Сьбат

«Һәԛи», чаԝа Кʹьтеба Пирозда те хәбьтандьне, те һʹәсабе ԝан тьшта бькьн чь кӧ бәр чʹәʹве Хԝәде  рʹаст ьн, у фьрԛийе нәкьнә ортʹа мәрьва. Бьфькьрьн дәрһәԛа кьред Иса, кӧ һәԛи дьданә кʹьфше. Ԝәʹде ԝида, сәрԝеред дине Щьһуйа мьләтед майин нәфрʹәт дькьрьн, у ԛәдьре жьна нәдьгьртьн. Ле Иса һьндава һʹәмуйада һәԛ бу у фьрԛи нәдькьрә ортʹа мәрьва. Әԝи мәрьвед нәщьһу ԛәбул дькьр, чахе ԝана баԝәрийа хԝә ԝи дьанин у пәй ԝи дьчун (Мәт. 8:5-10, 13). Әԝи һʹәмуйарʹа мьзгини бәла дькьр, һьн йед дәԝләтирʹа һьн жи кәсибарʹа (Мәт. 11:5; Луԛа 19:2, 9). Әԝ тʹӧ щар һьндава жьнада сәрт нибу у әԝана беһӧрмәт нәдькьрьн. Дәԝсе әԝ һьндава ԝанда бь ԛәдьр у һʹәйф бу, һәла һе һьндава ԝанда жи, йед кӧ мәрьвед майин бәр тьштәки һʹәсаб нәдькьрьн (Луԛа 7:37-39, 44-50). Әм дькарьн чʹәʹв бьдьнә Иса, у фьрԛийе нәкьнә ортʹа мәрьва, һʹәмуйарʹа мьзгинийе бәла кьн, фьрԛи тʹӧнә әԝана чь баԝәр дькьн, йан жи кʹәсиб ьн йан дәԝләти нә. Малхед мале йед кӧ Мәсиһи нә, гәрәке мина Иса һьндава жьнада бь ԛәдьр бьн. w19.05 2 ¶1; 5 ¶15-17

Иро гава рʹуспийед амьн пе Кʹьтеба Пироз бәр дьле ԝанда тен, йед кӧ һʹәԝщә нә, гәрәке тʹәви ԝан пе гьлийед ширьн, нәрм у дьлшәԝат хәбәр дьн. Ле гәло тʹәне рʹуспи гәрәке бәр дьле ԝанда бен, йед кӧ рʹасти зорбәтийе һатьнә? На. Һәр кәс жь мә борщдар ә, ԝәки «бәр дьле һәвда» бен (1 Тʹеслн. 4:18). Илаһи хушкед рʹӧһʹанида гьһишти дькарьн гәләк дьлбинийе бьдьнә ԝан хушка, кӧ рʹасти зорбәтийе һатьнә. Биньн бира хԝә, Кʹьтеба Пирозда Йаһоԝа Хԝәде хԝә бәрамбәри де дькә, йа кӧ бәр дьле кӧрʹе хԝәйи бьчʹукда те (Иша. 66:13). Кʹьтеба Пирозда гәләк мәсәлед ԝан жьна һәнә, йед кӧ ԝәʹде тәнгасийа дьлбини дьданә мәрьва (Иб. 42:11). У дьле Йаһоԝа гәләк ша дьбә, чахе дьвинә ԝәки хушк бәр дьле ԝан хушкада тен, йед кӧ емосийалида хԝә хьраб тʹәхмин дькьн! Һьнә дәрәщада, рʹуспи дькарьн хушкәкә гьһиштирʹа башԛә бежьн, ԝәки али фьлан хушке бькә у дьлбинийе бьдә ԝе. Һәрге әԝ Мәсиһи нахԝазә мәрʹа гьли кә дәрһәԛа хԝә, һәмьки әм гәрәке фәсал бьн, кӧ нәкʹәвьнә нав шьхӧле ԝан, у ԝан пьрса нәдьнә ԝан, щаба кʹижана әԝана нахԝазьн мәрʹа бежьн  (1 Тʹеслн. 4:11). w19.05 16-17 ¶10-12

Чахе кәсәки гӧне гьран кьрийә, чьрʹа те дәʹԝакьрьне, ԝәки пешийа кӧ рʹуспи комитейа диԝанкьрьне саз кьн, гәрәке дӧ шәʹдә һәбьн? Әԝ дәʹԝакьрьна һәԛ, ль гора Кʹьтеба Пироз ә. Һәрге кәсәк гӧне хԝә инкʹар дькә, дӧ шәʹдә лазьм ьн, ԝәки бе избаткьрьне кӧ әԝи гӧнә кьрийә. Ԝи чахи рʹуспи комитейа диԝанкьрьне саз дькьн (Ԛан. Дщр. 19:15; 1 Тимтʹ. 5:19). Һәрге әԝ әндәме щьвате гӧне хԝә инкʹар дькә, рʹуспи гьлийед шәʹда леколин дькьн. Мәʹнийа рʹуспийа һәйә, ԝәки комитейа диԝанкьрьне саз кьн, һәрге лап кем дӧ шәʹдә һәбьн. Йәк йе кӧ дәрһәԛа ве йәке әʹлами ԝан кьрийә, у йе дӧда, йе кӧ гьлийед ԝи избат дькә. Ле һәрге шәʹде дӧда тʹӧнә, әв найе һʹәсабе ԝәки әԝе кӧ ԝи нәһәԛ дькә, дәрәԝа дькә. Һәрге жи бь сайа дӧ шәʹда нәйе избаткьрьне, кӧ әԝи зорбәти зарʹе кьрийә, йәкә рʹуспи фәʹм дькьн, ԝәки дьбәкә жи гӧне гьран һатийә кьрьне. Рʹуспи бәрдәԝам дькьн бәр дьле ԝанда тен у али ԝан дькьн, йед кӧ зийан стандьнә у чʹәʹве рʹуспийа сәр ԝи мәрьви йә, йе кӧ зорбәтийеда һатийә нәһәԛкьрьне, сәва әԝ зийане нәдә әндәмед щьвате (Кʹар. Шанд. 20:28). w19.05 11 ¶15-16

Гәләк фәрз ә, кӧ зарʹа һин кьн чаԝа леколина бькьн. Зарʹ гәрәке һин бьн кӧ чаԝа хԝә бона щьвате һазьр кьн, ӧса жи һин бьн леколина бькьн, ԝәки бькарьбьн щаба ԝан пьрса бьдьн, кʹижан кӧ мәкʹтәбеда пешда тен (Ибрн. 5:14). Һәрге әԝана һьнә ԝәʹде хԝә хәрщ кьн, сәва малда леколина бькьн, әԝ йәк ԝе али ԝан бькә, ԝәки һʹәԝаса ԝан пешда бе, сәва гӧһдар бьн у фәʹм кьн, кӧ чь те готьне щьватада у ӧса жи щьватед мәзьнда. Де-бав гәрәке сафи кьн кӧ чьԛас ԝәʹдә хәрщ кьн сәр һәр леколинкьрьна тʹәви зарʹе, у һьлдьнә һʹәсаб сал, хәйсәт у фәрәсәтед зарʹед хԝә. Әм тʹәви кʹе һинбуна Кʹьтеба Пироз дәрбаз дькьн, ԝана жи гәрәке һин кьн кӧ бьзаньбьн чаԝа леколина бькьн. Чахе әԝана тʹәзә һинбуна Кʹьтеба Пироз дәстпедькьн, әм ша дьбьн гава әԝана хԝә һазьр дькьн бона һинбуне йан жи щьвате, у щаба кʹьфш дькьн. Ле әм ӧса жи гәрәке ԝана һин кьн, кӧ чаԝа кʹур леколина бькьн. Ԝи щурʹәйи чахе әԝана рʹасти проблема бен, ԝе һин бьн хԝәха әве информасийайе әʹдәбийәтед мәда бьгәрʹьн, кʹижан ԝе али ԝан бькә. w19.05 26 ¶2; 28 ¶10-11

Шәйтʹан дьхԝазә щурʹе фькьрандьна мә бьгӧһезә. Әԝ һәр щурʹә фькьр у ньһерʹандьн дьдә хәбате, сәва Хәбәра Хԝәде сәр мә һʹӧкӧм нәкә. Шәйтʹан бәрдәԝам дькә пьрсед ӧса бьдә, кʹижан кӧ әԝи бахче Еденеда да Һеԝайе: «Рʹасти Хԝәде готийә ԝәки . . .» (Дәстп. 3:1). Ве дьнйайеда, кӧ дәсте Шәйтʹанда йә, әм гәләк щар пьрсед ӧса дьбьһен, кӧ дькарьн шьке бькьнә дьле мә, мәсәлә: «Гәло рʹасти Хԝәде ԛәбул накә жьн-жьн бьстинә, мер-мер бьстинә? Рʹасти Хԝәде нахԝазә, ԝәки әм рʹожа буйина хԝә, йан жи сала тʹәзә дәрбаз кьн? Гәло рʹасти Хԝәде нахԝазә, ԝәки әм хуне бәри хԝә дьн? Рʹасти Хԝәдейе һʹьзкьрьн дьхԝазә, ԝәки әм һәләԛәтийа хԝә тʹәви мәрьвед хԝәйи незик, йед кӧ жь щьвате һатьнә дәрхьстьне, бьԛәтиньн?» Әм гәрәке баԝәрийа хԝәда ԛәԝи бьн у дӧдьли нәбьн. Һәрге һʹьше мәда пьрсед ӧса һәнә, щаба кʹижана мә нәстандийә, әԝ дькарә бьбә мәʹни кӧ шьк дьле мәда пешда бен. Әԝ шьк дькарьн ахьрийеда фькьрандьна мә хьраб кьн у баԝәрийа мә һьлшиньн. w19.06 12-13 ¶15-17

Йаһоԝа мә гәләк һʹьз дькә (Йуһʹн. 3:16). У әм дьхԝазьн чʹәʹв бьдьнә Баве хԝәйи һʹьзкьрьн. Ләма жи әм алийе хԝәда һәр тьшти дькьн, сәва һьндава һʹәмуйа «шәԝат бьн [у] һәв һʹьз бькьн», илаһи ԝана, йед кӧ «нәфәред мала Хԝәде» нә (Галт. 6:10). Чахе хушк-бьред мә дькʹәвьнә  тәнгасийа, әм дьхԝазьн али ԝан бькьн. Ча әм дькарьн бәр дьле ԝи мәрьвида бен, йе кӧ жьн йан мере хԝә ӧнда кьрийә? Гава пешьн әԝ ә, кӧ тʹәви ԝи кәси хәбәр дьн, һәрге жи һун шәрм дькьн йан жи ньзаньн чь бежьн. Паула, мере кʹижане ньшкева мьр, дьбежә: «Әз фәʹм дькьм, кӧ мәрьвед дьн тʹәвһәв дьбьн, чахе мәрьве кәсәкийи незик дьмьрә. Әԝ мәрьв щара нькарьн тьштәки бежьн, чьмки дьтьрсьн кӧ ԝе тьште ӧса бежьн, ԝәки әԝ кәс бьхәйдә. Ле һе баш ә мәри тьштәки нәрʹаст бежә, дәԝса кӧ ԛә тьштәки нәбежә». Мәрьве кӧ шине дькә, нә жи һивийе йә, ԝәки һун тьштәки аԛьлайи бежьн. Паула дьбежә: «Әз гәләк рʹази мә чахе һәвалед мьн, һәма тʹәне ԝан гьлийа мьнрʹа дьбежьн: ‹Дьле мьн дешә бона тә›». w19.06 20 ¶1; 23 ¶14

Һәрге шьхӧле мә ԛәдәхәкьри йә, рʹуспи ԝе ӧса организә бькьн, ԝәки һун чахе һәрʹьн щьвате, нәкʹәвьнә чʹәʹве ԝан, йед кӧ мьԛабьли мә нә. Рʹуспи дьбәкә ԝәрʹа бежьн, кӧ бь кʹомед бьчʹук тʹоп бьн, у дьбәкә гәләк щар ԝәʹдә у щийе тʹопбуне бьгӧһезьн. Ле хьзмәти щурʹә-щурʹә ԝәлатада, дькарә жь бо һьнә дәрәща, мина һәв нибә. Чь жи һәбә, йәкә әме мәщала бьгәрʹьн, сәва мьзгинийе бәла кьн, чьмки әм Йаһоԝа һʹьз дькьн у дьхԝазьн дәрһәԛа Пʹадшатийа ԝи мәрьварʹа гьли кьн (Луԛа 8:1). Тʹәрихзан Емили Б. Барен, дәрһәԛа Шәʹдед Йаһоԝа ԝәʹде Йәктийа Совйәте, гот: «Чахе дәԝләте Шәʹдед Йаһоԝарʹа гот, ԝәки изьн тʹӧнә хьзмәт кьн, ԝана дәстпекьр щинар, һәвалхәбатчи у һәвалед хԝәрʹа шәʹдәтийе бьдьн. Ле чахе жь бо ве йәке ԝана кьрьнә гьртигәһе, Шәʹдед Йаһоԝа гьртийарʹа шәʹдәти дьдан». Рʹаст ә шьхӧле мә ԛәдәхәкьри бу, ле йәкә хушк-бьред мә хьзмәти нәданә сәкьнандьне. Ләма һун жи чʹәʹв бьдьнә ԝан хушк-бьра! w19.07 11 ¶12-13

Әм ча дькарьн али мәрьвед нәбаԝәрмәнд бькьн, ԝәки Хԝәде һʹьз бькьн у бьбьнә шагьртед Мәсиһ? Әм гәрәке бир нәкьн, ԝәки мәрьв ча хԝә дьдә кʹьфше гава әм шәʹдәтийе дьдьн, ве йәкева гьредайи йә, кӧ әԝ ча у кʹидәре мәзьн буйә. Мәсәлә, мәрьвед кӧ Әԝропайеда мәзьн бунә, щӧдә дьбьн жь мәрьвед Асйайеда. Чьрʹа? Әԝропайеда, гәләк мәрьв дәрһәԛа Кʹьтеба Пироз заньн у бьһистьнә кӧ Хԝәде һʹәму тьшт әʹфьрандийә. Ле Асйайеда, һʹәчʹи зәʹф мәрьв һьндьк йан жи ԛә тьштәки ньзаньн дәрһәԛа Кʹьтеба Пироз, у дьбәкә баԝәр накьн ԝәки Әʹфьрандар һәйә. Ләма жи позитив бьн. Һәр сал, мәрьвед нәбаԝәр дьбьнә Шәʹдед Йаһоԝа. Гәләк жь ԝана нав-намус дьжитьн у дӧрʹутийа религийа бәр чʹәʹве ԝан рʹәш бу, һьнәк жи бь әʹмьре нәщайиз дьжитьн, ле гәләк жи гәрәке хәйсәтед хԝәйә хьраб бьтʹәрькандана. Пе аликʹарийа Йаһоԝа, әм дькарьн дӧдьли нәбьн, кӧ әме ԝан мәрьва бьвиньн, йед кӧ һазьр ьн мьзгинийе ԛәбул кьн (Кʹар. Шанд. 13:48; 1 Тимтʹ. 2:3, 4). w19.07 20-21 ¶3-4

Һевийа мә жийина һʹәта-һʹәтайе сәр әʹзмана йә йан сәр әʹрде йә, әм гәрәке бәрдәԝам кьн бьщәʹдиньн, сәва бьгьһижьнә нет-мәрәма хԝә. Фьрԛи тʹӧнә әм чь дәрәщада ньн, әм гәрәке һәр тьштед пәй хԝә һишти бир кьн, у нәһельн тʹӧ тьшт хьзмәтийа мә Йаһоԝарʹа бьдә сәкьнандьне (Фили. 3:16). Дьбәкә мәрʹа бе кʹьфше, кӧ әм һивийа чь нә, дәрәнги дькʹәвә, йан жи әм сьһʹәт-ԛәԝатеда ԛьдум дькʹәвьн. Дьԛәԝьмә бәре әм гәләк сала рʹасти тәнгасийед гьран у зерандьна һатьнә. Ле чь жи һәбә, «бона тʹӧ тьшти хәм нәкьн». Дәԝсе, хԝәстьна хԝә бь дӧа-дьрозга Хԝәдерʹа әʹйан кьн, у Хԝәде ԝе әʹдьлайа ӧса бьдә ԝә, кӧ һун нә жи дькарьн бьдьнә бәр чʹәʹве хԝә (Фили. 4:6, 7). Ԝәрә әм жи мина йе кӧ дьрʹәвә, һәр тьшти бькьн сәва һʹьш-аԛьле хԝә бь тʹәмами бьдьнә сәр нета хԝә, кӧ һʹәта хьлазийе бьрʹәвьн у бьгьһижнә финише. Чьԛас дәрәща мә у ԛәԝата мә дьһелә, әм гәрәке һәр тьшти бькьн, у пешда һәрʹьн бәрбь тьштед баш, кӧ пешийа мә нә. w19.08 7 ¶16-17

Дьбәкә әм ньзаньн кӧ чь бежьн ԝан, йед кӧ шине дькьн. Ԝан дәрәщада щара һесьред мә ԝе жь гьлийед мә ԛәԝаттьр бьн. Чахе һәвале Иса Лазар мьр, Мәрйәм, Мәртʹа у мәрьвед майин, бона һәвал у бьре хԝәйи һʹьзкьри дьгьрийан. Чар рʹож шунда, Иса һат. Рʹаст ә әԝи заньбу, кӧ ԝе Лазар жь мьрьне рʹакә, ле йәкә әԝ «гьрийа» (Йуһʹн. 11:17, 33-35). Әԝ һесьред Иса әʹйан кьрьн, кӧ Баве ԝи чь сәр хԝә тʹәхмин дькьр. Һьн жи гьрийе ԝи да кʹьфше, кӧ Иса әԝ малбәт һʹьз дькьр, у әԝе йәке бешьк дьл да Мәрйәме у Мәртʹайе. Чахе хушк-бьред мә жи тʹәхмин дькьн һʹьзкьрьн у хәмкьрьна мә, әԝана дьлрʹьһʹәт дьбьн, чьмки дьвиньн кӧ тʹәне ниньн, ле кʹеләка ԝан һәвалед баш ьн, кӧ ԝана һʹьз дькьн. Щарьна әм гәрәке тәне рʹьнд гӧһ бьдьнә ԝан. Ӧса бькьн ԝәки әԝана кʹәла дьле хԝә мәрʹа бьрʹежьн, дина хԝә нәдьнә гьлийед ԝан, чахе әԝана щара беһʹәмде хԝә тьштәки дьбежьн (Иб. 6:2, 3). Чьмки дьбәкә мәрьвед ԝани незик, кӧ Шәʹдед Йаһоԝа ниньн, кӧла ԝан зедә дькьн. Ләма жи тʹәви ԝан дӧа бькьн. Һиви кьн жь Йаһоԝа кӧ дӧа дьбьһе, ԝәки ԛәԝате у биланийе бьдә ԝан хушк-бьра (Зәб. 65:2). w19.04 18-19 ¶18-19

Фьрԛи тʹӧнә әм дәштеда хьзмәт дькьн йан Бәйтʹәледа, әм мәрьвед дор-бәре хԝә у һәла һе ԝи щийи жи, кʹидәре әм хьзмәт дькьн, һʹьз дькьн. Ләма жи жь бо чь мәʹнийа жи әм кʹьфшкьрьна хԝә дьһельн, йәкә дьле мә дешә у әм дьлтәнг дьбьн. Әм бира хушк-бьред ԝедәре дькьн, у бона ԝан бәрхԝә дькʹәвьн, илаһи һәрге әм жь ԝан дьԛәтьн жь бо ԝе йәке, кӧ йед мьԛабьл пәй мә дькʹәвьн (Мәт. 10:23; 2 Корн. 11:28, 29). Чәтьнайи дькарә әԝ бә жи, кӧ чахе әм кʹьфшкьрьна тʹәзә дьстиньн, йан жи вәдьгәрʹьн мале, гәләк щар әм тʹәвһәв дьбьн, чьмки гәрәке һини култура тʹәзә бьн, йан һәла һе жи һини култура ԝәлате хԝә бьн. Ӧса жи һьнә хушк-бьра, кʹьфшкьрьна кʹижана те гӧһастьне, дькарьн алийе пʹәрада жи ньшкева рʹасти чәтьнайа бен. Әԝана дьбәкә бәрхԝә кәвьн, бьтьрсьн кӧ ԝе ча бә һале ԝан, у тʹәвһәв бьн. Ԝи ԝәʹдәйи чь дькарә али ԝан бькә? Незики Йаһоԝа бьминьн (Аԛуб 4:8). Ле әм ча дькарьн ӧса бькьн? Әм гәрәке итʹбарийа хԝә ԝи биньн, йе кӧ «дӧа дьбьһе» (Зәб. 65:2). Йаһоԝа дькарә «һәр тьшти һе зедә кә, нә чаԝа әм дьхԝазьн йан дьфькьрьн» (Әфәс. 3:20). Чахе әм бь дӧа жь Йаһоԝа тьштәки һиви дькьн, әԝ нә тʹәне щаба дӧайе мә дьдә, ле дькарә ӧса али мә бькә у проблемед мә ӧса сафи кә, кӧ әм нә жи һивийе бун. w19.08 21 ¶5-6

Һьнә мәрьв чахе хәбәра «Һармәгәдон» дьбьһен, әԝана һʹәсаб дькьн, кӧ әԝ һәйә шәрʹе бь атоме йан жи хәзәба тʹәбийәте йа һʹәмдьнйайи. Ле Кʹьтеба Пироз дьбежә, ԝәки Һармәгәдон әԝ һәйә мьзгини у мәʹнийа шабуне! (Әʹйан. 1:3) Чьрʹа? Чьмки бь рʹасти шәрʹе Һармәгәдоне ԝе нә кӧ ԛьрʹа инсанәте бинә, ле хьлазбуне бинә. Чь щурʹәйи? Әԝ ԝе сәрԝертийед мәрьва бьдә һьлдане. Әв шәрʹ ԝе инсанәте хьлаз кә ӧса жи чахе мәрьвед хьраб кʹӧта кә, ле мәрьвед рʹаст хԝәй кә. Һьн жи инсанәт ԝе хьлаз бә, чьмки әԝ шәрʹ ԝе ԛьрʹа ԝан мәрьва бинә, йед кӧ әʹрде хьраб дькьн (Әʹйан. 11:18) Хәбәра «Һармәгәдон» Кʹьтеба Пирозда тʹәне щарәке те хәбьтандьне, у әԝ гьли сәр зьмане Ибрани те һʹәсабе «Чʹийайе Мәгидо» (Әʹйан. 16:16). Мәгидо шәһәр бу Исраела бәреда (Йешу 17:11). Ле Һармәгәдон рʹастә-рʹаст наве тʹӧ щийи нинә. Бь рʹасти әԝ һәйә әв дәрәщә, чахе «һʹәму пʹадшед дьнйайе» ԝе тʹоп бьн, сәва мьԛабьли Йаһоԝа дәрен (Әʹйан. 16:14). w19.09 8 ¶1-3

Әԝ жьньк гәләк дьлтәнг бу, чьмки һʹәԝще аликʹарийе бу. Әԝ чубу бал гәләк һʹәкима, сәва хԝә ԛәнщ кә. Ле тӧ тьшти али ԝе нәкьрьбу, у әԝ 12 сала жь бо ве нәхԝәшийа хԝә дьчәрчьри у ль гора Ԛануна Муса әԝ нәпаԛьж дьһатә һʹәсабе (Ԛан. Кʹаһ. 15:25). Паше әԝ пеһʹәсийа кӧ Иса нәхԝаша ԛәнщ дькә, у чу ԝи бьгәрʹә. Чахе әԝе Иса дит, дәсте хԝә да рʹишийед кʹьнще ԝи, у дәрберʹа ԛәнщ бу! Иса нә тʹәне сьһʹәт-ԛәԝата ԝе ԛәнщ кьр, ле әԝи пе хәбәрдана хԝәйә тʹәви ԝе, ԛәдьре ԝе бьльнд кьр. Мәсәлә, хәбәрданеда әԝи гьлики бь ԛәдьр у гәрм жерʹа гот, «әʹвде». Бьдьнә бәр чʹәʹве хԝә, әԝ жьньк рʹьһʹәтикә чьԛас мәзьн станд у ча шьдийа! (Луԛа 8:44-48) Дина хԝә бьдьне, кӧ әԝ жьньк хԝәха чу бал Иса, демәк әԝе хԝәха гава пешьн авит. Иро жи ӧса нә, пешийе гәрәке әм хԝәха гаве бавежьн, ԝәки бенә бал Иса. Фәʹмдари йә, ԝәʹде мәда Иса бь кʹәрәмәт нәхԝәшийед ԝан мәрьва ԛәнщ накә, йед кӧ тенә щәм ԝи. Ле әԝ иро жи мә тʹәглиф дькә: «Ԝәрьнә щәм мьн . . . у әзе рʹьһʹәтийе бьдьмә ԝә (Мәт. 11:28). w19.09 20 ¶2-3

Зәкәрйа пʹехәмбәр дәрһәԛа ве йәке пешда гот: «Ԝан рʹожада дәһ мәрьв жь һʹәму зьманед мьләта, ԝе хԝә рʹишийе кʹьнще Щьһукива бьгьрьн, у бежьн: ‹Әм дьхԝазьн тʹәви ԝә бен, чьмки мә бьһистийә Хԝәде тʹәви ԝә йә›» (Зәкәр. 8:23, ДТʹ). Шәʹдед Йаһоԝа фәʹм дькьн, кӧ сәва мәрьв жь һʹәму зьмана бенә тʹопкьрьне, мьзгини гәрәке сәр гәләк зьмана бе бәлакьрьне. Әм иро нава тʹәрихийеда шьхӧле ԝәлгәрʹандьнейә мәзьн дькьн, кӧ ида сәр 900 зьмана зедәтьр те ԝәлгәрʹандьне. Әʹйан ә, рʹасти жи Йаһоԝа иро кʹәрәмәте дькә, кӧ жь һʹәму мьләта әʹлаләта мәзьн тʹоп дькә. Әм гәләк рʹази нә кӧ хԝарьна рʹӧһʹани сәр һе зедә у зедә зьмана һәйә. Фьрԛийа зьмана ортʹа хьзмәткʹаред Йаһоԝа нав тʹәмамийа дьнйайеда, нә кӧ ԝана щӧдә дькә, ле дькә йәктийе. У әԝана әʹйан ьн пе ве йәке, кӧ бь хирәт мьзгинийе бәла дькьн у һʹьзкьрьна бьрати һьндава һәвда нишан дькьн. Рʹасти жи, әԝ йәк кӧ әм пе чʹәʹве хԝә дьвиньн ча әв пʹехәмбәрти те сери, баԝәрийа мә гәләк дьшьдинә! (Мәт. 24:14; Йуһʹн. 13:35) w19.09 30-31 ¶16-17

Ԝәʹде тәнгасийа мәзьн, мәрьв ԝе тʹәвһәв бьн, гава бьвиньн кӧ ча әԝ һʹәму тьшт һьлдьше, чь кӧ ԝана тʹьре ԝе һәр гав һәбә. Әԝана ԝе бьчәрчьрьн у бәрхԝә кәвьн, чьмки нава тәрихийа инсанәтеда әԝ ԝе ԝәʹдәки лапи гьран бә (Сефн. 1:14, 15). Һьнге, дьбәкә әʹмьр ԝе һе чәтьн бә, һәла һе бона щьмәʹта Хԝәде жи. Әм нә пʹара ве дьнйайе нә, ләма жи дьԛәԝьмә әме тәнгасийа бьвиньн. Дьбәкә һьнә тьшт кӧ әм һʹәԝщә бьн, бал мә тʹӧнә бьн. «Хӧламе амьн у сәрԝахт» мә һазьр дькә, ԝәки ԝәʹде тәнгасийа мәзьн әм Хԝәдерʹа амьн бьминьн (Мәт. 24:45). Әԝ бь щурʹә-щурʹә тьшта али мә дькә, тʹәне мәсәләке шеԝьр кьн: хӧламе амьн у сәрԝахт бь сайа щьватед мәзьнә серʹожи, кӧ салед 2016-2018-да дәрбаз бун, ԝәʹдәда али мә кьр. Бь сайа ԝан щьватед мәзьн, әм һелан бун, ԝәки нав хԝәда ԝан һʹӧнӧра ԛәԝи кьн, кʹижан кӧ мәрʹа лазьм ьн, чьмки рʹожа Йаһоԝа ида гәләк незик ә. w19.10 14 ¶2; 16 ¶10; 17 ¶12

Чахе әм хԝарьне дадьԛӧрчʹиньн, әԝ хԝарьн ча жи сәр мә һʹӧкӧм бә, ида әм нькарьн контрол кьн. Хԝарьна баш дькарә сьһʹәт-ԛәԝата мә баш кә, ле хԝарьна нәкерһати, ԝе сьһʹәт-ԛәԝата мә хьраб кә. Әԝ йәк рʹожәкеда ԝе нәйе кʹьфше, ле ԝәʹдә дәрбаз бә, әԝ йәк ԝе әʹйан бә. Мина ве йәке, чахе әм ԝәʹдәдәрбазкьрьна дьжберьн, әм хԝәха дьжберьн чь бькьнә һʹьше хԝә. Ле паше ида әм нькарьн контрол кьн, кӧ әԝ ԝәʹдәдәрбазкьрьн ча һʹӧкӧм бә сәр һʹьше мә у дьле мә. Ԝәʹдәдәрбазкьрьна баш дькарә мәрʹа кʹаре бинә, ле йа хьраб зийане тинә (Аԛуб 1:14, 15). Әм нькарьн дәрберʹа тедәрхьн кӧ ԝәʹдәдәрбазкьрьна хьраб ча сәр мә һʹӧкӧм дькә, ле ԝәʹдә шунда әԝ йәк ԝе әшкәрә бе кʹьфше. Ләма жи Кʹьтеба Пироз мәрʹа пешда дьбежә: «Мәрьв чь дьчинә, ԝе жи дьчьнә. Кʹи кӧ бона бьнйатʹа хԝә дьчинә, әԝе жь ԝе бьнйатʹе мьрьне бьчьнә» (Галт. 6:7, 8). Рʹасти жи чьԛас фәрз ә әм һәр щурʹә ԝәʹдәдәрбазкьрьна бьтʹәрькиньн, кʹижанада тьштед ӧса һәнә, кӧ бәр чʹәʹве Йаһоԝа рʹәш ьн! (Зәб. 97:10) w19.10 30 ¶12-14

Йаһоԝа һʹьзкьрьна хԝә мәрʹа избат кьр бь ве йәке, кӧ Кӧрʹе хԝә кьрә ԛӧрбан бона мә (Йуһʹн. 3:16). Ча әм дькарьн чʹәʹв бьдьнә һʹьзкьрьна Йаһоԝа? Әм гәрәке һʹәму хушк-бьред хԝә ԛимәт кьн у һʹьз бькьн, у ӧса жи чахе «пәза ӧндабуйи» вәдьгәрʹә бал Йаһоԝа, бь дьл у щан ша бьн у ԝи ԛәбул кьн (Зәб. 119:176; Луԛа 15:7, 10). Әм һʹьзкьрьна хԝә һьндава хушк-бьра, бь ве йәке избат дькьн, кӧ ԝәʹде тәнгасийа кʹеләка ԝан ьн у али ԝан дькьн (1 Йуһʹн. 3:17). Иса тʹәми да шагьртед хԝә, ԝәки мина ԝи һәвдӧ һʹьз бькьн (Йуһʹн. 13:34, 35). Әԝ тʹәмийа Иса тʹәзә йә, чьмки дәʹԝа дькә кӧ һʹьзкьрьнәкә ӧса бьдьнә кʹьфше, кʹижан кӧ Ԛануна Мусада нәдьһатә дәʹԝакьрьне. Әм гәрәке хушк-бьра ӧса һʹьз бькьн, ча Иса әм һʹьз кьрьнә. Әм гәрәке ԝана жь хԝә зедәтьр һʹьз бькьн. Гәрәке әм ӧса ԛайим ԝана һʹьз бькьн, ԝәки һазьр бьн бона ԝана әʹмьре хԝә жи бьдьн, чаԝа Иса бона мә да. w19.05 4 ¶11-13

Сәва әм жь рʹӧһʹе пироз аликʹарийе бьстиньн, әм гәрәке һәр гав беарзи, демәк бь хирәт дӧа бькьн (Луԛа 11:13). Мәсәла Иса жь Луԛа 11:5-9 али мә дькә, ԝәки фәʹм кьн кӧ чьрʹа Йаһоԝа ԝе рʹӧһʹе пироз бьдә мә. Мәсәледа мерьк дьхԝәст меване хԝәрʹа ԛәнщийе бькә. Әԝи дьхԝәст меване хԝә тʹер кә, кʹижан кӧ ниве шәве һатьбу, ле малда хԝарьн тʹӧнә бу. Иса гот ԝәки щинаре ԝи нан да ԝи, чьмки әԝи бәрдәԝам дькьр жь ԝи һиви кә. Ле бь ве йәке Иса чь дьхԝәст һин кьра? Әԝи дьхԝәст һин кьра кӧ һәрге мәрьве гӧнәкʹар һазьр ә али щинаре хԝә бькә жь бо беарзийа ԝи, ле илаһи Баве мәйи әʹзмана кӧ ԛәнщ ә, ԝе чьԛас зедә али ԝан бькә, йед кӧ тʹьме рʹӧһʹе пироз жь ԝи һиви дькьн! Ләма жи әм чахе дӧа дькьн дькарьн дӧдьли нәбьн, кӧ Йаһоԝа ԝе әʹсә хԝәстьна мә бинә сери у рʹӧһʹе пироз бьдә мә (Зәб. 10:17; 66:19). Әм дькарьн дӧдьли нәбьн, ԝәки Шәйтʹан чь жи бькә, йәкә әԝ ԝе нькарьбә мә бьшкенә. w19.11 13 ¶17-19

Иса заньбу, ԝәки щара жерʹа у шандийед ԝирʹа һесабун лазьм ә. Ле гәләк мәрьвед һьнге у йед иро, мина ԝи мәрьве дәԝләти нә, дәрһәԛа кʹижани Иса мәтʹәлокеда гот. Әԝи мерьки хԝәрʹа дьгот: «Рʹуне бьхԝә, вәхԝә у ша бә» (Луԛа 12:19; 2 Тимтʹ. 3:4). Дьле ԝи педа сәр рʹьһʹәтийе у ләзәте бу. Ле бона Иса у шандийед ԝи, рʹьһʹәти у ләзәте тʹӧ щар щийе пешьн нәдьгьртьн. Иро, әм чʹәʹв дьдьнә Иса ве йәкеда, кӧ чахе әм һеса дьбьн жи, әм ԝи ԝәʹде хԝә жи дьдьнә хәбате, бона шьхӧлед рʹӧһʹани. Сәва мә хьзмәти у щьват ӧса фәрз ьн, ԝәки әм тʹӧ мәщәла дәсте хԝә бәрʹнадьн (Ибрн. 10:24, 25). Һәла һе жи чахе дьчьн щики һеса бьн, әм ԝедәре жи дьчьн щьвате, у һәр мәщале дьдьнә хәбате, сәва шәʹдәтийе бьдьнә ԝан мәрьва, йед кӧ рʹасти мә тед (2 Тимтʹ. 4:2). w19.12 7 ¶16-17

Йаһоԝа азайе дьдә мә, ԝәки хԝәха бьжберьн ча бьжин. Әԝ мә һин дькә кӧ бьзаньбьн ча сафикьрьнед кӧ ԝи хԝәш тен, биньн сери (Зәб. 119:173). Чьԛас зедә әм биланийа жь Хәбәра Хԝәде дьдьнә хәбате, һаԛас зедә әм сафикьрьнед баш дькьн (Ибрн. 5:14). Һәрге жи мә сафикьрьнәкә билани кьрийә, йәкә дьԛәԝьмә мәрʹа чәтьн ә ве йәке һʹәта хьлазийе биньн сери. Дина хԝә бьдьнә ԝан мәсәла: Бьраки щаһьл хԝәрʹа сафи кьрийә, ԝәки бь тʹәмами Кʹьтеба Пироз бьхунә. Әԝ чәнд һʹәфтийа ве йәкеда рʹьнд пешда дьчә, ле паше дьсәкьнә. Хушк сафи дькә, ԝәки бьбә пешәнг, ле паш дьхә. Кʹомәкә рʹуспийа тʹәвайи сафи кьрьн, ԝәки щьвата хԝәда һе зедә сәрледана шьвантийе бькьн, ле мәһ дәрбаз бун ԝана һе дәстпенәкьр ве йәке биньн сери. Әԝ һәр се дәрәщә щурʹә-щурʹә нә, ле тьштәкида мина һәв ьн. Ԝана сафикьрьна хԝә һʹәта хьлазийе нәанинә сери. w19.11 26 ¶1-2

Иса ԝәʹде мә бәрамбәри «рʹожед Нӧһ» кьр, у әм жи бешьк «рʹожед ахьрийеда зәманед» хьрабда дьжин (Мәт. 24:37; 2 Тимтʹ. 3:1). Жь бо ве йәке, һьнә жьн-мер сафи дькьн, ԝәки һе зарʹед ԝан тʹӧнә бьн, сәва кӧ бькарьбьн һе зедә ԝәʹдә  хьзмәтийеда хәрщ кьн. Жьн-меред сәрԝахт чахе сафи дькьн, кӧ зарʹед ԝан һәбьн йан на, у чьԛас зарʹед ԝан һәбьн, хәрщед хԝә дьдьнә «бәр һʹәсеб» (Луԛа 14:28, 29). Зарʹед кʹе һәнә әԝана заньн, кӧ сәва зарʹа биньн у хԝәй кьн, нә кӧ тʹәне пʹәрә һәбә лазьм ә, ле ӧса жи ԝәʹдә у ԛәԝат. Ләма гәләк фәрз ә жьн-мер ван пьрса шеԝьр кьн: «Гәло гәрәке әм һәрдӧ жи бьхәбьтьн, сәва тьштед сәрәкә кӧ әм һʹәԝщә нә, бькʹьрьн? Әм һәрдӧ жи һәврʹа ԛайил ьн ве йәкеда, кӧ бь рʹасти әм һʹәԝще кʹижан тьштед сәрәкә нә? Һәрге әм һәрдӧ жи бьхәбьтьн, кʹе ԝе мьԛати зарʹа бә? Кʹе ԝе һʹӧкӧм кә сәр фькьрандьн у рʹабун-рʹуньштьна зарʹа?» Жьн-меред кӧ дәрһәԛа ԝан пьрса бь нәрми шеԝьр дькьн, әԝ ширәта жь рʹеза ве рʹоже һьлдьдьн һʹәсаб. w19.12 23-24 ¶6-7

Паԝлосе шанди гәләк щар бәр дәре мьрьне бу (2 Корн. 11:23-28). Әԝ ӧса жи дьчәрчьри жь бо «стьруйәки, ДТʹ» бәдәна хԝәда, чь кӧ дьбәкә нәхԝәшик бу (2 Корн. 12:7). У әԝ ӧса жи дьлшкәсти бу жь бо Димас, йе кӧ ԝәʹдәки һәвалхьзмәткʹаре ԝи бу, ле ԝи һишт, чьмки «дьнйа һʹьз кьр» (2 Тимтʹ. 4:10). Паԝлос йәки мерхас бу, пе рʹӧһʹе пироз бьжарти бу, у бь дьл у щан али хушк-бьра дькьр, ле әԝ жи щара дьлтәнг дьбу (Рʹом. 9:1, 2). Нава чәтьнайед хԝәда Паԝлос бәрдьли у аликʹари дьстанд. Ле чь щурʹәйи? Йа пешьн Йаһоԝа пе рʹӧһʹе хԝәйи пироз ԝи ԛәԝи кьр (2 Корн. 4:7; Фили. 4:13). Йаһоԝа ӧса жи бь аликʹарийа хушк-бьра бәрдьли дьда ԝи. Паԝлос дәрһәԛа һьнә бьра гот, ԝәки бина ԝи «бь ԝан дәркʹәтийә» (Колс. 4:11). Паԝлос бәʹса кʹижана кьр, нава ԝанда Әристархо, Тьхико у Марԛос бун. Ԝана Паԝлос ԛәԝи дькьр у али ԝи дькьрьн сәва сәбьр кә. w20.01 8 ¶2-3

Иса ӧса жи гот, ԝәки ԝи мәрьвирʹа кӧ бьжарти нинә, нькари бь тʹәмами шьровәки, кӧ йе бьжарти чь тʹәхмин дькә чахе «ну дьбә», демәк «жь рʹӧһʹ» те буйине (Йуһʹн. 3:3-8). Ле чаԝа щурʹе фькьрандьна Мәсиһийед бьжарти те гӧһастьне? Пешийа кӧ Йаһоԝа әԝ Мәсиһи бьжбартана, әԝана һивийа жийина һʹәта-һʹәтайе сәр әʹрде бун. Әԝана бь дьл у щан һивийа ԝи ԝәʹдәйи бун, чахе Йаһоԝа һʹәму щурʹә хьраби бьдә һьлдане у әʹрде бькә щьнәт. Дьԛәԝьмә әԝана ӧса жи дьданә бәр чʹәʹве хԝә, кӧ ԝе чаԝа рʹасти нәфәред хԝә йан жи һәвалед хԝә бен, йед кӧ жь мьрьне рʹабьн. Ле чахе әԝана пе рʹӧһʹе пироз һатьнә  кʹьфшкьрьне, әԝана ида щурʹәки майин дәстпекьрьн бьфькьрьн. Чь щурʹәйи? Әԝана нәфькьрин, ԝәки жийина сәр әʹрде ида һаԛас баш нинә, ԝана нә жи жь бо стресе йан жи кӧл-дәрда фькьрандьна хԝә гӧһастьн. Әԝана нә жи дьфькьрьн, ԝәки жийина һʹәта-һʹәтайе сәр әʹрде ԝе хԝәш нибә. Дәԝсе, Йаһоԝа пе рʹӧһʹе хԝәйи пироз, щурʹе фькьрандьна ԝан у һевийа ԝан кӧ әԝана ԛимәт дькьн, дьгӧһезә. w20.01 22 ¶9-11

Ль гора Ԛануна Муса, меред кʹьфшкьри, нә тʹәне әԝ проблем сафи дькьрьн, кʹижан кӧ һʹәбандьна Йаһоԝава гьредайи бун, ле ӧса жи шьхӧлед криминал у ԛачахтийе. Ле бьн «ԛануна Мәсиһда», рʹуспи тʹәне ԝан проблема сафи дькьн, кʹижан кӧ һʹәбандьна Йаһоԝава гьредайи нә (Галт. 6:2). Әԝана фәʹм дькьн кӧ тьштед криминал щабдарийа сәрԝеред дәԝләте йә, кʹижанарʹа Хԝәде һʹӧкӧм дайә. Демәк һʹӧкӧме ԝан һәйә, мәсәлә, щьрме бьдьнә сәр ԝи мәрьви кӧ ԛануне дьтʹәрьбинә, йан жи ԝи бькьнә кәле (Рʹом. 13:2-4). Ле рʹуспи щабдар ьн чь бькьн, чахе щьватеда кәсәки гӧнәки гьран кьрийә? Әԝана сәр һʹиме Кʹьтеба Пироз һәр тьшти леколин дькьн у паше сафикьрьна дькьн. Әԝана бир накьн, кӧ һʹьзкьрьн әԝ һәйә һʹиме ԛануна Мәсиһ. Ләма жи һʹьзкьрьн рʹуспийа һелан дькә, кӧ бьфькьрьн у ԝан тьшта һьлдьн һʹәсаб: Чь гәрәке бе кьрьне, сәва щьватеда али һәр кәси бькьн, һьндава кʹижанада хьраби һатийә кьрьне? Ле һьндава ԝи кәси йе кӧ гӧне гьран кьрийә, һʹьзкьрьн рʹуспийа һелан дькә тедәрхьн: Һәла әԝ гӧне хԝә тинә рʹуйе хԝә йан на? Әм дькарьн али ԝи бькьн, кӧ әԝ рʹӧһʹанида ԛәнщ бә? w19.05 7 ¶23-24

Иса фәʹм дькьр, кӧ Баве ԝи Канийа жийина ԝи йә, ча әԝи гьлийед рʹеза ирода гот. Иса бь тʹәмами итʹбарийа хԝә Баве хԝә дьани, у Йаһоԝа бона һʹәԝщед ԝи тʹьме хәм дькьр. Ле йа лапә фәрз әԝ ә, кӧ Йаһоԝа бона һʹәԝщед ԝийә рʹӧһʹани хәм дькьр (Мәт. 4:4). Йаһоԝа ӧса жи бона рʹӧһʹанийа мә хәм дькә. Әԝи бь сайа Хәбәра хԝә әʹйан кьр рʹастийа дәрһәԛа хԝә, нета хԝә, у ӧса жи әʹйан кьр, кӧ әԝи чьрʹа әм әʹфьрандьнә у ахьрийеда ԝе чь бьԛәԝьмә. Хенщи ве йәке, әԝи бь де-баве мә йан жи мәрьвед дьн али мә кьр, ԝәки әм дәрһәԛа ԝи пебьһʹәсьн. Хԝәде бь сайа рʹуспийед щьвате у хушк-бьред рʹӧһʹанида гьһишти, али мә дькә, ԝәки әм достийа хԝә тʹәви ԝи ӧнда нәкьн. Йаһоԝа ӧса жи мә бь сайа щьвата ширәт дькә, кʹидәре кӧ әм тʹәви малбәта хԝәйә рʹӧһʹани, һин дьбьн. Бь ԝи щурʹәйи у диса бь щурʹед дьн, Йаһоԝа мә һәр кәсирʹа һʹьзкьрьна хԝә дьдә кʹьфше (Зәб. 32:8). w20.02 3 ¶8; 5 ¶13

Һәрге әм һʹәвсудийе кәсәки бькьн йан жи кәсәк һʹәвсудийе мә бькә, әʹдьлайи ԝе ортʹа мәда тʹӧнә бә. Ле әм чь дькарьн бькьн, сәва нәбьнә мәʹни, ԝәки нав хушк-бьрада һʹәвсуди пешда бе, у әм ча дькарьн әʹдьлайе хԝәй кьн? Әм гәрәке бир нәкьн, кӧ ньһерʹандьна мә у кьред мә дькарьн сәр мәрьва гәләк һʹӧкӧм бьн. Әв дьнйа мә һелан дькә, ԝәки әм «кʹӧбар-бабах» бьн бона ԝан тьштед кӧ бал мә һәнә (1 Йуһʹн. 2:16). Ле әԝ йәк һʹәвсудийе пешда тинә. Ләма жи һәрге әм һәр гав дәрһәԛа хԝә хәбәр нәдьн, кӧ чь тьштед мә һәнә йан жи әм чь дьхԝазьн бькьрьн, ӧса әме нәбьнә мәʹни кӧ һʹәвсудийе мә бькьн. Ӧса жи әме нав мәрьвада һʹәвсудийе пешда нәйньн, һәрге хԝә ԛӧрʹә нәкьн бона щабдарийед хԝәйә щьватеда. Һәрге әм дина мәрьва бькʹьшиньн сәр щабдарийед хԝә, ӧса әм дькарьн бьбьн мәʹни кӧ нав ԝанда һʹәвсуди пешда бе. Ле чахе әм бона ԝана хәм дькьн у кьред ԝани баш дьшекьриньн, әм али ԝан дькьн, ԝәки рʹази бьн чь жи щәм ԝан һәйә. Ԝи щурʹәйи әм щьватеда йәктийе у әʹдьлайе хԝәй дькьн. w20.02 18 ¶15-16

Тӧ дькари Йаһоԝа нас ки бь сайа әʹфьринед ԝи (Әʹйан. 4:11). Бьфькьрьн сәр биланийа Хԝәде, кӧ әԝи ча планет у һʹәйԝан чекьрьнә. Һе зедә пебьһʹәсә дәрһәԛа бәдәна хԝә, кӧ әԝ ча әʹщеб һатийә чекьрьне (Зәб. 139:14). У бьфькьрә сәр ве ԛәԝате кӧ Йаһоԝа кьрә нав тәʹве, кʹижан кӧ стәйрк ә жь милиарда стәйрка (Иша. 40:26). Чахе тӧ кʹур бьфькьри дәрһәԛа әʹфьринед Йаһоԝа, те һе зедә ԝи һӧрмәт ки. Ле сәва һәләԛәтийа тә тʹәви Йаһоԝа ԛәԝи бә, бәс нинә тʹәне бьзаньби, ԝәки Йаһоԝа билан ә у ԛәԝат ә. Һәрге тӧ дьхԝази ԝи ԛайим һʹьз бьки, тӧ гәрәке дәрһәԛа ԝи һе зедә бьзаньби. Тӧ гәрәке дӧдьли нәби, ԝәки Йаһоԝа рʹасти тә һʹьз дькә. Бир нәкә «һәгәр тӧ ль ԝи бьгәрʹи, әԝе хԝә бь тә бьдә дитьн» (1 Дир. 28:9). Йаһоԝа тӧ кʹьшанди щәм хԝә (Йерәм. 31:3). Чьԛас һе зедә тӧ рʹьнд фәʹм бьки, кӧ Йаһоԝа чь бона тә дькә, һаԛас ԝе һʹьзкьрьна тә һьндава ԝи һе зедә бә. w20.03 4 ¶6-7

Паԝлосе шанди мәсәла баш һишт хьзмәтийеда, чьмки әʹмьре ԝида әԝ шьхӧләкә лапә фәрз бу. Чахе әԝ ԝәʹде рʹеԝитийа мисйонерти Корьнтʹеда бу, пʹәре ԝи һьндьк бу у әԝ гәрәке сәр чекьрьна кона бьхәбьтийа. Әԝ дьхәбьти сәва әʹбура хԝә бькә у бькарьбә хьзмәт кә, ԝәки «бе һәԛ» Корьнтʹийарʹа мьзгинийе бәла кә (2 Корн. 11:7). Рʹаст ә Паԝлосрʹа лазьм бу кӧ бьхәбьтә сәва әʹбура хԝә бькә, йәкә әԝи бәрдәԝам дькьр хьзмәтийа хԝә дайнә сәр щийе пешьн, у һәр Шәми хьзмәт дькьр. Ле чахе дәрәща Паԝлос һатә гӧһастьне, әԝ ида дькарьбу һе зедә хьзмәт кьра. Әԝи дәстпекьр «бь хирәт тʹәмамийа ԝәхте хԝә да һинкьрьна хәбәре у щьһуйарʹа шәʹдәти дьда кӧ Мәсиһ, Иса йә» (Кʹар. Шанд. 18:3-5; 2 Корн. 11:9). Паше, чахе Паԝлос Рʹомеда дӧ сала мала хԝәда гьрти бу, әԝи шәʹдәти ԝанрʹа дьда, йед кӧ тʹәсәлийа ԝи дькьрьн у ӧса жи нәʹмә дьньвисин (Кʹар. Шанд. 28:16, 30, 31). Паԝлос нә дьһишт, тʹӧ тьшт һʹьш-аԛьле ԝи жь хьзмәтийе бьрʹәвинә. w19.04 4 ¶9