Щотмәһ

Ԝе баш бә кӧ щьватеда әм бь дәнге бьльнд кʹьлама бьстьрен у щабед рʹьнд һазьркьри бьдьн. Бона һьнәка чәтьн ә кӧ бәр кәсед дьн кʹьлама бьстьрен йан щабед хԝә бьдьн. Гәло әв йәк тәрʹа жи чәтьн ә? Һәгәр әре, ԝәрә әм бьвиньн кӧ чь али һьнәка кьрийә ԝәки тьрса хԝә алт кьн. Һьнәка тедәрхьстийә ԝәки кʹьлам али ԝан дькә бь дьл у щан бьстьрен. Гава әм щьватада кʹьлама дьбежьн, гәрәке нета мәйә сәрәкә әв бә, кӧ әм пәсьне Йаһоԝа бьдьн. Чахе тӧ хԝә бона щьвате һазьр дьки, кʹьлама жи һазьр кә. Дина хԝә дьде кӧ готьнед кʹьлама чаԝа тʹема щьвинева гьредайи йә, у нәфькьрә кӧ тӧ баш настьри. Бона һьнәка чәтьн ә сәр щьвате щаба хԝә бьдьн. Ле чь дькарә али тә бькә? Тʹьме һазьр бә кӧ щаба хԝә бьди. Баш ә гава тӧ кьн у һеса щаба хԝә дьди. Йаһоԝа гәләк хирәта мә дьшекьринә гава әм сәр щьвата наве Ԝи рʹумәт дькьн. w22.04 7-8 ¶12-15

Хәбәра «пьштован», йа кӧ ве рʹезеда һатийә хәбьтандьне, те һʹәсабе чахе мәрьвәк дьчә һәԝара кәсәки. Бинә бәр чʹәʹве хԝә, кӧ Йаһоԝа чаԝа бь ләз дьчә һәԝара кәсәки, йе кӧ кʹәтийә тәнгасийе. Бь тʹәхмина тә, гәло әв хәбәр нишан накә, ԝәки Йаһоԝа һазьр ә у дьхԝазә бьбә Пьштоване мә, демәк Аликʹаре мә? Бәле! Һәрге Йаһоԝа тʹәви мә йә, әм дькарьн нава тәʹли-тәнгийада жи бь шабуне сәбьр кьн. Гәло Йаһоԝа чаԝа али мә дькә? Сәва кӧ щаба ве пьрсе бьстиньн, ԝәрә әм дина хԝә бьдьнә кʹьтеба Ишайа, чьмки гәләк тьштед кӧ Ишайа пʹехәмбәр жь бина бәр Хԝәде ньвисибу, бона мә нә жи. Ӧса жи, Ишайа бь готьнед һеса шьровәкьрьбу, кӧ Йаһоԝа йәки чаԝа йә. Мәсәлә, сәре 30 йа кʹьтеба Ишайа бинә бәр чʹәʹве хԝә. Ви сәрида, Ишайа пе мәсәлед хԝәш зәлал кьрьбу, кӧ Йаһоԝа чаԝа али хьзмәткʹаред хԝә дькә. Әԝи нишан кьрьбу, кӧ Йаһоԝа (1) дӧайед мә дьбьһе у щаба ԝан дьдә, (2) рʹебәрийа мә дькә у (3) һьм ньһа, һьм жи ахьрийеда ԝе мә кʹәрәм кә. w22.11 8 ¶2-3

Иса щьватед Сьмирна у Фьладәлфйайерʹа гот, ԝәки әԝана зерандьна нәтьрсьн, чьмки амьнийа ԝан ԝе бе хәлаткьрьне (Әʹйанти 3:10). Гәрәке әм һазьр бьн, ԝәки әме рʹасти пәйкʹәтьна бен у гәрәке бәр зерандьна сәбьр кьн (Мәтта 24:9, 13; 2 Корьнтʹи 12:10). Гәло Иса чьрʹа ԝанрʹа бәʹса пәйкʹәтьна кьр? Кʹьтеба Әʹйанти ида пешда готьбу кӧ «рʹожа Хӧданда», демәк рʹожед мәда, хьзмәткʹаред Хԝәде ԝе рʹасти пәйкʹәтьна бен (Әʹйанти 1:10). Кʹьтеба Әʹйанти сәре 12 бәʹса шәрʹе әʹзмана дькә. Әв шәрʹ дәрберʹа паши ве йәке дәстпебу, чахе Иса бу Пʹадше Пʹадшатийа Хԝәде. Мьхайил, демәк Иса у мәләкед ԝи мьԛабьли Мире-щьна у щьнед ԝи шәрʹ кьрьн (Әʹйанти 12:7, 8). Ахьрийеда, дьжмьнед Хԝәде жь әʹзмен һатьнә авитьне. Ләма сәр әʹрде гәләк кӧл-дәрд у хәзәбед мәзьн пешда һатьн (Әʹйанти 12:9, 12). w22.05 5 ¶12-13

Диԝанед Йаһоԝа һәртʹьм рʹаст у һәԛ ьн. Әԝ тʹӧ щар фьрԛийе накә ортʹа мәрьва. Йаһоԝа ль гора бәжн-бал, дәԝләмәндти йан фәрәсәтед мәрьва, сафикьрьне накә, һәла бьбахшинә ԝи йан на (1 Самуйел 16:7; Аԛуб 2:1-4). Тʹӧ кәс нькарә зоре Йаһоԝа бькә йан жи рʹӧшәте бьдә ԝи, сәва кӧ әԝ тьштәки бькә. Әԝ тʹӧ щара сәр һʹиме емосийед хԝә сафикьрьна накә (Дәркʹәтьн 34:7). Бәле, Йаһоԝа Һʹакьме һәри баш ә, чьмки әԝ дәрһәԛа мә у һʹале мә һәр тьшти занә (Ԛануна Дӧщари 32:4). Ньвискʹаред Ньвисаред Ибрани, рʹьнд заньбун ԝәки бахшандьна Йаһоԝа мәхсус ә. Чаԝа кӧ фәрһәнгәкеда те готьне, ԝана хәбәрәкә Ибрани «хут тʹәне ԝи чахи дьданә хәбате, гава хәбәрдан дәрһәԛа бахшандьна жь Хԝәде дьчу», ԝана «әв хәбәр тʹӧ щар нәдьданә хәбате гава хәбәрдан дәрһәԛа бахшандьна жь мәрьва дьчу». Тʹәне Йаһоԝа дькарә бь тʹәмами бьбахшинә ԝан гӧнәкʹара, йед кӧ тʹобә дькьн. w22.06 4 ¶10-11

Һәгәр тӧ зарʹед хԝә тʹәне мәзьн дьки йан һәгәр мере тә Шәʹде Йаһоԝа нинә, баԝәр бә кӧ амьнийа тә хушк-бьра ԛәԝи дькә. Һәгәр һун дьфькьрьн кӧ зарʹед ԝә һинкьрьна ԝә ԛәбул накьн, һун дькарьн чь бькьн? Бир нәкьн кӧ сәва һинкьрьна зарʹа, ԝәхт лазьм ә. Гава мәрьв тʹохьмәки дьчинә, әԝ щарна бәрхԝә дькʹәвә һәла рʹожәке тʹохьм ԝе бьбә дарәкә бәрдар йан на. Әв йәк дәсте мәрьвда нинә, ле диса жи әԝ дькарә ав бьдә, ԝәки мәщала даре һәбә кӧ мәзьн бә (Маркос 4:26-29). Мина ве йәке, һун дьԛәԝьмә бәрхԝә дькʹәвьн һәла готьнед ԝә, дьгьһижьн дьле зарʹед ԝә йан на. Һәмьки, ахьрийеда зарʹ хԝәха сафикьрьне дькьн. Ле диса жи гава һун чь жь дәсте ԝә те дькьн кӧ ԝан һин кьн, һун мәщаләкә баш дьдьнә ԝан, ԝәки бьбьнә достед Йаһоԝа. w22.04 19-20 ¶16-17

Чахе Сьлеман Пʹадша бь амьни Йаһоԝарʹа хьзмәт дькьр, әԝи ньһерʹандьна рʹаст һьндава хԝә хԝәй дькьр. Хортанийа хԝәда, әԝи синоред хԝә бь мьлукти ԛәбул дькьр у жь Йаһоԝа рʹебәри дьхԝәст (1 Пʹадшати 3:7-9). Гава Сьлеман тʹәзә дәстпекьрьбу пʹадшатийе бькә, әԝи заньбу ԝәки позбьльнди чьԛас хьраб ә. Сәд һʹәйф кӧ паше, Сьлеман ль гора ве ширәта хԝә нә дьжит. Паши чәнд салед пʹадшатийа хԝә, әԝ кʹӧбар-бабах бу у ԛанунед Йаһоԝа инкʹар кьр. Мәсәлә, йәк жь ван ԛануна әв бу кӧ гәрәке пʹадша «жьна зедә нәкә» ԝәки дьле ԝи сәр рʹийа рʹаст сар нәбә (Ԛануна Дӧщари 17:17, ИМ). Сьлеман гӧһ нәда ве ԛануне у хԝәрʹа 700 жьн у 300 щари анин (1 Пʹадшати 11:1-3). Сьлеман дьбәкә дьфькьри кӧ һәр тьшт бьн контрола ԝида йә. Ԝәхт шунда, әԝ жь Йаһоԝа дур кʹәт у рʹасти гәләк кӧл-дәрда һат (1 Пʹадшати 11:9-13). w22.05 23 ¶12

Рʹожа иройин лазьм ә кӧ һʹәму мәрьв сафикьрьнәкә фәрз бькьн. Гәло әԝана ԝе Йаһоԝа Хԝәде ча Һʹӧкӧмдаре һьмзор сәр тʹәмамийа гәрдуне ԛәбул бькьн, йан ԝе пьштгьрийа дьжмьне ԝи бькьн, демәк Мире-щьна? Һәр кәс гәрәке ве сафикьрьне бькә. Ахьрийа һәр кәси ве йәкева гьредайи йә, кӧ әԝана ԝе чь сафи кьн (Мәтта 25:31-33, 46). Ԝәʹде «тәнгасийа мәзьн», әԝана ԝе йан сах бьминьн у жийина һʹәта-һʹәтайе бьстиньн, йан жи ԝе бенә ԛьрʹкьрьне (Әʹйанти 7:14; 14:9-11; Һәзәԛел 9:4, 6). Һәгәр тә сафи кьрийә кӧ пьштгьрийа сәрԝертийа Йаһоԝа бьки, тә сафикьрьнәкә һәрә баш кьрийә. Ньһа тӧ дьхԝази али кәсед дьн бьки кӧ әԝана жи сафикьрьна рʹаст бькьн. Кәсед кӧ бь амьни пьштгьрийа сәрԝертийа Йаһоԝа дькьн, ԝе кʹәрәма бьстиньн. Ԝе баш бә ԝәки әм ван рʹастийед фәрз рʹьнд леколин бькьн, ԝәки бькарьбьн бь амьни Йаһоԝарʹа хьзмәт кьн у али кәсед дьн бькьн, кӧ әԝана жи бенә сәр рʹийа рʹастийе у Йаһоԝарʹа хьзмәт кьн. w22.05 15 ¶1-2

Гәрәке әм гӧһ бьдьн дәнге Йаһоԝа, нә кӧ дәнге дьжмьна. Гава Йаһоԝа тʹәви Ибо хәбәр да, Ибо рʹьнд гӧһ да ԝи. Йаһоԝа дина Ибо кʹьшандә сәр ԛәԝата хԝә у бь сайа чәнд мәсәла ԝирʹа зәлал кьр, кӧ әԝ һәр тьшти дьвинә. Бь аликʹарийа чәнд пьрса, Йаһоԝа Иборʹа да кʹьфше ԝәки әԝ чьԛас бона ԝи хәм дькә. Ибо бь мьлукти у рʹазибуне щаб да: «Мьн жь бо тә гӧһва бьһистьбу; ле ньһа жи чʹәʹвед мьн тә дитьн» (Ибо 42:5). Дьԛәԝьмә чахе Ибо әԝ гьли готьн, әԝ һе нав хԝәлийеда рʹуньшти бу, бәдәна ԝи педа бьринада бу. Диса жи, Йаһоԝа нишан кьр кӧ Әԝ Ибо һʹьз дькә у жь ԝи рʹази йә (Ибо 42:7, 8). Иро жи дьбәкә мәрьв мә ньмьз кьн у ча кәсед беԛимәт һʹәсаб кьн. Дьԛәԝьмә әԝана изьне бьдьнә хԝә кӧ наве мә у тʹәшкиләта мә рʹәш кьн. Сәрһатийа Ибо нишани мә дькә, кӧ гава әм рʹасти тәнгасийа тен, Йаһоԝа баԝәр ә кӧ әме ԝирʹа амьн бьминьн. w22.06 24 ¶15-16

Чахе Бабилона мәзьн бе кʹӧтакьрьне, сәр әʹзмана ԝе шабунәкә гәләк мәзьн бә (Әʹйанти 19:1-3). Ле «дәʹԝата Бәрх» ԝе шабунәкә дьһа мәзьн бинә. Кʹьтеба Әʹйантида һәма әԝ ә әʹламәтийа һәри фәрз. Пешийа кӧ шәрʹе Һармәгәдоне дәстпебә, 144 000 кәсед бьжарти ԝе гьшк ида сәр әʹзмана бьн. Ле дәʹԝата Бәрх ԝе дәрберʹа дәстпенәбә (Әʹйанти 21:1, 2). Дәʹԝата Бәрх ԝе паши шәрʹе Һармәгәдоне у ԛьрʹкьрьна һʹәму дьжмьнед Хԝәде дәстпебә (Зәбур 45:3, 4, 13-17). Гәло дәʹԝата Бәрх чь те һʹәсабе? Чаԝа кӧ зәԝащеда жьн у мер дьбьн йәк, Иса Мәсиһ жи ԝе зәԝаща симболикда тʹәви 144 000, йед кӧ ча «бука» ԝи тенә һʹәсабе, бьбьнә йәк. Һьнгеда, Иса ԝе тʹәви 144 000 һәмпʹадшайед хԝә 1 000 сали сәр дьнйайе һʹӧкӧм бькә (Әʹйанти 20:6). w22.05 17 ¶11-13

Иса пешда готьбу кӧ рʹожед ахьрийеда, әԝе «хӧламе амьн у сәрԝахт» кʹьфш кә, ԝәки әԝ хԝарьна рʹӧһʹани бьдә мә (Мәтта 24:45). Рʹебәре мә Иса Мәсиһ бь сайа кʹомәкә меред кʹьфшкьри, ԝәхтда хԝарьна рʹӧһʹани дьдә хьзмәткʹаред Хԝәде у кәсед кӧ гӧһ дьдьнә мьзгинийе. Әв мер һʹӧкӧми сәр баԝәрийа тʹӧ кәси накьн (2 Корьнтʹи 1:24). Әԝана ԛәбул дькьн ԝәки «сәрԝер у фәрмандаре» хьзмәткʹаред Хԝәде, Иса Мәсиһ йә (Ишайа 55:4, ИМ). Жь сала 1919-да, хӧламе амьн бь сайа щурʹә-щурʹә әʹдәбйәта али хԝәндәкʹаред тʹәзә дькә, кӧ әԝана хԝарьна рʹӧһʹани тәʹм бькьн. Сала 1921-да, хӧламе амьн кʹьтеба «Лире Хԝәде» дәрхьст, йа кӧ али кәсед кӧ гӧһ дьданә мьзгинийе, дькьр, ԝәки рʹастийед сәрәкә йед Кʹьтеба Пироз пебьһʹәсьн. Ԝәʹдә шунда, гәләк мәрьва Баве мәйи әʹзмана бь аликʹарийа щурʹә-щурʹә әʹдәбйәта нас кьрьнә. Ле тӧ бь сайа кʹижан әʹдәбйәте дәрһәԛа Хԝәде пеһʹәсийайи? w22.07 10 ¶9-10

Тʹӧ кәс мина Йаһоԝа мәрʹд нинә. Фьрԛи тʹӧнә тӧ чьԛас бона Йаһоԝа дьки, әԝе тʹьме дьһа зедә бона тә бькә (Маркос 10:29, 30). Иро ве дьнйа хьрабда жи, Йаһоԝа соз дьдә ԝәки әԝе жийинәкә хԝәш у бәхтәԝар бьдә тә. Ле әва тʹәне дәстпекә. Тӧ дькари һʹәта-һʹәтайе Баве хԝәйи әʹзманарʹа хьзмәт ки. Һʹьзкьрьна тә у Ԝи ԝе дьһа мәзьн бә, у тӧйе жийина һәрһәйи ԛазанщ ки. Бь сайа сонда тʹәсмилбуне у бь сайа ньхӧмандьне, тӧ дькари тьштәки гәләк ԛимәт бьди Баве хԝәйи әʹзмана. Әԝи һәр тьште ԛәнщ у һәр тьште кӧ дьле тә ша дькә, дайә тә. Тӧ жи дькари тьштәки гәләки ԛимәт бьди Хԝәдайе әʹрд у әʹзмана, чь кӧ щәм ԝи тʹӧнә йә. Демәк амьнийа тә у хԝәстьна тә кӧ ԝирʹа хьзмәт бьки (Ибо 1:8; 41:11; Мәтʹәлок 27:11). Гәло жийинәкә жь ве жийине четьр һәйә? w23.03 6 ¶16-17

Щаһьлтийеда, хԝәстьнед сексуали дькарьн ԛәԝи бьн, у дьбәкә кәсед дьн зоре ль тә бькьн ԝәки тӧ бенамусийе бьки. Мире-щьна дьхԝазә кӧ тӧ ль гора хԝәстьнед хԝә бьжийи. Гәло чь дькарә али тә бькә, ԝәки тӧ алийе нав-намусийеда тʹәмьз бьмини? (1 Тʹесалоники 4:3, 4) Дӧайед хԝәда дьле хԝә Йаһоԝарʹа вәкә. Ԝирʹа бәʹса һәстед хԝә бькә, у рʹәща бькә ԝәки әԝ ԛәԝате бьдә тә (Мәтта 6:13). Йаһоԝа бир накә «кӧ әм хали нә», у әԝ дьхԝазә али тә бькә, нә кӧ тә сущдар кә (Зәбур 103:13, 14). Нәфькьрә кӧ тӧ дькари проблемед хԝә бе аликʹарийа кәсәки сафи ки. Де-баве хԝәрʹа бәʹса проблема хԝә бькә. Һәмьки нә һеса йә кӧ тӧ дәрһәԛа тьштед шәхси хәбәр ди, ле ԝе баш бә кӧ тӧ ве йәке бьки. Хԝәндьна Кʹьтеба Пироз у фькьрандьна сәр принсипед Кʹьтеба Пироз ԝе али тә бькьн, кӧ тӧ сафикьрьнед ӧса бьки, йед кӧ Йаһоԝа хԝәш тен. Тӧйе бьвини кӧ нә лазьм ә ԝәки бона һәр тьшти ԛәйдә һәбә, чьмки тӧйе фәʹм бьки, ԝәки Йаһоԝа дәрһәԛа һьнә тьшта чь дьфькьрә. w22.08 5 ¶10-12

Сәред малбәта гәләк хирәт дькьн кӧ әʹбура малбәта хԝә бькьн. Һәгәр тӧ жи сәре малбәте йи, тӧ дьԛәԝьмә бәр хԝә дькʹәти ԝәки тӧйе зарʹед хԝә чаԝа тʹер ки у пʹәре кьре йан кредита мале чаԝа бьди. Тӧ дьԛәԝьмә дьтьрси кӧ һәгәр тӧ хәбата хԝә ӧнда ки, тӧйе нькарьби хԝәрʹа хәбатәкә тʹәзә бьвини. Йан жи тӧ дьԛәԝьмә дьфькьри кӧ тӧ нькари һьнә тьшта жь хԝә кем ки у бь жийинәкә садә бьжийи. Пе тьрсед ви щурʹәйи, Мире-щьна гәләк мәрьва жь Йаһоԝа дур хьстийә. Мире-щьна дьхԝазә мә бьдә баԝәркьрьне кӧ Йаһоԝа бона мә хәм накә у ԝе али мә нәкә ԝәки әм әʹбура малбәта хԝә бькьн. Ләма жи дьбәкә әм бьфькьрьн кӧ гәрәке әм чь жь дәсте мә те бькьн, ԝәки хәбата хԝә ӧнда нәкьн. Сәрда жи, тьрсед ӧса дькарьн бьбьнә сәбәб кӧ әм зьраре бьдьн достийа хԝә тʹәви Йаһоԝа. w22.06 15 ¶5-6

Әм заньн ԝәки Йаһоԝа йә «Хԝәдейе рʹәʹм у кʹәрәме, сәбьр-ськʹане, бь һӧб у амьнийеда хьнейо» (Дәркʹәтьн 34:6). Йаһоԝа һәԛийе һʹьз дькә (Ишайа 61:8). Гава әԝ дьвинә кӧ әм еше дькʹьшиньн, әԝ хәмгин дьбә у һазьр ә кӧ ль ԝәхта рʹаст һʹәму кӧл у дәрдед мә кʹокева рʹакә (Йерәмйа 29:11). Әм гәләк һивийа ԝе рʹоже нә! Бәле, мәʹник кӧ чьма әм Йаһоԝа һаԛас һʹьз дькьн, әв ә. Диса чьма әм рʹастийе һʹьз дькьн? Рʹийа рʹастийе кʹарәкә мәзьн дьдә мә. Мәсәлә, бь сайа рʹастийа Кʹьтеба Пироз, һевийа мә һәйә. Чаԝа кӧ ләнгәр гәмийе дьгьрә, ԝәки ав ле нәбә, һевийа мә жи дькарә ԝәʹде тәнгасийа али мә бькә, ԝәки ԛәԝи бьминьн. Рʹеза иройин нишан дькә, ԝәки Паԝлосе шанди бәʹса һевийа жийина сәр әʹзмана дькьр, йа кӧ Мәсиһийед кʹьфшкьри һивийе нә. Һевийа Мәсиһийед кӧ һивийа жийина сәр әʹрде нә жи мина ләнгәре йә (Йуһʹәнна 3:16). Бәле, һевийа жийина һәрһәйи сәр әʹрде, нета жийине дьдә мә. w22.08 14-15 ¶3-5

Сәва кӧ әм итʹбарийа хԝә хушк-бьра биньн, гәрәке әм ԝана һʹьз бькьн. Йәке Корьнтʹи сәре 13 бәʹса гәләк хәйсәтед һʹьзкьрьне дькә, йед кӧ дькарьн али мә бькьн, ԝәки әм итʹбарийа хԝә кәсед дьн биньн, йан жи һәрге мә итʹбарийа хԝә һьндава ԝан ӧнда кьрийә, диса ԛазанщ кьн (1 Корьнтʹи 13:4-8). Мәсәлә, рʹеза 4 дьбежә кӧ «һʹьзкьрьн думькдьреж у ширьн ә». Гава әм гӧнә дькьн, Йаһоԝа диса һьндава мәда бь сәбьр ә. Һәрге хушк-бьред мә дьле мә бь готьн йан кьред хԝә бешиньн, гәло нә лазьм ә ԝәки әм жи сәбьр кьн? Рʹеза 5 әшкәрә дькә, ԝәки һʹьзкьрьн кʹине нажо. Ләма жи гәрәке әм кʹине нәжон у шашийед бәре йед хушк у бьра бира хԝәда хԝәй нәкьн. Кʹьтеба Пироз ӧса дьбежә: «Зу нәхәйьдә» (Ԝаиз 7:9, ИМ). Гәрәке әм бь чʹәʹве Йаһоԝа сәр хушк-бьра бьньһерʹьн. Йаһоԝа ԝана һʹьз дькә у һʹәсаб накә кӧ әԝана чьԛас щар гӧнә дькьн. Гәрәке әм жи чʹәʹв бьдьнә Йаһоԝа (Зәбур 130:3). Дәԝса кӧ әм дина хԝә бьдьн сәр шашийед ԝан, гәрәке әм хәйсәт-һʹӧнӧред ԝанә баш бьвиньн (Мәтта 7:1-5). w22.09 3-4 ¶6-7

Кʹьтеба Данийел пешда готьбу кӧ хьлазийа рʹожед ахьрийе, чь ԝе пәй һәв бьԛәԝьмә. Мәсәлә, ве рʹезеда те готьне кӧ Мьхайил, демәк Иса Мәсиһ щьмәʹта Хԝәде «дьпарезә». Пʹарәкә ве пʹехәмбәртийе дәстпекьр бе сәри, гава сала 1914-да, Иса һатә кʹьфшкьрьне ча Пʹадше Пʹадшатийа әʹзмани. Данийелрʹа ӧса жи һатьбу готьне, ԝәки Иса Мәсиһ ԝе «рʹабә» ԝәʹде «тәнгасикә жь рʹожа кӧ . . . һʹәта иро нәһатийә дитьн». Әв «тәнгаси», ‹тәнгасийа мәзьн› ә, йа кӧ Мәтта 24:21-да те готьне. Хьлазийа ве тәнгасийе, демәк ԝәʹде Һармәгәдоне, Иса Мәсиһ ԝе рʹабә кӧ хьзмәткʹаред Хԝәде бьпʹарезә. Кʹьтеба Әʹйанти ԝана нав дькә ча «әʹлаләтәкә мәзьн», йа кӧ жь «тәнгасийа мәзьн» һатийә (Әʹйанти 7:9, 14). w22.09 21 ¶4-5

Һәрге наве кәсәки ве кʹьтебеда ньвиси бә жи, Йаһоԝа дькарә ви нави тʹәмьз кә, чьмки әԝ нав ча бежи пе ԛәләме ньвиси йә, нә кӧ пе һʹӧбьре (Әʹйанти 3:5). Һʹәта кӧ наве мә сәр һʹәта-һʹәтайе пе һʹӧбьре бе ньвисандьне, әм гәрәке алийе хԝәда һәр тьшти бькьн, ԝәки наве мә ве кʹьтебеда бьминә. Кʹомәк наве кʹижана ве кʹьтебеда һатьнә ньвисаре, әԝ һәнә кәсед кӧ һатьнә бьжартьне, ԝәки тʹәви Иса сәр әʹзмана сәрԝертийе бькьн. Ль гора гьлийед Паԝлосе шанди кӧ әԝи «һәвал-хәбатен» хԝәрʹа жь Филипйайе готьбу, навед кәсед бь рʹӧһʹ кʹьфшкьри, йед кӧ ԝе тʹәви Иса сәрԝертийе бькьн, ньһа кʹьтеба жийинеда ньвиси нә (Филипи 4:3). Ле сәва кӧ навед ԝан ве кʹьтеба симболикда бьминә, әԝана гәрәке амьн бьминьн. Паше, гава әԝана мора хԝә йа хьлазийе бьстиньн, йан пешийа мьрьна хԝә йан жи пешийа дәстпека тәнгасийа мәзьн, навед ԝан ԝе сәр һʹәта-һʹәтайе ве кʹьтебеда бенә ньвисандьне (Әʹйанти 7:3). w22.09 14 ¶3; 15 ¶5-6

Ԛә щәм тә ӧса ԛәԝьмийә? Бәʹса хәбәре, кәсәки тәрʹа хԝарьнәкә тәʹмхԝәш чекьрийә. Ле жь бо ве йәке кӧ тӧ ләз дькʹәви ԝәки щикида һәрʹи, йан жи һʹьше тә сәр тьштәки дьн ә, тӧ хԝарьне зу-зу дадьԛӧртини. Паши хԝарьне тӧ фәʹм дьки, ԝәки тә чьԛас зу хԝар у дьбежи: «Хԝәзьл мьн һеди-һеди бьхԝара у тәʹма хԝарьне һе рʹьнд тедәрхьста». Хԝәндьна Кʹьтеба Пироз жи дькарә ӧса бә. Гәло тә Кʹьтеба Пироз ԛә ӧса зу хԝәндийә кӧ тә рʹьнд фәʹм нәкьрийә, ԝәки әԝ дьхԝазә тәрʹа чь бежә? Ләма жи Кʹьтеба Пироз һеди-һеди бьхунә. Сәрһатийа бьдә бәр чʹәʹве хԝә, дәнга бьбьһе, у сәр тьштед кӧ тӧ дьхуни, кʹур бьфькьрә. Әв йәк ԝе бәхтәԝарийа тә зедә кә. Иса «хӧламе амьн у сәрԝахт» кʹьфш кьрийә, ԝәки ԝәʹдәда хԝарьна рʹӧһʹани бьдә мә, ләма жи әм рʹӧһʹанида тʹӧ щар бьрʹчи наминьн (Мәтта 24:45). Сәр һʹиме Хәбәра Хԝәде, хӧламе амьн тʹер-тʹьжә хԝарьна рʹӧһʹани һазьр дькә (1 Тʹесалоники 2:13). w22.10 7-8 ¶6-8

Кʹьтеба Пироз пешда готьбу, кӧ рʹожед ахьрийеда мәрьвед ӧса ԝе гәләк бьн (2 Пәтрус 3:3, 4). Әԝана хӧламед «хԝәстьнед дьле хԝәйә нәпʹак» ьн (Щьһуда 7, 17, 18). Гәло әм ча дькарьн хԝә бьпарезьн, ԝәки нәбьн кәсед ԛәрфкʹар? Бона ве йәке, гәрәке әм хԝә жь ван мәрьва дур бьгьрьн, йед кӧ һәртʹьм бӧхдана давежьнә кәсед дьн (Зәбур 1:1). Мәсәлә, әм гәрәке гӧһ нәдьн рʹабәра у кʹьтеб у нәʹмед ԝан нәхуньн. Һәрге әм һаш жь хԝә тʹӧнә бьн, әм һеса дькарьн сәр кәсед дьн бькьнә кӧтә-кӧт у итʹбарийа хԝә һьндава Йаһоԝа у рʹебәрийа тʹәшкиләта ԝи, ӧнда кьн. Сәва кӧ әм нәкʹәвьнә ве дәрәще, ԝәрә әм жь хԝә бьпьрсьн: «Гава әз әʹламәти йан рʹебәрикә тʹәзә дьстиньм, гәло әз дькьмә кӧтә-кӧт? Гәло әз бьред щабдарда шашийа дьгәрʹьм»? Ԝе баш бә ԝәки әм зу сәр хԝә бьхәбьтьн у жь хәйсәт-һʹӧнӧред ӧса хԝә дур бьгьрьн, ԝәки Йаһоԝа жь мә рʹази бә (Мәтʹәлок 3:34, 35). w22.10 20 ¶9-10

Рʹӧһʹе Хԝәде ԛәԝат дьда Һәзәԛел, ԝәки әԝ шьхӧле хԝә бинә сери у диԝана Хԝәде мәрьвед сәрһʹьшкрʹа әʹлам кә. Йаһоԝа Һәзәԛелрʹа гот: «Мьн рʹуйе тә мина рʹуйе ԝан у әʹнийа тә жи мина әʹнийа ԝан һʹьшк кьрийә. Мьн әʹнийа тә кьрийә мина алмасәке, жь кәвьре һәстә һʹьшктьр. Жь ԝан нәтьрсә у жь рʹуйе ԝан зьравԛәти нәбә, чьмки әԝ щьмәʹтәкә рʹабәр ә» (Һәзәԛел 3:8, 9, ДТʹ). Демәк, Йаһоԝа Һәзәԛелрʹа ӧса дьгот: «Сәва сәрһʹьшкийа мәрьва әʹщьз нәбә. Әзе тә ԛәԝи кьм». Паши ве йәке, рʹӧһʹе Хԝәдейи пироз рʹебәрийа Һәзәԛел дькьр. Һәзәԛел ӧса ньвиси: «Дәсте Хӧдан ль сәр мьнва хԝӧрт [ԛәԝи] бу». Жерʹа һʹәфтек лазьм бу, ԝәки хәбәра кӧ гәрәке әԝ бьгьһинә мәрьва һин бә у рʹьнд фәʹм бькә (Һәзәԛел 3:14, 15). Паше, Йаһоԝа әԝ бьрә дәштәке кӧ ԝедәре «рʹӧһʹ кʹәтә һʹӧндӧре [ԝи]» (Һәзәԛел 3:23, 24). Һәзәԛел ида һазьр бу, ԝәки хьзмәтийа хԝә дәстпекә. w22.11 4-5 ¶8-9

Һәбаԛуԛ пʹехәмбәр рʹасти гәләк тәʹли-тәнгийа дьһат. Щарәке, ча те кʹьфше әԝ һьнәки кʹәтә шьке һәла Йаһоԝа бь рʹасти бона ԝи хәм дькә йан на. Йаһоԝа гӧһ да дӧайе хьзмәткʹаре хԝәйи амьн (Һәбаԛуԛ 2:2, 3). Паши кӧ Һәбаԛуԛ ани бира хԝә, ԝәки Йаһоԝа хьзмәткʹаред хԝә чаԝа хьлаз дькә, дьле Һәбаԛуԛ диса бь шабуне тʹьжә бу. Гьлийед ԝи нишан дькьн, кӧ әԝи баԝәр дькьр, ԝәки Йаһоԝа бона ԝи хәм дькә у ԝе али ԝи бькә кӧ әԝ бәр һәр тәнгасийе сәбьр кә (Һәбаԛуԛ 3:17-19). Әԝ чь дәрс ә бона мә? Гава тӧ рʹасти чәтьнайа тейи, Йаһоԝарʹа дӧа бькә. Дьле хԝә ԝирʹа вәкә у хԝә бьсперә ԝи. Баԝәр бә, кӧ Йаһоԝа ԝе ԛәԝате бьдә тә, ԝәки тӧ бькарьби сәбьр ки. Гава тӧ дәсте ԝи жийина хԝәда бьвини, тӧйе һе зедә баԝәрийа хԝә ԝи бини. Һәрге тӧ хԝә тьштед рʹӧһʹани бьгьри, тӧйе нәһели ԝәки тʹӧ зьрар у дӧдьли тә дури Йаһоԝа хә (1 Тимотʹейо 6:6-8). w22.11 15 ¶6-7

Иса у дӧ кәсед сущдаркьри, йед кӧ кʹеләка ԝи дардакьри бун, һеди-һеди дәст жь жийина хԝә бәрʹдьдан (Луԛа 23:32, 33). Ван һәр дӧ мера ԛәрфед хԝә Иса дькьрьн (Мәтта 27:44; Маркос 15:32). Ле паше, йәки жь ԝан фькьра хԝә гӧһаст. Әԝи гот: «Иса, мьн бир бини, гава бь Пʹадшатийа хԝәва бейи». Иса бь гьлийед жь рʹеза рʹоже щаба ԝи да. Әв гьлийед Иса дькарьн али мә бькьн кӧ бьдьнә бәр чʹәʹве хԝә жийина Щьнәтеда ԝе чаԝа бә. Һьнә тьшт дәрһәԛа Щьнәте әм дькарьн жь сәрԝертийа Сьлеман Пʹадша пебьһʹәсьн, ԝәʹде кʹижани кӧ әʹдьлайи һәбу. Ӧса жи әв йәк кӧ Иса жь Сьлеман мәзьнтьр ә, мә дьдә баԝәр кьрьне, ԝәки әԝе тʹәви һәмпʹадшед хԝә кʹәрәмед мәзьн сәр инсанәтеда бьбаринә (Мәтта 12:42). Ләма жи, лазьм ә кӧ ‹пәзед дьн› бьзаньбьн гәрәке чь бькьн, ԝәки бькарьбьн һʹәта-һʹәтайе Щьнәтеда бьжин (Йуһʹәнна 10:16). w22.12 8 ¶1; 9 ¶4

Ишайа дьл дьдә мә, кӧ Йаһоԝа ԝе гӧһ бьдә һәԝар-газийа мә у бе һәԝара мә. Ӧса жи, әԝи готьбу: «Чахе бьһист, ԝе бәрсьва [щаба] тә бьдә». Бәле, Баве мәйи әʹзмани бь дьл у щан һазьр ә кӧ бе һәԝара мә. Гәло әв йәк али мә накә, кӧ әм бь шабуне сәбьр кьн? Йаһоԝа гӧһ дьдә дӧайед һәр йәки жь мә. Гәло әм ве йәке жь кʹӧ заньн? Пʹара пешьнда йа сәре 30 жь кʹьтеба Ишайа, Йаһоԝа тʹәви һʹәму хьзмәткʹаред хԝә хәбәр дьдә, ләма хәбәра «ԝә» те хәбьтандьне. Ле рʹеза 19-да, хәбәра «тә» те хәбьтандьне һьндава мәрьвәкида. Ишайа ӧса ньвисибу: «Те нәгьри. Һьлбәт ԝе Хӧдан . . . кʹәрәме нишани тә бьдә. . . . Ԝе бәрсьва [щаба] тә бьдә». Йаһоԝа Бавәки дьлован ә, ләма жи әԝ бона һәр йәки жь мә башԛә хәм дькә у гӧһ дьдә дӧайед мә (Зәбур 116:1; Ишайа 57:15). w22.11 9 ¶5-6

Гава әм һьмбәри мьԛабьлибуне мьзгинийе бәла дькьн у мәрьва һин дькьн, дьле мә рʹьһʹәт ә у әм ша дьбьн. Ԛьрʹна йәкеда, гава шандийарʹа һатә ԛәдәхәкьрьне ԝәки мьзгинийе бәла кьн, ԝана сафи кьр кӧ бәри пешьн гӧһ бьдьн Хԝәде. Ԝана бәлакьрьна мьзгинийе нәда сәкьнандьне, у жь ве йәке шабунәкә мәзьн дьстандьн (Кʹаред Шандийа 5:27-29, 41, 42). Һәмьки, һәрге шьхӧле мә бе ԛәдәхәкьрьне, гәрәке әм ԝәʹде бәлакьрьна мьзгинийе фәсал бьн. Ле һәрге әм чь жь дәсте мә те бькьн, кӧ хәбәра хере бәла кьн, Йаһоԝа ԝе жь мә рʹази бә у дьле мә ԝе рʹьһʹәт бә. Баԝәр бә кӧ ԝәʹде һәри гьранда жи, әм дькарьн дьлрʹьһʹәт бьн. Ԝәхтед ӧсада, гәрәке әм бир нәкьн ԝәки әм һʹәԝще әʹдьлайа Хԝәде нә, әʹдьлайи у дьлрʹьһʹәтийа кӧ тʹәне Йаһоԝа дькарә бьдә мә. Ләма жи чахе нәхԝәши бәла дьбьн, тʹәшԛәлед тʹәбийәте дьԛәԝьмьн йан жи зерандьн дәстпедьбьн, хԝә бьсперә Йаһоԝа, у ль гора рʹебәрийа тʹәшкиләта ԝи бьмәшә. Бинә бәр чʹәʹве хԝә кӧ рʹожед хԝәш һивийа тә нә. Кʹьтеба Пироз ӧса соз дьдә: «Хԝәдейе әʹдьлайийе ԝе тʹәви ԝә бә» (Филипи 4:9). w22.12 21 ¶17-18

Жь бо ве йәке, хирәт лазьм ә. Мәсәлә, әм гәрәке хирәт бькьн кӧ һʹӧнӧред ӧса ча кʹин, нәфрʹәт у һерс жь хәйсәте хԝә дәрхьн (Әфәси 4:31, 32). Ле чьрʹа әԝ щара дькарә нәһеса бә? Чьмки һʹӧнӧред хьраб дьԛәԝьмә гәләк кʹур нав мәда рʹуньштьбьн. Кʹьтеба Пироз дьбежә, ԝәки «сьтԛе дьле мерьв жь зарʹотийеда хьраб ә» (Дәстпебун 8:21). Лазьм ә кӧ мәрьв паши ньхӧмандьне жи бәрдәԝам кә хәйсәт-һʹӧнӧред хԝә контрол кә, йед кӧ нав ԝида кʹур рʹуньштьнә (Рʹомайи 7:21-23). Йаһоԝарʹа дӧа бькә у ԝирʹа бежә кӧ тӧ һьмбәри кʹижан хәйсәте хьраб шәрʹ дьки. Баԝәр бькә ԝәки әԝе гӧһ бьдә тә у али тә бькә (1 Йуһʹәнна 5:14, 15). Рʹаст ә, Йаһоԝа хәйсәте хьраб ԝе бь кʹәрәмәти жь тә дур нәхә, ле әԝ дькарә ԛәԝате бьдә тә, ԝәки тӧ сәркʹәви (1 Пәтрус 5:10). Һәмьки лазьм ә, ԝәки тӧ ль гора дӧайед хԝә һәр тьшти бьки у хәйсәтед мәрьве кәвьн жь хԝә дур хи. Ӧса жи, изьне нәдә ԝәки хԝәстьнед хьраб дьле тәда мәзьн бьн (Филипи 4:8; Колоси 3:2). w23.01 10 ¶7, 9-10

Гава әм мьзгинийа хере бь дьл у щан бәла дькьн, әм һʹьзкьрьна хԝә нишан дькьн. Әм мьзгинийе һʹәмуйарʹа бәла дькьн. Фьрԛи тʹӧнә мәрьв жь чь мьләти нә, сәр чь зьмани хәбәр дьдьн, кʹәсиб, дәԝләти, хԝәнди йан нәхԝәнди нә, бәр чʹәʹве мә гьшк йәк ьн. Ләма жи әм ль гора ԛьрара Йаһоԝа һәрәкʹәт дькьн, йе кӧ «дьхԝазә һʹәму мәрьв хьлаз бьн у рʹастийе нас кьн» (1 Тимотʹейо 2:4). Кәсе кӧ һʹьзкьрьна хԝә хушк-бьрарʹа нишан дькә, избат дькә, кӧ әԝ Йаһоԝа Хԝәде у Иса Мәсиһ һʹьз дькә. Әм бь дьл у щан дькʹәвьнә һʹәйра хушк-бьра, у гава әԝана тәнгасийа дькʹьшиньн, әм кʹеләка ԝан ьн у али ԝан дькьн. Гава мәрьве ԝани һʹьзкьри дьмьрә, әм дьчьн сәрхԝәшийа ԝан у дьлбинийе дьдьнә ԝан. Гава әԝана нәхԝәш дькʹәвьн, әм дьчьн тʹәсәлийа ԝан дькьн. У гава әԝана дьлтәнг ьн, чь жь дәсте мә те әм дькьн, ԝәки бәр дьле ԝанда бен (2 Корьнтʹи 1:3-7; 1 Тʹесалоники 5:11, 14). Әм тʹьме бона ԝан дӧа дькьн, чьмки әм заньн кӧ «дӧайе йе рʹаст гәләки ԛәԝат ә у һʹӧкӧм дькә» (Аԛуб 5:16). w23.01 28-29 ¶7-8

Кәсед кӧ шьхӧле авакьрьнеда дьхәбьтьн, ԝәʹдә шунда дьбьнә һостә, әм жи мина ԝан дькарьн алийе авакьрьна һәвдӧда бьбьнә һостә. Сәва кӧ ԛәԝата хушк-бьред мә зедә бә, ԝәки әԝана бькарьбьн бәр тәнгасийа сәбьр кьн, әм дькарьн ԝанрʹа бәʹса сәрһатийед кәсед амьн бькьн (Ибрани 11:32-35; 12:1). Сәва кӧ әм әʹдьлайе хԝәй кьн, әм гәрәке бәʹса һʹӧнӧред баш йед хушк-бьра бькьн. Чахе проблем пешда тен, әм гәрәке әʹдьлайе хԝәй кьн у ль һәв бен (Әфәси 4:3). Ӧса жи, әм дькарьн баԝәрийа хушк-бьра ԛәԝи кьн, кӧ дина ԝан бьдьн сәр готьнед Кʹьтеба Пироз, аликʹарийе бьдьнә ԝан у ӧса жи ԝан хушк-бьра бьшьдиньн, йед кӧ рʹӧһʹанида сьст бунә. Авакьрьна хушк-бьра мә дьлхԝәш дькә. Һәр авайи зу йан дәрәнг һьлдьше, ле авакьрьна хушк-бьра дькарә һʹәта-һʹәтайе бьминә! w22.08 22 ¶6; 25 ¶17-18

Иса гот кӧ бона фәʹмкьрьна Хәбәра Хԝәде фәʹмкʹари мәрʹа лазьм ә (Мәтта 24:15). Гәло фәʹмкʹари чь йә? Бь сайа фәʹмкʹарийе, әм дькарьн тедәрхьн кӧ дӧ фькьр чаԝа һәвва гьредайи нә у чаԝа жь һәв щӧдә нә у фькьред кӧ нә зәлал тенә кʹьфше, фәʹм бькьн. Ӧса жи, Иса нишан кьр кӧ фәʹмкʹари лазьм ә, ԝәки әм фәʹм бькьн кӧ созед Кʹьтеба Пироз чаԝа тенә сери. Бәле, бь сайа ви һʹӧнӧре фәрз, әм дькарьн жь хԝәндьна Кʹьтеба Пироз кʹара һәри мәзьн бьстиньн. Йаһоԝа фәʹмкʹарийе дьдә хьзмәткʹаред хԝә. Ләма жи ԝирʹа дӧа бькә у аликʹарийа ԝи бьхԝазә, ԝәки тӧ ви һʹӧнӧре фәрз нав хԝәда пешда бини. Гәло тӧ чаԝа дькари ль гора дӧайед хԝә һәрәкʹәт бьки? Сәр тьштед кӧ тӧ дьхуни кʹур бьфькьрә у дина хԝә бьде, кӧ әԝ чаԝа ван тьштава гьредайи йә, кʹижан кӧ тӧ зани. Леколина бькә кӧ мәʹнийа готьнед Кʹьтеба Пироз дьһа рʹьнд фәʹм бьки у әʹмьре хԝәда бини сери (Ибрани 5:14). Һәрге тӧ Кʹьтеба Пироз бь фәʹмкʹарийе бьхуни, чьԛас һәрʹә тӧйе Кʹьтеба Пироз һе зедә фәʹм бьки. w23.02 10 ¶7-8

Бьдә бәр чʹәʹве хԝә кӧ һәвале тә шькьләки кәвьн пʹешкʹеши тә дькә. Ле әԝ шькьл һьнәки хьраб буйә у һьнә тьштед бьчʹук гәрәке бенә чекьрьне. Ле диса жи, ԛимәта ве шькьле дьгьһижә милйона долара. Һьлбәт тӧ ԛимәта ԝи шькьли зани у дьхԝази ԝи бьпʹарези. Йаһоԝа Хԝәде жи пʹешкʹешәкә гәләк ԛимәт дайә мә. Әв пʹешкʹеш әʹмьре мә йә. Бәле, гава Йаһоԝа әʹмьре Кӧрʹе хԝә ча ԛӧрбан бәрва да, Әԝи нишан кьр кӧ әԝ жийина мә гәләк ԛимәт дькә (Йуһʹәнна 3:16). Йаһоԝа Хԝәде Канийа жийине йә (Зәбур 36:9). Паԝлосе шанди жи баԝәрийа хԝә ве йәке дьани. Әԝи ӧса гот: «Әм бь ԝи дьжин, дьмәшьн у һәнә» (Кʹаред Шандийа 17:25, 28). Ләма жи әм дькарьн бежьн, кӧ әʹмьре мә дайина Хԝәде йә. Әԝ мә һʹьз дькә у һәр тьште кӧ бона жийине лазьм ә, дьдә мә (Кʹаред Шандийа 14:15-17). Ле Йаһоԝа сәва кӧ әʹмьре мә хԝәй кә, кʹәрәмәта накә. Дәԝсе әԝ дьхԝазә ԝәки әм гӧһ бьдьнә сьһʹәт-ԛәԝата хԝә, кӧ бькарьбьн бәрдәԝам кьн жерʹа хьзмәт кьн (2 Корьнтʹи 7:1). w23.02 20 ¶1-2

Әм бона Кʹьтеба Пироз жь Йаһоԝа Хԝәде гәләк рʹази нә! Бь сайа Хәбәра хԝә, Йаһоԝа ширәтед баш дьдә мә. Бь аликʹарийа ван ширәта, әм дькарьн проблемед хԝә сафи кьн. Ӧса жи, Хԝәде һевикә гәләк хԝәш дайә мә. Йа һәри фәрз жи әв ә кӧ Йаһоԝа бь сайа Кʹьтеба Пироз, гәләк һʹӧнӧред хԝә мәрʹа әшкәрә кьрьнә. Гава әм дәрһәԛа һʹӧнӧред ԝи дьфькьрьн, әԝ йәк дьле мә дьгьрә у әм жь дьл дьхԝазьн бьбьн достед ԝийи незик (Зәбур 25:14). Йаһоԝа дьхԝазә ԝәки һәр кәс ԝи нас бькә. Дәмед бәреда, әԝи бь сайа хәԝн, хәйала у мәләка, хәбәра хԝә дьгиһандә мәрьва (Жьмар 12:6; Кʹаред Шандийа 10:3, 4). Ле һәрге әв хәԝн-хәйал, йан готьнед мәләка нәһатана ньвисандьне, гәло мәйе әԝ чаԝа бьхԝәнда? Ләма жи тьштед кӧ Йаһоԝа дьхԝәст, ԝәки әм бьзаньбьн, әԝи бь сайа пʹехәмбәра «пʹьртукәкеда» да ньвисандьне. Жь бәр кӧ «рʹийа Хԝәде кʹамьл ә», әм дькарьн баԝәр бьн, ԝәки әв метода хәбәрдана ԝи тʹәви мәрьва, йа һәри баш ә (Зәбур 18:30). w23.02 2 ¶1-2

Хԝәрʹа нетед һежа дайнә. Хԝәрʹа нетед ӧса бьжберә, йед кӧ ԝе баԝәрийа тә дьһа ԛәԝи бькьн у али тә бькьн кӧ тӧ бьби Мәсиһийе гьһишти (Әфәси 3:16). Мәсәлә, хԝәрʹа нете дайнә кӧ Кʹьтеба Пироз дьһа зедә бьхуни у леколин бьки (Зәбур 1:2, 3). Йан жи, тӧ дькари хԝәрʹа бьки хәйсәт кӧ дьһа зедә дӧа бьки у дӧайед тә жь дьл бьн. Дьбәкә лазьм ә ԝәки тӧ сәр хԝә бьхәбьти, кӧ ԝәʹдәдәрбазкьрьнед баш бьжбери у ԝәʹде хԝә рʹаст хәрщ ки (Әфәси 5:15, 16). Чьԛас кӧ тӧ али кәсед дьн бьки, һаԛас тӧйе рʹӧһʹанида пешда һәрʹи. Мәсәлә, тӧ дькари хԝәрʹа нете дайни кӧ али хушк-бьред әʹмьрда мәзьн йан жи йед нәхԝәш, бьки. Дьԛәԝьмә тӧ дькари һьнә шьхӧлед һәррʹожида али ԝан бьки, йан жи нишани ԝан бьки кӧ чаԝа һащәтед әләктроник бьдьнә хәбате. Ӧса жи, гава тӧ мәрьварʹа бәʹса мьзгинийа Пʹадшатийе дьки, тӧ нишан дьки ԝәки тӧ ԝана һʹьз дьки (Мәтта 9:36, 37). Һәрге мәщала тә һәбә, хԝәрʹа нете дайнә ԝәки бьби хьзмәткʹаре һәртʹьм. w22.08 6 ¶16-17