ಯೇಸುವೇ ನಮ್ಮ ರಕ್ಷಕ—ಇದರ ಅರ್ಥ ಏನು?

ಬೈಬಲ್‌ ಕೊಡೋ ಉತ್ತರ

ಯೇಸು ನಮ್ಮೆಲ್ಲರಿಗಾಗಿ ತನ್ನ ಜೀವವನ್ನೇ ಕೊಟ್ಟನು. ದೇವರಿಗೆ ನಂಬಿಗಸ್ತರಾಗಿ ಇರುವವರನ್ನ ರಕ್ಷಿಸಲಿಕ್ಕಾಗಿ ಆತನು ತನ್ನ ಜೀವವನ್ನ ಬಿಡುಗಡೆ ಬೆಲೆಯಾಗಿ ಕೊಟ್ಟನು. (ಮತ್ತಾಯ 20:28) ಹಾಗಾಗಿಯೇ ಯೇಸುವನ್ನು “ಲೋಕದ ರಕ್ಷಕ” ಅಂತ ಬೈಬಲ್‌ ಹೇಳ್ತದೆ. (1 ಯೋಹಾನ 4:14) ಅಲ್ಲದೇ ಬೈಬಲ್‌ ಇನ್ನೇನು ಹೇಳುತ್ತೆ ನೋಡಿ, “ಬೇರೆ ಯಾರಿಂದಲೂ ರಕ್ಷಣೆಯು ದೊರಕುವುದಿಲ್ಲ; ಆ ಹೆಸರಿನಿಂದಲೇ ಹೊರತು ಆಕಾಶದ ಕೆಳಗೆ ಮನುಷ್ಯರಲ್ಲಿ ಕೊಡಲ್ಪಟ್ಟಿರುವ ಬೇರೆ ಯಾವ ಹೆಸರಿನಿಂದಲೂ ನಾವು ರಕ್ಷಣೆಯನ್ನು ಹೊಂದಸಾಧ್ಯವಿಲ್ಲ.”—ಅಪೊಸ್ತಲರ ಕಾರ್ಯ 4:12.

ಯೇಸುವಲ್ಲಿ ನಂಬಿಕೆ ಇಡೋ ಪ್ರತಿಯೊಬ್ಬನಿಗಾಗಿ ಆತನು “ಮರಣವನ್ನು ಅನುಭವಿಸಿದನು.” (ಇಬ್ರಿಯ 2:9; ಯೋಹಾನ 3:16) ಆಮೇಲೆ ದೇವರು ಆತನನ್ನ ಜೀವಂತವಾಗಿ ಎಬ್ಬಿಸಿದನು. ಯೇಸು ಆತ್ಮಜೀವಿಯಾಗಿ ಪುನಃ ಸ್ವರ್ಗಕ್ಕೆ ಹೋದನು. (ಅಪೊಸ್ತಲರ ಕಾರ್ಯ 3:15) ಅಲ್ಲಿ ಯೇಸು “ತನ್ನ ಮೂಲಕ ದೇವರ ಸಮೀಪಕ್ಕೆ ಬರುವವರನ್ನು ಸಂಪೂರ್ಣವಾಗಿ ರಕ್ಷಿಸುವುದಕ್ಕೆ ಶಕ್ತನಾಗಿದ್ದಾನೆ. ಏಕೆಂದರೆ ಅವರಿಗೋಸ್ಕರ ಬೇಡಿಕೊಳ್ಳಲು ಆತನು ಯಾವಾಗಲೂ ಜೀವದಿಂದ ಇರುತ್ತಾನೆ.”—ಇಬ್ರಿಯ 7:25.

ನಮಗೋಸ್ಕರ ಯಾಕೆ ಯೇಸು ಬೇಡಬೇಕು?

ಯಾಕೆಂದರೆ ನಾವೆಲ್ಲ ಪಾಪಿಗಳು. (ರೋಮನ್ನರಿಗೆ 3:23) ನಮಗೂ ದೇವರಿಗೂ ಮಧ್ಯೆ ಈ ಪಾಪ ಒಂದು ಗೋಡೆ ತರ ಇದೆ. ಪಾಪದಿಂದ ನಮಗೆ ಸಾವು ಬಂದಿದೆ. (ರೋಮನ್ನರಿಗೆ 6:23) ಆದ್ರೆ ಯೇಸು ನಮಗಾಗಿ ಜೀವ ಕೊಟ್ಟಿದಾನೆ ಅಂತ ಯಾರು ನಂಬುತ್ತಾರೋ ಅವರಿಗೆ ಆತನು “ಸಹಾಯಕನಾಗಿದ್ದಾನೆ.“ ಇನ್ನೊಂದು ಮಾತಲ್ಲಿ ಹೇಳೋದಾದ್ರೆ ನಮ್ಮ ಪರವಾಗಿ ದೇವರ ಹತ್ರ ಮಾತಾಡ್ತಾನೆ. (1 ಯೋಹಾನ 2:1) ಆತನು ಅವರಿಗೋಸ್ಕರ ದೇವರ ಹತ್ತಿರ ಬೇಡ್ತಾನೆ. ಏನಿಕೋಸ್ಕರ? ನಾವು ಮಾಡೋ ಪ್ರಾರ್ಥನೆಯನ್ನ ದೇವರು ಕೇಳಬೇಕಂತ, ನಮ್ಮ ಪಾಪಗಳನ್ನ ಕ್ಷಮಿಸಬೇಕಂತ ಬೇಡ್ತಾನೆ. ಇದನ್ನ ತಾನು ಬಲಿಯಾಗಿ ಕೊಟ್ಟ ಜೀವದ ಆಧಾರದ ಮೇಲೆ ಮಾಡಬೇಕು ಅಂತ ಕೇಳಿಕೊಳ್ತಾನೆ. (ಮತ್ತಾಯ 1:21; ರೋಮನ್ನರಿಗೆ 8:34) ಈ ಬೇಡಿಕೆಗಳಿಗೆ ದೇವರು ಉತ್ತರ ಕೊಡ್ತಾನೆ. ಯಾಕಂದ್ರೆ ಅವು ದೇವರ ಚಿತ್ತಕ್ಕೆ ಹೊಂದಿಕೆಯಲ್ಲಿವೆ. ಯೇಸುವಿನ ಮೂಲಕ “ಲೋಕವನ್ನು ರಕ್ಷಿಸುವುದಕ್ಕಾಗಿಯೇ” ಆತನನ್ನ ದೇವರು ಈ ಭೂಮಿಗೆ ಕಳಿಸಿದನು.—ಯೋಹಾನ 3:17.

ರಕ್ಷಣೆ ಪಡಿಬೇಕಾದರೆ ಯೇಸುವಿನಲ್ಲಿ ನಂಬಿಕೆ ಇಟ್ಟರೆ ಸಾಕಾ?

ಸಾಕಾಗಲ್ಲ! ರಕ್ಷಣೆ ಪಡೆಯಲು ಯೇಸು ಮೇಲೆ ನಂಬಿಕೆ ಇಡಬೇಕು ನಿಜ. ಆದರೆ ನಾವು ಇನ್ನು ಏನೋ ಮಾಡಬೇಕು. (ಅಪೊಸ್ತಲರ ಕಾರ್ಯ 16:30, 31) ಬೈಬಲ್‌ ಏನು ಹೇಳ್ತದೆ ಅಂದ್ರೆ, “ಜೀವವಿಲ್ಲದ ದೇಹವು ಸತ್ತದ್ದಾಗಿರುವ ಪ್ರಕಾರವೇ ಕ್ರಿಯೆಗಳಿಲ್ಲದ ನಂಬಿಕೆಯು ಸಹ ಸತ್ತದ್ದಾಗಿದೆ.” (ಯಾಕೋಬ 2:26) ರಕ್ಷಣೆ ಪಡೆಯಲು ನಾವು ಕೆಳಗಿರೋ ವಿಷ್ಯಗಳನ್ನೆಲ್ಲ ಮಾಡಬೇಕು.

• ಯೇಸು ಬಗ್ಗೆ, ಆತನ ತಂದೆಯಾದ ಯೆಹೋವನ ಬಗ್ಗೆ ಕಲಿಯಬೇಕು.—ಯೋಹಾನ 17:3.

• ಅವರಿಬ್ಬರ ಮೇಲೆ ನಂಬಿಕೆ ಬೆಳಸ್ಕೊಬೇಕು.—ಯೋಹಾನ 12:44; 14:1.

• ಅವರ ಮೇಲೆ ನಮಗೆ ನಿಜವಾಗಲೂ ನಂಬಿಕೆ ಇದೆ ಅಂತ ಅವರ ಆಜ್ಞೆಗಳನ್ನ ಪಾಲಿಸೋ ಮೂಲಕ ತೋರಿಸಬೇಕು. (ಲೂಕ 6:46; 1 ಯೋಹಾನ 2:17) ಯೇಸುವನ್ನ “ಕರ್ತನೇ, ಕರ್ತನೇ” ಅಂತ ಹೇಳುವವರೆಲ್ಲ ರಕ್ಷಣೆ ಪಡೆಯಲ್ಲ, ಆತನ “ತಂದೆಯ ಚಿತ್ತವನ್ನು“ ಮಾಡುವವರು ಮಾತ್ರ ರಕ್ಷಣೆ ಪಡಿತಾರೆ ಅಂತ ಯೇಸುನೇ ಹೇಳಿದ್ದಾನೆ.—ಮತ್ತಾಯ 7:21.

• ಎಷ್ಟೇ ಕಷ್ಟ ಬಂದ್ರೂ ಯೇಸು ಮತ್ತು ಆತನ ತಂದೆ ಮೇಲೆ ನಂಬಿಕೆ ಕಳ್ಕೊಬೇಡಿ. ಇದರ ಬಗ್ಗೆ ಯೇಸುವೇ ಹೇಳಿರೋದು ಏನಂದ್ರೆ, “ಕಡೇ ವರೆಗೆ ತಾಳಿಕೊಂಡಿರುವವನೇ ರಕ್ಷಿಸಲ್ಪಡುವನು.”—ಮತ್ತಾಯ 24:13.