Ikalai Bepelula Byonka Biji Yehoba

1. Mambo ka o mukuminya bingi pa kwipelula kwa Yehoba?

INGE mwalanguluka pa bantu baji pa bifulo bikatampe lelo jino, nanchi bepelula nyi? Ine kwalepeshatu. Nangwa byonkabyo, Yehoba aye wa bulume bonse wipelula bingi. (Sala. 113:5-8) Kafwako wipelula byonka biji Yehoba ne. Mwi aye kechi mujipo bwitote nangwa pachechetu ne. Mu uno mutwe, tusakwisamba pa byubilo bina bya Yehoba mo amweshesha kwipelula bisakwitukwasha kuyuka byo epelula. Kabiji tusakufunda pe Yesu byo amwesheshe’mba wipelula byonka biji Shanji. Kwisamba pa bino bintu kusakwitukwasha kufwenya kwipi ne Yehoba ne kulondela kwipelula kwanji.

YEHOBA WAKASULUKILA BANTU

2. Byambo biji pa Salamo 62:8 bitubuulapo ka pe Yehoba? (Monai ne kipikichala kiji pa )

² Bantu betota kechi bakasulukila bantu ne. Kwitota kwibalengela kuba bintu bilengela bantu kwibachinuzhuka nangwa kubula kwibakasulukila. Pakuba Yehoba aye wapusanako. Na mambo a kuba’mba Shetu wa mwiulu wipelula bingi, ukeba’mba tumusolomokenga mu lulombelo ne kumubuula byonse bibena kwitukatazha mu milanguluko. (Tangai Salamo 62:8.) Byonkatu nsemi watemwa baana banji byo atelekesha ne kukebesha kumvwa bibena kwibakatazha, Yehoba naye ukebesha kuteleka ku milombelo ya bapopweshi banji. Kabiji milombelo yavula ya bakalume banji beinembele mu Baibolo. Kino kimweshatu patoka kuba’mba Yehoba ukeba’mba tumusolomokenga mu lulombelo. (Yosh. 10:12-14; 1 Sam. 1:10-18) Pano ibyepi pa bimye bimo inge tukankazhama kusolomoka Yehoba mu lulombelo na mambo a bintu byo tulubankanya?

3. Mambo ka o mwafwainwa kushiinwa’mba Yehoba ukeba’mba mumusolomokenga mu lulombelo kimye kyonse?

³ Twafwainwa kusolomokanga Yehoba mu lulombelo nangwa kya kuba tulanguluka’mba kechi witutemwa ne, na mambo a bintu byo tulubankanya. Mambo ka o twaambila bino? Mu kishimpi kya mwana walubile, Yesu waesakenye Yehoba ku nsemi wamulume wa kifyele watambwijile mwananji walapijile walangulukilenga’mba kechi basakumutambwila ne, na mambo a bintu byatama byo aubile. Pano uno nsemi waubile byepi byo amwene mwananji byo abwelelenga ku nzubo? Yesu waambile’mba uno nsemi byo amwene mwananji palepa byobya, “wamunyemejile lubilo ne kumupakachilamo ne kumufyompa.” (Luka 15:17-20) Yehoba naye uji byonka biji uno nsemi wamulume. Inge waumvwa milombelo ya bantu baji na bulanda na mambo a kulenga mambo, kwipelula kumulengela kwibateleka na kifyele. (Jila. 3:19, 20) Yehoba wibomvwina lusa ne kwibamwesha butemwe byonka byaubile nsemi wa mu kishimpi kya kwa Yesu. (Isa. 57:15) Pano Yehoba ‘witunyemena’ byepi lelo jino? Javula uba bino kwingijisha bakulumpe mu kipwilo, ba mu kisemi baitabila ne balongo ne banyenga. (Yako. 5:14, 15) Yehoba witukwasha mu jino jishinda mambo ukeba’mba tufwenye kwipi ne aye.

4. Yesu wamwesheshe byepi amba wakasulukijile bantu?

⁴ Yesu ulondela Shanji. Yesu naye wipelula byonkatu biji Shanji. Kino kyo kyalengelanga bantu kumusolomoka ne kumukasulukila byo ajinga pano pa ntanda. Kechi baumvwanga moyo kumwipuzha mepuzho ne. (Mako 4:10, 11) Inge wibepuzha byo balangulukilepo pa bintu bimo, bakumbulanga kwesakana na byo balangulukilenga. (Mat. 16:13-16) Kabiji inge balubankanya, kechi baakamwanga’mba Yesu usakuzhingila ne. Mambo bayukile’mba watekenye, wajinga na lusa ne kifyele. (Mat. 17:24-27) Na mambo kuba’mba Yesu wajinga na byubilo byonka bijipo ne Shanji, walengejile baana banji ba bwanga kuyuka bingi bulongo Yehoba. (Yoa. 14:9) Wibalengejile kuyuka’mba Yehoba wipelula kabiji ukeba bantu kufwenya kwipi ne aye, kupusanako na byajinga bantangi ba bupopweshi bakanamine kabiji betotele bingi.

5. Kwipelula kulengela byepi bakwetu kwitukasulukila?

⁵ Twakonsha kulondela byepi Yehoba? Inge twipelula, tulengela bakwetu kwitukasulukila. Kwipelula kuketulengelanga kuchinuzhuka kubula kulekelako bakwetu mambo, kwitota ne kwibobila kichima. Bino byubilo byakonsha kulengela bakwetu kubula kwitukasulukila. Kwipelula kwafwainwa kwitulengela kwikala na kifyele, kutekenya bakwetu ne kwibalekelako mambo. Abino byubilo byo bilengela bakwetu kwitukasulukila. (Kolo. 3:12-14) Bakulumpe mu kipwilo kikatakata bafwainwa kwibakasulukilanga ku balongo ne banyenga. Bino pa kuba’mba bakulumpe mu kipwilo bebakusulukile, bafwainwa kutanwanga javula na balongo ne banyenga. Bafwainwa kuyanga ku Nzubo ya Bufumu na kupwila, kechi kutelekelangatu kupwila ku nzubo kimye kyonse ne. Kabiji bafwainwa kumona’mba babena kwingijila pamo na balongo ne banyenga mu mwingilo wa kusapwila ku nzubo ku nzubo. Balongo ne banyenga inge bayuka bulongo bakulumpe mu kipwilo, kikebapelelanga kwibasolomoka inge baji na makatazho.

YEHOBA WITULANGULUKILAKO

6-7. Ambaipo bintu bimo bimwesha Yehoba byo apimpwile milanguluko yanji kwesakana na byalombele bakalume banji.

⁶ Bantu betota bintu byo boba na bantu bimwesha’mba kechi bebalangulukilako ne. Bino na mambo a kuba’mba Yehoba wipelula, witulangulukilako nangwa’mba upimpula milanguluko yanji nangwa kya kuba wakonsha kubila bintu monse mo abena kukebela. Akilangulukai pa byo aubile ne Milyama nyenga ya kwa Mosesa. Aye ne Alona banyinyichilenga Mosesa, Yehoba ye atongwele kumwimenako. Kyaubile Milyama kyamwesheshenga’mba kechi wanemekele Yehoba ne. Na mambo a kino, Yehoba wazhingijile Milyama ne kumukambula na mbumba. Pano Alona byo amusashijileko kwi Mosesa kuba’mba amukwashe, ne Mosesa byo asashijile Yehoba kuba’mba abuke nyenga yanji, Yehoba waubile byepi? Yehoba kechi watwajijile kumukambula na mbumba byonka byo afuukwilepo patanshi ne. Na mambo a kuba’mba Yehoba wipelula, wapimpwile byo afuukwile ne kubuka Milyama.​—Bala. 12:1-15.

⁷ Yehoba wamwesheshe ne kwipelula mu byo aubile na Mfumu Hezekiya. Kupichila mwi ngauzhi, Yehoba wabuujile Hezekiya kuba’mba usakufwa. Hezekiya wajijile Yehoba kuba’mba amubuke. Yehoba wamukumbwile ne kumunungilako myaka 15 ku bumi bwanji. (2 Mfu. 20:1, 5, 6) Kya kine, kwipelula kulengela Yehoba kubila bantu kifyele ne kupimpula milanguluko yanji.

8. Ñanyi bintu bimwesha’mba Yesu witulangulukilako? (Mako 3:1-6)

⁸ Yesu ulondela Shanji. Byo ajinga pano pa ntanda, Yesu kechi wakankazhamanga kukwasha bantu ne. Wabukanga bantu pa juba ja Sabado nangwa kya kuba bamukanyanga ku balwanyi banji bakanamine michima. (Tangai Mako 3:1-6.) Ne lunotu, Yesu watwajijila kwitulangulukilako byo aji mutwe wa kipwilo kya bwina Kilishitu. Inge muntu umo mu kipwilo walenga mambo akatampe, umutekenya ne kumupa kimye kyabaya kya kupimpula byubilo byanji.​—Lum. 2:2-5.

9. Twakonsha kumwesha byepi amba tulangulukilako bakwetu? (Monai ne bipikichala.)

⁹ Twakonsha kulondela byepi Yehoba? Atweba bonse twafwainwa kulangulukilangako bakwetu byonka byuba Yehoba, mu milanguluko yetu ne mu byo tuba. (Yako. 3:17) Nabiji bansemi, nangwa kya kuba kechi balama baana babo butotwe ne, bino bafwainwa kwibalangulukilangako. Kino kyo kishinka kiji mu jishimikila jaamba pe Yakoba jitanwa pa Ntendekelo 33:12-14. Bansemi bepelula kechi besakanya baana babo ne. Bakulumpe mu kipwilo nabo bafwainwa kulangulukilangako bakwabo. Jishinda jimo mo bobila bino ke kuswa byafuukula bavula mu jibumba ja bakulumpe, kikulutu kechi byalala mafunde a mu Baibolo ne. (1 Timo. 3:2, 3) Kabiji atweba bonse twafwainwa kumvwishanga mubena kulangulukila bakwetu nangwa kya kuba tubena kulangulukila mu jishinda japusanako. (Loma. 14:1) Ibyo, atweba bonse, ‘kukooka muchima kwetu kuyukanyikwe ku bantu bonse.’​—Fili. 4:5.

YEHOBA WATEKANYA

10. Mu ñanyi mashinda Yehoba mo amweshejile’mba watekanya?

¹⁰ Kampe ne anweba mwayuka’mba bantu betota bakankalwa kupembelela. Bwitote bwibalengela kubula kutekanya. Yehoba wapusanako bingi, mambo aye ye mwine watekanya. Nabiji mu moba a Nowa, Yehoba waambile’mba ukapembelela myaka 120 saka akyangye konauna babi. (Nte. 6:3) Kino kyalengejile Nowa kwikala na kimye kya kukomesha baana banji ne kufiika bwato na ba mu kisemi kyanji. Kabiji mu kuya kwa moba, malaika waimenejilengako Yehoba, watelekele byaambilenga Abalahama saka atekanya byo amwipwizhenga pa lonaiko lwa muzhi wa Sodoma ne Gomola. Muntu witota inge wamwambijile’mba, ‘Ñanyi wakupa luusa lwa kungipuzha?’ Bino byonka biji Yehoba, uno malaika naye watekenyejile Abalahama.​—Nte. 18:20-33.

11. Kwesakana na byaamba 2 Petelo 3:9, mambo ka Yehoba o atekenya ne mu ano moba?

¹¹ Yehoba watekanya ne mu ano moba. Ubena kupembelela kimye kyo atongola kya kuletelapo mpelo. Pano mambo ka o atekenya? “Mambo kechi usaka muntu nangwa umo amba akafwe ne, bino ukeba’mba bonse balapile.” (Tangai 2 Petelo 3:9.) Nanchi kutekanya kwa kwa Yehoba kubena kuyatu mu mema nyi? Ine. Bantu bavula ba michima ya bukishinka babena kwiya kwi aye. Kabiji twaketekela kuba’mba ne bantu bakwabo bavula bakafuukulapo kuba bino. Nangwa byonkabyo, butekanye bwa Yehoba buji na pa kupelela. Yehoba watemwa bantu, pano bino kechi uswisha bantu kutwajijilatu na kuba byatama ne. Kechi ukaswisha bubi kutwajijila myaka ne myaka ne.​—Ha. 2:3.

12. Yesu ulondela byepi kutekanya kwa Yehoba?

¹² Yesu ulondela Shanji. Pa myaka yavula, Yesu watwajijila kutekanya byonka byatekanya Yehoba. Yesu wimwena Satana byo amba bya bubela pe Yehoba ne pa bakalume banji bakishinka. (Nte. 3:4, 5; Yoba 1:11; Lum. 12:10) Yesu umona bantu byo babena kumanama, abino byonse byafwainwa bimulengela kukebesha bingi “konauna mingilo ya kwa Diabola.” (1 Yoa. 3:8) Pano ñanyi kintu kikwasha Yesu kupembelela saka atekanya kumuswisha konauna mingilo yonse ya kwa Diabola? Kwipelula ko kulengela Yesu kushiila bintu byonse mu maboko a kwa Yehoba mwine wayuka kimye kyafwainwa.​—Byu. 1:7.

13. Mu ñanyi jishinda kabiji mambo ka Yesu o atekenyanga batumwa banji?

¹³ Kabiji byo ajinga pano pa ntanda, Yesu watekenyanga batumwa. Nabiji kimye batumwa kyo bepachikilenga pa wajinga mukulumpe mwi abo, Yesu kechi wibalengulwile ne. Pakuba watwajijile kwibatekenya. (Luka 9:46; 22:24-27) Waketekejile’mba bakapimpula byubilo byabo mu kuya kwa moba. Nanchi ne anweba kujipo kintu kyatama kyo mubwezhabwezhapo kuba nyi? Umvwe ibyo, nanchi kechi musanta pa kwikala na Mfumu wipelula kabiji wimutekenya nenyi?

14. Ñanyi bintu biketukwasha kwikala batekanya?

¹⁴ Twakonsha kulondela byepi Yehoba? Inge twaikala na “muchima wa Kilishitu,” tukalangulukanga ne kuba bintu monka mubila Yehoba. (1 Ko. 2:16) Pano twakonsha kwikala byepi na muchima wa Kilishitu? Kintu kyakonsha kwitukwasha ke kutanga mabuku a Mambo Awama. Kabiji twafwainwa kulangulukanga pa mashimikila ajimo byo asolola ndangulukilo ya kwa Yesu. Kabiji twafwainwa kulomba Yehoba kwitukwasha kwikala bepelula kabiji batekanya byonka byajinga Yesu. Kwikala na muchima wa Kilishitu kuketukwasha kwitekenya atweba bene, ne bakwetu ba mu lwitabilo byonka bitutekenya Lesa.​—Mat. 18:26-30, 35.

YEHOBA WANEMEKA BANTU BEPELULA

15. Ambaipo bibena kumwesha’mba Yehoba wanemeka bingi bantu bepelula. (Salamo 138:6)

¹⁵ Tangai Salamo 138:6. Akikilangulukaipotu, Yehoba nangwa kya kuba ye Nkambo walengele bintu byonse, bino wanemeka bingi bantu bepelula. Akilangulukai pa bantu bajingako kala Yehoba bo anemekele. Bamo kechi twakonsha kwibavuluka bukiji ne, bino banembwa mu mashimikila a mu Baibolo. Yehoba watangijile Mosesa kunemba jizhina ja wa mwingilo aye Debola, wajingako mu moba a bashakulu babo. Debola waingijile mu bukishinka mu nzubo ya kwa Izaka ne ya kwa Yakoba pa myaka 125. Nangwa kya kuba kechi twayuka byavula pa uno mwanamukazhi wakishinka ne, bino Yehoba wamwene’mba bamutongola mu Mambo anji, kimwesha’mba wamutemenwe bingi. (Nte. 24:59; 35:8, tubyambo twa munshi.) Kabiji byo papichile myaka yavula, Yehoba watongwele Davida wajingatu nsongwalume kafunga kwikala mfumu wa kisaka kya bena Isalela. (2 Sam. 22:1, 36) Yesu byo asemenwe, Lesa wamwesheshe’mba wanemekele bakafunga byo atumine bamalaika kuya na kwibabuula patanshi kuba’mba mu muzhi wa Betelema mo mwasemenwa ukekala Mesiasa. (Luka 2:8-11) Kabiji Yosefwa ne Maliya byo batwajile Yesu mu nzubo ya Lesa, Yehoba wamwesheshe’mba wanemekele bingi bakote babiji, Shimeona ne Hana, byo ebalengejile kufikwako ne kumona Mwananji. (Luka 2:25-30, 36-38) Kya kine, “nangwa kya kuba Yehoba watumbalala bingi, umona bantu bepelula.”

16. Yesu walondejile byepi Shanji byo amona bantu?

¹⁶ Yesu ulondela Shanji. Byonkatu biji Shanji, Yesu naye wanemekele bingi bantu bo balengulwile. Yesu wafunjishanga ‘babula kufunda ne bantutu’ bukine bwaamba pa Bufumu bwa Lesa. (Byu. 4:13; Mat. 11:25) Kabiji Yesu wabukanga bantu bakolwa mu jishinda jibalengelanga kumvwa’mba banemekwa. (Luka 5:13) Bufuku bwapeleleko saka akyangye kufwa, Yesu waovwele baana banji ba bwanga ku maulu, mwingilo waingilanga bakalume. (Yoa. 13:5) Kabiji saka akyangye kuya mwiulu, wamwesheshe’mba wanemeka baana banji ba bwanga bajingako pa kyo kimye, ne bakekalako kulutwe kupichila mu kwibapa mwingilo wanema bingi wakukwasha bantu kukekala na bumi bwa myaka ne myaka.​—Mat. 28:19, 20.

17. Twakonsha kumwesha byepi amba twanemeka bakwetu? (Monai ne kipikichala.)

¹⁷ Twakonsha kulondela byepi Yehoba? Tumwesha’mba twanemeka bantu inge ke tusapwile mambo awama bonse bakeba kumvwa, bafuma mu bisho byapusana pusana, babikoba byapusana pusana, bafunda ne babula kufunda. Kabiji tumwesha’mba twanemeka balongo ne banyenga inge ke twibamone’mba betukila ke na mambo a busendwe bo tuji nabo nangwa kifulo kyo tujipo ne. (Fili. 2:3) Tutokesha Yehoba ku muchima inge twipelula ne kwikala “batanshi” mu kunemeka bakwetu mu ano mashinda ne mu mashindatu akwabo.​—Loma 12:10; Zefwa. 3:12.

18. Mambo ka o mwafuukwilapo kwipelula byonka bipelula Yehoba?

¹⁸ Inge twipelula byonka bipelula Shetu wa mwiulu witutemwa bingi, bantu baketukasulukilanga, tukalangulukilangako bakwetu ne kwibatekenya. Kabiji tukanemekanga bakwetu byonka bibanemeka Yehoba. Vulukainga kuba’mba Lesa uketunemeka bingi inge twatwajijila kwibikako kwipelula byonka byo epelula.​—Isa. 43:4.