ನಾನು ಗಾಡಿ ಓಡಿಸೋದನ್ನ ನಿಲ್ಲಿಸಬೇಕಾ?
ನೀವು ಎಷ್ಟೋ ವರ್ಷಗಳಿಂದ ಗಾಡಿ ಓಡಿಸ್ತಿರಬಹುದು. ನೀವೇ ಗಾಡಿ ಓಡಿಸ್ಕೊಂಡು ಬೇರೆ ಬೇರೆ ಕಡೆ ಹೋಗೋಕೆ ನಿಮ್ಗೆ ಇಷ್ಟ ಇರಬಹುದು. ಆದ್ರೆ ಈಗ ನಿಮ್ಮ ಕುಟುಂಬದವರು, ಸ್ನೇಹಿತರು ನೀವು ಗಾಡಿ ಓಡ್ಸೋದನ್ನ ನಿಲ್ಲಿಸಬೇಕು ಅಂತ ಹೇಳ್ತಿದ್ದಾರೆ. ‘ಇವರು ಯಾಕಪ್ಪಾ ಹೀಗೆ ಹೇಳ್ತಿದ್ದಾರೆ’ ಅಂತ ನಿಮಗೆ ಅರ್ಥಾನೇ ಆಗದೆ ಇರಬಹುದು.
ನಿಮಗೂ ಯಾರಾದ್ರೂ ‘ಗಾಡಿ ಓಡ್ಸೋದನ್ನ ನಿಲ್ಲಿಸಿ’ ಅಂತ ಹೇಳ್ತಿದ್ದಾರಾ? ಒಂದುವೇಳೆ ಹೇಳ್ತಿದ್ರೆ ನಿಲ್ಲಿಸಬೇಕಾ ಬೇಡ್ವಾ ಅಂತ ನಿರ್ಧಾರ ಮಾಡೋಕೆ ನಿಮಗೆ ಯಾವುದು ಸಹಾಯ ಮಾಡುತ್ತೆ?
ಕೆಲವೊಂದು ದೇಶದಲ್ಲಿ ಒಂದಿಷ್ಟು ವಯಸ್ಸಾದ್ಮೇಲೆ ಜನ ತಮ್ಮ ಡ್ರೈವಿಂಗ್‌ ಲೈಸೆನ್ಸ್‌ ರಿನ್ಯೂ ಮಾಡ್ಕೋಬೇಕು. ಆಗ ಡಾಕ್ಟರ್‌, ಆ ವ್ಯಕ್ತಿ ಗಾಡಿ ಓಡ್ಸೋಕೆ ಫಿಟ್‌ ಇದ್ದಾನಾ ಅಂತ ಚೆಕ್‌ ಮಾಡಿ ಒಂದು ಸರ್ಟಿಫಿಕೇಟ್‌ ಕೊಡ್ತಾರೆ. ಇಂಥ ದೇಶದಲ್ಲಿ ವಾಸಿಸ್ತಿರೋ ಕ್ರೈಸ್ತರು ಸರ್ಕಾರ ಇಟ್ಟಿರೋ ಆ ನಿಯಮಗಳನ್ನ ಪಾಲಿಸಬೇಕು. (ರೋಮ. 13:1) ನೀವಿರೋ ದೇಶದಲ್ಲಿ ಇಂಥ ನಿಯಮಗಳು ಒಂದುವೇಳೆ ಇಲ್ಲದ್ದಿದ್ರೂ ನಿಮ್ಗೆ ಗಾಡಿ ಓಡ್ಸೋಕೆ ಆಗುತ್ತಾ ಇಲ್ವಾ ಅಂತ ನೀವೇ ನಿರ್ಧರಿಸೋದು ಒಳ್ಳೇದು.
ಇತ್ತೀಚಿಗೆ ನೀವು ಹೇಗೆ ಗಾಡಿ ಓಡಿಸ್ತಿದ್ದೀರಾ?
‘ನಾನು ಡ್ರೈವಿಂಗ್‌ ಮಾಡಬೇಕಾ ಬೇಡ್ವಾ’ ಅನ್ನೋ ನಿರ್ಧಾರ ಮಾಡೋಕೆ ಈ ಮುಂದಿನ ಪ್ರಶ್ನೆಗಳನ್ನ ಕೇಳ್ಕೊಳಿ ಅಂತ ಅಮೇರಿಕಾದಲ್ಲಿರೋ ನ್ಯಾಷನಲ್‌ ಇನ್ಸ್‌ಟ್ಯೂಟ್‌ ಆನ್‌ ಏಜಿಂಗ್‌ (NIA) ಅನ್ನೋ ವೆಬ್‌ಸೈಟ್‌ ಹೇಳುತ್ತೆ:
ರೋಡಲ್ಲಿರೋ ಸೈನ್‌ ಬೋರ್ಡನ್ನ ಓದೋಕೆ ಮತ್ತು ರಾತ್ರಿಲಿ ರೋಡ್‌ ನೋಡೋಕೆ ನನಗೆ ಕಷ್ಟ ಆಗ್ತಿದ್ಯಾ?
ಕಾರಲ್ಲಿರೋ ಕನ್ನಡಿನ ಮತ್ತು ಬ್ಲೈಂಡ್‌ ಸ್ಪಾಟನ್ನ ನೋಡೋಕೆ ನನ್ನ ಕುತ್ತಿಗೆನ ಆರಾಮಾಗಿ ತಿರುಗಿಸೋಕೆ ಕಷ್ಟ ಆಗ್ತಿದ್ಯಾ?
ನಾನು ತಕ್ಷಣ ನನ್ನ ಕಾಲನ್ನ ಆಕ್ಸಿಲರೇಟರ್‌ ಮೇಲಿಂದ ತೆಗೆದು ಬ್ರೇಕ್‌ ಹಾಕೋಕೆ ಕಷ್ಟ ಪಡ್ತೀನಾ?
ರೋಡ್‌ ಅಲ್ಲಿ ಟ್ರಾಫಿಕ್‌ ಆಗೋ ತರ ನಾನು ನಿಧಾನವಾಗಿ ಓಡಿಸ್ತಿದ್ದೀನಾ?
ಇತ್ತೀಚಿಗೆ ಕೂದಲೆಳೆಯಲ್ಲಿ ನಿಮಗೆ ಆಕ್ಸಿಡೆಂಟ್‌ ತಪ್ಪಿದೆಯಾ ಅಥವಾ ನಿಮ್ಮ ಗಾಡಿಗೆ ಡೆಂಟ್‌ ಆಗಿದ್ದೀಯಾ?
ನಾನು ಗಾಡಿ ಓಡ್ಸೋ ರೀತಿ ನೋಡಿ ಪೊಲೀಸ್‌ ನನ್ನನ್ನ ನಿಲ್ಸಿದ್ದಾರಾ?
ನಾನು ಗಾಡಿ ಓಡ್ಸೋವಾಗ ತೂಕಡಿಸಿದ್ದೀನಾ?
ನೀವು ತಗೊಳ್ಳೋ ಮಾತ್ರೆಗಳಿಂದ ಮಂಪರು ಆಗುತ್ತಾ? ಗಾಡಿ ಓಡ್ಸೋಕೆ ತೊಂದ್ರೆ ಆಗುತ್ತಾ?
ನಿಮ್ಮ ಕುಟುಂಬದವರು ಅಥವಾ ಸ್ನೇಹಿತರು ನೀವು ಗಾಡಿ ಓಡ್ಸೋದನ್ನ ನಿಲ್ಲಿಸಬೇಕು ಅಂತ ಹೇಳ್ತಿದ್ದಾರಾ?
ನೀವು ಮೇಲಿನ ಒಂದು ಅಥವಾ ಎರಡು ಪ್ರಶ್ನೆಗಳಿಗೆ ‘ಹೌದು’ ಅಂತ ಉತ್ರ ಕೊಟ್ಟಿದ್ರೆ, ಗಾಡಿ ಓಡಿಸೋದ್ರಲ್ಲಿ ನೀವು ಕೆಲವೊಂದು ಬದಲಾವಣೆಗಳನ್ನ ಮಾಡ್ಕೋಬೇಕು. ಉದಾಹರಣೆಗೆ, ಗಾಡಿ ಓಡಿಸೋದನ್ನ ಕಮ್ಮಿ ಮಾಡಿ, ಮುಖ್ಯವಾಗಿ ರಾತ್ರಿ ಹೊತ್ತಲ್ಲಿ ಓಡಿಸೋದನ್ನ ಕಮ್ಮಿ ಮಾಡಿ. ಆಗಿಂದಾಗ್ಗೆ ನೀವು ಹೇಗೆ ಗಾಡಿ ಓಡಿಸ್ತಿದ್ದೀರಾ ಅಂತ ಪರೀಕ್ಷೆ ಮಾಡ್ಕೊಳಿ. ನಿಮ್ಮ ಕುಟುಂಬದವ್ರನ್ನ ಅಥವಾ ಸ್ನೇಹಿತ್ರನ್ನ ‘ನಾನು ಹೇಗೆ ಡ್ರೈವಿಂಗ್‌ ಮಾಡ್ತಿದ್ದೀನಿ?’ ಅಂತ ಕೇಳಿ ನೋಡಿ. ಸಾಧ್ಯವಾದ್ರೆ ಡ್ರೈವಿಂಗ್‌ನ ಇನ್ನೂ ಸೇಫಾಗಿ ಮಾಡೋಕೆ ಟ್ರೇನಿಂಗ್‌ ತಗೊಳ್ಳಿ. ಒಂದುವೇಳೆ ತುಂಬ ಪ್ರಶ್ನೆಗಳಿಗೆ ನೀವು ‘ಹೌದು’ ಅಂತ ಉತ್ರ ಕೊಟ್ಟಿದ್ರೆ ದಯವಿಟ್ಟು ಗಾಡಿ ಓಡಿಸೋದನ್ನ ನಿಲ್ಲಿಸಿ, ಅದು ನಿಮಗೇ ಒಳ್ಳೇದು!a
ನಿರ್ಧಾರ ಮಾಡೋಕೆ ಬೈಬಲ್ ಕೊಡೋ ಸಲಹೆ
‘ನಾನ್‌ ಚೆನ್ನಾಗೇ ಡ್ರೈವಿಂಗ್‌ ಮಾಡ್ತೀನಲ್ಲ’ ಅಂತ ನಿಮಗೆ ಅನಿಸ್ತಿರಬಹುದು. ಆದ್ರಿಂದ, ಯಾರಾದ್ರೂ ‘ನೀವು ಗಾಡಿ ಓಡ್ಸೋದನ್ನ ನಿಲ್ಲಿಸಬೇಕು’ ಅಂತ ಹೇಳಿದ್ರೆ ಬೇಜಾರಾಗಬಹುದು. ಹಾಗಾದ್ರೆ ಇದ್ರ ಬಗ್ಗೆ ಚೆನ್ನಾಗಿ ಯೋಚ್ನೆ ಮಾಡಿ ಒಳ್ಳೆ ನಿರ್ಧಾರ ತಗೊಳೋಕೆ ಯಾವ ಬೈಬಲ್ ಸಲಹೆ ಸಹಾಯ ಮಾಡುತ್ತೆ? ಬನ್ನಿ, ಅದ್ರಲ್ಲಿ ಎರಡನ್ನ ನೋಡೋಣ.
ದೀನತೆ ತೋರಿಸಿ. (ಜ್ಞಾನೋ. 11:2) ವಯಸ್ಸಾಗ್ತಾ ಆಗ್ತಾ ಕಣ್ಣು ಮಂಜಾಗುತ್ತೆ, ಸರಿಯಾಗಿ ಕೇಳ್ಸಲ್ಲ, ಕೈ ಕಾಲು ನಡುಗುತ್ತೆ ಮತ್ತು ಯಾವುದನ್ನೂ ಬೇಗ ಮಾಡಕ್ಕಾಗಲ್ಲ. ಅದಕ್ಕೇ ಕೆಲವರು ವಯಸ್ಸಾದ ಮೇಲೆ ಕೆಲವೊಂದು ಆಟ ಆಡೋದನ್ನ ನಿಲ್ಲಿಸ್ತಾರೆ. ಯಾಕಂದ್ರೆ ವಯಸ್ಸಾದ ಮೇಲೆ ಅವ್ರಿಗೆ ಬೇಗ ಗಾಯ ಆಗುತ್ತೆ. ಗಾಡಿ ಓಡಿಸೋ ವಿಷ್ಯದಲ್ಲೂ ಇದೇ ತರನೇ. ವಯಸ್ಸಾದ ಮೇಲೂ ಡ್ರೈವಿಂಗ್‌ ಮಾಡ್ತಿದ್ರೆ ಈ ಎಲ್ಲ ತೊಂದ್ರೆಗಳಿಂದ ಆಕ್ಸಿಡೆಂಟ್‌ ಆಗಬಹುದು. (ಜ್ಞಾನೋ. 22:3) ಹಾಗಾಗಿ ಯಾರಾದ್ರೂ ‘ನೀವು ಗಾಡಿ ಓಡ್ಸೋದನ್ನ ನಿಲ್ಲಿಸಿದ್ರೆ ಒಳ್ಳೇದು’ ಅಂತ ಹೇಳಿದ್ರೆ ನಾವು ದೀನತೆಯಿಂದ ಅವ್ರ ಮಾತನ್ನ ಕೇಳಬೇಕು.—2 ಸಮುವೇಲ 21:15-17 ಹೋಲಿಸಿ.
ರಕ್ತಪರಾಧದಿಂದ ದೂರ ಇರಿ. (ಧರ್ಮೋ. 22:8) ಸರಿಯಾಗಿ ಓಡಿಸಿಲ್ಲ ಅಂದ್ರೆ ನಮ್ಮ ಗಾಡಿಗಳು ಜನ್ರ ಪ್ರಾಣವನ್ನು ತೆಗೆದುಬಿಡುತ್ತೆ. ನಾವು ಗಾಡಿ ಓಡಿಸೋ ರೀತಿಯಲ್ಲಿ ತೊಂದ್ರೆ ಇದೆ ಅಂತ ಗೊತ್ತಾದ್ಮೇಲೂ ಗಾಡಿ ಓಡಿಸಿದ್ರೆ ಬೇರೆಯವರ ಪ್ರಾಣ ಹೋಗೋಕೆ ನಾವು ಕಾರಣ ಆಗ್ತೀವಿ!
ಗಾಡಿ ಓಡ್ಸೋದನ್ನ ನಿಲ್ಲಿಸಬೇಕಾ ಅನ್ನೋ ನಿರ್ಧಾರ ಮಾಡೋ ಪರಿಸ್ಥಿತಿ ಬಂದ್ರೆ, ‘ಇನ್ನು ಮೇಲೆ ಜನ ನಂಗೆ ಮರ್ಯಾದೆ ಕೊಡೋದಿಲ್ವೆನೋ’ ಅಂತ ಯೋಚಿಸಬೇಡಿ. ಆದ್ರೆ ಆ ತರ ಯೋಚ್ನೆ ಮಾಡಬೇಡಿ. ಯೆಹೋವ ನಿಮ್ಮಲ್ಲಿರೋ ದೀನತೆ ಮತ್ತು ನಿಸ್ವಾರ್ಥ ಗುಣಗಳನ್ನ ನೋಡಿ ನಿಮ್ಮನ್ನ ಪ್ರೀತಿಸ್ತಾನೆ. ‘ನಿಮ್ಮ ಕೈ ಹಿಡಿದು ನಡೆಸ್ತೀನಿ ಮತ್ತು ಕಾಪಾಡ್ತೀನಿ’ ಅಂತ ಮಾತು ಕೊಟ್ಟಿದ್ದಾನೆ. (ಯೆಶಾ. 46:4) ಹಾಗಾಗಿ ಪ್ರಾರ್ಥನೆ ಮಾಡಿ ‘ಸರಿಯಾಗಿರೋ ನಿರ್ಧಾರವನ್ನ ಮಾಡೋಕೆ ವಿವೇಕ ಮತ್ತು ತಿಳುವಳಿಕೆ ಕೊಡಪ್ಪ’ ಅಂತ ಬೇಡ್ಕೊಳ್ಳಿ.
a ಇದ್ರ ಬಗ್ಗೆ ಇನ್ನೂ ಜಾಸ್ತಿ ತಿಳ್ಕೊಳ್ಳೋಕೆ ಅಕ್ಟೋಬರ್‌ 8, 2002ರ ಎಚ್ಚರ! ಪತ್ರಿಕೆಯಲ್ಲಿರೋ “ವಾಹನ ಅಪಘಾತಗಳು ನೀವು ಸುರಕ್ಷಿತರಾಗಿದ್ದೀರೊ?” ಅನ್ನೋ ಲೇಖನ ಓದಿ.