Һʹәзиран

Достийа Ибо тʹәви Йаһоԝа ԛәԝи бу. Әԝ хԝәйе малбәтәкә мәзьн у бәхтәԝар бу, у йәки дәԝләти бу (Ибо 1:1-5). Ле нава рʹожәкеда, Ибо һәр тьшт ӧнда кьр. Пешийе, әԝи мал у мьлкʹе хԝә ӧнда кьр (Ибо 1:13-17). Паше, һʹәму зарʹед ԝи мьрьн. Ибо у жьна ԝи нә тʹәне зарʹәкә хԝә, ле дәһ зарʹед хԝә рʹожәкеда ӧнда кьрьн. Дәрдәки чьԛас гьран бу! Жь бәр ве еша гьран, Ибо кʹьнще хԝә чʹьрʹанд у кʹәтә сәр әʹрде (Ибо 1:18-20). Паше, Мире-щьна нәхԝәшикә гьран ани сәр Ибо (Ибо 2:6-8). Ԝәʹдәки мәрьва ԛәдьре Ибо дьгьртьн у жь ԝи ширәт дьстандьн, ле паше, әԝана жь ԝи дьрʹәвийан (Ибо 31:18). Бьред ԝи, достед ԝи у һәла һе хӧламед ԝи жи, хԝә жь ԝи дур дьгьртьн (Ибо 19:13, 14, 16). w22.06 21 ¶5-6

Паши ньхӧмандьне, гәрәке әм ль гора ширәта Паԝлосе шанди бьжин, йа кӧ әԝи дабу хушк-бьред ль бажаре Әфәсе. Әԝи ԝанрʹа готьбу ԝәки әԝана бьбьн шагьртед «гьһишти» (Әфәси 4:13). Демәк, әԝи ԝана һелан дькьр, кӧ бәрдәԝам кьн пешда һәрʹьн. Тӧ ида гәләки Йаһоԝа һʹьз дьки. Ле диса жи тӧ дькари һе зедә ԝи һʹьз бьки. Гәло чаԝа? Ль гора Филипи 1:9, Паԝлосе шанди дӧа дькьр, кӧ һʹьзкьрьна Филипйа һе у һе зедә бә. Гәло һʹьзкьрьна мә чаԝа дькарә дьһа зедә бә? Бона ве йәке, лазьм ә кӧ әм «занәбун у сәрԝахтийа гьһиштива зедә» бьн. Чьԛас әм Йаһоԝа дьһа баш нас кьн, һаԛас әме ԝи һе зедә һʹьз кьн, у һʹӧнӧр у кьред ԝи ԛимәт кьн. Әме бьхԝазьн дьле ԝи ша кьн у тьштед кӧ ԝи хԝәш найен нәкьн. Бона ве йәке, әм хирәт дькьн кӧ хԝәстьна ԝи рʹьнд фәʹм бькьн у ль гора ԝе йәке бьжин. w22.08 2-3 ¶3-4

Готьнед ве кʹьтебе бона хьзмәткʹаред Хԝәде һатьнә ньвисаре, у пʹехәмбәртийед кӧ ве кʹьтеба һʹәԝасда бәреда һатьбун ньвисаре, мәва жи гьредайи йә. Гава Йуһʹәннайе шанди ида кал бу, әԝи гот кӧ готьнед ве кʹьтебе ԝе «Рʹожа Хӧданда» бенә сери (Әʹйанти 1:10). Йуһʹәнна әв рʹез сала 96 йа Д.М.-да ньвиси. Һьнге, «Рʹожа Хӧдан» һе дур бу (Мәтта 25:14, 19; Луԛа 19:12). Ль гора Кʹьтеба Пироз, «Рʹожа Хӧдан» сала 1914-да дәстпебу, гава Иса Мәсиһ сәр әʹзмана бу Пʹадша. Жь ԝе салева, пʹехәмбәртийед жь кʹьтеба Әʹйанти, йед кӧ щьмәʹта Хԝәдева гьредайи нә, тенә сери. Бәле, ньһа әм «Рʹожа Хӧданда» дьжин! (Әʹйанти 1:3). w22.05 2 ¶2-3

Щәʹнәԝьр у пʹехәмбәре дәрәԝ жи сахә-сах һатьнә авитьне нав гола агьре кʹьркʹутейи дьшьхӧлә. Демәк, әԝана ԝе ԝәʹде сәрԝертийа хԝә, бь дәсте Йаһоԝа сәр һʹәта-һʹәтайе бенә ԛьрʹкьрьне. Әм гәрәке чь бькьн? Әм Мәсиһи нә, ләма жи гәрәке әм Хԝәдерʹа у Пʹадшатийа ԝирʹа амьн бьминьн (Йуһʹәнна 18:36). Гәрәке әм хԝә жь политике дур бьгьрьн у тʹәвнәбуйине хԝәй кьн. Әв йәк щарна гәләк зор ә, чьмки сәрԝеред дьнйайе дьхԝазьн кӧ әм бь готьн у кьред хԝә пьштгьрийа ԝан бькьн. Кәсед кӧ пьштгьрийа ԝан дькьн, нишана щәʹнәԝьр дьстиньн (Әʹйанти 13:16, 17). Һәр кәсе кӧ ве нишане дьстинә, ԝе һерса Йаһоԝа сәр хԝә бинә, у ԝе жийина һәр-һәйи нәстинә (Әʹйанти 14:9, 10; 20:4). Бь рʹасти жи гәләк фәрз ә, ԝәки әм бь тʹәмами тʹәвнәбуйине хԝәй кьн, һәла һе ԝи чахи жи, гава сәрԝеред дьнйайе зоре мә бькьн, ԝәки алийе ԝан бьгьрьн. w22.05 10-11 ¶12-13

Гәло тӧ дькари чь нетед дьн хԝәрʹа дайни? Һәрге тӧ фәрәсәтед хԝәда пешда һәрʹи у һе зедә тьшт һин би, тӧйе бькарьби дьһа зедә щабдарийа һьлди сәр хԝә. Һәла бьфькьрә кӧ бона авакьрьна авайед Бәйтʹәле, Одед Щьвата у щьватед мәзьн, чьԛас хәбаткʹар лазьм ьн. Гәләк жь ԝан бь сайа һәвкʹарийа тʹәви бьред щерʹьбанди, пʹешед тʹәзә һин бунә. Иро хушк-бьра пʹешед тʹәзә бона хԝәйкьрьна Одед Щьвата у щьватед мәзьн, һин дьбьн. Рʹасти жи, «Пʹадшайе һʹәта-һʹәтайе» Йаһоԝа, у «Пʹадшайе пʹадша» Иса Мәсиһ, бь сайа хәбаткʹаред һостә у хирәт, шьхӧлед мәзьн тиньн сери (1 Тимотʹейо 1:17; 6:15). Ләма жи әм дьхԝазьн бь дьл у щан бьхәбьтьн у фәрәсәтед хԝә нә кӧ бона рʹумәта хԝә, ле бона рʹумәта Йаһоԝа бьдьнә хәбате (Йуһʹәнна 8:54). w22.04 24 ¶7; 25 ¶11

Һʹале Сьлеман Пʹадша у Иса Мәсиһ алийе материалида жь һәв щӧдә бун. Сьлеман йәки дәԝләти бу, ле мал у мьлкʹе Иса тʹӧнә бу (1 Пʹадшати 10:7, 14, 15; Мәтта 8:20). Ле һәрдӧ жи жь Йаһоԝа Хԝәде билани стандьбун, ләма жи ньһерʹандьна ԝан сәр тьштед материали рʹаст бу. Сьлеман ԛәбул дькьр ԝәки пʹәрә дькарә мә бьпарезә. Бь сайа пʹәра, әм дькарьн һʹәԝщед хԝәйә материали рʹази кьн у дьбәкә һьнә хԝәстьнед хԝә жи биньн сери. Ле Сьлеман чьԛас жи дәԝләмәнд бу, диса жи әԝи фәʹм дькьр ԝәки пʹәрә тьште һәри фәрз нинә. Мәсәлә, әԝи гот: «Наве ԛәнщ жь һәбука пʹьр ԛәнщтьр ә» (Мәтʹәлок 22:1). Ӧса жи, Сьлеман дьдит ԝәки гәләк мәрьвед кӧ пʹәра һʹьз дькьн, бь тьштед кӧ дәсте ԝанда һәнә, рʹази ниньн (Ԝаиз 5:10, 12). Әԝи гот кӧ гәрәке мәрьв хԝә бь тʹәмами нәсперә пʹәра, чьмки пʹәрә дькарә зу «бьфьрʹә» (Мәтʹәлок 23:4, 5). w22.05 21 ¶4-5

Чьԛас әм сәр кʹәрәмед кӧ мә стандьнә кʹур бьфькьрьн, һаԛас әме дьһа незики Йаһоԝа бьн. Ӧса жи, ԝе баш бә ԝәки әм сәр кʹәрәмен, кӧ Йаһоԝа ԝе бьдә мә, кʹур бьфькьрьн, кӧ һевийа мә сах бьминә, ԝәки әме бькарьбьн һʹәта-һʹәтайе ԝирʹа хьзмәт бькьн. Әв йәк ԝе али мә бькә, кӧ әм бь шабуне Йаһоԝарʹа хьзмәт бькьн. Ԝәхтәкә незикда, Йаһоԝа ԝе ‘рʹабә’ у ве дьнйа хьраб ԛьрʹ кә. Әм рʹьнд заньн, ԝәки Йаһоԝа, йе кӧ Хԝәдайе һәԛийе йә, ԝе дьнйа Мире-щьна ԝәхта һәри рʹастда, ԛьрʹ кә (Ишайа 25:9). Мина Йаһоԝа, әм бь сәбьр һивийа ԝе рʹоже нә. Һʹәта һьнге, ԝәрә әм һәр гав дӧа бькьн, Хәбәра Хԝәде бьхуньн у ль гора ԝе бьжин у сәр кʹәрәмед кӧ мә стандийә, кʹур бьфькьрьн. Һәрге әм ӧса бькьн, Йаһоԝа ԝе али мә бькә, кӧ әм һʹәбандьна ԝида бь шабуне сәбьр кьн. w22.11 13 ¶18-19

Кʹьтеба Пироз бәʹса рʹожа ньхӧмандьна Тимотʹейо накә, ле әм дькарьн баԝәр бьн кӧ ве рʹоже дийа ԝи Әйньк, гәләки ша бу (Мәтʹәлок 23:25). Әԝ фьрнаԛ дьбә, чьмки щәфе ԝе, кӧ кӧрʹе хԝә дәрһәԛа Йаһоԝа у Иса Мәсиһ һин кә, бадиһәԝа нибу. Баве Тимотʹейо Йунан бу, ле де у пирька ԝи Щьһу бун (Кʹаред Шандийа 16:1). Паше ча те кʹьфше гава Тимотʹейо һе зарʹ бу, Әйньк у Лойис бунә Мәсиһи, ле баве ԝи әв рʹе ԛәбул нәкьр. Чахе Тимотʹейо мәзьн дьбу, лазьм бу ԝәки әԝ рʹийа хԝә бьжберә. Гәло әԝи чь кьр? Иро жи, дайикед кӧ Мәсиһи нә, зарʹед хԝә һʹьз дькьн. Жь һәр тьшти зедәтьр, әԝана дьхԝазьн али зарʹед хԝә бькьн ԝәки әԝана бьбьнә достед Йаһоԝа, у Йаһоԝа әмәке ԝан дайика гәләк дьшекьринә (Мәтʹәлок 1:9). Йаһоԝа рʹебәрийа гәләк дайика кьрийә ԝәки әԝана зарʹед хԝә рʹастийеда мәзьн бькьн. w22.04 16 ¶1-3

Дәмәкә незикда, Йаһоԝа ԝе бькә дьле сәрԝеред политики «кӧ хԝәстьна ԝи бькьн». Ахьрийа ве йәке ԝе чь бә? Сәрԝеред политики, демәк «дәһ пʹадша», ԝе һʹьщуми сәр тʹәшкиләтед религийа ԛәлп бькьн у ԝана ԛьрʹ кьн (Әʹйанти 17:1, 2, 16). Әм жь кʹӧ заньн ԝәки зутьрәке «Бабилона мәзьн» ԝе бе ԛьрʹкьрьне? Бона щаба ве пьрсе, бинә бира хԝә кӧ бәре бажаре Бабилоне чаԝа бь ава Чʹәме Фәрате дьһатә парастьне. Кʹьтеба Әʹйанти жи мьләтед кӧ иро пьштгьрийа «Бабилона мәзьн» дькьн, бәрамбәр дькә тʹәви «авен» кӧ ле дьпарезьн (Әʹйанти 17:15). Ле кʹьтеба Әʹйанти дьбежә кӧ әв ав ԝе ‹бьчʹькә›. Әв йәк те һʹәсабе кӧ гәләк мәрьв ԝе тʹәрка динед ԛәлп бьдьн (Әʹйанти 16:12). Әв пʹехәмбәрти иро те сери. Гәләк мәрьв пьшта хԝә дьдьнә религийед ԛәлп у мәщалед дьн дьгәрʹьн ԝәки проблемед хԝә сафи кьн. w22.07 5-6 ¶14-15

Гава әм дьбахшиньн мәрьва, әм нишан дькьн кӧ әм рʹәʹма Йаһоԝа ԛимәт дькьн. Мәтʹәлокәкеда, Иса бәʹса пʹадшаки кьр, йе кӧ дәйнәки мәзьн бахшандьбу хӧламәки хԝә. Ле әв хӧлам һьндава хӧламәки дьн рʹәʹмти нәда кʹьфше, йе кӧ һьнә пʹәрә дәйндаре ԝи бу (Мәтта 18:23-35). Гәло әв йәк бона мә чь дәрс ә? Йаһоԝа мина ви пʹадше жь мәтʹәлоке йә. Һәгәр әм жь дьл рʹәʹма Йаһоԝайә мәзьн ԛимәт дькьн, әме һазьр бьн кӧ бьбахшиньн мәрьва (Зәбур 103:9). Гәләк сал пешда, журнала «Бьрща Ԛәрәԝьлийеда» ӧса һатьбу готьне: «Әм чьԛас жи дьбахшиньн мәрьвед дьн, йәкә әв тʹӧ щар бәрамбәри бахшандьна жь Хԝәде набә, кʹижан кӧ сәр һʹиме ԛӧрбана Мәсиһ йә». Һәгәр әм дьбахшиньн кәсед дьн, Йаһоԝа жи ԝе бьбахшинә мә (Мәтта 5:7). Иса әв йәк әшкәрә кьр, гава шагьртед хԝә һин дькьр кӧ ча дӧа кьн (Мәтта 6:14, 15). w22.06 10 ¶8-9

Гава Иса сәр әʹрде дьжит, әԝи бь щурʹәки беԛьсур чʹәʹв дьда хәйсәте Баве хԝә (Йуһʹәнна 14:9). Ләма жи мә Йаһоԝа Хԝәде бь сайа Иса нас кьр у ԝи һʹьз кьр. Ӧса жи, әм жь готьнед Иса у жь ве йәке кӧ әԝ иро чаԝа рʹебәрийа щьвате дькә, кʹаре дьстиньн. Иса мә һин дькә, кӧ гәрәке әм ча бьжин, ԝәки Йаһоԝа жь мә рʹази бә. Ӧса жи, әм гьшк жь мьрьна Иса, демәк жь бьриндаркьрьна пәʹнийа ԝи, кʹаре дьстиньн. Гәло чь щурʹәйи? Гава Иса жь мьрьне рʹабу, әԝи ԛимәта хуна хԝә ча ԛӧрбанәкә беԛьсур бәрва да, йа кӧ «мә жь һʹәму гӧна» паԛьж дькә (1 Йуһʹәнна 1:7). Ньһа Иса Пʹадше рʹумәткьри йә, йе кӧ ԝе тʹӧ щар нәмьрә. Зутьрәке әԝе сәре мәʹр бьһʹьнщьрʹинә (Дәстпебун 3:15). Гава Мире-щьна бе ԛьрʹкьрьне, ньгед хьзмәткʹаред Хԝәде ԝе шабуна әʹрд нәгьрә! Һʹәта кӧ әв рʹож бе, мерхасийа хԝә ӧнда нәкьн. Хԝәдайе мә ԝе әʹсәйи созед хԝә бинә сери. w22.07 18 ¶13; 19 ¶19

Гава әм хԝәрʹа нета датиньн, гәрәке әм сәрԝахт бьн. Гәло чьрʹа? Чьмки һәр тьшт дәсте мәда нинә. Мәсәлә, бь сайа аликʹарийа Паԝлосе шанди, ль бажаре Тʹесалонике щьватәкә тʹәзә һатә сазкьрьне. Ле сәва пәйкʹәтьна, Паԝлос мәщбур бу жь ԝедәре бьрʹәвә (Кʹаред Шандийа 17:1-5, 10). Һәгәр Паԝлос ԝедәре бьма, әԝе сәре хушк-бьра бькьра бәлайе. Диса жи, Паԝлос хирәта хԝә ӧнда нәкьр, ле әԝ һини дәрәщед тʹәзә бу. Паше, әԝи Тимотʹейо шандә Тʹесалонике, ԝәки али ван хушк-бьред тʹәзә бькә (1 Тʹесалоники 3:1, 2). Бинә бәр чʹәʹве хԝә, ԝәки хушк-бьред Тʹесалоники чьԛас ша бун. Гәло әм дькарьн жь сәрһатийа Паԝлосе шанди чь һин бьн? Щарна гава әм дьхԝазьн щабдарик бьстиньн, дьбәкә һьнә дәрәщә рʹийа мә бьгьрьн (Ԝаиз 9:11). Һәгәр ӧса бә, һазьр бә кӧ хԝәрʹа нетәкә дьн дайни. w22.04 25-26 ¶14-15

Йаһоԝа бь сайа һевийе, дьле мә рʹьһʹәт дькә. Гава әм рʹасти тәнгасийа тен, әм дькарьн жь гәләк рʹеза дьлбинийе бьстиньн. Мәсәлә, Кʹьтеба Пироз дьбежә кӧ тʹӧ тьшт у тʹӧ тәнгаси нькарә «һʹьзкьрьна Хԝәде сәр мә сар кә» (Рʹомайи 8:38, 39). Ӧса жи, Кʹьтеба Пироз дьбежә кӧ Йаһоԝа «незики ԝан һʹәмуйа йә, кʹижан кӧ гази Ԝи дькьн» (Зәбур 145:18). Йаһоԝа мәрʹа дьбежә кӧ һәрге әм хԝә бьсперьн ԝи, әме бькарьбьн нава һʹәму тәʹли-тәнгасийада сәбьр кьн у шабуна хԝә ӧнда нәкьн (1 Корьнтʹи 10:13; Аԛуб 1:2). Хәбәра Хԝәде тинә бира мә ԝәки хәлата кӧ Йаһоԝа дьдә мә, һʹәта-һʹәтайе йә, ле тәнгасийед кӧ әм ньһа дькʹьшиньн, ԝәʹдәлу нә (2 Корьнтʹи 4:16-18). Йаһоԝа соз дьдә кӧ әԝе Мире-щьна у пьштгьред ԝи, йед кӧ сәбәбе һʹәму тәнгасийед мә нә, сәр һʹәта-һʹәтайе кʹӧта кә (Зәбур 37:10). Гәло тӧ чәнд рʹезед кӧ дьлбинийе дьдьн, әзбәри зани, йед кӧ дькарьн али тә бькьн, ԝәки нава тәнгасийед ахьрийеда сәбьр ки? w22.08 11 ¶11

Гәло тӧ бәрхԝә дькʹәви, һәла тӧйе бькарьби рʹож бь рʹож, сал бь сал ль гора принсипед Йаһоԝа бьжи? Йаһоԝа соз дьдә кӧ һәԛийа мә ԝе бьбә «мина лейед [пʹелен] бәре» (Ишайа 48:18). Бьдә бәр чʹәʹве хԝә кӧ тӧ бәр бәре сәкьни йи у пʹелед аве пәй һәв тен. Гәло тӧйе бьфькьри кӧ рʹожәке, әв пʹел ԝе хьлаз бьн? На! Тӧ зани кӧ ԝе һʹәта-һʹәтайе ӧса бә. Һәԛийа тә дькарә бьбә мина пʹелед бәʹре! Гәло чь щурʹәйи? Пешийа кӧ тӧ сафикьрьнәке бьки, бьфькьрә кӧ Йаһоԝа ԝе бьхԝәста ԝәки тӧ чь бьки, у һәма ӧса жи бькә. Сафикьрьна тә чьԛас чәтьн бә жи, Баве тәйи дьлован ԝе али тә бькә, ԝәки тӧ һәр рʹож ль гора рʹастийе бьжийи (Ишайа 40:29-31). w22.08 30 ¶15-17

Хьлазийа Сәрԝертийа Һʹәзарсали, әԝе бе азакьрьне, у әԝе һәр тьшти бькә ԝәки инсанед беԛьсур жь рʹийа Йаһоԝа дәрхә. Әв щерʹьбандьна пашьн ԝе мәщале бьдә һʹәму мәрьва кӧ әшкәрә нишан кьн, һәла әԝана ԛәдьре наве Хԝәде у сәрԝертийа ԝи дьгьрьн йан на (Әʹйанти 20:8-10). Һәрге әԝана гӧһ нәдьн Мире-щьна, у Йаһоԝарʹа амьн бьминьн, навед ԝан ԝе сәр һʹәта-һʹәтайе кʹьтеба жийинеда бе ньвисандьне. Һьнә мәрьв ԝе сәрԝертийа Йаһоԝа ԛәбул нәкьн. Ле Кʹьтеба Пироз һәжмара ԝан әшкәрә накә. Гәло чь ԝе бе сәре ԝан? Әʹйанти 20:15 ӧса дьбежә: «Наве кʹе ве кʹьтеба жийинеда ньвисар тʹӧнәбу, әԝ һатә авитьне нава гола егьр». Бәле, кәсед кӧ мьԛабьли Йаһоԝа дәрен ԝе сәр һʹәта-һʹәтайе бенә кʹӧтакьрьне. Ле һʹәчʹи зәʹф мәрьвед беԛьсур ԝе ԝәʹде щерʹьбандьна пашьн амьн бьминьн. w22.09 23-24 ¶15-16

Щьвата ԛьрʹна йәкеда һьнәка дьгот кӧ шагьртед жь мьләтед дьн жи гәрәке бенә сьнәткьрьне, дьԛәԝьмә сәва кӧ Щьһу ԝана сущдар нәкьн (Галати 6:12). Әв ньһерʹандьн бь дитьна Паԝлосе шанди нәрʹаст бу, ле диса жи, әԝи бь мьлукти жь шандийа у рʹуспийед ль Оршәлиме дәрһәԛа ве пьрсе ширәт хԝәст (Кʹаред Шандийа 15:2). Бь ви щурʹәйи, Паԝлосе шанди али ԝан кьр, ԝәки әԝана шабун у әʹдьлайа щьвате бьпʹарезьн (Кʹаред Шандийа 15:30, 31). Һәрге дәʹԝәкә мәзьн пешда те, ԝе баш бә кӧ әм жь бьред щабдар, йед кӧ Йаһоԝа кʹьфш кьрьнә, рʹебәрийе бьхԝазьн. Гәләк щара әм дькарьн рʹебәрийа Кʹьтеба Пироз әʹдәбйәтед мәда йан жь рʹебәрийед тʹәшкиләте бьстиньн. Һәрге әм ван рʹебәрийа сәр ньһерʹандьнед хԝәйә шәхсирʹа бьгьрьн, әме әʹдьлайе бькьнә щьвате. w22.08 22 ¶8-9

Мә гьшкарʹа һәваләки ӧса лазьм ә, кʹерʹа әм аза дькарьн дьле хԝә вәкьн. Дьбәкә мәрʹа чәтьн ә, ԝәки чь кӧ дьле мәда һәйә, кәсәкирʹа гьли кьн. У һәрге әм педьһʹәсьн кӧ һәвале мә гьлийед мә кәсәкирʹа готийә, һәмьки дьле мәйе бешә. Жь алийе дьнва жи, һәрге һәвале мә сӧрʹа мә вәшарти бьһелә, әме гәләк ша бьн, ӧса нинә? Әԝ һәваләки рʹаст у амьн ә! Рʹуспийед кӧ информасийа шәхси йед хушк-бьра бәла накьн, бь рʹасти жи бона ԝан дьбьн сьтʹар (Ишайа 32:2). Әм заньн кӧ әм дькарьн рʹьһʹәт тʹәви ԝан хәбәр дьн, чьмки әԝе гьлийед мә кәсәкирʹа нәбежьн. Ӧса жи әм зоре ԝан накьн ԝәки гьлийед кәсәки мәрʹа бежьн. Хенщи ве йәке, әм ԛәдьре жьнед рʹуспийа дьгьрьн, чьмки әԝана изьне надьнә хԝә, ԝәки тьштед конфиденсйал жь меред хԝә дәрхьн. Чьԛас баш ә кӧ рʹуспи информасийа шәхси йед хушк-бьра, жьнед хԝәрʹа набежьн. w22.09 11 ¶10-11

Әм дькарьн баԝәр бьн кӧ ԝәʹде ‹тәнгасийа мәзьн›, Йаһоԝа ԝе хьзмәткʹаред хԝә йед амьн хьлаз кә (Мәтта 24:21; Данийел 12:1). Гава коалисйа мьләта, бь наве Гог жь Магоге сәр тʹәмамийа дьнйайе һʹьщуми сәр амьнед Йаһоԝа бькә, Йаһоԝа ԝе ԝана алт кә. Һәрге әв коалисйа жь 193 әндәмед Мьләтед Йәкбуйи бә жи, йәкә әԝана ԝе нькарьбьн мьԛабьли Йе Бьльнд у ордийа ԝийә әʹзмани сәр кәвьн. Йаһоԝа соз дайә: «Әзе хԝә мәзьн бькьм у хԝә пироз бькьм у әзе дь чʹәʹве гәләк нәтәԝәйанда [мьләтада] хԝә бьдьм насин у ԝе бьзаньбьн кӧ, әз Хӧдан ьм!» (Һәзәԛел 38:14-16, 23). Гава Гог һʹьщуми сәр хьзмәткʹаред Хԝәде бькә, Йаһоԝа ԝе шәрʹе Һармәгәдонеда «һʹәму пʹадшед дьнйайе» ԛьрʹ кә (Әʹйанти 16:14, 16; 19:19-21). Жь алийе дьнва жи Йаһоԝа «әʹмьре амьнед Хԝә хԝәй дькә» (Зәбур 97:10). w22.10 16-17 ¶16-17

Әм нькарьн бьвиньн кӧ дьле мәрьвада чь һәйә. Тʹәне Йаһоԝа занә кӧ нета мәрьва бь рʹасти чь йә (Мәтʹәлок 16:2). Әв мәрьва һʹьз дькә. Фьрԛи тʹӧнә мәрьв жь чь мьләти йан бәрәки йә, әԝ дьхԝазә ԝәки әм жи чʹәʹв бьдьнә ԝи (2 Корьнтʹи 6:13). Ләма жи, әм һәр тьшти дькьн кӧ һʹәму нәфәред малбәта хԝәйә рʹӧһʹани һʹьз бькьн, у ԝана сущдар нәкьн. Ӧса жи, гәрәке әм кәсед кӧ Шәʹдед Йаһоԝа ниньн жи сущдар нәкьн. Ԛә тәйе дәрһәԛа мәрьвәки хԝәйи нәбаԝәрмәнд ӧса бьгота, «Әԝе тʹӧ щара рʹастийе ԛәбул нәкә»? Тʹәне кәсе ԛӧрʹә, йе кӧ хԝә жь мәрьвед дьн четьр һʹәсаб дькә, ԝе ӧса бежә. Йаһоԝа мәщале дьдә һʹәму мәрьва, ԝәки кьред хԝәйә нәрʹаст тʹобә бькьн (Кʹаред Шандийа 17:30). Тʹӧ щар бир нәкьн, ԝәки Йаһоԝа ԝан мәрьва, йед кӧ хԝә жь кәсед дьн четьр һʹәсаб дькьн, ча мәрьвед нәрʹаст һʹәсаб дькә. Һәрге әм принсипед Йаһоԝайә рʹастийе ԛимәт кьн, әме шабуне бьстиньн у кәсед дьнрʹа бьбьн мәсәләкә баш. Ахьрийеда, әԝана ԝе һе зедә мә һʹьз бькьн у дьһа незики Хԝәде бьн. w22.08 31 ¶20-22

Әм заньн кӧ хьзмәтийеда, әм дькарьн рʹасти пәйкʹәтьна бен. Ахьрийеда, пәйкʹәтьн ԝе дьһа зедә бьн (Данийел 11:44; 2 Тимотʹейо 3:12; Әʹйанти 16:21). Ле диса жи, әм дькарьн баԝәр бьн кӧ Йаһоԝа ԝе али мә бькә, чьмки Йаһоԝа һәртʹьм али хьзмәткʹаред хԝә кьрийә, ԝәки әԝана щабдарийед хԝә нава тәнгасийада жи биньн сери. Ԝәрә әм дәрһәԛа жийина Һәзәԛел пʹехәмбәр шеԝьр кьн, кʹижан кӧ Щьһуйед аксоркьрирʹа пʹехәмбәрти дькьр. Гәло мәрьвед кӧ рʹасти Һәзәԛел дьһатьн, чь щурʹәйи бун? Ль гора готьнед Йаһоԝа, әԝ мәрьвед рʹабәр у «дьл һʹьшк» бун. Әԝана мина стьруйе кӧ зийан дьдан у мина дупʹьшка хоф бун. Ләма жи, Йаһоԝа чәнд щара Һәзәԛелрʹа гот нәтьрсә! (Һәзәԛел 2:3-6) Һәзәԛел дькарьбу щабдарийа хԝә бинә сери, чьмки (1) Йаһоԝа әԝ шандьбу, (2) әԝи бь сайа рʹӧһʹе Хԝәде ԛәԝат дьстанд у (3) готьнед Хԝәде баԝәрийа ԝи ԛәԝи дькьрьн. w22.11 2 ¶1-2

Зу йан дәрәнг, һʹәму шинкайи дьчʹьлмьсьн, у һʹәму һʹәйԝан дьмьрьн. Жь алийе дьнва жи, гава Хԝәде мәрьвед пешьн әʹфьранд, әԝи мәщал да ԝан, кӧ тʹӧ щар нәмьрьн, ле һʹәта-һʹәтайе бьжин. Ӧса жи Йаһоԝа хԝәстьна мәзьн кьрийә дьле мә, кӧ әм дьхԝазьн бьжин. Кʹьтеба Пироз дьбежә кӧ Хԝәде «һәр-һәйити кьр дьле мәрьва» (Ԝаиз 3:11, ИМ). Ләма жи, мьрьн бона мә дьжмьн ә (1 Корьнтʹи 15:26). Чахе әм гьран нәхԝәш дькʹәвьн, әм һәр тьшти дькьн, ԝәки хԝә жь ве нәхԝәшийе ԛәнщ кьн. Мәсәлә, әм дьчьн бал дохдьр, у әм дьбәкә дәрмана вәдьхԝьн, ԝәки ԛәнщ бьн. Чь жь дәсте мә те, әм ве йәке дькьн, кӧ сах бьминьн. У гава мәрьвәки мәйи һʹьзкьри дьмьрә, фьрԛи тʹӧнә щаһьл бә йан әʹмьрда мәзьн, йәкә гәләк ԝәхт дьле мә дешә (Йуһʹәнна 11:32, 33). Бәле, Йаһоԝа һьм хԝәстьна жийина һәр-һәйи кьрийә дьле мә, һьм жи әм ӧса әʹфьрандьнә, кӧ әм бькарьбьн һʹәта-һʹәтайе бьжин. w22.12 3 ¶5; 4 ¶7

Гәләк хушк-бьред мә дьбәкә нәхԝәш ьн, тьрс дьле ԝанда һәйә, йан ԝан рʹожед гьранда тʹәне нә. Тʹьме һʹале хушк-бьра бьпьрсә. Жь бо нәхԝәшийед бәлабуйи дьԛәԝьмә лазьм ә, ԝәки әм бона хԝәйкьрьна сьһʹәта-ԛәԝата хԝә у йа кәсед дьн, жь хәлԛе дур бьсәкьньн, у һәла һе жь хушк-бьра жи. Дәрәщед ӧсада, дьбәкә һʹале тә мина һʹале Йуһʹәннайе шанди бә. Әԝи гәләк дьхԝәст досте хԝә Гайос рʹу бь рʹу бьдита (3 Йуһʹәнна 13, 14). Ле Йуһʹәнна фәʹм дькьр, кӧ ԝәхтәке, әԝ нькарә досте хԝә Гайос бьвинә. Диса жи, Йуһʹәнна чь жь дәсте ԝи дьһат дькьр, кӧ хԝә бьгьһинә досте хԝә, у жерʹа нәʹмәк ньвиси. Һәрге тӧ нькарьби һәри мала хушк-бьра, дьбәкә тӧ дькари бь щурʹәки дьн тʹәви ԝан текли би. Гава тӧ тʹәви хушк-бьра хәбәр ди, дьле тә ԝе дьһа рʹьһʹәт бә. Һәрге дәрде тә гәләк гьран бә, дьле хԝә рʹуспийарʹа вәкә у изьне бьдә, ԝәки әԝана тә һелан кьн (Ишайа 32:1, 2). w22.12 17-18 ¶6-7

Кʹьтеба Пироз дьбежә: «Ньгед ԝи ԛәйдада шьдандьн у хәлаԛ авитьнә стӧкӧра ԝи» (Зәбур 105:17, 18). Бәле, һʹале Усьв чьԛас дьчу дьһа хьраб дьбу. Әԝ ида диләки бь итʹбар нибу, ле гьртики бәләнгаз бу. Гәло, тӧ ԛә кʹәтьбуйи һʹаләки гьран у лавайа Хԝәде дькьр кӧ али тә бькә, ле диса жи һʹале тә чьԛас дьчу дьһа хьраб дьбу? Бәле, щарна ӧса дьбә. Йаһоԝа мә жь һʹәму тәнгасийед дьнйа Мире-щьна напʹарезә (1 Йуһʹәнна 5:19). Диса жи баԝәр бә кӧ Йаһоԝа һаш жь һʹале тә һәйә, у әԝ бона тә хәм дькә (Мәтта 10:29-31; 1 Пәтрус 5:6, 7). Сәрда жи, әԝи соз дайә: «Әзе тʹӧ щар жь тә нәчьм у тʹӧ щар тә бәрʹнадьм» (Ибрани 13:5). Һәрге жи тәрʹа те кʹьфше, кӧ чʹарә ида тʹӧнә, бир нәкә кӧ Йаһоԝа дькарә али тә бькә, ԝәки тӧ сәбьр ки. w23.01 16 ¶7-8

Ньвисаред Пироз дьбежьн кӧ гава әм шашийа дькьн, Йаһоԝа тʹәрка мә надә. Исраелийа диса у диса бәр Йаһоԝа гӧнә дькьрьн. Ле гава ԝана жь дьл тʹобә дькьр, Хԝәде дьбахшандә ԝан. Хьзмәткʹаред Хԝәде йед ԛьрʹна йәкеда жи заньбун, ԝәки Хԝәде ԝана гәләки һʹьз дькә. Жь бина бәр Хԝәде, Паԝлосе шанди хушк-бьрарʹа готьбу, ԝәки әԝана мерәки кӧ гӧне гьран кьрьбу, бьбахшиньн у ль бәр дьле ԝида бен, чьмки әԝи тʹобә кьрьбу (2 Корьнтʹи 2:6, 7; 1 Корьнтʹи 5:1-5). Бәле, чьԛас баш ә кӧ Йаһоԝа пьшта хԝә надә хьзмәткʹаред хԝә, йед кӧ шаши кьрьнә! Дәԝса ве йәке, әԝ жь дьл али ԝан дькә, ԝана рʹаст дькә у дьхԝазә кӧ әԝана диса бьбьнә достед ԝи. Әԝи соз дайә кӧ ԝе иро жи һьндава гӧнәкʹарада рʹәʹма хԝә бьдә кʹьфше, йед кӧ тʹобә дькьн (Аԛуб 4:8-10). Кʹьтеба Пироз билани, һәԛи у һʹьзкьрьна Хԝәде мәрʹа әшкәрә дькә. Әв кʹьтеб нишан дькә, кӧ Йаһоԝа дьхԝазә әм ԝи дьһа баш нас бькьн у бьбьнә достед ԝи. w23.02 7 ¶16-17

Фәʹмдари йә кӧ әм дьхԝазьн һаш пе һәбьн кӧ дьнйайеда чь дьԛәԝьмә, чьмки әв ԛәԝьмандьн пʹехәмбәртийед Кʹьтеба Пироз тиньн сери. Мәсәлә, Иса пешда йәк бь йәк готьбу кӧ әм чаԝа дькарьн тедәрхьн, ԝәки хьлазийа дьнйа Мире-щьна незик ә (Мәтта 24:3-14). Гьлийед Пәтрусе шанди мә һелан дькьн, ԝәки әм рʹьнд дина хԝә бьдьн сәр ван пʹехәмбәртийед кӧ бәр чʹәʹве мә тенә сери, ԝәки баԝәрийа мә дьһа ԛәԝи бә (2 Пәтрус 1:20, 21). Әԝ мә һелан дькә пʹехәмбәртийед Кʹьтеба Пироз леколин бькьн. Әԝ йәк дьле мә ԛәԝи дькә, кӧ әм «һивийа Рʹожа Хԝәде бьн» (2 Пәтрус 3:11-13). Гәло чьрʹа? Чьмки әм нә кӧ дьхԝазьн бьзаньбьн кӧ Һармәгәдон ԝе хут кʹижан ‹рʹоже у сьһʹәте› бе, ле әм дьхԝазьн «жийина һʹәлал у хԝәденасийеда бьмәшьн» (Мәтта 24:36; Луԛа 12:40). Әм дьхԝазьн тьштед рʹаст бькьн у Йаһоԝарʹа хьзмәт кьн, чьмки әм гәләк ԝи һʹьз дькьн. Сәва кӧ әм ӧса бьфькьрьн у ӧса бькьн, әм гәрәке мьԛати хԝә бьн у һаш жь готьн у кьред хԝә һәбьн. w23.02 16 ¶4, 6

Сәва кӧ ‹пәзед дьн› Щьнәтеда бьжин, лазьм ә кӧ әԝана ида ньһада һьнә тьшта бькьн. Әԝана гәрәке шекьрдарийа хԝә Исарʹа нишан кьн. Мәсәлә, гава әԝана пьштгьрийа бьред Иса Мәсиһ йед кʹьфшкьри дькьн, әԝана нишан дькьн, кӧ ԝи һʹьз дькьн. Иса готьбу кӧ әԝе диԝана ‹пәзед дьн› сәр һʹиме ве йәке бькә (Мәтта 25:31-40). Ләма жи, гәрәке әм шьхӧле бәлакьрьна мьзгинийеда бь дьл у щан пьштгьрийа бьред Мәсиһ бькьн (Мәтта 28:18-20). Гәло әм чаԝа дькарьн хԝә бона жийина Щьнәтеда һазьр бькьн? Мәсәлә, әм дькарьн хәйсәт-һʹӧнӧред баш нав хԝәда пешда биньн, ԝәки Йаһоԝа жь мә рʹази бә. Әм дькарьн ньһада хирәт бькьн, ԝәки бь готьн у кьрьнед хԝә һʹәлал бьн у мәрьвнә тʹәрбәт бьн. Ӧса жи, әм дькарьн Йаһоԝарʹа, һәвалзәԝаще хԝәрʹа у хушк-бьрарʹа амьн бьн. Һәрге әм ве дьнйа хьрабда гӧһ бьдьн Йаһоԝа, ԝе мәрʹа дьһа һеса бе, дьнйа тʹәзәда жи гӧһ бьдьн ԝи. w22.12 11-12 ¶14-16

Әм бәхтәԝар ьн кӧ Иса Пʹадше мә йә, чьмки әԝ Сәрԝере һәри баш ә. Йаһоԝа хԝәха Кӧрʹе хԝә һин кьрийә у әԝ кьрийә Пʹадша (Ишайа 50:4, 5). Ӧса жи, Иса жь һʹьзкьрьна мәзьн, әʹмьре хԝә бона мә бәрва да (Йуһʹәнна 13:1). Иса Пʹадше мә йә, ләма жи әԝ һежайи һʹьзкьрьна мә йә. Кәсед кӧ бь рʹасти ԝи һʹьз дькьн достед ԝи нә у гӧһ дьдьн тʹәмийед ԝи (Йуһʹәнна 14:15; 15:14, 15). Бона мә ԛәдьрәки гәләк мәзьн ә, кӧ әм достед Кӧрʹе Йаһоԝа нә! Тӧ зани кӧ Иса йәки мьлук ә у бь тʹәмами чʹәʹв дьдә Баве хԝә. Тӧ пеһʹәсийайи ԝәки әԝи хԝарьн дьда кәсед бьрʹчи, һеви дьда кәсед дьлшкәсти, у мәрьвед нәхԝәш ԛәнщ дькьрьн (Мәтта 14:14-21). Тӧ ида зани кӧ әԝ иро чаԝа рʹебәрийа щьвате дькә (Мәтта 23:10). У тӧ баԝәр дьки кӧ зутьрәке, әԝе ча Пʹадше Пʹадшатийа Хԝәде гәләк тьштед баш бона мә бькә. Гәло тӧ чаԝа дькари нишан ки, ԝәки тӧ Иса Мәсиһ һʹьз дьки? Гава тӧ чʹәʹв бьди ԝи. Мина Иса әʹмьре хԝә тʹәсмили Йаһоԝа кә у паше ԝәрә ньхӧмандьне. w23.03 4 ¶8, 10

Йаһоԝа нә тʹәне һʹәму тьштед сәр әʹзмана, ле һʹәму тьштед сәр әʹрде у бьне бәре жи әʹфьрандьнә. Әм дькарьн жь ван кʹаред дәсте Хԝәде гәләк тьшта һин бьн (Зәбур 104:24, 25). У бьфькьрә кӧ Хԝәде ча әм әʹфьрандьнә. Әԝи әм ӧса әʹфьрандьнә кӧ әм дькарьн жь бәдәԝбуна тʹәбийәте шабуне бьстиньн. Ӧса жи Йаһоԝа Хԝәде пенщ тьштед фәрз данә мә, әм дькарьн бьвиньн, бьбьһен, бине һьлдьн, тәʹма тедәрхьн у тьшта тʹәхмин кьн. Бь сайа ван тьшта, әм дькарьн жь әʹфринед Хԝәде шабуне бьстиньн. Кʹьтеба Пироз мәрʹа дәрһәԛа мәʹникә дьн жи дьбежә, кӧ чьрʹа гәрәке әм дина хԝә бьдьнә әʹфрина. Бь сайа әʹфрина әм дькарьн дьһа баш дәрһәԛа һʹӧнӧред Йаһоԝа пебьһʹәсьн (Рʹомайи 1:20). Мәсәлә, дина хԝә бьдә әʹфринед Хԝәде у бьвинә кӧ әԝана чьԛас бәдәԝ ьн. Гәло әв тьшт биланийа Хԝәде нишан накьн? Ӧса жи бьфькьрә кӧ чьԛас щурʹә-щурʹә хԝарьн һәйә жь кʹижана әм дькарьн ләзәте бьстиньн. Әв йәк нишани мә дькә, ԝәки Йаһоԝа чьԛас мә һʹьз дькә. Чьԛас зедә әм дина хԝә дьдьнә тʹәбийәте, һаԛас дьһа баш әм дәрһәԛа һʹӧнӧред Йаһоԝа педьһʹәсьн у незики ԝи дьбьн. w23.03 16 ¶4-5

Дьнйа чьԛас дьчә дьһа хьраб дьбә, у баԝәрийа мә һьндава рʹастийе, ԝе бе щерʹьбандьне. Һьнә мәрьв дьбәкә ӧса бькьн, ԝәки һьндава рʹастийа Кʹьтеба Пироз шьк бькьнә дьле мә, йан жи ԝәки әм дӧдьли бьн, һәла хӧламе амьн бь рʹасти алийе Хԝәдеда һатийә кʹьфшкьрьне йан на. Ле һәрге әм баԝәр бьн, кӧ Хәбәра Йаһоԝа һәртʹьм рʹаст ә, һʹьщумед ӧса ԝе нькарьбьн баԝәрийа мә сьст кьн. Әме хԝәрʹа ԛьрар кьн, ԝәки «жь һәр-һәйе һʹәта хьлазийе» ԛанунед Йаһоԝа хԝәй кьн (Зәбур 119:112). Әме шәрм нәкьн ԝәки мәрьварʹа бәʹса рʹастийе бькьн у ԝанрʹа бежьн, ԝәки әԝана жи рʹийа рʹастийеда бьмәшьн (Зәбур 119:46). Сәрда жи, әме бькарьбьн ԛәԝи у бь шабуне нава пәйкʹәтьн у чәтьнайед дьнда сәбьр кьн (Колс. 1:11; Зәб. 119:143, 157). Рʹастийа жь Кʹьтеба Пироз дьле мә рʹьһʹәт дькә у рʹебәрийа рʹаст дьдә мә, ӧса жи һевийе дьдә мә, кӧ әме бьн сәрԝертийа Пʹадшатийа Хԝәдеда бь жийинәкә хԝәш бьжин. w23.01 7 ¶16-17

Шәва пешийа мьрьна хԝә, Иса бона шагьртед хԝә дьреж дӧа кьр. Әԝи жь Баве хԝә рʹәща кьр, ԝәки әԝ ԝана жь Мире-щьна хԝәй кә (Йуһʹәнна 17:15). Әв йәк нишан дькә кӧ Иса чьԛас ԝана һʹьз дькьр. Рʹаст ә әԝ һʹаләки гәләк гьранда бу, ле йәкә әԝи бона шандийед хԝә хәм дькьр. Мина Иса гәрәке әм жи нә тʹәне дәрһәԛа һʹәԝщед хԝә бьфькьрьн. Ԝе баш бә кӧ әм һәр гав бона хушк-бьра жи дӧа бькьн. Бь ве йәке, әм дькарьн нишани Йаһоԝа бькьн, кӧ әм гӧһ дьдьн тʹәмийа Иса, ԝәки һәвдӧ һʹьз бькьн. Дӧайед бона хушк-бьра бадиһәԝа ниньн. Хәбәра Хԝәде дьбежә кӧ «дӧайе йе рʹаст гәләки ԛәԝат ә у һʹӧкӧм дькә» (Аԛуб 5:16). Сәр тʹәмамийа дьнйайе хушк-бьред мә рʹасти гәләк тәнгасийа тен. Ләма жи, әԝана һʹәԝще дӧайед мә нә. w22.07 23-24 ¶13-15