Щотмәһ

Йаһоԝа Канийа сәрԝахтийе йә, у әԝ ви һʹӧнӧри бь мәрʹданийе дьдә мәрьва жи. Чахе әм ширәткьрьна Йаһоԝа ԛәбул дькьн, әм сәрԝахтийе жь Хԝәде дьстиньн. Әԝ сәрԝахти мә хԝәй дькә, ԝәки әм жь хьрабийе дур бьн у рʹӧһʹанида зийане нәстиньн (Мәтʹлк. 2:10-12). Ԝи щурʹәйи, әме «хԝә нава ԝе һʹьзкьрьна Хԝәдейә һьндава хԝәда хԝәй кьн . . . кӧ жийина һʹәта-һʹәтайе бьдә» мә (Щьһуд. 21). Әм гьшк гӧнәкʹар ьн, у бь щурʹә-щурʹә һатьнә мәзьнкьрьне, ләма щара мәрʹа чәтьн ә ширәткьрьне ԛәбул кьн у рʹаст бьньһерʹьн сәр ве йәке чахе ширәта дьдьнә мә. Ле чахе әм дьвиньн кӧ ширәткьрьна Хԝәде ча кери мә те, әм фәʹм дькьн кӧ әԝ чьԛас мә һʹьз дькә. Мәтʹәлок 3:11, 12-да те готьне: «Лаԝе мьн, ширәта Хӧдан пьшт гӧһе хԝәва нәвежә . . . чьмки Хӧдан һʹьзкьрийе Хԝә ширәт дькә». Бәле, ԝәрә әм бир нәкьн кӧ Йаһоԝа тʹьме кʹара мә дьхԝазә (Ибрн. 12:5-11). Хԝәде мә бь тʹәмами нас дькә, ләма жи ширәткьрьна ԝи тʹьме рʹаст ә у ԝәʹдәда йә. w18.03 28 ¶1-2

Пәтрусе шанди әԝ гьлийед жоре ньвиси хушк-бьред жь щьватед Асйа Бьчʹукрʹа. Әԝ хушк-бьра кӧ жь щурʹә-щурʹә щийа бун, кʹәтьнә «алава тәнгасийе», демәк рʹасти пәйкʹәтьна һатьн. Гәло чь дькарьбу али ԝан һʹәму Мәсиһийа бькьра, ԝәʹде ԝи зәмане гьран? (1 Пәт. 1:1; 4:4, 7, 12). Дина хԝә бьдьне, Пәтрус дәрһәԛа хушк-бьра дьгот кӧ «һьндава һәвда» меванһʹьз бьн, демәк тʹәви ԝан кʹижана әԝана ида нас дькьн у һәвалтийе дькьн. Ле меванһʹьзийе ԝе чьда али ԝан Мәсиһийа бькьра? Әԝана ԝе һе незики һәв буна. Һәла бьфькьрьн, чахе кәсәки һун тʹәглифи мала хԝә кьрьн, һун гәләк ша бун, ӧса нинә? Дьбәкә әԝ рʹож һе бира ԝәда йә. Йан жи чахе ԝә жь щьвате кәсәк тʹәглифи мала хԝә кьр, һун һе незики һәв бун, рʹаст ә? Чахе әм меванһʹьзийе дьдьнә кʹьфше, әм хушк-бьра һе рʹьнд нас дькьн. Мәсиһийед кӧ ԝәʹде Пәтрус дьжитьн, гәрәке һе зедә тʹьфаԛ буна, чьмки һьнге һʹал хьраб дьбу. Иро жи әм гәрәке ӧса бькьн, чьмки әм дьжин «рʹожед ахьрийеда» (2 Тимтʹ. 3:1). w18.03 14-15 ¶1-3

Кʹьтеба Пироз дәрһәԛа мәрьвед рʹӧһʹани дьбежә кӧ әԝана бәхтәԝар ьн. Рʹомайи 8:6-да әм дьхуньн дәрһәԛа ве кʹаре, кʹижан кӧ мәрьве бь һʹьш-аԛьле рʹӧһʹани дьстинә: «Ахьрийа фькьра бьнйатʹа мәрьвайе мьрьн ә, ле ахьрийа фькьра рʹӧһʹ жийин у әʹдьлайи йә». Бәле, чахе һʹьш-аԛьле мә сәр тьштед рʹӧһʹани йә, әʹдьлайа мә тʹәви Хԝәде у тʹәви мәрьва һәйә, у һьн жи баԝәрийа мә һәйә кӧ әме ахьрийеда жийина һʹәта-һʹәтайе бьстиньн. Әм иро дьнйакә хьрабда дьжин. Дор бәре мә һʹәму мәрьв тʹәне дәрһәԛа тьштед бәдәни дьфькьрьн, у ләма мәрʹа лазьм ә рʹӧһʹанида гьһишти бьн у рʹӧһʹанийа хԝә хԝәй кьн. Һәрге әм рʹӧһʹанийа хԝә ӧнда кьн, әв дьне ԝе һʹьш-аԛьле мә бь фькьред бәдәни тʹьжә кә. Щьһуда дәрһәԛа мәрьвед ԝи щурʹәйи һәла һе жи гот, ԝәки «рʹӧһʹе пироз» бал ԝан тʹӧнә (Щьһуд. 18, 19). w18.02 19 ¶5, 7; 20 ¶8

Гәләк һʹәким дьхәбьтьн дор бәре ԝан мәрьва йед кӧ бь нәхԝәшикә ӧса нәхԝәш ьн, кʹижан кӧ дькарә дәрбази мәрьвед дьн бә. Һʹәким мьԛати нәхԝәша дьбьн, чьмки дьхԝазьн али ԝан бькьн. Ле әԝана гәрәке хԝә хԝәй кьн чахе ԝан нәхԝәша ԛәнщ дькьн, у фәсал бьн ԝәки әв нәхԝәши дәрбази ԝан нәбә. Мина ве йәке, иро әм жи дьжин у дьхәбьтьн тʹәви ԝан мәрьва, йед кӧ бь симболик нәхԝәш ьн бь ԝан нет-фькьра у хәйсәт-һʹӧнӧра, кʹижан кӧ Хԝәде ԛәбул накә. Әв йәк дькарә чәтьнайе пешда бинә. Ԝан рʹожед ахьрийеда, мәрьв ԛанун у принсипед Хԝәде пьшт гӧһе хԝәва давежьн. Паԝлосе шанди нәʹма Тимотʹейо дӧдада гьли дькә дәрһәԛа хәйсәт-һʹӧнӧред ԝан мәрьва, йед кӧ Хԝәде һʹьз накьн (2 Тимтʹ. 3:1-5). Рʹаст ә әԝ хәйсәтед хьраб бона мә әʹщеб ьн, ле йәкә дькарә ӧса бьԛәԝьмә кӧ фькьр у рʹабун-рʹуньштьна ԝан мәрьва сәр мә һʹӧкӧм кьн (Мәтʹлк. 13:20). Ләма жи әм гәрәке хԝә хԝәй кьн, ԝәки әв һʹӧнӧр нав мәда шин нәбьн, у ӧса жи али мәрьва бькьн алийе рʹӧһʹанида. w18.01 27 ¶1-2

Сала 33 Д.М., Иса кӧ жь мьрьне рʹабу, хәбәр да тʹәви 500 мәрьва зедәтьр, нава ԝанда бун мер, жьн, у дьԛәԝьмә зарʹ жи. Дьԛәԝьмә Иса һәма һьнге әԝ гьлийед жь рʹеза рʹоже гот (1 Корн. 15:6). Бәле, ча те кʹьфше бь сәда шагьртед ԝи ԝедәре бун чахе Иса тʹәми да, ԝәки әԝана һәрʹьн мәрьва һин кьн. Иса ӧса жи гот кӧ ньхӧмандьн дәʹԝакьрьн ә бона ԝан, йед кӧ нире Мәсиһ ԛәбул дькьн, демәк дьхԝазьн бьбьнә шагьртед ԝи (Мәт. 11:29, 30). Һәр кәсе кӧ дьхԝазә Хԝәдерʹа хьзмәт кә, гәрәке рʹьнд фәʹм кә чь йә рола Иса ԛьрара Йаһоԝада. Паши ве йәке әԝ мәрьв дькарә бе ньхӧмандьне. Тʹәне ньхӧмандьна ӧса Хԝәде ԛәбул дькә. Кʹьтеба Пирозда гәләк избаткьрьн һәнә кӧ ԛьрʹна йәкеда шагьртед Мәсиһ фәʹм дькьрьн фәрзбуна ньхӧмандьне. У ԝана бе мәʹни тʹӧ щар ньхӧмандьн паш нәдьхьстьн (Кʹар. Шанд. 2:41; 9:18; 16:14, 15, 32, 33). w18.03 5 ¶8

Иро әм ве дьнйайеда дьжин, кʹижан кӧ бь бенамусийе у һʹәбандьна ԛәлп тʹьжә йә. Мәрьв бьн һʹӧкӧме Бабилона Мәзьнда ньн, демәк бьн империйа религийа ԛәлпда, кʹижан кӧ Кʹьтеба Пироз нав дькә щи-ԝаре «щьна» (Әʹйан. 18:2). Ле әм жь ве дьнйайе башԛә дьбьн, у бона ве йәке мәрьв һәла һе жи мә дькʹәньн (Марԛ. 13:13). Мина Данийел, ԝәрә әм жи незики Хԝәдайе хԝә Йаһоԝа бьн. Чахе әм бь мьлукти гӧрʹа ԝи бькьн у итʹбарийа хԝә ԝи биньн, әме жи бәр чʹәʹве ԝи гәләк ԛимәт бьн (Һаг. 2:7). Де-бав дькарьн мәсәла баш жь де-баве Данийел һин бьн. Чахе Щьһудайеда Данийел һе бьчʹук бу, гәләк мәрьвед ԝедәре хьраб бун. Ле әԝ мина ԝан нибу, әԝ мәзьн дьбу у Хԝәде һʹьз дькьр. Әшкәрә йә кӧ де-баве ԝи әԝ һин дькьрьн, ԝәки Хԝәде һʹьз бькә (Мәтʹлк. 22:6). Һәла һе наве Данийел жи кӧ те һʹәсабе «Һʹакьме Мьн Хԝәде йә», дьдә кʹьфше ԝәки де-баве ԝи мәрьвнә хԝәдехоф бун (Дан. 1:6). Ләма жи де-бавно, бь сәбьр бьн һьндава зарʹед хԝә чахе дәрһәԛа Йаһоԝа һин дькьн. Тʹӧ щар баԝәрийа хԝә һьндава ԝан ӧнда нәкьн (Әфәс. 6:4). Хенщи ве йәке, һьн тʹәви ԝан дӧа бькьн, һьн жи бона ԝан. Чахе һун алийе хԝәда һәр тьшти бькьн сәва рʹастийа Хԝәде бьгьһижә дьле ԝан, Йаһоԝа ԝе ԝә гәләк кʹәрәм кә (Зәб. 37:5). w18.02 5 ¶12; 6 ¶14-15

Әм тьштед ԛимәт дьдьнә Йаһоԝа, чьмки ԝи щурʹәйи жи әм ԝи дьһʹәбиньн. Йуһʹәннайе шанди хәԝн-хәйаледа бьһист кӧ чаԝа әʹзменда хьзмәткʹаред Йаһоԝа дьготьн: «Йа Хӧдан Хԝәдейе мә, тӧ һежа йи кӧ рʹумәт, һӧрмәте у ԛәԝате бьстини. Чьмки тә һәр тьшт әʹфьрандьн у бь хԝәстьна тә әԝ әʹфьрин у һәнә» (Әʹйан. 4:11). Бешьк, Йаһоԝа һежайи һʹәму рʹумәт-һӧрмәте йә, ләма әм дьхԝазьн тьштед лапи баш бьдьнә ԝи. Йаһоԝа бь Муса щьмәʹта Исраелрʹа тʹәми да, кӧ сале се щара щәжьне дәрбаз кьн, у бәр Йаһоԝа бьсәкьньн. Әԝ щәжьн бун пʹара һʹәбандьна ԝан. Исраели ԝәʹде ԝан щәжьна «дәст вала ль бәр Хӧдан» гәрәке нәсәкьнийана (Ԛан. Дщр. 16:16). Иро жи ӧса нә, мәрʹданийа рʹәзәдьли дькʹәвә нава һʹәбандьна мә, у ӧса әм нишан дькьн кӧ тʹәшкиләта Йаһоԝа ԛимәт дькьн у пьштгьрийа шьхӧле ԝи дькьн. w18.01 18 ¶4-5

Иса зедә кьр: «Нире мьн һьлдьнә сәр хԝә . . . Чьмки нире мьн рʹьһʹәт ә у баре мьн сьвьк ә» (Мәт. 11:29, 30). Әв йәк рʹасти жи ӧса нә! Щара әм ԝәстийайи дьчьнә щьвата, йан жи хьзмәтийе. Ле гава әм вәдьгәрʹьн мал, гәло әм ча хԝә тʹәхмин дькьн? Бәле, әм вәдьгәрʹьн бь ԛәԝата тʹәзә у һе ԛәԝи дьбьн кӧ чәтьнайа тәйах кьн. Нире Иса рʹасти жи сьвьк ә! Хушкәкә мә бь ԝәстийайибуна кроники, депресийе у бь сәреша мигрен нәхԝәш ә. Фәʹмдари йә кӧ щара жерʹа чәтьн ә бе сәр щьвате. Ле щарәки чахе жерʹа гәләк чәтьн бу ԝәки һәрә щьвате, йәкә әԝ чу. Әԝе ньвиси: «Готар дәрһәԛа дьлтәнгийе бу. Әԝ готар ӧса бь дьлшәԝати у бь һʹьзкьрьне һатьбу хԝәндьне, кӧ әз гьрийам. Һьнге мьн диса кьрә бира хԝә кӧ чь жи һәбә, йәкә әз гәрәке тʹьме щьватеда бьм». Бь рʹастийе жи жерʹа нәһесабу бе сәр щьвате, ле әԝ хушк әшԛ у ша бу гава һатә щьвате! w18.01 8-9 ¶6-7

Һун чь дькарьн бькьн, һәрге зарʹа ԝә паши ньхӧмандьне баԝәрийеда дӧдьли дьбә? Мәсәлә, щаһьле ньхӧманди дькарә пәй тьштед ве дьнйайе кʹәвә, йан жи дьбәкә дӧдьли бә кӧ аԛьлайи йә пе принсипед Кʹьтеба Пироз бьжи (Зәб. 73:1, 3, 12, 13). Ве дәме һун ча хԝә бьдьнә кʹьфше, дькарә һʹӧкӧм бә сәр ве йәке кӧ зарʹ ԝе баԝәрийеда ԛәԝи бә йан жи баԝәрийе бьһелә. Тʹӧ щар бона ве йәке тʹәви зарʹе шәрʹ-дәʹԝа нәкьн, фьрԛи тʹӧнә әԝ бьчʹук ә йан мәзьн ә. Нета ԝә гәрәке әԝ бә, кӧ зарʹа ԝә бьвинә ԝәки һун ԝи һʹьз дькьн у дьхԝазьн али ԝи бькьн. Щаһьле ньхӧманди кʹижан кӧ хԝә тʹәсмили Йаһоԝа кьрийә, әԝи соз дайә кӧ ԝе ԝи һʹьз бькә у ԛьрара ԝи сәр һәр тьштирʹа бьгьрә (Марԛ. 12:30). Йаһоԝа сәр әԝи сози сьвьк наньһерʹә, у йе кӧ соз дьдә, әԝ жи гәрәке сьвьк нәньһерʹә сәр ԝи сози (Ԝаиз 5:4, 5). w17.12 22¶16-17

Мина Мәртʹайе, хьзмәткʹаред Йаһоԝайи амьн заньбун кӧ ахьрийеда ԝе рʹабуна мьрийа һәбә. Бьфькьрьн дәрһәԛа сәрһатийа Бьраһим. Исһаԛ кӧрʹе Бьраһими һʹьзкьри бу, чьмки Бьраһим гәләк һивийа буйина ԝи бу. Ле щарәке Хԝәде Бьраһимрʹа гот: «Рʹабә кӧрʹе хԝәйи тайе тʹәнейи дәлал Исһаԛ һьлдә у . . . бькә дийарийа тәвайишәԝате» (Дәстп. 22:2). Бьдьнә бәр чʹәʹве хԝә кӧ әԝе тʹәмийе ԝе ча Бьраһим тʹәвһәв кьра. Пешийа ве йәке, Йаһоԝа Бьраһимрʹа соз да кӧ пе зӧрʹәта ԝи һʹәму мьләт ԝе бенә кʹәрәмкьрьне (Дәстп. 13:14-16; 18:18; Рʹом. 4:17, 18). Хенщи ве йәке, Йаһоԝа гот кӧ әԝ кʹәрәм ԝе пе «Исһаԛ» бьбьн (Дәстп. 21:12). Ле гәло әԝ созе Хԝәде ԝе ча бьһата сери, һәгәр Бьраһим кӧрʹе хԝә Исһаԛ бькьра ԛӧрбан? Паԝлос пе рʹебәрийа Хԝәде ньвиси, кӧ Бьраһим баԝәр дькьр, ԝәки Хԝәде дькарә Исһаԛ жь мьрьне рʹакә (Ибрн. 11:17-19). Бьраһим ньзаньбу кӧ кʹәнге кӧрʹе ԝи ԝе жь мьрьне рʹабә, ле әԝи итʹбарийа хԝә Йаһоԝа дьани кӧ әԝ ԝе әʹсә Исһаԛ сах кә. w17.12 5-6 ¶12-14

Мина Паԝлос әм жи гәрәке сәр әʹмьр ӧса бьньһерʹьн ча Хԝәде. Йаһоԝа «дьхԝазә ԝәки һʹәму жь гӧнәкьрьне вәгәрʹьн» (2 Пәт. 3:9). Ле тӧ? Һәрге тӧ дьле хԝәда мәрьва һʹьз дьки у рʹәʹм и, тӧйе бь хирәт хьзмәт ки у шабунәкә мәзьн бьстини. Һәрге әм мина Йаһоԝа сәр әʹмьр дьньһерʹьн, лазьм ә әм фәсал бьн. Мәсәлә, әм гәрәке тʹьме фәсал бьн чахе авте дажон у дьхәбьтьн. Ӧса жи чахе сәр авакьрьне дьхәбьтьн, тьштед електрики дькьн. Тʹӧ щар пʹәра у ԝәʹдә сәр әʹмьррʹа, сьһʹәт-ԛәԝатерʹа у сәр мәрьварʹа нәгьрьн. Әм дьхԝазьн чʹәʹв бьдьнә Хԝәде, йе кӧ тʹьме тьштед раст дькә. Илаһи рʹуспи гәрәке фәсал бьн, ԝәки нә әʹмьре хԝә нә жи әʹмьре мәрьвед дор бәре хԝә нәкьнә ԛәзийе (Мәтʹлк. 22:3). Һәрге рʹуспик тинә бира ԝә дәрһәԛа ԛанун у принсипед хԝәхԝәйкьрьне, ширәтед ԝи ԛәбул кьн (Галт. 6:1). Сәр әʹмьр ӧса бьньһерʹьн чаԝа Йаһоԝа дьньһерʹә, у хуна тʹӧ кәси ԝе ль сәр ԝә нибә (Ԛан. Дщр. 19:10). w17.11 16 ¶11-12

Мәсиһийед бь рʹӧһʹе пироз бьжарти һивийа жийина сәр әʹзмана нә. Паԝлос әԝ пʹешкʹеш нав кьр ча «ләщхәлата жорчуйине, аԝа готи газийа Хԝәде» (Фили. 3:14). Әԝана бь дьл у щан һивийе нә, ԝәки тʹәви Иса Мәсиһ Пʹадшатийа ԝида сәрԝертийе бькьн у али ԝи бькьн мәрьва бькьнә беԛьсур (Әʹйан. 20:6). Рʹасти жи әԝана һивийа ԝәʹдәки гәләк хԝәш ьн! Ле пәзед дьн һивийа хәлатәкә дьн ьн. Әԝана жи һивийа жийина һʹәта-һʹәтайе нә, ле сәр әʹрде, у әшԛ ша һивийа ԝи ԝәʹдәйи нә (2 Пәт. 3:13). Паԝлос дьхԝәст, ԝәки хушк-бьред Мәсиһи һʹәта хьлазийе амьн бьминьн, сәва хәлате ԛазанч кьн. Әԝи готә ԝан: «Сәр тьштед жорьн бьфькьрьн» (Колс. 3:2). Әԝан Мәсиһийа гәрәке тʹьме дина хԝә бьдана сәр ԝе хәлата гәләк ԛимәт (Колс. 1:4, 5). Бәле, чахе хьзмәткʹаред Йаһоԝа дәрһәԛа кʹәрәмед Хԝәде дьфькьрьн, әԝ йәк али ԝан дькә кӧ чʹәʹве хԝә сәр хәлате хԝәй кьн (1 Корн. 9:24). w17.11 25 ¶1-2

Ве кʹьтеба тʹәзәда «Бона Йаһоԝа Бьстьрен» гәләк кʹьлам мина дӧа нә. Бь ван кʹьлама һун дькарьн дьле хԝә Йаһоԝарʹа вәкьн. Кʹьламед дьн жи ԝе али ԝә бькьн кӧ «һʹьзкьрьне у ԛәнщикьрьнеда һелана бьдьнә» һәв (Ибрн. 10:24). Бәле, әм дьхԝазьн гьли, мьԛам у ритмед кʹьламед мә һин бьн. Малпәра мә jԝ.org-да бьбьһен кӧ хушк-бьра ча ԝан кʹьлама дьстьрен, у әԝ йәк ԝе али ԝә бькә кӧ һун рʹьнд бьстьрен. Чахе һун малда ԝан кʹьлама бьстьрен, һуне һе аза у бь дьл у әшԛ бьстьрен. Бир нәкьн кӧ стьрандьн хьзмәтийа мәда щийе фәрз дьгьрә. Әв мәщала мәзьн дьдә мә, ԝәки һʹьзкьрьн у рʹазибуна хԝә Йаһоԝарʹа нишан кьн (Иша. 12:5). Һәрге һун бь дьл у щан бьстьрен, йед дьн жи ԝе чʹәʹв бьдьнә ԝә кӧ аза у бь дьл бьстьрен. Һәр кәс щьватеда, фьрԛи тʹӧнә щаһьл, йан мәзьн, йан йед кӧ Кʹьтеба Пироз һин дьбьн, дькарьн бь ве йәке Йаһоԝа бьһʹәбиньн. Ләма жи шәрм нәкьн у хԝә нәгьрьн ԝәки бьстьрен. Бәле, ԝәрә әм тʹьме бь шабуне бьстьрен! w17.11 7 ¶18-19

Иро гәләк рʹәви жь ԝәлатед ӧса рʹәвинә, кʹидәре кӧ шьхӧле мәйи бәлакьрьна мьзгинийе ԛәдәхәкьри йә у тʹӧ щар ԝана мьзгини нәбьһистийә. Әʹфәрьм ԝан Шәʹдед Йаһоԝайи хирәтрʹа, кӧ ԝан бь һʹәзара рʹәвийарʹа «хәбәра Пʹадшатийе» гьли кьрьнә (Мәт. 13:19, 23). Гәләк жь ԝан йед кӧ «баргьран» бун, сәр щьватед мә дьлрʹьһʹәти у бәрдьли дитьн у ԝана дәрберʹа тедәрхьстьн у готьн: «Рʹасти жи Хԝәде нав ԝәда йә!» (Мәт. 11:28-30; 1 Корн. 14:25). Әм гәрәке «сәрԝахт» бьн у билан бьн гава рʹәвийарʹа мьзгинийе гьли дькьн (Мәтʹлк. 22:3). Бь сәбьр гӧһ бьдьнә ԝана, ле тʹӧ щар дәрһәԛа сәрԝера у политика шеԝьр нәкьн. Әм гәрәке пәй рʹебәрийа филиале у сәрԝеред шәһәре хԝә һәрʹьн. Бь ви щурʹәйи әме нә хԝә, нә жи кәсәки дьн бькьн бьн ԛәзийе. Пебьһʹәсьн дәрһәԛа дин у әʹдәтед ԝан рʹәвийа у бь ԛәдьр бьн һьндава ԝанда. Бәʹса хәбәре, һьнә рʹәви жь ԝан ԝәлата нә, кʹидәре кӧ жьн щурʹәки майин кʹьнща хԝә дькьн. Ләма жи чахе рʹәвийарʹа мьзгинийе гьли дькьн, әм гәрәке кʹьнща ӧса хԝә кьн ԝәки ԝана әʹщьз нәкьн. w17.05 7 ¶17-18

Әм гәрәке дӧада жь Йаһоԝа рʹӧһʹе пироз бьхԝазьн, сәва мәрьвед хԝәйи незикрʹа кӧ нәбаԝәр ьн, һʹәйф бьн у нәрм хәбәр дьн. Әм гәрәке бона һинкьрьнед ԛәлп кӧ әԝана баԝәр дькьн тʹәви ԝан нәкʹәвьнә дәʹԝе. Һәрге жи әԝана пе гьли йан жи кьред хԝә дьле мә дешиньн, һьнге баш ә чʹәʹв бьдьнә шандийа. Паԝлос гот: «Гава мә рʹәзил дькьн, әм дӧа ль ԝан дькьн, гава мә дьзериньн, әм сәбьр дькьн, гава наве мәрʹа дьлизьн, әм ль бәр ԝан дадьхьн» (1 Корн. 4:12, 13). Рʹаст ә хәбәрдана нәрм дьле мәрьвед мәйи незик дькарә нәрм кә, ле рʹабун-рʹуньштьна мәйә баш дьһа дькарә ԛәԝи сәр ԝан һʹӧкӧм кә (1 Пәт. 3:1, 2, 16). Мәрьвед хԝәйи незикрʹа пе кьред хԝә нишан кә, ԝәки Шәʹдед Йаһоԝа дьхԝазьн зәԝаща ԝан бәхтәԝар бә, мьԛати зарʹа бьн, нав-намус у дьлша бьжин. Һәрге жи мәрьвед мәйи незик рʹастийе ԛәбул нәкьн, йәкә әм дькарьн дьлрʹьһʹәт бьн кӧ әм дьле Йаһоԝа ша дькьн, чьмки жерʹа амьн дьминьн. w17.10 15 ¶13-14

Әм әʹщебмайи наминьн кӧ бь аликʹарийа һинбуна Хәбәра Хԝәде иро гәләк мәрьва әʹмьре хԝәда гӧһастьнед мәзьн кьрьнә. Ԛьрʹна йәкеда жи хушк-бьред мәйә бьжарти әʹмьре хԝәда гӧһастьн кьрьнә (1 Корн. 6:9-11). Чахе Паԝлосе шанди дәрһәԛа ԝан мәрьва гот, йед кӧ ԝе Пʹадшатийа Хԝәде ԝар нәбьн, әԝи зедә кьр: «Жь ԝә һьнәк ӧса бун». Ле Хәбәра Хԝәде у рʹӧһʹе ԝийи пироз али ԝан мәрьва кьрьн у ԝана әʹмьре хԝә гӧһаст. Чахе әԝана бунә Мәсиһи, һәла һе һьнге жи һьнәка жь ԝан шашийед ӧса мәзьн кьрьн, кӧ әԝ йәк һʹӧкӧм бу сәр һәләԛәтийа ԝан тʹәви Йаһоԝа. Мәсәлә, Кʹьтеба Пирозда те готьне дәрһәԛа Мәсиһики бьжарти ԛьрʹна йәкеда, йе кӧ гәрәке жь щьвате бьһата дәрхьстьне. Ле паше әԝ һатә гӧһастьне у диса вәгәрʹийа щьвате (1 Корн. 5:1-5; 2 Корн. 2:5-8). Әԝ йәк мә гәләк ԛәԝи дькә, чьмки әм дьвиньн кӧ хушк-бьред мә бь аликʹарийа Хәбәра Хԝәде чәтьнайед хԝә сафи кьрьнә у гӧһастьнед мәзьн кьрьнә. Бәле, әм бешьк дьхԝазьн ԝәки Хәбәра Хԝәде рʹьнд бьдьнә хәбате. w17.09 23-24 ¶2-3

Йаһоԝа Канийа һʹьзкьрьне йә (1 Йуһʹн. 4:7). Һʹьзкьрьна лапә мәзьн «агапе» йә, кʹижан кӧ сәр һʹиме принсипед рʹаст ә. Рʹаст ә назькайи у дьлгәрми жи дькʹәвә нава ве һʹьзкьрьне, ле фәрз әԝ ә кӧ әв һʹьзкьрьн кʹара йед майин дьгәрʹә, нә кӧ кʹара хԝә. Ль гора фәрһәнгәке, һʹьзкьрьна «агапе» дькарә «тʹәне пе шьхӧла бе кʹьфше». Бәле, чахе әм һʹьзкьрьна ви щурʹәйи дьдьнә кʹьфше, йан жи йед майин һьндава мәда дьдьнә кʹьфше, әм бәхтәԝар дьбьн у әʹмьре хԝәда ша дьбьн. Йаһоԝа һәла һе пешийа әʹфьрандьна Адәм у Һеԝайе һʹьзкьрьн һьндава мәрьва да кʹьфше. Әԝи әʹрд ӧса чекьр сәва мәрьв нә кӧ тʹәне теда бьжин, ле әʹмьре хԝәрʹа бь тʹәмами ша бьн. Йаһоԝа әԝ йәк нә кӧ бона кʹара хԝә кьр, ле бона мә. Гава кӧ әԝи әʹрд һазьр кьр у кьрә Щьнәт, әԝи мәрьв кʹәрәм кьр у жийина һʹәта-һʹәтайе пʹешкʹеш да ԝан. w17.10 7 ¶1-2

Аԛуб ӧса жи гот: «Һәгәр һун фьрԛийе дькьн, гӧна дькьн» (Аԛуб 2:9). Мәсәлә, һʹьзкьрьн ԝе мә һелан кә, ԝәки әм дӧрʹу нибьн у фьрԛийе нәкьнә ортʹа мәрьва жь бо хԝәндьна ԝан, раса ԝан, йан жи һәбука ԝан. Әм гәрәке нә кӧ тʹәне бь гьлийа фьрԛийе нәкьнә ортʹа мәрьва, ле әԝ йәк гәрәке дьле мә у һʹьш-аԛьле мәда бә жи. Һʹьзкьрьн ӧса жи «думькдьреж у ширьн ә» у «пʹьшька хԝәда наԝәрьмә» (1 Корн. 13:4). Сәва кӧ мьзгинийа Пʹадшатийе бәла кьн, әм гәрәке бәрдәԝам кьн бь сәбьр, ԛәнщ у мьлук бьн (Мәт. 28:19). Әԝ һʹӧнӧр ӧса жи али мә дькьн, ԝәки тʹәви һʹәму хушк-бьред щьватеда әʹдьлайе хԝәй кьн. Һәрге әм һʹьзкьрьна ӧса бьдьн кʹьфше, әԝ йәк ԝе чь кʹәрәма бинә? Һьнге щьвата мәда ԝе әʹдьлайи һәбә, у әԝ йәк ԝе Йаһоԝа рʹумәт кә. У ӧса жи чахе мәрьв бьвиньн кӧ әʹдьлайи нав мәда һәйә, әԝана ԝе дьһа һелан бьн кӧ рʹастийе пебьһʹәсьн. Кʹьтеба Пирозда дәрһәԛа мәрьве ну ӧса те готьне: «Сәр ван һʹәмуйада һʹьзкьрьне ль хԝә кьн, йа кӧ ван һʹәмуйа бь йәктийа тʹам һәвва гьредьдә» (Колс. 3:14). w17.08 26 ¶18-19

Әм жи гәрәке һьндава ԝан мәрьвед кӧ һе Йаһоԝа нас накьн, дьлшәԝат бьн, чьмки дьбәкә әԝана жи бенә сәр рʹийа рʹаст у бьбьнә достед ԝи. Йаһоԝа нахԝазә кӧ ԝәʹде диԝана ԝи кӧ ԝе бе, кәсәк бьмьрә (2 Пәт. 3:9). Ләма жи һʹәта Хԝәде ԛьрʹа хьраба нәанийә, ԝәрә бәрдәԝам кьн әʹламәтийа ԝи бәла кьн, чьмки әԝ жь рʹәʹма дьле хԝә дьхԝазә мәрьв пебьһʹәсьн. Иса жи дьлшәԝатийеда мәсәләкә гәләк баш мәрʹа һишт. Дьле Иса дьшәԝьти сәр әʹлаләте кӧ рʹасти ԝи һат, чьмки «әԝана мина пәзе бе шьван, бәрәдайи у бәлабуйи бун». Ле әԝи бона ԝан чь кьр? Әԝи «дәстпекьр гәләк тьшт әԝ һин кьрьн» (Мәт. 9:36; Марԛ. 6:34). Ле Ферьси мина Иса нибун, әԝана һьндава мәрьва дьлсар бун, у тʹалаша ԝан жи нибу кӧ али ԝан бькьн (Мәт. 12:9-14; 23:4; Йуһʹн. 7:49). Ле һун дьхԝазьн мина Иса али ԝан мәрьва бькьн, йед кӧ рʹӧһʹанида бьрʹчи нә? w17.09 9 ¶6; 10 ¶9

Чахе Усьв кәла Мьсьреда бу, әԝ ԛә нә жи дьфькьри ԝәки ԝәʹдә шунда ԝе бьбә сәрԝере дӧда Мьсьреда. Әԝ нә жи сәрва дьчу кӧ Йаһоԝа бь сайа ԝи, ԝе малбәта ԝи жь бьрʹчибуне хьлаз кә (Дәстп. 40:15; 41:39-43; 50:20). Рʹасти жи Усьв гәләк әʹщебмайи ма, чьмки һивийе нибу кӧ Йаһоԝа ԝе ӧса һʹале ԝи бьгӧһезә. Сәра жи ида әʹмьрда мәзьн бу у ԛә һʹьше ԝерʹа жи дәрбаз нәдьбу кӧ дькарә кӧрʹ жерʹа бьбә. У чахе жерʹа Исһаԛ бу, әԝ гәләк зәндәгьрти ма, чьмки нә жи дьда бәр чʹәʹве хԝә кӧ дькарә ӧса бьԛәԝьмә (Дәстп. 21:1-3, 6, 7). Әм һивийе ниньн кӧ пешийа дьнйа тʹәзә Йаһоԝа ԝе бь кʹәрәмәт һʹәму чәтьнайи у тәнгасийед мә бьдә һьлдане. У әм нә жи дәʹԝа дькьн, ԝәки әʹмьре мәда Йаһоԝа тьштед әʹщеб бькә. Ле әм сәд сәләфи заньн, Хԝәдейе кӧ бәре али хьзмәткʹаред хԝә кьрийә, әԝ Хԝәдейе мә Йаһоԝа йә кʹижан кӧ найе гӧһастьне (Иша. 43:10-12). Әм заньн кӧ әԝ дькарә һәр тьшти бькә сәва мә ԛәԝат кә, ԝәки әм ԛьрара ԝи биньн сери (2 Корн. 4:7-9). Һәрге әм Йаһоԝарʹа амьн бьминьн, әԝ ԝе ԝәʹде тәнгасийед гьранда али мә бькә. w17.08 11-12 ¶13-14

Хьзмәткьрьна һәртʹьм мәщале дьдә ԝә кӧ тʹәви хьзмәткʹаред һәртʹьмә майин һәвкʹарийе бькьн, у әв йәк ԝе али ԝә бькә бьбьнә Мәсиһийед гьһишти. Гәләк хушк-бьра готьнә кӧ чьмки ԝана щаһьлтийеда хьзмәтийа һәртʹьм дәстпекьрьнә, әв йәк паше зәԝащеда кери ԝан һатийә. Гәләкед кӧ пешийа зәԝаще пешәнг бун, паши зәԝаще бәрдәԝам дькьн тʹәвайи ча пешәнг хьзмәт дькьн (Рʹом. 16:3, 4). Нетед ԝә гәрәке жь дьле ԝә бьн. Зәбур 20:4-да те готьне кӧ Хԝәде «бьра ԝәкә дьле тә бьдә тә у нет-мәрәмед тә бинә сери». Бьфькьрьн кӧ һун ча дьхԝәзьн әʹмьре хԝә дәрбаз кьн. Дина хԝә бьдьн кӧ Йаһоԝа чь дькә бона рʹожа иройин у чь һун дькарьн бькьн хьзмәтийеда. Паше нетед ӧса дайньн пешийа хԝә, кʹижан кӧ ԝе дьле Хԝәде ша кьн. Һәрге һун бь тʹәмами Йаһоԝарʹа хьзмәт кьн, һуне гәләк бәхтәԝар бьн, чьмки бь ԝе йәке һуне Хԝәде рʹумәт кьн. Бәле, бьра Йаһоԝа «шабуна тә бә, Әԝе хԝәстьна дьле тә бьдә тә» (Зәб. 37:4). w17.07 26 ¶15-18

Чахе кәсәк шьхӧләки рʹьнд дькә йан жи һʹӧнӧрәки баш дьдә кʹьфше, әм дьхԝазьн пʹайе ԝи бьдьн. Һәрге әм һелан дьбьн пʹайе мәрьва бьдьн, ле илаһи чьԛас гәләк мәʹнийед мә һәнә, ԝәки пәсьне Йаһоԝа Хԝәде бьдьн! Бәʹса хәбәре, әм пәсьне ԝи дьдьн чьмки ԛәԝата ԝи пʹьрʹ зор ә у әв йәк жь әʹфьринед ԝи те кʹьфше. Һьн жи, әԝ мә ԛайим һʹьз дькә, у әм ве йәкеда дӧдьли ниньн, чьмки әԝи сәва мә Кӧрʹе хԝә кьрә ԛӧрбан. Ньвискʹаре Зәбур 147, жь кʹәла дьле хԝә пәсьне Йаһоԝа да. Һьн жи әԝи һелан да йед дьн, сәва әԝана жи тʹәви ԝи пәсьне Хԝәде бьдьн (Зәб. 147:7, 12). Әм ньзаньн ньвискʹаре ве зәбуре кʹе йә, ле дьԛәԝьмә әԝи ԝи ԝәʹдәйида дьжит, чахе Йаһоԝа Исраели жь дилтийа Бабилоне аза кьр у әԝана вәгәрʹийанә Оршәлиме (Зәб. 147:2). Бәле, әԝ йәк рʹасти жи мәʹнийа мәзьн бу, кӧ әԝ зәбурбеж һелан бу пәсьне Йаһоԝа бьдә. Ле чь мәʹнийед ԝә һәнә кӧ бь дьл у щан пәсьне Йаһоԝа бьдьн? (Зәб. 147:1). w17.07 17 ¶1-3

Иса заньбу ԝәки гәләк шагьртед ԝи ԝе бьжин система комерсида йа ве дьнйайе. Рʹаст ә Иса шьровәнакә кӧ чьрʹа әԝ сәр һәбуке дьбежә «нәрʹаст», ле Кʹьтеба Пироз зәлал нишан дькә ԝәки комерси, йане пʹәрәԛазанщкьрьн ԛьрара Хԝәдеда нибу. Мәсәлә, Йаһоԝа Әдәнеда Адәм у Һеԝайерʹа тʹер-тʹьжә тьшт да, нә кӧ чьԛас ԝанрʹа лазьм бу (Дәстп. 2:15, 16). Һьн жи, чахе ԛьрʹна йәкеда рʹӧһʹе пироз һатә сәр йед бьжарти, «жь ԝана тʹӧ кәси һәбука хԝәрʹа нәдьгот кӧ: ‹йа мьн ә›, ле һәр тьштед ԝан йәк бу» (Кʹар. Шанд. 4:32). Ишайа пʹехәмбәр гот кӧ ԝе бе ԝәʹдә, ԝәки мәрьв беһәԛ жь дайина әʹрде ләзәте бьвиньн (Иша. 25:6-9; 65:21, 22). Ле һʹәта кӧ әԝ ԝәʹдә бе, шагьртед Исарʹа лазьм ә кӧ «бь аԛьли» бьжин. Әԝана гәрәке «һәбука нәрʹаст», демәк йа ве дьнйайе, ӧса бьдьнә хәбате кӧ Хԝәде жи хԝәш бен (Луԛа 16:8). w17.07 8 ¶4-6

Әм гәрәке рʹаст фәʹм бькьн кӧ чьрʹа пьрса дәрһәԛа сәрԝертийа Йаһоԝа гәрәке бе сафикьрьне. Кʹьтеба Ибода әԝ йәк зәлал те кʹьфше. Ль ԝедәре әм педьһʹәсьн, ԝәки Шәйтʹан гот кӧ һәрге Ибо бькʹәвә тәнгасийед гьран у бьчәрчьрә, әԝ ԝе пьшта хԝә бьдә Хԝәде. У әԝи Хԝәдерʹа гот, ԝәки Ибо бьчәрчьринә. Йаһоԝа әԝ йәк нәкьр, ле изьн да Шәйтʹан кӧ әԝ хԝәха Ибо бьщерʹьбинә. Һьнә ԝәʹдә дәрбаз бу, у Ибо бәрдәстийед хԝә, һәбуна хԝә, у дәһ зарʹед хԝәйи дәлал ӧнда кьр. Шәйтʹан ӧса әԝ бәла ани сәре Ибо, кӧ бе кʹьфше йанчь хԝәха Хԝәде әԝ бәла ани сәре ԝи (Иб. 1:13-19). Паши ве йәке, Шәйтʹан Ибо нәхԝәш хьст бь нәхԝәшийа гәләк гьран (Иб. 2:7). Кӧла ԝи бәси ԝи нибу, жьна ԝи у се һәвалед ԝи йед кӧ һьндава ԝи һʹәлал нибун, бь гьлийед хԝә дьле ԝи һе зәʹф ешандьн (Иб. 2:9; 3:11; 16:2). Ахьрийа ве йәке чь бу? Чь кӧ Шәйтʹан шәрʹ авитә Ибо, дәрәԝ дәркʹәтьн. Ибо тәнгасийада пьшта хԝә нәда Хԝәде (Иб. 27:5). w17.06 24 ¶9-10

Малхед мале фәʹм дькьн, ԝәки әԝана борщдар ьн нәфәред хԝә хԝәй кьн. У әԝана гәрәке бьхәбьтьн сәва әве борщдарийе биньн сери. Ле ԝан рʹожед ахьрийеда щара хәбат дькарә хәма һе зедә кә. Иро чәтьн ә хәбате бьвиньн, чьмки мәрьвед кӧ хәбате дьгәрʹьн зәʹф ьн, ле хәбат һаԛас тʹӧнә. У гәләк мәрьв мәщбур ьн бь сьһʹәта зедә жи бьхәбьтьн у щара бь һәԛе лап кем. Чьмки гәләк компанийа дьхԝазьн гәләк хәбат бькьн, ле нахԝәзьн һаԛас хәбатчийед ԝан һәбьн чьԛас кӧ лазьм ә. Әԝана ӧса дькьн сәва хәрще ԝан кем бә. У ләма һʹале хәбатчийа һьн физикида һьн жи емосийалида хьраб дьбә. Хәбатчийед кӧ рʹази набьн ӧса бьхәбьтьн, бәрхԝә дькʹәвьн чьмки дькарьн хәбата хԝә ӧнда кьн. Әм гәрәке бь тʹәмами Йаһоԝа Хԝәдерʹа амьн бьн, нә кӧ мәзьне хәбата хԝәрʹа (Луԛа 10:27). Хәбат мәрʹа лазьм ә кӧ әʹбура хԝә бькьн у бькарьбьн хьзмәт кьн. Һәрге әм фәсал ниньн, хәбат дькарә зийане бьдә хьзмәтийа мә. w17.05 23 ¶5-7

Щара мьзгинванед тʹәзә дьбежьнә хушк-бьред щерʹьбанди, ԝәки зарʹед ԝан рʹастийе һин кьн. Һәрге де йан бав дьхԝазә, ԝәки әм зарʹед ԝан Кʹьтеба Пироз һин кьн, фәрз ә әм бира хԝәда хԝәй кьн, ԝәки борщдарийа де-бав һьлнәдьн сәр хԝә (Әфәс. 6:1-4). Щара де-бавед кӧ Шәʹдед Йаһоԝа ниньн, дьбежьнә мә ԝәки зарʹед ԝан рʹастийе һин кьн. Ԝи чахи әм гәрәке бир нәкьн, кӧ әм бона ԝан зарʹа де йан бав ниньн. Һьн жи чахе әм тʹәви зарʹа һинбуне дәрбаз дькьн, ԝе бь билани бә кӧ малда бәр чʹәʹве де-бава ԝана һин кьн, йан жи бәр хушк йан бьраки гьһишти, йан жи кʹидәре кӧ мәрьв һәнә. Бь ԝи щурʹәйи ԝе мәʹни тʹӧнә бә кӧ хәлԛ тьштәки нәрʹаст фәʹм кьн. У дьбәкә де-баве ԝан зарʹа паше хԝәха бьхԝазьн борщдарийа хԝә биньн сери у хԝәха зарʹед хԝә дәрһәԛа Йаһоԝа һин кьн. w17.06 8 ¶15-16

Һәрге бона зарʹа әʹдәте де-бава ида дьбә хәриб, әԝана дьбәкә нә жи бьхԝазьн зьмане де-бава һин бьн у хԝә ль баԝәрийа ԝан бьгьрьн. Де-бавед кӧ Мәсиһи нә, рʹӧһʹанийа зарʹед хԝә датиньн щийе пешьн, нә кӧ кʹара хԝә дьгәрʹьн (1 Корн. 10:24). Бьрак бь наве Самуйел, гьли дькә: «Мьн у жьна хԝә дина хԝә дьдайе, һәла зарʹед мә сәр кʹижан зьмани рʹӧһʹанида ԛәԝи дьбьн, у мә дӧа дькьр ԝәки Хԝәде биланийе бьдә мә. . . . Гава мә дит кӧ зарʹед мә кем кʹаре дьстиньн жь щьвата сәр зьмане мә, мә сафи кьр дәрбази щьвата зьмане ԝи щийи бьн, кʹидәре әм дьминьн. Әм тʹәвайи дьчунә щьвате у хьзмәтийе. Ӧса жи мә жь щьвата ԝедәре хушк-бьра тʹәглиф дькьр сәр хԝарьне у екскурсийайе. Әԝан һʹәму тьшта али зарʹед мә кьр ԝәки хушк-бьра нас бькьн, у ӧса жи Йаһоԝа нас бькьн нә кӧ тʹәне ча Хԝәде, ле ча Бав у Дост жи. Мә фәʹм дькьр кӧ әԝ йәк дьһа фәрз ә, нә кӧ әԝана зьмане мә бьзаньбьн». w17.05 10 ¶11-13

Зутьрәке ԝе тʹәмамийа әʹрде бь ԝан мәрьва тʹьжә бә, йед кӧ пьштгьрийа сәрԝертийа Йаһоԝа дькьн. Рʹасти жи әм чьԛас һивийа ве рʹоже нә! Әм жи мина Дәборайе у Барак, дьбежьн: «Йа Хӧдан, бьра һʹәму нәйаред тә бь ԝи авайи тʹӧнә бьбьн; ле бәле йед кӧ жь тә һʹьз дькьн, бьра бьбьн мина рʹожа кӧ дь һеза тәда дәрдькʹәвә!» (Һʹакьм. 5:31). Әԝ гьли ԝе бенә сери, чахе Йаһоԝа ԛьрʹа дьнйа Шәйтʹан бинә. Гава кӧ шәрʹе Һармәгәдон дәстпебә, ԝе нәлазьм бьн мәрьвед кӧ шәрʹ бькьн сәва ԛьрʹа дьжмьна биньн. Ԝи чахи әме бьсәкьньн у бьвиньн кӧ Йаһоԝа ԝе ча мә хьлаз кә (2 Дир. 20:17). Ле ньһа, гәләк мәщалед мә һәнә кӧ бь мерхаси у хирәт пьштгьрийа Йаһоԝа бькьн. Чахе Дәбора у Барак шәрʹда сәркʹәтьн, ԝана бь кʹьламе рʹумәт данә Йе Һәри Жорьн. Ԝана дьстра: «Бона рʹәзәдьлийа щьмәʹте, шькьрийе бьдьнә Йаһоԝа!» (Һʹакьм. 5:1, 2, ДТʹ). Бәле, һәрге әм бь рʹәзәдьли Йаһоԝарʹа хьзмәт дькьн, йед дьн жи ԝе һелан бьн «шькьрийе бьдьнә Йаһоԝа!» w17.04 32 ¶17-18

Рʹаст ә Усьв бир нәкьр кӧ чь нәһәԛи һьндава ԝи кьрьн нава 13 салада, ле әԝ тʹӧ щар нәбу йәки зӧлм (Дәстп. 45:5-8). Лапә фәрз әԝ ә, кӧ әԝи изьн нәдьда ԝәки кемаси у кьред мәрьва йед хьраб, ԝи жь Йаһоԝа бьԛәтиньн. Усьв Йаһоԝарʹа амьн ма, ләма жи әԝи дит кӧ Йаһоԝа ча әԝ нәһәԛи рʹаст кьрьн у ԝи у малбәта ԝи кʹәрәм кьр. Әм жи мина Усьв гәрәке достийа хԝә тʹәви Йаһоԝа ԛимәт кьн у хԝәй кьн. Әм Йаһоԝа гәләк һʹьз дькьн, ләма гәрәке тʹӧ щар нәһельн шашийед хушк-бьра бьбьнә мәʹни кӧ әм жь ԝи дур кʹәвьн (Рʹом. 8:38, 39). Чахе әм алийе хушк-бьрада нәһәԛийе дьвиньн, ԝәрә чʹәʹв бьдьнә Усьв у һе незики Йаһоԝа бьн у ӧса сәр дәрәща бьньһерʹьн чаԝа Йаһоԝа дьньһерʹә. Һәрге мә пе принсипед Кʹьтеба Пироз алийе хԝәда һʹәму тьшт кьрийә сәва чәтьнайа мә сафи бә, йед майин ида бьдьнә дәсте Йаһоԝа. Тʹӧ щар дӧдьли нәбьн ԝәки Хԝәде ԝе әʹсә ԝәхтда әԝе дәрәще рʹаст кә. w17.04 20 ¶12; 22 ¶15-16

Һаннайе чь кӧ сонд хԝарьбу бәр Хԝәде, һәма әԝ йәк жи кьр. Ԛә һʹьше ԝерʹа жи дәрбаз нәбу, ԝәки сонда хԝә нәйнә сери. Әԝе Самуйел бьрә кон, щәм Әли сәрәккʹаһин у жерʹа гот: «Бона ԝи лаԝьки дӧа кьрьм у хԝәстәка кӧ жь Хӧданва хԝәстьбум да мьн; мьн жи ԝи бь дийари да Хӧдан; дь тʹәмамийа рʹожед кӧ ԝе бьжи ԝе жь Хԝәдерʹа һатийә бь дийари кьрьн» (1 Сам. 1:24-28). Жь ԝи ԝәʹдәйи, «Самуйеле зарʹок ль бәр Хӧдан мәзьн бу» (1 Сам. 2:21). Ле бона Һаннайе әԝ чь дьһатә һʹәсабе? Һаннайе кӧрʹе хԝә ԛайим һʹьз дькьр у жерʹа һеса нибу жь ԝи бьԛәтә. Әԝе ида нькарьбу һәр рʹож кӧрʹе хԝә бьдита у бьчʹуктайа ԝида перʹа шабуйа. Бьдьн бәр чʹәʹве хԝә, кӧ әԝе ча дьхԝәст кӧрʹе хԝә ԛайим һʹәмез кьра у бьда бәр дьле хԝә, тʹәви ԝи бьлиста, ԝи һин кьра у ширәт кьра. Һәр дайикәкә ԛәнщ зарʹа хԝәрʹа ша дьбә, чахе дьвинә кӧ зарʹа ԝе ча мәзьн дьбә. Ле бьдьнә һʹәсабе хԝә ԝәки Һанна ԛә жь сонда хԝә пʹошман нәдьбу, чьмки дьле ԝе Йаһоԝарʹа ша дьбу (1 Сам. 2:1, 2; Зәб. 61:1, 5, 8). w17.04 5¶7-8

Паԝлосе шанди пешда гот ԝәки ван рʹожед ахьрийеда «зәманед хьраб» ԝе һәбьн. Паши ԝан гьлийа әԝи гот: «Мәрьвед хьрабә хԝәйифел ԝе хьрабийеда пешда һәрʹьн» (2 Тимтʹ. 3:2-5, 13). Һун дьвиньн әԝ пʹехәмбәрти ча те сери? Дьԛәԝьмә мә алийе мәрьвед хьрабда зийан стандийә, мәсәлә жь ԛачахед берʹәʹм, йан жи жь фанатикед зӧлм. Һьнә мәрьвед хьраб, хьрабийа хԝә әʹйан дьдьн кʹьфше, һьнәк жи рʹуйе хԝә вәдьшерьн у хԝә дәԝса мәрьвед ԛәнщ датиньн. Дьбәкә әԝ мәрьв хут мәрʹа зийан нәданә, ле йәкә хьрабийа ԝан һʹӧкӧм дьбә сәр мә. Әм бинтәнг дьбьн чахе дәрһәԛа кьред ԝани бехԝәдети педьһʹәсьн. Әԝ мәрьвед зӧлм тьштед нәмәрьвайи дькьн, мина һʹәйԝанед бәйани у һәла һе жи мина щьна (Аԛуб 3:15). Ле шькьр жь Йаһоԝарʹа кӧ әԝ бь сайа Хәбәра хԝә мьзгинийа пʹьрʹ ша дьдә мә. w17.04 10 ¶4