MUTWE WA KUFUNDA 49
Nanchi Yehoba Ukakumbula Milombelo Yami Nyi?
‘Anweba mukangita ne kwiya kwi amiwa ne kulomba kwi amiwa, kabiji amiwa nkemumvwa.’—YELE. 29:12.
LWIMBO 41 Mwane Umvwai Lulombelo Lwami
BIJI MU UNO MUTWEa
1-2. Mambo ka o twakonsha kulangulukila’mba Yehoba kechi ubena kukumbula milombelo yetu?
“SANGALELA mwi Yehoba, ne aye ukakupa bintu bikeba muchima wobe.” (Sala. 37:4) Kino ke kintu kyawama bingi kitulaya Yehoba kwitubila. Pano nanchi twafwainwa kuketekela Yehoba kwitupa bintu byonse byo twamulomba pa kyonkakyo kimye nyi? Mambo ka buno bwipuzho o bwanemena? Twayai twambe pa bino bintu byakonsha kumweka. Nyenga muzhike walomba’mba akaye ku Sukulu wa Basapwishi ba Bufumu. Pano bino wapembela myaka yavula kwakubula kumwita ku sukulu. Mulongo mwanyike walomba kwi Yehoba kuba’mba amukwashe kikola kipwe pa kuba’mba engilenga bulongo mingilo mu kipwilo. Pano bino kikola kyanji kechi kyapwa ne. Bansemi bena Kilishitu balomba kuba’mba mwanabo atwajijile kwikala mu bukine. Pano bino mwanabo wafuukulapo kuleka kwingijila Yehoba.
2 Kampe ne anweba mwamulombapo kala Yehoba kintu kimo, pano bino kechi wimupa akyo ne. Na mambo a kino, mwakonsha kulanguluka’mba Yehoba ukumbulatu milombelo ya bakwenu kechi yenu ne. Nangwa kampe mwakonsha kulanguluka’mba kuji kyatama kyo mwauba. Abino byo byalangulukilenga ne nyenga Janiceb. Aye ne mwatawanji balombelenga’mba bakaye na kwingijila pa Betele. Washiinwe kuba’mba kechi pakapita ne kimye kyabaya ne, bakebeta kuya na kwingijila pa Betele. Bano ba mulume ne mukazhi baubiletu pembelele bañondo, ko kyakayanga ke myaka kwakubula kwibeta ku Betele. Janice waambile’mba: “Naumvwine bingi bulanda kabiji kyanshinkishe bulaka. Nalangulukilenga’mba kika kyo nauba kyafichisha Yehoba ku muchima? Nalombelengapo bingi kuba’mba tukaye ku Betele. Pano mambo ka o abujijile kukumbula lulombelo lwami?”
3. Ñanyi bintu byo tusakwisambapo mu uno mutwe?
3 Kimye kimo twakonsha ke tuzhinauke inge Yehoba uteleka ku milombelo yetu. Ne banabalume ba kishinka bamo ba kala nabo bazhinaukanga. (Yoba 30:20; Sala. 22:2; Ha. 1:2) Ñanyi kintu kimo kyafwainwa kwimulengela kushiinwa’mba Yehoba ukakumbula milombelo yenu? (Sala. 65:2) Pa kuba’mba tukumbule buno bwipuzho, patanshi tusakukumbula ano mepuzho: (1) Ñanyi bintu byo twafwainwa kuketekela Yehoba kuba? (2) Ñanyi bintu Yehoba byo akeba atweba kuba? (3) Mambo ka o twafwainwa kupimpula ne kulombako bintu bikwabo?
ÑANYI BINTU BYO TWAFWAINWA KUKETEKELA YEHOBA KUBA?
4. Kwesakana na Yelemiya 29:12, Yehoba walaya’mba ukoba ka?
4 Yehoba witulaya’mba uteleka ku milombelo yetu. (Tangai Yelemiya 29:12.) Lesa wetu watemwa bingi bapopweshi banji ba kishinka. Onkao mambo, ukatelekanga ku milombelo yabo. (Sala. 10:17; 37:28) Nangwa byonkabyo, kino kechi kibena kulumbulula’mba aye uketupa bintu byonse byo tumulomba ne. Twafwainwa kupembelela ne kuketekela’mba bintu bimo byo tumulomba uketupabyo mu ntanda ipya.
5. Ñanyi kintu Yehoba kyo alangulukapo pa kukumbula milombelo yetu? Lumbululai.
5 Yehoba ulanguluka pa kyaswa muchima wanji pa kuba’mba akumbule milombelo yetu. (Isa. 55:8, 9) Ukeba’mba ino ntanda, mukekalenga bantu bonse bakamukookelanga. Bino Satana wamba’mba bantu bakonsha kwikala ba lusekelo inge kebebalame ku bantu bakwabo. (Nte. 3:1-5) Pa kuba’mba Yehoba amweshe’mba byamba Satana bya bubela, waswisha makafulumende a bantu kulama bantu bakwabo. Nangwa byonkabyo, bukalama bwa bantu bo bubena kulengela makatazho avula bingi abena kupitamo bantu lelo jino. (Sapwi. 8:9) Twayuka kuba’mba Yehoba kechi ukapwisha ano makatazho onse lonka luno ne. Mambo inge wauba bino, bantu babula kwitabila bakonsha kwamba’mba bukalama bwa bantu bo bubena kupwisha ano makatazho. Bakonsha ne kulanguluka’mba bantu bakonsha kulama bantu bakwabo bulongo.
6. Mambo ka o twafwainwa kuketekela’mba Yehoba witutemwa kabiji ukoba kyaoloka?
6 Yehoba wakonsha kukumbula milombelo yetu mu mashinda apusana pusana. Kimye Mfumu Hezekiya kyo alombele’mba Yehoba amubuke, wamukumbwile ne kumubuka. (2 Mfu. 20:1-6) Pano bino mutumwa Paulo byo alombele kwi Yehoba kuba’mba amufumye “mwiba mu mubiji,” ko kuba’mba kikola kyo ajinga nakyo, Yehoba kechi wapwishishe lukatazho lwanji ne. (2 Ko. 12:7-9) Akilangulukai pa byapichilemo ne batumwa abo ba Yakoba ne Petelo. Mfumu Heloda wakebelenga kwibepaya bonse babiji. Kipwilo kyalombejileko Petelo kabiji kyamweka Yakoba naye bamulombejileko. Nangwa byonkabyo, Yakoba bamwipayile pa kuba Yehoba wapokolweleko Petelo. (Byu. 12:1-11) Kampe twakonsha kulanguluka’mba, ‘Mambo ka Yehoba o abujijile kupokolola Yakoba bino wapokolwele Petelo?’ Baibolo kechi waambapo ne.c Bino twafwainwa kushiinwa’mba Yehoba kechi “uba byatama” ne. (Mpitu. 32:4) Kabiji twayuka kuba’mba Yehoba watemenwe bonse babiji, Petelo ne Yakoba. (Lum. 21:14) Kimye kimo Yehoba wakonsha kukumbula milombelo mo twabujilenga kulangulukila. Bino na mambo a kuba’mba twashiinwa’mba Yehoba kimye kyonse uba byawama kabiji byaoloka, kechi twijizhañanya na mo akumbwila milombelo yetu ne.—Yoba 33:13.
7. Ñanyi kintu kyo twafwainwa kubula kubanga, kabiji mambo ka?
7 Kechi twesakanya bintu bimo byo tupitamo na bipitamo bakwetu ne. Twakonsha kulomba kwi Yehoba kuba’mba etukwashe mu kintu kyo tubena kupitamo, bino Yehoba kechi wakonsha kwitukumbula monka mo twamulombela ne. Bino palutwe kacheche twayuka kuba’mba mukwetu walombele kyonka kyo twalombelepo ne atweba kabiji Yehoba wamupelekyo. Akino kyo kyapichilemo ne nyenga Anna. Walombele kuba’mba kikola kya kansa kyajinga na mwatawanji aye Matthew kipwe. Banyenga babiji bena Kilishitu bajileko ka bukulumpe pa ba mwatawanji nabo bakolelwe kikola kya kansa. Anna walombejileko bingi bamwatawanji abo ba Matthew ne bano banyenga babiji. Bano banyenga babiji bakulumpe bakosele, bino Matthew wafwile. Patanshitu, Anna walangulukilenga inge kya kuba Yehoba ye wakwashishe bano banyenga babiji kukosa. Kabiji inge Yehoba ye wibakwashishe, mambo ka o abujijile kukumbula milombelo yanji yo alombelenga kuba’mba bamwatawanji bakose? Kechi twayuka kyalengejile bano banyenga kukosa ne. Pano bino twayuka kuba’mba Yehoba ukapwisha makatazho onse o tubena kupitamo kabiji ukebesha kusangula balunda nanji bafwa.—Yoba 14:15.
8. (a) Kwesakana na Isaya 43:2, Yehoba witukwasha byepi? (b) Lulombelo lwakonsha kwitukwasha byepi inge tubena kupita mu makatazho? (Monai vidyo wa kuba’mba Lulombelo Lwitukwasha Kuchinchika Inge Tubena Kupita mu Makatazho.)
8 Yehoba ukatwajijila kwitukwasha. Yehoba Shetu witutemwa kechi ukeba’mba tumanamenga ne. (Isa. 63:9) Nangwa byonkabyo, kechi wituzhikijila ku makatazho onse o tupitamo aji nobe mikola nangwa lubebe ne. (Tangai Isaya 43:2.) Bino witulaya kuba’mba uketukwashanga byo ‘tukapitanga’ mu ano makatazho. Yehoba uketukwasha kutwajijila kukosesha bulunda bwetu ne aye nangwa kya kuba tubena kupita mu makatazho akatampe. Kabiji Yehoba witupa mupashi wanji wazhila witukwasha kuchinchika. (Luka 11:13; Fili. 4:13) Twaketekela kuba’mba ukatwajijila kwitupa bintu biketukwasha kuchinchika ne kutwajijila kwikala ba kishinka kwi aye.d
YEHOBA UKEBA’MBA TUBE KA?
9. Kwesakana na Yakoba 1:6, 7, mambo ka o twafwainwa kuketekela’mba Yehoba uketukwasha?
9 Yehoba ukeba atweba kumuketekela. (Hebe. 11:6) Kimye kimo meseko o tupitamo akonsha kwitushinkisha bulaka. Twakonsha ne kutendeka kuzhinauka inge Yehoba wakonsha kwitukwasha. Bino Baibolo witubuula’mba na bulume bwa Lesa twakonsha “kukanjila ku lubumbulu.” (Sala. 18:29) Twafwainwa kuketekela’mba inge twalomba Yehoba ukakumbula milombelo yetu. Kechi twafwainwa kuzhinaukanga ne.—Tangai Yakoba 1:6, 7.
10. Lumbululai bintu byo twafwainwa kuba inge twalomba.
10 Yehoba ukeba atweba kubapo bintu bimo pa byo twalomba. Mulongo wakonsha kulomba kwi Yehoba kuba’mba amukwashe kutambula luusa ku mukulumpe wanji wa nkito pa kuba’mba akatanwe ku kushonkena. Yehoba wakonsha kukumbula byepi? Wakonsha kukwasha uno mulongo kuchinchika pa kuba’mba esambe na mukulumpe wanji wa nkito. Bino uno mulongo wafwainwa kuya ku mukulumpe wanji wa nkito ne kumubuula. Kabiji wakonsha kuba bino bimye byavula. Kimo kimye wakonsha kwisamba na mukwabo kuba’mba bepimpule moba a kwingila. Nangwa wakonsha kutambula moba a kubula kwingila kwakubula kumufolesha mali.
11. Mambo ka o twafwainwa kutwajijila kulomba inge tuji na makatazho?
11 Yehoba ukeba atweba kutwajijila kulomba kwakubula kuleka. (1 Tesa. 5:17) Yesu walumbulwilenga’mba bintu bimo byo tulomba kechi bakonsha kwitupa ponkapotu ne. (Luka 11:9) Onkao mambo, kechi mwafwainwa kuleka kulomba ne! Lombainga kufuma panshi ya muchima kabiji kwakubula kuleka. (Luka 18:1-7) Inge twatwajijila kulomba kwi Yehoba, kino kimwesha’mba kintu kyo tubena kulomba kyanema bingi kabiji tumwesha kuba’mba twaketekela’mba uketukwasha.
MAMBO KA O TWAFWAINWA KUPIMPWILAKO BYO TUBENA KULOMBA?
12. (a) Ñanyi bintu byo twafwainwa kwishikisha atweba bene pa bintu byo twalomba, kabiji mambo ka? (b) Milombelo yetu yakonsha kumwesha byepi’mba twamunemeka Yehoba? (Monai kakitenguluzha ka kuba’mba “Nanchi Milombelo Yami Imwesha’mba Namunemeka Yehoba Nyi?”)
12 Umvwe twabula kutambula kintu kyo tubena kulomba, twafwainwa kwiipuzha mepuzho asatu. Bwipuzho butanshi ke bwa kuba’mba, ‘Nanchi kintu kyo mbena kulomba kijitu bulongo nyi?’ Javula tulanguluka’mba kintu kyo mbena kulomba kyo kyawama. Pano bino, bintu bimo byo tulomba kechi byakonsha kwitukwasha ne. Inge tubena kulomba pa lukatazho lumo, kwakonsha kwikala jishinda jikwabo jawama kupwishishamo lukatazho kukila jo tubena kulombelamo. Kabiji bintu bimo byo tulomba bipusana na kyaswa muchima wa Yehoba. (1 Yoa. 5:14) Akilangulukai pa bansemi bo twaambapo kala. Balombelenga kwi Yehoba kuba’mba akwashe mwanabo kutwajijila kumwingijila. Kino kyo balombelepo kyajingatu bulongo. Bino Yehoba kechi ukanjikizha bantu kumwingijila ne. Ukeba atweba bonse, kuvwangakotu ne baana kwifuukwilapo atweba bene kumwingijila. (Mpitu. 10:12, 13; 30:19, 20) Onkao mambo, bansemi bafwainwe kulomba kwi Yehoba kuba’mba ebakwashe kufika mwanabo pa muchima pa kumufunjisha ne kwifuukwilapo aye mwine kutemwa Yehoba ne kwikala mulunda nanji.—Maana 22:6; Efi. 6:4.
13. Kwesakana na Bahebelu 4:16, ñanyi kimye kiketukwasha Yehoba? Lumbululai.
13 Bwipuzho bwa bubiji ke buno, ‘Nanchi kino kyo kimye kya Yehoba kya kumpa byo mbena kulomba nyi?’ Kimo kimye twakonsha kulanguluka’mba tubena kukeba Yehoba kuba’mba etukumbule ponkapotu. Nangwa byonkabyo, Yehoba ye wayuka kimye kyawama kyo afwainwa kwitukwasha. (Tangai Bahebelu 4:16.) Umvwe twabula kutambwila ponkapotu kintu kyo twalomba, kechi twafwainwa kufikenatu kupwisha kuba’mba Yehoba wakana kukumbula ne. Kampe kimye kyanji kya kukumbwilamo kikyangye kukifika. Akilangulukai pa mulongo walombelenga’mba Yehoba amubuke kikola kyanji. Umvwe Yehoba wamubukile mu jishinda ja kukumya, Satana inge waambilenga’mba uno mulongo watwajijila kwingijila Yehoba mambo Yehoba wamubuka. (Yoba 1:9-11; 2:4) Yehoba aye mwine wayuka kimye kyo akapwisha bikola byonse. (Isa. 33:24; Lum. 21:3, 4) Kufikatu ne kyokya kimye, kechi twakonsha kuketekela Yehoba kwitubuka bikola byetu mu jishinda ja kukumya ne. Onkao mambo, mulongo wakonsha kulomba Yehoba kuba’mba amukoseshe ne kubula kwikala na bijikila pa kuba’mba achinchike na kikola kyanji ne kutwajijila kwingijila Lesa mu bukishinka.—Sala. 29:11.
14. Ñanyi bintu byo mufunjilako ku byapichilemo nyenga Janice?
14 Akilangulukai pa byapichilemo nyenga Janice ye twaambapo kala walombele kuba’mba ukeba kuya na kwingijila pa Betele. Papichile myaka itanu pa kuba’mba ayuke’mba Yehoba wakumbwile lulombelo lwanji. Waambile’mba: “Yehoba waingijishe kino kimye kumfunjisha bintu byavula ne kunkwasha kwikala mwina Kilishitu wafikilamo. Nafunjile kuketekela bingi mwi aye. Nafunjile mashinda awama a kufunjilamo Baibolo. Kabiji nafunjile kuba’mba nafwainwa kwikala na lusekelo pa kwingijila Yehoba. Palutwe kacheche, Janice ne ba mwatawanji batendekele kwingila mwingilo wa bukalama mu mwanzo. Ba Janice baambile’mba: “Yehoba wakumbwile milombelo yami nangwa kya kuba kechi wakumbwijile monka mo nalombejile ne. Papichile moba avula bingi pa kuba’mba ngyuke amba Yehoba wakumbwile bulongo lulombelo lwami. Namusanchila bingi pa kummwesha butemwe ne kifyele.
Umvwe mwamona’mba Yehoba kechi wimupa byo mwamulomba ne, lombaiko bintu bikwabo (Monai jifuka 15)f
15. Mambo ka o twafwainwa kubula kushinkamikangatu milombelo pa bintu bimo? (Monai ne bipikichala.)
15 Bwipuzho bwa busatu ke buno, ‘Nanchi nafwainwa kulomba bintu bikwabo nyi?’ Kijitu bulongo kushinkamika milombelo yetu. Nangwa byonkabyo, kimye kimo kyawama kubula kushinkamika milombelo yetu pa kuba’mba tuyuke bintu bikwabo Yehoba byo akeba kwitubila. Akilangulukai pa nyenga muzhike ye twaambapo kala walombelenga kuba’mba bamwite kuya Sukulu wa Basapwishi ba Bufumu. Ukebesha bingi kutanwa ku uno sukulu pa kuba’mba akaye na kwingijila kwakepa basapwishi. Onkao mambo, inge ubena kulomba kuba’mba bakamwite kuya ku sukulu, wafwainwa ne kulomba kwi Yehoba kuba’mba amukwashe kuyuka mashinda akwabo o afwainwa kwingijilamo pakatampe mu mwingilo wa Yehoba. (Byu. 16:9, 10) Inge walomba, wafwainwa kwisamba na kalama wa mwanzo umvwe kujipo kipwilo kiji pepi mwakepa bapainiya mo afwainwa kuya na kwingijila. Nangwa kunembela ku ofweshi wa musampi kuba’mba bamubuule ku mpunzha kwakepa basapwishi ba Bufumu ko akonsha kuya na kwingijila.e
16. Ñanyi kintu kyo twafwainwa kushiinwa?
16 Byonka byo twafunda, twashiinwa kuba’mba Yehoba witutemwa kabiji ukumbula milombelo yetu mu jishinda jaoloka. (Sala. 4:3; Isa. 30:18) Bimye bimo Yehoba kechi wakonsha kukumbula monka mo twalombejile ne. Nangwa byonkabyo, kechi ubula kukumbula milombelo yetu ne. Witutemwa bingi kabiji kechi uketusha ne. (Sala. 9:10) Onkao mambo, twayai tutwajijile ‘kuketekela mwi aye kimye kyonse,’ ne kumubuulanga mu lulombelo byonse byo tuji nabyo ku muchima.—Sala. 62:8.
LWIMBO 43 Lulombelo lwa Kusanta
a Uno mutwe walumbulula ene mambo o twafwainwa kushiinwa’mba Yehoba witutemwa kabiji ukumbula milombelo yetu mu jishinda jaoloka.
b Mazhina amo apimpulwa.
c Monai mutwe wa kuba’mba “Nanchi Mwaketekela’mba Yehoba Kimye Kyonse uba Byaoloka Nyi?” mu Kyamba kya Usopa kya February 2022, mafu. 3-6.
d Umvwe mukeba kuyukilapo bikwabo Yehoba byo etukwasha kuchinchika makatazho, monai vidyo wa kuba’mba Lulombelo Lwitukwasha Kuchinchika Makatazho uji pa jw.org.
e Umvwe mukeba kuyuka bya kuba pa kuya na kwingijila mu nyaunda ikwabo, monai buku wa Bakwatankana Kuba Kyaswa Muchima wa Yehoba kita. 10, mafu. 6-9.
f KULUMBULULA KIPIKICHALA: Banyenga babiji babena kulomba saka bakyangye kunemba pepala wa kwipwizhapo kuya ku Sukulu wa Basapwishi ba Bufumu. Palutwe kacheche, nyenga umo bamwita, mukwabo kechi bamwita ne. Nangwa byonkabyo, kechi walefwilwe ne. Walombele kwi Yehoba kuba’mba amukwashe kutaana mashinda akwabo a kwingijilamo pakatampe mu mwingilo wa Yehoba. Kepo anembele nkalata ku ofweshi wa musampi ya kuya na kwingijila kwakepa basapwishi ba Bufumu.