Yukai Amba Yehoba Usekela mwi Anweba

1. Bakalume ba Yehoba bamo ba kishinka bakonsha kulanguluka’mba ka?

KITUTEKENESHA bingi kuyuka’mba Yehoba watemwa bantu banji bonse. Baibolo waamba’mba: “Yehoba usekela mu bantu banji.” (Sala. 149:4) Nangwa byonkabyo, bamo pa bimye bimo balefulwa kabiji kino kibalengela kwiipuzha’mba, ‘Nanchi Yehoba usekela mwi amiwa nyi?’ Bapopweshi ba Yehoba ba kishinka bavula bajingako mu moba a kala nabo baumvwanga bino pa bimye bimo.​—1 Sam. 1:6-10; Yoba 29:2, 4; Sala. 51:11.

2. Bañanyi betabilwa kwi Yehoba?

² Baibolo umwesha patooka’mba bantu bambulwakulumbuluka bakonsha kwitabilwa kwi Yehoba. Mu ñanyi mashinda? Twafwainwa kwikala na lwitabilo mwi Yesu Kilishitu ne kubatizhiwa. (Yoa. 3:16) Kino kimwesha patooka’mba twalapila kabiji twalaya Lesa amba tukobanga kyaswa muchima wanji. (Byu. 2:38; 3:19) Yehoba utemwa bingi inge twalondela ano mashinda pa kuba’mba twikale balunda nanji. Inge twatwajijila kwingila na ngovu kwesakana na byo twamulayile, Yehoba witubila bibusa ne kwikala balunda nanji.​—Sala. 25:14.

3. Ñanyi bintu byo tusakwisambapo?

³ Pano mambo ka bamo pa bimye bimo o balangulukila’mba kechi bakonsha kwitabilwa kwi Lesa ne? Yehoba umwesha byepi’mba twaitabilwa kwi aye? Kabiji mwina Kilishitu wafwainwa kushiinwa byepi kuba’mba waitabilwa kwi Lesa?

ENE MAMBO BANTU BAMO PA BIMYE BIMO O BALANGULUKILA’MBA KECHI BAKONSHA KWITABILWA KWI YEHOBA NE

4-5. Inge ketulanguluke’mba kechi twanema ne, ñanyi kintu kyo twafwainwa kushiinwa?

⁴ Atweba bavula kufumatu ne ku bwanyike, tulanguluka’mba kechi twanema ne. (Sala. 88:15) Mulongo Adrián waambile’mba: “Kufumatu ne kala, nemona’mba kechi nanema ne. Byo najinga mwanyike, nalombanga’mba kisemi kyami kikekale mu Paladisa nangwa kya kuba nayukile’mba amiwa kechi nakonsha kwikalamo ne.” Mulongo Tony wabujile kukomena mu kisemi kya bena Kilishitu waambile’mba: “Bansemi bami kechi bambulangapo amba bantemwa nangwa kusekela mwi amiwa ne. Kino kyandengelanga kulanguluka’mba kafwako kintu kyo nakonsha kuba kyakonsha kwibatookesha ku muchima ne.”

⁵ Inge kya kuba pa bimye bimo ketulanguluke’mba kechi twanema ne, twafwainwa kuvulukanga’mba Yehoba ye witukookejile kwi aye. (Yoa. 6:44) Yehoba umona byawama mwi atweba byo twakonsha kubula kumona ne atweba bene. Kabiji wayuka biji mu muchima wetu. (1 Sam. 16:7; 2 Moba 6:30) Onkao mambo, inge twayuka’mba Yehoba witunemeka, tukamuketekela bingi.​—1 Yoa. 3:19, 20.

6. Mutumwa Paulo waumvwanga byepi pa bintu byatama byo aubile?

⁶ Saka tukyangye kufunda bukine, atweba bamo twaubilepo bintu byatama byakonsha kwitulengela kwizhachisha. (1 Pe. 4:3) Nangwatu bena Kilishitu baingijila Yehoba pa myaka yavula mu bukishinka, nabo balubankanya. Nanchi ne anweba mwizhachisha nyi? Inge ibyo, yukai’mba bantu ba Yehoba ba kishinka nabo byo byo bomvwa. Bino byo byo kyajinga ne kwi mutumwa Paulo. Waumvwanga kutama ku muchima byo alangulukanga pa bintu byo alubankanyanga. (Loma 7:24) Nangwa byonkabyo, Paulo walapijile ne kubatizhiwa. Pano bino waambile pe aye mwine amba ne “mucheche pa batumwa” bonse kabiji ndengamambo “wakilamo.”​—1 Ko. 15:9; 1 Timo. 1:15.

7. Ñanyi kintu kyo twafwainwa kuvulukanga pa mambo o twalengele kala?

⁷ Shetu wa mwiulu witulaya kuba’mba uketulekelako mambo inge twalapila. (Sala. 86:5) Onkao mambo, inge twalapila kya kine pa mambo o twalengele, twafwainwa kuketekela’mba Yehoba uketulekelako mambo.​—Kolo. 2:13.

8-9. Twakonsha kuba byepi pa kuba’mba tubulenga kulanguluka’mba kafwako kyo twakonsha kuba kyakonsha kutookesha Yehoba ku muchima ne?

⁸ Atweba bonse tukeba kwingijila Yehoba kwesakana na papelela bulume bwetu. Nangwa byonkabyo, bamo balanguluka’mba kafwako kyo twakonsha kuba kyakonsha kulengela Yehoba kusekela mwi atweba ne. Nyenga Amanda waambile’mba: “Javula ndanguluka’mba kwingijila Yehoba papelela bulume bwami kilumbulula kwingila mingilo yavula kimye kyonse. Nebikila kwingila mingilo yavula kukila pa yo nafwainwa kwingila. Inge nakankalwa kwiingila, ndanguluka’mba nafichisha Yehoba ku muchima byonkatu byo ñumvwa ne amiwa ku muchima.”

⁹ Twakonsha kuba byepi pa kuba’mba tubulenga kulanguluka’mba kafwako kyo twakonsha kuba kyakonsha kutookesha Yehoba ku muchima ne? Vulukainga kuba’mba Yehoba kechi witukebela kuba bintu byo twakonsha kukankalwa kuba ne. Yehoba usanta bingi inge ketumwingijile papelela bulume bwetu. Kabiji langulukainga pa bantu bo baambapo mu Baibolo baingijilanga Yehoba na muchima yense. Akilangulukai pe Paulo. Waingijile na mukoyo pa myaka yavula, waendelenga miseke ne kulenga bipwilo byavula. Pano bino, bintu byo byapimpwilwe mu bwikalo bwanji, kechi wasapwijilenga byonka byo asapwilanga kala ne. Nanchi kino kibena kulumbulula’mba Yehoba walekele kumubila bibusa nyi? Ine. Paulo watwajijile kwingila papelela bulume bwanji kabiji Yehoba wamupesheshe bingi. (Byu. 28:30, 31) Kyo kimotu, bintu byo twakonsha kuba mu mwingilo wa Yehoba byakonsha kupimpulwa. Pano bino kintu kyanema kwi aye ke kintu kine kitulengela kumwingijila. Pano twayai twisambe pa mashinda amo Yehoba mo amweshesha’mba usekela mwi atweba.

YEHOBA UMWESHA BYEPI’MBA USEKELA MWI ATWEBA?

10. Twakonsha kumvwa byepi Yehoba saka etwambila’mba usekela mwi atweba? (Yoano 16:27)

¹⁰ Witupa Baibolo. Yehoba umonapo mashinda a kumwesheshamo’mba watemwa bantu banji kabiji usekela mwi abo. Binembelo byaamba pa bimye bibiji Yehoba po aambijile Yesu kuba’mba wamutemwa kabiji amba usekela mwi aye. (Mat. 3:17; 17:5) Nanchi ne anweba mukeba Yehoba kwimwambila’mba usekela mwi anweba nyi? Yehoba kechi wamba ne atweba kufuma mwiulu ne, pakuba wamba ne atweba kwingijisha Baibolo. Twakonsha “kumvwa” jiwi ja Yehoba ja kuba’mba usekela mwi atweba inge ke tutange byambo bya kwa Yesu byanembwa mu mabuku ana a Mambo Awama. (Tangai Yoano 16:27.) Yesu wamwesheshetu suka suka byubilo bya Shanji. Onkao mambo, inge ke tutange kuba’mba Yesu wasekejile mu baana banji ba bwanga nangwa kya kuba bajinga bambulwakulumbuluka, twakonsha kufwanyikizha Yehoba saka abena kwamba bino byambo bya kwa Yesu kwi atweba.​—Yoa. 15:9, 15.

11. Mambo ka kupita mu bya malwa o kubujila kulumbulula’mba twaleka kwitabilwa kwi Yehoba? (Yakoba 1:12)

¹¹ Yehoba witukwasha kutaana bintu byo tukeba. Pa bimye bimo, Yehoba wakonsha kuswisha bya malwa kwitufikila byonka byo aubile kwi Yoba. (Yoba 1:8-11) Inge tubena kupita mu bya malwa, kino kechi kilumbulula’mba twaleka kwitabilwa kwi Lesa ne. Pakuba bitulengela kumwesha byo twatemwa Yehoba ne byo twamuketekela. (Tangai Yakoba 1:12.) Kabiji inge tubena kupita mu bya malwa, po po tukemwena Yehoba byo etutemwa ne byo abena kwitukwasha kuchinchika.

12. Ñanyi bintu byo twakonsha kufunjilako ku byapichilemo mulongo Dmitrii?

¹² Akilangulukai pa mulongo Dmitrii wikala mu Asia. Nkito yapwile kabiji papichile bañondo bavula bingi kwakubula kutaana nkito ikwabo. Onkao mambo, wafuukwilepo kwingilanga kimye kyabaya mu mwingilo. Kino kyamwesheshe’mba waketekejile mwi Yehoba. Papichile bañondo bakwabo bavula kwakubula kutaana nkito. Kepo akolelwe bingi kya kuba wakankelwenga kubuuka ne pa mwanya. Watendekele kulanguluka’mba ubena kukankalwa kukebela ba mu kisemi kyanji. Kabiji wazhinaukilenga inge Yehoba watwajijila kusekela mwi aye. Juba jimo mabanga, mwananji wamukazhi wanembele pa pepala byambo biji pa Isaya 30:15 bya kuba’mba: “Mukekala na bulume inge mwatekanya ne kunketekela.” Waletejile bino byambo bashanji ku mwanya ne kwibambila’mba, “Tata inge mwaumvwa kutama ku muchima, mwafwainwa kuvulukanga kino kinembelo.” Mulongo Dmitrii wayukile ne kusanchila Yehoba kuba’mba kisemi kyanji kyajinga na kajo kawaina, bya kuvwala ne nzubo mwa kwikala. Waambile’mba: “Kintu kyo nafwainwa kuba ke kutwajijila kutekanya ne kuketekela mwi Lesa.” Ne anweba inge kemupite mu makatazho a uno mutundu, mwafwainwa kuketekela’mba Yehoba wimuta bingi muchima kabiji ukemukwasha kuchinchika.

13. Bañanyi Yehoba bo akonsha kwingijisha pa kwitukwasha kuyuka’mba twaitabilwa kwi aye, kabiji mu ñanyi jishinda?

¹³ Yehoba witupa balongo ne banyenga. Yehoba wingijisha balongo ne banyenga pa kwitumwesha’mba twaitabilwa kwi aye. Wakonsha kwingijisha bakwetu kwamba byambo bya kwitutekenesha pa kimye kyafwainwa. Kino kyo kyamwekejile ne nyenga umo wikala mu Asia kimye kyo apichilenga mu makatazho. Nkito yapwile kabiji wakolelwe bingi. Bamwatawanji balengele mambo akatampe kabiji kino kyalengejile kwibafumya pa bukulumpe mu kipwilo. Waambile’mba: “Kechi nayuka kyalengejilenga bino byonse kummwekela ne. Natendekele kulanguluka’mba kampe kuji kintu kyatama kyo naubile kabiji Yehoba waleka kungubila bibusa.” Uno nyenga wasashijile Yehoba kuba’mba amukwashe kuyuka’mba wakitabilwa kwi aye. Waubile byepi bino? Waambile’mba: “Bakulumpe mu kipwilo besambile ne amiwa ne kumbuula’mba Yehoba wakintemwa.” Palutwe kacheche, walombele jikwabo bukwasho kwi Yehoba. Waambile’mba: “Pa jonkaja juba natambwijile nkalata yafumine ku balongo ne banyenga mu kipwilo. Byo natangile ino nkalata mwajinga byambo bya lutekenesho, naumvwine kuba’mba Yehoba wakumbwile byo nalombele.” Byambo byawama bitwambila bakwetu, bitulengela kushiinwa’mba twaitabilwa kwi Yehoba.​—Sala. 10:17.

14. Ñanyi jishinda jikwabo Yehoba jo amwesheshamo’mba twaitabilwa kwi aye?

¹⁴ Yehoba witumwesha’mba twaitabilwa kwi aye inge waingijisha bena Kilishitu bakwetu kwitufundako inge ke kikebewe. Mu myaka kitota kitanshi, Yehoba waingijishe mutumwa Paulo kunembela bena Kilishitu bakwabo makalata 14. Mu ano makalata, wibafunjileko kwakubula kupita mu mbaji kabiji mu butemwe. Mambo ka Yehoba o atangijile Paulo kunemba bino bintu byo ebafunjileko? Yehoba ke Shetu wawama bingi kabiji ololako baana banji bo “atemwa.” (Maana 3:11, 12) Onkao mambo, inge betufundako kwingijisha Baibolo, kino kimwesha’mba twaitabilwa kwi Lesa, kechi amba witushikwa ne. (Hebe. 12:6) Ñanyi bintu bikwabo bimwesha’mba twaitabilwa kwi Yehoba?

BINTU BIKWABO BIMWESHA’MBA TWAITABILWA KWI YEHOBA

15. Bañanyi Yehoba bo apa mupashi wanji wazhila, kabiji mambo ka kino o kitutundaikila?

¹⁵ Yehoba upana mupashi wanji wazhila ku boba baitabilwa kwi aye. (Mat. 12:18) Twakonsha kwiipuzha’mba, ‘Nanchi mmweshapo bipangwa bimo bya mupashi wa Lesa mu bwikalo bwami nyi?’ Nanchi mwamona’mba pa kino kimye mutekenya bakwenu bingi kukila byo mwaubanga kala saka mukyangye kuyuka Yehoba nyi? Inge mwatwajijila kwibikako kwikala na bipangwa bya mupashi wa Lesa, kino kikemulengela kushiinwa’mba mwaitabilwa kwi Yehoba.​—Monai kakitenguluzha ka kuba’mba “Bipangwa bya Mupashi ke. . . .”

16. Bañanyi Yehoba bo engijisha kusapwila mambo awama, kabiji kino kimulengela kumvwa byepi? (1 Tesalonika 2:4)

¹⁶ Yehoba wapa mwingilo wa kusapwila mambo awama boba baitabilwa kwi aye. (Tangai 1 Tesalonika 2:4.) Akimonai byamwenejilemo nyenga Jocelyn mu kusapwila bakwabo mambo awama. Juba jimo, Jocelyn wabuukile na binyenge. Waambile’mba: “Kechi najinga na bulume bwa kwingila ne. Pano bino, nafwainwe kuya mu mwingilo mambo najinga painiya. Onkao mambo, nalombele kwi Yehoba kabiji nayile mu mwingilo.” Pa jonkaja juba lukelo, Jocelyn wasapwijile Mary kabiji waswile kutendeka kumufunjisha Baibolo. Byo papichile bañondo, Mary waambile’mba walombelenga kwi Lesa kuba’mba amukwashe kimye nyenga Jocelyn kyo afikile pa nzubo panji ne kukonkonsha. Nyenga Jocelyn byo aambilenga pa kino kyamwekele, waambile’mba: “Naumvwinetu nobe Yehoba ubena kuñambila’mba, ‘Mwena lusekelo mwi obewa.’” Nangwa byonkabyo, kechi bantu bonse baswa kwibasapwila ne. Pano bino, twafwainwa kushiinwa’mba Yehoba umvwa bingi bulongo byo twibikako kusapwila bantu mambo awama.

17. Ñanyi bintu byo tufunjilako ku byambo byaambile Vicky pa bukuzhi? (Salamo 5:12)

¹⁷ Aba baitabilwa kwi Yehoba bamwenamo bingi mu bukuzhi. (1 Timo. 2:5, 6) Pano kyakonsha kwikala byepi inge ke tuzhinauke’mba twaitabilwa kwi Yehoba nangwa kya kuba twaitabila mu bukuzhi ne kubatizhiwa? Vulukainga kuba’mba kechi twafwainwa kwiketekela atweba bene ne, twafwainwa kuketekela mwi Yehoba. Aba bonse baketekela mu bukuzhi wibamona’mba baoloka kabiji walaya’mba ukebapesha. (Tangai Salamo 5:12; Loma 3:26) Kulanguluka languluka pa bukuzhi kwakwashishe bingi nyenga Vicky. Juba jimo byo alangulukile langulukilenga pa bukuzhi, waambile’mba: “Yehoba wantekenyejile pa kimye kyabaya bingi. . . . Pano bino mu muchima, namwambijilenga Yehoba amba: ‘Anweba Yehoba kechi mwakonsha kutemwa muntu uji nobe amiwa ne. Kabiji bukuzhi bwa mwanenu kechi bwakonsha kufuuta mambo ami ne.’” Kulangulukishapo pa bupe bwa bukuzhi kwamulengejile kutendeka kutemwa Yehoba. Ne atweba tukayuka’mba Yehoba witutemwa ne kwitabilwa kwi aye inge ketulanguluke pa bukuzhi.

18. Ñanyi kintu kikoba Shetu wa mwiulu inge twatwajijila kumutemwa?

¹⁸ Nangwa kya kuba twakonsha kwibikako kulondela byo twafunda mu uno mutwe, pa bimye bimo twakonsha kulefulwa ne kulanguluka’mba kechi twaitabilwa kwi Yehoba ne. Inge ke mulanguluke bino, vulukainga kuba’mba Yehoba ubila bibusa boba “batwajijila kumutemwa.” (Yako. 1:12) Onkao mambo, twajijilai kufwenya kwipi ne Yehoba ne kuyuka’mba mwaitabilwa kwi aye. Vulukainga kimye kyonse kuba’mba Yehoba “kechi uji kwalepa ne atweba bonse ne.”​—Byu. 17:27.