Адар

Әм һьлбәт жь нәфрʹәте шабуне настиньн. Ләма, әм чьрʹа дькарьн бәхтәԝар бьн гава мә нәфрʹәт дькьн? Бона се сәбәба: Йа йәке, гава әм сәбьр дькьн, Хԝәде жь мә рʹази дьбә (1 Пәтрус 4:13, 14). Йа дӧда, баԝәрийа мә дьһа ԛәԝи дьбә (1 Пәтрус 1:7). У йа сьсийа, әме хәлатәкә хԝәш бьстиньн – жийина һʹәтайе! (Рʹомайи 2:6, 7) Дәмәкә кьн паши кӧ Иса Мәсиһ жь мьрьне рʹабу, готьнед ԝи һатьн сери. Щьһуйа шандийед Иса Мәсиһ данә бәр ԛамчийа у ԝанрʹа готьн, ԝәки бәлакьрьна мьзгине бьдьнә сәкьнандьне. Диса жи, шандийед Иса Мәсиһ ша дьбун, чьмки «бона наве Иса һежайи рʹәзилкьрьне бунә» (Кʹаред Шандийа 5:40-42). Ԝана Иса Мәсиһ һаԛас һʹьз дькьр кӧ жь дьжмьна нәдьтьрсийан. Сәва ве һʹьзкьрьне, ԝана бәлакьрьна мьзгине нәданә сәкьнандьне. Иро жи гәләк хушк-бьра ԝәʹде тәнгасийа бь амьни Йаһоԝарʹа хьзмәт дькьн. Әԝана заньн кӧ Йаһоԝа щәфе ԝан у һʹьзкьрьна кӧ әԝана бона наве ԝи нишан дькьн, бир накә. w21.03 25 ¶18-19

Кәсед бь рʹӧһʹ кʹьфшкьри бь һевийа әʹзмани найен буйине. Тʹәне Хԝәде дькарә ԝан бьжберә у ве һевийе бькә дьле ԝан. Әԝана дәрһәԛа һевийа хԝә дьфькьрьн у дӧа дькьн, у әԝана һʹьзрәта хәлата хԝә йа әʹзмани нә. Әԝана ньзаньн кӧ бәдәна ԝан йа рʹӧһʹани ԝе чь щурʹәйи бә (Филипи 3:20, 21; 1 Йуһʹәнна 3:2). Диса жи, әԝана ша нә кӧ әԝе бькʹәвьн Пʹадшатийа әʹзмани. Пәзед дьн һивийа жийана һәрһәйи йа ль сәр әʹрде нә. Бь рʹасти хԝәстьна жийана һәрһәйи йа ль сәр әʹрде дь дьле һʹәму инсанада һәйә. Пәзед дьн ша нә кӧ әԝе бькарьбьн тʹәмамийа әʹрде бькьн щьнәт, ханийа ава бькьн, баха бьчиньн у зарʹед хԝә бь сьһʹәта кʹамьл мәзьн бькьн (Ишайа 65:21-23). Мәщала ԝан ԝе һәбә кӧ чʹийа, дарьстан, бәред дьнйайе у тʹәбийәте леколин бькьн. Жь һәр тьшти зедәтьр, әԝана ша нә кӧ әԝе бькарьбьн һе незики Йаһоԝа бьн. w21.01 18-19 ¶17-18

Чахе Бабилони әʹрд зәфт кьрьн у ԝеран кьрьн, щьмәʹте дәрһәԛа әʹрде тʹәне әԝ йәк дькарьбу бьгота: «Бу чоләки бе мьров у бе һʹәйԝан, бь дәсте Кьлданийанва һатә дайин» (Йерәм. 32:43). Ԝәкә 200 сал паши пʹехәмбәртийа Йоԝел, Йаһоԝа пе Йерәмйа дәрһәԛа ве зәфткьрьне диса тьштәк пʹехәмбәрти кьр. Әԝи гот, әԝана ԝе Исраелийед кӧ кьред хьраб дькьрьн, һʹәму щийа бьгәрʹьн, у ԝана бьгьрьн. «А вай, әзе пʹьр мәʹсивана биньм, Хӧдан дьбежә у ԝе ԝан бьгьрьн у әзе паши ԝе пʹьрʹ нечʹирвана биньм у ԝе жь сәр һәр чʹийайи у жь сәр һәр гьр у жь . . . зьнарʹа нечʹира ԝан бькьн. . . . Пешийе әзе фәсадийед ԝан у сущед ԝан бь дӧ ԛати бьдьм». Бәле, ча бежьн нә океанада нә жи мешада, Исраелийед нәамьн нькарьбун хԝә жь щәзакьрьна Йаһоԝа вәшартана (Йерәм. 16:16, 18). w20.04 5 ¶12-13

Дәрәща гьранда Лут гәрәке тʹәмийа Йаһоԝа зу бьанийа сери, ле әԝи дәрәнги дьхьст. Әм дьбәкә Лут нәһәԛ кьн, у ԝи ча йәки бетʹалаш һʹәсаб кьн, у бьфькьрьн кӧ әԝ гӧрʹа Хԝәдеда нибу. Ле Йаһоԝа тʹәрка Лут нәда. «Бь рʹәʹма Хӧдан» мәләка дәсте Лут у нәфәред ԝи гьртьн, у әԝана жь шәһәр дәрхьстьн (Дәстп. 19:15, 16). Мәʹни һәбун кӧ чьрʹа Йаһоԝа рʹәʹма хԝә һьндава Лут да кʹьфше. Дьԛәԝьмә Лут жь щьмәʹта ԝи шәһәри дьтьрсийа, ләма әԝ зу жь мала хԝә дәрнәдькʹәт. Ле диса хоф һәбун. Дьԛәԝьмә Лут бьһистьбу, ԝәки дәшта незики ԝи щийи, чʹәʹлед ԛире һәбун, чьмки дӧ пʹадша кʹәтьбун нав ԛире (Дәстп. 14:8-12). Ча малхе мале у бав, Лут бона нәфәред хԝә жи бәрхԝә дькʹәт. Хенщи ве йәке, Лут йәки дәԝләти бу, у ләма дьԛәԝьмә Содомеда мала ԝи гәләк баш бу (Дәстп. 13:5, 6). Һәмьки әԝ мәʹни Лут һәԛ дәрнахьн, кӧ әԝи гӧрʹа Йаһоԝа нәкьр. Рʹаст ә Лут шаши кьр, ле йәкә Йаһоԝа ԝи һʹәсаб кьр мәрьвәки «рʹаст» (2 Пәт. 2:7, 8). w20.04 18 ¶13-14

Бьре щаһьл, щарна ԝәхт лазьм ә ԝәки кәсед кӧ жь бьчʹуктайе тә нас дькьрьн, ԛәбул бькьн кӧ тӧ ида мәзьн буйи. Ле тӧ дькари баԝәр би кӧ Йаһоԝа тʹәне бәжн-бала тә наньһерʹә. Әԝ занә кӧ тӧ йәки ча ни у дькари чь бьки (1 Самуйел 16:7). Йа дӧда, достийа хԝә тʹәви Хԝәде дьһа ԛәԝи бькә. Даԝьд сәва кӧ Йаһоԝа дьһа незик нас бькә, дина хԝә дьда чекьрьна дәстед ԝи у кʹур дьфькьри кӧ тʹәбийәт дәрһәԛа Хԝәде чь һин дькә (Зәбур 8:3, 4; 139:14; Рʹомайи 1:20). Йа сьсийа, хԝә бьсперә Йаһоԝа. Мәсәлә, дьбәк һьнә һәвалдәрсханед тә ԛәрфед хԝә тә дькьн, чьмки тӧ Шәʹде Йаһоԝа йи. Һәгәр ӧса йә, жь Йаһоԝа аликʹарийе бьхԝазә. Ӧса жи, ширәтед жь Кʹьтеба Пироз, жь әʹдәбйәт у видеойед мә бьдә хәбате. Һәр гав чахе тӧ дьвини кӧ Йаһоԝа чаԝа али тә дькә, баԝәрийа тә дьһа ԛәԝи дьбә. Сәрда, гава кәсед дьн дьвиньн кӧ тӧ хԝә дьспери Йаһоԝа, әԝе итʹбарийа хԝә тә биньн. w21.03 4 ¶7

Диса һәйә пʹешкʹешәкә ԛимәт кӧ найе дитьн, әԝ һәйә дӧа. Һәвалед незик һʹьз дькьн дәрһәԛа фькьр у һәстед хԝә тʹәви һәв хәбәр дьн. Дәрһәԛа достийа тʹәви Йаһоԝа жи әм дькарьн ӧса бежьн. Йаһоԝа пе Кʹьтеба Пироз мәрʹа хәбәр дьдә, у ве кʹьтебеда Әԝ фькьр у һәстед хԝә мәрʹа әʹйан дькә. Ле әм пе дӧа тʹәви ԝи хәбәр дьдьн у дькарьн жерʹа фькьред хԝә гьли кьн у дьле хԝә вәкьн. Ча Досте һʹьзкьри, Йаһоԝа нә тʹәне дӧайед мә дьбьһе, ле ӧса жи щаба дӧайед мә дьдә. Щара әԝ зу щабе дьдә, ле щара мәрʹа лазьм ә һе зедә дӧа бькьн һʹәта щабе бьстиньн. Чь жи һәбә, йәкә әм гәрәке дӧдьли нәбьн, ԝәки әме щаба дӧайед хԝә һьн әʹсә ԝәʹдәда бьстиньн, һьн жи ӧса кӧ бона мә ԝе лапә баш бә. Ле щара Хԝәде ӧса щаба мә надә, ча әм һивийе нә. Мәсәлә, дәԝса кӧ мә жь щерʹьбандьнәке хьлаз кә, әԝ биланийе у ԛәԝате дьдә мә, сәва әм бькарьбьн «тәйах кьн» (1 Корн. 10:13). Ча әм дькарьн нишан кьн, ԝәки әм рʹази нә бона пʹешкʹеша гәләк ԛимәт, демәк дӧа? Әме ве йәке бьдьнә кʹьфше, һәрге ширәта Йаһоԝа ԛәбул кьн, кӧ «һәр гав дӧа бькьн» (1 Тʹеслн. 5:17). w20.05 27-28 ¶7-8

Йед кӧ ләщмәйданеда дьрʹәвьн, һʹьш-аԛьле хԝә дьдьнә сәр рʹийа кӧ пешийа ԝан ә, сәва нәкʹәвьн. Һәрге жи әԝана дькʹәвьн, диса рʹадьбьн у бәрдәԝам дькьн дьрʹәвьн. Әԝана дина хԝә надьнә ве йәке кӧ чь бу мәʹни ԝәки әԝана кʹәтьн, ле һʹьш-аԛьле хԝә дьдьн сәр хәза финише у хәлате кӧ дьхԝазьн бьстиньн. Ләщмәйдана мәда жи әм дькарьн гәләк щар бьлькʹӧмьн чахе хәбәрдан йан кьред хԝәда шашийа дькьн. Йан жи хушк-бьред мә кӧ тʹәви мә дьрʹәвьн, дькарьн шашийед ӧса бькьн кӧ дьле мә бешиньн. Чахе тьштед ӧса дьԛәԝьмьн, әм гәрәке әʹщебмайи нәминьн, чьмки әм гьшк жи гӧнәкʹар ьн, у әм һʹәму жи рʹийа тәнгрʹа дьрʹәвьн. Ләма жи бьхԝазьн нәхԝазьн щара әме «бьньчʹиньнә» һәв у газьне мә ԝе ль һьндава һәвдӧ һәбә (Колс. 3:13). Дәԝса кӧ әм һʹьш-аԛьле хԝә бьдьнә сәр ве йәке кӧ чь бу мәʹни әм лькʹӧмин, ԝәрә әм һʹьш-аԛьле хԝә бьдьнә сәр хәлата пешийа хԝә. Һәрге жи әм бьлькʹӧмьн, ԝәрә әм диса рʹабьн у рʹәва хԝә бәрдәԝам кьн. Ле һәрге әм һерс кәвьн, хәйде дьле хԝәда хԝәй кьн, у нәхԝазьн рʹабьн, әме хәза финишерʹа дәрбаз нәбьн у хәлате нәстиньн. Хенщи ве йәке, әме бьбьнә кәвьре лькʹӧмандьне бәр ньге хушк-бьра, йед кӧ рʹийа жийинеда тʹәви мә дьрʹәвьн. w20.04 26 ¶1; 28 ¶8-9

Данийел дәрһәԛа ԝан сәрԝертийа пʹехәмбәрти кьр, йед кӧ щурʹә-щурʹә ԝәʹдәда пәй щьмәʹта Хԝәде дькʹәтьн. Әԝана бь симболик щурʹә-щурʹә пʹаред һәйкәле бун. Сәрԝертийа пашьн бь симболик ньгед ви һәйкәли нә, кӧ жь һʹәсьн у һʹәрʹийа сор ьн. Әв ньг бь симболик тенә һʹәсабе Англо-Америка Империйа Һʹәмдьнйайе. Әв пʹехәмбәрти нишан дькә, ԝәки әԝ ԝе һәла һе сәрԝертийе бькә, һʹәта кӧ Пʹадшатийа Хԝәде ԛьрʹа һʹәму сәрԝертийед мәрьва бинә. Йуһʹәннайе шанди жи дәрһәԛа сәрԝертийед дьнйайе пʹехәмбәрти кьр, йед кӧ пәй щьмәʹта Хԝәде дькʹәтьн. Пʹехәмбәртийа Йуһʹәннада әԝ сәрԝерти бь симболик щәʹнәԝьре пе һʹәфт сәрийа йә. Сәре һʹәфта йе щәʹнәԝьр те һʹәсабе Англо-Америка Империйа Һʹәмдьнйайе. Әва информасийа фәрз ә, чьмки паши ви сәри, ида тʹӧ сәре майин тʹӧнә йә, әԝ йе хьлазийе йә. У әв сәре һʹәфта һәла һе ԝе сәрԝертийе бькә, һʹәта Мәсиһ у ордийед ԝийи әʹзмана әԝи щәʹнәԝьри бь тʹәмами кʹӧта кьн (Әʹйан. 13:1, 2; 17:13, 14). w20.05 14 ¶11-12

Бь ван готьна, Йуһʹәнна рʹастикә һʹимгьрти тинә бира мә: Хԝәде һьм Чʹәʹвканийа жийане һьм жи Чʹәʹвканийа һʹьзкьрьне йә. Бәле, Йаһоԝа мә һʹьз дькә. Бь сайа һʹьзкьрьна ԝи, әм хԝә бехоф, бәхтәԝар у дьлрʹьһʹәт тʹәхмин дькьн. Әм шагьртед Иса Мәсиһ нә, у әм гәрәке һʹьзкьрьне әʹйан бькьн, чьмки әва тʹәми йә (Мәтта 22:37-40). Фәʹмдари йә ль мә зор найе кӧ әм гӧһ бьдьн  тʹәмийа пешьн, чьмки Йаһоԝа беԛьсур ә, ԛәнщ ә у бона мә хәм дькә. Ле бәле, бәлки щарна ль мә зор те кӧ әм тʹәмийа дӧда пек биньн. Гәло чьма? Чьмки хушк у бьред мә – йед кӧ мәрьвед мә йед һәри незик ьн – ԛьсурдар ьн. Щар-щара, готьн у кьрьнед ԝан дькарьн мә әʹщьз кьн. Йаһоԝа заньбу кӧ әв чәтьнайи ԝе һәбә. Ләма, әԝи бь сайа һьнә ньвискʹаред Кʹьтеба Пироз нишани мә кьрийә кӧ гәрәке әм чьма у чаԝа һәвдӧ һʹьз бькьн. Йәк жь ван ньвискʹара, Йуһʹәннайе шанди бу (1 Йуһʹәнна 3:11, 12). w21.01 8 ¶1-2

Фьрԛи тʹӧнә әм тʹәзә Йаһоԝарʹа хьзмәт дькьн йан жи гәләк сала, әм гәрәке тʹьме пьрсе бьдьнә хԝә: «Әз һәр тьшти дькьм сәва Шәйтʹан дьле мьн пʹарәвәнәкә, йан на?» Мәсәлә, һәрге һун телевисйонеда йан интернетеда шькләки ӧса бьвиньн, кӧ хԝәстьн у фькьред хьраб дькарә пешда бинә, ве дәме һуне чь бькьн? Дьбәкә һун дәрберʹа бьфькьрьн, нә әв шькьл йан жи филм порнографийа нинә. Ле дьбәкә Шәйтʹан әв тʹәльк данйә сәва дьле ԝә пʹарәвәкә? Әԝи шькли дькарьн бәрамбәри бьзмале бькьн, кʹижани кӧ мәрьв кʹенаре мәзьнда дькʹӧтә, ԝәки бькә дӧ кәрʹа. Пешийе пе ви бьзмали сәре кʹижани туж ә, ԛәлше дькә кʹенар, паше чахе әԝ һе кʹур дькʹәвә кʹенар, ле дькә дӧ кәрʹа. Бь рʹасти шьклед ӧса кӧ хԝәстьнед сексуали пешда тиньн, дькарьн бьбьнә мина сәре бьзмала туж. Аликива дькарә бе кʹьфше, кӧ әвана хоф ниньн у ԝе зийане нәйньн, ле бь рʹасти һеди-һеди әԝ тьшт дькарьн мәрьв бьбьнә бәрбь гӧнә у дьле ԝи пʹарәвәкьн. Ләма жи нәһельн кӧ тʹӧ тьште нәщайиз бькʹәвә дьле ԝә! Дьле хԝә ӧса хԝәй кьн, ԝәки жь наве Йаһоԝа бьтьрсә! w20.06 11-12 ¶14-15

Әм гәрәке тʹьме хушк-бьред кӧ жь щьвате дур кʹәтьнә, бьшьдиньн у али ԝан бькьн. Әԝана жи дьбәкә мина кӧрʹе ӧндабуйи мәтʹәлока Исада, дьлшкәсти нә (Луԛа 15:17-24). Фәʹмдари йә, әԝана рʹӧһʹанида жи сьст ьн, чьмки ве дьнйа Шәйтʹанда бе Йаһоԝа нә. Ләма жи ԝанрʹа аликʹари лазьм ә, ԝәки диса баԝәрийа хԝә һьндава Йаһоԝа ԛәԝи кьн. Иса мәтʹәлока дәрһәԛа пәза ӧндабуйида гьли дькә, кӧ шьван ве һьлдьдә һʹәмеза хԝә у дьбә дькә нав кәри. Шьван епʹещә ԝәʹдә хәрщ кьрийә у щәфа кʹьшандийә һʹәта кӧ әԝ дитийә. Ле паше әԝ фәʹм дькә, кӧ гәрәке әве пәзе бьвә бькә нав кәри, чьмки ԛәԝата ԝе тʹӧнә йә кӧ хԝәха вәгәрʹә (Луԛа 15:4, 5). Мәрʹа жи дьбәкә епʹещә ԝәʹдә у щәфа лазьм бә, ԝәки али йед сьст бькьн кӧ бькарьбьн вәгәрʹьн щәм Йаһоԝа. Әм дькарьн бь сайа рʹӧһʹе Йаһоԝайи пироз, Хәбәра ԝи, у әʹдәбйәтед кӧ әм щьватеда дьстиньн, али ԝан бькьн кӧ диса рʹӧһʹанида ԛәԝи бьн. Һәрге рʹуспи ԝәрʹа бежьн, кӧ тʹәви фьланкәсе һинбуна Кʹьтеба Пироз дәрбаз кьн, бь дьл у щан ве щабдарийе ԛәбул кьн. w20.06 28 ¶14-15

Һәр кәс жь мә гәрәке һʹьзкьрьне бьдә кʹьфше, чьмки әԝ йәк Мәсиһийед рʹаст әʹйан дькә. Ле мәрʹа ӧса жи лазьм ә «занәбун у сәрԝахтийа гьһишти» нав хԝәда зедә кьн (Фили. 1:9). Һәрге әм ӧса нәкьн, әме «бь дәрәԝед мәрьва бәр байе һәр һинкьрьнәке» кәвьн (Әфәс. 4:14). Чахе ԛьрʹна йәкеда гәләк шагьрт ида пәй Иса нәдьчун, Пәтрусе шанди бь баԝәрийе гот, кӧ «готьнед жийина һʹәта-һʹәтайе» щәм Иса нә (Йуһʹн. 6:67, 68). Рʹаст ә һьнге Пәтрус бь тʹәмами фәʹм нәдькьр, кӧ әԝ готьнед Иса чь дьһатьнә һʹәсабе, ле йәкә әԝ амьн ма, чьмки әԝи рʹастийа дәрһәԛа Иса фәʹм дькьр. Һун жи дькарьн баԝәрийа хԝә һьндава һинкьрьнед Кʹьтеба Пироз ӧса ԛәԝи кьн. Һун һәрге ӧса бькьн, чь жи бьԛәԝьмә йәкә баԝәрийа ԝә ԝе ԛәԝи бьминә, у һуне али мәрьвед дьн жи бькьн, ԝәки әԝана баԝәрийа хԝә бьшьдиньн (2 Йуһʹн. 1, 2). w20.07 8 ¶2; 13 ¶18

Сәва али хушк-бьра бькьн кӧ нава рʹастийеда бьминьн, әм гәрәке һьндава ԝанда дьлшәԝат бьн (1 Йуһʹн. 3:10, 11, 16-17). Әм гәрәке һәвдӧ һʹьз бькьн нә тʹәне һьнге чахе һʹәму тьшт баш ә, ле ӧса жи чахе проблем пешда  тен. Мәсәлә, дьбәкә кәсәк мәрьве хԝәйи незик ӧнда кьрийә, у һʹәԝще бәрдьлийе йә у жерʹа тьштәкида аликʹари лазьм ә. Йан жи дьбәкә ԝә бьһистийә, кӧ хушк-бьра жь бо хәзәбед тʹәбийәте зьрар стандьнә у ԝанрʹа аликʹари лазьм ә, ԝәки Одед щьватед ԝан, йан жи малед ԝан тʹәзәда ава кьн. Әм һʹьзкьрьн у дьлшәԝатийе һьндава хушк-бьра нә тʹәне пе гьлийед хԝә нишан дькьн, ле илаһи пе кьред хԝә. Чахе әм һʹьзкьрьна хԝә һьндава һәвда нишан дькьн, әм чʹәʹв дьдьнә Баве хԝәйи әʹзмана (1 Йуһʹн. 4:7, 8). Щурʹе лапә фәрз кӧ ча һʹьзкьрьне бьдьнә кʹьфше әԝ ә, кӧ һәвдӧ бьбахшиньн. Мәсәлә, кәсәк дьбәкә ԝе дьле мә бешинә, ле паше бахшандьне жь мә бьхԝазә. Һʹьзкьрьна мә һьндава ԝида ԝе һьнге бе кʹьфше, һәрге әм бьбахшиньнә ԝи у шашийа ԝи бир кьн (Колс. 3:13). w20.07 24 ¶14-15

Гәло һәр кәс йе кӧ жь мьрьне рʹабә, ԝе һинбуна шәхси бьстинә, чаԝа кӧ әм иро һинбуна Кʹьтеба Пироз дәрбаз дькьн? Гәло әԝ кәсед ну ԝе бьбьн пʹара щьвата у һинбуне бьстиньн, ԝәки әԝ жи бькарьбьн кәсед дьн һин бькьн? Әм ве йәке ньзаньн, гәрәке һивийе бьн кӧ бьвиньн. Ле бәле, әм сәд  сәләфи заньн кӧ даԝийа Һʹӧкӧмдарийа Һʹәзарсалида, дьнйа ԝе «бь занина Хӧданва тʹьжи бьбә» (Иша. 11:9). Бәле, ль ԝе дәме әме һьм пʹьрʹ шьхӧл бькьн һьм жи пʹьрʹ шабуне бьстиньн! Дәма Һʹӧкӧмдарийа Һʹәзарсалида, ԝе лазьм бә кӧ һʹәму хьзмәткʹаред Йаһоԝа хԝә сәррʹаст бькьн. Ләма, әԝе рʹьнд фәʹм бькьн кӧ жь бо кәсед рʹакьри нә һеса йә кӧ фькьр у хԝәстьнед нәрʹаст жь дьле хԝә дәрхьн у ль гора ԛанунед Хԝәде бьжин (1 Пәт. 3:8). Кәсед рʹакьри ԝе бьвиньн кӧ хьзмәткʹаред Йаһоԝа мьлук ьн у хирәт дькьн кӧ хԝә рʹаст бькьн, ԝәки «хьлазийа хԝә пек биньн», у әԝе жи бьхԝазьн бешьк тʹәви ԝан Йаһоԝа бьһʹәбиньн (Фили. 2:12, ИМ). w20.08 16 ¶6-7

Һәрге әм ль гора ширәта Паԝлосе шанди хԝә бьщерʹьбиньн, әме бәлки бьбиньн кӧ һьнә фәрәсәтед мә жи һәнә. Мәсәлә, рʹуспийед щьвате бәлки готарванәки һостә нинә, ле әԝ бәлки хьзмәтеда пʹьрʹ пешдачуйи йә. Йан жи, дьбә кӧ әԝ нькарә мина рʹуспийед дьн һәр тьшти рʹьнд организә бькә, ле әԝ бәлки шьванәки пʹьрʹ дьлгәрм ә, у ләма хушк у бьра бь рʹьһʹәти дькарьн һәрʹьн бал ԝи у жь ԝи ширәте бьхԝазьн. Йан жи, әԝ бәлки бьрайәки пʹьрʹ меванһʹьз ә (Ибрн. 13:2, 16). Һәрге әм фәрәсәтед хԝә рʹьнд бьзаньбьн, әме дьһа баш фәʹм бькьн кӧ щьватеда рола мә чь йә, у әме чʹәʹвнәбарийа хушк у бьрайед дьн нәкьн, йед кӧ һʹӧнӧред ԝан жь йед мә щӧда нә. Щьватеда рола мә чь бә жи, ԝе баш бә кӧ әм хирәт бькьн кӧ хьзмәтеда пешда һәрʹьн у фәрәсәтед хԝә зедә бькьн. w20.08 24 ¶16-18

Щозеф Рутерфорд готарәкә мәхсус бь наве «Әʹлаләта Мәзьн» хԝәнд, сала 1935-да ль сәр щьвата мәзьн бажаре Ԝашингтонеда (Америка). Готара хԝәда, бьре Рутерфорд зәлал кьр кӧ «әʹлаләта мәзьн», йа кӧ Әʹйанти 7:9-да те готьне, дәрһәԛа кʹе йә. Һʹәта ԝе дәме, хушк у бьра дьфькьрин кӧ әʹлаләта мәзьн жи ԝе һәрʹә әʹзмана. Ле бәле, әԝ дьфькьрин кӧ әндәмед ве кʹоме мина мәсиһийед бь рʹӧһʹ кʹьфшкьри амьн ниньн. Бьре Рутерфорд бь сайа Ньвисаред Пироз зәлал кьр кӧ әʹлаләта мәзьн ԝе нәчә әʹзмана, ле әԝана пәзед дьн йед Иса Мәсиһ нә, йед кӧ ԝе ԝәʹде «тәнгасийа мәзьн» сах бьминьн у һʹәта-һʹәтайе ль сәр әʹрде бьжин (Әʹйанти 7:14). Иса Мәсиһ ӧса соз дабу: «Пәзед мьнә дьн жи һәнә, йед кӧ нә ви ахлида нә. Гәрәке әз ԝана жи биньм у әԝе дәнге мьн бьбьһен у бьбьнә кәрик бәр шьванәки» (Йуһʹәнна 10:16). Әв «пәзед дьн», Шәʹдед амьн ьн, йед кӧ һивийа жийана һәрһәйи ль сәр әʹрде нә (Мәтта 25:31-33, 46). w21.01 14 ¶1-2

Әм һʹәԝщәйи дисиплине нә сәва әм сәбьр бькьн у ише бәлакьрьна мьзгине хьлаз бькьн (Мәт. 28:19, 20). Дисиплин хԝә бь хԝә пешда найе, у гәләк кәс нахԝазьн зәʹмәте бькʹьшиньн. Ле бәле, һьнә ишед фәрз бе зәʹмәт ченабьн. Ләма, мәрʹа аликʹари лазьм ә ԝәки әм дисиплина хԝә зедә бькьн у хԝә һин бькьн кӧ әм ишед чәтьн жи биньн сери. Бь сайа рʹӧһʹе пироз, Йаһоԝа ве аликʹарийе дьдә мә (Галт. 5:22, 23). Паԝлосе шанди жь алийе дисиплинева мәсәләкә баш бу. Диса жи, лазьм бу кӧ әԝ ‹щәфайе бьдә› бәдәна хԝә, ԝәки тьштед рʹаст бькә (1 Корн. 9:25-27). Әԝи кәсед дьн һелан дькьрьн кӧ әԝ һәр тьшти «бь тʹәрбәт, щи бь щи у маԛули бә», демәк бь дисиплин бькьн (1 Корн. 14:40). Бәле, жь бо кӧ әм мьзгине бь дьл у щан бәла бькьн у дь ишед дьнда жи щабдарийед хԝә йед рʹӧһʹани биньн сери, әм һʹәԝщәйи дисиплине нә (Кʹар. Шанд. 2:46). w20.09 6-7 ¶15-17

Ль гәләк ԝәлата, әм дькарьн мьзгине аза бәла бькьн. Һәгәр дь ԝәлате тәда азайа баԝәрийе һәйә, жь хԝә ӧса бьпьрсә: «Гәло әз ве азайе чаԝа бь кʹар тиньм?» Ль ван рʹожед ахьрийе, тʹәшкиләта Йаһоԝа хәбәра хере ль сәрансәре дьнйайе бәла дькә. Әв иш бь рʹасти жи пʹьрʹ мәзьн ә. Бона хьзмәткʹаред Йаһоԝа гәләк мәщал  һәнә кӧ ви шьхӧлида аликʹарийе бьдьн. Гәло тӧ чаԝа дькари ве дәма аштийе бь билани бьди хәбате? (2 Тимтʹ. 4:2) Гәло тӧ йан жи нәфәрәки малбәта тә дькарә һе зедә хьзмәт бькә йан жи бьбә пешәнг? Ньһа ԝәхта тʹопкьрьна мал у мьлкʹ нинә, чьмки әме нькарьбьн ван тьшта хԝәрʹа бьбьн дьнйайа тʹәзә (Мәтʹлк. 11:4; Мәт. 6:31-33; 1 Йуһʹн. 2:15-17). Иро, гәләк мьзгинван жь бо бәлакьрьна мьзгине зьманәки ну һин дьбьн. Тʹәшкиләта Хԝәде әʹдәбйәта бь зедәтьри 1 000 зьмана һазьр дькә кӧ мьзгин бьгьһижә һʹәму мәрьва. w20.09 16 ¶9-11

Әскәре баш, йәки амьн ә. Әԝ һʹьзкьрийед хԝә у тьштед бьԛимәт бь амьни дьпарезә. Ләма Паԝлосе шанди Тимотʹейорʹа гот кӧ бьра әԝ амьнийа хԝә зедә бькә (1 Тимтʹ. 4:7). Һәгәр әм Хԝәде жь дьл һʹьз дькьн, әме бьхԝазьн хԝә дь рʹастийеда ԛайим бьгьрьн (1 Тимтʹ. 4:8-10; 6:6). Жь бо кӧ әскәрәк һәр тʹьм бона шәрʹкьрьне һазьр бә, ԝирʹа дисиплин лазьм ә. Тимотʹейо ль һьмбәри һʹӧкӧме Мире-щьна ԛәԝи дьсәкьни, жь бәр кӧ ԝи гӧһ да ширәта Паԝлос кӧ жь хԝәстьнед нәрʹаст бьрʹәвә, һʹӧнӧред баш бь пеш бьхә у хушк-бьрарʹа һәвалтийе бькә (2 Тимтʹ. 2:22). Жь бо ве, Тимотʹейо һʹәԝщәйи дисиплине бу. Мәрʹа жи дисиплин лазьм ә кӧ әм мьԛабьли хԝәстьнед бәдәне сәр кʹәвьн (Рʹом. 7:21-25). Хенщи ве, әм һʹәԝщәйи дисиплине нә кӧ әм мәрьве кәвьн жь хԝә бехьн у мәрьве ну ль хԝә бькьн (Әфәс. 4:22, 24). Ӧса жи, гава әм паши рʹожәкә чәтьн ԝәстийайи нә, дьбәкә дисиплин лазьм бә кӧ әм диса жи һәрʹьн щьвине (Ибрн. 10:24, 25). w20.09 28 ¶9-11

Һʹәта кӧ хԝәндәкʹаред мә һазьр бьн кӧ жийана хԝә бьдьн дәсте Йаһоԝа у бенә ньхӧмандьне, һьлбәт лазьм ә кӧ әм сәбьр  бькьн. Диса жи, гәрәке әм зу йан дәрәнг тедәрхьн кʹа әԝ бь рʹасти дьхԝазә Йаһоԝарʹа хьзмәт бькә йан на. Мәсәлә, жь хԝә ӧса бьпьрсә: «Гәло хԝәндәкʹаре мьн жь алийе хԝәда тьштәки дькә кӧ гӧһ бьдә ԛанунед Иса Мәсиһ? Йан жерʹа тʹәне хәбәрдана мьн һʹәԝас ә?» Хԝәндәкʹар чаԝа пешда дьчә? Гәло әԝ дьбежә кӧ әԝ Йаһоԝа һʹьз дькә? Гәло әԝ ԝирʹа дӧа дькә? (Зәб. 116:1, 2) Гәло әԝ жь хԝәндьна Кʹьтеба Пироз шабуне дьстинә? (Зәб. 119:97) Гәло әԝ дьчә һʹәму щьвина? (Зәб. 22:22) Гәло әԝи жийана хԝә гӧһәрандийә? Гәло әԝ малбәт у һәвалед хԝәрʹа бәʹса мьзгине дькә? (Зәб. 9:1) Йа һәри фәрз, гәло әԝ дьхԝазә бьбә Шәʹде Йаһоԝа? (Зәб. 40:8) Һәгәр хԝәндәкʹар ван алийада ԛәт пешда начә, бь нәрми жь ԝи пебьһʹәсә кӧ мәʹни чь йә, у паше ԝирʹа бь ԛәдьр ле рʹастә-рʹаст дәрһәԛа ве проблеме хәбәр дә. w20.10 18 ¶14-15

Баве әʹзмани йе Иса Мәсиһ һәртʹьм сафикьрьнед баш дькә, у де у баве ԝи йед сәр әʹрде жи сафикьрьн бь билани дькьрьн. Ле бәле, гава Иса мәзьн дьбу, лазьм бу кӧ әԝ ида хԝәха һьнә сафикьрьна бькә (Галт. 6:5). Чаԝа кӧ әм хԝәйе азайа бьжартьне нә, әԝ жи хԝәйе азайа бьжартьне бу. Әԝи дькарьбу кʹара хԝә тʹәне бьгәрʹийа, ле әԝи һәри зедә дина хԝә дьда достийа тʹәви Йаһоԝа. Гава Иса фәʹм кьр кӧ хԝәстьна Йаһоԝа һьндава ԝида чь йә, әԝи сафи кьр кӧ ве ԛьрара Хԝәде бинә сери (Йуһʹн. 6:38). Иса заньбу кӧ гәләк кәс ԝе ԝи нәфрʹәт бькьн, у әв йәк тьштәки зор ә. Диса жи, әԝ һазьр бу хԝә тʹәсмили Йаһоԝа бькә. Гава Иса дь сала 29 Д.М., һатә ньхӧмандьне, әԝи ԛьрар кьр кӧ һәртʹьм ль гора хԝәстьна Йаһоԝа бьжи (Ибрн. 10:5-7). Ԝәхта кӧ әԝ ль сәр стуне һат мьх кьрьн жи, әԝи һәри зедә дина хԝә да хԝәстьна Баве хԝә (Йуһʹн. 19:30). w20.10 29 ¶12; 30 ¶15

Гәло дь щьвата тәда хушк йан бьрайед нәхԝәш һәнә? Гәло проблемед ԝан йед дьн һәнә? Гәло әԝ хәмгин ьн кӧ ԝана һʹьзкьрийәки хԝә ӧнда кьрийә? Һәгәр әм бьвиньн кӧ хушк йан бьракирʹа аликʹари лазьм ә, әм дькарьн дӧа бькьн кӧ Йаһоԝа али мә бькә кӧ әм тьштәки баш бона ԝан бькьн йан бежьн. Дьбәкә хушк йан бьре мә бь сайа готьн у кьрьнед мә мерхасийе бьстинә (1 Пәт. 4:10). Әм заньн кӧ Йаһоԝа тʹәви мә йә. Әԝ бь дәсте Иса у мәләка али мә дькә. Ӧса жи, һәгәр ль гора ԛьрара ԝи бә, әԝ дькарә бь дәсте кәсед хԝәйиһʹӧкӧм жи али мә бькә. Хенщи ве йәке, гәләк жь мә бь чʹәʹвед хԝә дитийә кӧ Йаһоԝа хьзмәткʹаред хԝә бь сайа рʹӧһʹе пироз дьдә хәбате кӧ әԝ али хушк у бьра бькьн. Ләма, ԝәк Паԝлос, әм дькарьн бь баԝәри бежьн: «Хӧдан пьштоване мьн ә у әз натьрсьм. Инсане чь ль мьн бькә?» (Ибрн. 13:6) w20.11 17 ¶19-20

Ль ԛьрʹна йәке, Йаһоԝа Хԝәде әшкәрә дьда кʹьфше кӧ пьштгьрийа шандийа дькә. Мәсәлә, әԝи ԛәԝат да ԝан кӧ әԝана кʹәрәмәта бькьн (Кʹаред Шандийа 5:12-16; 6:8). Иро, Йаһоԝа ԛәԝатәкә ӧса надә мә. Диса жи, бь сайа Хәбәра хԝә, Йаһоԝа бь дьловани мәрʹа дьбежә кӧ гава әм бона рʹастийе дькʹәвьнә тәнгасийе, әԝ жь мә рʹази йә у рʹӧһʹе ԝи ль сәр мә йә (1 Пәтрус 3:14; 4:14). Ләма, нә лазьм ә кӧ әм бь зедәйи бьфькьрьн кӧ һәгәр зерандьна гьран дәстпебә, әме чь бькьн. Ԝе баш бә ԝәки әм бьфькьрьн кӧ әм чаԝа дькарьн баԝәрийа хԝә һьндава Йаһоԝа дьһа ԛәԝи кьн, чьмки тʹәне Йаһоԝа дькарә али мә бькә у мә хьлаз бькә. Гәрәке әм баԝәрийа хԝә бь ве соза Иса Мәсиһ биньн: «Әзе зарʹ-зьман у сәрԝахтийе бьдьмә ԝә, кӧ дьжмьнед ԝәйе нькарьбьн ль бәр ԝә хәбәр дьн йан бьсәкьньн». Бәле, мәрʹа соз һатийә дайине кӧ һәгәр әм сәбьр бькьн, әме бенә хьлазкьрьне (Луԛа 21:12-19). Бь сәрда, һәгәр әм әʹмьре хԝә сәва амьнийа хԝә ӧнда бькьн жи, Йаһоԝа ԝе мә тʹӧ щара бир нәкә, у әԝе мә жь мьрьне рʹакә. w21.01 4 ¶12

Тʹәне Паԝлос нибу кӧ бәʹса рʹабуна мьрийа дькьр, Ибо жи бәʹса рʹабуна мьрийа кьрьбу. Әԝ баԝәр бу кӧ Хԝәде ԝе ԝи бинә бира хԝә у жь мьрьне рʹакә (Иб. 14:7-10, 12-15). Рʹабуна мьрийа пʹарәкә «һʹиме» баԝәрийа мә йә (Ибрн. 6:1, 2). Ль сәре 15 йа 1 Корьнтʹи, Паԝлос дәрһәԛа рʹабуна мьрийа ньвиси. Шагьртед ль ԛьрʹна йәке бешьк жь готьнед ԝи һелан дьстанд. Әв сәри дькарә ԛәԝате бьдә мә у һевийа мә һе ԛәԝи бькә. Рʹабуна Иса Мәсиһ баԝәрийа мә һе ԛәԝи дькә кӧ һʹьзкьрийед мә ԝе жь мьрьне рʹабьн. Рʹабуна Иса пʹара мьзгине бу, йа кӧ Паԝлос Корьнтʹийарʹа әʹлам дькьр (1 Корн. 15:1, 2). Паԝлос гот кӧ һәгәр кәсәк рʹабуна Иса Мәсиһ баԝәр накә, баԝәрийа ԝи пʹучʹ ә (1 Корн. 15:17). w20.12 2 ¶2-4

Гәло чь али Пәтрусе шанди кьр кӧ рʹӧһʹанида ԛәнщ бә? Йа пешьн, Иса дӧа кьрьбу кӧ баԝәрийа Пәтрус хьлаз нәбә. Әшкәрә йә кӧ Йаһоԝа щаба ве дӧайе Иса да. Паше, Иса Пәтрусрʹа жи хӧйа бу. Нета ԝи бешьк әв бу кӧ дьлбинийе бьдә ԝи (Луԛа 22:32; 24:33, 34; 1 Корн. 15:5). Иса шандийед хԝәрʹа диса хӧйа бу, паши шәва кӧ әԝана ԛәт мәʹси нәгьртьбун. Әԝи мәщал да Пәтрус кӧ әԝ бежә ԝәки әԝ ԝи чьԛас һʹьз дькә. Бәле, Иса Мәсиһ досте хԝәйи һежа әʹфу кьр, у щабдарикә фәрз да дәсте ԝи (Йуһʹн. 21:15-17). Әв йәк кӧ Иса Мәсиһ чаԝа дьл дьда Пәтрус нишан дькә кӧ Иса йәки дьлрʹәʹм ә. Ӧса жи, әм заньн кӧ Иса Мәсиһ бь тʹәмами чʹәʹв дьда Баве хԝә. Ләма, гава әм шашийа дькьн, гәрәке әм нәфькьрьн кӧ һʹале мә бечʹарә йә. Бир нәкә кӧ Мире-щьн дьхԝазә кӧ әм ӧса бьфькьрьн. Ләма, гәрәке әм биньн бира хԝә кӧ Йаһоԝа мә һʹьз дькә у синоред мә занә. Әԝ һазьр ә кӧ бьбахшинә мә, у гәрәке әм жи һазьр бьн кӧ бьбахшиньн ԝан йед кӧ дьле мә дьешиньн (Зәб. 103:13, 14). w20.12 20-21 ¶17-19

Әм дькарьн жь сәрһатийед кәсед кӧ дьлрʹьһʹәт нәдьман у итʹбарийа хԝә Йаһоԝа нәдьанин, һьнә дәрса бьстиньн. Ԝе баш бә кӧ әм ван сәрһатийа леколин бькьн, ԝәки әм ԝан шашийа нәкьн. Мәсәлә, дь дәстпека һʹӧкӧмдарийа хԝәда Аса гава рʹасти чәтьнайа дьһат, әԝи итʹбарийа хԝә Йаһоԝа дьани. Ле паше, дәԝса кӧ аликʹарийа Хԝәде бьхԝазә, әԝи дьхԝәст проблемед хԝә бь методед хԝә сафи бькә (2 Дирок 16:1-3, 12). Әв йәк кӧ әԝи аликʹарийа Сурийайе хԝәст, дьбәкә ԝәк планәкә баш дьһат кʹьфше. Ле бәле, пʹьрʹ ԝәхт дәрбаз нәбу кӧ Йаһоԝа бь сайа пʹехәмбәрәки, ԝирʹа ӧса гот: «Мадәм кӧ тә хԝә сьпарт ԛьрале [пʹадше] Сурийе у тә хԝә нәсьпарт Хԝәдайе хԝә Хӧдан, ләма артеша ԛьрале Сурийе жь дәсте тәва рʹәвийа у хьлаз бу» (2 Дирок 16:7). Жь ве сәрһатийе, гәло әм дькарьн чь дәрсе бьстиньн? Дьбә кӧ проблемәкә мә һәйә у лазьм ә кӧ әм зу сафикьрьне бькьн. Дь һʹаләки ӧсада, гәрәке әм бь зедәйи хԝәбаԝәр нәбьн у нәфькьрьн кӧ әм дькарьн ве проблеме бей рʹебәрийа Хәбәра Хԝәде сафи бькьн. Ле бәле, һәгәр әм рʹьһʹәт бьминьн у хԝә бьсперьн Йаһоԝа, әԝе али мә бькә кӧ әм сафикьрьнәкә рʹаст бькьн. w21.01 6 ¶13-15

Рʹожед мәда, һьнә хьзмәткʹаред Хԝәде сәва тәнгасийед економик, тʹәвльһәвийа политики у шәрʹ, бьрчи дьминьн. Ль һьнә ԝәлата, һьнә хушк у бьред мә сәва баԝәрийа хԝә кʹәтьнә кәле. Ле бәле, паши ԝеранкьрьна ве система хьраб, һʹәму хушк у бьред мә ԝе һәртʹьм тʹер у тʹьжә хԝарьна физики у рʹӧһʹани бьстиньн. Ԝәхта кӧ Йаһоԝа ԝе система Шәйтʹан кʹӧта бькә, әԝе әʹлаләта мәзьн жь ‹гәрмайа› һерса хԝә бьпарезә. Паши хьлазийа тәнгасийа мәзьн, Иса Мәсиһ ԝе ԝана бәрбь «ава жийане» бьвә (Әʹйан. 7:17). Һевийа әʹлаләта мәзьн бь рʹасти жи һевикә мәхсус ә. Дә бьдьнә һʹәсабе хԝә, бь милйарда ль ве дьнйайе инсан житьнә у мьрьнә, ле тʹәне әʹлаләта мәзьн дькарә тʹӧ щар мьрьне нәвинә! (Йуһʹәнна 11:26) Пәзед дьн бона ве һевийа хԝәш жь Йаһоԝа у Иса Мәсиһ рʹази нә. w21.01 16-17 ¶11-12

Шәва пашьн пешийа мьрьна хԝә, Иса Мәсиһ ль сәр чәтьнайед кӧ ԝе рʹасти шагьртед ԝи бьһатана, дьфькьри. Иса достед хԝә һʹьз дькьр, ләма жи әԝи жь Баве хԝә һиви кьр кӧ Әԝ ԝана «жь Йе Хьраб хԝәй кә» (Йуһʹәнна 17:14, 15). Иса заньбу чахе әԝ ԝе вәгәрʹә әʹзмана, Шәйтʹан ԝе пәй хьзмәткʹаред Йаһоԝа кʹәвә. Ләма жи шагьртед Иса Мәсиһ һʹәԝщәйи хԝәйкьрьне нә. Иро, әм гәләки һʹәԝщәйи пʹарастьне нә, чьмки Шәйтʹан жь әʹзмен һатийә авитьне сәр әʹрде у «әԝ жь һерсе хԝә дьхԝә» (Әʹйанти 12:12). Әԝ һьнә кәса дьдә баԝәркьрьне кӧ гава әԝана пәй мә дькʹәвьн, әԝ те һʹәсабе кӧ әԝана ‹Хԝәдерʹа ԛӧльх дькьн› (Йуһʹәнна 16:2). Һьнә кәсед кӧ Хԝәде баԝәр накьн жи зӧлме ль мә дькьн, чьмки әм нә мина мәрьвед ве дьнйайе нә. Ле чь жи һәбә, нә лазьм ә кӧ әм бьтьрсьн. Гәло чьма? Щаба ве пьрсе рʹеза ве рʹожеда әм дьхуньн. w21.03 26 ¶1, 3

Һʹәму кьрьнед Йаһоԝа һʹьзкьрьнева гьредайи нә. Жь һʹьзкьрьне, Әԝ бона һʹәму һʹәԝщед мә хәм дькә. Йаһоԝа кӧрʹе хԝә кьрә ԛӧрбан. Иса Мәсиһ жи мә пʹьр һʹьз дькә, ләма жи әԝи әʹмьре хԝә бона мә кьрә ԛӧрбан (Йуһʹәнна 3:16; 15:13). Бәле, Йаһоԝа у Иса Мәсиһ кәсед кӧ ԝанрʹа амьн ьн, һʹьз дькьн, у тʹӧ тьшт нькарә ԝана жь ве һʹьзкьрьне вәԛәтинә (Йуһʹәнна 13:1; Рʹомайи 8:35). Һәма ӧса сәре малбәте жи гәрәке һәр тьшти жь һʹьзкьрьне бькә. Гәло әв йәк чьма фәрз ә? Йуһʹәннайе шанди ӧса дьбежә: «Һәгәр әԝе бьре хԝә кӧ дьбинә һʹьз накә, ԝе чаԝа бькарьбә Хԝәде һʹьз бькә кӧ набинә?» (1 Йуһʹәнна 4:11, 20) Мина Йаһоԝа у Иса Мәсиһ, әв мере кӧ малбәта хԝә һʹьз дькә, гәрәке бона һʹәԝщед ԝанә физики у рʹӧһʹани хәм бькә (1 Тимотʹейо 5:8). Гәрәке әԝ зарʹед хԝә һин кә у ширәт кә. Ӧса жи, гәрәке әԝ һин бә сафикьрьнед ӧса бькә, йед кӧ ԝе Йаһоԝа рʹумәт кьн, у малбәта ԝирʹа кʹаре биньн. w21.02 5 ¶12-13

Баве мәйи дьлован рʹьнд занә кӧ тьштед хьраб, йед кӧ һатьбун сәре мә, дькарьн бьбьн сәбәб кӧ әм хԝә ньмьз һʹәсаб кьн. Әм бәлки дьфькьрьн кӧ һʹӧнӧред мә йед баш тʹӧнәнә, ле бәле Йаһоԝа ӧса нафькьрә (1 Йуһʹн. 3:19, 20). Гава кәсәк хирәт дькә кӧ тʹәрка хәйсәтәкә хьраб бькә, ле ви тьшти диса дькә, әԝ дькарә дьлтәнг бьбә. Һьлбәт нормал ә кӧ әм хԝә сәва шашийед хԝә сущдар бькьн (2 Корн. 7:10). Ле бәле, гәрәке әм нәфькьрьн кӧ әм бекер ьн у кӧ Йаһоԝа ԝе тʹӧ щара нәбахшинә мә. Ньһерʹандьнәкә ӧса нә рʹаст ә у дькарә бьбә сәбәб кӧ әм хьзмәта хԝә Йаһоԝарʹа бьдьнә сәкьнандьне. Дәԝса кӧ әм хԝә бь зедәйи сущдар бькьн, гәрәке әм Йаһоԝарʹа дӧа бькьн у жь ԝи бахшандьне бьхԝазьн (Иша. 1:18). Һәгәр әм жь дьл тʹобә бькьн, әԝе бьбахшинә мә. Ӧса жи, ԝе баш бә кӧ әм рʹуспийед щьватерʹа бәʹса проблема хԝә бькьн. Әԝе бь сәбьр али мә бькьн кӧ әм жь алийе рʹӧһʹанива ԛәнщ бьбьн (Аԛуб 5:14, 15). w20.12 23 ¶5-6

Иса Мәсиһ ԛәдре жьна дьгьрт. Ль ԛьрʹна йәке, Ферьсийа жьн ньмьз һʹәсаб дькьрьн, ләма жи ԝана нав мәрьвада тʹәви жьна хәбәр нәдьдан у дәрһәԛа Ньвисаред Пироз тʹәви ԝан шеԝьр нәдькьрьн. Иса Мәсиһ мина Ферьсийа нибу. Әԝи нә тʹәне тʹәви мера, ле тʹәви жьна жи дәрһәԛа тьштед рʹӧһʹани хәбәр дьда (Луԛа 10:38, 39, 42). Ӧса жи, гава әԝи мьзгин мал бь мал у гӧнд бь гӧнд бәла дькьр, әԝи изьн дьда кӧ жьн жи тʹәви ԝи һәрʹьн (Луԛа 8:1-3). Ԝәхта кӧ Иса Мәсиһ жь мьрьне рʹабу, әԝи һьнә жьнарʹа гот кӧ бьра әԝана мьзгина рʹабуна ԝи бьгьһиньн шандийа (Йуһʹәнна 20:16-18). Паԝлосе шанди Тимотʹейорʹа гот кӧ бьра әԝ ԛәдре жьна бьгьрә. Паԝлос заньбу кӧ дайик у пирька Тимотʹейо рʹастийа Ньвисаред Пироз кьрьнә дьле ԝи, у Паԝлос жи әв йәк заньбу (2 Тимотʹейо 1:5; 3:14, 15). Ль нәʹма Рʹомайарʹа, Паԝлос бь нава һьнә хушкарʹа сьлав шандьн. Хенщи ве йәке, кӧ әԝи дина хԝә дьда шьхӧлед ԝан, әԝи пʹайе ԝан жи дьда (Рʹомайи 16:1-4, 6, 12; Филипи 4:3). w21.02 15 ¶5-6