Нисан

Жь хԝә бьпьрсә: «Гәло әз ширәта ԛәбул дькьм? Гәло әз һазьр ьм кӧ шашийед хԝә биньм сәр хԝә? Йан әз тʹьме хԝә һәԛ дәрдьхьм? Гәло әз шашийед хԝә давежьм сәр кәсед дьн?» Гава тӧ Кʹьтеба Пирозда дәрһәԛа сәрһатийед хьзмәткʹаред амьн дьхуни, дина хԝә бьде кӧ әԝана чаԝа дәрәщед ӧсада сәрдькʹәтьн. У һәр щар ве пьрсе бьдә хԝә: «Әз чаԝа дькарьм чʹәʹв бьдьмә ван мәсәлед хьзмәткʹаред амьн?» Иро жи хушк-бьред мәйә щаһьл у әʹмьрда мәзьн мәрʹа мәсәлә нә. Бәʹса хәбәре бьфькьрә кӧ хушк-бьред щьвата тәда чаԝа бәр һʹӧкӧме мәрьвед дәр-дор, мьԛабьлибуна малбәтеда йан нәхԝәшийе, бь амьни Йаһоԝарʹа хьзмәт дькьн? Тӧ дьхԝази чʹәʹв бьди кʹижан һʹӧнӧред ԝанә баш? Әв йәк дькарә али тә бькә ԝәки тӧ жи нава тәнгасийед хԝәда Йаһоԝарʹа амьн бьмини. Гәло әв йәк кӧ хушк-бьред мәйә ӧса дәлал һәнә, дьле мә ша накә? (Ибрани 13:7). w22.04 13 ¶13-14

Чахе әм жийина хԝәда рʹасти тәнгасийа тен, гәло әм ша набьн гава рʹуспик ԝәʹдә вәдьԛәтинә, ԝәки гӧһ бьдә мә у бәр дьле мәда бе? Йан жи, гава мәрʹа бона һинбуна Кʹьтеба Пироз аликʹари лазьм ә, гәло әм ша набьн кӧ пешәнгәки щерʹьбанди һазьр ә тʹәви мә бе у ширәтед керһати бьдә мә? Бәле, хушк-бьред мә бь шабуне али мә дькьн. Һәгәр әм жи һазьр бьн кӧ али хушк-бьра бькьн, әме жи ша бьн. Һәгәр тӧ дьхԝази хьзмәта хԝә һьнә алийада дьһа зедә бьки, чь дькарә али тә бькә ԝәки тӧ бьгьһижи нетед хԝә? Һьнә кәс хԝәрʹа дьбежьн: «Әз дьхԝазьм щьватеда дьһа зедә шьхӧл бькьм». Ле һәрге әԝана нетәкә конкрет данәйньн пешийа хԝә, әԝана ԝе ньзаньбьн чаԝа бьгьһижьн нета хԝә, у ахьрийеда ԝе фәʹм нәкьн һәла әԝана гьһиштьнә нета хԝә йан на. Ләма жи ԝе дьһа баш бә, ԝәки тӧ нетәкә конкрет дайни пешийа хԝә. Тӧ дькари сәр кʹахазәке бьньвиси һәла нета тә чь йә у гәрәке тӧ чь бьки ԝәки бьгьһижи ве нете. w22.04 25 ¶12-13

Йаһоԝа ньһа ‹әʹлаләтәкә мәзьн› тʹоп дькә у һин дькә, ԝәки әԝана бьн Пʹадшатийа ԝида бьжин (Әʹйанти 7:9, 10). Иро, дьнйа бь тьрс у шәрава тʹьжә йә, ле кәсед кӧ пʹара әʹлаләта мәзьн ьн хирәт дькьн, ԝәки нәфрʹәте бь тʹәмами жь дьле хԝә дәрхьн. Ньһа, әԝана бь симболик шуред хԝә дькьн гисьн, демәк кʹотан (Миха 4:3). Дәԝса кӧ мәрьва шәрʹада бькӧжьн, әԝана дәрһәԛа Хԝәде у нетед ԝи ԝана һин дькьн у бь ве йәке али ԝан дькьн, ԝәки «жийина кӧ рʹасти жийин ә ԛазьнщ кьн» (1 Тимотʹейо 6:19). Дьбәкә мәрьвед ԝан мьԛабьли ԝан дәртен, йан жи әԝана алийе пʹәрава чәтьнайа дькʹьшиньн, чьмки пьштгьрийа Пʹадшатийа Хԝәде дькьн, ле диса жи, Йаһоԝа бона һʹәԝщед ԝан хәм дькә (Мәтта 6:25, 30-33; Луԛа 18:29, 30). Ләма жи, әм баԝәр ьн кӧ Пʹадшатийа Хԝәде бь рʹасти жи сәрԝертийе дькә у ԝе ԛьрара Йаһоԝа бинә сери. w22.12 5 ¶13

Хьлазийа 1 000 сали һәр кәс ԝе беԛьсур бә у тʹӧ кәс ԝе ида бьн һʹӧкӧме гӧне Адәмда нәчәрчьрә, чьмки һʹӧкӧме гӧне ԝи ԝе ида бь тʹәмами бе һьлдане (Рʹомайи 5:12). Бь ви щурʹәйи, хьлазийа Пʹадшатийа Һʹәзарсали һәр кәс ԝе ча бежи сах бә, демәк ԝе бьбә мәрьве беԛьсур (Әʹйанти 20:5). Мире-щьна амьнийа мәрьве беԛьсур, демәк Иса Мәсиһ кьрә бьн шьке, ле Иса һʹәму щерʹьбандьнада амьн ма. Чахе мәщал бькʹәвә дәсте Мире-щьна, кӧ диса мәрьвед беԛьсур бьщерʹьбинә, гәло һәр кәс ԝе мина Иса амьн бьминә? Ԝе һьнге щаба ве пьрсе әʹйан бә, гава хьлазийа 1 000 сали, Мире-щьна жь гәлийе һәй-ԝайе бе бәрʹдане (Әʹйанти 20:7). Кәсед кӧ ԝәʹде ве щерʹьбандьна хьлазийе амьн бьминьн, ԝе жийина һʹәта-һʹәтайе у азайа рʹаст бьстиньн (Рʹомайи 8:21). Ле кәсед кӧ мьԛабьли Хԝәде дәрен, ԝе тʹәви Мире-щьна у щьнед ԝи һʹәта-һʹәтайе бенә кʹӧтакьрьне (Әʹйанти 20:8-10). w22.05 19 ¶18-20

Әв готьн һатә сери, гава Мире-щьна, Щьһу у Рʹомайа да хәбате, ԝәки әԝана Кӧрʹе Хԝәде бькӧжьн (Луԛа 23:13, 20-24). Чаԝа кӧ бьрина пәʹнийе дәмәке дьбә сәбәб кӧ кәсәк нькарә рʹе һәрʹә, Иса жи дәмәке нькарьбу тьштәк бькьра, чьмки әԝ се рʹожа мьри бу (Мәтта 16:21). Сәва кӧ пʹехәмбәртийа жь Дәстпебун 3:15 бьһата сери, лазьм бу кӧ Иса жь мьрьне бьһата рʹакьрьне. Гәло чьрʹа? Чьмки ль гора ве рʹезе, зӧрʹәт ԝе сәре мәʹр бьһʹьнщьрʹинә. Бона ве йәке, лазьм бу кӧ бьрина пәʹнийа Иса ԛәнщ бә. Һәма ӧса жи ԛәԝьми. Рʹожа сьсийа паши мьрьна Иса, әԝ ча кәсе рʹӧһʹанийә нәмьри жь мьрьне һатә рʹакьрьне. Ве рʹожа кӧ Хԝәде ида кʹьфш кьрийә, Иса Мәсиһ ԝе сәре Мире-щьна бьһʹьнщьрʹинә (Ибрани 2:14). Иса у һәмпʹадшед ԝи, ԝе һʹәму дьжмьнед Хԝәде, демәк зӧрʹәта мәʹр, ԛьрʹ кьн (Әʹйанти 17:14; 20:4, 10). w22.07 16 ¶11-12

Де-бавно, али зарʹед хԝә бькьн кӧ әԝана хԝәрʹа һәвалед баш бьжберьн. Хәбәра Хԝәде зәлал дькә кӧ һәвалед мә дькарьн ль сәр мә баш йан хьраб һʹӧкӧм кьн. Гәло һун һәвалед зарʹед хԝә нас дькьн? Һун чаԝа дькарьн али зарʹед хԝә бькьн, ԝәки әԝана тʹәви кәсед кӧ Йаһоԝа һʹьз дькьн һәвалтийе бькьн? (1 Корьнтʹи 15:33). Дьԛәԝьмә һун дькарьн гази ԝан мәрьва бькьн йед кӧ рʹӧһʹанида ԛәԝи нә, ԝәки әԝана тʹәви малбәта ԝә ԝәʹдә дәрбаз кьн (Зәбур 119:63). Бавәки бь наве Тони дьбежә: «Бь сала, әз у жьна мьн, мә щурʹә-щурʹә хушк у бьред щаһьл у әʹмьрда мәзьн тʹәглифи мала хԝә дькьр. Мә тʹәвайи хԝарьн дьхԝар у ԛӧльхкьрьна тʹәви малбәте дәрбаз дькьр. Әв йәк мәщаләкә баш ә, ԝәки ԝан мәрьва рʹьнд нас кьн йед кӧ Йаһоԝа һʹьз дькьн у бь шабуне ԝирʹа хьзмәт дькьн . . . Хирәт, һазьрбун у сәрһатийед ԝан, сәр зарʹед мә гәләк баш һʹӧкӧм кьрьнә у али ԝан кьрийә кӧ әԝ дьһа незики Йаһоԝа бьн». w22.05 29-30 ¶14-15

Гава рʹуспи тʹәви кәсе кӧ гӧнә кьрийә хәбәр дьдьн, нета ԝан әв ә кӧ сафикьрьнәкә ӧса бькьн, йа кӧ ида сәр әʹзмана һатийә сафикьрьне. Гәло щьват жь ви шьхӧле рʹуспийа чаԝа кʹаре дьстинә? Жь аликива, кәсед кӧ тʹобә накьн у дькарьн зьраре бьдьн пәзед Йаһоԝа, жь щьвате тенә дәрхьстьнә (1 Корьнтʹи 5:6, 7, 11-13; Тито 3:10, 11). Жь алийе дьнва жи, дьбәкә кәсе кӧ гӧнә кьрийә тʹобә бькә у жь алийе Йаһоԝава бе бахшандьне (Луԛа 5:32). Рʹуспи бона кәсе кӧ тʹобә кьрийә дӧа дькьн у жь Йаһоԝа рʹәща дькьн ԝәки әԝ али ви кәси бькә, ԝәки әԝ рʹӧһʹанида диса ԛәнщ бә (Аԛуб 5:15). Мәсәлә, чахе ԝәʹде хәбәрдана тʹәви рʹуспийа әԝ гӧне хԝә тʹобә накә, әԝ гәрәке жь щьвате бе дәрхьстьне. Диса жи, һәгәр һʹьше ԝи кәсе гӧнәкʹар бе сәре ԝи у әԝ жь дьл тʹобә бькә у хԝә рʹаст кә, Йаһоԝа һазьр ә ԝәки гӧне ԝи бьбахшинә (Луԛа 15:17-24). Гӧне ԝи чьԛас гьран бә жи, Йаһоԝа дькарә бьбахшинә ԝи (2 Дирок 33:9, 12, 13; 1 Тимотʹейо 1:15). w22.06 9 ¶5-6

Бь сайа аликʹарийа Йаһоԝа, хушк-бьред мә сәр тʹәмамийа дьнйайе бь амьни мьԛабьли Мире-щьна дәртен (1 Пәтрус 5:9). Тӧ жи дькари ве йәке бьки! Зутьрәке, Йаһоԝа ԝе Иса Мәсиһ у һәмпʹадшед ԝирʹа бежә, ԝәки әԝана «кьред Мирещьн» хьраб кьн (1 Йуһʹәнна 3:8). Паши ве йәке, хьзмәткʹаред Хԝәде ԝе ида тʹӧ тьшти нәтьрсьн. Кʹьтеба Пироз ӧса дьбежә: «Те ԛә нәтьрси. Ԝе һәлакбун [саԝ] жь тә дур бә, ԝе ԛәт незики тә нәбә» (Ишайа 54:14, ИМ; Миха 4:4). Ле һʹәта ԝе рʹоже, лазьм ә кӧ әм гәләк хирәт бькьн ԝәки тьрс жь дьле хԝә дәрхьн. Йаһоԝа хьзмәткʹаред хԝә һʹьз дькә у ԝана дьпарезә. Сәва кӧ баԝәрийа мә дьһа ԛәԝи бә, ԝе баш бә кӧ әм дина хԝә бьдьне һәла ԝәʹде бәре Йаһоԝа хьзмәткʹаред хԝә чаԝа дьпарастьн. Әм гәрәке дәрһәԛа ван сәрһатийа кʹур бьфькьрьн у мәрьвед дьнрʹа жи гьли кьн. Ӧса жи, ԝе баш бә кӧ әм биньн бира хԝә ԝәки һʹәта ньһа, әԝи чаԝа али мә кьрийә кӧ әм нава тәнгасийада сәбьр кьн. Бәле, бь аликʹарийа Йаһоԝа, әм дькарьн тьрсед хԝә алт кьн! (Зәбур 34:4). w22.06 19 ¶19-20

Империйа һʹәмдьнйайе, йа кӧ бь симболик пʹийед «жь һʹәсьн у жь гьле» йә, гәрәке хӧйа буйа. Әв империйа һʹәмдьнйайе йа хьлазийе йә. Ԝәʹде Шәрʹе Һʹәмдьнйайе йа I, гава Британйа у Дәԝләтед Йәкбуйи йед Америкайе, бунә йәк, әв империйа һʹәмдьнйайе хӧйа бу, демәк Англо-Америка. Хәԝна Нәбукәднәсәр дина мә дькʹьшинә сәр ве йәке, чь кӧ ве империйайе жь пʹадшатийед пешийа ве щӧдә дькә. Йәктийа Британйа у Америкайе нә кӧ бь металәкә жь зерʹ йан зив ә, ле бь тʹәвльһәвийа һʹәсьн у гьле йә. Гьл, демәк һʹәрʹийа сор бь симболик те һʹәсабе щьмәʹт (Данийел 2:43). Иро әшкәрә йә, кӧ һʹӧкӧме щьмәʹте чаԝа рʹийа ве империйа һʹәмдьнйайе дьгьрә у щар-щара изьне надә кӧ әԝ хԝәстьна хԝә бинә сери. Әԝ рʹьнд те кʹьфше ԝәʹде һьлбьжартьнед политики, кампанйайед бона мафед бажарвана у протестед мәзьн кӧ щьмәʹт пешда тинә. w22.07 4-5 ¶9-10

Һәрге тӧ хԝә паш дьхи ԝәки бейи ньхӧмандьне, жь хԝә бьпьрсә: «Чь наһелә кӧ әз бемә ньхӧмандьне?» (Кʹаред Шандийа 8:36). Дина хԝә бьде, кӧ Иса ԛәдандьна хԝәстьна Баве хԝә бәрамбәри хԝарьне кьр. Гәло чьрʹа? Чаԝа кӧ хԝарьн бона бәдәна мә керһати йә, ӧса жи әв йәк кӧ Йаһоԝа чь жь мә дәʹԝа дькә бона кʹара мә йә. Йаһоԝа нахԝазә, ԝәки әм тьштед ӧса бькьн чь кӧ ԝе зьраре бьдә мә. Гәло Йаһоԝа дьхԝазә ԝәки тӧ бейи ньхӧмандьне? Һәмьки әре! (Кʹаред Шандийа 2:38) Ләма жи баԝәр бә кӧ һәрге тӧ гӧрʹа тʹәмийа Йаһоԝа бьки у бейи ньхӧмандьне, әв йәк бона кʹара тә йә. Мәсәлә, гава хԝарьнәкә хԝәш бьдьнә бәр тә, те бьхԝи ӧса нинә? Һәма бь ви щурʹәйи тӧ гәрәке хԝә паш нәхи у бейи ньхӧмандьне. Һьнәк кәс чьма хԝә паш дьхьн у найенә ньхӧмандьне? Дьԛәԝьмә әԝана дьфькьрьн: «Әз бона ньхӧмандьне һе һазьр ниньм». Сафикьрьна мәйә һәрә фәрз әԝ ә, кӧ әм хԝә тʹәсмили Йаһоԝа бькьн у бенә ньхӧмандьне. Ләма жи гәрәке тӧ ль сәр ве сафикьрьне кʹур бьфькьри. Ӧса жи, ԝәхт у хирәт лазьм ә, сәва кӧ тӧ бона ве йәке һазьр би. w23.03 7 ¶18-20

Жь ви ԝәʹдәйи, гава Иса бь рʹӧһʹе пироз һатийә кʹьфшкьрьне, әԝ бу пʹара сәрәкә йа зӧрʹәта кʹӧлфәте. Паши мьрьн у рʹабуна Иса, Хԝәде «бь рʹумәт у һӧрмәт кʹофи дани сери» у һʹәму һʹӧкӧм да ԝи, «ԝәки кьред Мирещьн хьраб кә» (Ибрани 2:7; Мәтта 28:18; 1 Йуһʹәнна 3:8). Ле хенщи Иса, кәсед дьн жи ԝе бьбуна пʹара зӧрʹәте. Паԝлосе шанди зәлал кьр, кӧ әԝ кʹи нә. Әԝи Щьһу у Нәщьһуйед бь рʹӧһʹе пироз кʹьфшкьрирʹа ӧса гот: «Һәгәр һун пʹара Мәсиһ ьн, ԝәки ӧса йә зӧрʹәта Бьраһим ьн у ԝаред ԝи сози нә» (Галати 3:28, 29). Чахе Йаһоԝа Мәсиһик бь рʹӧһʹе пироз кʹьфш дькә, әв кәс ида дьбә пʹара зӧрʹәта кʹӧлфәте. Демәк зӧрʹәт жь Иса Мәсиһ у 144 000 һәмпʹадшед ԝи нә (Әʹйанти 14:1). Әԝана гьшк хирәт дькьн кӧ чʹәʹв бьдьнә Баве хԝә Йаһоԝа. w22.07 16 ¶8-9

Әм заньн кӧ ван рʹожед ахьрийеда, әм дькарьн рʹасти тәнгасийа бен (2 Тимотʹейо 3:1). Ԝи ԝәʹдәйи, әм дькарьн хԝә бечʹарә тʹәхмин кьн, илаһи һәрге тәнгаси пәй тәнгасийарʹа тен, йан жи һәрге гьшк дәрбәкерʹа тенә сәре мә. Ле бир нәкә кӧ чʹәʹве Йаһоԝа сәр мә йә, у бь аликʹарийа ԝи әм дькарьн нава һʹәму тәнгасийада сәбьр кьн. Ԝәрә әм биньн бира хԝә кӧ Йаһоԝа чаԝа али Ибо кьрьбу. Дәрбәкерʹа, чәнд кӧл-дәрд һатьн сәре ви мере амьн. Рʹожәкеда, Ибо һʹәму кәрийед хԝә ӧнда кьрьн, у хӧламед ԝи һатьнә кӧштьне. Ле йа һәри хьраб әԝ бу, кӧ һʹәму зарʹед ԝи мьрьн (Ибо 1:13-19). Ԝәхтәкә кьн паши ве йәке, гава әԝи һе шина зарʹед хԝә дькьр, Ибо гьран нәхԝәш кʹәт (Ибо 2:7). Чʹәʹве Йаһоԝа сәр Ибо бу. Йаһоԝа ԝи һʹьз дькьр, ләма жи әԝи али ԝи кьр, ԝәки әԝ бькарьбә амьн бьминә. w22.08 11 ¶8-10

Чахе әм тенә ширәткьрьне, дьле мә дькарә бешә. Дьбәкә әм бьфькьрьн кӧ әв ширәт у щәза, бь һәԛийе нибу йан бь зедәйи сәрт бу. Ахьрийеда, дьбәкә әм нәвиньн кӧ әв ширәткьрьн чаԝа нишан дькә, кӧ Йаһоԝа мә һʹьз дькә (Ибрани 12:5, 11). Ләма жи щәза ԛәбул бькә у хԝә рʹаст кә. Иса чәнд щара бәр шандийед дьн Пәтрус ширәт кьр (Маркос 8:33; Луԛа 22:31-34). Һьнге, Пәтрус бешьк шәрм кьр. Ле Пәтрус Исарʹа амьн ма. Ләма жи Йаһоԝа амьнийа Пәтрус хәлат кьр у щьватеда щабдарийед фәрз да ԝи (Йуһʹәнна 21:15-17; Кʹаред Шандийа 10:24-33; 1 Пәтрус 1:1). Һәрге әм жь бо ширәткьрьн у щәза шәрм бькьн жи, ԝе баш бә кӧ әм ԝе ширәткьрьне ԛәбул кьн у хԝә рʹаст кьн. Бь ви щурʹәйи, әме һьм бона Йаһоԝа һьм жи бона хушк у бьра һе зедә керһати бьн. w22.11 21-22 ¶6-7

Бьраһим заньбу кӧ Йаһоԝа ԝе тʹӧ щар зӧлми у нәһәԛийе нәкә. Чаԝа кӧ Паԝлосе шанди ньвиси, Бьраһим баԝәр бу кӧ Йаһоԝа дькарә кӧрʹе ԝи Исһаԛ жь мьрьне рʹакә (Ибрани 11:17-19). Хԝәха Йаһоԝа соз дабу кӧ Исһаԛ ԝе бьбә баве мьләтәки, ле ԝе дәме, зарʹед Исһаԛ һе тʹӧнә бун. Бьраһим Йаһоԝа һʹьз дькьр, у әԝ баԝәр бу кӧ Йаһоԝа ԝе һәртʹьм рʹастийе бькә. Чьԛас зор бу жи, Бьраһим бь баԝәрийе гӧрʹа Йаһоԝа кьр (Дәстпебун 22:1-12). Әм чаԝа дькарьн чʹәʹв бьдьнә Бьраһим? Мина Бьраһим, гәрәке әм жи хирәт бьн ве йәкеда, кӧ Йаһоԝа дьһа баш нас бькьн. Әв йәк ԝе али мә бькә, ԝәки әм дьһа незики ԝи бьн у ԝи дьһа зедә һʹьз бькьн (Зәбур 73:28). Исафа мә ԝе ль гора фькьред Йаһоԝа бе һинкьрьне (Ибрани 5:14). Исафәкә ӧса ԝе мә ԝәʹде щерʹьбандьна хԝәй кә. Әме хԝә жь һәр тьште кӧ дькарә дьле Баве мәйи әʹзмана бешинә у зьраре бьдә достийа мә тʹәви Ԝи, дур бьгьрьн. w22.08 28-29 ¶11-12

Гава Паԝлосе шанди у Барнабас вәдьгәрʹийан Листра, Ԛонйа у Әнтакйайе, ԝана һәр щьватада рʹуспи кʹьфш кьрьн (Кʹаред Шандийа 14:21-23). Бешьк жь ван бьред кʹьфшкьри, щьвата гәләк һелан дьстандьн, у иро жи ӧса йә. Паԝлосе шанди ани бира хушк-бьра кӧ «әʹлаләта шәʹдайә гьран» чаԝа бь сайа ԛәԝата Йаһоԝа бәр чәтьнайа сәбьр кьрьбу (Ибрани 12:1). Паԝлос заньбу кӧ сәрһатийед кәсед кӧ бәре нава щурʹә-щурʹә тәнгасийада сәркʹәтьнә, дькарьн мерхасийе бьдьн хушк-бьра у али ԝан бькьн, ԝәки дина хԝә бьдьн «бажаре Хԝәдейе сах» (Ибрани 12:22). Иро жи ӧса йә. Һәр кәс ԛәԝате дьстинә жь ве йәке кӧ Йаһоԝа чаԝа али Гидәон, Барак, Даԝьд, Самуйел у гәләк кәсед дьн кьрьбу (Ибрани 11:32-35). w22.08 21-22 ¶5-6

Кәсед сахкьри ԝе сәр һʹиме кʹижан ‹кьра› бенә диԝанкьрьне? Гәло ль гора тьштед кӧ ԝана пешийа мьрьне кьрьбун? На! Бинә бира хԝә кӧ гава әԝана мьрьн, гӧнед ԝанә бәре һатьн паԛьжкьрьне. Ләма жи әшкәрә йә кӧ кʹьтеба Әʹйанти бәʹса «кьред» ԝанә паши рʹабуна жь мьрьне дькә, демәк паши кӧ әԝана дьнйа тʹәзәда бенә һинкьрьне. Һәрге ԝе лазьм бә ԝәки кәсед амьн ча Нӧһ, Самуйел, Даԝьд у Данийел жи дәрһәԛа Иса Мәсиһ һин бьн у баԝәрийа хԝә ԛӧрбана ԝи биньн, илаһи ԝе һе зедә лазьм бә ԝәки кәсед нәһәԛ ве йәке бькьн. Ле чь ԝе бе сәре мәрьвед кӧ ве мәщале нәдьнә хәбате? Әʹйанти 20:15 ӧса дьбежә: «Наве кʹе ве кʹьтеба жийинеда ньвисар тʹӧнәбу, әԝ һатә авитьне нава гола егьр». Бәле, әԝана ԝе сәр һʹәта-һʹәтайе ӧнда бьн һәрʹьн. Бь рʹасти жи гәләк фәрз ә кӧ әм һәр тьшти бькьн, ԝәки наве мә кʹьтеба жийинеда бе ньвисандьне у нәйе тʹәмьзкьрьне! w22.09 19 ¶17-19

Алийе сьһʹәт-ԛәԝат у щурʹе ԛәнщкьрьнеда, әм гәләк сафикьрьнед хԝә ль гора исафа хԝәйә бь Кʹьтеба Пироз һинкьри дькьн (1 Тимотʹейо 3:9). Гава әм сафикьрьнед ӧса дькьн, у тʹәви кәсед дьн дәрһәԛа ве йәке хәбәр дьдьн, ԝе баш бә кӧ әм готьнед жь Филипи 4:5 бир нәкьн: «Бьра бәрбьһерийа ԝә һʹәму мәрьвава әʹйан бә». Һәрге әм бәрбьһер у сәрԝахт бьн, әме дәрһәԛа сьһʹәт-ԛәԝата хԝә гәләк хәм нәкьн. Һәрге хушк-бьред мә сафикьрьнед щӧдә бькьн жи, диса жи әме ԝана һʹьз бькьн у ԛәдьре ԝан бьгьрьн, у ньһерʹандьна хԝә һьндава ԝанда нәгӧһезьн (Рʹомайи 14:10-12). Һәрге әм жийина хԝә бьпʹарезьн у бь дьл у щан Йаһоԝарʹа хьзмәт бькьн, әме рʹазибуна хԝә ԝирʹа нишан кьн. Әԝ Канийа жийине йә (Әʹйанти 4:11). Йазьх, иро әм нәхԝәш дькʹәвьн у рʹасти ԛәзийа тен. Ле Әʹфьрандаре мә жийинәкә ӧса бона мә нәдьхԝәст. Зутьрәке, Хԝәде ԝе жийина һʹәта-һʹәтайе бьдә мә. Ԝи чахи, тʹӧ кәс ԝе еше нәкʹьшинә у нәмьрә (Әʹйанти 21:4). Ле шькьр жь Баве мәйи әʹзманарʹа кӧ әм ньһа дьжин у ԝирʹа хьзмәт дькьн! w23.02 25 ¶17-18

Йаһоԝа әшкәрә нишан кьрийә кӧ әԝ жь сәрԝеред дьнйайе Бьльндтьр ә (Рʹомайи 13:1). Дина хԝә бьдьнә ван се мәсәла: (1) Мьсьреда Фьрәԝьн Исраели хԝәрʹа кьрьбун дил, у әԝи чәнд щара хԝәстьна Муса кӧ ԝана аза кә, инкʹар кьр. Ле Хԝәде щьмәʹта хԝә хԝәй кьр у Фьрәԝьн авитә бәʹра Сор (Дәркʹәтьн 14:26-28; Зәбур 136:15). (2) Пʹадше Бабилоне Бәлшатсар, щәжьнәкә мәзьн дәрбаз кьр у хԝә «ль һьмбәри Хӧдане әʹзмана . . . бьльнд кьр» у дәԝса кӧ пәсьне Йаһоԝа бьдә, пәсьне хӧданед «зив у зерʹ» да (Данийел 5:22, 23). Ле Хԝәде әв мере ԛӧрʹә ньмьз кьр. «Ԝе шәве», Бәлшатсар һатә кӧштьне, у пʹадшатийа ԝи кʹәтә дәсте Мәдийа-Фарьса (Данийел 5:30, 31). (3) Пʹадше Палестинайе Һеродәс Әгрипа I, Аԛубе шанди дабу кӧштьне у паше Пәтрусе шанди авитә кәле, кӧ ԝи жи бькӧжә. Ле Йаһоԝа изьн нәда кӧ Һеродәс нета хԝә бинә сери. «Мьлйакʹәтәки Хӧдан ԝи хьст», у әԝ мьр (Кʹаред Шандийа 12:1-5, 21-23). w22.10 15 ¶12

Чахе әм дьхуньн кӧ Йаһоԝа чаԝа хьзмәткʹаред хԝәйә бәре хԝәй дькьр, һевийа мә дьһа ԛәԝи дьбә. Кʹьтеба Пирозда те готьне: «Чь кӧ пешда кʹьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн» (Рʹомайи 15:4). Бьдә бәр чʹәʹве хԝә кӧ Йаһоԝа созед хԝә ча анинә сери. Мәсәлә, бинә бира хԝә кӧ Хԝәде бона Бьраһим у Сарайе чь кьрьбу. Әԝана ида кал-пир бьбун, ләма жи зарʹ ԝанрʹа нәдьбун. Диса жи Хԝәде соз дабу ԝана, кӧ зарʹ ԝе ԝанрʹа бьбә (Дәстпебун 18:10). Бьраһим «бь гӧман баԝәр кьр, кӧ әԝе бьбә баве гәләк мьләта» (Рʹомайи 4:18). Һʹале ԝи чьԛас бечʹарә дьһатә кʹьфше жи, диса жи Бьраһим баԝәр бу, ԝәки Йаһоԝа ԝе созе хԝә бинә сери. Һевийа ви мере амьн бадиһәԝа нибу (Рʹомайи 4:19-21). Сәрһатийед ӧса мәрʹа дьдьнә кʹьфше, ԝәки Йаһоԝа созед хԝә һәртʹьм тинә сәри. w22.10 27 ¶13-14

Гава Щьһу жь дилтийе дәркʹәтьн, әв соз һатә сери. Йаһоԝа ԝанрʹа бу Мамостә, у бь рʹебәрийа ԝи, ԝана һʹәбандьна рʹаст тʹәзәда ава кьр. Әм ша нә кӧ Йаһоԝа бона мә жи буйә Мамостәйе Мәзьн! Ишайа бь ван гьлийа мә бәрамбәри шагьрта дькә, кӧ алийе Йаһоԝава тенә һинкьрьне: «Чʹәʹвед тә Мамостәйе ԝә бьвиньн». Ль гора ве мәсәле, Мамостә ча бежи бәр шагьртед хԝә дьсәкьнә. Иро, дәрәща мә бь рʹасти жи ӧса йә. Йаһоԝа мә бь сайа тʹәшкиләта хԝә һин дькә. Бәле, әм бона рʹебәрийа зәлал, йа кӧ әм жь тʹәшкиләта Йаһоԝа дьстиньн, гәләк рʹази нә! Әв һинкьрьн кӧ әм сәр щьвата, бь сайа әʹдәбйәт, бродкастингед мә у бь гәләк щурʹед дьн дьстиньн, али мә дькә кӧ нава тәнгасийада бь шабуне сәбьр кьн. w22.11 10 ¶8-9

Дәрһәԛа ԝеранкьрьна система Щьһуйа у система иройин Иса ӧса гот: «Ле бона ԝе рʹоже у ԝе сьһʹәте тʹӧ кәс ньзанә, нә мьлйакʹәтед әʹзмен у нә жи Кӧрʹ, ле тʹәне Бав». Паше әԝи тʹәми да шагьртед хԝә, кӧ әԝана «һаш жь хԝә һәбьн» у «һʹьшйар бьминьн» (Маркос 13:32-37). Мәсиһийед кӧ ԛьрʹна йәкеда ль Щьһустане дьжитьн, гәрәке һʹьшйар бьмана, ԝәки әʹмьре хԝә ӧнда нәкьрана. Иса шагьртед хԝәрʹа ӧса готьбу: «Гава һун бьбиньн кӧ ордийа дора Оршәлиме гьртийә, һьнге бьзаньбьн кӧ ԝеранбуна ԝе незик ә». Ԝи чахи гәләк фәрз бу кӧ әԝана гӧһ бьдьн тʹәмийа Иса у «бьрʹәвьнә чʹийа» (Луԛа 21:20, 21). Чахе Рʹомайа Оршәлим ԝеран кьрьн, кәсед кӧ гӧһ данә тʹәмийа Иса, сах ман. Иро әм ахьрийа ве дьнйа хьрабда дьжин. Ләма гәрәке әм жи һаш жь хԝә һәбьн у һʹьшйар бьминьн. w23.02 14 ¶1-2; 16 ¶3

Йаһоԝа хьзмәткʹаред хԝә һин дькә, ԝәки әԝана рʹаст у һәԛ бьн. Бь сайа рʹастийе әԝана дьһа зедә ԛәдьре хԝә заньн у дьлрʹьһʹәтийе хԝәй дькьн (Мәтʹәлок 13:5, 6). Гава тә Кʹьтеба Пироз леколин дькьр, гәло тә тедәрхьст, ԝәки Йаһоԝа әв тьшт бона тә жи кьрийә? Тӧ пеһʹәсийайи ԝәки рʹийа Йаһоԝа, бона һәр кәси рʹийа һәрә баш ә (Зәбур 77:13). Ләма жи тӧ дьхԝази ван тьшта бьки чь кӧ бәр чʹәʹве Хԝәде рʹаст ә (Мәтта 6:33). Тӧ дьхԝази рʹастийе бьпарези у избат ки, ԝәки һʹәму готьнед Мире-щьна, йед кӧ әԝи дәрһәԛа Йаһоԝа Хԝәде готьнә, дәрәԝ ьн. Ле тӧ ча дькари ве йәке бьки? Тӧ дькари жийина хԝәда ве сафикьрьне бьки у бежи: «Әз дәрәԝед Мире-щьна инкʹар дькьм у пьштгьрийа рʹастийе дькьм. Әз дьхԝазьм ԝәки Йаһоԝа Сәрԝере мьн бә, у тьштед кӧ бәр чʹәʹве ԝи рʹаст ьн, бькьм». Гәло тӧ чаԝа дькари ве йәке бьки? Дӧада хԝә тʹәсмили Йаһоԝа кә у соз бьдә ԝи, кӧ тӧйе һәртʹьм жерʹа хьзмәт ки, у паше ԝәрә ньхӧмандьне. Һʹьзкьрьна һьндава рʹастийе у һәԛийе ԝе али тә бькә, ԝәки тӧ сафи ки, кӧ бейи ньхӧмандьне. w23.03 3 ¶4-5

Әʹдьлайикә ӧса һәйә кӧ мәрьвед ве дьнйайе һаш пе тʹӧнә нә. Әв әʹдьлайи, «әʹдьлайийа Хԝәде» йә. Баве мәйи әʹзмана ве әʹдьлайе дьдә достед хԝә. Чахе Хԝәде әʹдьлайа хԝә дьдә мә, дьле мә рʹьһʹәт дьбә (Филипи 4:6, 7). Бь сайа ве әʹдьлайе, әм бунә достед ԝан мәрьва, йед кӧ Хԝәде һʹьз дькьн. Ӧса жи, мә достийа незик тʹәви «Хԝәдейе кӧ әʹдьлайийе дьдә» ԛазанщ кьрийә (1 Тʹесалоники 5:23). Чахе әм Баве хԝә Йаһоԝа дьһа баш нас бькьн, баԝәрийа хԝә ԝи биньн у гӧһ бьдьне, бешьк әʹдьлайа ԝи ԝе ԝәʹде тәнгасийа дьле мә рʹьһʹәт бькә. Гава тьштед хьраб, мәсәлә нәхԝәшийед кӧ бәла дьбьн, тʹәшԛәлед тʹәбйәте, тәвльһәвбуна ԝәлатда зедә дьбьн, йан жи әм рʹасти пәйкʹәтьна тен, гәло бь рʹасти дьбә кӧ әм «әʹдьлайийа Хԝәде» бьстиньн, у дьле мә рʹьһʹәт бьминә? Тьштед ӧса дькарьн тьрс у хофе бькьн дьле мә. Ча баш ә кӧ хушк-бьред мә гӧһ дьдьн ве ширәте. Бь аликʹарийа Йаһоԝа, әԝана ԝәʹде тәнгасийед гьранда жи дьлрʹьһʹәт дьминьн. w22.12 16 ¶1-2

Жийина мәда һьнә тьшт дәсте мәда нинә. Ләма жи гәрәке әм бир нәкьн кӧ ԛимәта мә щабдарийед мәва гьредайи нинә, у гәрәке әм щабдарийед хԝә бәрамбәри щабдарийед кәсед дьн нәкьн (Галати 6:4). Дәԝса кӧ әм хԝә бәрамбәри кәсәки бькьн, гәрәке әм бьфькьрьн кӧ әм чаԝа дькарьн Йаһоԝарʹа хьзмәт кьн у али кәсед дьн бькьн. Сәва кӧ тӧ һазьр би ԝәки щабдарийед тʹәзә бьстини, жийина хԝә сьвьк кә у бона тьштед нә лазьм бадиһәԝа нәкʹәвә бьн дәйна. Хԝәрʹа нетед бьчʹук дайнә, йед кӧ ԝе али тә бькьн кӧ бьгьһижи нетед хԝәйә мәзьн. Мәсәлә, һәгәр нета тә әв ә кӧ бьби пешәнге һәртʹьм, пешийе тӧ дькари дәстпеки һәр мәһ ча пешәнге ԝәʹдәлу хьзмәт ки. Һәгәр нета тә әв ә кӧ бьби бәрдәстийе щьвате, ԝе баш бә ԝәки тӧ бона бәлакьрьна мьзгине дьһа зедә ԝәʹдә вәԛәтини. Әв йәк ԝе рʹе тәрʹа вәкә кӧ тӧ рʹожәке щабдарийед тʹәзә бьстини. Тӧ чь щабдари жи бьстини, бь дьл у щан бинә сери. w22.04 26 ¶16-17

Йаһоԝа дькарә али мә бькә, ԝәки әм чәтьнайада сәбьр кьн у жь хьзмәтийе шабуне бьстиньн. Гава әм Йаһоԝарʹа бәʹса дәрдед хԝә дькьн, әԝ дькарә дәрберʹа ԛәԝате бьдә мә, ԝәки әм бькарьбьн сәбьр кьн. Һәрге тәнгасийа мә зу хьлаз нәбә, дьбәкә лазьм бә кӧ әм диса у диса жь Йаһоԝа ԛәԝате бьхԝазьн, ԝәки әм бькарьбьн сәбьр кьн. Ишайа ӧса готьбу: «Рʹьһʹәтийе нәдьн [Йаһоԝа]» (Ишайа 62:7, ИМ). Әв гьли чь тенә һʹәсабе? Гәрәке әм һәр гав дӧа бькьн у ча бежи рʹьһʹәтийе нәдьн Йаһоԝа. Әв йәк, гьлийед Иса дәрһәԛа дӧа тиньн бира мә, йед кӧ әм Луԛа 11:8-10, 13-да дьхуньн. Ван рʹезада, Иса готьбу кӧ чьԛас фәрз ә, ԝәки әм нәԝәстьн у тʹьме рʹӧһʹе пироз бьхԝазьн. Ӧса жи, әм дькарьн жь Йаһоԝа рʹебәрийе бьхԝазьн, ԝәки сафикьрьнед баш бькьн. w22.11 8 ¶1; 9 ¶6-7

Һун ньһада дькарьн малбәта хԝә бона пәйкʹәтьна һазьр кьн. Дәрһәԛа тьштед хьраб, йед кӧ һун дьфькьрьн дькарьн бенә сәре ԝә, нәфькьрьн. Дәԝса ве йәке, достийа хԝә тʹәви Йаһоԝа дьһа ԛәԝи кьн у ве йәкеда али зарʹед хԝә жи бькьн. Чахе һун дьлтәнг ьн у бәрхԝә дькʹәвьн, дьле хԝә Йаһоԝарʹа вәкьн (Зәбур 62:7, 8). Тʹәви малбәта хԝә хәбәр дьн, кӧ һун чьрʹа дькарьн итʹбарийа хԝә Йаһоԝа биньн. Чаԝа кӧ һазьрбуна бона тʹәшԛәлед тʹәбийәте али ԝә у зарʹед ԝә дькә, ӧса жи һазьрбуна бона пәйкʹәтьна, ԝе али ԝә бькә кӧ һун ԛәԝи у дьлрʹьһʹәт бьминьн. Бь ви щурʹәйи зарʹед ԝә ԝе һин бьн итʹбарийа хԝә Йаһоԝа биньн, ӧса жи мерхас бьн у дьлрʹьһʹәт бьминьн. Әʹдьлайа Хԝәде дькарә дьл у һʹьше мә бьпарезә (Филипи 4:6, 7). Бь сайа ве әʹдьлайе Йаһоԝа дьле мә рʹьһʹәт дькә, гава кӧ нәхԝәши бәла дьбьн, тʹәшԛәлед тʹәбийәте дьԛәԝьмьн йан пәй мә дькʹәвьн. Әԝ бь сайа рʹуспийед хирәт шьвантийа мә дькә. У әԝи мәщал дайә мә һʹәмуйа, кӧ дәсте хԝә дьрежи һәвдӧ бькьн. Әʹдьлайи, демәк дьлрʹьһʹәтийа кӧ иро дьле мәда һәйә, али мә дькә, кӧ әм хԝә бона охьрмед гьран у һәла һе бона тәнгасийа мәзьн жи һазьр кьн (Мәтта 24:21). w22.12 27 ¶17-18

Әм ӧса жи гәрәке бьн баре гӧнед хԝәйи бәреда нәминьн. Һьлбәт әм гәрәке нәфькьрьн, кӧ ԛӧрбан һатийә дайине, у әм дькарьн бь һʹәмде хԝә гӧна бькьн (Ибрани 10:26-31). Ле әм дькарьн баԝәр бьн, һәрге мә гӧнәки гьран жь дьл тʹобә кьрийә, жь Йаһоԝа аликʹари хԝәстийә у рʹабун-рʹуньштьна хԝә рʹаст кьрийә, әԝ бь мәрʹдани дьбахшинә мә (Ишайа 55:7; Кʹаред Шандийа 3:19). Бәле, ԛӧрбана Иса дькарә һʹәму гӧнед мә афу бькә у рʹе вәкә ԝәки әм Щьнәтеда бьжин. Әме тʹӧ щар жь жийина Щьнәтеда нәԝәстьн. Әме тʹьме кәсед тʹәзә нас бькьн у жь шьхӧлед хԝәш шабуне бьстиньн. Йа һәри хԝәш жи әв ә, кӧ әме бькарьбьн Баве хԝәйи әʹзмана рʹож бь рʹож дьһа баш нас бькьн, у бьн сийа ԝида бәхтәԝар бьжин. Әме һʹәта-һʹәтайе дәрһәԛа ԝи у дәрһәԛа тʹәбийәте тьштед тʹәзә һин бьн. w22.12 13 ¶17, 19

Әшкәрә йә кӧ әв «кʹӧлфәт» Һеԝа нинә, чьмки рʹез дьбежә кӧ зӧрʹәта кʹӧлфәте ԝе сәре мәʹр «бьһʹьнщьрʹинә». Ле чаԝа мә дит, мәʹр Мире-щьна йә, у тӧ мәрьвәки гӧнәкʹар жь зӧрʹәта Һеԝайе нькарә сәре ви мәләке хьраб бьһʹьнщьрʹинә. Ле гәло Мире-щьна ԝе ча бе ԛьрʹкьрьне? Кʹьтеба пашьн йа Кʹьтеба Пироз зәлал дькә, ԝәки кʹӧлфәт, дәрһәԛа кʹижане Дәстпебун 3:15-да те готьне, кʹе йә (Әʹйанти 12:1, 2, 5, 10). Әв кʹӧлфәт мәрьв нинә. Ль гора рʹезе, «һив бьне пʹийада» йә у «кʹофикә жь донздәһ стәйрка жи ль сери бу». Жерʹа зарʹәкә мәхсус дьбә, демәк Пʹадшатийа Хԝәде. Пʹадшати йа әʹзмани йә, ләма гәрәке кʹӧлфәт жи әʹзмани бә. Бь ве йәке әм фәʹм дькьн кӧ кʹӧлфәт, пʹара әʹзмани йа тʹәшкиләта Йаһоԝа йә, йа кӧ жь мәләкед амьн ә (Галати 4:26). Хәбәра Хԝәде мәрʹа әʹйан дькә, кӧ зӧрʹәта сәрәкә йа кʹӧлфәте кʹи йә. Кʹьтеба Пирозда һатьбу пʹехәмбәртикьрьне, ԝәки әв кәсе создайи ԝе жь зӧрʹәта Бьраһим бе (Дәстпебун 22:15-18). w22.07 15-16 ¶6-8

Кʹьтеба Пироз бь биланийа Хԝәдева тʹьжә йә. Ширәтед Кʹьтеба Пироз дькарьн сәр мәрьва баш һʹӧкӧм кьн. Кʹьтеба Пироз жийина мәрьва бәрбь башийева дьгӧһезә. Гава Муса пʹехәмбәр кʹьтебед пешьн йед Кʹьтеба Пироз ньвисин, әԝи щьмәʹта Хԝәдерʹа ӧса гот: «Әв нә хәбәра бадиһәԝа йә бона ԝә, ле әԝ әʹмьре ԝә йә» (Ԛануна Дӧщари 32:47). Кәсед кӧ гӧһ дьдьн Ньвисаред Пироз, дьбьн хԝәйе жийинәкә хԝәш у бәхтәԝар (Зәбур 1:2, 3). Хәбәра Хԝәде чьԛас кәвьн буйә жи, ԛәԝата ԝе һәйә кӧ жийина мәрьва дьһа баш кә. Ширәтед Кʹьтеба Пироз бь биланийе тʹьжә нә у һʹәму дәма кери мәрьва һатьнә, һʹәта рʹожа иро жи. Гава әм Кʹьтеба Пироз дьхуньн у сәр готьнед ԝе кʹур дьфькьрьн, рʹӧһʹе пироз али мә дькә, кӧ әм фәʹм бькьн, һәла әм чаԝа дькарьн ширәтед Хԝәде жийина хԝәда бьдьнә хәбате (Зәбур 119:27; Малахи 3:16; Ибрани 4:12). Бь рʹасти жи, Йаһоԝа Хԝәде гәләк дьхԝазә али мә бькә. Гәло һежа нинә, ԝәки әм һәр рʹож Кʹьтеба Пироз бьхуньн? w23.02 3 ¶5-6

Кʹьтеба Әʹйанти сәре 13 әʹйан дькә, ԝәки әв сәре һʹәфта, демәк Англо-Америка, әв щәʹнәԝьр ә кӧ ‹дӧ стьруйе ԝийә мина йе бәрха һәнә у мина зийе хәбәр дьдә›. Ль гора кʹьтеба Әʹйанти, әв щәʹнәԝьр «нишанед ӧса әʹщебә мәзьн дькьрьн, һʹәта кӧ агьр жи жь әʹзмен ль бәр чʹәʹве мәрьва давитә сәр әʹрде» (Әʹйанти 13:11-15). Кʹьтеба Әʹйанти сәре 16 у 19 ви щәʹнәԝьри ча «пʹехәмбәре дәрәԝ» нав дькә (Әʹйанти 16:13; 19:20). Кʹьтеба Данийел жи пешда готьбу кӧ империйа һʹәмдьнйайе, демәк Британйа у Америка, ԝе бь щурʹәки «нәдити ԝеран бькә» (Данийел 8:19, 23, 24, ИМ). Ԝәʹде Шәрʹе Һʹәмдьнйайе йа II һәма ӧса жи ԛәԝьми. Дӧ бомбед атоме кӧ зандаред Британи у Америки тʹәвайи чекьрьбун, авитьне сәр Жапонйайе, у әԝ йәк бу мәʹни кӧ әв шәрʹ хьлаз бу. Һьнге ча бежи Англо-Америка ‹агьр жь әʹзмен авитә сәр әʹрде›. w22.05 10 ¶9