Илон

Пе рʹебәрийа Хԝәде Пәтрус һьнә гьли жь пʹехәмбәртийа Йоԝел щурʹәки майин ԝәкʹьланд (Кʹар. Шанд. 2:16, 17). Дәԝса кӧ дәстпекә пе ԝан гьлийа «паши ԝе», ча Йоԝелда те готьне, Пәтрус гот: «Рʹожед ахьрийеда». Әԝ гьли ве контекстеда те готьне дәрһәԛа дәԝрана Щьһуйа, у һьнге рʹӧһʹе Хԝәдейи пироз гәрәке «сәр һʹәму мәрьвада» бьһата рʹьжандьне. Әԝ те һʹәсабе, ԝәки паши пʹехәмбәртийа дәрһәԛа кӧлийа, епʹещә ԝәʹдә дәрбаз бу, у паше әԝ пʹара пʹехәмбәртийа Йоԝел һатә сери. Паши рʹьжандьна рʹӧһʹе Хԝәдейи пироз ԛьрʹна йәкеда, мьзгини нав тʹәмамийа дьнеда бәла бу. Ԝи ԝәʹдәйи, незики сала 61 Д.М., Паԝлосе шанди нәʹма хԝә Колосийарʹа ньвиси, әԝи гот кӧ мьзгини һатә дайине «ԝан һʹәмуйарʹа, йед кӧ бьн пʹәрʹе әʹзменда дьминьн» (Колс. 1:23). Чахе Паԝлос гот «һʹәму», әԝ дьһатә һʹәсабе һәр щийа, кʹидәре әԝи у мәрьвед дьн дькарьбун рʹеԝити бькьрана. Ле рʹожед мәда пе аликʹарийа ԛәԝата рʹӧһʹе Йаһоԝайи пироз, мьзгини һе зедә бәла бу, гьһиштә «һʹәта сәре дьнйайе» (Кʹар. Шанд. 13:47). w20.04 6-7 ¶15-16

Йаһоԝа мә һәр кәси һʹьз дькә, у ӧса жи ԝан «бьчʹука», йед кӧ жь кәрийе ԝи дур кʹәтьнә (Мәт. 18:12-14). Хԝәде бь сайа Һәзәԛел пʹехәмбәр соз да, ԝәки ԝе пәзед хԝәйә ӧндабуйи бьгәрʹә у рʹӧһʹанида ԝана ԛәнщ кә. У әԝи гот кӧ ԝе чь бькә сәва ԝана хьлаз кә. Чь кӧ әԝи гәрә бькьра, бәре шьване Исраели дькьр гава пәзәк ӧнда дьбу (Һәзԛл. 34:12-16). Пешийе, әԝ шьван дьчу пәза ӧндабуйи бьгәрʹә, у сәва ве йәке лазьм бу ԝәʹдә хәрщ кә у щәфе бьвинә. Чахе шьван әԝ пәз дьдит, дьани нава кәри. Хенщи ве йәке, һәрге әԝ пәз бьриндар йан тʹи-бьрчи буйа, әԝи шьвани бь һʹьзкьрьн али ве һʹәйԝана сьст дькьр, бьринед ԝе дьпʹечʹа, һьлдьда һʹәмеза хԝә у ле тʹер дькьр. Рʹуспи жи, демәк шьванед «кәрийе пәзе Хԝәде», гәрәке ӧса бькьн гава али ԝи кәси дькьн, йе кӧ жь щьвате дур кʹәтийә (1 Пәт. 5:2, 3). Рʹуспи ԝан кәса дьгәрʹьн, али ԝан дькьн сәва вәгәрʹьн щьвате, у бь һʹьзкьрьне рʹӧһʹанида ԝана ԛәнщ дькьн. w20.06 20 ¶10

Гәло чахе Иса гот, ԝәки зәви бона нандьруне һазьр ьн, әԝи дьхԝәст бьгота, кӧ гәләк мәрьв ԝе пәй ԝи һәрʹьн? На. Кʹьтеба Пирозда һатә пʹехәмбәртикьрьне, ԝәки һьндьк мәрьв ԝе баԝәрийа хԝә ԝи биньн (Йуһʹн. 12:37, 38). У һьн жи Иса дькарьбу дьле мәрьва бьдита (Мәт. 9:4). Ле йәкә әԝи һʹьш-аԛьле хԝә датани сәр ԝан һьнәка, йед кӧ ԝи баԝәр кьрана, һьн жи бь хирәт һәр кәсирʹа дәрһәԛа Хԝәде һин дькьр. Әм мина Иса нькарьн дьла бьвиньн, ләма жи әм тʹӧ щар нькарьн мьһаләке йан мәрьвәки сущдар кьн, у бьфькьрьн кӧ ԝе нәбьнә шагьртед Иса. Дәԝсе, әм гәрәке сәр мәрьва ӧса бьньһерʹьн ча сәр хушк-бьра. Иса готә шагьртед хԝә, кӧ зәви зәр бунә, демәк һазьр ьн бона нандьруне. Мәрьв дькарьн бенә гӧһастьне у бьбьнә шагьртед Мәсиһ. Йаһоԝа хԝәха баԝәр дькә, кӧ мәрьвед жь мьһала мә дькарьн бенә сәр рʹийа рʹаст, у ԝана һʹәсаб дькә ча «тьштед бьрʹумәт», демәк ԛимәт (Һаг. 2:7). Һәрге әм сәр мәрьва ӧса бьньһерʹьн ча Йаһоԝа у Иса дьньһерʹьн, әме дәрһәԛа ԝан мәрьва һе зедә пебьһʹәсьн. Һьнге әԝ мәрьв нә кӧ ԝе мәрʹа хәриб бьн, ле әме ԝана һʹәсаб кьн ча хушк-бьред ахьрийе. w20.04 13 ¶18-19

Хәбәра Хԝәде әшкәрә мәрʹа әʹйан дькә, кӧ сәва Йаһоԝа мә ԛәбул кә, әм гәрәке Иса һʹьз бькьн. Сәва кӧ бьбьнә досте Иса әм гәрәке ԝи нас кьн. Бь сайа хԝәндьна кʹьтебед Мәтта, Марԛос, Луԛа у Йуһʹәнна, әм дькарьн Иса нас бькьн. Чахе әм жь ԝан кʹьтеба дәрһәԛа жийина Иса дьхуньн, әм дәстпедькьн ԛәдьре ԝи бьгьрьн у ԝи һʹьз кьн, чьмки әԝ һьндава мәрьва һʹәйф у ԛәнщ бу. Бәʹса хәбәре, рʹаст ә әԝ Ахайе шагьртед хԝә бу, ле әԝ һьндава ԝанда ӧса нибу чаԝа һьндава хӧламада ньн. Дәԝсе, әԝи фькьред хԝә ԝанрʹа гьли дькьр у дьле хԝә ԝанрʹа вәдькьр. Иса дәрдед ԝан незики дьле хԝә дькьр у тʹәви ԝан дьгьрийа (Йуһʹн. 11:32-36). Һәла һе дьжмьнед ԝи жи дьдитьн, ԝәки Иса ԝанрʹа, йед кӧ мьзгинийа ԝи ԛәбул дькьрьн, дьбу һәвал (Мәт. 11:19). Чахе әм чʹәʹв дьдьнә Иса кӧ әԝ һьндава шагьртед хԝәда ча бу, әм дьһа незики ԝи дьбьн, рʹази у бәхтәԝар дьбьн, у һʹьзкьрьна мә һьндава ԝида һе зедә дьбә. w20.04 22 ¶9-10

Жь сала 1870, Британйа бу империйа һʹәмдьнйайе, ордийед кʹижани лапә ԛәԝи у мәзьн бун. Пʹехәмбәртийеда әԝ империйа бь симболик ча стьруки бьчʹук бу, кʹижан се стьруйед майин рʹакьр, демәк Франса, Испанйа у Нидерланд (Дан. 7:7, 8). Һʹәта сала 1917, Британйа пʹадше башуре бу. Ԝи ԝәʹдәйи, нава дьнйайеда Америка бу ԝәлатәки лапи дәԝләти, у дәстпекьр тʹәви Британйайе һәвкʹарийе бькә. Шәрʹе Һʹәмдьнйайе I-да, Америкайе у Британйайе ԛәԝата хԝә кьрьнә йәк у бунә пьштгьред һәв. Һьнгеда Британйа у Америка тʹәвайи бунә Империйа Англо-Америкайа Һʹәмдьнйайе. Ча Данийел пʹехәмбәрти кьр, әв пʹадше башуре «артешәки [ордикә] мәзьн у зәʹф хԝӧрт [ԛәԝи]» тʹоп кьр. Нава ԝан рʹожед ахьрийеда, Англо-Америка пʹадше башуре йә. w20.05 4 ¶7-8

Ав сәр әʹрде һәйә, чьмки планета мә щики ӧсада йә, кӧ жь тәʹве нә гәләк дур ә, нә жи гәләк незик ә. Һәрге әв һәма һьнәки незики тәʹве буйа, ава сәр әʹрде ԝе зьһа буйа, әʹрд ԝе гәрм у һʹьшк буйа, у жийин ԝе сәр тʹӧнә буйа. Ле һәрге әʹрд һәма һьнәки жь тәʹве дур буйа, тʹәмамийа ава сәр әʹрде ԝе ӧса бьԛәрʹьмийа, кӧ әʹрд бьбуйа тʹопәкә бузе. Ле Йаһоԝа әʹрд данийә щики лапи баш, ләма жи сәр әʹрде зьвьрʹока аве һәйә, кʹижан кӧ әʹмьр хԝәй дькә. Тәʹв ава окйануса у һʹәму авед сәр әʹрде гәрм дькә у дькә һӧлм сәва әʹԝьр чебьн. Һәр сал ава кӧ тәʹв дькә һӧлм, жь ава һʹәму голед сәр әʹрде, зедәтьр ә. Паше әԝ һӧлма аве, ԝәкә дәһ рʹожа һәԝеда дьминә, дьбә бәрф йан баран у дьбарә сәр әʹрде. Әв ав ахьрийеда пашда вәдьгәрʹә окйануса у щурʹә-щурʹә гол у канийед ава, у ӧса әв зьвьрʹок бәрдәԝам дьбә. Йаһоԝа әв зьвьрʹок ӧса саз кьрийә, сәва сәр әʹрде һәртʹьм ав һәбә. Әԝ йәк рʹасти жи биланийа ԝи у ԛәԝата ԝи әʹйан дькә (Иб. 36:27, 28). w20.05 22 ¶6

Иса ширәт да, ԝәки һәр гав Хԝәдерʹа дӧа бькьн, сәва рʹӧһʹе хԝәйи пироз бьдә мә (Луԛа 11:9, 13). Йаһоԝа бь сайа рʹӧһʹе хԝә нә тʹәне ԛәԝате дьдә мә, ле һәла һе «зорайийа ԛәԝате» жи (2 Корн. 4:7). Пе аликʹарийа рʹӧһʹе Йаһоԝайи пироз, әм дькарьн бәр һәр тәнгасике тәйах кьн. Рʹӧһʹе пироз дькарә али мә бькә, кӧ хьзмәтийа хԝә биньн сери у ӧса жи талантед мә у фәрәсәтед мә баш кә. Әм гәрәке бир нәкьн, ԝәки хьзмәтийеда һәр тьшт чь кӧ бал мә рʹьнд те стандьне, әва нә кӧ пе ԛәԝата мә йә, ле пе аликʹарийа рʹӧһʹе Хԝәдейи пироз ә. Әм нишан дькьн кӧ рʹӧһʹе пироз ԛимәт дькьн, гава дӧа дькьн, ԝәки Хԝәде али мә бькә сәва әм нав хԝәда фькьр у хԝәстьнед нәрʹаст тедәрхьн (Зәб. 139:23, 24). Һәрге әм бона ве йәке дӧа бькьн, Йаһоԝа ԝе бь сайа рʹӧһʹе хԝәйи пироз мәрʹа әʹйан кә, кӧ нав хԝәда ньһерʹандьн у хԝәстьнед хԝәйә нәрʹаст бьвиньн. Паше ида әм гәрәке дӧа бькьн, ԝәки рʹӧһʹе пироз ԛәԝате бьдә мә, сәва ван тьштед нәрʹаст бьтʹәрькиньн. Ԝи щурʹәйи, әме избат кьн, ԝәки әм нахԝазьн тьштед ӧса бькьн, кʹижан кӧ бьбьнә мәʹни ԝәки Йаһоԝа пе рʹӧһʹе хԝәйи пироз али мә нәкә (Әфәс. 4:30). w20.05 28-29 ¶10-12

Чахе әм наве Йаһоԝа дьпарезьн, әм чʹәʹв дьдьнә Иса Мәсиһ. Иса наве Баве хԝә әʹйан кьр нә тʹәне бь ԝе йәке, кӧ наве ԝи дьда хәбате, ле ӧса жи дәрһәԛа ԝи гьли дькьр, ԝәки әԝ бь рʹасти Хԝәдеки ча нә. Мәсәлә, әԝи дәрәԝед Ферьсийа әшкәрә дькьр, йед кӧ бь щурʹә-щурʹә метода Йаһоԝа әʹйан дькьрьн ча йәки сәрт, гәләк тьшт дәʹԝа дькә, хԝә жь мәрьва дур дьгьрә у берʹәʹм ә. Иса али мәрьва дькьр ԝәки әԝана бьвиньн, кӧ Баве ԝи йәки һәԛ у билан ә, бь сәбьр у һʹьзкьрьн ә у һазьр ә бьбахшинә. Хенщи ве йәке Иса бь тʹәмами чʹәʹв дьда һʹӧнӧред Баве хԝә, у бь ве йәке жи дьда кʹьфше, кӧ бь рʹасти Йаһоԝа Хԝәдеки чаԝа нә (Йуһʹн. 14:9). Мина Иса, әм жи дькарьн дәрһәԛа Йаһоԝа мәрьварʹа гьли кьн у ԝана һин кьн, ԝәки Әԝ Хԝәдеки бь һʹьзкьрьн у ԛәнщ ә. Чахе әм ӧса дькьн, әм әʹйан дькьн ԝәки әԝ дәрәԝ у бӧхданед һьндава Йаһоԝа, пʹучʹ ьн. Наве Йаһоԝа бь ԝи щурʹәйи жи пироз дьбә чахе әм али мәрьва дькьн, ԝәки әԝана Йаһоԝа һʹьш у дьле хԝәда пироз кьн. Әм бь хәбәрдан у шьхӧлед хԝә мәрьварʹа дьдьнә кʹьфше кӧ Йаһоԝа бь рʹасти йәки чаԝа нә. Әм ӧса жи наве Хԝәде пироз дькьн гава али мәрьва дькьн кӧ занәбуна нәрʹаст дәрһәԛа Йаһоԝа, жь сәре хԝә дәрхьн. w20.06 6 ¶17-18

Малпәред сосйали бь нета баш бьдьнә хәбате, мәсәлә ԝәки һаш малбәта хԝә у һәвалед хԝә һәбьн. Ле ԝә ԛә тʹәхмин кьрийә, кӧ һьнә мәрьв коментари, шькьл у видеойед хԝә дькьнә ԝан малпәра, ԝәки наве хԝә бьльнд кьн? Ча те кʹьфше, пе ве йәке әԝана тʹьме дьхԝазьн дина мәрьва бькʹьшиньн сәр хԝә. Һьнәк һәла һе жи коментарийед нәщайиз сәр шьклед хԝә, йан жи сәр шьклед мәрьвед дьн дьньвисьн. Ле Мәсиһи тенә һеланкьрьне кӧ мьлук бьн у һәстед һәв һьлдьнә һʹәсаб, ләма жи әԝана малпәред сосйали ԝе бь ԝи щурʹе нәщайиз нәдьнә хәбате (1 Пәт. 3:8). Һәрге тӧ малпәред сосйали дьди хәбате, ԝан пьрса бьдә хԝә: «Дьбә кӧ коментари, шькьл йан жи видеойед кӧ әз дькьмә малпәред сосйали, дьдьнә кʹьфше кӧ әз хԝә ԛӧрʹә дькьм йан жи пʹайе хԝә дьдьм? Мәсиһи хԝә сәр мәрьварʹа нагьрьн у дина мәрьва накʹьшиньн сәр хԝә. Әԝана әв ширәта жь Кʹьтеба Пироз йа рʹеза иройин һьлдьдьн һʹәсаб. Һәрге әм мьлук бьн, әме мина мәрьвед ве дьнйайе нибьн, йед кӧ ԛӧрʹә у бабах ьн у дьхԝазьн мәрьв ԝана бьльнд кьн (1 Йуһʹн. 2:16). w20.07 6 ¶14-15

Пешийа кӧ Паԝлос бьбуйа шагьрте Иса, әԝ щаһьләки бабах бу у пәй ԝан мәрьва дькʹәт, йед кӧ пәй Иса дьчун (Кʹар. Шанд. 7:58). Чахе Паԝлос наве кʹижани һьнге Шаԝул бу, щьвата Мәсиһийа дьзеранд, Иса хԝәха ԝи да сәкьнандьне. Иса жь әʹзмана тʹәви Паԝлос хәбәр да у әԝ кор кьр. Паԝлос гәрәке аликʹари жь ԝан мәрьва бьхԝәста, кʹижана әԝи дьзеранд. Әԝи бь мьлукти аликʹари жь Һананийа шагьрт ԛәбул кьр, кʹижани кӧ рʹонайа чʹәʹве ԝи ани щи (Кʹар. Шанд. 9:3-9, 17, 18). Ԝәʹдә шунда Паԝлос бу әндәме щьвата Мәсиһити, ле әԝи тʹӧ щар әԝ дәрса кӧ Иса сәр рʹийа Шаме ԝи һин кьрьбу, бир нәдькьр. Паԝлос мьлук ма у аликʹарийа хушк-бьра ԛәбул кьр. Әԝи ани сәр хԝә, ԝәки ԝана ԛәԝат дьда ԝи (Колс. 4:10, 11). w20.07 18-19 ¶16-17

Ԛӧдрәта Йаһоԝа чьԛас мәзьн ә жи, әԝ һьнә щабдари дьдә кәсед дьн жи. Мәсәлә, ԝи Иса ԝәк Пʹадше Пʹадшатийа хԝә кʹьфш кьрийә, у әԝ 144 000 кәси ԝәк һәмпʹадшайед Иса һьлдьбьжерә. Жь бо кӧ Иса бьбә Пʹадша у Сәроккʹаһин, әԝи һьлбәт жь Йаһоԝа һинбун стандийә (Ибрн. 5:8, 9). Һәмпʹадшайед Иса жи жь алийе Йаһоԝава тен һин кьрьн кӧ щабдарийа хԝә биньн сери. Ле бәле, Йаһоԝа һәр гавәкә ԝан контрол накә, ле әԝ баԝәр дькә кӧ әԝе хԝәстьна ԝи биньн сери (Әʹйан. 5:10). Һәрге Хԝәде – йе кӧ һʹәԝщәйи аликʹарийа тʹӧ кәси нинә – щабдарийа дьдә кәсед дьн, ма нә лазьм ә кӧ әм жи ӧса бькьн? Мәсәлә, һәрге тӧ сәре малбәте йан рʹуспийе щьвате йи, ԝе баш бә кӧ тӧ һьнә щабдарийа бьди кәсед дьн, у һәр гавәкә ԝан контрол нәки. Һәрге тӧ Йаһоԝа хԝәрʹа бьки мәсәлә, баре тә ԝе дьһа сьвьк бьбә, у тӧйе кәсед дьн һин бьки у хԝәбаԝәрийа ԝан зедә бьки (Иша. 41:10). w20.08 9 ¶5-6

Йаһоԝа дьхԝазә әм ча бьн һьндава пәзед ԝийи ӧндабуйида? Иса мәрʹа мәсәләкә баш һиштийә. Әԝи заньбу кӧ Йаһоԝа һʹәму пәзед хԝә ԛимәт дькә. Ләма Иса һәр тьшт чь дәсте ԝива дьһат дькьр, сәва «пәзед мала Исраелейә ӧндабуйи» вәгәрʹинә щәм Йаһоԝа (Мәт. 15:24). Ӧса жи Иса мина шьване һʹәйф, һәр тьшт дькьр сәва тʹӧ пәзәкә Йаһоԝа ӧнда нәбә (Йуһʹн. 6:39). Паԝлосе шанди рʹуспийед жь щьвата Әфәси ширәт кьр, ԝәки чʹәʹв бьдьнә Иса. Әԝи гот: «Гәрәке бьхәбьтьн кʹомәке бьдьнә кʹәтийа у хәбәра Хӧдан Иса бир биньн кӧ дьгот: ‹Хԝәзи ль дайийа, нә кӧ ль стандийа›» (Кʹар. Шанд. 20:17, 35). Әʹйан ә ԝәки ԝи шьхӧлида иро щабдарийа рʹуспийа мәзьн ә. Салвадор, рʹуспики жь Испанйайе дьбежә: «Чахе әз дьфькьрьм кӧ Йаһоԝа пәзед хԝәйә ӧндабуйи чьԛас зәʹф һʹьз дькә, әз дьһа зәʹф дьхԝазьм һәр тьшти бькьм чь дәсте мьн те, ԝәки али ԝан бькьм. Әз баԝәр ьм ԝәки Йаһоԝа дьхԝазә, кӧ әз . . . бона ԝана хәм бькьм». w20.06 23 ¶15-16

Йаһоԝа ԝе һʹәта хьлазийа Һʹӧкӧмдарийа Һʹәзарсали сәбьр бькә кӧ әм бьбьн мәрьвед беԛьсур. Һʹәта ԝе дәме, Йаһоԝа һазьр ә кӧ шаши у гӧнед мә афу бькә. Ма нә лазьм ә кӧ әм жи дина хԝә бьдьн һʹӧнӧред баш йед мәрьвед дьн у ль ԝан сәбьр бькьн. Гава әʹрд һат әʹфьрандьн, Иса у мәләк пʹьрʹ ша бун. Гава дьнйа бь мәрьвед беԛьсурва тʹьжә  бә, йед кӧ Йаһоԝа һʹьз дькьн у ԝирʹа хьзмәт дькьн, әԝе диса чьԛас ша бьн! Ӧса жи, гава 144 000 һʹәмпʹадшайед Иса ԝе бьвиньн кӧ инсан жь ише ԝан чаԝа фәйдәйе дьстиньн, әԝе чьԛас ша бьн! (Әʹйан. 4:4, 9-11; 5:9, 10) Бинә бәр чʹәʹве хԝә кӧ гава еш, кӧл у дәрд, нәхԝәши у мьрьн ԝе һʹәта һʹәтайе тʹӧнә бьн, әме жи чьԛас ша бьн! Һʹәта ԝе рʹоже, бьра әм һʹьзкьрьн, билани у сәбра Йаһоԝа хԝәрʹа бькьн мәсәлә. Һәрге әм ӧса бькьн, әме нава тәнгасийада жи дьлхԝәшийа хԝә тʹӧ щар ӧнда нәкьн (Аԛуб 1:2-4). Ма әм бона һевийа рʹабуна мьрийа жь Йаһоԝарʹа шькьрдар ниньн? (Кʹар. Шанд. 24:15) w20.08 19 ¶18-19

Кʹьтеба Пироз әԝ һәйә пʹешкʹеша жь Хԝәде. Баве мәйи әʹзмана рʹебәри кьр, ԝәки Кʹьтеба Пироз бе ньвисаре, чьмки әԝ зарʹед хԝәйә сәр әʹрде гәләк һʹьз дькә. Бь сайа Кʹьтеба Пироз, Йаһоԝа щабед пьрсед фәрз дьдә, кʹижан кӧ бал мәрьва дькарьн пешда бен, мәсәлә: Әм ча һатьнә дьне? Нета жийина мә чь йә? У ахьрийа мә ԝе ча бә? Йаһоԝа дьхԝазә ԝәки һʹәму зарʹед ԝи щаба ԝан пьрса пебьһʹәсьн, ләма жи әԝ нава ԛьрʹнада рʹебәрийе мәрьва дькьр, кӧ сәр гәләк зьмана Кʹьтеба Пироз ԝәлгәрʹиньн. Иро Кʹьтеба Пироз нивида йан бь тʹәмами сәр 3 000 зьмана зедәтьр һәйә! Нава тʹәрихийеда тʹӧ кʹьтеб сәр һаԛас зьмана нәһатийә ԝәлгәрʹандьне у ӧса бәлабуйи нинә чаԝа Кʹьтеба Пироз. Һәрге әм Кʹьтеба Пироз дьшекьриньн, әме һәр рʹож бьхуньн, сәр бьфькьрьн, у чь кӧ әԝ һин дькә әʹмьре хԝәда биньн сери. Ӧса жи әме бьдьнә кʹьфше кӧ дьшекьриньн әве пʹешкʹеша жь Хԝәде, һәрге чьԛас дькарьн гәләк мәрьварʹа гьли кьн, кӧ Кʹьтеба Пироз чь дьбежә (Зәб. 1:1-3; Мәт. 28:19, 20). w20.05 24-25 ¶15-16

Йерәмйа пʹехәмбәр нав мәрьвед сәрт у сәрһʹьшкда хьзмәт дькьр. Щарәке, Йерәмйа һаԛас әʹщьз бу кӧ әԝи дьхԝәст хьзмәта хԝә бьһелә. Ле әԝи ӧса нәкьр. Гәло чьма? Чьмки хәбәра Йаһоԝа дь дьле Йерәмйада ԝәк агьр бу, у әԝи нькарьбу хԝә бьгьрә (Йерәм. 20:9). Гава һʹьш у дьле мә бь хәбәра Йаһоԝава тʹьжә дьбә, әм жи ӧса дьбьн. Ләма, пʹьрʹ фәрз ә кӧ әм Кʹьтеба Пироз рʹож бь рʹож леколин бькьн у ль сәр ԝе кʹур бьфькьрьн. Бь ви аԝайи, шабуна мә ԝе зедә бьбә, у хьзмәта мә ԝе һе зедә бәр бьдә (Йерәм. 15:16). Ләма, гава тӧ сәва тьштәки дьлтәнг дьби, Йаһоԝарʹа дӧа бькә кӧ әԝ али тә бькә. Бь аликʹарийа ԝи, тӧ дькари ль һьмбәри ԛьсур у кемасийед хԝә шәрʹ бьки. Һәрге тӧ нәхԝәши жи, Йаһоԝа ԝе кʹеләка тә бә у пьштгьрийа тә бькә. Ӧса жи, әԝе али тә бькә кӧ ньһерʹандьна тә йа ль сәр хьзмәта тә позитив бә. Бәле, Баве хԝәйи әʹзманирʹа дәрһәԛа хәмед хԝә гьли кә. Бь аликʹарийа ԝи, тӧ дькари сәри бь дьлтәнгийерʹа дәрхи. w20.12 27 ¶20-21

Хенщи щьвина, бона һьнә хушка гәләк мәщал ченабә ԝәки тʹәви хушк у бьра ԝәхт дәрбаз кьн. Ләма ԝе баш бә кӧ әм ль щьвина тʹәви хушка хәбәр дьн у нишани ԝан бькьн кӧ бона ԝан хәм дькьн. Ԝәк Иса, ԝе баш бә кӧ  әм тʹәви хушка ԝәхт дәрбаз бькьн (Луԛа 10:38-42). Бәлки әм дькарьн ԝан жь бо хԝарьнәкә сьвьк йан жь бо ԝәʹдәдәрбазкьрьнәкә дьн гази мала хԝә бькьн. Гава әм бь һәврʹа ԝәхт дәрбаз дькьн, гәрәке әм дәрһәԛа тьштед позитив хәбәр дьн (Рʹом. 1:11, 12). Ԝе баш бә кӧ рʹуспийед щьвате ньһерʹандьна Иса Мәсиһ хԝәрʹа бькьн мәсәлә. Иса заньбу кӧ азәпбун ль һьнәка зор те, ле әԝи нишан кьр кӧ жь бо бәхтәԝарийа рʹасти, әʹсәйи нинә кӧ кәсәк бьзәԝьщә йан зарʹа бинә дьнйайе (Луԛа 11:27, 28). Сәва кӧ әм бь рʹасти бәхтәԝар бьн, лазьм ә ԝәки әм һәри зедә дина хԝә бьдьн хьзмәта Йаһоԝа (Мәт. 19:12). Илаһи фәрз ә кӧ рʹуспийед щьвате жьнед амьн ԝәк хушк у дайькед хԝә һʹәсаб кьн. Ԝе баш бә кӧ рʹуспийед щьвате пешийа йан паши щьвина ԝәхт вәԛәтиньн кӧ тʹәви хушка хәбәр дьн. w20.09 21-22 ¶7-9

Ԝәлате Исраелда щоткʹар тʹохьм паши баранед пешьн пайизе дьрʹәшанд, ле бәре әʹрде паши баранед пашьн бьһаре тʹоп дькьр (Марԛ. 4:28). Ԝе баш бә әм жи мина щоткʹарʹа бьсәбьр бьн. Ле бәле, әв йәк щарьна һеса нинә. Әм ԛьсурдар ьн, ләма әм дьхԝазьн бәре кʹәда хԝә зу-зу бьстиньн. Ле һәгәр әм дьхԝазьн кӧ бахче мә бәрдар бә, гәрәке әм бәрдәԝам кьн бькʹольн, бьчиньн, зиԝана жь кʹокева рʹакьн у ав бьдьн. Жь бо ише һинкьрьне жи пʹьрʹ ԝәхт у хирәт лазьм ә. Мәсәлә, ԝәхт лазьм ә кӧ әм али хԝәндәкʹаред хԝә бькьн кӧ «зиԝана» жь дьле хԝә дәрхьн, демәк фьрԛийе нәкьнә ортʹа мәрьва у бетʹалаш нибьн. Гава әм рʹасти тәнгасийа тен, сәбьр дькарә али мә бькә ԝәки әм дьлтәнг нәбьн у дьлхԝәшийа хԝә ӧнда нәкьн. Һәгәр һьнә кәс һазьр ьн кӧ гӧһ бьдьн мә, диса жи лазьм ә кӧ әм бьсәбьр бьн. Әм нькарьн баԝәрийа хԝәндәкʹаред хԝә бь зоре мәзьн бькьн. Щарьна шагьртед Иса Мәсиһ жи зу фәʹм нәдькьр кӧ әԝи дьхԝәст чь бьгота (Йуһʹн. 14:9). Гәрәке әм жи бир нәкьн кӧ әм чьԛас бьчиньн у ав бьдьн жи, йе кӧ мәзьн дькә, Хԝәде йә (1 Корн. 3:6). w20.09 11 ¶10-11

Әм гьшк дьхԝазьн кӧ хԝәндәкʹаред мә пешда һәрʹьн у рʹожәке бенә ньхӧмандьне. Чь дькарә али ԝан бькә кӧ әԝ бьгьһижьн ве нете? Мәсәлә, пʹьрʹ фәрз ә кӧ әм ԝан һелан бькьн ԝәки әԝ бен щьвина. Гәләк хԝәндәкʹаред кӧ жь дәстпекева тен щьвина алийе рʹӧһʹанива зу пешда дьчьн. Һьнә дәрсдар хԝәндәкʹаред хԝәрʹа дьбежьн кӧ бона һинбуна Кʹьтеба Пироз, һинкьрьна кӧ щьватада те дайин мина һинбуна шәхси фәрз ә. Ибрани 10:24, 25 тʹәви хԝәндәкʹар бьхунә у ԝирʹа шьровәкә кӧ чь кʹаре әԝ дькарә жь щьвата бьстинә. Нә бәс ә кӧ тӧ ԝи тʹәне тʹәглиф бьки кӧ бе сәр щьвате. Бона кӧ тӧ хԝәстьна ԝи зедә бьки, бь хирәт бәʹса тьштәки хԝәш бькә, йа кӧ тӧ ль щьвинәке һин буйи. Тьштед кӧ хԝәндәкʹаре тә ԝе ль щьвина бьвинә у бьбьһе, ԝе жь һʹәму тьштед кӧ әԝи ль щьвинед баԝәрийед дьн дитьнә йан бьһистьнә, хԝәштьр бьн (1 Корн. 14:24, 25). Бь сәрда, әԝе кәсед дьн нас бькә, йед кӧ дькарьн ԝирʹа бьбьн мәсәлед баш у али ԝи бькьн кӧ әԝ бәрбь ньхӧмандьне һәрʹә. w20.10 10-11 ¶14-15

Рʹӧһʹе Хԝәде ԝе али тә бькә ԝәки тӧ тьштед кӧ дь Кʹьтеба Пирозда дьхуни у леколин дьки, жийана хԝәда пек бини. Мина зәбурбеж дӧа бькә: «Хӧдан рʹийа Хԝә мьн һин кә, кӧ әз рʹастийа Тәда һәрʹьм, бькә кӧ дьле мьн жь наве Тә хоф бькә» (Зәб. 86:11). Хԝарьна рʹӧһʹани, йа кӧ Йаһоԝа бь сайа Кʹьтеба Пироз у тʹәшкиләта хԝә дьдә мә, тʹьме бьстинә. Нета тә һьлбәт нә тʹәне әв ә кӧ тӧ занәбуна хԝә зедә бьки, ле әв ә кӧ тӧ рʹастийе теки дьле хԝә у хԝәрʹа бьки рʹебәр. Рʹӧһʹе Йаһоԝа дькарә али тә бькә кӧ тӧ ве йәке бьки. Ӧса жи, һелане бьдә хушк у бьра (Ибрн. 10:24, 25). Әв йәк чьрʹа фәрз ә? Чьмки әԝана малбәта тәйә рʹӧһʹани нә. Ләма, дӧа бькә кӧ рʹӧһʹе Хԝәде али тә бькә ԝәки тӧ бькарьби ль щьвина щабед жь дьл бьди у щабдарийед хԝә бь аԝайәки баш пек бини. Бь ви щурʹәйи, тӧ дькари нишани Йаһоԝа у Иса Мәсиһ бьки кӧ тӧ «бәрхед» ԝанә ԛимәт, һʹьз дьки (Йуһʹн. 21:15-17). Ләма жи гӧһ бьдә Мамостайе хԝәйи Мәзьн у һʹәму һинкьрьнед ԝи бьдә хәбате. w20.10 24-25 ¶15-17

Гава шандийед Иса Мәсиһ жь бо дәмәке сьст бун, әԝи чь кьр? Паши кӧ Иса жь мьрьне рʹабу, әԝи һьнә шагьртед хԝәрʹа ӧса гот: «Нәтьрсьн! Һәрʹьн бежьнә бьред мьн, кӧ [әз рʹабумә]» (Мәт. 28:10а). Иса һевийа хԝә жь  шандийа нәбьри. Рʹаст ә ԝана Иса һиштьн, ле әԝи ԝанрʹа гот «бьред мьн». Мина Йаһоԝа, Иса Мәсиһ жи йәки рʹәʹм бу у дь бахшандә мәрьва (2 Пʹадш. 13:23). Мина ве йәке, һәрге жи һьнә кәс хьзмәте данә сәкьнандьне, әм диса жи бона ԝана хәм дькьн. Әԝана диса жи хушк у бьред мә нә, у әм ԝана һʹьз дькьн! Әм кʹәда ԝан бир накьн. Һьнә жь ԝан гәләк сала бь дьл у щан бона Йаһоԝа хьзмәт кьрьбун (Ибрн. 6:10). Әм бь рʹасти жи бира ԝан дькьн! (Луԛа 15:4-7) Ләма жи әм гәрәке хушк у бьред ӧса, кʹижан рʹӧһʹанида сьст бунә һелан кьн кӧ бенә щьвате. У гава йәк жь ԝан бен Одед щьвате, әм гәрәке бь дьлгәрми рʹасти ԝи бен. w20.11 6 ¶14-17

Щарәке, Аԛуб у Йуһʹәннайе шанди тʹәви дийа хԝә чун бал Иса кӧ ԛәдрәки мәхсус бьхԝазьн. Ԝе гот: «Әʹмьр бькә кӧ әв һәрдӧ кӧрʹед мьн, Пʹадшатийа тәда йәк ль мьле тә йе рʹасте, йе дьн ль мьле тә йе чʹәпе рʹуне». Ле Иса ԝерʹа гот кӧ тʹәне Хԝәде дькарә сафи кә кӧ кʹи ԝе Пʹадшатийеда ль мьле Иса йе рʹасте у чʹәпе рʹуне (Мәт. 20:20-23, ИМ). Иса синоред хԝә бь мьлукти ԛәбул дькьрьн. Әԝ тʹӧ щара жь готьнед Йаһоԝа дәрнәдькʹәт (Йуһʹн. 12:49). Әм чаԝа дькарьн мина Иса бьн? Жь бо кӧ әм мина Иса бьн, гәрәке әм гӧһ бьдьн ве ширәта Кʹьтеба Пироз жь рʹеза иройин. Ләма, һәрге кәсәк бе бал мә у жь мә ширәте бьхԝазә, гәрәке әм рʹьнд бьфькьрьн бәри кӧ әм ширәте бьдьн ԝи у зоре ль ԝи нәкьн кӧ әԝ ньһерʹандьна мә ԛәбул бькә. Ԝе баш бә кӧ әм дина мәрьва бькʹьшиньн сәр ширәтед Кʹьтеба Пироз у әʹдәбйәтед тʹәшкиләте. Бь ви аԝайи, әм дькарьн пәсне Йаһоԝа бьдьн у нишан бькьн кӧ әм синоред хԝә заньн (Әʹйан. 15:3, 4). w20.08 11-12 ¶14-15

Һәгәр тӧ дьфькьри кӧ хушк йан бьрак һʹәԝщәйи ширәте йә, гәрәке тӧ чь бьки? Пешийа кӧ тӧ ширәте бьди кәсәки, жь хԝә бьпьрсә: «Гәло әԝ бь рʹасти һʹәԝщәйи ве ширәте йә?» Һьнә кәс хԝә бь зедәйи рʹаст һʹәсаб дькьн, ләма әԝ мәрьва нә ль гора принсипед Йаһоԝа, ле ль гора ньһерʹандьна хԝә мәрьва сущдар дькьн, у мәрьвед ӧса гәләк щара дьлрʹәʹм ниньн. Һәгәр бь рʹасти лазьм бә кӧ тӧ ширәте бьди һәвале хԝә, ԝирʹа бь зәлали бежә кӧ проблем чь йә, у бь аликʹарийа пьрса али һәвале хԝә бькә кӧ әԝ шашийа хԝә фәʹм бькә. Бир нәкә кӧ гәрәке һәвале тә нә ль бәр тә, ле ль бәр Йаһоԝа һʹәсабе хԝә бьдә (Рʹом. 14:10). Ләма, гава тӧ ширәте дьди  кәсәки, Хәбәра Хԝәде бьдә хәбате у мина Иса Мәсиһ дьлрʹәʹм бә (Мәтʹлк. 3:5; Мәт. 12:20). Гәло чьма? Чьмки һәгәр әм һьндава кәсед дьн дьлрʹәʹм бьн, Йаһоԝа жи ԝе һьндава мәда дьлрʹәʹм бә (Аԛуб 2:13). w20.11 21 ¶13

Ԝәйе бьхԝәста кӧ мәрьв сәр һʹиме рʹәнге чʹәрме ԝә, йан сьфәте ԝә, йан жи бәжьн-бала ԝә ломә ԝә бькьн? Фәʹмдари йә тʹӧ кәс ве йәке нахԝазә. Рʹасти жи әм чьԛас дьлбинийе дьстиньн кӧ заньн, ԝәки Йаһоԝа тʹӧ щар ль гора дитьна чʹәʹве мәрьва, диԝана мә накә! Биньн бира хԝә, чахе Самуйел кӧрʹед Йеша ньһерʹи, әԝи әԝ йәк нәдит чь кӧ Йаһоԝа дит. Йаһоԝа готә Самуйел, ԝәки кӧрʹәки Йеша ԝе бьбә пʹадше Исраеле. Ле кʹижан? Гава Самуйел кӧрʹе Йешайи мәзьн Әлийаб дит, гот: «Бь рʹасти жи мәсиһе Хӧдан ль бәр ԝи йә!» Әлийаб йәки бәрбьчʹәʹв бу, ләма жи Самуйел тʹьре әԝ ә бьжартийе Хԝәде. Ле Йаһоԝа готә Самуйел: «Ль хӧйабуна ԝи у дьрежийа ԛама [бәжьна] ԝи нәньһерʹә; жь бәр кӧ ԝи рʹәд кьрьм». Әԝ гьли чь дәрсе мә һин дькьн? Йаһоԝа гот: «Мәрьв ль ԝәщ [рʹу] дьньһерʹә; ле бәле Хӧдан ль дьл дьньһерʹә» (1 Сам. 16:1, 6, 7). Бәле, әм гәрәке һьндава хушк-бьрада ӧса бьн ча Йаһоԝа. w20.04 14 ¶1; 15 ¶3

Иса бәр зәвийарʹа дәрбаз дьбә, кʹижан кӧ дьбәкә йед щәһ бун у тʹәзә шин дьбун (Йуһʹн. 4:3-6). Әԝ зәви ԝе ԝәкә чар мәһада зәр буна у дьрутьнерʹа һазьр буна. Ле әʹщебмайи йә Иса чьрʹа ӧса гот: «Чʹәʹвед хԝә вәкьн у дина хԝә бьдьнә зәвийа, әԝ чаԝа зәр бунә, дьрутьнерʹа һазьр ьн!» (Йуһʹн. 4:35, 36) Әԝи бь ԝан гьлийа чь дьхԝәст бьгота? Ча те кʹьфше Иса нә кӧ дәрһәԛа дьруна зәвийа дьгот, ле дьруна рʹӧһʹани. Дина хԝә бьдьне, һʹәта Иса әԝ гьли бьгота, чь ԛәԝьми. Рʹаст ә Щьһуйа хԝә жь мәрьвед Самәри дур дьгьртьн, ле Иса жьнәкә Самәрирʹа шәʹдәти да у әԝе гӧһ да ԝи! У чахе Иса дәрһәԛа зәвийед кӧ «дьрутьнерʹа һазьр» бун, хәбәр да, һьнге әʹлаләта Самәри, кӧ жь ве жьньке дәрһәԛа Иса пеһʹәсийабун, рʹеда бун, дьһатьн сәва ԝи бьвиньн у дәрһәԛа ԝи һе зедә пебьһʹәсьн (Йуһʹн. 4:9, 39-42). Леколинкʹарәки Кʹьтеба Пироз дәрһәԛа ве ԛәԝьмандьне дьбежә: «Әԝ йәк кӧ щьмәʹт зу һатьн щәм Иса сәва ԝи бьбьһен . . . дьда кʹьфше кӧ әԝана мина зәвийе гьһишти һазьр бун сәва нандьруне». w20.04 8 ¶1-2

Бь сайа щьвина, әм дькарьн бьбьн дәрсдаред баш. Мәсәлә, әм һин дьбьн кӧ әм чаԝа дькарьн Һащәтед Сәрәкә бона Һинкьрьне бь һостәти бьдьнә хәбате. Ләма жи бона щьвата рʹьнд һазьр бә. Ԝәʹде щьвина рʹьнд гӧһ бьдә. Паши щьвина чь тӧ һинбуйи бьдә хәбате. Бь ви щурʹәйи тӧйе бьби «әскәре Мәсиһ Исайи ԛәнщ» (2 Тимотʹейо 2:3). Сәрда жи, бь милйона мәләкед ԛәԝат кʹеләка мә нә. Бинә бәр чʹәʹве хԝә кӧ тʹәне мәләкәк дькарә чь бькә! (Ишайа 37:36) У ньһа, бинә бәр чʹәʹве хԝә кӧ бь милйона мәләк дькарьн чь бькьн! Инсан бә йан щьн бә, тʹӧ кәс нькарә һьмбәри ордийа Йаһоԝа сәркʹәвә. Һәгәр Йаһоԝа тʹәви мә бә, һәжмара дьжмьна ԛәт тьштәк нинә (Һʹакьмти 6:16). Һәгәр һәвалхәбатчи, һәвалдәрсхан йан мәрьвәки тә мьԛабьли тә рʹадьбә, бир нәкә кӧ дь ви шәрʹида тӧ тʹәне нини. Һʹәта кӧ тӧ гӧһ бьди рʹебәрийа Йаһоԝа, әԝе пьштгьрийа тә бькә. w21.03 29 ¶13-14

Әв ньһерʹандьна нәрʹаст пешийа рʹожед Паԝлос жи һәбу. Мәсәлә, Ишайа 22:13 дьбежә ԝәки Исраелийед кӧ жь Хԝәде дур дькʹәтьн у ль хԝәстьнед хԝә дьгәрʹийан, әʹйни тьшт дьготьн. Иро жи, гәләк кәс дьбежьн: «Жийан кьн ә, ль кʹефа хԝә бьньһерʹә!» Әԝ йәк кӧ Йаһоԝа дькарә мьрийа рʹакә, гәрәке сәр бьжартьна мә дәрһәԛа һәвала һʹӧкӧм кә. Мәсәлә, лазьм бу кӧ хушк у бьред ль Корьнтʹе хԝә жь кәсед кӧ рʹабуна мьрийа баԝәр накьн, дур бьгьрьн. Әв йәк тьштәки фәрз мә һин дькә: Ԝе баш бә кӧ әм  тʹәви кәсед кӧ тʹәне бона иро дьжин һәвалтийе нәкьн, чьмки һәгәр әм бь кәсед ӧсарʹа пʹьрʹ ԝәхт дәрбаз кьн, әԝана дькарьн сәр ньһерʹандьн у рʹабун-рʹуньштьна мә хьраб һʹӧкӧм бькьн. Ләма, Паԝлосе шанди шагьртед Иса Мәсиһ ӧса тʹәми дькьрьн: «Рʹаст бьфькьрьн, сәр һʹьше хԝәда ԝәрьн, иди гӧна нәкьн» (1 Корн. 15:33, 34). w20.12 9 ¶3, 5-6

Әв рʹез нишани мә дькә кӧ Йаһоԝа малбәта хԝә йа ль әʹзмана у ль сәр әʹрде чаԝа организә кьрийә. Сәрити һʹӧкӧм у щабдарийева гьредайи йә. Йе һәри бьльнд Йаһоԝа йә, ләма жи һʹәму мәләк у инсан ль бәр ԝи щабдар ьн (Рʹомайи 14:10; Әфәси 3:14, 15). Йаһоԝа сәрԝертийа ль сәр щьвате дайә дәсте Иса Мәсиһ, ле Иса диса жи бона хер-хԝәшийа щьвате ль бәр Йаһоԝа щабдар ә (1 Корьнтʹи 15:27). Ӧса жи, Йаһоԝа щабдари ль сәр жьн у зарʹа дайә дәсте мер. Ле ча мер дькарә бьбә малхе баш? Йа әʹԝльн, әԝ гәрәке фәʹм бькә кӧ чь Хԝәде жь ԝи дәʹԝа дькә. Гәрәке әԝ бьзаньбә кӧ чьма Йаһоԝа сәрити саз кьрийә у чаԝа әԝ дькарә чʹәʹв бьдә Йаһоԝа у Иса Мәсиһ. Чьма әв йәк ӧса фәрз ә? Чьмки Йаһоԝа әв щабдари дайә сәре малбәте, у дьхԝазә кӧ әԝ ве щабдарийе рʹаст бинә сери (Луԛа 12:48б). w21.02 2 ¶1-3

Ԝе баш бә кӧ чʹәʹв бьдьнә Йаһоԝа ве йәкеда, кӧ һьнә тьшта бира хԝәда хԝәй нәкьн. Мәсәлә, рʹаст ә бира Йаһоԝа кʹамьл ә, ле чахе әм гӧнед хԝә тʹобә дькьн, әԝ ван гӧна бир дькә у дьбахшиньнә мә (Зәб. 25:7; 130:3, 4). У чахе мәрьв дьле мә дешиньн, ле бахшандьне жь мә дьхԝазьн, әм жи гәрәке мина Йаһоԝа бир кьн у бьбахшиньнә ԝан (Мәт. 6:14; Луԛа 17:3, 4). Әме нишан кьн кӧ пʹешкʹеша жь Хԝәде дьшекьриньн, демәк мәжу, һәрге әве пʹешкʹеше бьдьнә хәбате сәва пәсьна бьдьнә Ԝи. Һьнә мәрьв мәжийе хԝә бона кʹара хԝә дьдьнә хәбате, демәк хԝәха сафи дькьн бона ԝан чь ԛәнщ ә у чь хьраб ә. Ле чьмки Йаһоԝа әм әʹфьрандьнә, логики йә ԝәки принсипед ԝи дьһа баш ьн, нә кӧ принсипед кӧ әм хԝәха хԝәрʹа датиньн (Рʹом. 12:1, 2). Чахе әм принсипед ԝи тиньн сери, әм әʹдьлайеда дьжин (Иша. 48:18). Әԝ йәк нете дьдә әʹмьре мә, кӧ әм пәсьна дьдьнә Әʹфьрандар у Баве хԝә, у дьле ԝи ша дькьн (Мәтʹлк. 27:11). w20.05 23-24 ¶13-14

Гәло әм чаԝа дькарьн хушк у бьра дьһа зедә һʹьз бькьн? Һәгәр әм ԝана дьһа незик нас бькьн, мәрʹа ԝе дьһа һеса бә кӧ ԝана фәʹм бькьн у һʹьз бькьн. Фьрԛи тʹӧнә хушк-бьред мә чәнд сали нә у жь  кʹижан мьләти нә, диса жи әм дькарьн ԝанрʹа һәвалтийе бькьн. Йонатʹан ԝәкә 30 сал жь Даԝьд мәзьнтьр бу, ле әԝ диса жи бунә достед һәв. Гава кӧ әм тʹәви хушк йан бьраки жь мә мәзьнтьр йан бьчʹуктьр һәвалтийе дькьн, әм нишан дькьн кӧ әм тʹәмамийа бьратийа хԝә һʹьз дькьн (1 Пәтрус 2:17). Гәло әв йәк те һʹәсабе кӧ гәрәке әм тʹәви һʹәму хушк у бьра бьбьнә достед незик? На, әв йәк набә. Бь рʹасти инсан хԝә дьһа незики ԝан кәса тʹәхмин дькә, йед кӧ мина ԝи әʹйни тьшта һʹьз дькьн у бь әʹйни тьшта мьжул ьн. Иса Мәсиһ жи һʹәму шандийед хԝә ԝәк достед хԝә һʹәсаб дькьр, ле әԝи Йуһʹәнна бь мәхсуси һʹьз дькьр (Йуһʹәнна 13:23; 15:15; 20:2). Диса жи, Иса Мәсиһ щӧдәти нәдькьрә дь нав шагьртед хԝәда (Марԛ. 10:35-40). w21.01 23 ¶12-13

Паԝлосе шанди тʹәви пʹутпʹарьстед Атʹинайеда щурʹәки майин хәбәр да, нә кӧ чаԝа тʹәви Щьһуйед жь кʹьниште. Әԝи рʹьнд дина хԝә дайе дор-бәре ԝи чь бу, у әʹдәтед дине мәрьва чь щурʹәйи нә (Кʹар. Шанд. 17:23). Ль гора ве йәке, Паԝлос тедәрхьст кӧ әԝана жь Ньвисаред Пироз чьда дькарьн тʹәви ԝи ԛайил бьн, у бь ван тьшта хәбәрдана хԝә дәстпекьр. Бәле, Паԝлос тʹьме чахе лазьм бу щурʹе хәбәрдана хԝә дьгӧһаст. Әԝи Атʹинарʹа гот, ԝәки әԝ чь кӧ ԝанрʹа дьбежә жь «Хԝәдейе Нәнас» ә, кʹижан кӧ әԝана дьһʹәбиньн. Рʹаст ә пʹутпʹарьста Ньвисаред Пироз ньзаньбун, ле Паԝлос нәдьфькьри ԝәки әԝана ԝе тʹӧ щар нькарьбьн бьбьнә Мәсиһи. Дәԝсе, әԝи һʹәсаб дькьр, ԝәки әԝана мина зәвийед зәрбуйи, дьрунерʹа һазьр ьн, у чахе лазьм бу әԝи щурʹе бәлакьрьна мьзгинийе дьгӧһаст. Мина Паԝлос дина хԝә бьдьне дор-бәре мәрьва. Дина хԝә бьдьнә ԝан тьшта, чь кӧ нишан дькьн, ԝәки мәрьвед мьһала ԝәда чь баԝәр дькьн. Бәʹса хәбәре, дәр-доре хԝәйе мале чь щурʹәйи йә? Наве ԝи, кʹьнщ, хәмьландьн йан жи хәбәрдана ԝи дәрһәԛа дине ԝи чь дьдә кʹьфше? w20.04 9-10 ¶7-8