Iikal mutwiishiibw ney Yehow i mukufwiilok lus

1-2. Tumvumvw bicy hatumaamanyik ney Yehow i mwiitufwiilok lus bwa mpeekaat yiitut? (Tal cikwaabw cifwaatul cya ha cizubw.)

MUKALENG Davih umvwiil kaakunying kavul bwa myand yibiih yaakadyey mulong. (Mis. 40:12; 51:3; mut a mukand) Nook, waalabwiil micim ni Yehow umufwiidilok lus. (2 Sam. 12:13) Davih umvwiil musangal hamanyikiley ney Yehow waakady mumufwiilok lus.​—Mis. 32:1.

² Teng bu Davih, tudy mwa kumvw byeet musangal diib didy Yehow wiitufwiilok lus bwa mpeekaat yiitut. Biitukaakashish ku micim bikasakan hatumaamanyik ney Yehow i mukat bwa kwiitufwiilok lus bwa mpeekaat yiitut yoos diib ditwiiyitootond, twaalabul micim, ni twiikashishomw bwa kulek kwiiyilong cikwaabw! (Tus. 28:13; Myil. 26:20; 1 Jah 1:9) Biitukaakashish cikwaabw hatumaamanyik ney, diib didy Yehow wiitufwiilok lus bwa mpeekaat yiitut, i bilong teng bu ney katwiish banj kwiiyilongoh!​—Ez. 33:16.

3-4. I mushind kaay waakady mwiin-kweet mwaan-mukaj kaahand mwiiyumvw kuunyim kwindiy muman ni kuhet baatiisumw, ni i biny bitwiiyiiy kutal mu ciin-bwaal eecy?

³ Misang yikwaabw baat bakwaabw bady mwa kulang ney Yehow kiish mwiibafwiilok lus. I mumw mwiiyumvwiil Jennifer, baledy bindiy baakady bamulongweesh myand ya biin-biin habitaatal Yehow. Ki hakuluuhiley, utangil kulong myand yibiih ni waakady wiiyisokok baledy bindiy. Ki kuunyim kwa mivw, uhingilomw kudy Yehow waalek biikadil bindiy bibiih aaby, ni waahet baatiisumw. Uleeleeb ney: “Kuuhal naakady nend masandy, nakol maal, niib bikasakan, natamb kufulul mund, ni kukaam kwa fwalang kwaakady ni buseeb buvul kunady. Naakady mumanyik ney kuunyim kwa mim muman ni kwaalabul micim ni mulomb Yehow bwa afwiilok lus, waakady muufwiilok lus kuhicil ku mulambw a Yeez. Ki mucim a mim waakady teng ufwiij naay.”

⁴ Bidyaakal bikukasakeenok misang yikwaabw bwiibuh kutwiishiibw ney Yehow i mukufwiilok lus bwa bilem biibuh biwaakady mulong ha kal eeny? Teng bu Davih, Yehow ukaakaam bwa twiikal batwiishiibw byeet ney i mwiitufwiilok lus. Mu ciin-bwaal eecy, twiiyiiy kutal bwaabiny bidy ni buseeb bwiitut kwiikal batwiishiibw ney Yehow i mwiitufwiilok lus ni cidy mwa kwiitwambulwiish bwiitut kulong naak.

BWAABINY BIKAAM TWIIKAL BATWIISHIIBW NEY YEHOW I MWIITUFWIILOK LUS?

5. I biny bidy Sataan ukaam bwa ney twiitab? Twaal cileejel.

⁵ Tut batwiishiibw ney Yehow i mwiitukat ni wiiyiiy kwiitufwiilok lus, twiiyiiy kweehuk matey ma Sataan. Manyik ney Sataan wiiyiiy kulong cyoos cidyey mwa kulong bwa kwiitukakeesh bwiitut kukadil Yehow mudimw. Bwa kukumbaj kiihacil kindiy aak, Sataan ukaakaam bwa twiitab ney Yehow kiishoh bend mwa kwiitufwiil lus bwa mpeekaat yiitut. Tutalaay cileejel cya mwaan-mulum a mu korent waakadyobw baful mu cisumbw bwa cyendend cya masandy. (1 Kor. 5:1, 5, 13) Haakadyey mwaalabul micim, Sataan waakady ukaam bwa biin mu cisumbw kabamufwiiloh bend lus, ni balek kumwaak cikwaabw mu cisumbw. Ni waakady ukaam bwa ney muut waakady mwaalabul micim oow iiyumvw ney kaakady mukumban bwa kumufwiilobw lus bwa ashaal ni “kaakunying kavul kady mwa kumumanomw,” ni alek kukadil Yehow mudimw. Sataan kiishoh bend mushintulul kiihacil kindiy aak. Ki “tudy bamanyik bilengel meej mindiy.”​—2 Kor. 2:5-11.

6. Tut twiiyumvw ney Yehow kiish mwiitufwiilok lus bwa myand yibiih yitwaakady balong, i biny bidy mwa kwiitwambulwiish?

⁶ Tut batwiishiibw ney Yehow i mwiitufwiilok lus, twiiyiiy kulek kwiilumbulwiish. Hatudyaakal tulong mpeekaat, tudyaakal tumvw bibiih menmen. (Mis. 51:17) Kulong naak i kulengel bwaal diib ditwiiyumvumvw bibiih bwa mpeekaat yitudy balong, biitusaasak bwiitut kushintuluk ni bwa kulong cidy cilengel. (2 Kor. 7:10, 11) Tut baman ni kwaalabul micim bwa mpeekaat yitwaakady balong ki batungunuk ni kwiilumbulwiish, bidy mwa kwiiy kwiitukooyesh mu mikon. Tut batwiishiibw ney Yehow i mwiitufwiilok lus, twiiyiiy kweehuk lungeny lwa kwiilumbulwiish. Nook tudy mwa kukadil Yehow mudimw mu mushind udyey mukat ni mucim mutook ni musangal muvul. (Kol. 1:10, 11; 2 Tim. 1:3) I mushind kaay utudy mwa kutwiishiibw mu micim yiitut ney Yehow i mwiitufwiilok lus?

I BINY BIDY MWA KWIITWAMBULWIISH BWIITUT KUTWIISHIIBW NEY YEHOW I MWIITUFWIILOK LUS?

7-8. I mushind kaay waakady Yehow mwiimanyish kudy Moyiz ni bwaal oobw bwiituloolongweesh biny? (Cimwang 34:6, 7)

⁷ Langil ha mushind waakady Yehow mwiimanyish kaayend kend. Cileejel, tal cyaakady Yehow mwambil Moyiz ha mukun a Sinaay.a (Bal Cimwang 34:6, 7.) Ning mudy Yehow mwiikal ni biikadil bivul, usungwiil bwa kwambil Moyiz ney i ‘Mawej ufwiifwiilangan lus ni wiiteeteek ha cyaab cya bakwaabw.’ Mawej wa nook udy mwa kulek bwa kufwiilok mwiin mudimw indiy udy mwaalabul micim biin-biin lus bwa mpeekaat yindiy eeny? Waakweeh! Yehow yiy mulek kufwiilok muut oow lus, udy mwa kushaal bu mwiin cikis ni udy kay ni lus. Yehow kiish mwa kulongoh bwaal bwa nook ning bicy.

⁸ Bikaam twiikal batwiishiibw ney hady Yehow uleeb ney udy ni lus, uleeleebelomw biin-biin, ni kiishoh bend udingomw. (Mis. 31:5) Nook bikaam twiitab bileeleebey. Uw mutal ney i bikasakan bwa kulek kwiilumbulwiish bwa mpeekaat yiwaakady mulong ha kal, iijooj ney: ‘Nady mutwiishiibok ney Yehow ufwiifwiilangan lus biin-biin ni wiiteeteek ha cyaab cya bakwaabw, ni ufwiifwiilok mulong a mpeekaat woos waalaalabul micim lus eeny? Nady mutwiishiibw ney i muufwiilok byaany lus eeny?

9. I biny bidy Misambw 32:5 wiitulongweesh habitaatal mushind udy Yehow wiitufwiilok lus bwa mpeekaat yiitut?

⁹ Langil ha myand yidy mu Bibl yileeleej ney Yehow i mwiitufwiilok lus. Tukontononaay cidy Davih muleeb habitaatal mushind udy Yehow ufwiilangan lus. (Bal Misambw 32:5, NWT.) Davih uleebel ney: “Uw waakady muufwiil lus bwa mpeekaat ya mim.” Mwaak wa mu ciin Ebreh udyobw baalabul ney ‘muufwiil lus,’ udy mwa kumvwiij cikwaabw “kuful [bujit]” eecy “kwangat [bujit].” Haakady Yehow mufwiilok Davih lus, byaakady bilong teng bu ney waakady muful mpeekaat yindiy mwiiyimbash kuleeh. Davih umvwiil musangal hamanyikiley ney Yehow waakady mumufwiilok lus buyiil. (Mis. 32:2-4) Tudy mwa kumvw byeet bya mushind aakaabumw oow. Hatwaalaalabul micim bwa mpeekaat yitwaakady balong, kabiish bikaam ney tutungunuk ni kwiilumbulwiish bwa mpeekaat yidy Yehow muman ni kwiitufwiilok lus.

10-11. May ma ney Yehow udy habwiih bwa “kwiitufwiilok lus” mumvumvwiij biny habimutaatal? (Misambw 86:5)

¹⁰ Bal Misambw 86:5, NWT.Hiinaah Davih uleeleeb ney Yehow udy “habwiih bwa kwiitufwiilok lus.” Bwaal oobw bumvumvwiij ney, Yehow kadyaakaloh bend umvw cinj lwang-lwang diib ditumuloolongel bilem, ni udyaakal teng ni diijing dya kufwiilok baat baalaalabul micim lus. Bwaabiny? Cituh ciibiidy cya verseh cileeleej ney: “Udy ni lukat lwa bulamat kudy boos bakubiibiikan.” Teng mutwaakady biibital mu ciin-bwaal cishaal, lukat lwa Yehow lwa bulamat lumusaasak bwa kudy bulund bukasakan ni biin mudimw bindiy ba lulamat. Nook diib didy muut udy mulong mpeekaat waalabul micim, Yehow umuleeleej lukat lwa bulamat ni wiiyiiy umufwiilok lus buyiil. (Ye. 55:7.) Biby bikukasakeen bwiibuh kutwiishiibw ney Yehow i mukufwiilok lus, iijooj ney: ‘Nady mutwiishiibok ney Yehow ufwiifwiilangan lus ni udy habwiih bwa kufwiilok baamulong a mpeekaat boos baalaalabul micim lus eeny? Nady mutwiishiibok ney uufwiifwiilok lus diib dinamuloolomb eeny?’

¹¹ Biitukaakashish hatumaamanyik ney Yehow i mumanyik bilengel ney tudy baat bakiish bawaakan. (Mis. 139:1, 2) May aam mady cikwaabw mu musambw ufundil Davih, ni mady mwa kwiitwambulwiish bwiitut kutwiishiibw ney Yehow i mwiitufwiilok lus.

I BINY BIDY YEHOW UVULUK BWIITUT?

12-13. Bilondeshel Misambw 103:14, i biny bidy Yehow uvuluk bwiitut, ni bwaal oobw bumusaasak bwa kulong biny?

¹² Bal Misambw 103:14.Davih uleeleeb ney, Yehow “imuvulukok ney tudy bulab.” Mu may aam Davih uleeleej tubingil tuleeleej mushind udy Yehow habwiih bwa kufwiilok biin mudimw bindiy baalaalabul micim lus. Uvuuvuluk ney tudy baat bakiish bawaakan. Bwa kumvw bwaal oobw bilengel, tutalaay cidy may ma Davih aam mumvwiij.

¹³ Davih uleeleeb bwa Yehow ney: “I mumanyikok bilengel mutudy babumb.” Yehow ubumbil Adam ni “bulab,” nook i mumanyik mushind udy baat ni cicyobw naacy diijing. Cileejel, bady diijing ni kudy, kulaal ni kutwiim. (Kbwa. 2:7) Ki halongel Adam ni Eev mpeekaat, baat bashaadil bulab mu mushind mukwaabw. Bu mwaakady Adam ni Eev balong mpeekaat, mwaak bulab uhetel dyumvwiij dikwaabw, tudy bulab eecy baat bakiish bawaakan bwaal tudy lelakan ya Adam, ni ki bwaabiny tuloolong myand yibiih. Haakady Davih muleeb ney Yehow i muvulukok ney tudy babumb ni bulab, waakady ukaam kuleeb ney Yehow i muvulukok ney tudy baamulong a bibiih. Yehow i mumanyikok ney tudy balong mpeekaat ni misang yikwaabw tudy mwa kulong bilem, ni diib dituloolong mpeekaat ni twaalabul micim wiitufwiifwiilok lus.​—Mis. 78:38, 39.

14. a) I mushind kaay udy Davih umvwiij mushind udy Yehow wiitufwiilok lus? (Misambw 103:12) b) I biny bitudy mwa kulongel ku mushind waakady Yehow mufwiilok Davih lus? (Tal kazubw ka ney “Mushind udy Yehow uvulamin ni ufwiilanganok lus.”)

¹⁴ I biny bidy mwa kwiitwambulwiish bwiitut kutwiishiibw ney Yehow i mwiitufwiilok lus? Davih uleeleeb ney, hady Yehow wiitufwiilok lus, ufweefweej bibiih biitut kuleeh teng bu mudy “kuhaahatukil diib kwiikal kuleeh ni kutweetweelel diib.” (Bal Misambw 103:12.) Kuhaahatukil diib ni kutweetweeleledy kabiish mwa kusambakeen bwaal i kuleeh menmen. Biituloolongweeshok biny bwa mushind udy Yehow wiitufwiilok lus bwa mpeekaat yiitut? Mukand kaahand umvumvwiij verseh oow ney: Mawej i muteek mpeekaat yiitut kuleeh neet bilong teng bu luvumb lwa ciit kaahand ludy lujimban buyiil. Nook bikaam twiikal batwiishiibw ney kiishoh bend wiiy uvuluk mpeekaat yiitut. Luvumb lwa ciit kaahand ludy mwa kwiituvulwiijok ciit, eecy bwaal bwaakady bulongek ha kal. Ki hady Yehow wiitufwiilok lus, kakwiishoh bend ciit cidy mwa kumuvulwiijok myand yibiih yitwaakady balong ha kal.​—Ez. 18:21, 22; Myil. 3:19.

15. I biny bitudy mwa kulong tut biikal tulang ney Yehow kiishoh bend mwiitufwiilok lus bwa myand yibiih yitwaakady balong?

¹⁵ I mushind kaay udy may mady mu Misambw a 103 mwa kwiitwambulwiish bwiitut kutwiishiibw ney Yehow i mwiitufwiilok lus? Tut tuhit kwiilumbulwiish bwa mpeekaat yitwaakady balong ha kal, bikaam twiijooj ney: “Nady muvulukok ney Yehow i mumanyik ney nady mulong a mpeekaat, ni ufwiifwiilok baamulong a bibiih baalaalabul micim lus eeny? Navuuvulukok mpeekaat yikaady Yehow muvulamin ni muufwiil lus, ni navuluk ney kaakwiiyoh bend kuulumbulwiish cikwaabw eeny?’ Bu mudy Yehow kay uvuluk mpeekaat yiitut ya ha kal, tut byeet katwiish mwa kutungunuk ni kwiiyivuluk. (Mis. 130:3) Tut batwiishiibw ney Yehow i mwiitufwiilok lus, katwiishoh bend twiiy kwiilumbulwiish, ki tutuutungunuk ni kumukadil mudimw ni musangal.

16. Twaal cileejel cileeleej ney tut tutuungunuk ni kwiilumbulwiish bwa mpeekaat yiitut ya ha kal, twiiyiiy kuhet njiw. (Tal cikwaabw cifwaatul.)

¹⁶ Twangat cileejel eecy. Kwiilumbulwiish bikasakan bwa mpeekaat yitwaakady balong ha kal i kulong teng bu muut wendendesh ­mashiny ook mutal teng mu lumween. I bilengel bwa kutal mu lumween ku musang ni ku musang bwa kweehuk njiw yidy mwa kulongek haanyim, ki bwa kwendesh mashiny bilengel, bikaam wiikal mutal kuuhal kuwuyaay. Bya mushind aakaabumw, bidy ni buseeb bwiitut kuvuluk bilem bitwaakady balong ha kal ni tudy mwa kuhetelok malongweesh bwiitut kutungunuk ni kwiikal biiswiik bwiitut kulek kwiibilong cikwaabw. Ki tut batungunuk ni kwiilumbulwiish ni kwiimanyin ha mpeekaat yitwaakady balong ha kal, bidy mwa kwiitukaakeesh bwiitut kutungunuk ni kukadil Mawej mudimw. Hamut a kulong nook, bikaam twiitwaal bikasakan mu mudimw a Yehow ni tutungunuk ni kulangil ha myand yidyey mwiitulay mu bulongolody buhyaabuhy mutwiikal katuy mwa “kuvuluk” myand yibiih yitwaakady balong ha kal.​—Ye. 65:17; Tus. 4:25.

TUNGUNUK NI KWIIKAL MUTWIISHIIBW MU MICIM YIIBUH

17. Bwaabiny bikaam twiikal batwiishiibw mu micim yiitut ney Yehow i mwiitukat ni wiitufwiifwiilok lus?

¹⁷ Bikaam twiikal batwiishiibw mu micim yiitut ney Yehow i mwiitukat ni udy habwiih bwa kwiitufwiilok lus. (1 Jah 3:19.) Bwaabiny? Bwaal Sataan wiiyiiy kutungunuk ni kwiitusak bwiitut kuhet kweelakan kwa ney Yehow kiishoh bend mwiitukat ni kiish wiitufwiil lus. Nook kiihacil kindiy i ka ney tulek kukadil Yehow mudimw. Bu mutukaady mu mafuk ma bulekel, Sataan wiiyiiy kwiitulwiish bikasakan bwaal i mumanyik ney i kumushaadil mafuk makeeh bituh. (Myis. 12:12) Ki bikaam tumucimun ni tutungunuk ni kukadil Yehow mudimw ni lulamat!

18. I biny biwudy mwa kulong bwiibuh kutwiishiibw mu micim yiibuh ney Yehow i mukukat ni mukufwiilok lus?

¹⁸ Bwiibuh kutwiishiibw biin-biin ney Yehow i mukukat, lond myand yitudy balong mu ciin-bwaal cishaal. Bwiibuh kutwiishiibw mu micim yiibuh ney Yehow i mukufwiilok lus, langil ha mushind udyey mwiimanyish yiy kaayend. Langil ha mushind waakadyey musak baat baakady bafund Bibl bwa kumvwiij cidy lus lwindiy. Kuvulaminoh bend ney i mumanyik ney kwiishoh bend muwaakan, ni udy habwiih bwa kukufwiilok lus. Ni vuluk ney hadyey ukufwiilok lus, uvuuvulaminok buyiil myand yiibuh yibiih. Uw mwiikal ni kutwiishiibw kwa bwiin kwaakady naak Davih habitaatal lus lwa Yehow oolw, wiiyiiy kuleeb byeeb ney: “Afwaak a Yehow, bwaal udy muufwiilok lus bwa ‘mpeekaat ya mim’!”​—Mis. 32:5, NWT.