Адар

Пәтрусе шанди Мәсиһийарʹа готьбу ԝәки әԝана пʹешкʹеш у фәрәсәтед хԝә бона һеланкьрьна һәвдӧ бьдьнә хәбате. Әԝи ньвиси: «Жь ԝә кʹе чь пʹешкʹеш стандийә, бь ԝе жи һәврʹа хьзмәткʹарийе бькьн, чаԝа ԝәкʹилед ԛәнщә ԝан кʹәрәмед Хԝәде» (1 Пәтрус 4:10). Һьнә кәс дьтьрсьн кӧ һәгәр әԝана «пʹешкʹеша» хԝә, демәк фәрәсәтед хԝә бь тʹәмами хьзмәтеда бьдьнә хәбате, кәсед дьн ԝе чʹәʹвнәбарийа ԝан бькьн йан жи дьлтәнг бьн. Ле әм гәрәке фәсал бьн ԝәки хԝә ԛӧрʹә нәкьн (1 Корьнтʹи 4:6). Гәрәке әм бир нәкьн кӧ фәрәсәтед мә пʹешкʹешед жь Хԝәде нә. Лазьм ә кӧ әм ван пʹешкʹеша бона кʹара щьвате бьдьнә хәбате, нә кӧ наве хԝә дәрхьн у хԝә бьльнд кьн (Филипи 2:3). Һәгәр әм ԛәԝат у фәрәсәтед хԝә ль гора хԝәстьна Хԝәде бьдьнә хәбате, әме ша бьн, нә кӧ чьмки әм жь кәсед дьн четьр ьн, ле чьмки әм ван пʹешкʹеша бона рʹумәта Йаһоԝа дьдьнә хәбате. w22.04 11-12 ¶7-9

Иса Ньвисаред Пироз һʹьз дькьр. Хәбәра Хԝәдеда дәрһәԛа һәстед ԝи ӧса һатьбу пʹехәмбәртикьрьне: «Әз дьхԝазьм хԝәстьна Тә бьԛәдиньм, йа Хԝәде у ва йә һинкьрьна Тә дьле мьнда йә» (Зәбур 40:8). Әԝи Хәбәра Хԝәде һʹьз дькьр, ләма жи әԝ бәхтәԝар бу у хьзмәтийа Йаһоԝада пешдачуйи бу. Һәрге әм жи Хәбәра Хԝәде бьхуньн у же һʹьз бькьн, әме дьлхԝәш у пешдачуйи бьн (Зәбур 1:1-3). Мәсәла Иса у готьнед ԝи мә һелан дькьн ԝәки әм хԝәндьна Кʹьтеба Пирозда тʹьме пешда һәрʹьн у методед тʹәзә һин бьн. Сәва кӧ әм Кʹьтеба Пироз дьһа баш фәʹм бькьн, гәрәке әм дӧа бькьн, һеди-һеди бьхуньн, пьрса бьдьнә хԝә у фькьред кьн хԝәрʹа башԛә бьньвисьн. Фәʹмкʹари ԝе али мә бькә ԝәки әм бь аликʹарийа әʹдәбйәтед мә, сәр тьштед кӧ дьхуньн кʹур бьфькьрьн. У сәва кӧ Хәбәра Хԝәде сәр һʹьш у дьле мә һʹӧкӧм кә, гәрәке әм ԝе бь нета рʹаст бьхуньн. Гава әм хирәт бькьн, кӧ Кʹьтеба Пироз ԝи щурʹәйи бьхуньн, әме жь хԝәндьна Кʹьтеба Пироз һе зедә кʹаре бьстиньн у дьһа незики Йаһоԝа Хԝәде бьн (Зәбур 119:17; Аԛуб 4:8). w23.02 13 ¶15-16

Хԝәрʹа нетәкә конкрет дайнә у паше бь дьл у щан хирәт бькә ԝәки бьгьһижи ве нете. Гәло тӧ чаԝа дькари ве йәке бьки? Мәсәлә, һәгәр тӧ дьхԝази һинкьрьнеда пешда һәрʹи, брошура «Хԝәндьн у Һинкьрьнеда Щерʹьбанди бә» леколин кә. Пешийа кӧ тӧ сәр щьвате пе дәрсәке дәрейи, жь бьраки щерʹьбанди бьхԝазә ԝәки әԝ гӧһ бьдә готара тә у тәрʹа һьнә ширәта бьдә. Бьра кәсед дәр-дора тә нә тʹәне фәрәсәтед тә бьвиньн, ле ӧса жи бьвиньн кӧ тӧ йәки хирәт у бь итʹбар и (2 Корьнтʹи 8:22). Һәгәр тәрʹа чәтьн ә фәрәсәтәке нав хԝәда пешда бини, бәрдәԝам кә сәр хԝә бьхәбьтә! Гәло Тимотʹейо ԝәʹдә шунда бу готарванәки зарширьн у дәрсдарәки щерʹьбанди? Әм ве йәке ньзаньн. Ле әм дькарьн баԝәр бьн, кӧ Тимотʹейо гӧһ да ширәта Паԝлос, ләма жи әԝи щабдарийед хԝә чьԛас дьчу һаԛас дьһа баш дьани сери (2 Тимотʹейо 3:10). w22.04 24-25 ¶8-11

Щәʹнәԝьре пе һʹәфт сәрийа чь те һʹәсабе? Әв щәʹнәԝьр мина пьльнг ә, ньгед ԝи мина ләпе һʹьрʹчʹа нә, дәве ԝи мина дәве шера йә у дәһә стьруйед ԝи һәнә. Чар щәʹнәԝьред жь кʹьтеба Данийел сәре 7, мина ви щәʹнәԝьре жь кʹьтеба Әʹйанти нә. Демәк чар щурʹед щәʹнәԝьред жь кʹьтеба Данийел, щәʹнәԝьре кʹьтеба Әʹйантида һәнә. Рʹез дьбежә кӧ әв щәʹнәԝьр «ль сәр һәр бәрәке, щьмәʹте, зьмани у мьләти» сәрԝертийе дькә. Ләма жи, әм фәʹм дькьн ԝәки әв щәʹнәԝьр сәрԝертик йан империйәкә башԛә нинә (Әʹйанти 13:7). Әшкәрә йә кӧ әв щәʹнәԝьр һʹәму сәрԝертийед политики тенә һʹәсабе, йед кӧ нава тʹәрихийеда сәр тʹәмамийа инсанәте сәрԝертийе дькьн (Ԝаиз 8:9). Кʹьтеба Пирозда, һәжмара «дәһ» гәләк щар тьштәки тʹам дьдә кʹьфше. w22.05 9 ¶6

Гәло кʹе ԝе ван кʹәрәма бьстинә? Пешийе, ԝе әʹлаләта мәзьн йа кӧ жь Һармәгәдоне хьлаз бә, у зарʹед кӧ ԝе паши Һармәгәдоне бенә буйине, ван кʹәрәма бьстиньн. Ӧса жи, кʹьтеба Әʹйанти сәри 20 соз дьдә, кӧ кәсед мьри ԝе бенә сахкьрьне (Әʹйанти 20:11-13). Йед «һәԛ», демәк кәсед амьн у йед «нәһәԛ», демәк кәсед кӧ мәщала ԝан тʹӧнәбу ԝәки Йаһоԝа нас бькьн, ԝе гьшк диса вәгәрʹьн жийине (Кʹаред Шандийа 24:15; Йуһʹәнна 5:28, 29). Ле гәло әв йәк те һʹәсабе, ԝәки ԝәʹде Һʹӧкӧмдарийа Һʹәзарсали һәр кәс ԝе жь мьрьне рʹабә? На. Йед кӧ пешийа мьрьна хԝә нәдьхԝәстьн Йаһоԝарʹа хьзмәт кьн, ԝе нәйенә рʹакьрьне. Чахе Йаһоԝа мәщал дабу ԝан, ԝәки ԝирʹа хьзмәт кьн, ԝана әв йәк инкʹар кьр у нишан кьрьн, ԝәки әԝ һежайи жийина һәрһәйи ниньн (Мәтта 25:46; 2 Тʹесалоники 1:9; Әʹйанти 17:8; 20:15). w22.05 18 ¶16-17

Бь сайа «хӧламе амьн у сәрԝахт», Иса тʹәшкиләтәкә мәхсус саз кьрийә, ԝәки һʹәбандьна рʹаст сәр әʹрде пешда һәрʹә (Мәт. 24:45). Тӧ сәр ве тʹәшкиләте чаԝа дьньһерʹи? Дьбәкә тӧ жи мина Пәтрусе шанди хԝә тʹәхмин дьки, йе кӧ Исарʹа гьлийед жь рʹеза рʹоже гот. Һәрге мә тʹәшкиләта Йаһоԝа нас нәкьра, һʹале мә ԝе ньһа чаԝа буйа? Бь сайа тʹәшкиләте, әм жь алийе рʹӧһʹанива тʹӧ щара бьрʹчи наминьн. Ӧса жи, Иса мә бь сайа тʹәшкиләте һин дькә, кӧ әм хьзмәтийеда пешда һәрʹьн, у әԝ али мә дькә кӧ әм «мәрьве ну» ль хԝә бькьн, ԝәки Йаһоԝа жь мә рʹази бә (Әфәси 4:24). Рʹожед чәтьнда, Иса рʹебәрийа мә дькә. Гава пандәмийа COVID-19 дәстпебу, кʹара ван рʹебәрийед билан әшкәрә бун. Гәләк мәрьвед ве дьнйайе тʹәвльһәв бьбун, ле Иса бь зәлали рʹебәрийа мә дькьр, ԝәки әм хԝәйкьри бьн. w22.07 12 ¶13-14

Ԝәʹде бәре, Йаһоԝа хьзмәткʹаред хԝәрʹа дьгот, ԝәки әԝана тʹьме дәрһәԛа ԝи зарʹед хԝә һин кьн (Ԛануна Дӧщари 6:6, 7). Нава рʹожеда, гәләк мәщалед де у бавед Исраели һәбун кӧ зарʹед хԝәрʹа хәбәр дьн у һʹьзкьрьна һьндава Йаһоԝа бькьн дьле ԝан. Мәсәлә, кӧрʹькед Исраели дьбәкә бь сьһʹәта тʹәви баве хԝә зәвийеда дьхәбьтин. Ле кәчʹькед Исраели дьбәкә кʹьнщдьрунеда у шьхӧлед маледа али дийа хԝә дькьрьн. Гава де-бав тʹәви зарʹед хԝә дьхәбьтин, ԝана дькарьбу дәрһәԛа гәләк тʹемед фәрз хәбәрдана, мәсәлә, дәрһәԛа ԛәнщийа Йаһоԝа у кӧ Йаһоԝа чаԝа али малбәта ԝан дькә. Гәләк ԝәлатада, де-бав дьхәбьтьн у зарʹ жи дьчьн мәкʹтәбе, ләма жи әԝана нькарьн тʹәвайи гәләк ԝәʹдә дәрбаз кьн. Ле чь жи һәбә де-бав гәрәке ԝәʹдә бьвиньн, ԝәки тʹәви зарʹед хԝә хәбәр дьн (Әфәси 5:15, 16). w22.05 28 ¶10-11

Гава кәсәк гӧнәки гьран дькә, әԝ ԛануна Хԝәде дьтʹәрʹьбинә. Әԝ мәрьв гәрәке һьм жь Йаһоԝа бахшандьне бьхԝазә, һьм жи дәрһәԛа ве йәке рʹуспийед щьватерʹа хәбәр дә (Зәбур 32:5; Аԛуб 5:14). Гәло рола рʹуспийа чь йә? Тʹәне Йаһоԝа дькарә гӧна бь тʹәмами бьбахшинә, у әԝ ве йәке ль сәр һʹиме ԛӧрбана Иса дькә. Ле Йаһоԝа дьхԝазә ԝәки рʹуспи ль гора Ньвисаред Пироз тедәрхьн һәла кәсе кӧ гӧнә кьрийә дькарә щьватеда бьминә йан на (1 Корьнтʹи 5:12). Ләма жи, гәрәке әԝана жь хԝә ӧса бьпьрсьн: Гәло ви кәси бь һʹәмде хԝә гӧнә кьр? Гәло кәсе кӧ гӧнә кьрийә, пешда әв нет кьрьбу дьле хԝә ԝәки хьрабийе бькә? Гәло әԝи бәрдәԝам дькьр ви гӧнәйи бькә? Ле йа һәри фәрз әв ә, гәло әԝ жь дьл тʹобә дькә йан на? Гәло избати һәнә кӧ Йаһоԝа бахшандийә ԝи? (Кʹаред Шандийа 3:19). w22.06 9 ¶4

Иса шагьртед хԝәрʹа гот, кӧ әԝана пәй рʹастийе һәрʹьн (Мәтта 5:6). Мәрьвед ӧса бь дьл у щан дьхԝазьн кӧ чь бәр чʹәʹве Хԝәде ԛәнщ у рʹаст ә, ве йәке бькьн. Гәло тӧ жи рʹастийе у һәԛийе һʹьз дьки? Әм баԝәр ьн, кӧ әре! Тӧ дәрәԝийе, һәр тьштед нәрʹаст у хьрабийе нәфрʹәт дьки (Зәбур 119:128, 163). Дәрәԝи, йәк жь хәйсәтед Мире-щьна йә, йе кӧ сәрԝере ве дьнйайе йә (Йуһʹәнна 8:44; 12:31). Нетәкә Мире-щьна әԝ ә, кӧ наве Йаһоԝа Хԝәде бәр чʹәʹве һәр кәси рʹәш кә. Жь ԝәхта рʹабәрибуна бахче Еденеда, Мире-щьна дәрһәԛа Хԝәдайе мә гәләк дәрәԝа бәла дькә. Әԝ дьхԝазә мәрьва бьдә баԝәркьрьне, кӧ Йаһоԝа сәрԝерәки хԝәһʹьз ә, нә рʹаст у нә жи һәԛ ә, у ԛәнщийе жь мәрьва вәдьшерә (Дәстпебун 3:1, 4, 5). Дәрәԝед Мире-щьна мәрьва һелан дькьн, ԝәки әԝана дәрһәԛа Йаһоԝа хьраб бьфькьрьн. Мире-щьна дькарә сәр кәсед кӧ рʹастийе һʹьз накьн һʹӧкӧм бькә, ԝәки әԝана һʹәму тьштед хьраб у мьрʹдарʹ бькьн (Рʹомайи 1:25-31). w23.03 2 ¶3

Һәрге тӧ сәр хԝә дьхәбьти, ԝәки тʹәрка хәйсәтәки хьраб бьди, дькарә ӧса бьԛәԝьмә ԝәки тӧ диса тьштәки хьраб бьки. Йан жи дьԛәԝьмә тӧ дьлтәнг дьби у дьфькьри кӧ тӧ нькари бьгьһижи нета хԝә. Чь ԝе али тә бькә ԝәки тӧ сәбьр ки? Һʹӧнӧрәки гәләк фәрз әԝ һәйә һʹьзкьрьна һьндава Йаһоԝа. Һʹьзкьрьна тә һьндава Йаһоԝа һʹӧнӧре һәри ԛимәт ә кӧ дьле тәда һәйә (Мәтʹәлок 3:3-6). Әԝ һʹьзкьрьн ԝе али тә бькә, ԝәки тӧ һьмбәри тәнгасийа сәбьр ки. Кʹьтеба Пироз гәләк щар бәʹса һʹьзкьрьна Йаһоԝайә амьн һьндава хьзмәткʹаред ԝи дькә. Һʹьзкьрьна амьн те һʹәсабе кӧ Йаһоԝа ԝе тʹӧ щар хьзмәткʹаред хԝә нәһелә у һʹьзкьрьна ԝи һьндава ԝанда ԝе тʹӧ щар сар нәбә. Тӧ дьлԛе Хԝәдеда һати әʹфьрандьне (Дәстпебун 1:26). Ле тӧ ча дькари ве һʹьзкьрьне бьди кʹьфше? Пешийе рʹазибуна хԝә Йаһоԝарʹа бьдә кʹьфше (1 Тʹесалоники 5:18). Һәр рʹож пьрсе бьдә хԝә: «Йаһоԝа ча һʹьзкьрьна хԝә нишани мьн кьрийә?» Паше дӧайед хԝәда рʹазибуна хԝә Йаһоԝарʹа бьдә кʹьфше, сәва ве йәке, чь кӧ әԝи бона тә кьрийә. Хԝәде тьштед ԛәнщ бона тә дькә, чьмки әԝ тә һʹьз дькә. w23.03 12 ¶17-19

Иса 12 шандийед хԝәрʹа һʹәйф у дьлован бу. Гәло әм чь дькарьн жь ве йәке һин бьн? Тьште һәри фәрз нә әв ә кӧ кәсед дьн чь дькьн йан чь накьн, ле әв ә кӧ әм ль һьмбәри шаши у кемасийед ԝан ча хԝә дьдьнә кʹьфше. Гава әм жь бо готьн йан кьред хушк йан бьраки әʹщьз дьбьн, әм дькарьн жь хԝә бьпьрсьн: «Гәло кьред ԝи чьма һаԛас мьн әʹщьз дькьн? Гәло дьбә кӧ кьред ԝи кемасикә мьн әшкәрә дькьн, йа кӧ әз гәрәке рʹаст кьм? Дьбәкә кәсе кӧ әз дамә хәйдандьне дәрәщәкә чәтьнда йә? Һәрге әз рʹаст бьм жи, гәло әз дькарьм һьндава ԝида рʹәʹм бьм у чʹәʹве хԝә сәр шашийа ԝи бьгьрьм?» Чьԛас әм һьндава кәсед дьн дьлован бьн, һаԛас әме избат кьн, кӧ әм бь рʹасти шагьртед Иса нә. Ӧса жи әм жь мәсәла Иса һин дьбьн, кӧ әм гәрәке һәр тьшти бькьн, ԝәки хушк-бьра фәʹм бькьн (Мәтʹәлок 20:5). Һәмьки Иса дькарьбу бьвинә кӧ дьле мәрьвада чь һәйә, ле әм нькарьн. Ле диса жи, әм дькарьн һьмбәри ԛьсуред хушк-бьра сәбьр бькьн (Әфәси 4:1, 2; 1 Пәтрус 3:8). Һәрге әм ԝана дьһа баш нас бькьн у пебьһʹәсьн кӧ әԝана әʹмьре хԝәда рʹасти чь дәрәща һатьнә, ԝе бона мә дьһа һеса бә һьндава ԝанда бь сәбьр бьн. w23.03 30 ¶14-16

Мире-щьна дькарә ве мәщале бьдә хәбате ԝәки әм ԛанунед Йаһоԝа бьтʹәрʹьбиньн. Мәсәлә, дьбәкә дохдьр йан мәрьвед мә, йед кӧ Шәʹдед Йаһоԝа ниньн, зоре мә бькьн ԝәки әм хуне бәри хԝә дьн йан жи щурʹе ԛәнщкьрьнәкә ӧса бьжберьн, кʹижан кӧ мьԛабьли принсипед Кʹьтеба Пироз ә. Әм һьлбәт нахԝазьн бьмьрьн, ле әм заньн кӧ һәгәр әм жийина хԝә ӧнда кьн жи, һʹьзкьрьна Йаһоԝа һьндава мә тʹӧ щар хьлаз набә (Рʹомайи 8:37-39). Гава достед Йаһоԝа дьмьрьн, әԝ ԝана бира хԝәда хԝәй дькә, ча бежи әԝана сах ьн (Луԛа 20:37). Әԝ жь дьл дьхԝазә ԝана жь мьрьне рʹакә (Ибо 14:15). Йаһоԝа бона мә ԛӧрбанәкә мәзьн дайә, ԝәки әм жийина һʹәта-һʹәтайе бьстиньн (Йуһʹәнна 3:16). Әм заньн кӧ Йаһоԝа чьԛас мә һʹьз дькә у бона мә хәм дькә. Ләма гава әм нәхԝәш дькʹәвьн йан бәр мьрьне нә, әм пьшта хԝә надьнә Йаһоԝа, ле әм хԝә дькьнә бьн пʹәрʹе ԝи, ԝәки әԝ дьлбини, билани у ԛәԝате бьдә мә. (Зәбур 41:3). w22.06 18 ¶16-17

Кʹьтеба Пироз дьбежә: «Сәре сәрԝахтийе хофа Хӧдан ә, Йе Һәри Пироз наскьрьн биланти йә» (Мәтʹәлок 9:10). Ләма жи, пешийа кӧ сафикьрьнәкә фәрз бькьн, гәрәке әм ве йәке сәр һʹиме ньһерʹандьна Йаһоԝа бькьн, демәк сәр һʹиме занәбуна дәрһәԛа «Йе Һәри Пироз». Бона ве йәке, әм дькарьн Кʹьтеба Пироз у әʹдәбйәтед сәр һʹиме Кʹьтеба Пироз леколин кьн. Бь ви щурʹәйи, әме биланийа рʹаст бьдьнә кʹьфше (Мәтʹәлок 2:5-7). Тʹәне Йаһоԝа дькарә биланийа рʹаст бьдә мә (Рʹомайи 16:27). Гәло әԝ чьрʹа Канийа биланийе йә? Йа пешьн, Әԝ Әʹфьрандаре һʹәму тьшти йә у дәрһәԛа әʹфринед хԝә һәр тьшти занә (Зәбур 104:24). Йа дӧда, биланийа Йаһоԝа һʹәму кьред ԝида те кʹьфше (Рʹомайи 11:33). Йа сьсийа, ширәтед Йаһоԝайә билан кʹаре дьдьнә ван мәрьва, йед кӧ ль гора ван ширәта дьжин (Мәтʹәлок 2:10-12). Сәва кӧ әм биланийа рʹаст ԛазанщ кьн, гәрәке әм ван рʹастийед сәрәкә ԛәбул кьн у изьне бьдьн, кӧ әԝ рʹебәрийа сафикьрьн у кьред мә бькьн. w22.10 19 ¶3-4

Кʹьтеба Әʹйанти сәре 12 нишан дькә, ԝәки Мире-щьна тʹәви щьна һат авитьне сәр әʹрде. Кʹьтеба Пироз ӧса дьбежә: «Ԝәй ль әʹрде у ль бәʹре, чьмки Мирещьн жорда сәр ԝәда һатә авитьне» (Әʹйанти 12:9-12). Гәло әм жь ван пʹехәмбәртийа чь кʹаре дьстиньн? Һьм һʹале дьнйайе һьм жи хәйсәт-һʹӧнӧред мәрьва, нишан дькьн кӧ Иса бь рʹасти жи буйә Пʹадша. Ләма жи, гава әм дьвиньн кӧ инсанед ль дәр-дора мә чьԛас хԝәһʹьз у һерс ьн, әм бь зедәйи бәрхԝә накʹәвьн, чьмки әм фәʹм дькьн кӧ кьред ԝан избат дькьн, ԝәки Пʹадшати ида һʹӧкӧм дькә! (Зәбур 37:1) Чьԛас әм незики Һармәгәдоне дьбьн, һаԛас һʹале дьнйайе ԝе дьһа хьраб бә (Маркос 13:8; 2 Тимотʹейо 3:13). Гәло әм шекьрдар ниньн, ԝәки Баве мәйи дьлован мәрʹа зәлал дькә кӧ сәбәбе ван тьшта чь йә? w22.07 3-4 ¶7-8

Әм дькарьн жь Йаһоԝа рʹәща бькьн, кӧ әԝ али хушк-бьред мә бькә, ԝәки әԝана бәр нәхԝәши, тʹәшԛәлед тʹәбийәте, шәрʹ, пәйкʹәтьн у тәнгасийед дьн, сәбьр бькьн. Ӧса жи, әм дькарьн бона ԝан хушк-бьра дӧа бькьн, йед кӧ али кәсед дәсттәнг дькьн. Һәрге тӧ һьнә жь ван хушк-бьра шәхси нас дьки, тӧ дькари илаһи бона ԝан дӧа бьки. Әв йәк кӧ тӧ жь Йаһоԝа рʹәща дьки ԝәки әԝ али ԝан бькә, нишан дькә, ԝәки тӧ бь рʹасти ԝана һʹьз дьки. Бьред кӧ рʹебәрийа щьвате дькьн, гәләк дьшекьриньн гава әм бона ԝан дӧа дькьн. Бь рʹасти жи, һʹӧкӧме дӧа гәләк мәзьн ә. Паԝлосе шанди жи заньбу кӧ әԝ һʹәԝще дӧайед хушк-бьра йә. Әԝи ӧса ньвиси: «Бона мьн жи дӧа бькьн, кӧ гава әз хәбәр дьм, готьнәк мьнрʹа бе дайине, ԝәки меркʹими сӧрʹа Мьзгинийе әʹйан кьм» (Әфәси 6:19). Иро жи гәләк бьред жир һәнә, йед кӧ гәләк шьхӧл дькьн у рʹебәрийа мә дькьн. Гава әм жь Йаһоԝа рʹәща дькьн, ԝәки әԝ шьхӧле ԝан кʹәрәм бькә, әм нишан дькьн кӧ әм ԝана һʹьз дькьн. w22.07 23-24 ¶14-16

Әскәр кʹӧмзьрьһʹе дькә сәре хԝә ԝәки сәре хԝә бьпарезә. Ле шәрʹе рʹӧһʹанида, гәрәке әм һʹьше хԝә жь һʹьщумед Мире-щьна бьпарезьн. Мире-щьна дьхԝазә мә бьщерʹьбинә у һʹьше мә бь фькьред шаш тʹьжә кә. Чаԝа кӧ кʹӧмзьрьһʹ сәре әскәр дьпарезә, һеви жи һʹьше мә дьпарезә, ԝәки әм Йаһоԝарʹа амьн бьминьн. Һәрге һевийа мә сьст бә у әм изьне бьдьн кӧ хԝәстьнед бәдәне һʹьше мә контрол кьн, әм дькарьн нета жийина һәрһәйи пьшт гӧһе хԝәва бавежьн. Ԛьрʹна йәкеда, һʹале һьнә шагьртед Иса жи ӧса бу, йед кӧ бажаре Корьнтʹеда дьжитьн. Баԝәрийа ԝан дәрһәԛа һевийа рʹабуна мьрийа сьст бьбу (1 Корьнтʹи 15:12). Паԝлос зәлал кьр, ԝәки кәсед кӧ баԝәрийа хԝә ве һевийа фәрз найньн, тʹәне дина хԝә дьдьн хԝәстьнед хԝә (1 Корьнтʹи 15:32). Рʹожед мәда жи гәләк мәрьвед ӧса һәнә. Әԝана тʹәне дина хԝә дьдьн ве йәке, чь кӧ ньһа дькарьн бьстиньн. Ле әм ӧса накьн. Әм итʹбарийа хԝә созед Хԝәде тиньн. w22.10 25-26 ¶8-9

Йаһоԝа дьхԝазә кӧ тӧ ԝирʹа дӧа бьки. Әԝ дәрдед тә дьвинә, у әԝи соз дайә кӧ әԝе һәр гав гӧһ бьдә дӧайед тә. Кʹьтеба Пироз дьбежә кӧ дӧайе рʹаста бәр дьле Ԝида ширьн ә (Мәтʹәлок 15:8). Чахе тӧ хԝә тʹәне тʹәхмин дьки, гәло тӧ дькари дәрһәԛа чь дӧа бьки? Дьле хԝә Йаһоԝарʹа вәкә (Зәбур 62:8). Ԝирʹа бәʹса хәм у дәрдед хԝә бькә у бежә кӧ әԝана сәр тә чаԝа һʹӧкӧм дькьн. Жь Йаһоԝа рʹәща бькә кӧ әԝ сәбьре бьдә тә. Һәрге тӧ хԝә тʹәне тʹәхмин дьки у дьтьрси, дӧа бькә кӧ Йаһоԝа билани у мерхасийе бьдә тә, ԝәки тӧ бькарьби бь зәлали у бь зарширьни хәбәр ди (Луԛа 21:14, 15). Һәрге тӧ хәмгин и йан фькьред нәбаш тенә һʹьше тә, жь Йаһоԝа бьхԝазә кӧ әԝ али тә бькә, ԝәки тӧ хушк йан бьраки щерʹьбандирʹа бәʹса һәстед хԝә бьки. Тӧ дькари жь Йаһоԝа рʹәща бьки ԝәки әԝ али ви кәси бькә, кӧ әԝ дәрде дьле тә рʹьнд фәʹм кә. Дьле хԝә Йаһоԝарʹа вәкә, дина хԝә бьдә щаба ԝи у аликʹарийа кәсед дьн ԛәбул кә. Әв йәк ԝе али тә бькә кӧ тӧ хԝә бь зедәйи тʹәне тʹәхмин нәки. w22.08 10 ¶6

Бажаре Тʹесалоникеда щьвата тʹәзә рʹасти зерандьнед гьран һат. Кʹомәкә мәрьвед һерс чәнд бьред дьн бьрьнә бәр сәрԝеред бажер (Кʹаред Шандийа 17:6). Һәла бьдә бәр чʹәʹве хԝә, кӧ әв шагьртед тʹәзә сәва ве йәке чьԛас дьтьрсийан! Ле Паԝлосе шанди тьштәк кьр, ԝәки шагьртед ви бажарида, хьзмәтеда сьст нәбьн. Әԝи ԝанрʹа гот: «[Әм] Тимотʹейойе бьрайе мә . . . сәр ԝәда бьшиньн, кӧ баԝәрийа ԝә ԛәԝин кә у дьл бьдә ԝә, ԝәки ван тәнгасийада тʹӧ кәс жь ԝә нәлькʹӧмә» (1 Тʹесалоники 3:2, 3). Тимотʹейо дитьбу кӧ ахьрийеда Йаһоԝа чаԝа әԝ кʹәрәм кьрьбу, ләма жи әԝи дькарьбу хушк-бьред Листрайеда бьдә баԝәркьрьне, ԝәки Йаһоԝа ԝе али ԝан жи бькә (Кʹаред Шандийа 14:8, 19-22; Ибрани 12:2). w22.08 21 ¶4

Сала 1870-да, кʹомәкә леколинкʹаред Кʹьтеба Пироз, бьн рʹебәрийа Чарлз Расселда, дәстпекьр Ньвисаред Пироз кʹур леколин кә. Ԝана дьхԝәст фәʹм бькьн, кӧ ԛимәта ԛӧрбанбуна Иса Мәсиһ бь рʹасти чьда йә у биранина мьрьна ԝи гәрәке чаԝа дәрбаз кьн. Һʹәта рʹожа иро, әм жь леколина ԝан кʹарәкә гәләк мәзьн дьстиньн. Ча бежи чʹәʹве мә вәбу, кӧ әм мәʹна ԛӧрбанбуна Иса Мәсиһ һе рʹьнд фәʹм кьн у бьзаньбьн кӧ әв чь кʹаре мәрʹа тинә (1 Йуһʹәнна 2:1, 2). Ӧса жи мә фәʹм кьрийә, кӧ Кʹьтеба Пироз дӧ һеви дьдә мәрьвед амьн. Демәк һьнә кәс ԝе ль әʹзмана бьжин, ле йед дьн ԝе һʹәта-һʹәтайе ль сәр әʹрде бьжин. Гава әм дьфькьрьн кӧ Йаһоԝа чьԛас мә һʹьз дькә у кʹара ԛӧрбанбуна Иса Мәсиһ сәва мә чь йә, әм дьһа незики Йаһоԝа дьбьн (1 Пәтрус 3:18). Мина хушк-бьред амьн йед ԝәʹде бәре, әм жи мәрьва тʹәглиф дькьн кӧ тʹәви мә Евара Биранине дәрбаз кьн, чаԝа кӧ Иса Мәсиһ тʹәми дабу шагьртед хԝә. w23.01 21 ¶6-7

Иса мәрьв һин дькьрьн, кӧ Пʹадшатийа Хԝәде ԝе чьԛас кʹәрәма сәр мәда бьбаринә. Әм бона кʹьрʹине рʹази нә, чьмки әԝ рʹе вәдькә, ԝәки әм бьбьнә достед Йаһоԝа у Иса. Кәсед кӧ баԝәрийа хԝә Иса тиньн, һевидар ьн кӧ ԝе жийина һʹәта-һʹәтайе бьстиньн у мәрьвед хԝәйи незик кӧ мьрьнә, диса бьвиньн (Йуһʹәнна 5:28, 29; Рʹомайи 6:23). Мә тʹӧ тьшт нәкьрийә кӧ һежайи ԝан кʹәрәма бьн, у әме тʹӧ щар нькарьбьн бьн ԛәнщийа Хԝәде у Иса дәрен (Рʹомайи 5:8, 20, 21). Ле әм дькарьн шекьрдарийа хԝә ԝанрʹа нишан кьн. Гәло чь щурʹәйи? Һәрге чь дәсте мәда һәйә әм бона шьхӧле Пʹадшатийе хәрщ кьн. Мәсәлә, әм дькарьн пьштгьрийа шьхӧле авакьрьне у тʹәзәкьрьна авайед бона һʹәбандьна Йаһоԝа, бькьн. w23.01 26 ¶3; 28 ¶5

Сәрԝертийа Пʹадшатийа Хԝәде, ԝе бона һʹәму мәрьвед сәр тʹәмамийа дьнйайе щабдар бә. Мина Иса Мәсиһ, 144 000 кәсед кʹьфшкьри ԝе ча пʹадша у кʹаһин хьзмәт бькьн (Әʹйанти 5:10). Бьн Ԛануна Мусада, шьхӧле кʹаһинайә сәрәкә әԝ бу, кӧ сьһʹәт-ԛәԝата мәрьва йа физики у рʹӧһʹани бьпарезьн. Әв йәк кӧ «Ԛанун сийа ԝан тьштед ԛәнщ ә», логики йә кӧ һәмпʹадшед Иса Мәсиһ ԝе бона һʹәԝщед хьзмәткʹаред Хԝәде, ча алийе физики ӧса жи алийе рʹӧһʹанида хәм бькьн (Ибрани 10:1). Гәло дьнйа тʹәзәда, әме чаԝа рʹебәрийе жь ԝана бьстиньн? Әм ве йәке ньзаньн, ле әм дькарьн баԝәр бьн, кӧ һәр тьшт ԝе бь организә бе кьрьне (Әʹйанти 21:3, 4). w22.12 11 ¶11-13

Хԝәстьна мә әв ә, ԝәки мәрьвед кӧ щара пешьн тенә сәр Евара Биранине, пебьһʹәсьн ԝәки Йаһоԝа у Иса Мәсиһ бона мә чь кьрьнә (Йуһʹәнна 3:16). Әм һевидар ьн, ԝәки тьштед кӧ әԝана ԝедәре бьвиньн у бьбьһен ԝе дьле ԝан бьгьрә у әԝана ԝе бьхԝазьн һе зедә һин бьн у бьбьнә хьзмәткʹаред Йаһоԝа. Әм ӧса жи ԝан мәрийа тʹәглифи сәр Евара Биранине дькьн, йед кӧ ида Йаһоԝарʹа хьзмәт накьн. Әм әве йәке дькьн, сәва кӧ биньнә бира ԝан, ԝәки Йаһоԝа диса жи ԝана һʹьз дькә. Гәләк жь ԝан тенә сәр Евара Биранине, у әм һатьна ԝанрʹа гәләк ша дьбьн. Биранин тинә бира ԝан, кӧ чахе ԝана Йаһоԝарʹа хьзмәт дькьр, жийина ԝан чьԛас хԝәш бу. (Зәбур 103:1-4). Фьрԛи тʹӧнә мәрьв ԝе әве тʹәглифе ԛәбул кьн йан на, әм диса жи бь хирәт ԝана тʹәглифи сәр Евара Биранине дькьн. Йа лапә фәрз әԝ ә, кӧ бона Йаһоԝа нә кӧ һәжмара мәрьва фәрз ә, ле һәр мәрьвәк кӧ те сәр Евара Биранине (Луԛа 15:7; 1 Тимотʹейо 2:3, 4). w23.01 20 ¶1; 22-23 ¶9-11

Шәва пешийа мьрьна хԝә, Иса тьштәки мәхсус жь Баве хԝәйи әʹзмана һиви кьрьбу. Әԝи жь Йаһоԝа хԝәстьбу ԝәки әԝ шагьртед ԝи бьпарезә (Йуһʹәнна 17:15, 20). Йаһоԝа хьзмәткʹаред хԝә һәртʹьм хԝәй дькьр, у чʹәʹве ԝи тʹьме сәр ԝан бу. Ле Иса Мәсиһ заньбу кӧ Мире-щьна ԝе дьһа зедә мьԛабьли ԝан шәрʹ бькә. Ләма жи сәва кӧ әԝана бькарьбуна һьмбәри һʹьщуме Мире-щьна ԛәԝи бьсәкьнийана, әԝана һʹәԝще аликʹарийа Йаһоԝа бун. Иро, дьнйа Мире-щьна Мәсиһийед рʹастрʹа гәләк чәтьнайа тинә. Тәнгасийед кӧ рʹасти мә тен, дькарьн мерхасийа мә бьшкеньн у амьнийа мә бьщерʹьбиньн. Ле нә лазьм ә ԝәки әм бьтьрсьн. Чʹәʹве Йаһоԝа сәр мә йә, әԝ һʹәму тәнгасийед мә дьвинә, у һәр гав һазьр ә али мә бькә, ԝәки әм сәбьр кьн. Бәле, «чʹәʹве Хӧдан ль сәр хофкʹешед Ԝи нә ... [әԝ] ԝан хьлаз дькә» (Зәбур 33:18-20). w22.08 8 ¶1-2

Һәр сал ԝәʹде Биранина мьрьна Иса, әм дьхԝазьн шекьрдарийа хԝә нишан кьн. Ләма жи әм дӧа дькьн у кʹур дьфькьрьн, ԝәки ԛӧрбанбуна Иса бона мәрийа чь те һʹәсабе. Һьм жи чь кӧ жь дәсте мә те әм дькьн, сәва кӧ һʹәму мәрьва тʹәглифи сәр ве щьвина мәхсус кьн. Әм изьне надьн ԝәки тьштәк рʹийа мә бьгьрә у бьбә мәʹни, кӧ әм нәчьн сәр Евара Биранине. Сәр Евара Биранине, әм педьһʹәсьн кӧ мәрьв чьма һʹәԝще ԛӧрбане нә у мьрьна мәрьвәки чаԝа дькарә һәԛе гӧнед гәләка бьдә. Әв готар тинә бира мә, кӧ мәʹна нан у шәраве чь йә у кʹи гәрәке симбола бьхԝә у вәхԝә (Луԛа 22:20). У әм дәрһәԛа ԝан кʹәрәмед ахьрийе дьфькьрьн, йед кӧ әԝ мәрьв ԝе бьстиньн, һевийа кʹижана жийина һʹәта-һʹәтайе сәр әʹрде йә (Ишайа 35:5, 6; 65:17, 21-23). Әм гәрәке ԝан рʹастийед Кʹьтеба Пироз гәләк ԛимәт кьн. w23.01 20 ¶2; 21 ¶4

Хԝәде Кӧрʹе хԝә ча ԛӧрбан бона гӧне мә бәрва да, ԝәки әм бькарьбьн жийина һәр-һәйи бьстиньн (Мәтта 20:28). Паԝлосе шанди ньвиси: «Мьрьн рʹуйе мәрьвәкида бу, бь мәрьвәки жи ԝе рʹабуна мьрийа бьбә. Чаԝа һʹәмуйед жь Адәм буйи дьмьрьн, ӧса жи һʹәмуйед жь Мәсиһ буйи ԝе сах бьн» (1 Корьнтʹи 15:21, 22). Иса Мәсиһ шагьртед хԝә һин кьр, ԝәки дӧа бькьн кӧ Пʹадшатийа Хԝәде бе у ԛьрара Хԝәде сәр әʹрде бе сери (Мәтта 6:9, 10). Гәло ԛьрара Хԝәде чь йә? Пʹарәкә ԛьрара ԝи әв ә, ԝәки инсан һʹәта-һʹәтайе сәр әʹрде бьжин. Сәва кӧ ве ԛьрара хԝә бинә сери, Йаһоԝа Кӧрʹе хԝә ча Пʹадше Пʹадшатийа хԝә кʹьфш кьрийә. Ӧса жи, Хԝәде 144 000 мәрьв ль сәр әʹрде дьжберә, ԝәки әԝана тʹәви Иса ԛьрара Хԝәде биньн сери (Әʹйанти 5:9, 10). w22.12 5 ¶11-12

Гава мәрьвәки мәйи һʹьзкьри дьмьрә, әм гәләк бира ԝи дькьн! Серида, хенщи еше әм дьбәкә тьштәки дьн тʹәхмин накьн, илаһи һәрге пешийа мьрьна хԝә әԝ дьчәрчьри. Ле ԝәʹдә шунда, дьбәкә еша дьле мә һьнәки сьвьк дьбә. Дьбәкә әм бь шабуне тиньн бира хԝә кӧ әԝ мәрьве мәйи дәлал, чь готьбу йан чь кьрьбу, ԝәки мә ԛәԝи кә, бәшәра мә хԝәш кә йан жи тьштәки мә һин кә. Мина ве йәке, гава әм дәрһәԛа еш у мьрьна Иса Мәсиһ дьхуньн, дьле мә хәмгин дьбә. Һʹәфтийед пешийа у паши Биранине, әм ԝәʹдә вәдьԛәтиньн, сәва кӧ дәрһәԛа кʹьрʹине кʹур бьфькьрьн (1 Корьнтʹи 11:24, 25). Ле чахе әм дәрһәԛа жийина Исайә сәр әʹрде дьфькьрьн, демәк сәр гьли у кьред ԝи, әм гәләк ша дьбьн. Ӧса жи гава әм дина хԝә дьдьн тьштед кӧ Иса иро дькә у тьштед кӧ әԝе ахьрийеда бона мә бькә, дьле мә ԛәԝи дьбә. w23.01 26 ¶1-2

Паши мьрьна Иса Мәсиһ, шагьртед ԝи гәләк дьлтәнг бун. Ԝана нә кӧ тʹәне достәки дәлал ӧнда кьр, ле ԝана ӧса тʹәхмин дькьр кӧ те бежи әԝана бе һеви ман (Луԛа 24:17-21). Ле гава Иса шагьртед хԝәрʹа әʹйан бу, әԝи ԝанрʹа шьровәкьр, кӧ пʹехәмбәртийед Кʹьтеба Пироз ча сәр ԝи һатьнә сери. Ӧса жи, Иса щабдарикә фәрз да ԝан (Луԛа 24:26, 27, 45-48). Чахе Иса чу ль әʹзмана, ԝи чахи хәмгинийа шагьртед ԝи дәрбаз бу у шабун кʹәтә дьле ԝан. Әԝана гәләк ша бун, чьмки ԝана заньбу кӧ Ахайе ԝан сах ә у ԝе али ԝан бькә, ԝәки шьхӧле хԝәйә тʹәзә биньн сери. Әԝ шабун ԝана дәʹф дьда ԝәки тʹьме пәсьне Йаһоԝа бьдьн (Луԛа 24:52, 53; Кʹаред Шандийа 5:42). Чʹәʹв бьдьнә мәсәла шагьртед Иса те һʹәсабе, кӧ әм гәрәке шьхӧлед Пʹадшатийа Хԝәде жийина хԝәда дайньн сәр щийе пешьн. Рʹаст ә, сәва кӧ әм бькарьбьн бәрдәԝам кьн Йаһоԝарʹа хьзмәт кьн, мәрʹа сәбьр лазьм ә, ле Йаһоԝа соз дайә кӧ әԝе мә гәләк кʹәрәм кә, һәрге әм ве йәке бькьн (Мәтʹәлок 10:22). w23.01 30-31 ¶15-16

Сәва кӧ әм шашийа Адәм у Һеԝайе дӧбарә нәкьн, гәрәке әм бәрдәԝам кьн дәрһәԛа Йаһоԝа һе зедә пебьһʹәсьн, һʹӧнӧред ԝи ԛимәт бькьн у хирәт кьн, кӧ әм фькьред ԝи фәʹм кьн. Чьԛас һе зедә әм ве йәке бькьн, һаԛас әме Йаһоԝа дьһа зедә һʹьз бькьн. Бинә бира хԝә кӧ Бьраһим Йаһоԝа чьԛас һʹьз дькьр. Гава жерʹа чәтьн бу ԝәки сафикьрьнед Йаһоԝа фәʹм кә, әԝ диса жи нәбу рʹабәр, ле әԝи дьхԝәст Йаһоԝа дьһа незик нас бькә. Мәсәлә, гава Бьраһим бьһист кӧ Йаһоԝа дьхԝазә бажаред Содом у Гоморайе ԝеран кә, әԝ пешийе дьтьрсийа кӧ «һʹакьме тʹәмамийа дьнйайе» ԝе кәсед рʹаст тʹәви кәсед хьраб ԛьрʹ кә. Бьраһим дьхԝәст бьзаньбуйа һәла Хԝәде ԝе бь рʹасти ве йәке бькә йан на, ләма әԝи бь мьлукти чәнд пьрс пьрсин. Йаһоԝа бь сәбьр щаба ԝи да. Хьлазийеда, Бьраһим тедәрхьст кӧ Йаһоԝа дьле һәр кәси дьньһерʹә у тʹӧ щара кәсед бесущ тʹәви кәсед сущдар щәза накә (Дәстпебун 18:20-32). w22.08 28 ¶9-10

Сала 455 Б.Д., паши кӧ Нәһәмийайе Ԝәли, диԝаред Оршәлиме ава кьрьбун, әԝи меред бь итʹбар дьгәрʹийа, йед кӧ ԝе бькарьбуна ви бажари рʹьнд хԝәй кьн. Йәк жь кәсед кӧ әԝи бьжарт, мерәки бь наве Һананйа бу, йе кӧ «сәрәке бьрще» бу. Кʹьтеба Пироз дьбежә кӧ әԝ «дьлсоз бу у жь гәләк кәса зедәтьр жь Хԝәде дьтьрсийа» (Нәһәмийа 7:2, ИМ). Һананйа Йаһоԝа һʹьз дькьр у нәдьхԝәст дьле ԝи бешинә, ләма әԝи щабдарийед хԝә ча лазьм ә дьани сери. Әв һʹӧнӧр дькарьн али мә жи бькьн, ԝәки әм хьзмәтийа Хԝәдеда амьн у бь итʹбар бьн. Ӧса жи, дина хԝә бьдә мәсәла һәваләки Паԝлос, бь наве Тьхико. Паԝлосе шанди хԝә дьспартә Тьхико, йе кӧ ԝирʹа бу «ԛӧльхкʹаре . . . амьн» (Әфәси 6:21, 22). Бь сайа Тьхико, Паԝлос һьм нәʹмед хԝә шандьн хушк-бьред ль бажаред Әфәс у Колосйайерʹа, һьм жи һелан у дьлбини да ԝан. Мина Тьхико, иро жи бьред амьн у бь итʹбар һәнә, йед кӧ бона һʹәԝщед мәйә рʹӧһʹани хәм дькьн (Колоси 4:7-9). w22.09 9-10 ¶5-6

Усьв кʹәтә нава тәнгасийед гьран, йед кӧ ԝәкә 13 сала кʹьшандьн. Усьв дькарьбу бькʹәта шьке, гәло Йаһоԝа ԝи һʹьз дькә йан на, у әԝ дькарьбу бәрхԝә кʹәта, ԝәки Йаһоԝа ван тәнгасийада әԝ тʹәне һиштийә. Ле Усьв жь бо тьште кӧ һатә сәре ԝи, нәбу йәки һерс у зӧлм. Әԝ рʹьһʹәт у сәрхԝә ма. Гава мәщал кʹәтә дәсте ԝи, кӧ һʹәйфе жь бьред хԝә һьлдә, әԝи бь дьловани бахшандә ԝан (Дәстпебун 45:4, 5). Усьв йәки сәрԝахт бу, ләма жи әԝи бь зедәйи дина хԝә нәдьда дәрдед хԝә, ле әԝи фәʹм дькьр, ԝәки тьштед кӧ һатьнә сәре ԝи, нета Йаһоԝава гьредайи нә (Дәстпебун 50:19-21). Әԝ чь дәрс ә бона мә? Һәрге тӧ рʹасти нәһәԛийе бейи, жь Йаһоԝа нәхәйдә у нәфькьрә кӧ әԝи тʹәрка тә дайә, ле бьфькьрә кӧ әԝ чаԝа али тә дькә, ԝәки тӧ ве дәрәщеда сәбьр ки. Гава кәсед дьн нәһәԛийе ль тә бькьн, хирәт бькә кӧ кемасийед ԝан бь һʹьзкьрьне дади. w22.11 21 ¶4

Жь хәԝн-хәйала Данийел пʹехәмбәр, бь зәлали те фәʹмкьрьне кӧ Йаһоԝа жь һʹәму сәрԝеред дьн Бьльндтьр ә. Бәри пешьн, Данийел чар щәʹнәԝьред мәзьн дитьн, йед кӧ империйед һʹәмдьнйайе йед бәре у иройин тенә һʹәсабе, демәк Бабилон, Мәдийа-Фарьс, Йунаньстан, Рʹом у Англо-Америка, йа кӧ рʹожа иройин сәрԝертийе дькә (Данийел 7:1-3, 17). Паше, Данийел Йаһоԝа Хԝәде сәр тʹәхте диԝана әʹзмани рʹуньшти дит (Данийел 7:9, 10). Хԝәде ԝе һʹӧкӧмәтийе жь сәрԝеред дьнйайе бьстинә у бьдә кәсед дьһа һежа у ԛәԝат. Гәло ԝе бьдә кʹе? «Йәки мина лаԝе мәрьв», демәк Иса Мәсиһ у «пирозед Йе Бьльнд», демәк 144 000 кәсед кӧ ԝе «һәр у һәр» һʹӧкӧм бькьн (Данийел 7:13, 14, 18, ИМ). Әшкәрә йә кӧ Йаһоԝа «Йе Бьльнд» ә. Әв хәԝн-хәйала Данийел избат дькә тьштәки кӧ әԝи бәре готьбу. Данийел гот: «Хԝәдайе әʹзмана . . . пʹадша дәрдьхә сәр тʹәхт у тинә хԝаре» (Данийел 2:19-21). w22.10 14-15 ¶9-11