Тʹәбах

Гәло Йаһоԝа чьрʹа навед ԝан мәрьва ‹пʹьртукәкә биранинеда› дьньвисә, йед кӧ бь хәбәрдана хԝә нишан дькьн кӧ жь ԝи дьтьрсьн у сәр наве ԝи дьфькьрьн? Хәбәрдана мә нишан дькә, кӧ дьле мәда чь һәйә. Иса ӧса готьбу: «Чь кӧ дьлада һәйә зар жи ԝе дьбежә» (Мәтта 12:34). Йаһоԝа ԝе жийина һʹәта-һʹәтайе бьдә ԝан мәрьва, кʹи кӧ ԝи һʹьз дькьн. Әв йәк кӧ Йаһоԝа ԝе һʹәбандьна мә ԛәбул бькә йан на, хәбәрдана мәва жи гьредайи йә (Аԛуб 1:26). Һьнә кәсед кӧ Хԝәде һʹьз накьн, һерс, сәрт у ԛӧрʹә хәбәр дьдьн (2 Тимотʹейо 3:1-5). Һәмьки әм нахԝазьн мина ԝан бьн. Әм дьхԝазьн кӧ Йаһоԝа жь хәбәрдана мә рʹази бә. Һәгәр әм тʹәне хьзмәтеда йан щьватада ширьн-ширьн, бь мәʹрифәти у дьловани хәбәр дьн, ле чахе хушк-бьра мә навиньн, тʹәви нәфәред хԝә сәрт хәбәр дьн, гәло Йаһоԝа ԝе жь мә рʹази бә? (1 Пәтрус 3:7). w22.04 5 ¶4-5

Хԝәде әв йәк ԝе бькә дьле дәһ стьруйа у щәʹнәԝьре, ԝәки ԛьрʹа Бабилона Мәзьн биньн. Бәле, Йаһоԝа ԝе фькьра хԝә бькә дьле мьләта, ԝәки әԝана бь сайа щәʹнәԝьре соре гәвәз, демәк тʹәшкиләта Мьләтед Йәкбуйи, һʹьщуми сәр һʹәму религийед ԛәлп бькьн у ԝана бь тʹәмами ԛьрʹ кьн (Әʹйанти 18:21-24). Әм гәрәке чь бькьн? Гәрәке хԝәденасийа мә бәр чʹәʹве Хԝәдейе мә «рʹаст у беԛӧсур» бә (Аԛуб 1:27). Гәләк фәрз ә кӧ әм нәкʹәвьн бьн һʹӧкӧме һинкьрьнед ԛәлп, щәжьнед пʹутпʹарьсти, бенамусийе у сербазийа Бабилона Мәзьн. Ӧса жи, гәрәке әм бәрдәԝам кьн гази мәрьва бькьн, ԝәки әԝана жи «жь нава ԝе дәркʹәвьн», сәва кӧ «нәбьнә һәвал-пʹаред гӧнед ԝе» (Әʹйанти 18:4). w22.05 11 ¶17; 14 ¶18

Де-бавно, Мәщала бьгәрʹьн кӧ дәрһәԛа Йаһоԝа у кʹәрәмед кӧ ԝә жь ԝи стандьнә, зарʹед хԝәрʹа гьли кьн (Ԛануна Дӧщари 6:6, 7). Әв йәк гәләк фәрз ә, илаһи һәгәр һун нькарьн леколина Кʹьтеба Пироз һәр һʹәфте малда тʹәви зарʹед хԝә дәрбаз кьн жь бо ве йәке, кӧ кәсәк малбәта ԝәда Шәʹде Йаһоԝа нинә. Хушкәкә мә Кристина, дьбежә: «Тʹьме нәдьһатә стандьне ԝәки дәрһәԛа Йаһоԝа тʹәви зарʹед хԝә хәбәр дьм, ләма жи чьԛас дәсте мьн дьһат мьн һʹәму мәщал рʹьнд дьданә хәбате». Тʹәви зарʹед хԝә дәрһәԛа тʹәшкиләта Йаһоԝа у хушк-бьра позитив хәбәр дьн. Рʹуспийа сущдар нәкьн, ԝәки зарʹед ԝә чахе һʹәԝщә бьн, һеса незики ԝан бьн у аликʹарийе жь ԝан бьхԝазьн. Малда әʹдьлайе хԝәй кьн. Дайикед дәлал у ԛимәт, тʹьме мер у зарʹед хԝәрʹа нишан кьн, кӧ һун ԝана һʹьз дькьн. Бь нәрми у бь ԛәдьр бәʹса мере хԝә бькьн, у зарʹед хԝә һин бькьн ԝәки әԝана жи бь хәбәрдана хԝә ԛәдьре баве хԝә бьгьрьн. Ӧса һун дәрәщәкә баш саз дькьн, йа кӧ мәщале дьдә, ԝәки зарʹ дәрһәԛа Йаһоԝа һин бьн (Аԛуб 3:18). w22.04 18 ¶10-11

Әʹламәтийа кӧ Иса шандьбу щьвата Әфәсе нишан дькә, кӧ хушк-бьред ԝедәре һьмбәри чәтьнайа сәбьр дькьрьн у бь амьни Йаһоԝарʹа хьзмәт дькьрьн. Ле сәд һʹәйф кӧ ԝана һʹьзкьрьна хԝәйә пешьн ӧнда кьрьбу. Сәва кӧ Йаһоԝа һʹәбандьна ԝан ԛәбул кьра, лазьм бу кӧ ԝана һʹьзкьрьна хԝә тʹәзәда гӧрʹ кьра. Иро жи сәбьркьрьн фәрз ә, ле гәрәке әм ве йәке бь нета рʹаст бькьн. Хԝәде нә тʹәне дина хԝә дьде кӧ әм чь дькьн, әԝ дина хԝә дьде кӧ әм ве йәке чьрʹа дькьн. Нета дьле мә бона ԝи гәләк фәрз ә, чьмки әԝ дьхԝазә ԝәки әм бь һʹьзкьрьн у рʹазибуне ԝи бьһʹәбиньн (Мәтʹәлок 16:2; Маркос 12:29, 30). Гәрәке әм бәрдәԝам кьн һʹьшйар бьминьн. Щьвата Сардәйсда проблемәкә дьн һәбу. Хушк-бьред ԝедәре бәре бь дьл у щан Йаһоԝарʹа хьзмәт дькьрьн, ле хирәта ԝан ида сьст бьбу. Ләма жи, Иса ԝанрʹа гот ԝәки әԝана һʹьшйар бьн (Әʹйанти 3:1-3). Бәле, Йаһоԝа ԝе тʹӧ щар щәфе мә бир нәкә (Ибрани 6:10). w22.05 3 ¶6-7

Сьлеман дьгот ԝәки әԝ шабуна кӧ мәрьв жь кʹәда хԝә дьстинә, «дайина Хԝәде» йә (Ԝаиз 5:18, 19). Сьлеман ве йәкеда хԝәха жи баԝәр бу. Әԝи мал ава кьрьбун, рʹәз у бах чандьбун, һʹәԝз чекьрьбун у һәла һе чәнд бажар жи ава кьрьбун (1 Пʹадшати 9:19; Ԝаиз 2:4-6). Әв йәк бь рʹасти жи хәбатәкә мәзьн бу, у Сьлеман бешьк жь кʹәда хԝә кʹеф дьстанд. Ле Сьлеман заньбу сәва кӧ бәхтәԝарийа рʹаст бьстиньн, әв йәк бәс нинә. Ләма жи хенщи ван шьхӧла, әԝи бона Йаһоԝа жи гәләк тьшт кьр. Мәсәлә, әԝи пʹарьстгәһа Йаһоԝа ава кьр. Әв авакьрьна мәзьн һʹәфт сала кʹьшанд (1 Пʹадшати 6:38; 9:1). Сьлеман паши кьрьна һʹәму шьхӧлед хԝә, фәʹм кьр ԝәки хьзмәтийа Йаһоԝарʹа тьште һәри фәрз ә. Әԝи ӧса ньвиси: «Жь Хԝәде бьтьрсә у әʹмред ԝи бьгьрә» (Ԝаиз 12:13, ИМ). w22.05 22 ¶8

Кʹьтеба Пироз бәʹса гәләк мәрьва дькә, кʹижана кӧ жь Йаһоԝа бахшандьн стандьнә. Мәсәла Мьнашә Пʹадша бинә бира хԝә. Әԝи гәләк хьраби кьрьбу. Мәсәлә, әԝи пʹут дьһʹәбандьн у һьм жи щьмәʹт бәрбь ве йәке һелан дькьр. Әԝи һәла һе зарʹед хԝә жи пʹутарʹа ԛӧрбан кьрьбу. Сәрда жи, әԝи пʹарьстгәһа Йаһоԝада пʹутәк данибу. Кʹьтеба Пироз дьбежә кӧ Мьнашә пе хьрабийа хԝә һерса Йаһоԝа рʹакьрьбу (2 Дирок 33:2-7). Диса жи, гава Мьнашә жь дьл тʹобә кьр, Йаһоԝа бахшандә ԝи (2 Дирок 33:12, 13). Даԝьд Пʹадша жи бинә бира хԝә. Әԝи жи гӧнед гьран кьрьбун. Мәсәлә, Даԝьд бенамуси кьрьбу у мерәк дабу кӧштьне. Диса жи, гава Даԝьд жь дьл гӧнед хԝә ани рʹуйе хԝә, Йаһоԝа бахшандә ԝи (2 Самуйел 12:9, 10, 13, 14). Бәле, әм дькарьн баԝәр бьн, ԝәки Йаһоԝа һазьр ә бьбахшинә мә. w22.06 3 ¶7

Щарна һеса нинә кӧ әм һевийа хԝә ԛәԝи хԝәй кьн. Әв йәк кӧ созед Хԝәде һе нәһатьнә сери, дькарә сәбьра мә бьщерʹьбинә. Йаһоԝа Хԝәдейе һʹәта-һʹәтайе йә, ләма жи ньһерʹандьна ԝи сәр ԝәʹдә, жь йа мә щӧдә йә (2 Пәтрус 3:8, 9). Әԝе нета хԝә бь щурʹе һәри баш бинә сери, ле дьбәкә әԝ ви ԝәʹдәйи нәйнә сери, чахе әм һивийе нә. Гәло чь дькарә али мә бькә, ԝәки һевийа мә ԛәԝи бә у әм бь сәбьр һивийа ви ԝәʹдәйи бьн, чахе Хԝәде созед хԝә бинә сери? (Аԛуб 5:7) Незики Йаһоԝа бьн, чьмки әԝе һәр тьшти бинә сери, чь кӧ әм һивийе нә. Ль гора Кʹьтеба Пироз, һеви баԝәрийева гьредайи йә. Бәле, гәрәке әм баԝәр бькьн «кӧ Хԝәде һәйә у ԝе ԝан хәлат кә, кʹижан кӧ ль ԝи дьгәрʹьн» (Ибрани 11:1, 6). Чьԛас кӧ баԝәрийа мә һьндава Йаһоԝа ԛәԝи дьбә, һаԛас әм дьһа зедә избат дьбьн, кӧ әԝе һʹәму созед хԝә бинә сери. Сәва кӧ һевийа мә ԛәԝи бьминә, әм гәрәке Йаһоԝарʹа дӧа кьн у Хәбәра ԝи бьхуньн. Әм нькарьн Йаһоԝа бьвиньн, ле диса жи әм дькарьн незики ԝи бьн. Әм баԝәр ьн кӧ гава әм бь сайа дӧа ԝирʹа хәбәр дьдьн, әԝ мә дьбьһе (Йерәмйа 29:11, 12). w22.10 26-27 ¶11-13

Бьдә бәр чʹәʹве хԝә кӧ Ибо чаԝа нава хԝәлийеда рʹуньшти йә у еше дькʹьшинә (Ибо 2:8). Һәвалед ԝи дьбежьн кӧ әԝ мәрьвәки баш нинә у һʹәму ԛәнщийа кӧ әԝи кьрийә, бадиһәԝа йә. Дәрдед ԝи мина барәки гьран сәр стуйе ԝи нә, у дьле ԝи сәва мьрьна зарʹед ԝи гәләк дешә. Серида, Ибо дәнге хԝә накә (Ибо 2:13). Һәвалед Ибо дьбәкә дьфькьрьн кӧ әԝ ԝе ида пьшта хԝә бьдә Йаһоԝа, ле Ибо ӧса нәкьр. Бь дәнгәки баԝәр, әԝ ван һәвалед ԛәлпрʹа дьбежә: «Һʹәта мьрьне беԛьсуртийа хԝә наһельм!» (Ибо 27:5, ДТʹ). Гәло чь али Ибо дькьр, ԝәки әԝ ван тәнгасийед гьранда ԛәԝи у мерхас бьминә? Гава һʹале ԝи гәләк хьраб бу жи, әԝи тʹӧ щара һевийа хԝә ӧнда нәдькьр, кӧ рʹожәке Хԝәдайе дьлован ԝе ԝи хьлаз кә. Әԝи заньбу кӧ һәгәр әԝ бьмьрә жи, Йаһоԝа ԝе ԝи жь мьрьне рʹакә (Ибо 14:13-15). w22.06 22 ¶9

Дӧа пʹешкʹешәкә гәләк ԛимәт ә, чьмки бь сайа ве, әм дькарьн Әʹфьрандаре әʹрд у әʹзманарʹа аза дӧа бькьн. Һәла бьфькьрә: Сьһʹәт чь бә жи у әм кʹидәре бьн жи, әм дькарьн дьле хԝә Йаһоԝарʹа вәкьн. Йаһоԝа һәр зьмани фәʹм дькә, у пешийа кӧ әм дӧа бькьн, нә лазьм ә ԝәки әм жь ԝи изьне бьстиньн. Һәрге әм нәхԝәшханеда йан кәледа бьн жи, Баве мәйи дьлован һәртʹьм гӧһ дьдә дӧайед мә. Әм бона ве пʹешкʹеша ԛимәт гәләк рʹази нә! Даԝьд Пʹадша мәщала дӧа гәләк ԛимәт дькьр. Әԝи Йаһоԝарʹа ӧса гот: «Бьра дӧайе мьн мина бьхуре ль бәр Тә бе ԛәбулкьрьне» (Зәбур 141:1, 2). Рʹожед Даԝьдда, бьхура пироз, йа кӧ жь алийе кʹаһинава бона һʹәбандьне дьһатә хәбьтандьне, фәсал дьһатә һазьркьрьне (Дәркʹәтьн 30:34, 35). Мина ве йәке, Даԝьд дьхԝәст хәбәред дӧайед хԝә жи рʹьнд бьжберә. Хԝәстьна мә жи әв ә, чьмки әм жи дьхԝазьн ԝәки дӧайед мә Йаһоԝа хԝәш бен. w22.07 20 ¶1-2; 21 ¶4

Һʹәйфһьлдан йа Йаһоԝа йә. Гава кәсәк мьԛабьли мә гӧнә дькә, Йаһоԝа изьне надә кӧ әм һʹәйфе һьлдьн (Рʹомайи 12:20, 21). Хԝәде һәр тьшти дьвинә, ле әм нькарьн бьвиньн. Әм гӧнәкʹар ьн у һәр тьшти ньзаньн (Ибрани 4:13). Щарна жи, емосийед мә дькарьн сәр ньһерʹандьна мә һʹӧкӧм кьн. Ләма жи Аԛуб жь бина бәр Хԝәде ӧса ньвисибу: «Һерса мерьв рʹастийа Хԝәде найнә сери» (Аԛуб 1:20). Әм дькарьн баԝәр бьн кӧ Йаһоԝа ԝе һәԛийе у диԝана рʹаст бькә. Гава әм дьбахшиньнә мәрьва, әм нишан дькьн кӧ әм итʹбарийа хԝә һәԛийа Йаһоԝа тиньн. Хԝәде соз дайә ԝәки ԝе һʹәму зьраре кӧ мә жь бо гӧнә стандийә, бь тʹәмами бьдә һьлдане. Ләма жи ԝе баш бә кӧ әм проблемед хԝә бьдьнә дәсте ԝи. Дьнйа тʹәзәда, бьринед емосийали у дәрдед бәре ԝе ида «нәйед биранин у нәйед сәр һʹьша» (Ишайа 65:17). w22.06 10-11 ¶11-12

Әв йәк кӧ мәрьв мә нәфрʹәт дькьн, избат дькә ԝәки Йаһоԝа жь мә рʹази йә (Мәтта 5:11, 12). Сәбәба ве нәфрʹәте, Мире-щьна йә. Ле Иса жь ԝи ԛәԝитьр ә! Диса тьштәк кӧ бәлакьрьна мьзгинийа Пʹадшатийе чәтьн дькә әв ә, кӧ гәләк зьман һәнә у әм ван зьмана ньзаньн. Ле кʹьтеба Әʹйантида Иса пʹехәмбәрти кьрьбу, кӧ рʹожед мәда мьзгини ԝе нава гәләк чәтьнайада жи бе бәлакьрьне (Әʹйанти 14:6, 7). Гәло чь щурʹәйи? Сәр малпәра мә jw.org, сәр 1 000 зьмани зедәтьр әʹдәбйәтед сәр һʹиме Кʹьтеба Пироз һәнә, у әм хирәт дькьн кӧ хәбәра Пʹадшатийе бьгьһиньн һәр кәси. Жь бо ве йәке, Кʹома Рʹебәрийе сафи кьр кӧ кʹьтеба «Ша бә Жийинерʹа Һʹәта-Һʹәтайе!» сәр 700 зьмани зедәтьр бе ԝәлгәрʹандьне. w22.07 9 ¶6-7

Иса йәки дьлшәԝат бу. Мәттайе шанди дәрһәԛа ԝи ӧса ньвиси: «Гава әԝи әʹлаләт дит, гӧне ԝи ль ԝан һат, чьмки әԝана мина пәзе бе шьван, бәрʹәдайи у бәлабуйи бун» (Мәтта 9:36). Ле гәло Йаһоԝа ча сәр мәрьва дьньһерʹә? Иса ӧса гот: «Баве ԝәйи әʹзмана нахԝазә кӧ жь ван бьчʹука йәк ӧнда бә» (Мәтта 18:14). Хәбәред ча хԝәш ьн! Бәле, чьԛас баш әм Иса нас бькьн, һаԛас зедә әме Йаһоԝа һʹьз бькьн. Сәва кӧ тӧ бьби шагьртәки дьлован у гьһишти, тʹәви хушк-бьред щерʹьбанди ԝәʹдә дәрбаз кә. Дина хԝә бьде кӧ әԝана чьԛас ша нә. Әԝана сәва сафикьрьна хԝә кӧ Йаһоԝарʹа хьзмәт бькьн, тʹӧ щар пʹошман набьн. Бежә ԝан кӧ дәрһәԛа һьнә сәрһатийед хԝәйә хьзмәтийеда гьли кьн. Чахе тӧ гәрәке сафикьрьнәкә фәрз бьки, жь ԝана ширәте бьхԝазә, чьмки ча Кʹьтеба Пироз нишан дькә, «кʹома шеԝьркьра» кʹаре тинә. w22.08 3 ¶6-7

Зу йан дәрәнг, әме гьшк рʹасти тәнгасийа бен. Ле әме тʹӧ щар тʹәне нибьн. Мина бавәки дьлован, чʹәʹве Йаһоԝа һәртʹьм сәр мә йә. Әԝ кʹеләка мә йә, әԝ һәԝар-газийа мә дьбьһе, у әԝ һазьр ә кӧ пьштгьрийа мә бькә (Ишайа 43:2). Әм заньн кӧ әм дькарьн нава чәтьнайада амьн бьминьн, чьмки Йаһоԝа бь мәрʹдани һәр тьшт дайә мә, ԝәки әм бькарьбьн сәбьр кьн. Ԝәʹде чәтьнайа әм жь дӧа, Кʹьтеба Пироз, хԝарьна рʹӧһʹани у хушк-бьред дьлгәрм, ԛәԝате дьстиньн. Әм чьԛас шекьрдар ьн кӧ чʹәʹве Баве мәйи әʹзмана сәр мә йә. «Дьле мә пе Ԝи ша дьбә» (Зәбур 33:21). Сәва кӧ әм Йаһоԝарʹа нишан кьн, ԝәки әм аликʹарийа ԝи ԛимәт дькьн, әм гәрәке һʹәму тьштед кӧ әԝи дайә мә, бьдьнә хәбате. Ӧса жи, гәрәке әм хирәт бькьн кӧ бьн пʹәрʹе Хԝәдеда бьминьн. Һәрге әм чь жь дәсте мә те бькьн, ԝәки гӧһ бьдьн Йаһоԝа у тьштед рʹаст бькьн, чʹәʹве ԝи ԝе һʹәта-һʹәтайе сәр мә бә! w22.08 13 ¶15-16

Гәләк мәрьв ньзаньн кӧ итʹбарийа хԝә кʹе биньн. Әԝана баԝәр накьн ԝәки кәсед навдар, мәсәлә политик, зандар йан бизнесмен, бь рʹасти бона ԝан хәм дькьн. Ӧса жи, әԝана ида ԛәдьре рʹебәред религи нагьрьн, йед кӧ дьбежьн әԝ Мәсиһи нә, чьмки әԝана тʹәне рʹува нишан дькьн, ԝәки гӧһ дьдьнә Хәбәра Хԝәде. Ләма жи ида баԝәрийа гәләк мәрьва һьндава Кʹьтеба Пироз ӧнда буйә. Әм хьзмәткʹаред Йаһоԝа нә, ләма жи әм баԝәр ьн, ԝәки «Хԝәдайе рʹастийе» әԝ ә, у әԝ тʹьме хера мә дьхԝазә (Зәбур 31:5; Ишайа 48:17). Бешьк, әм дькарьн итʹбарийа хԝә готьнед Кʹьтеба Пироз биньн. Әм тʹәви готьнед зандарәки Кʹьтеба Пироз ԛайил ьн, әԝ дьбежә: «Готьнед Хԝәдеда ԛәт шаши тʹӧнә у ԛәт шьк жи тʹӧнә, кӧ гьлики Хԝәде ԝе нәйе сери. Хьзмәткʹаред Хԝәде дькарьн итʹбарийа хԝә готьнед ԝи биньн, чьмки әԝана итʹбарийа хԝә Хԝәде тиньн». w23.01 2 ¶1-2

Гава әм баԝәрийа хушк-бьра дьһа ԛәԝи дькьн, әм ԝана ава дькьн. Мәсәлә, һьнә хушк-бьред мә жь алийе нәбаԝәра рʹасти мьԛабьлибуне тен. Һьнәк жи гьран нәхԝәш ьн йан дьлбьриндар ьн. Ӧса жи, һьнә хушк-бьред мә бь гәләк сала һивийа хьлазийа ве дьнйа хьраб ьн. Тьштед ӧса дькарьн баԝәрийа ԝан бьщерʹьбиньн. Ԛьрʹна йәкеда жи, һьнә кәс рʹасти тәнгасийед ӧса дьһатьн. Паԝлос Ньвисаред Пироз дьда хәбате ԝәки баԝәрийа хушк-бьра ава бькә. Мәсәлә, һьнә Мәсиһийед Щьһурʹа дьбәкә чәтьн бу, кӧ щаба нәфәред хԝәйә нәбаԝәрмәнд бьдьн, йед кӧ хԝә ԛӧрʹә дькьрьн у дьготьн кӧ Щьһути жь Мәсиһитийе четьр ә. Нәʹма Паԝлос Ибранийарʹа, бешьк гәләк ԛәԝат да ԝан хушк-бьра (Ибрани 1:5, 6; 2:2, 3; 9:24, 25). Бь аликʹарийа шьровәкьрьна ԝи, ԝана дькарьбу дәнге мьԛабьла бьбьрʹийа. w22.08 23-24 ¶12-14

Иро мәрьв ньзаньн итʹбарийа хԝә кʹе биньн. Әԝана гәләк щара сәва кьред сәрԝеред комерси, политики у религи әʹщьз дьбьн у итʹбарийа хԝә һьндава ԝан ӧнда дькьн. Ләма жи ԝанрʹа чәтьн ә итʹбарийа хԝә һәвал, щинар у һәла һе мәрьвед хԝә жи биньн. Кʹьтеба Пироз дәрһәԛа рʹожед мә пешда готьбу, кӧ мәрьв ԝе бьбьн «һʹәрам», «бӧхданбеж» у «нәмам», демәк хәйсәтед ԝан ԝе мина йе «мире ве дьнйайе» бә, йе кӧ ԛә бь итʹбар нинә (2 Тимотʹейо 3:1-4; 2 Корьнтʹи 4:4). Әм Мәсиһи, заньн кӧ әм дькарьн итʹбарийа хԝә Йаһоԝа биньн. Әм баԝәр ьн кӧ әԝ мә һʹьз дькә у тʹӧ щар ԝе тʹәрка мә нәдә (Зәбур 9:10). Ӧса жи, әм дькарьн итʹбарийа хԝә Иса Мәсиһ биньн, йе кӧ әʹмьре хԝә бона мә бәрва да (1 Пәтрус 3:18). Хенщи ве йәке, мә бь чʹәʹве хԝә дитийә кӧ рʹебәрийа Кʹьтеба Пироз бь итʹбар ә (2 Тимотʹейо 3:16, 17). w22.09 2 ¶1-2

Бәхтәԝарийа рʹаст тьштәкә ӧса нинә, кӧ зу те у дьчә. Мәрьв дькарә тʹәмамийа әʹмьре хԝәда бәхтәԝар бә. Гәло чаԝа? Иса Мәсиһ ӧса готьбу: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани, чьмки Пʹадшатийа Әʹзмана йа ԝан ә» (Мәтта 5:3, ДТʹ). Иса Мәсиһ заньбу кӧ хԝәстьна инсана һәйә, ԝәки Йаһоԝа Хԝәде нас бькьн у ԝи бьһʹәбиньн. У чьмки Йаһоԝа «Хԝәдейе хԝәзьли» йә, йед кӧ жерʹа хьзмәт дькьн жи дькарьн бәхтәԝар бьн (1 Тимотʹейо 1:11). Гәло бәхтәԝари те һʹәсабе кӧ жийина мәда ԛә дәрд ԝе тʹӧнә бьн? На. Иса ԝәʹде хьзмәткьрьна сәр чʹийе гот ԝәки әԝед кӧ «бона рʹастиԛәдандьне тенә зерандьне» у кәсед кӧ сәва баԝәрийа хԝә тенә беһӧрмәткьрьне жи, дькарьн бәхтәԝар бьн (Мәтта 5:4, 10, 11). Иса һин дькьр кӧ бәхтәԝари нә әв ә гава жийина мәда ԛә чәтьнайи тʹӧнә нә, ле әв ә, гава әм һаш жь һʹәԝщед хԝәйә рʹӧһʹани һәнә у незики Хԝәде дьбьн (Аԛуб 4:8). w22.10 6 ¶1-3

Сәрԝахти али мә дькә, кӧ әм «дәма һьшбуне у дәма пәйьвине» жь һәв дәрхьн (Ԝаиз 3:7, ИМ). Һьнә културада готьнәкә ӧса һәйә, «хәбәрдан зив ә, ле һьшбун зерʹ ә». Бәле, щарна дьһа баш ә кӧ әм һьш бьн у хәбәр нәдьн. Һәла дина хԝә бьдьнә ве мәсәле: Рʹуспики щерʹьбандирʹа гәләк щара дьбежьн кӧ һәрʹә али щьватед дьн бькә, гава әԝана рʹасти проблемед мәзьн тен. Рʹуспики дьн дәрһәԛа ԝи ӧса дьбежә: «Әԝ тʹӧ щара дәрһәԛа щьватед дьн информасийа вәшарти әʹйан накә». Ләма жи рʹуспи ԛәдьре ви рʹуспийе сәрԝахт дьгьрьн. Әԝана баԝәр ьн кӧ әԝе сӧрʹед ԝан жи кәсед дьнрʹа нәбежә. Һʹәлали жи һʹӧнӧрәки фәрз йа итʹбарийе йә. Әм итʹбарийа хԝә кәсе һʹәлал тиньн, чьмки әм заньн ԝәки әԝе һәртʹьм рʹастийе бежә (Әфәси 4:25; Ибрани 13:18). w22.09 12 ¶14-15

Гава биланийа рʹаст «кʹучада дькә гази», гәләк кәс гӧһ надьне (Мәтʹәлок 1:20). Кʹьтеба Пироз кәсед ӧса нав дькә ча «беһʹьш», «ԛәрфкьр» у «ахмах» (Мәтʹәлок 1:22-25). Мәрьвед «беһʹьш», демәк кәсед нәщерʹьбанди әв ьн, йед кӧ һеса һәр тьшти баԝәр дькьн йан жи тенә хапандьне (Мәтʹәлок 14:15). Иро бь милйона мәрьв жь алийе сәрԝеред религи йан политике тенә хапандьне. Һьнә мәрьвед кӧ фәʹм дькьн ԝәки әԝана һатьнә хапандьне, әʹщебмайи дьминьн, ле йед кӧ Мәтʹәлок 1:22 бәʹса ԝан дькә, сафи дькьн ԝәки «беһʹьш» бьминьн, демәк нәщерʹьбанди, чьмки әв йәк ԝана хԝәш те (Йерәмйа 5:31). Әԝана нахԝазьн бьзаньбьн кӧ Кʹьтеба Пироз чь дьбежә у гӧһ бьдьн ԛанунед ԝе. Йазьх кӧ гәләк мәрьв ӧса дьфькьрьн, ле әм нахԝазьн мина ван мәрьва нәщерʹьбанди бьн! (Мәтʹәлок 1:32; 27:12) w22.10 19 ¶5-7

Тʹәшкиләта Хԝәде бона сах-сьламәтийа мә рʹебәрийе дьдә мә. Мәрʹа ида гәләк щар һатийә готьне, кӧ гәрәке әм адрес у һәжмара тʹела хԝә бьдьн рʹуспийед щьвате, ԝәки әԝана дәрәщед чәтьнда бькарьбьн тʹәви мә текли бьн. Дьԛәԝьмә мәрʹа рʹебәри бе дайине, кӧ әм чаԝа дькарьн хԝә бьпарезьн, кʹӧда бьрʹәвьн у жь кʹидәре аликʹарийе бьстиньн. Йан жи, дьбәкә мәрʹа бе готьне, кӧ әм чаԝа у кʹәнге дькарьн аликʹарийе бьдьн кәсед дьн. Һәрге әм гӧһ нәдьн ван рʹебәрийа, әм дькарьн жийина хԝә у жийина рʹуспийа жи бькьнә ԛәзийе, йед кӧ мьԛати мә дьбьн у бона мә хәм дькьн (Ибрани 13:17). Гәләк хушк-бьред мә жь бо тʹәшԛәлед тʹәбийәте йан тәвльһәвбуна ԝәлатда, бунә кʹочʹбәр. Әԝана һәр тьшти дькьн, ԝәки һини һʹале хԝәйи тʹәзә бьн у бәрдәԝам дькьн шьхӧлед рʹӧһʹанива мьжул бьн. Мина Мәсиһийед ԛьрʹна йәке, йед кӧ жь бо пәйкʹәтьна бьбунә кʹочʹбәр, әԝана жи һәр дәра «Мьзгинийа хәбәре» бәла дькьн (Кʹаред Шандийа 8:4). Бәлакьрьна хәбәра хере али ԝан дькә, кӧ бәри һәр тьшти дина хԝә бьдьн Пʹадшатийа Хԝәде, нә кӧ чәтьнайед хԝә. Ләма жи әԝана дьлрʹьһʹәти у шабуна хԝә ӧнда накьн. w22.12 19 ¶12-13

Йаһоԝа һәр кәси жь мә ԛимәт дькә. Пешийа кӧ Иса шагьртед хԝә шандә хьзмәтийе, әԝи али ԝан кьр, ԝәки әԝана тьрса бәр мәрьва алт кьн (Мәтта 10:29-31). Әԝи ԝанрʹа бәʹса чʹьвика кьр, йед кӧ Исраеледа гәләк бәлабуйи бун. Рʹожед Исада чʹьвикед ӧса йед лапә әрзан бун. Ле әԝи шагьртед хԝәрʹа гот: «Ле йәк жи жь ԝан бейи әʹмьре Баве ԝә накʹәвә әʹрде». Паше әԝи зедә кьр: «Һун жь гәләк чʹьвика ԛимәттьр ьн». Бь ван гьлийа Иса дьле шагьртед хԝә ԛәԝи кьр, кӧ һәр йәк жь ԝан бәр чʹәʹве Йаһоԝа ԛимәт ә. Ләма жи нә лазьм ә кӧ әԝана пәйкʹәтьна бьтьрсьн. Бешьк, гава шагьртед Иса мьзгини ль гӧнд у бажара бәла дькьрьн у чʹьвик дьдитьн, готьнед Иса дьһатьн бира ԝан. Ньһа һәр щар гава тӧ чʹьвикед бьчʹук бьвини, бинә бира хԝә ԝәки тӧ бәр чʹәʹве Йаһоԝа «жь гәләк чʹьвика ԛимәттьр» и. Йаһоԝа тʹәви тә йә, ләма жи нә лазьм ә ԝәки тӧ мәрьва бьтьрси. w23.03 18 ¶12

Щарна, жийина хԝәда әм рʹасти чәтьнайа тен. Мәсәлә, дьбәкә малбәта мә ԛәрфе хԝә мә бькә, чьмки әм Шәʹде Йаһоԝа нә, йан дьбәкә әм хәбата хԝә ӧнда кьн. Һәрге тәнгаси дьреж бькʹьшиньн, дьбәкә әм мерхасийа хԝә ӧнда кьн у хԝә бечʹарә тʹәхмин кьн. Мире-щьна мәщалед ӧса дьдә хәбате, ԝәки шьке бькә дьле мә, кӧ Йаһоԝа бь рʹасти мә һʹьз дькә. Әԝ дьхԝазә кӧ әм бьфькьрьн, ԝәки сәбәбе дәрде мә Йаһоԝа йан жи тʹәшкиләта ԝи йә. Бәре, һʹале һьнә Исраелийед Мьсьреда ӧса бу. Сәрида, ԝана баԝәр кьр кӧ Муса у Һарун жь алийе Йаһоԝада һатьнә кʹьфшкьрьне, ԝәки ԝана жь дилтийе аза бькьн (Дәркʹәтьн 4:29-31). Ле паше, гава Фьрәԝьн баре ԝан һе гьран кьр, әԝана фькьрин кӧ әв тәнгаси рʹуйе Муса у Һарунда пешда һатьн (Дәркʹәтьн 5:19, 20). Бәле, Исраелийа хьзмәткʹаред Хԝәде йед амьн сущдар дькьрьн. Сәд һʹәйф! Һәрге тӧ жи мина ԝан ԝәхтәки дьреж нав тәнгасийеда би, дӧада дьле хԝә Йаһоԝарʹа вәкә у аликʹарийе жь ԝи бьхԝазә. w22.11 15 ¶5-6

Йаһоԝа Канийа Жийине йә, у ԛәԝата ԝи дьгьһиже кӧ мьрийа вәгәрʹинә жийине. Мәсәлә, әԝи ԛәԝат дабу Елйас пʹехәмбәр, ԝәки кӧрʹе жьнәбикә ль бажаре Сәрәптайе жь мьрьне рʹакә (1 Пʹадшати 17:21-23). Паше, Елиша бь аликʹарийа Хԝәде кӧрʹе жьнькәкә Шунәми жь мьрьне рʹакьр (2 Пʹадшати 4:18-20, 34-37). Сәрһатийед ӧса нишан дькьн, кӧ ԛәԝата Йаһоԝа дьгьһиже, ԝәки мьрийа жь мьрьне рʹакә. Гава Иса сәр әʹрде бу, әԝи избат кьр, ԝәки Баве ԝи ԛәԝат дайә ԝи кӧ мьрийа рʹакә (Йуһʹәнна 11:23-25, 43, 44). Иса ньһа сәр әʹзмана йә, у «һʹәму һʹӧкӧме әʹрд у әʹзмен» жерʹа һатийә дайине. Ләма жи, ԛәԝата Иса дьгьһиже, «кӧ һʹәмуйед тʹьрбада» жь мьрьне рʹакә у мәщале бьдә ԝан һʹәта-һʹәтайе бьжин (Мәтта 28:18; Йуһʹәнна 5:26-29). w22.12 5 ¶10

Бь ве йәке кӧ Исраелийа Һәзәԛел инкʹар кьр, бь рʹасти ԝана Йаһоԝа инкʹар кьр. Жь ван гьлийед рʹеза рʹоже, Һәзәԛел фәʹм дькьр, ԝәки нәгӧһдарикьрьна щьмәʹте найе һʹәсабе, кӧ әԝ пʹехәмбәрәки бекер ә. Сәрда жи, Йаһоԝа Һәзәԛелрʹа гот кӧ гава диԝанед кӧ әԝи әʹлам дькьр, бенә сери, щьмәʹт ԝе бьзаньбә ԝәки «нав ԝанда пʹехәмбәрәк һәйә» (Һәзәԛел 2:5; 33:33). Ван готьнед Йаһоԝа дьлбини у ԛәԝат дьда Һәзәԛел, ԝәки хьзмәтийа хԝә бинә сери. Йаһоԝа әм жи шандьнә, у әв йәк ԛәԝате дьдә мә. Әм сәрбьльнд ьн, кӧ әԝ мә ча «Шәʹден» хԝә нав дькә (Ишайа 43:10, ИМ). Әв ԛәдьрәки гәләк мәзьн ә! Чаԝа кӧ Йаһоԝа Һәзәԛелрʹа готьбу «нәтьрсә», әԝ мәрʹа жи дьбежә: «Нәтьрсьн!» (Һәзәԛел 2:6). Гәло чьрʹа әм гәрәке дьжмьна нәтьрсьн? Чьмки мина Һәзәԛел, Йаһоԝа әм жи шандьнә, у әԝ пьштгьрийа мә дькә (Ишайа 44:8). w22.11 3-4 ¶4-5

Иро әм рʹуспи у аликʹарчийе щьватейә амьн гәләки ԛимәт дькьн. Бәле, әв бьред амьн бона мә хәм дькьн, у әм жь Йаһоԝа рʹази нә кӧ әԝи бьред ӧса дәлал дайә мә. Гәло әм чаԝа дькарьн нишан кьн, кӧ әм жи мәрьвед бь итʹбар ьн? Әм хушк-бьра жь дьл һʹьз дькьн, у әм хера ԝан дьхԝазьн. Ле диса жи, әм гәрәке хԝәгьрти бьн у нәкʹәвьнә нав шьхӧлед ԝанә шәхси. Ԛьрʹна йәкеда, Паԝлос дәрһәԛа һьнә Мәсиһийа готьбу кӧ әԝана гьлигәрʹо нә, у «тʹәви шьхӧле хәлԛе дьбьн у тьштед нәщайиз хәбәр дьдьн» (1 Тимотʹейо 5:13). Әм нахԝазьн мина ԝан бьн. Бьдә бәр чʹәʹве хԝә, кәсәк тьштәки шәхси мәрʹа дьбежә, у нахԝазә ԝәки әв йәк бькʹәвә гӧһе кәсәки дьн. Мәсәлә, дьбәкә хушкәк мәрʹа бәʹса нәхԝәши йан проблемәкә хԝә дькә у мәрʹа дьбежә кӧ бьра әв йәк ортʹа мәда бьминә. Лазьм ә ԝәки әм ль гора хԝәстьна ԝе бькьн. w22.09 10 ¶7-8

Гьли-готьна Йунани «һʹьш-аԛьле хԝә ну кьн», нә тʹәне әв ә, кӧ әм жийина хԝә бь чәнд кьред ԛәнщ бьхәмьлиньн. Лазьм ә кӧ әм дьле хԝә у хәйсәте хԝә бьщерʹьбиньн. Һәрге лазьм бә, гәрәке әм хԝә бьгӧһезьн, ԝәки жийина мә һʹәта дәсте мә те, ль гора принсипед Йаһоԝа бә. Гәрәке әм ве йәке нә тʹәне щарәке, ле тʹьме бькьн. Гава әм бьгьһижьн беԛьсуртийе, ԝи чахи ԝе һеса бә ԝәки әм пе һʹәму кьред хԝә дьле Йаһоԝа ша кьн. Ле һʹәта ԝе дәме, гәрәке әм сәр хԝә бьхәбьтьн кӧ бьгьһижьн ве нете. Дина хԝә бьдьне кӧ Рʹомайи 12:2-да, Паԝлос нав нукьрьна һʹьш-аԛьле мә у фәʹмкьрьна ԛьрара Хԝәдеда чь гьредан чекьр. Әм гәрәке нәкʹәвьн бәр байе ве дьнйайе, ле хԝә бьщерʹьбиньн у тедәрхьн һәла фькьред Хԝәде сәр нет у сафикьрьнед мә чьԛас һʹӧкӧм дькьн. w23.01 8-9 ¶3-4

Әм чь дькарьн жь жийина Усьв һин бьн? Йаһоԝа накʹәвә нав һʹәму дәрәща кӧ рʹасти мә тен. Гәло Йаһоԝа ӧса дькә, ԝәки тьштед хьраб бенә сәре мә бона мәʹникә баш? Кʹьтеба Пироз ӧса набежә (Ԝаиз 8:9; 9:11). Чь жи һәбә әм заньн, кӧ чахе әм дькʹәвьнә тәнгасийа, Йаһоԝа дьвинә у һәԝар-газийа мә дьбьһе (Зәбур 34:15; Ишайа 59:1). Хенщи ԝе йәке, Йаһоԝа дькарә али мә бькә, ԝәки әм нава һʹәму щурʹә чәтьнайада сәркʹәвьн. Гәло чаԝа? Гәләк щар Йаһоԝа али мә дькә бь ԝе йәке, кӧ әм ԝәхтда бәрдьли у һелани бьстиньн (2 Корьнтʹи 1:3, 4). Гәло дәрәщәки ӧса те бира тә, чахе тә ԝәʹде лазьмда бәрдьли у һелани жь Йаһоԝа станд? Гәләк щар, тʹәне паши ԝе йәке ча тәнгасийа мә хьлаз дьбә, әм фәʹм дькьн кӧ Йаһоԝа чаԝа али мә кьрийә. w23.01 17-18 ¶13-15

Әв щәʹнәԝьр мина щәʹнәԝьре бь һʹәфт сәрийа йә, ле рʹәнге ԝи соре гәвәз ә. Әԝ ча «һʹәйкәле щәʹнәԝьр» у ча «пʹадше һʹәйшта» те навкьрьне (Әʹйанти 13:14, 15; 17:3, 8). Кʹьтеба Әʹйанти дьбежә кӧ әв «пʹадша» һәбу, паше бәтавәбу у паше диса хӧйа бу. Әԝ йәк бь рʹасти жи әʹйан дькә, ԝәки әԝ тʹәшкиләта Мьләтед Йәкбуйи йә, йа кӧ бона пьштгьрийа система политика һʹәмдьнйайе һатә сазкьрьне. Пешийе, әв ча Лига Мьләта әʹйан бу. Ле Ԝәʹде Шәрʹе Һʹәмдьнйайе йа ЬЬ, әԝ һьлшийа. Паше, әԝ ча Мьләтед Йәкбуйи тʹәзәда диса пешда һат. Щәʹнәԝьред политики бь сайа пропаганда хԝә, ԝе нав мәрьва дьн, ԝәки мьԛабьли Йаһоԝа у хьзмәткʹаред ԝи рʹабьн. Бь симболик, әԝана ԝе «һʹәму пʹадшед дьнйайе» бона шәрʹе Һармәгәдоне, демәк бона «Рʹожа Мәзьнә Хԝәдейе Һʹәму Зорайийе», бьщьвиньн (Әʹйанти 16:13, 14, 16). w22.05 10 ¶10-11

Ԝәхт шунда, Иса хԝәха жи һин бу Ньвисаред Пироз бьхунә. Ләма жи, әԝи Ньвисаред Пироз баш заньбу, әԝи ньвисар һʹьз дькьр у дьһишт кӧ әԝ сәр ԝи һʹӧкӧм бькьн. Мәсәлә, биньн бира хԝә әв дәрәщә, гава Исайе 12 сали пʹарьстгәһеда бу. Дәрсдаред кӧ Ԛануна Муса рʹьнд заньбун, «хәбәрдана ԝи дьбьһистьн, сәр занәбун у щабед ԝи зәндәгьрти дьман» (Луԛа 2:46, 47, 52). Әм жи дькарьн Хәбәра Хԝәде баш бьзаньбьн у һʹьз бькьн. Бона ве йәке, лазьм ә ԝәки әм һәр рʹож Хәбәра Хԝәде бьхуньн. Әм дькарьн жь хәбәред кӧ Иса ԛанунзана, Ферьси у Садуԛийарʹа готьбу, һьнә тьшта һин бьн. Ԝана гәләк щар Ньвисаред Пироз дьхԝәндьн, ле Хәбәра Хԝәде сәр һʹьш у дьле ԝан һʹӧкӧм нәдькьр. Иса дина ԝан кʹьшандә сәр се тьшта, йед кӧ ԝана нәдькьр. Гьлийед ԝи кӧ әԝи ԝанрʹа готьбу, али мә дькьн ԝәки әм (1) тьштед кӧ дьхуньн фәʹм бькьн, (2) рʹастийед ԛимәт бьвиньн, у (3) бьһельн ԝәки Хәбәра Хԝәде сәр һʹьш у дьле мә һʹӧкӧм кә. w23.02 8-9 ¶2-3

Һьнә тʹәлькед кӧ гәрәке әм хԝә жь ԝан дур бьгьрьн әԝ ьн: Флирт, хԝарьн у вәхԝарьна зедә, готьнед кӧ дьла бьриндар дькьн, ӧса жи ньһерʹандьна зордарийе, порнографийайе у тьштед мина ԝе (Зәбур 101:3). Мире-щьна һәр гав мәщала дьгәрʹә, ԝәки зьраре бьдә достийа мә тʹәви Йаһоԝа (1 Пәтрус 5:8). Һәрге әм һаш хԝә тʹӧнә бьн, Мире-щьна дькарә тʹохьмед һʹәвсудийе, ԛәлпийе, тьмайе, кʹин у нәфрʹәте, ԛӧрʹәбун у хәйде, һʹьш у дьле мәда бьчинә (Галати 5:19-21). Һәрге әм ԝана зу кʹокева рʹанәкьн, әԝе мина шинкайа жәʹрдадайи шин бьн у зьраре бьдьнә мә (Аԛуб 1:14, 15). Һәвалтийа хьраб тʹәлькәкә вәшарти йә. Гәрәке әм ве йәке бир нәкьн: Кәсед кӧ әм ԝәʹде хԝә тʹәви ԝан дәрбаз дькьн, дькарьн гәләк сәр мә һʹӧкӧм кьн (1 Корьнтʹи 15:33). Һәрге әм һаш жь хԝә һәбьн, әме тʹәви кәсед ӧса һәвалтийе нәкьн, чьмки әԝ ль гора ԛанун у принсипед Йаһоԝа Хԝәде намәшьн (Луԛа 21:34; 2 Корьнтʹи 6:15). Әм гәрәке пешда тʹәльк у хофе тедәрхьн у хԝә жь ван дур бьгьрьн. w23.02 16 ¶7; 17 ¶10-11

Чьԛас баш тӧ Йаһоԝа нас бьки, һаԛас һе зедә те ԝи һʹьз бьки. Бешьк, тӧ дьхԝази һьм ньһа һьм жи һʹәта-һʹәтайе незики ԝи би. У әв йәк реали йә. Әԝ дьхԝазә ԝәки тӧ бь готьн у кьред хԝә дьле ԝи ша бьки (Мәтʹәлок 23:15, 16). Тӧ дькари жийина хԝәда бьди кʹьфше, ԝәки тӧ бь рʹасти Йаһоԝа һʹьз дьки. Әва нета һәрә баш ә йа кӧ тӧ дькари бьди пешийа хԝә! Гәло тӧ ча дькари һʹьзкьрьна хԝә Йаһоԝарʹа бьди кʹьфше? Йа әʹԝльн, дӧайе хԝәйи шәхсида Йаһоԝарʹа бежә, ԝәки тӧ дьхԝази жийина хԝә тʹәсмили ԝи ки (Зәбур 40:8). Паше гава тӧ бейи ньхӧмандьне, һәр кәс ԝе бьвинә, ԝәки тә жийина хԝә тʹәсмили Йаһоԝа кьрийә. Рʹожа ньхӧмандьне рʹожәкә гәләк хԝәш у мәхсус ә. Тӧ жийинәкә тʹәзә дәстпедьки нә кӧ бона хԝә, ле бона Йаһоԝа (Рʹомайи 14:8; 1 Пәтрус 4:1, 2). Әв йәк дьдә кʹьфше ԝәки тә гавәкә гәләк фәрз авитийә. Демәк ньхӧмандьн дәре жийинәкә хԝәш у бәхтәԝар бәр тә вәдькә. w23.03 5-6 ¶14-15