Bya Kunengezha Kijiilo kya Masongola Kinemeka Yehoba

1-2. Yehoba umona byepi bijiilo bya masongola?

NANCHI bemwipanguzha nangwa mwaipanguzha nyi? Inge ibyo, twaketekela kuba’mba muji bingi na lusekelo. Mwafwainwa mwapayankana bingi kunengezha kijiilo kyenu kya masongola. Yehoba ukeba’mba kijiilo kyenu kya masongolaa kikemuletele bingi lusekelo. Kabiji ukeba’mba mukekalenga na lusekelo mu masongola enu.​—Maana 5:18; Lwimbo 3:11.

² Kijiilo kyenu kya masongola kyafwainwa kuleta munema kwi Yehoba. Mambo ka o twaambila bino? Kabiji mwakonsha kuba byepi bino? Nangwa kya kuba uno mutwe ubena kwamba kikatakata pa beipanguzha babena kunengezha kijiilo kya masongola, bino mafunde ajimo akonsha kwitukwasha atweba bonse kunemeka Yehoba, nangwa inge betwipuzha ku babena kunengezha kijiilo kya masongola amba twibafundeko.

MAMBO KA O TWAFWAINWA KUNEMEKELA YEHOBA?

3. Ñanyi kintu kyafwainwa kuvulukanga bena Kilishitu beipanguzha babena kunengezha kijiilo kya masongola, kabiji mambo ka?

³ Bena Kilishitu beipanguzha babena kunengezha kijiilo kya masongola bafwainwa kumona’mba balondela mafunde a Yehoba aji mu Mambo anji. Mambo ka? Mambo Yehoba ye watendekeshe masongola, ye wasongwesheshe ba Adama ne Evwa. (Nte. 1:28; 2:24) Onkao mambo, beipanguzha bafwainwa kumona’mba kijiilo kyabo kya masongola kyanemeka Yehoba.

4. Ñanyi kishinka kyafwainwa kulengela bena Kilishitu beipanguzha kunemeka Yehoba pa juba jabo ja masongola?

⁴ Muji na kishinka kyanema bingi kyafwainwa kwimulengela kulondela bikeba Yehoba pa kijiilo kyenu kya masongola: Yehoba ye Shenu wa mwiulu kabiji mulunda nenu. (Hebe. 12:9) Kwakubula nangwa kuzhinaukatu ne, mukeba kutwajijila kwikala balunda nanji. Kechi mukeba kuba kintu kyatama pa joja juba nangwa pa juba jikwabotu kikamufichisha ku muchima ne. (Sala. 25:14) Inge mwalanguluka pa bintu bimubila Yehoba ne byo akemubila kulutwe, nanchi kino kechi kyafwainwa kwimulengela kukebesha kumunemeka pa kijiilo kyenu kya masongola nenyi?​—Sala. 116:12.

MWAKONSHA KUNEMEKA BYEPI YEHOBA?

5. Baibolo wakonsha kukwasha byepi bena Kilishitu beipanguzha babena kunengezha kijiilo kya masongola?

⁵ Mu Baibolo kechi muji mizhilo yonse yafwainwa kulondela bena Kilishitu mu bintu byonse byubiwa pa bijiilo bya masongola ne. Bena Kilishitu bakonsha kunengezha masongola kwesakana na bintu byo biji, biji bisho ne bintu byo babena kukeba abo bene. Kabiji bena Kilishitu ba kine balondela mizhilo ya kafulumende yaamba pa masongola. (Mat. 22:21) Nangwa byonkabyo, masongola o banengezha mwayila mafunde a mu Baibolo anemeka Yehoba ne kumusangajika. Pano ñanyi mafunde a mu Baibolo o mwafwainwa kuvulukanga?

6. Mambo ka bena Kilishitu beipanguzha o bafwainwa kulondela mizhilo ya kafulumende yaamba pa masongola?

⁶ Londelainga mizhilo ya kafulumende. (Loma 13:1, 2) Mu byalo bimo, bena Kilishitu beipanguzha bafwainwa kulondela mizhilo ya kafulumende saka bakyangye kwisongola. Beipanguzha bafwainwa kuyuka mizhilo yaamba pa masongola ya ku mpunzha ko bekala. Inge muji na mepuzho pa byo mwafwainwa kuba bino, ipuzhai bakulumpe mu kipwilo pa kuba’mba bemukwashe.b

7. Kijiilo kya masongola kyafwainwa kwikala byepi?

⁷ Monai kuba’mba byonse byaubiwa mu mushingi. (1 Ko. 10:31, 32) Bintu byonse byo mukoba byafwainwa kumwesha bipangwa bya mupashi wa Lesa, kechi mupashi wa pano pa ntanda ne. (Nga. 5:19-26) Kwesakana na jifunde ja mu Baibolo jaamba pa bumutwe, mwanamulume waipanguzha ye uji na mwingilo wa kumona’mba kijiilo kya masongola abo kya lusekelo kabiji kya mushingi. Ñanyi bintu byakonsha kwibakwasha kuba bino? Jashi ja masongola jaimena pa Baibolo inge bejamba na butemwe, na kizaku ne na mushingi jilengela bantu kunemeka lunengezho lwa Lesa lwa masongola. Bonse mu luonde bakamwenamo mambo jikebakwasha kuyuka buneme bwa lunengezho lwa masongola. Bena Kilishitu bavula beipanguzha bafuukulapo kuba’mba luchipo lwa masongola abo lukekele mu Nzubo ya Bufumu inge kyakonsheka. Inge mwafuukulapo kwingijisha Nzubo ya Bufumu, mwafwainwa kunembela nkalata jibumba ja bakulumpe saka kukiji kimye.

8. Mwafwainwa kuba byepi pa kuba’mba kijiilo kya masongola enu kikekale kya mushingi? (Loma 13:13)

⁸ Tangai Loma 13:13. Inge mwafuukulapo kwikala na kijiilo kya masongola, mwafwainwa kuba byepi pa kuba’mba bintu bikobiwanga bikabule kumwesha mupashi wa pano pa ntanda? Kyambo kya Kingiliki kyatuntululwa’mba “kusangalala kubi” kilumbulula bijiilo bantu ko batomanga maalwa avula ne kuteleka ku nyimbo kufikatu ne bufuku. Inge mwafuukulapo kunengezha maalwa pa kijiilo kyenu kya masongola, mwafwainwa kumona’mba bantu kechi bakizhamo kutoma maalwa ne.c Inge kya kuba kukekala nyimbo, mwafwainwa kumona’mba kechi ibena kuvumisha kya kuba bantu kebakankalwe ne kwisamba ne. Salai bulongo musango wa nyimbo ne kuteleka ku byambo bijimo pa kuba’mba bikabule kutuntwisha bantu.

9. Ñanyi bintu byafwainwa kuvulukanga beipanguzha babena kunengezha kijiilo kya masongola pa bakambapo byambo bicheche bo basala nangwa pa bya kisangajimbwe?

⁹ Nanchi mwanengezha kuba’mba ku kijiilo kyenu kya masongola kukekale bamo bakambapo byambo bicheche, kutamba mavidyo, bipikichala nangwa bintutu bikwabo bya kusangajika bantu nyi? Abino byonse byakonsha kulengela juba jenu ja masongola kwikala bingi ja lusekelo. Nangwa byonkabyo, mwafwainwa kumona’mba byonse bikobiwa bikatundaika bantu. (Fili. 4:8) Iipuzhai’mba: ‘Nanchi bikamwesha’mba twanemeka bakwetu nyi? Nanchi bikamwesha’mba twanemeka lunengezho lwa masongola nyi?’ Kabiji kyanema pa byonse, iipuzhai’mba: ‘Nanchi bikanemeka Yehoba nyi?’ Nangwa kya kuba kwambapo bya kusekesha kujitu bulongo, bino mwafwainwa kumona’mba kechi byalengela bantu kwikala na milanguluko yabula kufwainwa ne. (Efi. 5:3) Monai kuba’mba balunda nenu ne ba mu kisemi bakambapo byambo bicheche bayuka byo mwafuukula kabiji bakebinemeka.

10. Bena Kilishitu beipanguzha babena kunengezha kijiilo kya masongola bakonsha kuyuka byepi pa kupelela? (1 Yoano 2:15-17)

¹⁰ Yukai pa kupelela. (Tangai 1 Yoano 2:15-17.) Yehoba umvwa bingi bulongo inge bakalume banji bafuukulapo kumunemeka, kukila inge batatu muchima pa byo babena kukeba abo bene. Bena Kilishitu bepelula bachinuzhuka kutaya mali avula pa bintu ne ‘kwimwesha.’ Ñanyi bintu byawama bikafumamo inge mwapeezhako bintu pa masongola enu? Kampe ne anweba kikekala byonka byo kyajinga ku mulongo Mike wa ku kyalo kya Norway. Waambile’mba: “Kechi twitwezhezhe mu nkongole ne, kabiji kitulengejile kutwajijila kwingila mwingilo wa bupainiya. Nangwa kya kuba twapeezhezheko masongola etu, bino awamine kabiji twajinga bingi na lusekelo.” Nyenga Tabitha wa ku kyalo kya India waambile’mba: “Kupeezhako masongola etu kwitulengejile kubula kwikala na bijikila. Kabiji kwitulengejile kubula kwikala na bintu byavula bya kunengezha ne kubula kwipachika na ba mu kisemi ne atweba bene.”

11. Babena kwisongola bakonsha kubula kukizhamo byepi mu mvwajilo ne mwekelo yabo? (Monai ne bipikichala.)

¹¹ Nanchi mwafuukulapo kala bivwalo byo mukavwala nyi? Kwakubula nangwa kuzhinaukatu ne, mukeba’mba mukamweke bingi bulongo. Mu moba anembejilwemo Baibolo, musongoshi ne musongwa, batangako bingi muchima ku byo bakavwala pa juba jabo ja masongola. (Isa. 61:10) Ibyo kuba’mba bivwalo byo mukavwala pa juba ja masongola byakonsha kupusanako na byo muvwala kimye kyonse, pano bino kange mukakizhemo ne. (1 Timo. 2:9) Kange muswishe bivwalo nangwa bintutu bikwabo kwikala bintu byanemesha pa masongola enu ne.​—1 Pe. 3:3, 4.

12. Mambo ka babena kwisongola o bafwainwa kukaina kuvwanga mu masongola abo bisho byakanya Baibolo byubiwa ku mpunzha ko bekala?

¹² Chinuzhukainga bisho byakanya Baibolo. (Lum. 18:4) Mu ino ntanda ya kwa Satana, mu bijiilo bya masongola bavwangamo bisho bya bantu babula kupopwela Lesa, kupopwela mipashi ne bingelekezha. Yehoba witukambizha’mba kechi twafwainwa kukwatako nangwa pacheche ku bino bintu ne. (2 Ko. 6:14-17) Inge ku mpunzha ko mwikala kuji bisho bimo byo mubena kuzhinauka, mwafwainwa kuyuka ko byafuma ne mafunde a mu Baibolo o mwafwainwa kulondela saka mukyangye kwibivwanga mu kijiilo kyenu kya masongola.

13. Babena kwisongola bakonsha kulondela byepi Yehoba pa kutambula bya bupe?

¹³ Nanchi ko mwikala kuji kisho kya kupa bupe babena kutwela mu masongola nyi? Bantu bamo bakajilwa bo mwaita kechi bakonsha kupana bya bupe byakonsha kupanapo baji na mali ne. Ibyo kuba’mba bena Kilishitu bebatundaika kupana kabiji kuba bino kwibaletela bingi lusekelo. (Maana 11:25; Byu. 20:35) Nangwa byonkabyo, kechi twafwainwa kutwika mutembo wa kupana bupe bo twaita ku masongola ne, nangwa kwibalengela kulanguluka’mba kupana bupe bucheche kechi kukamweka bulongo ne. Onkao mambo, tulondela Yehoba byo amona bupe inge ke tuswishe bakwetu kupana bupe kufuma panshi ya muchima kwesakana bintu byo baji nabyo.​—2 Ko. 9:7.

BYA KUCHINUZHUKA MAKATAZHO NE BYA KWIAPWISHA

14. Ñanyi makatazho amo ekala na babena kunengezha kijiilo kya masongola?

¹⁴ Mukatalañana na makatazho pa kunengezha kijiilo kya masongola kikanemeka Yehoba. Kampe kyakonsha kwimukatazha bingi kunengezha masongola apeela. Charlie wikala pa makuji a Solomon Islands, waambile’mba: “Kitukatezhe bingi kuyuka bantu bo twafwainwe kwita ku masongola. Tuji na balunda bavula bingi, kabiji mwayila kisho kyetu, bonse batengela kutanwako.” Tabitha ye twaji kwambapo waambile’mba: “Ko twikala, ku bijiilo bya masongola kutanwa bantu bavula bingi. Bansemi betu kibakatezhe bingi kuswa byo twibabuujile’mba twafuukula kwitatu bantu 100.” Sarah wa ku kyalo kya India waambile’mba: “Bantu bavula bata bingi muchima pa bibamona bantu. Muvyala wami wajinga na kijiilo kya masongola kikatampe. Kino kyandengejile ne amiwa kukeba kwikala na kijiilo kya masongola kikatampe kukila ne byajinga kijiilo kyanji.” Ñanyi bintu byakonsha kwimukwasha kuyuka bya kuba na ano makatazho ne akwabotu?

15. Mambo ka kulomba o kwanemena kimye kyo mubena kunengezha kijiilo kya masongola?

¹⁵ Lombainga kimye kyonse Lesa kwimukwasha pa kunengezha masongola enu. Mwakonsha kubuula Yehoba mu lulombelo bijikila byo muji nabyo ne byo mubena kumvwa ku muchima. (Fili. 4:6, 7) Mwakonsha kulomba kuba’mba emukwashe kufuukula bintu bulongo, kubula kubambisha muchima inge mwaikala na bijikila ne kuchinchika inge ke kikebewe. (1 Pe. 5:7) Mukaketekela bingi mwi Yehoba byo mukemwena byo akemukwashanga. Tabitha ye twaji kwambapo waambile’mba: “Bonse bubiji bwetu pa kunengezha masongola twaakamwanga bingi kuba’mba tukapusenangamo atweba bene ne na ba mu kisemi. Onkao mambo, inge tubena kunengezha bikekala masongola etu, twalombanga saka tukyangye kutendeka. Twimwenejile Yehoba byo etukwashishe kabiji bintu byonse byaendeletu bulongo.”

16-17. Kwisamba bulongo kwakonsha kwimukwasha byepi kunengezha bulongo kijiilo kya masongola enu?

¹⁶ Isambainga bulongo mu mushingi. (Maana 15:22) Anweba mubena kutwela mu masongola mukafuukwila pamo bintu byavula pa kunengezha kijiilo kyenu kya masongola. Pa bino bintu paji kusala juba ja masongola, mali o mukatayapo, bantu bo mwafwainwa kwita ne bintutu bikwabo. Saka mukyangye kufuukulapo, pitulukaimo pamo bonse mu bino byonse ne kwisamba pa mafunde a mu Baibolo aamba pa bino bintu ne pa bimubuulako bena Kilishitu bakoma mu lwitabilo. Pa kwamba pa byo mubena kukeba, mwafwainwa kwamba na kifyele, kwilangulukilako ne kubula kuminatu pa kintu kimo. Inge ba mu kisemi nabiji bansemi benu, byo babena kukeba’mba mube bijitu bulongo, mwafwainwa kuswa. Jino juba janema bingi ne kwi abo. Inge mwakaana kuswa byo bemubuula’mba mube, balumbulwilai kyo mwakaaina mu jishinda jawama. (Kolo. 4:6) Lumbulwilai ba mu kisemi kyenu kuba’mba kintu kyo mwanemeka bingi ke kwikala na kijiilo kya masongola kikanemeka Yehoba.

¹⁷ Kulumbulwila bansemi benu byo mwafuukulapo kechi kwapela ne, kikatakata inge kechi baji mu bukine ne. Nangwa byonkabyo, mwakonsha kwibakwasha kumvwisha. Mulongo Santhosh wa ku kyalo kya India waambile’mba: “Ba mu kisemi kyetu bakebelanga kubikamo bisho byapusana pusana bya mu bupopweshi bwa ba Hindu. Atweba bonse babiji kitusendejile kimye kyabaya bingi pa kuba’mba twibalumbulwile byo twafuukwilepo. Twapimpwileko bintu bimo byakebewenga byo twamwene’mba kechi bikafichisha Yehoba ku muchima ne. Twapimpwileko kajo ko twakebelenga kunengezha ne kubikapo ko bakebelenga. Kabiji twafumishepo nyimbo ne kuzha, mambo mu kisho kyetu kechi muji bino bintu ne.”

18. Mwakonsha kuba byepi pa kuba’mba bintu bikende bulongo pa masongola enu? (1 Kolinda 14:40) (Monai ne kipikichala.)

¹⁸ Nengezhai bulongo. Kunengezha bintu bulongo kukemulengela kubula kwikala na bijikila pa juba jenu ja masongola. (Tangai 1 Kolinda 14:40.) Mulongo Wayne wa ku kyalo kya Taiwan waambile’mba: “Byo kwashajiletu moba acheche juba jetu ja masongola kufika, twasambakene na bonse bepaine kwitukwashako mu mingilo. Twisambile pa byo twanengezhezhe ne kupitulukamo mu mbaji imo ya kijiilo kyetu kya masongola pa kuba’mba bintu byonse bikende bulongo.” Na mambo a kunemeka bantu bo mwaita, kyanema bingi kulama kimye.

19. Ñanyi bintu bikemukwasha pa kuba’mba bintu bikende bulongo pa juba jenu ja masongola?

¹⁹ Makatazho avula twakonsha kwiachinuzhuka inge twalangulukila jimo pa byakonsha kumweka. (Maana 22:3) Nabiji ku mpunzha yenu, inge bantu bavula baya ku masongola kwakubula kwibeta, monai byo mwafwainwa kuba pa kuba’mba kino kikabule kumweka. Lumbulwilai balongo benu babula mu bukine bikekala masongola enu kabiji balumbulwilai ne byo mumona bisho byubiwa pa bijiilo bya masongola. Batuminai kibaaba kya kuba’mba “What Happens at a Wedding of Jehovah’s Witnesses?” (Ñanyi Bintu Byubiwa pa Juba ja Masongola a Bakamonyi ba kwa Yehoba?) kiji pa jw.org. Pa kuba’mba bintu bikabule kuya munsunya pa kijiilo kyenu kya masongola, mwafwainwa kutongola mulongo uji na bulunda bwakosa ne Yehoba wa kwikala “mukulumpe wa kijiilo.” (Yoa. 2:8) Inge mwamulumbulwila bulongo byo mwanengezha kijiilo kyenu kya masongola, ukemukwasha kumona’mba bintu pa juba jenu ja masongola byaubiwa mu mushingi kabiji byonka byo mwanengezhezhe.

20. Ñanyi kintu kyafwainwa kuvulukanga beipanguzha pa kunengezha juba jabo ja masongola?

²⁰ Mwakonsha kwikala na bijikila inge mwalanguluka pa bintu byonse byavwangwa mu kunengezha juba jenu ja masongola. Nangwa byonkabyo, vulukainga’mba juba ja masongola jikekalatu juba jimo. Jino juba jakonsha kwikala ntendekelo ya bwikalo bwawama bo mukekalanga bwa kwingijila Yehoba pamo. Onkao mambo, monai kuba’mba mwapeezhako bintu pa juba jenu ja masongola kabiji byonse byaubiwa mu mushingi. Ketekelai mwi Yehoba. Ukemukwasha kunengezha bulongo juba jenu ja masongola, jo mukavulukanga na lusekelo kwa kubula kwilangulusha.​—Sala. 37:3, 4.