Мьждар

Әм дәрһәԛа Уньс нә һәр тьшти заньн, у ләма аликива мәрʹа те кʹьфше, кӧ әԝ мәрьвәки бь итʹбар нибу, у һәла һе жи йәки нәамьн бу. Әԝи жь Йаһоԝа тʹәми станд, ԝәки һәрʹә Нәйноԝайе у дәрһәԛа диԝана Йаһоԝа әʹлам кә. Ле Уньс гӧрʹа Йаһоԝа нәкьр, дәԝсе рʹабу кӧ «жь бәр чʹәʹве Хӧдан бьрʹәвә» (Унс. 1:1-3). Һәрге һун буна, ԝәйе диса мәщал бьда Уньс, ԝәки ԝи шьхӧли бинә сери? Дьбәкә жи на. Ле Йаһоԝа һʹәсаб кьр, кӧ Уньс һежа йә диса мәщале бьстинә (Унс. 3:1, 2). Жь дӧайе Уньс те кʹьфше, кӧ әԝ дьлда мәрьвәки ча бу (Унс. 2:1, 2, 9). Бешьк, Уньс тʹьме Йаһоԝарʹа дӧа дькьр, ле әв дӧайе ԝи зьке мәʹсида, али мә дькә, ԝәки әм сәр ԝи ӧса нәньһерʹьн ча сәр мәрьвәки тьрсонәк, йе кӧ жь щабдарийа хԝә рʹәви. Гьлийед ԝи әʹйан дькьн, ԝәки әԝ мәрьвәки мьлук у шекьрдар бу, у дьхԝәст гӧрʹа Йаһоԝа бькә. Бәле, Йаһоԝа дина хԝә да дьле ԝи, нә кӧ тʹәне кьре ԝи. Әԝи щаба дӧайе Уньс да у диса жи ԝи һʹәсаб дькьр ча пʹехәмбәре хԝә! Рʹасти жи чьԛас фәрз ә, ԝәки һәр рʹуспи пешийа кӧ ширәтәке бьдә, избаткьрьна пебьһʹәсә. w20.04 15 ¶4-6

Мәсиһийед ԛьрʹна йәке әԝ һинкьрьн ԛәбул кьрьн у баԝәр дькьрьн, кӧ рʹӧһʹе пироз ԝе али ԝан бькә, ԝәки Хәбәра Хԝәде фәʹм кьн. Бь сайа леколинкьрьне әԝана баԝәр бун, ԝәки әԝ һинкьрьн сәр һʹиме Ньвисара бун (Кʹар. Шанд. 17:11, 12; Ибрн. 5:14). Баԝәрийа ԝан тʹәне сәр һʹиме һәст у емосийед ԝан нибу. Ӧса жи ԝана нә тʹәне бона ԝе йәке Йаһоԝарʹа хьзмәт дькьрьн, кӧ ԝанрʹа һʹәԝас бу тʹәви хушк-бьра бьн. Ле дәԝсе баԝәрийа ԝан сәр һʹиме «занәбуна Хԝәде» бу (Колс. 1:9, 10). Рʹастийед Хәбәра Хԝәде найенә гӧһастьне (Зәб. 119:160). Мәсәлә, әԝ рʹасти найенә гӧһастьне һәрге хушк йан бьра, мә дьдьнә хәйдандьне йан жи гӧне гьран дькьн. У әԝ ӧса жи найенә гӧһастьне чахе әм рʹасти чәтьнайа тен. Ләма жи әм гәрәке һинкьрьнед Кʹьтеба Пироз рʹьнд бьзаньбьн у баԝәр бьн, ԝәки әԝ һинкьрьн рʹаст ьн. Баԝәрийа мәйә сәр һʹиме рʹастийед Кʹьтеба Пироз, ԝәʹде чәтьнайа ԝе мә ԛәԝи кә, чаԝа кӧ ләнгәр ԝәʹде фьртоне гәмийе хԝәй дькә. w20.07 9 ¶6-7

Әм чь жи бона бьред бь рʹӧһʹ кʹьфшкьри дькьн, Иса һʹәсаб дькә кӧ әм бона ԝи дькьн (Мәт. 25:34-40). Ле йа лапә фәрз кӧ чьда әм дькарьн али ԝан бькьн әԝ ә, кӧ бь хирәт шагьрта һазьр кьн, демәк ԝи шьхӧли бькьн, рʹебәрийа кʹижани Иса дькә (Мәт. 28:19, 20). Әԝ бьред Мәсиһ бе аликʹарийа «пәзед . . . дьн» нькарьн ви шьхӧле мәзьнә һʹәмдьнйайе бькьн, кӧ иро те кьрьне (Йуһʹн. 10:16). Һәрге һун бь рʹӧһʹ кʹьфшкьри ниньн, һәр щар чахе һун хьзмәт дькьн, һун һʹьзкьрьна хԝә дьдьнә кʹьфше нә тʹәне һьндава бьред кʹьфшкьри, ле ӧса жи һьндава Иса. Әм ӧса жи дьбьнә достед Йаһоԝа у Иса, чахе пʹәра ԛӧрбан дькьн бона шьхӧле кӧ әԝана рʹебәри дькьн (Луԛа 16:9). Мәсәлә, әм дькарьн ԛӧрбана бькьн сәва шьхӧле һʹәмдьнйайе, кʹижан кӧ те хәрщкьрьне бона аликʹарийа хушк-бьра йед кӧ жь тʹәшԛәла зийан стандьнә. Әм дькарьн пʹәра ԛӧрбан кьн ӧса жи сәва щьвата хԝә у сәва аликʹарийа хушк-бьред дәсттәнг (Мәтʹлк. 19:17). w20.04 24 ¶12-13

Ль гора ве пʹехәмбәртийе пʹадше бакӧре һьндава «Хԝәдейе кал-бавед хԝә», ԛәдьр нишан нәкьр. Чь щурʹәйи? Йәктийа Совйәте пе ве нете кӧ кʹока религийа бинә, һәр тьшт дькьр сәва ԛәԝата тʹәшкиләтед религи сьст кә. Ләма жи сәрԝеред Совйәте бона ве йәке һәла һе жь сала 1918 фәрманәки ӧса дан, кʹижан кӧ һʹим дани ԝәки мәкʹтәбада атеизм бе һинкьрьне. Ле ль гора пʹехәмбәртийе, пʹадше бакӧре ча пәсьн да хӧдане «бьрща»? Йәктийа Совйәте беһʹәсаб пʹәрә хәрщ кьр, сәва ордийа хԝә ԛәԝи кә, у бь һʹәзара бомбед атоме чекьр, ԝәки ԛәԝата хԝә мәзьн кә. Һьн пʹадше бакӧре һьн жи пʹадше башуре, ахьрийеда хԝәрʹа чʹәкед ӧса ԛәԝи тʹоп кьрьн, кӧ дькарьн ԛьрʹа бь милйарда мәрьва биньн! Пʹадше бакӧре тʹәне тьштәкида пьштгьрийа пʹадше башуре кьр: Әԝана һәрдӧ жи «тьште мәкруһ йе кӧ хьраб дькә» ава кьрьн, демәк тьште һʹәрам, кӧ бь симболик те һʹәсабе тʹәшкиләта Мьләтед Йәкбуйи (Дан. 11:31). w20.05 6-7 ¶16-17

Кʹе дькарә ԝан хушк-бьред кӧ жь щьвате дур кʹәтьнә, бьгәрʹә? Гьшк, демәк рʹуспи, пешәнг, нәфәред мале, у хушк-бьред щьвате дькарьн ве йәкеда аликʹарийе бьдьн. Дьбәкә һәвал йан мәрьвед ԝәйи незик хьзмәтийа хԝә данә сәкьнандьне. Йан жи дьбәкә һун мал бь мал, йан ԝәʹде хьзмәтийа бәр стенде, рʹасти ԝан бен. Ԝанрʹа бежьн кӧ һәрге әԝана ԛайил ьн ԝәки кәсәк тʹәсәлийа ԝан бькә, әме бь шабун адрес йан һәжмара тʹела ԝан, бьдьнә рʹуспийед мьһала ԝан. Томас, кӧ рʹуспи йә, дьбежә: «Пешийе әз жь хушк-бьра дьпьрсьм, ԝәки әԝед ӧндабуйи ньһа кʹидәре дьжин. Йан жи дьбежьм, ԝәки биньн бира хԝә, һәла кʹе ида гәләк ԝәхт найе щьвате. Паше әз тʹәсәлийа ԝан хушк-бьра дькьм, йед кӧ жь щьвате дур кʹәтьн, у дьпьрсьм һәла зарʹ у мәрьвед ԝани незик ча ньн. Һьнәк жь ԝан хушк-бьра бәре тʹәви зарʹед хԝә дьһатьнә щьвате, у әԝ зарʹ дьбәкә ԝәʹдәки мьзгинван бун. Ԝанрʹа жи аликʹари лазьм ә, ԝәки вәгәрʹьн щәм Йаһоԝа». w20.06 24 ¶1; 25 ¶6-7

Жь һʹәму әʹфринед сәр әʹрде, тʹәне мәрьв дькарьн ԛәԝьмандьнед бәре биньн бира хԝә, кʹур сәр бьфькьрьн, у сәр һʹиме ве йәке хԝәрʹа дәрса һин бьн. Бь ви щурʹәйи әм дькарьн бьбьнә мәрьвнә һе баш, у щурʹе фькьрандьна хԝә у жийина хԝә бьгӧһезьн (1 Корн. 6:9-11; Колс. 3:9, 10). Демәк, әм дькарьн исафа хԝә һин кьн, кӧ ԛәнщи у хьрабийе жь һәв дәрхьн (Ибрн. 5:14). Әм ӧса жи дькарьн һин бьн кӧ һʹьзкьрьне бьдьнә кʹьфше, дьлшәԝат у рʹәʹм бьн, у чʹәʹв бьдьнә һәԛийа Йаһоԝа. Щурʹәки кӧ ча әм дькарьн рʹазибуна хԝә бьдьнә кʹьфше бона ве пʹешкʹеше кӧ бира мә һәйә, әԝ ә кӧ бир нәкьн, ԝәки Йаһоԝа ча һʹәму дәрәщада али мә дькьр у дьлбини дьда мә. Бь ве йәке баԝәрийа мә ԝе һе ԛәԝи бә, ԝәки Хԝәде ԝе ахьрийеда жи али мә бькә (Зәб. 77:12; 78:4, 7). Әме ӧса жи бьдьнә кʹьфше, кӧ әве пʹешкʹеше ԛимәт дькьн, һәрге бир нәкьн у бьшекьриньн ԛәнщийа мәрьва һьндава хԝә. Леколинкʹара тедәрхьстьнә, ԝәки мәрьвед шекьрдар дьһа бәхтәԝар ьн. w20.05 23 ¶12-13

Бьфькьрьн кӧ Муса чь тʹәхмин кьр, гава ԛәльштока ԛәйеда бу у хәԝн-хәйаледа дит, кӧ рʹумәта Йаһоԝа бәр ԝирʹа дәрбаз бу. Дькарьн бежьн кӧ пешийа һатьна Иса сәр әʹрде, бона мәрьва әԝ ԛәԝьмандьн йа пешьн бу кӧ лапә мәхсус бу. Һьнге Муса әԝ гьли бьһист, кʹижан кӧ мәләк гот: «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һӧб у амьнийеда хьнейо, кӧ бона һʹәзара хԝәйе һʹӧба амьн ә, нәһәԛийе, нәрʹастийе у гӧна дьбахшинә» (Дәркʹ. 33:17-23; 34:5-7). Дьԛәԝьмә чахе Муса наве Йаһоԝа һьлдьда, әԝ ԛәԝьмандьна мәхсус дькʹәтә бира ԝи йа жь рʹеза иройин. Чахе әм дәрһәԛа наве Йаһоԝа дьфькьрьн, әм гәрәке ӧса жи бьфькьрьн кӧ әԝ йәки ча нә. Әм гәрәке дәрһәԛа һʹӧнӧред ԝийи ӧса бьфькьрьн, ча ԛәԝат, билани, һәԛи у һʹьзкьрьн. Һәрге әм сәр ԝан һʹӧнӧра у һʹӧнӧред дьн бьфькьрьн, әме һе зедә һелан бьн ԛәдьр-һӧрмәте бьдьнә ԝи (Зәб. 77:11-15). w20.06 8-9 ¶3-4

Иса гот кӧ шагьртед ԝи ԝе пе һʹьзкьрьне бенә наскьрьне (Йуһʹн. 13:34, 35). Ле сәва кӧ баԝәрийа мә ԛәԝи бә, диса һьнә тьшт лазьм ьн. Баԝәрийа мә гәрәке нә тʹәне сәр һʹиме һʹьзкьрьна һьндава щьмәʹта Хԝәде бә. Чьрʹа? Чьмки һәрге баԝәрийа мә тʹәне сәр һʹиме ве һʹьзкьрьне бә, әм дькарьн һеса баԝәрийа хԝә ӧнда кьн. Мәсәлә, дьбәкә әм бьлькʹӧмьн у хьзмәтийа хԝә Йаһоԝарʹа бьдьнә сәкьнандьне һәрге хушкәк йан бьрак, йан жи һәла һе рʹуспи йан пешәнг, гӧнәки гьран бькә. Әм ӧса жи дьбәкә бьлькʹӧмьн, һәрге кәсәк дьле мә бешинә йан жи бьбә рʹабәр у бежә кӧ баԝәрийа мә нә рʹаст ә. Ләма жи һәрге һун дьхԝазьн баԝәрийа ԝә ԛәԝи бә, әԝ гәрәке сәр һʹиме һәләԛәтийа ԝәйә баш тʹәви Йаһоԝа бә. Ле һәрге ԝә баԝәрийа хԝә сәр һʹиме кьред мәрьва ава кьрийә, ԝи чахи баԝәрийа ԝә ԝе сьст бә. Бәле, баԝәрийа мә гәрәке нә кӧ тʹәне сәр һʹиме һәст у емосийа бә, ле ӧса жи сәр һʹиме избаткьрьнед һʹимгьрти. Һун гәрәке сәд сәләфи баԝәр бьн, ԝәки Кʹьтеба Пироз рʹастийе дәрһәԛа Йаһоԝа һин дькә (Рʹом. 12:2). w20.07 8 ¶2-3

Гәләк мәсәлә нишан дькьн, кӧ мәләк жи кʹомәке дьдьнә мә, ԝәки әм ԝан хушк-бьра бьвиньн, йед кӧ дьхԝазьн вәгәрʹьн щәм Йаһоԝа (Әʹйан. 14:6). Мәсәлә, Силвио жь Әкԝадоре, дӧа-дьрозгә дькьр, ԝәки Йаһоԝа кәсәки бьшинә щәм ԝи кӧ али ԝи бькә ԝәки әԝ вәгәрʹә щьвате. Чахе әԝи дӧа дькьр, һәма ве дәме кәсәк дәри хьст. Әԝ дӧ рʹуспи бун. Ԝәʹде ве сәрледане, әԝ рʹуспи гәләк ша бун, кӧ ԝе аликʹарийе бьдьнә ԝи, чьда әԝ һʹәԝщә йә. Дьле мә ша дьбә чахе әм али йед рʹӧһʹанида сьст дькьн, кӧ вәгәрʹьн щәм Йаһоԝа. Пешәнгәк наве кʹижани Салвадор ә, кӧ дина хԝә дьдә сәр хушк-бьред рʹӧһʹанида сьст, ӧса дьбежә: «Щара, әз жь шабуне нькарьм һесьре хԝә бьгьрьм. Дьле мьн ша дьбә чахе әз дьфькьрьм, кӧ Йаһоԝа ча жь ве дьнйа Шәйтʹан пәзәкә хԝә хьлаз кьр, у ԛәдьрәки ӧса дайә мьн, кӧ әз тʹәви Ԝи ве йәкеда һәвкʹарийе дькьм». Һәрге һун жь щьмәʹта Йаһоԝа дур кʹәтьнә, дӧдьли нәбьн, ԝәки Йаһоԝа диса ԝә һʹьз дькә. Мина баве жь мәтʹәлока Иса, чʹәʹве Йаһоԝа тʹьме рʹийа ԝә йә у ԝе бь дьл у щан ԝә ԛәбул кә мала хԝә. w20.06 29 ¶16-18

Сәрһатийед кӧ Кʹьтеба Пирозда дәрбаз дьбьн, «бона һинбуна мә» һатьнә ньвисандьн. Мәсәлә, Кʹьтеба Пироз бәʹса һьнә кәсед мьлук дькә, йед кӧ синоред хԝә заньбун. Ӧса жи, Кʹьтеба Пирозда һьнә сәрһатийед кәсед ԛӧрʹә жи һәнә. Әм дькарьн жь ван сәрһатийа гәләк дәрсед фәрз бьстиньн (Зәб. 37:37; 1 Корн. 10:11). Мәсәлә, бинә бира хԝә кӧ чь һатьбу сәре Шаԝул Пʹадша. Сәрида, әԝ хортәки мьлук бу. Ԝи синоред хԝә заньбун, у әԝ дьтьрсийа кӧ һе зедә щабдарийа ԛәбул бькә (1 Сам. 9:21; 10:20-22). Ле бәле, паши ве йәке кӧ әԝ бу пʹадша, Шаԝул бу мәрьвәки хԝәсәри хԝә. Щарәке, гава Шаԝул һивийа Самуйел пʹехәмбәр дьсәкьни әԝи сәбра хԝә ӧнда кьр, у ԛӧрбанәк пʹешкʹеш кьр кӧ изна ԝи тʹӧнә бу кӧ ве йәке бькә. Ләма Йаһоԝа сәр ԝи һерс кʹәт у ԛьрар кьр кӧ кәсәки дьн бькә пʹадша (1 Сам. 13:8-14). Ԝе баш бә кӧ әм жь ве сәрһатийе дәрса бьстиньн у синоред хԝә бьзаньбьн. w20.08 10 ¶10-11

Бь дәсте Иса Мәсиһ, Йаһоԝа бьред щабдар ԝәк пʹешкʹеш данә щьвата хԝә (Әфәс. 4:8). Һьнә жь ԝан ԝәк әндәмед Кʹома Рʹебәрийе, аликʹаред Кʹома Рʹебәрийе, әндәмед комитейа Филиале, бәрпьрсийаред мьһале, мамостәйед мәкʹтәбед теократик, рʹуспийед щьвате у бәрдәстийед щьвате хьзмәт дькьн. Әв бьра жь алийе рʹӧһʹе пирозва тен кʹьфш кьрьн кӧ мийед Йаһоԝа хԝәй бькьн у бона һʹәԝщед щьвате хәм дькьн (1 Пәт. 5:2, 3). Бьра жь алийе рʹӧһʹе пирозва тен кʹьфш кьрьн кӧ щурʹә-щурʹә щабдарийа биньн сери. Чаԝа кӧ дәст у пʹе у пʹаред дьн йед бәдәне жь бо кʹара бәдәне һәвкʹарийе дькьн, бьрайед кʹьфшкьри жи жь бо кʹара щьвате һәвкʹарийе дькьн. Әԝ пәсна нагәрʹьн, ле нета ԝан әв ә кӧ хушк у бьра жь алийе рʹӧһʹанива ава бькьн у ԛәԝи бькьн (1 Тʹеслн. 2:6-8). Ма әм жь Йаһоԝарʹа шькьрдар ниньн кӧ ԝи бьрайед һаԛас фәдакʹар, хирәт у зен данә мә? w20.08 21 ¶5-6

Мәʹник кӧ чьрʹа әм мьзгине бәла дькьн, әԝ ә кӧ мәрьв «мина мийед бе шьван йед шашбуйи у бәлавбуйи» нә, у һʹәԝщәдарийа ԝан һәйә кӧ рʹастийа дәрһәԛа Пʹадшатийе һин бьбьн (Мәт. 9:36, ИМ). Йаһоԝа «дьхԝазә һʹәму мәрьв хьлаз бьн у рʹастийе нас кьн» (1 Тимтʹ. 2:4). Гава әм тиньн бәр чʹәʹве хԝә кӧ хьзмәта мә чаԝа дькарә ль сәр мәрьва һʹӧкӧм бькә, әв йәк жи дькарә хԝәстьна мә зедә бькә. Әм әʹмьре мәрьва хьлаз дькьн (Рʹом. 10:13-15; 1 Тимтʹ. 4:16). Жь бо кӧ әм карьбьн ише хԝә бькьн, әм жи һʹәԝщәйи һьнә һащәта нә, у гәрәке әм бьзаньбьн кӧ ван һащәта ча бьдьнә хәбате. Иса Мәсиһ рʹебәрикә зәлал да шагьртед хԝә кӧ әԝ чаԝа «мәʹсийа бьгьрьн». Әԝи ԝанрʹа гот кӧ гәрәке әԝ чь хԝәрʹа бьбьн, мьзгине ль кӧ дәре бәла бькьн у мәрьварʹа чь бежьн (Мәт. 10:5-7; Луԛа 10:1-11). Иро, тʹәшкиләта Йаһоԝа Һащәтед бона Һинкьрьне һазьр дькә у мә һин дькә кӧ гәрәке әм ван һащәта чаԝа бьдьнә хәбате. Әв һинкьрьн али мә дькә кӧ әм ише хԝә бь аԝайәки баш у бь һостәти биньн сери (2 Тимтʹ. 2:15). w20.09 4 ¶6-7, 10

Бьдьнә бәр чʹәʹве хԝә Йуһʹәннайе шанди шабунәкә ча станд чахе бьһист, ԝәки әԝ мәрьвед кӧ бь аликʹарийа ԝи һатьбун сәр рʹийа рʹаст, бәрдәԝам дькьн бь амьни Йаһоԝарʹа хьзмәт кьн. Әԝи әԝана һʹәсаб дькьрьн зарʹед ԝийә рʹӧһʹани. Йуһʹәнна һʹәму тьшт дькьр, ԝәки баԝәрийа ԝан Мәсиһийед амьн ԛәԝи кә, чьмки әԝана рʹасти гәләк чәтьнайа дьһатьн. Әм жи шабуне дьстиньн чахе дьвиньн зарʹед мә у ӧса жи зарʹед мәйә рʹӧһʹани, хԝә тʹәсмили Йаһоԝа дькьн у бәрдәԝам дькьн ԝирʹа хьзмәт кьн (3 Йуһʹн. 3). Незики сала 98 Д.М., Йаһоԝа пе рʹӧһʹе хԝәйи пироз али Йуһʹәнна кьр, кӧ ԝан се нәʹма бьньвисә. Нета ԝан нәʹма әԝ бу, ԝәки Мәсиһийед амьн һелан кә, кӧ баԝәрийа хԝә һьндава Иса хԝәй кьн у бәрдәԝам кьн нава рʹастийеда бьжин. Йуһʹәнна бәрхԝә дькʹәт, чьмки дәрсдаред ԛәлп сәр щьвата хьраб һʹӧкӧм дьбун (1 Йуһʹн. 2:18, 19, 26). Әԝан рʹабәра дьготьн ԝәки Хԝәде нас дькьн, ле бь рʹасти гӧрʹа ԝи нәдькьрьн. w20.07 20 ¶1-3

Әм ве хәбәра кӧ бәла дькьн хԝәха жи баԝәр дькьн, ләма әм дьхԝазьн ве хәбәре бьгьһиньн һәр кәси. Әм баԝәрийа хԝә созед Хәбәра Хԝәде тиньн (Зәб. 119:42; Иша. 40:8). Чәнд пʹехәмбәртийед Кʹьтеба Пироз ль бәр чʹәʹве мә һатьнә сери. Мә дитийә кӧ ширәтед Кʹьтеба Пироз жийана мәрьва чаԝа һе баш дькьн. Ләма, әм жь дьл баԝәр ьн кӧ гәрәке һәр кәс мьзгина Пʹадшатийе бьбьһе. Ӧса жи, әм хԝә дьсперьн Йаһоԝа, йе кӧ канийа мьзгине йә, у әм баԝәрийа хԝә бь Иса Мәсиһ тиньн, йе кӧ жь алийе Йаһоԝава ча Пʹадшайе Пʹадшатийа Хԝәде һатийә кʹьфш кьрьн. Чь жи бьбә, Йаһоԝа һәр тʹьм сьтʹара мә йә, у әԝе ԛәԝате бьдә мә (Зәб. 46:1-3). Хенщи ве йәке, әм баԝәр ьн кӧ Иса бь ԛәԝат у һʹӧкӧме кӧ әԝи жь Йаһоԝа стандийә, жь әʹзмана рʹебәрийа ише бәлакьрьна мьзгине дькә (Мәт. 28:18-20). Һәгәр баԝәрийа мә ԛәԝи бә, әме дӧдьли нәбьн кӧ Йаһоԝа дькарә хирәта мә бьбәрәкʹәт бькә. w20.09 12 ¶15-17

Щар щара, гава хушкед мә рʹасти тәнгасийа тен, лазьм ә кӧ кәсәк ԝан бьпарезә (Иша. 1:17). Мәсәлә, хушкәкә кӧ бемер майә бәлки жь бо ишед кӧ мере ԝе дькьр, һʹәԝщәйи аликʹарийе йә. Бәлки хушкәкә әʹмьрда мәзьнрʹа аликʹари лазьм ә кӧ докторрʹа хәбәр дә. Йан жи, бәлки лазьм ә кӧ әм хушкәкә пешәнг бьпарезьн, йа кӧ дь проектәкә теократикда дьхәбьтә у жь алийе һьнә кәсанва те сущдар кьрьн, чьмки әԝ нькарә мина пешәнгед дьн дәркʹәвә хьзмәте. Гава жьнед амьн жь алийе кәсед дьнва дьһатьн сущдар кьрьн, Иса Мәсиһ әԝ дьпарастьн. Мәсәлә, гава Мәрйәме сәр хушка хԝә Мәртʹайе газьн кьр, Иса әԝ параст (Луԛа 10:38-42). Щарәкә дьн, гава һьнәка Мәрйәм сущдар дькьр, Иса Мәсиһ диса Мәрйәм параст (Марԛ. 14:3-9). Иса заньбу кӧ нета Мәрйәме чь бу, у әԝи пʹайе ԝе да. Бь сәрда, әԝи гот кӧ «мьзгини ль кӧ дәра дьнйайе бе дайин, әв тьште кӧ ве жьньке кьр жи ԝе жь бо биранина ԝе бе готьн». w20.09 24 ¶15-16

Шьване ԛәнщ фәʹм дькьр, ԝәки пәз дькарә ӧнда бә. У чахе пәз хԝәха жь кәри дур дькʹәт, шьван сәва ве йәке ле щәза нәдькьр. Дина хԝә бьдьнә мәсәла Хԝәде, кӧ әԝи ча али хьзмәткʹаред хԝә дькьр, йед кӧ ԝәʹдәлу жь ԝи дур кʹәтьбун. Уньс пʹехәмбәр гӧрʹа Йаһоԝа нәкьр у жь щабдарийа хԝә рʹәви. Ле Йаһоԝа тʹәрка Уньс нәда. Йаһоԝа мина шьване ԛәнщ әԝ хьлаз кьр у али ԝи кьр, ԝәки ԛәԝи бә у щабдарийа хԝә бинә сери (Унс. 2:7; 3:1, 2). Паше, Йаһоԝа пе мәсәла кʹол али Уньс кьр кӧ фәʹм кә, ԝәки әʹмьре һәр мәрьвәки бона ԝи чьԛас ԛимәт ә (Унс. 4:10, 11). Жь ве йәке әм чь дәрсе һин дьбьн? Рʹуспи гәрәке дәрберʹа нәфькьрьн, ԝәки хушк-бьред кӧ хьзмәтийа хԝә данә сәкьнандьне, ԝе ида вәнәгәрʹьн. Дәԝсе, рʹуспи гәрәке тедәрхьн кӧ мәʹни чь бу, ԝәки әԝ пәз жь кәри дур кʹәт. У чахе әԝ вәдьгәрʹә щәм Йаһоԝа, рʹуспи гәрәке бәрдәԝам кьн бь һʹьзкьрьн бона ԝи хәм бькьн. w20.06 20-21 ¶10-12

Сала 1991-да Йәктийа Совйәте һьлшийа. Һьнге хьзмәткʹаред Хԝәде кӧ бьн сәрԝертийа ԝеда дьжитьн, һьнәки «аликʹари» стандьн, демәк ԝәхтәки азайеда бун. Бь сайа ве йәке, ԝана аза мьзгини бәла дькьр, у зутьрәке ԝан ԝәлатада, кʹижан бәре дькʹәтьнә Йәктийа Совйәте, һәжмара мьзгинвана бь сәда һʹәзара зедә бу. Ԝәʹдә шунда, Русйа у ԝәлатед кӧ пьштгьрийа ԝе дькьн, бунә пʹадше бакӧре. Сәва тедәрхьн кӧ пʹадше бакӧре у пʹадше башуре кʹе нә, әм гәрәке бир нәкьн кӧ кʹижан се тьштада әԝана найенә гӧһастьне: 1) әԝана мьԛабьли щьмәʹта Хԝәде дәрдькʹәвьн, 2) пе ԝан кьред хԝә әԝана әшкәрә дькьн кӧ дьжмьнед Хԝәде у щьмәʹта ԝи нә, у 3) әԝ һәрдӧ пʹадша һәврʹа дькʹәвьнә һʹӧщәте. Русйа у пьштгьред ԝе, пәй щьмәʹта Хԝәде кʹәтьнә бь ве йәке, кӧ шьхӧле бәлакьрьна мьзгинийе ԛәдәхә кьрьнә, у бь сәда һʹәзара хушк-бьра дьзериньн. Әв кьред ԝан нишан дькьн, ԝәки әԝана Йаһоԝа у щьмәʹта ԝи нәфрʹәт дькьн. У әԝана сәва һʹӧкӧме хԝә зедә кьн, дькʹәвьнә һʹӧщәте тʹәви пʹадше башуре, демәк Англо-Америка Империйа Һʹәмдьнйайе. w20.05 12-13 ¶3-4

Әԝ йәк кӧ һинкьрьн шьхӧле бәлакьрьна мьзгинева гьредайи йә, гәрәке әм бьбьн дәрсдаред һостә. Ль тʹәмамийа дьнйайе, Шәʹдед Йаһоԝа бь милйона һинбунед Кʹьтеба Пироз дәрбаз дькьн. Әм рʹастийа Кʹьтеба Пироз пʹьр һʹьз дькьн. Ләма тʹәльк әв ә кӧ әм бь зедәйи дәрһәԛа тьштед кӧ әм һʹьз дькьн, хәбәр дьн. Ле бәле, әм заньн кӧ гәрәке әԝе кӧ Һинбуна «Бьрща Ԛәрәԝьлийе», Һинбуна Кʹьтеба Пироз йа Щьвате йан һинбуна Кʹьтеба Пироз дәрбаз дькә, бь зедәйи хәбәр нәдә. Һәгәр әм дьхԝазьн кӧ Кʹьтеба Пироз мәрьва һин бькә, гәрәке әм хԝә бьгьрьн. Нә лазьм ә кӧ әм һәр тьште кӧ әм дәрһәԛа рʹез йан тʹемәке заньн, хәбәр дьн (Йуһʹн. 16:12). Бинә бира хԝә кӧ гава тӧ һати ньхӧмандьне, занина тә чьԛас бу. Фәʹмдари йә, тә ль ԝе дәме дьбәкә тʹәне рʹастийед сәрәкә заньбу (Ибрн. 6:1). Гәләк сал дәрбаз бун һʹәта кӧ тӧ һәр тьшти һин буйи. Ләма, ԝе баш бә кӧ әм хԝәндәкʹара пе информасийа нәһʹәԝщә баргьран нәкьн. w20.10 14-15 ¶2-4

Йаһоԝа бона Иса де у бавәки гәләк баш һьлбьжарт (Мәт. 1:18-23; Луԛа 1:26-38). Готьнед Мәрйәме, йед кӧ ль Кʹьтеба Пироз һатьнә ньвисаре, нишан дькьн кӧ әԝе Йаһоԝа у Хәбәра ԝи чьԛас һʹьз дькьр (Луԛа 1:46-55). Ӧса жи, әв йәк кӧ Усьв рʹебәрийа Йаһоԝа чаԝа ԛәбул кьр, нишани мә дькә кӧ әԝ жь Хԝәде дьтьрсийа у дьхԝәст дьле ԝи ша бькә (Мәт. 1:24). Йаһоԝа бона Иса де у бавәки дәԝләмәнд нәбьжарт. Ԛӧрбана кӧ Усьв у Мәрйәме паши буйина Иса пʹешкʹеш кьр, нишан дькә кӧ әԝ кʹәсиб бун (Луԛа 2:24). Әшкәрә йә кӧ әԝана бь жийинәкә сьвьк дьжитьн, чьмки һәри кем 7 зарʹед ԝан һәбун (Мәт. 13:55, 56). Йаһоԝа Кӧрʹе хԝә Иса жь һьнә тʹәлька дьпараст, ле әԝи әԝ жь һʹәму проблема хԝәй нәдькьр (Мәт. 2:13-15). Мәсәлә, серида һьнә нәфәред малбәта Иса әԝ ча Мәсиһ ԛәбул нәдькьрьн (Марԛ. 3:21; Йуһʹн. 7:5). Ӧса жи, ча те кʹьфше Усьв зу мьр у әԝ йәк жи бона ԝи дәрдәки гьран бу. w20.10 26-27 ¶4-6

Гәло тӧ хԝә щарьна тʹәне тʹәхмин дьки у дьфькьри кӧ  тʹӧ кәс али тә накә? Һьнә хьзмәткʹаред Йаһоԝа йед амьн жи хԝә ӧса тʹәхмин дькьрьн (1 Пʹадш. 19:14). Ль дәмед ӧса, ве соза Йаһоԝа бинә бира хԝә: «Әзе тʹӧ щар жь тә нәчьм у тʹӧ щар тә бәрʹнадьм». Ләма әм дькарьн бь баԝәри ӧса бежьн: «Хӧдан пьштоване мьн ә у әз натьрсьм» (Ибрн. 13:5, 6). Паԝлосе шанди әв готьн ԝәкә сала 61 йа Д.М. хушк у бьред ль Щьһустанерʹа ньвисибун. Готьнед Паԝлос рʹезед Зәбур 118:5-7 тиньн бира мә. Ԝәк зәбурбеж, Паԝлос жи жь Йаһоԝа аликʹари дьстанд. Мәсәлә, ԝәкә дӧ сал пешийа кӧ ԝи нәʹма хԝә йа Ибранийарʹа ньвиси, гәмийа кӧ Паԝлос теда бу, кʹәт фьртонәкә мәзьн (Кʹар. Шанд. 27:4, 15, 20). Һьм ль дәма ве фьртонәйе һьм жи гәләк щаред дьн, Йаһоԝа Паԝлосрʹа бу Аликʹар. w20.11 12 ¶1-2

Гәрәке әм чьма нәфькьрьн кӧ рʹожед бәре «четьр бун»? Носталжи дькарә бьбә сәбәб кӧ әм тʹәне тьштед хԝәш биньн бира хԝә. Паши кӧ Исраели жь ԝәлате Мьсре дәркʹәтьн, әԝ кʹәтьн ве тʹәльке. Ԝана зу бир кьр кӧ жийана ль Мьсре чьԛас зор бу. Ԝана тʹәне дина хԝә да хԝарьнед хԝәш, йед кӧ ль ԝедәре һәбун. Ԝана гот: «Те бира мә әԝ мәʹсийед Мьсьреда кӧ мә бе һәԛ дьхԝарьн. Ӧса жи хийар, зәвәш, пивазок, пиваз у сир» (Жьмар 11:5). Гәло ԝана бәре бь рʹасти «бе һәԛ» хԝарьн дьхԝар? На! Ԝи чахи, әԝ ль Мьсре хӧлам бун (Дәркʹ. 1:13, 14; 3:6-9). Бәле, ԝана зәʹмәтед хӧламтийе бир кьр, у бира рʹожед бәре дькьр. Дәԝса кӧ әԝ дина хԝә бьдана кʹәрәмед кӧ ԝана жь Йаһоԝа дьстандьн, ԝана дина хԝә дьда рʹожед бәре (Жьмар 11:10). w20.11 25 ¶5-6

Жийана мә бь рʹасти жи кьн у «тʹери тәнгасийе» йә (Иб. 14:1). Ләма, әм щарьна дьлтәнг дьбьн. Һьнә хьзмәткʹаред Йаһоԝа Хԝәде, йед кӧ ль дәмед бәре дьжитьн, әʹйни тьшт тʹәхмин дькьрьн. Һьнә жь ԝан һәла һе мьрьне жи хԝәрʹа дьхԝәстьн (1 Пʹадш. 19:2-4; Иб. 3:1-3, 11; 7:15, 16). Ле бәле, ԝана хԝә дьспарт Йаһоԝа, у әԝи тʹьме ԛәԝат у мерхаси дьда ԝан. Сәрһатийед ԝана бона дьлбинийа у һинбуна мә һатьнә ньвисандьн (Рʹом. 15:4). Дина хԝә бьдьн мәсәла Усьв кӧрʹе Аԛуб. Усьв, йе кӧ бона баве хԝә кӧрʹе һәри һʹьзкьри бу, ньшкева ль Мьсре бу хӧлам (Дәстп. 37:3, 4, 21-28; 39:1). Паше жьна Потифар шәрʹ авитә Усьв. Әԝе гот кӧ әԝи бь зоре дьхԝәст сәре хԝә перʹа дайнә. Потифар леколин нәкьр кʹа Усьв бь рʹасти жи тьштәки ӧса кьрьбу йан на, ле әԝи әԝ рʹастә-рʹаст авитә кәле, у ль ԝедәре, әԝ бь зьнщиред һʹәсьн һат гьредан (Дәстп. 39:14-20; Зәб. 105:17, 18). Бәле, гәләк сәбәб һәбун жь бо чь жи Усьв дьлтәнг дьбу! w20.12 16-17 ¶1-4

Иса гот, кӧ йа лапә фәрз бона чь жи әм гәрәке дӧа бькьн, әԝ һәйә пирозкьрьна наве Хԝәде. Ле әв гьлийед Иса чь тенә һʹәсабе? Тьштәки пироз кьн, те һʹәсабе паԛьж кьн. Ле һьнә мәрьв дьбәкә бьфькьрьн: «Нә наве Йаһоԝа ида пироз у паԛьж ә?» Сәва щаба ве пьрсе бьдьн, әм гәрәке фәʹм кьн кӧ нав чь те һʹәсабе. Нав тʹәне хәбәр нинә, кʹижан дькарьн бьньвисьн йан жи бежьн. Дина хԝә бьдьне Кʹьтеба Пироз чь дьбежә: «Наве ԛәнщ жь һәбука пʹьрʹ ԛәнщтьр ә» (Мәтʹлк. 22:1; Ԝаиз 7:1). Ле чьрʹа ԛимәте нав ӧса мәзьн ә? Чьмки наве мәрьв дьдә кʹьфше кӧ әв мәрьв кʹе йә у дәрһәԛа ԝи чь дьфькьрьн. Ләма жи фәрз нинә әԝ нав ча те ньвисаре йан ча те готьне, ле фәрз әԝ ә кӧ чахе мәрьв әви нави дьбьһен йан жи ԝи мәрьви дьвиньн, дәрһәԛа ԝи чь те һʹьше ԝан. Чахе мәрьв дәрһәԛа Йаһоԝа дәрәԝа дьбежьн, әԝана наве ԝи әʹрде дьхьн. Әԝ те һʹәсабе пе ԝан бӧхдана наве ԝи хьраб дькьн. w20.06 3 ¶5-7

Тәнгасийед жийане дькарьн бона мә бьбьн баред гьран. Мәсәлә, әм дьбәкә дьтьрсьн кӧ әме хәбата хԝә ӧнда бькьн йан нәхԝәш кʹәвьн у нькарьбьн әʹбура малбәта хԝә бькьн. Йан жи, әм бәлки дьтьрсьн кӧ гава әм бен щерʹьбандьн, әме сьст бьбьн у ԛануна Хԝәде бьтʹәрьбиньн. Әм заньн кӧ дь дәмәкә незикда, Шәйтʹан ԝе кәсед кӧ дь бьн контрола ԝида ньн, дәф дә кӧ әԝ һʹьщуми сәр хьзмәткʹаред Хԝәде бькьн, ләма әм дьбәкә бәрхԝә дькʹәвьн кӧ ль ԝе дәме, әме чь бькьн. Гәло әв йәк кӧ әм дәрһәԛа тьштед ӧса бәрхԝә дькʹәвьн, нәрʹаст ә? Әм заньн кӧ Иса Мәсиһ шагьртед хԝәрʹа ӧса готьбу: «Хәма нәкьн» (Мәтта 6:25). Гәло әв йәк те һʹәсабе кӧ гәрәке әм бона тʹӧ тьшти хәма нәкьн? На. Мәсәлә, ль дәмед бәре, һьнә хьзмәткʹаред Йаһоԝа дьлтәнг дьбун, ле Йаһоԝа диса жи ԝана ԛәбул дькьр (1 Пʹадшати 19:4). Бь рʹасти Иса Мәсиһ бь готьнед хԝә дьхԝәст мерхасийе бьдә мә. Әԝ нахԝазә кӧ әм бь хәмед жийане һаԛас баргьран бьн, ԝәки әм нькарьбьн һәри зедә дина хԝә бьдьн хьзмәта Хԝәде. w21.01 3 ¶4-5

Мер бона хер-хԝәшийа малбәте һьм ль бәр Йаһоԝа һьм жи ль бәр Иса Мәсиһ щабдар ә (1 Пәтрус 3:7). Йаһоԝа сәре малбәта хԝә йа ль сәр әʹрд у ль сәр әʹзмен ә. Ләма жи, изьна ԝи һәйә кӧ бона зарʹед хԝә ԛәйд-ԛануна дайнә, у һәгәр йәк жь ԝан гӧһ нәдә ван ԛәйд-ԛануна, Йаһоԝа дькарә ширәте бьдә ԝи у ԝи рʹаст бькә (Ишайа 33:22). Ле Иса Мәсиһ сәре щьвате йә, ләма һʹӧкӧме ԝи жи һәйә кӧ ԛәйд-ԛануна бона ван дайнә (Галати 6:2; Колоси 1:18-20). Мина Йаһоԝа у Иса Мәсиһ, һʹӧкӧме сәре малбәте жи һәйә кӧ бона малбәта хԝә сафикьрьна бькә (Рʹомайи 7:2; Әфәси 6:4). Ле йәкә, синоред һʹӧкӧме ԝи һәнә. Мәсәлә, ԛәйдед кӧ әԝ бона малбәте датинә, гәрәке сәр һʹиме принсипед Кʹьтеба Пироз бьн (Мәтʹәлок 3:5, 6). Ӧса жи, изьна сәре малбәте тʹӧнә ԝәки бона кәсе кӧ нәфәре малбәта ԝи нинә, ԛәйда дайнә (Рʹомайи 14:4). Хенщи ве йәке, гава зарʹ мәзьн дьбьн у жь мале дьчьн, һәмьки әԝана диса жи ԛәдьре баве хԝә дьгьрьн, ле ида бьн һʹӧкӧме ԝида ниньн (Мәтта 19:5). w21.02 2-3 ¶3-5

Сәред малбәте, йед кӧ нәфәред хԝә һʹьз дькьн, бона һʹәԝщәдарийед ԝан хәм дькьн. Ле бәле, гәрәке әԝана бир нәкьн кӧ мал у мьлкʹ нькарә һʹәԝщәдарийед малбәте йед рʹӧһʹани тʹер бькә (Мәтта 5:3). Гава Иса Мәсиһ ль сәр стуне мьхкьри бу у ль бәр мьрьне бу, әԝи һәла һе ԝи чахи жи дьхԝаст бьзаньбуйа кӧ дәрһәԛа дийа ԝи ԝе хәм бькьн. Еша Иса Мәсиһ чьԛас гьран бу жи, әԝи Йуһʹәннарʹа гот кӧ бьра әԝ Мәрйәме хԝәй бькә (Йуһʹәнна 19:26, 27). Щабдарийед сәред малбәте гәләк ьн. Бона рʹумәта наве Йаһоԝа, гәрәке әԝ дь хәбата хԝәда хирәт бә (Әфәси 6:5, 6; Тито 2:9, 10). Ӧса жи, бәлки дь щьватеда жи щабдарийед ԝи һәнә. Мәсәлә, әԝ дьбәкә шьвантийе дькә у рʹебәрийа ише бәлакьрьна мьзгине дькә. Хенщи ве йәке, фәрз ә кӧ әԝ Кʹьтеба Пироз һәр һʹәфтә тʹәви жьн-зарʹед хԝә леколин бькә. Бь ве йәке, әԝ бона һʹәԝщед физики, емосийали у рʹӧһʹани йед нәфәред хԝә хәм дькә, у малбәта ԝи щәфе ԝи дьшекьриньн (Әфәси 5:28, 29; 6:4). w21.01 12 ¶15, 17

Ль гора Кʹьтеба Пироз, жьнәкә жир у сәрхԝә дькарә шьхӧле мале һьлдә дәсте хԝә, мьлкʹ бькʹьрʹә у бьфьрʹошә (Мәтʹәлок 31:15, 16, 18). Жьн нә хӧлам ә, йа кӧ гәрәке дәнге хԝә нәкә. Мере кӧ дьхԝазә ль гора принсипед Кʹьтеба Пироз бьжи, ԝе итʹбарийа хԝә жьна хԝә бинә у гӧһ бьдә фькред ԝе (Мәтʹәлок 31:11, 26). Һәгәр мер ԛәдре жьна хԝә бьгьрә, әԝе сәритийа ԝи дьһа һеса ԛәбул бькә. Иса Мәсиһ чьԛас пешдачуйи бу жи, әԝ нәдьфькьри кӧ ԛәбулкьрьна сәритийа Йаһоԝа ԝи ньмьз дькә (1 Корьнтʹи 15:28; Филипи 2:5, 6). Мина ве йәке, жьнәкә жир у зен, йа кӧ чʹәʹв дьдә Иса, нафькьрә кӧ ԛәбулкьрьна сәритийа мер, ԝе ньмьз дькә. Әԝ пьштгьрийа мере хԝә дькә – нә тʹәне чьмки ԝи һʹьз дькә, ле һәри зедә чьмки әԝ Йаһоԝа һʹьз дькә у дьхԝазә һӧрмәте бьдә ԝи. Һәгәр мер бьхԝазә кӧ жьна ԝи ԛанун у принсипед Кʹьтеба Пироз бьтʹәрьбинә, жьна кӧ Мәсиһи йә, гәрәке гӧрʹа ԝи нәкә. w21.02 11 ¶14-15; 12 ¶19

Бәле, һʹьзкьрьна Хԝәде һәртʹьм али хьзмәткʹаред Йаһоԝа кьрийә кӧ әԝана һьмбәри зерандьне сәбьр бькьн. Мәсәлә, гава диԝана бьльнд йа Щьһуйа, шандийед Иса Мәсиһрʹа әʹмьр да кӧ әԝана ида мьзгине бәла нәкьн, ԝана гот кӧ гәрәке әԝана «гӧрʹа Хԝәде бькьн, нә кӧ йа мәрьва», чьмки ԝана Хԝәде һʹьз дькьр (Кʹаред Шандийа 5:29; 1 Йуһʹәнна 5:3). Иро жи, һʹьзкьрьна Хԝәде ԛәԝате дьдә хушк-бьред мә. Гава әԝана жь алийе дәԝләтева зерандьне у зӧлме дьвиньн, әԝана мерхасийа хԝә ӧнда накьн; дьнйа чьԛас ԝана нәфрʹәт бькә жи, йәкә әԝана шабуна хԝә ӧнда накьн (Кʹаред Шандийа 5:41; Рʹомайи 5:4, 5). Гава әм дьхԝазьн Йаһоԝа нас кьн, дьбәкә һьнә нәфәред мә мьԛабьли мә дәртен, чьмки дьфькьрьн кӧ әм тен хапандьне йан кӧ мә аԛьле хԝә ӧнда кьрийә (Марԛос 3:21 жи бьньһерʹә). Дьбәкә әԝана ль мә зордарийе жи дькьн. Һәгәр тьштәки ӧса бе сәре мә, гәрәке әм әʹщебмайи наминьн. Иса Мәсиһ ӧса готьбу: «Дьжмьнед мерьв ԝе жь мала ԝи бьн» (Мәтта 10:36). w21.03 21 ¶6-7

Чахе кәсәк тә тʹәглифи һинбуна хԝә дькә, рʹьнд гӧһ бьдә гава дәрсдар у хԝәндәкʹар хәбәр дьдьн. Бь ви щурʹәйи, тӧйе һазьр би кӧ ԝәхта рʹаст тьштәки бежи. Рʹьнд бьфькьрә пешийа кӧ тӧ тьштәки бежи. Бь зедәйи хәбәр нәдә, хәбәрдана дәрсдар нәбьрә у дәрбази тʹемәкә дьн нәбә. Ле тӧ дьбәкә дькари бь щаб, мәсәлә йан пьрсәкә кьн али хԝәндәкʹар бьки кӧ әԝ дәрсе дьһа баш фәʹм бькә. Дәрһәԛа һьнә тʹема, дьбәкә тә зор те кӧ тӧ тьштәки бежи. Диса жи, һәгәр тӧ бь дьлгәрми пʹайе хԝәндәкʹар бьди, әв йәк ԝе бешьк дьле ԝи бьгьрә у али ԝи бькә кӧ әԝ пешда һәрʹә. Һәгәр дьбә, кьн хԝәндәкʹаррʹа бежә кӧ тӧ чаԝа һати сәр рʹийа рʹастийе, Йаһоԝа чаԝа али тә кьрийә у тә чаԝа сәри тәнгасийарʹа дәрхьст (Зәбур 78:4, 7). Сәрһатийа тә дькарә мерхасийе бьдә хԝәндәкʹар, баԝәрийа ԝи дьһа ԛәԝи бькә у али ԝи бькә кӧ әԝ бәрбь ньхӧмандьне һәрʹә. w21.03 10 ¶9-10

Кʹе һежайи пʹайа йә, һәрге хьзмәтийеда әм бәред баш дьстиньн? Паԝлос щаба ве пьрсе да чахе щьвата Корьнтʹирʹа ԝан гьлийа ньвиси: «Мьн дачьканд, Аполо авда, ле Хԝәде гиһанд. Аԝа нә йе дачьканд тьштәк ә, нә жи йе авда, ле йе гиһанд, кӧ Хԝәде йә» (1 Корн. 3:6, 7). Мина Паԝлос, әм гәрәке тʹьме шькьрийе бьдьнә Йаһоԝа бона һәр пешдачуйинәкә хьзмәтийеда. Әм ча дькарьн рʹазибуна хԝә нишан кьн бона ве йәке, кӧ әм «һәвал-хәбатед» Хԝәде, Иса у мәләка нә? (2 Корн. 6:1) Әм ве йәке дькьн, чахе әм мәщала дьгәрʹьн сәва мәрьварʹа мьзгинийе гьли кьн. Әм гәрәке нә кӧ  тʹәне рʹастийе бьчиньн, ле ӧса жи ав дьн. Чахе кәсәкирʹа һʹәԝас ә дәрһәԛа мьзгинийе хәбәр дә, әм алийе хԝәда һәр тьшти дькьн, ԝәки тʹәви ԝи һинбуна Кʹьтеба Пироз дәстпекьн. Мәрьве кӧ Кʹьтеба Пироз һин дьбә, чахе пешда дьчә, әм ша дьбьн чьмки дьвиньн, ԝәки Йаһоԝа ча һʹьш у дьле ԝи дьгӧһезә. w20.05 30 ¶14, 16-18