Гӧлан

Йуһʹәннайе шанди «әʹлаләтәкә ӧса мәзьн» дит, һәжмара кʹижани беһʹәсаб бу. Кʹьтеба Әʹйанти дәрһәԛа ԝан ӧса дьбежә: «Әвана әԝ ьн, йед кӧ жь ԝе тәнгасийа мәзьн һатьнә, чӧхед хԝә пе хуна ԝи Бәрхи шуштьнә» (Әʹйанти 7:14). Паши ве йәке кӧ әԝ әʹлаләт жь тәнгасийа мәзьн хьлаз бә, әԝана ԝе сәр әʹрде бьжин у гәләк кʹәрәма бьстиньн (Зәбур 37:9-11, 27-29; Мәтʹәлок 2:21, 22; Әʹйанти 7:16, 17). Чаԝа кӧ кʹьтеба Әʹйанти сәре 7 нишан дькә, һьм 144 000 кәсед бьжарти, һьм жи әʹлаләта мәзьн ԝе кʹәрәмед мәзьн бьстиньн. Тӧ жи дькари нав ԝанда би! Рʹожед пʹьрʹ хԝәш пешийа мә нә. Һьнге әме гәләк ша бьн, кӧ мә пьштгьрийа сәрԝертийа Йаһоԝа кьрийә. w22.05 16 ¶6-7

Гава кӧ лазьм ә ԝәки әм сафикьрьнәкә фәрз бькьн, гәло әм дӧа накьн ԝәки Хԝәде биланийе бьдә мә? (Аԛуб 1:5). Билани бь рʹасти жи тьштәки гәләк ԛимәт ә. Сьлеман Пʹадша ӧса ньвиси: «Сәри сәрԝахти йә» (Мәтʹәлок 4:7). Ве рʹезеда, Сьлеман бәʹса биланийа дьнйайе нәдькьр. Әԝи бәʹса ве биланийе дькьр, кʹижан кӧ жь Йаһоԝа йә. Гәло биланийа Хԝәде дькарә али мә бькә, ԝәки әм проблемед иройин сафи кьн? Һәмьки әре! Сәва кӧ әм биланийа рʹаст ԛазанщ кьн, ԝе баш бә ԝәки әм готьнед дӧ кәсед һәри билан, леколин бькьн у бьдьнә хәбате. Пешийе, дина хԝә бьдьнә Сьлеман Пʹадша. Ль гора Кʹьтеба Пироз, «Хԝәде шәһрәзайи [билани], фәʹмдарикә кʹур . . . да Сьлеман» (1 Пʹадшати 4:29, ИМ). Йа дӧда, дина хԝә бьдьнә Иса Мәсиһ, йе кӧ кәсе һәри билан бу (Мәтта 12:42). Дәрһәԛа Иса бәрева ӧса һатьбу готьне: «Ԝе Рʹӧһʹе Хӧдан, Рʹӧһʹе шәһрәзабун у фәʹмдарийе . . . ль сәр ԝи бә» (Ишайа 11:2, ИМ). w22.05 20 ¶1-2

Кәсед кӧ ида щаһьл ниньн жи, дькарьн хԝәрʹа нета дайньн у бьгьһижьн ван нета. Һәла дина хԝә бьдә сәрһатийа хушкәкә бь наве Беверли, йа кӧ ида 75 сали йә. Рʹуйе нәхԝәшикә гьранда, әԝ нькарьбу рʹе һәрә. Ле диса жи, әԝе дьхԝәст пьштгьрийа кампанийа бона Биранине бькә. Ләма жи әԝе һьнә нет дани пешийа хԝә. Гава Беверли гьһиштә нетед хԝә, әԝ гәләк ша бу. Хирәта ԝе кәсед дьн жи һелан кьр, ԝәки мьзгине бь дьл у щан бәла кьн. Бәле, һәгәр сьһʹәт-ԛәԝата хушк-бьред мәйә әʹмьрда мәзьн ида нә мина йа бәре бә жи, Йаһоԝа диса жи хьзмәта ԝан ԛимәт дькә (Зәбур 71:17). Хԝәрʹа нетед ӧса дайнә кӧ ԛәԝата тә дьгьһиже. Һʹӧнӧред баш нав хԝәда пешда бинә у бь ви щурʹәйи дьле Йаһоԝа ша кә. Тьштед тʹәзә һин бә у фәрәсәтед хԝә зедә кә, ԝәки тӧ бькарьби бона Хԝәде у бона тʹәшкиләта ԝи, һе зедә керһати би. Мәщала бьгәрʹә ԝәки дьһа зедә али хушк-бьра бьки. Мина Тимотʹейо, бьра Йаһоԝа али тә бькә, ԝәки «пешдачуйина тә һʹәмуйава әʹйан бә» (1 Тимотʹейо 4:15). w22.04 27 ¶18-19

Һәгәр ԝә гәләк ԛәԝат хәрщ кьрийә кӧ һʹьзкьрьна һьндава Йаһоԝа бькьн дьле зарʹед хԝә, ле йәкә, зарʹәкә ԝә нахԝазә Йаһоԝарʹа хьзмәт кә, нәфькьрьн кӧ һун де-бавнә хьраб ьн! Йаһоԝа азайа бьжартьне дайә мә һәр кәси. Ләма жи, әм дькарьн хԝәха сафи кьн, кӧ Хԝәдерʹа хьзмәт бькьн йан на. Һевийа хԝә ӧнда нәкьн кӧ рʹожәке әԝе диса вәгәрʹә бал Йаһоԝа. Мәтʹәлока кӧрʹе ӧндабуйи биньн бира хԝә (Луԛа 15:11-19, 22-24). Әв хорт жь рʹийа рʹаст гәләк дур кʹәт, ле хьлазийе әԝ диса вәгәрʹийа. Де-бавно, ԝәрʹа ԛәдьрәки мәзьн һатийә дайине, кӧ һун дькарьн зарʹед хԝә һин кьн, ԝәки әԝана бьбьнә хьзмәткʹаред Йаһоԝа (Зәбур 78:4-6). Әв йәк һеса нинә, у әм пʹайе ԝә дьдьн, чьмки һун бәрдәԝам дькьн бь хирәт али зарʹед хԝә бькьн, ԝәки әԝана Йаһоԝа һʹьз бькьн у ԝана бь ԛәйдә у ԛанунед ԝи мәзьн дькьн. Баԝәр бьн, кӧ Баве мәйи әʹзмана ԝе жь ԝә гәләк рʹази бә (Әфәси 6:4). w22.05 30-31 ¶16-18

Сәва кӧ әм щьватеда әʹдьлайи у йәктийе пешда бьвьн, гәрәке һәр кәс жь мә бона ве йәке чь жь дәсте мә те бькә. Ԛьрʹна йәкеда, щурʹә-щурʹә пʹешкʹеш у щабдарийед Мәсиһийа һәбун (1 Корьнтʹи 12:4, 7-11). Диса жи, әԝана һәвдӧрʹа нәдькʹәтьнә һʹӧщәте, у йәктийа нав хԝәда хьраб нәдькьрьн. Паԝлос ԝанрʹа гот кӧ бьра һәр кәс, «бона авабуна бәдәна Мәсиһ» хирәт бькә. Әԝи Әфәсийарʹа жи ньвиси кӧ «гава һәр пʹарәкә бәдәне шьхӧле хԝә дькә, һʹьзкьрьнеда хԝәха дьгьһижә у мәзьн дьбә» (Әфәси 4:1-3, 11, 12). Әԝ Мәсиһийед кӧ тʹәмийа Паԝлосе шанди анинә сери, йәкти у тʹьфаԛи нав хԝәда хԝәй дькьрьн, у иро әм ве йәке щьватед хԝәда жи дьвиньн. Хԝә бәрамбәри кәсед дьн нәкә. Жь Иса Мәсиһ һин бә у чʹәʹв бьдә хәйсәт-һʹӧнӧред ԝи. Чь жь дәсте тә те бькә, у баԝәр бә кӧ Йаһоԝа «сәр нәһәԛийе нинә», ԝәки кьред тә бир кә (Ибрани 6:10). Бь шабуне Йаһоԝарʹа хьзмәт кә, у бир нәкә кӧ әԝ хирәта тә гәләк ԛимәт дькә. w22.04 14 ¶15-16

Чьԛас баш ә ԝәки әм сафи накьн һәла Йаһоԝа ԝе бьбахшинә кәсәки йан на. Әԝ сафикьрьна ԝи йә, нә кӧ йа мәрьва. Ле тьштәк һәйә кӧ гәрәке әм хԝәха сафи кьн. Гәло әԝ чь йә? Щарна, дьбәкә кәсәки мьԛабьли мә гӧнәки гьран кьрьбә, ле паше дьбәкә әԝ жь мә бахшандьне бьхԝазә. Щарна жи дьбәкә әԝ бахшандьне нахԝазә. Диса жи, әм дькарьн бьбахшиньнә ԝи кәси у һерсе дьле хԝәда хԝәй нәкьн. Һәгәр әԝи дьле мә гәләк ешандийә, дьбәкә бона ве йәке мәрʹа ԝәхт лазьм бә. Чәнд сал пешда, журналәкә мәда ӧса һатьбу готьне: «Гава тӧ дьбахшини кәсәки, әв йәк найе һʹәсабе ԝәки тӧ чʹәʹве хԝә сәр гӧне ԝи дадьди. Бона Мәсиһийа бахшандьн те һʹәсабе ԝәки әм ве проблеме дьдьнә дәсте Йаһоԝа. Һʹакьме һәԛ йе тʹәмамийа гәрдуне Әԝ ә, у әԝе ԝәхта рʹастда һәԛийе бинә сери» («Бьрща Ԛәрәԝьлийе» йа 15 Илоне, сала 1994). w22.06 9 ¶6-7

Йаһоԝа соз дабу кӧ рʹожед мәда, әԝе мәрьвед жь һʹәму мьләт у зьмана тʹоп кә, ԝәки әԝана йәктийеда ԝи бьһʹәбиньн. Иро әв ‹әʹлаләта мәзьн› бь рʹасти жи тʹәвайи тʹоп буйә (Әʹйанти 7:9, 10). Әв жьн, мер у зарʹ чьԛас жи жь щурʹә-щурʹә мьләт, зьман у бәрәка нә жи, әԝ сәр тʹәмамийа дьнйайе бунә малбәтәкә тʹьфаԛ (Зәбур 133:1; Йуһʹәнна 10:16). Әԝана һәртʹьм һазьр ьн кӧ мәрьварʹа бәʹса һевийа хԝә бькьн (Мәтта 28:19, 20; Әʹйанти 14:6, 7; 22:17). Һәгәр тӧ пʹара ве әʹлаләта мәзьн и, тӧ бешьк һевийа жийина һʹәта-һʹәтайе гәләк ԛимәт дьки. Мире-щьна дьхԝазә кӧ әм һевийа хԝә ӧнда кьн. Әԝ дьхԝазә мә бьдә баԝәркьрьне кӧ Йаһоԝа ԝе созед хԝә нәйнә сери. Һәгәр Мире-щьна бьгьһижә ве нета хԝә, әме мерхасийа хԝә ӧнда кьн у дьбәкә хьзмәтийа хԝә Йаһоԝарʹа бьдьнә сәкьнандьне. w22.06 20-21 ¶2-3

Һевийа мә али мә дькә, кӧ әм һьмбәри фьртонед жийине сәбьр кьн, чьмки әм рʹьнд заньн ԝәки хьлази незик ә. Иса Мәсиһ готьбу кӧ әме рʹасти пәйкʹәтьна бен (Йуһʹәнна 15:20). Ләма жи фькьрандьна кʹур сәр созед Йаһоԝа ԝе али мә бькә, ԝәки әм жь рʹийа рʹастийе дәрнәйен. Дина хԝә бьде кӧ гава Иса бәр мьрьне бу, әԝ чаԝа амьн ма. Рʹожа Пенщийә Һʹәсаб Д.М.-да, Пәтрусе шанди бәʹса готьнәкә жь Зәбуре кьр, йа кӧ нишан дькә ԝәки Иса Мәсиһ чьма һаԛас ԛәԝи у рʹьһʹәт ма: «Бәдәна мьнә мьри жи ԝе бь гӧман бьжи, чьмки тӧ мьн дийаре мьрийада наһели, нә жи те бьһели кӧ Пирозе тә бьрʹьзә. . . . Те шабуна диндара хԝәва мьн тʹьжи ки» (Кʹаред Шандийа 2:25-28; Зәбур 16:8-11). Иса заньбу кӧ Хԝәде ԝе ԝи жь мьрьне рʹакә у әԝе вәгәрʹә бал Баве хԝә (Ибрани 12:2, 3). w22.10 25 ¶4-5

Щарәке, Аԛуб у Йуһʹәннайе шанди бь сайа дийа хԝә жь Иса хԝәстьн, ԝәки әԝ Пʹадшатийеда щийед мәхсус бьдә ԝан (Мәтта 20:20, 21). Бь ве йәке, ԝана нишан кьр кӧ дьле ԝанда ԛӧрʹәбун һәйә у ԝана дьхԝәст жь кәсед дьн четьр бьн (Мәтʹәлок 16:18). Ве дәрәщеда, нә тʹәне Аԛуб у Йуһʹәнна хԝә нә рʹаст данә кʹьфше. Дина хԝә бьдьне кӧ щаба шандийед дьн чь бу: «Гава һәр дәһә шагьртед дьн әв йәк бьһист, дьле ԝан жь һәр дӧ бьра ма» (Мәтта 20:24). Кʹе занә кӧ Аԛуб, Йуһʹәнна у шандийед дьн, чаԝа һәвдӧрʹа кʹәтьнә дәʹԝе! Ле гәло Иса әв дәрәщә чаԝа сафи кьр? Әԝ һерс нәкʹәт. Әԝи нәгот кӧ әԝе ԝан бьһелә у хԝәрʹа шандийед дьһа мьлук у дьлован бьжберә. Дәԝсе Иса бь сәбьр ширәт да ԝан, чьмки әԝи заньбу кӧ әԝана дьхԝазьн тьштед рʹаст бькьн (Мәтта 20:25-28). Иса ԝанрʹа дьда кʹьфше кӧ әԝ ԝан һʹьз дькә. w23.03 28-29 ¶10-13

Тӧ ида гьһишти гәләк тьшта. Дьԛәԝьмә тә гәләк сал Кʹьтеба Пироз бь хирәт леколин кьрийә. Бь сайа ве леколине, тӧ избат буйи кӧ Кʹьтеба Пироз Хәбәра Хԝәде йә. Ӧса жи, тә Ньвискʹаре Кʹьтеба Пироз, демәк Хԝәде, нас кьрийә у ԝи һʹьз кьрийә. Тә һаԛас Йаһоԝа һʹьз кьрийә кӧ тә жийина хԝә тʹәсмили ԝи кьрийә у һати ньхӧмандьне. Тә сафикьрьнәкә гәләк баш кьрийә! Чахе тӧ бәрбь ньхӧмандьне дьчуйи, амьнийа тә бешьк дьһатә щерʹьбандьне. Чьԛас кӧ тӧ мәзьн би, һаԛас тӧйе рʹасти щерʹьбандьнед дьн жи бейи. Мире-щьна ԝе һәр тьшти бькә кӧ хирәта тә бьтәмьринә у тә жь Йаһоԝа дур хә (Әфәси 4:14). Ләма жи һаш жь хԝә һәбә! Гәло чь дькарә али тә бькә ԝәки тӧ Йаһоԝарʹа амьн бьмини у ль гора сонда хԝәйә тʹәсмилбуне, бьжийи? Лазьм ә кӧ тӧ рʹӧһʹанида бәрдәԝам ки пешда һәрʹи (Ибрани 6:1). w22.08 2 ¶1-2

Малбәтеда, лазьм ә кӧ һʹәму нәфәред мале, проблемед шәхси йед малбәта хԝә вәшарти бьһельн. Мәсәлә, бьдә бәр чʹәʹве хԝә, щәм хушкәкә мә хәйсәтәки ӧса һәйә, кӧ тʹьме кʹәне мере ԝе тинә. Гәло мере ԝе кәсед дьнрʹа ԝе бәʹса ве йәке бькә у ле бьдә шәрме? На. Һәрге әԝ жьна хԝә һʹьз дькә, әԝе пе ве йәке дьле ԝе нәешинә (Әфәси 5:33). Ԝе баш бә ԝәки де-бав ԛәдьре зарʹед хԝә жи бьгьрьн у шашийед ԝан кәсед дьнрʹа әшкәрә нәкьн (Колоси 3:21). Зарʹ жи гәрәке һин бьн кӧ тьштед шәхси йед малбәта хԝә хәлԛерʹа нәбежьн. Һәрге малбәтеда һәр кәс алийе хԝәда гьлийед мале дәрнәхә, йәктийа малбәте ԝе дьһа ԛәԝи бә. w22.09 10 ¶9

Сәва кӧ Ибо билани у һʹьзкьрьна Йаһоԝа дьһа баш фәʹм бькә, Йаһоԝа ԝирʹа бәʹса чәнд һʹәйԝанед һʹәԝас кьр (Ибо 38:1, 2; 39:9, 13, 19, 27; 40:15; 41:1, 2). Ӧса жи, Йаһоԝа бь сайа хортәки амьн бь наве Әлиһу мерхаси у дьлбини да Ибо. Әлиһу ԝирʹа гот кӧ Йаһоԝа сәбьра хьзмәткʹаред хԝә һәртʹьм хәлат дькә. Хенщи ве йәке, Йаһоԝа һьнә фькьред Ибо бь сайа Әлиһу рʹаст кьрьн. Әлиһу али Ибо кьр ԝәки әԝ бь зедәйи сәр хԝә нәфькьрә, ле дина хԝә бьдә мәзьнайа Йаһоԝа. Ӧса жи, Йаһоԝа шьхӧләк да Ибо; әԝи жерʹа гот ԝәки әԝ бона се һәвалед хԝә, йед кӧ гӧнә кьрьбун, дӧа бькә (Ибо 42:8-10). Гава әм рʹасти тәнгасийед гьран тен, гәло Йаһоԝа ча али мә дькә? Йаһоԝа тʹәви мә хәбәр надә чаԝа кӧ әԝи тʹәви Ибо хәбәр дабу, ле әԝ бь сайа Кʹьтеба Пироз тʹәви мә хәбәр дьдә (Рʹомайи 15:4). w22.08 11 ¶10-11

Щьвата Рʹомеда һьнә Мәсиһи Щьһу бун, һьнәк жи жь мьләтед дьн бун. Гава Ԛануна Муса һатә бәталкьрьне, ида нә лазьм бу кӧ әԝана жь хԝарьнед кӧ бәре ԛәдәхә бун, хԝә дур бьгьрьн (Маркос 7:19). Һьнгева, һьнә Мәсиһи ида аза ван хԝарьна дьхԝарьн. Ле һьнәк диса жи дьфькьрин кӧ гәрәке ван хԝарьна нәхԝьн. Сәва кӧ әʹдьлайи у йәктийа щьвате хьраб нәбә, Паԝлосе шанди шьровәкьр кӧ чьԛас фәрз ә әʹдьлайе хԝәй кьн. Әԝи хушк-бьра да фәʹмкьрьне, кӧ шәрʹ-дәʹԝед ӧса зьраре дьдьнә тʹәмамийа щьвате (Рʹомайи 14:19, 20). Паԝлос хԝәха жи һазьр бу кӧ рʹабун-рʹуньштьна хԝә бьгӧһезә, ԝәки тʹӧ кәс сәва кьред ԝи нәлькʹӧмә у жь рʹастийе дур нәкʹәвә (1 Корьнтʹи 9:19-22). Лазьм ә әм жи жь бо ньһерʹандьнед хԝәйә шәхси, тʹӧ кәсирʹа нәбьнә кәвьре лькʹӧмандьне, ле ԝана ава бькьн у әʹдьлайе хԝәй кьн. w22.08 22 ¶7

Паши кӧ мә хьзмәтийа Йаһоԝада хԝәрʹа нетәк данийә, әм хирәт дькьн кӧ пәй ве нете һәрʹьн. Лазьм ә ԝәки әм ӧса жи бь хирәт пәй рʹастийе һәрʹьн. Йаһоԝа ԝе бәрдәԝам кә али мә бькә, кӧ әм ве йәкеда пешда һәрʹьн (Зәбур 84:5, 7). Йаһоԝа дьбежә кӧ «тʹәмийед ԝи нә гьран ьн» (1 Йуһʹәнна 5:3). Бь рʹасти тʹәмийед ԝи һәр рʹож мә дьпарезьн. Бинә бира хԝә чʹәкед рʹӧһʹани, йед кӧ Паԝлос бәʹса ԝан кьрьбу (Әфәси 6:14-18). Кʹижан чʹәк дьле мә дьпарезә? Әв һәйә зьрьһʹе һәԛийе, йе кӧ те һʹәсабе принсипед Йаһоԝайә рʹастийе. Чаԝа кӧ зьрьһʹ дьле әскәра дьпараст, принсипед Йаһоԝайә рʹастийе жи дькарьн дьле мәйи симболик, демәк хԝәстьн, һәст у фькьред мә, бьпарезьн. Ләма жи, избат бә кӧ зьрьһʹе рʹастийе бал тә һәйә! (Мәтʹәлок 4:23) w22.08 29 ¶13-14

Хәбәра Хԝәде бь һʹәзара сала рʹебәрийа баш дайә щурʹә-щурʹә мәрьвед амьн. Гәло чь щурʹәйи? Йаһоԝа ӧса кьр, ԝәки копийед Ньвисаред Пироз бенә чекьрьне. Мәрьвед кӧ копи дькьрьн, чьԛас жи мәрьвнә ԛьсурдар бун, диса жи ԝана шьхӧле хԝә гәләк фәсал дькьрьн. Зандарәки дәрһәԛа Ньвисаред Ибрани ӧса гот: «Әм баԝәр ьн кӧ ԛә кʹьтебәкә дьн йа кәвьн бь щурʹәки һаԛас рʹаст нәһатийә копикьрьне». Ле диса жи, әм дькарьн баԝәр бьн, кӧ готьнед Кʹьтеба Пироз фькьред Ньвискʹаре ԝейә әʹсьли, демәк фькьред Йаһоԝа, әʹйан дькьн. Йаһоԝа йә Канийа «һәр дайина ԛәнщ у һәр пʹешкʹеша кʹамьл» (Аԛуб 1:17). Кʹьтеба Пироз йәк жь пʹешкʹешед һәри баш ә, кӧ Йаһоԝа дайә мә. Гава кәсәк пʹешкʹешәке дьдә мә, пʹешкʹеша ԝи әшкәрә дькә, һәла әԝ мә у һʹале мә баш занә, йан на. Әм дькарьн әԝе йәке бәрамбәри Ньвискʹаре әʹсьлийә Кʹьтеба Пироз бькьн. Чьԛас зедә әм Кʹьтеба Пироз дьхуньн, һаԛас баш әм Йаһоԝа нас дькьн. Әм жь Кʹьтеба Пироз педьһʹәсьн кӧ Йаһоԝа мә баш нас дькә у занә чь мәрʹа лазьм ә. w23.02 2-3 ¶3-4

Чахе рʹабуна мьрийа ԝәʹде Сәрԝертийа Иса Мәсиһ йа Һʹәзарсали сәр әʹрде дәстпебә, ньге мә ԝе шабуна әʹрд нәгьрә! Әм һʹьзрәта ве йәке нә кӧ диса мәрьвед хԝәйә һʹьзкьри бьвиньн, у Йаһоԝа жи һʹьзрәта ве йәке йә (Ибо 14:15). Бьдә бәр чʹәʹве хԝә, кӧ гава әм диса ԝана бьвиньн, әме чьԛас ша бьн! «Йед һәԛ», наве кʹижана кʹьтеба жийинеда ньвиси нә, ԝе «бона жийине» бенә сахкьрьне (Кʹаред Шандийа 24:15; Йуһʹәнна 5:29). Һьм жи гәләк мәрьвед мәйи һʹьзкьри, дьбәкә ԝәʹде дәстпека рʹабуна мьрийа, бона жийина сәр әʹрде бенә рʹакьрьне. Ӧса жи, «йед нәһәԛ», демәк кәсед кӧ пешийа мьрьне епʹещә мәщала ԝан тʹӧнә бу, кӧ Йаһоԝа нас кьн йан жи ԝирʹа бь амьни хьзмәт кьн, ԝе «бона диԝане» бенә рʹакьрьне. Ԝе лазьм бә ԝәки һʹәму кәсед сахкьри бенә һинкьрьне (Ишайа 26:9; 61:11). Ләма жи, бәрнама һинкьрьне йа һәри мәзьн ԝе дәстпебә (Ишайа 11:10). w22.09 20 ¶1-2

Йаһоԝа нишан кьрийә кӧ әԝ жь һʹәму кʹомед сәрԝера жи бьльндтьр ә. Мәсәлә, әԝи али Исраелийа кьр, ԝәки әԝана пʹаред мәзьн йед Әʹрдед Создайи зәфти хԝә кьн (Йешу 11:4-6, 20; 12:1, 7, 24). Йаһоԝа гәләк щара избат кьрийә кӧ «Йе Бьльнд», әԝ ә! Чахе пʹадше Бабилоне Нәбукәднәсәр хԝә ԛӧрʹә кьр, пәсьне ԛәԝата хԝә да у сәре хԝә ль бәр мәзьнайа Хԝәде хар нәкьр, Хԝәде ӧса кьр кӧ әԝ һʹьше хԝә ӧнда кә. Ле чахе һʹьше Нәбукәднәсәр һатә сәре ԝи, әԝи «Йе кӧ Бьльнд ә» пироз кьр у ԛәбул кьр кӧ «сәрԝертийа [Йаһоԝа] сәрԝертийа» һʹәта-һʹәтайе йә. Ӧса жи, әԝи гот: «Тʹӧ кәсе кӧ . . . жерʹа бежә: ‹Тӧ чь дьки?› тʹӧнәйә» (Данийел 4:30, 33-35, ИМ). Зәбурбеж ӧса гот: «Хԝәзи ль ԝи мьләти, Хԝәдейе кʹижани Хӧдан ә у ль ԝе щьмәʹте, кʹижан бьжарт кьрә ԝаре Хԝә» (Зәбур 33:12). Һәрге ӧса йә, гәло һежа нинә кӧ әм Йаһоԝарʹа амьн бьминьн? w22.10 15-16 ¶13-15

Гәләк тьштед кӧ Кʹьтеба Пироз пʹехәмбәрти кьрьбу ида һатьнә сери, у әв йәк баԝәрийа мә гәләк ԛәԝи дькә, кӧ Хԝәде ԝе ахьрийеда жи созед хԝә бинә сери. Мина зәбурбежәки, әм Йаһоԝарʹа ӧса дьбежьн: «Әз дьһʹәльм жь дәст һʹәйра азадийа Тә, мьн гӧман данийә ль сәр ԝе хәбәра Тә» (Зәбур 119:81). Бь сайа рʹезед Кʹьтеба Пироз, Йаһоԝа бь дьловани «һевийе у ахьрийа баш» дьдә мә (Йерәмйа 29:11, ДТʹ). Һевийа мә нә кӧ кьред мәрьвава гьредайи йә, ле созед Йаһоԝава. Ԝәрә әм бәрдәԝам кьн пʹехәмбәртийед жь Кʹьтеба Пироз леколин кьн, у бь ве йәке дьһа зедә итʹбарийа хԝә Хәбәра Хԝәде биньн. Кәсед кӧ ль гора ширәтед Кʹьтеба Пироз дьжин, жийина хԝә алийе башда дьгӧһезьн. Сәрһатийед ԝан, баԝәрийа мә һьндава Кʹьтеба Пироз дьһа ԛәԝи дькә (Зәбур 119:66, 138). Мәсәлә, гәләк жьн-меред кӧ һьндьк мабу һәв бьԛәтьн, ньһа тʹәвайи жийинәкә бәхтәԝар дәрбаз дькьн, чьмки әԝана ида ль гора ширәтед Кʹьтеба Пироз дьжин. У дьле зарʹед ԝан жи рʹьһʹәт ә, чьмки әԝана дьвиньн, ԝәки де-баве ԝан, ԝана һʹьз дькьн у ԝана дьбьнә хԝәйи (Әфәси 5:22-29). w23.01 5 ¶12-13

Бьфькьрә кӧ һʹәта ньһа, тә жь созед Хәбәра Хԝәде чь кʹар стандийә. Мәсәлә, Иса соз дайә кӧ Баве ԝи ԝе бона һʹәԝщед тәйә сәрәкә хәм бькә (Мәтта 6:32, 33). Ӧса жи, Иса соз дайә кӧ гава тӧ бьхԝази, Йаһоԝа ԝе рʹӧһʹе пироз бьдә тә (Луԛа 11:13). Йаһоԝа әв соз анинә сери. Әԝи гәләк созед дьн жи данә. Мәсәлә, әԝи соз дайә кӧ ԝе бьбахшинә тә, дьле тә рʹьһʹәт бькә у тә рʹӧһʹанида тʹер бькә (Мәтта 6:14; 24:45; 2 Корьнтʹи 1:3). Фькьрандьна сәр тьштед кӧ Хԝәде бона тә кьрьнә, ԝе һевийа тә дьһа ԛәԝи кә кӧ ахьрийеда, Әԝе созед хԝәйи дьн жи бинә сери. Кʹьтеба Пироз ӧса дьбежә: «Хԝәзи ль ԝи, кӧ . . . гӧмана ԝи ль сәр Хӧдан, Хԝәде ԝи йә . . . [Әԝ] амьнийа хԝә һʹәта-һʹәтайе хԝәй дькә» (Зәбур 146:5, 6). w22.10 27 ¶15; 28 ¶17

Гәло пʹехәмбәртийа дәрһәԛа вәгәрʹандьна һʹәбандьна рʹаст рʹожед мәда жи һатийә сери? Бәле! Жь сала 1919 Д.М.-да, бь милйона мәрьв жь дилтийа Бабилона Мәзьн, демәк жь империйа динед ԛәлп, аза бунә, у әԝана кʹәтьнә щьнәта рʹӧһʹани, йа кӧ жь Әʹрде Создайи кӧ ԝәʹде Исраелийа һәбу, дьһа баштьр ә (Ишайа 51:3; 66:8). Жь сала 1919 Д.М., кәсед бь рʹӧһʹ кʹьфшкьри щьнәта рʹӧһʹанида дьжин. Ԝәʹдә шунда, «пәзед дьн» жи щьнәта рʹӧһʹанида щиԝар бун. Ньһа әԝана жи жь Йаһоԝа гәләк кʹәрәма дьстиньн у һивийа жийина һʹәта-һʹәтайе сәр әʹрде нә (Йуһʹәнна 10:16; Ишайа 25:6; 65:13). Щьнәта ԝанә рʹӧһʹани жи сәр тʹәмамийа дьнйайе йә. Фьрԛи тʹӧнә әм кʹидәре дьжин, һәрге әм алийе хԝәда һәр тьшти дькьн, ԝәки пьштгьрийа һʹәбандьна рʹаст бькьн, әм дькарьн бьбьнә пʹара ве щьнәта рʹӧһʹани. w22.11 11-12 ¶12-15

Кʹьтеба Пироз дьбежә, кӧ Йаһоԝа «Хԝәдайе һәрһәйи» йә. Гәло тәрʹа чәтьн ә ве йәке фәʹм бьки? (Ишайа 40:28, ИМ) Бь рʹасти жи гәләк мәрьва зор те кӧ ве йәке фәʹм бькьн. Мәсәлә, Әлиһу дәрһәԛа Хԝәде готьбу кӧ леколина «һәжмара салед ԝи» набә (Ибо 36:26). Ле әв йәк кӧ әм тьштәки фәʹм накьн найе һʹәсабе, кӧ әв тьшт нә рʹаст ә. Мәсәлә, дьԛәԝьмә әм рʹьнд фәʹм накьн, кӧ рʹонайи чаԝа дьхәбьтә, ле әв йәк һьлбәт найе һʹәсабе, кӧ рʹонайи тʹӧнә йә. Мина ве йәке, дьбәкә әм тʹӧ щар бь тʹәмами фәʹм нәкьн, кӧ Йаһоԝа чаԝа тʹьме һәбу у ԝе тʹьме һәбә, ле әв йәк найе һʹәсабе, кӧ Хԝәде һәр у һәр нажи. Рʹастийа дәрһәԛа Хԝәде ве йәкева гьредайи нинә, кӧ әм чь фәʹм дькьн у чь фәʹм накьн (Рʹомайи 11:33-36). Ль гора Кʹьтеба Пироз, пешийа чекьрьна әʹрд у әʹзмана, Йаһоԝа һәбу. Әʹфьрандаре һәр тьшти әԝ ә (Йерәмйа 51:15). w22.12 2-3 ¶3-4

Щарна лазьм ә, ԝәки әм бәр кәсед дьн дӧа бькьн. Мәсәлә, бьдә бәр чʹәʹве хԝә, кӧ дӧ хушк дьчьн сәр һинбунәкә Кʹьтеба Пироз. Хушка кӧ һинбуне дәрбаз дькә, хушка дьнрʹа дьбежә ԝәки әԝ дӧа бькә. Һәрге хушка аликʹар, ве хԝәндәкʹаре һәла һе рʹьнд нас накә, дьбәкә дьһа баш бә кӧ әԝ паши дәрсе дӧа бькә. Әв йәк ԝе али ԝе бькә, ԝәки ль гора һʹәԝщед хԝәндәкʹаре дӧа бькә. Гава бьрарʹа щабдари те дайине, ԝәки щьватеда йан ԝәʹде щьвинед бона хьзмәтийе дӧа бькьн, гәрәке әԝана бир нәкьн кӧ нета щьвине чь йә. Нәщайиз ә ԝәки бьра дӧада ширәта бьдә йан жи дәрһәԛа тьштәки әʹлам бькә. Бона һʹәчʹи зәʹф щьвата, бь тʹәмами 5 дәԛә те дайине бона кʹьлам у дӧа, ләма жи нә лазьм ә ԝәки бьре кӧ дӧа дькә, готьнед хԝә дьреж кә, илаһи чахе щьвин дәстпедьбә (Мәтта 6:7). w22.07 24 ¶17-18

Иса пешда готьбу кӧ рʹожед ахьрийеда гәләк щийа нәхԝәши ԝе бәла бьн (Луԛа 21:11). Гәло занәбуна ве йәке чаԝа әʹдьлайе дькә дьле мә? Чахе нәхԝәши бәла дьбьн, әм әʹщебмайи наминьн. Әм жь ван ԛәԝьмандьна, кӧ дьнеда дьԛәԝьмьн, фәʹм дькьн, кӧ готьнед Иса йәк пәй йәке тенә сери. Ләма жи, әм гӧһ дьдьн ве ширәта кӧ Иса дайә мә: «Һаш жь хԝә һәбьн кӧ һун хԝә ӧнда нәкьн». Нәхԝәшийед бәлабуйи дькарьн жийина мәйә һәррʹожи тʹәвльһәв кьн. Ле гәрәке әв йәк нәбә мәʹни, ԝәки әм леколина хԝәйә шәхси у щьватед хԝә бәрʹдьн. Һәрге тӧ сәрһатийед хушк-бьред мә, әʹдәбйәт у видеойед мәда бьньһерʹи, тӧйе бьвини, кӧ әԝана чаԝа һьмбәри кӧл-дәрдед хԝә бь амьни Йаһоԝарʹа хьзмәт дькьн. w22.12 17 ¶4, 6

Аԛуб «жь һʹәмуйа зәʹфтьр Усьв һʹьз дькьр» (Дәстпебун 37:3, 4). Ләма жи кӧрʹед Аԛуб йед мәзьн чʹәʹвнәбарийа бьре хԝә дькьрьн. Гава мәщал кʹәтә дәсте ԝан, ԝана Усьв фьрот базьрганед Мьдйанирʹа. Әԝана жи Усьв бьрьн Мьсьре, ԝәлатәки кӧ бь сәда километьра дури мала ԝи бу. Ԝедәре, Потифаре кӧ сәрԝере нобәдара бу, Усьв ча дил кʹьрʹи. Жийина Усьв бь тʹәмами һатә гӧһастьне. Бәре әԝ кӧрʹе баве хԝә йе һʹьзкьри бу, ле ньһа әԝ ида диле Мьсьрийа бу (Дәстпебун 39:1). Әм дькʹәвьн тәнгасийед ӧса, йед кӧ «тенә сәре мәрьвед майин» жи (1 Корьнтʹи 10:13). Щарна жи мәʹнийа тәнгасийед мә әԝ ә, кӧ әм Мәсиһи нә. Мәсәлә, дьбәкә мәрьв сәва баԝәрийа мә ԛәрфа мә бькьн, пәй мә кәвьн, йан һәла һе мә бьзериньн жи (2 Тимотʹейо 3:12). Ле чь жи һәбә, Йаһоԝа дькарә али тә бькә ԝәки чәтьнайада жи тӧ сәрфьнийаз би. w23.01 14-15 ¶3-4

Дьԛәԝьмә әм щарна дьфькьрьн, ԝәки әм гәрәке тʹәви хушк йан бьраки кӧ дьле мә ешандийә, дәрберʹа хәбәр дьн. Ле пешийе ԝе баш бә кӧ әм пьрсед ӧса бьдьнә хԝә: «Гәло әз бь тʹәмами һаш пе һәмә кӧ чьрʹа ӧса ԛәԝьми йә?» (Мәтʹәлок 18:13). «Гәло дьбәкә әԝи нәдьхԝәст дьле мьн бешанда?» (Ԝаиз 7:20). «Мьн ԛә шашийед ӧса бәрʹнәдайә?» (Ԝаиз 7:21, 22). «Һәрге әз тʹәви ԝи хәбәр дьм, гәло проблем ԝе сафи бә, йан ԝе һе хьраб бә?». Һәрге әм дәрһәԛа ве йәке кʹур бьфькьрьн, дьбәкә әм жь һʹьзкьрьне сафи кьн, ԝәки чʹәʹве хԝә сәр шашийа хушк йан бьре хԝә, бьгьрьн. Һәрге һәр кәс жь мә һьмбәри кемасийед хушк у бьра сәбьр кә у ԝана һʹьз бькә, ԝе избат кә кӧ әԝ шагьрте Иса йә. Бь ви щурʹәйи әме али кәсед дьн жи бькьн, ԝәки әԝана религийа рʹаст бьвиньн у тʹәви мә Йаһоԝарʹа хьзмәт кьн. Бәле, һʹьзкьрьн нишана Мәсиһийед рʹаст ә! Ләма жи әм бь дьл у щан дьхԝазьн тʹьме ве һʹьзкьрьне бьдьнә кʹьфше. w23.03 31 ¶18-19

Кʹьтеба Пироз дьбежә, кӧ һʹӧнӧре Йаһоԝайи һәри мәзьн һʹьзкьрьн ә. Йаһоԝа мә һʹьз дькә, ләма жи әԝи готьнед кӧ мәрʹа нә лазьм ьн, нәдайә ньвисаре (Йуһʹәнна 21:25). Йаһоԝа ӧса жи һʹьзкьрьна хԝә мәрʹа дайә кʹьфше бь ве йәке, кӧ Кʹьтеба Пирозда рʹезәкә дьреж йа ԛануна нәдайә мә, ԝәки әм жийина хԝәда чь бькьн у чь нәкьн. Дәԝса ве йәке, әԝ дьхԝазә кӧ әм хԝәха бьфькьрьн у жь сәрһати, готьнед пʹехәмбәра у ширәтед Кʹьтеба Пироз һин бьн у сафикьрьнед баш бькьн. Ӧса Хәбәра Хԝәде дьле мә ԛәԝи дькә, кӧ әм Хԝәде һʹьз бькьн у жь дьл гӧһ бьдьн ԝи. Кʹьтеба Пироз дьбежә кӧ Йаһоԝа бона мә хәм дькә. Гәло чаԝа? Хәбәра ԝида, гәләк сәрһатийед кәсен, кӧ һәстед ԝан мина һәстед мә нә, һатьнә ньвисаре. Әм дькарьн һʹале ԝан рʹьнд фәʹм бькьн, чьмки әԝана жи хут мәрьвнә «мина мә» бун (Аԛуб 5:17). Йаһоԝа бона мәрьвед мина мә хәм дькьр, у али ԝан дькьр. Жь ве йәке әм дькарьн зәлал фәʹм бькьн, кӧ Йаһоԝа чьԛас дьлшәԝат у «рʹәʹм ә» (Аԛуб 5:11). w23.02 6 ¶13-15

Кʹьтеба пашьн, йа Кʹьтеба Пироз, бь ван гьлийа дәстпедьбә: «Әʹйантийа Иса Мәсиһ ә, кʹижан Хԝәде да ԝи, ԝәки әԝ ԝан тьштед кӧ гәрәке зутьрәке бьԛәԝьмьн, нишани хӧламед ԝи кә» (Әʹйанти 1:1). Ләма жи, әм дьхԝазьн һаш жь тьштед кӧ дьнйайеда дьԛәԝьмьн һәбьн, чьмки дьхԝазьн бьзаньбьн һәла пʹехәмбәртийед Кʹьтеба Пироз чаԝа тенә сери. Һәмьки әм бь дьл у щан дьхԝазьн тʹәви кәсед дьн дәрһәԛа ве йәке хәбәр дьн. Гава әм тʹәви кәсед дьн дәрһәԛа пʹехәмбәртийед Кʹьтеба Пироз хәбәр дьдьн, әм гәрәке бәр хԝә дәрнәхьн кӧ дьбәкә чь у ча ԝе бьԛәԝьмә. Гәло чьрʹа? Чьмки әм нахԝазьн пе гьлийед хԝә йәктийа щьвате хьраб кьн. Мәсәлә, дьбәкә сәрԝеред дьнйайе бежьн, кӧ ԝана бона проблемәке чʹарә дитийә у дьхԝазьн әʹдьлайе у бехофийе биньн дьнйайе. Дәԝса кӧ әм бь тʹәхмина хԝә бежьн, ԝәки әԝ йәк пʹехәмбәртийа жь 1 Тʹесалоники 5:3 тинә сери, дьһа баш ә ԝәки әм дина хԝә бьдьн фәʹмкьрьна һәри тʹәзә, йа кӧ әʹдәбйәтед мәда һатийә зәлалкьрьне. Һәрге хәбәрдана мә сәр һʹиме әʹдәбйәтед тʹәшкиләта Йаһоԝа бә, әме йәктийа щьвате бьпарезьн у «сәр нет-мәрәмәки бьн» (1 Корьнтʹи 1:10; 4:6). w23.02 16 ¶4-5

Чьрʹа тӧ Иса Мәсиһ һʹьз дьки? Иса рʹастийе, мьлуктийе у һәԛийе һʹьз дькә. Һәрге тӧ рʹастийе у һәԛийе һʹьз дьки, демәк тӧ Иса Мәсиһ жи һʹьз дьки. Иса бь мерхаси һәр тьште кӧ рʹаст бун, дьпараст (Йуһʹәнна 18:37). Ле әԝ ча мьлуктийе дьдә кʹьфше? Иса йәки мьлук ә. Мәсәлә, әԝи тʹӧ щар рʹумәт нәдьда хԝә, ле дьда Баве хԝә (Маркос 10:17, 18; Йуһʹәнна 5:19). Ле мьлуктийа ԝи ча сәр тә һʹӧкӧм дькә? Гәло әв йәк тә һелан накә, ԝәки тӧ Кӧрʹе Хԝәде һʹьз бьки у чʹәʹв бьди ԝи? Бешьк, һәма ӧса жи һәйә. Гәло Иса чьрʹа йәки мьлук ә? Чьмки әԝ Баве хԝәйи мьлук һʹьз дькә у чʹәʹв дьдә ԝи (Зәбур 18:35; Ибрани 1:3). Иса бь тʹәмами һʹӧнӧред Йаһоԝа әʹйан дькә, ләма жи әм дьхԝазьн незики ԝи бьн. w23.03 3-4 ¶6-7

Кʹьтеба Пироз дьбежә кӧ дӧ кʹом, демәк «һʹәму һәԛ у нәһәԛе» жь мьрьне бенә рʹакьрьне, у мәщала ԝан ԝе һәбә һʹәта-һʹәтайе сәр әʹрде бьжин. «Йед һәԛ» әԝ ьн, йед кӧ бь амьни Йаһоԝарʹа хьзмәт кьрьбун. Кәсед «нәһәԛ» Йаһоԝарʹа хьзмәт нәкьрьбун. Гава әԝ һәрдӧ кʹом бенә рʹакьрьне, гәло әв йәк те һʹәсабе кӧ навед ԝан кʹьтеба жийинеда ньвисар ә? Пешийа мьрьне, навед ԝан кʹьтеба жийинеда һатьбу ньвисандьне. Ле чахе әԝана мьрьн, гәло навед ԝан жь ве кʹьтебе һатьн дәрхьстьне? На. Бира Йаһоԝада, әԝана һе «сах» ьн. Йаһоԝа нә кӧ «Хԝәдейе мьрийа йә, ле йе зендийа йә, чьмки бона ԝи һʹәму жи сах ьн» (Луԛа 20:38). Ләма жи гава йед һәԛ бона жийина сәр әʹрде бенә рʹакьрьне, навед ԝан ԝе кʹьтеба жийинеда ньвиси бьн, ле сәрида тʹәне ча бежи пе «ԛәләме» (Луԛа 14:14). w22.09 16 ¶9-10

Йаһоԝа дьхԝәст кӧ мәрьве пешьн, Адәм, жь әʹфрина шабуне бьстинә. Хԝәде әԝ бахчәки бәдәԝда щи-ԝар кьр, ԝәки әԝ ле бьбә хԝәйи у һеди-һеди тʹәмамийа әʹрде бькә щьнәт (Дәстпебун 2:8, 9). Чахе Адәм дьдит кӧ тʹохьм чаԝа шин дьбьн у кӧлирк чаԝа вәдьбьн, һʹәԝаса ԝи гәләки ԝе йәкерʹа дьһат. Чь ԛәдьрәки мәзьн бу, кӧ әԝи хԝәйити бахче Едене дькьр! Ӧса жи, Йаһоԝа щабдари да Адәм, кӧ әԝ нава дайнә сәр һʹәму һʹәйԝана (Дәстпебун 2:19, 20). Һәмьки, Йаһоԝа хԝәха дькарьбу әв йәк бькьра. Ле дәԝсе, әԝи әв щабдари да дәсте Адәм. Бешьк, Адәм бәри пешьн ча лазьм ә дина хԝә дьда һʹәйԝана у паше нав дьда сәр ԝан. Әв шьхӧл гәләк Адәм хԝәш дьһат. Әв йәк али ԝи дькьр ԝәки әԝ дьһа зедә билани, һʹӧнӧр у кьред Баве хԝәйи әʹзмана бьшекьринә. w23.03 15 ¶3

Империйа Англо-Америкайе бь симболик пʹийед һʹәйкәл ьн. Демәк, ль гора Кʹьтеба Пироз, әв империйа һʹәмдьнйайе йа хьлазийе йә (Данийел 2:31-33). Паши ве сәрԝертийе, ида тʹӧ сәрԝерти ԝе щийе ве нәгьрә. Дәԝсе, әԝе шәрʹе Һармәгәдонеда тʹәви һʹәму сәрԝертийед дьнйайе, жь алийе Пʹадшатийа Хԝәдева бе ԝеранкьрьне (Әʹйанти 16:13, 14, 16; 19:19, 20). Гәло әм жь ве пʹехәмбәртийе чь кʹаре дьстиньн? Пʹехәмбәртийа Данийел избаткьрьнед дьн жи нишан дькә, кӧ әм ньһа рʹожед ахьрийеда дьжин. Зедәтьри 2 500 сал пешда, Данийел готьбу кӧ паши Бабилоне, ԝе чар империйед дьн сәр хьзмәткʹаред Хԝәде һʹӧкӧм бькьн. Ӧса жи, әԝи нишан кьрьбу кӧ империйа Англо-Америкайе ԝе сәрԝертийа пашьн бә. Әв йәк баԝәрийа мә дьһа ԛәԝи дькә, кӧ дәмәкә незикда Пʹадшатийа Хԝәде ԝе һʹәму сәрԝертийед дьнйайе бь тʹәмами кʹокева рʹакә у хԝәха сәр дьнйайе пʹадшатийе бькә. w22.07 4 ¶9; 5 ¶11-12