ಯುದ್ಧ ಮತ್ತು ಹೊಡೆದಾಟಗಳೆಲ್ಲಾ ಯಾಕೆ ನಡೀತಾ ಇದೆ?

ಪಾಪ

ದೇವರು ನಮ್ಮ ಮೊದಲ ಹೆತ್ತವರಾದ ಆದಾಮ ಮತ್ತು ಹವ್ವನ ತನ್ನ ಹೋಲಿಕೆಯಲ್ಲಿ ಸೃಷ್ಟಿ ಮಾಡಿದ್ದನು. (ಆದಿಕಾಂಡ 1:27) ಇದರರ್ಥ ಅವರು ದೇವರಲ್ಲಿರೋ ಶಾಂತಿ, ಪ್ರೀತಿ ಇಂಥ ಒಳ್ಳೊಳ್ಳೆ ಗುಣಗಳನ್ನ ತೋರಿಸಬಹುದಿತ್ತು. (1 ಕೊರಿಂಥ 14:33; 1 ಯೋಹಾನ 4:8) ಆದ್ರೆ ಆದಾಮ ಮತ್ತು ಹವ್ವ ದೇವರ ಮಾತನ್ನ ಕೇಳದೆ ತಪ್ಪು ಮಾಡಿದ್ರು. ಇದ್ರಿಂದ ಅವ್ರ ಮಕ್ಕಳಾಗಿರೋ ನಮ್ಮೆಲ್ರಿಗೂ ಪಾಪ ಮತ್ತು ಸಾವು ಬಂತು. (ರೋಮನ್ನರಿಗೆ 5:12) ಈ ಪಾಪ ನಮ್ಮಲ್ಲಿ ಇರೋದ್ರಿಂದಾನೇ ನಾವು ಕೆಟ್ಟ ಯೋಚನೆ ಮಾಡ್ತೀವಿ. ಇದ್ರಿಂದ ಹಿಂಸೆ, ಹೊಡೆದಾಟಗಳಂಥ ಕೆಟ್ಟ ಕೆಲಸಗಳನ್ನೂ ಮಾಡಿಬಿಡ್ತೀವಿ.—ಆದಿಕಾಂಡ 6:5; ಮಾರ್ಕ 7:21, 22.

ಮನುಷ್ಯರ ಸರ್ಕಾರ

ನಾವು ನಮ್ಮನ್ನೇ ಆಳ್ಕೊಳ್ಳೋ ತರ ದೇವರು ನಮ್ಮನ್ನ ಸೃಷ್ಟಿಮಾಡಿಲ್ಲ. “ಎಲ್ಲಿ ಹೆಜ್ಜೆ ಇಡಬೇಕು ಅಂತ ತನಗೆ ದಾರಿ ತೋರಿಸ್ಕೊಳ್ಳೋ ಅಧಿಕಾರ ಸಹ ಮನುಷ್ಯನಿಗಿಲ್ಲ” ಅಂತ ಬೈಬಲ್‌ ಹೇಳುತ್ತೆ. (ಯೆರೆಮೀಯ 10:23) ಅದಕ್ಕೇ ಯುದ್ಧ ಮತ್ತು ಹಿಂಸೆಯನ್ನ ಪೂರ್ತಿಯಾಗಿ ತೆಗೆದುಹಾಕೋಕೆ ಮನುಷ್ಯರ ಸರ್ಕಾರಗಳಿಂದ ಆಗ್ತಾ ಇಲ್ಲ.

ಸೈತಾನ ಮತ್ತು ಅವನ ಕೆಟ್ಟ ದೇವದೂತರು

“ಇಡೀ ಲೋಕ ಸೈತಾನನ ಕೈಯಲ್ಲಿದೆ” ಅಂತ ಬೈಬಲ್‌ ಹೇಳುತ್ತೆ. (1 ಯೋಹಾನ 5:19) ಈ ಸೈತಾನ ಒಬ್ಬ ಕೆಟ್ಟ ದೇವದೂತ ಮತ್ತು ಕೊಲೆಗಾರ. (ಯೋಹಾನ 8:44) ಇವನು ಮತ್ತು ಇವನ ಜೊತೆ ಇರೋ ಕೆಟ್ಟ ದೇವದೂತರು ತೆರೆಮರೆಯಲ್ಲಿದ್ದು ಜನ್ರಿಗೆ ಯುದ್ಧ ಮಾಡೋಕೆ, ಹೊಡೆದಾಡೋಕೆ ಕುಮ್ಮಕ್ಕು ಕೊಡ್ತಿದ್ದಾರೆ.—ಪ್ರಕಟನೆ 12:9, 12.