Тирмәһ

Әм гәрәке тʹәви Иса достийе бькьн, сәва кӧ Хԝәде щаба дӧайед мә бьдә. Бәс нинә кӧ әм тʹәне хьлазийа дӧайед хԝәда бежьн «пе наве Иса». Әм гәрәке фәʹм кьн, кӧ чьрʹа Йаһоԝа пе Иса щаба дӧайед мә дьдә. Иса готә шандийед хԝә: «Пе наве мьн һун чь бьхԝазьн, әзе бькьм» (Йуһʹн. 14:13). Рʹаст ә тʹәне Йаһоԝа дӧайед мә дьбьһе, ле әԝи һʹӧкӧм да Иса сәва ԛьраред Ԝи бинә сери. Ләма жи һʹәта кӧ Йаһоԝа щаба дӧайед мә бьдә, әԝ дина хԝә дьдә һәла әм тʹәмийед кӧ Иса да, тиньн сери йан на. Мәсәлә, Иса гот: «Һәгәр һун нәһәԛийед мәрьвайә һьндава ԝәда кӧ дькьн бьбахшиньн, Баве ԝәйи Әʹзмана жи ԝе ԝә бьбахшинә. Ле һәгәр һун нәһәԛийед мәрьва нәбахшиньн, Баве ԝә жи нәһәԛийед ԝә набахшинә» (Мәт. 6:14, 15). Рʹасти жи чьԛас фәрз ә, ԝәки әм һьндава мәрьвада ӧса рʹәʹм бьн, ча Йаһоԝа у Иса һьндава мә! w20.04 22 ¶6

Паԝлосе шанди дина хԝә дьдайе, кӧ гӧһдарванед ԝирʹа чь ԝе һʹәԝас бә, у ль гора ве йәке әԝи щурʹе хәбәрдана хԝә дьгӧһаст. Мәсәлә, әʹлаләта Листрайе, тʹәви кʹижана Паԝлос хәбәр да, Ньвисаред Пироз рʹьнд ньзаньбун. Ләма жи Паԝлос тʹәви ԝан ӧса хәбәр дьда, ԝәки ԝанрʹа фәʹмдари бә. Әԝи дәрһәԛа тʹер-тʹьжәбуна бәре әʹрде хәбәр да у кӧ мәрьв ӧса һатьнә әʹфьрандьне, ԝәки жь әʹмьре хԝә ләзәте бьстиньн. Әԝи мәсәлә у гьлийед ӧса дьда хәбате, кӧ гӧһдарванед ԝи зу у һеса фәʹм кьн. Сәрԝахт бьн кӧ тедәрхьн һәла бона мәрьвед мьһала ԝәда чь һʹәԝас ә, у ль гора ве йәке щурʹе бәлакьрьна мьзгинийе бьгӧһезьн. Ле чахе кәсәк рʹасти ԝә те, йан һун незики мала кәсәки дьбьн, һун ча дькарьн тедәрхьн, кӧ ԝе чь жерʹа һʹәԝас бә? Дина хԝә бьдьнә һәр тьшти, бәʹса хәбәре, дьбәкә әԝ бахчә бещәр дькә, йан әʹрәба хԝә чедькә, йан жи тьштед дьн дькә. Һун дькарьн хәбәрдане дәстпекьн дәрһәԛа шьхӧле ԝи (Йуһʹн. 4:7). Һәла һе жи кʹьнще мерьв дькарә нишан кә, кӧ әԝ чь мьләт ә, йан пʹеше ԝи чь йә, йан жи кʹижан кʹома спорти бәгәм дькә. w20.04 11 ¶11-12

Һьнә хушк-бьред мә, йед кӧ емосйалида һʹаләки гьранда ньн, чахе жийина һәррʹожида тʹәви мәрьва нә, тʹәвһәв дьбьн у нәрʹьһʹәт ьн. Ԝанрʹа чәтьн ә һәрʹьнә ԝан щийа, кʹидәре гәләк мәрьв ьн, ле йәкә әԝана диса жи тенә щьвата у щьватед мәзьн. Ԝанрʹа нәһеса йә тʹәви мәрьвед нәнас бькʹәвьнә хәбәрдане, ле йәкә әԝана хьзмәтийеда тʹәви мәрьва хәбәр дьдьн, демәк шәʹдәтийе дьдьн. Һәрге тӧ жи ԝи һʹалида ни, бир нәкә тӧ тʹәне нини, чьмки гәләк хушк-бьра жи һʹаләки ӧсада ньн. Дӧдьли нәбә, дьле Йаһоԝа ша дьбә, кӧ тӧ чьԛас дькари бь дьл у щан жерʹа хьзмәт дьки. Әԝ йәк кӧ тӧ жь бо ԝан проблема нәшкәсти, избат дькә ԝәки Йаһоԝа тә кʹәрәм дькә у ԛәԝате дьдә тә (Фили. 4:6, 7). Һәрге сьһʹәт-ԛәԝата тәйә физики йан емосйали хьраб ә, у тӧ бәрдәԝам дьки Йаһоԝарʹа хьзмәт дьки, баԝәр бә ԝәки Йаһоԝа жь тә рʹази йә. Фьрԛи тʹӧнә сьһʹәт-ԛәԝата мә баш ә йан на, йәкә әм бәрдәԝам дькьн дьрʹәвьн (2 Корн. 4:16). Пе аликʹарийа Йаһоԝа әм гьшк жи дькарьн һʹәта финише бьрʹәвьн! w20.04 31 ¶20-21

Әм биланийа Хԝәде әшкәрә дьвиньн ве йәкеда, кӧ әԝи ча мала мә, демәк әʹрд чекьрийә (Ибрн. 3:4). Планета мә тʹәк ә ве йәкеда, кӧ һәр тьшт чь бона жийина мәрьва лазьм ә, сәр һәйә. Планета мә гәрдунеда мина гәмийе йә, йа кӧ сәр окйануса мәзьн дьчә. Ле фьрԛийед мәзьн һәнә ортʹа гәмийа бь мәрьва тʹьжә у әʹрде мә. Мәсәлә, бьфькьрьн, мәрьв сәр гәмийе чьԛас ԝәхт ԝе бькарьбьн бьжин, һәрге хԝәха хԝәрʹа оксижәне, хԝарьне у аве дәстхьн, у һьн жи һәрге нькарьбьн гәмаре у тьштед бәрмайи бавежьн окйанусе. Фәʹмдари йә, мәрьвед ве гәмийеда ԝе дьреж әʹмьр нәкьн. Ле сәр әʹрде бь милйарда мәрьв у һʹәйԝан дьжин. Әʹрд хԝәха оксижәне, хӧрәк у аве дьдә, у әԝ тьшт тʹӧ щар хьлаз набьн. Һьн жи рʹаст ә һʹәму гәмар у тьштед бәрмайи сәр әʹрде дьминьн, йәкә әʹрд диса жи бәдәԝ дьминә у баш ә бона жийине. Ле чьрʹа? Чьмки Йаһоԝа әʹрд ӧса чекьр, кӧ әв дькарә тьштед бәрмайи бькә тьштед керһати, кӧ диса жи дькарьн бьдьнә хәбате. w20.05 20 ¶3-4

Шәйтʹан әʹйан бӧхдан авитә сәр наве Хԝәде у готә Һеԝайе, ԝәки Йаһоԝа йәки дәрәԝин ә. Ӧса Шәйтʹан бу дьжмьн, йане бӧхданбеж. Һеԝа хальфи у баԝәрийа хԝә Шәйтʹан ани (1 Тимтʹ. 2:14). Әԝе һе зедә итʹбарийа хԝә ԝи ани, нә кӧ Йаһоԝа, ләма жи сафикьрьна лапә хьраб кьр. Һеԝайе гӧрʹа Йаһоԝа нәкьр у бәре даре хԝар, кʹижан кӧ Йаһоԝа ԛәдәхә кьрьбу, у паше Адәмрʹа жи да (Дәстп. 3:6). Бьфькьрьн кӧ Һеԝайе ча гәрәке щаба Шәйтʹан бьда. Бьдьнә бәр чʹәʹве хԝә һәрге әԝе ӧса бьгота: «Әз ньзаньм тӧ кʹе йи, ле әз Баве хԝә Йаһоԝа заньм у әз ԝи һʹьз дькьм у итʹбарийа хԝә ԝи тиньм. Әԝи һәр тьшт да мьн у Адәм. Тә ча изьн да хԝә кӧ дәрһәԛа ԝи тьштед хьраб бежи? Дури мьн һәрʹә!» Бьдьнә һʹәсабе хԝә, Йаһоԝа ԝе чьԛас шабуйа һәрге әԝи жь ԛиза хԝәйә һʹьзкьри, әԝ гьли бьбьһиста! (Мәтʹлк. 27:11) Ле Һеԝайе у ӧса жи Адәм бь дьл у щан Йаһоԝа һʹьз нәдькьрьн. Һьзкьрьна ԝан һьндава Йаһоԝа кем бу, ләма жи ԝана наве ԝи жь бӧхдан хԝәй нәкьрьн. w20.06 4 ¶10-11

Хушкед мә дь хьзмәта Йаһоԝада бь дьл у щан дьхәбьтьн, у бона ве йәке, әԝана һежайи пәсна нә. Мәсәлә, әԝана дь ише авакьрьн у хԝәйкьрьна авайед тʹәшкиләтеда дьхәбьтьн, пьштгьрийа кʹомед бь зьманед хәриб дькьн, Бәйтʹәлада хьзмәт дькьн, ише аликʹарикьрьна паши тʹәшԛәлед тʹәбийәте кʹомәке дьдьн, әʹдәбйәтед мә ԝәлдьгәрʹиньн у ԝәк пешәнг у мисйонер хьзмәт дькьн. Ӧса жи, хушкед мә али меред хԝә дькьн кӧ әԝана щабдарийед хԝә йед ль щьвате у ль тʹәшкиләте биньн сери. Бе аликʹарийа хушкед мә, ԝе бона ван бьра пʹьрʹ зор буйа кӧ жь бо мә ԝәк «пʹешкʹеш бь щурʹе мәрьва» хьзмәт бькьн (Әфәс. 4:8, ДТʹ). Хушкед мә бь рʹасти жи ордикә мәзьн ьн, йед кӧ мьзгине бь дьлхԝази у бь һостәйи бәла дькьн. Ӧса жи, рʹуспийед щьвате фәʹм дькьн кӧ хушкед амьн у щерʹьбанди дькарьн али хушкед щаһьл бькьн кӧ әԝ проблемед хԝә сафи бькьн (Тито 2:3-5). Бәле, хушкед мә бь рʹасти жи  һежайи пʹайа нә! w20.09 23-24 ¶13-14

Йаһоԝа бир накә ԝан мәрьва, йед кӧ жерʹа хьзмәт дькьрьн, ле ԝәʹдәлу жь щьмәʹта ԝи дур кʹәтьнә. Әԝ нә жи бир дькә кьред ԝан, кʹижан кӧ бона ԝи кьрьнә (Ибрн. 6:10). Ишайа пʹехәмбәр мәсәләкә ӧса дьлгәрми ани, кӧ дьдә кʹьфше ԝәки Йаһоԝа ча бона щьмәʹта хԝә хәм дькә. «Ԝе мина шьванәки пәзе хԝә бажо, бь баске хԝә ԝе бәрхька бьщьвинә» (Иша. 40:11). Ле Йаһоԝа ча Шьване Мәзьн, чь тʹәхмин дькә гава пәзәкә ԝи жь кәри дур дькʹәвә? Иса әʹйан кьр әԝ йәк гава пьрс да шагьртед хԝә: «Һун чаԝа тʹәхмин дькьн? Һәгәр сәд пәзед мәрьвәки һәбьн у йәк жь ԝан ӧнда бә, әԝе нод нәһа нәһелә чʹийабанийа у нәчә кӧ йа ӧндабуйи бьгәрʹә? Ле гава бьбинә, әз рʹаст ԝәрʹа дьбежьм, әԝе бона ԝе һе гәләки ша бә, нә кӧ бона нод нәһед дьнә кӧ ӧнда нәбунә» (Мәт. 18:12, 13). w20.06 19-20 ¶8-9

Һәр шьхӧле кӧ әм бона Йаһоԝа дькьн, бона мә ԛәдьр ә (Зәб. 27:4; 84:10). Һәрге бьра дьхԝазә щьватеда һе зедә щабдарийа бьстинә, әԝ һежайи пʹайа йә. Ле чахе әԝ щабдарийе дьстинә, гәрәке дәрһәԛа хԝә зедә нәфькьрә (Луԛа 17:7-10). Нета ԝи гәрәке әв бә, кӧ бь мьлукти бона һʹәԝщед кәсед дьн хәм бькә (2 Корн. 12:15). Кʹьтеба Пирозда һәнә мәсәлед ԝан мәрьва, йед кӧ бона хԝә зәʹф дьшьрмиш дьбун. Мәсәлә, Дийотрәфис йәки шкәсти нибу у хԝә «сәр һʹәмуйарʹа» дьгьрт (3 Йуһʹн. 9). Узийа жь бабахбуне тьштәки ӧса кьр, чь кӧ Йаһоԝа изьн нәдабу ԝи кӧ бькә (2 Дир. 26:16-21). Ле Абшалом дьхԝәст бьбуйа пʹадша у әԝи хԝә ӧса да кʹьфше, кӧ йан чь мәрьва һʹьз дькә, ԝәки әԝана пьшта ԝи бьгьрьн (2 Сам. 15:2-6). Әԝ сәрһатийед жь Кʹьтеба Пироз зәлал дьдьнә кʹьфше, ԝәки мәрьвед бабах кӧ дьхԝазьн бенә һӧрмәткьрьне, дьле Йаһоԝа хԝәш найен (Мәтʹлк. 25:27). У ахьрийеда әԝана рʹасти проблема тен (Мәтʹлк. 16:18). w20.07 4 ¶7-8

Һьнә малбәт сәва проблема дәрбази ԝәлатәки дьн бунә. Дьбәкә зарʹокед ԝан ида дьчьн мәкʹтәбе кӧ бь зьмане ви ԝәлати һинбуне бьстиньн. Ӧса жи, де у бав бәлки хирәт дькьн кӧ зьмане ну һин бьбьн жь бо кӧ әԝ карьбьн хԝәрʹа хәбатәке бьбиньн. Ле һәрге щьват йан кʹомәкә бь зьмане ԝан жи һәбә, гәло гәрәк әԝ һәрʹьн кʹижан щьвате? Гәло ԝе баш бә кӧ әԝ һәрʹьн щьватәкә бь зьмане ви ԝәлати йан щьватәкә бь зьмане хԝә? Гәрәке сәре малбәте сафи кә кӧ малбәт һәрʹә кʹижан щьвате. Әв йәк мәсәләкә шәхси йә, у гәрәке әԝ бьфькьрә кӧ жь бо малбәта ԝи чь ԝе баштьр бә. Ԛьрара ԝи чь бә жи, гәрәке әм ԛәдре ве малбәте бьгьрьн у ԝана бь дьл у щан щьвата хԝәда ԛәбул бькьн (Рʹом. 15:7). w20.08 30 ¶17-18

Һәрге әм дьхԝазьн ԛәԝате жь Хԝәде бьстиньн, әԝ йәк гьредайи нинә тʹәви сьһʹәт-ԛәԝат, хԝәндьн, култура мә у һәбуке. Йаһоԝа нә сәва ԝан тьшта мә ԛәбул дькә. Мәсәлә, гәләк хьзмәткʹаред Хԝәде «нә сәрԝахт бунә, жь ԝә гәләк дьнеда нә зор бунә у нә жи жь ԝә гәләк малед рʹәнгинда бунә» (1 Корн. 1:26). Һәрге әԝ һʹәму тьшт чь кӧ мә гот, бал мә тʹӧнә, әԝ найе һʹәсабе ԝәки әм нькарьн Йаһоԝарʹа хьзмәт кьн. Дәԝсе әм ве йәке һʹәсаб дькьн ча мәщал, кӧ ԛәԝата Хԝәде сәр хԝә тʹәхмин кьн. Мәсәлә, һәрге әм жь ԝан мәрьва дьтьрсьн, йед кӧ баԝәрийа мә дькьнә бьн шьке, әм гәрәке Йаһоԝарʹа дӧа бькьн, ԝәки мерхасийе бьдә мә, кӧ әм бькарьбьн баԝәрийа хԝә бьпарезьн (Әфәс. 6:19, 20). Һәрге нәхԝәшийа ԝәйә кʹроники һәйә, Йаһоԝарʹа дӧа бькьн ԝәки ԛәԝате бьдә ԝә кӧ һун чьԛас дькарьн ԝирʹа хьзмәт кьн. Һәр щар чахе һун аликʹарийа Хԝәде бьвиньн, баԝәрийа ԝә ԝе дьһа ԛәԝи бә у һуне һе бьшьдьн. w20.07 16 ¶9

Һәрге әм дьхԝазьн Пʹадшатийа Хԝәде жийина хԝәда дайньн щийе пешьн у дьле Йаһоԝа ша бькьн, гәрәке әм ԝәк Бьраһим фәдакʹар бьн (Марԛ. 10:28-30; Ибрн. 11:8-10). Нәфькьрә кӧ жийина тә ԝе бедәрд бә. Илаһи кәсед кӧ тʹәмамийа әʹмьре хԝә хьзмәта Йаһоԝада дәрбаз дькьн жи, рʹасти проблема тен (Аԛуб 1:2; 1 Пәт. 5:9). Иро гәләк сәбәб һәнә кӧ әм дина хԝә бьдьн һевийа хԝә. Һʹале дьнйайе зәлал нишан дькә кӧ әм ида гьһиштьнә рʹожед ахьрийе йед ве дьнйайе. Йәк жь кʹәрәмед кӧ әме Пʹадшатийа Хԝәдеда бьстиньн әв ә, кӧ һʹьзкьрийед мә ԝе жь мьрьне рʹабьн. Ԝе дәме, Йаһоԝа ԝе Бьраһим у малбәта ԝи жи жь мьрьне рʹакә. Гәло тӧйе жи ԝан кʹәрәма бьвини? Һәгәр тӧ һазьр и кӧ ԝәк Бьраһим жь бо Пʹадшатийа Хԝәде ԛӧрбана бьки, амьнийа хԝә нава проб-лемада хԝәй бьки у бь сәбьр һивийа Йаһоԝа бьмини, тӧйе ԝан кʹәрәма бьбини! (Миха 7:7) w20.08 5-6 ¶13-14; 7 ¶17

Әм заньн кӧ һәрге әм бен кӧштьн жи, Йаһоԝа ԝе мә жь мьрьне рʹакә. Әм баԝәр ьн кӧ тʹӧ тьшт нькарә мә жь Йаһоԝа у жь һʹьзкьрьна ԝи вәԛәтинә (Рʹом. 8:35-39). Әв йәк кӧ Йаһоԝа һевийа рʹабуне дайә мә, нишан дькә кӧ биланийа ԝи чьԛас мәзьн ә! Бь сайа ве һевийе, Йаһоԝа мә жь тьрса мьрьне дьфьльтинә у мерхасийа мәзьн дьдә мә. Һәрге дьжмьнед Йаһоԝа тә бьтьрсиньн у бежьн кӧ әԝе тә бькӧжьн, гәло тӧйе хԝә бьспери Йаһоԝа? Тӧ чаԝа дькари бьзаньби кӧ баԝәрийа тә чьԛас ԛәԝи йә? Мәсәлә, жь хԝә бьпьрсә: «Гәло ԛьраред бьчʹук, йед кӧ әз һәр рʹож дьдьм, нишан дькьн кӧ әз хԝә дьсперьм Йаһоԝа?» (Луԛа 16:10) Пьрсәкә дьн жи әв ә: «Гәло ԛьраред мьн избат дькьн кӧ әз баԝәрийа хԝә бь созе Йаһоԝа тиньм кӧ һәрге әз һәри зедә Пʹадшатийа ԝи бьгәрʹьм, Йаһоԝа ԝе бона һʹәму һʹәԝщед мьн хәм бькә?» (Мәт. 6:31-33) Һәрге щаба тә «Әре» йә, әв йәк нишан дькә кӧ тӧ жь бо һʹәму тәнгасийа һазьр и (Мәтʹлк. 3:5, 6). w20.08 17-18 ¶15-16

Ԝәки әм бьбьн мамостәйед баш, гәрәке әм Хәбәра Хԝәде һәр тʹьм бьдьнә хәбате. Әм һьлбәт дькарьн дь щьвинада һьнә һʹӧнӧра һин бьн. Ле бәле, һәгәр әм дьхԝазьн кәсед дьн бьдьнә баԝәркьрьне кӧ готьнед Кʹьтеба Пироз бона ԝан керһати нә, гәрәке әм бәрдәԝам кьн Кʹьтеба Пироз леколин бькьн. Сәва кӧ баԝәрийа мә һе ԛәԝи бә, гәрәке әм Хәбәра Хԝәде рʹьнд бьдьнә хәбате. Бәс нинә кӧ әм Кʹьтеба Пироз тʹәне бьхуньн. Гәрәке әм кʹур бьфькьрьн у дь әʹдәбйәтед мәда легәрʹине бькьн, ԝәки Ньвисаред Пироз рʹаст фәʹм бькьн у бь кʹар биньн (1 Тимтʹ. 4:13-15). Бь ви аԝайи, әме бькарьбьн рʹастийе бь аликʹарийа Хәбәра Хԝәде кәсед дьн һин бькьн. Жь бо ве, бәс нинә кӧ әм рʹеза тʹәне гӧһдаред хԝәрʹа бьхуньн. Гәрәке әм али ԝан бькьн кӧ әԝ манәйа рʹеза фәʹм бькьн у те дәрхьн кӧ готьнед рʹеза жь бо ԝан чьма керһати нә. Бь сайа леколина шәхси, әм дькарьн һʹӧнӧред хԝә йед жь бо һинкьрьна Кʹьтеба Пироз чьԛас дьчә зедә бькьн (2 Тимтʹ. 3:16, 17). w20.09 28 ¶12

Йаһоԝа али мә дькә кӧ әм дина хԝә бьдьн ише бәлакьрьна мьзгине. Мәсәлә, бь сайа аликʹарийа Йаһоԝа, әм гәләк әʹдәбйәтед нәшьркьри у әләктроник, аудио-видео у бәрнамәйед Интернете дьстиньн. Сәр малпәра мә, бь зедәтьри 1 000 зьмани әʹламәти һәйә! (Мәт. 24:45-47) Ӧса жи, ԝе баш бә кӧ әм Иса Мәсиһ хԝәрʹа бькьн мәсәлә. Әԝи тʹӧ щара изьн нәдьда кӧ тьштәк дина ԝи жь бәлакьрьна мьзгине бькʹьшинә сәр тьштәки дьн (Йуһʹн. 18:37). Гава Мире-щьна «һʹәму пʹадшатийед дьнйайе у рʹумәт у бәдәԝийа ԝан» Исарʹа нишан кьр у гава мәрьва дьхԝәст әԝ бькьра пʹадша, әԝи әв йәк ԛәбул нәкьр (Мәт. 4:8, 9; Йуһʹн. 6:15). Әԝ нәдькʹәт пәй мал у мьлкʹ, у мьԛабьлибуна дьжмьна нькарьбу әԝ бьда сәкьнандьн (Луԛа 9:58; Йуһʹн. 8:59). Чахе баԝәрийа мә те щерʹьбандьн, ԝе баш бә кӧ әм ширәта Паԝлосе шанди биньн бира хԝә жь рʹеза йа рʹожа иройин. w20.09 9-10 ¶6-7

Әм чьԛас ша нә кӧ щьватед мәда һаԛас хушкед бьхирәт һәнә! Әԝана бь дьл у щан щьватеда щаба дьдьн у дәрдькʹәвьн хьзмәте. Һьнә жь ԝан шьхӧле хԝәйкьрьна Ода Щьватеда аликʹарийе дьдьн, у әԝана бона хушк у бьра хәм дькьн. Әԝана һьлбәт рʹасти һьнә тәнгасийа жи тен. Һьнә хушкед мә ль де у баве хԝә дьньһерʹьн. Һьнәк жь алийе мәрьвед хԝәва рʹасти зӧлме тен. Һьнәк жи хԝәха әʹбура хԝә дькьн у зарʹед хԝә мәзьн дькьн. Чьма фәрз ә кӧ әм пьштгьрийа хушка бькьн? Ль дьнйайе, гәләк кәс ԛәдре жьна нагьрьн. Ле Кʹьтеба Пироз дьбежә кӧ гәрәке әм ԛәдре ԝан бьгьрьн у пьштгьрийа ԝан бькьн. Мәсәлә, Паԝлосе шанди жь щьвата Рʹомайерʹа готьбу кӧ бьра әԝ Фибийе «ԛәбул бькьн у чь һʹәԝщәдарийа ԝе» һәбә, «аликʹарийа ԝе бькьн» (Рʹом. 16:1, 2, ИМ). Паԝлос  култура ӧсада мәзьн бьбу, кӧ жьн ньмьз дьһатьн дитьн. Ле паши кӧ Паԝлос бу шагьрте Иса Мәсиһ, әԝи чʹәʹв дьда Иса, у ԛәдре жьна дьгьрт. w20.09 20 ¶1-2

Сәва кӧ әм али хԝәндәкʹаред хԝә бькьн кӧ хԝәстьна ԝан пешда бе ԝәки әԝана жи мьзгине бәла бькьн, әм дькарьн жь хԝәндәкʹаре хԝә бьпьрсьн: «Мьзгина Пʹадшатийе ль сәр жийана тә чаԝа һʹӧкӧм кьрийә? Бь дитьна тә, гәло кәсед дьн жи һʹәԝщә нә кӧ ве мьзгине бьбьһен? Тӧ чаԝа дькари али ԝан бьки?» (Мәтʹлк. 3:27; Мәт. 9:37, 38) Бир нәкә кӧ Иса Мәсиһ готьбу кӧ гәрәке әм «һʹәму тʹәмийед» кӧ әԝи дайә мә, мәрьва һин бькьн. Дь нав ван тьштада, тʹәмийед һәри мәзьн жи һьлбәт һәнә – кӧ гәрәке әм Хԝәде у инсана һʹьз бькьн. Әв һәр дӧ тʹәми жи бь ише бәлакьрьна мьзгине у ише шагьрткьрьнева гьредайи йә (Мәт. 22:37-39). Һʹьзкьрьн йәк жь сәбәба һәри мәзьн ә кӧ әм мьзгине бәла дькьн. Һьнә хԝәндәкʹаред Кʹьтеба Пироз дьтьрсьн мьзгине бәла бькьн. Ле бәле, әм дькарьн ԝана бьдьн баԝәр кьрьн кӧ бь аликʹарийа Йаһоԝа, әԝе ԝәʹдә шунда жь ве тьрсе бьфьльтьн (Зәб. 18:1-3; Мәтʹлк. 29:25). w20.11 3 ¶6-8

Гава тӧ бона һинбуна Кʹьтеба Пироз хԝә һазьр дьки, дәрһәԛа хԝәндәкʹар у һʹәԝщәдарийед ԝи дӧа бькә. Аликʹарийе жь Йаһоԝа бьхԝазә кӧ тӧ бькарьби Кʹьтеба Пироз бь аԝайәки баш һин бьки у бьгьһини дьле хԝәндәкʹар. Бир нәкә кӧ тӧ дьхԝази али ԝи бьки кӧ әԝ бәрбь ньхӧмандьне һәрʹә. Хԝәндәкʹар ӧса жи гәрәке һәр рʹож гӧһ бьдә Йаһоԝа у ԝирʹа хәбәр дә. Гәло әԝ чаԝа дькарә дәнге Йаһоԝа бьбьһе у гӧһ бьдә ԝи? Бона ве йәке, гәрәке әԝ Кʹьтеба Пироз һәр рʹож бьхунә (Йешу 1:8; Зәб. 1:1-3). Әԝ дькарә һәр рʹож дӧа бькә у бь ви аԝайи тʹәви Йаһоԝа хәбәр дә. Ләма жи дәстпекеда у хьлазийа һәр дәрседа жь дьл дӧа бькә, у дӧада бәʹса хԝәндәкʹаре хԝә бькә. Гава әԝ дӧайед тә дьбьһе, әԝе һин бьбә кӧ әԝ чаԝа дькарә бь наве Иса Мәсиһ дӧа бькә у дьле хԝә Йаһоԝарʹа вәкә (Мәт. 6:9; Йуһʹн. 15:16). Бәле, һәгәр хԝәндәкʹар Кʹьтеба Пироз һәр рʹож бьхунә (демәк гӧһ бьдә Йаһоԝа) у дӧа бькә (демәк Йаһоԝарʹа хәбәр дә), әԝе һәр кӧ дьчә һе незики Хԝәде бьбә (Аԛуб 4:8). w20.10 8 ¶8; 9 ¶10-11

Мина шагьртед Иса йед кӧ ль ԛьрʹна йәке дьжитьн, тʹәшкиләта Йаһоԝа йа иройин жи дьхԝазә бь тʹәрбәт у маԛул бә (Кʹар. Шанд. 16:4, 5). Мәсәлә, һәгәр тӧ бона Һинбуна «Бьрща Ԛәрәԝьлийе» бьчуйайи щьватәкә дьн, бәлки жи ль ԝәлатәки дьн, ль ԝе дәре, тәйе хԝә рʹьһʹәт тʹәхмин бькьра, чьмки тәйе бь зәлали бьзаньбуйа кӧ щьвин ԝе чаԝа дәрбаз бьбә у кʹижан готар ԝе бе леколин кьрьн. Тʹәне рʹӧһʹе Хԝәде дькарә йәктикә ӧса нава тʹәшкиләтеда хԝәй бькә (Сефн. 3:9). Тӧ дькари чь бьки? Жь хԝә бьпьрсә: «Гәло әз әʹдьлайийе у йәктийа щьвате хԝәй дькьм? Гәло әз гӧһ дьдьм бьред щабдар? Гәло әз йәки бь итʹбар ьм, илаһи һәгәр дь щьватеда щабдарийед мьн һәнә? Гәло әз һәр тьшти ԝәхтда дькьм у һазьр ьм кӧ хьзмәт бькьм?» (Аԛуб 3:17) Һәгәр тӧ тедәрхи кӧ гәрәке тӧ дь һьнә алийада хԝә рʹаст бьки, дӧа бькә ԝәки Йаһоԝа рʹӧһʹе пироз бьдә тә. Чьԛас тӧ изне бьди кӧ рʹӧһʹе пироз ль сәр хәйсәт у кьред тә һʹӧкӧм бькә, һаԛас хушк у бьра ԝе һе зедә тә ԛимәт кьн у һʹьз бькьн. w20.10 23 ¶12-13

Хәбәра Хԝәде бәрамбәри нәйнькәке дьбә (Аԛуб 1:23-25). Сьбәһе, пешийа кӧ әм жь мале дәрдькʹәвьн, ма әм дь нәйнькеда ль хԝә наньһерʹьн? Бь ви аԝайи, әм дьвиньн кӧ гәрәке әм чь рʹаст бькьн пешийа кӧ кәсед дьн мә бьвиньн. Мина ве йәке, һәгәр әм Кʹьтеба Пироз һәр рʹож бьхуньн, әме бьвиньн кӧ гәрәке әм кʹижан ньһерʹандьн у фькред хԝә рʹаст бькьн. Гәләк хушк у бьра һәр сьбәһе рʹеза рʹоже дьхуньн пешийа кӧ әԝ жь мале дәрдькʹәвьн. Паше, әԝ тʹәмамийа рʹоже дьфькьрьн кӧ әԝ чаԝа дькарьн ве ширәта Хәбәра Хԝәде пек биньн. Ӧса жи, гәрәке әм хԝәрʹа бәрнамәкә леколине чекьн, Хәбәра Хԝәде һәр рʹож бьхуньн у ль сәр ԝе кʹур бьфькьрьн. Дьбәкә әм дьфькьрьн әԝ тьштед һеса нә, ле бь рʹасти гәләк фәрз ә ԝан тьшта бькьн, ԝәки әм ль сәр рʹийа жийане бьминьн. Хәбәра Хԝәде ԝәк рентгене йә, йа кӧ нишани мә дькә кӧ нав дьле мәда чь һәйә. Ле бәле, сәва кӧ әм ширәтед Кʹьтеба Пироз у йед тʹәшкиләта Хԝәде ԛәбул кьн у кʹаре бьстиньн, гәрәке әм мьлук бьн. w20.11 18 ¶3; 20 ¶8

Ль ԛьрʹна йәке, шагьртед Иса пʹьр зӧлм дьдит, ле бәле щарьна, ԝана рʹожед рʹьһʹәт жи дьдитьн. Гәло ԝана дь дәма аштийеда чь дькьр? Ван шагьртед амьн мьзгина Пʹадшатийе «бь тьрса Хӧдан» у бе сәкьнандьн бәла дькьр. Кʹьтеба Кʹаред Шандийада те готьне кӧ әԝ «бь тьрса Хӧдан пешва дьчун». Ахьрийеда, шагьртед Иса чьԛас дьчу «зедә дьбун». Әшкәрә йә кӧ Йаһоԝа ише кӧ ԝан дь дәма аштийеда дьани сери, бьбәрәкʹәт дькьр (Кʹар. Шанд. 9:26-31). Шагьртед Иса йед пешьн һʹәму мәщал дьда хәбате кӧ мьзгине бәла бькьн. Мәсәлә, гава Паԝлосе шанди ль бажаре Әфәсе бу, әԝи дит кӧ бона бәлакьрьна мьзгине дәрики мәзьн вәбу, у әԝи әв мәщал бь кʹар ани кӧ мьзгине бьдә гәләк мәрьва у ԝана бькә шагьртед Иса (1 Корн. 16:8, 9). Шагьртед Иса пʹьр хирәт кьр кӧ «хәбәра Хӧдан һин дькьрьн у даннасин дькьрьн» (Кʹар. Шанд. 15:30-35). Ахьри чь бу? Рʹеза йа рʹожа иройин щаб дьдә. w20.09 16 ¶6-8

Гава Адәм гӧнә кьр, ԝи бәла ани сәр хԝә у сәр зарʹед хԝә. Әм жи ахьрийа хьраб йа нәгӧһдарийа ԝи дькʹьшиньн. Ле бәле, бь сайа ве йәке кӧ Хԝәде Кӧрʹе хԝә жь мьрьне рʹакьр, әм дькарьн жь ви һʹали бьфьльтьн. «Бь мәрьвәки жи ԝе рʹабуна мьрийа бьбә», демәк бь Иса Мәсиһ. Паԝлос ӧса гот: «Чаԝа һʹәмуйед жь Адәм буйи дьмьрьн, ӧса жи һʹәмуйед жь Мәсиһ буйи ԝе сах бьн» (1 Корн. 15:22). Гава Паԝлос гот кӧ «һʹәмуйед жь Адәм буйи дьмьрьн», әԝи бәʹса кʹе дькьр? Бь ван готьна, Паԝлос бәʹса зарʹед Адәм дькьр, йед кӧ гӧнә у ԛьсурдари жь Адәм миратʹ стандьнә у ләма дьмьрьн (Рʹом. 5:12). Адәм ԝе жь мьрьне нәйе рʹакьрьн. Ԛӧрбана Иса Мәсиһ гӧне Адәм данадә, чьмки Адәм мәрьвәки беԛьсур бу, йе кӧ бь һʹәмде хԝә гӧһ нәда Хԝәде. Ԝәк ‹бьзьнед› кӧ ԝе диԝана мьрьна һәр-һәйи бьстиньн, Адәм жи ԝе тʹӧ щара жь мьрьне рʹанәбә (Мәт. 25:31-33, 46; Ибрн. 5:9). w20.12 5 ¶13-14

Һәгәр әм щабдарики настиньн, дәрһәԛа мәләкед амьн бьфькьрьн. Ль дәма Аһаб Пʹадша, Йаһоԝа мәләка пьрси кʹа ԝана ԝе әв пʹадше хьраб чаԝа бьхапанда. Чәнд мәләка фькред хԝә готьн. Ле бәле, Хԝәде тʹәне йәк жь ԝан бьжарт у ԝирʹа гот кӧ фькра ԝи баш ә (1 Пʹадш. 22:19-22). Гәло мәләкед дьн әʹщьз бун у фькьрин кӧ хирәта ԝан бадиһәԝа бу? Һьлбәт на! Мәләк бь рʹасти мьлук ьн, у әԝана дьхԝазьн кӧ Йаһоԝа һʹәму пәсна бьстинә (Һʹакьм. 13:16-18; Әʹйан. 19:10). Бир нәкә ԝәки әԝ ԛәдьрәки мәзьн ә кӧ наве Хԝәде ль сәр мә йә у әм мьзгина Пʹадшатийа Хԝәде әʹлам дькьн. Әм дькарьн һьнә кʹьфшкьрьнед мәхсус бьстиньн йан жи ӧнда бькьн, ле бәле бона Йаһоԝа, тьште һәри фәрз әв ә кӧ әм мьлук бьн у синоред хԝә бьзаньбьн. Һәгәр әм мәрьвед ӧса бьн, һьм Йаһоԝа һьм жи хушк у бьред мә ԝе мә һʹьз бькьн. Ләма, жь Йаһоԝа аликʹарийе бьхԝазә кӧ тӧ мьлук бьмини. Сәрһатийед мәрьвед дьлньмьз, йед кӧ ль Кʹьтеба Пироз һатьнә ньвисандьн, бинә бәр чʹәʹве хԝә. Ише кӧ гәрәке тӧ бьки чь бә жи, ви иши бь дьл у щан бона кʹара хушк у бьра пек бинә (1 Пәт. 5:5). w20.12 26 ¶16-17

Кʹӧмзьрьһʹа хьлазбуне те һʹәсабе һевийа кӧ Йаһоԝа дьдә – һевийа кӧ әԝ ԝе мә жь мьрьне аза бькә у кӧ әԝ ԝе һәр кәсе кӧ хԝәстьна ԝи пек тинә, хәлат бькә (1 Тʹесалоники 5:8; 1 Тимотʹейо 4:10; Тито 1:1, 2). Һевийа хьлазбуне жи һʹьше мә хԝәй дькә. Әв али мә дькә кӧ әм дина хԝә бьдьн созед Хԝәде у һьмбәри проблема бь зедәйи бәрхԝә нәкʹәвьн. Әм ви кʹӧмзьрьһʹи ль хԝә дькьн, гава фькред хԝә ль гора фькред Хԝәде дькьн. Мәсәлә, гәрәке әм «гӧмана хԝә нәдьнә сәр һәбука пʹучʹә дәрәԝ, ле ль сәр Хԝәдейе кӧ һәр тьшти бь мәрʹдани дьдә мә» (Зәбур 26:2; 104:34; 1 Тимотʹейо 6:17). Шуре рʹӧһʹ те һʹәсабе Хәбәра Хԝәде, демәк Кʹьтеба Пироз. Әв шур дькарә дәрәԝа «жекә» у мәрьва жь хӧламтийа баԝәрийед ԛәлп у әʹдәтед хьраб хьлаз кә (2 Корьнтʹи 10:4, 5; 2 Тимотʹейо 3:16, 17; Ибрани 4:12). Бь сайа леколина шәхси у һинбуна кӧ әм жь тʹәшкиләта Хԝәде дьстиньн, әм һин дьбьн кӧ ви шури бь һостәти бьдьнә хәбате (2 Тимотʹейо 2:15). w21.03 27 ¶4; 29 ¶10-11

Гава Йуһʹәнна гьрти бу, чьмки мьзгина дәрһәԛа Иса Мәсиһ бәла дькьр, әԝи диса жи бона кәсед дьн хәм дькьр. Мәсәлә, Йуһʹәнна кʹьтеба Әʹйанти ньвиси у чәнд щьватарʹа шанд, ԝәки әԝана дәрһәԛа «тьштед кӧ гәрәке зутьрәке бьԛәԝьмьн» бьзаньбьн (Әʹйанти 1:1). Дьԛәԝьмә паши кӧ әԝ жь Патмосе аза бу, әԝи һьнге кʹьтеба хԝә дәрһәԛа жийан у хьзмәта Иса Мәсиһ ньвиси. Ӧса жи, әԝи се нәʹмә ньвисин, ԝәки хушк-бьра һелан бькә у ԝана ԛәԝи бькә. Тӧ дькари фәдакʹарийа Йуһʹәнна хԝәрʹа бьки мәсәлә, у избат ки кӧ тӧ инсана һʹьз дьки, у әв йәк ԝе ль сәр сафикьрьнед тә һʹӧкӧм бькә. Дьнйа Шәйтʹан дьхԝазә кӧ тӧ ԝәхт у ԛәԝата хԝә тʹәне бона кʹара хԝә бьди хәбате. Система иройин мәрьва һелан дькә кӧ әԝ бькʹәвьн пәй мал у мьлкʹ йан жи пәй наве хԝә. Ле бәле, сәр тʹәмамийа дьнйайе, мьзгинванед фәдакʹар чь жь дәсте ԝан те дькьн кӧ мьзгине бәла бькьн у али мәрьва бькьн ԝәки әԝана незики Йаһоԝа бьн. w21.01 10 ¶9-10

Рʹаст ә Йонатʹан кӧрʹе Шаԝул Пʹадша бу, ле әԝ нәдьфькьри кӧ гәрәке әԝ бьбә пʹадша, у әԝи чʹәʹвнәбарийа Даԝьд нәдькьр (1 Самуйел 20:31). Йонатʹан мәрьвәки мьлук бу, у әԝ Йаһоԝарʹа амьн бу. Ләма, әԝи ԛьрара Йаһоԝа ԛәбул кьр кӧ гәрәке Даԝьд бьбә пʹадша, у әԝи пьштгьрийа Даԝьд дькьр. Ԝәхта кӧ Шаԝьл ль сәр Йонатʹан һерс кʹәт, әԝ диса жи Даԝьдрʹа амьн ма (1 Самуйел 20:32-34). Йонатʹан Даԝьд һʹьз дькьр, ләма әԝи һʹәвсуди ԝи нәдькьр у тʹәви ԝи нәдькʹәтә һʹӧщәте. Йонатʹан тирванәки һостә у әскәрәки мерхас бу. Мина баве хԝә Шаԝул, Йонатʹан «жь ԛәртәла жиртьр, жь шера хӧрттьр [ԛәԝаттьр] бу» (2 Самуйел 1:22, 23). Әшкәрә йә кӧ гәләк сәбәб һәбун кӧ Йонатʹан пәсне әʹгитийа хԝә бьда. Ле бәле, Йонатʹан чʹәʹвнәбарийа сәркʹәтьнед Даԝьд нәдькьр. Даԝьд йәки мерхас бу у хԝә дьспарт Йаһоԝа. Паши кӧ әԝи Голйатʹ кӧшт, Йонатʹан ԝирʹа һʹәйран ма, у әԝана бун достед һәв. w21.01 21 ¶6; 22 ¶8-9

Һʹәму шагьртед Иса Мәсиһ бьн сәритийа ԝийә беԛьсурда ньн. Ле гава жьн мер дькә, әԝ дькʹәвә бьн сәритийа мерәки ԛьсурдар. Әв йәк щарна зәʹмәт ә. Ләма пешийа кӧ хушкәк мер кә, ԝе баш бә кӧ әԝ жь хԝә бьпьрсә: «Гәло әв бьра ԝе бона малбәте бьбә сәрәки баш? Гәло һʹәбандьна Йаһоԝа жийана ԝида щийе пешьн дьгьрә? Һәгәр на, әз жь кʹӧ заньм кӧ паше гава әм бьзәԝьщьн, әԝе жь алийе рʹӧһʹанива сәритийа малбәте бькә?» Ԝе һьлбәт баш бә кӧ хушк дәрһәԛа хԝә жи һьнә пьрса бьпьрсә: «Гәло чь һʹӧнӧред мьн йед баш һәнә? Гәло әз йәкә бь сәбьр у дәствәкьри мә? Гәло достийа мьн тʹәви Йаһоԝа ԛәԝи йә?» (Ԝаиз 4:9, 12) Һәгәр жьнькәк пешийа зәԝаще сафикьрьнед баш бькә, әԝе зәԝаща хԝәда дьһа бәхтәԝар бә. Бь милйона хушкед мә сәритийа меред хԝә ԛәбул дькьн. Ләма жи әԝана һежайи пʹайа нә! w21.02 8 ¶1-2

Ван сала, гәләк мьзгинвана дәстпекьрьнә зьманәки ну һин бьн, жь бо кӧ әԝ хьзмәта хԝә зедә бькьн у дәрбази щьватәкә дьн бунә, йа кӧ һе зедә һʹәԝщәйи мьзгинвана йә. Әв шагьртед Иса ве сафикьрьна шәхси дькьн кӧ бькарьбьн һе зедә Йаһоԝарʹа хьзмәт бькьн. Дьбә кӧ гәләк сал дәрбаз бьн һʹәта кӧ әԝ зьмане нуда һостә бьн, ле әԝ диса жи бь гәләк аԝайа аликʹарийа щьвате дькьн. Щерʹьбандьн у һʹӧнӧред ԝан йед баш, щьвате жь алийе рʹӧһʹанива ава дькьн. Ма әм пʹьрʹ ԛимәте надьн ван хушк у бьрайед фәдакʹар? Әв йәк кӧ бьрайәк зьмане щьвате баш ньзанә гәрәк нәбә сәбәб, кӧ кʹома рʹуспийед щьвате ԝи ԝәк бәрдәстийе щьвате йан рʹуспи кʹьфш нәкьн. Гәрәке рʹуспийед щьвате нә ль гора ве йәке кӧ бьрайәк зьмане щьвате чьԛас баш занә, ле ль гора принсипед Кʹьтеба Пироз сафи бькьн кʹа әԝ һазьр ә кӧ бьбә бәрдәстийе щьвате йан рʹуспийе щьвате (1 Тимтʹ. 3:1-10, 12, 13; Тито 1:5-9). w20.08 30 ¶15-16

Һьнә кәс дьфькьрьн кӧ һәгәр сьһʹәта ԝан баш бә, пʹәре ԝан гәләк бә у малбәта ԝанда әʹдьлайи һәбә, әԝ йәк бәс ә кӧ мәрьв бәхтәԝар бә. Ле шабуна бәʹса кʹижани кӧ Аԛуб дькьр, пʹарәкә «бәре рʹӧһʹ» ә у һʹале мәва гьредайи нинә (Галати 5:22). Мәсиһи шабуне дьстинә у бәхтәԝар ә, чьмки занә кӧ әԝ чʹәʹв дьдә Иса у дьле Йаһоԝа ша дькә (Луԛа 6:22, 23; Колс. 1:10, 11). Чаԝа кӧ алава һӧндьре ләмпеда те парастьн ԝәки нәтәмьрә, әв шабун жи ӧса дьле Мәсиһида дьшьхӧлә. Гава сьһʹәт-ԛәԝата ԝан хьраб дьбә йан пʹәре ԝан наминә, диса жи әв шабуна ԝан натәмьрә. Ӧса жи, зерандьн у ԛәрфед мәрьва нькарьн ве алаве бьтәмьриньн. Сәрда жи, гава дьжмьн дьхԝазьн кӧ ве алаве бьтәмьриньн, әв алав дьһа гӧрʹ дьбә. Чахе әм сәва баԝәрийа хԝә рʹасти тәнгасийа тен, әв йәк избат дькә кӧ әм бь рʹасти шагьртед Иса Мәсиһ нә (Мәтта 10:22; 24:9; Йуһʹәнна 15:20). Ләма Аԛуб дькарьбу ԝан хәбәред жь рʹеза ве рʹоже бьньвисийа. w21.02 28 ¶6

Гәләк рʹезед Кʹьтеба Пироз нишан дькьн кӧ һәгәр әм рʹьһʹәт бьминьн у итʹбарийа хԝә Йаһоԝа биньн, әме ԛәԝат бьн. Гава әм Кʹьтеба Пироз дьхуньн у рʹасти рʹезед ӧса тен, ԝе баш бә кӧ әм ԝан әʹзбәр бькьн. Бона ве йәке, дьбәкә баш бә кӧ әм ван рʹеза бь дәнге бьльнд бьхуньн. Йан жи, әм дькарьн ԝана бьньвисьн у гәләк щара бьхуньн. Йаһоԝа Йешурʹа готьбу кӧ бьра әԝ кʹьтеба Ԛануне һәртʹьм бь дәнге ньмьз бьхунә, ԝәки әԝ билан бә. Әв рʹебәри ԝе али ԝи бькьра кӧ әԝ щабдарийа хԝә бетьрс пек бинә (Йешу 1:8, 9). Дь ве дьнйайеда, гәләк инсан сәва проблемед хԝә хәма дькʹьшиньн у дьтьрсьн. Гава әм рʹасти тәнгасийед ӧса тен, готьнед Хәбәра Хԝәде дькарьн али мә бькьн кӧ һʹьш у дьле мә рʹьһʹәт бә (Зәбур 27:1-3; Мәтʹәлок 3:25, 26). Ль щьвина, әм жь рʹебәрийа кӧ жь сене те дайин, жь щабед гӧһдара у жь хәбәрдана тʹәви хушк-бьра, кʹаре дьстиньн (Ибрани 10:24, 25). Ӧса жи, әм дькарьн дьле хԝә хушк-бьред амьнрʹа вәкьн. w21.01 6 ¶15-16

Мьлук бьминә у тʹьме хԝә бьсперә Йаһоԝа. Ԝәхта кӧ тӧ һати ньхӧмандьне, тә баԝәрикә мәзьн әʹйан дькьр у тә хԝә дьспарт Йаһоԝа. У Йаһоԝа тӧ дь малбәта хԝәда ԛәбул кьри. Ньһа жи гәләк фәрз ә кӧ тӧ бәрдәԝам ки хԝә бьспери ԝи. Гава тӧ сафикьрьнед гәләк фәрз дьки, һьлбәт һеса йә кӧ тӧ баԝәрийа хԝә Йаһоԝа бини. Ле гава тӧ сафикьрьнед һәррʹожи дьки, тӧ һьнге жи рʹебәрийа Йаһоԝа дьгәрʹи? Мәсәлә, гава тӧ хԝәрʹа хәбатәки дьгәрʹи, ԝәʹдәдәрбазкьрьне дьжбери йан жь хԝәрʹа нета датини, тʹӧ щар хԝә нәсперә аԛьле хԝә. Принсипед Кʹьтеба Пироз бьгәрʹә, йед кӧ ԝе али тә бькьн ԝәки тӧ сафикьрьнед рʹаст бьки, у пәй ԝан принсипа һәрә (Мәтʹәлок 3:5, 6). Һәгәр тӧ ӧса бьки, тӧйе дьле Йаһоԝа ша бьки у бона хушк-бьра бьби мәсәла баш. Ча һәр кәс, һьлбәт тӧ жи щарна шашийа дьки. Ле әв йәк гәрәке рʹийа тә нәгьрә кӧ хьзмәтийа хԝәда хирәт би. w21.03 6 ¶14-15

Дьԛәԝьмә нәфәред тә мьԛабьли тә дәртен, йан жи шьхӧлед Шәʹдед Йаһоԝа ԝәлате тәда һатьнә ԛәдәхәкьрьн. Һәгәр ӧса йә, готьнед жь 2 Тимотʹейо 1:12-16 у 4:6-11, 17-22, йед кӧ Паԝлосе шанди кәледа ньвисибун, дькарьн мерхасийе бьдьн тә. Пешийа кӧ тӧ ван рʹеза бьхуни, бь зәлали Йаһоԝарʹа бәʹса проблема хԝә бькә у ԝирʹа бежә кӧ әв проблем чаԝа ль сәр тә һʹӧкӧм дькә. Паше, жь Йаһоԝа рʹәща бькә ԝәки әԝ али тә бькә кӧ тӧ жь сәрһатийа Паԝлос һин би кӧ чаԝа сәри тәнгасийед хԝәрʹа дәрхи. Йаһоԝа бь сайа Һагабо пʹехәмбәр пешда Паԝлосрʹа готьбу кӧ әԝе рʹасти зерандьна бе, чьмки әԝ шагьрте Иса Мәсиһ йә (Кʹаред Шандийа 21:11-13). Гәло Йаһоԝа чаԝа али Паԝлос дькьр? Әԝи щаба дӧайед Паԝлос дьда, у тʹьме ԛәԝат дьда ԝи. Паԝлосрʹа һатә готьне кӧ әԝе бьгьһижә хәлата хԝә. Ӧса жи, Йаһоԝа бь сайа достед амьн йед Паԝлос али ԝи дькьр. w21.03 17-18 ¶14-15, 19