Zɛkaraya
11 “E Libanɔn, opin yu domɔt dɛn,
So dat faya go bɔn yu sida stik dɛn.
2 Lɛ di junipa stik dɛn kray lawd wan bikɔs di sida stik dɛn dɔn fɔdɔm;
Di big big stik dɛn dɔn pwɛl!
Lɛ di ok stik dɛn na Beshan kray lawd wan,
Bikɔs di tik tik fɔrɛst nɔ de igen!
3 Lisin! Di shɛpad dɛn de kray lawd wan,
Bikɔs di tin we de gi dɛn glori nɔ de igen.
Lisin! Di yɔŋ layɔn dɛn de ala lawd wan,
Bikɔs pipul dɛn dɔn dɔnawe wit di tik tik bush dɛn we de nia di Jɔdan.
4 “Na dis Jiova we na mi Gɔd se: ‘Tek kia ɔf di ship dɛn we dɛn fɔ kil, 5 we di wan dɛn we de bay dɛn de kil dɛn ɛn dɛn nɔ gɛt fɔ ansa to ɛnibɔdi. Ɛn di wan dɛn we de sɛl dɛn de tɔk se: “Lɛ Jiova gɛt di prez, bikɔs a go jɛntri.” Ɛn dɛn shɛpad dɛn nɔ de sɔri fɔ dɛn.’
6 “Jiova se: ‘A nɔ go sɔri igen fɔ di pipul dɛn we de na di land, so a go mek ɔlman in neba sɔprɛs am, ɛn in kiŋ sɛf go sɔprɛs am; ɛn dɛn go pwɛl di land, ɛn a nɔ go sev dɛn na dɛn an.’”
7 So a bigin fɔ kia fɔ di ship dɛn we dɛn fɔ kil. E di ship dɛn we de sɔfa, a de du dis fɔ una yon bɛnifit. So a tek tu staf dɛn, a kɔl di wan Gudnɛs, ɛn a kɔl di ɔda wan Wanwɔd, ɛn a bigin fɔ kia fɔ di ship dɛn. 8 Ɛn insay wan mɔnt, a pul tri shɛpad dɛn pan dɛn wok, bikɔs a* nɔ bin gɛt peshɛnt wit dɛn igen, ɛn dɛnsɛf* nɔ bin lɛk mi biznɛs atɔl. 9 Ɛn a tɔk se: “A nɔ go kɔntinyu fɔ kia fɔ una igen. Lɛ di wan we de day, day ɛn lɛ di wan we nɔ go de igen nɔ de igen. As fɔ di wan dɛn we lɛf, lɛ dɛn it dɛn kɔmpin dɛn.” 10 So a tek mi staf we nem Gudnɛs ɛn kɔt am, a pwɛl di agrimɛnt we a bin dɔn mek wit ɔl di pipul dɛn. 11 So di agrimɛnt pwɛl da de de, ɛn di ship dɛn we de sɔfa we bin de wach mi no se na Jiova in mɛsej.
12 Dɔn i tɛl dɛn se: “If i ɔrayt wit una, una gi mi mi pe; bɔt if i nɔ ɔrayt wit una, una ol am.” Ɛn dɛn pe mi 30 silva mɔni.
13 Na de Jiova tɛl mi se: “Trowe am na di say we dɛn de kip valyu tin dɛn—na di wɔndaful we dis we dɛn sho se dɛn valyu mi.” So a tek di 30 silva mɔni ɛn trowe am usay dɛn de kip valyu tin dɛn na Jiova in os.
14 Dɔn a kɔt mi sɛkɔn staf we nem Wanwɔd, a pwɛl di brɔda biznɛs we de bitwin Juda ɛn Izrɛl.
15 Ɛn Jiova tɛl mi se: “Tek di tin we shɛpad we nɔ gɛt wan yus de yuz. 16 A go alaw wan shɛpad fɔ de oba di land. I nɔ go kia fɔ di ship dɛn we nɔ go de igen; i nɔ go fɛn di yɔŋ wan dɛn ɔ mɛn di wan dɛn we wund ɔ fid di wan dɛn we ebul fɔ tinap. Bifo dat, i go it di fat wan dɛn bif ɛn pul di ship dɛn sus* dɛn.
17 I go bad fɔ mi shɛpad we nɔ gɛt wan valyu, we de lɛf mi ship dɛn!
Sɔd go wund in an ɛn bɔs in rayt yay.
In an go day,
Ɛn i nɔ go si natin wit in rayt yay.”