Chinuzhukainga Muchima wa Kwitemwa uji mu Ntanda Lelo Jino
NANCHI mwayuka’mba bantu bavula ba mu ino ntanda balanguluka’mba banema kukila bakwabo, kabiji bakeba kwibapa mingilo imo kukila bakwabo nyi? Nangwatu bebanemeka mu jino jishinda, batwajijila na kukebelapo ne bifulo bikwabo. Ino ndangulukilo imwesha muchima wa kwitemwa ne kubula kusanta. Baibolo waambijile jimo kuba’mba bantu ba mu moba akupelako byo byo bakekala.—2 Timo. 3:2.
Kufumatu ne kala, bantu bamwesha muchima wa kwitemwa. Adama ne Evwa befuukwijilepo abo bene kyawama ne kyatama, kabiji mwafumine bintu byatama bingi. Byo papichile myaka yavula, Mfumu Uzaya wa mu Yuda walangulukilenga’mba wafikijilemo kusoka bya kufutumuna pa nzubo ya Lesa. Pano bino, kintu kyo aubile kyatamine bingi. (2 Moba 26:18, 19) Kabiji Bafaliseo ne Basadusea balangulukanga’mba Lesa wafwainwe kwibobila bibusa kukila bakwabo na mambo a kuba’mba bafumine mu kisemi kya kwa Abalahama.—Mat. 3:9.
Ne atweba lelo jino twikala na bantu baji na muchima wa kwitemwa abo bene kabiji twakonsha kutendeka kulondela byubilo byabo. (Nga. 5:26) Twakonsha kutendeka kulanguluka’mba bafwainwa kwitupapo mwingilo umo nangwa kwitunemeka. Twakonsha kuchinuzhuka byepi ino ndangulukilo? Kitanshi, twafwainwa kuyuka Yehoba byo alangulukapo pa kino. Mafunde a mu Baibolo abiji akonsha kwitukwasha.
Yehoba ye wayuka bulongo mingilo yo afwainwa kwitupa. Twayai twisambeko pa bintu bimo.
Mu kisemi, mwanamulume wafwainwa kuyuka’mba mukazhanji wamunemeka, kabiji wamukazhi naye wafwainwa kuyuka’mba mwatawanji wamutemwa. (Efi. 5:33) Baji mu masongola bafwainwa kwimweshangatu butemwe na mukwabo wa mu masongola. (1 Ko. 7:3) Bansemi bakeba baana kwibakookelanga, kabiji baana nabo bafwainwa kuyuka’mba bansemi babo bebatemwa ne kwibata muchima.—2 Ko. 12:14; Efi. 6:2.
Mu kipwilo, twafwainwa kunemeka bakulumpe mu kipwilo bengila na mukoyo. (1 Tesa. 5:12) Nangwa byonkabyo, bakulumpe mu kipwilo kechi baji na luusa lwa kutangijilanga byonse byuba balongo ne banyenga ne.—1 Pe. 5:2, 3.
Lesa wapa makafulumende luusa lwa kwitukambizha kuba’mba twafwainwa kupananga misonko ne kwibanemeka.—Loma 13:1, 6, 7.
Na mambo a butemwe bwanji, Yehoba witupa bintu byavula bingi byabula ne kwitufwainwa. Na mambo a bundengamambo bwetu, twafwainwatu kufwa. (Loma 6:23) Nangwa byonkabyo, Yehoba witupa mapesho avula bingi na mambo a butemwe bwanji bubula kwaluka. (Sala. 103:10, 11) Tutambwila mapesho ne mingilo iji yonse na mambo a lusa lwanji lukatampe.—Loma 12:6-8; Efi. 2:8.
BYO TWAKONSHA KUCHINUZHUKA MUCHIMA WA KWITEMWA
Chinuzhukainga ndangulukilo ya bantu ba mu ino ntanda. Kwakubulatu nangwa kuyuka ne, twakonsha kutendeka kulanguluka’mba twanema kukila bakwetu. Yesu wamwesheshe’mba kyapeela bingi kwikala na ino ndangulukilo byo aambile pa kishimpi kya ba mingilo bo bafwetele ndenali umo. Bamingilo bamo batendekele kwingila lukelo kabiji bazhikishe juba na kwingila mu mute wazonga; pakuba bamo baingijiletu jiola jimo. Jibumba jitanshi jatendekele kulanguluka’mba bafwainwe kwibapa mfweto ikatampe na mambo a mwingilo ye baingijile. (Mat. 20:1-16) Byo aingijishe kino kishimpi, Yesu wamwesheshenga’mba baana banji ba bwanga bwafwainwa kutondwa na bintu byonka byakonsha kwibapa Lesa.
Banabalume bazhikishe juba na kwingila balangulukilenga’mba bakebapa mfweto ikatampe kukila bakwabo
Santainga kabiji kange muketekelenga bakwenu kwimupa bintu ne. (1 Tesa. 5:18) Londelainga byaubanga Paulo wabulanga kulomba balongo mu Kolinda kuba’mba bamupe bintu byo akebelenga nangwa kya kuba kyajingatu bulongo kuba bino. (1 Ko. 9:11-14) Twafwainwa kusantanga pa bintu byonse byawama bitupa bakwetu ne kuchinuzhuka muchima wa kwibalombanga bintu.
Mutumwa Paulo kechi walombanga balongo kumupa mali ne
Ikalai bepelula. Muntu inge keelangulukile po abula, javula utendeka kulanguluka’mba bafwainwa kumubikilapo ne bintu bikwabo pa byo aji nabyo. Kwipelula kwakonsha kwitukwasha kuchinuzhuka ino ndangulukilo yatama.
Ngauzhi Danyela wipelwile kabiji kino kyo kyalengejile Yehoba kumutemwa
Twafwainwa kufunjila kwi ngauzhi Danyela mambo wipelwile bingi. Kisemi kyanji kyajinga kinonshi, wamwekanga bulongo, wajinga na maana ne kuyuka bintu. Abino byonse inge byamulengejile kutendeka kulanguluka’mba bafwainwa kumunemeka kukila bakwabo kabiji amba byo byalengejile kumupa mingilo yo aingijilenga. (Da. 1:3, 4, 19, 20) Nangwa byonkabyo, Danyela watwajijile kwipelula kabiji kino kyubilo kyo kyalengejile Yehoba kumutemwa.—Da. 2:30; 10:11, 12.
Twayai atweba bonse tuchinuzhukenga muchima wa kwitemwa wasampukila ne pa katele mu ntanda lelo jino. Pakuba twayai tusekelenga mu mingilo yonse yakonsha kwitupa Yehoba na mambo a lusa lwanji lukatampe.