ನಮ್ಮ ಕ್ರೈಸ್ತ ಜೀವನ
ಸತ್ಯಾರಾಧನೆಯ ಸ್ಥಳಗಳನ್ನು ಕಟ್ಟುವುದು ಮತ್ತು ಸುಸ್ಥಿತಿಯಲ್ಲಿಡುವುದು ನಮ್ಮ ಸುಯೋಗ
ಇಸ್ರಾಯೇಲಿನ ದೇವಾಲಯವನ್ನು ಕಟ್ಟುವುದರಲ್ಲಿ ಹೆಚ್ಚಿನ ಕೆಲಸ ಒಳಗೂಡಿತ್ತು. ಜೊತೆಗೆ, ಬಹಳಷ್ಟು ಹಣದ ಅಗತ್ಯವಿತ್ತು. ಆದರೂ, ಇಸ್ರಾಯೇಲ್ಯರು ತುಂಬಾ ಹುರುಪಿನಿಂದ ತಮ್ಮ ಸಹಾಯಹಸ್ತವನ್ನು ನೀಡಿದರು. (1ಪೂರ್ವ 29:2-9; 2ಪೂರ್ವ 6:7, 8) ದೇವಾಲಯವನ್ನು ಕಟ್ಟಿದ ನಂತರ, ಇಸ್ರಾಯೇಲ್ಯರು ಅದನ್ನು ಇಟ್ಟುಕೊಂಡ ರೀತಿಯಿಂದ ಅವರ ಆಧ್ಯಾತ್ಮಿಕತೆ ಹೇಗಿತ್ತು ಎಂದು ಹೇಳಬಹುದಿತ್ತು. (2ಅರ 22:3-6; 2ಪೂರ್ವ 28:24; 29:3) ಇಂದು ನಾವು ರಾಜ್ಯ ಸಭಾಗೃಹಗಳನ್ನು ಮತ್ತು ಸಮ್ಮೇಳನ ಹಾಲ್‌ಗಳನ್ನು ಕಟ್ಟಲು, ಶುಚಿಗೊಳಿಸಲು ಮತ್ತು ಅದನ್ನು ಸುಸ್ಥಿತಿಯಲ್ಲಿಡಲು ಹೆಚ್ಚಿನ ಸಮಯ ಮತ್ತು ಶ್ರಮವನ್ನು ವ್ಯಯಿಸುತ್ತಿದ್ದೇವೆ. ಈ ರೀತಿ ಯೆಹೋವನೊಂದಿಗೆ ಕೆಲಸಮಾಡುವುದು ನಮ್ಮ ಸುಯೋಗ ಮತ್ತು ಪವಿತ್ರ ಸೇವೆಯ ಭಾಗವಾಗಿದೆ.—ಕೀರ್ತ 127:1; ಪ್ರಕ 7:15.
ನಾವು ಏನೆಲ್ಲಾ ಮಾಡಬಹುದು?
ಕೂಟಗಳ ನಂತರ ರಾಜ್ಯ ಸಭಾಗೃಹವನ್ನು ಶುಚಿಮಾಡಬಹುದು. ಶುಚಿಮಾಡಲು ನಿಮ್ಮಿಂದ ಸಾಧ್ಯವಿಲ್ಲದಿದ್ದರೆ ಕನಿಷ್ಠಪಕ್ಷ ನಿಮ್ಮ ಸೀಟಿನ ಸುತ್ತ ಬಿದ್ದಿರುವ ಕಸವನ್ನು ತೆಗೆಯಲು ಪ್ರಯತ್ನಿಸಿ.
ರಾಜ್ಯ ಸಭಾಗೃಹವನ್ನು ಶುಚಿಗೊಳಿಸುವ ಮತ್ತು ಸುಸ್ಥಿತಿಯಲ್ಲಿಡುವ ಕೆಲಸದಲ್ಲಿ ತಪ್ಪದೇ ಕ್ರಮವಾಗಿ ಭಾಗವಹಿಸಬಹುದು. ಎಲ್ಲರೂ ಸೇರಿ ಮಾಡಿದರೆ ಕೆಲಸ ಸುಲಭವಾಗುತ್ತದೆ ಮತ್ತು ಸಂತೋಷಕರವಾಗಿರುತ್ತದೆ.—ದೇವರ ಪ್ರೀತಿ ಪು. 105, ಪ್ಯಾ. 18.
ಕಾಣಿಕೆ ನೀಡಬಹುದು. ಮನಪೂರ್ವಕವಾಗಿ ಕೊಡುವ ತೀರ ಕಡಮೆ ಬೆಲೆಯ ಎರಡು ಚಿಕ್ಕ ನಾಣ್ಯಗಳು’ ಸಹ ಯೆಹೋವನನ್ನು ಸಂತೋಷಪಡಿಸುತ್ತವೆ.—ಮಾರ್ಕ 12:41-44.
ನಿಮಗೆ ಸಾಧ್ಯವಾದರೆ, ದೇವಪ್ರಭುತ್ವಾತ್ಮಕ ಚಟುವಟಿಕೆಗಳಿಗಾಗಿರುವ ಕಟ್ಟಡಗಳ ನಿರ್ಮಾಣಕಾರ್ಯ ಮತ್ತು ದುರಸ್ತಿಕಾರ್ಯದಲ್ಲಿ ಸ್ವಯಂ ಸೇವಕರಾಗಿ ಕೆಲಸಮಾಡಬಹುದು. ಇದಕ್ಕಾಗಿ ನಿರ್ಮಾಣ ಕೆಲಸದ ಅನುಭವ ಇರಬೇಕಂತೇನಿಲ್ಲ.