Londainga ‘Lesa Wetu wa Lusekelo,’ aye Yehoba
1 Yehoba kine ukeba bantu kwikala ba lusekelo. Mambo Anji etukwasha kutengela bibusa byawama biji kulutwe byo anengezhezha bantu. (Isa. 65:21-25) Kyafwainwa kuba saka kimweka ku bantu kuba’mba tutana lusekelo mu kwisamba nabo “mambo awama a lukumo lwa Lesa wa bibusa [lusekelo NW].” (1 Timo. 1:11) Jishinda jo twambilamo mambo a Bufumu jafwainwa kumwesha butemwe bwetu bwa kutemwa bukine ne kuta muchima kwa kine ko tuta bantu bo twisamba nabo.—Loma 1:14-16.
2 Pano bino, kimye kimo kyakonsha kushupa kwikala basangalala. Mu manyaunda amo, tutanamo bantu bachechetu baswa mambo a Bufumu. Kabiji kwakonsha kwikala bimye bimo byo twakonsha kukatazhiwa mu bwikalo. Pa kuba’mba twikale balusekelo, twafwainwa kulanguluka byo kyanemena bantu ba mu nyaunda yetu kumvwa ne kuyuka bilumbulula mambo awama a Bufumu o tubena kusapwila. (Loma 10:13, 14, 17) Kulanguluka languluka pa kino kuketukwasha kutwajijila na lusekelo mu kuyukisha lusa lwa Yehoba lwa lunengezho lwa lupulukilo.
3 Ambainga pa Bintu Byawama Bikeya: Twafwainwa ne kutako muchima ku bintu byo twamba. Nangwa kya kuba twakonsha kutendeka mwisambo kupichila mu kutongola lukatazho nangwa kintu kya bukumo kyaubiwa bantu kyo babena kulangulukapo, twafwainwa kumona kuba’mba kechi tubena kwambatu pa bintu bilefula ne. Mwingilo wetu ke wa kuleta “mambo a lusekelo a bintu byawama.” (Isa. 52:7; Loma 10:15) Ano mambo awama ke mambo aimena pa milaye ya Lesa ya bintu bya kulutwe byawama. (2 Pe. 3:13) Byo mwayuka kino, ingijishainga binembelo ‘kubuka balajika michima.’ (Isa. 61:1, 2) Kino kiketukwasha atweba bonse kutwajijila kwikala basangalala ne kwamba pa bintu byawama.
4 Kwakubula nangwa kuzhinauka ne, bantu bakamona byo twasangalala kimye kyo tubena kwingilako mwingilo wa kusapwila. Onkao mambo, nanchi twayayi jonse tumweshenga muchima wa ‘Lesa wetu wa lusekelo,’ aye Yehoba, kimye kyo tubena kwisamba na bantu ba mu nyaunda yetu mambo awama a Bufumu.