Щотмәһ

Әм иро әшкәрә дьвиньн кӧ Йаһоԝа ча щьмәʹта хԝә хԝәй дькә. Бьфькьрьн дәрһәԛа ве йәке: Әм нав тʹәмамийа дьнйайеда мьзгинийе бәла дькьн у мәрьва рʹастийе һин дькьн (Мәт. 28:19, 20). Бь сайа ве йәке, әм кьред Шәйтʹанә хьраб әшкәрә дькьн. Һәрге дәсте Шәйтʹан бьһата, әԝи әԝ шьхӧле мә ԝе бьда сәкьнандьне, ле әԝ нькарә ве йәке бькә. Ләма әм гәрәке тʹӧ щар жь рʹӧһʹед хьраб нәтьрсьн. Һәрге әм Йаһоԝарʹа амьн ьн, щьн ԝе нькарьбьн тʹӧ зийане бьдьнә мә. Ле йәкә әм гьшк жи гәрәке мьԛабьли рʹӧһʹед хьраб дәрен у хԝә бьсперьнә Йаһоԝа. Һәрге әм ӧса бькьн, әме гәләк кʹәрәма бьстиньн, у Шәйтʹан ԝе нькарьбә пе дәрәԝед хԝә мә бьхапинә. Ӧса жи әме тʹӧ щар жь щьна нәтьрсьн у нәләрьзьн, ле достийа хԝә тʹәви Йаһоԝа ԛәԝи кьн. Аԛуб гьлийед ӧса ньвиси: «Мьԛабьли Мирещьн бьсәкьньн у әԝе жь ԝә бьрʹәвә. Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:7, 8). w19.04 24 ¶15; 25 ¶18

«Бәре зька дайина» Йаһоԝа йә, демәк Йаһоԝа зарʹ пʹешкʹеш данә ԝә. Ләма жи һун щабдар ьн сәва зарʹед хԝә хԝәй кьн. Ле чь һун дькарьн бькьн, ԝәки зарʹед хԝә жь зорбәтийе хԝәй кьн? Йа пешьн, пебьһʹәсьн кӧ чь йә зорбәти. Бьзаньбьн мәрьвед кӧ зарʹа хьраб дькьн чь щурʹәйи нә, у чь метода дьдьнә хәбате сәва зарʹа бьхапиньн. Тедәрхьн у фәсал бьн чь щурʹә мәрьв у кʹижан дәрәщә дькарьн хоф бьн (Мәтʹлк. 22:3; 24:3). Бир нәкьн, ԝәки һʹәчʹи зәʹф әԝ мәрьв зорбәтийе зарʹа дькьн, кʹижан ԝан зарʹарʹа нас ьн у зарʹ итʹбарийа хԝә ԝана тиньн. Йа дӧда, тʹьме тʹәви зарʹед хԝә бькʹәвьнә хәбәрдане, ԝәки әԝана аза ԝәрʹа дьле хԝә вәкьн (Ԛан. Дщр. 6:6, 7; Аԛуб 1:19). Бир нәкьн, бона ԝан зарʹа, кʹижан кӧ рʹасти зорбәтийе һатьнә, чәтьн ә дәрһәԛа ве йәке хәбәр дьн. Әԝана дьбәкә дьтьрсьн кӧ ԝе тʹӧ кәс ԝана баԝәр нәкә, йан жи әԝе кӧ зорбәти ԝан кьрийә, әԝ данә тьрсандьне, кӧ кәсәкирʹа нәбежьн. Һәрге һун тʹәхмин дькьн, ԝәки зарʹ хԝә щурʹәки дьн дьгьрә, бь нәрми пе пьрса ԝана бьдьнә хәбәрдане, у паше бь сәбьр гӧһ бьдьнә ԝан. Йа сьсийа, зарʹед хԝә ширәт кьн. Ԝана һин кьн ча хәбәр дьн у ча хԝә хԝәй кьн, чахе әԝана рʹасти зорбәтийе бен. w19.05 13 ¶19-22

Чьрʹа мәрьвед бабах бәр чʹәʹве Йаһоԝа рʹәш ьн? Мәʹник әԝ ә, кӧ әԝед кӧ дьбьнә хԝәһʹьз у бабах, чʹәʹв дьдьнә бабахийа Шәйтʹан. Бьдьнә һʹәсабе хԝә, Шәйтʹан дьфькьри, ԝәки Иса, бь сайа кʹижани Хԝәде һʹәму тьшт әʹфьранд, гәрәке сәре хԝә бәр ԝи дайнә у ԝи бьһʹәбинә! (Мәт. 4:8, 9; Колс. 1:15, 16) Мәрьвед кӧ хԝәһʹьз у бабах ьн, дьфькьрьн кӧ сәрԝахт у билан ьн, ле чʹәʹве Хԝәдеда әԝана бефәʹм ьн (1 Корн. 3:19). Кʹьтеба Пироз мә һин дькә, ԝәки әм гәрәке дәрһәԛа хԝә ча бьфькьрьн. Әԝ дьбежә ԝәки ве йәкеда хьраби тʹӧнә, һәрге әм рʹаст хԝә һʹьз бькьн. Иса гот «һәвале хԝә ԝәкә хԝә һʹьз бькә». Әԝ йәк дьдә кʹьфше, ԝәки әм гәрәке бона хԝә жи бьфькьрьн (Мәт. 19:19). Ле Кʹьтеба Пироз һин накә, ԝәки әм гәрәке хԝә сәр мәрьварʹа бьгьрьн. Дәԝсе әԝ дьбежә: «Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә» (Фили. 2:3; Рʹом. 12:3). w19.05 24 ¶13-14

Биньн бира хԝә, чахе һун пеһʹәсийан кӧ Хәбәра Хԝәде чь һин дькә у ԝә сафи кьр Йаһоԝарʹа хьзмәт кьн, ԝә чь гӧһастьн кьр. Гәләка жь мә тʹәрка кьред хьраб дан (1 Корн.  6:9-11). Әм чьԛас жь Йаһоԝа рʹази нә, ԝәки әԝи али мә кьр ԝан тьштед хьраб бьтʹәрькиньн! Ле йәкә әм тʹӧ щар гәрәке хԝәрʹази нибьн у нәфькьрьн, ԝәки мәрʹа ида тʹӧ тьштида нәлазьм ә бенә гӧһастьне. Рʹаст ә әм ида гӧнед мәзьн накьн, кʹижан мә бәре пешийа ньхӧмандьне дькьр, ле йәкә әм гәрәке жь һәр тьшти кӧ дькарә мә диса бьвә бәрбь ԝан шьхӧла, дур бьн. Әм дӧ тьшта гәрәке бькьн. Йа пешьн, әм гәрәке «нәкʹәвьнә кьрасе бәнде» ве дьнйайе, демәк нәкʹәвьнә бәр байе ве дьнйайе. Йа дӧда, әм гәрәке һʹьш-аԛьле хԝә ну кьн у бь ве йәке бенә «гӧһастьн». Гӧһастьн найе һʹәсабе тʹәне рʹува бейи гӧһастьне, ле әԝ те һʹәсабе ԝәки әм һʹәму алийава хԝә бьгӧһезьн. Әм гәрәке һʹьш-аԛьле хԝә ну кьн у бь тʹәмами бенә гӧһастьне, демәк ньһерʹандьнед кʹижан кʹурайа дьле мәда һәнә, ӧса жи һәст у хԝәстьнед хԝә бьгӧһезьн. w19.06 9 ¶4-6

Чахе әм дькʹәвьнә стресе, һьнге жи әм дькарьн ԛәԝате бьстиньн у гәш бьн һәрге тен сәр щьвата. Әм сәр щьвата, диса мәщале дьдьн Йаһоԝа, ԝәки бе «һәԝара» мә у дьлбинийе бьдә мә. Сәр щьвате әԝ пе рʹӧһʹе хԝәйи пироз, пе Хәбәра хԝә у щьмәʹта хԝә мә дьшьдинә. Щьват мәрʹа мәщала дьдьн, ԝәки әм «дьл бьдьн бәр һәв» (Рʹом. 1:11, 12). Хушкәк наве кʹижане Софйа йә, гот: «Йаһоԝа у хушк-бьра али мьн кьрьн кӧ сәбьр кьм. Бона мьн лапә фәрз щьватед мә бун. Мьн дит, ԝәки чьԛас зедә әз дьчьмә хьзмәтийе у щьвате, һаԛас стреса мьн сьвьк дьбә у әз кем бәрхԝә дькʹәвьм». Чахе  әм дьлтәнг ьн, ԝәрә бир нәкьн ԝәки Йаһоԝа соз дьдә, кӧ ԝе нә тʹәне ахьрийеда стресе бьдә һьлдане, ле әԝ ньһа жи али мә дькә, ԝәки әм бәр стреса тәйах кьн. Әԝ һьн хԝәстьне һьн жи ԛәԝате дьдә мә, ԝәки әм тәйах кьн чахе дьлтәнг ьн у дьфькьрьн кӧ бечʹарә нә (Фили. 2:13). w19.06 19 ¶17-18

Иса паши сахкьрьна хԝә, йа пешьн әԝе щьвине саз дькә бона шагьртед хԝә. Әшкәрә йә, сәр ве щьвине әԝи дьхԝәст рʹебәрийед гәләк фәрз бьда ԝан! Иса сәр ве щьвине да кʹьфше, ԝәки чьԛас фәрз ә әԝ шьхӧле кӧ шагьртед ԝи гәрәке бькьрана, демәк әԝ шьхӧл, кӧ әм жи иро дькьн. Иса гот: «Ньһа һәрʹьн . . . ԝан һʹәму тʹәмийед кӧ мьн данә ԝә мьләта һин кьн, ԝәки әԝ хԝәй кьн» (Мәт. 28:19, 20). Иса әԝ тʹәми нә тʹәне 11 шандийед хԝәрʹа да, әԝ дьхԝазә, ԝәки һʹәму шагьртед ԝи мьзгинийе бәла кьн. Ле әм жь кʹӧ ве йәке заньн? Чахе Иса сәр чʹийайе Щәлиле әԝ тʹәми да шагьртед хԝә, ԝедәре тʹәне шанди нибун. Биньн бира хԝә ԝәки мәләк жьнарʹа гот: «[Щәлиледа] һуне ԝи бьбиньн» (Мәт. 28:7). Демәк, ча те кʹьфше әԝ жьнед амьн жи чунә сәр ве щьвине. w20.01 2-3 ¶1-4

Иса шьровәкьр, кӧ чьрʹа мәрьв ԝе мьԛабьли мә дәрен. Әԝи гот, ԝәки әме бәр чʹәʹве мәрьва рʹәш бьн, чьмки әм нә пʹара дьнйайе нә. Чахе әм тенә зерандьне, әԝ найе һʹәсабе, ԝәки мә кʹәрәма Йаһоԝа ӧнда кьрийә, ле әԝ те һʹәсабе, ԝәки әм ве йәке дькьн чь кӧ рʹаст ә! Мәрьвед мьԛабьл нькарьн һʹәбандьна Хԝәдейе Һьмзоррʹа, бь тʹәмами бьдьнә сәкьнандьне. Гәләка хԝәстьнә ве йәке бькьн, ле нәгьһиштьнә нета хԝә. Дина хԝә бьдьне, чь ԛәԝьми ԝәʹде Шәрʹе Һʹәмдьнйайе йа II. Ԝи чахи щьмәʹта Хԝәде гәләк ԝәлатада, алийе сәрԝерада ԛайим дьһатә зерандьне. Һьнге шьхӧле Шәʹдед Йаһоԝа нә тʹәне алийе партйа Натсиста Алманйайеда һатә ԛәдәхәкьрьне, ле ӧса жи Австралйайеда, Канадайеда у ԝәлатед майинда. Ле ньһа дина хԝә бьдьне кӧ чь ԛәԝьми. Сала 1939-да чахе шәрʹ дәстпебу, һьнге нав тʹәмамийа дьнйайеда 72 475 мьзгинван һәбун. Ле хьлазийа шәрʹ сала 1945-да, һʹәсаба нишан кьрьн, ԝәки ида 156 299 мьзгинван һәбун. Пе кʹәрәма Йаһоԝа, һʹәсабе мьзгинвана дӧ щар зедәтьр зедә бьбу! w19.07 9 ¶4-5

Һәрге һун тʹәви тʹӧ кәси һинбуна Кʹьтеба Пироз дәрбаз накьн, һун щурʹәки майин дькарьн аликʹарийе бьдьн. Мәсәлә, һун дькарьн бь бәшәра хԝәш у бь дьл у щан сьлав кьн ԝан мәрьва, йед кӧ тʹәзә тенә щьвате. Ԝи щурʹәйи һун али ԝан дькьн, кӧ әԝана бьвиньн, ԝәки һʹьзкьрьн мә ча Мәсиһийед рʹаст әʹйан дькә. Щабед кӧ һун сәр щьвата дьдьн, һәла һе щабед кьн жи, дькарьн ԝан мәрьвед тʹәзә һин кьн, кӧ чаԝа бь дьл у бь ԛәдьр баԝәрийа хԝә нишан кьн. Һун ӧса жи дькарьн тʹәви мьзгинване тʹәзә дәркʹәвьнә хьзмәтийе, у али ԝи бькьн кӧ рʹезед жь Кʹьтеба Пироз бьдә хәбате, чахе мәрьва һин дькә. Ԝи щурʹәйи, һуне ԝи һин кьн, ԝәки чʹәʹв бьдә Мәсиһ (Луԛа 10:25-28). Гәләк Мәсиһи иро бәтал ниньн, чьмки щабдарийед ԝанә фәрз һәнә. Ле йәкә әԝана жи ԝәʹдә хԝәрʹа башԛә дькьн, сәва һинбунед Кʹьтеба Пироз дәрбаз кьн, у шабунәкә мәзьн бьстиньн. w19.07 17 ¶11, 13

Паԝлос нәһишт тʹӧ тьшт һʹьш-аԛьле ԝи бьрʹәвинә, нә шаши нә жи кьред ԝийи бәре. Әԝи гот «әз тьштед пьшт хԝәва һьшти бир бькьм», ԝәки «хԝә бавежьмә йед пешийа хԝә», демәк сәва рʹәва хԝәда бьгьһижә хьлазийе. Ле кʹижан тьшт дькарьбун һʹьш-аԛьле Паԝлос бьрʹәвандана? Йа пешьн, әԝ пешийа кӧ бьбуйа Мәсиһи, нава Щьһуйада навдар у пешдачуйи бу. Ле йәкә әԝи әԝ тьшт чаԝа «гәмар» һʹәсаб кьр (Фили. 3:3-8). Йа дӧда, бәре әԝи Мәсиһи дьзерандьн, ле бона ве йәке әԝи хԝә һәр гав сущдар нәдькьр, жь бо чь жи дькарьбу хьзмәтийа хԝә Йаһоԝарʹа бьда сәкьнандьне. У йа сьсийа, әԝ нәдьфькьри, ԝәки әԝи бона Йаһоԝа епʹещә тьштед баш кьрийә у ида нәлазьм ә зедә бькә. Паԝлос гьрти бу жи, һатә кʹӧтане жи, ԝи данә бәр кәвьра жи, чәнд щара гәмийед кӧ әԝ теда бу һурдәхԝәши бун, әԝи ӧса жи кемасийа хԝарьне у кʹьнща жи дит, ле йәкә әԝи хьзмәтийеда гәләк тьшт кьр у хирәт ма (2 Корн. 11:23-27). Паԝлос чь шьхӧл жи кьр у чь тәнгаси жи дит, йәкә әԝи заньбу кӧ гәрәке хьзмәтийа хԝә нәдә сәкьнандьне. Лазьм ә әм жи чʹәʹв бьдьнә ԝи. w19.08 3 ¶5

Гәләк хушк-бьред мә ԝан ԝәлатада дьжин, кʹидәре нькарьн аза хьзмәт кьн, ләма жи әԝана дьгәрʹьн щурә-щурʹә метода, кӧ чаԝа мьзгинийе бәла кьн (Мәт. 10:17-20). Ԝәлатәки ӧсада, бәрпьрсийарәки мьһале ширәт да мьзгинвана, ԝәки әԝана һин бьн шәʹдәтийе бьдьн мәрьвед хԝәйи незик, щинар, һәвалед мәкʹтәбеда, һәвалхәбатчийа у мәрьвед нас. Нава дӧ салада, һәжмара щьвата ԝе мьһаледа гәләк мәзьн бу. Әм дьбәкә ԝи ԝәлатида нажин, кʹидәре әм нькарьн әшкәрә мьзгинийе бәла кьн, ле йәкә әм дькарьн дәрсәкә фәрз һин бьн жь хушк-бьред сәрԝахт: Тʹьме мәщала бьгәрʹьн, сәва чьԛас дькарьн мәрьварʹа шәʹдәтийе бьдьн у дӧдьли нәбьн, кӧ Йаһоԝа ԝе ԛәԝате бьдә ԝә, ԝәки һун чәтьнайада жи жерʹа хьзмәт кьн (Фили. 2:13). Ньһа ԝәʹдәки ӧса йә, кӧ әм гәрәке әʹмьре хԝәда тьштед фәрз дайньн щийе пешьн, ширһʹәлал, демәк бекемаси бьн, тʹӧ кәсирʹа нәбьнә сәбәбе лькʹӧмандьне, у бәред һәԛийе бьдьн. Һьнге һʹьзкьрьна мә ԝе һе зедә бә, у әме пәсьна бьдьнә Баве хԝәйи һʹьзкьри, Йаһоԝа! w19.08 13 ¶17-18

Тʹӧ кәс жь мә һʹьз накә тʹәви ԝан мәрьва незик бә, йед кӧ тʹәне йа хԝә дькьн у нахԝазьн ширәта ԛәбул кьн. Ле мә хԝәш те тʹәви ԝан мәрьва бьн, йед кӧ дьлшәԝат ьн, мәрьва һʹьз дькьн, рʹәʹм у шкәсти нә (1 Пәт. 3:8). Чаԝа кӧ әм дьхԝазьн незики мәрьвед ӧса бьн, ӧса жи мәрьв ԝе бьхԝазьн незики мә бьн, һәрге әм мьлук бьн. Мьлукти ӧса жи әʹмьре мә дьһа һеса дькә. Мәсәлә, щара әʹмьре мәда тьштед ӧса дьԛәԝьмьн, кӧ әм дьфькьрьн ԝәки әԝ нәрʹасти йә, гәрәке ӧса нибуйа. Мәрьвед кӧ гәләк аԛьл ьн у фәрәсәтед ԝан һәнә, нә һәр гав пʹайа у һӧрмәте дьстиньн. Ле щара мәрьвед кӧ нә бәрбьчʹәʹв ьн у фәрәсәтед ԝан кем һәнә, һе зедә ԛәдьр-һӧрмәте дьстиньн. Ле йәкә Сьлеман фәʹм дькьр, ԝәки билани йә һәрге мәри бь реали бьньһерʹә сәр әʹмьре хԝә, у бәрхԝә нәкʹәвә дәрһәԛа тьштед кӧ әʹмьре ԝида дьԛәԝьмьн (Ԝаиз 6:9). Һәрге әм мьлук ьн, мәрʹа ԝе һеса бә әʹмьре хԝәда ԛәбул кьн ԝан тьшта, чь кӧ әм һʹәсаб дькьн кӧ гәрәке ӧса нибуйа. w19.09 4-5 ¶9-10

Мәрьвед хԝәйиһʹӧкӧм, мәсәлә бав, дькарьн кʹаре бьдьн мәрьвед дьн жи. Йаһоԝа бав кʹьфш кьр ча сәре малбәте у жь ԝан дәʹԝа дькә, ԝәки зарʹед хԝә һин кьн, ширәт кьн у рʹаст кьн (1 Корн. 11:3). Ле һʹӧкӧме бава бь синор ә. Әԝана нькарьн ча дьхԝазьн ӧса сәрԝертийа мале бькьн, чьмки сазкʹаре малбәте Йаһоԝа йә, у әԝана бәр ԝи щабдар ьн (Әфәс. 3:14, 15). Бав дьдьнә кʹьфше кӧ гӧрʹа Йаһоԝада ньн, чахе һʹӧкӧме хԝә ӧса дьдьнә хәбате, ча Хԝәде хԝәш те. Һʹӧкӧм кӧ Йаһоԝа дайә ԝә, алийе нәрʹастда нәдьнә хәбате. Шашийед хԝә биньн сәр хԝә у чахе ԝәрʹа ширәта сәр һʹиме Кʹьтеба Пироз дьдьн, ԛәбул кьн. Һәрге һун ӧса бькьн, малбәта ԝә ԝе ԛәдьре ԝә бьгьрә, бона мьлуктийа ԝә. Чахе һун тʹәви нәфәред хԝә дӧа дькьн, дьле хԝә Йаһоԝарʹа вәкьн, бьра әԝана бьбьһен, кӧ һун аликʹари у рʹебәри жь Йаһоԝа дьгәрʹьн. Ле йа лапә фәрз, бьра хьзмәтийа Йаһоԝарʹа әʹмьре ԝәда щийе пешьн бьгьрә (Ԛан. Дщр. 6:6-9). Мәсәла ԝәйә баш, әԝ һәйә пʹешкʹешәкә мәзьн, бона нәфәред ԝә. w19.09 15 ¶8; 17 ¶14; 18 ¶16

Марԛос шабун дьстанд жь ве йәке, кӧ хушк-бьрарʹа бәрдәсти дькьр. Әԝи щурʹә-щурʹә ԝәʹдада тʹәви Паԝлос у Пәтрусе шанди хьзмәт дькьр, чахе ԝана щабдарийед хԝә дьанинә сери. Мәсәлә, әԝи һʹәԝщед физикида бәрдәсти ԝанрʹа дькьр (Кʹар. Шанд. 13:2-5; 1 Пәт. 5:13). Паԝлос чахе гот «әвана . . . бона Пʹадшатийа Хԝәде тʹәви шьхӧле мьн ьн», әԝи дәрһәԛа Марԛос жи дьгот, йе кӧ бина Паԝлос ԝи дәрдькʹәт (Колс. 4:11). Марԛос бона Паԝлос бу һәвале незик. Мәсәлә, чахе Паԝлос щара хьлазийе Рʹомеда кәледа бу, незикайа сала 65 Д.М., әԝи нәʹма хԝәйә дӧда Тимотʹейорʹа ньвиси. Ве нәʹмеда, Паԝлос Тимотʹейорʹа гот, ԝәки бе Рʹоме у Марԛос жи тʹәви хԝә бинә (2 Тимтʹ. 4:11). Бешьк Паԝлос гәләк ԛимәт дькьр әԝ бәрдәстикьрьна Марԛосә бәре, ләма әԝи хԝәст Марԛос ԝи ԝәʹде фәрз бе у кʹеләка ԝи бә. Марԛос щурʹә-щурʹә тьштада али Паԝлос кьр, дьбәкә әԝи хԝарьн жерʹа дьани, йан жи тьштед бона ньвискʹарийе. Әԝ кʹомәкдари у дьлдайин кʹижан Паԝлос станд, али ԝи кьр, ԝәки рʹожед хьлазийа әʹмьре хԝә, тәйах кә. w20.01 11 ¶12-13

Мә әʹмьрәки ӧса бьжарт, кӧ әм гәләк тьшт жь хԝә кем дькьн у шьхӧле гьран дькьн. Иса пешда мәрʹа гот, ԝәки әме бенә зерандьне. Ле әм гәрәке баԝәр кьн у бир нәкьн, кӧ Йаһоԝа ԝе ԛәԝате бьдә мә сәва һʹәму тәнгасийада сәбьр кьн. Әм чьԛас зедә сәбьр дькьн, һаԛас баԝәрийа мә ԝе һе ԛәԝи бә у әме бьшьдьн (Аԛуб 1:2-4). Әм ӧса жи баԝәр дькьн, ԝәки Йаһоԝа ԝе али мә бькә гава әм тьштәкида һʹәԝщә бьн, ӧса жи Иса ԝе мьԛати мә бә, у хушк-бьред мә жи ԝе мә бьшьдиньн (Мәт. 6:31-33; Йуһʹн. 10:14; 1 Тʹеслн. 5:11). Жьнка кӧ Иса ле ԛәнщ кьр кʹижан кӧ сәр хуне ԝәбьбу, һәма ве рʹоже рʹьһʹәти станд у гәш бу (Луԛа 8:43-48). Ле һәрге әԝ буйә шагьрта Мәсиһ, әԝе һʹәта-һʹәтайе гәш бьминә. Ле бь тʹәхмина ԝә әԝ пәй Иса чу? Һәрге әԝе бьжартийә кӧ нире Иса һьлдә сәр хԝә, бьдьнә бәр чʹәʹве хԝә кӧ әԝе хәлатәкә чьԛас мәзьн стандийә, демәк тʹәви Иса сәр әʹзмана йә! Һәр тьшт чь кӧ әԝе жь хԝә кем кьрийә у ԛӧрбан кьрийә бона Иса, найе бәрамбәрикьрьне тʹәви ве кʹәрәме, чь кӧ әԝе стандийә! Фьрԛи тʹӧнә һевийа мә жийина сәр әʹрде йан сәр әʹзмана йә, йәкә әме гәләк бәхтәԝар у рʹази бьн, кӧ мә ԛәбул кьрийә әв тʹәглифкьрьна Иса: «Ԝәрьнә щәм мьн»! w19.09 25 ¶21-22

Мәрьвед Даԝьдрʹа аликʹари лазьм бу у әԝана чун бал Набал, йе кӧ дәԝләти бу, у һьнә хԝарьн жь ԝи хԝәстьн. Ԝана аза әԝ аликʹари жь ԝи хԝәстьн, чьмки бәрʹийеда кәрийед ԝи хԝәй дькьрьн. Ле Набал мәрьвәки хԝәһʹьз бу у ԛайил нәбу тьштәки бьдә ԝан. Сәва ве йәке Даԝьд гәләк һерс кʹәт у сафи кьр Набал у һʹәму меред мала ԝида, бькӧжә (1 Сам. 25:3-13, 22). Ле Абигаила жьна Набал, хенщи кӧ бәдәԝ бу, ӧса жи йәкә сәрԝахт бу. Әԝе мерхаси да кʹьфше кӧ чу бал Даԝьд. Әԝ кʹәтә сәр чока у һиви ԝи кьр, ԝәки гӧне хуна кәсәк нәкә стуйе хԝә. Әԝе бь мәʹрифәти Даԝьд ширәт кьр, ԝәки әве дәрәще бьдә дәсте Йаһоԝа. Әԝ гьлийед ԝейә бь мьлукти у кьред ԝейә бь билани, дьле Даԝьд гьртьн. Әԝи тедәрхьст, ԝәки Йаһоԝа әԝ шандийә бал ԝи (1 Сам. 25:23-28, 32-34). Абигаиле хәйсәт-һʹӧнӧред ӧса нав хԝәда пешда анибу, кӧ али ԝе кьрьн дәсте Йаһоԝада керһати бә. Иро жи хушкед кӧ сәр хԝә дьхәбьтьн, ԝәки мәʹрифәт у сәрԝахт бьн, Йаһоԝа дькарә ԝана бьдә хәбате, сәва әԝана нәфәред хԝә у хушк-бьред щьватеда бьшьдиньн (Тито 2:3-5). w19.10 23 ¶10

Һʹәму Мәсиһийед рʹаст гәрәке жь Бабилона Мәзьн бь тʹәмами башԛә бьн. Мәрьве кӧ Кʹьтеба Пироз һин дьбә, дьбәкә пешийа кӧ дәрһәԛа рʹастийе пебьһʹәсийа, әндәме религийа ԛәлп бу. Әԝ дьбәкә пәй әʹйд-ԛәйд у шьхӧлед ве религийайе дьчу, йан жи пʹәрә ԛӧрбан дькьр. Ләма пешийа кӧ кәсәк бьбә хьзмәткʹаре нәньхӧманди, әԝ гәрәке ида тʹӧ тьштида тʹәви религийа ԛәлп гьредайи нибә. Әԝ гәрәке нәʹме бьньвисә йан жи щурʹәки майин бь тʹәмами жь ве дере йан тʹәшкиләте бьԛәтә, йа кӧ тʹәви Бабилона Мәзьн гьредайи йә. Мәсиһийе рʹаст гәрәке баԝәр бә, кӧ хәбата ԝи тʹӧ тьштида тʹәви Бабилона Мәзьн гьредайи нинә (2 Корн. 6:14-17). Ле чьрʹа әм хԝә ӧса дур дьгьрьн жь религийа ԛәлп? Чьмки әм нахԝазьн тʹәви шьхӧл у гӧнед ԝан религийа бьн, кʹижан кӧ бәр чʹәʹве Хԝәде һʹәрам ьн (Иша. 52:11). w19.10 12 ¶16-17

Йерәмйа ньвиси кʹьтеба кӧ наве ԝи сәр ә, у дьԛәԝьмә әԝ ӧса жи кʹьтебед 1 у 2 Пʹадшати ньвиси. Ньвисандьна ԝан кʹьтеба бешьк али ԝи кьр кӧ фәʹм кә, ԝәки Йаһоԝа чьԛас рʹәʹм ә һьндава мәрьвед гӧнәкʹар. Мәсәлә, әԝи заньбу ԝәки чахе Аһаб Пʹадша бона кьред хԝәйи хьраб гӧне хԝә ани рʹуйе хԝә, Йаһоԝа бахшандә ԝи у гот ԝәки рʹожед ԝида ԝе бәла нәйнә сәр мала ԝи (1 Пʹадш. 21:27-29). Йерәмйа ӧса жи заньбу, ԝәки Мьнаш жь Аһаб хьрабтьр зӧлми дькьр у дьле Йаһоԝа дешанд, ле чьмки Мьнаш гӧне хԝә ани рʹуйе хԝә, Йаһоԝа бахшандә ԝи (2 Пʹадш. 21:16, 17; 2 Дир. 33:10-13). Әԝан сәрһатийа али Йерәмйа кьрьн, кӧ чʹәʹв бьдә Хԝәде сәбьреда у рʹәʹмтийеда. Дина хԝә бьдьне, Йерәмйа ча бу һьндава Барук, чахе дина ԝи чу сәр тьште майин, нә кӧ сәр шьхӧле ԝи. Йерәмйа тʹӧ щар нәдьфькьри кӧ әԝ ида нькарә тʹәви ԝи һәвалтийе бькә, дәԝсе әԝи али Барук кьр, демәк гьлийед Хԝәде перʹа-перʹа, ле бь нәрми жерʹа гот (Йерәм. 45:1-5). w19.11 6 ¶14-15

Жь кʹьтеба Ԛануна Кʹаһинтийе, әм педьһʹәсьн, ԝәки Исраелийа дькарьбун дийарийа һәләԛәтийе биньн, демәк ԛӧрбан «бона рʹазидарийе» (Ԛан. Кʹаһ. 7:11-13, 16-18). Ԝана әԝ ԛӧрбан дьанин нә сәва ве йәке кӧ дьһатә дәʹԝакьрьне, ле чьмки ԝана хԝәха дьхԝәст. Мина ԝан дийарийед һәләԛәтийе, хьзмәтийа мәйә бь рʹәзәдьли жи дьдә кʹьфше, ԝәки әм Йаһоԝа һʹьз дькьн. Әм йа лапә баш дьдьн Йаһоԝа, чьмки әм бь тʹәмамийа дьле хԝә ԝи һʹьз дькьн. Йаһоԝа чьԛас ша дьбә, чахе бь милйона хьзмәткʹара дьвинә, йед кӧ бь рʹәзәдьли ԝи дьһʹәбиньн, чьмки ԝи у ԛанунед ԝи һʹьз дькьн. Дьле мә жи ша дьбә, кӧ Йаһоԝа дьвинә у ԛимәт дькә нә тʹәне ве йәке чь әм бона ԝи дькьн, ле ӧса жи кӧ әм чьрʹа дькьн. Мәсәлә, һәрге һун әʹмьрда мәзьн ьн у ида нькарьн һаԛас бькьн чьԛас дьхԝазьн, дӧдьли нәбьн, ԝәки Йаһоԝа һʹале ԝә фәʹм дькә. Дьбәкә һун дьфькьрьн, кӧ нькарьн бона Йаһоԝа гәләк бькьн, ле Йаһоԝа дьле ԝәда дьвинә һʹьзкьрьна ԝә һьндава ԝи, кʹижан кӧ ԝә һелан дькә һаԛас бькьн, чьԛас дькарьн. Әԝ бь дьл у щан ԛәбул дькә чахе әм чьԛас дькарьн йа лапә баш дьдьн ԝи. w19.11 22 ¶9; 23 ¶11-12

Гәләк фәрз ә, ньһерʹандьна мә һьндава хәбате рʹаст бә. Сьлеман Пʹадша пе рʹебәрийа Хԝәде ньвиси: «Ԝәхте һәр . . . кьрьне һәйә». Мәсәлә, әԝи дәрһәԛа чандьне, авакьрьне, гьри, кʹән, рʹәԛасе у кьред майин дьгот (Ԝаиз 3:1-8). Әʹйан ә ԝәки әʹмьре мәда хәбат у һесабун фәрз ьн. Ньһерʹандьна Иса сәр хәбате у һесабуне рʹаст бу. Щарәке шанди чахе жь рʹеԝитийа хьзмәтийе вәгәрʹийан, ԝана һаԛас хьзмәт кьр, ԝәки «мәщал нәдьдит кӧ нане хԝә жи бьхԝарана». Һьнге Иса гьлийед жь рʹеза ве рʹоже ԝанрʹа гот (Марԛ. 6:30-34). Рʹаст ә әԝ у шагьртед ԝи һәр гав нькарьбун хԝәрʹа ӧса рʹьһʹәт буна ча ԝана дьхԝәст, ле Иса фәʹм дькьр ԝәки ԝан һʹәмуйарʹа һесабун лазьм ә. Щара мәрʹа лазьм ә һеса бьн йан жи графика хԝәда гӧһастьна бькьн. Әве йәке әме рʹьнд фәʹм бькьн, гава әм шеԝьр кьн дәрһәԛа Рʹожа Шәмийе, йа кӧ Хԝәде тʹәми да Исраелийа ԝәки хԝәй кьн. Рʹаст ә әм бьн Ԛануна Мусада ниньн, ле чахе әм дәрһәԛа рʹожа Шәмийе шеԝьр кьн, әме кʹаре бьстиньн. w19.12 3 ¶6-7

Йаһоԝа соз да, ԝәки ԝе бона хьзмәткʹаред хԝәйи амьн хәм бькә, у әԝ хԝә борщдар һʹәсаб дькә, ԝәки әԝи сози бинә сери (Зәб. 31:1-3). Хенщи ве йәке, Йаһоԝа занә ԝәки әме дьлшкәсти бьн һәрге әԝ бона мә хәм нәкә, чьмки әм нәфәред малбәта ԝи нә. Әԝ соз дьдә, ԝәки ча матерйалида ӧса жи рʹӧһʹанида ԝе али мә бькә, у тʹӧ тьшт нькарә рʹийа ԝи бьгьрә, кӧ ви созе хԝә бинә сери (Мәт. 6:30-33; 24:45). Һәрге әм бир нәкьн, кӧ чьрʹа Йаһоԝа созед хԝә тʹьме тинә сери, әме дӧдьли нәбьн, кӧ ԝәʹде проблемед алийе пʹәрәда, әԝ ԝе али мә бькә. Дина хԝә бьдьнә  мәсәла Мәсиһийед ԛьрʹна йәке. Чахе щьвата Оршәлиме рʹасти зерандьнәкә гьран һат, «пештьри шандийа һʹәмуйед баԝәрмәнд» һәв бәла бун (Кʹар. Шанд. 8:1). Бьфькьрьн, әԝана жь бо ве йәке кʹәтьнә чь тәнгасийе. Әԝана економикида рʹасти чәтьнайа һатьн. Әԝан Мәсиһийа дьԛәԝьмә мал у хәбатед хԝә ӧнда кьрьн. Ле Йаһоԝа әԝана нәһиштьн, нә жи ԝана шабуна хԝә ӧнда кьр (Кʹар. Шанд. 8:4; Ибрн. 13:5, 6; Аԛуб 1:2, 3). Йаһоԝа али ԝан Мәсиһийед амьн дькьр, у әԝ ԝе али мә жи бькә (Зәб. 37:18, 19). w20.01 17-18 ¶14-15

Чахе Даԝьд пәзед баве хԝә жь шер у һʹьрчʹ хԝәй кьр, әԝи тедәрхьст, ԝәки Йаһоԝа али ԝи кьр, кӧ әԝи карьбу ԝан тәрәԝьлед бәйани бькӧжә. Чахе Даԝьд Голйате тәʹрьки кӧшт, Даԝьд әшкәрә дит, ԝәки Йаһоԝа рʹебәри ԝи кьр (1 Сам. 17:37). У чахе әԝ жь Шаԝуле һʹәвсуд рʹәвийа, әԝи фәʹм кьр, ԝәки Йаһоԝа ԝи хьлаз кьр (Зәб. 18, бьнсәри). Һәрге Даԝьд мәрьвәки ԛӧрʹә буйа, ԝе һʹәсаб кьра, ԝәки әԝи хԝәха пе ԛәԝата хԝә һәр тьшт дькьр. Ле әԝ йәки мьлук бу, ләма жи әʹмьре хԝәда дәсте Йаһоԝа дьдит. Әм жь ве йәке чь дәрсе һин дьбьн? Әм гәрәке жь Йаһоԝа нә тʹәне аликʹарийе бьхԝазьн, ле ӧса жи гәрәке тедәрхьн кʹәнге у ча әԝ аликʹарийе дьдә мә. Һәрге әм мьлук ьн, әме фәʹм кьн, ԝәки әм хԝәха нькарьн һәр тьшти бькьн, ле Йаһоԝа али мә дькә. У һәр щар, чахе әм аликʹарийа Йаһоԝа дьвиньн, һәләԛәтийа мә тʹәви ԝи һе ԛәԝи дьбә. w19.12 20 ¶18-19

Диса гәләк мәʹни һәнә, кӧ дӧдьли нәбьн ԝәки Йаһоԝа мә ԛимәт дькә. Әԝи әм незики хԝә кьрьн у дина хԝә дайе кӧ мә ча хԝә да кʹьфше, гава мьзгини бьһист (Йуһʹн. 6:44). Чахе мә дәстпекьр незики Йаһоԝа бьн, әԝ дьһа незики мә бу (Аԛуб 4:8). Йаһоԝа ӧса жи ԝәʹдә у һәр мәщала дьдә хәбате сәва мә һин кә, у бь ве йәке дьдә кʹьфше кӧ мә һʹьз дькә. Әԝ занә әм ньһа мәрьвнә чь щурʹәйи нә, у занә әм ча алийе башда дькарьн бенә гӧһастьне. У әԝ ӧса жи мә ширәт дькә, чьмки мә һʹьз дькә. Әԝ избаткьрьнәкә ԛәԝи йә, кӧ Йаһоԝа бь рʹасти мә ԛимәт дькә! Һьнәка Даԝьд Пʹадша бәр тьштәки һʹәсаб нәдькьрьн, ле әԝи заньбу ԝәки Йаһоԝа ԝи һʹьз дькә у пьшта ԝи дьгьрә. Әве йәке али ԝи дькьр тәнгасийада ньһерʹандьна рʹаст хԝәй кә (2 Сам. 16:5-7). Чахе әм хԝә бекер тʹәхмин дькьн у дьлшкәсти нә, йан жи проблемед мә һәнә, Йаһоԝа дькарә али мә бькә, ԝәки ԝан чәтьнайада зәʹф дьлтәнг нәбьн у  ӧса жи али мә бькә ԝан проблема һеса дәрбаз кьн (Зәб. 18:27-29). Чахе Йаһоԝа алийе мә йә, тʹӧ тьшт нькарә мә бьдә сәкьнандьне, кӧ бь шабуне ԝирʹа хьзмәт кьн (Рʹом. 8:31). w20.01 15 ¶7-8

Чахе һун һинбуне дәрбаз дькьн, пе дӧа дәстпекьн. Ԝе гәләк баш бә, зу мәрьварʹа шьровәкьн, ԝәки лазьм ә һинбуне пе дӧа дәстпекьн у хьлаз кьн, мәсәлә, һәма һʹәфтийед пешийеда ӧса дәрбаз кьн. Әԝана гәрәке бьзаньбьн, ԝәки әм Хәбәра Хԝәде тʹәне пе аликʹарийа рʹӧһʹе Хԝәдейи пироз дькарьн фәʹм кьн. Һьнә хушк-бьра чахе һинбуне дәстпедькьн у дьхԝазьн шьровәкьн, ԝәки чьрʹа пе дӧа гәрәке дәстпекьн, мәрьварʹа рʹеза жь Аԛуб 1:5 дьхуньн: «Һәгәр сәрԝахтийа йәки жь ԝә тʹера ԝи накә, бьра һиви жь Хԝәде бькә». У паше пьрсе дьдьнә ԝан: «Чаԝа әм дькарьн жь Хԝәде сәрԝахтийе бьхԝазьн?» Мәрьв дьбәкә ԛайил бә, ԝәки әм гәрәке Хԝәдерʹа дӧа бькьн. Ԝана һин кьн кӧ чаԝа дӧа бькьн. Ԝанрʹа шьровәкьн, ԝәки Йаһоԝа дьхԝазә дӧайед ԝани бь дьл бьбьһе. Ԝанрʹа бежьн, ԝәки әԝана дькарьн дӧайед хԝәда дьле хԝә Йаһоԝарʹа вәкьн. Ӧса жи ԝанрʹа шьровәкьн, ԝәки әԝана чь кӧ дьбәкә нькарьн мәрьварʹа бежьн, бьра Йаһоԝарʹа гьли кьн, чьмки әԝ ида фькьред ԝанә кʹур занә (Зәб. 139:2-4). w20.01 2 ¶3; 5 ¶11-12

Йаһоԝа хԝәха сафи дькә, кӧ кʹәнге мәрьва бь рʹӧһʹе пироз кʹьфш кә (Рʹом. 8:28-30). Йаһоԝа паши сахкьрьна Иса дәстпекьр ԝана бьжберә. Те кʹьфше ԝәки ԛьрʹна йәкеда һʹәму Мәсиһи бьжарти бун. Паше ида чахе ԛьрʹнә дәрбаз дьбун, һʹәчʹи зәʹф кӧ дьготьн, ԝәки әԝана Мәсиһи нә, бь рʹасти пәй Мәсиһ нәдьчун. Ле һәла һе ԝан салада жи Йаһоԝа һьнәк кʹьфш кьрьн, йед кӧ Мәсиһийед рʹаст бун. Әԝана мина гәньм нава зиԝанда мәзьн дьбун (Мәт. 13:24-30). Ԝәʹде рʹожед ахьрийеда, Йаһоԝа бәрдәԝам дькә ԝан мәрьва бьжберә, йед кӧ ԝе бькʹәвьнә нава 144 000. Ләма һәрге Хԝәде сафи дькә, ԝәки бәр шемика хьлазийа дьнйайе һьнәка кʹьфш кә, әм гәрәке сафикьрьна ԝи нәкьнә бьн шьке (Рʹом. 9:11). Әм гәрәке фәсал бьн, ԝәки нәбьнә мина ԝан пʹала, дәрһәԛа кʹижана Иса мәтʹәлокеда гьли кьр. Ԝана дькьрә кӧтә-кӧт, кӧ чьрʹа аха һьндава ԝанда, йед кӧ хьлазийа рʹожеда хәбьтин, мәрʹдани да кʹьфше (Мәт. 20:8-15). w20.01 30 ¶14

Йаһоԝа бавәки һʹьзкьри йә, у ләма әԝ дьхԝазә малбәта ԝи бәхтәԝар бә. Гәләк мәʹни һәнә, кӧ чьрʹа әм ида ньһа дькарьн әшԛ у ша бьн, һәла һе жи чахе рʹасти чәтьнайа тен. Мәсәлә, әм баԝәр ьн, ԝәки Баве мәйи әʹзмана мә гәләк һʹьз дькә. Әм рʹастийа жь Хәбәра Хԝәде заньн (Йерәм. 15:16). У әм малбәтәкә ӧса мәхсусда ньн, кʹидәре гьшк Йаһоԝа у ԛанунед ԝи һʹьз дькьн, у ӧса жи һәвдӧ һʹьз дькьн (Зәб. 106:4, 5). Әм шабуна хԝә ӧнда накьн, чьмки һевийа мә һәйә, кӧ әʹмьре мә ахьрийеда ԝе дьһа хԝәш бә. Әм заньн ԝәки зутьрәке Йаһоԝа ԝе һʹәму щурʹә хьраби бьдә һьлдане у бьн рʹебәрийа Пʹадшатийа хԝә әʹрде бькә Щьнәт. Хенщи ве йәке, һевийа мә һәйә кӧ мьри ԝе рʹабьн у әме диса кʹеләка мәрьвед хԝәйи незик бьн (Йуһʹн. 5:28, 29). Әԝ рʹасти жи ԝе ԝәʹдәки чьԛас хԝәш бә! Ле йа лапә фәрз әԝ ә, кӧ зутьрәке һәр кәс ча сәр әʹзмана ӧса жи сәр әʹрде, ԝе һӧрмәт у пәсьна бьдьнә Баве мәйи һʹьзкьри у тʹәне ԝи бьһʹәбиньн, чьмки тʹәне әԝ һежайи ве йәке йә. w20.02 13 ¶15-16

Һәрге тә гӧнәки мәзьн кьрийә, вәнәшерә, дәԝсе бь тʹәмамийа дьле хԝә дӧада бәр Йаһоԝа гӧне хԝә бинә рʹуйе хԝә. Һьнге тӧйе ида жь бо гӧне хԝә зәʹф бәрхԝә нәкʹәви у дьле тә ԝе һьнәки һеса бә. Ле һәрге тӧ дьхԝази, ԝәки достийа хԝә тʹәви Йаһоԝа вәгәрʹини, хенщи дӧа, тӧ гәрәке диса тьштәки бьки. Һун гәрәке ширәткьрьне ԛәбул кьн. Чахе Йаһоԝа Натан шанд щәм Даԝьд Пʹадша сәва гӧне ԝи тʹәви  Бат-Шәбайе бьдә рʹуйе ԝи, Даԝьд хԝә һәԛ дәрнәдьхьст у гӧне хԝә сьвьк һʹәсаб нәдькьр. Әԝи дәрберʹа ани сәр хԝә, ԝәки нә кӧ тʹәне һьндава мере Бат-Шәбайе гӧнә кьрийә, ле илаһи һьндава Йаһоԝа. Даԝьд щәза у ширәткьрьна Йаһоԝа ԛәбул кьр у Йаһоԝа бахшандә ԝи (2 Сам. 12:10-14). Һәрге мә гӧнәки гьран кьрийә, әм гәрәке рʹуспийарʹа бежьн, чьмки Йаһоԝа әԝана кʹьфш кьрьнә кӧ  шьвантийе мә бькьн (Аԛуб 5:14, 15). Әм ӧса  жи гәрәке хԝә һәԛ дәрнәхьн. Әм  чьԛас зу ширәткьрьне ԛәбул кьн у бьдьнә хәбате, һаԛас һе зу әме дьлрʹьһʹәтийе у шабуне диса бьстиньн. w20.02 24-25 ¶17-18

«Дәһ мәрьв» бь симболик әԝ ьн, һевийа кʹижана жийина һʹәта-һʹәтайе сәр әʹрде йә. Әԝана заньн, ԝәки Йаһоԝа әв кʹома бьжартийа кʹәрәм дькә, кʹижан кӧ бь симболик «Щьһу» нә, у һʹәсаб дькьн, ԝәки бона ԝан ԛәдьр ә кӧ тʹәви бьжартийа Хԝәде бьһʹәбиньн. Рʹаст ә найе  стандьне, ԝәки бьзаньбьн наве һәр бьжартийа, кӧ иро сәр әʹрде нә, ле әԝед кӧ һивийа жийина сәр әʹрде нә, йәкә дькарьн бь симболик тʹәви бьжартийа һәрʹьн. Чаԝа? Рʹеза рʹожа иройин щаба ԝе пьрсе дьдә. Дина хԝә бьдьне, ԝәки ве рʹезеда те готьне дәрһәԛа Щьһуки. Ле «дәһ» мәрьв дьбежьн «ԝә», демәк гәләканида. Әԝ те һʹәсабе, ԝәки Щьһу тʹәне мәрьвәк нинә, ле әԝ тʹәмамийа кʹома бьжартийа йә. Әԝед кӧ кʹьфшкьри ниньн, тʹәви йед бьжарти Йаһоԝарʹа хьзмәт дькьн. Ле әԝана тʹӧ щар ԝана ча рʹебәред хԝә һʹәсаб накьн, чьмки әԝана фәʹм дькьн, ԝәки Рʹебәре ԝан тʹәне Иса йә (Мәт. 23:10). w20.01 26 ¶1-2

Иса гот кӧ гьшкарʹа ԝе әʹйан бә, ԝәки әԝана шагьртед ԝи нә, һәрге ӧса мәрьва һʹьз бькьн, чаԝа әԝи ԝана һʹьз дькьр. Әԝ гьлийед Иса чаԝа бона ԛьрʹна йәке бун, ӧса жи бона иро нә. Рʹасти жи чьԛас фәрз ә һәв һʹьз бькьн һәрге жи мәрʹа чәтьн ә! Пьрс бьдьнә хԝә: «Әз чь дькарьм һин бьм жь ԝан хушк-бьра, кʹижан кӧ бәрдәԝам дькьн һʹьзкьрьне бьдьнә кʹьфше, гава ԝанрʹа чәтьн ә жи?» Әм гӧнәкʹар ьн, ләма жи щара мәрʹа чәтьн ә һәвдӧ ԛайим һʹьз бькьн. Ле йәкә әм гәрәке чʹәʹв бьдьнә Иса. Әԝи һин кьр кӧ чьԛас фәрз ә әʹдьлайе хԝәй кьн тʹәви ԝи мәрьви, дьле кʹижани жь мә майә (Мәт. 5:23, 24). Әԝи да кʹьфше кӧ һәрге әм дьхԝазьн ль Хԝәде хԝәш бен, әм гәрәке һәләԛәтийа баш тʹәви мәрьва хԝәй кьн. Йаһоԝа ша дьбә чахе әм һәр тьшти дькьн, сәва тʹәви хушк-бьра ль һәв бен. Йаһоԝа ԝе хьзмәтийа мә ԛәбул нәкә, һәрге әм хәйде дьле хԝәда хԝәй кьн у илаһи нәхԝазьн ль һәв бен (1 Йуһʹн. 4:20). w20.03 24 ¶1-4

Шәйтʹан, кӧ «баве дәрәԝа» йә, жь дәстпека тʹәрихийа инсанәте, мәрьва дьхальфинә (Йуһʹн. 8:44). Мәсәлә, әԝ һинкьрьнед ԛәлп дәрһәԛа мьрьне у жийина паши мьрьне бәла дькә. Сәр һʹиме ԝан һинкьрьнед ԛәлп, гәләк ԛәйд у әʹдәт пешда һатьнә. Чьрʹа һаԛас мәрьв тенә хапандьне? Шәйтʹан занә, ԝәки мәрьв чь тʹәхмин дькьн дәрһәԛа мьрьне, у әԝе йәке дьдә хәбате сәва мә бьхальфинә. Әԝ занә кӧ әм нахԝазьн бьмьрьн, чьмки әм ӧса һатьнә әʹфьрандьне, кӧ һʹәта-һʹәтайе бьжин (Ԝаиз 3:11). Мьрьн дьжмьне мә йә (1 Корн. 15:26). Шәйтʹан чь жи дькә, йәкә рʹастийа дәрһәԛа мьрьне вәшарти нинә. Бь рʹасти иро гәләк мәрьв һинкьрьнед Кʹьтеба Пироз дәрһәԛа мьрийа у һевийа бона мьрийа заньн у бәла дькьн. Әԝ рʹастийед жь Кʹьтеба Пироз дьлбинийе дьдьнә мә (Ԝаиз 9:5, 10; Кʹар. Шанд. 24:15). Әм ида жь мьрьне натьрсьн у бәрхԝә накʹәвьн кӧ чь дьԛәԝьмә паши мьрьне. w19.04 14 ¶1; 15 ¶5-6

Йаһоԝа Хԝәде хьзмәткʹаред хԝә гәләк һʹьз дькә. Әԝи тʹьме әԝана һʹьз кьрьнә у ԝе тʹьме һʹьз бькә. Әԝ ӧса жи һәԛийе һʹьз дькә (Зәб. 33:5). Ләма әм ван дӧ тьштада гәрәке дӧдьли нәбьн: 1) Дьле Йаһоԝа дешә чахе хьзмәткʹаред ԝи рʹасти нәһәԛийе тен. 2) Әԝ соз дьдә, ԝәки нәһәԛи ԝе бе һьлдане, у әԝ ԝе диԝана ԝан бькә, йед кӧ һьндава щьмәʹта ԝи нәһәԛийе дькьн. Ԛанун кӧ Хԝәде бь сайа Муса дабу щьмәʹта Исраел, сәр һʹиме һʹьзкьрьне бу. Әԝе Ԛануне һин дькьр, ԝәки әԝана һәԛ бьн, илаһи һьндава ԝанда, йед кӧ нькарьбун хԝә хԝәй кьрана (Ԛан. Дщр. 10:18). Әԝ Ԛанун әʹйан дькә, ԝәки Йаһоԝа ча дькʹәвә һʹәйра хьзмәткʹаред хԝә у бона ԝан хәм дькә. Чахе щьвата Мәсиһити һатә сазкьрьне, сала 33 Д.М., Ԛануна Муса жь ԛәԝате дәркʹәт. Ле  гәло Мәсиһийед һьнге бе ԛанун ман, кʹижан кӧ сәр һʹиме һʹьзкьрьне бу у һәԛи дьани? На, чьмки Мәсиһийарʹа ԛануна тʹәзә һатә дайине, демәк «ԛануна Мәсиһ». Иса шагьртед хԝәрʹа гәләк ԛанун нәньвисин, әԝи рʹебәри, тʹәми у принсип да ԝан. Һʹәму тьшт чь кӧ Иса һин дькьр, дькʹәвә нава «ԛануна» Мәсиһда. w19.05 2 ¶1-3

Мәрьв ӧса һатьнә әʹфьрандьне кӧ һʹәԝще бәрдьлийе нә у һьн жи нав ԝанда жи һәйә әԝ фәрәсәт, кӧ бәр дьле мәрьвада бен. Бәʹса хәбәре, чахе зарʹа бьчʹук ԝәʹде листьке дькʹәвә у чока ԝи дьһʹәрьшә, әԝ дьгьри у дьрʹәвә бал де йан баве хԝә. Де-бав рʹаст ә нькарьн бьрʹина зарʹе ԛәнщ кьн, ле бәр дьле ԝида тен. Әԝана дьпьрсьн кӧ чь ԛәԝьми, һесьред ԝи тʹәмьз дькьн, гьлийед ширьн жерʹа дьбежьн у ԝи һʹәмез дькьн. Паше әԝана бьрʹина ԝи ида дәрман дькьн йан гьредьдьн. Зарʹ ида һеса дьбә у нагьри, у дьбәкә диса бәрдәԝам дькә бьлизә. Ԝәʹдә дәрбаз дьбә у бьрʹина ԝи жи ԛәнщ дьбә. Ле щара һьнә зарʹ зийана һе мәзьн дьстиньн, мәсәлә, чахе рʹасти зорбәтийа сексуали тен. Һьнә зарʹ тʹәне щарәке рʹасти ве йәке һатьнә, ле һьнәк жи бь сала рʹасти ве зорбәтийе тен. Фьрԛи тʹӧнә чьԛас щар әԝана рʹасти ве йәке һатьнә, әԝ һʹәму зарʹ зийана психоложи дьстиньн, дьле ԝан бьриндар дьбә у еша дьле ԝан гәләк ԝәхт дәрбаз набә. Щара әԝед кӧ зорбәти зарʹа кьрьнә, тенә щәзакьрьне у дькʹәвьнә кәле, щара жи ӧса те кʹьфше, кӧ әԝана жь щәзакьрьне хьлаз бунә. Ле һәрге жи әԝ мәрьв те щәзакьрьне, йәкә зийана кӧ әԝи дайә зарʹе, сәр зарʹе бь сала жи дькарә бьминә. w19.05 14 ¶1-2