Илон

Һәгәр әм пʹешкʹеша хәбәрдане рʹаст бьдьнә хәбате, мәрьвед дьн ԝе зәлал бьвиньн, кӧ әм хьзмәткʹаред Йаһоԝа нә. Әԝана ԝе фьрԛийа нав мәрьвед кӧ Хԝәдерʹа хьзмәт дькьн у кәсед кӧ жерʹа хьзмәт накьн, рʹьнд бьвиньн (Малахи 3:18). Ԝәрә әм дина хԝә бьдьнә сәрһатийа хушкәкә бь наве Кимберли. Мәкʹтәбеда, әԝе дәрс стандьбу, кʹижан кӧ гәрәке тʹәви һәвалдәрсханәкә хԝә һазьр кьра. Чахе ԝана тʹәвайи дәрс һазьр дькьр, һәвалдәрсхана Кимберлийе дит кӧ әԝ дәрһәԛа тʹӧ кәси хьраб хәбәр надә, тʹьме позитив хәбәр дьдә у чʹерʹа накә. Әв йәк ӧса сәр ԝе һʹӧкӧм кьр, кӧ ԝәʹдә шунда әԝе дәстпекьр Кʹьтеба Пироз һин бә. Гава әм зар-зьмане хԝә рʹаст дьдьнә хәбате, әм мәрийа дькʹьшиньн сәр рʹийа рʹастийе у дьле Йаһоԝа гәләк ша дькьн! Әм гьшк жи дьхԝазьн бь хәбәрдана хԝә Йаһоԝа рʹумәт кьн. w22.04 5-6 ¶5-7

Иса Мәсиһ Мәрйәма Мәждәлани жь һʹӧкӧме щьна хьлаз кьр! Әԝ ӧса рʹази бу, кӧ хԝәст бьбә шагьрта Иса у хьзмәтийеда пьштгьрийа ԝи бькә (Луԛа 8:1-3). Рʹаст ә Мәрйәм бона гәләк тьшта жь Иса шекьрдар бу, ле дьбәкә әԝе һе фәʹм нәдькьр кӧ Иса Мәсиһ ԝе ахьрийеда бона ԝе чь бькә. Әԝи гәрәке жийина хԝә бьда, ԝәки «һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16). Мәрйәме шекьрдарийа хԝә бь ве йәке да кʹьфше, кӧ Иса Мәсиһрʹа амьн ма. Гава Иса Мәсиһ ль сәр стуна щәфайе дьчәрчьри, Мәрйәм незики ԝи сәкьни бу, чьмки әԝе бона ԝи хәм дькьр, у дьхԝәст дьлбинийе бьдә ԝи у мәрьвед дьн, йед кӧ ԝедәре бун (Йуһʹәнна 19:25). Паши мьрьна Иса, Мәрйәме у дӧ жьнед дьн бьһарәтед бинхԝәш бона дәфьнкьрьна ԝи анинә тʹьрбе (Маркос 16:1, 2). Чахе Иса жь мьрьне һатә рʹакьрьне, Мәрйәме әԝ дит у перʹа хәбәр да. Әв мәщал нәкʹәтьбу дәсте гәләк шагьрта (Йуһʹәнна 20:11-18). w23.01 27 ¶4

Гәрәке әм нәфькьрьн кӧ һәгәр мә бәре бь дьл у щан Йаһоԝарʹа хьзмәт дькьр, ньһа ида нә лазьм ә ԝәки әм һаԛас хирәт бьн. Һәгәр сьһʹәт-ԛәԝата мә ида нә мина йа бәре йә, диса жи әм гәрәке һʹьшйар бьминьн у һʹәта хьлазийе «һәр гав шьхӧле Хӧданда пешда һәрʹьн» (1 Корьнтʹи 15:58; Мәтта 24:13; Маркос 13:33). Һʹәбандьна мә гәрәке бь хирәт у бь дьл у щан бә. Әʹламәтийа кӧ Иса шандьбу щьвата Лаԝдькйа әшкәрә дькә кӧ ԝедәре, проблемәкә дьн һәбу. Һʹәбандьна ԝан ида «голи» бьбу. Ләма жи, Иса ԝанрʹа гот кӧ әԝана «мәʹрьм, рʹәбән, бәләнгаз, кор у тәʹзи» нә. Лазьм бу кӧ ԝана һʹәбандьнеда хирәта хԝә гӧрʹ кьра (Әʹйанти 3:16, 17, 19). Дәрс бона мә чь йә? Һәгәр хирәта мә кем буйә, гәрәке әм кʹәрәмед кӧ мә жь Йаһоԝа у жь тʹәшкиләта ԝи стандьнә, дьһа зедә бьшекьриньн (Әʹйанти 3:18). Ӧса жи әм гәрәке һаш жь хԝә һәбьн, ԝәки хԝәстьна мә кӧ бь жийинәкә рʹьһʹәт бьжин, нәбә мәʹни кӧ әм һʹәбандьна хԝә Йаһоԝарʹа дайньн сәр щийе дӧда. w22.05 3-4 ¶7-8

Бь һʹәзара сала, Йаһоԝа кʹьтебәкә мәхсус дьньвисә. Ве кʹьтебеда, навед кәсед амьн һәнә. Мәрьве пешьн, йе кӧ наве ԝи ве кʹьтебеда һатьбу ньвисандьне, кӧрʹе Адәм Һабил бу (Луԛа 11:50, 51). Жь ԝи чахива, Йаһоԝа навед мәрьвед дьн жи ве кʹьтебеда зедә кьрьнә, у иро теда бь милйона нав һәнә. Кʹьтеба Пироз ве кʹьтебе ча «пʹьртукәк[ә] биранине» у «кʹьтеба жийине» нав дькә (Малахи 3:16; Әʹйанти 3:5; 17:8). Ве кʹьтеба мәхсусда навед ԝан һʹәму мәрьва ньвиси йә, йед кӧ бь хоф у һӧрмәте Йаһоԝа дьһʹәбиньн, у наве ԝи ԛимәт дькьн. Мәщала ԝан һәйә кӧ жийина һʹәта-һʹәтайе бьстиньн. Һәрге әм сәр һʹиме ԛӧрбана Иса Мәсиһ незики Йаһоԝа бьн, наве мә жи дькарә ве кʹьтебеда бе ньвисандьне (Йуһʹәнна 3:16, 36). Фьрԛи тʹӧнә кӧ әм һивийа жийина сәр әʹзмана нә йан сәр әʹрде, әм гьшк жи дьхԝазьн ԝәки наве мә ве кʹьтебеда һәбә. w22.09 14 ¶1-2

Кʹьтеба Әʹйанти бәʹса «зийаки зәри мәзьн» дькә (Әʹйанти 12:3). Әв зийа тʹәви Иса Мәсиһ у мәләкед ԝи шәрʹ дькә (Әʹйанти 12:7-9). Әԝ һʹьщуми хьзмәткʹаред Хԝәде дькә у ԛәԝате дьдә щәʹнәԝьред политики (Әʹйанти 12:17; 13:4). Гәло әв зийа кʹе йә? Әԝ «мәʹре бәре» йә, кӧ «жерʹа Мирещьн у Шәйтʹан дьбежьн» (Әʹйанти 12:9; 20:2). Әԝ һʹәму дьжмьнед Йаһоԝа контрол дькә. Чь ԝе бе сәре зийа? Әʹйанти 20:1-3 дьбежә кӧ мәләкәк ԝе Мире-щьна бавежә «гәлийе һәй-ԝайе», демәк ча бежи әԝе кәледа гьрти бә. Һьнге әԝе «иди мьләта нәхальфинә, һʹәта һʹәзар сал тʹәмам бә». Паши ве йәке, Мире-щьна у щьнед ԝи ԝе бенә авитьне «нава гола агьре кʹьркʹуте», чь кӧ ԛьркьрьна һʹәта-һʹәтайе те һʹәсабе. Дә бьдә бәр чʹәʹве хԝә, кӧ бе Мире-щьна у щьнед ԝи, жийин ԝе чьԛас хԝәш бә! w22.05 14 ¶19-20

Иса йәки хәбатһʹьз бу. Әԝи жь зарʹотийеда шьхӧле нәщартийе дькьр (Маркос 6:3). Бона де-баве ԝи һеса нибу әʹбура малбәте бькьн. Бешьк ԝана аликʹарийа Иса гәләк ԛимәт дькьр. Иса беԛьсур бу у ԛьсура хәбата ԝи жи тʹӧнә бу, ләма жи дьбәкә мьштәрийа дьхԝәстьн чекьрьна дәстед ԝи ԛазанщ кьрана. Рʹаст ә Иса жь хәбата хԝәйә нәщартийе шабун дьстанд, диса жи әԝи ԝәʹдә дьдит ԝәки Йаһоԝарʹа хьзмәт кә (Йуһʹәнна 7:15). Паше ча хьзмәткʹаре һәртʹьм, Иса гӧһдаред хԝәрʹа ӧса гот: «Бона хԝарьна пʹучʹ нәхәбьтьн, ле бона ԝе хԝарьне бьхәбьтьн, йа кӧ жийина һʹәта-һʹәтайеда дьминә» (Йуһʹәнна 6:27). Ԝәʹде хьзмәтийа сәр Чʹийе, Иса ӧса гот: «Хьзне хԝәрʹа ль әʹзмен бьщьвиньн» (Мәтта 6:20). Биланийа жь Хԝәде али мә дькә, ԝәки әм ньһерʹандьна рʹаст һьндава хәбате хԝәй кьн. Кʹьтеба Пироз дьбежә, ԝәки әм гәрәке бь дьл у щан бьхәбьтьн. w22.05 22 ¶9-10

Әйньке Тимотʹейорʹа мәсәләкә баш һишт. Бешьк, Тимотʹейо жь кьред дийа хԝә дьдит, кӧ әԝ чьԛас Йаһоԝа һʹьз дькә у кӧ хьзмәтийа Йаһоԝарʹа, шабунәкә чьԛас мәзьн жерʹа тинә. Иро жи, гәләк дайик «бе готьн» нәфәред хԝә анинә сәр рʹийа рʹастийе (1 Пәтрус 3:1, 2). Һун жи дькарьн ӧса бькьн. Гәло чь щурʹәйи? Һәри зедә дина хԝә бьдьн достийа хԝә тʹәви Йаһоԝа (Ԛануна Дӧщари 6:5, 6). Мина гәләк дайика, һун жи гәләк ԛӧрбана дькьн. Бона һʹәԝщед физики йед зарʹед хԝә, һун ԝәхт, пʹәрә, хәԝ у тьштед дьн ԛӧрбан дькьн. Диса жи, гәрәке һун бь ван тьшта һаԛас мьжул нәбьн, ԝәки ԝәʹде ԝә нәминә кӧ һун достийа хԝә тʹәви Йаһоԝа ԛәԝи кьн. Ләма жи бәрдәԝам кьн ԝәʹдә вәԛәтиньн бона дӧайе шәхси, леколина Кʹьтеба Пироз у щьвина. Бь ви щурʹәйи, һуне незики Йаһоԝа бьн, у һуне һьм нәфәред хԝәрʹа һьм жи кәсед дьнрʹа бьбьнә мәсәла баш. w22.04 16 ¶1; 19 ¶12-13

Әм чьԛас ша нә кӧ щабдарийа мә нинә, ԝәки әм диԝана мәрьва бькьн. Һʹакьме мәзьн, Йаһоԝа, ԝе хԝәха ве йәке бькә (Рʹомайи 14:10-12). Йаһоԝа жь мә баштьр занә кӧ чь рʹаст ә у чь на, у әм дькарьн бь тʹәмами баԝәр бьн, кӧ Әԝе һәртʹьм ль гора принсипед хԝәйи беԛьсур диԝане бькә (Дәстпебун 18:25). Әԝ тʹӧ щар нәһәԛийе накә! Әм һʹьзрәта ԝе рʹоже нә, гава Йаһоԝа ԝе һʹәму зийанед кӧ жь ԛьсурдарийе у гӧнә тен, бьдә һьлдане. Һьнге һʹәму бьринед мәйә физики у емосийали ԝе ида ԛәнщ бьн (Зәбур 72:12-14; Әʹйанти 21:3, 4). Әме ԝана ида нәйньн бира хԝә. Һʹәта кӧ әв рʹожа хԝәш бе, ԝәрә әм мина Йаһоԝа рʹәʹм бьн у бьбахшиньнә мәрьва! w22.06 13 ¶18-19

Һʹакьмәки баш гәрәке ԛануна рʹьнд бьзаньбә. Хенщи ве йәке, пешийа кӧ һʹакьм сафикьрьне бькә, әԝ гәрәке бьзаньбә кӧ бь рʹасти чь ԛәԝьмийә. Ԝи алида жи Йаһоԝа Һʹакьме һәри баш ә, чьмки әԝ һаш жь һәр тьшти һәйә. Дьнйайеда, гава һʹакьм диԝана кәсәки дькьн, әԝана бь тʹәмами һаш жь дәрәща ԝи тʹӧнә нә. Әԝана тʹәне ль гора тьштед кӧ дьбьһен йан дьвиньн, сафикьрьне дькьн. Ле Йаһоԝа ӧса нинә. Әԝ бь тʹәмами һаш жь һәр тьшти һәйә (Дәстпебун 18:20, 21; Зәбур 90:8). Йаһоԝа рʹьнд занә кӧ сәр рʹабун-рʹуньштьна кәсәки һʹӧкӧм дькьн факторед генетик, тьштед кӧ бьчʹуктайеда һатьнә сәре ԝи, тьштед кӧ дәр-дора ԝи дьԛәԝьмьн у һʹале ԝийи психоложи. Сәрда жи, Йаһоԝа дьле мәрьва жи дьвинә. Әԝ нет, фькьр у хԝәстьнед һәр кәси занә. Тʹӧ тьшт нькарә жь Йаһоԝа бе вәшартьне (Ибрани 4:13). Ләма жи гава Йаһоԝа дьбахшинә кәсәки, мәʹни әԝ ә кӧ әԝ һур бь һур һәр тьшти занә. w22.06 4 ¶8-9

Гәрәке әм рʹьнд бьзаньбьн кӧ Мире-щьна кʹижан метод дьда хәбате, ԝәки Ибо амьн нәминә, чьмки иро жи әԝ ԝан метода дьдә хәбате. Мире-щьна дьгот кӧ әм Йаһоԝа жь дьл һʹьз накьн, у һәгәр әм мәщбур бьн, әме тʹәрка ԝи бьдьн, ԝәки әʹмьре хԝә хьлаз кьн. Ӧса жи, Мире-щьна дьбежә кӧ Хԝәде мә һʹьз накә у амьнийа мә бона ԝи бадиһәԝа йә. Әм һаш жь дәрәԝед ԝи һәнә у итʹбарийа хԝә Йаһоԝа тиньн, ләма жи әм найенә хапандьне. Гава әм рʹасти тәнгасийа тен, мәщал дькʹәвә дәсте мә ԝәки дьһа баш хԝә нас кьн. Тәнгасийед кӧ рʹасти Ибо һатьбун, али ԝи кьрьн ԝәки әԝ һьнә кемасийед хԝә бьвинә у рʹаст кә. Мәсәлә, әԝ һин бу кӧ гәрәке дьһа мьлук бә (Ибо 42:3). Әм жи гава рʹасти тәнгасийа тен, дькарьн гәләк тьшт дәрһәԛа хԝә һин бьн у кемасийед хԝә бьвиньн. Гава әм кемасийед хԝә тедәрдьхьн, әм дькарьн сәр хԝә бьхәбьтьн у хԝә рʹаст кьн. w22.06 23 ¶13-14

Йаһоԝа соз дьдә кӧ әԝе али мә бькә. Мәсәлә, пешийа кӧ Йаһоԝа гот «һун шәʹдед мьн ьн», әԝи ӧса готьбу: «Гава тӧ аварʹа дәрбаз бьби, әзе бь тәрʹа бьм. Гава тӧ чʹәмарʹа дәрбаз бьби жи, ԝе сәр тәрʹа нәԛәльбьн. Гава тӧ нав егьррʹа дәрбаз бьби, те нәшәԝьти у ԝе пʹета егьр тә нәшәԝьтинә» (Ишайа 43:2, ИМ). Ԝәʹде хьзмәтийе, әм щарна рʹасти чәтьнайед ӧса тен, йед кӧ ча бежи мина «ав» йан «егьр» ьн. Ле диса жи, бь аликʹарийа Йаһоԝа, әм бәрдәԝам дькьн хьзмәтийа хԝә тиньн сери (Ишайа 41:13). Иро гәләк мәрьв гӧһ надьн мьзгинийа Хԝәде, йа кӧ әм бәла дькьн. Ле әв йәк найе һʹәсабе, кӧ әм хьзмәткʹаред баш ниньн. Әм заньн кӧ гава әм хьзмәтийа хԝә бь амьни тиньн сери, Йаһоԝа жь мә рʹази йә. Паԝлосе шанди ӧса готьбу: «Һәр кәсе һәԛе хԝә бьстинә, ԝәкә хәбата хԝә» (1 Корьнтʹи 3:8; 4:1, 2). w22.11 4 ¶5-6

Иро пʹехәмбәртийед жь Кʹьтеба Пироз бәр чʹәʹве мә тенә сери. Мәрьвед «жь һәр зьман у жь һәр мьләти» ньһа ‹зьмане паԛьж› йа рʹастийа Кʹьтеба Пироз һин дьбьн (Зәкәрйа 8:23, ИМ; Сефанйа 3:9). Тʹәшкиләта Йаһоԝада зедәтьри 8 милйон мәрьв жь 240 ԝәлати һәнә, у һәр сал бь дәһа һʹәзара мәрьв тенә ньхӧмандьне. Тьштәки кӧ жь ван һәжмара фәрзтьр ә әв ә, кӧ әв шагьртед тʹәзә «мәрьве ну» ль хԝә кьрьнә (Колоси 3:8-10). Гәләк жь ԝан тʹәрка бенамуси, зордари, насйонализм у фьрԛикьрьна ортʹа мәрьва, данә. Чаԝа кӧ Ишайа 2:4-да һатьбу пʹехәмбәртикьрьне, әԝ ида ‹һини шәрʹ набьн›. Хирәта мә кӧ «мәрьве ну» ль хԝә бькьн, сәр кәсед дьн жи һʹӧкӧм дькә у али ԝан дькә кӧ әԝ жи бьбьн шагьртед Иса Мәсиһ. Ӧса жи, гава әм чь жь дәсте мә те дькьн кӧ «мәрьве ну» ль хԝә бькьн, әм избат дькьн ԝәки әм пәй рʹебәре хԝә Иса Мәсиһ дьчьн (Йуһʹәнна 13:35). Әв һәр тьшт ньшкева набә. Бь сайа аликʹарийа Иса әм пешда дьчьн. w22.07 9 ¶7-8

Чахе әм Йаһоԝарʹа дӧа дькьн, гәрәке әм бь ԛәдьр хәбәр дьн. Ԝәрә әм дина хԝә бьдьнә хәԝн-хәйала Ишайа, Һәзәԛел, Данийел у Йуһʹәнна. Ван хәԝн-хәйалада Йаһоԝа ча Пʹадшаки мәзьн әʹйан дьбә. Мәсәлә, хәԝн-хәйала Ишайа пʹехәмбәрда, Йаһоԝа «ль сәр тʹәхтәки бьльнд у мәзьн рʹуньшти» бу (Ишайа 6:1-3). Хәԝн-хәйала Һәзәԛел пʹехәмбәрда, Йаһоԝа ль сәр әʹрәбәйа хԝә йа әʹзмани рʹуньшти бу, у дәр-дора ԝи мина кʹәскәсор дьбьрьԛи (Һәзәԛел 1:26-28). Хәԝн-хәйала Данийелда, «Йе Һәрһәйи» бь кʹьнще сьпи хӧйа дькьр у тʹәхте ԝи мина алава агьр дьшьхӧли (Данийел 7:9, 10, ИМ). Хәԝн-хәйала Йуһʹәннайе шандида, Йаһоԝа ль сәр тʹәхтәки рʹуньшти бу, у «кʹәскәсоре жи дора тʹәхт гьртьбу, мина ишьԛа зьмруде» (Әʹйанти 4:2-4). Гава әм рʹумәта Йаһоԝайә мәзьн дьдьн бәр чʹәʹве хԝә, әм фәʹм дькьн ԝәки дӧа ԛәдьрәки чьԛас мәзьн ә. Ләма жи гәрәке әм бь ԛәдьр ԝирʹа дӧа бькьн. w22.07 20 ¶3

Щаһьлно Мире-щьна дьхԝазә рʹийа ԝә бьгьрә, ԝәки һун рʹӧһʹанида пешда нәчьн. Мәсәлә, әԝ һәр тьшти дькә, кӧ дәрһәԛа һьнә һинкьрьнед Кʹьтеба Пироз, шьке бькә дьле ԝә. Һьнә кәс дьԛәԝьмә ԝәрʹа бежьн, ԝәки Хԝәде тʹӧнә у һәр тьшт хԝәха пешда һатийә. Гава тӧ бьчʹук буй, дьбәкә тӧ дәрһәԛа ве йәке гәләк нәдьфькьрийи, ле дьԛәԝьмә әв тʹема рʹожәке сәр дәрсед мәкʹтәбе дәрбаз бә. Готьнед дәрсдара дәрһәԛа теорийа еволусийайе, дьбәкә бь логики бе кʹьфше. Ле дәрсдар һьлбәт ван избатийа кӧ Хԝәде һәйә, тʹӧ щар кʹур леколин нәкьрьнә. Бинә бира хԝә кӧ Мәтʹәлок 18:17 чь дьбежә: «Йе пешийе готьна хԝә дьбежә, кӧ әԝ рʹаст дәре, ле гава дәԝкьре ԝи бе, ԝе бе әʹнәнәкьрьне». Дәԝса кӧ тӧ ван тьшта йед кӧ мәкʹтәбеда тенә готьне, чʹәʹвгьрти ԛәбул ки, рʹьнд дина хԝә бьдә рʹастийед Кʹьтеба Пироз. w22.08 2 ¶2; 4 ¶8

Әм дьхԝазьн мәʹна готьнед кӧ әм Хәбәра Хԝәдеда дьхуньн фәʹм бькьн. Һәрге әм ӧса нәкьн, әме жь хԝәндьне бь тʹәмами кʹаре нәстиньн. Мәсәлә, дина хԝә бьдә хәбәрдана Иса тʹәви ԛанунзанәки (Луԛа 10:25-29). Әԝи Иса пьрси кӧ әԝ чаԝа дькарә жийина һʹәта-һʹәтайе ԛазанщ кә. Иса щаба ԝи жь Хәбәра Хԝәде да. Иса ӧса гот: «Ԛанунеда чь ньвисар ә? Тӧ чаԝа дьхуни?» Ԝи мери щаба рʹаст да. Әԝи жь Ньвисаред Пироз хәбәр да у гот кӧ гәрәке әм Хԝәде у һәвале хԝә һʹьз бькьн (Ԛануна Кʹаһинтийе 19:18; Ԛануна Дӧщари 6:5). Ле паше әԝи Исарʹа ӧса гот: «Һәвале мьн кʹи йә?» Әве пьрсе дәрһәԛа ԝи тьштәк әшкәрә кьр. Әԝи мәʹна тьштед кӧ хԝәндьбу фәʹм нәкьрьбу. Ләма жи әԝи ньзаньбу кӧ чаԝа ван рʹеза жийина хԝәда бьдә хәбате. Әм һʹәԝще аликʹарийа Йаһоԝа нә, кӧ бькарьбьн Хәбәра ԝи фәʹм бькьн. Ләма жи жь ԝи рʹӧһʹе пироз бьхԝазә кӧ бькарьби ча лазьм ә дина хԝә бьди Хәбәра ԝи у жийина хԝәда бьди хәбате. w23.02 9 ¶4-5

«Тӧ чаԝа һати сәр рʹийа рʹастийе?» Нава Шәʹдед Йаһоԝада, әв пьрс гәләк щара те дайине. Гава әм һәврʹа дьбьнә нас, йәк жь пьрсед пешьн, йед кӧ әм жь һәвдӧ дьпьрсьн, әв ә. Әм гәләк һʹьз дькьн һәвдӧрʹа дәрһәԛа хԝә гьли кьн у бежьн, ԝәки мә чаԝа Йаһоԝа нас кьрийә (Рʹомайи 1:11). Хәбәрданед ӧса тиньн бира мә, ԝәки рʹийа рʹастийе чьԛас ԛимәт ә. Ӧса жи, әм сафи дькьн кӧ тʹьме «нава рʹастийеда» бьминьн, демәк ль гора хԝәстьна Йаһоԝа. Мәʹни гәләк ьн кӧ чьрʹа әм рʹастийе һʹьз дькьн. Йа һәри фәрз, әм Йаһоԝа һʹьз дькьн, йе кӧ Канийа рʹастийе йә. Бь сайа Кʹьтеба Пироз, әм нә тʹәне һин бунә кӧ әԝ Әʹфьрандаре әʹрд у әʹзмана йә, ле әм пеһʹәсийанә кӧ әԝ Баве мәйи дьлован ә у бона мә хәм дькә (1 Пәтрус 5:7). w22.08 14 ¶1, 3

Паԝлосе шанди хушк-бьрарʹа гот ԝәки әԝана «ԛәнщикьрьнеда» һелана бьдьнә һәв (Ибрани 10:24). Әԝи нә тʹәне бь готьнед хԝә, ле бь кьред хԝә жи али хушк-бьра дькьр. Мәсәлә, гава Щьһустанеда хәла дәстпебу, Паԝлос бона һьнә һʹәԝщед хушк-бьред ԝедәре хәм кьр (Кʹаред Шандийа 11:27-30). Паԝлос чьԛас жи шьхӧле бәлакьрьна мьзгинийева гьредайи бу, диса жи әԝ һәртʹьм һазьр бу аликʹарийе бьдә бәләнгаза. Бь ви щурʹәйи, әԝи баԝәрийа хушк-бьра ава дькьр, кӧ Йаһоԝа ԝе ԝана хԝәй кә. Иро, гава әм ԝәхт, хирәт у фәрәсәтед хԝә дьдьнә хәбате, ԝәки паши тʹәшԛәлед тʹәбийәте аликʹарийе бьдьн хушк-бьра, йан жи бона шьхӧле һʹәмдьнйайе пʹәра ԛӧрбан дькьн, бь ве йәке әм жи баԝәрийа хушк-бьра ава дькьн. Ӧса әм али хушк-бьра дькьн, ԝәки итʹбарийа хԝә Йаһоԝа биньн, кӧ әԝе тʹӧ щар ԝана нәһелә. w22.08 24 ¶14

Тʹәрихи нишан дькә, ԝәки гәләк тьштед кӧ бәреда Кʹьтеба Пирозда һатьбун ньвисаре, бь ԛьрʹна шунда һатьн сери. Әм әʹщебмайи наминьн, чьмки әм заньн, кӧ канийа ван готьна, Йаһоԝа йә. Бьдә бәр чʹәʹве хԝә, кӧ Кʹьтеба Пирозда дәрһәԛа ԝеранкьрьна Бабилоне чь һатьбу готьне. Ԛьрʹна 8-да Б.Д.М., Ишайа пʹехәмбәр жь бина бәр Хԝәде ньвиси бу, кӧ бажаре Бабилоне, кʹижан кӧ ԝи чахи нав у дәнг бу, ԝе бе зәфткьрьне. Сәрда жи, әԝи пʹехәмбәрти кьрьбу, кӧ наве ԝи мери, кʹижан кӧ ԝе бажер бьндәст кә, Корәш ә. Ишайа пʹехәмбәр готьбу, кӧ ча дора бажар ԝе бе гьртьне (Ишайа 44:27–45:2). Ӧса жи, Ишайа пешда готьбу, кӧ ахьрийеда Бабилон ԝе бь тʹәмами бе ԝеранкьрьне у тʹӧ щар ԝе нәйе авакьрьне (Ишайа 13:19, 20). Сала 539-да Б.Д.М., бажаре Бабилоне кʹәтә дәсте Мәдийа-Фарьса, у иро ԝи щийи тʹәне кәвьр-кӧчʹьк манә. w23.01 4 ¶10

Йаһоԝа мә бьжартийә, кӧ әм бьбьнә пʹара малбәта ԝи. Ԝәрә бьфькьрә кӧ әв йәк бона мә ԛәдьрәки чьԛас мәзьн ә у әм жь ве йәке чьԛас кʹаре дьстиньн! (Маркос 10:29, 30) Сәр тʹәмамийа дьнйайе, хушк-бьред мә һәнә, йед кӧ мина мә Йаһоԝа һʹьз дькьн у хирәт дькьн кӧ ль гора принсипед ԝи бьжин. Гава әм хушк-бьред дьн щара пешьн нас дькьн, әм һәвдӧ дәрберʹа ча нәфәред мале ԛәбул дькьн. У фьрԛи тʹӧнә зьман, култур у кʹьнщхԝәкьрьна мә чьԛас жь һәв щӧдә дьбьн. Ле һʹәчʹи зәʹф мә хԝәш те чахе әм тʹәви ԝан Баве хԝәйи әʹзмана дьһʹәбиньн, у гәләк фәрз ә ԝәки әм тʹәви хушк-бьра йәктийеда бьн (Зәбур 133:1). Щарна әԝана али мә дькьн, ԝәки әм баре хԝә һьлгьрьн (Рʹомайи 15:1; Галати 6:2). Ӧса жи, әԝана дьле мә ԛәԝи дькьн, сәва кӧ әм хьзмәтийа Йаһоԝада хирәт бьминьн у достийа хԝә тʹәви Йаһоԝа хԝәй кьн (Ибрани 10:23-25). Ԝәрә бьфькьрьн, һʹале мә ԝе ча буйа, һәрге щьвате али мә нәкьра ԝәки әм һьмбәри дьжмьнед хԝә, демәк һьмбәри Мире-щьна у дьнйа хьраб, ԛәԝи бьсәкьньн. w22.09 2-3 ¶3-4

Чахе әм малпәред сосйал дьдьнә хәбате, әв йәк щарна зор ә. Һәрге әм мьԛати хԝә нибьн, әм дькарьн бе һʹәмде хԝә тьштед конфиденсйал гәләкарʹа әшкәрә кьн. Паши кӧ әм информасийәке бәла кьн, әм ида нькарьн контрол кьн мәрьв ԝе ча ве йәке бьдьнә хәбате, у чь зийан әв йәк дькарә бинә. Ӧса жи, хԝәгьртьн али мә дькә хԝә кәрʹ кьн, гава йед мьԛабьл бь фелбазийе дьхԝазьн информасийа жь мә дәрхьн, йа кӧ дькарә зийане бьдә хушк-бьред мә. Щарна полис тьштед ӧса дькьн, илаһи ԝан ԝәлатада кʹидәре кӧ шьхӧле Шәʹдед Йаһоԝа бь тʹәмами йан һьнә тьштада ԛәдәхәкьри йә. Дәрәщед ӧсада, чаԝа кӧ Кʹьтеба Пирозда те готьне, гәрәке әм ‹гәмәке бавежьнә› дәве хԝә (Зәбур 39:1). Бәле, лазьм ә кӧ әм һәртʹьм бь итʹбар бьн, һьндава малбәта хԝә, һәвале хԝә, һьндава хушк-бьра у һьндава кәсед дьн. У сәва кӧ әм бь итʹбар бьн, әм һʹәԝще хԝәгьртьне нә. w22.09 13 ¶16

Сәва бь рʹасти бәхтәԝар бьн, гәрәке әм хԝарьна рʹӧһʹани бьстиньн. Иса ӧса готьбу: «Инсан тʹәне бь нен нажи, ле бь һәр хәбәра кӧ жь дәве Хԝәде дәрдькʹәвә» (Мәтта 4:4). Ләма бьра рʹожәк жи ӧса дәрбаз нәбә, кӧ әм Хәбәра Хԝәде нәхуньн. Бь сайа Кʹьтеба Пироз, Йаһоԝа бь һʹьзкьрьне мә һин дькә кӧ әм чаԝа дькарьн бь жийинәкә бәхтәԝар бьжин. Жь ве кʹьтебе әм педьһʹәсьн, кӧ ԛьрара ԝи бона мә чь йә. Ӧса жи, әм һин дьбьн кӧ әм чаԝа дькарьн незики ԝи бьн у гәрәке әм чь бькьн, ԝәки Әԝ гӧнед мә бьбахшинә. Хенщи ве йәке, әм педьһʹәсьн кӧ Йаһоԝа бона ахьрийе чь соз дайә (Йерәмйа 29:11). Гава әм Кʹьтеба Пироз леколин дькьн, рʹастийа дәрһәԛа ван тьшта дьле мә ша дькә. Гава әм сәва проблемед жийине дьлтәнг дьбьн, ԝе баш бә ԝәки әм Хәбәра Йаһоԝа һе зедә бьхуньн у сәр ԝе кʹур бьфькьрьн. w22.10 7 ¶4-6

Кʹьтеба Пирозда ширәт те дайине, кӧ щерʹьбанди бьн. Чахе әм ль гора принсипед Кʹьтеба Пироз дьжин, әм биланийе ԛазанщ дькьн у дьбьнә мәрьвнә щерʹьбанди. Һеди-һеди, әм педьһʹәсьн кӧ әв принсип чаԝа дькарьн али мә бькьн, ԝәки әм хԝә жь проблема дур бьгьрьн у сафикьрьнед билан бькьн. Ԝе баш бә кӧ әм хԝә бьщерʹьбиньн, һәла әм ве йәкеда пешда дьчьн йан на. Мәсәлә, һәрге әм Кʹьтеба Пироз һин дьбьн у тʹәне чәнд щара чунә щьвата, ԝе баш бә кӧ әм жь хԝә бьпьрсьн, һәла мә чьма һе соз нәдайә Йаһоԝа, ԝәки ԝирʹа хьзмәт кьн у һе нәһатьнә ньхӧмандьне. Йан жи, һәрге әм ида ньхӧманди нә, гәло әм ча мьзгинван у дәрсдар пешда дьчьн? Гәло сафикьрьнед мә нишан дькьн, ԝәки әм ль гора рʹебәрийа Кʹьтеба Пироз дьжин? Гәло әм ван һʹӧнӧра һьндава мәрьвада дьдьнә кʹьфше, йед кӧ Иса дьда кʹьфше? Һәрге лазьм бә кӧ әм һьнә тьштада хԝә рʹаст кьн, ԝәрә әм гӧһ бьдьн ширәтед Йаһоԝа, йед кӧ биланийе дьдьнә кәсед нәщерʹьбанди (Зәбур 19:7). w22.10 20 ¶8

Һәзәԛел пʹехәмбәр пе чʹәʹве хԝә дитьбу, ԝәки рʹӧһʹе Хԝәде чьԛас ԛәԝат ә. Хәԝн-хәйаледа, Йаһоԝа нишани ԝи кьр, ԝәки рʹӧһʹе пироз чаԝа сәр мәләка у сәр тʹәкәрәкед мәзьн йед әʹрәба әʹзмани, һʹӧкӧм дькә (Һәзәԛел 1:21). Гава Һәзәԛел әв йәк дит, әԝ дәвәрʹуйа кʹәтә сәр әʹрде (Һәзәԛел 1:28). Паше, һәр щар чахе Һәзәԛел әв хәԝн-хәйал дьани бира хԝә, баԝәрийа ԝи бешьк дьһа ԛәԝи дьбу, кӧ бь аликʹарийа рʹӧһʹе Хԝәде, әԝе бькарьбә хьзмәтийа хԝә бинә сери. Йаһоԝа Һәзәԛелрʹа ӧса гот: «Лаԝе мәрьв, рʹабә сәр пʹийа кӧ әз бь тәрʹа бьахьфьм [хәбәр дьм]!». Ван готьна у рʹӧһʹе Хԝәдейи пироз ԛәԝат да Һәзәԛел, ԝәки әԝ рʹабә сәр пʹийа (Һәзәԛел 2:1, 2). Гава Һәзәԛел хьзмәтийа хԝә дьани сери, «дәсте» Йаһоԝа, демәк рʹӧһʹе пироз, һәртʹьм рʹебәрийа ԝи дькьр (Һәзәԛел 3:22; 8:1; 33:22; 37:1; 40:1). w22.11 4 ¶7-8

Ишайа пʹехәмбәр гот кӧ Йаһоԝа мина дәрсдарәки йә кӧ пьшт шагьртед хԝә рʹе дьчә у рʹебәрийе дьдә ԝан. Бәле, Йаһоԝа жи бь сайа Кʹьтеба Пироз, йа кӧ бь ԛьрʹна бәре һатьбу ньвисаре, тʹәви мә хәбәр дьдә. Ләма жи гава әм Кʹьтеба Пироз дьхуньн, әм дәнге Хԝәде ча бежи пьшт хԝәва дьбьһен (Ишайа 51:4). Гәло әм чаԝа дькарьн жь рʹебәрийа Йаһоԝа кʹаре бьстиньн? Ԝәрә әм биньнә бира хԝә, кӧ Ишайа чь готьбу: «Рʹе әв ә, ве рʹерʹа һәрʹьн!». Бәс нинә, ԝәки әм тʹәне бьзаньбьн кӧ «рʹе» кʹижан ә. Лазьм ә кӧ әм «ве рʹерʹа һәрʹьн». Йаһоԝа бь сайа тʹәшкиләта хԝә у Хәбәра хԝә мәрʹа шьровәдькә у зәлал дькә, ԝәки әм һин бьн, кӧ Әԝ жь мә чь дәʹԝа дькә у әм чаԝа дькарьн ль гора хԝәстьна Ԝи бьжин. Сәва кӧ әм бь шабуне Йаһоԝарʹа хьзмәт кьн у кʹәрәмед ԝи бьстиньн, әм гәрәке һәрдӧ гава бавежьн. w22.11 11 ¶10-11

Зутьрәке паши ԝе йәке чахе һʹәчʹи зәʹф шандийед Иса мьрьн, Мәсиһийед ԛәлп кʹәтьн нав щьвате (Мәтта 13:24-27, 37-39). Әԝана «тьштед хельф» хәбәр дьдан, сәва кӧ «шагьрта пәй хԝә бьбьн» (Кʹаред Шандийа 20:30). Мәсәлә, әԝ Мәсиһийед ԛәлп дьготьн, кӧ жь бо бахшандьна гӧнед мәрьва, бәс нинә кӧ бәдәна Иса Мәсиһ «щарәке бона гӧнәһьлдана гәләка» ча ԛӧрбан бе дайине. Ԝана дьгот кӧ ԛӧрбанбуна Иса диса у диса гәрәке бе дайине (Ибрани 9:27, 28). Иро жи гәләк мәрьв баԝәрийа хԝә ве һинкьрьна ԛәлп тиньн. Әԝана һәр һʹәфте, йан жи щарна һәр рʹож дереда тʹоп дьбьн, сәва кӧ ԛӧрбанбуна Иса Мәсиһ дәрбаз кьн. Ле һьнә деред дьнда, мьрьна Иса Мәсиһ дьһа кем дәрбаз дькьн, у һʹәчʹи зәʹф жь ԝана зәлал фәʹм накьн, ԝәки ԛӧрбанбуна Иса Мәсиһ чь те һʹәсабе. w23.01 21 ¶5

Ԝәʹде Сәрԝертийа Һʹәзарсали, кәсед мьри ԝе бенә рʹакьрьне, у мәрьвед гӧһдар ԝе бьгьһижьнә беԛьсуртийе. Мәрьвед кӧ Йаһоԝа ԝана ча кәсед рʹаст һʹәсаб дькә, ԝе «ль әʹрде ԝар бьн у һәр-һәйе ԝе сәр бьжин» (Зәбур 37:10, 11, 29). У мьрьн, демәк «дьжмьне хьлазийе» ԝе кʹокева бе рʹакьрьне (1 Корьнтʹи 15:26). Һевийа жийина һәр-һәйи һевикә сахләм ә, чьмки һʹиме ве һевийе, Хәбәра Хԝәде йә. Бь сайа ве һевийе, әм дькарьн ль һьмбәри тәнгасийед ван рʹожед ахьрийе Йаһоԝарʹа амьн бьминьн. Һәмьки, сәва кӧ Йаһоԝа жь мә рʹази бә, бәс нинә, кӧ әм тʹәне жь бо жийина һәр-һәйи амьн бьминьн. Йа һәри фәрз әв ә, кӧ әм Йаһоԝа у Иса Мәсиһирʹа амьн бьминьн, чьмки әм ԝана гәләк һʹьз дькьн (2 Корьнтʹи 5:14, 15). Ләма жи, әм дьхԝазьн чʹәʹв бьдьнә ԝан у кәсед дьнрʹа дәрһәԛа һевийа хԝә гьли кьн (Рʹомайи 10:13-15). Һәрге әм хԝәһʹьз нибьн, ле дәствәкьри бьн, Йаһоԝа ԝе мә һʹәта-һʹәтайе ча достед хԝә ԛәбул бькә. w22.12 6-7 ¶15-16

Ԝәʹде пәйкʹәтьна, әм дькарьн гәләк тьштед кӧ дьлрʹьһʹәтийе дьдьн мә, ӧнда кьн. Тьрс у хоф дькарә бькʹәвә дьле мә, кӧ ахьрийеда чь ԝе бьԛәԝьмә. Фькьр у һәстед ӧса нормал ьн. Ле гәрәке әм һаш жь хԝә һәбьн, чьмки Иса пешда готьбу кӧ шагьртед ԝи дькарьн ԝәʹде зерандьна бьлькʹӧмьн (Йуһʹәнна 16:1, 2). Рʹаст ә әм дькарьн рʹасти зерандьна бен, ле чаԝа Иса готьбу, әм дькарьн амьн бьминьн (Йуһʹәнна 15:20; 16:33). Гава шьхӧле мә бь тʹәмами йан һьнә алийада те ԛәдәхәкьрьне, дьбәкә әм жь Бәйтʹәле йан жь рʹуспийа рʹебәрийе бьстиньн. Нета ве рʹебәрийе әԝ ә, кӧ әм бенә хԝәйкьрьне, хԝарьна рʹӧһʹани бәрдәԝам кьн бьстиньн у һʹәта кӧ мәщал һәйә мьзгинийе бәла кьн. Әм бь дьл у щан дьхԝазьн ль гора ԝе бьмәшьн (Аԛуб 3:17). Ӧса жи, гәрәке әм тʹӧ щар информасийа дәрһәԛа хушк-бьра йан шьхӧлед щьвате, ԝан мәрьварʹа әшкәрә нәкьн, изьна кʹе тʹӧнә ве йәке бьзаньбә (Ԝаиз 3:7). w22.12 20-21 ¶14-16

Иро, Иса рʹебәрийа шагьртед хԝә дькә, ԝәки әԝана мьзгинийа Пʹадшатийа Хԝәде һʹәму дәра бәла кьн. Бь сайа тʹәшкиләта Йаһоԝа, Иса мә һин дькә у һащәтед лазьм дьдә мә, ԝәки әм мьзгинийе бәла кьн (Мәтта 28:18-20). Әм дьхԝазьн гӧрʹа Иса бькьн, ләма жи әм мьзгинийе бь дьл у щан бәла дькьн у мәрьва һин дькьн. Ӧса жи, һʹәта кӧ Йаһоԝа хьлазийа ве дьнйа хьраб бинә, әм дьхԝазьн һʹьшйар бьминьн. Һәрге әм ширәта жь Ибрани 6:11, 12 биньн сери, әме «һʹәта хьлазийе» һевийа хԝә ӧнда нәкьн. Йаһоԝа ида рʹож кʹьфш кьрийә кӧ кʹәнге дьнйа Мире-щьна ԛьрʹ кә. Гава әԝ рʹож бе, Йаһоԝа ԝе һʹәму созед хԝә бинә сери. Дьбәкә әм щарна дьфькьрьн кӧ хьлазийа ве дьнйайе дәрәнги дькʹәвә. Ле рʹожа Йаһоԝа ‹ԝе дәрәнг нәминә› (Һәбаԛуԛ 2:3, ИМ). Һʹәта һьнге, әм дьхԝазьн бь дьл у щан у бь сәбьр «һивийа Хԝәде хьлазкʹаре хԝә» бьн (Миха 7:7, ДТʹ). w23.02 19 ¶15-16

Мәрьве кӧ һьлдькʹьшә сәр чʹийе, нета ԝи әԝ ә кӧ бьгьһижә сәре чʹийе. Сәр рʹийа хԝә әԝ рʹасти гәләк щийед бәдәԝ те, бәр кʹижана дьсәкьнә у дина хԝә дьдә бәдәԝбуна тʹәбийәте. Анәгори ве йәке, тӧ жи тʹьме ԝәʹдә хԝәрʹа вәԛәтинә, сәва кӧ аԝа готи бьсәкьни у бьфькьри, һәла Йаһоԝа чаԝа али тә кьрийә, ԝәки нава тәнгасийада сәбьр ки. Һәр евар жь хԝә бьпьрсә: «Гәло, мьн иро чьда кʹәрәма Йаһоԝа дит? Һәрге жи проблема мьн сафи набә, гәло Йаһоԝа чаԝа али мьн дькә кӧ әз сәбьр кьм?» Чь жи һәбә, аликʹари у кʹәрәмед Йаһоԝа тʹӧ щар бир нәкә. Дьԛәԝьмә тӧ дӧа дьки, сәва кӧ тәнгасийа тә хьлаз бә (Филипи 4:6). Ле гәрәке әм тʹӧ щар бир нәкьн, кӧ Йаһоԝа иро ча мә кʹәрәм дькә. Йаһоԝа соз дайә мә, кӧ әԝе ԛәԝате бьдә мә у али мә бькә, ԝәки әм сәбьр кьн. Ләма жи тʹьме сәва аликʹарийа Йаһоԝа рʹази бә. Чаԝа кӧ Йаһоԝа һәртʹьм рʹийа Усьв рʹаст дькьр, баԝәр бә кӧ әԝе рʹийа тә жи рʹаст кә, ԝәки тӧ сәркʹәви! (Дәстпебун 41:51, 52) w23.01 19 ¶17-18

Жь хԝә бьпьрсә: «Гәло жийина мьн нишан дькә, ԝәки әз рʹьнд фәʹм дькьм, кӧ хьлазийа ве дьнйайе гәләк незик ә? Гәло сафикьрьнед мьн дәрһәԛа бьжартьна хәбат у һинбуне дьдьнә кʹьфше, ԝәки жийина мьнда хьзмәтийа Йаһоԝарʹа тьште һәри фәрз ә? Гәло әз баԝәр дькьм кӧ Йаһоԝа ԝе бона һʹәԝщед мьн у малбәта мьн хәм бькә?» Гава Йаһоԝа дьвинә кӧ әм ль гора ԛьрара ԝи дьжин, әԝ гәләк ша дьбә (Мәтта 6:25-27, 33; Филипи 4:12, 13). Әм гәрәке фькьред хԝә һәртʹьм бьщерʹьбиньн у һәрге лазьм бә, гәрәке әм ԝана рʹаст бькьн. Паԝлос Корьнтʹийарʹа ӧса гот: «Һун дьле хԝә бьщерʹьбиньн у дина хԝә бьдьне, кʹа һун нава баԝәрийеда нә? Хԝә әʹнәнә кьн» (2 Корьнтʹи 13:5). Сәва кӧ бәрдәԝам кьн һʹьше хԝә ну кьн, гәрәке әм Хәбәра Хԝәде бьхуньн у һин бьн кӧ мина ԝи бьфькьрьн. Паше, чь лазьм бә жи, гәрәке әм ве йәке бькьн кӧ хԝә ль гора ԛьрара Йаһоԝа рʹаст бькьн (1 Корьнтʹи 2:14-16). w23.01 9 ¶5-6