл у щан Хәбәра Хԝәде леколин бькьн, кʹур сәр бьфькьрьн, у мәщала бьгәрʹьн баԝәрийа хԝә щьватеда нишан кьн. Ԝәʹде һинбуна мәкʹтәбеда, һун дькарьн бәлакьрьна мьзгинийеда щерʹьбанди бьн. Һин бьн кӧ бь мәʹрифәти пьрса бьдьнә мәрьва у гӧһ бьдьнә щабед ԝан сәва тедәрхьн әԝана чь дьфькьрьн. Щьватеда жи һун дькарьн шьхӧл бькьн, мәсәлә аликʹарийе бьдьн сәва тʹәмьзайи у тʹәзәкьрьна Ода Щьвате. Йаһоԝа һʹьз дькә мәрьвед мьлук, йед кӧ бь рʹәзәдьли аликʹарийе дьдьн (Зәб. 110:3; Кʹар. Шанд. 6:1-3). Паԝлосе шанди, Тимотʹейо тʹәглифи хьзмәтийа мисйонерти кьр, чьмки «һьндава ԝида ԛәнщ хәбәр дьдан» (Кʹар. Шанд. 16:1-5). w17.07 23 ¶7; 26 ¶14

Сәва кӧ нав тʹәмамийа гәрдунеда әʹдьлайи һәбә, пьрса дәрһәԛа изьна сәрԝертийа Йаһоԝа гәрәке бе сафикьрьне. У гава бе избаткьрьне ԝәки сәрԝертийа Йаһоԝа йе һәри баш ә, ԝи чахи ида гьшк ԝе бьжин бьн сәрԝертийа ԝийә ԛәнщда у тʹәмамийа гәрдунеда ԝе әʹдьлайи һәбә (Әфәс. 1:9, 10). Зутьрәке ԝе бе избаткьрьне ԝәки сәрԝертийа Хԝәде рʹаст ә, ле сәрԝертийа Шәйтʹан у мәрьва ԝе бе һьлдане. Сәрԝертийа Хԝәде бь сайа Пʹадшатийе, ԝе нета хԝә бинә сери у мәрьвед амьн ԝе избат кьн кӧ мәрьв дькарә бь амьни пьштгьрийа сәрԝертийа Хԝәде бькә (Иша. 45:24). Бешьк, һун дьхԝазьн нава ԝан мәрьвада бьн, ӧса нинә? Сәва әм амьнийа хԝә хԝәй кьн, лазьм ә әм фәʹм бькьн, ԝәки чьԛас фәрз ә пьштгьрийа сәрԝертийа Хԝәде бькьн. w17.06 23 ¶4-5

Һьнәк мәрьв гәләк ԝәʹдә дьнәʹльн кʹәрбе мьрийед хԝә. Чахе кәсәк тʹәзә мьрийә, ԝи чахи гәләк һәвал у мәрьвед незик тенә сәр шине. Ле паши чʹәʹлкьрьне, ида гьшк дьчьнә мал-һʹалед хԝә у хԝәйе мьри тʹәне дьминә. Ләма һьнге жи ԝанрʹа бәрдьли лазьм ә. Бәле, әм гәрәке тʹьме ԝан хушк-бьра дьлгәрм кьн, һʹәта кӧ еша дьле ԝан дайнә (1 Тʹеслн. 3:7). Бир нәкьн кӧ дәрд-кӧле хԝәйе мьри дькарә ньшкева диса тʹәзә бә. Мәсәлә, әԝ йәк дькарә бьԛәԝьмә ԝәʹде рʹожа зәԝаща ԝан, йан жь бо бьһистьна кʹьламәке, дитьна шькла, йан жи ԝәʹде сезонәкә сале. Әԝе кӧ малхе хԝә йан кʹӧлфәта хԝә ӧнда кьрийә, гәләк тьшт щара пешьн тʹәне дькә, бәʹса хәбәре, те сәр щьвата мәзьн йан сәр Евара Биранине, у әԝ йәк дькарә ешәкә гьран бинә. Әм гәрәке нә кӧ тʹәне рʹожед мәхсус бәр дьле ԝанда бен, ле рʹожед дьн жи. w17.07 16 ¶17-19

Чахе әм али йед дьн дькьн, әм чәтьнайед хԝә бир дькьн у шабуне дьстиньн. Хушкед азәп у йед меркьри, шабунәкә мәзьн дьстиньн чахе мьзгинийе бәла дькьн, чьмки ӧса әԝана тʹәви Хԝәде һәвкʹарийе дькьн. Нета ԝан әԝ ә, ԝәки Йаһоԝа Хԝәде рʹумәт кьн у ԛьрара ԝи биньн сери. Әԝана дьлрʹьһʹәт дьбьн гава мәрьварʹа мьзгинийе гьли дькьн. Бәле, һәр кәс жь мә дькарә бона йед дьн хәм бькә, чаԝа бона мәрьвед дәшта мәда, ӧса жи хушк-бьред щьватеда. У ӧса әм һе незики хушк-бьра дьбьн. Паԝлосе шанди ве йәкеда мәрʹа мәсәләкә баш һишт. Бона щьвата Тʹесалоники әԝ бу ча «кәваник кӧ зарʹед хԝәрʹа дьрьщьфә», әԝ ӧса жи мина бавәки рʹӧһʹани бу (1 Тʹеслн. 2:7, 11, 12). Зарʹед кӧ Йаһоԝа һʹьз дькьн у тʹәмийед ԝи тиньн сери, дькарьн аликʹарийа мәзьн бьдьнә нәфәред мале у бәр дьле ԝанда бен. Мәсәлә, әԝана ԛәдьре де-баве хԝә дьгьрьн у али ԝан дькьн. Әԝана ӧса жи дькарьн нәфәра рʹӧһʹанида жи ԛәԝи кьн. w17.06 7 ¶13-14; 8 ¶17

Һьнә мәрьв ӧса дәԝләти нә кӧ һәбука ԝан дькарә тʹера гәләк рʹькʹьнйатед ԝан бькә, ле бь милиарда мәрьв кʹәсибийеда дьжин у һʹьзрәта ԝан пәʹри нан ә. Иса заньбу, ԝәки әԝ һʹал ԝе нәйе гӧһастьне, һʹәта Пʹадшатийа Хԝәде нәйе. Ве дьнйайеда хенщи система политики у рʹелиги, һәйә система комерси, кʹижан кӧ пʹәрәһʹьз ә. Әв систем кʹьтеба Әʹйанти 18:3-да бь симболик те навкьрьне «базьрган», у әԝ жи пʹарәкә ве дьнйа Шәйтʹан ә. Рʹаст ә щьмәʹта Хԝәде бь тʹәмами жь политике у динед ԛәлп ԛәтийа йә, ле бь тʹәмами жь ве система комерсйайе нькарә бьԛәтә. Ԝе керһати бә һәрге әм хԝә бьщерʹьбиньн, һәла әм ча ньн һьндава ве система комерсида. Мәсәлә, пьрсед ӧса бьдьнә хԝә: «Әз ча дькарьм бь һәбука хԝә амьнийа хԝә Хԝәдерʹа нишан кьм? Ча әз дькарьм һе кем бькʹәвьмә нава комерсйайе? Чь избат дькә ԝәки ве дьнйа чәтьнда, щьмәʹта Хԝәде бь тʹәмами итʹбарийа хԝә Хԝәде тинә?» w17.07 7-8 ¶1-3

Иса заньбу ԝәки ве дьнйайеда мәрьв ԝе гәләк кӧл-дәрда бькʹьшиньн у рʹасти чәтьнайа бен. Чахе Иса мәсәла тʹохьмрʹәш ани, әԝи гот кӧ ԝе һьнәк «хәбәра Пʹадшатийе» ԛәбул кьн у пешда һәрʹьн, ле «хәмед ве дьнйайе» у «дәԝләтийе» дәрәԝ ԝе «хәбәре» бьхәньԛиньн (Мәт. 13:19-22; Марԛ. 4:19). Рʹасти жи ӧса нә, һәрге әм фәсал нибьн, хәмед мәйи һәррʹожи дькарьн дьле мә бькʹьшиньн сәр хԝә у рʹӧһʹанида мә сьст кьн. Әм дькарьн һʹьзкьрьна хԝә Исарʹа бьдьнә кʹьфше, һәрге шьхӧле кӧ әԝи дабу шагьртед хԝә дайньн щийе пешьн. Гәло әм ча дькарьн әве йәке бькьн? Щара лазьм ә пьрсе бьдьнә хԝә: «Гәло әз бь рʹастийе чь һʹьз дькьм? Гәло әз шабуне дьһа зәʹф чьда дьвиньм, хьзмәтийа Хԝәдеда йан шьхӧлед ве дьнйайеда?» w17.05 23 ¶3-4

Чахе йед «хәриб» дури ԝан Шәʹдед Йаһоԝа дьжин йед кӧ сәр зьмане ԝан хәбәр дьдьн, лазьм ә әԝана һәрʹьн щьвата сәр зьмане ԝи щийи кʹидәре әԝана дьминьн (Зәб. 146:9). Ле һәрге незики ԝан һәйә щьвата сәр зьмане ԝани де, ида пьрс пешда те: Гәло малбәта ԝәрʹа һе баш ә һәрʹьн щьвата кʹижан зьмани? Әԝе пьрсе гәрәке малхе мале сафи кә. Әԝ гәрәке кʹур бьфькьрә, дӧа бькә у ӧса жи тʹәви жьн-зарʹед хԝә шеԝьр бькә (1 Корн. 11:3). Де-бав гәрәке рʹьнд бьщерʹьбиньн, һәла зарʹед ԝан бь рʹастийе һʹәԝще чь нә. Сәва кӧ зарʹ кʹур рʹастийе фәʹм бькә, бәс нинә тʹәне һәр һәʹфти чәнд сьһʹәта һәрә щьвате. Ле бьфькьрьн дәрһәԛа ве йәке: Һәрге зарʹ дьчә сәр щьвата ԝи зьмани кʹижани әԝ рʹьнд фәʹм дькә, әԝ дькарә һәма тʹәне сәр щьвате һаԛас тьшт һин бә, кӧ дьбәкә де-бав әʹщебмайи бьминьн. Ле һәрге зарʹерʹа зьмане щьвате бь тʹәмами фәʹмдари нинә, әԝ ида һаԛас кʹаре настинә (1 Корн. 14:11). w17.05 10 ¶10-11

Ԝе баш бә һәр кәс жь мә пьрсе бьдә хԝә: «Гәло әз һәʹму тьшти дькьм, сәва хьзмәтийеда хирәт бьм? Гәло нета мьн әԝ ә кӧ дәрбази шәһәр йан ԝәлатәки майин бьм, сәва гәләк пʹәра хԝәрʹа ԛазанщ кьм?» Һәрге ӧса нә, гәло тӧ дӧа дьки Хԝәдерʹа сәва әԝ тәрʹа әʹйан кә, һәла әԝ йәк ԝе ча сәр нәфәред тә у сәр щьвате һʹӧкӧм бә? Йаһоԝа ԛәдьрәки мәзьн да мә, кӧ әм дькарьн пьштгьрийа сәрԝертийа ԝи бькьн. Шәйтʹан ӧса кьр кӧ мәрьвед пешьн Адәм у Һеԝа мьԛабьли Йаһоԝа рʹабун у әԝ һʹәта ньһа жи дьхԝазә мәрьва жь Хԝәде дур хә. Ле чахе әм пьштгьрийа сәрԝертийа Йаһоԝа дькьн, әм Шәйтʹанрʹа әʹйан избат дькьн ԝәки әм алийе Хԝәде нә. Баԝәри у амьнийа мә һьндава Йаһоԝа, мә һелан дькә кӧ бь рʹәзәдьли жерʹа хьзмәт кьн, у әԝ йәк дьле ԝи гәләк ша дькә (Мәтʹлк. 23:15, 16). Амьнийа мә мәщале дьдә Йаһоԝа кӧ щаба ԛәрфе Шәйтʹан бьдә (Мәтʹлк. 27:11). Тьштәки ԛимәт кӧ әм дькарьн бьдьнә Йаһоԝа, әԝ һәйә гӧһдари. Бәле, чахе әм гӧрʹа ԝи дькьн, дьле ԝи гәләк ша дьбә. w17.04 32 ¶15-16

Ԛануна Мусада дьһатә готьне: «Гава мерәк ль бәр Хӧдан ад-ԛьрар бькә йан сонд бьхԝә . . . , әԝ гәрә иди хәбәра хԝә нәтʹәрьбинә, ле һәр тьшт чь кӧ жь дәве ԝи дәркʹәтийә, гәрәке бинә сери» (Жьмар 30:2). Паше, Сьлеман жи бь рʹебәрийа Хԝәде гьлийед жь рʹеза иройин ньвиси. Иса жи избат кьр кӧ гәләк фәрз ә сонда хԝә биньн сери. Әԝи гот: «Пешийарʹа һатийә готьне: ‹Дәрәԝ сонд нәхԝә у сонде хԝә ль бәр Хӧдан бинә сери›» (Мәт. 5:33). Әшкәрә йә, кӧ чахе әм Хԝәдерʹа тьштәки соз дьдьн, әԝ йәк тьштәки бьчʹук нинә. Әԝ йәк кӧ әм ча сонда хԝә тиньн сери, һʹӧкӧм дькә сәр достийа мә тʹәви Йаһоԝа. Даԝьд ньвиси: «Кʹи дькарә һьлкʹьшә чʹийайе Йаһоԝа, кʹи дькарә һьлкʹьшә щийе ԝийи пироз? Йе . . . кӧ бь наве Мьн [Йаһоԝа] дәрәԝ сонд нәхԝарийә у сонда дәрәԝ нәдайә» (Зәб. 24:3, 4, ДТʹ). w17.04 4 ¶3-4

Һәрге кәсәк щьватеда нәһәԛийе мә бькә, әм гәрәке фәсал бьн ԝәки гәвәстийа ԝи мәрьви нәкьн. Һәмьки әм дькарьн аликʹарийе жь рʹуспийа бьхԝазьн, у һәрге кәсәки гӧнәки мәзьн кьрийә рʹуспийара бежьн (Ԛан. Кʹаһ. 5:1). Ле һәрге әԝи кәси гӧне мәзьн нәкьрийә, һе баш ә әве чәтьнайе ортʹа һәвдӧда сафи кьн у рʹуспийа нәкьнә ортʹе (Мәт. 5:23, 24; 18:15). Ԝәрә әм тʹьме ль гора принсипед Кʹьтеба Пироз чәтьнайа сафи кьн. Һьнә дәрәщада мәрʹа дькарә бе кʹьфше ԝәки һьндава мә нәһәԛи кьрьнә, ле бь рʹастийе дьбәкә әԝ ӧса нинә. Ләма жи чьԛас баш ә бӧхдана нәвежьн хушк-бьра у чәтьнайе гӧрʹ нәкьн. Фьрԛи тʹӧнә әм рʹаст ьн йан нәһәԛ ьн, чәтьнайи ԝе тʹӧ щар сафи нәбә һәрге әм гәвәстийе бькьн. Амьни һьндава Йаһоԝа у хушк-бьра ԝе мә бьгьрә ԝәки шашикә ӧса нәкьн. w17.04 21 ¶14