Гӧлан

Де-бав чь дькарьн бькьн, сәва али зарʹед хԝә бькьн кӧ Йаһоԝа һʹьз бькьн? Мина Маноаһ бона аликʹарийе Йаһоԝарʹа дӧа бькьн. Ӧса жи пе кьред хԝә ԝана һин кьн у ԝанрʹа бьбьнә мәсәлә. Рʹаст ә чь һун дьбежьнә зарʹед хԝә әв фәрз ә, ле дьһа зәʹф ԝе кьред ԝә сәр зарʹед ԝә һʹӧкӧм бьн. Усьв у Мәрйәм мәсәла баш бун бона зарʹед хԝә, демәк ӧса жи бона Иса. Усьв хәбата гьран дькьр, сәва әʹбура нәфәред хԝә бькә, ле әԝи ӧса жи ԝана һин дькьр, кӧ тьштед рʹӧһʹани ԛимәт кьн (Ԛан. Дщр. 4:9, 10). Әԝи «һәр сал» нәфәред хԝә дьбьрә Оршәлиме, сәва Щәжьна Дәрбазбуне дәрбаз кьн (Луԛа 2:41, 42). Һьнге һьнә бав дькарьбун бьфькьрийана, ԝәки әԝ рʹеԝити бона малбәта ԝан ԝе баргьрани бә, гәләк ԝәхт бькʹьшинә у бьһа бә. Ле Усьв ӧса нәдьфькьри, әԝи тьштед рʹӧһʹани ԛимәт дькьр, у зарʹед хԝә һин дькьр, ԝәки әԝана жи ԛимәт кьн. Мәрйәме жи Ньвисаред Пироз рʹьнд заньбу, у бешьк әԝе һьн пе гьлийа һьн жи пе кьред хԝә, зарʹед хԝә һин дькьр, ԝәки Хәбәра Хԝәде һʹьз бькьн. w19.12 24-25 ¶9-12

Әм һʹьзкьрьна Йаһоԝа әшкәрә дьвиньн ве йәкеда, кӧ әԝи чь кьр гава щара пешьн малбәта ԝида йа сәр әʹрде проблем пешда һат.  Чахе Адәм гӧрʹа Баве хԝәйи әʹзмана нәкьр, әԝи ида малбәта Йаһоԝада щийе хԝә ӧнда кьр, нә әԝ, нә жи зӧрʹәтед ԝи ида пʹара ве малбәте нибун (Рʹом. 5:12). Ле Йаһоԝа бона хатьре зӧрʹәта Адәм, тьштәки мәхсус кьр. Рʹаст ә Йаһоԝа Адәм щәза кьр, ле әԝи зӧрʹәтед Адәм кӧ һе нәһатьбун дьне, бе һеви нәһишт. Әԝи дәрберʹа соз да, ԝәки мәрьвед гӧһдар ԝе вәгәрʹьн нав малбәта ԝи (Дәстп. 3:15; Рʹом. 8:20, 21). Йаһоԝа ԝе әԝи сози бинә сери сәр һʹиме ԛӧрбана Иса, Кӧрʹе хԝәйи дәлал. Йаһоԝа Кӧрʹе хԝә бона мә бәрва да, у пе ве йәке избат кьр, ԝәки әԝ ча ԛайим мә һʹьз дькә (Йуһʹн. 3:16). Әԝ Бавәки лапи баш ә! Әԝ дӧайед мә дьбьһе у мә хԝәй дькә, һьн материалида һьн жи рʹӧһʹанида. Әԝ мә ширәт дькә у али мә дькә. Әԝ ӧса жи ахьрийеда ԝе кʹәрәмед пʹьр баш сәр мәда бьбаринә. Дьле мә гәрм дьбә чахе әм заньн, ԝәки Баве мә Йаһоԝа, мә һʹьз дькә у бона мә хәм дькә! w20.02 6 ¶16-17; 7 ¶20

Дьбәкә тӧ бона тьштәки гәләк хәмгин буйи. Дьԛәԝьмә кәсәки пе гьлийа йан жи пе кьред хԝә дьле тә ешанд, йан жи дьбәкә тӧ хәмгин дьби жь бо гьли йан кьре хԝә. Мәсәлә, тә шаши кьрийә у гәләк бәрхԝә дькʹәви кӧ Йаһоԝа ԝе тʹӧ щар нәбахшинә тә. У һьн жи тӧ дьбәкә дьшьрмиш дьби, ԝәки баԝәрийа тә сьст ә, ләма тӧ ӧса зәʹф бәрхԝә дькʹәви, у хԝә һʹәсаб дьки мәрьвәкә нәбаш. Дина хԝә бьдьнә чәнд сәрһатийед жь Кʹьтеба Пироз. Һанна дийа Самуйел пʹехәмбәр, жьнәкә бь баԝәрийа ԛәԝи бу, ле әԝ гәләк хәмгин дьбу, чьмки нәфәрәкә жь мала ԝе һьндава ԝеда хьраб бу (1 Сам. 1:7). Баԝәрийа Паԝлосе шанди жи ԛайим бу, ле әԝ гәләк бәрхԝә дькʹәт «хәмед һʹәму щьвина» сәр ԝи тʹоп дьбун (2 Корн. 11:28). Даԝьд Пʹадша жи мәрьвәки бь баԝәрийа ԛәԝи бу, у Йаһоԝа ԝи гәләк һʹьз дькьр (Кʹар. Шанд. 13:22). Ле йәкә Даԝьд шашийед мәзьн кьр у жь бо ве йәке гәләк дьнәʹлийа (Зәб. 38:4). Йаһоԝа ԝан һәр кәсирʹа бәрдьли да у дьле ԝан рʹьһʹәт кьр. w20.02 20 ¶1-2

Һун гәрәке дӧада Йаһоԝарʹа бежьн, ԝәки һун хԝә тʹәсмили ԝи дькьн у дьхԝазьн һʹәта-һʹәтайе жерʹа хьзмәт кьн. Чахе һун хԝә тʹәсмили Хԝәде дькьн, һун хԝә «инкʹар» дькьн. Һьнгеда һун дьбьнә пʹара Йаһоԝа у әԝ йәк бона ԝә рʹасти жи ԛәдьрәки гәләк мәзьн ә (Рʹом. 14:8). Һун Йаһоԝарʹа дьбежьн, ԝәки һуне ида жийина хԝәда хьзмәтийе дайньн щийе пешьн, нә кӧ хԝәстьнед хԝә. Әԝ тʹәсмилкьрьна ԝә сонд ә, йан жи соз ә, кӧ һун дьдьнә Хԝәде. Йаһоԝа тӧ щар зоре мә накә ԝәки әви сонди бьхԝьн. Ле чахе әм әви сози дьдьн, әԝ дьхԝазә ԝәки әм хԝәйе созе хԝә бьн (Зәб. 116:12, 14). Тʹәсмилкьрьн әԝ һәйә созе шәхси, кӧ һун дьдьнә Йаһоԝа. Ле ньхӧмандьн әԝ ә, кӧ һун бәр мәрьва ве йәке избат дькьн, мәсәлә сәр щьвата мәзьн. Демәк, чахе һун тенә ньхӧмандьне, һун әшкәрә дьдьнә кʹьфше, ԝәки ԝә ида хԝә тʹәсмили Йаһоԝа кьрийә. Ләма жи ньхӧмандьна ԝә мәрьварʹа әʹйан дькә, ԝәки һун Хԝәдайе хԝә Йаһоԝа бь тʹәмамийа дьле хԝә, щанийа хԝә, һʹьше хԝә у ԛәԝата хԝә һʹьз дькьн, у ԝә сафи кьрийә һʹәта-һʹәтайе жерʹа хьзмәт кьн (Марԛ. 12:30). w20.03 9 ¶4-5

Шәйтʹан ӧса дькә, ԝәки мәрьв Йаһоԝа бир кьн. Паши мьрьна шандийед Иса, һьнәкед кӧ хԝә Мәсиһи һʹәсаб дькьрьн, дәстпекьрьн һинкьрьнед ԛәлп бәла кьн (Кʹар. Шанд. 20:29, 30). Әԝ мәрьвед рʹабәр, һеди-һеди ӧса кьрьн, ԝәки Хԝәдейе рʹаст бе биркьрьне. Мәсәлә, ԝана ида наве Хԝәде Кʹьтеба Пирозда нәдьданә хәбате у дәԝса наве ԝи, сәрнав дьньвисин, бәʹса хәбәре «Хӧдан». Жь бо ве йәке кӧ ԝана наве Хԝәде данә һьлдане у дәԝса наве ԝи ньвисин «Хӧдан», хԝәндәванед Кʹьтеба Пирозрʹа чәтьн бу Йаһоԝа башԛә кьн жь «хӧданен» майин, дәрһәԛа кʹижана Кʹьтеба Пирозда те гьликьрьне (1 Корн. 8:5). Ԝана әԝ термин, демәк «Хӧдан», һьн сәр Йаһоԝа һьн жи сәр Иса дьготьн, чь кӧ мәрьварʹа чәтьн дькьр фьрԛийа ортʹа Йаһоԝа у Исада бьвиньн (Йуһʹн. 17:3). Әԝе хальфандьне, һинкьрьна дәрһәԛа Сейәканә пешда ани, чь кӧ Хәбәра Хԝәде һин накә. Ахьрийа ве йәке әԝ ә, кӧ гәләк мәрьв баԝәр дькьн, ԝәки әԝана нькарьн Хԝәде нас кьн. Ле әԝ дәрәԝәкә мәзьн ә! (Кʹар. Шанд. 17:27) w19.06 5 ¶11

Щурʹәк кӧ ча хьзмәтийа хԝә биньн сери әԝ ә, кӧ хьзмәтийеда һе щерʹьбанди бьн (Мәтʹлк. 1:5; 1 Тимтʹ. 4:13, 15). Йаһоԝа изьн дайә мә, ԝәки әм бьбьнә һәвалхәбаткʹаред ԝи. Бәле, әԝ ԛәдьрәки гәләк мәзьн ә! (1 Корн. 3:9). Һәрге һун «кʹижан һәрә ԛәнщ ә, . . . ԝе бьбьжерьн» у һʹьш-аԛьле хԝә дайньн сәр хьзмәтийа хԝә, һуне «бь шабуне Хӧдан бьһʹәбиньн» (Фили. 1:10; Зәб. 100:2). Һун гәрәке дӧдьли нәбьн, ԝәки Хԝәде ԝе ԛәԝате бьдә ԝә, кӧ һун хьзмәтийа хԝә биньн сери, чь чәтьнайи йан синоред ԝә жи һәбьн (2 Корн. 4:1, 7; 6:4). Фьрԛи тʹӧнә дәрәща ԝә дьһелә һун зәʹфи хьзмәт кьн йан һьндьки, йәкә мәʹнийа ԝә һәйә ша бьн, һәрге дьле ԝә сәр хьзмәтийе йә (Галт. 6:4). Чахе һун хьзмәтийа хԝә дьԛәдиньн, һун һʹьзкьрьна хԝә һьндава Йаһоԝа у мәрьва дьдьнә кʹьфше. Кʹьтеба Пироз дьбежә: «Бь ви тьһәри те хԝә жи хьлаз ки у ԝан жи, кʹижанед гӧһдарийа тә дькьн» (1 Тимтʹ. 4:16). w19.04 6 ¶15; 7 ¶17

Тьштәки бәлабуйи бь чь жи Шәйтʹан у щьнед ԝи мәрьва дьхальфиньн, әԝ һәйә сербази. Әԝед кӧ сербазийе дькьн, дьбежьн кӧ әԝана жь жорʹ ԛәԝате дьстиньн, у заньн йан жи контрол дькьн ԝан тьшта, йед кӧ мәрьвед майин нькарьн бьзаньбьн у контрол кьн. Ле әԝ йәк жь Хԝәде нинә. Мәсәлә, һьнәк жь ԝан дьбежьн, ԝәки пе кʹочʹәктийе йан жи стәйрнасийе дькарьн ахьрийе бежьн. Һьнәк жи йанчь гази мьрийа дькьн у тʹәви ԝан хәбәр дьдьн. Һьнәкә майин жи пе сербазийе сәр мәрьва щәʹду у бәнька дькьн. Ль гора һʹәсаба, кӧ 18 ԝәлатед Амәрикайа Латинида у Карибеда һатьнә кьрьне, әʹйан бу ԝәки ԝан щийада жь се мәрьва йәк, сербазийе у кʹочʹәктийе баԝәр дькьн, у ԝәкә һаԛас мәри жи баԝәр дькьн, ԝәки дькарьн тʹәви кәсед рʹӧһʹ хәбәр дьн. Дь 18 ԝәлатед Африкайеда жи, ль гора һʹәсаба, жь дӧ мәрьва мәрьвәк, һәла һе зедә жи, сербазийе баԝәр дькьн. w19.04 20-21 ¶3-4

Һәр щурʹә хьраби, бәр чʹәʹве Хԝәде рʹәш ә! (Зәб. 5:4-6) Бьдьнә һʹәсабе хԝә, илаһи зорбәтийа сексуали һьндава зарʹа, бәр чʹәʹве Ԝи чьԛас һʹәрам ә у тьштәки ча бехԝәдети йә! Әм чаԝа Шәʹдед Йаһоԝа, чʹәʹв дьдьнә Ԝи у нәфрʹәт дькьн зорбәтийа сексуали һьндава зарʹа у нава щьвата Мәсиһитида тӧ щар чʹәʹве хԝә сәр ве йәке данадьн (Рʹом. 12:9). Һәр щурʹә зорбәтийа һьндава зарʹа бь тʹәмами мьԛабьли «ԛануна Мәсиһ» йә! (Галт. 6:2) Һʹәму тьшт чь кӧ Иса һьн пе гьлийа һьн жи пе шьхӧлед хԝә һин дькьр, сәр һʹиме һʹьзкьрьн у һәԛийе бу. Мәсиһийед рʹаст ль гора ве ԛануне дьжин, у һьндава зарʹа ӧса ньн, ԝәки зарʹ тʹәхмин кьн кӧ ԝана дьбьнә хԝәйи у ԝана һʹьз дькьн. Ле зорбәтийа һьндава зарʹа әԝ һәйә тьштәки хԝәһʹьзийева гьредайи, нәрʹасти у хьраби, жь бо чь жи зарʹ хԝә ӧса тʹәхмин дькә, кӧ кәс ле набә хԝәйи у һʹьз накә. Йазьх, Мәсиһийед рʹаст жи рʹасти ве хьрабийе һатьнә. Чьрʹа? Чьмки «мәрьвед хьрабә хԝәйифел» тʹьжә нә, у һьнәк дькарьн бькʹәвьнә нава щьвате жи (2 Тимтʹ. 3:13). Хенщи ве йәке, һьнә мәрьвед дӧрʹу, йед кӧ хԝә дьдьнә кʹьфше ԝәки әԝана пʹара щьвате нә, кʹәтьнә бьн байе хԝәстьна бәдәнейә мьрʹдар, у зарʹ хьраб кьрьнә. w19.05 8 ¶1-3

Әԝед кӧ депресийеда ньн, дьбәкә хԝә нәһежа тʹәхмин дькьн, кӧ Йаһоԝарʹа дӧа кьн. Һәрге әм дьхԝазьн бәр дьле ԝан мәрьвада бен, ԝе баш бә ԝанрʹа бежьн кӧ әм дьхԝазьн тʹәви ԝан бона ԝан дӧа бькьн. Чахе һун дӧа дькьн наве ԝан һьлдьн. Дӧада әм дькарьн Йаһоԝарʹа бежьн, ԝәки әԝ мәрьвед дәлал у дьлшкәсти, чьԛас ԛимәт ьн бона мә у щьвате. Әм ӧса жи дькарьн жь Йаһоԝа һиви кьн, ԝәки дьлбинийе у бәрдьлийе бьдә хьзмәткʹаред хԝәйи һʹьзкьри. Дӧайе ԝи щурʹәйи дькарә гәләк али ԝан мәрьва бькә. Пешийа кӧ тьштәки бежьн, пешда рʹьнд бьфькьрьн. Гьлийед ширьн дькарьн дьле бьриндар дәрман кьн (Мәтʹлк. 12:18). Ләма жь Йаһоԝа һиви кьн, ԝәки али ԝә бькә, кӧ һун гьлийед ширьн, дьлгәрм у нәрм бежьн. Бир нәкьн ԝәки тӧ гьлийе мә һаԛас ԛәԝат нинә, чьԛас гьлийе Хԝәде жь Хәбәра ԝи (Ибрн. 4:12). Чахе әм бәр дьле ԝан мәрьвада тен, әм али ԝан дькьн, ԝәки әԝана бир нәкьн, кӧ Йаһоԝа ԝана һʹьз дькә. У әм ӧса жи гәрәке тʹӧ щар бир нәкьн, кӧ Йаһоԝа Хԝәдейе һәԛийе йә. Тӧ зорбәти у тʹӧ хьраби ве вәшарти нәминә. Йаһоԝа һәр тьшти дьвинә, у әԝ ԝе тӧ щар бе щәза нәһелә ԝан мәрьвед зорбә, йед кӧ тʹобә накьн (Жьмар 14:18). w19.05 18 ¶18; 19 ¶19, 21

Шәйтʹан дьхԝазә, ԝәки әм пьшта хԝә бьдьнә Йаһоԝа. Әԝ сәва бьгьһижә нета хԝә, һәр тьшти дькә, ԝәки һʹьше мә бькә дилтийе, кӧ әм мина ԝи бьфькьрьн. Әԝ дьхԝазә мә бьхальфинә, ԝәки әм пәй хԝәстьнед хԝә кʹәвьн, у ӧса пәй ԝи һәрʹьн (Колс. 2:4). Ле гәло бь рʹасти әм бьн ве хофеда ньн кӧ Шәйтʹан дькарә мә бьхальфинә? Бәле, хоф һәйә. Биньн бира хԝә, ԝәки Паԝлос нә кӧ мәрьвед нәбаԝәррʹа гьлийед жь Колоси 2:8 ньвиси, ле ԝан Мәсиһийарʹа, йед кӧ бь рʹӧһʹе пироз кʹьфшкьри бун (Колс. 1:2, 5). Бәле, әԝ Мәсиһийед һьнге бьн хофеда бун, ле әм иро бьн хофәкә дьһа мәзьнда ньн (1 Корн. 10:12). Чьрʹа? Чьмки Шәйтʹан һатә авитьне сәр әʹрде, у әԝ һʹәму тьшти дькә сәва хьзмәткʹаред Хԝәдейи амьн бькә тʹәльке (Әʹйан. 12:9, 12, 17). Хенщи ве йәке, мәрьвед хьраб у дӧрʹу «хьрабийеда» пешда дьчьн, чьмки әм рʹожед ахьрийеда дьжин (2 Тимтʹ. 3:1, 13). w19.06 2 ¶1-2

Елйас тьрсийа, чахе Жьн-пʹадша Изабел, гот кӧ ԝе ԝи бькӧжә. Ләма әԝ рʹәвийа Бәәр-шәбайе. Әԝ ӧса дьлтәнг бу, ԝәки «бона щане хԝә мьрьне дьхԝәст». Ле чьрʹа әԝи хԝә ӧса тʹәхмин дькьр? Елйас мәрьвәки гӧнәкʹар бу, «хут мәрьвәки мина мә бу» (Аԛуб 5:17). Әԝ стресәкә мәзьнда бу у ԛьдум кʹәтьбу, дьԛәԝьмә әԝи тʹьре чʹарә тʹӧнә. Ча те кʹьфше Елйас дьфькьри, ԝәки һʹәму щәфе ԝи, кӧ әԝи бона һʹәбандьна рʹаст дькьр, пʹучʹ бу, у кӧ Исраеледа ԝе һʹал баш нәбә, у әԝи тʹьре тʹәне әԝ майә жь ԝан, йед кӧ Йаһоԝарʹа хьзмәт дькьрьн (1 Пʹадш. 18:3, 4, 13; 19:10, 14). Йаһоԝа һале ԝи рʹьнд фәʹм дькьр у бона ве йәке Елйас сущдар нәкьр, дәԝсе али ԝи кьр, ԝәки диса ԛәԝате бьстинә (1 Пʹадш. 19:5-7). Һьнә ԝәʹдә шунда, Йаһоԝа бь нәрми ньһерʹандьна Елйас рʹаст кьр, гава ԛәԝата Хԝәйә зор нишани ԝи кьр. Йаһоԝа ӧса жи дина ԝи да сәр ве йәке, кӧ Исраеледа диса 7 000 мәрьв һәбун, йед кӧ сәре хԝә бәр Баәʹл нәдатанин (1 Пʹадш. 19:11-18). Ԝи щурʹәйи, Йаһоԝа Елйасрʹа да кʹьфше, ԝәки Ԝи һʹьз дькә. w19.06 15-16 ¶5-6

Хԝәсәри хԝә нибьн, ле һәр гав пәй рʹебәрийе һәрʹьн. Һәрге әм тʹьме пәй рʹебәрийед бьред щабдар дьчьн, әме хԝә жь проблема хԝәй кьн. Мәсәлә, ԝәлатәкида кʹидәре шьхӧле мә ԛәдәхәкьри йә, бьред щабдар готьн, кӧ мьзгинван ԝәʹде хьзмәтийе әʹдәбйәтед нәшьркьри бәла нәкьн. Ле бьраки пешәнг ве мьһаледа, фькьри кӧ дьһа баш занә чь бькә, у әʹдәбйәт бәла кьр. Ахьрийа ве йәке чь бу? Щарәке чахе әԝи у һьнәкед майин нәформал хьзмәт дькьрьн, полис әԝана гьртьн у пе пьрса дьщерʹьбандьн. Ча те кʹьфше, полис пәй ԝан дьчун у әԝана сәр ве йәке гьртьн, кӧ әʹдәбйәта бәла дькьн. Әм жь ве ԛәԝьмандьне чь һин дьбьн? Әм гәрәке һәр гав пәй рʹебәрийа һәрʹьн, һәла һе һьнге жи, һәрге әм дьфькьрьн кӧ әм дьһа рʹьнд заньн. Йаһоԝа ԝе тʹьме мә кʹәрәм кә, һәрге әм пьштгьрийа ԝан бьра бькьн, йед кӧ әԝи кʹьфш кьрийә сәва рʹебәрийе бьдьнә мә (Ибрн. 13:7, 17). w19.07 12 ¶17

Иса шәва пешийа мьрьна хԝә гот, ԝәки һʹәмуйед кӧ бьбьнә шагьртед ԝи, ԝе бәр чʹәʹве ве дьнйайе рʹәш бьн (Йуһʹн. 17:14). Һʹәта иро жи, мәрьвед кӧ мьԛабьли һʹәбандьна рʹаст ьн, пәй Мәсиһийед амьн дькʹәвьн, йед кӧ Шәʹдед Йаһоԝа нә. Ахьрийа ве дьнйайе ида гәләк незик ә, у ләма әм заньн, ԝәки дьжмьнед мә ԝе һе зедә пәй мә кәвьн (Мәт. 24:9). Ле әм ча дькарьн хԝә пешда һазьр кьн бона зерандьне? Әм гәрәке һʹьше хԝәда нәзьвьрʹиньн у нәдьн бәр чʹәʹве хԝә, кӧ дьбәкә чь дькарә бе сәре мә. Чьрʹа? Чьмки ԝе тьрс мә бьгьрә у әме бәрхԝә кәвьн. Ӧса әм дькарьн һе пешийа щерʹьбандьна сьст бьн у бькʹәвьнә бьн тьрсе (Мәтʹлк. 12:25; 17:22). Тьрс, әԝ һәйә чʹәке ԛәԝи, кʹижан кӧ «Мирещьне нәйаре» мә, мьԛабьли мә дьдә хәбате (1 Пәт. 5:8, 9). Ләма жи гәләк фәрз ә ԝәки әм ида ньһада һәләԛәтийа хԝә тʹәви Йаһоԝа ԛәԝи кьн. w19.07 2 ¶1-3

Иса паши сахбуна хԝә, готьбу шандийед хԝә кӧ сәр чʹийе тʹоп бьн. Шанди бешьк бь шабунәкә мәзьн һивийе бун кӧ ԝи бьвиньн (Мәт. 28:16). Дьԛәԝьмә һьнге Иса «щарәкерʹа пенсьд хушк-бьрайи зедәтьрва хӧйа бу» (1 Корн. 15:6). Чьрʹа Иса готә шагьртед хԝә, ԝәки тʹәвайи тʹоп бьн? Әԝи тʹәмикә ну да ԝан: «Ләма һәрʹьн у һʹәму мьләта бькьн шагьртед мьн, ИМ» (Мәт. 28:18-20). Шагьртед Иса йед кӧ гьлийед ԝи бьһистьн, бун пʹара щьвата пешьнә Мәсиһити йа ԛьрʹна йәке. Нета сәрәкә йа ве щьвате әԝ бу, кӧ һе зедә мәрьва бькьнә шагьртед Иса. Иро нав тʹәмамийа тʹопа дьнйайе бь дәһа һʹәзара щьват һәнә, у нета ԝан щьвата диса жи әԝ ә. w19.07 14 ¶1-2

Бәрпьрсийарәки мьһале жь Норԝәже дьбежә, ԝәки мәрьвед кӧ нахԝазьн дәрһәԛа Хԝәде хәбәр дьн, гәләк щар дьхԝазьн дәрһәԛа һале дьнйайе хәбәр дьн. Чахе әԝ мәрьва сьлав дькә, паше дьбежә: «Һун ча дьфькьрьн, ахьрийа мә ԝе чаԝа бә? Гәло ахьрийа мәйә баш политикава, зандарава йан жи кәсәки дьнва гьредайи йә?» Паше чахе әԝ щаба мәрьва дьбьһе, рʹезәкә жь Кʹьтеба Пироз, кʹижан кӧ дәрһәԛа ахьрийа баш ә, дьхунә йан жи бь әзбәри дьбежә. Һьнә мәрьварʹа һʹәԝас ә һе зедә пебьһʹәсьн дәрһәԛа созе жь Кʹьтеба Пироз, кʹидәре те готьне, ԝәки әʹрд ԝе һʹәта-һʹәтайе бьминә у мәрьвед ԛәнщ ԝе сәр һʹәта-һʹәтайе бьжин (Зәб. 37:29). Ԝе баш бә әм щурʹә-щурʹә метода бьдьнә хәбате тʹәви щурʹә-щурʹә мәрьва. Ле чьрʹа? Чьмки чь кӧ йәкерʹа һʹәԝас бә, дькарә йе майинрʹа һʹәԝас нибә. Һьнәка хԝәш те дәрһәԛа Хԝәде у Кʹьтеба Пироз хәбәр дьн, ле һьнәкарʹа жи һʹәԝас ә дәрһәԛа тьштед майин хәбәр дьн. Чь жи һәбә, әм гәрәке һәр мәщале бьдьнә хәбате, сәва тʹәви һʹәму щурʹә мәрьва хәбәр дьн (Рʹом. 1:14-16). Йаһоԝа рʹастийе дьле ԝан мәрьвада мәзьн дькә, йед кӧ рʹастийе һʹьз дькьн (1 Корн. 3:6, 7). w19.07 22-23 ¶10-11

Һәрге әм Хԝәде ԛайим һʹьз дькьн, әме хушк-бьред хԝә жи һʹьз бькьн (1 Йуһʹн. 4:20, 21). Әм дьбәкә дьфькьрьн, ԝәки һеса йә хушк-бьред хԝә һʹьз бькьн, чьмки әм гьшк жи Йаһоԝа дьһʹәбиньн у дьхԝазьн чʹәʹв бьдьнә хәйсәт-һʹӧнӧред ԝи. Әм гьшк ӧса жи чʹәʹв дьдьнә Иса, һʹьзкьрьна кʹижани ӧса мәзьн бу, кӧ әԝи әʹмьре хԝә да бона мә. Ле йәкә щара мәрʹа дькарә чәтьн бә һәвдӧ һʹьз бькьн. Әйодийа у Сьнтиха хушкед гәләк хирәт бун, йед кӧ тʹәви Паԝлос хьзмәтийеда «худан рʹетьнә». Ле дьԛәԝьмә жь бо һәвнәфәʹмкьрьне, әԝ дӧ хушк ида тʹәви һәв һәвалти нәдькьр. Чахе Паԝлос щьвата ԝанрʹа нәʹма ньвиси, наве ԝан дӧ хушка һьлда у ширәт кьр, ԝәки «йәкбуйи бьра ль һәв бен» (Фили. 4:2, 3). Паԝлос һʹәсаб кьр, ԝәки ве нәʹмеда лазьм ә ӧса жи ширәте бьдә тʹәмамийа щьвате. Нәʹмеда әԝи гот: «Һәр тьшти бе бинтәнги у бе шәрʹ у дәʹԝ бькьн» (Фили. 2:14). w19.08 9 ¶6-7

Гәләк щьват у ӧса жи хушк-бьред башԛә, аликʹарийе дьдьнә хьзмәткʹаред һәртʹьм, сәва әԝана бькарьбьн хьзмәтийа хԝә бәрдәԝам кьн. Мәсәлә, әԝана дьл дьдьнә ԝана кӧ бәрдәԝам кьн шьхӧле хԝә бькьн, алийе пʹәрада йан жи тьштед материалида али ԝан дькьн, йан кʹомәке дьдьн нәфәред ԝан, кʹижан кӧ дури ԝан ньн. Һәрге щьвата ԝәда хьзмәткʹарәки һәртʹьм кʹьфш кьрьнә, нәфькьрьн ԝәки кʹьфшкьрьна ԝи һатә гӧһастьне, чьмки шьхӧле хԝә нәбаш дькьр, йан жи тьштәки хьраб кьрийә. Дәԝсе, али ԝи бькьн, ԝәки зу һини гӧһастьна бә. Бь дьл у щан ԝи ԛәбул кьн у пʹайе ԝи бьдьн бона шьхӧле кӧ әԝ дькә, һәрге жи әԝ жь бо сьһʹәт-ԛәԝата хԝә нькарә гәләк тьшт бькә. Тʹәви ԝи бьбьнә нас. Һуне бькарьбьн жь хушк-бьред ӧса гәләк тьшт һин бьн, чьмки ԝана һинкьрьн у занәбун стандьнә, у щерʹьбанди нә. Пешийе, әԝед кӧ кʹьфшкьрьна хԝәйә тʹәзә дьстиньн лазьм ә али ԝан бькьн, мәсәлә ԝанрʹа мал бьвиньн, дәрһәԛа транспорте ԝанрʹа бежьн, ча хәбате бьвиньн, у диса тьштед майин. w19.08 23-24 ¶12-13

Гог ԝе итʹбарийа хԝә дәсте хԝәйи «гошт» бинә, демәк ордийа хԝәйә мәзьн (2 Дир. 32:8). Ле әме итʹбарийа хԝә Йаһоԝа Хԝәде биньн, чь кӧ ԝе бәр чʹәʹве мьләта беһʹьши бә. Чьрʹа? Чьмки хӧданед Бабилона Мәзьнә бәре, кӧ ԛәԝат бу, әԝана хьлаз нәкьрьн жь «щәʹнәԝьр» у «дәһә стьруйед» ԝи! (Әʹйан. 17:16). Ләма жи Гог ԝе бьфькьрә, кӧ ԝе һеса ԛьрʹа мә бинә. Әԝ ԝе «мина әʹԝьрәки» кӧ әʹрде дадьдә, пәй щьмәʹта Йаһоԝа кʹәвә. Ле Гог ԝе зутьрәке бьвинә, ԝәки әԝ кʹәтийә тʹәльке у нькарә хьлаз бә. Мина Фьрәԝьн бәр Бәʹра Сор, Гог ԝе пебьһʹәсә, ԝәки әԝ мьԛабьли Йаһоԝа шәрʹ дькә (Дәркʹ. 14:1-4; Һәзԛл. 38:3, 4, 18, 21-23). Мәсиһ у ордийед ԝийи әʹзмана, ԝе щьмәʹта Хԝәде хьлаз кьн, ле Гог ордийед ԝива ԝе ԛьрʹ кьн (Әʹйан. 19:11, 14, 15). Ле чь ԝе бьԛәԝьмә тʹәви дьжмьне Йаһоԝайи сәрәкә, Шәйтʹан, йе кӧ пе пропаганда ԛәлп сәрԝеред дьнйайе хапандьн, сәва әԝана шәрʹе Һармәгәдонеда мьԛабьли щьмәʹта Хԝәде дәркʹәвьн? Иса ԝи у щьнед ԝи, ԝе бавежә «гәлийе һәй-ԝайе», кʹидәре кӧ әԝана ԝе һʹәзар сали гьрти бьн (Әʹйан. 20:1-3). w19.09 11-12 ¶14-15

Тʹәбийәти йә кӧ әм дьхԝазьн, ԝәки кʹәрәмед кӧ Йаһоԝа соз дайә, зу бенә сери. Ле чахе әм һивийа тьштәки нә у әԝ йәк дәрәнги дькʹәвә, әм дькарьн хирәта хԝә ӧнда кьн у һәла һе жи дьлшкәсти бьн (Мәтʹлк. 13:12). Әԝ йәк ԛәԝьми тʹәви бьред кӧ дьжитьн дәстпека ԛьрʹна 20. Һьнге гәләк Мәсиһийед бь рʹӧһʹе пироз бьжарти һивийе бун, ԝәки сала 1914, хәлата хԝәйә әʹзмани бьстиньн. Чахе әԝ йәк нәԛәԝьми, ча әԝ Мәсиһийед амьн хԝә данә кʹьфше? Әԝана рʹийа жийинеда бәрдәԝам дькьрьн бьрʹәвьн, чьмки һʹьш-аԛьле ԝан сәр ве йәке бу, кӧ ԛьрара Хԝәде биньн сери, нә кӧ хәлата хԝә бьстиньн. Ԝана дьле хԝәда сафи кьрьбу, кӧ ләщмәйданеда сьст нәбьн у һʹәта хьлазийе бьрʹәвьн. Бешьк, әм һивийе нә кӧ наве Йаһоԝа бе пирозкьрьне, у бе избаткьрьне ԝәки сәрԝертийа ԝи йа һәрә баш ә, ӧса жи ԝәки һʹәму созед ԝи бенә сери. Дӧдьли нәбьн, ԝәки әԝ һʹәму тьшт ԝе бьԛәԝьмьн ԝи ԝәʹдәйи, кʹижан кӧ Йаһоԝа ида кʹьфш кьрийә. Ле һʹәта һьнге, әм гәрәке шьхӧле Хԝәдеда хирәт бьн, у тӧ щар нәһельн, ԝәки әм дьлтәнг бьн йан жи сьст бьн бона ве йәке, кӧ әм һивийа чь бунә нәһатийә сери. w19.08 4-5 ¶9-10

Пьрса бьдьнә хԝә: «Мәрьв мьн ӧса нас дькьн ча кәсе нәрм у мьлук? Әз бона мәрьва бь дьл у щан шьхӧлед ньмьз дькьм? Әз мәрьварʹа һʹәйф ьм?» Иса йәки бь әʹдьл бу у тʹәви ԝи һʹәԝас бу шьхӧлкʹарийе бькьн, у әԝи һʹьз дькьр шагьртед хԝә һин кә (Луԛа 10:1, 19-21). Әԝи дьл дьда шагьртед хԝә, ԝәки пьрса бьдьнә ԝи, у хԝәха жи пьрс дьда ԝан, чьмки дьхԝәст фькьред ԝан пебьһʹәсә (Мәт. 16:13-16). Чаԝа кӧлирьк бахче башда шин дьбьн у жь сӧрʹ-сәрме хԝәйкьри нә, ӧса жи шагьртед Иса тʹәви ԝи гәш дьбун. Ԝана дина хԝә дьдане, кӧ Иса ча һин дькә у ԝана хԝәха жи бәред баш дьанин, демәк кьред баш дькьрьн. Һәрге һʹӧкӧме ԝә һәйә, пьрсед ӧса бьдьнә хԝә: «Малда йан жи хәбатеда мәрьв тʹәви мьн хԝә рʹьнд тʹәхмин дькьн? Әз әʹдьлайе хԝәй дькьм? Әз хԝә ӧса дьгьрьм кӧ мәрьв һеса бькарьбьн пьрса бьдьнә мьн? Әз бь дьл у щан фькьред ԝан дьбьһем?». Әм тʹӧ щар нахԝазьн бьбьнә мина Ферьсийа, йед кӧ һерс дькʹәтьн чахе мәрьв ԝанда дӧдьли дьбун, у берʹәʹм бун һьндава ԝанда, йед кӧ мина ԝан нәдьфькьрин (Марԛ. 3:1-6; Йуһʹн. 9:29-34). w19.09 20 ¶1; 23 ¶9-11

Сәрԝеред дьнйайе щара әԝе готьне дьдьнә хәбате, чахе хәбәр дьдьн дәрһәԛа ԝе йәке, кӧ һәләԛәтийа ортʹа мьләта баш кьн. Ле йәкә әԝ  әʹламкьрьн кӧ «дьне сәԛьри у бехофи йә», кӧ Кʹьтеба Пирозда те готьне,  ԝе щӧдә бә. Чьрʹа? Чахе әԝ йәк ԝе бьԛәԝьмә, мәрьв ԝе бьфькьрьн кӧ сәрԝеред дьнйайе бехофи у әʹдьлайи анинә дьне. Ле бь рʹасти, «хәзәбе ньшкева» бе у «тәнгасикә . . . мәзьн» ԝе дәстпебә (Мәт. 24:21). Әм ньзаньн чь ԝе сәрԝера һелан кә, ԝәки әԝе йәке әʹлам кьн, йан ԝе чь щурʹәйи әԝ әʹламәти бе әʹламкьрьне. У әм ӧса жи ньзаньн кӧ әԝ йәк ԝе тʹәне щарәке бь щурʹе мәхсус бе әʹламкьрьне, йан чәнд щара. Чь жи бьԛәԝьмә, әм ве йәке заньн: Әм гәрәке нәйенә хапандьне у баԝәр нәкьн, ԝәки сәрԝеред дьнйайе дькарьн әʹдьлайе биньн сәр әʹрде. Ле әԝ ча бежи нишан ә, кӧ «рʹожа Хӧдан» ва ԝе дәстпебә! (1 Тʹеслн. 5:2) w19.10 8-9 ¶3-4

Шәрʹе Һармәгәдон ԝе бьбә хьлазийа ве дьнйайе. Ле йәкә әм гәрәке нәтьрсьн. Чьрʹа? Чьмки әԝ йәк ԝе шәрʹе Хԝәде бә (Мәтʹлк. 1:33; Һәзԛл. 38:18-20; Зәкәр. 14:3). Чахе Йаһоԝа фәрмане бьдә, Иса Мәсиһ ԝе рʹебәрийа ордийа Хԝәде бькә сәва дәрен шәрʹ. Әԝ ԝе тʹәви Мәсиһийед бьжарти у мирйада мәләка дәре шәрʹ. Тʹәвайи әԝана ԝе мьԛабьли Шәйтʹан, щьнед ԝи у ордийед әʹрде, шәрʹ бькьн (Әʹйан. 6:2; 17:14). Йаһоԝа соз дьдә мә: «Ԛәт чʹәкед кӧ ль дьжи [мьԛабьли] тә һатьнә чекьрьн, ԝе жь тʹӧ кʹарирʹа нәбә» (Иша. 54:17). «Әʹлаләтәкә . . . мәзьн», демәк хьзмәткʹаред Йаһоԝайи амьн, ԝе ԝәʹде тәнгасийа мәзьн хьлаз бьн! Паши ве йәке, әԝана ԝе бәрдәԝам кьн жерʹа хьзмәт кьн (Әʹйан. 7:9, 13-17). Кʹьтеба Пироз баԝәрийа мә дәрһәԛа ахьрийе ԛәԝи дькә! Әм заньн ԝәки «Хӧдан ширһʹәлала хԝәй дькә», демәк йед амьн (Зәб. 31:23). Һʹәмуйед кӧ Йаһоԝа һʹьз дькьн у пәсьна дьдьнә ԝи, ԝе бьвиньн у ша бьн кӧ ча наве ԝи бе пирозкьрьне (Һәзԛл. 38:23). w19.10 18-19 ¶17-18

Әм незики хьлазийа «рʹожед ахьрийе» дьбьн, у ләма дьбәкә әм рʹасти тәнгасийед гьран бен (2 Тимтʹ. 3:1). Мәсәлә, ԝәлатәки Африкайа рʹоавайеда паши һьлбьжартьна сәрок, шәрʹәки гьран дәстпебу. Хушк-бьред мә шәш мәһа зедәтьр, нькарьбун аза дәркʹәтана нав шәһәр, чьмки шәрʹ дьчу. Ле чь али ԝан кьр, ԝәки ве тәнгасийеда тәйах кьн? Һьнәк дәрбази малед хушк-бьред дьн бун, кʹидәре хоф тʹӧнә бу. Бьраки гьли кьр: «Һьнге мьн гәләк ԛимәт кьр кӧ һәвалед мьн кʹеләка мьн бун. Мә дьл дьда бәр һәв». Чахе «тәнгасийа мәзьн» дәстпебә, әме гәләк ша бьн, ԝәки һәвалед мәйи баш һәнә, йед кӧ мә һʹьз дькьн (Әʹйан. 7:14). Ләма гәләк фәрз ә ида ирода әм һәвалтийа хԝә ԛәԝи кьн (1 Пәт. 4:7, 8). Чьрʹа? Чьмки дьжмьнед мә ԝе бьхԝазьн пе дәрәԝа у информасийа ԛәлп йәктийа мә хьраб кьн. Әԝана ԝе бьхԝазьн ортʹа мә хьраб кьн, ле ԝе нькарьбьн ве йәке бькьн. Ԛәԝата ԝан һаԛас тʹӧнә, ԝәки һʹьзкьрьна мә һьндава хушк-бьра сар кьн. w19.11 2 ¶1-2; 7 ¶19

Шәйтʹан, «баве дәрәԝа», мәрьвед кӧ бьн һʹӧкӧме ԝида ньн дьдә хәбате, сәва дәрәԝа дәрһәԛа Йаһоԝа у хушк-бьред мә бәла кә (Йуһʹн. 8:44). Мәсәлә, рʹабәр дәрһәԛа тʹәшкиләта Йаһоԝа дәрәԝа у информасийа ԛәлп пе интернете у щурʹә-щурʹә тьшта бәла дькьн. Әԝ дәрәԝ жи дькʹәвьнә нава «тиред агьрийә» Шәйтʹан. Ле әм гәрәке чь бькьн һәрге кәсәк мәрʹа дәрһәԛа ԝан дәрәԝа гьли дькә? Әм гәрәке гӧһе хԝә нәдьнә ԝан! Чьмки әм баԝәрийа хԝә Йаһоԝа тиньн у итʹбарийа хԝә хушк-бьра тиньн. Бь рʹасти әм тʹӧ щар тʹәви рʹабәра хәбәр надьн. Әм тʹӧ щар тʹәви ԝан накʹәвьнә дәʹԝе, нә бона кәсәки нә жи бона тьштәки, нә жи сәва ве йәке кӧ дьхԝазьн пебьһʹәсьн әԝана чь дьбежьн, ԝәки баԝәрийа мә сьст нәбә. Ԝә карьбуйә гӧһе хԝә нәдьнә рʹабәра у тʹәви ԝан нәкʹәвьнә дәʹԝе бона дәрәԝед, кӧ әԝана бәла дькьн? Ԝәки әре, әԝ гәләк баш ә. Ле әм гәрәке тʹьме сәр хԝә бьн, чьмки чʹәкед Шәйтʹанә майин жи һәнә, кʹижан кӧ әԝ мьԛабьли мә дьдә хәбате. w19.11 15 ¶8; 16 ¶11

Тʹьме мәʹнийа сафикьрьна хԝә бьщерʹьбиньн. Йаһоԝа дьхԝазә, ԝәки әм һʹәму тьштада һʹәлал у дьлтʹәмьз бьн. Ләма жи гава әм тьштәки сафи дькьн, әм дьхԝазьн һьндава хԝәда у мәрьвед дьнда рʹаст у һʹәлал бьн. Һәрге нетед мә бь тʹәмами рʹаст нибьн, ԝе мәрʹа чәтьн бә сафикьрьна хԝә биньн сери. Мәсәлә, бьраки щаһьл сафи дькә, кӧ бьбә пешәнг. Ле һьнә ԝәʹдә шунда жерʹа чәтьн дьбә сьһʹәтед пешәнгийе перʹа бьгьһинә, у ләма әԝ ида хьзмәтийеда шабуне навинә. Әԝи тʹьре нета ԝийә кӧ бьбә пешәнг әԝ ә, ԝәки дьле Йаһоԝа ша кә. Ле дьбәкә пешийе нета ԝийә сәрәкә әԝ бу, ԝәки дьле де-баве хԝә ша кә йан жи дьле кәсәки дьн? Дина хԝә бьдьн ве мәсәле: Мәрьвәк кӧ Кʹьтеба Пироз һин дьбә, сафи кьрийә ԝәки щьхаре бьтʹәрькинә. Пешийе һʹәфтеки йан жи дӧ һʹәфтийа әԝ щьхаре накʹьшинә, ле паше дәстпедькә диса бькʹьшинә. Ахьрийеда әԝи бь тʹәмами тʹәрька щьхаре да! Һьзкьрьна ԝи һьндава Йаһоԝа у хԝәстьна ԝи кӧ дьле Ԝи ша кә, али ԝи кьр әви хәйсәти бьтʹәрькинә (Колс. 1:10; 3:23). w19.11 27 ¶9; 29 ¶10

Паԝлос дӧдьли нәбу, ԝәки әԝ ԝе ләщмәйданеда һʹәта хьлазийе бьрʹәвә у бьгьһижә мәрәма хԝә. Әԝ Мәсиһийе бь рʹӧһʹе пироз бьжарти бу, у һивийе бу кӧ «ләщхәлата жорчуйине, аԝа готи газийа Хԝәде», бьстинә. Ле сәва бьгьһижә ве мәрәме, әԝи фәʹм дькьр, ԝәки гәрәке бьщәʹдинә (Фили. 3:14). Паԝлос Филипийарʹа мәсәләкә баш гот, сәва али ԝан бькә, ԝәки әԝана һʹьш-аԛьле хԝә бьдьнә сәр нета хԝә. Паԝлос ани бира Филипйа, кӧ әԝана бажарванед әʹзмана нә (Фили. 3:20). Чьрʹа ԝана гәрәке әԝ йәк бир нәкьрана? Ԝан рʹожада, бажарвантийа Рʹоме гәләк ԛимәт дькьрьн, чьмки гәләк тьштада кʹара ве йәке һәбу. Ле Мәсиһийед бь рʹӧһʹе пироз бьжарти, бажарванед щики һе баш бун. Бажарвантийа Рʹоме бәр бажарвантийа әʹзмани беԛимәт бу! Мәсиһийед бь рʹӧһʹе пироз бьжарти, иро мәсәләкә баш дьһельн ве йәкеда, кӧ һәр тьшти дькьн ԝәки бьгьһижьнә нета хԝә, демәк жийина һʹәта-һʹәтайе сәр әʹзмана ԛазанщ кьн. w19.08 6 ¶14-15

Әԝ азайи һе мәзьн бу нә кӧ азайа ԝәʹде сала Йубиле (Ԛан. Кʹаһ. 25:8-12). Мәсәлә, мәрьве кӧ ԝәʹде Йубиле жь дилтийе аза дьбу, паше диса дьбәкә бьбуйа хӧлам, у йәкә ахьрийеда ԝе бьмьра ча һʹәму мәрьв. Ле азайа кӧ Иса тинә, ԝе һʹәта-һʹәтайе бьминә. Рʹожа Пенщийе Һʹәсабе сала 33 Д.М., Йаһоԝа пе рʹӧһʹе пироз шанди у жьн меред дьнә амьн бьжарт. Әԝи ԝана кьрә ча кӧрʹед хԝә, сәва кӧ ахьрийеда әԝана жь мьрьне рʹабьн, ԝәки сәр әʹзмана тʹәви Иса сәрԝертийе бькьн (Рʹом. 8:2, 15-17). Әԝана йед пешьн бун, кӧ әв азайи стандьн, дәрһәԛа кʹижане Иса кʹьништа Ньсрәтеда әʹлам кьр (Луԛа 4:16-19, 21). Әԝ мәрьв ида хӧламед һинкьрьнед ԛәлп нибун кӧ сәрԝеред Щьһуйа бәла дькьрьн, у ӧса жи хӧламед ԝан әʹдәта нибун, йед кӧ мьԛабьли Хәбәра Хԝәде бун. Хԝәде ӧса жи һʹәсаб дькьр, кӧ әԝана жь гӧнә аза бунә, кʹижан кӧ мьрьне тинә. Йубила симболик кӧ сала 33 Д.М.-да дәстпебу пе бьжартьна шагьртед Мәсиһ, ԝе хьлаз бә хьлазийа Һʹәзарсалийа Сәрԝертийа Иса. w19.12 11 ¶11-12

Де-бавно, али зарʹед хԝә бькьн, ԝәки һәвалед баш хԝәрʹа бьвиньн. Бир нәкьн, де-бав гәрәке бьзаньбьн кӧ зарʹед ԝан чь дькьн у тʹәви кʹе һәвалтийе дькьн. Әԝ те һʹәсабе, ԝәки әԝана гәрәке һаш пе һәбьн, кӧ зарʹед ԝан пе интернете у тʹеле тʹәви кʹе хәбәр дьдьн у тʹәви кʹе һәвалтийе дькьн. Чьрʹа? Чьмки һәвал дькарьн сәр фькьр у рʹабун-рʹуньштьна зарʹа һʹӧкӧм кьн. Гәләк де-бав мәщәла дьвиньн, сәва зарʹед ԝан тʹәви мәрьвед кӧ хьзмәтийеда мәсәла баш ьн, незик бьн. Мәсәлә, Дени у Бомин, жьн-мер кӧ жь Кот Девуаре нә, гәләк щар бәрпьрсийаре мьһале тʹәглиф дькьрьн, кӧ мала ԝанда бьминә. Дени гьли дькә: «Әԝ йәк гәләк баш сәр кӧрʹе мә һʹӧкӧм дьбу. Әԝ буйә пешәнг у ньһа ча аликʹарчийе бәрпьрсийаре мьһале хьзмәт дькә». Де-бав чьԛас зу дәстпекьн зарʹед хԝә һин кьн, һаԛас баш ә (Мәтʹлк. 22:6). Бьфькьрьн дәрһәԛа Тимотʹейо. Дийа ԝи, Әйньк у пирька ԝи Лойис, ԝи «жь зарʹотийа» ԝида һин дькьрьн. (2 Тимтʹ. 1:5; 3:15). w19.12 25 ¶14; 26 ¶16-17

Бьбә һәвале бь итʹбар. Мәсәлә, әм хушк-бьред хԝәйә һʹәԝщәрʹа нә тʹәне соз дьдьн, ԝәки али ԝан бькьн, ле әм пе кьред хԝә аликʹарийе дьдьнә ԝан (Мәт. 5:37; Луԛа 16:10). Чахе әԝед кӧ һʹәԝщә нә, заньн, ԝәки әме әʹсә али ԝан бькьн, әԝана дьлбинийе дьстиньн. Хушкәке гот: «Чахе тӧ зани, ԝәки әԝ мәрьве кӧ тәрʹа соз дайә, ԝе әʹсә бе һәԝара тә, дьле тә рʹьһʹәт ә». Әԝед кӧ рʹасти щерʹьбандьна тед йан жи дьлшкәсти дьбьн, дьлбиникә мәзьн дьстиньн, гава һәваләки бь итʹбаррʹа дьле хԝә вәдькьн. Ле сәва әм бьбьнә һәвале баш у бь итʹбар, мәрʹа сәбьр лазьм ә. Чахе мере хушкәкә мә Жанайе, ле һишт, әԝе дьлбини жь һәвалед хԝәйи незик станд. Әԝ дьбежә: «Әԝана бь сәбьр гӧһ дьданә мьн һьнге жи, чахе мьн гьлик чәнд щара дьгот». Һун жи дькарьн бьбьнә һәвале баш бь ве йәке, кӧ бь сәбьр гӧһ бьдьн. w20.01 10-11 ¶9-11

Кʹьтеба Пирозда һәнә гәләк мәсәлед ԝан мәрьва, йед кӧ рʹӧһʹе пироз стандьбун, ле йәкә һевийа ԝан жийина сәр әʹзмана нибу. Мәсәлә, рʹӧһʹе пироз рʹебәрийа Даԝьд дькьр (1 Сам. 16:13). Рʹӧһʹе пироз али ԝи кьр, ԝәки рʹастийед кʹур дәрһәԛа Йаһоԝа фәʹм кә у ӧса жи һьнә пʹаред Кʹьтеба Пироз бьньвисә (Марԛ. 12:36). Ле йәкә Пәтрус гот, ԝәки Даԝьд «нәчубу әʹзмана» (Кʹар. Шанд. 2:34). Йуһʹәннайе Ньхӧмдар жи «бь рʹӧһʹе пироз тʹьжи» бу (Луԛа 1:13-16). Иса гот кӧ тʹӧ мәрьв жь Йуһʹәнна мәзьнтьр нибу, ле паше әԝи гот, ԝәки Йуһʹәнна накʹәвә нав Пʹадшатийа әʹзмана (Мәт. 11:10, 11). Йаһоԝа пе рʹӧһʹе хԝәйи пироз ԝанрʹа ԛәԝат дьда, ԝәки кьред мәзьн бькьн, ле әԝи пе ви рʹӧһʹи ԝана бона жийина сәр әʹзмана нәжьбарт. Гәло әԝ те һʹәсабе, кӧ әԝана һаԛас амьн нибун? На. Әԝ те һʹәсабе, ԝәки Йаһоԝа ԝе ԝана жь мьрьне рʹакә, сәва Щьнәтеда сәр әʹрде бьжин (Йуһʹн. 5:28, 29; Кʹар. Шанд. 24:15). w20.01 25 ¶15

Йаһоԝа әм тʹәглиф кьрьнә, кӧ бьбьнә нәфәред малбәта ԝи. Әԝ малбәт жь ԝан мәрьва йә, йед кӧ хԝә тʹәсмили Хԝәде кьрьнә у баԝәрийа хԝә ԛӧрбана Кӧрʹе ԝи тиньн. Әм малбәтәкә бәхтәԝар ьн. Әм нә тʹәне иро пе әʹмьре бәхтәԝар дьжин, ле һевийа мә һәйә, ԝәки әм ахьрийеда һʹәта-һʹәтайе бьжин, фьрԛи тʹӧнә сәр әʹрде Щьнәтеда йан сәр әʹзмана. Йаһоԝа жь һʹьзкьрьне тьштәки ӧса кьр, ԝәки әм бькарьбьн бьбьнә нәфәред малбәта ԝи. Ле сәва ве йәке әԝи һәԛе мәзьн да (Йуһʹн. 3:16). Әм «бь ԛимәт һатьнә кʹьрʹине» (1 Корн. 6:20). Йаһоԝа бь сайа кʹьрʹине мәрʹа мәщал да, ԝәки һәләԛәтийа мә тʹәви ԝи незик бә. Ԛәдьрәки мәйи мәзьн һәйә, ԝәки нава гәрдунеда Кәсе лапи мәзьнрʹа, бежьн Баво. Йаһоԝа Бавәки лапи баш ә. Мина зәбурбежәки, дьбәкә әм жи пьрсе дьдьнә хԝә: «Әз чь бьдьмә Хӧдан, бона тʹәмамийа ԛәнщийа Ԝийә сәр мьн?» (Зәб. 116:12) Щаба ве пьрсе әԝ ә, кӧ бь рʹасти әме тӧ щар нькарьбьн бона һәр тьшти һәԛе Баве хԝәйи әʹзмана бьдьн. Ле йәкә һʹьзкьрьна ԝи һьндава мә, мә һелан дькә ԝәки ԝи һʹьз бькьн. w20.02 8 ¶1-3