Тʹәбах

Тʹәне әԝед кӧ тʹәви Иса незик ьн, ԝе бь сайа ԛӧрбана ԝи кʹәрәма бьстиньн. Иса гот ԝәки әԝ ԝе «әʹмьре хԝә бәр достед хԝәва» бьдә (Йуһʹн. 15:13). Мәрьвед амьн йед кӧ дьжитьн пешийа һатьна Иса сәр әʹрде, гәрәке дәрһәԛа ԝи пебьһʹәсьн у ԝи һʹьз кьн. Чахе мәрьвед амьн ԝе жь мьрьне рʹабьн, һәла һе әԝана жи гәрәке бьбьнә достед Иса, сәва жийина һʹәтаһʹәтайе ԛазанщ кьн (Йуһʹн. 17:3; Кʹар. Шанд. 24:15; Ибрн. 11:8-12, 24-26, 31). Әм шабуне дьстиньн кӧ шьхӧле бәлакьрьна мьзгинийеда у һинкьрьнеда тʹәви Иса һәвкʹарийе дькьн. Чахе Иса сәр әʹрде бу, әԝ дәрсдар бу. Ле чахе әԝ вәгәрʹийа ль әʹзмен, һьнгеда әԝ бәрдәԝам дькә ча сәре щьвате рʹебәрийа ԝи шьхӧли бькә. Әԝ щәфе мә дьвинә у ԛимәт дькә, чьмки әм чьԛас дькарьн али гәләка дькьн, ԝәки әԝана ԝи у Баве ԝи нас кьн. Бь рʹасти тʹәне пе аликʹарийа Йаһоԝа у Иса әм дькарьн әԝи шьхӧли биньн сери (Йуһʹн. 15:4). w20.04 22 ¶7-8

Сәрнав «пʹадше бакӧре» у «пʹадше башуре» пешийе сәр ԝан сәрԝера дьһатә готьне, йед кӧ ԝан щийа пʹадшати дькьрьн, кӧ жь Исраеле алийе бакӧре у башуре бун (Дан. 10:14). Һʹәта Пенщийә Һʹәсабе сала 33 Д.М., мьләте Исраел щьмәʹта Хԝәде бу. Паше Йаһоԝа әшкәрә кьр, ԝәки ида шагьртед Исайи амьн бунә щьмәʹта ԝи. Ләма жи пʹехәмбәртийа Данийел жь сәре 11, дьһа зәʹф нә кӧ дәрһәԛа мьләте Исраеле йә, ле дәрһәԛа шагьртед Мәсиһ йә (Кʹар. Шанд. 2:1-4; Рʹом. 9:6-8; Галт. 6:15, 16). У щурʹә-щурʹә ԝәʹдәда, щурʹә-щурʹә сәрԝер дьбунә пʹадше бакӧре у пʹадше башуре, ле әԝана се тьштада нәдьһатьнә гӧһастьне. Йа пешьн, әԝ һәрдӧ пʹадша пәй щьмәʹта Хԝәде дькʹәтьн. Йа дӧда, әԝ йәк кӧ әԝана ча бун һьндава щьмәʹта Хԝәде, дьда кʹьфше кӧ әԝана Хԝәдейе рʹаст Йаһоԝа нәфрʹәт дькьн. У йа сьсийа, әв һәрдӧ пʹадша бона һʹӧкӧмтийе һәврʹа дькʹәтьнә һʹӧщәте. w20.05 3 ¶3-4

Йаһоԝа дькарә бьбә һәр кәсе кӧ лазьм ә, сәва ԛьрара хԝә бинә сери. Йаһоԝа һьн жи дькарә ӧса бькә, ԝәки хьзмәткʹаред ԝийи гӧнәкʹар жи бьбьнә әԝ, чь кӧ лазьм ә сәва ԝирʹа хьзмәт кьн у нета ԝи биньн сери (Иша. 64:8). Бь ԝи щурʹәйи Йаһоԝа ӧса дькә, ԝәки ԛьрара хԝә әʹсәйи бинә сери. Тʹӧ тьшт нькарә ԝи бьдә сәкьнандьне, кӧ нета ԝи бе сери (Иша. 46:10, 11). Һәрге әм дәрһәԛа кьред Йаһоԝа бьфькьрьн у дәрһәԛа ве йәке кӧ әԝ ча али мә дькә, ԝәки ԛьрара ԝи биньн сери, әме Баве хԝәйи әʹзмана һе зедә ԛимәт кьн. Мәсәлә, гава әм дәрһәԛа һʹәму чекьрьнед дәсте Хԝәде дьфькьрьн, әм әʹщебмайи дьминьн кӧ Йаһоԝа чьԛас ԛәԝат ә (Зәб. 8:3, 4). У чахе әм дьфькьрьн кӧ әԝ ча али мә дькә, ԝәки әм ԛьрара ԝи биньн сери, әм һе зедә ԛәдьре ԝи дьгьрьн у ԝи һӧрмәт дькьн. Наве Хԝәде рʹасти жи мә гәләк мәтʹал дькә! Әԝ нав мәрʹа һәр тьшти дәрһәԛа Баве мә әʹйан дькә, у ӧса жи дәрһәԛа һʹәму кьред ԝи, кӧ әԝ дькә у ԝе бькә (Зәб. 89:7, 8). w20.06 9-10 ¶6-7

Оксижән әԝ һәйә газ, бь сайа кʹижани мәрьв у һʹәйԝан дьжин. Ль гора леколине, әʹфринед сах нава саләкеда бь сәда милйард тон оксижән бина хԝәрʹа дькʹьшиньн, ле газа карбондиоксид бина хԝәрʹа дәрдьхьн. Ле оксижән тʹӧ щар кʹӧта набә, у карбондиоксид жи һәԝайеда наминә у тʹоп набә. Чьрʹа? Чьмки Йаһоԝа щурʹә-щурʹә шинкайед мәзьн у бьчʹук әʹфьрандийә, кʹижан кӧ карбондиоксиде дькʹьшиньнә хԝә, у дәԝсе оксижәне дәрдьхьн. Әв зьвьрʹока оксижәне избат дькә гьлийед жь рʹеза рʹожа иройин. Чь дькарә али мә бькә, ԝәки әм планета мә у тьштед баш чь сәр һәнә, һе зедә бьшекьриньн? (Зәб. 115:16) Йа пешьн, бьфькьрьн сәр чекьрьна дәстед Йаһоԝа. Әԝ йәк ԝе мә һелан кә, ԝәки һәр рʹож бона тьштед ԛәнщ кӧ Йаһоԝа дьдә мә, рʹазибуна хԝә жерʹа бьдьнә кʹьфше. Ӧса жи һәрге әм щийе кӧ әм дьжин тʹәмьз хԝәй кьн, әме бьдьнә кʹьфше кӧ әʹрде ԛимәт дькьн. w20.05 22 ¶5, 7

Йаһоԝа һьндава бӧхдана Шәйтʹан билани, сәбьр у һәԛийа хԝә да кʹьфше. Йаһоԝа бь гәләк щурʹа әʹйан кьр, ԝәки Әԝ Хԝәдайе Һьмзор ә. Ле йа лапә фәрз әԝ ә, кӧ һʹәму кьред ԝида һʹьзкьрьна ԝи те кʹьфше (1 Йуһʹн. 4:8). Бәле, Йаһоԝа тʹьме наве хԝә пироз дькә. Шәйтʹан һʹәта рʹожа иро жи пе бӧхдана наве Хԝәде беһӧрмәт дькә. Әԝ шьке дькә дьле мәрьва, кӧ Йаһоԝа ԛәԝат, һәԛ, билан у бь һʹьзкьрьн ә. Мәсәлә, Шәйтʹан һʹәму тьшти дькә, ԝәки мәрийа бьдә баԝәркьрьне кӧ Әʹфьрандар тʹӧнә йә. Ле әԝ мәрьвед кӧ Хԝәде баԝәр дькьн, Шәйтʹан дьхԝазә ԝана бьдә баԝәркьрьне, ԝәки Хԝәде у нормед ԝи һәԛ ниньн у азайа мәрьва синор дькьн. Әԝ һәла һе жи һин дькә, кӧ Йаһоԝа Хԝәдеки берʹәʹм ә у мәрьва щәʹньмеда дьшәԝьтинә. Чахе мәрьв ԝан дәрәԝа баԝәр дькьн, ида нормед Йаһоԝайи һәԛ инкʹар дькьн. Мире-щьна һʹәта кӧ нәһатийә кʹӧтакьрьне, ԝе бәрдәԝам кә тʹәлька бәр мә дайнә, ԝәки әм пьшта хԝә бьдьнә Баве хԝә. Ле әԝ ԝе бькарьбә бьгьһижә нета хԝә йан на? w20.06 5 ¶13-15

Гәләк щьватада, һьнә хушк у бьрайед кӧ зьмане щьвате баш ньзаньн, һәнә. Ԝан бәлки зор те кӧ фькред хԝә биньн зьмен. Ле һәрге әм нә тʹәне хәбәрдана ԝан бьньһерʹьн, әме бьвиньн кӧ әԝ чьԛас Йаһоԝа һʹьз дькьн у дьхԝазьн ԝирʹа хьзмәт бькьн. Гава әм ван һʹӧнӧред ԝанә хԝәш бьвиньн, әме жь дьл ԛимәте бьдьн ԝан. Әме нәбежьн «Тӧ кери мьн найейи!», жь бәр кӧ әԝ зьмане мә баш ньзаньн (1 Корн. 12:21). Әм жь Йаһоԝарʹа шькьрдар ьн жь бәр кӧ ԝи әм дь щьвата хԝәда ԛәбул кьрьнә. Жь бо Йаһоԝа фьрԛ накә кӧ әм мер йан жьн ьн, азәп йан зәԝьщи нә йан зьманәки баш заньн йан на. Йаһоԝа ԛимәте дьдә мә һʹәмуйа, у гәрәке әм жи ԛимәте бьдьн һәвдӧ (Рʹом. 12:4, 5; Колс. 3:10). Ԝәрә әм тʹьме алийе хԝәда һәр тьшти бькьн кӧ рола хԝә у рола кәсед майин тʹәшкиләта Йаһоԝада, ԛимәт бькьн. w20.08 31 ¶20-22

Паԝлос тʹӧ щар нәдьфькьри, ԝәки мәрьвед Атʹини ԝе нәбьнә шагьртед Иса, чьмки бажаре ԝан бь пʹута, бенамусийе, у философийа пʹутпʹарьста тʹьжә бу. Әԝи бәрдәԝам дькьр ԝанрʹа шәʹдәтийе бьдә һьнге жи, гава ԝана әԝ беһӧрмәт дькьрьн. Паԝлос хԝәха һʹәта кӧ бьбуйа Мәсиһи, дькʹьфьри, дьзеранд у нәйарти дькьр (1 Тимтʹ. 1:13). Чаԝа Иса баԝәр дькьр, ԝәки Паԝлос дькарә бьбә шагьрте ԝи, ӧса жи Паԝлос баԝәр дькьр, ԝәки Атʹини дькарьн бенә сәр рʹийа рʹаст. У әԝ ньһерʹандьна ԝи пʹучʹ нибу (Кʹар. Шанд. 9:13-15). Ԛьрʹна йәкеда, мәрьвед жь щурʹә-щурʹә мьләта дьбунә шагьртед Иса. Чахе Паԝлос Мәсиһийед Корьнтʹирʹа нәʹмә ньвиси, әԝи гот кӧ һьнәкед жь ԝан бәре ԛачах бун у бенамусийа мьрʹдарʹ дькьрьн. Паше әԝи ԝанрʹа гот: «Жь ԝә һьнәк ӧса бун. Ле һун жь гӧна һатьнә шуштьне» (1 Корн. 6:9-11). Ле ԝәйе ԛә баԝәр кьра, кӧ әԝ мәрьв дькарьн бенә гӧһастьне у бьбьн шагьртед Мәсиһ? w20.04 12 ¶15-16

Рʹуспи гәрәке ләз нәкʹәвьн кӧ ԝан хушк-бьра сущдар кьн, йед кӧ дӧдьли дьбьн, ԝәки хьзмәти Йаһоԝарʹа бадиһәԝа нинә. Дәԝсе, әԝана гәрәке фәʹм бькьн, кӧ чьрʹа әԝ хушк йан бьра ӧса дьфькьрә йан ӧса дькә. Тʹәне һьнге рʹуспи ԝе бькарьбьн бь сайа Кʹьтеба Пироз һе баш дьл бьдьнә ԝи у али ԝи бькьн. Елйас пʹехәмбәр жь Изабела Жьн-пʹадша, рʹәви (1 Пʹадш. 19:1-3). Әԝи тʹьре шьхӧле кӧ әԝи дькьр бадиһәԝа бу у хԝәрʹа мьрьн дьхԝәст (1 Пʹадш. 19:10). Йаһоԝа сәва ве йәке Елйас сущдар нәкьр, ле дәԝсе ԝи да баԝәркьрьне кӧ әԝ тʹәне нинә, у дькарә итʹбарийа хԝә ԛәԝата Хԝәде бинә, у һәла һе гәләк шьхӧл майә кӧ әԝ гәрәке бькә. Чахе Елйас дәрдед хԝә Йаһоԝарʹа гьли кьр, Йаһоԝа бь дьл гӧһ да ԝи у шьхӧлед тʹәзә да ԝи (1 Пʹадш. 19:11-16, 18). Әԝ йәк чь дәрсе мә һин дькә? Һәр кәс жь мә, илаһи рʹуспи гәрәке һьндава хьзмәткʹаред Йаһоԝа нәрм у ԛәнщ бьн. Һәрге кәсәк һерсә-һерс дәрде хԝә рʹуспийарʹа гьли дькә, йан жи кәсәк дьбежә, ԝәки әԝ һежайи бахшандьна Йаһоԝа нинә, йәкә рʹуспи гәрәке рʹьнд гӧһ бьдьнә ԝи, гава әԝ дьле хԝә вәдькә. Паше рʹуспи гәрәке әԝ пәза ӧндабуйи бьдьнә баԝәркьрьне, кӧ Йаһоԝа ԝи гәләк һʹьз дькә. w20.06 22 ¶13-14

Йаһоԝа дьхԝазә, ԝәки әм шабуне бьстиньн, чахе тʹәви нәфәр у һәвалед хԝә, ԝәʹдә дәрбаз дькьн (Зәб. 133:1). Һәвалед Иса жи һәбун (Йуһʹн. 15:15). Кʹьтеба Пирозда те готьне, кӧ һәвалед баш дькарьн кери мә бен (Мәтʹлк. 18:24). У ӧса жи те готьне, ԝәки нә баш ә һәрге хԝә жь мәрьва башԛә кьн (Мәтʹлк. 18:1). Гәләк мәрьв дьфькьрьн, ԝәки малпәред сосйали мәщаләкә баш ә, кӧ һәвала хԝәрʹа бьвиньн у хԝә тʹәне тʹәхмин нәкьн. Ле әм чахе малпәред ӧса дьдьнә хәбате, гәрәке фәсал бьн. Леколина нишан кьрьн, ԝәки мәрьвед кӧ гәләк ԝәʹдә малпәред сосйалида дәрбаз дькьн, ахьрийеда хԝә тʹәне тʹәхмин дькьн у дькʹәвьнә депресийе. Ле чьрʹа? Мәʹник дьбәкә әԝ ә, кӧ мәрьв шьклед хԝәйә бәдәԝ у йед һәвалед хԝә дькьнә малпәред сосйали, у гьшкарʹа нишан дькьн кӧ әԝана щийед чьԛас башда ԝәʹде хԝә дәрбаз дькьн. Мәрьве кӧ ԝан шькла дьньһерʹә дьбәкә бьфькьрә, кӧ әʹмьре ԝи һьмбәри әʹмьре мәрьве кӧ шькле хԝә кьрийә ԝан малпәра, ԛә һʹәԝас нинә у һәла һе жи нета әʹмьре ԝи тʹӧнә йә. w20.07 5-6 ¶12-13

Журнала «Бьрща Ԛәрәԝьлийе» йа 1 Щотмәһе 1988, ӧса дьбежә: «Рʹуспийед щьвате гәрәке фәʹм бькьн кӧ Иса Мәсиһ дькарә бь сайа рʹӧһʹе пироз сәр йәк жь рʹуспийед щьвате һʹӧкӧм бькә кӧ әԝ бәʹса принсипәкә Кʹьтеба Пироз бькә, йа кӧ жь бо сафикьрьна проблемәке йан сафикьрьна фәрз лазьм ә (Кʹар. Шанд. 15:7-15). Кʹома рʹуспийед щьватеда, рʹӧһʹе пироз тʹӧ щара тʹәне сәр йәки жь ԝан һʹӧкӧм накә». Рʹуспийе щьвате, йе кӧ ԛәдре рʹуспийед дьн дьгьрә, накә кӧ щьвина рʹуспийед щьвате контрол бькә, у әԝ нафькьрә кӧ ньһерʹандьна ԝи һәр тʹьм рʹаст ә. Әԝ фькред хԝә бь мьлукти тинә зьмен, у әԝ рʹьнд гӧһ дьдә готьнед рʹуспийед дьн. Әԝ хирәт дькә кӧ дина ԝан бькʹьшинә сәр принсипед Кʹьтеба Пироз, у әԝ һазьр ә кӧ рʹебәрийа «хӧламе амьн у сәрԝахт» ԛәбул бькә (Мәт. 24:45-47). Һәрге нав рʹуспийед щьватеда һʹьзкьрьн у һӧрмәт һәбә, рʹӧһʹе пироз ԝе рʹебәрийа ԝан бькә кӧ әԝана сафикьрьнед рʹаст бькьн (Аԛуб 3:17, 18). w20.08 27 ¶5-6

Дьжмьнед Паԝлосе шанди гәләк жь ԝи ԛәԝаттьр бун. Ԝана гәләк щар ԝи дькʹӧтан у дькьрьнә кәле. Ӧса жи мина дәрәща Даԝьд, мәрьвед кӧ һәвалед Паԝлос бун, һьндава ԝида хьраб бун. Һәла һе һьнә Мәсиһийед жь щьвате жи, мьԛабьли ԝи бун (2 Корн. 12:11; Фили. 3:18). Ле йәкә әԝ нәшкәст. Чьԛас жи мьԛабьли ԝи дәрдькʹәтьн, йәкә әԝи бәрдәԝам дькьр мьзгинийе бәла кә. Әԝ хушк-бьрарʹа амьн дьма һәла һе ԝи чахи жи, гава ԝана дьле ԝи дешанд. Хенщи ве йәке, әԝ Хԝәдерʹа амьн ма һʹәта хьлазийа әʹмьре хԝә (2 Тимтʹ. 4:8). Паԝлос нә кӧ пе ԛәԝата хԝә әԝ һʹәму чәтьнайи алт дькьр, ле Йаһоԝа ԛәԝат дьда ԝи. Ле һун ԛә рʹасти дәрәщәкә ӧса һатьнә, кӧ мәрьв мьԛабьли ԝә дәркʹәтбун? Әм дьхԝазьн кӧ Хәбәра Хԝәде бьгьһиньн һʹьш у дьле мәрьва. Әм гәрәке бь Кʹьтеба Пироз щаба пьрсед мәрьва бьдьн, бь ԛәдьр у һʹәйф бьн һьндава ԝанда, у һʹәмушкарʹа, һәла һе дьжмьнарʹа жи ԛәнщийе бькьн (Мәт. 5:44; 1 Пәт. 3:15-17). w20.07 17-18 ¶14-15

Гәло Йаһоԝа мьлук ә? Бәле! Зәбурбеж Даԝьд жи ве йәке гот ве рʹеза рʹожеда (Зәб. 18:35). Гава Даԝьд әв готьн дьньвисин, әԝи бәлки дьани бира хԝә кӧ Самуйел пʹехәмбәр чаԝа һатьбу мала баве ԝи кӧ пʹадшаки ну кʹьфш бькә. Жь 8 лаԝька, йе һәри бьчʹук Даԝьд бу. Диса жи, Йаһоԝа әԝ һьлбьжарт кӧ дәԝса Шаԝул бьбә пʹадша (1 Сам. 16:1, 10-13). Даԝьд пʹадша бе шьк ван готьнед зәбурбежрʹа ԛайил бу, йе кӧ дәрһәԛа Йаһоԝа ӧса гот: «Хԝә ԛуз дькә, дина Хԝә дьдә әʹрд у әʹзмана . . . Әԝ фәԛир жь хԝәлийе рʹадькә . . . ԝәки кʹеләка әʹсьлзада бьдә рʹуньштандьне» (Зәб. 113:6-8). Мьлуктийа Йаһоԝа жь һәләԛәтийа ԝи йа бь инсанед ԛьсурдаррʹа әʹйан дьбә. Әԝ һьм һʹәбандьна мә ԛәбул дькә һьм жи мә ԝәк достед хԝә ԛәбул дькә (Аԛуб 4:8). Йаһоԝа Кӧрʹе хԝә ԝәк ԛӧрбанәкә жь бо гӧнәһед мә дайә у бь ви аԝайи рʹе вәкьрийә, кӧ әм бьбьн достед ԝи. Йаһоԝа бь рʹасти жи пʹьрʹ дьлован у дьлрʹәʹм ә! w20.08 8 ¶1-3

Йаһоԝа рʹож у сьһʹәта ԛьрʹа ве дьнйайе кʹьфш кьрийә (Мәт. 24:36). Әԝ сәбра хԝә ӧнда накә, у әԝе бәри ви ԝәхти, тьштәки нәкә. Хԝәде һьлбәт бира кәсед мьри дькә у дьхԝазә ԝан рʹакә, ле әԝ диса жи сәбьр дькә (Иб. 14:14, 15). Ԝәхте рʹастда, әԝе ԝана жь мьрьне рʹакә (Йуһʹн. 5:28). Гәрәк әм жь бо сәбра Йаһоԝа шькьрдар бьн. Жь бәр кӧ Йаһоԝа сәбьр кьрийә, мәщал кʹәтийә дәсте мә у дәстед гәләк кәсед дьн кӧ тʹобә бькьн. Йаһоԝа мәщале дьдә һәр кәси кӧ жийина һәрһәйи бьстинә. Гәло әм чаԝа дькарьн нишан кьн кӧ әм жь бо сәбра ԝи шекьрдар ьн? Гәрәк әм бь дьл у щан ԝан кәса бьгәрʹьн, «йед кӧ дьле ԝан жь бо жийина һәрһәйи һазьр» ә, у али ԝан бькьн кӧ әԝ Йаһоԝа һʹьз бькьн у ԝирʹа хьзмәт кьн (Кʹар. Шанд. 13:48, ДТʹ). Бь ви аԝайи, әԝе жи жь сәбра Йаһоԝа кʹаре бьвиньн. w20.08 18 ¶17

Әм һьлбәт дьхԝазьн кӧ хԝәндәкʹаре мә дәрһәԛа Йаһоԝа һин бьбә. Ӧса жи, әм дьхԝазьн кӧ һинбуна Кʹьтеба Пироз дьле ԝи бьгьрә, сәва кӧ әԝ тьштед кӧ һин дьбә дь жийана хԝәда бьхәбьтинә. Готьнед Иса Мәсиһ нә тʹәне ль сәр һʹьше мәрьва, ле ль сәр дьле ԝан жи һʹӧкӧм дькьр (Луԛа 24:15, 27, 32). Пʹьрʹ фәрз ә кӧ хԝәндәкʹар Йаһоԝа ԝәк Кәсәки реали у ԝәк Бав, Хԝәде у Досте хԝә һʹәсаб кә (Зәб. 25:5). Ль дәма һинбуна Кʹьтеба Пироз дина хԝәндәкʹар бькʹьшинә сәр хәйсәт-һʹӧнӧред Хԝәде (Дәркʹ. 34:5, 6; 1 Пәт. 5:6, 7). Тʹема дәрсе чь бә жи, нишани хԝәндәкʹар бькә кӧ Йаһоԝа йәки чаԝа йә. Али ԝи бькә кӧ әԝ һʹьзкьрьн, дьловани у дьлрʹәʹмийа Йаһоԝа бьвинә. Иса Мәсиһ готьбу кӧ «тʹәмийа пешьн у һәрә мәзьн» әв ә кӧ мәрьв «Хӧдан Хԝәдейе хԝә һʹьз бькә» (Мәт. 22:37, 38). Хирәт бькә кӧ һʹьзкьрьна Хԝәде дь дьле хԝәндәкʹарда мәзьн бьбә. w20.10 10 ¶12

Иса Мәсиһ ԛәдре һʹәму жьна дьгьрт (Йуһʹн. 4:27). Ле бәле, Иса Мәсиһ һе зедәтьр ԛимәт дьда жьнед кӧ хԝәстьна Хԝәде дьани сери. Чаԝа кӧ Иса һьнә мер ԝәк бьред хԝә һʹәсаб дькьр, әԝи жьнед баԝәрмәнд жи ԝәк хушкед хԝә һʹәсаб дькьр (Мәт. 12:50). Иса ӧса жи ԝанрʹа бу достәки баш. Мәсәлә, достийа ԝи йа бь Мәрйәм у Мәртʹайерʹа бинә бира хԝә (Луԛа 10:38-42). Ӧса те фәʹм кьрьн  кӧ әв һәрдӧ хушк жи азәп бун. Иса Мәсиһ бь готьн у кьрьнед хԝә али ԝан дькьр кӧ әԝ хԝә рʹьһʹәт тʹәхмин бькьн. Мәсәлә, Мәрйәме шәрм нәдькьр кӧ бәр льнгед ԝи рʹуне. Гава Мәртʹа әʹщьз бу, чьмки Мәрйәме али ԝе нәдькьр, әԝе хԝә паш нәкʹьшанд кӧ ве йәке Исарʹа бежә. Ԝе рʹоже, Иса һәрдӧ хушкарʹа һьнә дәрсед фәрз да. Иса Мәсиһ гәләк щар дьчу мала Мәртʹа, Мәрйәм у бьре ԝан Лазар, чьмки әԝи ԝана һʹьз дькьр (Йуһʹн. 12:1-3). Ләма әм шаш наминьн кӧ гава Лазар нәхԝәш кʹәт, Мәрйәм у Мәртʹайе жь Иса аликʹари хԝәст (Йуһʹн. 11:3). w20.09 20 ¶3; 21 ¶6

Шагьртед Иса йед пешьн һивийе бун кӧ Пʹадшати зу бе у ԝана жь бьндәстийа Рʹомайе бьфьльтинә. Ньһа әм һивийе нә кӧ Пʹадшатийа Хԝәде хьраби у зӧлми кʹӧта кә у дьнйа ну саз бькә (2 Пәт. 3:13). Ле бәле, гәрәке әм бь сәбьр һивийа ԝәхта кӧ Йаһоԝа кʹьфш кьрийә, бьсәкьньн. Йаһоԝа епʹещә ԝәхт дабу Нӧһ кӧ «рʹасти даннасин» бькә у гәмийе ава бькә (2 Пәт. 2:5; 1 Пәт. 3:20). Гава Бьраһим дәрһәԛа ԛьрʹкьрьна бажаред Содом у Гоморайе гәләк пьрс дан, Йаһоԝа бь сәбьр гӧһ да ԝи (Дәстп. 18:20-33). Бь гәләк сәдсала, Йаһоԝа ль һьмбәри сәрһʹьшкийа мьләте Исраел сәбрәкә мәзьн әʹйан дькьр (Нәһәм. 9:30, 31). Иро жи, Йаһоԝа сәбьра хԝә мәрьвед дьлпʹакрʹа әʹйан дькә у мәщале дьдә «кӧ һʹәму тʹобә бькьн» (2 Пәт. 3:9; Йуһʹн. 6:44; 1 Тимтʹ. 2:3, 4). Һәгәр Йаһоԝа һаԛас сәбьр дькә, гәло нәлазьм ә кӧ әм жи ише бәлакьрьн у һинкьрьна мьзгине бь сәбьр бәрдәԝам бькьн? w20.09 10 ¶8-9

Йаһоԝа ԝе хәйсәт-һʹӧнӧр у бира кәсед рʹакьри вәгәрʹинә. Әв йәк те һʹәсабе кӧ Йаһоԝа мәрьва һаԛас һʹәз дькә кӧ әԝ һʹәму фькьр, һәст, готьн у кьрьнед ԝан дьвинә у бира хԝәда хԝәйи дькә. Ләма, әԝ һеса дькарә ньһерʹандьн, бир у хәйсәт-һʹӧнӧред кәсед рʹакьри жь нува бьдә ԝан. Даԝьд Пʹадша заньбу кӧ Йаһоԝа бона һәр йәк жь мә чьԛас хәм дькә (Зәб. 139:1-4). Гәло әв йәк кӧ Йаһоԝа дәрһәԛа мә һәр тьшти занә, сәр мә чаԝа һʹӧкӧм дькә? Әв йәк кӧ Йаһоԝа дәрһәԛа мә һәр тьшти занә, мә әʹщьз накә. Гәло чьма? Чьмки Йаһоԝа мә пʹьр һʹьз дькә. Әԝ ԛимәте дьдә һәр йәк жь мә. Әԝ һәр тьште кӧ сәр мә һʹӧкӧм дькә, бира хԝәда хԝәйи дькә. Әв фькьр бь рʹасти жи мерхасийе дьдә мә. Тʹӧ щар нә лазьм ә кӧ әм хԝә тʹәне тʹәхмин бькьн. Йаһоԝа һәр тʹьм кʹеләка мә йә у әԝ һәр тʹьм һазьр ә кӧ али мә бькә (2 Дир. 16:9). w20.08 17 ¶13-14

Йаһоԝа хьзмәткʹаред хԝә жь дьл һин дькә. Әԝ дьхԝазә кӧ әԝана ԝи нас бькьн у ԝи һʹьз бькьн. Әԝ ԝана ԝәк зарʹед хԝә һʹәсаб дькә у дьхԝазә кӧ әԝана һʹәта-һʹәтайе бьжин. Әв йәк бе ширәт у рʹебәрийа ԝи набә (Йуһʹн. 17:3). Ль ԛьрʹна йәке, Йаһоԝа хьзмәткʹаред хԝә бь сайа щьвате һин дькьрьн (Колс. 1:9, 10). Чаԝа кӧ Иса Мәсиһ соз дабу, «Пьштован», демәк рʹӧһʹе пироз, пʹьрʹ али ԝан дькьр (Йуһʹн. 14:16). Рʹӧһʹе пироз али шагьрта дькьр кӧ әԝ Хәбәра Хԝәде фәʹм бькьн у гәләк тьштед кӧ Иса Мәсиһ готьбун у кьрьбун, дьанин бира ԝан. Әв готьн у кьрьнед Иса Мәсиһ паше ль Мьзгинида һатьн ньвисандьн. Ве занәбуне баԝәрийа ԝан ԛәԝи дькьр у али ԝан дькьр кӧ әԝана Хԝәде, Иса Мәсиһ у һәвдӧ һе зедә һʹьз бькьн. Йаһоԝа бәреда готьбу кӧ «дь рʹожед даԝинда», инсане жь һʹәму мьләта ԝе һьлкʹьшьн «чʹийайе» ԝи, ԝәки жь ԝи һинкьрьне бьстиньн (Иша. 2:2, 3). Әв пʹехәмбәрти ньһа те сери. w20.10 24 ¶14-15

Һьнә кәс чьма ширәтед баш йед дост у һәвалед хԝә ԛәбул накьн? Чьмки әԝ ԛӧрʹә нә! Мәрьвед ԛӧрʹә һәртʹьм дьхԝазьн тьштед кӧ ль гӧһед ԝан хԝәш тен, бьбьһен, у әԝ гӧһед хԝә жь рʹастийе дьзьвьриньн (2 Тимтʹ. 4:3, 4). Әԝ дьфькьрьн кӧ ньһерʹандьна ԝан, ньһерʹандьна һәри рʹаст ә, у кӧ ԛимәта ԝан жь ԛимәта кәсед дьн бьльндтьр ә. Ле Паԝлосе шанди ӧса ньвиси: «Һәгәр йәк хԝә дәԝса тьштәки датинә у хԝәха нә тʹӧ тьшт ә, әԝ хԝәха хԝә дьхапинә» (Галт. 6:3). Сьлеман Пʹадша жи ньвиси: «Хорте фәԛир у шәһрәза, жь пʹадшайе беаԛьл у калбуйи йе кӧ ида нашеԝьрә четьр ә» (Ԝаиз 4:13, ИМ). Бинә бира хԝә кӧ гава Паԝлосе шанди ль бәр һәр кәси шашийа Пәтрусе шанди да рʹуйе ԝи, Пәтрус хԝә ча кʹьфш кьр (Галт. 2:11-14). Жь бәр кӧ Пәтрус йәки аԛьлмәнд бу, әԝ нәхәйиди кӧ Паԝлос ль бәр һәр кәси ширәт да ԝи, ле әԝи ширәта ԝи ԛәбул кьр. Паше, әԝи дәрһәԛа Паԝлос гот «бьре . . . дәлал» (2 Пәт. 3:15). w20.11 21 ¶9, 11-12

Чь ԝе али хԝәндәкʹаред Кʹьтеба Пироз бькә кӧ әԝана алийе рʹӧһʹанива пешда һәрʹьн? Пʹьрʹ фәрз ә кӧ әԝана бен щьвина. Һинкьрьн кӧ ль щьвина те дайин ԝе занәбуна ԝан зедә бькә, баԝәрийа ԝан һе ԛәԝи бькә у али ԝан бькә кӧ әԝ һе зедә Хԝәде һʹьз бькьн (Кʹар. Шанд. 15:30-32). Хенщи ве йәке, мьзгинван дькарә хԝәндәкʹаре хԝәрʹа бежә кӧ һʹьзкьрьна Йаһоԝа чаԝа али ԝи кьрьбу кӧ гӧһ бьдә ԛанунед Хԝәде (2 Корн. 7:1; Фили. 4:13). У гава хԝәндәкʹаред Кʹьтеба Пироз щурʹә-щурʹә мьзгинванед амьн нас дькьн, мәсәлед ԝан дькарьн ԝана һин бькьн, кӧ әԝ чаԝа дькарьн ль гора тʹәмийа Иса кӧ Хԝәде у инсана һʹьз бькьн, бьжин (Йуһʹн. 13:35; 1 Тимтʹ. 4:12). Ӧса хԝәндәкʹар дьвиньн кӧ мьзгинван жи мина ԝан рʹасти проблема һатьбун, у әв йәк нишани хԝәндәкʹара дькә кӧ әԝ жи дькарьн жийана хԝә бьгӧһезьн у бьбьн шагьртед Иса Мәсиһ (Ԛан. Дщр. 30:11). Һʹәму хушк у бьра дькарьн щурʹә-щурʹә алийава али хԝәндәкʹара бькьн кӧ әԝ жь алийе рʹӧһʹанива пешда һәрʹьн (Мәт. 5:16). w20.11 5 ¶10-12

Дьбә кӧ Паԝлосе шанди ль аренайа Әфәсе бь һʹәйԝанарʹа шәрʹ кьрьбу (2 Корн. 1:8; 4:10; 11:23). Йан жи, ԝи бәлки бәʹса Щьһуйа у кәсед дьн дькьр, йед кӧ мина һʹәйԝанед хоф мьԛабьли ԝи дәрдькʹәтьн (Кʹар. Шанд. 19:26-34; 1 Корн. 16:9). Сәбәб чь бу жи, әшкәрә йә кӧ Паԝлосе шанди рʹасти дәрәщед хоф һатьбу. Ле диса жи, әԝи һевийа хԝә тʹӧ щара ӧнда нәдькьр (1 Корн. 15:30, 31; 2 Корн. 4:16-18). Иро, дьнйа пʹьрʹ хьраб ә. Һьнә хушк у бьред мә сәва шәрʹ йан зӧлм у зордарийе зьрар дитийә. Һьнә хушк у бьред мә жи ль ԝәлатед кӧ ише бәлакьрьна мьзгине һатийә ԛәдәхә кьрьн, дьжин. Диса жи, әԝана хьзмәта Йаһоԝа надьн сәкьнандьн, у амьнийа ԝан мәрʹа мәсәлә йә. Әԝ заньн кӧ һәгәр әԝана жийана хԝә ӧнда бькьн жи, Йаһоԝа ԝе жийанәкә дьһа баш бьдә ԝан. w20.12 9 ¶3-4

Гәло тӧ щарьна дьлтәнг дьби жь бәр кӧ ль һәрема тә, гәләк мәрьв гӧһ надьн мьзгине йан нә ль мале нә? Һәгәр ӧса йә, тӧ чаԝа дькари шабуна хԝә хԝәй бьки йан зедә бьки? Ӧса жи, пʹьрʹ фәрз ә кӧ ньһерʹандьна мә ль сәр хьзмәте рʹаст бә. Гәло әм чаԝа  дькарьн ньһерʹандьнәкә позитив хԝәй бькьн? Бир нәкә кӧ нета һәри фәрз йа хьзмәта мә әв ә кӧ әм наве Хԝәде у Пʹадшатийа ԝи әʹлам бькьн. Иса Мәсиһ зәлал кьрьбу кӧ йед кӧ рʹийа жийане дьвиньн, һьндьк ьн (Мәт. 7:13, 14). Гава әм дьчьн хьзмәте, әм тʹәви Йаһоԝа, Иса Мәсиһ у мәләка һәвкʹарийе дькьн (Мәт. 28:19, 20; Әʹйан. 14:6, 7). Йаһоԝа кәсед һежа дькʹьшинә бал хԝә (Йуһʹн. 6:44). Ләма, һәгәр кәсәк ньһа мьзгине ԛәбул нәкә жи, әԝе бәлки щарәкә дьн гӧһ бьдә мә. Хушкәкә мә Деби, дьбежә: «Шәйтʹан дькарә дьлтәнгийе ԝәк чʹәкәке бьхәбьтинә». Ле бәле, Йаһоԝа жь Шәйтʹан у һʹәму чʹәкед ԝи ԛәԝаттьр ә. w20.12 26 ¶18-19; 27 ¶21

Гәләк хушк у бьра дьхәбьтьн кӧ әʹбура хԝә у малбәта хԝә бькьн. Ле диса жи, әв мьзгинванед амьн бь дьл у щан пьштгьрийа тʹәшкиләта Хԝәде дькьн. Мәсәлә, һʹәму мьзгинван дькарьн бь пʹәра пьштгьрийа шьхӧле Пʹадшатийе бькьн. Ӧса жи, һьнә мьзгинван паши тʹәшԛәлед тʹәбийәте аликʹари дьдьн йан жи проектед авакьрьнеда дьхәбьтьн. Бь ви аԝайи, әԝана избат дькьн кӧ әԝана Хԝәде у инсана һʹьз дькьн. Һәр һʹәфтә, әм дьчьн щьвина, чьмки әм хушк у бьра һʹьз дькьн. Әм чьԛас ԝәстийайи бьн жи, әм дьчьнә щьвина. Әм чьԛас шәрмокә бьн жи, әм ль щьвина щабед хԝә дьдьн. Ӧса жи, чьԛас проблемед мә һәбьн жи, әм пешийа у паши щьвате кәсед дьн дьшдиньн (Ибрани 10:24, 25). Әм  бона шьхӧлед кӧ мьзгинванед дьн дькьн гәләк рʹази нә! w21.01 10 ¶11

Мәрьвед ԛӧрʹә зор те кӧ пәсне кәсед дьн бьдьн, чьмки әԝ һәр тʹьм дьхԝазьн пәсна бьстиньн. Әԝ хԝә бь кәсед дьн бәрамбәр дькьн у дьхԝазьн жь ԝан баштьр бьн. Әԝ баԝәр накьн кӧ кәсед дьн жи дькарьн ишед баш бькьн, ләма әԝ һәр тʹьм дьхԝазьн һәр тьшти хԝә бь хԝә бькьн. Һәрге тӧ тедәрхи кӧ дьле тәда ԛӧрʹәти һәйә, дӧа бькә кӧ Йаһоԝа али тә бькә кӧ бькарьби бь сайа «нубуна һʹьше хԝә» жь ви хәйсәте хьраб бьфьльти (Рʹом. 12:2, ИМ). Әм чьԛас шекьрдар ьн кӧ Баве мә Йаһоԝа мьлук ә! (Зәб. 18:35) Әԝ мьлуктийа хԝә кәсед дьнрʹа әʹйан дькә, у ԝе баш бә кӧ әм жи ӧса бькьн. Ӧса жи, ԝе баш бә кӧ әм мәрьвед кӧ бь мьлукти Йаһоԝарʹа хьзмәт дькьн хԝәрʹа бькьн мәсәлә. Бьра әм һәр тʹьм пәсне Йаһоԝа бьдьн! (Әʹйан. 4:11) w20.08 13 ¶19-20

Зәԝащ бь әʹсле хԝә пʹешкʹешәкә беԛьсур жь Хԝәде йә, ле сәд һʹәйф кӧ инсан беԛьсур ниньн (1 Йуһʹәнна 1:8). Ләма Кʹьтеба Пироз жьн-мерарʹа дьбежә кӧ зәԝаща ԝанда тәнгасийед ԝан ԝе һәбьн. Йаһоԝа дьхԝазә кӧ мер бона һʹәԝщед малбәта хԝә йед рʹӧһʹани, емосийали у физики хәм бькә (1 Тимотʹейо 5:8). Ле жьнәкә меркьри чьԛас бь шьхӧлед малева мьжул бә жи, гәрәке әԝ хԝәха жи һәр рʹож Кʹьтеба Пироз бьхунә, ль сәр кʹур бьфькьрә у Йаһоԝарʹа жь дьл дӧа бькә. Әв йәк щарна һеса нинә. Шьхӧлед мале гәләк ьн, ле гәләк фәрз ә кӧ жьн бона ван тьшта ԝәʹдә бьвинә, чьмки Йаһоԝа дьхԝазә кӧ һәр йәк жь мә достийа хԝә тʹәви ԝи ԛәԝи бькә (Кʹаред Шандийа 17:27). Һʹәму мер гӧнәкʹар ьн, ләма щарна жьнед ԝанрʹа һеса нинә кӧ сәритийа ԝан ԛәбул бькьн. Ле һәгәр жьн рʹьнд фәʹм бькә кӧ ль гора Кʹьтеба Пироз әв йәк чьма фәрз ә, ԝе жерʹа дьһа һеса бә кӧ гӧрʹа мере хԝә бькә. w21.02 9 ¶3, 6-7

Щерʹьбандьн у тәнгаси ԝәк агьре бона һʹәсьн ә. Гава шурәк егьрда те соркьрьн у паше аведа те саркьрьн, шур дьһа ԛайим дьбә. Мина ве йәке, гава әм ль һьмбәри тәнгасийа сәбьр дькьн, баԝәрийа мә дьһа ԛәԝи дьбә. Ләма Аԛуб ӧса ньвиси: «Сәбьр жи, бьра бь думька дьреж бә, ԝәки һун кʹамьл у гьһишти бьн, тʹӧ кемасикә ԝә тʹӧнәбә» (Аԛуб 1:4). Гава әм дьвиньн кӧ тәнгасийед мә баԝәрийа мә дьһа ԛәԝи дькьн, әм дькарьн ль һьмбәри ԝан бь шабуне сәбьр бькьн. Нәʹма Аԛуб дина мә дькʹьшинә сәр һьнә зәʹмәтед кӧ дькарьн шабуне жь мә бьстиньн. Проблемәк әв ә гава тӧ ньзани чь бьки. Чахе әм дькʹәвьн тәнгасийе, гәрәке әм жь Йаһоԝа аликʹарийе бьхԝазьн, ԝәки әм сафикьрьнед баш бькьн, йед кӧ ԝе дьле ԝи хԝәш бен, бона хушк-бьред мә керһати бьн, у ԝе али мә бькьн кӧ әм Йаһоԝарʹа амьн бьминьн (Йерәмйа 10:23). Сәва кӧ әм бьзаньбьн кӧ чь бькьн у дьжмьнарʹа чь бежьн, әм һʹәԝще биланийе нә. Һәгәр әм ньзаньн кӧ чь бькьн, әм дькарьн мерхаси у шабуна хԝә зу ӧнда кьн. w21.02 28 ¶7-9

Йаһоԝа мәрʹа мәсәлә йә. Һʹьзкьрьна ԝи һаԛас ԛәԝи йә кӧ һʹәта әм ԝирʹа амьн бьминьн, тʹӧ тьшт нькарә достийа дь нав мә у Йаһоԝада хьраб кә (Рʹомайи 8:38, 39). Хәбәра Йунани, йа кӧ ве рʹезеда ча «ԛайим» һатийә ԝәлгәрʹандьне, фькьрәки ӧса дьдә, кӧ мәри гәрәке щәфа бькʹьшинә ԝәки һʹьзкьрьне бьдә кʹьфше. Щарна бәлки лазьм ә кӧ әм зоре хԝә бькьн ԝәки хушк йан бьраки һʹьз бькьн. Гава кәсед дьн дьле мә дешиньн, гәрәке әм «бь сәбьре һʹьзкьрьнеда ль бәр һәв дахьн . . . бьщәдиньн, кӧ йәктийа рʹӧһʹ пе һәвгьредана әʹдьлайийе хԝәй кьн» (Әфәси 4:1-3). Гәрәке әм дина хԝә нәдьн шашийед хушк у бьра, ле бь чʹәʹве Йаһоԝа Хԝәде ль ԝан бьньһерʹьн (1 Самуйел 16:7; Зәбур 130:3). Илаһи гава әм шашийед хушк у бьра дьвиньн, щарна һеса нинә кӧ әм ԝан һʹьз бькьн. Ль ԛьрʹна йәке жи, әв йәк һьнә шагьртед Иса Мәсиһ зор дьһат, мәсәлә ӧса ԛәԝьми тʹәви дӧ хушкед бь наве Әйодийа у Сьнтиха. Паԝлосе шанди ԝанрʹа гот кӧ әԝ «тʹәви Хӧдан йәкбуйи бьра ль һәв бен» (Филипи 4:2, 3). w21.01 22-23 ¶10-11

Бьред щаһьл, хушк-бьра ԝә гәләк ԛимәт дькьн, чьмки һун тʹәви ԝан «мьл бь мьл» Йаһоԝарʹа хьзмәт дькьн (Сефанйа 3:9). Хирәт у рʹәзәдьлийа ԝә гәләк ԝан хԝәш те. Баԝәр бьн, әԝана ԝә гәләк һʹьз дькьн! Бьред щаһьл, тʹӧ щара бир нәкьн кӧ Йаһоԝа ԝә һʹьз дькә у итʹбарийа хԝә ԝә тинә. Жь бәрева Кʹьтеба Пирозда һатьбу ньвисаре кӧ рʹожед ахьрийеда, гәләк хорт ԝе бь рʹәзәдьли Йаһоԝарʹа хьзмәт бькьн (Зәбур 110:1-3). Хԝәде занә кӧ һун ԝи һʹьз дькьн у дьхԝазьн бь дьл у щан ԝирʹа хьзмәт бькьн. Һьм ль һьмбәри хԝә, һьм жи ль һьмбәри кәсед дьн бь сәбьр бьн. Гава һун сәва шашикә хԝә тенә ширәткьрьне, ве йәке ԛәбул бькьн ча ширәта жь Йаһоԝа (Ибрани 12:6). Һʹәму щабдари у шьхӧлед хԝә бь хирәт биньн сери. У йа лапә фәрз, һәр тьшти ӧса бькьн, ԝәки Баве ԝәйи әʹзмана ԝәрʹа фьрнаԛ бә (Мәтʹәлок 27:11). w21.03 7 ¶17-18

Әм дькарьн сәва гәләк тьшта дьлтәнг бьбьн, мәсәлә сәва нәхԝәши йан ԛьсур у кемасийед хԝә. Йан жи, әм дькарьн дьлтәнг бьбьн, чьмки мә дь хьзмәта Йаһоԝада ве щабдарийе нәстандийә кӧ мә дьхԝәст, йан жи чьмки гәләк мәрьвед ль мьһала мә гӧһ надьн мьзгине. Мәрьв һеса дькарә сәва ԛьсур у кемасийед хԝә дьлтәнг бьбә у бьфькьрә кӧ Йаһоԝа ԝи һежайи жийана һәр-һәйи һʹәсаб накә. Ньһерʹандьнәкә ӧса хоф ә у дькарә зийане бинә. Ль гора Кʹьтеба Пироз, тʹәне Иса Мәсиһ гӧнә нәкьрийә, ле әм гьшк гӧнәкʹар ьн (Рʹом. 3:23). Ле бәле, Хԝәде бь зедәйи дина хԝә надә ԛьсуред мә. Әԝ Бавәки дьлован ә, у әԝ дьхԝазә али мә бькә. Ӧса жи, әԝ бьсәбьр ә. Әԝ дьвинә кӧ әм чаԝа хирәт дькьн кӧ жь ԛьсуред хԝә бьфьльтьн у дәрһәԛа хԝә бь зедәйи негатив нәфькьрьн. Хԝәде һәртʹьм һазьр ә кӧ али мә бькә (Рʹом. 7:18, 19). w20.12 22 ¶1-3

Әм гьшк ль сәр рʹейәке дьмәшьн. Нета мә әв ә кӧ әм бьн һʹӧкӧмдарийа Йаһоԝада дьнйа тʹәзәда бьжин. Рʹож бь рʹож, әм хирәт дькьн кӧ ль сәр рʹийа жийане бьминьн. Ле ԝәк Иса Мәсиһ готьбу, әв рʹе тәнг ә, у щарьна ль мә зор те кӧ әм ль сәр ве рʹе бьминьн (Мәтта 7:13, 14 бьхунә). Жь бәр кӧ әм ԛьсурдар ьн, әм һеса дькарьн жь ве рʹе дәркʹәвьн (Галт. 6:1). Сәва кӧ әм ль сәр рʹийа жийане бьминьн, гәрәке әм һазьр бьн кӧ фькьр, ньһерʹандьн у рʹабун-рʹуньштьна хԝә бьгӧһезьн. Паԝлосе шанди мә һелан дькә кӧ «сәр хԝә бьхәбьтьн». Һеса нинә кӧ әм фькред хԝә бьщерʹьбиньн, чьмки дьле мә «хапинок» ә, ләма әм щарьна фәʹм накьн кӧ дьле мә, мә дьбә кʹӧ дәре (Йерәм. 17:9). Гәрәке әм һаш жь хԝә һәбьн кӧ әм бь фькьред шаш хԝә нәхапиньн (Аԛуб 1:22). Ләма, һәгәр әм дьхԝазьн хԝә бьщерʹьбиньн, гәрәке әм Хәбәра Хԝәде бьдьнә хәбате. Хәбәра Хԝәде әшкәрә дькә кӧ әм мәрьвед чаԝа нә у «нет у фькьред» дьле мә чь нә (Ибрн. 4:12, 13). w20.11 18 ¶1-3

Кәсед мьлук һе бәхтәԝар ьн. Гәло чьма? Кәсед кӧ синоред хԝә заньн аликʹарийа кәсед дьн бь шькьрдари ԛәбул дькьн. Мәсәлә, бинә бира хԝә кӧ гава Иса 10 мәрьвед кʹоти ԛәнщ кьрьн, чь ԛәԝьми. Тʹәне йәк жь ԝан вәгәрʹийа кӧ жь Исарʹа шькьр бькә, чьмки ԝи әԝ жь нәхԝәшийәкә бечʹарә фьльтанд. Әв мәрьв сәва аликʹарийа Иса шькьрдар бу, у ԝи пәсне Хԝәде да (Луԛа 17:11-19). Мәрьвед мьлукрʹа һеса йә кӧ кәсед дьнрʹа достийе бькьн у аштийеда бьминьн. Гәло чьма? Әԝ ԛәбул дькьн кӧ кәсед дьн жи хԝәйе һʹӧнӧред баш ьн, у әԝ бь ԝан баԝәр ьн. Гава кәсед дьн ише хԝәда пешдачуйи нә, мәрьвед мьлук ша дьбьн у пәсне ԝан дьдьн. w20.08 12 ¶17-18