Masongola​—ke Bulunda bwa Myaka

Bena Kilishitu baji mu masongola bekala bulongo baleta munema kwi Yehoba kabiji ne abo bene bekala na lusekelo. (Mak 10:9) Pa kuba’mba masongola ekale a myaka kabiji a lusekelo, bena Kilishitu bafwainwa kwingijisha mafunde a mu Baibolo pa kusala muntu wa kutwela nanji mu masongola.

Kyawama kutendeka kulanguluka pa bya kutwela mu masongola inge muntu “wapitaila pa jifumbi ja bwanyike,” kimye kilaka kya kwilaala po kibaya. Mambo kutwela mu masongola pa jifumbi ja bwanyike kwakonsha kwimulengela kubula kufuukulapo bulongo. (1Ko 7:36) Ingijishai kimye kyo muji bakatanda nangwa bazhike kukosesha bulunda bwenu ne Lesa ne kwikala na byubilo byawama bya bwina Kilishitu. Kuba bino kukemukwasha kwikala bulongo mu masongola enu.

Saka mukyangye kutwela mu masongola, ikalai na kimye kyabaya kya kuyuka “muchima” wa muntu ye mukeba kusongola nangwa kusongolwako. (1Pe 3:4) Umvwe kwaikala bintu bikatampe byakonsha kwimulengela kutendeka kuzhinauka, isambai na ye mukeba kutwela nanji mu masongola. Kupusanako na bulundatu, baji mu masongola bafwainwa kuta muchima pa byo bafwainwa kubila benakwabo, kechi pa byo afwainwa kwimubila ne. (Fp 2:3, 4) Inge mwalondela mafunde a mu Baibolo saka mukyangye kutwela mu masongola, mukaala kitendekesho kyawama kikemulengela kwikalanga na lusekelo mu masongola enu.

TAMBAI VIDYO WA KUBA’MBA KUNENGEZHA MASONGOLA​—LUBAJI 3: “KUBALA MALI AKATAIWAPO,” APA BINO MUKUMBULE ANO MEPUZHO:

• Bulunda bwa nyenga na mulongo Shane bwaendelenga byepi?

• Ñanyi bintu byayukile nyenga byo batwajijile kwikala balunda ne Shane?

• Bansemi banji bamukwashishe byepi, kabiji nyenga waji kufuukulapo byepi bulongo?