Nga Mambo ka Bantu Obebayanjishila na Mambo a Bupopweshi Bwabo?

ABYA mulangulukapo’mba bantu bafwainwa kuyanjishiwa na mambotu abupopweshi bwabo nyi? Kampepo kechi byobyo mulanguluka ne, mwakonsha kulanguluka’mba kikulutu abo bantu kechi babena kunyanchijila lūsa lwa bakwabo ne. Pano nangwa kikale byonkabyo, kuyanjisha bantu na mambo abupopweshi bwabo kwatendekele kala kabiji ne lelo jino kukyubiwa. Kyakumwenako, Bakamonyi bakwa Yehoba bavula mu Europe ne mu mapunzha akwabo mwaya ntanda yonse, javula bebangachilenga lūsa lwabo lwa kupopwela ne kwibamwesha malwa pa myaka nobe 50 yapitapo.

Pakyokya kimye, Bakamonyi bakwa Yehoba bebamwesheshe malwa akine kine ne kwibayanjisha pakimye kikatampe bingi kukafulumende wa National Socialist ne wa Communist mu Europe. Nanchi twakonsha kufunjilako ka ku bintu byo bapichilemo pa kwibamanyika na mambo akwikala na bupopweshi bwapusanako? Kabiji kika kyotwakonsha kufunjilako ku byo baubile kimye kyo bamanaminenga?

“Kechi bo ba Panopantanda ne”

Bakamonyi bakwa Yehoba bebikako nangovu kumvwina mizhilo, kwikala bamutende kabiji ba byubilo byaoloka. Kechi balengulula makafulumende nangwa kukeba kwilwisha nao ne, kabiji kechi bekolomwena abo bene malwa na mambo akukeba’mba bafwile palwitabilo lwabo ne. Bano bena Kilishitu kechi betumpa mubyabumulwila ntanda ne. Kino kyayila monka mwaambijile Yesu amba: “[Baana bami babwanga] kechi bo ba panopantanda ne, byonka byo nji amiwa kechi ne wa panopantanda ne.” (Yoano 17:16) Makafulumende avula ayuka kuba’mba Bakamonyi kechi betumpa mubyabumulwila ntanda ne. Bino kafulumende wa National Socialist ne wa Communist ao kechi anemeka mukambizho wa mu Baibolo wakuba’mba bena Kilishitu kechi bo ba panopantanda ne.

Ene mambo alengela kino aambiwe pa kipwilo kyajingako mu November 2000 pa Univesiti wa Heidelberg, mu Germany. Kino kipwilo kyajinga na mutwe wakuba’mba: “Kumanyika ne Kwikala na Lūsa: Bakamonyi Bakwa Yehoba mu Maboko a Kafulumende Washinta wa National Socialist Newa Communist.” Dr. Clemens Vollnhals wapa Sukulu wa Hannah-Arendt-Institute Upesa-pesa ano Makafulumende waambile’mba “Kafulumende wa National Socialist ne wa Communist kechi batatu muchima mubyabumulwila ntanda byonka ne, bino bakeba muntu uji yense kwibakokela mu byonse.”

Bena Kilishitu bakine kechi bakonsha kukokela makafulumende abantu “mubyonse” ne, mambo balayañana na luchipo kwikala bakishinka kwi Yehoba Lesa kwapwa. Bakamonyi baji mubyalo muji kafulumende wa National Socialist ne wa Communist batana kuba’mba mikambizho ya Kyalo ne mikambizho yalwitabilo lwabo kimye kimo kechi iswañana ne. Nanchi baubapo byepi pakupita mubuno bulwi? Kufumatu ne kukala, Bakamonyi bakwa Yehoba balondela jifunde jaambile batumwa bakwa Yesu kuba’mba: “Twafwainwa kukokela Lesa kukila bantu.”—Byubilo 5:29.

Bakamonyi bavula bakosejiletu kulwitabilo lwabo kabiji kechi betumpile mu bya bumulwila ntanda ne nangwa kyakuba bapichilenga mu malwa. Pano nanchi bachinchikile byepi? Nga ngovu ya kuchinchika beifumishepi? Mwane lekai bene bekumbwile. Kabiji twayai tumone byotwakonsha kufunjilako ku byo bapichilemo atweba bonse Bakamonyi ne boba babula Bakamonyi.

[Mabulañano pa peja 4]

Bakamonyi bakwa Yehoba mu Germany bebamwesheshe malwa akatampe bingi pakimye kyabaya kukafulumende wa National Socialist ne wa Communist mu Europe mu myaka-kitota kyabu 20

[Mabulañano pa peja 4]

“Kafulumende wa National Socialist ne wa Communist kechi batatu muchima mu bya bumulwila ntanda byonka ne. Bino bakeba muntu uji yense kwibakokela mu byonse.” Dr. Clemens Vollnhals

[Kipikichala pa peja 4]

Kisemi kya ba Kusserow bekimanyikile na mambo akuba bakaine kusankilapo lwitabilo lwabo

[Kipikichala pa peja 4]

Ba Johannes Harms bebepaijile mu kaleya ka bena Nazi pamambo a lwitabilo lwabo