Kabokoshi Ka Mepuzho

◼ Nanchi kyafwainwa kukopolola byambo bikafunjiwa mu Sukulu ya Mwingilo wa Teokalasi ne kwibisampanya ku bakwetu nyi?

Kijitu bulongo kuba kino umvwe mubena kukeba kukebingijisha na ba mu kisemi kyenu ne balunda nenu ba kamo kamo. Nangwa byonkabyo, a bino byambo kechi byafwainwa kwikala ke bya kusampanya ku bantu bonse nangwa kwibipotesha’mba mumwenemo mali ne, mambo kino ke kulala muzhilo wa kupulinta mabuku kwakubula lūsa.—Loma 13:1.

Majashi amo a mu Sukulu ya Mwingilo wa Teokalasi, ekalatu na kishina; kafwako mabuku amweshiwa’mba mo mwafuma jashi ne. Nanchi kyakonsha kuwama muntu kunemba mutanchi wa mabuku muji byobyo byambo nangwa kukopolola byambo biji mu oo mabuku amba akape boba bapewa ano majashi nyi? Ine. Kabiji kechi kyafwainwa kunemba mikumbu ya mepuzho ekala mu kupituluka mu Sukulu ya Mwingilo wa Teokalasi kuba’mba bakwetu bakeengijishe ne, mambo kino kechi kikebakwasha kuvuluka bishinka bikatampe ne. Baana basukulu bafwainwa kwipesela pesela bene. Jino ke jishinda janema bingi Yehoba jo anengezha kupichila mu sukulu kwitukwasha kwamba na “lujimi wa bafunda.”—Isa. 50:4.