Ibikilai Anweba Bene Bikonkwanyi Byakumupashi
1 Byokiketuwaminapo kumutota Yehoba myaka yonsetu! Pakuba’mba tufikizhe kino kikonkwanyi, twafwainwa kwibikila bukiji-bukiji bikonkwanyi byakumupashi nekwibingila. Kino kitukwasha kwingijisha ngovu yetu bulongo. (1 Ko. 9:26) Ñanyi bikonkwanyi byomwakonsha kwibikila anweba bene?
2 Lufunjisho lwa Baibolo: Abya munengezha kupwila konse kwakipwilonyi? Umvwe munengezha, mwikalako nakimye kyakupesa-pesa nekulangulukapo pabyambo byomubena kutanga kimye kyomubena kunengezhanyi? Kyakumwenako, umvwe kemunengezhe Lufunjisho lwa Kyamba kya Usopa ne Lufunjisho lwa Buku Pakipwilo lwikalako mulungu nemulungu, nanchi mushilatu mikumbu yonkanyi, inyi mutanga nebinembelo byamweshiwa nekulangulukishapo pandumbulwilo yabyobyo byambo? Abya mwakonsha kwibikila kikonkwanyi kyakupesa-pesa pabishinka bimo mulungu nemulungu biji mumutanchi wakokozhewa wakutanga Baibolo mu Sukulu ya Mwingilo wa Teokalasi nyi? Kupesa-pesa mubintu byakumupashi kwauno mutundu kukebewa kimye nekwibikako, pano bino mufuma mfweto ikatampe yakumupashi.—Mana. 2:4, 5.
3 Kupwila Kwakipwilo: Kikonkwanyi kikwabo kekya kutanwanga moba onse kukupwila kwakipwilo konse kutanu. Kufikanga bukiji nakupwañena pamo nabapopweshi bakwetu nekwimbako lwimbo wakushinkwila nelulombelo kukosesha bingi mupashi wakipwilo. Kabiji twafwainwa kwibikangako kuba’mba tukumbulengapo pakupwila konse nekwibikako kuba’mba tukumbulenga mikumbu yaumvwanyika. Kimo kimye mwakonsha kulumbulula kinembelo kiji mupalagalafu byokyakwatankana nabyambo byomubena kwisambapo nangwa kulumbulula byobyo byambo byobyakonsha kwimukwasha mubwikalo bwenu bwajuba nejuba.—Hebe. 10:24, 25.
4 Mwingilo Wamubujimi: Twakonsha kuwamishako mwingilo wetu umvwe twibikila bikonkwanyi. Abya mwibikila kikonkwanyi kyamaawala omwakonsha kwingila mumwingilo wenu pañondo pañondonyi? Bamo kino kibakwasha bingi. Inyi mwakonsha kuwamishako mbaji imo yamwingilo wenu, nabiji byomwakonsha kwingijisha Baibolo mubusapwishi bwakunzubo nenzubo, kubwela kubaji nalusekelo lwakukeba kufunda bukine, kweseka nangovu kutatula lufunjisho lwa Baibolo, nangwa kwikala basendwe bakufunjisha mafunjisho?
5 Anweba bansemi, nanchi mubena kutundaika baana benu kwibikila bikonkwanyi mumwingilo wa Yehoba nyi? Abya bafwainwa kwikala basapwishinyi? Bakwashai bayuke kuba’mba kwikala painiya, nangwa kufunda Sukulu Yalufunjisho Lwamwingilo, nangwa kwikala mukisemi kya Betele jojishinda jawama jakumwesheshamo lusanchilo lwabo kwi Yehoba.—Sapwi. 12:1.
6 Byotubena kupesa-pesa mingilo yetu, kwibikila bikonkwanyi byakumupashi, nekwibingila, tukekala nalusekelo lukatampe mumwingilo wetu kabiji kiketulengela kutundaikako nebakwetu.—Loma 1:12.