Zɛkaraya

12 Wan impɔtant mɛsej:

2 “A go mek Jerusɛlɛm bi kɔp* we de mek di pipul dɛn we de rawnd am staga; ɛn ɛnimi dɛn go sɔrawnd Juda ɛn Jerusɛlɛm. 3 Da de de, a go mek Jerusɛlɛm bi ɛvi ston fɔ ɔl di pipul dɛn. Ɔl di wan dɛn we es am go mɔs damej bad; ɛn ɔl di neshɔn dɛn na di wɔl go gɛda agens am.” 4 Jiova se: “Da de de, a go mek ɔl di ɔs dɛn fred ɛn di wan dɛn we de rayd dɛn go kres. Mi yay go de pan di pipul dɛn na Juda, bɔt a go mek ɔl di ɔs dɛn we di pipul dɛn gɛt blayn. 5 Ɛn di chif dɛn na Juda go tɔk na dɛn at se: ‘Di pipul dɛn na Jerusɛlɛm na dɛn de gi wi trɛnk bikɔs ɔf dɛn Gɔd we na Jiova we gɛt bɔku bɔku sojaman dɛn.’ 6 Da de de, a go mek di chif dɛn na Juda tan lɛk pɔt we gɛt faya midul wud dɛn ɛn lɛk stik we gɛt faya midul wit* we dɛn dɔn kɔt we de bay ro. Ɛn dɛn go bɔn ɔl di pipul dɛn we de rawnd dɛn na dɛn rayt ɛn na dɛn lɛft; ɛn di pipul dɛn na Jerusɛlɛm go kɔntinyu fɔ liv na dɛn ples,* na Jerusɛlɛm.

7 “Ɛn Jiova go sev di tɛnt dɛn na Juda fɔs, so dat Devid in pipul dɛn ɛn di pipul dɛn na Jerusɛlɛm nɔ go gɛt mɔ ɔnɔ pas di pipul dɛn na Juda. 8 Da de de, Jiova go protɛkt di pipul dɛn na Jerusɛlɛm; da de de, di wan we want fɔ fɔdɔm* go tan lɛk Devid, ɛn Devid in pipul dɛn go tan lɛk Gɔd, dɛn go tan lɛk Jiova in enjɛl we de go bifo dɛn. 9 Da de de, a go mɔs dɔnawe wit ɔl di neshɔn dɛn we kam fɔ atak Jerusɛlɛm.

10 “A go put mi spirit pan Devid in pipul dɛn ɛn pan di pipul dɛn na Jerusɛlɛm fɔ sho se a gladi fɔ dɛn ɛn dɛn go rili beg mi we dɛn de pre to mi, ɛn dɛn go luk to di wan we dɛn chuk, dɛn go kray lawd wan pan am lɛk we dɛn de kray pan wangren bɔypikin; ɛn dɛn at go pwɛl bad bad wan bikɔs ɔf am lɛk we pipul dɛn at kin pwɛl fɔ dɛn fɔs bɔypikin. 11 Da de de, dɛn go kray lawd lawd wan na Jerusɛlɛm, lɛk aw dɛn de kray na Edadrimɔn we de na di Flat Land na Mɛgido. 12 Ɔl di pipul dɛn na di land go kray lawd wan, ɔl di famili dɛn go kray na dɛn yon grup; Devid in famili go kray na dɛn yon grup, ɛn dɛn uman dɛnsɛf go kray na dɛn yon grup; Netan in famili go kray na dɛn yon grup, ɛn dɛn uman dɛnsɛf go kray na dɛn yon grup; 13 Livay in famili go kray na dɛn yon grup, ɛn dɛn uman dɛnsɛf go kray na dɛn yon grup; Shimiay in famili go kray na dɛn yon grup, ɛn dɛn uman dɛnsɛf go kray na dɛn yon grup; 14 ɛn ɔl di famili dɛn we lɛf go kray, ɔl di famili dɛn go kray na dɛn yon grup, ɛn dɛn uman dɛnsɛf go kray na dɛn yon grup.