Һʹәзиран

Гәләк фәрз ә кӧ әм жь дьл бькʹәвьнә һʹәйра хԝәндәкʹаред хԝә у ԝана ԝәк хушк у бьред хԝәйә рʹӧһʹани бьвиньн. Бона ԝан бәлки һеса нинә кӧ әԝ һәләԛәтийа хԝә тʹәви һәвалед хԝә йед бәре бьԛәтиньн у жийана хԝә бь тʹәмами бьгӧһериньн, ԝәки әԝ бькарьбьн Йаһоԝарʹа хьзмәт бькьн. Ләма, дәрсдаред щерʹьбанди хԝәндәкʹаред хԝә хушк у бьред дьн жи дьдьн нас кьрьн. Кәсед ӧса дькарьн али хԝәндәкʹара бькьн кӧ әԝ дьһа незики Йаһоԝа бьбьн у мерхасийе бьдьн ԝан. Әм дьхԝазьн кӧ хԝәндәкʹаред мә хԝә ԝәк  пʹара щьвате у пʹара малбәта мә йа рʹӧһʹани һʹәсаб кьн у хушк-бьра һʹьз бькьн. Әв йәк ԝе али ԝан бькә кӧ әԝ һәләԛәтийа хԝә тʹәви һәвалед нәбаш бьԛәтиньн, йед кӧ али ԝан накьн кӧ әԝ Йаһоԝа һʹьз бькьн (Мәтʹлк. 13:20). Һьнге, һәгәр һәвалед ԝан йед бәре ԝан бьһельн жи, әԝе хәмгин нәбьн, чьмки әԝе бьзаньбьн кӧ дь тʹәшкиләта Йаһоԝада хԝәрʹа достед баш бьвиньн (Марԛ. 10:29, 30; 1 Пәт. 4:4). w20.10 17 ¶10-11

Һәрге әм дьхԝазьн һәләԛәтийа мә тʹәви Йаһоԝа незик бә, әм гәрәке бьбьнә достед Иса. Чьрʹа әԝ ӧса фәрз ә? Дина хԝә бьдьнә тʹәне дӧ мәʹнийа. Йа пешьн, Иса готә шагьртед хԝә: «Бав хԝәха ԝә һʹьз дькә, чьмки ԝә әз һʹьз кьрьм» (Йуһʹн. 16:27). Әԝи ӧса жи гот: «Тʹәне пе мьн йәк дькарә бе щәм Баве» (Йуһʹн. 14:6). Һәрге әм бьхԝазьн бе достийа тʹәви Иса бьбьнә достед Йаһоԝа, әԝ мина ве йәке йә, кӧ әм дьхԝазьн бькʹәвьнә авайи, ле дәрирʹа дәрбаз нәбьн (Йуһʹн. 10:7). Мәʹнийа дӧда әԝ ә, кӧ Иса бь тʹәмами чʹәʹв дьда хәйсәт-һʹӧнӧред Баве хԝә. Әԝи готә шагьртед хԝә: «Йе кӧ әз дитьмә, Бав дитийә» (Йуһʹн. 14:9). Ләма һәрге әм дьхԝазьн Йаһоԝа нас кьн, әм гәрәке дәрһәԛа жийина Иса пебьһʹәсьн. Чьԛас һе зедә әм дәрһәԛа Иса бьзаньбьн, һаԛас һе ԛайим әме ԝи һʹьз бькьн. У гава достийа мә тʹәви Иса незик бә, ԝе һʹьзкьрьна мә һьндава Баве ԝи жи ԛайим бә. w20.04 21-22 ¶5-6

Дьбәкә һун нәхԝәше нав щи-ньвина нә, йан жи сәԛәт ьн. Йан дьԛәԝьмә чокед ԝә сьст ьн, йан чʹәʹвада бәләнгаз ьн. Һәрге ӧса нә, гәло һун дькарьн тʹәви щаһьла у тʹәви йед кӧ сьһʹәт-ԛәԝат ьн, бьрʹәвьн? Бәле, дькарьн! Гәләк хушк-бьред әʹмьрда мәзьн у йед бетʹаԛәт рʹийа жийинеда дьрʹәвьн, ле нә пе ԛәԝата хԝә. Әԝана ԛәԝате жь Йаһоԝа дьстиньн бь ве йәке, кӧ пе тʹеле гӧһ дьдьнә щьвата йан жи пе видео стриминге дьньһерʹьн. У әԝана хьзмәт дькьн бь ве йәке, кӧ шәʹдәтийе дьдьнә һʹәкима, бәрдәстийед һʹәкима у мәрьвед хԝәйи незик. Һәрге һун бона Йаһоԝа нькарьн һаԛаси бькьн чьԛас дьхԝазьн, дьлшкәсти нәбьн у нәфькьрьн ԝәки һуне нькарьбьн һʹәта хьлазийе рʹийа жийинеда бьрʹәвьн. Йаһоԝа ԝә һʹьз дькә бона баԝәрийа ԝә һьндава ԝи у бона һʹәму кьред ԝә, кӧ һун нава гәләк салада бона ԝи дькьн. Ԝәрʹа илаһи ньһа аликʹарийа ԝи лазьм ә, у әԝ ԝе тʹӧ щар ԝә нәһелә (Зәб. 9:10). Ле дәԝсе әԝ ԝе дьһа незики ԝә бә. w20.04 29 ¶16-17

Һун тʹәви мәрьве баԝәрмәнд дәрһәԛа чь дькарьн хәбәр дьн? Бьфькьрьн кӧ әԝ кәс чьда ԝе тʹәви ԝә ԛайил бә. Бәʹса хәбәре, әԝ Хԝәдеки дьһʹәбинә, Иса ча пʹехәмбәр һʹәсаб дькә, йан жи әԝ баԝәр дькә, ԝәки әм дьжин ԝәхтәки ӧсада, кӧ зутьрәке хьраби ԝе бе һьлдане. Әԝ ԝе чьда тʹәви ԝә ԛайил бә, һәма сәр һʹиме ве йәке жи ԝирʹа дәстпекьн мьзгинийа жь Кʹьтеба Пироз гьли кьн, у ӧса кӧ жерʹа һʹәԝас бә. Бир нәкьн, ԝәки мәрьв дьбәкә һʹәму тьшти баԝәр нәкьн, чь кӧ дине ԝан һин дькә. Ләма жи чахе һун дьвиньн дине мерьв чь йә, ԝе баш бә һун ӧса жи тедәрхьн кӧ әԝ хԝәха чь баԝәр дькә. Бьре кӧ мисйонер ә, дина хԝә дайе, ԝәки һьнәкед кӧ дьбежьн Сейәканә баԝәр дькьн, бь рʹасти баԝәр накьн ԝәки Бав, Кӧрʹ, у рʹӧһʹе пироз Хԝәдек ә. Әԝ дьбежә: «Чахе әз ве йәке бир накьм, мьнрʹа дьһа һеса йә зьман ԝанрʹа бьвиньм». Ләма жи лазьм ә тʹьме тедәрхьн, кӧ мәрьв бь рʹасти чь баԝәр дькьн. У паше мина Паԝлос шанди һуне «бона һʹәмуйа» бькʹәвьнә «һʹале һәр кәси» (1 Корн. 9:19-22). w20.04 10 ¶9-10

Әм гәрәке ахьрийе нәтьрсьн, чьмки пʹехәмбәртийед жь Данийел у жь Йуһʹәнна избат дькьн, ԝәки ԝәʹде тәнгасийа мәзьн һʹәмуйед кӧ Йаһоԝа у Исарʹа хьзмәт дькьн, ԝе хьлаз бьн. Данийел дьбежә кӧ наве ԝан, йед кӧ ԝе хьлаз бьн, ԝе «пʹьртукеда ньвисанди» бьн. Ле әм гәрәке чь бькьн сәва наве мә ве пʹьртукеда бе ньвисандьне? Әм гәрәке пе жийина хԝә избат кьн, ԝәки баԝәрийа хԝә Бәрхе Хԝәде, демәк Иса тиньн (Йуһʹн. 1:29). Әм гәрәке әʹмьре хԝә тʹәсмили Хԝәде кьн у бенә ньхӧмандьне (1 Пәт. 3:21). У әм гәрәке нишан кьн, ԝәки пьштгьрийа Пʹадшатийа Хԝәде дькьн бь ве йәке, кӧ али мәрьва дькьн дәрһәԛа Йаһоԝа пебьһʹәсьн. Ньһа әԝ ԝәʹдә йә, ԝәки әм итʹбарийа хԝә һьндава Йаһоԝа у тʹәшкиләта ԝи ԛәԝи кьн. Ньһа йә ԝәʹдә кӧ алийе Пʹадшатийа Хԝәде бьгьрьн. Һәрге әм ӧса бькьн, әме хьлаз бьн, гава Пʹадшатийа Хԝәде ԛьрʹа пʹадше бакӧре у пʹадше башуре бинә. w20.05 16 ¶18-19

Адәм у Һеԝайе заньбун кӧ наве Хԝәде Йаһоԝа йә. Әԝана ӧса жи дәрһәԛа ԝи тьштед фәрз заньбун, мәсәлә кӧ әԝ Әʹфьрандар ә, йе кӧ жийин, мала щьнәти у зәԝаща беԛьсур дабу ԝан (Дәстп. 1:26-28; 2:18). Ле гәло әԝана сәр һʹәму ԛәнщийед кӧ Йаһоԝа бона ԝан кьрьбу, дьфькьрин? Гәло ԝана бәрдәԝам дькьрьн һʹьзкьрьн у рʹазибуна хԝә һьндава Йаһоԝа бьдьн кʹьфше? Әԝ йәк әʹйан бу гава дьжмьне Хԝәде әԝана щерʹьбандьн. Шәйтʹан бь сайа мәʹр пьрс да Һеԝайе: «Рʹасти Хԝәде готийә ԝәки жь һʹәму даред бахчә гәрәке нәхԝьн?» (Дәстп. 2:16, 17; 3:1) Ве пьрседа дәрәԝәкә вәшарти һәбу, кӧ мина жәʹре бу. Бь рʹасти Хԝәде ԝанрʹа гот кӧ жь һʹәму даред бахчәда дькарьн бьхԝьн, тʹәне жь йәке нәхԝьн (Дәстп. 2:9). Ле Шәйтʹан ӧса хәбәр да, кӧ йанчь Хԝәде мәрʹд нинә. Ләма жи дьԛәԝьмә һʹьше Һеԝайерʹа фькьрәкә ӧса дәрбаз бу: «Дьбәкә Хԝәде тьштәки баш жь мьн вәдьшерә?» w20.06 3-4 ¶8-9

Һьнә хушк-бьра хьзмәтийа хԝә данә сәкьнандьне, чьмки жь щьвате кәсәки әԝана данә хәйидандьне. Паԝлосе шанди заньбу, ԝәки щара ԝе «газьне» мә һьндава хушк йан бьрада һәбә. Һәла һе дьԛәԝьмә нәһәԛийе жи мә бькьн. Һәрге әм фәсал нибьн, әм дькарьн бьбьнә йәки зӧлм у һерс. Әв һерс ахьрийеда дькарә мә жь щьмәʹта Йаһоԝа дур хә. Бьраки мә Пабло кӧ жь Америка Башуре йә, гьли кьр кӧ бӧхдан авитьнә ԝи, кӧ йан чь әԝи хьраби кьрийә. Әԝи жь бо ве йәке щабдарийа хԝә щьватеда ӧнда кьр. Әв дәрәщә сәр ԝи ча һʹӧкӧм бу? Пабло дьбежә: «Әз гәләк һерс кʹәтьм, у һеди-һеди әз жь щьвате дур кʹәтьм». Йан жи әԝе кӧ гӧнәки гьран кьрийә, исафа ԝи дькарә гәләк ԝәхт ԝи бьчәрчьринә, у әԝ дькарә бьфькьрә кӧ ида һежайи һʹьзкьрьна Хԝәде нинә. Һәла һе жи һәрге әԝи бь дьл гӧне хԝә анийә рʹуйе хԝә, йәкә әԝ дькарә һʹәсаб кә кӧ ида лайиԛ нинә Йаһоԝарʹа хьзмәт кә. Ле һун һьндава ԝан хушк-бьрада ча ньн, йед кӧ рʹасти ԝан чәтьнайа тен? w20.06 19 ¶6-7

Гәрәке әм фәʹм бькьн кӧ чь дькарә зьраре бьдә мә, у гәрәке әм хԝә жь тьштед ӧса бьпарезьн (Ибрн. 5:14). Мәсәлә, гәрәке әм мьжулийед хԝә рʹьнд һьлбьжерьн. Дь гәләк филм у бәрнамәйед телевизйонеда бенамуси һәйә. Тьштед ӧса дьле Хԝәде хԝәш найен у ԝе зу йан дәрәнг зьраре бьдьн мә. Ләма, гәрәке әм хԝә жь мьжулийед кӧ дькарьн һʹьзкьрьна Хԝәде дьле мәда һеди-һеди сьст бькьн, дур бьгьрьн (Әфәс. 5:5, 6). Гәрәке әм фәʹм бькьн кӧ әʹламәтийа дәрәԝин, йа кӧ рʹабәр бәла дькьн, тʹәльк ә у хоф ә, чьмки әԝана дәрһәԛа хушк у бьра йан жи дәрһәԛа тʹәшкиләте хәбәред дәрәԝин бәла дькьн (1 Тимтʹ. 4:1, 7; 2 Тимтʹ. 2:16). Дәрәԝед ӧса дькарьн мә жь рʹийа рʹастийе дәрхьн. Ләма гәрәке әм һаш жь хԝә һәбьн кӧ әм сәва пропагандайа «мәрьвед кӧ һʹьше ԝан хьраб буйә у жь рʹастийе бепʹар бунә» нәйен хапандьн. Нета ԝан тʹәне әв ә кӧ шәрʹ-дәʹԝа пешда биньн (1 Тимтʹ. 6:4, 5, ИМ). Әԝана дьхԝазьн кӧ әм дәрәԝед ԝан баԝәр бькьн у итʹбарийа хԝә һьндава хушк у бьра ӧнда кьн. w20.09 29 ¶13, 15

Жьн-мер гәрәке һьндава һәвда бь һʹьзкьрьн у бь ԛәдьр бьн (Әфәс. 5:33). Кʹьтеба Пироз мә һин дькә, ԝәки һе зедә бона мәрьва хәм бькьн, нә кӧ бькʹәвьнә һʹәйра хԝә (Кʹар. Шанд. 20:35). Ле кʹижан һʹӧнӧр ԝе али жьн-мера бькә, кӧ һьндава һәвда бь һʹьзкьрьн у бь ԛәдьр бьн? Әв һәйә мьлукти. Мьлукти али гәләк жьн-мере Мәсиһи дькә кӧ зәԝаща хԝәда бәхтәԝар бьн. Мәсәлә, бьраки мә Стивен дьбежә: «Һәрге һун мина кʹом йәктийеда бьн, һуне проблемада жи хԝә ль һәв бьгьрьн. Һьнге һуне дәԝса кӧ бьфькьрьн ‹чь дьһа баш ә бона мьн›, һуне бьфькьрьн ‹чь дьһа баш ә бона мә›». Жьна ԝи, Стефани дьбежә: «Тʹӧ кәс нахԝазә тʹәв мәрьве ӧса бьжи, кʹе кӧ тʹьме дькʹәвә дәʹԝе. Чахе ортʹа мәда чәтьнайи пешда тед әм пешийе дьгәрʹьн кӧ мәʹнийа ве йәке чь йә. Паше әм дӧа дькьн, леколина дькьн у шеԝьр дькьн ча әве проблеме сафи кьн. Паше әм нә кӧ һәврʹа дькʹәвьнә дәʹԝе, ле дина хԝә дьдьне кӧ чь щурʹәйи проблеме сафи кьн». Мер-жьн дьһа бәхтәԝар ьн, чахе һәр кәс дәрһәԛа хԝә зедә нафькьрә. w20.07 3-4 ¶5-6

Итʹбарийа хԝә ԛәԝата хԝә у фәрәсәтед хԝә нәйньн. Паԝлос шанди йәки хԝәнди бу, әԝ бал сәрԝере Дине Щьһуйа һин бьбу, наве кʹижани Гамалйел бу у нав мәрьвада гәләк хԝәйи ԛәдьр бу (Кʹар. Шанд. 5:34; 22:3). Паԝлос ԝәʹдәки нав щьмәʹта Щьһу йәки хԝәйиһʹӧкӧм бу (Кʹар. Шанд. 26:4). Ле Паԝлос тʹӧ щар итʹбарийа хԝә ԛәԝат у фәрәсәтед хԝә нәдьани. Паԝлос һәр тьштед ве дьнйайе, кӧ дькарьбун әԝ навдар кьрана, пәй хԝә һишт (Фили. 3:8). Паԝлос гәләк чәтьнайи дит, сәва бьбә шагьрте Мәсиһ. Әԝ бәр чʹәʹве мьләте хԝә рʹәш бьбу (Кʹар. Шанд. 23:12-14). Әԝ алийе бажарванед хԝәда, демәк алийе Рʹомайада, ледайи-кʹӧтайи бу у кʹәтьбу кәле (Кʹар. Шанд. 16:19-24, 37). Әԝи ӧса жи фәʹм дькьр, ԝәки әԝ беԛьсур нинә у ԝирʹа чәтьн ә ве йәке бькә, чь кӧ рʹаст ә (Рʹом. 7:21-25). Паԝлос нәдьһишт ԝәки дьжмьн у сьстбунед ԝи сәр ԝи һʹӧкӧм бьн, ле дәԝсе сьстбунед хԝәда шабун дьдит. Чьрʹа? Чьмки чахе әԝ сьст дьбу, әԝи ԛәԝата Хԝәде сәр хԝә тʹәхмин дькьр (2 Корн. 4:7; 12:10). w20.07 16 ¶7-8

Бь рʹасти жи фәрз ә кӧ әм бь тʹәмами дина хԝә бьдьн ише бәлакьрьна мьзгина Пʹадшатийе. Иса Мәсиһ жь бәреда готьбу кӧ паши мьрьна ԝи, шагьртед ԝи ԝе нә тʹәне ви шьхӧли бәрдәԝам бькьн, ле һәла һе һʹәта сәре дьнйайе жи бәла бькьн. Паши кӧ Иса жь мьрьне һат рʹакьрьн, әԝи бь кʹәрәмәтәке али шагьртед хԝә кьр кӧ әԝана гәләк мәʹсийа бьгьрьн. Паше, әԝи ԝанрʹа гот кӧ шьхӧле бәлакьрьна мьзгине жь һәр шьхӧле дьн фәрзтьр ә (Йуһʹн. 21:15-17). Пешийа кӧ Иса Мәсиһ һьлкʹьшийа әʹзмана, әԝи шагьртед хԝәрʹа гот кӧ мьзгин ԝе нә тʹәне ль ԝәлате Исраел, ле ль сәрансәре дьнйайе жи бе бәла кьрьн (Кʹар. Шанд. 1:6-8). Гәләк сал шунда, Иса Мәсиһ нишани Йуһʹәннайе шанди кьр кӧ «дь рʹожа Хӧданда» чь ԝе бьԛәԝьмә. Дитьнокеда, Йуһʹәнна дит кӧ мәләкәки «Мьзгинийа . . . Һʹәта-һʹәтайе» әʹлами «һʹәму мьләта, бәрәка, зьмана у щьмәʹта» дькьр (Әʹйан. 1:10; 14:6). Әшкәрә йә кӧ Йаһоԝа дьхԝазә ԝәки әм мьзгине ль сәрансәре дьнйайе бәла бькьн һʹәта кӧ әв иш хьлаз бә. w20.09 9 ¶5

Малбәта Бьраһимда проблемед мәзьн һәбун. Жьна ԝи Сара безарʹок бу. Гәләк сала, әԝ сәва ве йәке пʹьрʹ хәмгин дьбун. Ләма, Сарайе хьзмәткʹара хԝә Һащәр да Бьраһим, ԝәки әԝ жь бо Бьраһим у Сарайе зарʹока бинә. Ле чахе Һащәр һʹәмлә ма, ԝе Сара ньмьз дькьр. Проблем һаԛас мәзьн бу кӧ Сарайе бәри Һащәре да (Дәстп. 16:1-6). Ԝәхт дәрбаз бу, Сара һʹәмлә ма у кӧрʹе хԝә Исһаԛ ани дьнйайе. Бьраһим һәр дӧ кӧрʹед хԝә – һьм Исһаԛ һьм жи Исмайил – һʹьз дькьр. Ле бәле, жь бәр кӧ Исмайил ԛәрфед хԝә бь Исһаԛ дькьр, Бьраһим мәщбур бу кӧ Исмайил у Һащәре жь мале бьшинә (Дәстп. 21:9-14). Паше, Йаһоԝа жь Бьраһим хԝәст кӧ әԝ Исһаԛ ԛӧрбан бькә (Дәстп. 22:1, 2; Ибрн. 11:17-19). Һәр дӧ щара жи, лазьм бу кӧ Бьраһим баԝәр бә кӧ Йаһоԝа ԝе созед хԝә, йед дәрһәԛа Исмайил у Исһаԛда бинә сери. w20.08 4 ¶9-10

Гава кәсед рʹакьри ԝе хәйсәтед хԝә йед кәвьн бьһельн у ль гора ԛанунед Хԝәде бьжин, әԝе жи пʹьр дьлша бьбьн. Кәсед кӧ һазьр ьн кӧ жийина хԝә бьгӧһәриньн ԝе жийина бедаԝи бьстиньн. Бь ви аԝайи, рʹабуна ԝан ԝе бьбә рʹабуна «жь бо жийине». Ле бәле, һәрге кәсәк хԝә рʹаст нәкә, Йаһоԝа ԝе изне нәдә кӧ әԝ әʹдьлайа Щьнәте хьраб бькә (Иша. 65:20; Йуһʹн 5:28, 29). Мәтʹәлок 10:22 ӧса дьбежә: «Дӧайе Хӧдан һәбуке дьдә у кʹәдәре сәрда зедә накә». Бьн һʹӧкӧмдарийа Пʹадшатийа Хԝәдеда, һʹәму хьзмәткʹаред Хԝәде ԝе бәрәкʹәтед мәзьн бьстиньн. Бь аликʹарийа рʹӧһʹе Йаһоԝа, әԝе жь алийе рʹӧһʹанива дәԝләмәнд бьн, йани әԝе һәр кӧ дьчә бьбьн мина Иса Мәсиһ у бьгьһижьн беԛьсурийе (Йуһʹн. 13:15-17; Әфәс. 4:23). Рʹож бь рʹож, сьһʹәта ԝан ԝе баштьр бьбә, у әԝе бьбьн мәрьвед ԛәнщтьр. Ль ԝе дәме, жийин ԝе чьԛас хԝәш бә! (Иб. 33:25) w20.08 17 ¶11-12

Әм ча дькарьн нишан бькьн кӧ әм һʹале хушк у бьрайед нәзәԝьщи фәʹм дькьн? Гәрәке әм бир нәкьн кӧ һьнә хушк у бьра хԝә бь хԝә ԛьрар дайә кӧ азәп бьминьн. Һьнә кәс жи бәлки дьхԝазьн бьзәԝьщьн, ле һʹәта ньһа, ԝан кәсәки ль гора дьле хԝә нәдитийә. Ӧса жи, һьнә хушк у бьрайед мә би манә. Гәло ԝе ԝан хԝәш бе кӧ әм ԝан бьпьрсьн, кʹа әԝ чьма назәԝьщьн йан бежьн кӧ әме аликʹарийе бьдьнә ԝан, кӧ ԝанрʹа кәсәки лайиԛ бьбиньн? Һәрге ԝана аликʹарикә ӧса нәхԝәстьбә, ма әԝ йәк ԝе ль ԝан хԝәш бе? (1 Тимтʹ. 5:13) Хушк у бьрайед мә йед азәп ԝе дьлхԝәш бьн һәрге әм дина хԝә бьдьн, нә азәпбуна ԝан, ле сәр һʹӧнӧред ԝан. Дәԝса кӧ әм гӧне хԝә бь ԝан биньн, ԝе баш бә кӧ әм ԛәдре ԝан бьгьрьн кӧ әԝ Йаһоԝарʹа амьн дьминьн. Һәрге әм ӧса бькьн, хушк у бьрайед мә йед азәп ԝе тʹӧ щара нәфькьрьн кӧ әм ԝанрʹа дьбежьн: «Тӧ кери мьн найейи!» (1 Корн. 12:21) Әԝе бьвиньн кӧ әм ԛәдре ԝан дьгьрьн у ԛимәте дьдьн ԝан. w20.08 29 ¶10, 14

Паше, Иса Мәсиһ Паԝлосрʹа жи хӧйа бу (1 Корн. 15:8). Гава әԝ дьчу бажаре Шаме, әԝи дәнге Иса Мәсиһ бьһист у әԝ хәйаледа дит (Кʹар. Шанд. 9:3-5). Сәрһатийа Паԝлос жи избат дькә кӧ рʹабуна Иса Мәсиһ чʹирок нинә (Кʹар. Шанд. 26:12-15). Пешийа кӧ Паԝлос баԝәрийа хԝә бь Иса Мәсиһ ани, әԝи зӧльм ль шагьртед Иса кьрьбу. Ле бәле, гава әԝи баԝәр кьр кӧ Иса Мәсиһ жь мьрьне рʹабу, ԝи пʹьрʹ хирәт кьр кӧ кәсед дьн жи бьдә баԝәр кьрьн. Жь бо ве йәке кӧ әԝи мьзгина дәрһәԛа мьрьн у рʹабуна Иса Мәсиһ бәла дькьр, әԝ рʹасти гәләк тәнгасийа дьһат. Паԝлос гәләк щара һат ледане, ԝи давитьнә кәле, у се щара гәмийед кӧ әԝ теда бу, ноԛ бун (1 Корн. 15:9-11; 2 Корн. 11:23-27). Паԝлос бь рʹабуна Иса Мәсиһ һаԛас баԝәр дькьр кӧ әԝ һазьр бу ԝәки бона баԝәрийа хԝә бьмьрә. Гәло готьнед ван шәʹда тә надьнә баԝәркьрьне, кӧ Иса бь рʹасти жь мьрьне рʹабу? Гәло әв йәк баԝәрийа тә дьһа ԛәԝи накә кӧ рʹожәке мьри ԝе рʹабьн? w20.12 3 ¶8-10

Әм дькарьн жь хԝә бьпьрсьн: «Гәло әз дьчьм һʹәму щьвина?» Ль щьвинед кӧ жь алийе тʹәшкиләта Йаһоԝава тен организә кьрьн, әм һьм һелан дьбьн һьм жи хԝарьна рʹӧһʹани дьстиньн (Мәт. 11:28). Ӧса жи, ԝе баш бә кӧ әм жь хԝә ӧса бьпьрсьн: «Гәло мьн леколина Кʹьтеба Пироз хԝәрʹа кьрийә хәйсәт?» Һәгәр тӧ тʹәви малбәта хԝә дьжийи, гәло тӧ һәр һʹәфтә жь бо ԛӧльхкьрьна тʹәви малбәте ԝәхт вәдьԛәтини? Һәгәр тӧ тʹәне дьжийи, гәло тӧ диса жи жь бо леколине ԝәхт вәдьԛәтини? Ӧса жи, чь дәсте тә те, тӧ бәлакьрьна мьзгинеда дьки? Ԝе чьма баш бә кӧ әм ван пьрса жь хԝә бьпьрсьн? Кʹьтеба Пироз дьбежә кӧ Йаһоԝа һʹьш у дьле мә леколин дькә, ләма гәрәке әм жи ӧса бькьн (1 Дир. 28:9). Һәгәр әм тедәрхьн кӧ гәрәке әм нет, ньһерʹандьн йан фькред хԝә бьгӧһезьн, лазьм ә әм аликʹарийе жь Йаһоԝа бьхԝазьн кӧ әм бькарьбьн ван гӧһастьна бькьн. Гәрәке әм хԝә ньһада бона щерʹьбандьна һазьр бькьн. w20.09 19 ¶19-20

Иса Мәсиһ готьбу кӧ һәгәр кәсәк дьхԝазә бьрщәке ава бькә, гәрәке әԝ пешийе хәрще хԝә һʹәсаб бькә у бьфькьрә ԛәԝата ԝи ԝе бьгьһиже әве йәке бинә сери йан на. Ӧса жи, Иса гот кӧ пешийа кӧ пʹадша дьчә кӧ шәрʹ бькә, гәрәке әԝ рʹуне у бьфькьрә кʹа әскәред ԝи ԝе бькарьбьн сәркʹәвьн йан на (Луԛа 14:27-32). Мина ве, Иса Мәсиһ заньбу кӧ һәгәр кәсәк дьхԝазә бьбә шагьрте ԝи, гәрәке әԝ рʹьнд фәʹм бькә кӧ чь те һʹәсабе бьбьн шагьртед ԝи. Ләма, ԝе баш бә кӧ әм хԝәндәкʹаред хԝә һелан бькьн кӧ әԝ һинбуна Кʹьтеба Пироз һәр һʹәфтийе дәрбаз бьн. Лазьм ә кӧ дәрсдар бона һәр дәрсе хԝә рʹьнд һазьр бькә. Паше бьфькьрә кӧ тӧ чаԝа дькари информасийайе бь щурʹәки һеса хԝәндәкʹаре хԝәрʹа шьровәки, ԝәки әԝ бькарьбә информасийайе рʹьнд фәʹм бькә у жийана хԝәда бьхәбьтинә (Нәһәм. 8:8; Мәтʹлк. 15:28а). w20.10 7 ¶5; 8 ¶7

Ль гора рʹебәрийа Иса Мәсиһ, гәрәке әм мәрьварʹа зәлал шьровәкьн кӧ тʹәмийед Иса чь нә. Ле гәло әв бәс ә? Иса Мәсиһ ӧса гот: «Ԝан һʹәму тʹәмийед кӧ мьн  данә ԝә мьләта һин кьн, ԝәки әԝ хԝәй кьн». Бәле, ль гора готьнед Иса Мәсиһ, лазьм ә кӧ әм мәрьва һин бькьн кӧ гәрәке әԝ чь бькьн у чаԝа (Кʹар. Шанд. 8:31). Чьма фәрз ә кӧ әм мәрьва һин бькьн, ԝәки әԝ тʹәмийед Иса Мәсиһ «хԝәй кьн»? Гава әм һинбуна Кʹьтеба Пироз тʹәви мәрьва дәрбаз дькьн, әм ԝана һин дькьн кӧ Хԝәде чь жь мә дәʹԝа дькә. Ле әв бәс нинә. Гәрәке әм ӧса жи хԝәндәкʹара һин бькьн кӧ әԝ чаԝа дькарьн ль гора Кʹьтеба Пироз бьжин (Йуһʹн. 14:15; 1 Йуһʹн. 2:3). Бь рʹабун у рʹуньштьна хԝә, әм дькарьн нишани ԝан бькьн кӧ әԝ чаԝа дькарьн принсипед сәрәкә йед Кʹьтеба Пироз һʹәму алийед жийана хԝәда пек биньн. Ӧса жи, әм дькарьн ль бәр хԝәндәкʹаред хԝә дӧа бькьн кӧ рʹӧһʹе пироз рʹебәрийа ԝан бькә (Йуһʹн. 16:13). w20.11 2-3 ¶3-5

Шагьртед Иса рʹасти тәнгасийа дьһатьн. Мәсәлә, копийед Ньвисаред Пироз ль ԝе дәме һьндьк бун. Әʹдәбйәтед леколине тʹӧнә бун. Сәрда жи, лазьм бу кӧ шагьрт мьзгине бьдьн кәсед кӧ бь зьманед хәриб хәбәр дьдан. Нава ван тәнгасийада, ван шагьртед бьхирәт бь дәһа сала мьзгина Пʹадшатийе «жь һʹәму әʹфьринед ль сәр рʹуйе әʹрдерʹа» бәла кьр (Колс. 1:6, 23, ИМ). Йаһоԝа иро жи рʹебәрийе хьзмәткʹаред хԝә дькә у ԛәԝате дьдә ԝан. Рʹебәрийа Хԝәде һьлбәт һәри зедә жь Кʹьтеба Пироз те, йа кӧ бь сайа рʹӧһʹе пироз һатийә ньвисандьн. Мәсәлә, Кʹьтеба Пироз мәрʹа әʹйан дькә кӧ Иса Мәсиһ чаԝа хьзмәт дькьр у әʹмьр да шагьртед хԝә кӧ әԝ ви иши бәрдәԝам бькьн (Мәт. 28:19, 20). Йаһоԝа бетәрәф ә, ләма әԝи жь бәреда готьбу кӧ мьзгин ԝе бона «һʹәму мьләта, бәрәка, зьмана у щьмәʹта» бе дайин (Әʹйан. 14:6, 7). Хԝәде дьхԝазә кӧ һәр кәс хәбәра Пʹадшатийе бьбьһе. w20.10 21 ¶6-8

Даԝьд Пʹадша нә мина Шаԝул Пʹадша бу. Даԝьд ԛануна Йаһоԝа пʹьр һʹьз дькьр (Зәб. 1:1-3). Әԝи заньбу кӧ Йаһоԝа кәсед мьлук хьлаз дькә, ле кәсед ԛӧрʹә нәфрʹәт дькә. Ләма Даԝьд изьн да кӧ ԛануна Хԝәде фькред ԝи рʹаст бькә. Әԝи ӧса ньвиси: «Пәсьне Тә әзе бьдьм, Хӧдане ширәткʹар, һʹәта шәв жи дьл нав мьнда дьбә дәрсдар» (Зәб. 16:7). Һәгәр әм мьлук бьн, әме изне бьдьн кӧ Хәбәра Хԝәде фькред мә йед шаш рʹаст бькә пешийа кӧ әм шашике бькьн. Хәбәра Хԝәде ԝе мәрʹа ӧса бежә: «Рʹе әв ә, дь ве рʹейада бьмәшьн!» Гава әм жь рʹийа рʹаст шаш бьбьн, әԝе мә һʹьшйар бькә (Иша. 30:21). Һәгәр әм гӧһ бьдьн Йаһоԝа, әме гәләк кʹаре бьстиньн (Иша. 48:17). Мәсәлә, ԝе нә лазьм бә кӧ кәсәки дьн мә рʹаст бькә. Ӧса жи, әме дьһа незики Йаһоԝа бьбьн, чьмки әме фәʹм бькьн кӧ әԝ мә ԝәк зарʹед хԝә дьвинә (Ибрн. 12:7). w20.11 20 ¶6-7

Ньһерʹандьна ӧса бәлки ль сәр һьнә шагьртед ль Корьнтʹе һʹӧкӧм дькьр (1 Корн. 15:12). Һьнә кәс дьԛәԝьмә дьфькьрин кӧ рʹабуна мьрийа тʹәне тьштәки симболик ә. Әԝ бәлки дьфькьрин кӧ кәсед гӧнәкʹар «мьри» нә, ле гава әԝ дьбьн шагьртед Иса Мәсиһ, әԝ «сах» дьбьн. Сәбәбед ньһерʹандьнед ԝан һәр чь бун жи, әв йәк кӧ ԝана бь рʹабуна мьрийа баԝәр нәдькьр те һʹәсабе кӧ баԝәрийа ԝан пʹучʹ бу. Һәгәр Иса Мәсиһ жь мьрьне рʹанәбуйа, әв йәк ԝе бьһата һʹәсабе кӧ ԛӧрбан нәһатийә дайин у һәр кәс һе дь нав гӧнада йә. Ләма, кәсед кӧ бь рʹабуна мьрийа баԝәр нәдькьр, беһеви бун (1 Корн. 15:13-19; Ибрн. 9:12, 14). Паԝлосе шанди заньбу кӧ «Мәсиһ жь мьрьне рʹабуйә». Рʹабуна Иса Мәсиһ жь рʹабуна кәсед дьн четьр бу, йед кӧ бь зәманрʹа диса мьрьн. Паԝлос гот кӧ Иса Мәсиһ «бәре дәрәмәта пешьн жь нава мьрийа рʹабуйи» бу. Әԝ һьлбәт нә мәрьве пешьн бу, йе кӧ жь мьрьне һат рʹакьрьн, ле әԝ мәрьве пешьн бу, йе кӧ ԝәк рʹӧһʹ һат рʹакьрьн у чу әʹзмана (1 Корн. 15:20; Кʹар. Шанд. 26:23; 1 Пәт. 3:18, 22). w20.12 5 ¶11-12

Ль ԛьрʹна йәке, кʹома рʹебәрийе, йа кӧ ль бажаре Оршәлиме бу, һәвкʹари дькьр кӧ әʹдьлайе у тʹәрбәтийе дь нав хьзмәткʹаред Хԝәдеда хԝәй бькә (Кʹар. Шанд. 2:42). Мәсәлә, дь сала 49-да Д.М., гава пьрса сьнәтбуне пешда һат, кʹома рʹебәрийе дәрһәԛа ве проблеме бь аликʹарийа рʹӧһʹе пироз шеԝьра хԝә кьр. Һәгәр әв проблем сафи нәбуйа, әв йәк ԝе бәлакьрьна мьзгинерʹа бьбуйа астәнг. Шанди у меред әʹмьрда мәзьн Щьһу бун, ле әԝана дь бьн һʹӧкӧме әʹдәтед Щьһуйада йан дь бьн һʹӧкӧме кәсед кӧ пьштгьрийа ван әʹдәта дькьр, нәман. Ԝана рʹебәрийа Хәбәра Хԝәде у рʹӧһʹе пироз дьгәрʹийан (Кʹар. Шанд. 15:1, 2, 5-20, 28). Ахьрийеда, Йаһоԝа сафикьрьна ԝан кʹәрәм кьр, әʹдьлайи у йәкти хьраб нәбу у ише бәлакьрьна мьзгине пешда чу (Кʹар. Шанд. 15:30, 31; 16:5). Рʹожа иройин тʹәшкиләта Йаһоԝа һәр тьшти дькә кӧ йәктийе у әʹдьлайи нава щьмәʹта Йаһоԝада хԝәй дькә. w20.10 22-23 ¶11-12

Дьбә кӧ тӧ сәва кал-пирбуне, нәхԝәшийе йан сәбәбед дьн нькари хьзмәтеда һьнә кʹьфшкьрьна бьстини. Һәгәр һʹале тә ӧса йә, сәрһатийа Даԝьд Пʹадша бинә бәр чʹәʹве хԝә. Әԝи жь дьл дьхԝәст пʹарьстгәһа Хԝәде ава бькә. Гава Даԝьдрʹа һат готьн кӧ изна ԝи тʹӧнә кӧ пʹарьстгәһе ава бькә, әԝи бь дьл у щан аликʹари да ви мәрьви, йе кӧ жь алийе Хԝәдева һат бьжартьн кӧ ви иши бькә. Ӧса жи, Даԝьд бона ве авакьрьне пʹьрʹ зерʹ у зив һазьр кьр. Чь мәсәләкә баш! (2 Сам. 7:12, 13; 1 Дир. 29:3-5) Бьраки бь наве Һуго, йе кӧ ль Франсайе дьжи, жь бо нәхԝәшийе ида нькарьбу ԝәк рʹуспи хьзмәт бькә. Сәрда жи, әԝи ида нькарьбу һьнә ишед мале бькә. Әԝ ӧса дьньвисә: «Дь сәрида, мьн хԝә беԛимәт тʹәхмин дькьр, у әз пʹьрʹ дьлтәнг бум. Ле ԝәʹдә шунда, мьн фәʹм кьр кӧ гәрәке әз синоред хԝә ԛәбул бькьм, у мьн һьмбәри ван синора хьзмәта Йаһоԝада шабун дьстанд. Мина Гидәйон у 300 әскәред ԝи, йед кӧ ԝәстийайи бун у диса жи шәрʹе хԝә бәрдәԝам дькьрьн, әзе жи нәһельм кӧ дьлтәнги мьн бьшкенә!» (Һʹакьм. 8:4) w20.12 25 ¶14-15

Гава Йуһʹәнна дәрһәԛа жийина Иса Мәсиһ ньвиси, әԝи хәбәра «һʹьзкьрьн», жь Мәтта, Марԛос у Луԛа зедәтьр да хәбате. Әв ньвисаред ԝи, кӧ жь бина бәр Хԝәде нә, мә һин дькьн кӧ һʹьзкьрьн гәрәке ль сәр һʹәму кьрьнед мә һʹӧкӧм бькә (1 Йуһʹәнна 4:10, 11). Ле бәле, Йуһʹәннарʹа жи ԝәхт лазьм бу кӧ әԝ ве дәрсе һин бә. Ԝәхта кӧ Йуһʹәнна һе хорт бу, әԝи щарна һʹьзкьрьн әʹйан нәдькьр. Мәсәлә, щарәке Иса Мәсиһ у шагьртед ԝи бәрбь Оршәлимева дьчун. Гава әԝана дь гӧндәки Самәрирʹа дәрбаз дьбун, Самәрийа ча меван ԝана ԛәбул нәкьрьн. Йуһʹәнна хԝәст кӧ «жь әʹзмен агьр . . . бьбарә у ԛьрʹа ван бинә»! (Луԛа 9:52-56) Щарәкә дьн жи, Йуһʹәнна у бьре ԝи Аԛуб дийа хԝәрʹа готьн кӧ бьра әԝ жь Иса Мәсиһ ӧса рʹьща бькә: «Бежә, кӧ әв һәр дӧ кӧрʹед мьн ль нав Пʹадшатийа тәда, йәк ль мьле тәйи рʹасте, йе дьн жи ль мьле тәйи чʹәпе рʹуне». Гава шандийед дьн бьһистьн кӧ Аԛуб у Йуһʹәнна чь кьрьн, әԝана гәләк һерс кʹәтьн! (Мәтта 20:20, 21, 24) Рʹаст ә Йуһʹәнна гәләк шаши дькьрьн, ле диса жи Иса ԝи һʹьз дькьр (Йуһʹәнна 21:7). w21.01 8-9 ¶3-4

Гава Йаһоԝа сафикьрьна дькә, әԝ бона кʹара кәсед дьн дьфькьрә. Мәсәлә, әԝи нә кӧ бона кʹара хԝә әʹмьр әʹфьранд, ле ԝәки әм жи бькарьбьн мина ԝи жийинерʹа ша бьн. Ӧса жи, әԝи бь рʹәзәдьли Кӧрʹе хԝә бона гӧнед мә кьрә ԛӧрбан. Гава Иса Мәсиһ тьштәк сафи дькьр, әԝи жи бона кʹара кәсед дьн хәм дькьр. Мәсәлә, рʹожәке, гава әԝ ԝәстийайи бу, дәԝса кӧ һеса бә, әԝи ԝәʹде хԝә бона һинкьрьна мәрьва хәрщ кьр (Марԛос 6:31-34). Бона сәре малбәте щарна һеса нинә кӧ сафикьрьнәкә билан бькә. Әԝ рʹьнд занә кӧ әв йәк щабдарикә мәзьн ә. Ләма жи, сәре малбәте гәрәке рʹьнд бьфькьрә пешийа кӧ сафикьрьна бькә, у изьне бьдә кӧ Йаһоԝа ԝи һин бькә (Мәтʹәлок 2:6, 7). Бь ве йәке, әԝ ԝе нә кӧ бона кʹара хԝә, ле бона кʹара кәсед дьн бьфькьрә (Филипи 2:4). Һәрге сәре малбәте чʹәʹв бьдә Йаһоԝа у Иса, әԝ ԝе бьбә малхе баш. w21.02 7 ¶19-21

Щаһьлтийа хԝәда, Аса Пʹадша йәки мьлук у мерхас бу. Мәсәлә, паши мьрьна баве хԝә Әбийа, гава Аса бу пʹадша, әԝи дәстпекьр пʹутпʹарьстийе кӧта кә. Ӧса жи, әԝи щьмәʹта Щьһударʹа гот кӧ бьра әԝана Йаһоԝа бьгәрʹьн у гӧһ бьдьн ԛанунед ԝи (2 Дирок 14:1-7). Гава Зәраһе Әтйопи тʹәви милйонәки әскәред хԝә кʹәтә ԝәлате Щьһуда, Аса Пʹадша жь Йаһоԝа аликʹари хԝәст. Әԝи фәʹм дькьр кӧ һәгәр Йаһоԝа али ԝан бькә, һәжмара ԝан ԛәт нә фәрз ә. Ләма Аса жь дьл баԝәр дькьр кӧ Йаһоԝа дькарә ԝи у мьләте ԝи хьлаз кә. Аса хԝә дьспарт Баве хԝәйи әʹзмани, у Әԝи дьжмьнед ԝи бьн дәст кьрьн (2 Дирок 14:8-12). Гава милйонәк әскәр мьԛабьли Аса Пʹадша дәркʹәтьн, әв йәк бь рʹасти жи проблемәкә мәзьн бу. Аса жь Йаһоԝа аликʹари хԝәст, у әв йәк сафикьрьнәкә баш бу. w21.03 5 ¶12-13

Кʹьтеба Пироз бәʹса гәләк мәрьвед дьлшәԝат дькә. Мәсәлә, дина хԝә бьдә сәрһатийа Даԝьд у Йонатʹан. Кʹьтеба Пироз дьбежә кӧ әԝ достед һәв бун, у «Йонатʹан мина щане хԝә» Даԝьд һʹьз дькьр (1 Самуйел 18:1). Йаһоԝа Даԝьд бьжартьбу кӧ әԝ паши Шаԝул бьбә пʹадше мьләте Исраел. Шаԝул Пʹадша чʹәʹвнәбарийа Даԝьд дькьр у дьхԝәст ԝи бькӧжә. Ле Йонатʹан нәдькʹәтә бәр байе баве хԝә. Даԝьд у Йонатʹан соз данә һәвдӧ кӧ әԝе тʹьме достийе бькьн у һәртʹьм пьштгьрийа һәв бькьн (1 Самуйел 20:42). Бь рʹасти гәләк сәбәб һәбун йед кӧ дькарьбун рʹийа ԝан бьгьртана кӧ достийе бькьн. Мәсәлә, Йонатʹан ԝәкә 30 сал жь Даԝьд мәзьнтьр бу. Диса жи, Йонатʹан нәдьфькьри кӧ Даԝьд һаԛас щаһьл у нәщерʹьбанди йә кӧ әԝана ԝе нькарьбьн бьбьн достед һәв. Бәле, Йонатʹан Даԝьд жь хԝә ньмьзтьр һʹәсаб нәдькьр, ле ԛәдьре ԝи дьгьрт. w21.01 21-22 ¶6-7

Иса Мәсиһ соз дабу шагьртед хԝә кӧ әԝана ԝе бәхтәԝар бьн. Ӧса жи, әԝи готьбу йед кӧ ԝи һʹьз дькьн, ԝе рʹасти тәнгасийа бен (Мәтта 10:22, 23; Луԛа 6:20-23). Әм бәхтәԝар ьн кӧ әм шагьртед Иса нә. Ле гава малбәта мә һьмбәри мә дәрдькʹәвә, дәԝләт пәй мә дькʹәвә, йан гава һәвалхәбатчи йан һәвалдәрсханед мә зоре ль мә дькьн кӧ әм тьштәки хьраб бькьн, гәло әв йәк ль сәр мә чаԝа һʹӧкӧм дькә? Тьштед ӧса һьлбәт дькарьн мә әʹщьз бькьн. Бь нормали зерандьн бона мәрьва мәʹнийа шабуне нинә. Гәло ль гора Хәбәра Хԝәде, гәрәке әм ль тәнгасийа чаԝа бьньһерʹьн? Мәсәлә, Аԛубе шагьрт ньвисибу кӧ гава әм зәʹмәта дькʹьшиньн, гәрәке әм бь зедәйи дьлтәнг нәбьн, ле ша бьн (Аԛуб 1:2, 12). Ӧса жи, Иса Мәсиһ готьбу кӧ һәгәр мәрьв пәй мә бькʹәвьн, гәрәке әм диса жи шабуна хԝә ӧнда нәкьн (Мәт. 5:11). Бь рʹебәрийа Йаһоԝа, Аԛуб һьнә ширәтед баш данә ԝан, ԝәки әԝана нава тәнгасийада шабуна хԝә ӧнда нәкьн. w21.02 26 ¶1-2; 27 ¶5

Ль рʹожед Тимотʹейо, һьнә шагьртед Иса ви ԛәдьри ԛимәт нәдькьр кӧ әԝ һәвалкʹаред Хԝәде нә. Мәсәлә, Димас Фугәло, Һермохенис, Һумәнайо, Скәндәр у Фьлито (1 Тимтʹ. 1:19, 20; 2 Тимтʹ. 1:15; 2:16-18; 4:10). Әшкәрә йә кӧ әв мәрьв дь сәрида рʹастийеда ԛәԝи бун, ле ԝана пәй зәманрʹа бир кьр кӧ чь бь рʹасти бьԛимәт ә. Мире-щьна чь метода бь кʹар тинә кӧ мә бьхапинә, ԝәки әм чь кӧ Йаһоԝа спартийә мә, бьһельн? Мәсәлә, бь сайа телевизйон, синәма, интернет, рʹожнамә, кʹьтеб у журнала, әԝ дьхԝазә фькьр, һʹал у һәрәкәтед мә бьгӧһезә, ԝәки әм рʹастийе бьһельн. Ӧса жи бь сайа һʹӧкӧме һәвала у зерандьна, әԝ дьхԝазә мә бьдә сәкьнандьне кӧ әм мьзгине бәла нәкьн. Һьн жи, әԝ дьхԝазә кӧ әм гӧһ бьдьн тьштед «кӧ бь дәрәԝ жь ԝанрʹа ‹занин› те готьн» у жь рʹийа рʹастийе дәркʹәвьн. Һәгәр әм һаш жь хԝә тʹӧнә бьн, әм дькарьн һеди-һеди жь рʹастийе дур бькʹәвьн (1 Тимтʹ. 6:21). w20.09 27 ¶6-8

Ԛәт дост йан мәрьвәки тә дьле тә ешандийә? Тьштәки ӧса һатьбу сәре Даԝьд Пʹадша жи гава кӧрʹе ԝи Абшалом нәмами ль ԝи кьр (2 Самуйел 15:5-14, 31; 18:6-14). Гәло тӧ дькари жь ве сәрһатийе чь дәрса һин би? Мина Даԝьд Пʹадша, дьле хԝә Йаһоԝарʹа вәкә у ԝирʹа бежә кӧ тӧ чьма хәмгин и (Зәбур 6:6-8). Бинә бәр чʹәʹве кӧ Даԝьд Пʹадша сәва ван тәнгасийа чьԛас хәмгин бу. Әԝи кӧрʹе хԝә Абшалом һʹьз дькьр у итʹбарийа хԝә шеԝьрмәнде хԝә Аһитофәл дьани. Ле ԝана һәрда жи мьханәти ԝи кьр. Ԝана дьле ԝи гәләк ешанд, у сәрда жи дьхԝәстьн ԝи бькӧжьн. Диса жи, Даԝьд итʹбарийа хԝә һьндава һәвалед хԝә йед дьн ӧнда нәдькьр у нәдьфькьри кӧ һәр кәс буйә дьжмьне ԝи. Ӧса жи, әԝ нәкʹәтә һʹәйра хԝә у тʹәне жь ԝәлат нәрʹәви. Әԝи һьм жь Йаһоԝа һьм жь достед хԝә аликʹари хԝәст. Паши кӧ әԝи сафикьрьнәк кьр, әԝи дәрберʹа ль гора сафикьрьна хԝә кьр. Ӧса жи, әԝи баԝәрийа хԝә һьндава Йаһоԝа у достед хԝә ӧнда нәдькьр. w21.03 15 ¶7-8; 17 ¶10-11