Тʹәбах

Гава пәй Иса дькʹәтьн, әԝ һьнге жи дьлрʹьһʹәт дьма, чьмки заньбу кӧ әԝ дьле Баве хԝә ша дькә. Әԝ гӧрʹа Баве хԝәда дьма, гава жерʹа чәтьн бу. Әԝи Баве хԝә һʹьз дькьр, у хьзмәтийа Йаһоԝарʹа әʹмьре ԝида щийе пешьн дьгьрт. Пешийа кӧ әԝ бьһата сәр әʹрде, әԝ һостәйе Хԝәде бу (Мәтʹлк. 8:30). У чахе әԝ сәр әʹрде бу, әԝи бь хирәт мәрьв дәрһәԛа Баве хԝә һин дькьрьн (Мәт. 6:9; Йуһʹн. 5:17). Әԝи шьхӧли Исарʹа шабунәкә лапә мәзьн дьани (Йуһʹн. 4:34-36). Әм чʹәʹв дьдьнә Иса, гава гӧрʹа Йаһоԝада дьминьн у «һәр гав шьхӧле Хӧданда» пешда дьчьн (1 Корн. 15:58). Чахе әм «бь хирәт» мьзгинийе бәла дькьн, әм сәр проблемед хԝә дьһа сьвьк дьньһерʹьн (Кʹар. Шанд. 18:5). Хьзмәтийеда әм рʹасти мәрьвед ӧса тен, проблемед кʹижана жь йед мә зедәтьр у хьрабтьр ьн. Ле чахе әԝана һин дьбьн Йаһоԝа һʹьз бькьн у ширәтед ԝи биньн сери, әʹмьре ԝан дьһа баш дьбә у әԝана дьһа бәхтәԝар дьбьн. Һәр щар чахе әм әԝе йәке дьвиньн, баԝәрийа мә һе ԛәԝи дьбә кӧ Йаһоԝа ԝе тʹӧ щар мә нәһелә у али мә бькә. w19.04 10-11 ¶8-9

Әԝан мәрьва алийе хԝәда һәр тьшт кьрьн, ԝәки мьԛабьли рʹӧһʹед хьраб бьсәкьньн. Кʹьтебед ԝанә сербазийе гәләк бьһа бун, ле йәкә ԝана әԝ кʹьтеб нә кәсәкирʹа дан нә жи фьротьн, ле бь тʹәмами кʹӧта кьрьн. Ԝанрʹа фәрз нибу кӧ баһе ԝан кʹьтеба чьԛас ә, ле фәрз бу ԝәки дьле Йаһоԝа ша кьн. Ле ча әм дькарьн чʹәʹв бьдьнә ԝан Мәсиһийед ԛьрʹна йәке? Ԝе аԛьлайи бә һәр тьштед кӧ сербазийева гьредайи нә, кʹӧта кьн. Мәсәлә, тәлисмә, чʹәʹвшинк, у тьштед майин кӧ мәрьв хԝә дькьн йан жи хԝәй дькьн, сәва рʹӧһʹед хьраб зийане нәдьнә ԝан (1 Корн. 10:21). Ԝәʹдәдәрбазкьрьне фәсал бьжберьн. Пьрсе бьдьнә хԝә: Гәло ԝәʹдәдәрбазкьрьна мьн тьштәки сербазийева гьредайи йә, мәсәлә вампир, зомби йан жи тьштед нәмәрьвайива? Чахе һун сафи кьн кӧ кʹижан ԝәʹдәдәрбазкьрьна бьжберьн, йед ӧса бьжберьн, кӧ һун дур бьн жь ԝан тьшта, кӧ бәр чʹәʹве Йаһоԝа рʹәш ьн. Әм дьхԝазьн ԝәки һәр тьшти бькьн, сәва бәр Хԝәде исафа мә рʹьһʹәт бә (Кʹар. Шанд. 24:16). w19.04 22-23 ¶10-12

Чахе рʹуспи педьһʹәсьн, кӧ кәсәки гӧне гьран кьрийә, әԝана гәрәке дәрһәԛа гәләк тьшта кʹур бьфькьрьн. Нета ԝанә лапә фәрз әԝ ә, ԝәки Йаһоԝа һӧрмәт бә у наве ԝи бе рʹумәткьрьне (Ԛан. Кʹаһ. 22:31, 32; Мәт. 6:9). Әԝана ӧса жи хәм дькьн бона рʹӧһʹанийа хушк-бьред щьвате, у дьхԝазьн али ԝан бькьн, һьндава кʹижанада гӧне гьран һатийә кьрьне. Һьн жи, һәрге кәсәк, йе кӧ пʹара щьвате йә, гӧне гьран кьрийә, рʹуспи гәрәке тедәрхьн һәла әԝ бь рʹасти пʹошман буйә у тʹобә дькә йан на. Һәрге әре, рʹуспи һʹәму тьшти дькьн, сәва али ԝи бькьн, ԝәки әԝ һәләԛәтийа хԝә тʹәви Йаһоԝа диса вәгәрʹинә (Аԛуб 5:14, 15). Мәсиһийе кӧ пәй хԝәстьна хьраб кʹәтийә у гӧне гьран кьрийә, рʹӧһʹанида нәхԝәш ә. Әԝ те һʹәсабе, ԝәки әԝи һәләԛәтийа хԝә тʹәви Йаһоԝа хьраб кьрийә. Рʹуспи чаԝа һʹәкимед рʹӧһʹани нә, ләма әԝана алийе хԝәда һʹәму тьшти дькьн, сәва «йе нәхԝәш», демәк йе кӧ гӧне гьран кьрийә, ԛәнщ кьн. Ширәтед рʹуспийа сәр һʹиме Кʹьтеба Пироз, ԝе али ԝи бькьн, ԝәки һәләԛәтийа хԝә тʹәви Хԝәде вәгәрʹинә, ле тʹәне һәрге әԝ бь рʹасти гӧне хԝә тʹобә дькә (Кʹар. Шанд. 3:19; 2 Корн. 2:5-10). w19.05 10 ¶10-11

Йаһоԝа дькарә хԝәстьне бькә дьле мә, сәва фьлан шьхӧли бькьн. Мәсәлә, әм пеһʹәсийанә, ԝәки щьватеда кәсәкирʹа йан жи шьхӧләкида аликʹари лазьм ә. Дьбәкә әм пьрсе дьдьнә хԝә: «Әз чьда дькарьм аликʹарийе бьдьм?» Йан жи дьбәкә мәрʹа шьхӧләки гьран данә, ле әм дӧдьли нә, әме бькарьбьн әԝи шьхӧли рʹьнд бькьн йан на. Йан жи паши хԝәндьна рʹезед жь Хәбәра Хԝәде, дьбәкә әм хԝәрʹа дьфькьрьн: «Чаԝа әз дькарьм пе ԝан рʹеза али мәрьва бькьм?» Фәʹмдари йә, Йаһоԝа ԝе тʹӧ щар зоре мә нәкә тьштәки бькьн. Ле чахе Йаһоԝа дьвинә кӧ әм хԝә дьщерʹьбиньн, әԝ дькарә хԝәстьне у ԛәԝате бьдә мә, ԝәки әм бькьн ве йәке, дәрһәԛа чь кӧ фькьрин. Йаһоԝа дькарә ӧса жи ԛәԝате бьдә мә, кӧ ԛьрара ԝи биньн сери (Иша. 40:29). Әԝ рʹӧһʹе хԝәйи пироз дьдә мә, сәва әм фәрәсәтед хԝә һе баш кьн (Дәркʹ. 35:30-35). Йаһоԝа бь сайа тʹәшкиләта хԝә мә һин дькә, кӧ чаԝа фьлан шьхӧлида һе пешда һәрʹьн у һе рʹьнд бькьн. Һәрге һун шьхӧләки ньзаньн ча бькьн, аликʹарийе бьхԝазьн. Ӧса жи һун һәр гав дькарьн жь Баве мәйи әʹзмана кӧ мәрʹд ә, һиви кьн сәва «зорʹайийа ԛәԝате жь Хԝәде» бьстиньн (2 Корн. 4:7; Луԛа 11:13). w19.10 21 ¶3-4

Иро әԝ дьнйа мәрьва һелан дькә, кӧ хԝәһʹьз бьн. Әнсиклопедийакеда те готьне, ԝәки салед 1970-1979-да, кʹьтебед ӧса бәлабуйи бун, кʹижанада ширәт дьһатьнә дайине, ԝәки чаԝа әʹмьре хԝәда пешдачуйи бьн. Һьнә кʹьтеба, «хԝәндәван һелан дькьрьн, ԝәки нәлазьм ә бенә гӧһастьне, у нәфькьрьн ԝәки тьштәки хьраб нав ԝанда һәйә». Мәсәлә, дина хԝә бьдьне, кʹьтебәкеда чь дьһатә готьне: «Хԝә һʹьз бькә, чьмки тӧ нава дьнйайеда кәсе лапи бәдәԝ, һежа у мәхсус и». Ве кʹьтебеда ӧса жи дьһатә готьне, ԝәки мәрьв гәрәке хԝәха сафи кә, кӧ ча рʹабә-рʹуне у ве йәке бькә чь кӧ әԝ һʹәсаб дькә рʹаст ә у ча жерʹа дәст дьдә. Ньһерʹандьна ԝи щурʹәйи дьбәкә ԝәрʹа нас ә. Шәйтʹан Һеԝа һәма бәрбь ԝе йәке һелан кьр. Әԝи готә ԝе, кӧ әԝ дькарә «мина Хԝәде, ԛәнщи у хьрабийе» жь һәв дәрхә (Дәстп. 3:5). Иро гәләк мәри ӧса бабах ьн, ԝәки һʹәсаб дькьн кӧ тӧ кәс, һәла һе Хԝәде жи, нькарә ԝанрʹа бежә чь рʹаст ә у чь хьраб ә. Мәсәлә, ньһерʹандьна ԝи щурʹәйи илаһи те кʹьфше ве йәкеда, кӧ мәрьв ча дьньһерʹьн сәр зәԝаще. w19.05 23 ¶10-11

Щара дәрдед Даԝьд Пʹадша пʹьрʹ гьран бун. Бьфькьрьн әԝ рʹасти чь кӧл-дәрда һат. Әԝ дьнәʹлийа, чьмки гәләк шаши бәрʹдабу (Зәб. 40:12). Кӧрʹе ԝи Абшалом мьԛабьли ԝи рʹабу, жь бо чь жи ахьрийеда мьр (2 Сам. 15:13, 14; 18:33). У һәваләки ԝийи лапи незик жи, нәмамийа ԝи кьр (2 Сам. 16:23–17:2; Зәб. 55:12-14). Гәләк зәбуред кӧ Даԝьд ньвиси, дьдьнә кʹьфше кӧ әԝ чьԛас дьлшкәсти бу, ле йәкә бь тʹәмами итʹбарийа хԝә Йаһоԝа дьани (Зәб. 38:5-10; 94:17-19). Ԝәʹдә шунда, зәбурбежәки дәстпекьр һʹәвсудийе мәрьвед хьраб бькә. Дьԛәԝьмә әԝ жь зӧрʹәте Асафе Леԝи бу, у «пирозгәһа Хԝәдеда» хьзмәт дькьр. Әԝ емосийалида кʹәтә стресе, чь кӧ бу мәʹни кӧ әԝи һеди-һеди шабуна хԝә ӧнда кьр у әʹмьре хԝәрʹа ша нәдьбу. Әԝ һәла һе жи ида дӧдьли дьбу, кӧ хьзмәти кʹәрәма тинә (Зәб. 73:2-5, 7, 12-14, 16, 17, 21). w19.06 17 ¶12-13

Шәйтʹан хԝәстьнед мәрьвайә тʹәбийәти дьдә хәбате. Мәсәлә, хԝәстьна мәйә тʹәбийәти һәйә, кӧ пʹешә йан тьштед тʹәзә һин бьн, сәва кӧ әʹбура хԝә у нәфәред хԝә бькьн (1 Тимтʹ. 5:8). Гәләк щар әм ԝан пʹеша йан фәрәсәта ԛазанщ дькьн, чахе мәкʹтәбеда рʹьнд һин дьбьн. Ле әм гәрәке ве йәкеда фәсал бьн. Гәләк ԝәлатада, мәкʹтәбада у университетада хенщи пʹешә, ӧса жи философийайе һин дькьн, демәк биланийа мәрьвайи. Мәкʹтәбада шьке дькьнә дьле шагьрта, кӧ Хԝәде тʹӧнә йә, у ԛәдьре Кʹьтеба Пироз дехьн. Ԝанрʹа дьбежьн, ԝәки һʹәму мәрьвед аԛьл баԝәр дькьн, кӧ әʹмьр пе еволусийайе пешда һатийә (Рʹом. 1:21-23). Ле әԝ һинкьрьн бь тʹәмами мьԛабьли «сәрԝахтийа Хԝәде» нә (1 Корн. 1:19-21; 3:18-20). Хԝәрʹа ԛьрар кьн, ԝәки тʹӧ щар нәкʹәвьнә бәр байе философийа у «хапандьна пʹучʹ» йа ве дьнйа Шәйтʹан (Колс. 2:8). Тʹӧ щар нәһельн, ԝәки Шәйтʹан ԝә бьхальфинә (1 Корн. 3:18). Тʹӧ щар изьне нәдьнә ԝи, ԝәки ӧса бькә, кӧ һун Йаһоԝа бир кьн. Пе принсипед Йаһоԝа бьжин. Тʹӧ щар изьне нәдьн Шәйтʹан, ԝәки ԝә бькә ве тʹәльке, кӧ һун ширәтед Йаһоԝа пьшт гӧһе хԝәва бавежьн. w19.06 5 ¶13; 7 ¶17

Фьрԛи тʹӧнә һун чь тʹемайе бьжберьн, бьфькьрьн дәрһәԛа ԝан мәрьва, йед кӧ ԝе гӧһ бьдьнә ԝә. Бьдьнә бәр чʹәʹве хԝә, кӧ чахе әԝана пебьһʹәсьн кӧ бь рʹасти Кʹьтеба Пироз чь һин дькә, ԝе кʹарәкә чьԛас мәзьн бьстиньн. Чахе һун тʹәви ԝан хәбәр дьдьн, гәләк фәрз ә кӧ гӧһ бьдьнә ԝан у ԛәдьре ньһерʹандьна ԝан бьгьрьн. Ӧса һуне ԝана һе рʹьнд фәʹм бькьн, у әԝана ԝе бьхԝазьн һе зедә гӧһ бьдьнә ԝә. Ԝәрʹа дьбәкә ԝәʹдә лазьм бә, сәва сәрледана бькьн, һʹәта мәрьв ԛайил бә Кʹьтеба Пироз һин бә. Ле чьрʹа? Чьмки мәрьв дьбәкә малда ниньн чахе әм дьчьнә мала ԝан. Ӧса жи дьбәкә лазьм бә чәнд щара сәрледана бькьн, сәва кӧ хԝәйе мале тʹәви мә хԝә һеса тʹәхмин кә у һинбуна Кʹьтеба Пироз ԛәбул кә. Бир нәкьн, шинкайи һьнге мәзьн дьбә, чахе һәр гав авдьдьн. Мина ве йәке, һʹьзкьрьна мәрьва жи һьндава Йаһоԝа у Иса Мәсиһ һьнге мәзьн дьбә, чахе һәр гав дәрһәԛа Хәбәра Хԝәде тʹәви ԝан шеԝьр дькьн. w19.07 14 ¶1; 15-16 ¶7-8

Иса чь дьхԝаст бьгота? Әԝи нә гот, ԝәки Мәсиһи ԝе ша бьн кӧ бәр чʹәʹве мәрьва рʹәш бьн. Ле әԝи пешда гот, кӧ чь дькарә бе сәре мә. Әм нә пʹара ве дьнйайе нә. Әм дьжин ль гора һинкьрьнед Иса у ԝе мьзгинийе бәла дькьн, кʹижан кӧ әԝи бәла дькьр. Ләма жи әм бәр чʹәʹве ве дьнйайе рʹәш ьн (Йуһʹн. 15:18-21). Әм дьхԝазьн дьле Йаһоԝа ша кьн. Һәрге мәрьв мә нәфрʹәт дькьн жь бо ве йәке, кӧ әм Баве хԝә һʹьз дькьн, әв проблема ԝан ә. Чахе мәрьв ԛәдьре мә дьгьрьн, мә хԝәш те, ле чахе мә һʹьз накьн, әԝ найе һʹәсабе, ԝәки әм мәрьвнә һесир ьн у нәһежа нә. Әм ньзаньн әме кʹәнге рʹасти зерандьне бен, йан жи кʹәнге шьхӧле мә ԝе бе ԛәдәхәкьрьне. Ле әм заньн, кӧ әм дькарьн ида ньһа һәләԛәтийа хԝә тʹәви Йаһоԝа ԛәԝи кьн, мерхас бьн, у һин бьн сәбьр кьн чахе мә нәфрʹәт кьн. Әԝ һазьрбун ԝе али мә бькә ахьрийеда бәрдәԝам кьн Йаһоԝарʹа хьзмәт кьн. w19.07 6 ¶17-18; 7 ¶21

Чахе әм һинбунед Кʹьтеба Пироз дәрбаз дькьн тʹәви мәрьвед нәбаԝәр, әм гәрәке тʹьме баԝәрийа ԝан мәзьн кьн ве йәкеда кӧ Хԝәде һәйә. У әм гәрәке али ԝан бькьн, ԝәки әԝана баԝәрийа хԝә Кʹьтеба Пироз биньн. Дьбәкә бона ве йәке әм чәнд щара мәрьварʹа тьштәки бьԝәкʹьлиньн. Ԝәʹде һәр һинбуне, әм дькарьн тʹәви ԝан избаткьрьнәке шеԝьр кьн, кӧ Кʹьтеба Пироз Хәбәра Хԝәде йә у нишан кьн кӧ чаԝа әԝ пʹехәмбәрти һатьнә сери, ӧса жи ча Кʹьтеба Пироз алийе зандарийеда у тʹәрихийеда рʹаст ә, у ча ширәтед жь ԝе, жийина һәррʹожида кери мә тен. Чахе әм һьндава мәрьва һʹьзкьрьне дьдьнә кʹьфше, бь ве йәке әм али ԝан дькьн, ԝәки бьбьнә шагьртед Мәсиһ, фьрԛи тʹӧнә әԝана баԝәрмәнд ьн йан на (1 Корн. 13:1). Ԝәʹде һинкьрьне нета мә әԝ ә, кӧ бьдьнә кʹьфше, ԝәки Хԝәде мә һʹьз дькә у дьхԝазә әм жи ԝи һʹьз бькьн. Һәр сал, бь һʹәзара мәрьвед кӧ бәре тӧ религийада нибун, тенә ньхӧмандьне, чьмки ԝана Хԝәде һʹьз кьр. Ләма жи позитив бьн, бькʹәвьнә һʹәйра һʹәму щурʹә мәрьва у ԝана һʹьз бькьн. Гӧһ бьдьнә ԝана, у һʹал у ньһерʹандьна ԝан фәʹм бькьн. Пе мәсәла хԝә ԝана һин кьн, кӧ бьбьнә шагьртед Мәсиһ. w19.07 24 ¶16-17

Ԛизед Шаллум нава ԝан мәрьвада бун, йед кӧ Йаһоԝа әԝ данә хәбате, сәва диԝаред Оршәлиме тʹәзә кьн (Нәһәм. 2:20; 3:12). Рʹаст ә баве ԝан сәрԝер бу, йәкә ԛизед Шаллум һазьр бун әԝ шьхӧле гьран у хоф бькьн (Нәһәм. 4:15-18). Иро жи, хушкед хирәт шабуне дьстиньн чахе хьзмәтийа мәхсусда шьхӧл дькьн, әԝ һәйә авакьрьн у тʹәзәкьрьна ԝан авайа, кʹижан кӧ тʹәсмили Йаһоԝа кьрьнә. Сәва әԝ шьхӧл пешда һәрә, мәрʹа хушкед ӧса хирәт, зен у амьн лазьм ьн. Йаһоԝа Тʹабита һелан кьр, ԝәки «ԛәнщи у херкьрьнада» мәрʹд бә, илаһи һьндава жьнәбийада (Кʹар. Шанд. 9:36). Әԝ мәрьвәкә гәләк дәствәкьри у һʹәйф бу, ләма чахе әԝ мьр, гәләка шина ве дькьрьн. Ле гава Пәтрус әԝ жь мьрьне рʹакьр, шабуна ньге ԝан әʹрд нәдьгьрт (Кʹар. Шанд. 9:39-41). Әм жь Тʹабитайе чь һин дьбьн? Фьрԛи тʹӧнә әм щаһьл йан мәзьн ьн, мер йан жьн ьн, әм гьшк жи дькарьн тьштәкида аликʹарийе бьдьнә хушк-бьра. w19.10 23 ¶11-12

Әм ча дькарьн кәсәки бьлькʹӧминьн? Бьдьнә бәр чʹәʹве хԝә ве дәрәще. Мәрьвәки кӧ бәре гәләк ичʹкә вәдьхԝар, ле паше һинбуна Кʹьтеба Пироз дәстпекьр, ахьрийеда анщах тʹәрька ичʹке да. Әԝ фәʹм дькә, ԝәки гәрәке ида тʹӧ щар ичʹке вәнәхԝә. Әԝи әʹмьре хԝәда гәләк гӧһастьн кьр у һатә ньхӧмандьне. Ԝәʹдә дәрбаз дьбә, бьраки кӧ хушк-бьра тʹәглифи мала хԝә дькә, сәва тʹәвайи ԝәʹдә дәрбаз кьн, ԝан гьлийа жерʹа дьбежә: «Һәрге хԝәгьртьна тә һәйә, тӧ дькари ичʹке һьнәки вәхԝи». Бьдьнә бәр чʹәʹве хԝә, ахьри ԝе чьԛас хьраб бә, һәрге әԝ бьре тʹәзә гӧһ бьдә ширәта ԝийә нәрʹаст у диса пәй ичʹке кʹәвә! Щьватед мә али мә дькьн, ԝәки ширәтед жь рʹеза иройин бьдьнә хәбате. Ԝедәре әм һин дьбьн кӧ бона Йаһоԝа чь йә лапә фәрз у ча ԝан тьшта кʹижан кӧ әм педьһʹәсьн, бьдьнә хәбате сәва ширһʹәлал бьн, демәк бекемаси бьн. Щьват ӧса жи мә һелан дькьн, ԝәки әм һʹьзкьрьна хԝә һьндава Хԝәде у хушк-бьред мә, һе мәзьн кьн. Һәрге әм ԛайим Хԝәде у хушк-бьра һʹьз дькьн, әме тʹӧ щар нәһельн, ԝәки кәсәк сәва мә бьлькʹӧмә. w19.08 10 ¶9; 11 ¶13-14

Һәнә мәрьвед кӧ хԝәда баԝәр ьн, йан жи сәр хԝә нә, ле әԝ найе һʹәсабе, кӧ әԝана ԛӧрʹә нә (Йуһʹн. 1:46, 47). Ләма жи, фьрԛи тʹӧнә әм мәрьвнә шәрмокә нә йан сәр хԝә нә, әм гьшк жи гәрәке сәр хԝә бьхәбьтьн, ԝәки дьле хԝәда мьлук бьн. Дина хԝә бьдьнә мәсәла Паԝлос. Йаһоԝа бь сайа Паԝлос гәләк шәһәрада щьватед тʹәзә саз кьр. Һәла һе жи дьԛәԝьмә Паԝлос хьзмәтийеда жь шандийед Иса зедәтьр кьрьбу. Ле йәкә әԝ нәдьфькьри, ԝәки әԝ жь бьра четьр ә у әԝи хԝә сәр ԝанрʹа нәдьгьрт. Әԝи гот ԝәки һәләԛәтийа ԝи тʹәви Йаһоԝа баш ә, нә жь бо һʹӧнӧред ԝийи баш йан жи шьхӧлед ԝи, ле бь сайа ԛәнщийа Хԝәдейә мәзьн (1 Корн. 15:10). Паԝлос бь нәʹма хԝәйә Корьнтʹийарʹа, мьлуктийеда мәсәла баш һишт. Рʹаст ә һьнәкед ԝе щьватеда хԝә сәр ԝирʹа дьгьртьн, ле йәкә әԝи пʹайе хԝә нәдьда (2 Корн. 10:10). w19.09 3 ¶5-6

Мәʹник кӧ чьрʹа мәрʹа нәһеса йә гӧрʹа Йаһоԝа бькьн, әԝ ә кӧ әм гӧнәкʹар ьн. Ләма щара әм нахԝазьн гӧрʹа ԝи бькьн. Паши ве йәке кӧ Адәм у Һеԝа мьԛабьли Хԝәде рʹабун у бәре даре хԝарьн, ԝана ида хԝәха сафи дькьр чь ԛәнщ ә у чь хьраб ә (Дәстп. 3:22). Иро жи һʹәчʹи зәʹф мәрьв нахԝазьн гӧрʹа Йаһоԝа бькьн, у хԝәха хԝәрʹа сафи дькьн чь рʹаст ә у чь хьраб ә. Һәла һе ԝанрʹа жи, йед кӧ Йаһоԝа нас дькьн у һʹьз дькьн, дькарә щара чәтьн бә бь тʹәмами гӧрʹа ԝи бькьн. Паԝлосе шанди жи әԝ йәк сәр хԝә тʹәхмин дькьр (Рʹом. 7:21-23). Мина Паԝлос әм дьхԝазьн бәр чʹәʹве Йаһоԝа тьштед рʹаст бькьн. Ле әм гәрәке һәр гав мьԛабьли хԝәстьнед хԝәйә нәрʹаст шәрʹ бькьн, ԝәки тьштед нәрʹаст нәкьн. Мәʹнийа дьн кӧ чьрʹа мәрʹа дькарә чәтьн бә гӧрʹа Йаһоԝада бьн, әԝ ә, кӧ сәр мә һʹӧкӧм дьбьн әʹдәт у култура ԝи щийи, кʹидәре әм мәзьн бунә. Гәләк ньһерʹандьнед мәрьва мьԛабьли ньһерʹандьна Йаһоԝа нә, у мәрʹа лазьм ә тʹьме сәр хԝә бьхәбьтьн, сәва нәкʹәвьнә бәр байе ԝан ньһерʹандьна. w19.09 15 ¶4-6

Әм гьшк гәрәке фәʹм бькьн кӧ ԛәԝата мә бь синор ә. Ләма жи әм гәрәке мьԛати хԝә бьн у сәрԝахт бьн, һәла әм ԝәʹдә у ԛәԝата хԝә сәр чь хәрщ дькьн. Мәсәлә, әм дькарьн ԛәԝата хԝә хәрщ кьн сәр тʹопкьрьна һәбуке. Дина хԝә бьдьне, Иса чь готә мерәки дәԝләти, йе кӧ жь ԝи пьрси: «Әз чь бькьм, ԝәки жийина һʹәта-һʹәтайе ԝар бьм?» Ча те кʹьфше әԝ мәрьвәки һʹәйф бу, чьмки кʹьтеба Марԛосда те готьне кӧ Иса «әԝ һʹьз кьр». Иса әԝ сәрԝере щаһьл тʹәглиф кьр бь ԝан гьлийед жоре. Әԝи мерьки дьхԝәст пәй Иса бьчуйа, ле «гәләк һәбука» ԝи һәбу у ча те кʹьфше әԝи һәбука хԝә нькарьбу жь дәсте хԝә бәрда (Марԛ. 10:17-22). Әԝи ԛәбул нәкьр кӧ нире Иса һьлдә у бәрдәԝам кьр «Һәбукерʹа» хӧламтийе бькә (Мәт. 6:24). Ле ԝәйе чь бьжбарта? Щар-щара лазьм ә әм хԝә бьщерʹьбиньн һәла әʹмьре мәда чь щийе пешьн дьгьрә. Ле чьрʹа? Чьмки ӧса әме бьзаньбьн һәла әм ԛәԝата хԝә бь билани хәрщ дькьн йан на. w19.09 24 ¶17-18

Бәлакьрьна мьзгинийе ԝе хьлаз нәбә һʹәта кӧ Йаһоԝа нәвежә хьлаз. Ле чьԛас ԝәʹдә майә, ԝәки мәрьв дәрһәԛа Йаһоԝа Хԝәде у Иса Мәсиһ пебьһʹәсьн? (Йуһʹн. 17:3) Әм ве йәке ньзаньн. Ле әм заньн, ԝәки һʹәта кӧ тәнгасийа мәзьн дәстпебә, һәр мәрьве дьлсах дькарә мьзгинийе ԛәбул кә у сафи кә Йаһоԝарʹа хьзмәт кә (Кʹар. Шанд. 13:48). Һʹәта кӧ дәрәнг нинә, әм ча дькарьн али ԝан мәрьва бькьн? Йаһоԝа бь сайа тʹәшкиләта хԝә һʹәму тьшти дьдә мә, чь кӧ мәрʹа лазьм ә сәва мәрьва рʹастийе һин кьн. Мәсәлә, һәр һʹәфти әм сәр бәрнама щьвине һин дьбьн, кӧ ча мәрьва һин кьн. Әԝ щьвин али мә дькә, кӧ ча хәбәрдане дәстпекьн у ча сәрледана дӧбарә бькьн. У һәрге мәрьвәки гӧһ да ԝә чахе ԝә жерʹа шәʹдәти да, у ԝә бәлавок йан журналәк да ԝи, әԝе бькарьбә һе зедә тьшт бьхунә, һʹәта кӧ тʹәви ԝи текли бьн. Әм һәр кәс борщдар ьн һәр мәһ чьԛас дькарьн шьхӧле бәлакьрьна мьзгинийеда кʹар бькьн. w19.10 9 ¶7; 10 ¶9-10

Йаһоԝа соз да Шьмһʹуне каләмер жь Оршәлиме, йе кӧ амьн бу, ԝәки һʹәта әԝ Мәсиһ пе чʹәʹве хԝә нәвинә, ԝе нәмьрә. Әԝ соз ԝе гәләк Шьмһʹун бьшьданда, чьмки әԝ ида гәләк сала һивийа Мәсиһ бу. Баԝәри у сәбьра ԝи һатә кʹәрәмкьрьне. Рʹожәке, «әԝ бь рʹебәрийа рʹӧһʹ» һатә пʹарьстгәһе. Ԝедәре әԝи Исайе бьчʹук дит, у Йаһоԝа Шьмһʹун да хәбате сәва дәрһәԛа ве зарʹе пʹехәмбәртийе бькә, йе кӧ ԝе бьбә Мәсиһ (Луԛа 2:25-35). Рʹаст ә дьбәкә Шьмһʹун перʹа нәгьһишт кӧ хьзмәтийа Исайә сәр әʹрде бьвинә, ле әԝ гәләк рʹази бу сәва ԝи ԛәдьре мәзьн, кӧ Йаһоԝа ԝи да хәбате. Ле диса һе зедә кʹәрәм һивийа Шьмһʹун ьн! Дьнйа тʹәзәда, әԝ мере амьн ԝе сәрԝертийа Иса бьвинә, кʹижан кӧ ԝе һʹәмуйед сәр әʹрдерʹа кʹәрәма бинә (Дәстп. 22:18). Әм жи дькарьн бона һәр щурʹә шьхӧл жь Йаһоԝа рʹази бьн, ԝәки әԝ мә дьдә хәбате. w19.10 22 ¶7; 23 ¶12

Фьрԛи тʹӧнә пʹәре мә гәләк ә йан жи һьндьк ә, йәкә әм гьшк гәрәке дьле хԝә хԝәй кьн. Чь щурʹәйи? Әм гәрәке нәһельн дьле мәда һʹьзкьрьн һьндава пʹәрада пешда бе. У нәһельн ԝәки хәбата мә жь хьзмәтийа Йаһоԝарʹа фәрзтьр бә. Ле ча һун дькарьн тедәрхьн, ԝәки һун кʹәтьнә тʹәлькәкә ӧса? Һьнә пьрса бьдьнә хԝә: «Чахе әз щьватеда мә йан жи хьзмәт дькьм, әз тʹьме дәрһәԛа хәбата хԝә дьфькьрьм? Дьбә әз тʹьме дьтьрсьм, кӧ ахьрийеда алийе пʹәрада чәтьнайи бал мьн пешда бен? Мьн у зәԝаща мьнрʹа пʹәрә у һәбук проблема пешда тиньн? Әз һазьр ьм хәбатәкә ӧса бькьм, кӧ бәр чʹәʹве мәрьва ньмьз ә, һәрге әԝ хәбат ԝе али мьн бькә һе зедә Йаһоԝарʹа хьзмәт кьм?» (1 Тимтʹ. 6:9-12) Чахе әм дәрһәԛа ԝан пьрса дьфькьрьн, ԝәрә әм бир нәкьн, кӧ Йаһоԝа мә һʹьз дькә у созәки ӧса дьдә ԝан, йед кӧ ԝи һʹьз дькьн: «Әзе тʹӧ щар жь тә нәчьм у тʹӧ щар тә бәрʹнадьм». Ләма жи Паԝлосе шанди ньвиси: «Пʹәрәһʹьзи бьра нава жийина ԝәда щи нәгьрә» (Ибрн. 13:5, 6). w19.10 29 ¶10

Чахе әм жи тʹәви хушк-бьра хьзмәт дькьн у хәйсәт-һʹӧнӧред ԝани баш дьвиньн, әм жь ԝана гәләк тьшта һин дьбьн у дьһа незики ԝан дьбьн. Мәсәлә, һун чь тʹәхмин дькьн чахе тʹәви һәвале хԝә дәртен хьзмәтийе у дьвиньн ча әԝ бь мерхаси баԝәрийа хԝә дьпарезә, йан жи чахе бедӧдьлибун дәрһәԛа Йаһоԝа у ԛьрара ԝи бь дьл у щан хәбәр дьдә? Һәмьки һʹьзкьрьна ԝә һьндава ԝи һәвали, һе зедә дьбә. Аделин кӧ 23 сали йә, готә һәваләкә хԝә, Кандис, ԝәки тʹәви ԝе хьзмәт кә ве мьһаледа, кʹидәре мьзгинван һьндьк ьн. Әԝ гьли дькә: «Мә дьхԝәст һе бь хирәт хьзмәт кьн у һе зедә жь хьзмәтийе шабуне бьстиньн. Мә һәрдӧрʹа жи лазьм бу дьлдайин, ԝәки йа лапә баш бьдьнә Йаһоԝа». Ле ԝана чь кʹар станд кӧ тʹәвайи хьзмәт дькьрьн? Аделин дьбежә: «Хьлазийа һәр рʹоже, мә хәбәр дьда кӧ ԝәʹде хьзмәтийе мә чь тʹәхмин дькьр, чь дьле мә гьрт чахе мә тʹәви мәрьва хәбәр дьда, у ча мә рʹебәрийа Йаһоԝа дьдит. Мә хԝәш дьһат тʹәвайи хәбәр дьн у ӧса мә һе рʹьнд һәв нас кьр». w19.11 5 ¶10-11

Ԝәʹде бәре, әскәр һәрге бей мәртʹала хԝә вәгәрʹийа мал, ԝе шәрми буйа. Тʹәрихзане Рʹомайи Татсит ньвиси: «Һәрге әскәр мәртʹала хԝә бьһишта, әԝ беһӧрмәтийа мәзьн бу». Әԝ тʹәне мәʹник ә, кӧ чьрʹа әскәр гәрәке мәртʹалед хԝә ԛайим бьгьртана у хԝәй кьрана. Әм мәртʹала хԝәйә баԝәрийе ԛайим дьгьрьн, чахе һәр гав тенә сәр щьвата у дәрһәԛа наве Йаһоԝа у Пʹадшатийа ԝи мәрьварʹа гьли дькьн (Ибрн. 10:23-25). Хенщи ве йәке, әм Хәбәра Хԝәде һәр рʹож дьхуньн, у дӧа дькьн сәва һʹәму ширәтед теда, биньн сери (2 Тимтʹ. 3:16, 17). Һәрге әм ӧса бькьн, тʹӧ чʹәке Шәйтʹан, кӧ мьԛабьли мә дьдә хәбате, ԝе зийанәкә ӧса нәдьнә мә, кӧ Хԝәде нькарьбә мә хьлаз кә (Иша. 54:17). Мәртʹала мәйә баԝәрийе ԝе мә хԝәй кә. Әме ԛәԝи бьн, у бь мерхаси тʹәви хушк-бьра шьхӧле Хԝәде бькьн. У әме һе зедә бькьн, нә кӧ тʹәне һәр рʹож шәрʹда сәркʹәвьн, ле ԛәдьрәки мәйи ӧса һәйә, кӧ алийе Иса бьн чахе әԝ шәрʹе мьԛабьли Шәйтʹан у пьштгьред ԝи, алт кә (Әʹйан. 17:14; 20:10). w19.11 19 ¶18-19

Һәрге һун дәрһәԛа сафикьрьна хԝә башԛә хԝәрʹа бьньвисьн кӧ ча биньн сери, һуне бькарьбьн һʹәта хьлазийе биньн сери (1 Корн. 14:40). Мәсәлә, бона кʹома рʹуспийа рʹебәри һәйә, ԝәки рʹуспики кʹьфш кьн сәва һәр сафикьрьна кʹома рʹуспийа бьньвисә, у ӧса жи кӧ кʹе гәрәке әԝи тьшти бькә у кʹәнге гәрәке әԝ шьхӧл хьлаз бә. Ԝан рʹуспийарʹа йед кӧ пәй ве рʹебәрийе дьчьн, дьһа һеса йә сафикьрьна хԝә биньн сери. Һун жи шьхӧле хԝә дькарьн ӧса бькьн. Мәсәлә, һәр рʹож бьньвисьн кӧ һун чь гәрәке бькьн, у пешийе чь бькьн. Әԝ йәк ԝе али ԝә бькә нә кӧ тʹәне шьхӧлед хԝә биньн сери, ле ӧса жи ԝәʹдәки кьнда һе зедә тьшт бькьн. Хирәт бьн, ԝәки нетед хԝә биньн сери. Мәрʹа ԛәԝат у ԝәʹдә лазьм ә, сәва хԝә ль нетед хԝә бьгьрьн, ԝәки һʹәта хьлазийе биньн сери (Рʹом. 12:11). Паԝлос готә Тимотʹейо, ԝәки хԝә бьдә шьхӧле хԝә у нава ԝан тьштада бьминә, сәва бьбә дәрсдаре баш. Әԝе ширәте әм гәрәке һьлдьн һʹәсаб, чахе нетед рʹӧһʹани датиньн пешийа хԝә (1 Тимтʹ. 4:13, 16). w19.11 29-30 ¶15-16

Чахе Мусарʹа һатә готьне, ԝәки щьмәʹта Исраел жь дилтийа Мьсьре дәрхә, әԝ хԝәда дӧдьли дьбу у чәнд щара готә Йаһоԝа, ԝәки ԝе нькарьбә әԝи шьхӧли бинә сери. Ле Хԝәде һьндава ԝида дьлшәԝати да кʹьфше у али ԝи кьр (Дәркʹ. 4:10-16). Әԝе йәке мерхаси да Муса, ԝәки диԝана мәзьн Фьрәԝьнрʹа әʹлам кә. Паше Муса дит кӧ Йаһоԝа ча пе ԛәԝата хԝә Исраелийа хьлаз кьр, ле Фьрәԝьн у ордийед ԝи Бәрʹа Сорда ԛьрʹ кьр (Дәркʹ. 14:26-31; Зәб. 136:15). Чахе Муса Исраелийа жь Мьсьре дәрхьст, ԝана гәләк щар дькьрьнә котә-кот. Һьнге Муса сәбьра Йаһоԝайә мәзьн дит һьндава щьмәʹте, кʹижан кӧ Әԝи жь дилтийе дәрхьст (Зәб. 78:40-43). Муса ӧса жи мьлуктийа Йаһоԝа дит, чахе Әԝи паши гьлийед Муса фькьред хԝә гӧһаст (Дәркʹ. 32:9-14). Паши дәркʹәтьна жь Мьсьре, һәләԛәтийа Муса тʹәви Йаһоԝа ӧса незик бу, кӧ ча бежи әԝи Баве хԝәйи әʹзмана дьдит (Ибрн. 11:27). w19.12 17 ¶7-9

Һʹәчʹи зәʹф шагьртед Иса жь Щәлиле бун. Ләма аԛьлайи бу, ԝәки Иса шагьртед хԝә нә кӧ маләкә Оршәлимеда тʹоп кьр, ле сәр чʹийайе ль Щәлиле. Хенщи ԝе йәке, Иса паши сахкьрьне ида тʹәви 11 шандийед хԝә башԛә Оршәлимеда маләкеда тʹоп бун. Һәрге Иса бьхԝәста тʹәне шандийед хԝәрʹа тʹәми бьда, кӧ мьзгинийе бәла кьн у мәрьва бькьнә шагьрт, әԝи ԝе һьнге Оршәлимеда бьгота ԝан, дәԝса кӧ ԝанрʹа, ԝан жьнарʹа у шагьртед майинрʹа әʹлам кьра, ԝәки Щәлиледа рʹасти ԝи бен (Луԛа 24:33, 36). Иса нә тʹәне шагьртед хԝәйи ԛьрʹна йәкерʹа әԝ тʹәми да, ле мә һʹәмушкарʹа. Әм жь кʹӧ әве йәке заньн? Чахе Иса рʹебәри дьда шагьртед хԝә, хьлазийеда әԝи гот: «Әз ирода тʹьме һʹәта ахьрийа дьнйайе тʹәви ԝә мә!» (Мәт. 28:19, 20) Иро шьхӧле һазьркьрьна шагьрта гәләк пешда дьчә. Бьфькьрьн, һәр сал 300 000 мәрьв ча Шәʹдед Йаһоԝа тенә ньхӧмандьне у дьбьнә шагьртед Мәсиһ! w20.01 2 ¶1; 3 ¶5-6

Тӧ щаһьл и бь нәхԝәшийа кӧ һеди-һеди ԛьдум дьхә. Йан әʹмьрда мәзьн дьби у нькари хәбате бьвини. Кал-пир дьби у сьһʹәт-ԛәԝата тә һеди-һеди сьст дьбә у ча бәре ида нькари һаԛас Йаһоԝарʹа хьзмәт ки. Һәрге тӧ рʹасти дәрәщед ӧса һати, дьбәкә тӧ бьфькьри кӧ ида бекер и у кәсәкирʹа нәлазьм и. Әԝ дәрәщә дькарьн шабуне жь тә бьстиньн, тӧ ида ԛимәте хԝә ӧнда ки, у һәләԛәтийа тә ортʹа мәрьва хьраб бә. Ньһерʹандьна ве дьнйайе сәр әʹмьре мәрьва, мина йа Шәйтʹан ә. Шәйтʹан тʹьме һьндава мәрьвада ӧса нә, кӧ те бежи ԛимәта ԝан ԛә тʹӧнә у әԝана бекер ьн. Әԝи жь берʹәʹмтийа хԝә готә Һеԝайе кӧ әԝ дькарә бей Хԝәде аза бьжи, ле әԝи рʹьнд заньбу, ԝәки әԝ нәгӧһдарикьрьн ԝе ԝана бәрбь мьрьне бьвә. Система ԝе дьне тʹьме жи дәсте Шәйтʹанда бу, ләма жи әм әʹщебмайи наминьн, ԝәки хәма ԝан сәрԝеред дьнйайе нинә кӧ мәрьв чь тʹәхмин дькьн. Ле Йаһоԝа дьхԝазә әм хԝә ԛимәт кьн, у әԝ али мә дькә чахе әм жь бо һьнә дәрәща хԝә бекер тʹәхмин дькьн (Рʹом. 12:3). w20.01 14 ¶1-4

Йерәмйа 40 сала йан һе зедә, нава щьмәʹта нәамьнда дьжит, ӧса жи шәһәре ԝи Анатотеда щинаред ԝи у дьԛәԝьмә мәрьвед ԝийи незик жи нәамьн бун (Йерәм. 12:6). Ле йәкә әԝи хԝә жь мәрьва башԛә нәдькьр. Мәсәлә, әԝи дьле хԝә аликʹарчийе хԝә Барукрʹа вәдькьр, ле әм жи заньн әԝи чь тʹәхмин дькьр, чьмки әԝи ньвисийә кӧ чь дьле ԝида һәбу (Йерәм. 8:21; 9:1; 20:14-18; 45:1). Бьдьнә бәр чʹәʹве хԝә, ча Барук дәрһәԛа әʹмьре Йерәмйа дьньвиси, у ԝана ча һе зедә һәв һʹьз кьрьн у ԛәдьре һәвдӧ дьгьртьн (Йерәм. 20:1, 2; 26:7-11). Гәләк сала, Йерәмйа бь мерхаси Исраелийарʹа әʹлам дькьр, ԝәки ԝе чь бе сәре Оршәлиме (Йерәм. 25:3). Йаһоԝа диса дьхԝәст щьмәʹт һелан кьра, ԝәки гӧне хԝә бинә рʹуйе хԝә, ләма жи готә Йерәмйа, сәва әԝ дәрһәԛа диԝана Ԝи сәр кʹьтеба гӧломәтккьри бьньвисә (Йерәм. 36:1-4). Чахе Йерәмйа у Барук тʹәвайи әԝ шьхӧле Хԝәде дькьрьн, кʹижан кӧ дьԛәԝьмә чәнд мәһа кʹьшанд, хәбәрдана ԝанә тʹәви һәв бешьк баԝәрийа ԝан гәләк ԛәԝи кьр. w19.11 2-3 ¶3-4

Әм гәрәке һьндава хушк-бьред бьжартида ча бьн? Ԝе нәрʹаст бә ԝәки әм кәсәки гәләк бьльнд кьн, һәрге жи әԝ бьжарти йә (Мәт. 23:8-11). Кʹьтеба Пироз дәрһәԛа рʹуспийа мә һелан дькә, ԝәки «чʹәʹв бьдьнә баԝәрийа ԝан», ле әԝ набеже, ԝәки мәрьв бькьн рʹебәре хԝә (Ибрн. 13:7). Кʹьтеба Пироз дьбежә, ԝәки һьнәк «дӧбарә һежайи ԛәдьр» ьн, чьмки әԝана «сәрԝерийе рʹьнд дькьн» у «хәбәрдан у һинкьрьнеда дьхәбьтьн», ле нә жь бо ве йәке кӧ әԝана бьжарти нә (1 Тимтʹ. 5:17). Һәрге әм йед бьжарти гәләк һӧрмәт кьн у бьльнд кьн, әм дькарьн ԝана әʹщьз кьн. Йан һе хьраб әԝ ә, кӧ әм дькарьн бьбьнә мәʹни, кӧ әԝана ԛӧрʹә бьн (Рʹом. 12:3). Тʹӧ кәс жь мә нахԝазә, ԝәки тьштәки ӧса бькә, чь кӧ ԝе ԝанрʹа бьбә мәʹни әве шашийа мәзьн бькьн (Луԛа 17:2). w20.01 29 ¶8

Хәмед Паԝлос рʹасти жи гәләк бун. Мәсәлә, әԝ бона проблемед хушк-бьра, бәрхԝә дькʹәт (2 Корн. 2:4). Дьжмьна әԝ дькʹӧтан у дькьрьнә кәле. Әԝ нава чәтьнайед майинда жи хәмгин дьбу, мәсәлә чахе «тʹӧнәбунеда» бу (Фили. 4:12). Хенщи ве йәке, бьдьнә бәр  чʹәʹве хԝә әԝи чьԛас хоф кʹьшанд, чахе лапә кем се щара жь һурдәхԝәшибуна гәмийе анщах хьлаз бу (2 Корн. 11:23-27).  Ле чь али Паԝлос дькьр, кӧ нава ԝан тәнгасийада кем хәмгин бә? Әԝи гәләк бәрхԝә дькʹәт чахе хушк-бьред ԝи тәнгасийада бун, ле әԝ йәки мьлук бу у фәʹм дькьр, ԝәки хԝәха ԝе нькарьбә һʹәму проблемед ԝан сафи кә. Ләма жи әԝи жь чәнд бьра аликʹари хԝәст, ԝәки кʹомәке бьдьнә щьвате, әԝи бьред бь итʹбар Тимотʹейо у Тито бона ԝи шьхӧли кʹьфш кьр. Әԝ кʹомәкдарийа ԝан, бешьк хәмед Паԝлос кем кьрьн (Фили. 2:19, 20; Тито 1:1, 4, 5). w20.02 23 ¶11-12

Йаһоԝа дьхԝазә, ԝәки әм гӧрʹа ԝида бьн. Әԝ һежа йә, ԝәки әм гӧрʹа ԝи бькьн, чьмки әԝ Әʹфьрандаре мә йә, демәк Жийиндаре мә, у әԝ жь һʹәму де-бава билантьр ә. Ле мәʹнийа сәрәкә, кӧ чьрʹа әм гӧрʹа Йаһоԝа дькьн әԝ ә, кӧ әм ԝи һʹьз дькьн (1 Йуһʹн. 5:3). Рʹаст ә гәләк мәʹнийед мә һәнә, кӧ гӧрʹа Йаһоԝа бькьн, ле әԝ тʹӧ щар зоре мә накә. Йаһоԝа мәрʹа азайа бьжартьне дайә, ләма жи әԝ ша дьбә чахе әм жь һʹьзкьрьне хԝәха сафи дькьн гӧрʹа ԝи бькьн. Де-бав дьхԝазьн, ԝәки зарʹед ԝан хԝәйкьри бьн, ләма жи әԝана рʹабун-рʹуньштьнеда ԝанрʹа синора датиньн. Чахе зарʹ ԝан тьштада гӧрʹа де-баве хԝә дькьн, әԝана дьдьн кʹьфше, ԝәки итʹбарийа хԝә де-баве хԝә тиньн у ԛәдьре ԝан дьгьрьн. Бьдьнә һʹәсабе хԝә чьԛас фәрз ә, кӧ әм принсип у ԛанунед Баве хԝәйи әʹзмана бьзаньбьн у анәгори ԝан бьжин. Чахе әм ӧса дькьн, әм Йаһоԝарʹа нишан дькьн, кӧ ԝи һʹьз дькьн у ԛәдьре ԝи дьгьрьн, у һьн жи әм кʹаре дьстиньн (Иша. 48:17, 18). Ле әԝед кӧ пьшта хԝә дьдьнә Йаһоԝа у принсипед ԝи пьшт гӧһе хԝәва давежьн, ахьрийеда зийане дьдьнә хԝә (Галт. 6:7, 8). w20.02 9-10 ¶8-9

Әм жи гәрәке мина Абигаиле мерхас бьн, ԝәки хԝә кәрʹ нәкьн чахе дьвиньн кӧ кәсәк дькарә шашийа мәзьн бькә (Зәб. 141:5). Әм гәрәке тʹәви ԝана бь ԛәдьр хәбәр дьн, ле бетьрс. Чахе әм бь һʹьзкьрьн кәсәкирʹа ширәте дьдьн, әм избат дькьн кӧ һәвале рʹаст ьн (Мәтʹлк. 27:17). Илаһи мерхасийа рʹуспийа гәрәке һәбә сәва хәбәр дьн тʹәви ԝан хушк-бьред щьвате, йед кӧ гавәкә нәрʹаст давежьн (Галт. 6:1). Рʹуспи фәʹм дькьн ԝәки әԝана хԝәха жи гӧнәкʹар ьн у щара ԝанрʹа жи ширәт лазьм ә. Ле жь бо ве йәке әԝана хԝә паш нахьн, сәва хушк-бьра ширәт кьн у рʹаст кьн (2 Тимтʹ. 4:2; Тито 1:9). Бәʹса хәбәре, чахе рʹуспи бьраки ширәт дькьн, әԝана пʹешкʹеша хәбәрдане бь сәрԝахти дьдьнә хәбате у бь сәбьр ԝи һин дькьн. Әԝана бьре хԝә һʹьз дькьн у һʹьзкьрьна ԝан һьндава ԝида ԝана һелан дькә, кӧ али ԝи бькьн (Мәтʹлк. 13:24). Ле нета ԝанә сәрәкә әԝ ә, ԝәки һӧрмәте бьдьнә Йаһоԝа, демәк принсипед ԝи һьлдьн һʹәсаб у щьвате жь зийане хԝәй кьн (Кʹар. Шанд. 20:28). w20.03 20 ¶8-9

Йаһоԝа Муса кьрә хьлазкʹаре Исраелийа. Ле кʹәнге Йаһоԝа ԝи да хәбате, чахе Муса «тʹәмамийа сәрԝахтийа мьсьрийа һин бу», һьнге? (ʹКар. Шанд. 7:22-25) На, Йаһоԝа Муса да хәбате тʹәне һьнге, чахе али ԝи кьр, кӧ бьбә мәрьвәки шкәсти, нәрм у бь сәбьр (Кʹар. Шанд. 7:30, 34-36). Йаһоԝа мерхаси да Муса сәва бәр сәрԝере Мьсьрейи ԛәԝи бьсәкьнә (Дәркʹ. 9:13-19). Жь ве йәке әм дьвиньн, кӧ Йаһоԝа ԝан мәрьва дьдә хәбате, йед кӧ чʹәʹв дьдьнә хәйсәт-һʹӧнӧред ԝи у итʹбарийа хԝә ԝи тиньн кӧ ԛәԝате жь ԝи дьхԝазьн. Нава тʹәрихийеда, Йаһоԝа хьзмәткʹаред хԝә щурʹә-щурʹә ролада дьдә хәбате. Ле гәло әԝ ԝе тә ча бьдә хәбате? Дьһа зәʹф тәва гьредайи йә, кӧ тӧ чьԛас хирәт и у чьԛас сәр хԝә дьхәбьти (Колс. 1:29). Һәрге тӧ бьһели, Йаһоԝа дькарә тә бькә мьзгинване хирәт, дәрсдаре баш, мәрьве бәрдьлийе, хәбатеда һостә, һәвале баш, у һәр кәсе кӧ жерʹа лазьм ә сәва ԛьрара хԝә бинә сери. w19.10 21 ¶5; 25 ¶14

Һәвалед баш ԝе али мә бькьн Йаһоԝарʹа амьн бьминьн. Һәрге әм дьхԝазьн кӧ һәвалед мәйи баш һәбьн, әм хԝәха гәрәке һәвалед баш бьн (Мәт. 7:12). Мәсәлә, Кʹьтеба Пироз мәрʹа дьбежә, кӧ ԝәʹдә бьвиньн ԝәки илаһи али ԝан бькьн, йед кӧ сьст ьн у чәтьнайада ньн (Әфәс. 4:28). Гава әм аликʹарийе дьдьнә мәрьва, әм дьһа бәхтәԝар дьбьн (Кʹар. Шанд. 20:35). Чахе әм рʹасти чәтьнайа бен, һәвалед мә ԝе кʹеләка мә бьн у али мә бькьн кӧ дьлрʹьһʹәтийе ӧнда нәкьн. Әԝана ԝе мина Әлиһуйе, кӧ гӧһ дьда Ибо чахе әԝи кӧла хԝә жерʹа гьли дькьр, бь сәбьр гӧһ бьдьнә мә, гава әм дьле хԝә ԝанрʹа вәкьн (Иб. 32:4). Ле әм гәрәке һивийе нибьн, ԝәки һәвалед мә дәԝса мә сафикьрьна бькьн. Ԝе билани бә әм гӧһ бьдьнә ширәтед ԝан, кӧ сәр һʹиме Кʹьтеба Пироз ьн (Мәтʹлк. 15:22). Чаԝа кӧ Даԝьд Пʹадша бь мьлукти жь һәвалед хԝә аликʹари ԛәбул дькьр, әм жи ԝәʹде тәнгасийа гәрәке ԛӧрʹә нибьн у аликʹарийа һәвалед хԝә ԛәбул кьн (2 Сам. 17:27-29). Бь рʹасти һәвалед баш пʹешкʹеш ьн жь Йаһоԝа (Аԛуб 1:17). w19.04 11 ¶12; 12 ¶14-15