Nanchi Bupopweshi Bwafwainwa Kwivwanga mu Nkondo Nyi?

Ba Alberto baingijile mu bushilikale pepi na myaka 10, baambile’mba: “Mukulumpe wa chechi wetu ulombelako bashilikale witupesheshe amba, ‘Lesa emupeshe.’ Bino nalangulukilenga kuba’mba amiwa mbena kuya na kwipayañana, bino Baibolo wamba’mba “kwipayañana ne.’”

Ray wajinga mu nzhita yalwilenga Nkondo ya Kyalo kyonse ya bubiji. Juba jimo waipwizhe mukulumpe wa chechi walombelangako bashilikale amba: “Mwiya mu bwato na kulombelako nzhita kuba’mba bashinde, nanchi balwanyi nabo kechi balomba kuba’mba bashinde ne nyi?” Mukulumpe wa chechi walombelangako bashilikale wakumbwile kuba’mba Nkambo wingila mu mashinda a kukumya.

Umvwe kya kuba’mba kechi mwatondwa na uno mukumbu ne, ko kuba’mba kechi yenu bonka ne.

NANCHI BAIBOLO UFUNJISHA AMBA KA?

Yesu waambile kuba’mba mukambizho mukatampe wa Lesa ke wa ‘kutemwa mukwenu byonka byo witemwa obe mwine.’ (Mako 12:31) Nanchi Yesu waambile kuba’mba twafwainwa kutemwatu mulunda netu na mambo kyalo nangwa ko ekala nyi? Ine. Waambijile bana banji ba bwanga amba: “Pa kyo kino po po bakayukila bonse amba mwi baana bami ba bwanga umvwe mwitemwa anwe bene na bene.” (Yoano 13:34, 35) Kwitemwa ko betemwa kwaikala ke kiyukilo kya kwibayukilako. Bena Kilishitu bakonsha kufwila bakwabo kukila kwipaya bakwabo.

Bena Kilishitu batanshi balondelanga byambo byaambile Yesu. Buku wa Encyclopedia of Religion waamba’mba:“Ba Fwaza ba mu chechi batanshi, kumvwangakotu ne Tertullian ne Origen, baambile amba bena Kilishitu bebakainye kwipaya bantu kabiji jino jifunde jo jibalengejile kubula kwimvwanga mu nzhita ibena Loma.”

NANCHI BAKAMONYI BA KWA YEHOBA BOBA BYEPI MU KINO?

Bakamonyi ba kwa Yehoba batanwa pepi mu byalo byonsetu, bemwena mikoka ya bantu byo beshikwa. Bino abo bebikako kumwesha kyubilo kya butemwe akyo kyaikala ke kayukilo.

Kyakumwenako, kimye kyo kwajinga milukuchi mu 1994 pakachi ka ba Hutu ne ba Tutsi mu Rwanda na mambo a mishobo, Bakamonyi ba kwa Yehoba kechi bemvwangilemo ne. Bakamonyi babikile bumi bwabo mu kizumba kupichila mu kufya bakwabo nangwa kya kuba bapusene mishobo. Kimye kyo bakwachile bakamonyi babiji ba Hutu na mambo a kufya balongo babo ba Tutsi, kipamo kya bashilikale kya ba Hutu Interahamwe kyaambile kuba’mba, “Mwafwainwa kufwa mambo mwakukwasha ba Tutsi kuba’mba banyeme.” Kyatamakotu, bano bonse Bakamonyi babiji ba Hutu bebepaile.—Yoano 15:13.

Nanchi mwalanguluka kuba’mba byubilo bya Bakamonyi ba kwa Yehoba byakwatankana na byambo byaambile Yesu pa butemwe bwa kwipana kufwila bakwabo nyi?

[Byambo biji pa Kipikichala pa peja 5]

Based on U.S. Army photo

[Mabulañano pa peja 5]

Nanchi bantangi ba bupopweshi bafunjisha bena Kilishitu butemwe bwa bena Kilishitu ba kine nyi?