Чьлә

Һʹәму хьзмәткʹаред Хԝәдейи амьн, дьхԝазьн һин бьн кӧ чаԝа хьзмәтийа хԝә, кʹижан кӧ ԝанрʹа һатийә дайине, «бьԛәдиньн» (2 Тимт. 4:5). Әʹмьре мәда әԝ шьхӧләкә лапә фәрз ә. Ле дьбәкә мәрʹа чәтьн ә һаԛас ԝәхт хәрщ кьн сәр хьзмәтийе чьԛас әм дьхԝазьн. Диса шьхӧлед майинә фәрз һәнә, кӧ ԝәʹдә у ԛәԝате жь мә дьстиньн.  Мәсәлә, дьбәкә әм рʹоже гәләк сьһʹәта дьхәбьтьн, сәва әʹбура хԝә у нәфәред хԝә бькьн. Дьбәкә щабдарийед мәйә дьн һәнә, йан әм нәхԝәш ьн, йан депресийа мә һәйә, йан жи чәтьнайед жь бо әʹмьре мәзьн. Һәрге әм жь бо дәрәщед хԝә нькарьн гәләк хьзмәт кьн, әм гәрәке бәрхԝә нәкʹәвьн. Иса заньбу ԝәки әме һʹәмушк нькарьбьн мина һәв бәр бьдьн (Мәт. 13:23). Һәрге әм хьзмәтийеда алийе хԝәда һʹәму тьшти дькьн, Йаһоԝа гәләк ԛимәт дькә ве йәке (Ибрн. 6:10-12). w19.04 2 ¶1-3

Шәйтʹан пе дәрәԝед  дәрһәԛа мьрийа, бӧхдана давежә Йаһоԝа. Һинкьрьнәкә ԛәлп дькʹәвә нава ԝан дәрәԝа, кӧ йанчь мьри агьре щәʹньмеда дьчәрчьрьн. Ле әԝ һинкьрьн Хԝәде беһӧрмәт дькә у хьраб дәрдьхә. Чаԝа? Әԝ дәрәԝи Хԝәдейе һʹьзкьрьне дькә ԝәкә Мире-щьн, демәк берʹәʹм (1 Йуһʹн. 4:8). Һун чь тʹәхмин дькьн чахе дәрһәԛа ԝе йәке дьфькьрьн? Ле Йаһоԝа, бәр чʹәʹве  кʹижани һʹәму щурʹә берʹәʹмти рʹәш ә, чь тʹәхмин дькә? (Йерәм. 19:5) Дәрәԝед Шәйтʹан дәрһәԛа мьрьне, баԝәри һьндава ԛӧрбана Мәсиһ дькьн бьн шьке (Мәт. 20:28). Диса дәрәԝәкә майин кӧ Шәйтʹан бәла дькә, әԝ һәйә кӧ йанчь нәфса мәрьва намьрә. Һәрге әԝ йәк ӧса буйа, һәр кәс ԝе һʹәта-һʹәтайе бьжита. Ида ԝе нәлазьм буйа, ԝәки Мәсиһ әʹмьре хԝә бона мә ԛӧрбан кьра, сәва әм жийина һʹәта-һʹәтайе бьстиньн (Йуһʹн. 3:16; 15:13). Бьдьнә бәр чʹәʹве хԝә, Йаһоԝа у Кӧрʹе ԝи чь тʹәхмин дькьн дәрһәԛа ԝан һинкьрьнед ԛәлп, кӧ ԛӧрбанәкә ӧса мәзьн дькьн бьн шьке у беԛимәт дькьн! w19.04 14 ¶1; 16 ¶8-9

Һинкьрьнед Иса кʹидәре һатьнә ньвисаре? Чар кʹьтебед пешьнә Мьзгинида, гәләк тьшт те гьликьрьне чь кӧ Иса сәр әʹрде дьгот у дькьр. Кʹьтебед Ньвисаред Йунанийә дьн жи, кӧ бь рʹебәрийа рʹӧһʹе пироз һатьнә ньвисаре, али мә дькьн, ԝәки фькьр у ньһерʹандьна Иса сәр гәләк тьшта, фәʹм кьн, чьмки әԝ кʹьтеб ԝан мәрьва ньвисин, «нет-фькьра» кʹижана мина йа Мәсиһ бу. Һинкьрьнед Иса һʹәму алийада али мә дькьн. Демәк ԛануна Мәсиһ һʹәму дәра сәр һʹәму кьред мә һʹӧкӧм дькә, мәсәлә малда, мәкʹтәбеда, хәбатеда, у щьватеда (Галт. 6:2). Ԛануна ԝи әм һин дьбьн чахе Ньвисаред Йунани дьхуньн у сәр дьфькьрьн. Чахе әм дьжин ль гора тʹәми, рʹебәри у принсипед ԝан кʹьтеба, кʹижан кӧ жь бина бәр Хԝәде һатьнә ньвисаре, бь ве йәке әм гӧрʹа ве ԛануне дькьн. Чахе әм гӧрʹа ԛануна Мәсиһ дькьн, бь ве йәке әм гӧрʹа Йаһоԝа Хԝәдайе мәйи һʹьзкьрьне дькьн, чьмки Канийа ԝан тьшта чь кӧ Иса һин дькьр, Йаһоԝа йә (Йуһʹн. 8:28). w19.05 3 ¶6-7

Чьԛас хьраб ә чахе мәрьв тьштед ӧса дькьн, кӧ дьле Шәйтʹан хԝәш тен. Ле Йаһоԝа һаш кьред Шәйтʹан һәйә. Әԝ занә әм чь кӧл-дәрда дькʹьшиньн, у дькарә бәрдьлийе бьдә мә. Әм рʹасти жи кʹәрәмкьри нә, кӧ хьзмәт дькьн Хԝәдейе һʹәму бәрдьлийерʹа. «Әԝ нава һʹәму тәʹли-тәнгийада дьл дьдә бәр мә, ԝәки әм жи бькарьбьн дьл бьдьнә бәр ԝан, йед кӧ нава һәр щурʹә тәʹли-тәнгийада нә, бь ԝе бәрдьлийе, пе кʹижане әм хԝәха жь Хԝәде тенә бәрдьликьрьне» (2 Корн. 1:3, 4). Һьнә де-бава зарʹед хԝә жь зорбәтийа сексуали хԝәй нәкьрьнә, йан жи әԝ йәк пьшт гӧһе хԝәва авитьнә. Илаһи әԝ зарʹ у ӧса жи йед кӧ алийе мәрьвед незикда рʹасти зорбәтийе һатьнә, һʹәԝще бәрдьлийе нә. Даԝьде зәбурбеж заньбу, ԝәки Йаһоԝа һәйә канийа бәрдьлийейә лапә баш (Зәб 27:10). Даԝьд баԝәр дькьр, ԝәки Йаһоԝа ԝе ԝана бькә бьн пʹәре хԝә, нәфәред кʹижана хьраб ьн һьндава ԝанда. Лә ча? Әԝ ве йәкеда хьзмәткʹаред хԝәйи амьн дьдә хәбате. Хушк-бьред мә, малбәта мәйә рʹӧһани нә. Мәсәлә, Иса әԝед кӧ тʹәви ԝи Йаһоԝарʹа хьзмәт дькьрьн, нав дькьр ча бьра, де у хушк (Мәт. 12:48-50). w19.05 15-16 ¶8-9

Йа пешьн, әм гәрәке чь леколин бькьн? Әм гәрәке әʹсә һәр рʹож ԝәʹдә башԛә кьн, сәва Хәбәра Хԝәде кʹур леколин бькьн. Бәрнама хԝәндьна Кʹьтеба Пирозә щьватеда, ида кем буйә, сәва әм сәр ԝан рʹеза һе зедә бьфькьрьн у дьһа зедә леколин бькьн. Хенщи кӧ бьхуньн, нета мә гәрәке әԝ бә, ԝәки рʹезед кӧ әм дьхуньн, дьле мә бьгьрьн у һе незики Йаһоԝа кьн (Зәб. 19:14). Бь сайа һинбуна «Бьрща Ԛәрәԝьлийе» әм Кʹьтеба Пироз һин дьбьн. Ләма жи ԝәʹде леколинкьрьна готаре, рʹьнд дина хԝә бьдьнә рʹезед Кʹьтеба Пироз, илаһи ԝан рʹеза кӧ ԝе щьватеда бенә хԝәндьне. Бьфькьрьн кӧ хәбәред сәрәкә йан жи гьлийед рʹезада, ча абзаседа нета сәрәкәва гьредайи нә. Хенщи ве йәке, ԝәʹдә башԛә кьн, сәва бьфькьрьн сәр рʹезед кӧ һун дьхуньн, у дьшьрмиш бьн кӧ чаԝа һун дькарьн әʹмьре хԝәда ԝан рʹеза бьдьнә хәбате (Йешу 1:8). w19.05 27 ¶5; 28 ¶9

Иса мәсәла мәзьн мәрʹа һиштийә ве йәкеда, кӧ ча сәр хьзмәтийе бьньһерʹьн. Тьште лапә фәрз әʹмьре ԝида әԝ бу, кӧ дәрһәԛа Пʹадшатийа Хԝәде мәрьварʹа гьли кә. Әԝ бь сәда километьра рʹе дьчу сәва чьԛас дькарә гәләк мәрьварʹа мьзгинийе бәла кә. Әԝи мәщал дьгәрʹийа сәва һьн дәрва һьн жи мал бь мал мәрьварʹа хәбәр дә. Тʹәмамийа әʹмьре Исада хьзмәти щийе пешьн бу. Әм дькарьн чʹәʹв бьдьнә Иса, гава мәщале дьвиньн ԝәки мәрьварʹа дәрһәԛа мьзгинийе гьли кьн, фьрԛи тʹӧнә чь ԝәʹдә бә йан кʹидәре бә. Әм накʹәвьнә һʹәйра хԝә у комфорта хԝә, ле һазьр ьн сәва мьзгинийе бьгьһиньнә мәрьва (Марԛ. 6:31-34; 1 Пәт. 2:21). Һьнә хушк-бьред мә хьзмәт дькьн ча пешәнгед һәртʹьм, пешәнгед кʹомәкдар, йан жи пешәнгед мәхсус. Һьнәк жи зьмане тʹәзә һин дьбьн, йан жи дәрбази ԝан щийа дьбьн, кʹидәре һʹәԝщәти һәйә. Ле шьхӧле бәлакьрьна мьзгинийе дьһа зәʹф мьзгинванед ӧса дькьн, йед кӧ мина ԝан нькарьн һаԛас хьзмәт кьн, ле йәкә чьԛас дәсте ԝан те һаԛаси дькьн. Фьрԛи тʹӧнә әм дькарьн гәләки бькьн йан һьндьки, Йаһоԝа жь мә һаԛаси дәʹԝа накә чьԛас әм нькарьн. w19.04 4 ¶7-8

Пьрсе бьдьнә хԝә: «Гәло дьбә кӧ дьле мьнда һʹәвсуди йан чʹәʹвнәбари һәйә?» (1 Пәт. 2:1) «Дьԛәԝьмә кӧ әз һьнәки хԝә ԛӧрʹә дькьм жь бо малбәта хԝә, хԝәндьна хԝәйә бьльнд, йан жи һәбука хԝә?» (Мәтʹлк. 16:5) «Әз ньмьз һʹәсаб дькьм ԝан мәрьва, кʹижан дәсттәнг ьн, йан жи нә жь мьләте мьн ьн?» (Аԛуб 2:2-4) «Әз һʹьз дькьм ԝан тьшта, кӧ дьнйа Шәйтʹан дьдә?» (1 Йуһʹн. 2:15-17) «Мьн хԝәш тен ԝәʹдәдәрбазкьрьнед бенамуси у зорбәти?» (Зәб. 97:10; 101:3; Амс. 5:15) Әм гәрәке дьле хԝәда щаба ԝан пьрса бьдьн, у тедәрхьн, һәла чьда мәрʹа лазьм ә сәр хԝә бьхәбьтьн. Һәвалед мә, ԛайим сәр мә һʹӧкӧм дьбьн (Мәтʹлк. 13:20). Сәр хәбате йан жи мәкʹтәбеда, дорбәре мә әԝ мәрьв ьн, йед кӧ али мә накьн чʹәʹв бьдьнә ньһерʹандьна Хԝәде. Мәрьвед кӧ дькарьн мәрʹа бьбьнә һәвалед лапи баш, әм дькарьн щьватед мәда бьвиньн. Тʹәне ԝедәре әм дькарьн «һʹьзкьрьне у ԛәнщикьрьнеда» һелане бьстиньн (Ибрн. 10:24, 25). w19.06 12 ¶13-14

Йаһоԝа нәдьхԝәст кәсәк жь мә рʹасти проблема у стреса бе. Ле фәʹмдари йә, кӧ хьзмәткʹаре амьн щара дькарә ԝәʹде стреса мәзьн, гьлийед бефәʹмти бежә (Иб. 6:2, 3). Һәрге жи әԝ кәс тьштед нәрʹаст дәрһәԛа Йаһоԝа йан жи дәрһәԛа мә дьбежә, ԝәрә әм тʹӧ щар ләз нәкʹәвьн кӧ сәр ԝи һерс кәвьн, йан жи бона гьлийед ԝи, ԝи сущдар кьн. Щара лазьм ә мәрьве кӧ жь бо проблема стреседа нә, ширәт кьн йан жи рʹаст кьн (Галт. 6:1). Ле рʹуспи ве дәрәщеда ча гәрәке хԝә бьдьнә кʹьфше? Әԝана гәрәке чʹәʹв бьдьнә Әлиһу, йе кӧ бь дьлшәԝатийе гӧһ дьда Ибо (Иб. 33:6, 7). Чахе Әлиһу ньһерʹандьн у фькьред Ибо фәʹм кьр, тʹәне паши ве йәке әԝи Ибо ширәт кьр. Рʹуспийед кӧ чʹәʹв дьдьнә Әлиһу, ԝе рʹьнд гӧһ бьдьнә хушк йан бьра, сәва рʹьнд һале ԝан фәʹм кьн. Паше, чахе рʹуспи ԝана ширәт кьн, ширәт ԝе бьгьһижә дьле ԝан. w19.06 22-23 ¶10-11

Ле һун ча дькарьн ԝәʹде ԛәдәхәкьрьна шьхӧле мә, бәрдәԝам кьн Йаһоԝарʹа хьзмәт кьн? Филиал ԝе рʹебәрийе у ширәта бьдә рʹуспийа. Һәрге филиал нькарьбә тʹәви рʹуспийа текли бә, рʹуспи ԝе али хушк-бьра бькьн, сәва бәрдәԝам кьн Йаһоԝарʹа хьзмәт кьн. Әԝана ԝе рʹебәрийа сәр һʹиме Кʹьтеба Пироз у әʹдәбйәта бьдьнә мә (Мәт. 28:19, 20; Ибрн. 10:24, 25). Йаһоԝа соз дьдә, ԝәки хьзмәткʹаред ԝи ԝе рʹӧһʹанида бьрчи нәминьн (Иша. 65:13, 14; Луԛа 12:42-44). Ләма жи һун дькарьн дӧдьли нәбьн, ԝәки тʹәшкиләта ԝи ԝе һәр тьшти бькә, сәва һун рʹӧһʹанида нәкʹәвьн у Хԝәдерʹа амьн бьминьн. Ле һун алийе хԝәда чь дькарьн бькьн? Ԝәʹде ԛәдәхәкьрьне, щики рʹьнд бьвиньн, сәва Кʹьтеба хԝәйә Пироз у әʹдәбйәта вәшерьн. Фәсал бьн, ԝәки тӧ щар әԝ тьштед ԛимәт, фьрԛи тʹӧнә йед нәшьркьри йан әләктроник, щики ӧсада нибьн, кʹидәре һеса дькарьн бенә дитьне. Һәр кәс жь мә гәрәке һәр тьшти бькә, сәва рʹӧһʹанида ԛәԝи бьминә. w19.07 10 ¶10-11

Бь һʹәзара сала, сәр дьнйайе һʹәчʹи зәʹф мәрьв баԝәрмәнд бун у щурʹә-щурʹә религийада бун. Ле ԝан салед пашԝәхтийеда, мәрьв гәләк һатьнә гӧһастьне. Чьԛас дьчә һе зедә у зедә дьбьнә нәбаԝәр. Мәсәлә, һьнә ԝәлатада һʹәчʹи зәʹф бьнәли дьбежьн, ԝәки әԝана нәбаԝәрмәнд ьн (Мәт. 24:12). Ле чьрʹа? Чьмки һьнәк пәй рʹьһʹәтийе дькʹәвьн, йан жи пәй проблемед хԝә (Луԛа 8:14). Һьнәк дьбьнә атеист. Һьнәк жи Хԝәде баԝәр дькьн, ле дьфькьрьн, ԝәки религийа ида тьштәки кәвьн ә у кʹаре найнә, йан жи тʹәви зандарийе у логике һәв нагьрә. Әԝана дьбәкә жь һәвал, дәрсдар йан жи жь медийайе дьбьһен, ԝәки жийин бь сайа еволусийайе дәстпебуйә, ле дәрһәԛа мәʹнийед логики кӧ Хԝәде һәйә, һьндьки дьбьһен. Һьнәк жи нахԝазьн бькʹәвьнә нава религийайе, чьмки дьвиньн сәрԝеред религийа пʹәрәһʹьз у һʹӧкӧмһʹьз ьн. Һьнә щийада жи, сәрԝеред дәԝләте ԛанунед ӧса дәрхьстьнә, кʹижан кӧ изьне надьн мәрьв аза Хԝәде бьһʹәбиньн. w19.07 20 ¶1-2

Сәва һун рʹӧһʹанида бәрдәԝам кьн пешда һәрʹьн, ԝәрʹа нәлазьм ә ԛәԝата физикийә ԛайим. Бь рʹасти гәләк хушк-бьред кӧ сьһʹәт-ԛәԝатеда сьст ьн, бәрдәԝам дькьн алийе хԝәда һәр тьшти бькьн, сәва рʹӧһʹанида пешда һәрʹьн (2 Корн. 4:16). Дьбәкә һун гәләк сала Йаһоԝарʹа хьзмәт дькьн у ньһа жь бо сьһʹәт-ԛәԝата хьраб, һун ида нькарьн һаԛас хьзмәт кьн, чьԛас ԝә бәре дькьр. Һәрге ӧса нә, бәрхԝә нәкʹәвьн. Дӧдьли нәбьн, ԝәки Йаһоԝа хьзмәтийа ԝәйә бәре бир накә у ԛимәт дькә (Ибрн. 6:10). У бир нәкьн, ԝәки әм амьни у һʹьзкьрьна хԝә һьндава Йаһоԝа избат дькьн нә пе ве йәке, кӧ бона шьхӧле ԝи әм чьԛас дькьн. Һьзкьрьна мә һьндава Йаһоԝа бь рʹасти һьнге те кʹьфше, чахе ньһерʹандьна мә баш ә у чахе әм чьԛас дькарьн жерʹа хьзмәт дькьн (Колс. 3:23). Йаһоԝа мә фәʹм дькә у әԝ һаԛас жь мә дәʹԝа накә, чьԛас әм нькарьн (Марԛ. 12:43, 44). w19.08 3 ¶6; 5 ¶11-12

Йаһоԝа мәрьва незики хԝә дькә пе «кьрьнед . . . ԛәнщ» йед хьзмәткʹаред хԝә (Мәт. 5:14, 15; 1 Пәт. 2:12). Һәрге һәвалзәԝаще ԝә Шәʹде Йаһоԝа нинә, бьфькьрьн һәла әԝ жь щьвата ԝә кәсәки нас дькә? Һун дькарьн ле тʹәглиф кьн, кӧ тʹәви ԝә бе щьвате (1 Корн. 14:24, 25). Әм дьхԝазьн ԝәки һʹәму нәфәр у мәрьвед мәйи незик тʹәви мә бьбьнә йәк кӧ Йаһоԝарʹа хьзмәт кьн. Рʹаст ә әм һʹәму тьшти дькьн, сәва әԝана бьбьнә хьзмәткʹаред Хԝәде, ле дьбәкә йәкә әԝана рʹастийе ԛәбул нәкьн. Һәрге ӧса бә, әм гәрәке хԝә сущдар нәкьн бона сафикьрьна ԝан, чьмки әм нькарьн зоре кәсәки бькьн кӧ баԝәрийа мә ԛәбул кьн. Һәрге һун бәхтәԝар ьн, кӧ Йаһоԝарʹа хьзмәт дькьн у шабуна ԝә һәйә, әԝана ԝе әве йәке бьвиньн, у дьԛәԝьмә әԝ йәк ԝе сәр ԝана һʹӧкӧм бә. Бона ԝана дӧа бькьн, бь нәрми у мәʹрифәти тʹәви ԝан хәбәр дьн. Бәрдәԝам кьн али ԝан бькьн, кӧ мьзгинийе ԛәбул кьн (Кʹар. Шанд. 20:20). Дӧдьли нәбьн, ԝәки Йаһоԝа ԝе щәфе ԝә кʹәрәм кә. У һәрге нәфәред ԝә гӧһ бьдьнә ԝә, әԝана ԝе хьлаз бьн! w19.08 18-19 ¶15-17

Гәло бь ԝан гьлийа Иса чь дьхԝәст бьгота? Иса дьхԝәст бьгота, ԝәки бь әʹмьре сьвьк бьжин у һʹьш-аԛьле хԝә у нетед хԝә бьдьнә сәр хьзмәтийе, нә кӧ сәр  тьштед дьн. Хьзмәти әʹмьре Исада щийе лапә фәрз дьгьрт, у әԝи шагьртед хԝә һин дькьр ԝәки һʹьш-аԛьле хԝә бьдьнә сәр Йаһоԝа у Пʹадшатийа Ԝи. Әме чʹәʹв бьдьнә Иса һәрге хьзмәтийе һʹәсаб кьн шьхӧле лапә фәрз, демәк «бәре пешьн ль Пʹадшатийа Хԝәде бьгәрʹьн у бькьн кӧ рʹастийа  ԝи бьԛәдиньн» (Мәт. 6:33). Әм дькарьн хьзмәтийе дайньн щийе пешьн, һәрге тьштед нәфәрз кем кьн, у һе зедә хьзмәт кьн, ԝәки али мәрьва бькьн кӧ әԝана Йаһоԝа нас кьн у һʹьз бькьн. Мәсәлә, дьбәкә әм дькарьн сьһʹәтед хәбата хԝә кем кьн, сәва хенщи шәми-ләʹда рʹожед дьн жи хьзмәт кьн. Йан жи дьбәкә әм ԝәʹде һесабуна хԝә кем кьн, кʹижан кӧ гәләк ԝәʹдә жь мә дьстинә. w19.04 5-6 ¶12-13

Ԝан рʹожед пашԝәхтийада, гәләк хушк-бьред кӧ гәләк сала Йаһоԝарʹа хьзмәт дькьн, кʹьфшкьрьнед тʹәзә стандьнә. Бона ԝан хушк-бьра, чәтьн бу ԝан гӧһастьна бькьн. Фәʹмдари йә, әԝана һʹьз дькьрьн кʹьфшкьрьна хԝәйә бәре, у гәләка жь ԝан әԝ шьхӧле хԝә бь  сала дькьр. Һьнәка ча бежи «шин» дькьрьн, һʹәта кӧ һини гӧһастьнед тʹәзә бун. Ԝәʹдә дәрбаз бу, у әԝана ида һини дәрәща хԝә бун. Чьрʹа? Мәʹнийа әʹԝльн әԝ ә, кӧ әԝана Йаһоԝа һʹьз дькьн. Ԝана заньбу, ԝәки хԝә тʹәсмили Хԝәде кьрьнә, нә кӧ тʹәсмили шьхӧләки, навәки, йан жи кʹьфшкьрьнәке (Колс. 3:23). Әԝана ша нә кӧ бь мьлукти бәрдәԝам дькьн Йаһоԝарʹа хьзмәт кьн, фьрԛи тʹӧнә кʹидәре хьзмәт дькьн. Әԝ хушк-бьра «һʹәму хәмед хԝә» давежьнә сәр Йаһоԝа, чьмки заньн ԝәки әԝ бона ԝана хәм дькә (1 Пәт. 5:6, 7). Чахе әм әв һʹӧнӧре ԛимәт, демәк мьлукти нав хԝәда пешда тиньн, һьн әм кʹаре дьстиньн һьн жи мәрьвед дьн. Хенщи ве йәке, чахе әм мьлук ьн, әм дьһа һеса тәнгасийада тәйах дькьн. Ле йа лапә фәрз, әм незики Йаһоԝа Баве хԝәйи әʹзмана дьбьн. w19.09 6-7 ¶15-17

Йаһоԝа Даԝьд нә тʹәне ча сәре малбәте кʹьфш кьр, ле ча сәрԝере тʹәмамийа щьмәʹта Исраеле. Чаԝа пʹадша, ԛәԝата Даԝьд гәләк мәзьн бу. Щара әԝи ԛәԝата хԝә нә рʹаст дьда хәбате у шашийед мәзьн бәрдьда (2 Сам. 11:14, 15). Ле әԝи дьхԝәст гӧрʹа Йаһоԝа бькә. Ча? Әԝи ширәтед Йаһоԝа ԛәбул кьр. Әԝи дӧада дьле хԝә Йаһоԝарʹа вәкьр у кәла дьле хԝә рʹет. Даԝьд алийе хԝәда һʹәму тьшт дькьр, сәва гӧрʹа Йаһоԝа бькә у ширәткьрьна ԝи ԛәбул кә (Зәб. 51:1-4). Әԝ ӧса мьлук бу, кӧ нә тʹәне жь мера ширәт ԛәбул дькьр, ле ӧса жи жь жьна (1 Сам. 19:11, 12; 25:32, 33). Даԝьд жь шашийед хԝә хԝәрʹа дәрс һьлда у әʹмьре хԝәда һʹьш-аԛьле хԝә да сәр хьзмәтийа хԝә Йаһоԝарʹа. Әԝи заньбу, кӧ чьԛас кʹар ә чахе мәрьв гӧрʹа Йаһоԝа дькә. Иро әм дькарьн бьвиньн фьрԛийа ортʹа ԝан мәрьвада, йед кӧ гӧрʹа Йаһоԝа дькьн у йед кӧ ширәтед ԝийи бь һʹьзкьрьн инкʹар дькьн. Әԝед кӧ гӧрʹа Йаһоԝа дькьн «жь фьрәйа дьл» дьстьрен (Иша. 65:13, 14). w19.09 17 ¶15; 19 ¶21

Сала 1935-да Шәʹдед Йаһоԝа фәʹм кьрьн, ԝәки әʹсәйи нинә әʹлаләта мәзьн сәр әʹзмана бә, сәва «ль бәр тʹәхт у ԝи Бәрхи» сәкьни бә. Әԝана ль бәр тʹәхт бь симболик дьсәкьньн. Рʹаст ә әʹлаләта мәзьн сәр әʹрде дьжи, йәкә әԝ дькарә «ль бәр тʹәхт» бьсәкьнә бь ве йәке, кӧ һʹӧкӧме Йаһоԝа ча сәрԝере гәрдуне ԛәбул кә, у нишан кә кӧ гӧрʹа ԝи дькә (Иша. 66:1). Ле «ль бәр . . . ԝи Бәрхи» әԝана ԝи щурʹәйи дьсәкьньн, кӧ баԝәрийа хԝә ԛӧрбана Иса тиньн. Кʹьтеба Пирозда һәнә рʹезед майин, кʹижан али мә дькьн, ԝәки фәʹм кьн кӧ рʹеза жь Әʹйанти 7:9, бь симболик чь те фәʹмкьрьне. Мәсәлә, Мәтта 25:31, 32-да, те готьне ԝәки «һʹәму мьләт», ӧса жи мәрьвед хьраб, ԝе «ль бәр» тʹәхте Исайи рʹумәте «бьщьвьн». Демәк, әшкәрә йә кӧ әԝ һʹәму мьләт нә кӧ сәр әʹзмана нә, ле сәр әʹрде нә. Әв фәʹмкьрьн кӧ сала 1935-да зәлал бу, рʹасти жи логики у фәʹмдари йә. Кʹьтеба Пирозда тӧ щики найе готьне, ԝәки әʹлаләта мәзьн ԝе һәрә сәр әʹзмана. Тʹәне кʹомәк ԝе жийина һʹәта-һʹәтайе сәр әʹзмана бьстинә, демәк 144 000, йед кӧ ԝе тʹәви Иса «ль сәр дьнйайе пʹадшатийе бькьн» (Әʹйан. 5:10). w19.09 28 ¶9

Йаһоԝа һивийе йә кӧ хьзмәткʹаред ԝи жь Бабилона Мәзьн дур бьн. Ле әԝ найе һʹәсабе кӧ тʹәне жь религийа ԛәлп бьԛәтьн. Әм гәрәке ԛайим хԝә ль религийа рʹаст бьгьрьн у Йаһоԝарʹа хьзмәт кьн. Ԝәрә әм дӧ тьшта шеԝьр кьн, кӧ ча ԝе йәке бькьн. Йа пешьн, әм гәрәке ԛәԝи хԝә принсипед Йаһоԝайә дәрһәԛа намусийе, бьгьрьн. Әм тӧ щар гәрәке ньһерʹандьн у принсипед ԝе дьнйайе ԛәбул нәкьн. Мәсәлә, әм һәр щурʹә бенамусийе ԛәбул накьн, дькʹәвә нава ве йәке ӧса жи зәԝаща дӧ жьна йан жи дӧ мера, у рʹабун-рʹуньштьна һомосексуалийә майин (Мәт. 19:4, 5; Рʹом. 1:26, 27). Йа дӧда, әм гәрәке бәрдәԝам кьн тʹәви хушк-бьра тʹоп бьн. Әм ԝе йәке һʹәму щийа дькьн, кʹидәре те стандьн, фьрԛи тʹӧнә ода щьватада йан чахе лазьм ә малада, у һәла һе дьзикава жи. Чь жи бьԛәԝьмә, әме тӧ щар щьватед хԝә нәһельн. Бь рʹасти әм гәрәке һе зедә тʹәвайи тʹоп бьн, «чьмки әм дьбиньн кӧ рʹожа ахрәте незик дьбә» (Ибрн. 10:24, 25). w19.10 16 ¶6-7

Йаһоԝа дьхԝазә әм әʹмьре хԝәрʹа ша бьн, у ве йәкеда ԝәʹдәдәрбазкьрьн дькарьн али мә бькьн. Хәбәра  Хԝәде дьбежә, ԝәки «бона зьлам жь хԝарьн у вәхԝарьне у жь  кʹәде  щане хԝә ша кьрьне ԛәнщтьр тьштәк нинә» (Ԝаиз 2:24). Ле һʹәчʹи зәʹф ԝәʹдәдәрбазкьрьнед ве дьнйайе, дькарьн сәр мә хьраб һʹӧкӧм бьн. Әԝ ԝәʹдәдәрбазкьрьн нормед намусийе хьраб дькьн, у һелан дькьн ԛәбул кьн у һәла һе жи һʹьз бькьн ԝан тьшта, кʹижан кӧ Хәбәра Хԝәде ԛәдәхә дькә. Әм дьхԝазьн, ԝәки тʹәне Йаһоԝа бьһʹәбиньн у жерʹа амьн бьн, ләма жи әм нькарьн һьн «жь сьфра» Йаһоԝа у һьн жи «жь сьфра щьна» бьхԝьн (1 Корн. 10:21, 22). Чахе әм хԝарьне тʹәви кәсәки дьхԝьн, гәләк щар  әԝ нишана һәвалтийе йә. Һәрге әм ԝәʹдәдәрбазкьрьнед ӧса дьжберьн, кʹидәреда һәйә зорбәти, сербази, бенамуси, йан жи хԝәстьнед бәдәне у ньһерʹандьнед нәрʹаст, бь рʹасти әԝ те һʹәсабе, ԝәки әм тʹәви дьжмьнед Хԝәде хԝарьне дьхԝьн, кʹижан кӧ ԝана һазьр кьрийә. Ахьрийа ве йәке әԝ  ә, кӧ әм нә кӧ тʹәне хԝәрʹа зийане тиньн, ле ӧса жи һәләԛәтийа мә тʹәви Йаһоԝа хьраб дьбә. w19.10 26 ¶2; 29-30 ¶11-12

Һәрге гәмиван дьхԝазә, ԝәки ба али ԝи бькә, әԝ гәрәке дӧ тьшта бькә. Йа пешьн ба кʹи алива те, әԝ гәрәке ԛәйька хԝә ԝи алива бажо. Һәрге гәмиван сәр щийе сәкьнандьна ԛәйька бьсәнә, у ԛәйьке нәбә нав бәʹре, ба ԝе ԛәйьке нәжо. Йа  дӧда, жерʹа лазьм ә чьԛас дькарә бабьрка һьлкʹьшинә у вәкә. Фәʹмдари йә, кӧ һәрге ба һәбә жи, ԛәйьк тʹәне ԝе һьнге һәрә, һәрге ба бабьрка хә. Мина ве йәке, әм жи дькарьн бәрдәԝам кьн Йаһоԝарʹа хьзмәт кьн тʹәне һьнге, һәрге аликʹарийа рʹӧһʹе пироз бьстиньн. Ле сәва кӧ рʹӧһʹе пироз бьстиньн, мәрʹа лазьм ә дӧ гава бькьн. Йа пешьн, әм гәрәке хԝә рʹийа рʹӧһʹе пироз бьгьрьн, бь ве йәке кӧ ԝан шьхӧла бькьн, кʹижана кӧ әԝ рʹебәрийе дьдә мә кӧ әм бькьн. Йа дӧда, әм гәрәке «бабьркед хԝә һьлкʹьшиньн», демәк чьԛас дькарьн бь тʹәмами нава ԝан шьхӧлада бьн (Зәб. 119:32). Рʹӧһʹе пироз ԝе мә пʹеларʹа дәрбаз кә, демәк мьԛабьлибун у тәнгасийарʹа, у ԝе ԛәԝате бьдә мә кӧ бь амьни Хԝәдерʹа хьзмәт кьн. w19.11 9 ¶8; 10 ¶11

Иса рʹожа пашьн йа жийина хԝәйә сәр әʹрде, гәләк бәрхԝә дькʹәт. Әԝ гәрәке зутьрәке бь дәсте нәпʹака, щәфе гьран бькʹьшанда у бьмьра. Ле дьһа зәʹф әԝ сәва ве йәке бәрхԝә дькʹәт, кӧ дьхԝәст хԝәстьна Баве хԝә бинә сери, чьмки әԝи Баве хԝә гәләк һʹьз дькьр. Иса заньбу кӧ һәрге әԝ нава ԝан тәнгасийада кӧ пешийа ԝи бун, амьн бьминә, әԝ ԝе наве Йаһоԝа һәԛ дәрхә у бьльнд кә. Иса ӧса жи мәрьв һʹьз дькьрьн, у әԝи заньбу ԝәки жийина мәйә һʹәта-һʹәтайе ԝива гьредайи йә, демәк амьнийа ԝива һʹәта мьрьне. Рʹаст ә Иса стресәкә гәләк гьранда бу, ле дьле ԝи рʹьһʹәт бу. Дьле Исада «әʹдьлайийа Хԝәде» һәбу, демәк дьлрʹьһʹәти, кʹижан кӧ әԝи дьстанд бь сайа һәлә-ԛәтийа хԝә тʹәви Йаһоԝа. Әве әʹдьлайе али Иса кьр, кӧ гәләк бәрхԝә нәдькʹәт у тʹәвһәв нәдьбу (Фили. 4:6, 7). Тӧ кәс жь мә ԝе рʹасти щерʹьбандьна ӧса нәйе, кʹижан кӧ рʹасти Иса һат, ле һʹәму шагьртед ԝи ԝе рʹасти чәтьнайа бен (Мәт. 16:24, 25; Йуһʹн. 15:20). Мина Иса, әме жи щара бәрхԝә кәвьн. w19.04 8 ¶1-3

Ԝе баш бә һәрге әм пьрса бьдьнә хԝә: «Әз дьшекьриньм кӧ әз дькʹәвьмә нава пʹара тʹәшкиләта Йаһоԝа сәр әʹрде?» Йаһоԝа епʹещә избаткьрьн дьдә мә, ԝәки иро әԝ щьмәта хԝә кәрәм дькә. Рʹасти жи гәләк мәʹнийед мә һәнә кӧ жь Хԝәде рʹази бьн (1 Тʹеслн. 5:18). Ле әм ча дькарьн пьштгьрийа хԝә һьндава тʹәшкиләта Йаһоԝа нишан кьн? Әм пьштгьрийа тʹәшкиләта Йаһоԝа дькьн, чахе тиньн сери ԝан тьштед кӧ әм жь Кʹьтеба Пироз, әʹдәбйәтед мә, щьватед мә у щьватед мәзьн педьһʹәсьн. Хенщи ве йәке, әм дькарьн пьштгьрийа хԝә нишан кьн бь ве йәке, кӧ шьхӧле бәлакьрьна мьзгинийеда у һинкьрьнеда чьԛас дькарьн кʹар бькьн (1 Корн. 15:58). Әм дьхԝазьн, ԝәки Йаһоԝа ԛӧрбанед мә ԛәбул кә. Ԝәрә әм һәр гав Йаһоԝарʹа хьзмәт кьн, чьмки әм һʹәму ԛәнщийед ԝи дьшекьриньн. Ԝәрә әм бәрдәԝам кьн йа лапә баш бьдьнә Йаһоԝа, чьмки әм ԝи бь тʹәмамийа дьле хԝә һʹьз дькьн. У ԝәрә әм бь дьл у щан чьԛас дькарьн пьштгьрийа тʹәшкиләта ԝи бькьн кӧ әԝ иро кʹәрәм дькә. Һәрге әм ԝан тьшта бькьн, әме Йаһоԝарʹа нишан кьн, ԝәки әм ԛимәт дькьн ԝи ԛәдьри, кӧ дькарьн ча Шәʹдед ԝи жерʹа хьзмәт кьн! w19.11 25 ¶17-18

Иса нәгот, ԝәки әԝана ԝе мина ԝи кʹәрәмәта бькьн. Дәԝсе әԝи дьхԝәст бьгота, ԝәки шагьртед ԝи ԝе һе гәләк щийада у һе гәләк мәрьварʹа мьзгинийе бәла кьн у ԝана һин кьн, у һе зедә ԝәхт нә кӧ чьԛас Иса кьр. Һәрге һун дьхәбьтьн, ван пьрса бьдьнә хԝә: «Щийе хәбате, мәрьв мьн нас дькьн ча йәки хәбатһʹьз? Әз ԝәʹдәда хәбата хԝә хьлаз дькьм у чьԛас дәсте мьн те шьхӧл рʹьнд дькьм?». Һәрге щаба ԝә әре йә, ԝәки ӧса нә һуне бал мәзьне хәбата хԝә навәки баш ԛазанщ кьн. Ӧса жи мәрьвед сәр хәбата ԝә, ԝе һе зедә бьхԝазьн гӧһ бьдьнә мьзгинийе. Дәрһәԛа хьзмәтийа хԝә пьрсед ӧса бьдьнә хԝә: «Хьзмәтийеда мьн нас дькьн ча мәрьве хирәт? Әз хԝә рʹьнд һазьр дькьм бона сәрледанед пешьн? Әз зу сәрледана дӧбарә дькьм? Әз щурʹә-щурʹә хьзмәтийеда кʹар дькьм?» Һәрге әре, һуне хьзмәтийа хԝәда шабуне бьвиньн. w19.12 5 ¶14-15

Жьн-мере кӧ сафи дькьн зарʹа биньн, гәрәке дӧ пьрсед фәрз ортʹа һәвда шеԝьр кьн: Йа пешьн, кʹәнге әԝана дьхԝазьн зарʹед ԝан һәбьн? У йа дӧда, әԝана дьхԝазьн чьԛас зарʹед ԝан һәбьн? Ле кʹәнге баш ә әԝан пьрса сафи кьн? У чьрʹа әԝ дӧ пьрс ӧса фәрз ьн? Гәләк дәрәщада, һе баш ә пешийа зәԝаще хорт у ԛиз ортʹа һәвда шеԝьр кьн, һәла әԝана дьхԝазьн зарʹед ԝан һәбьн йан на. Ле чьрʹа һьнге әԝана сафи дькьн? Мәʹник әԝ ә, кӧ гәләк фәрз ә, ԝәки ве пьрседа әԝана һәрдӧ жи бенә сәр нетәкә. Ӧса жи, әԝана гәрәке шеԝьр кьн, кӧ һәла һазьр ьн әве щабдарийе һьлдьн сәр хԝә йан на. Һьнә жьн-мер сафи дькьн, ԝәки саләк йан дӧ сал паши зәԝаще зарʹа биньн, чьмки сәва бьбьнә де-бав, лазьм ә гәләк ԝәʹдә у ԛәԝат. Әԝана дьфькьрьн, кӧ һәрге һьнәки һивийе бьн, әԝана ԝе зәԝащеда һини һәвдӧ бьн у һе незики һәв бьн. w19.12 23 ¶4-5

Нава тʹәмамийа дьнйайеда, гәләк хьзмәткʹаред Йаһоԝа жь бо щурʹә-щурʹә чәтьнайа дькʹәвьнә стресе, у һәла һе жи ешәкә гьран дькʹьшиньн. Һьнә хушк-бьред мә дәрд дькʹьшиньн жь бо нәхԝәшийед гьран, һьнәк жь бо мьрьна мәрьве хԝәйи незик. Һьнәк жи гәләк дьлтәнг дьбьн, чахе нәфәре ԝан йан жи һәвале ԝан рʹастийе дьһельн. Ӧса жи һьнә хушк-бьред мә рʹасти хәзәбед тʹәбийәте тен у гәләк зийане дьстиньн. Ԝан һʹәму хушк-бьрарʹа бәрдьли лазьм ә. Ле әм ча дькарьн али ԝан бькьн? Гәрәке бьбьнә һәваләки баш у амьн. Һәвалед амьн һʹәйфа хԝә ԝәʹдә у ԛәԝата хԝә найньн, сәва аликʹари бьдьнә хушк-бьра. Мәсәлә, һʹәким бьраки мә Питеррʹа гот, ԝәки нәхԝәшийа ԝийә гьран һәйә, кӧ бәрбь мьрьне дьбә. Жьна ԝи Катрин, дьбежә: «Жь щьвата мә жьн-мерәки ве рʹоже әм бьрьн бал һʹәким, кʹидәре кӧ әм дәрһәԛа нәхԝәшийа Питер пеһʹәсийан. Ԝана жь ве дәме хԝәрʹа сафи кьрьбун, ԝәки ви һале гьранда мә тʹәне нәһельн, у гава мәрʹа аликʹари лазьм бу, әԝана һәр гав кʹеләка мә бун». Рʹасти жи әм дьлбиникә мәзьн дьстиньн, чахе һәвалед баш кʹеләка мә нә, у али мә дькьн, ԝәки әм тәнгасийада тәйах кьн! w20.01 8 ¶1; 9 ¶5; 10 ¶6

Һәрге тӧ йәк жь ԝан шагьртед Иса буйайи, кʹижан кӧ сала 33 Д.М., тʹоп бьбун ода мәзьнә жорʹьнда, ԝе ԛә шьк жи бал тә тʹӧнә буйа, кӧ тӧ пе рʹӧһʹе пироз һати бьжартьне (Кʹар. Шанд. 2:5-12). Ле гәло йед кӧ бь рʹӧһʹе пироз кʹьфшкьри нә, һʹәму жи бь щурʹе мәхсус у ԝәʹдәкида тенә бьжартьне? На. Дина хԝә бьдьне, кӧ кʹәнге мәрьв дьбә бьжарти. Ве рʹоже, нә тʹәне әԝ кʹома жь 120 Мәсиһийа пе рʹӧһʹе пироз һатьнә кʹьфшкьрьне, ле ве рʹоже, ԝәкә 3 000 мәрьвед дьн жи рʹӧһʹе пироз стандьн. Әԝана һатьбун кʹьфшкьрьне, гава һатьн ньхӧмандьне (Кʹар. Шанд. 2:37, 38, 41). Ле паши ве йәке, ида нә һʹәму Мәсиһи ԝәʹде ньхӧмандьне дьһатьнә кʹьфшкьрьне. Мәсәлә, Самәри һьнә ԝәʹдә шунда паши ньхӧмандьне һатьнә кʹьфшкьрьне (Кʹар. Шанд. 8:14-17). Ле кʹьфшкьрьна Корнелйо у малбәта ԝи гәләк әʹщебмайи бу. Әԝана һәла һе жи пешийа ньхӧмандьне һатьбун кʹьфшкьрьне (Кʹар. Шанд. 10:44-48). w20.01 20-21 ¶2-4

Иса ԝәкә 165 щара һәма тʹәне чар кʹьтебед пешьнә Мьзгинийеда сәр Йаһоԝа дьбежә «Бав». Чьрʹа әԝи ӧса зәʹф дәрһәԛа Йаһоԝа хәбәр дьда? Мәʹник әԝ ә, сәва мәрьв баԝәр буна, кӧ Йаһоԝа Бавәки бь һʹьзкьрьн ә (Йуһʹн. 17:25). Бьфькьрьн кӧ әм дәрһәԛа Йаһоԝа чь педьһʹәсьн жь ԝе йәке, кӧ әԝи ча хԝә дьда кʹьфше һьндава Кӧрʹе хԝә Иса. Йаһоԝа тʹьме дӧайед ԝи дьбьһист. Әԝи нә кӧ тʹәне дӧайед ԝи дьбьһист, ле ӧса жи щаба дӧайед ԝи дьда (Йуһʹн. 11:41, 42). Иса рʹасти чь чәтьнайа жи дьһат, тʹьме һʹьзкьрьн у пьштгьрийа Баве хԝә сәр хԝә тʹәхмин дькьр (Луԛа 22:42, 43). Йаһоԝа чаԝа Баве һʹьзкьри, ӧса кьр ԝәки Иса бьзаньбә, кӧ Әԝ бона ԝи хәм дькә (Мәт. 26:53; Йуһʹн. 8:16). Рʹаст ә Йаһоԝа Иса хԝәй нәдькьр жь һʹәму тьштед кӧ дькарьбун зийан бьдана ԝи, ле әԝи али ԝи дькьр, ԝәки щерʹьбандьнада тәйах кә. Иса заньбу, ԝәки әԝ рʹасти чь тәнгасийе жи бе, ԝе ԝәʹдәлу  бә (Ибрн. 12:2). Йаһоԝа избат кьр, кӧ әԝ Иса һʹьз дькә, гава дӧайед ԝи дьбьһист, бона ԝи хәм дькьр, ԝи һин дькьр у пьштгьрийа ԝи дькьр (Йуһʹн. 5:20; 8:28). w20.02 3 ¶6-7, 9

Чахе әм гәрәке сафи кьн кӧ фьлан әʹйд-ԛәйде бькьн йан на, әм гәрәке бьфькьрьн кӧ чаԝа сафикьрьна мә дькарә сәр исафа мәрьвед майин һʹӧкӧм кә, илаһи сәр хушк-бьра. Әм тӧ щар нахԝазьн кәсәки бьлькʹӧминьн (Марԛ. 9:42). Әм ӧса жи нахԝазьн мәрьвед хԝә кӧ Шәʹдед Йаһоԝа ниньн, бьхәйдиньн. Һʹьзкьрьн дькарә али мә бькә, ԝәки тʹәви ԝан бь ԛәдьр хәбәр дьн у бь ԝе йәке Йаһоԝа рʹумәт кьн. Әм ӧса жи нахԝазьн тʹәви мәрьва бькʹәвьнә дәʹԝе, йан ԛәрфе хԝә әʹдәтед ԝан бькьн. Бир нәкьн, ԛәԝата һʹьзкьрьне мәзьн ә! Чахе әм һʹьзкьрьна һʹәлал ԝанрʹа дьдьнә кʹьфше у бь ԛәдьр ьн һьндава ԝанда, әм дькарьн һәла һе дьле ԝан жи нәрм кьн, йед кӧ мьԛабьли мә нә. Бьра мәрьватийа ԝә у щинаред ԝә бьзаньбьн кӧ һун Шәʹде Йаһоԝа нә (Иша. 43:10). Һәрге һун мәрьвед хԝә у щинаред хԝәрʹа пешда бежьн, кӧ һун Йаһоԝа дьһʹәбиньн у тʹәви әʹдәтед ԝан набьн, ԝәрʹа ԝе дьһа һеса бә әԝе чәтьнайе дәрбаз кьн. Ԝәрә әм тӧ щар шәрм нәкьн амьн бьминьн, бь ве йәке кӧ пьштгьрийа рʹастийе бькьн (Рʹом. 1:16). w19.04 17-18 ¶14-16

Ԝәʹде хьзмәтийа Исайә сәр әʹрде, 12 шандийед ԝи тʹәви ԝи бун, ле Паԝлос бу Мәсиһи тʹәне паше мьрьна Иса у рʹабуна ԝи. Рʹаст ә ахьрийеда әԝ һатә кʹьфшкьрьне ча «шандийе нәщьһуйа», ле Паԝлос нәкʹәтә нава ԝан 12 шандийа (Рʹом. 11:13; Кʹар. Шанд. 1:21-26). Дәԝса кӧ һʹәвсудийа ԝан 12 мера бькә, кӧ һәләԛәтийа ԝан тʹәви Иса гәләк незик бу, Паԝлос рʹази бу бона ве йәке чь кӧ бал ԝи һәбу. Һәрге әм мьлук ьн у рʹази нә бона тьштед кӧ бал мә һәнә, әме жи мина Паԝлос бь ԛәдьр бьн һьндава ԝанда, кʹижанарʹа Йаһоԝа һʹӧкӧм дайә (Кʹар. Шанд. 21:20-26). Йаһоԝа организә кьр, ԝәки бьра бенә кʹьфшкьрьне, сәва щьватада рʹебәрийе бькьн. Рʹаст ә кемасийед ԝан һәнә, ле Йаһоԝа ԝана һʹәсаб дькә ча «пʹешкʹеш бь щурʹе мәрьва» (Әфәс. 4:8, 11, ДТʹ). Чахе әм ԛәдьре ԝан бьред щабдар дьгьрьн у бь мьлукти пәй рʹебәрийа ԝан дьчьн, һәләԛәтийа мә тʹәви Йаһоԝа незик дьминә у щьватеда әм тʹәви хушк-бьра әʹдьлайеда дьминьн. w20.02 17 ¶13-14

Дьбәкә пешийа кӧ тә тʹәви Шәʹдед Йаһоԝа һинбуна Кʹьтеба Пироз дәстпекьра, тә ида Хԝәде һʹьз дькьр у дьхԝәст кӧ Әԝ тә ԛәбул кә. Ньһа тӧ Шәʹдед Йаһоԝа нас дьки у тә хԝәш те тʹәви ԝан ԝәʹдә дәрбаз ки. Ле гәрәке тʹәне әва мәʹни нибә, кӧ хԝә тʹәсмили Йаһоԝа ки у бейи ньхӧмандьне. Мәʹнийа сәрәкә, кӧ чьрʹа бейи ньхӧмандьне, гәрәке һʹьзкьрьна һьндава Йаһоԝа бә, Хԝәдайе рʹаст. Чахе тӧ жь һәр тьшти у һәр кәси зедәтьр Йаһоԝа һʹьз бьки, ԝе тӧ тьшт у тӧ кәс рʹе тә нәгьрә, ԝәки жерʹа хьзмәт ки. Тӧ гәрәке фәʹм  ки, ԝәки һʹьзкьрьн һьндава Йаһоԝа мина рʹе йә бона ньхӧмандьне у чаԝа сур ә, кʹижан кӧ али тә дькә сәр рʹийа Хԝәде бьмини. Иса гот ԝәки әм гәрәке Йаһоԝа бь тʹәмамийа дьле хԝә, щанийа хԝә, һʹьше хԝә у ԛәԝата хԝә һʹьз бькьн (Марԛ. 12:30). Ле тӧ ча дькари ӧса ԛайим Йаһоԝа һʹьз бьки? Чахе тӧ дәрһәԛа һʹьзкьрьна Йаһоԝа һьндава хԝә бьфькьри, тӧйе жи ԝи һʹьз бьки. w20.03 4 ¶4-5

Чь те һʹәсабе ԛӧльхе хԝә бьԛәдиньн? Хьзмәтийа хԝә бьԛәдиньн те һʹәсабе мьзгинийе бәла кьн у мәрьва һин кьн, чьԛас кӧ дькарьн. Ле фәрз тʹәне әԝ нинә кӧ чьԛас ԝәʹдә әм хәрщ дькьн. Бона Йаһоԝа дьһа фәрз ә, кӧ әм бь чь нете жерʹа хьзмәт дькьн. Әм Йаһоԝа у мәрьва һʹьз дькьн, ләма бь дьл у щан хьзмәтийа хԝәйә Мәсиһити тиньн сери (Марԛ. 12:30, 31; Колс. 3:23). Хԝәдерʹа бь дьл у щан хьзмәт кьн, те һʹәсабе кӧ ԛәԝат у фәрәсәтед хԝә бь щурʹе лапә баш бьдьнә хәбате. Чахе әм ԛимәт дькьн ԝи ԛәдьри кӧ мьзгинийе бәла дькьн, әм мәщале бәрнадьн у чьԛас дькарьн гәләк мәрьварʹа мьзгинийе гьли дькьн. Әм дьбәкә нькарьн хьзмәт кьн чьԛас дьхԝазьн. Йәкә, әм әԝи шьхӧли һʹьз дькьн. Әм алийе хԝәда һәр тьшти дькьн, сәва һе рʹьнд хьзмәт кьн, ԝәки мьзгинийе бьгьһиньн дьле мәрьва. У әʹмьре хԝәда әм хьзмәтийе датиньн щийе пешьн. w19.04 2 ¶3; 3 ¶4, 6

Дәрәԝед Шәйтʹан кӧл-дәрдед инсанәте зедә дькьн. Щара ԝан де-баварʹа йед кӧ шина зарʹа хԝә дькьн, дьбежьн ԝәки Хԝәдерʹа сәр әʹзмана диса мьлйакʹәтәк лазьм бу, ләма әԝи зарʹа ԝан бьрә бал хԝә. Әв дәрәԝи нә кӧ дьле мәрьва рʹьһʹәт дькә, ле һе зедә еше дькә дьле ԝан. Бәре, дәрәԝа дәрһәԛа щәʹньме дьданә хәбате, ԝәки хԝә һәԛ дәрхьн чахе мәрьв бь чәрчьрандьне дькӧштьн. Мәсәлә, мәрьвед кӧ мьԛабьли һинкьрьнед дере дәрдькʹәтьн, стунева дардадькьрьн у дьшәԝьтандьн. Ль гора кʹьтебәке («Spanish Inquestion»), һьнәкед кӧ ӧса берʹәʹмти мәрьв дьданә кӧштьне, баԝәр дькьрьн ԝәки чахе мәрьв ӧса бьчәрчьрьн, ԝе фәʹм бькьн кӧ чәрчьрʹандьна щәʹньмеда ча нә, у дьбәкә пешийа мьрьне әԝана тʹобә бькьн у жь щәʹньме хьлаз бьн. Гәләк ԝәлатада, мәрьв бона мьрийед хԝә хԝарьне һазьр дькьн, әʹйда датиньн, сәва һӧрмәте бьдьнә кал-бавед хԝәйи мьри. Һьнәк жи биранина мьрийа дәрбаз дькьн у һӧрмәте дьдьнә ԝан, жь тьрса кӧ мьри ԝана щәза нәкьн. Сәд һʹәйф, әԝ дәрәԝед Шәйтʹан ԛә дьлбинийе надьн мәрьва, дәԝсе кӧл-дәрдед ԝан зедә дькьн, у һәла һе жи тьрсе дькьнә дьле ԝан. w19.04 14 ¶1; 16 ¶10