Di civatê de, eger em ji hinekan re hezkirinê nîşan bidin û ji hinekan re na, bi eslê xwe ev yek tê maneya ku em guh nadin emrê Îsa Mesîh. Wek Îsa, helbet em jî xwe ji hinek xwişk û birayan nêzîktir hîs dikin (Yûhena 13:23; 20:2). Lê Petrûsê şandî şîretê dide me ku gerek em “ji tevahiya koma xwişk û birayan hez bikin”, çimkî em hemû ferdên malbatekê ne (1. Petrûs 2:17). Petrûs got: “Ji dil û can û bi germî ji hevdû hez bikin” (1. Petrûs 1:22). Yanî, çi qas zehmet be jî, gerek em ji her xwişk yan birayekî xwe re hezkirinê nîşan bidin. Mesela, eger birayek dilê me biêşîne, emê çi bikin? Di serî de, dibe ku em bixwazin heyfa xwe bistînin. Lê Petrûs ji Îsa Mesîh hîn bû ku Xwedê ji hal û hereketên wisa ne razî ye (Yûhena 18:10, 11). Petrûs nivîsand: “Di şûna xerabiyê de xerabiyê nekin, di şûna nizimkirinê de jî nizim nekin. Bervajiyê vê, pîroz bikin” (1. Petrûs 3:9). Hezkirina jidil alî me dike ku em ji mirovan re dilovan bin. w23.09 29 par. 9-11

Gava em dibînin ku zarok çi qas zû mezin dibin, em ji vê yekê re heyran dimînin. Wisa xuya dike ku zarok xwe bi xwe bêxîret mezin dibin. Lê belê, ji bo ku em bibin şagirtên Îsa Mesîh yên gihîştî, ev yek bi xwe çênabe (1. Korîntî 13:11; Îbranî 6:1). Ji bo vê yekê, gerek em dostaniya xwe ya bi Yehowa re xurttir bikin. Wekî din, ji bo ku em sifetên li gor dilê Xwedê ava bikin, hunerên bifeyde bi pêş bixin û ji bo mesûliyetan xwe hazir bikin, ruhê pîroz ji me re lazim e (Methelokên Silêman 1:5). Yehowa mirov wek jin û mêr afirandine (1. Mûsa 1:27). Jin û mêr hem ji aliyê bedenî ve hem jî di warên din de ji hev cuda ne. Mesela, Yehowa jin û mêr wisa çêkirine ku ew rolên cuda bînin cih. Ji bo ku ew wezîfeyên xwe pêk bînin, sifet û hunerên taybet ji wan re lazim in (1. Mûsa 2:18). w23.12 18 par. 1-2

Gelo Îsa Mesîh dixwest ku kesên din navê Bavê wî bi kar bînin? Belê. Gava Îsa Mesîh li dinyayê bû, hin alimên dînî belkî difikirîn ku navê Xwedê ew qas pîroz e ku gerek mirov wî neyne zimên. Lê belê, Îsa Mesîh tu caran îzin nedida ku urf û adetên wisa – yên ku bi eslê xwe li dijî Nivîsarên Pîroz in – bibin sebeb ku ew navê Bavê xwe pîroz neke. Ka bîne bîra xwe ku gava Îsa Mesîh li herêma xelkê Gerasînayê zilamekî ku bi cin ketibû qenc kir, çi çêbû. Mirovên herêmê ditirsiyan, û wan dixwest ku Îsa Mesîh ji wê derê here, ew jî çû (Marqos 5:16, 17). Dîsa jî, Îsa Mesîh dixwest ku navê Yehowa li wê derê bê îlankirin. Loma, wî ji zilamê qencbûyî re got ku bila ew ji xelkê re bibêje ku Yehowa ji bo wî çi kir, ne ku Îsa Mesîh çi kir (Marqos 5:19, NWT). Îsa Mesîh dixwaze ku em jî wisa bikin – ku em navê Bavê wî li seranserê dinyayê îlan bikin! (Meta 24:14; 28:20). Wexta ku em wisa dikin, em dilê padîşahê xwe Îsa Mesîh xweş dikin. w24.02 10 par. 10