Тирмәһ

Әԝ йәк кӧ әм дькарьн хәбәр дьн пʹешкʹешәкә жь Хԝәде йә. Ле пʹешкʹеша хәбәрдане бь щурʹәки хьраб һатә хәбьтандьне. Мире-щьна Һеԝайе хапанд, у әв дәрәԝ бу сәбәба гӧнә у ԛьсурдарийе (Дәстпебун 3:1-4). Паше, Адәм сәва шашийед хԝә, һьм жьна хԝә һьм жи Йаһоԝа нәһәԛ кьр. Бь ви щурʹәйи, әԝи зьмане хԝә бь щурʹәки хьраб да хәбате (Дәстпебун 3:12). Паши кӧ Ԛайин бьре хԝә Һабил кӧшт, әԝи Йаһоԝарʹа дәрәԝи гот (Дәстпебун 4:9). Иро мәрьв гәләк гьлийед хьраб дьдьнә хәбате. Һьм мәкʹтәбада һьм жи щийед хәбате, гьлийед хьраб тенә бьһистьне. Һәгәр әм һаш жь хԝә тʹӧнә бьн, әм дькарьн ӧса һини зьмане хьраб бьн, кӧ готьнед хьраб дькарьн бе һʹәмде мә жь дәве мә дәркʹәвьн. Әм Шәʹдед Йаһоԝа нә, ләма жи әм дьхԝазьн дьле Йаһоԝа ша кьн. Бона ве йәке, бәс нинә кӧ әм тʹәне чʹерʹа нәкьн. Гәрәке әм бь хәбәрдана хԝә пәсьне Хԝәде бьдьн. w22.04 4 ¶1-3

Гәло Иса чаԝа сәр тьштед материали дьньһерʹи? Әԝи жь хԝарьн у вәхԝарьне ләзәт дьстанд (Луԛа 19:2, 6, 7). Щарәке, әԝи шәравәкә хԝәш чекьр. У әв йәк кʹәрәмәта ԝийә пешьн бу (Йуһʹәнна 2:10, 11). Рʹожа мьрьна Иса кʹьнщәкә бьһа ль ԝи бу (Йуһʹәнна 19:23, 24). Ле Иса тьштед материали ча тьштед һәри фәрз һʹәсаб нәдькьр. Иса гот кӧ һәгәр әм бәри һәр тьшти Пʹадшатийа Хԝәде бьгәрʹьн, Йаһоԝа ԝе бона һʹәԝщед мәйә материали хәм бькә (Мәтта 6:31-33). Гәләк мәрьв жь ширәтед Хԝәдейә бь билани йед бона хәбьтандьна пʹәра, кʹар стандьнә. Ԝәрә әм дина хԝә бьдьн мәсәла бьраки азәп бь наве Дениел. Әԝ дьбежә: «Чахе әз щаһьл бум, мьн ԛьрар кьр ԝәки әзе жийина хԝәда һәри зедә дина хԝә бьдьм хьзмәтийа Йаһоԝарʹа». Әԝ бь жийинәкә һеса дьжи, ләма жи әԝ дькарә ԝәхт у фәрәсәтед хԝә бона шьхӧлед тʹәшкиләте бьдә хәбате. Әԝ дьбежә: «Пʹәрә тʹӧ щар нькарә дәԝса ԝан кʹәрәма бьгьрә, йед кӧ мьн жь Йаһоԝа стандийә». w22.05 21-22 ¶6-7

Бь ве йәке кӧ әм бәрдәԝам дькьн Кʹьтеба Пироз у әʹдәбйәтед сәр һʹиме Кʹьтеба Пироз лекʹолин дькьн, әм нишан дькьн кӧ әм рʹастийе һʹьз дькьн. Фьрԛи тʹӧнә кӧ чәнд сал ә әм Шәʹдед Йаһоԝа нә, гәрәке әм тʹәрка һинбуне нәдьн. Бона лекʹолинкьрьне ԝәʹдә у ԛәԝат лазьм ә, ле әԝ йәк һежайи ве йәке йә. Һьнә мәрьв хԝәндьн у лекʹолине һаԛас һʹьз накьн. Ле Йаһоԝа мәрʹа дьбежә кӧ тʹьме рʹастийе леколин кьн, ԝәки бькарьбьн дьһа баш рʹастийе фәʹм кьн (Мәтʹәлок 2:4-6). Гава әм ве йәке дькьн, щәфе мә бадиһәԝа начә, чьмки әв йәк тʹьме кʹаре дьдә мә. Бьраки бь наве Кори дьбежә кӧ гава әԝ Кʹьтеба Пироз дьхунә, әԝ дина хԝә дьдә тʹәмамийа рʹезе: «Әз һʹәму спартьна дьхуньм, һәр әʹламәтийа зедә дьньһерʹьм у дьһа зедә леколине дькьм. . . . Бь ви щурʹәйи, әз жь хԝәндьне кʹарәкә мәзьн дьстиньм!» Фьрԛи тʹӧнә әм чь щурʹә лекʹолине дькьн, ԝе баш бә ԝәки әм ве йәке бь дьл у щан бькьн. Ӧса әме нишан кьн, кӧ әм рʹастийе гәләк ԛимәт дькьн (Зәбур 1:1-3). w22.08 17 ¶13; 18 ¶15-16

Гава Иса һатә сәр әʹрде әԝи бь сайа әʹфрина али шагьртед хԝә дькьр, ԝәки әԝана Баве ԝи нас бькьн. Мәсәләке шеԝьр кьн. Йаһоԝа һʹьзкьрьна хԝә һәр кәсирʹа дьдә кʹьфше. Ԝәʹде Хьзмәтийа сәр Чʹийе, Иса дина гӧһдаред хԝә кʹьшандә сәр шәԝԛа тәʹве у баране, кʹижан кӧ бона гәләк мәрьва тьштед әʹщебмайи ниньн. Жийин бе шәԝԛа тәʹве у бе баране набә. Йаһоԝа дькарьбу әв тьшт нәдана мәрьвед кӧ ԝирʹа хьзмәт накьн, ле әԝ бь һʹьзкьрьне шәԝԛа тәʹве у баране дьдә һәр кәси (Мәтта 5:43-45). Бь ве мәсәле Иса нишан кьр, ԝәки Йаһоԝа дьхԝазә кӧ әм һәр кәси һʹьз бькьн. Мәсәлә, чахе рʹо дьчә ава йан жи баранәкә хԝәш дьбарә, бинә бира хԝә кӧ Йаһоԝа һәр кәси һʹьз дькә. Әв йәк мә һелан дькә, ԝәки әм жи һʹәму мәрьварʹа һʹьзкьрьне бьдьнә кʹьфше у һәр кәсирʹа мьзгинийе бәла кьн. w23.03 17 ¶9-10

Йуһʹәннайе шанди тьштәки әʹщеб дит, жьнәк ль сәр щәʹнәԝьрәки соре гәвәз сийар бьбу. Әԝ ԛавәкә мәзьн ә у әԝ те навкьрьне «Бабилона Мәзьн», йа кӧ тʹәви «пʹадшед дьнйайе» бенамусийе дькә (Әʹйанти 17:1-5). «Бабилона Мәзьн» чь йә? Әшкәрә йә, кӧ әв жьн тʹәшкиләтәкә политики нинә, чьмки әԝ хԝәха тʹәви сәрԝеред политики йед ве дьнйайе, бенамусийе дькә (Әʹйанти 18:9). Сәрда жи, әв ԛав ԝана сийар буйә, демәк әԝ ԝана бьн контрола хԝәда дьгьрә. Ӧса жи әʹйан ә кӧ әԝ ԛав система комерсийайә тьма нинә, чьмки кʹьтеба Әʹйанти ве системе нав дькә ча «базьрганед дьнйайе» (Әʹйанти 18:11, 15, 16). Бабилона бәре щийе сәрәкә бу, жь кʹидәре кӧ һʹәбандьна ԛәлп пешда һат. Ләма әшкәрә йә, ԝәки Бабилона Мәзьн һʹәму щурʹед һʹәбандьна ԛәлп те һʹәсабе. Әԝ бь рʹасти жи империйа һʹәмдьнйайе йа религийа ԛәлп ә (Әʹйанти 17:5, 18). w22.05 11 ¶14-16

Һʹӧкӧме дьнйа Мире-щьна гәләк ԛәԝи йә. Ләма жи дайик щарна бәрхԝә дькʹәвьн, гәло зарʹед ԝан ԝе рʹийа Йаһоԝа бьжберьн йан на. Сәрда жи, гәләк дайик зарʹед хԝә тʹәне мәзьн дькьн, йан жи малхе ԝан Шәʹде Йаһоԝа нинә. Һьлбәт, һәгәр тʹәне де йан бав Мәсиһи йә, әв йәк һеса нинә. Ле һәгәр һьм де һьм жи бав Шәʹдед Йаһоԝа нә, щарна ԝанрʹа жи һеса нинә кӧ рʹастийе бьгьһиньн дьле зарʹед хԝә, ԝәки әԝана Йаһоԝа һʹьз бькьн у бьбьнә хьзмәткʹаред ԝи. Ле бь зедәйи бәрхԝә нәкʹәвьн, Йаһоԝа ԝе али ԝә бькә. Ӧса жи, һун дькарьн жь де у бавед дьн бьпьрсьн һәла әԝана ча һащәтед бона һинкьрьне ԝәʹде Ԛӧльхкьрьна тʹәви Малбәте дьдьнә хәбате (Мәтʹәлок 11:14). Хенщи ве йәке, Йаһоԝа дькарә али ԝә бькә кӧ һун фькьред зарʹа рʹьнд фәʹм кьн у рʹастийе бьгьһиньн дьле ԝан (Мәтʹәлок 20:5). w22.04 17 ¶4, 7; 18 ¶9

Сәва кӧ һе зедә Йаһоԝа һʹьз бькьн, гәрәке әм Кӧрʹе ԝи, йе кӧ һʹәму тьштида чʹәʹв дьдә Баве хԝә, дьһа рʹьнд нас бькьн (Ибрани 1:3). Бона ве йәке, йа һәри баш әв ә, кӧ әм чар кʹьтебед Мьзгинийейә пешьн кʹур леколин бькьн. Һәрге тә һе хԝәрʹа нәкьрийә хәйсәт кӧ һәр рʹож Кʹьтеба Пироз бьхуни, ирода дәстпекә. Ԝәʹде хԝәндьна ван кʹьтеба, рʹьнд дина хԝә бьдә һʹӧнӧред Иса Мәсиһ. Әԝ йәки дьлгәрм бу, у әԝи зарʹа гәләки һʹьз дькьрьн у ԝана һʹәмез дькьрьн (Маркос 10:13-16). Шандийед ԝи дькарьбун һеса ԝирʹа бәʹса һәст у фькьред хԝә бькьн (Мәтта 16:22). Мәʹнийа ве йәке әв бу, кӧ Иса чʹәʹв дьда Баве хԝәйи әʹзмана. Йаһоԝа жи гәләк дьлгәрм ә. Әм дькарьн ԝирʹа аза дӧа бькьн у дьле хԝә ԝирʹа вәкьн, чьмки әм заньн кӧ әԝ мә инкʹар накә, ле мә һʹьз дькә у бона мә хәм дькә (1 Пәтрус 5:7). w22.08 3 ¶4-5

Йаһоԝа әм әʹфьрандьнә, ләма жи әԝ дәрһәԛа мә һәр тьшти занә. Бьдә һʹәсабе хԝә, ԝәки Әԝ дәрһәԛа һәр мәрьве сәр әʹрде һәр тьшти һур бь һур занә! (Зәбур 139:15-17) Ләма жи Йаһоԝа һʹәму кемасийед кӧ мә жь де у баве хԝә стандийә, дьвинә. Йаһоԝа һәла һе һәр тьште кӧ сәр хәйсәте мә һʹӧкӧм кьрийә жи, занә. Гәло әԝ йәк кӧ Йаһоԝа дәрһәԛа мә һаш һәр тьшти һәйә, ԝи бәрбь чь һелан дькә? Әв йәк ԝи һелан дькә, ԝәки һьндава мәда рʹәʹм бә (Зәбур 78:39; 103:13, 14). Йаһоԝа избат кьрийә ԝәки әԝ һазьр ә бьбахшинә мә. Әԝ рʹьнд занә кӧ сәва гӧне Адәм, әм гьшк кʹәтьнә бьн ньфьрʹа гӧнә у мьрьне (Рʹомайи 5:12). Ԛәԝата мә нагьһиже, ԝәки әм хԝә йан жи кәсәки дьн жь ве ньфьрʹе хьлаз кьн (Зәбур 49:7-9). Ле Хԝәдайе мәйи дьлшәԝат тьштәк кьрийә, ԝәки әм аза бьн. Чаԝа кӧ Йуһʹәнна 3:16 нишан дькә, Йаһоԝа Кӧрʹе хԝәйи тайе тʹәне шанд, ԝәки әԝ бона мә әʹмьре хԝә бьдә (Мәтта 20:28; Рʹомайи 5:19). w22.06 3 ¶5-6

Йаһоԝа нишани хьзмәткʹаре хԝәйи амьн Ибо кьрьбу, ԝәки әԝед кӧ бахшандьне дьхԝазьн ԝе бенә бахшандьне. Готьнед Әлифаз, Билдад у Зофар дьле Ибо гәләк ешандьбун. Диса жи, Йаһоԝа ԝирʹа гот ԝәки әԝ бона ԝан дӧа бькә. Паши кӧ Ибо әв йәк кьр, Йаһоԝа әԝ кʹәрәм кьр (Ибо 42:8-10). Гава әм кʹине дьле хԝәда хԝәй дькьн, әм зьраре дьдьнә хԝә. Кʹин барәки гьран ә, у Йаһоԝа дьхԝазә ԝәки әм ви бари сәр хԝә бавежьн (Әфәси 4:31, 32). Әԝ мәрʹа ӧса дьбежә: «Һерс нәкʹәвә . . . бинтәнг нәбә» (Зәбур 37:8). Әв йәк бь рʹасти жи ширәтәкә бь билани йә. Кʹин дькарә сьһʹәт-ԛәԝата мә ча физикида ӧса жи психикида хьраб кә (Мәтʹәлок 14:30). Чаԝа кӧ кәсәк жәʹре вәдьхԝә зьраре дьдә хԝә, нә кӧ кәсед дьн, бь ви щурʹәйи кәсе кӧ кʹине дажо, зьраре тʹәне дьдә хԝә. Ле кәсе кӧ дьбахшинә мәрьва, хԝәха хԝәрʹа кʹаре тинә. Һәгәр әм бьбахшиньнә мәрьва, әʹдьлайи ԝе бькʹәвә дьле мә у әме бькарьбьн бь дьләки рʹьһʹәт Йаһоԝарʹа хьзмәт бькьн. w22.06 10 ¶9-10

Мина кʹӧмзьрьһʹе, һевийа мә һʹьше мә дьпарезә у али мә дькә, ԝәки әм тʹәне ль сәр хԝәстьнед хԝә нәфькьрьн, чьмки әм заньн кӧ һәрге әм ӧса бьжин чаԝа дьле мә дьхԝазә, ԝи чахи достийа мә тʹәви Йаһоԝа дькарә хьраб бә (1 Корьнтʹи 15:33, 34). Һеви дькарә мә жь ньһерʹандьнед шаш бьпарезә. Һьнә кәс дьфькьрьн кӧ әԝана чь бькьн жи, Йаһоԝа жь хирәта ԝан рʹази нинә. Бинә бира хԝә кӧ Әлифаз, достәки Ибойи дәрәԝин, чь гот: «Ма мьров чи йә кӧ паԛьж бьбә?» Ӧса жи, Әлифаз дәрһәԛа Хԝәде ӧса гот: «А вай, Хԝәде жь пирозед хԝәрʹа әԝлә нинә, һʹәта әʹзман жи дь чʹәʹве ԝида нә паԛьж ьн» (Ибо 15:14, 15). Дәрәԝәкә ча мәзьн ә! Бир нәкә кӧ ньһерʹандьна ӧса жь Мире-щьна йә. Әԝ занә кӧ һәрге фькьред ӧса дьле тәда пешда бен, тӧйе һевийа хԝә ӧнда ки. Ләма жи, дәрәԝед ӧса инкʹар кә. Баԝәр бә, Йаһоԝа дьхԝазә ԝәки тӧ һʹәта-һʹәтайе бьжи у әԝе али тә бькә, ԝәки тӧ бьгьһижи ве нете (1 Тимотʹейо 2:3, 4). w22.10 25-26 ¶8-10

Мире-щьна дьхԝәст Ибо бьдә баԝәркьрьне ԝәки сәбәба дәрдед ԝи әв ә, кӧ Йаһоԝа ида жь ԝи рʹази нинә. Мәсәлә, Мире-щьна баки ԛайим да хәбате, ԝәки ханийе кӧ зарʹед Ибо теда тʹәвайи тʹоп бьбун, һьлшинә (Ибо 1:18, 19). Ӧса жи, әԝи кәрийед Ибо у шьванед ԝи бь агьре жь әʹзмен кӧштьн (Ибо 1:16). Әв йәк кӧ ба у агьр жь әʹзмен һатьн, Ибо дьфькьри кӧ әԝ жь Йаһоԝа бу. Әԝ дьфькьри кӧ Йаһоԝа сәр ԝи һерс кʹәтийә, ле диса жи әԝи ньфьрʹ Баве хԝәйи әʹзмана нәкьр. Бь сала, Ибо гәләк тьштед баш жь Йаһоԝа стандьбун, у әԝ дьфькьри кӧ һәгәр әԝ һазьр бу ван тьшта ԛәбул кә, гәрәке әԝ һазьр бә кӧ тьштед хьраб жи ԛәбул бькә. Ләма жи, әԝи гот: «Бьра наве Хӧдан пироз бә!» (Ибо 1:20, 21). w22.06 21 ¶7

Иса диса шагьртед хԝәрʹа гот кӧ әԝана ԝе бәр чʹәʹве ве дьнйайе рʹәш бьн, әв йәк Йуһʹәнна 17:14-да ньвисар ә. Илаһи 100 салед пашԝәхтийе, мә пекһатьна ве пʹехәмбәртийе дитийә. Гәло чаԝа? Ԝәхтәкә кьн паши кӧ Иса сала 1914-да бу Пʹадше Пʹадшатийа Хԝәде, Мире-щьна жь әʹзмана һатә авитьне. Әԝ ида нькарә вәгәрʹә әʹзмана, у дәмәкә незикда, ԝе ԛьрʹа ԝи бе (Әʹйанти 12:9, 12). Ләма әԝ гәләк һерс ә, хԝәрʹа щи навинә у һерса хԝә сәр хьзмәткʹаред Хԝәдеда дьрʹьжинә (Әʹйанти 12:13, 17). Әԝ ә мәʹни кӧ әв дьнйа, Шәʹдед Йаһоԝа һе зедә нәфрʹәт дькә. Диса жи, нә лазьм ә ԝәки әм Мире-щьна у пьштгьред ԝи бьтьрсьн. Мина Паԝлосе шанди, әм дькарьн бь баԝәри ӧса бежьн: «Һәгәр Хԝәде пьшта мә йә, кʹи дькарә мьԛабьли мә бә?» (Рʹомайи 8:31). Әм дькарьн бь тʹәмами итʹбарийа хԝә Йаһоԝа биньн. w22.07 18 ¶14-15

Иса бәрхԝә нәдькʹәт, кӧ незики хьлазийа ве дьнйайе хәбаткʹар ԝе һьндьк бьн. Әԝи заньбу кӧ әв готьн ԝе бенә сери: «Рʹожа һәри шер, щьмәʹта Тәйе бь рʹәзәдьли бе» (Зәбур 110:3). Гава тӧ мьзгинийе бәла дьки, тӧ пьштгьрийа Иса у хӧламе амьн дьки у ве йәкеда кʹар дьки, ԝәки әԝ пʹехәмбәрти бе сери. Бәле, шьхӧл пешда дьчә, ле чәтьнайи жи һәнә. Йәк жь чәтьнайа әв ә кӧ гәләк кәс шьхӧле мә нәфрʹәт дькьн. Рʹабәр, сәрԝеред религи у политик дәрһәԛа шьхӧле мә дәрәԝа бәла дькьн. Һәрге мәрьвед мә, һәвал йан һәвалхәбатчийед мә ван дәрәԝа баԝәр бькьн, дьбәкә әԝана зоре мә бькьн, кӧ әм хьзмәта Йаһоԝарʹа у бәлакьрьна мьзгине бьһельн. Һьнә ԝәлатада, хушк-бьред мә дьдьнә тьрсандьне, дьгьрьн у дькьнә кәле. w22.07 8 ¶1; 9 ¶5-6

Йаһоԝа дьхԝазә кӧ әм бәрдәԝам кьн Кʹьтеба Пироз леколин бькьн у кʹур сәр бьфькьрьн. Әм чьԛас тьштед кӧ һин дьбьн жийина хԝәда тиньн сери, һаԛас баԝәрийа мә дьһа ԛәԝи дьбә, у әм дьһа незики Баве хԝәйи әʹзмана дьбьн. Әв йәк али мә дькә ԝәки әм нава тәнгасийада сәбьр кьн. Ӧса жи, Йаһоԝа рʹӧһʹе пироз дьдә кәсед кӧ хԝә дьсперьн Хәбәра ԝи. Тәнгасийа мә чь бә жи, рʹӧһʹе пироз «зорайийа ԛәԝате жь Хԝәде» дьдә мә, ԝәки әм бькарьбьн бәр һәр тьшти сәбьр бькьн (2 Корьнтʹи 4:7-10). Пе аликʹарийа Йаһоԝа, «хӧламе амьн у сәрԝахт» хԝарьна рʹӧһʹани тʹер у тʹьжә дьдә мә. Бь сайа ве йәке, Йаһоԝа али мә дькә, ԝәки әм баԝәрийа хԝә ава кьн у рʹӧһʹанида һʹьшйар бьминьн (Мәтта 24:45). Йаһоԝа дьхԝазә кӧ хьзмәткʹаред ԝи һәвдӧ һʹьз бькьн у ԝәʹде тәнгасийа, дьлбинийе бьдьнә һәв (2 Корьнтʹи 1:3, 4; 1 Тʹесалоники 4:9). Хушк-бьред мә һазьр ьн али мә бькьн, гава әм рʹасти чәтьнайа тен. w22.08 12 ¶12-14

Чахе әм дәрһәԛа һʹӧнӧред хушк-бьрайә баш хәбәр дьдьн,әм һʹьзкьрьн у достийа нав хушк-бьрада ава дькьн. Щар-щара хушк-бьред щерʹьбанди жи дькарьн сәр һьнә пьрса һәвдӧрʹа ԛайил нәбьн йан жи һәврʹа бькʹәвьнә дәʹԝе. Паԝлосе шанди у досте ԝи Барнабас жи щарәке һәврʹа кʹәтьнә дәʹԝе, кӧ Марԛос тʹәви хԝә бьвьн йан на. Кʹьтеба Пироз дьбежә: «Йа ԝан ль һәв нәгьрт, әв бу мәʹни жь һәв ԛәтийан» (Кʹаред Шандийа 15:37-39). Ле Паԝлос, Барнабас у Марԛос паше диса ль һәв һатьн. Ԝәхт шунда, Паԝлос пʹайе Барнабас у Марԛос да (1 Корьнтʹи 9:6; Колоси 4:10). Һәрге ортʹа мә у хушк-бьрада проблем чебә, гәрәке әм жи тʹәви ԝан ль һәв бен у дина хԝә бьдьн һʹӧнӧред ԝанә баш. Бь ви щурʹәйи, әм дькарьн әʹдьлайе у йәктийе хԝәй кьн. w22.08 23 ¶10-11

Чахе әм сәр хԝә дьхәбьтьн кӧ ль гора принсипед Йаһоԝа бьжин, әм гәрәке фәсал бьн, ԝәки кәсед дьн сущдар нәкьн у хԝә жь ԝан четьр һʹәсаб нәкьн, чьмки «Һʹакьме тʹәмамийа дьнйайе» Йаһоԝа йә (Дәстпебун 18:25). Йаһоԝа әм кʹьфш нәкьрьнә, ԝәки кәсед дьн сущдар кьн. Дина хԝә бьдьнә сәрһатийа Усьв. Әԝи мәрьва сущдар нәдькьр, һәла һе ԝана жи, йед кӧ хьраби ԝи дькьрьн. Бьред ԝи нәмамийа ԝи кьрьн, у әԝ ча хӧлам фьротьнә дилтийе у паше баве хԝәрʹа готьн, ԝәки әԝ мьрийә. Гәләк сал шунда, Усьв диса рʹасти бьред хԝә һат. Ви чахи әԝ ида сәрԝерәки ԛәԝи бу, у дькарьбу диԝана ԝан бькьра у һʹәйфе һьлда. Бьред ԝи чьԛас жи сәва кьред хԝә пʹошман бьбун, диса жи әԝана дьтьрсийан кӧ Усьв ԝе һʹәйфе һьлдә. Ле Усьв ԝанрʹа гот: «Нәтьрсьн, чьма әз дәԝса Хԝәде дьгьрьм?» (Дәстпебун 37:18-20, 27, 28, 31-35; 50:15-21). Бәле, Усьв бь мьлукти әв йәк да дәсте Йаһоԝа, чьмки әԝи заньбу ԝәки тʹәне изьна Йаһоԝа һәйә диԝана мәрьва бькә. w22.08 30 ¶18-19

Гава кәсәк Йаһоԝа Хԝәдерʹа дӧа дькә у жь ԝи аликʹарийе дьхԝазә, әԝ гәләк щар бь сайа хьзмәткʹаред хԝә дьлрʹьһʹәтийе дьдә ԝи (Колоси 4:11). Фьрԛи тʹӧнә рʹуспи, бәрдәстийе щьвате, пешәнг, мьзгинван, щаһьл йан әʹмьрда мәзьн бә, Йаһоԝа дькарә бь сайа ԝи аликʹарийе бьдә кәсед дьн. Ча баш ә кӧ әм дькарьн бь ви щурʹәйи һьм Йаһоԝарʹа һьм жи хушк-бьред хԝәрʹа хьзмәтийе бькьн! Мәсәлә, гава нәхԝәши бәла дьбьн, тʹәшԛәлед тʹәбийәте дьԛәԝьмьн йан пәйкʹәтьн дәстпедьбьн, әм дькарьн бенә һәԝара ԝан. Дьбәкә әм дьхԝазьн дьһа зедә али хушк-бьра бькьн, ле чьмки әм нәфәре хԝәйи нәхԝәш дьньһерʹьн, әв жи щарна мәрʹа зәʹмәт ә. Ле диса жи, әм дьхԝазьн али хушк-бьра бькьн. У гава чь жь дәсте мә те әм дькьн, кӧ али ԝан бькьн, әм дьле Йаһоԝа ша дькьн (Мәтʹәлок 19:17). w22.12 22 ¶1-2

Һʹьзкьрьн һʹиме итʹбарийе йә. Иса готьбу кӧ дӧ тʹәмийед һәри мәзьн әв ьн, ԝәки әм Йаһоԝа у мәрьва һʹьз бькьн (Мәтта 22:37-39). Әм Йаһоԝа гәләк һʹьз дькьн, ләма жи әм дьхԝазьн чʹәʹв бьдьнә ԝи у бь итʹбар бьн. Әм хушк-бьра жи һʹьз дькьн, ләма жи әм нахԝазьн информасийа шәхси дәрһәԛа ԝан кәсед дьнрʹа гьли кьн. Әм нахԝазьн бь готьнед хԝә зьраре бьдьнә ԝан, кӧ әԝана шәрми бьн йан дьлтәнг бьн. Мьлукти ӧса жи ԝе али мә бькә ԝәки әм мәрьвед бь итʹбар бьн. Мәсиһийе мьлук ԝе хԝә бәрʹа нәкә кӧ пешийа гьшка информасийәке бәла кә, сәва пе ԝе йәке хԝә ԛӧрʹә кә (Филипи 2:3). Әԝ нахԝазә хԝә бәр чʹәʹве мәрьва бьльнд кә, әԝ ԝанарʹа надә кʹьфше кӧ әԝ информасийәкә конфиденсйал занә, йа кӧ әԝ нькарә әшкәрә кә. Ӧса жи, кәсе мьлук ԝе пе ньһерʹандьна хԝә ван тьшта шьровәнәкә у бәла нәкә, чь кӧ Кʹьтеба Пирозда йан әʹдәбйәтед мәда найе готьне. w22.09 12 ¶12-13

Мәләк Данийелрʹа готьбу, кӧ занәбуна рʹаст ԝе зедә бә у хьзмәткʹаред Хԝәде ԝе готьнед жь кʹьтеба ԝи дьһа баш фәʹм бькьн, ле «ԝе тʹӧ кәси жь йед хьраба йә, фәʹм нәкьн» ван готьна (Данийел 12:10). Гәрәке әм бь рʹабун-рʹуньштьна хԝә избат кьн, кӧ әм нава мәрьвед хьрабда ниньн (Малахи 3:16-18). Йаһоԝа иро ван мәрьва тʹоп дькә, кʹижана кӧ әԝ ча мале хԝәйә хас һʹәсаб дькә. Гәло әм нахԝазьн нава ԝанда бьн? Рʹожед мә бь рʹасти жи рʹожед мәхсус ьн. Дәмәкә незикда, һʹәму кәсед хьраб ԝе бенә кʹӧтакьрьне. Паше, әме пекһатьна ве йәке бьвиньн, чь кӧ Йаһоԝа Данийелрʹа соз дабу: «Те һʹьшйар бьби у хәлата хԝә бьстини» (Данийел 12:13, ИМ). Һәрге тӧ һʹьзрәта ԝе рʹоже йи кӧ Данийел у мәрьвед тәйи һʹьзкьри жь мьрьне рʹабьн, һәр тьшти бькә ԝәки тӧ амьн бьмини. Һьнге наве тә ԝе кʹьтеба жийинеда бьминә! w22.09 24 ¶17; 25 ¶19-20

Һәзәԛел жь ван готьна ԛәԝат дьстанд. Гәло чьрʹа? Бешьк, әԝи заньбу, кӧ гава Йаһоԝа Муса у Ишайа ча пʹехәмбәр кʹьфш кьрьбун, әԝи ԝанрʹа жи ӧса готьбу (Дәркʹәтьн 3:10; Ишайа 6:8). Ӧса жи, Һәзәԛел заньбу, ԝәки Йаһоԝа али ван дӧ пʹехәмбәра кьрьбу, кӧ әԝана нава тәнгасийада сәркʹәвьн. Бь сайа ве йәке кӧ Йаһоԝа дӧ щара Һәзәԛелрʹа гот «әз тә дьшиньм», әԝи дькарьбу хԝә бьсперә аликʹарийа Йаһоԝа. Хенщи ве йәке, кʹьтеба Һәзәԛелда гәләк щара ӧса те готьне: «Готьна Хӧдан жь мьнрʹа һат» (Һәзәԛел 3:16; 6:1). Һәзәԛел бешьк баԝәр бу кӧ Йаһоԝа әԝ шандьбу. Ӧса жи, Һәзәԛел кӧрʹе кʹаһин бу, у бешьк баве ԝи жерʹа гьли кьрьбу, ԝәки Йаһоԝа чаԝа пʹехәмбәред хԝәрʹа готьбу, кӧ әԝ кʹеләка ԝан ә. Мәсәлә, Йаһоԝа Исһаԛ, Аԛуб у Йерәмйарʹа ӧса готьбу: «Әз тʹәви тә мә» (Дәстпебун 26:24; 28:15; Йерәмйа 1:8). w22.11 2 ¶3

Рʹаст ә Адәм у Һәԝайе гӧнә кьрьн у бь ве йәке мьрьн анинә сәр зарʹед хԝә, ле йәкә Йаһоԝа ԛьрара хԝә нәгӧһастийә (Ишайа 55:11). Әԝ дьхԝазә кӧ мәрьвед амьн һәр-һәйи бьжин. Тьштед кӧ Йаһоԝа готийә у кьрийә, ԝәки ԛьрара хԝә пек бинә, ве йәке әшкәрә нишан дькьн. Йаһоԝа соз дайә кӧ әԝе мьрийа рʹакә у мәщале бьдә ԝан, ԝәки һʹәта-һʹәтайе бьжин, у хьзмәткʹаред Хԝәде йед бәре бь ве йәке баԝәр бун (Кʹаред Шандийа 24:15; Тито 1:1, 2). Мәсәлә, Ибо баԝәр бу, кӧ Йаһоԝа жь дьл дьхԝазә мьрийа рʹакә (Ибо 14:14, 15). Данийел пʹехәмбәр заньбу кӧ мәщала мьрийа һәйә, ԝәки бенә рʹакьрьн у һʹәта-һʹәтайе бьжин (Зәбур 37:29; Данийел 12:2, 13). Щьһуйед кӧ рʹожед Исада дьжитьн заньбун, ԝәки Йаһоԝа дькарә «жийина һʹәта-һʹәтайе» бьдә хьзмәткʹаред хԝәйә амьн (Луԛа 10:25; 18:18). Иса жи чәнд щара бәʹса ве йәке кьрьбу, у әԝ хԝәха жи пе ԛәԝата Баве хԝә жь мьрьне һат рʹакьрьн (Мәтта 19:29; 22:31, 32; Луԛа 18:30; Йуһʹәнна 11:25). w22.12 4-5 ¶8-9

Йаһоԝа дьхԝазә кӧ әм незики ԝи бьн (Аԛуб 4:8). Әԝ һазьр ә кӧ бона мә бьбә Хԝәде, Бав у Дост. Әԝ дӧайед мә дьбьһе, у гава әм дькʹәвьн тәнгасийа, әԝ али мә дькә. Ӧса жи, әԝ мә бь сайа тʹәшкиләта хԝә һин дькә у дьпарезә. Сәва кӧ әм незики Йаһоԝа бьн, гәрәке әм жерʹа дӧа бькьн, Хәбәра ԝи бьхуньн у сәр Хәбәра ԝи кʹур бьфькьрьн. Бь сайа ван тьшта, әме дьһа зедә ԝи һʹьз бькьн у ԛимәт кьн. Әме бьхԝазьн гӧһдарийа ԝи бькьн у пәсьне ԝи бьдьн (Әʹйанти 4:11). Чьԛас зедә әм Йаһоԝа нас бькьн, һаԛас әме дьһа зедә итʹбарийа хԝә ԝи у тʹәшкиләта ԝи биньн, йа кӧ әԝи бона кʹара мә саз кьрийә. Мире-щьна һәр тьшти дькә, кӧ әм итʹбарийа хԝә Йаһоԝа у тʹәшкиләта ԝи нәйньн. Сәва кӧ әм нәкʹәвьн ве тʹәльке у тʹәрка Хԝәде у тʹәшкиләта ԝи нәдьн, гәләк фәрз ә кӧ баԝәрийа мә ԛәԝи бә у әм бь дьл у щан итʹбарийа хԝә Йаһоԝа биньн (Зәбур 31:13, 14). w22.11 14 ¶1-3

Гәләк Мәсиһи азайа хԝә у һәла һе әʹмьре хԝә жи дькьнә бьн хофе, чьмки Йаһоԝа һʹьз дькьн у ԝи ча Сәрԝер ԛәбул дькьн. Мина се хортед Ибрани, йед кӧ сәва амьнийа хԝә Йаһоԝарʹа, жь агьр һатьн хьлазкьрьне, Мәсиһи жи һәр тьшти дькьн ԝәки Йаһоԝарʹа амьн бьминьн. Бь ван готьна, Даԝьд Пʹадша нишан кьр кӧ чьԛас фәрз ә ԝәки әм Йаһоԝарʹа амьн бьминьн у беԛьсуртийа хԝә хԝәй кьн: «Хӧдан сәр мьләтада дьньһерʹә. Хӧдано, Тӧ һәԛийе ль мьн бькә, ль гора ԝе рʹасти у бесущийа мьн» (Зәбур 7:8). Рʹезәкә дьнда жи, Даԝьд ӧса гот: «Һʹәлали у рʹасти бьра мьн хԝәй кьн, чьмки әз бь гӧман һивийа Тә мә» (Зәбур 25:21). Әм дьхԝазьн Йаһоԝарʹа амьн бьминьн! Ви чахи әме жи хԝә мина зәбурбеж тʹәхмин кьн, йе кӧ Йаһоԝарʹа гот: «Амьнед Тә бьра әшԛ у ша бьн» (Зәбур 132:9). w22.10 17 ¶18-19

Ибо жийина хԝәда тʹәви гәләк мәрьва хәбәр дьда, ле хәбәрдана ԝи тʹәви Йаһоԝа хәбәрданәкә лапә мәхсус бу. Йаһоԝа дина Ибо кʹьшандә сәр чәнд әʹфринед хԝә. Бь ве йәке, Ибо фәʹм кьр кӧ биланийа Хԝәде беԛьсур ә у әԝ дькарә хьзмәткʹаред хԝә бьбә хԝәйи. Мәсәлә, Хԝәде ани бира Ибо, кӧ һәрге Әԝ бона һʹәйԝана хәм дькә, Әԝе әʹсәйи бона ԝи жи хәм бькә (Ибо 38:39-41; 39:1, 5, 13-16). Ибо рʹьнд дина хԝә дьда әʹфрина, ләма жи әԝ дәрһәԛа һʹӧнӧред Йаһоԝа гәләк тьштед ԛимәт һин бу. Һәрге әм рʹьнд дина хԝә бьдьнә тьштед кӧ Хԝәде әʹфьрандьнә, әме жи дәрһәԛа Ԝи гәләк тьшта пебьһʹәсьн. Ле әв йәк щарна чәтьн ә. Мәсәлә, һәрге әм шәһәрда дьминьн әм нькарьн бь тʹәмами дина хԝә бьдьнә тʹәбийәте. Ле кәсед кӧ жь шәһәр дәр дьминьн, кʹидәре кӧ тʹәбийәт һәйә, дьԛәԝьмә ԝәʹде ԝан тʹӧнә йә, кӧ дина хԝә бьдьнә тʹәбийәте, ләма жи лазьм ә, ԝәки әм ԝәʹдә вәԛәтиньн кӧ рʹьнд дина хԝә бьдьнә тʹәбйәте. w23.03 15 ¶1-2

Иса готьбу, пешийа кӧ хьлази бе, «әʹрдһʹәжед мәзьн» у тʹәшԛәлед дьн жи ԝе бьԛәԝьмьн (Луԛа 21:11). Ӧса жи, әԝи бәʹса «зедәбуна нәһәԛийе» кьрьбу. Мәсәлә, әм иро дьвиньн кӧ зӧлм, зордари у тероризм дьԛәԝьмьн (Мәтта 24:12). Иса ԛә нәготьбу, кӧ әв бәла ԝе тʹәне бенә сәре кәсед кӧ Йаһоԝа Хԝәде инкʹар дькьн. Чаԝа әм заньн, гәләк хьзмәткʹаред Йаһоԝа жи рʹуйе ван тʹәшԛәлада зьрар стандьнә (Ишайа 57:1; 2 Корьнтʹи 11:25). Дьбәкә Йаһоԝа мә бь кʹәрәмәти жь һʹәму тʹәшԛәла хԝәй нәкә, ле әԝ ԝе бона һʹәԝщед мә хәм бькә, ԝәки әм бина хԝә фьрә кьн у дьлрʹьһʹәтийе ӧнда нәкьн. Һәрге әм ньһада хԝә һазьр кьн, ԝе мәрʹа дьһа һеса бә, ԝәки дьлрʹьһʹәт бьминьн. Гәло әв һазьрбун те һʹәсабе, кӧ баԝәрийа мә һьндава Йаһоԝа кем ә? Һәмьки на. Бь рʹасти гава әм хԝә һазьр дькьн, әм баԝәрийа хԝә нишан дькьн, кӧ Йаһоԝа бь рʹасти дькарә али мә бькә. Хәбәра Хԝәде ширәте дьдә мә, ԝәки әм хԝә бона тʹәшԛәлед тʹәбийәте һазьр кьн. w22.12 18 ¶9-10

Чахе Усьв кәледа бу, Йаһоԝа дӧ хәԝнед әʹщеб нишани Фьрәԝьн кьр. Фьрәԝьн гәләк дьхԝәст мәʹна ԝан хәԝна бьзаньбуйа. Гава Фьрәԝьн бьһист кӧ Усьв дькарә хәԝна шьровәкә, әԝи гази Усьв кьр. Бь аликʹарийа Йаһоԝа, Усьв хәԝнед Фьрәԝьн шьровәкьрьн у жерʹа гот кӧ гәрәке әԝ чь бькә. Фьрәԝьн әԝ ль сәр тʹәмамийа ԝәлате Мьсьре кьрә ԝәзире бәлакьрьна хԝарьне, чьмки фәʹм кьр кӧ Йаһоԝа тʹәви Усьв ә (Дәстпебун 41:38, 41-44). Паше, бьрʹчибунәкә гьран һьм Мьсьреда, һьм жи Кәнанеда дәстпебу, демәк ԝи ԝәлатида, кʹидәре кӧ малбәта Усьв дьжит. Һьнге Усьв дькарьбу малбәта хԝә жь хәлайе хьлаз кә. Бь ви щурʹәйи, Усьв чаԝа малбәта баве хԝә хԝәй кьр, ӧса жи хәза рʹькʹьнийата Мәсиһе создайи. Әшкәрә йә, әв Йаһоԝа Хԝәде бу, йе кӧ һәр тьштида дәсте Усьв ль һәв дьани! Ахьрийеда, Йаһоԝа хьрабийа бьред Усьв да хәбате ча мәщал, бь сайа чь жи әԝи ԛьрара хԝә ани сери. w23.01 17 ¶11-12

Кәсе кӧ мьԛати хԝә дьбә у һаш жь хԝә һәйә, дина хԝә дьдә тьштед кӧ дькарьн зьраре бьдьн достийа ԝи тʹәви Йаһоԝа, у әԝ алийе хԝәда һәр тьшти дькә, ԝәки хԝә жь ван хофа хԝәй кә. Бь ви щурʹәйи, әԝ һʹьзкьрьна Хԝәдеда дьминә (Мәтʹәлок 22:3; Щьһуда 20, 21). Паԝлосе шанди Мәсиһийарʹа готьбу, ԝәки әԝана мьԛати хԝә бьн. Мәсәлә, әԝи Әфәсийарʹа ӧса готьбу: «Аԝа бьньһерʹьн кӧ һун ньге хԝә фәсал бавежьн, нәбьнә мина бефәʹма, ле мина сәрԝахта» (Әфәси 5:15, 16). Мире-щьна тʹьме хирәт дькә, ԝәки достийа мә тʹәви Йаһоԝа хьраб кә. Ләма жи Кʹьтеба Пироз ве ширәте дьдә мә: «Бьзаньбьн чь йә ԛьрара Хӧдан». Һәрге әм ӧса бькьн, әме хԝә жь һʹәму һʹьщумед Мире-щьна бьпарезьн (Әфәси 5:17). Сәва кӧ әм сафикьрьнед баш бькьн, әм гәрәке фәʹм бькьн кӧ «чь йә ԛьрара» Йаһоԝа. Ләма жи гәләк фәрз ә, ԝәки әм һәр рʹож Хәбәра Хԝәде бьхуньн у сәр готьнед ԝе кʹур бьфькьрьн. Чьԛас әм фәʹм бькьн кӧ хԝәстьна Йаһоԝа чь йә, у чьԛас әм ль гора «нет-фькьра Мәсиһ» бьфькьрьн, әме һаԛас зедә мина ‹сәрԝахта бьмәшьн›. Һәрге әм ӧса бькьн, бона һәр тьшти мәрʹа ида ԝе ԛанун у ԛәйдә нә лазьм бьн (1 Корьнтʹи 2:14-16). w23.02 16-17 ¶7-9

Әм тʹьме жи мала хԝә тʹәмьз дькьн, ӧса нинә? Гава әм дәрбази маләкә тʹәзә дьбьн, һәмьки әм ԝи рʹьнд паԛьж дькьн. Ле һәрге әм мала хԝә һәртʹьм паԛьж нәкьн, әме ԝәхт шунда нава тʹозеда бьфәтьсьн. Ләма жи, лазьм ә кӧ әм һәртʹьм мала хԝә тʹәмьз кьн, ԝәки мала мә тʹәрʹ-тʹәмьз у щи-ԝар бә. Мина ве йәке, лазьм ә кӧ әм бәрдәԝам кьн сәр фькьр у хәйсәте хԝә бьхәбьтьн. Пешийа кӧ әм һатьнә ньхӧмандьне, мә һьлбәт гәләк хирәт дькьр кӧ жийина хԝә бьгӧһезьн у «хԝә жь һʹәму кʹьретийа ԛальб у рʹӧһʹе хԝә паԛьж кьн» (2 Корьнтʹи 7:1). Ле ньһа жи лазьм ә кӧ әм бәрдәԝам кьн «бь рʹӧһʹ у фькьред хԝәда нуйәжийин бьн» (Әфәси 4:23). Тʹоз у ԛьрежайа ве дьнйайе дькарә мә зу бьләԝьтинә. Ләма жи, сәва кӧ әм бәр чʹәʹве Йаһоԝа тʹәмьз бьминьн, гәрәке әм тʹьме фькьр, хәйсәт у хԝәстьнед хԝә бьщерʹьбиньн. w23.01 8 ¶1-2

Бинә бәр чʹәʹве хԝә кӧ тӧ гӧһ дьди хәбәрдана Иса Мәсиһ. Готьнед Ньвисаред Пироз тʹьме бира ԝида бун у әԝи гәләк щара әв йәк бь сәрбәсти дьда хәбате! Гава Иса һатә ньхӧмандьне у бь рʹӧһʹе пироз ча Мәсиһ һат бьжартьне, ча кʹьфш ә жийина ԝийә ль әʹзмана диса кʹәтә бира ԝи. Мәсәлә, готьнед ԝийи пешьн кӧ әԝи паши ньхӧмандьне гот у һьнә готьнед ԝийи пешийа мьрьна ԝи, рʹезед жь Ньвисаред Пироз бун (Ԛануна Дӧщари 8:3; Зәбур 31:5; Луԛа 4:4; 23:46). Иса ԝәʹде хьзмәтийе жи нава се сал у нивада гәләк щара бәр щьмәʹте жь Ньвисаред Пироз дьхԝәнд, рʹез дьԝәкʹьландьн у шьровәдькьрьн (Мәтта 5:17, 18, 21, 22, 27, 28; Луԛа 4:16-20). Гәләк сала пешийа кӧ Иса хьзмәтийа хԝә дәстпекьр, әԝи тʹьме Хәбәра Хԝәде дьхԝәнд у дьбьһист. Малда, әԝи бешьк дьбьһист кӧ Усьв у Мәрйәме чаԝа рʹастә-рʹаст жь Ньвисаред Пироз хәбәр дьдан (Ԛануна Дӧщари 6:6, 7). Ӧса жи Иса тʹьме рʹожа Шәмийе тʹәви малбәта хԝә дьчу кʹьниште (Луԛа 4:16). Чахе ԝедәре Ньвисаред Пироз дьһатьнә хԝәндьне, әԝи баш гӧһдари дькьр. w23.02 8 ¶1-2

Гәләк мәʹни һәнә, жь бо чь жи әм Йаһоԝа һʹьз дькьн. Мәсәлә, тә фәʹм кьрийә кӧ Йаһоԝа «канийа жийане» йә у «һәр дайина ԛәнщ у һәр пʹешкʹеша кʹамьл» жь ԝи те (Зәбур 36:9; Аԛуб 1:17). Бәле, һәр тьште ԛәнщ дайина Баве мәйи дьлован у дәствәкьри йә. Ԛӧрбана Иса пʹешкʹешәкә гәләк ԛимәт ә, кӧ Йаһоԝа дайә мә. Әм чьма дькарьн ӧса бежьн? Һәла сәр достийа Йаһоԝа у Кӧрʹе ԝи бьфькьрә. Иса ӧса гот: «Бав мьн һʹьз дькә» у «әз Баве һʹьз дькьм» (Йуһʹәнна 10:17; 14:31). Йаһоԝа у Иса бь милйарда сала тʹәвайи бун, ләма жи достийа ԝан гәләки ԛәԝи йә (Мәтʹәлок 8:22, 23, 30). Һәла бьфькьрә, гава Хԝәде һишт ԝәки Кӧрʹе ԝи гәләк щәфа бькʹьшинә у бе кӧштьне, еша дьле ԝи чьԛас гьран бу. Йаһоԝа тә у һʹәму мәрьва ӧса һʹьз дькә, кӧ әԝи Кӧрʹе хԝәйи һʹьзкьри бона мә кьрә ԛӧрбан. Ләма жи әм дькарьн әʹмьре һʹәта-һʹәтайе бьстиньн (Йуһʹәнна 3:16; Галати 2:20). Гәло әва мәʹникә мәзьн нинә, кӧ әм Хԝәде һʹьз бькьн? w23.03 4-5 ¶11-13

Әм гәрәке гӧһ нәдьн һинкьрьнед рʹабәра. Иса һьнә кәсед щьвата Пәргамайеда рʹаст кьрьн, чьмки ԝана йәктийа щьвате хьраб дькьр (Әʹйанти 2:14-16). Әԝи пʹайе хушк-бьред ль Тийатирайе да, чьмки ԝана хԝә жь «Сӧрʹед Мирещьнә Кʹур» дур дьгьрт, у әԝи ԝанрʹа гот ԝәки әԝана рʹастийе «ԛәԝин бьгьрьн» (Әʹйанти 2:24-26). Лазьм бу ԝәки кәсед кӧ кʹәтьбун бәр байе һинкьрьнед ԛәлп тʹобә кьрана. Гәло дәрс бона мә чь йә? Гәрәке әм һинкьрьнед кӧ мьԛабьли фькьред Йаһоԝа нә, инкʹар кьн. Рʹабәр хԝә ӧса нишан дькьн кӧ те бежи хԝәдехоф ьн, ле бь рʹасти әԝана жь Йаһоԝа дур ьн (2 Тимотʹейо 3:5). Сәва кӧ әм бь һинкьрьнед ԛәлп нәхапьн, гәрәке әм Хәбәра Хԝәде бь дьл у щан леколин бькьн (2 Тимотʹейо 3:14-17; Щьһуда 3, 4). Әм гәрәке бь щурʹе рʹаст Йаһоԝа бьһʹәбиньн. Һәгәр әм тьштәки ӧса дькьн, сәва чь жи Йаһоԝа дькарә һʹәбандьна мә ԛәбул нәкә, әм гәрәке дәрберʹа сәр хԝә бьхәбьтьн у хԝә рʹаст кьн (Әʹйанти 2:5, 16; 3:3, 16). w22.05 4 ¶9; 5 ¶11