Tusapwila Mambo Awama
1 Byo tujipo na jishuko jikatampe ja kusapwila “mambo a lusekelo a bintu byawama!” (Lo. 10:15) Tuji na mambo a kutekenesha akwabana na bantu baji na bijikila kabiji bapelelwa. Twakonsha kwibakwasha byepi bano bantu kuyuka kuba’mba tubena kupana “mambo awama a lusekelo”?—Isa. 52:7.
2 Nengezhai Byambo Byawama: Misambo yetu mu butumwa yakonsha kufumamo byawama inge yashinkamana kwamba pa bintu byawama. Onkao mambo, kimye kyo tubena kunengezha mwakwambila ne kupituluka mu mabuku otusakwingijisha mu busapwishi, twafwainwa kumona bintu bibena kwamba pa bintu byawama. Kupichila mu kusapwila luketekelo lwetu lwaimana pa Baibolo na kizaku, twakonsha kuketekela kuba’mba mukafuma byawama.—Mana. 25:11.
3 Nangwa kya kuba tumvwina bantu lusa byo bapelelwa na mambo a buyanji bubena kuya na kutaminako, twafwainwa kwibalumbulwila kuba’mba Bufumu bwa kwa Lesa bo bukapwisha lukatazho lwa bantu. Nangwatu tubena kwisamba nabo pa kwiya kwa “juba ja kushinkanya” ja kwa Yehoba, twafwainwa kwibalumbulwila kuba’mba ano ke “mambo awama ku bapelulwa.” (Isa. 61:1, 2) Twafwainwa kwibatekenesha banteleki betu kuba’mba byonse byuba Yehoba kikapelako bikaleta lusekelo lukatampe ne bya kufumamo byawamisha.
4 Panai Kine na lusekelo lwine lwine: Inge bantu bamona byo twasangalala ne ñambilo yetu ya luketekelo, bakekala na kizaku kya kukeba kumvwa. Umvwe sa tumwesha bino byubilo bya luketekelo, banteleki betu bakamona kuba’mba “[tusekela] mu luketekelo.” (Lo. 12:12) Onkao mambo bakonsha kwikala na kizaku kya kumvwa mambo awama. Kya kine, tuji na milanguluko yawama ya kutwajijila kumwesha byubilo bya lusekelo mu mashinda onse a butumwa bwetu.
5 Byo tuji bamingilo ba mambo awama, kechi tushimunatu mambo awama onkatune. Busapwishi bwetu bupana luketekelo lwa bumi bwawama bwa mu ano moba etu a lelo ne a mu kimye kya kulutwe. (1 Timo. 4:8) Pa kwisamba na muntu yense ye tusambakana, milangwe yetu yawama imweshiwa mu byo twamba kabiji, ikwasha bantu kumvwa mambo awama. Umvwe twiketa mu byambo byetu ne mo twibyambila twayai tukoseshe bantu bakishinka kumvwa mambo awama a kisangajimbwe o tusapwila!