Sɔlɔmɔn in Siŋ
8 “If nɔmɔ yu bin tan lɛk mi brɔda,
We sɔk mi mama in bɔbi!
We a si yu na pɔblik, a go kis yu
Ɛn nɔbɔdi nɔ go kɔndɛm mi.
2 A go kɛr yu go;
A go briŋ yu kam insay mi mama in os,
Di wan we tich mi.
A go gi yu wayn we gɛt spays fɔ drink,
A go gi yu frɛsh pomegranet jus.
3 In lɛftan go de ɔnda mi ed,
Ɛn in raytan go de rawnd mi.
4 E di uman dɛn na Jerusɛlɛm, una swɛ to mi se:
Una nɔ go tray fɔ wek lɔv insay mi te i wek fɔ insɛf.”
5 “Udat dande we de kam na di wildanɛs* so,
We ling pan di wan we i lɛk?”
“Na ɔnda di apul tik a wek yu.
Na de yu mama in bɛlɛ at fɔ bɔn yu.
Na de di wan we bɔn yu in bɛlɛ at.
6 Put mi na yu at lɛk riŋ we dɛn kin yuz fɔ stamp,
Put mi na yu an lɛk riŋ we dɛn kin yuz fɔ stamp,
Bikɔs lɔv strɔng lɛk day,
Ɛn tru lɔv strɔng lɛk di Grev.*
Dis kayn lɔv tan lɛk faya we de blez, faya we kɔmɔt frɔm Ja.*
7 Bɔku bɔku wata nɔ ebul fɔ ɔt lɔv,
Ɛn riva dɛn nɔ ebul fɔ kɛr am go.
If pɔsin gi ɔl di jɛntri na in os fɔ lɔv,
Dɛn nɔ go tek di jɛntri* mek natin.”
8 “Wi gɛt wan smɔl sista,
We nɔ gɛt bɔbi.
Wetin wi go du fɔ wi sista
Di de we dɛn de kam aks fɔ mared am?”
9 “If na wɔl,
Wi go bil lo silva wɔl pantap am,
If in na domɔt, wi go batin am wit sida tik.”
10 “Mi na wɔl,
Ɛn mi bɔbi dɛn tan lɛk tawa dɛn.
So i de si mi
As pɔsin we gɛt pis.
11 Sɔlɔmɔn gɛt wan vayn gadin na Beal-emɔn.
I gi am to sɔm pipul dɛn fɔ tek kia ɔf am.
Dɛn ɔl bin de kam wit wan wan tawzin silva mɔni fɔ di frut dɛn.
12 A gɛt mi yon vayn gadin ɛn na mi nɔmɔ gɛt am.
E Sɔlɔmɔn, na yu gɛt di wan tawzin silva mɔni,
Ɛn di tu ɔndrɛd na fɔ di wan dɛn we de tek kia ɔf di frut dɛn.”
13 “Yu we de na di gadin dɛn,
Mi* kɔmpin dɛn de wet fɔ yɛri yu vɔys.
Lɛ a yɛri am.”
14 “Di wan we a lɛk, kam kwik,
Ɛn rɔn lɛk gezɛl*
Ɔ lɛk yɔŋ man dia
Pantap di mawntin dɛn we spays dɛn de.”