Yehow ukwanyanyishok eeny?

1. I meej ma bicy maakady bahambidil ba lulamat ba Yehow bakwaabw bal naam diivit?

BIITUKAAKASHISH ku micim hatumaamanyik neey Yehow i mukat baat bindiy boos! Bibl uleeleeb neey: “Mawej [Yehow] udy ni musangal mukacy mwa baat bindiy.” (Mis. 149:4) Ha kal, baat bakwaabw bakooyedyeel mu mikon baafik ni ku kwiiyiihanguj neey: ‘Yehow uyanyanyishok eeny?’ Bahambidil bavul ba lulamat ba Yehow ba mu ciisang cifundilobw Bibl, baakady bal diivit ni meej ma bwiin miinaam.—1 Sam. 1:6-10; Yoobw 29:2, 4; Mis. 51:11.

2. I ngany udy Yehow wanyish?

² Bibl uleeleeb hatook neey: Yehow udy mwa kwanyish baat bakiish bawaakan. Mushind kaay? Bikaam twiitabij Yeez ni tuhet baatiisumw. (Jah 3:16) Tut balong nook, tuleeleej bakwaabw neey tudy biifwiij naay bwa mpeekaat yiitut ni baalabul micim ni tudy balay Mawej bwa kulong lukat lwindiy. (Yil. 2:38; 3:19) Yehow usaasangal neet hatuloolong myand yiitwambabulwiish bwiitut kudy nend bulund. Hatutuutungunuk ni kwiikashishomw bwa kukumbaj mucih iitut a kwiilambul, Yehow wiitwanyanyish ni wiitubal bu balund nend ba ha micim.—Mis. 25:14.

3. I majooj kaay masat matwiiyiiy kwaalabul?

³ Bwabiny bamw bady mwa kulang neey Yehow kiish wiibanyish? I mushind kaay udy Yehow uleej neey wiitwanyanyish? Ni i mushind kaay udy mwiin Krist mwa kujaadik biin-biin neey Mawej umwanyanyish?

BWABINY BAKWAABW BADY MWA KULANG NEEY YEHOW KIISH WIIBANYISH

4-5. Ning tut katuy twiiyangat ni buseeb, twiikal batwiishiibw bwa bwaal kaay?

⁴ Bavul ba mukacy mwiitut balwaal diivit ni meej ma kulek kwiiyangat ni buseeb kacy ku butofw. (Mis. 88:15) Mwiin-kweet mwaan-mulum dindiy Adrián uleeleeb neey: “Naakady teng niiyumvw ciy ni buseeb. Hanacyaakady mutofw, navuuvuluk munaakady nasambil neey cisak ciitut cyaakady mwa kwiiy kushikat mu Paradiiz, ning munaakady mutwiishiibw neey cyaakadyoh bend muut mulengel waakady mwa kwiiy kushikatomw.” Tony, waakady mukasakeen mu cisak cya Baatemw ba Yehow uleeleeb neey: “Balel baam kabaakady baayambiloh neey baakady baakat eecy baakady ni musangal bwa mim. Myand eey yilongel bwa mim kwiiyumvw neey cyaakadyoh bend mwa kulong bwaal kaahand bwaakady mwa kwiibasangej.”

⁵ Tut biikal misang yikwaabw tul diivit ni meej ma kulek kwiiyangat ni buseeb, Tuvuluk neey Yehow kaayend-kend i yiy udy mwiitukok kudyey. (Jah 6:44) I mutal biikadil bilengel bitudy naaby, bitudy katuy mwa kutal ning tut biin, tuleeb neey i mwiitumanyik bilengel menmen. (1 Sam. 16:7; 2 Cif. 6:30) Nook, twiikalaay bamuteekel micim hadyey uleeb neey: tudy ni buseeb.—1 Jah 3:19, 20.

6. I mushind kaay waakady mupostol Pool wiiyumvw bwa mpeekaat yindiy ya kal-kal?

⁶ Kuuhal kwiitut kulong myand ya biin-biin, bakwaabw mukacy mwiitut oomw balongel myand yicibafiifikish ku kwiiyumvw bafw naay. (1 Py. 4:3) Ning biin Krist ba lulamat bacilwaal teng diivit ni meej ma kulong mpeekaat. Mucim iibuh ukufwiifwiijok naay eeny? Biby biikal naak, ukaakasakan ku micim hawumaamanyik neey, ning biin mudimw ba lulamat ba Yehow baakady bal diivit ni meej ma mwaamumw aam. Cileejel, mupostol Pool waakady wiital bu cimon-a-mal haakadyey ulangil ha bibiih bindiy. (Rom 7:24) Biin-biin, Pool waakady mwiifwiij naay bwa mpeekaat yindiy ni mwaalabul micim ni muhet ni baatiisumw. Ki waakady wiileeb yiy kaayend neey: “nady mukeeh wa ku bapostol” ni nady “mubiih wa ku boos.”—1 Kor. 15:9; 1 Tim. 1:15.

7. I biny bitudy ni bwa kuvuluk habitaatal mpeekaat yiitut ya kal-kal?

⁷ Taat iitut a mu diiwul wiitulaalay neey, wiiyiiy kwiitufwiil lus teng tut biifwiij naay bwa mpeekaat yiitut ni baalabul micim. (Mis. 86:5) Nook, tut twiifwiij naay bwa mpeekaat yitudy balong, twiikal batwiishiibw neey myand yoos yidy Yehow muleeb i ya biin-biin ni—i mwiitufwiilok lus.—Kol. 2:13.

8-9. I mushind kaay utudy mwa kucimun meej ma neey: katwiish mwa kulongoh bwaal ning bwaakaabumw budy ma kusangej Yehow?

⁸ Tukaakaam kulong cyoos citudy mwa kulong bwa kukadil Yehow mudimw. Ning naak, bakwaabw biyumvumvw bu kabiish mwa kulongoh bwaal ning bwaakaabumw bwa kwiibanyishey. Mwiin-kweet mwaan-mukaj dindiy Amanda uleeleeb neey: “Civul naakady nalang neey kwaakish Yehow cidy cilengel bwa mim kumvumvwiij neey bikaam nalong teng myand yivul. Naakady teng niikashishomw bwa kulong bihit ni binaakady mukumban bwa kulong. Hanaakady ‘nakaakal myand aay,’ naakady nalang neey Yehow waakady wiiyumvw mumb mwanz ku makas bikasakan menmen kuhitok ni mim mwiin.”

⁹ I mushind kaay utudy mwa kucimun meej ma neey: katwiish mwa kulongoh bwaal ning bwaakaabumw budy mwa kusangej Yehow? Vuluk neey, Yehow i mumanyik bitudy mwa kulong ni bitudy katuy mwa kulong. Kiish mwa kwiitulomb bwa kulong myand yitudy katuy ni mushind a kulong. Ni waanaan byoos bitumuloolongel bilondeshel cidy cilengel bwiitut. Cikwaabw, langil ha bileejel bya baat ba mu Bibl baakady bakadil Yehow mudimw ni muwuy aabab woos. Langil ha cileejel cya Pool. Ukadil mudimw ni cisumy yiy kaayend mukacy mwa mivw yivul, ulong ngend ya kilometel binun bivul wend ulong bisumbw. Ki, haakady shikacil indiy mushiituluk kaciy ni mushind a kudiil baat musah bu mwaakadyey ulong kuuhal, byaakady byumvwiijok neey Yehow kacyaakady umwanyish eeny? Waakweeh, utungunukil ni kulong byaakadyey mwa kukumbaj, ni Yehow umubeneshel. (Yil. 28:30, 31) Bya mushind aakaabumw, mushind utuloolongel Yehow mudimw udy mwa kushiituluk. Ki cidy ni buseeb kudyey i citusaasak bwa kumukadil mudimw. Tukontononaay kaabaak yimw mishind yidy Yehow uleej neey wiitwanyanyish.

I MUSHIND KAAY UDY YEHOW WIITULEEJ NEEY WIITWANYANYISH?

10. Bilondeshel Jah 16:27, i mushind kaay utudy mwa “kumvw” Yehow wiitwanyish?

¹⁰ Ku dyambulwiish dya Bibl. Yehow i mukat kuleej baat bindiy neey i mwiibakat ni wiibanyanyish. Bibl uteeteel biisang bibidy haakadyey mwambil Yeez neey waakady mwaan indiy waakadyey muhit kukat, ni wanyish. (Mat. 3:17; 17:5) Ukaakaam neey Yehow akujaadikil neey ukwanyanyish eeny? Yehow kiish mwa kwiisamb neet tut bumvwok, ki wiisaasamb neet ku dyambulwiish dya Bibl. Tudy mwa “kumvw” diiy dya mudy Yehow wiitwanyish hatubaabal may ma Yeez mady mu musah mulengel. (Bal Jah 16:27.) Yeez waakady uleej biin-biin buumuut bwa Taat indiy. Nook hatubaabal neey Yeez wanyishiil biiyij bindiy ba lulamat baakady baat bakiish bawaakan, tudy mwa kwiifwanyikijil bu Yehow wend wiitwambil may aam.—Jah 15:9, 15.

11. Bilondeshel Jak 1:12, bwabiny kabiish bileej neey Yehow kiish wiitwanyish hatuheehet makab?

¹¹ Ku dyambulwiish dya myand yidyey ulong. Yehow ukaakaam kwiitwambulwiish, cileejel: hadyey wiitwaakish biit bya ku nyeet bitukaakaam. Misang yikwaabw Yehow udy mwa kulek makeng mitukwaat teng bu mulongeley bwa muut muwaakan Yoobw. (Yoobw 1:8-11) Makab kamiish maleej neey Yehow kiish wiitwanyish, ki miitwaakaakish mushind iitut kuleej mutudy bakat Mawej bikasakan ni bamuteekel micim. (Bal Jak 1:12.) Ki mu makab aam, twiiyiiy kutal mudy Yehow mwiitukat bikasakan ni mudyey wiitwambulwiish bwiitut kutaatameen.

12. I biny bitudy mwa kulongel ku bwaal bwa Dmitrii?

¹² Tal cileejel cya mwiin-kweet wa mu Azih dindiy Dmitrii. Ujimbajil mudimw indiy ni waalong suuny yivul kay muhet mudimw a kulong. Wangacil dihangadik dya kuvudij mudimw indiy a bukajaady bwa kuleej mwaakadyey muteekel Yehow micim. Kuhicil suuny yivul ni kaakady teng muhet mudimw. Ki uhetel lubeel waashaal kaciy ni mushind a kujuuk ha bulaal. Utangil kulang neey kacyaakadyoh bend mulum mulengel eecy taat mulengel ni waakady ki wiiyiihanguj ning Yehow ucyaakady umwanyish. Diifuk dikwaabw kawul mwaan indiy mwaan mukaj uhatwiishiil diibij bafundoh may matusaasangan mu Yeshaay 30:15 maleeleeb neey: “Diikand diinun i kubatamij micim mund ni kutakamin kunady.” Wiiyil naady wamuteekeledy ku butamb bwa bulaal, waaleeb neey: “Taat, hawiiyumvumvw bibiih, iikal uvuluk verseh oow.” Dmitrii ufikil ku kumvw neey: ku dyambulwiish dya Yehow cisak cindiy cyaakady cihet byaakudy bikumban, bizang, ni cyaab cya kushikacil. Uleeleeb neey: “Cinaakady nakaam kulong, i kubatamij micim mund ni kuteekel Mawej micim.” Uw mwiikal ni makab ma mwaamumw aam, iikal mutwiishiibw neey Yehow ukwaakwaakish biwudy naaby diikeng ni wiiyiiy kukwambulwiish bwiibuh kutaatameen.

13. I bangany bady Yehow mwa kukal naab mudimw bwa kwiituleejey mudyey mwiitukat, ni i mushind kaay udyobw mwa kulong nook?

¹³ Ku dyambulwiish dya biin-kweet baan-balum ni baan-bakaj. Yehow ukaakal mudimw ni biin-kweet baan-balum ni baan-bakaj bwa kwiituleej mudyey wiitwanyish. Cileejel, udy mwa kusak bakwaabw bwa kwiitukashishobw ni may mu ciisang ciwaakan. Mwiin-kweet mwaan-mukaj wa mu Azih utadil bwaal oobw haakadyey mu kaakunying kavul menmen. Ujimbajil mudimw ni waabeel bikasakan. Ni mbaayend ulongel mpeekaat mutam baamuful mu bukul. Uleeleeb neey: “Cyaakadyoh bend mumvw bwabingany myand aay yaakady yiifikil. Naakady ki nalang neey: misang yikwaabw nalongel bwaal bubiih, ni Yehow kacyaakadyoh bend uuyanyish.” Mwiin-kweet oow wiisanjiil Yehow bwa amujaadikil mwaakadyey umwanyish. Yehow umwaalabwiil bicy? Umvumvwiij neey: “Bakul ba mu cisumbw biisambiil naany baajaadikil neey: Yehow ucyaakady teng muukat.” Kuunyim ulombel cikwaabw Yehow dyambulwiish. Uleeleeb neey: “Diifuk dikwaabw, nahetel mukand waakady biin-kweet baan-balum ni baan-bakaj ba mu cisumbw ciitut baafundil. Hanabadil may ma kuukashish naam maakadyobw baafundil, numvwiil neey Yehow waakady muuyumvw.” Biin-biin, civul Yehow udyaakal wiituleej mudyey wiitwanyish ku dyambulwiish dya may ma bakwaabw.—Mis. 10:17.

14. I mu mushind kaay mukwaabw udy Yehow uleej neey i mwiitukat?

¹⁴ Cikwaabw Yehow uleeleej mudyey wiitwanyish hakaakaley mudimw ni biin-kweet baan-balum ni baan-bakaj bwa kwiitaakishobw mibel diib ditwiiyikaakaam. Cileejel, mu siiyekel a kuuhal, Yehow ukadiil mudimw ni mupostol Pool bwa kufundiley biin-kweet baan-balum ni baan-bakaj mikand 14 ku bukash bwa spirit mujilang. Mu mikand eey, Pool waakishilomw biin-kweet baan-balum ni baan-bakaj mibel ya buludy-ludy ni lukat loos. Bwabingany Yehow ulombweel Pool bwa kufundey mibel Ya nook? Yehow i Taat mulengel, ni unyonyook baan bindiy “badyey mukat.” (Tus. 3:11, 12) Bab biitwaakish mibel yishimacil mu Bibl twiikal twiiyital bu cijaadik cya neey Yehow wiitwanyanyish ni kiishoh bend mwiitulek. (Ebr. 12:6) I biny bikwaabw bileeleej neey, Yehow wiitwanyanyish?

CIJAADIK CIKWAABW CILEELEEJ NEEY YEHOW WIITWANYANYISH

15. I bangany bady Yehow waakish spirit mujilang, ni bwabiny biinaaby bitujaajaadikil neey, Yehow wiitwanyanyish?

¹⁵ Yehow waakaakish aab boos badyey wanyish spirit indiy mujilang. (Mat. 12:18, NWT) Tudy mwa kwiiyihanguj neey: naleeleejok bimw biikadil bya diimum dya spirit mujilang a Mawej mu shikacil a mim eeny? Udyok ni lutuul luvul kuhitok muwaakady kuuhal kwiibuh kumanyik Yehow eeny? Hawiikaakashishomw bwiibuh kwiikal ni biikadil bya diimum dya spirit mujilang a Mawej, wiiyiiy kwiikal mujaadik biin-biin neey Yehow ukwanyanyish!—Tal kazubw ka neey: “Diimum dya spirit i . . . ”

16. Bilondeshel 1 Biin Tesalonik 2:4 Yehow ukaakal mudimw ni bangany bwa kudiil baat musah mulengel, ni wiiyumvumvw bicy bwa bwaal oobw?

¹⁶ Yehow udy ni musangal bwa kwaakish baat badyey wanyish misah yilengel. (Bal 1 Biin Tesalonik 2:4.) Tal musangal uhetel mwiin-kweet mukwaabw mwaan-mukaj dindiy Jocelyn mu kudiil kwa baat bakwaabw musah mulengel. Diifuk dikwaabw Jocelyn ubuukil ni kaakunying. Uleeleeb neey: “Cyaakadyoh bend ni diikand ni niiyumvwiil ciy ni buseeb. Ki naakady seb’aa nijl ni dyaakady diifuk dinaakady nay mu mudimw’a bukajaady. Nook, nalongel diisambil ni mim kuy mu mudimw.” Kuhacy aak, Jocelyn usambakeen ni Mary, mwaan-mukaj wa micim yilengel wiitabil bwa kulong Bibl. Kuunyim kwa suuny yikeeh, Mary uleebel neey: waakady usambil Mawej bwa amwambulwiish teng diib dyaakady Jocelyn mukookol ku cibel kwindiy. Hady Jocelyn ulangil ha bwaal oobw, uleeleeb neey: “niiyumvwiil teng bu neey Yehow waakady uuyambil neey: ‘Nady mukwanyish.’” Biin-biin, baat boos kabaakwiiyoh bend kukun mat ku musah wutwiibadiidiil. Ki twiikalaay batwiishiibw neey Yehow usaasangal hatuloolong mwiitut moos bwa kudiil bakwaabw musah mulengel.

17. Bilondeshel Misambw 5:12, I biny bituloolongel ku cileejel cya Vicky habitaatal cya kukuul naacy baat?

¹⁷ Yehow ukuukuloh baat badyey wanyish ni cya kukuul naacy baat. (1 Tim. 2:5, 6) Ki tudy mwa kuleeb bicy tut twiiyumvw neey Yehow kiish wiitwanyanyish ning mutudy baleej diitabij mu cya kukuul naacy baat ni bahet baatiisumw? Vuluk neey, katwiish teng mwa kwiitab meej miitut, ki bikaam tuteekel Yehow micim. Utaatal boos bady baleej diitabij mu cya kukuul naacy baat bu baat bawaakan ku mees kwindiy ni i mwiibalay bwa kwiibabenesh. (Bal Misambw 5:12, NWT; Rom. 3:26, NWT) Kulangil ha cya kukuul naacy baat kwambulwiishil Vicky. Diifuk dikwaabw, kuunyim kwa yiy muman kulangil bikasakan ha cya kukuul naacy baat, umanyikil neey: “Yehow waakady naany lutul ciisang cileeh. . . . Ki byaakady teng bu naakady namwambil neey: ‘Kwiish mwa kukat muut bu mim oow. Mulambw a Mwaan Iibuh kiishoh bend mwa kubwiikil bibiih byaam.’” Haakadyey ulangil ha mulambw a cya kukuul naacy baat, utangil kumvw mwaakady Yehow mumukat. Tut byeet twiiyiiy kumvw mudy Yehow mwiitukat ni wiitwanyish tut balangil ha cya kukuul naacy baat.

18. I biny bitudy mwa kwiikal bajaadik hatutuutungunuk ni kukat Taat iitut a mu diiwul?

¹⁸ Ning tut bikashishomw bwa kukooyel ku myand yitubalong mu ciin bwaal eecy, misang yikwaabw tudy mwa kukooyel mu mikon ni twiiyihanguj ning Yehow wiitwanyanyish. Biby bilongek naak, vuluk neey, wanyanyish aab “bady bamukat.” (Jak. 1:12) Nook tungunuk ni kufweej habwiih ni Yehow ni kaam mwa kumanyik mishind yoos yidyey mwa kukujaadikil neey ukwanyanyish. Kaay waavulamin neey Yehow “kiishoh bend kuleeh ni muut woosoow.”—Yil. 17:27.