Һʹәзиран

Һанна, дийа Самуйел пʹехәмбәр, дәрдед гьран дькʹьшанд. Гәләк сала әԝ безӧрʹәт бу (1 Сам. 1:2). Һьнге гәләк Исраели дьфькьрин, ԝәки жьна безӧрʹәт жь Хԝәде ньфьркьри йә. Ләма жи Һаннайе хԝә ньмьз тʹәхмин дькьр (Дәстп. 30:1, 2). Әԝ кӧл бәси ԝе нибу, диса жьнәкә мере ԝе һәбу, Пенина, йа кӧ ԝирʹа зарʹ дьани у Һаннайе дькʹәнийа. Пешийе Һанна гәләк дьлшкәсти дьбу у бәрхԝә дькʹәт. Әԝ ӧса хәмгин дьбу, кӧ «дьгьрийа у хԝарьне нәдьхԝар». «Еша дьле» Һаннайе гәләк гьран бу (1 Сам. 1:7, 10). Ле чаԝа Һаннайе бәрдьли станд? Һаннайе дӧада дәрде дьле хԝә Йаһоԝарʹа гьли кьр. Паши дӧа, әԝе дәрһәԛа һале хԝә Сәрәккʹаһин Әлирʹа жи гьли кьр. Әԝи чахе гӧһ да ԝе, паше гот: «Бь сьламәтийе һәрә у бьра Хԝәдайе Исраел, тьште кӧ тә же хԝәстийә бьдә тә!» Паши ве йәке, Һаннайе хԝә ча тʹәхмин дькьр? Әԝ «бь рʹийа хԝәва чу у хԝарьн хԝар; иди ԝәще ԝе [сәр чʹәʹве ԝе] нә бь кʹәсәр бу» (1 Сам. 1:17, 18). Бәле, Һаннайе бь сайа дӧа дьлрʹьһʹәти станд. w20.02 21 ¶4-5

Зутьрәке, Йаһоԝа ԝе ԛьрʹа ве дьнйайе бинә. У тʹәне әԝ мәрьв ԝе хьлаз бьн, дьле кʹижана һазьр ә мьзгинийе ԛәбул кьн (Кʹар. Шанд. 13:48). Әм илаһи дьхԝазьн ԝәки мәрьвед мәйи незик тʹәви мә Йаһоԝарʹа хьзмәт кьн. Йаһоԝа, Баве мәйи һʹьзкьри, «нахԝазә тӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәт. 3:9). Әм гәрәке бир нәкьн, ԝәки әм дькарьн мьзгинийа хьлазбуне бь щурʹе рʹаст у щурʹе нәрʹаст жи бәла кьн. Әм чахе мәрьвед нәнасрʹа шәʹдәтийе дьдьн, әм бь мәʹрифәти у нәрм тʹәви ԝан хәбәр дьдьн, ле чахе мәрьве хԝәйи незикрʹа шәʹдәтийе дьдьн, дьбәкә әм сәрт гьлийа дьдьнә дәсте ԝан. Гәләк жь мә дьбәкә пʹошман дьбьн, кӧ пешийе мә мәрьвед хԝәйи незикрʹа чь щурʹәйи шәʹдәти дьда, у дьфькьрьн кӧ хԝазьл мә щурʹәки майин бькьра. Әв ширәта Паԝлосе шанди жь рʹеза иройин әм гәрәке бир нәкьн чахе тʹәви мәрьвед хԝә хәбәр дьдьн. Йан на, әԝана ԝе нә кӧ гӧһ бьдьнә мә, ле хԝә жь мә дур бьгьрьн у бьхәйдьн. w19.08 14-15 ¶3-5

Ԝә чь тʹәхмин кьр чахе һун пеһʹәсийан рʹастийед дәрһәԛа Иса, Кӧрʹе Хԝәде? Нава гәрдунеда паши Хԝәде, Иса кәсе лапи мәзьн ә. Әԝ Хьлазкʹаре мә йә, чьмки әԝи бь дьл бона мә әʹмьре хԝә да. Әм чахе пе кьред хԝә баԝәрийа хԝә һьндава кʹьрʹине нишан дькьн, гӧнед мә тенә бахшандьне, әм дьбьнә достед Хԝәде, у дькарьн жийина һʹәта-һʹәтайе бьстиньн (Йуһʹн. 3:16). Иса  Сәрәккʹаһине мә йә. Әԝ дьхԝазә али мә бькә, ԝәки әм жь кʹьрʹине кʹаре бьстиньн у һәләԛәтийа мә тʹәви Хԝәде незик бә (Ибрн. 4:15; 7:24, 25). Бь сайа Иса, ча Пʹадше Пʹадшатийа Хԝәде, ԝе наве Йаһоԝа бе рʹумәткьрьне, һʹәму хьраби ԝе бе һьлдане у мәрьве Щьнәтеда сәр әʹрде кʹәрәмед һʹәта-һʹәтайе бьстиньн (Мәт. 6:9, 10; Әʹйан. 11:15). Иса мәрʹа нәхшәк һишт, ԝәки әм пʹегәһа ԝида һәрʹьн. Әԝи мәсәлә һишт ве йәкеда, кӧ әʹмьре хԝәда ԛьрара Хԝәде датани щийе пешийе (Йуһʹн. 4:34). Чахе һун рʹастийед Кʹьтеба Пироз ԛәбул дькьн, һун дәстпедькьн Кӧрʹе Хԝәдейи дәлал һʹьз бькьн. Әԝ һʹьзкьрьн ԝә һелан дькә мина Иса әʹмьре хԝәда ԛьрара Хԝәде биньн сери. w20.03 10 ¶12-13

Иса тʹәмамийа рʹожа пешийа мьрьна хԝә, дӧа дькьр. Чахе әԝи шагьртед хԝәрʹа нишан кьр, кӧ биранина мьрьна ԝи ча дәрбаз кьн, әԝи сәр нан у шәраве дӧа кьр (1 Корн. 11:23-25). Ӧса жи пешийа кӧ әԝана жь ԝи щийи дәркʹәтана, кʹидәре кӧ ԝана Щәжьна Дәрбазбуне дәрбаз кьр, әԝи тʹәви шагьртед хԝә дӧа кьр (Йуһʹн. 17:1-26). Паше, чахе ве шәве әԝ тʹәви шагьртед хԝә чу бахче Гетшәмани, әԝи ԝедәре жи гәләк щар дӧа кьр (Мәт. 26:36-39, 42, 44). Иса һәла һе бәр мьрьне бу жи, дӧа кьр (Луԛа 23:46). Ве рʹожа гьран, Иса дәрһәԛа һәр тьштед кӧ ве рʹоже дьԛәԝьмин, дӧада Йаһоԝарʹа дьгот. Мәʹник кӧ Иса чьрʹа сәбьр кьр ԝәʹде тәнгасийа, әԝ бу, кӧ әԝи Баве хԝәрʹа дӧа дькьр ԝәки али ԝи бькә. Ле шандийа ве шәве дӧада хирәт нибун. Ләма жи чахе әԝана кʹәтьнә щерʹьбандьне, мерхасийа ԝан кем бу (Мәт. 26:40, 41, 43, 45, 56). Әм жи чахе рʹасти тәнгасийа бен, дькарьн мина Иса амьн бьминьн, тʹәне һәрге «һәр гав дӧа бькьн». w19.04 9 ¶4-5

Сербази бәр чʹәʹве Йаһоԝа рʹәш ә. Йаһоԝа готә Исраелийа: «Бьра нава тәда йе ӧса тʹӧнә бә, йе кӧ кӧрʹ йан ԛиза хԝә нава егьррʹа дәрбаз дькә, нә кʹочʹәк, нә сербаз, нә рʹәмьлдар, нә жи пирәсер, нә ньфьрʹкьр, нә йе кӧ гази рʹӧһʹа дькә, нә хԝәйиһʹӧньр, нә жи йе кӧ гази мьрийа дькә. Чьмки ль бәр чʹәʹве Хӧдан йе кӧ ве йәке дькә кʹьрет ә» (Ԛан. Дщр. 18:10-12). Рʹаст ә Мәсиһи бьн ве Ԛанунеда ниньн, кʹижан кӧ Йаһоԝа да Исраелийа, ле ньһерʹандьна Йаһоԝа сәр сербазийе нәһатийә гӧһастьне. Йаһоԝа мәрʹа дьбежә, ԝәки хԝә жь сербазийе дур бьгьрьн, чьмки әԝ занә кӧ Шәйтʹан әԝе йәке дьдә хәбате, сәва зийане бьдә мәрьва. Шәйтʹан пе сербазийе дәрәԝа бәла дькә. Дәрәԝәкә ԝи әԝ ә, кӧ йанчь мьри сах ьн у щики дьжин (Ԝаиз 9:5). Шәйтʹан ӧса жи пе сербазийе тьрсе дькә сәр мәрьва, сәва ԝана жь Йаһоԝа дур хә. Нета Шәйтʹан ве йәкеда нә, ԝәки мәрьвед кӧ сербазийе дькьн, баԝәрийа хԝә рʹӧһʹед хьраб биньн, нә кӧ Йаһоԝа. w19.04 21 ¶5-6

Зорбәти һьндава зарʹа гӧнәки мәзьн ә. Әԝе кӧ зорбәтийе зарʹе дькә, зийанәкә гәләк мәзьн дьдә зарʹе у әʹмьре ԝи хьраб дькә. Пе кьре хԝәйи зӧлм, әԝ итʹбарийа зарʹе ӧнда дькә, у зарʹ ида хԝә бехоф тʹәхмин накә. Әм гәрәке зарʹа жь кьре ԝи щурʹәйи хԝәй кьн, ӧса жи бәрдьлийе у аликʹарийе бьдьнә ԝан зарʹа, йед кӧ рʹасти ве хьрабийе һатьнә (1 Тʹеслн. 5:14). Һәрге кәсәк жь щьвате те нәһәԛкьрьне ве йәкеда, кӧ һьндава зарʹе зорбәтийа сексуали кьрийә, әԝ наве щьвате хьраб дькә (Мәт. 5:16; 1 Пәт. 2:12). Әм тʹӧ щар наһельн, кӧ щьватеда әԝ мәрьв бьминьн, йед кӧ хьрабийе дькьн, ле тʹобә накьн у наве щьвате хьраб дькьн. Һәрге кәсәк жь щьвате ԛануна дәԝләте тʹәрьбандийә, мәсәлә зорбәтийа сексуали һьндава зарʹе кьрийә, әԝи һьндава сәрԝеред дәԝләте гӧнә кьрийә (Бәрамбәр кьн Кʹаред Шандийа 25:8). Рʹаст ә изьна рʹуспийа тʹӧнә пе ԛануна дәԝләте кәсәки щәза кьн, ле әԝана ԝи мәрьве кӧ зорбәтийа зарʹе кьрийә, жь щәзакьрьна дәԝләте хԝәй накьн. w19.05 9 ¶4-7

Әм дькарьн һәр чәтьнайикеда чʹаре бьвиньн, чьмки Йаһоԝа йә Мамостайе мәйи Һәри мәзьн (Иша. 30:20, 21). Хәбәра Ԝи али мә дькә, сәва әм һаш һʹәму тьшти һәбьн у «бона һʹәму кьрьнед ԛәнщ һазьр сәкьни» бьн (2 Тимтʹ. 3:17). Чахе әм ль гора һинкьрьнед Кʹьтеба Пироз дьжин, әм жь мәрьвед кӧ пе «сәрԝахтийа ве дьнйайе» дьжин, сәрԝахттьр дьбьн (Зәб. 119:97-100). Йазьх сәрԝахтийа ве дьнйайе, мәрьва һелан дькә пәй хԝәстьнед хԝә кәвьн. Мәрʹа нәһеса йә чʹәʹв нәдьнә ньһерʹандьн у рʹабун-рʹуньштьна мәрьвед ве дьнйайе, ләма жи Кʹьтеба Пироз бадиһәԝа набежә: «Һаш жь хԝә һәбьн, нәбә кӧ йәк бь сәрԝахтийа дәрәԝә пʹучʹ дьле ԝә бькә һесир. Әԝ жь әʹдәтед мәрьва . . . тен» (Колс. 2:8). Чаԝа Кʹьтеба Пирозда һатьбу пʹехәмбәртикьрьне, нишанәкә рʹожед ахьрийе ԝе әԝ буйа, кӧ мәрьв бьбьнә «рʹьһʹәтиһʹьз» (2 Тимтʹ. 3:4). Нәхԝәшийед жь бо һәләԛәтийа сексуали жи бәла бунә, мәсәлә ӘЙДЗӘ (нәхԝәшийа спид). Әԝ тʹәне нишанәкә, кӧ дьдә кʹьфше, ԝәки сәрԝахтийа ве дьнйайе беһʹьши йә (2 Пәт. 2:19). w19.05 21 ¶1-2; 22 ¶4-5

Шәйтʹан Исраели ӧса хальфандьн, кӧ ԝана тʹьре гәрәке кьред у әʹдәтед мьләтед пʹутпʹарьст бькьн, сәва кӧ әʹрде ԝан шин бә. Әԝ мьләтед пʹутпʹарьст баԝәр дькьрьн, кӧ һәрге әԝана хӧданед хԝә бьһʹәбиньн у фьлан әʹдәта бькьн, хӧданед ԝан ԝе ԝанрʹа баране бьбариньн. Исраелийед кӧ баԝәрийа хԝә һьндава Йаһоԝа сьст кьрьн, баԝәр дькьрьн ԝәки һьнге ԝе әʹрд һьшк нәбә, һәрге әԝана ԝан әʹдәтед пʹутпʹарьста бькьн, кʹижан кӧ бона хӧдане ԛәлп Баәʹл дькьрьн. Шәйтʹан ӧса жи хԝәстьнед бенамуси да хәбате. Мьләтед пʹутпʹарьст пе кьред хԝәйи һʹәрам, хӧданед хԝә дьһʹәбандьн. Нава ԝан кьред һʹәрамда, ӧса жи ԛавийа жьна у мера бу, кӧ пʹарьстгәһеда дькьрьн. Әԝана сәр һомосексуалтийе у кьред дьнә бенамуси, нә кӧ тʹәне чʹәʹве хԝә дадьдан, ле әԝ йәк бона ԝан ида нормал дьһатә һʹәсабе! (Ԛан. Дщр. 23:17, 18; 1 Пʹадш. 14:24). Әԝ мьләтед пʹутпʹарьст баԝәр дькьрьн, ԝәки чахе әԝана әԝан әʹдәта биньн сери, әв йәк ԝе хӧданед ԝан һелан кә кӧ әʹрде ԝан кʹәрәм кьн, сәва гәләк бәр бьдә. Гәләк Исраели кʹәтьнә ве тʹәльке, у мина ԝан мьләтед хәриб, әʹдәтед бенамуси кьрьн, у дәстпекьрьн хӧданед ԛәлп бьһʹәбиньн. w19.06 2 ¶3; 4 ¶7-8

Бь һʹәзара әндәмед Бәйтʹәле у һьнә хушк-бьра, кʹьфшкьрьнед тʹәзә стандьн. Ԝан хушк-бьред амьнрʹа нәһеса йә, ԝәки кʹьфшкьрьна хԝәйә кӧ гәләк һʹьз дькьн, бьһельн. Һәрге һун йәк жь ԝан ьн, чь ԝе али ԝә бькә щабдарийе хԝе биньн сери? Сәва достийа мә тʹәви Йаһоԝа незик бьминә, һәр рʹож әм гәрәке Хәбәра ԝи бьхуньн у сәр бьфькьрьн. Ӧса жи, чьԛас дькарьн щьвата хԝәйә тʹәзәда хьзмәтийеда хирәт бьн. Йаһоԝа бир накә ԝан, йед кӧ бәрдәԝам дькьн жерʹа бь амьни хьзмәт дькьн, һәла һе жи һәрге әԝана ида нькарьн һаԛас бькьн, чьԛас ԝана бәре дькьр. Бь әʹмьре сьвьк бьжин. Нәһельн, ԝәки хәмед ве дьнйа Шәйтʹан, ԝә «бьхәньԛиньн», у ԝә бьдьнә сәкьнандьне (Мәт. 13:22). Гӧһ нәдьнә ԝан һәвал йан жи мәрьвед хԝәйи незик, йед кӧ бь дьле хԝәйи сах ԝә һелан дькьн пәй пʹәра кәвьн, сәва әʹмьре хԝә һе баш кьн (1 Йуһʹн. 2:15-17). Итʹбарийа хԝә Йаһоԝа биньн. Әԝ соз дьдә гава әм һʹәԝщә бьн, әԝ ԝе алийе рʹӧһʹанида, емосийалида у физикида, ԝе али мә бькә у мә нәһелә (Ибрн. 4:16; 13:5, 6). w19.08 20 ¶4; 21-22 ¶7-8

Һун бона тьштәки бәрхԝә дькʹәвьн? Чьԛас әм дьлбинийе дьстиньн, чьмки заньн кӧ Йаһоԝа һале мә жи фәʹм дькә! Сәрһатийа Елйас мә дьдә баԝәркьрьне, ԝәки Йаһоԝа дьлтәнгийа мә дьвинә. Әԝ занә әм чь дькарьн у чь нькарьн, у һәла һе жи занә әм чь дьфькьрьн у ча хԝә тʹәхмин дькьн (Зәб. 103:14; 139:3, 4). Һәрге әм итʹбарийа хԝә Йаһоԝа биньн, әԝ ԝе али мә бькә, әм нава ԝан проблемада сәбьр кьн, кʹижан кӧ мә дькьнә стресе. Чахе һун стреседа ньн, дьбәкә дьфькьрьн, ԝәки дәрәща ԝә ԝе тʹӧ щар нәйе гӧһастьне, у һун бинтәнг дьбьн. Һәрге һун һʹаләки ӧсада ньн, бир нәкьн, ԝәки Йаһоԝа ԝе али ԝә бькә һун бәр стресе тәйах кьн. Ле әԝ ԝе ча али ԝә бькә? Йаһоԝа дьхԝазә, ԝәки һун дьле хԝә жерʹа вәкьн у хәмед хԝә жерʹа гьли кьн. Әԝ ԝе әʹсә щаба һәԝар-газийа ԝә бьдә (Зәб. 5:3; 1 Пәт. 5:7). Ләма жи һәр гав дәрһәԛа проблемед хԝә Йаһоԝарʹа дӧа бькьн. Бәле, әԝ ԝе рʹастә-рʹаст тʹәви ԝә хәбәр нәдә, ле ԝе пе Хәбәра хԝә, демәк пе Кʹьтеба Пироз, у пе тʹәшкиләта хԝә ԝәрʹа хәбәр дә. Мәсәлә, сәрһатийед кӧ һун Кʹьтеба Пирозда дьхуньн, дькарьн дьлбинийе у һевийе бьдьнә ԝә, ле хушк-бьред щьвате дькарьн бәр дьле ԝәда бен у ԝә бьшьдиньн (Рʹом. 15:4; Ибрн. 10:24, 25). w19.06 16 ¶7-8

Чахе пәй ԝә дькʹәвьн һун Йаһоԝарʹа дӧа бькьн, «дьле хԝә мина авәке» ль бәр ԝи бьрʹежьн, у Баве хԝәйи һʹьзкьрирʹа дәрһәԛа хәмед хԝә у һʹәму тьрсед дьле хԝә, гьли кьн (Лур. Йерәм. 2:19). Чьԛас һе зедә һун ӧса дӧа бькьн, һаԛас һе зедә һуне хԝә незики Йаһоԝа тʹәхмин кьн (Рʹом. 8:38, 39). Дӧдьли нәбьн, ԝәки һʹәму кʹәрәмед Пʹадшатийа Хԝәде, ԝе бенә сери (Жьмар 23:19). Һәрге һун һьндава созед Хԝәде дӧдьли бьн, Шәйтʹанрʹа у йед кӧ бьн дәсте ԝида ньн, ԝе һеса бә ԝә бьтьрсиньн (Мәтʹлк. 24:10; Ибрн. 2:15). Ләма ԝәʹдә хԝәрʹа башԛә кьн, сәва леколин кьн созед Хԝәде дәрһәԛа Пʹадшатийа ԝи, у ӧса жи ԝан мәʹнийа, кӧ чьрʹа әм дькарьн баԝәр бьн, ԝәки әԝ соз ԝе әʹсә бенә сери. Ле чьда әԝ йәк ԝе али ԝә бькә? Дина хԝә бьдьн мәсәла Стенли Щонс, йе кӧ ԝәкә 7 сала бона баԝәрийа хԝә кәледа бу. Чь али ԝи кьр кӧ әԝи сәбьр кьр у Хԝәдерʹа амьн ма? Әԝи гот: «Баԝәрийа мьн ԛәԝи бу, чьмки мьн дәрһәԛа Пʹадшатийа Хԝәде заньбу у ӧса жи мьн заньбу кӧ әԝ ԝе чь бькә бона инсанәте. Әз тʹӧ щар ве йәкеда дӧдьли нибум, ләма жи тӧ кәси нькарьбу зоре мьн бькьра, кӧ мьн Йаһоԝа бьһишта». Һәрге баԝәрийа ԝә һьндава созед Йаһоԝа ԛәԝи йә, тʹӧ щар тьрс ԝе рʹийа ԝә нәгьрә жерʹа хьзмәт кьн (Мәтʹлк. 3:25, 26). w19.07 2 ¶1; 3 ¶6-7

Чьрʹа мәрьва бькьнә шагьртед Мәсиһ, әв шьхӧләкә гәләк фәрз ә? Чьмки тʹәне шагьртед Мәсиһ дькарьн бьбьнә достед Хԝәде. Хенщи ве йәке, әԝед кӧ пәй Мәсиһ дьчьн, әʹмьре хԝәда бәхтәԝар дьбьн, у ӧса жи һевийа ԝан һәйә кӧ ахьрийеда һʹәта-һʹәтайе бьжин (Йуһʹн. 14:6; 17:3). Бешьк, Иса щабдарийа фәрз да мә, ле әԝи шьхӧли әм тʹәне накьн. Паԝлосе шанди дәрһәԛа хԝә у хушк-бьра ньвиси: «Әм һәвпʹаред Хԝәде йед хәбате нә» (1 Корн. 3:9, ИМ). Рʹасти жи Йаһоԝа у Мәсиһ ԛәдьрәки чьԛас мәзьн данә мәрьвед гӧнәкʹар! Хенщи ԝе йәке, әԝ шьхӧл кӧ мәрьва бькьнә шагьрт, мәрʹа шабунәкә мәзьн тинә. Гава пешьн сәва мәрьва бькьнә шагьрт, әԝ ә кӧ мәрьвед дьлсах бьвиньн, йед кӧ бьхԝазьн дәрһәԛа Йаһоԝа пебьһʹәсьн. Чахе әм һәр мәрьвәкирʹа кӧ рʹасти мә те, шәʹдәтийе дьдьн, әм избат дькьн кӧ әм бь рʹасти Шәʹдед Йаһоԝа нә. Чахе әм гӧрʹа тʹәмийа Иса дькьн кӧ мьзгинийе бәла дькьн, әм избат дькьн, ԝәки әм Мәсиһийед рʹаст ьн. w19.07 15 ¶3-5

Гәләк мәрьв бәгәм дькьн биланийа кӧ Кʹьтеба Пирозда һәйә. Нийу Йоркеда, хушкәк йа кӧ шәʹдәтийе дьдә мәрьвед кӧ сәр зьмане Мандарини хәбәр дьдьн, дьбежә: «Әз дькʹәвьмә һʹәйра мәрьва у гӧһ дьдьмә ԝан. Һәрге әз педьһʹәсьм, ԝәки әԝана емигрантед тʹәзә нә, щара жь ԝана дьпьрсьм: ‹Һун ча һини ви щийи бунә? Ԝә хәбат хԝәрʹа дитийә? Мәрьвед ԝьра ԝәрʹа һʹәйф ьн?›» Щара әԝ йәк али ԝе дькә кӧ гьли кә, Кʹьтеба Пироз чь һин дькә. Чахе те стандьн, хушк зедә дькә: «Бь тʹәхмина ԝә чь йә тьште лапи фәрз, ԝәки һәләԛәтийа баш хԝәй кьн тʹәви мәрьва? Изьн ә әз ԝәрʹа мәтʹәлокәкә жь Кʹьтеба Пироз бьхуньм? Ԝьра те готьне: ‹Дәстпебуна шерʹ мина авбәрдане йә, һе шәрʹ кӧ гьран нәбуйә же дур кʹәвә›. Һун ча дьфькьрьн, әԝ ширәт дькарә али мә бькә, ԝәки һәләԛәтийа мә тʹәви мәрьва баш бә?» (Мәтʹлк. 17:14) Хәбәрдана ԝи щурʹәйи дькарә али мә бькә, ԝәки ԝан мәрьва бьвиньн, йед кӧ дьхԝазьн һе зедә пебьһʹәсьн. w19.07 23 ¶13

Әԝед кӧ дәрбази щийе кʹьфшкьрьна тʹәзә бунә, һʹәԝщә нә кӧ ԝана фәʹм кьн, нә кӧ гӧне хԝә ԝана биньн. Дьбәкә алийе сьһʹәт-ԛәԝатеда проблема ԝан йан йа мәрьве ԝани незик һәйә. Йан жи дьбәкә мәрьве ԝани незик мьрийә. Дьбәкә әԝана нишан накьн, ле бәрхԝә дькʹәвьн, чьмки бира һәвалед хԝә дькьн. Сәва әԝана кем бәрхԝә кʹәвьн, ԝанрʹа ԝәʹдә лазьм ә. Һәрге һун тʹәви ԝан хьзмәт бькьн, у пе мәсәла хԝә дьл бьдьнә ԝана, әԝ йәк жи ԝе али ԝан бькә, кӧ зу һини гӧһастьна бьн. Хушкәкә мә, йа кӧ гәләк сала ԝәлате хәрибда хьзмәт дькьр, дьбежә: «Мьн бәре кʹидәре хьзмәт дькьр, һәр рʹож мьн тʹәви мәрьва һинбуна Кʹьтеба Пироз дәрбаз дькьр. Ле кʹьфшкьрьна мьнә тʹәзәда мьнрʹа ӧса чәтьн бу, кӧ мьн нә жи дькарьбу мәрьварʹа һәма Кʹьтеба Пироз вәкьра, йан жи видеок нишани ԝан кьра. Ле хушк-бьред жь щьвата мьн, әз тʹәглиф дькьрьм сәр сәрледан у һинбунед хԝә. Әԝ йәк али мьн кьр ньһерʹандьна позитив хԝәй кьм. Әз һин бум кӧ чаԝа ве територийа тʹәзәда тʹәви мәрьва хәбәрдане дәстпекьм. Әԝ һʹәму тьшт али мьн кьр шабуна хԝә вәгәрʹиньм». w19.08 22 ¶10; 24 ¶13-14

Дьбәкә әм жи мина Әйодийа у Сьнтихайе, дина хԝә дьдьн сәр шашийед хушк-бьра, у мәрʹа чәтьн ә ԝана һʹьз бькьн. Ле әм гьшк жи һәр рʹож шашийа дькьн. Һәрге әм дина хԝә бьдьнә тʹәне сәр шашийед ԝан, һʹьзкьрьна мә һьндава ԝанда ԝе һеди-һеди сар бә. Мәсәлә, бьдьнә бәр чʹәʹве хԝә щьватеда бьра бир дькә, кӧ тʹәмьзкьрьна Ода Щьватеда али мә бькә, у әм сәр ԝи һерс дькʹәвьн. Һәрге әм паше шашийед ԝийи дьн жи биньн бира хԝә у сәр бьфькьрьн, һерса мә ԝе һе гӧрʹ бә у һʹьзкьрьна мә жи һьндава ԝи ԝе һеди-һеди сар бә. Һәрге бал ԝә проблема ԝи щурʹәйи һәйә, ԝе баш бә сәр ве йәке бьфькьрьн: Йаһоԝа чаԝа кемасийед мә дьвинә, ӧса жи кемасийед хушк-бьред мә дьвинә. Ле йәкә әԝ диса жи ԝан хушк-бьра у мә һʹьз дькә. Ләма жи әм гәрәке һʹьзкьрьнеда чʹәʹв бьдьнә Йаһоԝа у һе зедә дина хԝә бьдьнә сәр һʹӧнӧред ԝани баш. Чахе әм һәр тьшти дькьн, сәва хушк-бьред хԝә һʹьз бькьн, әм тʹьфаԛи у йәктийе ортʹа һәвда ԛәԝи дькьн (Фили. 2:1, 2). w19.08 9-10 ¶7-8

Йаһоԝа мәрьвед мьлук гәләк һʹьз дькә. Тʹәне һәләԛәтийа ԝан мәрьва йед кӧ бь рʹасти мьлук ьн, тʹәви Йаһоԝа гәләк незик у ширьн ә, ле «кʹӧбара» әԝ «дурва нас дькә». Һәр кәс жь мә дьхԝазә дьле Йаһоԝа ша кә у һʹьзкьрьна ԝийә гәрм тʹәхмин кә. Бәле, мәʹнийед мәйә фәрз һәнә, сәва мьлук бьн. Мәрьве мьлук хԝә сәр мәрьварʹа нагьрә, у ԛӧрʹәбун у бабахи нав ԝида тʹӧнә. Кʹьтеба Пирозда те готьне, ԝәки мәрьве мьлук фәʹм дькә, кӧ Йаһоԝа жь ԝи зортьр ә, у ньһерʹандьна ԝи һьндава мәрьва рʹаст ә. Әԝ ӧса жи фәʹм дькә, кӧ һәр мәрьвәк тьштәкида жь ԝи баштьр ә (Фили. 2:3, 4). Һьнә мәрьв тʹәне тенә кʹьфше, кӧ мьлук ьн. Мәсәлә, әԝана дьбәкә шәрмокә нә, йан жи һьндава мәрьвада бь ԛәдьр ьн у мәʹрифәт ьн, чьмки де-баве ԝан әԝана ӧса һин кьрьнә. Ле дьле хԝәда, әԝана дькарьн гәләк ԛӧрʹә бьн. Мәрьвед ӧса, зу йан дәрәнг, ԝе әʹйан бьн кӧ дьлда бь рʹасти ча ньн (Луԛа 6:45). w19.09 2 ¶1, 3-4

«Мьзгинийа дәрһәԛа Хӧдане мә Иса», ӧса жи те һʹәсабе һʹәму рʹастийед кӧ Иса һин дькьр. Әме бьдьнә кʹьфше кӧ гӧрʹа ве мьзгинийе дькьн, һәрге ԝан тьшта әʹмьре хԝәда бьдьнә хәбате. Әԝ те һʹәсабе Пʹадшатийа Хԝәде дайньн щийе пешьн, гӧрʹа принсипед Хԝәде бькьн, у мьзгинийа Пʹадшатийе бәла кьн (Мәт. 6:33; 24:14). Әԝ ӧса жи те һʹәсабе пьштгьрийа Мәсиһийед бь рʹӧһʹе пироз бьжарти бькьн, щабдарийед ԝани фәрзда (Мәт. 25:31-40). Әԝе зутьрәке «пәзед . . . дьн» хәлат кьн, бона ԛәнщийа ԝан, демәк пьштгьрийа ԝан (Йуһʹн. 10:16). Ле чаԝа? Пешийа дәстпека шәрʹе Һармәгәдоне, һʹәму 144 000 йед бьжарти ида ԝе сәр әʹзмана бьн, чаԝа рʹӧһʹед нәмьри. Әԝана һьнге ԝе бьбьнә пʹара ордийа әʹзмани, кʹижан кӧ ԝе ԛьрʹа Гог бинә, ле «әʹлаләтәкә . . . мәзьн», демәк щьмәʹта Йаһоԝа хьлаз кә (Әʹйан. 2:26, 27; 7:9, 10). Бәле, һьнге әԝ әʹлаләта мәзьн ԝе чьԛас ша бә, кӧ ԛәдьрәки ӧса бал ԝан һәбу, ԝәки пьштгьрийа Мәсиһийед бьжарти дькьрьн, һʹәта кӧ әԝана сәр әʹрде бун. w19.09 12-13 ¶16-18

Чьрʹа әм рʹьһʹәтийе дьстиньн у гәш дьбьн, чахе ԝи шьхӧли дькьн, кʹижан кӧ Иса да мә? Чьмки сәркʹаред мә лапә баш ьн. Йаһоԝа Сәркʹаре мәйи Һәри Мәзьн, нә ахаки бешекьр у дьлсар ә. Әԝ шьхӧле мә ԛимәт дькә (Ибрн. 6:10). У әԝ ԛәԝате дьдә мә, кʹижан кӧ мәрʹа лазьм ә, сәва шьхӧле ԝи биньн сери (2 Корн. 4:7; Галт. 6:5). Пʹадшайе мә Иса, мәсәләкә лапә баш мәрʹа һиштийә, кӧ әм гәрәке һьндава мәрьвада ча бьн (Йуһʹн. 13:15). Рʹуспийед кӧ шьвантийе мә дькьн, чʹәʹв дьдьнә «сәрәк шьван», демәк Иса (Ибрн. 13:20; 1 Пәт. 5:2). Әԝана сәр хԝә дьхәбьтьн сәва һьндава һʹәмуйада һʹәйф бьн, мә ԛәԝи кьн у мерхас бьн, чьмки әԝана мә һин дькьн у мьԛати мә дьбьн. Ӧса жи һәвалед мәйи лапә баш һәнә. Ве дьнйайеда һәвалед тʹӧ кәси ӧса дәлал у бь һʹьзкьрьн ниньн чаԝа һәвалед мә, у шьхӧләки ӧса тӧ кәс накә, чь кӧ әм дькьн. Һәла бьфькьрьн: Ԛәдьрәки мәйи ӧса һәйә, кӧ әм тʹәви ԝан мәрьва һәвкʹарийе дькьн, йед кӧ нав-намус дьжин, ле хԝә жь кәсәки четьр һʹәсаб накьн. Әԝана мәрьва сәр хԝәрʹа дьгьрьн. Әԝана мә нә тʹәне ча һʹәвалхәбатчи һʹәсаб дькьн, ле ча дост. У һʹьзкьрьна ԝан һьндава мә ӧса ԛәԝи йә, кӧ әԝана һәла һе һазьр ьн әʹмьре хԝә жи бона мә бьдьн! w19.09 20 ¶1; 23 ¶12-14

Әԝ ширәта Паԝлос мәрʹа нишан дькә, кӧ чаԝа бона «рʹожа Хӧдан» һазьр бьн (1 Тʹеслн. 5:1-6). Ве рʹезеда әԝ рʹож дәрһәԛа ԝи ԝәʹдәйи те готьне, кʹижан кӧ ԝе дәстпебә пе кʹӧтакьрьна Бабилона Мәзьн, демәк империйа религийед ԛәлп, у ԝе бь Һармәгәдоне хьлаз бә (Әʹйан. 16:14, 16; 17:5). Паԝлос ӧса жи дьбежә, ԝәки әм гәрәке «хәԝеда нәминьн мина йед майин», ле «һʹьшйар» бьминьн, ԝәки тʹәвнәбуйине хԝәй кьн, демәк нәкʹәвьнә нава шьхӧлед политики, йан на әм дькарьн бьбьнә «пʹара дьнйайе» (Йуһʹн. 15:19). Әм заньн ԝәки тʹәне Пʹадшатийа Хԝәде ԝе әʹдьлайе бинә сәр дьнйайе. Әм гәрәке хԝәха һʹьшйар бьминьн, ӧса жи лазьм ә али мәрьва бькьн, кӧ һʹьшйар бьн у һаш пе һәбьн кӧ Кʹьтеба Пироз чь пʹехәмбәрти дькә дәрһәԛа ахьрийа дьнйайе. Гава тәнгасийа мәзьн дәстпебә, ида ԝе гәләк дәрәнг бә мәрьв бенә бал Йаһоԝа. Ләма жи шьхӧле бәлакьрьна мьзгинийе гәләк фәрз ә! w19.10 8 ¶3; 9 ¶5-6

Чахе ԝана ньвисара кʹьтеба гӧломәтккьри хьлаз кьрьн, Йерәмйа итʹбарийа хԝә һәвале хԝә Барук ани, кӧ әве әʹламәтийе бьгьһинә щьмәʹте (Йерәм. 36:5, 6). Барук бь мерхаси әԝ шьхӧле хоф ани сери. Бьдьнә бәр чʹәʹве хԝә, чаԝа Йерәмйа Барукрʹа фьрнаԛ дьбу, чахе әԝ кʹәтә һʹәйата пʹарьстгәһе у бәр щьмәʹте әв кʹьтеба гӧломәтккьри хԝәнд (Йерәм. 36:8-10). Сәрокед Щьһудайе чахе бьһистьн Барук чь кьр, жерʹа фәрман дан кӧ бе бал ԝан у ԝанрʹа әве кʹьтеба гӧломәтккьри бьхунә (Йерәм. 36:14, 15). Сәрока сафи кьрьн, ԝәки пʹадша Йаһойакимрʹа гьли кьн, кӧ Йерәмйа чь әʹлам кьр. Пʹадша Йаһойаким, чахе бьһист гьлийед кӧ Йерәмйа ве кʹьтеба гӧломәтккьрида ньвисибу, әԝ ӧса һерс кʹәт кӧ әв кʹьтеб шәԝьтанд, у фәрман да, ԝәки Йерәмйа у Барук бенә гьртьне. Ле Йерәмйа кʹьтебәкә гӧломәтккьрийә тʹәзә һьлда, да Барук у гьлийед Йаһоԝа диса жерʹа гот у Барук жи «һʹәму готьнед пʹьртука кӧ ԛьрал Йәһойаким дь агьрда шәԝьтандийә» ньвиси (Йерәм. 36:26-28, 32). w19.11 3-4 ¶4-6

Йаһоԝа дькарә бьбә кәсе лазьм, сәва кӧ ԛьрара хԝә бинә сери. Мәсәлә, Йаһоԝа дьбә Дәрсдар, Баве бәрдьлийе, у Мьзгиндар. Әԝ тʹәне чәнд мәсәлә нә, кӧ ча әԝ дькарә бьбә кәсе лазьм (Иша. 48:17; 2 Корн. 7:6; Галт. 3:8). Ле әԝ гәләк щар мәрьва дьдә хәбате, сәва ԛьрара хԝә бинә сери (Мәт. 24:14; 28:19, 20; 2 Корн. 1:3, 4). Йаһоԝа ӧса жи дькарә биланийе у ԛәԝате бьдә мә һәр кәси, ԝәки әм бьбьнә кәсед лазьм, сәва ԛьрара ԝи биньн сери. Наве ԝи һәма әԝ йәк те һʹәсабе, кӧ әԝ һьн хԝә, һьн жи әʹфьринед хԝә дькарә бькә кәсе лазьм, чаԝа кӧ гәләк зандар ве нета наве Йаһоԝа шьровәдькьн. Һәр кәс жь мә дьхԝазә дәсте Йаһоԝада керһати бә. Ле һьнәк дьбәкә дӧдьли нә, кӧ Йаһоԝа ԝана дьдә хәбате йан на. Чьрʹа? Чьмки әԝана жь бо әʹмьре хԝәйи мәзьн, дәрәщед хԝә, йан жи фәрәсәтед хԝә һаԛас нькарьн бькьн чьԛас дьхԝазьн. Ле һьнәк жи дьфькьрьн, ԝәки әԝана епʹещәйи дькьн, у нахԝазьн һе зедә бькьн у пешда һәрʹьн. w19.10 20 ¶1-2

Пʹәрәһʹьзи дькарә баԝәрийа мә сьст кә у әм ида кем Йаһоԝарʹа хьзмәт кьн. Паԝлосе шанди гот: «Тʹӧ әскәр шьхӧле бьнәʹлитийева мьжул набә, ԝәки ль сәрәскәр хԝәш бе» (2 Тимтʹ. 2:4). Мәсәлә, әскәред Рʹомерʹа изьн тʹӧнә бу шьхӧлед майин бькьн. Мина әскәред баш, әм нахԝазьн һʹьше мә жь нета мәйә сәрәкә һәрә, демәк әм дьхԝазьн дьле Сәрокед хԝә Йаһоԝа у Мәсиһ, ша кьн. Әԝ тьштәки дьһа ԛимәт ә, нә кӧ тьштед дьнйа Шәйтʹанда. Ләма әм гәрәке тʹьме хԝә бьщерʹьбиньн, һәла ԝәʹдә у ԛәԝата мә һәйә, кʹижан кӧ мәрʹа лазьм ә сәва Йаһоԝарʹа хьзмәт кьн, у ӧса жи мәртʹала баԝәрийе у чʹәкед майин һʹаләки башда хԝәй кьн. Әм гәрәке һәр гав сәр хԝә бьн! Чьрʹа? Паԝлосе шанди гот, ԝәки «әԝед кӧ дьхԝазьн дәԝләти бьн» ԝе «жь баԝәрийе» бьхальфьн (1 Тимтʹ. 6:9, 10). w19.11 17 ¶12, 14-15

Әʹламәти кӧ «дьне сәԛьри у бехофи йә», ԝе пешийа дәстпека «рʹожа Йаһоԝа, ДТʹ» бе әʹламкьрьне (1 Тʹеслн. 5:1-6). 1 Тʹесалоники 5:2-да, «рʹожа Йаһоԝа» те һʹәсабе «тәнгасийа мәзьн» (Әʹйан. 7:14). Ле ча әме пебьһʹәсьн, ԝәки әԝ тәнгасийа мәзьн ва ида ԝе дәстпебә? Кʹьтеба Пироз дьбежә, кӧ әʹламәтийа мәхсус ԝе бе әʹламкьрьне. Әԝ әʹламәти ԝе бьбә нишан, кӧ тәнгасийа мәзьн ида бәр шемике йә. Ль гора пʹехәмбәртийе, ԝе бе әʹламкьрьне, кӧ «дьне сәԛьри у бехофи йә». Гәло ԝе сәрԝеред религийа жи тʹәви ԝан бьбьнә йәк? Дьбәкә жи. Чь жи һәбә, йәкә әԝ әʹламәти ԝе дәрәԝа жь щьна бә. Ле әԝ дәрәԝи ԝе гәләк хоф бә, чьмки ԝе мәрьва бьхальфинә, йанчь әԝана ида бехофийеда ньн, ле бь рʹасти ԝе бәр шемика тәнгасийа һәрә мәзьн бьн, кʹижан кӧ тʹәрихийа инсанәтеда тʹӧ щара тʹӧнә буйә. Бәле, «һьнге хәзәбе ньшкева сәр ԝанда бе, мина еша кʹӧлфәта һʹәмлә». Ле хьзмәткʹаред Йаһоԝайи амьн һьнге ԝе ча бьн? Рʹаст ә дьбәкә әԝана әʹщебмайи бьминьн кӧ рʹожа Йаһоԝа ньшкева дәстпебу, чьмки әԝана ԝәʹдә ньзаньн, ле йәкә әԝана бона ве рʹоже ԝе һазьр сәкьни бьн. w19.09 9 ¶7-8

Гава һун сафикьрьна дькьн, нетед конкрет дайньн пешийа хԝә. Ӧса ԝәрʹа ԝе дьһа һеса бә сафикьрьна биньн сери. Мәсәлә, бәʹса хәбәре ԝә хԝәрʹа сафи кьрийә, кӧ һәр гав Кʹьтеба Пироз бьхуньн. Ле һәрге ԝә плана бона хԝәндьне конкрет кʹьфш нәкьрийә, ԝәрʹа ԝе чәтьн бә  әве нета хԝә биньн сери. Йан жи мәсәлә, рʹуспийед щьватеда сафи кьрьнә, ԝәки һе зедә сәрледанед шьвантийе бькьн, ле ԝәʹдә дәрбаз бу, ԝана нета хԝә нәани сери. Ԝана дькарьбун ԝан пьрса бьдьнә хԝә, сәва әве сафикьрьне биньн сери: «Мә ԛә конкрет сафи кьрийә, кӧ кʹижан хушк-бьрарʹа лазьм ә сәрледанед шьвантийе бькьн? Мә ԝәʹдә кʹьфш кьрийә, кӧ кʹәнге тʹәсәлийа ԝан бькьн?» Бь реали бьньһерʹә сәр дәрәща хԝә. Бал мә һәр кәси һаԛас ԝәʹдә, тьшт, у ԛәԝат тʹӧнә йә, ԝәки һәр тьшти бькьн чь әм дьхԝазьн. Ләма жи әм гәрәке бь реали у рʹаст бьньһерʹьн сәр дәрәща хԝә. Щара дьбәкә лазьм бә һун сафикьрьна хԝә бьгӧһезьн, чьмки ԛәԝата ԝә нагьһиже кӧ ве йәке биньн сери. w19.11 29 ¶11-12

Ахьрийеда жийина сәр әʹрде ԝе ӧса бә, ча Ишайа 65:21-23-да һатийә пʹехәмбәртикьрьне. Ле әме ԝедәре бешьхӧл нибьн. Кʹьтеба Пироз әʹйан дькә, ԝәки ԝи чахи щьмәʹта Хԝәде ԝе шьхӧләки керһати бькә, кʹижан кӧ ԝе шабуне бинә. Хьлазийа Һʹәзарсалийе, әм дькарьн ида дӧдьли нәбьн, кӧ «әʹфьрине хԝәха жи жь ԝе хӧламтийа пʹучʹ аза бьн у тʹәви азайи у рʹумәта зарʹед Хԝәде бьн» (Рʹом. 8:21). Чаԝа кӧ Йаһоԝа ӧса организә кьр, ԝәки ԝәʹде Исраелийа һәбә һьн бона хәбате у һьн жи бона һесабуне, әԝ ԝе ӧса жи ԝәʹде Һʹәзарсалийа Сәрԝертийа Мәсиһ ӧса бькә. Ԝедәре ԝе ԝәʹде мә һәбә, ԝәки шьхӧлед рʹӧһʹани жи бькьн. Сәва әм иро бәхтәԝар бьн, әм гәрәке Хԝәде бьһʹәбиньн, у дьнйа тʹәзәда жи ԝе ӧса бә. Бәле, һʹәму мәрьвед амьн ԝәʹде Һʹәзарсалийа Сәрԝертийа Мәсиһ ԝе әʹмьре хԝәрʹа ша бьн, чьмки гьшк ԝе Йаһоԝа бьһʹәбиньн у шьхӧлед баш бькьн. w19.12 12 ¶15; 13 ¶17-18

Кәсәки «һини» тьштәки бькьн, әԝ те һʹәсабе «һин кьн у гәләк щар биньн бире». Бона ве йәке, де-бав гәрәке һәр гав бона зарʹед хԝә ԝәʹдә хәрщ кьн. Щара де-бав гәләк дьԝәстьн, кӧ зарʹед хԝәрʹа ширәта бьԝәкʹьлиньн. Ле йәкә де-бав әве йәке ча мәщал һʹәсаб дькьн, сәва али зарʹед хԝә бькьн, ԝәки Хәбәра Хԝәде фәʹм кьн у әʹмьре хԝәда бьдьнә хәбате. Ләма жи зарʹед хԝә рʹьнд нас кьн. Зәбур 127 зарʹа бәрамбәри тира дькә (Зәб. 127:4). Чаԝа кӧ тир дькарә жь щурʹә-щурʹә материал бә у чапа ԝан жи щӧдә бә, һәр зарʹ жи щурʹәки йә. Ләма де-бав гәрәке сафи кьн, кӧ чаԝа һәр зарʹәкә хԝә һин кьн у ширәт кьн. Жьн-мерәк жь Исраела иройин, йед кӧ дӧ зарʹед хԝә ӧса мәзьнкьрьнә кӧ Йаһоԝарʹа хьзмәт кьн, дьбежьн ԝәки ве йәкеда чь али ԝан кьр: «Мә һинбуна Кʹьтеба Пироз тʹәви һәр зарʹәкә хԝә башԛә дәрбаз дькьр». Фәʹмдари йә, ԝәки һәр малхе мале ԝе сафи кә, кӧ ча лазьм ә зарʹед хԝә һин кә. w19.12 26-27 ¶18-20

Әм гәләк рʹази нә ԝан мәрьварʹа, йед кӧ пе шьхӧле хԝә тәнгасийада али мә дькьн! Райан, баве кʹижани ньшкева жь бо ԛәзийе  мьр, дьбежә: «Чахе дәрд дькʹьшини, гәләк шьхӧлед һәррʹожи бона тә гьран дьбьн у нькари бьки. Ләма аликʹарийа һәла һе тьштед бьчʹукда жи, гәләк дьлбинийе дьдә». Бир нәкьн, ԝәки һун дькарьн дьлбиникә мәзьн бьдьнә мәрьва һәла һе пе кьред бьчʹук жи. Марԛос шагьрте ԛьрʹна йәке шьхӧлһʹьз бу. Ле Марԛос  ӧса жи ԝәʹдә дьдит, сәва дьлбинийе бьдә Паԝлосе шанди, у Паԝлос аза дькарьбу жь ԝи аликʹарийе бьхԝазә. Ангела, нәфәра кʹижане берʹәʹмти кӧштьн, дьбежә кӧ әԝ чьԛас рʹази бу жь ԝана, йед кӧ бәр дьле ԝеда дьһатьн. Әԝ дьбежә: «Чахе һәвал бь дьл у щан дьхԝазьн аликʹарийе бьдьнә тә, гәләк һеса йә тʹәви ԝан хәбәр ди. Те кʹьфше, ԝәки әԝана дьхԝазьн али тә бькьн у ве йәкеда хԝә нагьрьн». Әм дькарьн пьрсе бьдьнә хԝә: «Мьн ӧса нас дькьн ча мәрьвәки кӧ дьлбинийе дьдә у һазьр ә аликʹарийе бьдә?» w20.01 11-12 ¶14-16

Чаԝа йе бьжарти дькарә «нәлайиԛи» симболед Биранине бьхԝә у вәхԝә? Әԝ йәк ԝе нәлайиԛи бә, һәрге әԝ пе ԛанун у принсипед Йаһоԝа нажи (Ибрн. 6:4-6; 10:26-29). Йед бьжарти фәʹм дькьн, кӧ һәрге әԝана дьхԝазьн «ләщхәлата жорчуйине, аԝа готи газийа Хԝәдейә бь сайа Мәсиһ Иса» бьстиньн, гәрәке Хԝәдерʹа һʹәта хьлазийе амьн бьминьн (Фили. 3:13-16). Йаһоԝа пе рʹӧһʹе хԝәйи пироз али хьзмәткʹаред хԝә дькә, ԝәки мьлук бьн, нә кӧ ԛӧрʹә бьн (Әфәс. 4:1-3; Колс. 3:10, 12). Ләма йед кʹьфшкьри тʹӧ щар нафькьрьн, ԝәки әԝана жь Мәсиһийед майин баштьр ьн. Әԝана заньн, кӧ бьжартьна ԝан надә кʹьфш, ԝәки Йаһоԝа әʹсә рʹӧһʹе хԝәйи пироз һе зедә дьдә ԝана, нә кӧ хьзмәткʹаред майин. Әԝана һʹәсаб накьн, ԝәки әԝана Кʹьтеба Пироз жь хушк-бьра четьр заньн. У әԝана тʹӧ щар ԝе кәсәки һелан нәкьн у нәбежьн, ԝәки әԝ жи бьжарти йә у гәрәке дәстпекә симбола бьхԝә у вәхԝә. Дәԝсе, әԝана бь мьлукти тиньн сәр хԝә, ԝәки тʹәне Йаһоԝа сафи дькә кӧ кʹе һәрә әʹзмана. w20.01 27-28 ¶4-5

Йаһоԝа дьхԝазә, ԝәки әм досте ԝи бьн у тʹәви ԝи хәбәр дьн. Әԝ мәрʹа дьбежә, ԝәки әм «һәр гав дӧа бькьн», у әԝ тʹьме гӧһ дьдә мә (Рʹом. 12:12). Әԝ тʹьме һазьр ә у тʹӧ щар наԝәстә гӧһ бьдә мә. Ле әм гӧһ дьдьнә ԝи, чахе Хәбәра ԝи дьхуньн, у ӧса жи әʹдәбйәтед дьн, кʹижан кӧ али мә дькьн Хәбәра ԝи фәʹм кьн. Әм ӧса жи ԝи дьбьһен, чахе бәрнамед щьвата рʹьнд гӧһ дьдьн. Һәрге әм һәр гав тʹәви Йаһоԝа хәбәр дьн у гӧһ бьдьнә ԝи, әме незики ԝи бьминьн. Йаһоԝа дьхԝазә, ԝәки әм дӧайед хԝәда дьле хԝә жерʹа вәкьн (Зәб. 62:8). Ләма жи ԝе баш бә әм пьрсе ӧса бьдьнә хԝә: «Гәло дӧайед мьн һәр щар мина һәв ьн, йан әз Йаһоԝарʹа гьли дькьм чь дьле мьнда һәйә?» Бешьк, һун Йаһоԝа гәләк һʹьз дькьн, у дьхԝазьн кӧ һәләԛәтийа ԝә тʹәви ԝи незик бә. Ләма жи һун гәрәке тʹьме тʹәви ԝи хәбәр дьн. Итʹбарийа хԝә ԝи биньн у жерʹа гьли кьн дьле ԝәда чь йә. Жерʹа гьли кьн чь ԝә ша дькә, у чь дьле ԝә дешинә. Дӧдьли нәбьн, ԝәки һун тʹьме дькарьн жь ԝи аликʹарийе бьхԝазьн. w20.02 9 ¶4-5

Йаһоԝа щабдарийа фәрз да рʹуспийа, кӧ шьвантийе щьмәʹта ԝи бькьн. Рʹуспи дькарьн жь сәрһатийа Нәһәмийа гәләк тьшт һин бьн, кӧ әԝ ча бу һьндава щьмәʹта Йаһоԝа. Һʹӧкӧме ԝи мәзьн бу, чьмки әԝ сәрԝере Щьһудайе бу (Нәһәм. 1:11; 2:7, 8; 5:14). Бьдьнә бәр чʹәʹве хԝә, Нәһәмийа рʹасти чь чәтьнайа һат. Әԝ пеһʹәсийа кӧ щьмәʹте пʹарьстгәһ һʹәрам кьрийә, у ль гора Ԛануне Леԝийарʹа пʹәра ԛӧрбан накьн. Щьһуйа ӧса жи ԛануна дәрһәԛа рʹожа Шәмийе жи дьтʹәрʹьбандьн, у һьнәка жь ԝан жьнед хәриб стандьн. Ча сәрԝер, Нәһәмийа гәрәке әв дәрәща чәтьн сафи кьра (Нәһәм. 13:4-30). Нәһәмийа тʹӧ щар һʹӧкӧме хԝә нәдьда хәбате, сәва дәсте зоре щьмәʹта Хԝәде бинә сәр фькьред хԝә. Дәԝсе әԝи бь дьл у щан Йаһоԝарʹа дӧа дькьр, ԝәки рʹебәрийе бьдә ԝи у ӧса жи әԝи щьмәʹт Ԛануна Йаһоԝа һин дькьр (Нәһәм. 1:4-10; 13:1-3). Нәһәмийа ӧса жи бь мьлукти тʹәви щьмәʹте дьхәбьти, һәла һе жи авакьрьна диԝаред Оршәлимеда али ԝан дькьр (Нәһәм. 4:15). w19.09 16 ¶9-10