Адар

Һʹьзкьрьн һьндава Хԝәде у Хәбәра ԝи, мә ԛәԝи дькә, ԝәки әм гӧрʹа Йаһоԝа бькьн, һәла һе жи чахе мәрьвед мәйи незик йан жи һәвал зоре мә дькьн, ԝәки әʹдәт у ԛәйдед бона мьрийа бькьн. Әԝана дьбәкә мә бьдьнә шәрме, у бежьн йанчь мә мьрийе хԝә һʹьз нәдькьр у ԛәдьре ԝи нәдьгьрт. Йан жи дьбәкә әԝана бежьн, кӧ һәрге әм әве йәке нәкьн, мьри ԝе зийане бьдә саха. Жь щьмәʹта Карибе гәләк мәрьв баԝәр дькьн, ԝәки чахе мәрьв дьмьрә, «рʹӧһʹе» ԝи ԝедәре дьчә-те у дькарә щәза кә ԝан мәрьва, йед кӧ һьндава ԝида хьраб бун. Кʹьтебәкеда те готьне, ԝәки әԝ «рʹӧһʹ» дькарә һәла һе «ԛәзийе бинә сәр щьмәʹте жи». Африкайеда жи әʹдәтәкә ӧса һәйә, кӧ мала мьрида нәйньке дадьдьн у шькла жи дьзвьриньн алийе диԝар. Ле чьрʹа ӧса дькьн? Һьнәк дьбежьн ԝәки мьри гәрәке хԝәха хԝә нәвиньн. Әм чаԝа хьзмәткʹаред Йаһоԝа тʹӧ щар ԝан чʹирока баԝәр накьн у нә жи ԝан ԛәйд у әʹдәта дькьн, йед кӧ сәр һʹиме дәрәԝед Шәйтʹан ьн (1 Корн. 10:21, 22). w19.04 16 ¶11-12

Иса принсипед ӧса һин дькьр, кʹижан кӧ ԝе али пәйчуйед ԝи бькьрана, ԝәки һьндава мәрьвада һәԛ буна. Мәсәлә, бьфькьрьн дәрһәԛа Ԛәйде Зерʹин. Бәле, әм гьшк дьхԝазьн ԝәки һьндава мәда һәԛ бьн. Ләма әм жи гәрәке һьндава мәрьвада һәԛ бьн. Чахе әм ӧса бькьн, әԝана жи ԝе һелан бьн һьндава мәда ӧса бьн. Ле һәрге һьндава мәда нәһәԛийе бькьн, әм гәрәке чь бькьн? Иса шагьртед хԝә һин кьр, ԝәки итʹбарийа хԝә Йаһоԝа биньн, кӧ әԝ ԝе һәԛийе бькә ԝанрʹа, «йед кӧ шәв у рʹож һәԝара хԝә ԝи датиньн» (Луԛа 18:6, 7). Әв рʹез созәки ӧса дьдә мә: Хԝәдейе мәйи һәԛ у рʹаст, занә әм ԝан рʹожед ахьрийеда рʹасти чь тәнгасийа тен, у әԝ ԝе әʹсә ԝәʹдәда һәԛийе бинә (2 Тʹеслн. 1:6). Чахе әм ԝан принсипа биньн сери, кʹижан кӧ Иса һин дькьр, әме һьндава мәрьвада һәԛ бьн. У һәрге ве дьнйа Шәйтʹанда кәсәк нәһәԛи мә кьрийә, әм гәрәке дьлрʹьһʹәт бьминьн, чьмки заньн кӧ Йаһоԝа ԝе диԝана ԝан бькә, йед кӧ нәһәԛи мә кьрьнә. w19.05 5 ¶18-19

Һәрге тӧ щаһьл и, дьбәкә һәвалдәрсханед тә теорийа еволусийайе баԝәр дькьн. Фәʹмдари йә һун дьхԝазьн ԝанрʹа шьровәкьн, кӧ һун чьрʹа баԝәр дькьн, ԝәки мәрьв һатьнә әʹфьрандьне. Ле дьбәкә һун дьфькьрьн, ԝәки һуне нькарьбьн шьровәкьн. Ԝи чахи ԝәрʹа лазьм ә леколина бькьн! Ԝәʹде леколинкьрьне дӧ нетед ԝәйә сәрәкә гәрәке һәбьн: 1) Баԝәрийа хԝә ԛәԝи кьн, ԝәки Хԝәде һʹәму тьшт әʹфьрандийә у 2) һин бьн чаԝа һе рʹьнд шьровәкьн рʹастийа жь Хәбәра Хԝәде (Рʹом. 1:20). Һун дькарьн пьрсе бьдьнә хԝә: «Һәвалдәрсханед мьн чахе пьштгьрийа теорийа еволусийайе бькьн, чь дькарьн бежьн?» Паше әʹдәбийәтед мәда леколина бькьн. Һун дькарьн әʹщебмайи бьминьн кӧ ча һеса йә мәрьварʹа дәрһәԛа баԝәрийа хԝә шьровәкьн. Һʹәчʹи зәʹф мәрьв еволусийайе баԝәр дькьн жь бо ве йәке, чьмки кәсәки кӧ әԝана ԛәдьре ԝи дьгьрьн, ԝанрʹа готийә кӧ әԝ рʹаст ә. Һәрге һун һәма тʹәне избаткьрьнәке йан дӧда ԝанрʹа бежьн, дьԛәԝьмә кӧ һун пе щаба хԝә али ԝан бькьн, йед кӧ дьхԝазьн рʹастийе пебьһʹәсьн (Колс. 4:6). w19.05 29 ¶13

Чахе Елйас пʹехәмбәр дьрʹәвийа сәва әʹмьре хԝә хьлаз кә, әԝ ӧса дьлтәнг бу, ԝәки хԝәрʹа мьрьн дьхԝәст. Йаһоԝа мәләкәки ԛәԝи шанд сәва тʹәсәлийа ԝи бькә. Әԝи мәләки ве йәкеда али Елйас кьр, чьда әԝ һʹәԝщә бу. Әԝи хԝарьнәкә гәрм да Елйас у бь нәрми жерʹа гот ԝәки бьхԝә (1 Пʹадш. 19:5-8). Әԝ сәрһати нишан дькә, ԝәки щара ԛәнщи-кә бьчʹук дькарә гәләк кʹаре бинә. Мәсәлә, хԝарьн, пʹешкʹешәкә бьчʹук йан жи нәʹмә, кʹижанеда гьлийед ширьн у дьлшәԝати ньвисар ьн, дькарә һʹьзкьрьн у хәмкьрьна мә һьндава ԝанда, бьдә кʹьфше. Һәрге мәрʹа чәтьн ә хәбәр дьн дәрһәԛа тьштед ԝани шәхси, йан жи дәрәща ԝан кӧ ешәкә ӧса мәзьн анийә, әм бь кьред бьчʹук дькарьн али ԝан бькьн. Йаһоԝа бь кʹәрәмәт али Елйас кьр, ԝәки һʹәта Чʹийайе Һорәб һәрә, сәва дур бә жь әԝед кӧ дьхԝәстьн ԝи бькӧжьн. Әм чь дәрсе дькарьн жь ве йәке һин бьн? Һәрге әм дьхԝазьн дьлбинийе бьдьнә мәрьвед кӧ рʹасти зорбәтийе һатьнә, пешийе әм гәрәке ӧса бькьн сәва әԝана хԝә рʹьһʹәт тʹәхмин кьн, фьрԛи тʹӧнә мала хԝәда йан Ода Щьватеда. w19.05 16 ¶11; 17 ¶13-14

Бәʹса хәбәре, һун дьхуньн пʹехәмбәртийа жь Зәкәрийа сәре 12, кʹидәре те пʹехәмбәртикьрьне дәрһәԛа мьрьна Мәсиһ (Зәкәр. 12:10). Чахе һун гьһиштьнә рʹеза 12, һун дьхуньн ԝәки «әʹшира мала Натан», демәк малбәта ԝи, бона мьрьна Мәсиһ ԝе гәләк бьгьри у бәрхԝә кʹәвә. Дәԝса кӧ әԝ информасийа бьчʹук пьшт гӧһе хԝәва бавежьн, һун дьсәкьньн у пьрсе дьдьнә хԝә: «Ортʹа мала Натан у Мәсиһда, чь һәвгьредан һәйә?» Ньһа һун леколине дәстпедькьн, чьмки дьхԝазьн ве йәке пебьһʹәсьн. Рʹеза маргинал ԝә дьбә бәрбь 2 Самуйел 5:13, 14, жь кʹидәре һун педьһʹәсьн, ԝәки Натан кӧрʹе Даԝьд Пʹадша бу. Рʹеза маргинала дӧда Луԛа 3:23, 31 йә, кʹижан кӧ әʹйан дькә, ԝәки Натан кал-баве Мәрйәме бу (Бьньһерʹә «Бьрща Ԛәрәԝьлийе», Тʹәбах 2017, рʹупʹела 32, абзаса 4). Һун әʹщебмайи дьминьн! Һун заньн ԝәки ль гора пʹехәмбәртийе, Иса гәрәке жь рʹькʹьнийата Даԝьд бьһата (Мәт. 22:42). Ле кӧрʹед Даԝьд 20 зедәтьр бун. Ньһа ԝәрʹа фәʹмдари йә, кӧ чьрʹа Зәкәрийа хут бәʹса малбәта Натан кьр, ԝәки ԝе шина Иса бькьн, чьмки Иса жь рʹькʹьнйата ԝи бу. w19.05 30 ¶17

Һәрге әм һәр гав леколина дькьн, әме ԛайим баԝәр бьн ԝан рʹастийада, кʹижан кӧ әм жь Кʹьтеба Пироз педьһʹәсьн. Әм дькарьн тʹӧ щар дӧдьли нәбьн, ԝәки принсипед Йаһоԝа тʹьме рʹаст ьн. Ахьрийеда, баԝәрийа мә, ԝе бьбә мина дара бь кʹокед ԛәԝи, демәк «һʹимгьрти» бә (Колс. 2:6, 7). Бир нәкьн, ԝәки тʹӧ кәс дәԝса ԝә нькарә баԝәрийа ԝә ԛәԝи кә. Ләма жи бәрдәԝам кьн һʹьш-аԛьле хԝәда бенә гӧһастьне. Һәр гав дӧа бькьн у жь Йаһоԝа һиви кьн, ԝәки пе рʹӧһʹе хԝәйи пироз али ԝә бькә. Кʹур бьфькьрьн, у һәр гав фькьр у нет-мәрәмед хԝә бьщерʹьбиньн. Һәвалед рʹаст хԝәрʹа ԛазанщ кьн, йед кӧ ԝе али ԝә бькьн һʹьш-аԛьле хԝә бьгӧһезьн. Һәрге һун ӧса бькьн, һуне нәһельн, ԝәки һʹӧкӧме дьнйа Шәйтʹан сәр ԝә һʹӧкӧм кә, у һуне бькарьбьн «шеԝьра у һʹәму бьльндщийед кʹӧбарийейә мьԛабьли занәбуна Хԝәде», һьлшиньн (2 Корн. 10:5). w19.06 13 ¶17-18

Чаԝа кӧ Рʹутʹ кʹеләка Наһомийе бу, әм жи гәрәке али ԝан бькьн, йед кӧ мәрьвед хԝәйи незик ӧнда дькьн (Рʹутʹ 1:16, 17). Паула дьбежә: «Һәма паши мьрьна мере мьн, дәрберʹа гәләка аликʹарийа мәзьн данә мьн. Ԝәʹдә дәрбаз бу, у әԝ мәрьв ида шьхӧле хԝәйә һәррʹожива мьжул дьбун. Ле әʹмьре мьн бь тʹәмами һатә гӧһастьне. Чахе мәрьв фәʹм дькьн, ԝәки кәсе кӧ шине дькә, бь мәһа һʹәԝще бәрдьлийе йә, һәла һе жи бь сала, әԝ йәк аликʹарикә мәзьн ә». Һәмьки, һәр мәрьв щурʹәки йә. Һьнә мәрьв зу һини дәрәща хԝә дьбьн. Ле һьнәкарʹа жи чәтьн ә, чьмки һәр тьшт, чь кӧ ԝана тʹәвайи дькьр, тинә бира ԝан кӧ әԝ кәс ида кʹеләка ԝан нинә. Бәле, һәр мәрьв нә мина һәв шине дькьн. Ле ԝәрә әм бир нәкьн, кӧ Йаһоԝа мәрʹа ԛәдьр у щабдари да, ԝәки али ԝан мәрьва бькьн, йед кӧ жьн йан мере хԝә ӧнда кьрьнә. w19.06 24 ¶16

Фәсал бьн, кӧ һун кʹерʹа чь дьбежьн. Ԝәʹде ԛәдәхәкьрьне, әм гәрәке бьзаньбьн кӧ «ԝәхта һʹьшбуне һәйә» (Ԝаиз 3:7). Информасийа кӧ гәрәке вәшарти бә, әм гәрәке кәсәкирʹа нәбежьн, мәсәлә наве хушк-бьред мә, щийед тʹопбуне, ча әм хьзмәт дькьн, у ча хԝарьна рʹӧһʹани дьстиньн. Әм гәрәке әԝан тьшта сәрԝеред дәԝләтерʹа йан жи полисрʹа нәбежьн; нә жи һәвал, мәрьвед хԝәйи незик йан жи мәрьвед кӧ ԝәлате дьнда ньн. Һәрге әм ве йәкеда фәсал нибьн, әме хушк-бьра бькьнә ԛәзийе. Нәһельн, ԝәки сәва проблемед бьчʹук, тʹьфаԛи ортʹа мәда ӧнда бә. Шәйтʹан занә, ԝәки мала бетʹьфаԛ нькарә ԛәԝи бьминә (Марԛ. 3:24, 25). Ләма әԝ ԝе һәр гав тьштәки бькә, сәва нав мәда йәкти ӧнда бә. Әԝ баԝәр ә, ԝәки әме һәврʹа шәрʹ-дәʹԝа бькьн, нә кӧ мьԛабьли ԝи шәрʹ кьн. Һәла һе Мәсиһийед гьһишти жи гәрәке фәсал бьн, кӧ нәкʹәвьнә ве тʹәльке. Һәрге әм жи һәр тьшти дькьн, сәва проблемед ортʹа мә у хушк-бьрада сафи бьн, әме нәһельн тʹьфаԛийа мә хьраб бә (Колс. 3:13, 14). w19.07 11-12 ¶14-16

Гәләк щар мәрьв мьзгинийа мә рʹьнд ԛәбул дькьн, нә бона ве йәке кӧ мә чь ԝанрʹа готийә, ле ча мә ԝанрʹа готийә. Дьле ԝан те чахе әм дькʹәвьнә һʹәйра ԝан, ԝанрʹа һʹәйф у бь мәʹрифәт ьн. Әм зоре ԝан накьн кӧ гӧһ бьдьнә мә. Дәԝсе әм дьхԝазьн фәʹм кьн һәла ньһерʹандьна ԝан сәр религийа ча нә, ӧса жи әм гәрәке ньһерʹандьн у фькьред ԝан мәрьва һьлдьн һʹәсаб. Мәсәлә, чахе Паԝлос тʹәви Щьһуйа хәбәр дьда, әԝи Ньвисаред Пироз дьда хәбате. Ле чахе тʹәви философед Йунани бәр щьвина Арйопагойе хәбәр дьда, әԝи хәбәрданеда бәʹса Кʹьтеба Пироз нәдькьр (Кʹар. Шанд. 17:2, 3, 22-31). Ле ча әм дькарьн чʹәʹв бьдьнә Паԝлос? Һәрге һун рʹасти ԝи мәрьви бен, кʹижан кӧ Кʹьтеба Пироз ԛәбул накә, ԝе баш бә ԝәʹде хәбәрдане конкрет бәʹса рʹезед жь Кʹьтеба Пироз нәкьн. Һәрге һун тедәрдьхьн, ԝәки мәрьв нахԝазә кәсәк ԝи бьвинә, кӧ әԝ тʹәви ԝә Кʹьтеба Пироз дьхунә, жерʹа рʹеза ӧса нишан кьн, ԝәки нәкʹәвә бәр чʹәʹва, мәсәлә жь һащәта әләктроник нишан кьн. w19.07 21 ¶5-6

Шәйтʹан бь һостәти Исраели бәрбь пʹутпʹарьстийе һелан кьр. Әԝи заньбу, ԝәки ԝанрʹа хԝарьн лазьм ә у әԝ йәк да хәбате. Чахе Исраели кʹәтьнә Әʹрде Создайи, әԝана гәрәке һин буна бь щурʹе тʹәзә әʹрде бещәр кьн. Чахе әԝана Мьсьреда бун, ԝана бона әʹрдед хԝә ав жь чʹәме Нил һьлдьдан. Ле Әʹрде Создайида чʹәм тʹӧнә бу, ләма жи сәва авдане баран у шьли лазьм бу, ԝәки тьштед чанди шин бьн (Ԛан. Дщр. 11:10-15; Иша. 18:4, 5). Исраели гәрәке ида һин буна щурʹәки майин әʹрд у дәштед хԝә бещәр кьрана. Ле чьрʹа Йаһоԝа чахе тʹәви ԝан хәбәр дьда, кӧ ча әʹрде бещәр кьн, гот ԝәки сәре хԝә бәр хӧданед ԛәлп данәйньн? Йаһоԝа заньбу, ԝәки Исраели дьбәкә бьхԝазьн һьнә методед бещәркьрьне жь мьләтед пʹутпарьст һин бьн у кӧ Кәнанийед кӧ хԝәйе әʹрд бун, хӧдане ԛәлп Баәʹл дьһʹәбандьн, у тьштед ԛәлп баԝәр дькьрьн (Жьмар 25:3, 5; Һʹакьм. 2:13; 1 Пʹадш. 18:18). w19.06 3 ¶4-6

Чахе Паԝлосе шанди, Силас, Луԛа у Тимотʹейо, һатьнә колонийа Рʹоме, ль шәһәре Филипйайе, ԝана гәләк мәрьв дитьн, кӧ гӧһ данә мьзгинийа Пʹадшатийе. Бь аликʹарийа әԝан чар бьред хирәт, щьвата тʹәзә саз бу, у һʹәму хушк-бьред тʹәзә дәстпекьрьн тʹәвайи тʹоп бьн, дьԛәԝьмә мала Лидйайеда, йа кӧ хушкәкә гәләк меванһʹьз бу (Кʹар. Шанд. 16:40). Ле зутьрәке әԝ щьвата тʹәзә кʹәтә чәтьнайе. Шәйтʹан дьжмьнед рʹастийе һелан кьрьн, ԝәки пәй ԝан Мәсиһийед амьн кʹәвьн у шьхӧле бәлакьрьна мьзгинийе бьдьнә сәкьнандьне. Паԝлос у Силас гьртьн, данә бәр шьва, у кьрьнә кәле. Паше чахе әԝана аза кьрьн, әԝана чун тʹәсәлийа ԝан хушк-бьред тʹәзә кьрьн у әԝана шьдандьн. Паше Паԝлос, Силас, у Тимотʹейо жь ԝи шәһәри дәркʹәтьн, ле ча те кʹьфше Луԛа ԝедәре ма. Ле әԝ щьвата тʹәзә ча бу? Әԝан хушк-бьред тʹәзә пе аликʹарийа рʹӧһʹе Йаһоԝа, бь хирәт бәрдәԝам кьрьн Йаһоԝарʹа хьзмәт кьн (Фили. 2:12). Рʹасти жи мәʹнийа Паԝлос һәбу, кӧ ԝанрʹа фьрнаԛ бә! w19.08 8 ¶1-2

Дьбәкә һун дәрбази щики тʹәзә бунә. Чахе мәри дәрбази щики дьн дьбә, һеса дькарә бькʹәвә бьн дәйна. Ләма жи нәкʹәвьнә һʹәйра ԝан тьшта, кʹижан ԝәрʹа зәʹф нәлазьм ьн, сәва кредит һьлнәдьн у нәкʹәвьнә бьн дәйна (Мәтʹлк. 22:3). Чахе әм стреседа ньн, мәсәлә чахе мьԛати мәрьве хԝәйи нәхԝәш дьбьн, дьбәкә чәтьн ә нәкʹәвьнә дәйна. Ԝан дәрәщада, биньн бира хԝә, ԝәки дӧа-дьрозгә дькарьн али ԝә бькьн сафикьрьнед аԛьлайи бькьн. Сәр щаба дӧайед ԝә, Йаһоԝа дькарә әʹдьлайе бьдә ԝә, кʹижан кӧ «ԝе дьл у фькьред ԝә . . . хԝәй кә», у али ԝә бькә кӧ дьлрʹьһʹәтийе ӧнда нәкьн (Фили. 4:6, 7; 1 Пәт. 5:7). Һәвалед баш хԝәрʹа бьвиньн. Дьле хԝә вәкьн у хәмед хԝә һәвалед хԝәрʹа гьли кьн, илаһи ԝанрʹа, йед кӧ мина ԝә рʹасти чәтьнайа һатьнә у хьзмәтийеда гәләк шабун дитьнә. Әԝ йәк ԝе али ԝә бькә гәләк бәрхԝә нәкʹәвьн у дьлбинийе бьстиньн (Ԝаиз 4:9, 10). Һәвалед кӧ ԝә хԝәрʹа ԛазанщ кьрийә, диса жи ԝе һәвалед ԝә бьминьн. w19.08 22 ¶9-10

Чьрʹа Йаһоԝа шәрʹе хьлазийейә мәзьн тәвгьредьдә тʹәви Мәгидо? Мәгидо у Нәԝала Йизрәәле, кӧ незики ԝи шәһәри бу, щийед гәләк шәрʹа бун. Щар-щара ԝан шәрʹада Йаһоԝа али щьмәʹта хԝә дькьр кӧ сәркʹәвьн. Мәсәлә, пе «авед Мәгиддо» Хԝәде али Барак һʹакьм кьр, ԝәки ордийа Кәнанийа тʹәви сәроке ԝан, демәк Сисәра, алт кә. Барак у Дәбора пʹехәмбәр, шькьри данә Йаһоԝа, чьмки әԝи бь кʹәрәмәт али ԝан кьр, кӧ ԝи шәрʹида сәркʹәвьн. Кʹьламеда ԝана ӧса дьгот, «стәйркед жь әʹзмана» мьԛабьли Сисәра шәрʹ кьрьн. Ԝана дьстьра у дьгот: «Йа Хӧдан, бьра һʹәму нәйаред тә бь ви аԝайи тʹӧнә бьбьн; ле бәле йед кӧ тә һʹьз дькьн, бьра бьбьн мина рʹожа кӧ һеза тәда дәрдькʹәвә!» (Һʹакьм. 5:19-21, 31) Ԝәʹде Һармәгәдоне жи, дьжмьнед Хԝәде ԝе ԛьрʹ бьн, ле йед кӧ Хԝәде һʹьз дькьн ԝе хьлаз бьн. Ле нава ԝан дӧ шәрʹада фьрԛи һәйә. Һармәгәдонеда щьмәʹта Хԝәде ԝе шәрʹ нәкә, у һәла һе чʹәкед ԝан жи ԝе тʹӧнә бьн! Ԛәԝата ԝан ԝе әԝ бә, кӧ әԝана рʹьһʹәт бьминьн у бьдьнә кʹьфше кӧ итʹбарийа хԝә Йаһоԝа у ордийа ԝийә әʹзмани тиньн (Иша. 30:15; Әʹйан. 19:11-15). w19.09 9 ¶4-5

Гавәк кӧ әм ча дькарьн бенә щәм Иса әԝ ә, кӧ һе зедә дәрһәԛа ԝи пебьһʹәсьн, демәк әԝи чь дьгот у чь дькьр (Луԛа 1:1-4). Тʹӧ кәс дәԝса мә нькарә ве йәке бькә, ләма әм гәрәке хԝәха леколина бькьн. Әм ӧса жи тенә бал Иса, чахе сафи дькьн кӧ бенә ньхӧмандьне у дьбьнә шагьртед ԝи. Әм ӧса жи тенә щәм Иса чахе дьчьн бал рʹуспийа, гава мәрʹа аликʹари лазьм ә. Иса «пʹешкʹеш бь щурʹе мәрьва, ДТʹ» дьдә хәбате, сәва мьԛати пәзед ԝи бьн (Әфәс. 4:7, 8, 11; Йуһʹн. 21:16; 1 Пәт. 5:1-3). Ле әм хԝәха гәрәке незики рʹуспийа бьн, сәва аликʹарийе жь ԝана бьхԝазьн. Фәʹмдари йә, рʹуспи нькарьн фькьред мә бьхуньн у бьзаньбьн әм һʹәԝще чь нә. Дина хԝә бьдьне, бьраки бь наве Щулиан чь дьбежә: «Мьн аликʹари хԝәст, у ԝана тʹәсәлийа мьн кьр. Әԝ тʹәсәлийа ԝан пʹешкʹешәкә лапә ԛимәт бу бона мьн». Рʹуспийед амьн дькарьн али мә бькьн, ԝәки әм «нет-фькьра Мәсиһ» бьзаньбьн, демәк фәʹм кьн у чʹәʹв бьдьнә фькьр у ньһерʹандьна ԝи (1 Корн. 2:16; 1 Пәт. 2:21). Әԝ рʹасти жи алийе ԝанда пʹешкʹешәкә гәләк ԛимәт ә бона мә. w19.09 21 ¶4-5

Кʹьтеба Пирозда әм дьхуньн дәрһәԛа ԝан жьн у меред амьн, рʹебәрийа кʹижана рʹӧһʹе пироз дькьр, ле йәкә нав 144 000-да нибун. Мәсәлә, Йуһʹәннайе Ньхӧмдар (Мәт. 11:11). Диса мәсәләк әԝ һәйә Даԝьд (Кʹар. Шанд. 2:34). Әԝана у диса йед майин, ԝе жь мьрьне рʹабьн, сәва щьнәтеда сәр әʹрде бьжин. Әԝана гьшк тʹәви әʹлаләта мәзьн, ԝе бькарьбьн амьнийа хԝә һьндава Йаһоԝа у сәрԝертийа ԝи бьдьнә кʹьфше. Тʹӧ щар нава тʹәрихийа инсанәтеда Хԝәде ӧса бь милйона мәрьв жь һʹәму мьләта нәкьрийә йәктийе. Фьрԛи тʹӧнә һевийа мә жийина сәр әʹрде йә йан сәр әʹзмана, әм гәрәке чьԛас дәсте мә те али мәрьва бькьн, сәва әԝана бьбьн пʹара әʹлаләта мәзьн. Зутьрәке, Йаһоԝа ԝе тәнгасийа мәзьн бинә сәр әʹрде, дәрһәԛа кʹижани пешда һатьбу пʹехәмбәртикьрьне. Әԝ тәнгасийа мәзьн ԝе һʹәму сәрԝертийед мәрьва у религийа, йед кӧ кӧл-дәрд мәрьварʹа анинә, бьдә һьлдане. Әԝ ԛәдьрәки чьԛас мәзьн ә, ԝәки һʹәмуйед кӧ дькʹәвьнә нава әʹлаләта мәзьн, ԝе һʹәта-һʹәтайе сәр әʹрде Йаһоԝарʹа хьзмәт кьн! (Әʹйан. 7:14) w19.09 31 ¶18-19

Ахьрийа дьнйа Шәйтʹан гәләк незик ә, у әм һивийе нә кӧ амьнийа мә һьндава Хԝәде у Пʹадшатийа ԝи, ԝе һе зедә бе щерʹьбандьне. Диса жи дьбәкә ԝе ԛәрфа мә бькьн у мә бькʹәньн. Әԝ илаһи һьнге дькарә бьԛәԝьмә чахе әм тʹәвнәбуйине хԝәй дькьн. Әм гәрәке ида ньһада амьнийа хԝә ԛәԝи кьн, сәва кӧ ԝәʹде тәнгасийа мәзьн амьн бьминьн. Ԝәʹде тәнгасийа мәзьн, гӧһастьн ԝе һәбьн дәрһәԛа бьред кӧ сәр әʹрде рʹебәрийе дьдьнә мә. Ԝәʹдәки һʹәму Мәсиһийед бьжарти йед кӧ һе сәр әʹрде нә, ԝе сәр әʹзмана бенә щьвандьне сәва шәрʹе Һармәгәдонеда шәрʹ бькьн (Мәт. 24:31; Әʹйан. 2:26, 27). Әԝ те һʹәсабе кӧ Кʹома Рʹебәрийе ида ԝе тʹәви мә сәр әʹрде нибә. Ле йәкә әʹлаләта мәзьн ԝе диса жи организә бә. Бьред щерʹьбанди ԝе рʹебәрийа бьдьнә мә. Әме һьнге амьнийа хԝә Йаһоԝарʹа нишан кьн бь ве йәке, кӧ пьштгьрийа ԝан бьра бькьн у пәй рʹебәрийа ԝан һәрʹьн, йа кӧ әԝана ԝе жь Хԝәде бьстиньн. Хьлазбуна мә ве йәкева ԝе гьредайи бә! w19.10 17 ¶13-14

Наһоми жьнәкә амьн бу, йа кӧ Йаһоԝа һʹьз дькьр. Ле паши мьрьна мере хԝә у дӧ кӧрʹед хԝә, әԝе дьхԝәст наве хԝә бьгӧһаста у хԝә нав кьра «Мара», чь кӧ те һʹәсабе «Дәрд у Кӧл» (Рʹутʹ 1:3, 5, 20, 21). Бука Наһомийе әԝ нәһишт у ԝәʹде тәнгасийа тʹәви ԝе ма. Рʹутʹ нә тʹәне пе кьред хԝә али Наһомийе дькьр, ле әԝе ӧса жи тʹәви ԝе ширьн у бь дьлшәԝати хәбәр дьда. Рʹутʹ пе гьлийед жь дьле хԝәйи сах, Наһомирʹа нишан дькьр кӧ ле һʹьз дькә, у кʹеләка ԝе йә. Чахе кәсәк щьватеда мер йан жьна хԝә ӧнда дькә, ԝи кәсирʹа аликʹари у пьштгьри лазьм ә. Әм дькарьн жьн-мер бәрамбәри дӧ баха бькьн, йед кӧ кʹеләка һәвдӧ мәзьн дьбьн. Нава салада, кʹокед ԝан дӧ баха һәвва дьальн. Чахе бахәк кʹокева те дәрхьстьне у дьмьрә, баха дьн зийанәкә мәзьн дьстинә. Мина ве йәке, чахе кәсәк жьн йан мере хԝә ӧнда дькә, әԝ гәләк ԝәхт дькарә емосийалида еша гьран бькʹьшинә. w19.06 23 ¶12-13

Әм гәрәке фәсал бьн нә тʹәне ве йәкеда, кӧ чь щурʹә ԝәʹдәдәрбазкьрьн бьжберьн, ле ӧса жи чьԛас ԝәʹдә әм сәр хәрщ кьн. Һәрге әм дина хԝә нәдьн ве йәке, әм дькарьн ԝәʹде хԝә һе зедә сәр ԝәʹдәдәрбазкьрьна хәрщ кьн, нә кӧ сәр хьзмәтийа Йаһоԝарʹа. Пешийе әм гәрәке пебьһʹәсьн, кӧ әм сәр ве йәке чьԛас ԝәʹдә хәрщ дькьн. Ԝе баш бә ԝәки һун бьньвисьн, кӧ сәр ԝәʹдәдәрбазкьрьне һун һәр һʹәфти чьԛас ԝәʹдә хәрщ дькьн. Салнәмеда бьньвисьн, кӧ һун чьԛас ԝәʹдә хәрщ дькьн сәр телевисйоне, Интернете, у сәр листька тʹеледа. Һәрге ԝә тʹәхмин кьр, кӧ һун гәләк ԝәʹдә хәрщ дькьн сәр ԝан тьшта, хԝәрʹа сафи кьн, кӧ сәр чь, чьԛас ԝәʹдә хәрщ кьн. Пешийе ԝәʹдә башԛә кьн, сәва тьштед фәрз бькьн, паше бона ԝәʹдәдәрбазкьрьне ԝәʹдә башԛә кьн. Паше, жь Йаһоԝа аликʹарийе бьхԝазьн сәва али ԝә бькә, һун ӧса бькьн чаԝа ԝә сафи кьрийә. Ԝи щурʹәйи бал ԝә ԝе һе зедә ԝәʹдә у ԛәԝат бьминә сәр леколинкьрьна Кʹьтеба Пироз, ԛӧльхкьрьна тʹәви малбәте, щьвате у сәр хьзмәтийа Йаһоԝарʹа. Ԝи щурʹәйи һуне жь һесабуна хԝә һе ләзәте бьстиньн, чьмки һун шьхӧле Йаһоԝа датиньн щийе пешьн. w19.10 30 ¶14, 16; 31 ¶17

Незики сала 55 Д.М., Мәсиһийед Корьнтʹида сафикьрьна фәрз кьрьн. Әԝана пеһʹәсийан, ԝәки хушк-бьред ԝани рʹӧһʹани Оршәлимеда у Щьһустанеда тәʹли-тәнгасийада ньн, у хԝәрʹа нет данин, ԝәки аликʹарийе бьдьнә ԝан (1 Корн. 16:1; 2 Корн. 8:6). Ле чәнд мәһ шунда Паԝлосе шанди пеһʹәсийа, ԝәки ԝана чь кӧ сафи кьрьбун нәанинә сери. Ахьрийа ве йәке ԝе әԝ буйа, кӧ ԛӧрбанкьрьна ԝан ԝе һазьр нибуйа һьнге, гава гәрәке бьвьрана Оршәлиме тʹәви ԛӧрбанкьрьнед щьватед майин (2 Корн. 9:4, 5). Корьнтʹийа сафикьрьна баш кьрьн, у Паԝлос бона баԝәрийа ԝанә ԛәԝи у мәрʹданийа кӧ ԝана дьхԝәст бьда кʹьфше, пʹайе ԝан да. Ле әԝи ӧса жи дьл да ԝан, ԝәки ԝана чь жи дәстпекьр биньн сери (2 Корн. 8:7, 10, 11). Әԝ дәрәща ԝан мә һин дькә, ԝәки һәла һе Мәсиһийед амьнрʹа жи щара нәһеса йә сафикьрьнед баш һʹәта хьлазийе биньн сери. Чьрʹа? Чьмки жь бо гӧнәкʹарийа мә нав мәда әԝ хәйсәт һәйә, кӧ тьшта дәрәнги хьн. Йан жи щара тьштед ӧса дьԛәԝьмьн, кӧ әм һивийе нибун, у жь бо ве йәке найе стандьне сафикьрьна хԝә биньн сери (Ԝаиз 9:11). w19.11 26-27 ¶3-5

Чаԝа кӧ мәртʹал бәдәне хԝәй дькә, баԝәрийа тә жи жь тьштед хьраб тә хԝәй дькә, мәсәлә жь бенамусийе, зорбәтийе у жь һʹәму тьштед кӧ ль гора принсипед Хԝәде ниньн. Ча Мәсиһи әм шәрʹе рʹӧһʹанида ньн у мьԛабьли рʹӧһʹед хьраб шәрʹ дькьн (Әфәс. 6:10-12). Ле һун ча дькарьн тедәрхьн, ԝәки баԝәрийа ԝә ӧса ԛәԝи йә, кӧ ԝәʹде щерʹьбандьна ԝе сьст нәбә? Йа пешьн, бона аликʹарийе Хԝәдерʹа дӧа бькьн. Паше һун гәрәке пе хәбәра Хԝәде хԝә бьщерʹьбиньн у фәʹм кьн кӧ Хԝәде ча сәр ԝә дьньһерʹә (Ибрн. 4:12). Кʹьтеба Пироз дьбежә: «Бь тʹәмамийа дьле хԝә баԝәрийа хԝә Йаһоԝа бинә, у итʹбарийа хԝә һʹьше хԝә нәйнә» (Мәтʹлк. 3:5, 6, ДТʹ). Бәʹса хәбәре, биньн бира хԝә ԝан пашԝәхтийада ԝә чь сафикьрьн кьрийә. Дьԛәԝьмә проблема ԝә һәбуйә алийе пʹәрада. Ле гәло һьнге һун фькьрин сәр созе Йаһоԝа жь Ибрани 13:5, кʹидәре те готьне: «Әзе тʹӧ щар жь тә нәчьм у тʹӧ щар тә бәрʹнадьм»? Әԝи сози баԝәрийа ԝә ԛәԝи кьрийә ве йәкеда, кӧ Йаһоԝа ԝе али ԝә бькә? Һәрге әре, әԝ йәк дьдә кʹьфше, ԝәки һун мәртʹала хԝәйә баԝәрийе рʹьнд хԝәй дькьн. w19.11 14 ¶1, 4

Ча де ӧса жи бав, гәрәке епʹещә ԝәʹдә у ԛәԝате хәрщ кьн бона зарʹа хԝә. Ләма жи һәрге чәнд зарʹед жьн-мер һәнә кӧ салийед хԝәда гәләк жь һәв мәстьр ниньн, ԝанрʹа дькарә чәтьн бә, ԝәки башԛә дина хԝә бьдьнә һәр зарʹәке. Һьнә жьн-мер кӧ чәнд зарʹед ԝанә бьчʹук һәнә, дьбежьн ԝәки әԝана гәләк дьԝәстьн. Де дькарә һьн физикида һьн жи емосийалида сьст бә. Әԝ дькарә ӧса ԝәстийайи бә, кӧ ԛәԝата ԝе жи тʹӧнә бә сәва леколинкьрьне, дӧа у хьзмәтийе. Ӧса жи жерʹа дьбәкә нәһеса бә гӧһ бьдә бәрнама щьвате у кʹаре бьстинә. Һәмьки мере баш ԝе һәр тьшти бькә, сәва али жьна хԝә бькә кӧ ча щьватеда ӧса жи малда, мьԛати зарʹа бә. Мәсәлә, әԝ дькарә шьхӧле малда али жьна хԝә бькә. Ӧса жи әԝ ԝе алийе хԝәда һәр тьшти бькә, сәва һʹәму нәфәред ԝи һәр гав Ԛӧльхкьрьна тʹәви Малбәте дәрбаз кьн. У бав кӧ Мәсиһи нә, ԝе тʹәви нәфәред хԝә һәр гав дәркʹәвьн хьзмәтийе. w19.12 24 ¶8

Исраелийа жь сала Йубиле чь кʹар дьстандьн? Мәсәлә, бьдьн бәр чʹәʹве хԝә, ԝәки Исраелик бьн дәйнада бу, у әʹрде хԝә фьротьбу, сәва дәйне хԝә бьдә. Сала Йубиледа, әԝ әʹрд пашда жерʹа вәдьгәрʹийа. Ләма жи әԝи дькарьбу «вәгәрʹә һәрә ль сәр мьлкʹе хԝә», у мьлкʹе зарʹед ԝи ӧнда нәдьбу. Дәрәщәкә дьнда, Исраели сәва дәйне хԝә бьда, дьбәкә гәрәке зарʹа хԝә йан һәла һе хԝә жи бьфьрота дилтийе. Ле ԝәʹде сала Йубиле, хӧлам гәрәке вәгәрʹийа «нава малбәта хԝә» (Ԛан. Кʹаһ. 25:10). Ләма жи тʹӧ кәс нәдьбу хӧламе ӧса, кӧ тʹӧ щар азайи нәстанда. Хенщи ве йәке Йаһоԝа гот: «Ль нава тәда кʹәсиб гәрә тʹӧнәбә, чьмки Хӧдан ԝе әʹсә дӧа ль тә бькә ль сәр ԝи әʹрди, кӧ Хӧдан Хԝәдейе тә чаԝа мьлкʹ дьдә тә кӧ ԛазьнщ ки» (Ԛан. Дщр. 15:4). Ле дьнйа иройинда мәрьвед дәԝләти һе дәԝләти дьбьн, ле мәрьвед кʹәсиб һе кʹәсиб дьбьн! Рʹасти жи фьрԛикә чьԛас мәзьн ә! w19.12 8-9 ¶3-4

Чахе Иса рʹасти щерʹьбандьна һат, әԝи «гәләки кʹәсәр у бь һесьра» дӧа дькьр (Ибрн. 5:7). Әԝ дӧа-дьрозгед ԝи жь дьле ԝийи амьн дьһатьн у нишан дькьрьн кӧ әԝи дьхԝәст һе зедә гӧрʹа Баве хԝәда бә. Бона Йаһоԝа дӧайед Иса мина бьхура бинхԝәш бун. Иса тʹәмамийа әʹмьре хԝәда дьле Баве хԝә ша дькьр у избат кьр, кӧ сәрԝертийа Баве ԝи йа лапә баш ә. Әм дькарьн чʹәʹв бьдьнә Иса, кӧ һәр гав гӧрʹа Йаһоԝа бькьн у жерʹа амьн бьминьн. Чахе әм рʹасти щерʹьбандьна тен, әм дӧа-дьрозга дькьн сәва Йаһоԝа али мә бькә, чьмки әм нахԝазьн дьле ԝи бешиньн. Әм заньн ԝәки һәрге әм ԝан тьшта бькьн чь кӧ бәр чʹәʹве Йаһоԝа рʹәш ьн, әԝ ԝе дӧайед мә ԛәбул нәкә. Ле һәрге әм ль гора ԛанун у принсипед ԝи дьжин, әм дькарьн дӧдьли нәбьн, ԝәки дӧайед мәйи жь дьл, ԝе бона Йаһоԝа мина бьхура бинхԝәш бьн. У әм ӧса жи дькарьн баԝәр бьн, ԝәки гава әм бь амьни гӧрʹа ԝи дькьн у беԛьсуртийа хԝә хԝәй дькьн, әԝ йәк дьле Баве мәйи әʹзмана гәләк ша дькә. w19.11 21-22 ¶7-8

Сала 1919, Иса кʹомәкә бьчʹук йед бьред бь рʹӧһʹе пироз бьжарти ча «хӧламе амьн у сәрԝахт» кʹьфш кьр. Әԝ хӧлам рʹебәрийа шьхӧле бәлакьрьна мьзгинийе дькә, у «ԝәхтда хԝарьне» дьдә шагьртед Иса. Бей аликʹарийа Йаһоԝа хӧламе амьн у сәрԝахт ԝе нькарьбуйа әԝ шьхӧл бькьра, чьмки Шәйтʹан у дьнйа ԝи һәр тьшти дькьн, сәва ԝи шьхӧлида рʹе ԝи бьгьрьн. Дӧ шәрʹед һʹәмдьнйайе, зерандьн, кризиса һʹәмдьнйайейә економики, у нәһәԛи, хӧламе амьн у сәрԝахт нәданә сәкьнандьне кӧ ԝәʹдәда хԝарьна рʹӧһʹани бьдә шагьртед Мәсиһ. Бьфькьрьн кӧ чьԛас гәләк щурʹә әʹдәбйәт сәр 900 зьмана зедәтьр әм беһәԛ дьстиньн! Әԝ йәк әшкәрә дьдә кʹьфше, кӧ дәсте Хԝәде сәр ԝан ә. Дина хԝә бьдьне кӧ Йаһоԝа ча әшкәрә кʹәрәм дькә шьхӧле бәлакьрьна мьзгинийе: Мьзгини рʹасти жи «ль нав тʹәмамийа дьнйайе» те бәлакьрьне (Мәт. 24:14). w19.11 24 ¶15-16

Һәр сал Рʹожа Кʹәԝандьне сәрәккʹаһин гәрәке бьхур бьшәԝьтанда пешийа кӧ ԛӧрбан бьанийа. Чахе әԝи ӧса дькьр, ида әԝ баԝәр дьбу, ԝәки Хԝәде ԝе ԛӧрбанед кӧ әԝ ԝе бинә, ԛәбул кә. Чахе Иса сәр әʹрде бу, пешийа кӧ әʹмьре хԝә бьда ча ԛӧрбан, әԝи гәрәке тьштәки фәрз бькьра, чь кӧ жь хьлазбуна инсанәте фәрзтьр бу. Ле әԝ чь бу? Әԝ гәрәке амьн у беԛьсур бьжита сәр әʹрде, сәва Йаһоԝа ԛӧрбана ԝи ԛәбул кә. Иса гәрәке избат кьра, кӧ жийина рʹаст әԝ ә, кӧ бьжи ӧса ча Йаһоԝа һин дькә. Әԝи гәрәке избат кьра, кӧ һʹӧкӧмәтийа Баве ԝи рʹаст ә у щурʹе сәрԝертийа ԝи һәԛ ә. Нава тʹәмамийа жийина хԝәйә сәр әʹрде, Иса бь тʹәмами гӧрʹа принсипед Йаһоԝайи рʹаст дькьр. Иса дьхԝәст избат кә, ԝәки тʹӧ щерʹьбандьн у тәнгаси, һәла һе щәфе бәр мьрьне жи, нькарьбун рʹе ԝи бьгьртана (Фили. 2:8). w19.11 21 ¶6-7

Ԝәʹде тʹәмамийа хьзмәтийа Иса, шандийед ԝийи амьн избат кьрьн, кӧ бь рʹасти һәвалед ԝи нә. (Мәтʹлк. 18:24). Иса әԝ һәвалед хԝә гәләк ԛимәт дькьр. Ԝәʹде хьзмәтийа ԝи, жь бьред ԝи ԛә йәки жи ԝи баԝәр нәдькьр (Йуһʹн. 7:3-5). Ԝәʹдәки мәрьвед ԝийи незик һәла һе жи дьготьн, ԝәки әԝи һʹьше хԝә ӧнда кьрийә (Марԛ. 3:21). Ле Иса дәрһәԛа шандийед хԝәйи амьн, шәва пешийа мьрьна хԝә, гьлийед жь рʹеза иройин гот. Рʹаст ә щара шагьртед Иса дьле ԝи дешандьн, ле әԝи дина хԝә нәдьда шашийед ԝан, дәԝсе әԝи нав ԝанда баԝәри һьндава хԝәда дьдит (Мәт. 26:40; Марԛ. 10:13, 14; Йуһʹн. 6:66-69). Иса пешийа мьрьна хԝә шәва пашьн, готә шандийед хԝәйи амьн: «Мьн һун дост һʹәсаб кьрьн, чьмки һәр тьштед кӧ мьн жь Баве хԝә бьһистьн ԝәва данә әʹйанкьрьне» (Йуһʹн. 15:15). Бешьк, һәвалед Иса гәләк дьл дьданә ԝи. w19.04 11 ¶11-12

Ча Мәсиһи тедәрдьхә, ԝәки әԝ бона жийина сәр әʹзмана һатийә газикьрьне? Гьлийед Паԝлосе шанди щаба ве пьрсе әʹйан дькьн, кʹижан кӧ әԝи готә йед «пирозбунерʹа газикьри» кӧ Рʹомеда бун. Әԝи хенщи гьлийед рʹеза иройин, ӧса жи готә ԝан: «Ԝә рʹӧһʹәки ӧса нәстандийә, кӧ ԝә диса бькә хӧлам бьтьрсьн, ле ԝә әԝ рʹӧһʹ стандийә, йе кӧ ԝә дькә зарʹед Хԝәде, бь кʹижани гази ԝи дькьн: ‹Абба!› аԝа готи ‹Баво!›» (Рʹом. 1:7; 8:15) Демәк, Хԝәде пе рʹӧһʹе хԝәйи пироз йед бьжартирʹа зәлал әʹйан дькә, ԝәки әԝана бона жийина сәр әʹзмана газикьри нә (1 Тʹеслн. 2:12). Йаһоԝа ԛә шьке наһелә һʹьш у дьле ԝан Мәсиһийада, йед кӧ бона жийина сәр әʹзмана һатьнә газикьрьне (1 Йуһʹн. 2:20, 27). Мәсиһийед бьжарти һʹәԝщә ниньн, ԝәки кәсәк ԝанрʹа избат кә, кӧ әԝана бьжарти нә. w20.01 22 ¶7-8

Ԛануна Мәсиһ сәр һʹимәки лапи ԛәԝи һатийә сазкьрьне, әԝ һәйә һʹьзкьрьн (Галт. 6:2). Һʹәму тьшт чь кӧ Иса дькьр жь һʹьзкьрьне бу. Дьлшәԝати жь һʹьзкьрьне те. Дьле Иса дьшәԝьти бона мәрьва у гӧне ԝи ԝана дьһат, ләма әԝи мәрьв һин дькьрьн, йед нәхԝәш ԛәнщ дькьр, йед бьрʹчи тʹер дькьр, у йед мьри рʹадькьр (Мәт. 14:14; 15:32-38; Марԛ. 6:34; Луԛа 7:11-15). Иса бь рʹәзәдьли һʹәԝщед мәрьва жь һʹәԝщед хԝә бьльндтьр дьгьрт. Ле һʹьзкьрьна хԝәйә лапә мәзьн әԝи избат кьр бь ве йәке, кӧ әʹмьре хԝә да бона мәрьва. Әм гәрәке чʹәʹв бьдьнә Иса кӧ бькʹәвьнә һʹәйра мәрьва, нә кӧ һʹәйра хԝә, демәк пешийе һʹәԝщед ԝан һьлдьн һʹәсаб. Ӧса жи әм гәрәке дьлшәԝат бьн һьндава ԝанда, кʹерʹа мьзгинийе гьли дькьн. Чахе дьлшәԝати мә һелан дькә, кӧ мьзгинийе бәла кьн у мәрьва һин кьн, бь ве йәке әм гӧрʹа ԛануна Мәсиһ дькьн. w19.05 4 ¶8-10

Иса али щьмәʹте кьр кӧ аза бьн жь һинкьрьнед сәрԝеред религийа, кӧ баре гьран бун. Гәләк Щьһу хӧламед әʹйд-ԛәйд у баԝәрийед ԛәлп бун (Мәт. 5:31-37; 15:1-11). У әԝед кӧ йанчь алийе рʹӧһʹанида али щьмәʹте дькьрьн, ча бежи кор бун, чьмки хԝәха рʹаст Хԝәдерʹа хьзмәт нәдькьрьн. Ԝана Мәсиһ у һинкьрьна рʹӧһʹани кӧ әԝи дьда, инкʹар кьрьн, ләма тәʹрийеда у нава гӧнада ман (Йуһʹн. 9:1, 14-16, 35-41). Иса ӧса жи тьштед рʹаст һин дькьр у мәсәла баш бу, у бь ԝе йәке әԝи мәрьвед мьлукрʹа әʹйан кьр, кӧ чаԝа әԝана дькарьн жь һинкьрьнед ԛәлп аза бьн (Марԛ. 1:22; 2:23–3:5). Азайа дӧда, кӧ Иса ани, әԝ һәбу азайа инсанәте жь хӧламтийа гӧнә. Бь сайа ԛӧрбана Иса, Хԝәде дькарьбу гӧне ԝан бьбахшанда, йед кӧ пе кьред хԝә баԝәри дьданә кʹьфше һьндава ве кʹьрʹине (Ибрн. 10:12-18). w19.12 10 ¶8; 11 ¶10-11

Йаһоԝа пе рʹӧһʹе хԝәйи пироз, һʹәму Мәсиһийед бьжартирʹа зәлал әшкәрә дькә, ԝәки Әԝи әԝана бьжартьнә. Бь ԝи щурʹәйи, рʹӧһʹе пироз ча «бьһе йә [нишан йан соз ә]» кӧ Хԝәде дьдә ԝан, сәва ԝана бьдә баԝәркьрьне кӧ ахьрийеда әԝана ԝе һʹәта-һʹәтайе сәр әʹзмана бьжин, нә кӧ сәр әʹрде (2 Корн. 1:21, 22). Һәрге Мәсиһи пе рʹӧһʹе пироз һатийә кʹьфшкьрьне, гәло әԝ те һʹәсабе кӧ ԝе әʹсә хәлата хԝәйә әʹзмани бьстинә? На. Рʹаст ә әԝ дӧдьли нинә, кӧ әԝ  һатийә бьжартьне бона жийина сәр әʹзмана, ле әԝ гәрәке бир нәкә әве тʹәмийе: «Бона ве йәке хушк-бьрано, һе бькьн кӧ ԝе гази у жьбарәбуна хԝә тʹәстиԛ кьн. Һун кӧ ве йәке бькьн, тʹӧ щар накʹәвьн» (2 Пәт. 1:10). Демәк, һәрге Мәсиһи газикьри йә бона жийина сәр әʹзмана, әԝ ԝе хәлата хԝә тʹәне һьнге бьстинә, һәрге һʹәта мьрьне амьн бьминә (Фили. 3:12-14; Ибрн. 3:1; Әʹйан. 2:10). w20.01 21-22 ¶5-6

Мәʹник, кӧ чьрʹа әԝ се һәвалед Ибойә ԛәлп һьндава ԝида дьлшәԝат нибун әԝ бу, кӧ ԝана нәхԝәст бь тʹәмами һʹале ԝи фәʹм кьн. Ләма жи ньһерʹандьна ԝан нәрʹаст бу у ԝана гәләк сәрт Ибо сущдар дькьрьн. Ле әм чь дькарьн бькьн, ԝәки шашийед ӧса нәкьн? Бир нәкьн, ԝәки тʹәне Йаһоԝа һур бь һур занә дәрһәԛа дәрәща мәрьва. Рʹьнд гӧһ бьдьнә ԝи кәси, йе кӧ кӧла дьле хԝә ԝәрʹа гьли дькә, у нә тʹәне гӧһ бьдьнә гьлийед ԝи, ле ӧса жи еша ԝи фәʹм кьн. Тʹәне һьнге һуне бькарьбьн бь дьле хԝәйи сах бәр дьле ԝида бен. Һәрге әм дьлшәԝат ьн, әме гәвәстийе нәкьн дәрһәԛа проблемед хушк-бьра. Мәрьве гәвәзә щьвате нә кӧ ава дькә, ле һьлдьшинә (Мәтʹлк. 20:19; Рʹом. 14:19). Әԝ дькарә дәрде мәрьва һе гьран кьн (Әфәс. 4:31, 32). Ле чьԛас баш ә чахе әм һе зедә дина хԝә дьдьнә һʹӧнӧред мәрьвайә баш у дьфькьрьн, кӧ чаԝа әм дькарьн али ԝан бькьн тәнгасийеда сәбьр кьн! w19.06 21-22 ¶8-9