Илон

Гәло әԝ йәк кӧ Йаһоԝа у Иса гәләк дьхәбьтьн у мәсәла баш ьн бона мә, те һʹәсабе ԝәки әʹсәйи нинә әм һеса бьн? Тʹӧ щар на. Фәʹмдари йә, Йаһоԝа тʹӧ щар наԝәстә, у жерʹа нәлазьм ә алийе физикида һеса бә. Ле Кʹьтеба Пироз дьбежә, ԝәки чахе Йаһоԝа әʹзман у әʹрд әʹфьрандьн, «дәсте хԝә жь хәбате кьр у рʹьһʹәт бу» (Дәркʹ. 31:17). Әшкәрә жь  ве йәке те кʹьфше, ԝәки чахе Йаһоԝа әʹфьрандьн хьлаз кьр, паше сәкьни дина хԝә да чекьрьна дәсте хԝә у перʹа ша дьбу. Ӧса жи Иса, рʹаст ә чахе әԝ сәр әʹрде бу, гәләк шьхӧл дькьр, ле ӧса жи хԝәрʹа ԝәʹдә дьдит, ԝәки һьнәки һеса бә у тʹәви һәвалед хԝә хԝарьне бьхԝә (Мәт. 14:13; Луԛа 7:34). Кʹьтеба Пироз щьмәʹта Хԝәде һелан дькә, ԝәки хәбатһʹьз бьн. Хьзмәткʹаред ԝи гәрәке нә кӧ тʹәмбәл бьн, ле шьхӧлда хирәт бьн (Мәтʹлк. 15:19). Дьԛәԝьмә һун дьхәбьтьн, сәва әʹбура нәфәред хԝә бькьн. У ча һʹәму шагьртед Мәсиһ, һун жи щабдар ьн шьхӧле бәлакьрьна мьзгинийе бькьн. Ле ԝәрʹа ӧса жи лазьм ә һьнәки һеса бьн. w19.12 2 ¶2; 3 ¶4-5

Сәрһатийед дәрһәԛа щьна гьли нәкьн. Ԝе йәкеда Иса мәсәләкә баш мәрʹа һишт, у әм гәрәке чʹәʹв бьдьнә ԝи. Пешийа кӧ Иса һатә сәр әʹрде, әԝи сәр әʹзмана дьжит, ләма әԝи гәләк тьшт заньбу дәрһәԛа Шәйтʹан у щьна. Ле Иса дәрһәԛа ԝан рʹӧһʹед хьраб у кьред ԝан, гьли нәдькьр. Әԝи дьхԝәст мәрьва дәрһәԛа Йаһоԝа һин кә, нә кӧ дина ԝан бьдә сәр Шәйтʹан. Әм дькарьн чʹәʹв бьдьнә Иса кӧ бәла нәкьн сәрһатийед дәрһәԛа щьна. Дәԝсе әм пе гьлийед хԝә гәрәке нишан кьн, ԝәки «жь дьле» мә «хәбәра ԛәнщ бьлԛ вәдьдә» (Зәб. 45:1). Жь рʹӧһʹед хьраб нәтьрсьн. Ве дьнйа хьрабда, әм дькарьн рʹасти тәнгасийа бен. Мәсәлә, дьбәкә әм бькʹәвьнә ԛәзийе, нәхԝәш кәвьн, йан жи ньшкева мәрьве хԝәйи незик ӧнда кьн. Ле әм гәрәке нәфькьрьн, ԝәки ве йәкеда рʹӧһʹед хьраб нәһәԛ ьн. Кʹьтеба Пироз дьбежә, ԝәки ԝәхт у ԛәԝьмандьнед ньшкева дькарьн рʹасти һәр кәси бен (Ԝаиз 9:11). Чь жи һәбә, Йаһоԝа әʹйан дькә, ԝәки әԝ жь Шәйтʹан у щьна ԛәԝаттьр ә. w19.04 23-24 ¶13-14

Гәло рʹуспи ԝан ԛанунед дәԝләте тиньн сери, демәк чахе ԝанрʹа дьбежьн кӧ һьндава зарʹе зорбәти һатийә кьрьне, әԝана полисрʹа дьбежьн? Бәле. Ԝан щийада кʹидәре ԛанунед ԝи щурʹәйи һәнә, рʹуспи чахе педьһʹәсьн дәрһәԛа зорбәтийа һьндава зарʹе, гәрәке сәрԝеред дәԝләтерʹа бежьн. Ԛанунед ԝи щурʹәйи мьԛабьли ԛануна Хԝәде ниньн (Кʹар. Шанд. 5:28, 29). Ләма жи рʹуспи һәма ча дәрһәԛа ве йәке педьһʹәсьн, дәрберʹа жь филиале рʹебәрийе дьхԝазьн, кӧ ԝан ԛанунед дәԝләте чь щурʹәйи биньн сери. Рʹуспи чахе тʹәви ԝан зарʹед, кӧ рʹасти зорбәтийе һатьнә у тʹәви де-бавед ԝан хәбәр дьдьн, гәрәке ԝанрʹа бежьн, кӧ изьна ԝан һәйә дәрһәԛа ве йәке әʹлами полис кьн. Ле һәрге кәсәк жь щьвате зорбәтийа сексуалида нәһәԛ дькьн, у дәрһәԛа ве йәке мәрьвед дьн пеһʹәсийанә, чь гәрәке бькьн? Гәло лазьм ә әԝ Мәсиһи кӧ дәрһәԛа ве йәке әʹлам кьрийә, бәрхԝә кʹәвә кӧ әԝ наве Хԝәде хьраб дькә? Тʹӧ щар на! Әԝ мәрьве зорбә, наве Хԝәде беһӧрмәт дькә. w19.05 10 ¶13-14

Кʹьтеба Пироз тʹәмийе дьдә мер у жьна, ԝәки һӧрмәте бьдьнә кʹьфше һьндава һәвдӧ у ӧса жи һьндава сонда зәԝаща хԝә. Кʹьтеба Пироз ӧса жи жьн-мера һин дькә, ԝәки әԝана борщдар ьн тʹәвайи бьн у һәв нәԛәтьн: «Мере де у баве хԝә бьһелә, хԝә ль жьна хԝә бьгьрә у бьбьнә бәдәнәк» (Дәстп. 2:24). Ле әԝед кӧ пе сәрԝахтийа ве дьнйайе дьжин, щурʹәки майин дьфькьрьн. Әԝана дьбежьн, ԝәки һәр кәс гәрәке бона хԝә у һʹәԝщед хԝә бьфькьрә. Кʹьтебәкеда дәрһәԛа һәвԛәтандьне һатийә готьне, ԝәки сонда зәԝаще, кӧ жьн-мер һәвдӧрʹа дьдьн у дьбежьн «һʹәта әм сах бьн», һьнә ԝәлатада ӧса һатийә гӧһастьне, «һʹәта әм һәв һʹьз бькьн». Әв ньһерʹандьна сьвьк сәр зәԝаще, бе һʹәсаб малбәта һьлдьшинә у ешәкә мәзьн тинә. Бешьк дькарьн бежьн, ԝәки ньһерʹандьна ве дьнйайе сәр зәԝаще, беһʹьши йә. w19.05 23 ¶12

Паԝлос бәрхԝә дькʹәт, чьмки тедәрдьхьст ԝәки шеԝьр у философийа дьнйа Шәйтʹан сәр һьнә Мәсиһийа һʹӧкӧм дькә (Әфәс. 4:17-19). Әԝ йәк тʹәви мә һәр кәси жи дькарә бьԛәԝьмә. Шәйтʹан кӧ сәрԝере ве дьнйайе йә, щурʹә-щурʹә метода дьдә хәбате, сәва әм пьшта хԝә бьдьнә Йаһоԝа. Мәсәлә, һәрге әм дьхԝазьн хԝә бьльнд кьн, йан жи дьхԝазьн бьбьнә нав у дәнг, Шәйтʹан әве хԝәстьна мә ԝе бьдә хәбате, сәва мә жь Йаһоԝа дур хә. Әԝ һәла һе жи дькарә ԝан тьшта бьдә хәбате, кʹижан кӧ әм малда, нав мьләте хԝәда йан мәкʹтәбеда һин бунә, сәва фькьрандьна мә бьгӧһезә у бькә мина йа хԝә. Гәло әм дькарьн тьштед ӧса нав хԝәда дәрхьн, кӧ мәрʹа бунә ча бежи «тʹәʹбийа», демәк кʹур нав һʹьше мәда рʹуньштьнә? (2 Корн. 10:4) Дина хԝә бьдьне Паԝлос чь гот: «Әм ԝан шеԝьра у һʹәму бьльндщийед кʹӧбарийейә мьԛабьли занәбуна Хԝәде бәтал дькьн у һʹәму фькьра дькьнә һесир, ельми Мәсиһ дькьн» (2 Корн. 10:5). Бәле, пе аликʹарийа Йаһоԝа әм дькарьн һәр щурʹә фькьрандьн у ньһерʹандьна нәрʹаст, кʹокева дәрхьн. w19.06 8 ¶1-3

Һанна, Даԝьд Пʹадша у зәбурбеж, һәԝара хԝә Йаһоԝа дьанин у аликʹари жь ԝи дьхԝәстьн. Әԝана хәмед хԝә у кӧла дьле хԝә, пе дӧа-дьрозга Йаһоԝарʹа гьли дькьрьн. Ԝана аза тʹәви ԝи хәбәр дьдан, кӧ чьрʹа әԝана һʹаләки ӧса гьранда ньн. У ԝана щийе һʹәбандьна Йаһоԝа нәдьһишт (1 Сам. 1:9, 10; Зәб. 55:22; 73:17; 122:1). Йаһоԝа бь дьлшәԝати щаба дӧайед һәрсека да. Һаннайе дьлрʹьһʹәти станд (1 Сам. 1:18). Даԝьд ньвиси: «Тәнгасийед йе рʹаст гәләк ьн, ле Хӧдан жь һʹәмуйа хьлаз дькә» (Зәб. 34:19). У зәбурбеж жи паше тʹәхмин кьр, ԝәки Йаһоԝа «дәсте» ԝийи рʹасте дьгьрә, у бь һʹьзкьрьн ԝи ширәт дькә (Зәб. 73:23, 24). Әм чь һин дьбьн жь ԝан мәсәла? Щара әм пе проблемед мәзьн баргьран дьбьн, у дькʹәвьнә стресе. Ле һәрге әм бьфькьрьн кӧ Йаһоԝа ча али хьзмәткʹаред хԝә кьрийә у иро жи дькә, у бь баԝәрийе жерʹа дӧа бькьн, у ԝан тьшта бькьн чь кӧ әԝ жь мә дәʹԝа дькә, һьнге әм дькарьн дӧдьли нәбьн, кӧ Йаһоԝа ԝе әʹсә али мә бькә, әм сәбьр кьн (Зәб. 143:1, 4-8). w19.06 17 ¶14-15

Тʹӧ щар жь бо гьли йан кьред мәрьва, шәрм нәкьн кӧ һун Шәʹдед Йаһоԝа нә (Мих. 4:5). Дина хԝә бьдьнә мәсәла шандийа, кӧ паши мьрьна Иса Оршәлимеда бун. Ԝана заньбу кӧ сәрԝеред Щьһу ԝана гәләк нәфрʹәт дькьн (Кʹар. Шанд. 5:17, 18, 27, 28). Ле йәкә әԝана һәр рʹож бәрдәԝам дькьрьн дьчунә пʹарьстгәһе у вәнәдьшартьн кӧ шагьртед Иса нә (Кʹар. Шанд. 5:42). Тьрсе тʹӧ щар рʹийа ԝан нәдьгьрт. Әм жи дькарьн тьрса хԝә бәр мәрьва алт кьн бь ве йәке, һәрге һʹәму щийа, демәк щийе хәбате, мәкʹтәбеда, у нава щинарада, хԝә әʹйан кьн ча Шәʹдед Йаһоԝа (Кʹар. Шанд. 4:29; Рʹом. 1:16). Ле чьрʹа шандийед Иса ӧса бәхтәԝар бун? Ԝана заньбу чьрʹа әԝана бәр чʹәʹве мәрьва рʹәш ьн, у бона ԝан ԛәдьр бу кӧ дьһатьнә зерандьне, чьмки ԛьрара Хԝәде дьанин сери (Луԛа 6:23; Кʹар. Шанд. 5:41; 1 Пәт. 2:19-21). Һәрге әм фәʹм дькьн, кӧ бона рʹастийе мә һʹьз накьн, әме тʹӧ щар нәһельн, ԝәки әԝ йәк мә бьтьрсинә у хьзмәтийа мә Йаһоԝарʹа бьдә сәкьнандьне. w19.07 7 ¶19-20

Иса у Щьһуйед кӧ пәй ԝи дьчун, ль гора Ԛануна Муса Шәми хԝәй дькьрьн. Ле Иса һьн пе гьлийа һьн жи пе кьред хԝә нишан кьр, ԝәки рʹожа Шәмийе гәрәке бей ԛәйдед зедә хԝәй кьн, у тьштәки нәрʹаст нинә һәрге ве рʹоже кьред ԛәнщ бькьн у аликʹарийе бьдьн (Мәт. 12:9-11). Әԝ нәдьфькьри, ԝәки аликʹари у ԛәнщикьрьн ԛануна рʹожа Шәмийе дьтʹәрьбинә. Кьред Иса нишан дькьрьн, ԝәки әԝи фәʹм дькьр, кӧ мәʹнийа хԝәйкьрьна Шәмийе чь йә. Мәʹни әԝ бу, кӧ щьмәʹта Хԝәде жь шьхӧлед хԝәйә һәррʹожи һеса бьн, сәва һʹьш-аԛьле хԝә бьдьн сәр тьштед рʹӧһʹани. Иса малбәтәкә ӧсада мәзьн бу, кʹижан кӧ һәр гав рʹожа Шәмийе хԝәй дькьрьн, сәва һе незики Хԝәде бьн. Әве йәке әм жь Кʹьтеба Пироз педьһʹәсьн, кʹидәре ньвисар ә дәрһәԛа Иса, чахе әԝ шәһәре хԝә Ньсрәтеда бу: «Мина әʹдәте хԝә рʹожа шәмийе [Иса] кʹәтә кʹьниште у рʹабу кӧ бьхунә» (Луԛа 4:15-19). Шагьртед ԝи ӧса жи зәʹф ԛәдьре ԛануна рʹожа Шәмийе дьгьртьн, кӧ ԝана һазьркьрьна бьһарәта бона чʹәʹлкьрьна Иса данә сәкьнандьне, һʹәта рʹожа Шәмийе хьлаз бу (Луԛа 23:55, 56). w19.12 4 ¶10

Һәр Мәсиһи дьхәбьтә у аликʹарийе дьдә ве йәкеда, ԝәки мәрьвед дьлсах бьвиньн. Әԝе йәке әм дькарьн бәрамбәри легәрина зарʹа ӧндабуйи бькьн. Чь щурʹәйи? Дина хԝә бьдьнә сәрһатике йа кӧ рʹасти ԛәԝьмийә. Гәде се сали чахе жь мал дәрдькʹәвә, ӧнда дьбә. Ԝәкә 500 мәрьв ԝи дьгәрʹьн. Ахьрийеда, паши ԝәкә 20 сьһʹәта, йәк жь ԝан мәрьва әԝе зарʹе чоле дьвинә. Ле әԝи мәрьви нәхԝәст пәсьна бьдьнә ԝи, чьмки әԝи гот: «Бь сәда мәрьва ԝи дьгәрʹийан». Гәләк мәрьв мина ве зарʹе нә, демәк ча бежи ӧндабуйи нә. Һевийа ԝан тʹӧнә йә, у әԝана аликʹарийе дьхԝазьн. Әм һʹәйшт милйон мәрьва зедәтьр, ԝан мәрьвед дьлсах дьгәрʹьн. Дьбәкә һун хԝәха нәвиньн мәрьвәки, кӧ һинбуна Кʹьтеба Пироз ԛәбул кә, ле мьзгинванед майин мьһала ԝәда дькарьн ԝан мәрьва бьвиньн, йед кӧ дьхԝазьн дәрһәԛа рʹастийа жь Хәбәра Хԝәде пебьһʹәсьн. Чахе хушк йан бьрак мәрьвәки дьвинә, кʹижан кӧ дьбә шагьрте Мәсиһ, һәр кәс жь мә кӧ легәринеда аликʹари дайә, ша дьбә. w19.07 16-17 ¶9-10

Паԝлосе шанди ани бира Мәсиһийед Филипйайе, кӧ әԝана гәрәке бәрдәԝам кьн бь сәбьр бьрʹәвьн. Әԝ щьват һәма дәстпекеда һатә зерандьне. Әԝ йәк дәстпебу,  чахе рʹӧһʹе пироз рʹебәри кьр, ԝәки Паԝлос һәрә Мәкәдонйайе. Незики сала 50 Д.М., Паԝлос у Силас һатьнә Филипйайе, шәһәре Мәкәдонйайе (Кʹар. Шанд. 16:9). Ԝана ԝедәре жьнькәк бь наве Лидйа дитьн. «Хӧдан дьле ԝе вәкьр кӧ гӧһ бьдә» мьзгинийе (Кʹар. Шанд. 16:14). Әԝ зутьрәке тʹәви нәфәред хԝә һатә ньхӧмандьне. Ле йәкә Мире-щьна дәстпекьр чәтьнайа пешда бинә. Меред ԝи шәһәри, Паԝлос у Силас гьртьн у кʹаши щәм сәрԝеред бажер кьрьн у бӧхдан авитьнә ԝан, кӧ йанчь әԝана щьмәʹте тʹәвһәв дькьн. Паԝлос у Силас кʹӧтан, кьрьнә кәле, ле паше, һиви жь ԝан кьрьн, ԝәки жь шәһәр дәрен (Кʹар. Шанд. 16:16-40). Ле гәло Паԝлос у Силас ԝәстийан у хьзмәтийа хԝә данә сәкьнандьн? Тʹӧ щар на! Ле хушк-бьред тʹәзә Филипйайеда чь кьрьн? Әԝана жи ԛәԝи ман у сәбьр кьрьн! Бешьк әԝана гәләк шьдийан пе мәсәла Паԝлос у Силас. w19.08 2 ¶1-2

Бешьк, нава «бәред һәԛийеда» бу һʹьзкьрьна һьндава Йаһоԝа у щьмәʹта ԝи. Әԝ ӧса жи дьһатә һʹәсабе, кӧ дәрһәԛа баԝәрийа хԝә һьндава Иса у һевийа хԝә, мәрьвед дьнрʹа жи гьли кьн. Әм «бәред һәԛийе» дьдьн чахе чьԛас дәсте мә те, бь хирәт шьхӧле лапә фәрз тиньн сери, демәк чахе шагьрта һазьр дькьн (Мәт. 28:18-20). Фьрԛи тʹӧнә әм чь дәрәщада ньн, әм дькарьн чаԝа рʹонайи шәԝԛ бьдьн. Щара әԝ дәрәща кӧ бь тʹәхмина мә рʹе мә дьгьрә кӧ мьзгинийе бәла кьн, дькарә мәрʹа бьбә мәщал, ԝәки ве йәке бькьн. Паԝлосе шанди, мәсәлә, чахе Рʹомеда гьртийе малда бу, әԝи һьнге Филипийарʹа нәʹмә ньвиси. Ле зьнщира рʹе ԝи нәдьгьртьн, ԝәки шәʹдәтийе бьдә ԝан, йед кӧ нобәдари дькьрьн у тʹәсәлийа ԝи дькьрьн. Паԝлос бь хирәт нава ԝан дәрәщада мьзгини бәла дькьр, у әԝе йәке хушк-бьра шьданд у мерхаси да ԝан, ԝәки хәбәра Хԝәде бь меркʹими «бе . . . тьрс бежьн» (Фили. 1:12-14; 4:22). w19.08 12 ¶15-16

Мәʹнийа лапә фәрз, кӧ чьрʹа әм гәрәке мьлук бьн, әԝ ә, кӧ әм бь ве йәке дьле Йаһоԝа ша дькьн. Пәтрусе шанди әԝ йәк әшкәрә да кʹьфше гьлийед ве рʹожеда. Кʹьтебеда «Ԝәрә Бьбә Шагьрте Мьн», дәрһәԛа ԝан гьлийед Пәтрус тьштәки ӧса те готьне сәре 3, абзаса 23-да: «Ԛӧрʹәбун мина жәʹре йә, кʹижан кӧ ахьрикә гәләк хьраб тинә. Әԝ һʹӧнӧр, мәрьве гәләк аԛьл у зен жи, дькарә бәр чʹәʹве Хԝәде бькә бекер. Ле мьлукти дькарә мәрьве ньмьз у бәләнгаз, бәр чʹәʹве Йаһоԝа бькә йәки гәләк керһати. . . . Хԝәде ԝе ша бә тә хәлат кә, һәрге тӧ мәрьвәки мьлук би». Рʹасти жи ԝе четьр чь һәйә, кӧ әм дькарьн дьле Йаһоԝа ша кьн! (Мәтʹлк. 23:15) Әм чахе мьлук ьн, ӧса әм һьн дьле Йаһоԝа ша дькьн, һьн жи хԝәха гәләк кʹаре дьстиньн. Һәрге әм мьлук ьн, мәрьв ԝе бьхԝазьн незики мә бьн. Сәва әм фәʹм кьн кӧ әԝ йәк чьрʹа ӧса нә, хԝә дайньн дәԝса мәрьвед дьн (Мәт. 7:12). w19.09 4 ¶8-9

Рʹуспи чьԛас дәсте ԝан те, али хушк-бьра дькьн. У әԝана тʹӧ щар нафькьрьн, кӧ жь бо һʹӧкӧме  хԝә жь хушк-бьра четьр ьн. Дәԝсе, әԝана хушк-бьрарʹа һʹәйф у нәрм ьн (1 Тʹеслн. 2:7, 8). Һʹьзкьрьн у мьлуктийа ԝана те кʹьфше жь хәбәрдана ԝанә ширьн у нәрм тʹәви  хушк-бьра. Рʹуспики щерʹьбанди Ендриу, дьбежә: «Мьн фәʹм кьр, ԝәки хушк-бьра дьшьдьн чахе рʹуспи ԝанрʹа һʹәйф ьн у ча һәвал ьн. Чахе рʹуспи ԝан һʹӧнӧра дьдьнә кʹьфше, щьватерʹа һеса йә тʹәви ԝан һәвкʹарийе бькә». Рʹуспики майин бь наве Тони, дьбежә: «Әз сәр хԝә дьхәбьтьм, ԝәки ширәта жь Филипи 2:3 бьдьмә хәбате у һәр гав хушк-бьра сәр хԝәрʹа бьгьрьм. Әԝ йәк али мьн дькә, кӧ сәрт нибьм у зоре хушк-бьра нәкьм гӧрʹа мьн бькьн». Рʹуспи гәрәке мьлук бьн, чаԝа кӧ Йаһоԝа мьлук ә. Бьдьнә һʹәсабе хԝә, Йаһоԝа Сәрԝере Һьмзор ә, ле әԝ «хԝә ԛуз дькә», сәва «фәԛир жь сәр хԝәлийе» рʹакә (Зәб. 18:35; 113:6, 7). Бь рʹасти мәрьвед ԛӧрʹә у бабах бәр чʹәʹве Йаһоԝа рʹәш ьн. w19.09 16-17 ¶11-12

Ԝәки әм жь нире Иса рʹьһʹәтийе у ԛәԝате бьстиньн, әм гәрәке ньһерʹандьна рʹаст хԝәй кьн. Әм шьхӧле Йаһоԝа дькьн, ләма жи гәрәке әԝи шьхӧли ӧса бькьн ча ԝи хԝәш те. Әм хәбатчи нә, ле Йаһоԝа ахайе мә йә (Луԛа 17:10). Һәрге әм шьхӧле Йаһоԝа ӧса бькьн ча әм дьхԝазьн, әме нире хԝә баргьран кьн. Бәле, ле чахе әм һәр тьшти ӧса бькьн ча Йаһоԝа дьхԝазә у ча әԝ рʹебәрийе дьдә мә, әме бькарьбьн тьштед ӧса бькьн, кӧ мә тʹьре әм нькарьн. Бир нәкьн кӧ тʹӧ кәс нькарә рʹийа Йаһоԝа бьгьрә, кӧ ԛьрара хԝә бинә сери! (Рʹом. 8:31; 1 Йуһʹн. 4:4) Нета мә әԝ ә, ԝәки пәсьна бьдьнә Баве хԝәйи һʹьзкьри Йаһоԝа. Мәрьвед ԛьрʹна йәкеда, йед кӧ тьма у хԝәһʹьз бун, у тʹәне кʹара хԝә дьгәрʹийан, зутьрәке бунә бебәхт у нире Иса һиштьн (Йуһʹн. 6:25-27, 51, 60, 66; Фили. 3:18, 19). Ле әԝед кӧ бь дьле тʹәмьз Хԝәде у мәрьв һʹьз дькьрьн, тʹәмамийа әʹмьре хԝәда бәхтәԝар бун, чьмки әԝ нир һьлдан, у һевийа ԝан һәбу кӧ тʹәви Иса сәр әʹзмана сәрԝертийе бькьн. Әме жи бәхтәԝар бьминьн, һәрге пе нета рʹаст у бь дьле сах нире Иса һьлдьн. w19.09 20 ¶1; 24-25 ¶19-20

Бьфькьрьн сәр ԝан кʹәрәма кӧ һун дьстиньн, чьмки аза бунә жь һинкьрьнед ԛәлп. Әм чьԛас бәхтәԝар ьн, кӧ азайа мәйә ӧса һәйә! Ле азайа мәзьн һе пешийа мә йә. Зутьрәке, Иса ԝе ԛьрʹа религийа ԛәлп у сәрԝертийед мәрьвайә хьраб бинә. Хԝәде ԝе «әʹлаләтәкә мәзьн» кӧ жерʹа хьзмәт дькә, хьлаз кә, у паше әԝана ԝе щьнәтеда сәр әʹрде кʹәрәмарʹа ша бьн (Әʹйан. 7:9, 14). Гәләк мәрьв ԝе жь мьрьне рʹабьн у ԝе мәщала ԝан һәбә аза бьн жь һʹәму зийанед кӧ жь гӧне Адәм пешда һатьнә (Кʹар. Шанд. 24:15). Ԝәʹде Һʹәзарсалийа Сәрԝертийе, Иса у йед кӧ тʹәви ԝи сәрԝертийе бькьн, ԝе али инсанәте бькьн кӧ ԛазанщ кьн сьһʹәт-ԛәԝата бекемаси у һәләԛәтийа беԛьсур тʹәви Хԝәде. Әԝ гӧһастьн у азайи ԝе мина Йубила Исраеле бә. Һʹәмуйед сәр әʹрде кӧ бь амьни Хԝәдерʹа хьзмәт дькьн, ԝе бьбьнә беԛьсур, у жь гӧнә аза бьн. w19.12 12-13 ¶14-16

Ԛьрʹна йәкеда Д.М., мәрьвәки мәрʹд Усьв (наве зедә Барнабас), һишт ԝәки Йаһоԝа ԝи бьдә хәбате (Кʹар. Шанд. 4:36, 37). Паше ԝе йәке чахе Шаԝул бу Мәсиһи, гәләк бьра дьтьрсийан незики ԝи бьн, чьмки әԝи бәре Мәсиһи дьзерандьн. Ле Барнабасе дьлован чу али Шаԝул бькә (Кʹар. Шанд. 9:21, 26-28). Паше, рʹуспийед Оршәлимеда дитьн, ԝәки хушк-бьред жь Әнтакйа Сурйайерʹа дьлдайин лазьм ә. Ле ԝана кʹе шанд бона ве йәке? Бәле, Барнабас! У ԝана рʹасти жи мәрьвәки ӧса бьжартьн, кʹижан кӧ лазьм бу. Кʹьтеба Пироз дьбежә, ԝәки Барнабас «дьл дьда ԝан һʹәмуйа кӧ бь тʹәмамийа дьле хԝәва Хӧданрʹа амьн бьминьн» (Кʹар. Шанд. 11:22-24). Иро жи, Йаһоԝа дькарә али мә бькә, ԝәки бона хушк-бьра бьбьнә «йе дьлдайине». Мәсәлә, Йаһоԝа бь сайа мә дькарә бәрдьлийе бьдә ԝан хушк-бьра, кʹижана кӧ мәрьве хԝәйи незик ӧнда кьрьнә. Йан жи әԝ дькарә мә һелан кә, сәва әм тʹәсәлийа ԝан хушк-бьра бькьн, йан жи тʹелехьн, йед кӧ нәхԝәш ьн йан жи депресийада ньн, у ԝанрʹа гьлийед ширьн бежьн. Ле һуне бьһельн, ԝәки Йаһоԝа ԝә жи бьдә хәбате чаԝа Барнабас да хәбате? (1 Тʹеслн. 5:14) w19.10 22 ¶8

Щара чахе әм тʹәви кәсәки һәвалтийе дькьн, әм нә тʹәне хәйсәт-һʹӧнӧред ԝани баш дьвиньн, ле ӧса жи кемасийед ԝан. Ле чь дькарә али мә бькә, кӧ һәвалед хԝә ӧнда нәкьн, чахе әԝана шашийа дькьн? Фәʹмдари йә, әм нькарьн жь хушк-бьра һивийе бьн, кӧ ԛә шашийа нәкьн у беԛьсур бьн. Ләма жи чахе кәсәк мәрʹа дьбә һәвал, әм гәрәке һәр тьшти бькьн, ԝәки әве һәләԛәтийа тʹәзә ӧнда нәкьн. Һәрге һәвалед мә шашийа бькьн, дьбәкә лазьм бә бь нәрми, ле рʹастә-рʹаст жь Хәбәра Хԝәде ԝанрʹа ширәте бьдьн (Зәб. 141:5). У һәрге әԝана дьле мә бешиньн, әм гәрәке бьбахшиньнә ԝан. Гава мә бахшандә ԝан, әм гәрәке ида кәсәкирʹа гьли нәкьн кӧ ԝана әм данә хәйдандьне, у нә жи биньн бира ԝан. Рʹасти жи чьԛас фәрз ә әм ԝәʹде ԝан зәманед хьраб, дина хԝә бьдьн сәр хәйсәт-һʹӧнӧред хушк-бьрайә баш, нә кӧ сәр кемасийед ԝан! Әԝ йәк ԝе һәләԛәтийа мә тʹәви ԝан һе ԛәԝи кә, у ԝәʹде тәнгасийа мәзьн, әԝ һәвалед незик ԝе кери мә бен. w19.11 6 ¶13, 16

Чахе әм һинбуна Кʹьтеба Пироз дәрбаз дькьн, әм дьхԝазьн чьԛас дькарьн ӧса бькьн кӧ мәрьва бькьн шагьрт, у «һʹәму тʹәмийед кӧ [Иса дайә] мьләта һин кьн». Әм гәрәке али мәрьва бькьн, кӧ әԝана фәʹм кьн, ԝәки бона ԝан чьԛас фәрз ә алийе Йаһоԝа у Пʹадшатийа Ԝи бьгьрьн. Әԝ те һʹәсабе кӧ мәрьва һелан кьн, ԝәки рʹастийе ԛәбул кьн, чь кӧ педьһʹәсьн әʹмьре хԝәда бьдьнә хәбате, хԝә тʹәсмили Йаһоԝа кьн у бенә ньхӧмандьне. Тʹәне һьнге әԝана ԝе ԝәʹде рʹожа Йаһоԝа хьлаз бьн (1 Пәт. 3:21). Гәләк һьндьк ԝәʹдә майә, кӧ кʹӧтасийа ве дьнйайе бе. Ләма жи ԝәʹде мә тʹӧнә кӧ бәрдәԝам кьн һинбуна Кʹьтеба Пироз тʹәви ԝан мәрьва дәрбаз кьн, йед кӧ әʹмьре хԝәда гӧһастьна накьн, сәва бьбьнә хьзмәткʹаред Йаһоԝа (1 Корн. 9:26). Шьхӧле мә гәләк фәрз ә! Һе диса гәләк мәри һәнә, кӧ гәрәке мьзгинийа Пʹадшатийе бьбьһен, һʹәта дәрәнг нинә. w19.10 11-12 ¶14-15

Һәр сал Рʹожа Кʹәԝандьне, мьләте Исраел тʹәвайи тʹоп дьбу у һʹәйԝан ԛӧрбан дьанин. Әԝ ԛӧрбан али Исраелийа дькьр, ԝәки бир нәкьн кӧ әԝана һʹәԝщә нә жь гӧнә бенә паԛьжкьрьне! Пешийе сәрәккʹаһин гәрәке фәсал әԝ бьхура пироз бькьра сәр курма агьр, у әԝ отʹах бь бина хԝәш тʹьжи буйа. Әм чь һин дьбьн жь ве йәке? Кʹьтеба Пироз дьбежә, ԝәки дӧайед хьзмәткʹаред Йаһоԝайи амьн мина бьхуре нә (Зәб. 141:2; Әʹйан. 5:8). Сәрәккʹаһин гәрәке бьхур бь ԛәдьр-һӧрмәт бьанийа бәр Йаһоԝа. Ләма чахе әм Йаһоԝарʹа дӧа дькьн, әм гәрәке бь ԛәдьрәки мәзьн у бь һӧрмәт дӧа бькьн. Әм гәләк дьшекьриньн ве йәке, кӧ Әʹфьрандаре мә изьне дьдә мә незики ԝи бьн, мина зарʹа кӧ незики баве хԝә дьбә (Аԛуб 4:8). Әԝ мә ча достед хԝә һʹәсаб дькә! (Зәб. 25:14) Әм әви ԛәдьри ӧса зәʹф ԛимәт дькьн, ԝәки тʹӧ щар нахԝазьн дьле ԝи бешиньн! w19.11 20-21 ¶3-5

Мәрьвед мьһала ԝәда ча ньн һьндава хәбате? Гәләк ԝәлатада мәрьв зәʹф дьхәбьтьн у чьԛас дьчә ԝәʹде хԝә сәр хәбате зәʹф хәрщ дькьн. Мәрьвед кӧ гәләк дьхәбьтьн, ԝәʹде ԝан тʹӧнә кӧ һьнәки һеса бьн, тʹәви нәфәред хԝә ԝәʹдә дәрбаз кьн, йан жи дәрһәԛа Хԝәде һе зедә пебьһʹәсьн (Ԝаиз 2:23). Алики дьнва жи һьнә мәрьв ԛә хәбате һʹьз накьн у мәʹнийа дьгәрʹьн, ԝәки нәхәбьтьн (Мәтʹлк. 26:13, 14). Ньһерʹандьна мәрьвед ве дьнйайе һьндава хәбате, нәрʹаст ә, ләма жи ԝәрә пебьһʹәсьн кӧ Йаһоԝа у Иса ча дьньһерʹьн сәр хәбате. Әм заньн, ԝәки Йаһоԝа хәбатһʹьз ә. Иса әԝ йәк зәлал да кʹьфше чахе гот: «Баве мьн һʹәта ньһа шьхӧле хԝә дькә, әз жи дькьм» (Йуһʹн. 5:17). Бьфькьрьн сәр һʹәму шьхӧлед Хԝәде, чахе әԝи беһʹәсаб әʹфьринед рʹӧһʹани у гәрдуна мәзьн әʹфьрандьн. Әм ӧса жи пе чʹәʹве хԝә дьвиньн, кӧ чекьрнед дәсте Хԝәдейә сәр әʹрде чьԛас бәдәԝ ьн. w19.12 2 ¶1-2

Ча Даԝьд бу досте Йаһоԝайи ӧса незик? Даԝьд дина хԝә дьда әʹфьрина у дәрһәԛа Йаһоԝа педьһʹәсийа. Чахе Даԝьд щаһьл бу, әԝи гәләк ԝәʹдә дәрва дәрбаз дькьр, чьмки мьԛати пәзед баве хԝә дьбу. Дьԛәԝьмә әԝи һьнге дәстпекьр бьфькьрә сәр чекьрьнед дәсте Йаһоԝа. Мәсәлә, чахе Даԝьд шәв әʹзман дьньһерʹи, әԝи нә тʹәне гәләк стәйрк дьдитьн, ле ӧса жи тедәрдьхьст һʹӧнӧред ԝи, йе кӧ әԝ стәйрк әʹфьрандьнә (Зәб. 19:1, 2).  Чахе Даԝьд дьфькьри, кӧ әԝ у һʹәму мәрьв чь щурʹәйи һатьнә әʹфьрандьне, әԝи фәʹм дькьр кӧ биланийа Йаһоԝа чьԛас мәзьн ә (Зәб. 139:14). Гава Даԝьд дина хԝә дьда шьхӧлед дәсте Йаһоԝа, әԝи фәʹм дькьр кӧ әԝ бәр Йаһоԝа чьԛас бьчʹук ә (Зәб. 139:6). Ле әм жь Даԝьд чь дәрсе һин дьбьн? Жийина хԝәйә һәррʹожида бьфькьрьн, кӧ һун жь әʹфьринед дор бәре хԝә, мәсәлә жь шинкайе, һʹәйԝана у мәрьва, чь дькарьн һин бьн дәрһәԛа Йаһоԝа. Ӧса һуне һәр рʹож дәрһәԛа Баве хԝәйи әʹзмана һе зедә пебьһʹәсьн (Рʹом. 1:20). У һәр рʹож һуне бьвиньн, кӧ һʹьзкьрьна ԝә һьндава ԝи һе ԛәԝи дьбә. w19.12 19-20 ¶15-17

Муса сафи кьр, ԝәки Хԝәдерʹа хьзмәт кә. Чахе Муса ԝәкә 40 сали бу, сафи кьр ԝәки тʹәви щьмәʹта Хԝәде бә, демәк тʹәви Исраелийа, дәԝса кӧ «кӧрʹе ԛиза Фьрәԝьн» бе һʹәсабе. Муса навдари у щийе бьльнд жь дәсте хԝә бәрда. Әԝ йәк кӧ әԝи пьшта Ибранийа гьрт, йед кӧ Мьсьреда хӧлам бун, дькарьбу һерса Фьрәԝьн бьанийа, кʹижан кӧ сәрԝере ԛәԝи бу у Мьсьрийа ԝи ча хӧдан һʹәсаб дькьрьн. Рʹасти жи баԝәрийа Муса ԛәԝи бу! Муса итʹбарийа хԝә Йаһоԝа дьани. Итʹбари һьндава Йаһоԝа әԝ һәйә һʹиме ԛәԝи, кӧ дьбә бәрбь достийа һʹәта-һʹәтайе (Мәтʹлк. 3:5). Әм чь дәрсе хԝәрʹа һин дьбьн? Мина Муса, әм гьшк жи гәрәке бьжберьн, Хԝәдерʹа хьзмәт кьн у тʹәви щьмәʹта ԝи бьн йан на? Дьбәкә әм жи гәрәке ԛӧрбана бькьн, сәва Хԝәдерʹа хьзмәт кьн, у дьԛәԝьмә әԝед кӧ Йаһоԝа нас накьн пәй мә кʹәвьн. Ле һәрге әм итʹбарийа хԝә Баве хԝәйи әʹзмана тиньн, әм дькарьн дӧдьли нәбьн, ԝәки әԝ ԝе пьшта мә бьгьрә. w19.12 17 ¶5-6

Рʹаст ә әм жь халийе һатьнә чекьрьне, ле ԛимәте мә ԛимәте халийе нинә. Дина хԝә бьдьнә тʹәне чәнд мәʹнийа, кӧ чьрʹа әм баԝәр ьн, ԝәки Йаһоԝа мә ԛимәт дькә у мә һʹьз дькә. Әԝи мәрьв пе хәйсәт-һʹӧнӧред хԝә әʹфьрандийә (Дәстп. 1:27). Пе ве йәке, әԝи мәрьв жь һʹәму әʹфьринед сәр әʹрде бьльнд гьрт у һʹӧкӧм да ԝан кӧ сәрԝертийе сәр әʹрде у сәр һʹәйԝана бькьн (Зәб. 8:4-8). Һәла һе паши гӧнәкьрьна Адәм жи, мәрьв диса жи бәр чʹәʹве Йаһоԝа ԛимәт бун. Әԝ ӧса мә һʹьз дькә, ԝәки Кӧрʹе хԝәйи тайе тʹәне бона гӧнед мә ԛӧрбан кьр (1 Йуһʹн. 4:9, 10). Бь сайа ве ԛӧрбане, Йаһоԝа ԝе мәрьвед «һәԛ у нәһәԛ» жь мьрьне рʹакә, йед кӧ жь бо гӧне Адәм мьрьнә (Кʹар. Шанд. 24:15). Хәбәра Ԝи әшкәрә дькә, ԝәки әм бәр чʹәʹве ԝи гәләк ԛимәт ьн, һәрге жи әм нәхԝәш ьн, кʹәсиб ьн, йан жи әʹмьрда мәзьн ьн (Кʹар. Шанд. 10:34, 35). w20.01 15 ¶5-6

Һевийа әʹзмани тʹӧ щар жь малбәте ча мьлкʹ дәрбази кәсәки набә, ле Хԝәде әве һевийе дьдә ԝан (1 Тʹеслн. 2:12). Ләма жи пьрсед ӧса нәдьнә ԝан, кʹижан кӧ дькарьн дьле ԝан бешиньн. Мәсәлә, әм гәрәке жьнед ԝан бьред кʹьфшкьри нәпьрсьн, кӧ әԝана бей меред хԝә ԝе ча бьжин сәр әʹрде. Әм дӧдьли ниньн, ԝәки дьнйа тʹәзәда Йаһоԝа ԝе «һʹәму бинбәри гора дьле ԝан тʹер» кә (Зәб. 145:16). Һәрге әм йед кʹьфшкьри бьльнд нәкьн, әме хԝә жь тʹәльке хԝәй кьн. Жь кʹижан тʹәльке? Кʹьтеба Пироз дьбежә, ԝәки дьбәкә жи һьнә йед бьжарти ԝе амьн нәминьн (Мәт. 25:10-12; 2 Пәт. 2:20, 21). Ле һәрге әм тʹӧ кәси бьльнд нәкьн, һәла һе жи һәрге әԝана бьжарти нә, йан жи бьред навдар ьн у йед кӧ гәләк сала Йаһоԝарʹа хьзмәт дькьн, әме ԝана ча рʹебәред хԝә һʹәсаб нәкьн (Щьһуд. 16). У һьнге, һәрге әԝана нәамьн бьн йан жи щьвате бьһельн, әме баԝәрийа хԝә һьндава Йаһоԝа ӧнда нәкьн, у хьзмәтийа хԝә нәдьнә сәкьнандьне. w20.01 29 ¶9-10

Чаԝа «зарʹед» Йаһоԝайә һʹьзкьри, әм чьԛас дькарьн чʹәʹв дьдьнә ԝи. Әм чʹәʹв дьдьнә хәйсәт-һʹӧнӧред ԝи. Мәсәлә әм һьндава мәрьвада бь һʹьзкьрьн у һʹәйф ьн, у дьбахшиньн ԝан. Чахе әԝед кӧ Хԝәде нас накьн рʹабун-рʹуньштьна мә дьвиньн, әԝана дьбәкә бьхԝазьн һе зедә дәрһәԛа ԝи пебьһʹәсьн (1 Пәт. 2:12). Ле де-бав кӧ Мәсиһи нә, гәрәке чʹәʹв бьдьнә Йаһоԝа, кӧ тʹәви зарʹед хԝә ӧса бьн, ча әԝ һьндава мәда йә. Һәрге әԝана ӧса бькьн, зарʹед ԝан жи дьбәкә ахьрийеда бьхԝазьн бьбьнә достед Баве мәйи бь һʹьзкьрьн. Әм Йаһоԝарʹа, Баве хԝәйи әʹзманарʹа фьрнаԛ дьбьн, у дьхԝазьн ԝәки мәрьвед дьн жи ԝи нас кьн. Дьле хԝәда әм тʹәхмин дькьн ве йәке, чь кӧ Даԝьд пʹадша тʹәхмин дькьр. Әԝи гот: «Нәфса мьн пе Хӧдан дьфьрʹә» (Зәб. 34:2). Ле һәрге әм шәрмокә нә, әм ча дькарьн бьбьнә мерхас? Әм дьһа мерхас дьбьн, чахе дьфькьрьн кӧ әм чьԛас дьле Йаһоԝа ша дькьн у чьԛас мәрьв ԝе кʹәрәма бьстиньн, чахе дәрһәԛа ԝи пебьһʹәсьн. У Йаһоԝа ԝе мерхасийе бьдә чахе мәрʹа лазьм бә. Әԝи али Мәсиһийед ԛьрʹна йәке кьр, кӧ мерхас бьн у әԝ ԝе али мә жи бькә (1 Тʹеслн. 2:2). w20.02 11 ¶12-13

Гәләк мәрьв кӧ Кʹьтеба Пироз һин дьбьн, ахьрийеда тенә ньхӧмандьне. Ле һәнә йед ӧса, кʹижан кӧ һәр гав тʹәви мә һинбуна Кʹьтеба Пироз дәрбаз дьбьн, ле хԝә паш дьхьн рʹӧһʹанида пешда һәрʹьн. Ԝанрʹа һʹәԝас ә һин бьн, ле әԝана пешда начьн кӧ бенә ньхӧмандьне. Һәрге һун тʹәви кәсәки һинбуна Кʹьтеба Пироз дәрбаз дькьн, фәʹмдари йә һун дьхԝазьн, ԝәки әԝ мәрьв чь кӧ педьһʹәсә, әʹмьре хԝәда бинә сери у бьбә шагьрте Мәсиһ. Йаһоԝа дьхԝазә мәрьв жь һʹьзкьрьне жерʹа хьзмәт кьн. Ләма жи нета мә әԝ ә, ԝәки али ԝан мәрьва бькьн, йед кӧ Кʹьтеба Пироз һин дьбьн, ԝәки фәʹм кьн кӧ Йаһоԝа бона ԝана хәм дькә у ԝана гәләк һʹьз дькә. Әм дьхԝазьн али ԝан бькьн, ԝәки әԝана Йаһоԝа һʹәсаб кьн ча «баве сеԝийа, тайе жьнәбийа» (Зәб. 68:5). Чахе әԝана һʹьзкьрьна Хԝәде һьндава хԝә бьвиньн, әԝ йәк ԝе ԝана һелан кә, әԝана жи ԝи һʹьз кьн. Ләма жи али ԝан бькьн кӧ фәʹм кьн, ԝәки Хԝәдейе мәйи һʹьзкьри дьхԝазә әԝана әʹмьре һʹәта-һʹәтайе бьстиньн, у әԝ һазьр ә ве йәкеда али ԝан бькә. w20.01 3 ¶7-8

Паԝлосе шанди йәки мьлук бу, ләма жи әԝи фәʹм дькьр кӧ жерʹа дьлбинийа жь һәвала лазьм  ә у әԝи дьстанд жи. Паԝлос бәрхԝә нәдькʹәт, кӧ мәрьв ԝе бьфькьрьн, ԝәки әԝ йәки сьст ә, ләма жи ԝәʹде тәнгасийе ԝирʹа бәрдьли лазьм ә (Колс. 4:7-11). Чахе әм бь мьлукти тиньн сәр хԝә, кӧ мәрʹа дьлбини лазьм ә, хушк-бьред мә ԝе дьл-әшԛ кʹеләка мә бьн у али мә бькьн. Паԝлос заньбу кӧ Ньвисаред Пироз ԝе дьлбинийе бьдьнә ԝи (Рʹом. 15:4). Әԝи фәʹм дькьр, ԝәки жь Хәбәра Хԝәде әԝ дькарә биланийе жи бьстинә, сәва ԝәʹде щерʹьбандьна амьн бьминә (2 Тимтʹ. 3:15, 16). Чахе әԝ щара дӧда Рʹомеда гьрти бу, әԝи заньбу кӧ мьрьна ԝи ида незик ә. Әԝи Тимотʹейорʹа гот, ԝәки зу бе у «кʹьтебед гӧломатк» тʹәви хԝә бинә (2 Тимтʹ. 4:6, 7, 9, 13). Ле чьрʹа? Паԝлос пе ԝан кʹьтеба, кʹижан кӧ дьԛәԝьмә Ньвисаред Ибрани бун, дькарьбу леколинкьрьна шәхси дәрбаз кьра. Һәрге әм чʹәʹв бьдьнә Паԝлос у тʹьме Хәбәра Хԝәде леколин бькьн, Йаһоԝа ԝе пе Ньвисаред Пироз дьле мә рʹьһʹәт кә у дьлбинийе бьдә мә, фьрԛи тʹӧнә әм чь щерʹьбандьнада бьн. w20.02 23-24 ¶14-15

Әлифаз, Билдад, у Зофар, те кʹьфше кӧ нә жи фькьрибун, ԝәки ча пе хәбәрдана хԝә али Ибо бькьн. Дәԝсе, әԝана дьфькьрин кӧ ча Иборʹа избат кьн, ԝәки йанчь әԝи хьраби кьрийә. Ԝана һьнә тьшт рʹаст готьн, ле ниве зәʹф ԝана чь жи дәрһәԛа Ибо у Йаһоԝа гот, бь һʹьзкьрьн нибу у дәрәԝ бу. Ԝана берʹәʹмти ломә Ибо кьрьн (Иб. 32:1-3). Ле Йаһоԝа сәр ве йәке ча ньһерʹи? Һерса Ԝи рʹабу сәр ԝан һәрсека. Әԝи ԝана бефәʹм нав кьр у готә ԝан, ԝәки жь Ибо һиви кьн кӧ бона ԝан дӧа бькә (Иб. 42:7-9). Әм жь мәсәла Әлифаз, Билдад, у Зофар дәрсәкә фәрз һин дьбьн. Йа пешьн, әм гәрәке тʹӧ щар лома хушк-бьра нәкьн (Мәт. 7:2-5). Дәԝсе, әм гәрәке пешийа кӧ тьштәки ԝанрʹа бежьн, рʹьнд гӧһ бьдьнә ԝан. Тʹәне һьнге әме бькарьбьн һʹале ԝан фәʹм кьн (1 Пәт. 3:8). Йа дӧда, чахе әм хәбәр дьдьн, әм гәрәке кʹур бьфькьрьн һәла гьлийед мә ԝе ԛәнщ бьн у чь кӧ әм дьхԝазьн бежьн рʹаст ә йан на (Әфәс. 4:25). У йа сьсийа, Йаһоԝа гәләк дина хԝә дьде кӧ әм һәвдӧрʹа чь у ча дьбежьн. w20.03 22-23 ¶15-16

Чахе әм дәрһәԛа Йаһоԝа мәрьва һин дькьн, әм хԝәха жи ԝи дьһа рʹьнд нас дькьн. Мәсәлә, әм әшкәрә дьвиньн рʹәʹма Йаһоԝа, чахе әԝ рʹебәрийе мә дькә, кӧ мәрьвед дьлсах бьвиньн (Йуһʹн. 6:44; Кʹар. Шанд. 13:48). Әм ӧса жи дьвиньн, кӧ ԛәԝата Хәбәра Хԝәде чьԛас мәзьн ә, гава мәрьвед кӧ әм тʹәви ԝан һинбуна Кʹьтеба Пироз дәрбаз дьбьн, хәйсәтед хьраб дьтʹәрькиньн у мәрьве ну хԝәдькьн (Колс. 3:9, 10). У әм ӧса жи зәлал дьвиньн сәбьра Хԝәде ве йәкеда, кӧ диса у диса мәщале дьдә мәрьва дәрһәԛа ԝи пебьһʹәсьн у хьлаз бьн (Рʹом. 10:13-15). Фьрԛи тʹӧнә чьԛас сал ә кӧ әм Йаһоԝарʹа хьзмәт дькьн, әм гәрәке һәләԛәтийа хԝә тʹәви ԝи ԛимәт кьн. Щурʹе сәрәкә кӧ әм ча дькарьн нишан кьн, ԝәки достийа хԝә тʹәви Хԝәде ԛимәт дькьн, әԝ ә, кӧ һәр гав тʹәви ԝи дӧада хәбәр дьн. Сәва кӧ һәвалтийа хԝә тʹәви кәсәки ԛәԝи кьн, әм гәрәке һәр гав тʹәвайи хәбәр дьн. Ләма жи тʹьме пе дӧа незики Хԝәде бьн, у тʹӧ щар нәтьрсьн кӧ дьле хԝә жерʹа вәкьн. w19.12 19 ¶11, 13-14).

Гьлийед жь рʹеза иройин дьле мә гәләк рʹьһʹәт дькә! Иса чаԝа Пʹадша Пʹадшатийа Хԝәдеда, ԝе һʹәму кӧл-дәрда кӧ Шәйтʹан у дьнйа ԝи мәрʹа анинә, кʹӧта кә (Иша. 65:17; 1 Йуһʹн. 3:8; Әʹйан. 21:3, 4). Әԝ йәк ԝе мәрʹа ахьрийа гәләк баш бинә, кʹижан кӧ әм гәләк һивийе нә! Рʹаст ә Иса шьхӧләкә нәһеса дайә дәсте мә, ле әԝ тʹәви мә йә у нава ԝан рʹожед ахьрийеда али мә дькә (Мәт. 28:19, 20). Әԝ йәк мерхасикә мәзьн дьдә мә! Дьлрʹьһʹәти, баԝәри һьндава ахьрийа баш у мерхаси, әԝ һәнә тьштед сәрәкә бь сайа кʹижана әм дьле хԝәда әʹдьлайе хԝәй дькьн у дәрһәԛа тьштед нәбаш нафькьрьн. Ле чаԝа һун дькарьн дьлрʹьһʹәтийе ӧнда нәкьн һьнге жи, гава тәнгаси пәй тәнгасийарʹа те? Чʹәʹв бьдьнә Иса. Йа пешьн, дӧа бькьн, һәр гав дӧа бькьн. Йа дӧда, гӧрʹа Йаһоԝада бьминьн у бь хирәт мьзгинийе бәла кьн, гава ԝәрʹа чәтьн ә жи. У йа сьсийа, итʹбарийа хԝә һәвалед хԝә биньн, йед кӧ тәнгасийада али ԝә бькьн (Фили. 4:6, 7). Паше, ԝе әʹдьлайа Хԝәде дьл у фькьред ԝә хԝәй кә у һуне мина Иса бькарьбьн һәр тәнгасийеда сәркʹәвьн (Йуһʹн. 16:33). w19.04 13 ¶16-17